VOAL

VOAL

Copyright © 2022

VOAL

Debati i plotë pa media në PD, përplasjet mes Bashës, Bregut e Patozit

July 20, 2016

Kreu i opozitës, Lulzim Basha, thirri në një mbledhje jashtë radhe Grupin Parlamentar demokrat për të unifikuar qëndrimin e PD-së kur ngelen edhe 24 orë deri në votimin e reformës në Kuvend.

Gjatë mbledhjes së Grupit Parlamentar, Basha është përballur me kërkesën e deputetëve të Grupit Parlamentar mbi koston politike që do të ketë PD-ja në rast se nuk do të votojë Reformën në Drejtësi.

Kreu i opozitës ka informuar deputetët demokratë mbi propozimin e fundit të ardhur në tryezën e negociatave nga përfaqësuesi i BE-së, i cili ka prishur në mënyrë të pakuptimtë edhe marrëveshjen e arritur nga negociatorët.

Basha ka deklaruar se një propozim i tillë nuk do të kalojë kurrsesi, pasi ai nuk ka qenë asnjëherë pjesë e draftit të reformës. Sipas kreut të PD-së, opozita do të mbështesë çdo lloj negociate për të përmbyllur me sukses Reformën në Drejtësi.

“Nga sot qëndrojmë në gatishmëri dhe të hapur për negociata, fuqimisht në parimet e shpallura nga SHBA, BE dhe Komisioni i Venecias, e jemi gati të ofrojmë, të kërkojmë dhe të pranojmë zgjidhje të argumentuara në bazë të kësaj kornize parimesh fare të qartë. Jemi shumë afër, ndaj nuk jam pesimist. Sot them që kjo është një reformë drejt miratimit dhe jo dështimit, por PD-ja i bën thirrje maxhorancës që së bashku të ulemi e të gjejmë zgjidhjen përfundimtare për çështjen që e mban peng, çështje e rakorduar dje. Kjo sepse shqiptarët meritojnë një zgjidhje konsensuale të Reformës në Drejtësi”, ka deklaruar Basha.

DEBATI NË GRUPIN E PD

Lulzim Basha: Dua t’ju informoj se jemi shumë pranë arritjes së një konsensusi me të gjitha forcat politike për të miratuar me konsensus Reformën në Drejtësi. Këtë konsensus, negociatorët tanë e kanë arritur dy ditë më parë në komision, por ka qenë një propozim i beftë dhe i pakuptimtë i ardhur nga përfaqësuesi i BE-së në këto negociata që ka ndryshuar të gjithë rrjedhën e konsensusit. Por jam besimplotë që kjo sakrificë nuk do të bëhet pengesë dhe ne si forcë politike do të bëjmë gjithçka për ta kaluar reformën.

Arben Imami: Dua të kërkoj një gjë të përsëritur nga Partia Demokratike. A mund të kemi një qëndrim më të fortë politik ndaj ambasadores së BE-së në Tiranë, Romana Vlahutin? Duhet të ishim artikuluar më parë, por edhe tani që flasim nuk është vonë nëse e themi të vërtetën ashtu siç është. Është një ambasadore e angazhuar publikisht dhe politikisht në përkrahje të qeverisë. Teknicieni që EURALIUS ka në tryezën e negociatave, sigurisht ka ndryshuar qëndrim vetëm përmes mesazheve që vijnë nga ambasadorja e BE-së në Tiranë për ta kundërshtuar konsensusin që u arrit. Mbështes atë që tha Z.Basha se ka një plan për t’ia faturuar opozitës këtë çështjen e reformës, që më pas të përdoren në fushatë.

Sali Berisha: Propozimi i fundit i bërë nga ai eksperti i EURALIUS ishte realisht i papranueshëm për ne. Është një propozim stalinist, është oruellian. Më mirë të thonë hajde miratojmë listën e Ramës dhe të jemi të qartë, sesa Rama thotë këtë dhe këtë s’e do opinioni.

