VOAL

VOAL

Copyright © 2022

VOAL

DEKLARATË E DEGËS SË LDK-së NË ZVICËR

June 10, 2015

“Lidhja Demokratike e Kosovës ka qenë shkatërruese e Lidhjes së Komuniste të Jugosllavisë, kurse akad. Isa Mustafa me klanin e tij po i hakmerret LDK-së pse ia ka shkatërruar atij LKJ-në”.

 

VOAL – Kryesia e Degës së LDK-së në Zvicër në mbledhjen e saj të jashtëzakonshme, në pjesëmarrje  të shumicës absolute të anëtarëve të kryesisë, mbajtur në  Solothurn më 06.06.2015, i shqyrtoi rrjedhat politike në Lidhjen Demokratike të Kosovës, veçmas ato gjatë dhe pas Kuvendit të VIII-të zgjedhor, me theks të veçantë raportet e Kryesisë Qendrore në Prishtinë me Degët e LDK-së në Zvicër dhe Gjermani, e cila si sjellje është jodemokratike, (autokrate) dhe e papranueshme.

Kryesia e Degës së LDK-së në Zvicër e konsideron të papranueshëm vendimin e Kryesisë Qendrore në Prishtinë për anulimin e Kuvendit të VIII-të zgjedhor të Degës së LDK-së në Zvicër, i cili u mbajt konform statutit dhe rregullores mbi zgjedhjet si dhe në përputhshmëri me të gjitha normat demokratike, duke u zgjedhur të gjitha organet legjitime me votën e fsheht dhe me kundërkandidatë – ashtu siç i parasheh rregullorja për zgjedhje dhe statuti i LDK-së.

Për kryesinë e Degës së LDK-së në Zvicër është e papranueshme mënyra e komunikimit përmes mjeteve të informimit publik që ka përdorur Kryesia Qendrore e LDK-së në Prishtinë, e cila, jo vetëm që nuk përkon me kulturën demokratike, por bie ndesh me të gjitha parimet dhe procedurat statutare që i ka vet LDK-ja.

Kryesia e Degës së LDK-së në Zvicër e sheh si të papranueshme edhe mënyrën e komunikimit të Kryesisë Qendrore me individët që i kanë humbur zgjedhjet në Zvicër, si dhe injorimin në komunikim që ia ka bërë kryesisë legjitime të dalur nga kuvendi i VIII-të zgjedhor. Po ashtu, Kryesia e Degës së LDK-së në Zvicër ndjehet shumë e indinjuar pse Kryesia Qendrore e LDK-së në Prishtinë nuk ka qenë e gatshme të pres e takoj Kryetarin e Degës së LDK-së në Zvicër  i cili ishte për vizitë zyrtare në Kosovë.  Edhe pse zyrtarisht iu ka bërë kërkesa për një takim zyrtar, qoftë krytarit të LDK-së z. Isa Mustafa dhe sekretarit të LDK-së z. Ismet Beqiri, ata nuk e kanë pranuar fare në takim. Në këto përpjekje, kryetari i Degës së LDK-së në Zvicër, zotëri Shefqet Dibrani, me datën 26 maj 2015, e ka protokoluar në mënyrë zyrtare kërkesën edhe në sekretariatin e LDK-së, përkatësisht tek personi i autorizuar në sekretariat – z. Selver Doda, i cili, përkundër premtimve, nuk ka qenë në gjendje ta informojë kryetarin e Degës së LDK-së për arsyet pse Kryetari apo dikush nga Kryesia e LDK-së në Prishtinë nuk kanë shprehur gatishmeri për t’u takuar dhe për të komunikuar. (Këtë sjellje Kryesia e LDK-së e kanë treguar edhe ndaj Donika Gërvallës dhe delegatëve nga Dega e LDK-së në Gjermani).

Kryesia e Degës së LDK-së është indinjuar nga vendimi i Kryesisë Qendrore në Prishtinë i datës 26 maj 2015, i cili u publikua në mjetet e informimit publik, duke mos ia dërguar zyrtarisht këtë vendim kryesisë së Degës, e cila, për këtë vendim, u informua vetëm nga mjetet e informimit. Kryesia e Degës së LDK-së në Zvicër këtë vendim arbitrar e konsideron të papranueshëm, jodemokratik dhe antistatutar, sepse vendimet e tilla për ripërsëritjen e zgjedhjeve duheshin të mirreshin në një kohë ku asnjë Degë e LDK-së nuk do të duhej të përjashtohej nga e drejta demokratike për të zgjedhë dhe për t’u zgjedhur.

Kryesia e LDK-së në Prishtinë ka qenë hollësisht e informuar për procesin dhe fushatën zgjedhore e cila ka shkuar në përputhje të plotë me rregulloret për zgjedhje. Procesin e zgjedhjeve e kanë përcjellur dhe udhëhequr vet tashmë ish kryetari z. Haki Latifi dhe ish nënkrytari i Degës së LDK-së në Zvicër z. Arif Baftiu, të cilët vazhdimisht kanë raportuar vetëm për rregullësi të këtij procesi zgjedhor.

Po ashtu Kuvendi i VIII-të zgjedhor i Degës së LDK-së në Zvicër është udhëhequr nga ish kryetari i Degës së LDK-së në Zvicër z. Haki Latifi, i cili ishte kandidat për kryetar dhe ish nënkryetari z. Arif Baftiu, të cilët, në një garë demokratike dhe me votën e fsheht, e kanë humbur garën karshi kundërkandidatit Shefqet Dibranit, i cili fitoi në mënyrë të rregullt, sepse votimi ishte i fshehtë dhe ka qenë transparent, madje çdo gjë është bërë përpara syve të delegatëve, kurse punimet e kuvendit janë përcjellur edhe me kamerë.

Zgjedhjen e kryetarit e kanë uruar edhe Haki Latifi dhe Arif Baftiu të cilët fillimisht e kanë pranuar procesin të rregullt dhe transparent. Madje Haki Latifi ka pranuar dhe është zgjedhur edhe nënkryetar i Degës së LDK-së, si dhe, njëherit, ka qenë i zgjedhur edhe si delegat për kuvendin e VIII-të zgjedhor në Prishtinë.