Igli Cara: Kemi 1 vit e gjysmë që nga koha kur është mandatuar z.Halimi dhe jeni mandatuar edhe ju për të udhëhequr negociatat për Reformën në Drejtësi me maxhorancën. Që nga ajo periudhë janë bërë ndryshime shumë pozitive, të cilat janë meritë e Partisë Demokratike. Siç na keni bërë me dije, sot dhe mbrëmë Edi Rama nuk lëshon dy elementë teknikë, të cilat parimisht normalisht janë principale, parimore. Tani është anormale që Kryeministri të na fusë në kurthin e tij, duke na bërë që për këto dy elementë të mos mbajmë qëndrim për Reformën në Drejtësi. Nuk mund të lejojmë që dy elementë teknikë të rrëzojnë 99% të punës që kemi bërë. S’mund të mbajmë ne faturën për reformën, kur përgjatë gjithë procesit pengesa ka qenë Edi Rama. Nga ju personalisht, por edhe nga Grupi Parlamentar i Partisë Demokratike duhet gjetur mundësia teknike që Ramës t’i zhvishet ky argument dhe kjo çështje teknike. Për sa i takon çështjes së votimit, të gjithë ne votojmë në të njëjtën linjë dhe sipas vendimit politik të Grupit Parlamentar të PD-së.

Lulzim Basha: Jam plotësisht dakord me të gjitha ato që the dhe pikërisht mbi këtë gjë jemi duke punuar.

Igli Cara: Ajo që unë shoh si shqetësim dhe që dua të investohemi, është që fatura të mos i ngelet Partisë Demokratike. Një tjetër çështje që më ka bërë përshtypje këto ditët e fundit është se diskutimi për Reformën në Drejtësi është bërë trepolar, ndërkohë që më parë ishte dypolar. Në momentin që ky diskutim bëhet trepolar, nuk mund të lejojmë që në momentin e fundit dikush të na shpallet si babai i kombit.

Eduard Selami: Jemi futur në një rreth vicioz, apo në një spirale kur ndërkombëtarët na shohin si pengesë? Ju thatë se vetëm neni 88-të ishte pengesa. Partia Demokratike kurrsesi nuk mund të krijojë të tilla distancime sa u takon qëndrimeve që mban në raport me aleatët tanë të SHBA-ve e BE-së. Jemi një forcë politike që jemi krijuar si parti mbi frymën perëndimore dhe me mbështetjen amerikane. Nuk mundemi që me të tilla qëndrime të jemi kaq të ndryshëm, pikërisht me këta aleatë strategjikë. Është një peshë e madhe që Partia Demokratike nuk ka pse ta mbajë dhe nuk duhet ta mbajë për aq kohë sa e gjithë anëtarësia e saj kërkon që të miratohet kjo reformë. Z.Basha ju personalisht në mbledhje, në media, në dalje zyrtare keni dalë për javë, ndoshta edhe për muaj me radhë, nëse jam i saktë dhe keni thënë nëse maxhoranca pranon që të zbatojë rekomandimin e 88-të të Komisionit të Venecias, unë do të jem gati në atë moment të votoj me Grupin Parlamentar reformën. Sot ky rekomandim është tejkaluar sepse është pranuar prej kohësh, ndërkohë që kanë dalë çështje të tjera. Unë mendoj se duhet të jemi koherentë dhe më korrektë me qëndrimet që mbajmë, sidomos kur ato i japim përpara aleatëve tanë.

Lulzim Basha: Z.Selami, më fole më tepër në mënyrë të përgjithshme mbi parimet e Partisë Demokratike, të cilat i njoh shumë mirë, pavarësisht se nuk kam shumë kohë në krye të partisë. Ti nuk ke qenë prezent në të gjitha mbledhjet e grupeve parlamentare, por ne kemi ecur mbi këtë rrugë për të cilën unë fola dhe sqarova. Nëse je në brendësi të gjithë negociatave, do të kuptosh që kemi qenë gjithnjë koherentë me qëndrimet që kemi mbajtur, ndërkohë që jemi përballur me një palë që më shumë sesa për reformën kanë qenë të interesuar për t’i lënë një faturë opozitës, me të cilën të konkurrojnë në zgjedhjet e ardhshme. Pikërisht për këtë arsye edhe ne kemi qenë të kujdesshëm dhe kemi dashur që në çdo moment publiku të njihet mbi qëndrimet kontradiktore të shumicës. Rasti më i fundit ishte një ditë më parë, negociatori ynë, z.Bylykbashi, ka qenë prezent deri në orën 2 të mëngjesit kur edhe është arritur një dakordësi dhe në kohën kur është arritur marrëveshja, negociatori i tyre ka nxjerrë një tjetër arsyetim për ta rrëzuar konsensusin.