Duke i pasur parasysh tërë procesin dhe këto zhvillime të drejta e demokratike në Degën e LDK-së në Zvicër, duke e pasur parasysh deklaratat e Haki Latifit në dy mbledhjet e para të kryesisë, (në të parën kur pranon postin e nënkryetarit dhe në të dytën edhe kryetar i komisionit për bashkëpunim me CVP), shkuarja e tij në Prishtinë është parë me sy kritik, e sidomos qëndrimi i tij jodemokratik, jokolegial dhe minues për të mbajtur Kuvend të ri. Këto sjellje të zotëriut Latifi, jo që janë të papranueshme, por  konsiderohen thellësisht manipuluese e të dëmshëm dhe me qëllime të porositura.

Andaj, kryesia e Degës së LDK-së në Zvicër apelon tek veprimtarët e saj dhe tek antarësia e gjerë që të mos bien pre e manipulimeve të individëve të cilët në proces dhe në mënyrë demokratike i kanë humbur zgjedhjet, kurse tani janë në shërbim të koncepteve  antidemokratike dhe diktatoriale.

Kryesia e Degës së LDK-së në Zvicër, jo vetëm që është e indinjuar me sjelljen e kryesisë Qendrore në Prishtinë, por edhe është thellësisht e zhgënjyer me faktin që Kryesia e LDK-së në Prishtinë nuk i ka pranuar as si mysafir delegatët nga Zvicra dhe Gjermania, por ka shkuar aq larg sa ka futur kuisling në kuvend.

Po ashtu për Kryesinë e Degës së LDK-së në Zvicër janë të papranueshme të gjitha rezultatet e zgjedhjeve që janë mbajtur me deklarim të hapur nëpër Degët e LDK-së si dhe ato në Kuvendin e VIII-të zgjedhor ku është rizgjedhur (rikatapultuar)  zotëri Isa Mustafa në postin e kryetarit të LDK-së.

Për Degën e LDK-së në Zvicër është e papranueshme përjashtimi që Kryesia Qendrore e LDK-së në Prishtinë ua ka bërë Degëve të LDK-së në Zvicër dhe Gjermani si dhe asaj në Skënderaj të Drenicës. Pastaj për përjashtimin e mediave dhe mjeteve të informimit publik si dhe proteston ashpër për injorimin dhe mosftesën që ua ka bërë trupi diplomatik në Kosovë, veçmas ambasadave Amerikane, Gjermane, Angleze dhe asaj Zvicerane.

Kryesia proteston ashpër sidomos për përjashtimin nga punimet e Kuvendit të VIII-të që ia kanë bërë delegatëve, zonjës Donika Gërvalla, e bia e Heroit të Kosovës Jusuf Gërvalla, z. Behxhet Krasniqi, vëllai i ministrit të mbrojtjes kol. Ahmet Krasniqi, z. Blerim Hajdaraj, i biri i komandantit të Dukagjinit Smajl Hajdaraj, z. Emrush Çekaj familjar i Heroit të Kosovës Salih Çekaj si dhe z. Shefqet Dibrani, babai i të cilit është vrarë në Luftën e Kosovës.

Shikuar në përgjithësi Isa Mustafa dhe klani i tj kanë pasur një luftë të ashpër jo vetëm me dy Degët ma të fuqishme të LDK-së në Europën Perëndimore, por e goditën dhe plagosën rëndë   Drenicën, duke u hamerrur ligsisht  kundër familjarëve të dëshmorëve dhe heronjëve të Kosovës. Andaj kryesia e Degës së LDK-së në Zvicër shtron pyetjen për zyrtarët e LDK-së dhe delegatët e Kuvendit të VIII-të zgjedhor: kur votuat kundër pjesmarrjes së Diasporës dhe Drenicës në Kuvendin e VIII-të, a keni votuar edhe kundër baballarëve dhe familjarëve të tyre, apo Heronjtë e përmendur juve ju duhen vetëm për fushata zgjedhore sa për t’u fotografuar para varreve të tyre?! Ju që votuat kundër Diasporës dhe Drenicës a keni votuar edhe kundër luftës,  qëndresës dhe sakrificës që ka bërë Drenica dhe kundër ardhmërisë demokratike të Kosovës?

Prandaj, Kryesia e Degës së LDK-së në Zvicër, mbështetur në parimet dhe të drejtën e reciprocitetit, ka  vendosur që të mos e njoh Isa Mustafën Kryetar të LDK-së dhe as vendimet me aklamacion të marra në Kuvendin e VIII-të, pasi ai Kuvend nuk ka qenë demokratik, kurse Isa Mustafa nuk është zgjedhur me votën e fsheht dhe me kundërkandidat – ashtu siç e përcakton rregullorja dhe statuti i LDK-së.

Dega e LDK-së në Zvicër do të jetë kurdoherë mbështetëse aktive e reformave demokratike që do të ndodhin në LDK dhe në Kosovë, por jo mbështetëse e klaneve të interesit dhe diktaturave komuniste. Dega e LDK-së në Zvicër apelon edhe tek faktori ndërkombëtar që të ushtroj trysni tek kryesia qendrore e LDK-së në Prishtinë, për të mos lejuar instalimin e formave të diktaturës dhe diktatit në LDK dhe në Kosovë.

Dega e LDK-së në Zvicër me të gjitha strukturat e saj organizative dhe udhëheqëse do ta vazhdojë punën e saj si kërkesë e antarësisë dhe bashkatdhetarëve duke u bazuar në rezultatet dhe vendimet e Kuvendit të VIII-të Degës, mbajtur më 10.05.2015, dhe do të jetë kurdoherë mbështetëse e reformave demokratike që do të ndodhin në LDK dhe përgjithësisht në Kosovë!

 

Zvicër, 07.06.2015.

  • twitter
  • facebook
  • linkedin
Fjalë kyçe:

Komentet

Lajme të ngjashëm

Gërvalla në prag të zgjedhjeve në SHBA: Nuk shoh sinjale të ndryshimit të përkrahjes për Kosovën

Ministrja e Jashtme e Kosovës, Donika Gërvalla, ka thënë të hënën se nuk ka parë ndonjë shenjë se mbështetja e Shteteve të Bashkuara për Kosovën mund të pësojë ndryshime pas zgjedhjeve presidenciale të 5 nëntorit në SHBA.

“Jemi me fat që në SHBA kemi pasur mbështetjen e të dyja kampeve, pra të atij republikan dhe atij demokrat. Prandaj, nuk shoh asnjë sinjal që një gjë e tillë të ketë ndryshuar gjatë rrugës”, tha Gërvalla kur u pyet në një konference për media se çfarë pret në marrëdhëniet mes Kosovës dhe SHBA-së pas zgjedhjeve atje të martën.

Në garë për të presidentin e ardhshëm amerikan janë Kamala Harris, nga Partia Demokratike, aktualisht nënpresidente, dhe Donald Trump, nga Partia Republikane dhe president nga viti 2017 deri më 2021.

Gërvalla tha gjatë konferencës së përbashkët në Prishtinë me ministrin e Jashtëm të Luksemburgut, Xavier Bettel, se Kosova do t’i forcojë marrëdhëniet me Shtetet e Bashkuara duke i kryer “detyrat e shtëpisë”.

“Duke çuar përpara agjendat e reformave dhe duke vendosur ligjin në çdo cep të Kosovës, duke luftuar krimin e organizuar, kështu forcohet partneriteti me SHBA-në. Nuk forcohet me fjalë dhe deklarata, por me punë konkrete”, tha ajo.

Administrata e tanishme amerikane, ku bën pjesë Harris, ka inkurajuar vazhdimisht Kosovën që t’i normalizojë marrëdhëniet me Serbinë, si kusht për të ecur përpara në rrugën e integrimit evropian, ndërsa Trump si president ka qenë dëshmitar i nënshkrimit të një marrëveshjeje mes Kosovës dhe Serbisë për normalizimin e marrëdhënieve ekonomike.

Për analistët në SHBA, situata nuk do të jetë aq e thjeshtë, megjithatë. Fillimisht, me luftën në Ukrainë, konfliktin në Lindjen e Mesme dhe kontestin territorial në Detin e Kinës Jugore, Kosova nuk do të depërtojë lart në agjendë, sipas tyre.

Frank Wisner, ish-emisar i SHBA-së për statusin e Kosovës, tha për programin Expose të Radios Evropa e Lirë javën e kaluar se problemi më i madh i Kosovës është mosmarrëveshja me Serbinë, e cila vazhdon të mos ia njohë pavarësinë, edhe gati 17 vjet pas shpalljes.

Wisner nuk pret ndonjë lëvizje në këtë drejtim, nëse Harris zgjidhet presidente.

David Phillips, drejtor i Programit për Ndërtimin e Paqes dhe të Drejtat e Njeriut në Universitetin e Kolumbias, ndan pikëpamje të ngjashme për Harrisin, pasi nuk pret ndonjë veprim domethënës prej saj në lidhje me marrëdhëniet ndërmjet Kosovës dhe Serbisë.

Por, për Trumpin, pritshmëritë janë dukshëm më shqetësuese.

Të dy ekspertët druajnë se qasja e tij “transaksionale” mund të çojë në pasoja të paparashikueshme dhe potencialisht të rrezikshme për të ardhmen e Kosovës.

Wisner nuk e përjashton mundësinë që Trump ta eksplorojë ndarjen e Kosovës si zgjidhje të shpejtë për konfliktin e saj të vazhdueshëm me Serbinë, duke e kujtuar një marrëveshje për shkëmbim territoresh mes Kosovës dhe Serbisë, përgjatë vijave etnike, e përfolur në vitin 2020, gjatë mandatit të parë presidencial të Trumpit.

Phillips tha, po ashtu, se Trump e sheh ndarjen e Kosovës si zgjidhje të shpejtë për marrëdhëniet e saj të trazuara etnike dhe kjo, sipas tij, jo vetëm se do ta destabilizonte Kosovën, por do ta hapte Kutinë e Pandorës edhe në shtete të tjera multietnike të Ballkanit, si Maqedonia e Veriut, Bosnje e Hercegovina apo Serbia. REL

Baerbock në Kiev, premton vazhdimin e mbështetjes për Ukrainën

Ministrja e Jashtme e Gjermanisë, Annalena Baerbock, është zotuar se aleatët perëndimorë do të vazhdojnë të mbështesin Ukrainën, teksa nisi vizitën e tetë në Kiev, që kur Rusia nisi pushtimin e shtetit fqinj më 2022.

Kjo vizitë më 4 nëntor po zhvillohet një ditë para mbajtjes së zgjedhjeve amerikane, rezultati i të cilave është kritik për Ukrainën.

“Gjermania, së bashku me partnerët në mbarë botën, qëndron fort në anën e Ukrainës”, tha Baerbock përmes një deklarate, teksa lufta në Ukrainë është duke shkuar drejt vitit të katërt.

“Ne do të mbështesim popullin e Ukrainës për aq kohë sa të jetë e nevojshme, në mënyrë që ata të shkojnë drejt rrugës së një paqeje të drejtë”, shtoi kryediplomatja gjermane.

Presidenti amerikan, Joe Biden, është zotuar se shteti i tij do të vazhdojë të mbështesë Ukrainën. Në garën presidenciale amerikane janë nënpresidentja demokrate, Kamala Harris, që ka premtuar vazhdimin e mbështetjes së Ukrainës, dhe ish-presidenti republikan, Donald Trump, i cili ka përmendur një zgjidhje të shpejtë për luftën.

Baerbock përmendi rëndësinë e mbrojtjes së infrastrukturës së energjisë së Ukrainës nga shkatërrimi gjatë sezonit të dimrit.

Ajo tha se Gjermania do të ndihmojë në luftimin e fushatës “brutale” të Rusisë, në mënyrë që “ukrainasit jo vetëm të mbijetojnë gjatë dimrit, por edhe shteti i tyre të mund të mbijetojë”.

Gjermania, mbështetësja e dytë më e madhe e Ukrainës pas SHBA-së, ka dhënë 170 milionë euro ndihmë emergjente për të ndihmuar vendin që të mund t’ia dalë gjatë dimrit.

Për një kohë të gjatë, Ukraina i ka kërkuar Gjermanisë që t’i japë raketat me rreze të gjatë veprimi, Taurus, por kancelari Olaf Scholz, ka refuzuar që të plotësojë këtë kërkesë të Kievit, nga frika se konflikti mund të përshkallëzohet dhe zgjerohet.

Scholz po ashtu ka refuzuar kërkesën e Ukrainës për anëtarësim të menjëhershëm në NATO. Një kërkesë e tillë është bërë nga presidenti ukrainas, Volodymyr Zelensky, teksa ai ua ka prezantuar “Planin e Fitores” aleatëve të tij perëndimorë. REL

Shqiptarët e Luginës së Preshevës protestuan në Medvegjë mes shqetësimeve për fshirjen e adresave

VOA/Leonat Shehu

Me moton “ma kthe adresën” grupe qytetarësh protestuan të dielën në qytetin e Medvegjës, komunë e banuar edhe me shqiptarë në jug të Serbisë, mes shqetësimeve për fshirjen e adresave të banorëve shqiptarë.