Majlinda Bregu: E thashë edhe në mbledhjen e një jave më parë dhe dua ta përsëris edhe sot. Partia Demokratike nuk duhet të mbajë një peshë shumë të madhe, që për më tepër edhe nuk i takon dhe që lidhet me mosvotimin e Reformës në Drejtësi. Ne nuk mund t’u dalim kundër ambasadorëve dhe jo më t’i shpallim “luftë” Ambasadës së SHBA-ve. Qëndrimi ynë si forcë politike duhet të jetë i qartë dhe unë mendoj se nga kjo mbledhje duhet të dalim me një vendim për të miratuar si Grup Parlamentar Reformën në Drejtësi. Nuk shoh se ka vend për të bërë diversion dhe përllogaritje në raport me forca të tjera politike. Edhe kjo çështja teknike e fundit që ka ngelur në lidhje me rolin e ndërkombëtarëve në procesin e vetingut besoj se duhet të marrë fund. Janë histori të vjetruara këto që kanë qarkulluar këto ditë dhe mbi bazën e të cilave janë zhvilluar diskutimet e fundit. Filmat me diversantë dhe desantë ajrorë i kemi lënë pas qëkur ishim fëmijë. Ndaj edhe vota e PD-së të mos lihet për në momentin e fundit, por të deklarohet hapur pro reformës në Kuvend. Sepse kam parë ditët e fundit se fillimisht është parë qëndrimi i Ilir Metës dhe LSI-së për reformën dhe më pas ka dalë me deklarata mbështetëse edhe PD-së. Po ne nuk kemi pse të jemi të varur me forca të tjera jashtë spektrit tonë politik dhe për më tepër me forca që nuk janë pjesë e koalicionit opozitar. Ne koalicionin e kemi me shqiptarët. Ata e duan reformën, ata na ndëshkojnë me votë nëse fatura e dështimit të kësaj reforme na ngelet ne.

Lulzim Basha: Jam plotësisht dakord! Për këtë çështje po negociojmë. Ne si forcë politike edhe publikisht e kemi deklaruar se jemi që Reforma në Drejtësi të kalojë, por të kalojë përmes konsensusit.

Majlinda Bregu: Thatë se ka pasur një tërheqje nga maxhoranca pas negociatave që kanë zgjatur deri në orën 02:00 të mëngjesit. Unë propozoj që të kërkohet që të zbardhen procesverbalet e asaj mbledhjeje dhe opozita t’i bëjë publike ato në media. E kam thënë edhe vazhdoj ta përsëris, duhet të investohemi që kjo faturë, kjo përgjegjësi për reformën të mos bie mbi ne.

Lulzim Basha: Patjetër, edhe kjo mund të jetë një formë. T’i marrim ato procesverbale t’jua vëmë në dispozicion juve si deputetë, por edhe medias.