Kryetari i Këshillit Kombëtar Shqiptar në Bujanoc, Nevzat Lutfiu tha se Medvegja është qyteti me numrin më të madh të qytetarëve në Serbi, të cilëve u janë fshirë adresat e banimit.

“Një komunë sipas statistikave të fundit zyrtare janë 6 mijë e 360 banorë, janë pasivizuar mbi 4 mijë e 214 qytetarë. A e di bashkësia ndërkombëtare se shumica e këtyre personave kanë qenë shqiptarë të Medvegjës?. Viti 2024, shteti Serbi, komuna e Medvegjës, vetëm brenda një periudhe 4 vjeçare këtu janë fshirë nga listat e votuesve afër 4 mijë persona. A e di bashkësia ndërkombëtare se shumica e këtyre personave të fshirë, pa dijeninë e tyre nga listat e votuesve, ishin shqiptarë të Medvegjës?”, tha ai.

Zoti Lutfiu tha se ky diskriminim sistematik nuk po mjafton për Bashkimin Evropian dhe OSBE-në për të nisur hetime mbi siç tha shkeljet ndaj shqiptarëve në Medvegjë dhe Luginë të Preshevës në përgjithësi.

“Bashkësia ndërkombëtare po promovon me ngulm themelimin e një Asociacioni për komunat me shumicë serbe në Kosovë ndërsa në të njëjtën kohë po i mbyllë sytë sot ndaj fushatës shpopulluese të Beogradit zyrtar në Luginën e Preshevës”, tha ai.

Protesta në Medvegjë

Protesta në Medvegjë

Deputeti shqiptar në parlamentin e Serbisë, Shaip Kamberi tha se diskriminimi po ndodh për shkak të përkatësisë etnike.

“Mirëpo kjo po ndodh dhe kjo është fotografia e diskriminimit në Ballkanin Perëndimor më së shumti që shihet në Medvegjë. Medvegja është simbol i metodave perfide të pastrimit etnik të një komune nga komunitetet tjera. Mjerisht kjo po ndodh në sytë e BE-së”, tha zoti Kamberi.

Deputeti Shaip Kamberi tha se shqiptarët e Luginës së Preshevës duhet të vazhdojnë angazhimin politik, institucional dhe qytetarë për të kundërshtuar fshirjen e adresave.

Kjo është hera e tretë brenda tre muajve që shqiptarët e Luginës së Preshevës hidhen në protestë me kërkesat si ndalimin e pasivizimit të adresave të tyre, kthimin e gjykatës në komunën e Preshevës, respektimin e marrëveshjeve politike, njohjen e diplomave të të rinjve që përfundojnë studimet në universitetet në Kosovë si dhe angazhim më të madh për integrimin institucional të tyre.

Sipas regjistrimit të fundit të popullsisë në Serbi, rreth 60 mijë shqiptarë jetojnë në Luginën e Preshevës.

Përfaqësuesit politik thonë se situata në rajonin e Luginës së Preshevës vazhdon të jetë e rëndë dhe se nuk është shënuar përparim që nga përfundimi i konfliktit në vitin 2001 ndërmjet forcave qeveritare serbe dhe kryengritësve shqiptarë që luftonin për më shumë të drejta të shqiptarëve në atë zonë.

Shqiptarët e Luginës protestojnë kundër pasivizimit të adresave

Pamje nga protesta e mbajtur në Bujanoc, në muajin gusht.

 

Me thirrjet, “Kthema adresën”, shqiptarët e Luginës së Preshevës, kanë protestuar të dielën për herë të tretë brenda pak muajve, kundër atyre që i quajnë veprime diskriminuese të autoriteteve serbe ndaj pakicës shqiptare në Serbi.

Të dielën, protestuesit janë mbledhur para stacionit policor në Medvegjë.

Në Serbi jetojnë më shumë se 60.000 shqiptarë, të cilët përbëjnë pakicën e katërt më të madhe atje, sipas regjistrimit të fundit të popullsisë më 2022.

Në raportet ndërkombëtare, Lugina e Preshevës – term që përdoret për Preshevën, Medvegjën dhe Bujanocin, komuna të banuara me shumicë shqiptare në jug të Serbisë – konsiderohet tërësisht e izoluar dhe thuhet se merr vëmendje vetëm në kohë zgjedhjesh.

Në protestën e së dielës ka marrë deputeti i vetëm shqiptar në Kuvendin e Serbisë, Shaip Kamberi, më pas kryetarja e Preshevës, Ardita Sinani dhe pjesëtarë të Këshillit Kombëtar Shqiptar, organit përfaqësues të pakicës shqiptare në Serbi.

Kur është pyetur për t’i komentuar protestat paraprake, presidenti serb, Aleksandar Vuçiq, pati thënë se “askush nuk po i rrah, nuk po i ngacmon, apo diçka tjetër. Serbia është shtet demokratik dhe ne do të vazhdojmë të sillemi në këtë mënyrë”.

Kërkesat kryesore

Në protestat e mbajtura, fillimisht në Bujanoc, e më pas në Preshevë, u bë thirrje për njohje të diplomave të Kosovës, për integrim nëpër institucionet shtetërore të Serbisë, për lejim të përdorimit të simboleve kombëtare shqiptare dhe për zgjidhjen e çështjes së pasivizimit të adresave.

Pasivizimi nënkupton fshirjen e qytetarëve prej adresave ku kanë qenë të regjistruar. Ky hap rezulton me humbjen e shtetësisë serbe, e rrjedhimisht të të gjitha të drejtave civile – përfshirë të drejtën për të votuar, për të pasur pronë, për të pasur sigurim shëndetësor e pension dhe për t’u punësuar.

Pasivizimi i adresës përcaktohet me ligj në Serbi prej vitit 2011. Ligji parasheh që institucionet të bëjnë kontrolle për të kuptuar nëse një banor jeton në adresën e regjistruar.

Nëse vërtetohet që një banor nuk jeton në atë adresë, merret vendimi për pasivizimin e saj, dhe banori obligohet që të regjistrojë adresën e re brenda tetë ditëve, pas pranimit të vendimit.

Ndonëse ligji parasheh të drejtën për apel, qytetarët kanë thënë se, në disa raste, as nuk kanë mundur të ankohen ndaj vendimit, pasi nuk janë informuar me kohë për pasivizimin.

Në raportin e Komitetit të Helsinkit për të Drejta të Njeriut në Serbi, të vitit 2021, Presheva, Medvegja dhe Bujanoci përshkruhen si pengje të marrëdhënieve ndërmjet Kosovës dhe Serbisë.

Sipas raportit, çështja e pasivizimit të adresave “në thelb është formë e spastrimit etnik nëpërmjet metodave administrative”.

Banorët e Luginës dhe udhëheqës të komunave atje kanë kërkuar disa herë që të ketë prani të mekanizmave ndërkombëtarë, në mënyrë që të monitorohen kushtet e jetesës në atë pjesë.

Ata kanë akuzuar përfaqësuesit e faktorit ndërkombëtar në Beograd për mosreagim ndaj trajtimit që u bëhet.

Mungesa e investimeve dhe barrierat e vazhdueshme besohet se kanë ndikuar në largimin e rreth 20.000 shqiptarëve prej këtij rajoni, kryesisht drejt shtetit të Kosovës. REL

Kamala Harris letër të hapur komunitetit shqiptaro-amerikan para zgjedhjeve

Kandidatja demokrate për zgjedhjet e 5 nëntorit në SHBA, Kamala Harris, i është drejtuar me një letër të hapur komunitetit shqiptaro-amerikan, ku ndër të tjera vlerëson lidhjet e forta të shqiptarëve me SHBA-në.

Në letrën e saj ajo thekson ndihmën amerikane për Pavarësinë e Kosovës dhe mbështetjen që do të vazhdojë të japë, nëse do të jetë në Shtëpinë e Bardhë, pas zgjedhjeve të 5 nëntorit.

“Shqiptaro-amerikanët kanë dhënë kontribute të çmuara për kombin tonë për breza të tërë, duke treguar një përkushtim të thellë ndaj familjes, komunitetit dhe luftës për liri. Janë qindra mijëra shqiptarë amerikanë që jetojnë në Shtetet e Bashkuara dhe qëndrueshmëria e komunitetit shqiptaro-amerikan vazhdon të na frymëzojë të gjithëve”, shkruan në letrën e saj Kamala Harris.

Ajo vlerësoi kontributin e vazhdueshëm të shqiptaro-amerikanëve, të cilët thonë se tashmë shqiptarët nga punëtorët, nga bizneset e vogla, kanë arritur në profesione të ndryshme, në mjekësi, në drejtësi, dhe kudo në shërbimet publike.

“Shqiptarët amerikanë kanë kontribuar thellësisht në strukturën e kombit tonë, duke pasuruar komunitetet me shpirtin e tyre sipërmarrës, vlerat e forta familjare dhe përkushtimin e thellë ndaj arsimit dhe angazhimit qytetar. Nga pronarët e bizneseve të vogla te profesionistët në mjekësi, drejtësi dhe shërbime publike, shqiptarët amerikanë kanë luajti një rol kyç në zhvillimin e ekonomive lokale dhe forcimin e strukturës sociale të qyteteve dhe fshatrave në të gjithë vendin.

Për më shumë se një shekull, duke filluar nga Konferenca e Paqes në Paris pas Luftës së Parë Botërore, amerikanët dhe shqiptarët kanë një lidhje të veçantë. Edhe sot shqiptarët e Amerikës kujtojnë se ishin Shtetet e Bashkuara të Amerikës që qëndruan pranë në atë moment të rëndësishëm për pavarësinë e Shqipërisë.

Dua të konfirmoj partneritetin e fortë mes Shteteve të Bashkuara dhe Shqipërisë. Shqipëria është një aleate e qëndrueshme e NATO-s dhe unë i jam mirënjohës Shqipërisë për promovimin e stabilitetit në rajon, si dhe për udhëheqjen e saj në Këshillin e Sigurimit të OKB-së në muajt pas pushtimit brutal të Ukrainës nga Rusia”, vijon Harris.

“Shtetet e Bashkuara kanë udhëhequr gjithashtu aleatët dhe partnerët evropianë për të mbështetur pavarësinë dhe sovranitetin historik të Republikës së Kosovës dhe vazhdojnë të mbështesin një Kosovë multietnike dhe demokratike, të integruar plotësisht në bashkësinë ndërkombëtare.

Unë i kuptoj sfidat unike në vendin tonë me të cilat përballen shumë nga komuniteti shqiptaro-amerikan dhe jam i përkushtuar ndaj politikave që fuqizojnë këtë komunitet, duke përfshirë luftën për një ekonomi të mundësive dhe mbrojtjen e të drejtave civile për të gjithë. Pjesëmarrja e shqiptarëve amerikanë në demokracinë tonë është më e rëndësishme se kurrë. Së bashku ne mund të formojmë një të ardhme që pasqyron vlerat dhe aspiratat tona të përbashkëta”, theksoi Harris.

“Faleminderit për gjithçka që kontribuoni për këtë vend të madh”, përfundon letrën e saj, nënpresidentja amerikane, e cila pret votën e qytetarëve amerikanë për zgjedhjet presidenciale që do të mbahen të martën më 5 nëntor.bw

Mijëra qytetarë shkodranë iu bashkuan thirrjes së PD-së në protestën kundër krimit politik

Pas masakrës me 3 të vrarë tri ditë më parë, mosbindja civile e opozitës u zhvendos këtë të shtunë në Shkodër, ku për rreth një orë e gjysmë, mijëra qytetarë, marshuan në rrugët e qytetit me pankarta në duar që përcillnin mesazhet: “Po na vrisni”, “Qytetnimi asht ma i fortë se krimi”, “Shtet dhe krim është e barabartë me shkatërrim”.

Marshimi në heshtje në fillim nisi në sheshin para bashkisë dhe më pas vijoi përgjatë pedonales “Kol Idromeno”, për t’u kthyer sërish në sheshin përpara baskisë, ku morën pjesë deputetët dhe drejtuesit e Partisë Demokratike.

Në mbyllje të protestës Luçiano Boçi deklaroi se Rama nuk mund të mbajë pushtetin me anë të krimit dhe kërkoi qeveri teknike, lirimin e Berishës dhe kthimin e Shkodrës e Shqipërisë qytetarëve.