Astrit Patozi: Përtej faktit që PD-ja është në një pozicion të panatyrshëm si në konflikt me Perëndimin, kam edhe një shqetësim tjetër. Tani nuk ka më kohë për të shpjeguar detajet, ku kemi ngecur, edhe sikur ne të kemi të drejtë. Tani duhet marrë një vendim i qartë politik, sepse retorika nuk ka me asnjë vlerë, sepse të gjithë janë të lodhur nga gati dy vjet debate. Në këtë forum ne duhet të jemi të sinqertë me njëri-tjetrin dhe duhet ta themi se nuk është më çështje parimesh, por pragmatizmi politik. Sepse vetëm për parime nuk mund të flitet më në politikën shqiptare. Dhe duhet ta pranojmë se edhe ne nuk jemi të larë në këtë histori, se kemi edhe ne njollat tona të errëta në këto vite apo në këtë proces, pavarësisht se kundërshtari mund të ketë bërë më shumë gjynahe. Shembulli më tipik ishte kur dikush mbrëmë tha se unë nuk jam ai që isha dje dhe ju e dini për kë e kam fjalën. Pra, vetëm pragmatizmi ngelet të merret në konsideratë. Dhe pyetja ime është nëse i kemi ne votat për ta ndalur atë që sipas nesh është e pavotueshme? Sepse do të ishte dyfish e rënde që reforma të kalojë dhe ne të votojmë kundër. Unë sërish këmbëngul që konsensusi është i mundur dhe ne duhet ta kërkojmë. Por edhe në rast se nuk e arrijmë, ne nuk duhet të votojmë kundër një reforme që mund të kalojë edhe pa ne.

Genc Ruli: Kam lexuar në lidhje me kushtet që do të duhet të pranoj një person që do të punojë në Prokurorinë Speciale. Dhe të jem i sinqertë, nuk e konceptoj se si njeri me vullnet të pranojë të jetë i përgjuar përgjatë gjithë kohës. Për më tepër, të përgjohet jo vetëm ai, por edhe familjarë të tij. Unë besoj se asnjë njeri i ndershëm nuk do të pranonte të ishte i përgjuar dhe i survejuar gjatë gjithë kohës, t’i përgjohej bashkëshortja, t’i përgjohej vajza etj.

JUXHIN MUSTAFAJ

  • twitter
  • facebook
  • linkedin
Fjalë kyçe: , , , ,

Komentet

Lajme të ngjashëm

Buxheti 2025- Buxhuku: Është bërë i shkëputur nga politikat ekonomike, i dobët nga ana profesionale. PS e mendon të lehtë fitoren në zgjedhje

Kreu i Konfindustrisë Gjergj Buxhuku, në një intervistë me Skype në News 24 foli për projekt-buxhetin 2025.

Buxhuku deklaroi se buxheti është bërë i shkëputur nga politikat ekonomike, duke shtuar se është i dobët nga ana profesionale. Sipas Buxhukut, PS mendon se e ka të lehtë fitoren, prandaj dhe debatin për projekt-buxhetin e ka marrë lehtë.

Gjergj Buxhuku, kreu i Konfindustrisë: Është buxhet afër 8.2 miliardë euro. Projektbuxheti është bërë i shkëputur nga politikat ekonomike. Shqipëria ka pensionet në nivele tepër të ulëta. Nëse ka rritje ekonomike, kjo duhet të reflektohet në mirëqënie më të mirë të qytetarëve.

 

Paratë që jepen për pensionet për politikën konsiderohen “para të humbura”. Shqipëria ka nevojë për debat për analizën ekonomike në vend. Ky është buxhet i dobët nga ana profesionale, ngaqë PS pret fitore të lehtë në zgjedhje.bw

Shuhet politikani dhe drejtuesi i shoqatës ‘Tirana’, Arben Tafaj- Këlliçi: Ngushëllimet më të sinqerta për familjen

Drejtuesi politik i PD për Qarkun Tiranë, Belind Këlliçi, në një postim në Facebook ka shprehur ngushëllime për humbjen nga jeta të politikanit dhe aktivistit të njohur Arben Tafaj, i cili u nda nga jeta ditën e sotme.

Si anëtar i Këshillit Bashkiak Tiranë ai ishte një përfaqësues i palodhur i qytetarëve dhe një derë e hapur për këdo që kishte një shqetësim. Pa Arbenin, Tirana është sot më e varfër, me një referencë që do të na mungojë të gjithëve’– shkruan Këlliçi.

Postimi:

Me hidhërim të thellë mora vesh lajmin për ndarjen para kohe nga jeta të mikut, qytetarit, familjarit, bashkëpunëtorit, politikanit dhe aktivistit të palodhur për Tiranën tonë, z. Arben Tafaj.

Arben Tafaj bëri kaq