“Domosdoshmëri për qeveri teknike. Sot e kërkojnë qytetarët e Shqipërisë e kërkojnë qytetarët e Shkodrës. Nuk mundet që Rama ta përsërisë pushtetin me krim. Zgjedhjet e këtë bashki i mori me anë të krimit, por nuk do ta lejojmë që të përsërisë sundimin tij me anë të krimin. Ne kërkojmë qeveri teknike, liri liderit të opozitës, pushim i luftës ndaj opozitës dhe kthimin e Shkodrës dhe Shqipërisë qytetarëve dhe jo krimit. Qytetaria nuk lejon që Rama ta qeverisë këtë vend me bandat e tij”.

Gjithashtu Sekretari i Përgjithshëm i PD-së, Flamur Noka theksoi se shkodranët refuzuan t’i bindeshin diktatit të krimit dhe se mesazhi i tyre ditën e sotme ishte se ‘djepi i kulturës s’mund të kthehet në djep krimi’.

‘Mesazhin që Shkodra e refuzon krimin, Shkodra e refuzon pushtetin politik të mafies, Shkodra e refuzon korrupsioni dhe Shkodra dhe e gjithë Shqipëria janë në këmbë, në mosbindje civile për t’i dhënë zgjidhje politike Shkodrës dhe të gjithë Shqipërisë. Nuk mund të pranojë askush një diktat të tillë. Diktati më i rrezikshëm nga të gjitha diktatet është diktati i krimit. Ky është mesazhi që dhamë sot ne. Djepin e kulturës nuk mund ta pranojmë që të kthehet në djep krimi.

Sot jemi në një ditë proteste. Kemi lancuar hapat e mosbindjes civile. Janë 77 hapa, dy kemi realizuar. Janë dhe 75 hapa të tjerë për të arritur qëllimin’, u shpreh Noka në mbyllje të marshimit-protestë. sn

‘Qytetnimi asht ma i fortë se krimi! Po na vrasin, duhet reagim’, shkodranët në këmbë kundër krimit politik

Mijëra qytetarë shkodranë i janë bashkuar thirrjes së opozitës për të marshuar në qytetin e Shkodrës kundër krimit politik i cili po merr jetë njerëzish të pafajshëm çdo ditë e më shumë, ku më së fundi u vranë tre persona në një atentat kriminal në mes të ditës.

Në shenjë solidariteti me qytetarët e ndershëm dhe të lirë të Shkodrës, opozita me në krye Partinë Demokratike ka ndërmarrë një marshim civil në pedonalen e qytetit.

‘Qytetnimi asht ma i fortë se krimi! Po na vrasin, duhet reagim’, është pankarta gjigante që mbajnë në duar qytetarët, ndërkohë që marshojnë në rrugët e qytetit. sn

UNESCO: Çdo katër ditë vritet nga një gazetar

Një gazetar është vrarë çdo katër ditë në dy vjetët e fundit, sipas raportit më të ri të Agjencisë së Kombeve të Bashkuara për Edukim, Kulturë dhe Shkencë (UNESCO).

Raporti është publikuar të shtunën në ditën kur shënohet Dita ndërkombëtare për dhënie fund të pandëshkueshmerisë për krimet kundër gazetarëve.

Prej 162 vrasjeve të gazetarëve më 2022 dhe 2023, të verifikuara nga organizata me bazë në Paris, më shumë se gjysma janë kryer në një shtet të prekur nga konflikti i armatosur.

Shumë profesionistë të mediave kanë vdekur nëpër vendlindjet e tyre, sipas raportit.

Ata që kanë vdekur në shtetet pa konflikte, janë vrarë për shkak të fokusit në krim të organizuar dhe korrupsion, apo duke raportuar prej protestave, sipas raportit që publikohet çdo dy vjet, dhe analizon sigurinë e gazetarëve në mbarë botën.

Në raport është thënë se 162 vrasjet e verifikuara të gazetarëve më 2022-23 përbëjnë
“rritje prej 38 për qind në krahasim me periudhën paraprake, kur UNESCO ka regjistruar 117 raste të vrasjeve. Kjo periudhë përbën edhe numrin më të madh të vrasjeve prej periudhës 2016-2017”.

“Këto krime nuk mund të mbesin pa u ndëshkuar”, ka thënë drejtoresha e UNESCO-s, Audrey Azoulay, përmes një deklarate.

Numri me më së shumti gazetarë të vrarë më 2022 ka qenë Meksika, me 19 raste, derisa më 2023, numri më i madh i gazetarëve të vrarë, 24, është regjistruar në territoret palestineze, ka thënë UNESCO.

Sipas raportit, Amerika Latine dhe Karaibet, si dhe shtetet arabe, janë rajonet me numrin më të madh të gazetarëve të vrarë.

Sipas gjetjeve të raportit, për shumicën e vrasjeve askush nuk është mbajtur përgjegjës.

UNESCO-ja ka thënë se shkalla globale e pandëshkueshmerisë më 2024 ka shkuar në 85 për qind, një ulje e vogël në krahasim me 89 për qind më 2018 dhe 95 për qind më 2012. REL

Komisioni Evropian: Shënjestrimi i gazetarëve në konflikt ‘krim lufte’

Gazetarët e dislokuar në zonat e armiqësive mbeten civilë, ndaj ligji ndërkombëtar i njeh sulmet e qëllimshme kundër tyre si krim lufte.

Kështu thuhet në një deklaratë të përbashkët me rastin e Ditës Ndërkombëtare për t’i dhënë fund pandëshkueshmërisë për krimet kundër gazetarëve më 2 nëntor nga Përfaqësuesi i Lartë i BE-së Josep Borrell dhe Zëvendës Presidentja e Komisionit Evropian, Věra Jourová. Teksti i plotë i dokumentit është publikuar në faqen e internetit të Shërbimit Evropian të Veprimit të Jashtëm.

“Në Ditën e 10-të Ndërkombëtare për t’i dhënë fund pandëshkueshmërisë për krimet kundër gazetarëve, ne përgëzojmë gazetarët sidomos gazetarët e vijës së parë të patrembur që mbulojnë konfliktet, krizat dhe emergjencat. Puna e tyre është thelbësore për të ekspozuar shkeljet e të drejtave të njeriut, abuzimet dhe krimet e luftës që përndryshe do të mbeteshin të fshehura nga opinioni publik”, thuhet në deklaratën e përbashkët.

Viti i kaluar pa një rritje të paprecedentë të vrasjeve të gazetarëve, gjë që është “shkatërruese dhe e papranueshme”, theksojnë zyrtarët.

Kjo ndodhi në Gaza, në Liban, në Mianmar, në Jemen, në Sudan dhe në vende të tjera, ku gazetarët, pavarësisht rreziqeve vdekjeprurëse, kryen me guxim detyrën e tyre, duke dhënë lajme objektive nga toka për komunitetin ndërkombëtar, ekspozuan krimet e luftës dhe dokumentuan mizoritë e luftës.

“Gazetarët ukrainas vazhdojnë të jenë objektiva të dhunës, ngacmimeve dhe ndalimeve arbitrare nga Rusia dhe forcat pro-ruse… BE-ja dënon fuqishëm sulmet ndaj gazetarëve dhe bën thirrje edhe një herë për veprim urgjent dhe efektiv për të mbrojtur gazetarët dhe punonjësit e medias. Gazetarët dhe punonjësit e medias janë civilë dhe duhet të mbrohen në çdo kohë thanë përfaqësuesit e Komisionit Evropian.

Joseph Borrell dhe Věra Jourová u bënë thirrje të gjitha shteteve që të hetojnë incidente të tilla shpejt, në mënyrë efektive dhe të paanshme. Ata theksuan se dhuna ndaj gazetarëve, kërcënimet dhe ngacmimet nxisin një klimë frike, autocensurimi apo edhe mërgimi. Pa llogaridhënie, cikli i dhunës ndaj gazetarëve do të vazhdojë, duke zvogëluar më tej hapësirën për media të lira dhe të pavarura dhe duke dëmtuar të drejtën e qytetarëve për informim, përfundon deklarata.

Siç u raportua më herët, duke iu referuar Këshillit të Evropës, më shumë se 30 gazetarë ukrainas aktualisht mbahen ilegalisht nga forcat pushtuese ruse me akuza të sajuara.

PD nesër protestë në Shkodër, Salianji rikthen nga burgu denoncimin e bërë më parë: Shqiptarët meritojnë një qeveri që lufton krimin

Ish-deputeti i Partisë Demokratike Ervin Salianji, në një postim në rrjetet sociale, teksa ndodhet në burg, ka rikthyer një denoncim të bërë vite më parë për situatën kriminale në Shkodër.

Salianji bën thirrje që qytetarët të bashkohen me protestën e nesërme në qytetin e Shkodrës, në orën 12:00.

Në videon, e cila është bërë shtatë vite më parë, Salianji përçon mesazhin se situata kriminale në vend është e rëndë dhe se shqiptarët meritojnë një qeveri që e lufton krimin.

“Sidomos në Shkodër në ditët e fundit, krimi sundon bashkë me qeverinë qendrore të Edi Ramës. Këtë e provoi sot një tjetër vrasje e tipit mafioz në qytetin e Shkodrës. Edhe kjo e sotmja ende e pazbuluar. Vrasja e sotme është në serinë e vrasjeve dhe rrëmbimeve të ditëve dhe javëve të fundit në zonën e Shkodrës.

Në pak muaj, në zonën e Shkodrës ka pasur 6 viktima, dy të zhdukur dhe tre makina të djegura. Familjarët dinë çdo motiv të krimeve që po kryhen nga bandat, edhe policia i di. Edhe qytetarët e frikësuar flasin nën zë për autorët, por policia nuk ndërhyn dhe nuk shoqëron askënd. Shqiptarët meritojnë një qeveri që lufton me zero tolerancë krimin e organizuar. PD garanton qytetarët se që në ditën e parë të saj në qeveri do të nisë shtypjen e bandave në çdo qytet ku operojnë”, tha Salianji.

PD thirrje qytetarëve shkodranë: Bashkohuni në mosbindjen civile të së shtunës, ora 12:00 para bashkisë

Partia Demokratike u ka bërë thirrje të gjithë qytetarëve shkodranë që të bashkohen në marshimin protestë të ditës së shtunë ora 12:00 para bashkisë së Shkodrës.

‘Shkodra, Zonja e madhe, tashme është kryeulur nga kthetrat e krimit. Me bekimin e Edi Ramës, qyteti jonë është nënshtruar nga të fortët, të cilët sundojnë qytetin’, tha në një deklaratë nga selia e PD-së së Shkodrës, Izmira Ulqinaku.

Deklarata e PD së Shkodrës:

Në emër të Partisë Demokratike, i bëj thirrje të gjithë qytetarëve të Shkodrës, të gjithë prindërve që kanë vendosur të rrisin dhe edukojnë fëmijët në këtë qytet, të bëhen bashkë në marshimin protestë, ditën e shtunë me datë 2 nëntor, ora 12:00, para Bashkisë Shkodër.

Shkodra qyteti i artit e kulturës, qyteti i këngës e humorit, sot është transformuar në kopjen e shëmtuar te Palermos.

Shkodra, Zonja e madhe, tashme është kryeulur nga kthetrat e krimit. Me bekimin e Edi Ramës, qyteti jonë është nënshtruar nga të fortët, të cilët sundojnë qytetin.

Pasiguria ndihet kudo!

Situatën nuk e zgjidh dot Rilindja e as banda e policisë. Ata janë palë në fushata, për të ruajtur njeri tjetrin.

Ky terror që po instalon Edi Rama në Shkodër, do ti kthehet shpejt në boomerang!

Ditën e shtunë, ne do të marshojmë për liri.

Do të marshojmë kundër kthetrave të krimit.

Do të marshojmë për ti kthyer lavdinë Shkodrës; për ti kthyer qetësinë banorëve të saj.

Do të marshojmë për rendin e sigurinë e munguar.

Bashkohuni me ne, të shtunën, në pedonale para bashkisë, ora 12:00, në marshim!

sn

UGSHPD: TË BETOHESH DHE T’I SHËRBESH SI DEPUTET ATDHEUT DHE ZGJEDHËSVE


Kaloi pa u vënë re në Kuvendin e Republikës së Shqipërisë betimi i dy deputetëve Andrea Nesti Mano PD dhe Erjon Shërbet Meka PS gjatë seancës plenare të së Enjtes 31 Tetor, 2024. Lista e lajmeve të ngjeshura dhe ngarkesa e tyre prej Kuvendit ku opozita protestonte ndërsa Ambasadori i BE dorëzoi “Raport Progresin 2024”, ngjarja e rëndë e vrasjes së dy personave dhe një të plagosuri në qytetin e Shkodrës, qëndrimi në Gjirin e Durrësit E ANIJES ende të pa përpunuar me ngarkesën e 2100-ton mbetjesh toksike, bënë që të humbte rasti i parë i njohjes me publikun i dy përfaqësuesve zgjedhor respektivisht të qyteteve të rëndësishme si Korça dhe Durrësi.
Duke e monitoruar këtë zhvillim vlen të nxjerrim në dukje ato shqetësime që kanë dalë edhe më parë dhe tani janë formuar si një normë “e pranueshme”. Raporti i pushtetit me mediat dhe propaganda në veprim për të ndalur mendimin kritik dhe thelbin e së vërtetës jo vetëm që janë bërë agresive, por edhe vetë një komision për dezinformimin në kuvend nuk arrin t’i drejtpeshojë këto situata.
Më 27 Shtator Ervin Salianji (PD) merr gjykimin për “kallëzim të rremë” dhe nis kryerjen e dënimit me 1 vit burg. Arrestohet 10 ditë më parë ish presidenti Ilir Meta, president i PL i cili vazhdon masën e sigurisë ku deri në pritje të vendimit nga Prokuroria e Posaçme SPAK  i është komunikuar akuza për korrupsion, pastrim i produkteve dhe mos deklarim i pasurisë. Deri këtu ngjarjet janë pritur si goditje politike nga njëra anë, por edhe si vendosmëri e drejtësisë për të zbatuar ligjin në zyrtarë  të dyshuar për shkelje dhe korrupsion nga ana tjetër.
Si për të mos i lënë fare vend dhe hapësirë njohjes me dy deputetët më të rinj të sapo pranuar në Kuvend dhe të dalë nga listat shumë emërore të zgjedhjeve për në Kuvend të datës 25 prill 2021, por ishte kryeministri Rama që nga një studio televizive i mëshoi të dyja çështjeve sipas interesave të tija. Për Salianjin Rama u shpreh se: -“…do të uronte që ai vendim të bëhej mësim për të tjerë që vazhdojnë dhe bëjnë shpifje katastrofike”, ku sipas tij u përdor mandati i deputetit për të degjeneruar publikisht kundërshtarin politik. Ndërsa në rastin për Ilir Meta duke shprehur si zakonisht tërheqjen për të mos bërë komente u shpreh se: -“Unë po flas në parim, nuk po merrem me rastin konkret, policia nuk arreston por ekzekuton vendimin e  gjykatës. Policia nuk ka asnjë tagër as të njoftojë as të zgjedhë, si kur dhe qysh pasi quhet dekonspirim ka një operacion”.
Vjen rasti të pyesim se a jetojnë tashmë në dy realitete të ndryshme shqiptarët?
Një për opozitën dhe kundërshtare të pushtetit dhe tjetri për elitën e partisë shtet.
Duhet kuptuar se po, pasi propaganda dhe media e imponuar me lajmin e rremë dhe e pa fuqishme për të mbrojtur të vërtetën e ka kaluar fazën e evidentimit të bashkëjetesës dhe të trajtimit pushtet dhe opozitë në dy standarde të ndryshme. Standardi i ndryshëm është normë, ndërsa sundimi i pushtetit pa kontrollin e opozitës është një realitet.
Për ta krahasuar vetëm përmes lajmit zyrtar të shtetit shqiptar ATSH trajtimi mbetet i shkruar dhe i dokumentuar sipas linjës propagandë të pushtetit. Paragrafi i fundit shënon;”Andrea Mano zuri vendin e Ervin Salianjit, i cili u dënua me 1 vit burg nga Gjykata e Apelit ndërsa Erjon Meka vendin e Jurgis Ҫyrbjes, i cili dorëzoi mandatin e deputetit “për arsye shëndetësore”.
Ky parashtrim  i fakteve me tendencë shtrembër të bën të kuptosh standardin e dyfishtë që jetohet sot si dy realitete të ndryshme.
Salianji me “kallëzim të rremë” 1 vit burg.
Pra theksohet ndëshkimi, kurse Jurgis Ҫyrbja, pas disa aktesh teatrale me hyrje dalje në Strukturën  e Posaçme Kundër Korrupsionit dhe Krimit të Organizuar i merret masa e sigurisë pasi është shfuqizuar nga cdo lidhje me Partinë Socialiste ose sipas ATSH-s dhe Komisionit të Mandateve “për arsye shëndetësore”.
Në një kohë kur në vetë lajmet e saj ATSH-ja ka të detajuar procedimin penal Nr. 93 të vitit 2023 që Jurgis Ҫyrbja ka konsumuar veprat penale “Zbulimi i akteve ose të dhënave sekrete”, “Tregimi i sekretit shtetëror nga shtetasit”, “Përkrahja e autorit të krimit” dhe “Korrupsioni aktiv në zgjedhje”. Kjo e fundit ne na sjell në të kuptuarin e progresit që sjell bashkëveprimi i shtetit të korruptuar me krimin. Dy renditje më poshtë në listën shumë emërore se vetë kreu i Rilindjes Socialiste për Durrësin për zgjedhjet e 25 Prillit, 2021, fillimi i mandatit të tretë.

Të vërtetat flasin vetë ndërsa propaganda e pushtetit fsheh dhe shtrembëron realitetin duke ndërtuar perceptime edhe më të gabuara për detyrat e përfaqësuesve në Kuvend të zgjedhur nga populli. Në çfarë shkalle duhet të mbërrijë për t’u parë korrupsioni. Këtë e gjen dhe e justifikon me mos përgjegjësinë e vet kryeministri dhe njëherazi kryetari i Rilindjes Socialiste. Ai nuk flet më për mandatin e katërt sepse fuqia e kartonit në një Kuvend pa opozitë po i krijon të gjitha kushtet e mbrojtjes. Progresivizmi në këtë rast jo ai i Raportit Vjetor të BE-së, por i strategjisë për ta mbajtur përjetësisht pushtetin është kthyer në mbivlerësime personale dhe autoritare. Të bërjes politikë e cila shkon  deri në auto-vlerësime filozofike ku propaganda çmon, shquan dhe ngre figurën e një lideri që tani shkollon dhe certifikon të rinj dhe të reja në Akademinë e Partisë Socialiste, një përpunim ideologjik progresist që ka në qendër pushtetin dhe sundimin e përjetshëm.

 

31 Tetor, 2024

 

Unioni i Gazetarëve Shqiptarë Profesionistë të Diasporës (UGSHPD)
Verband Albanischer Berufsjournalisten der Diaspora (VABD)
Union of Professional Albanian Journalists of Diaspora (UPAJD)
L’Union des journalistes professionnels albanais de la diaspora (UJPAD)
Unione dei Giornalisti Professionisti Albanesi della Diaspora (UGPAD)

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend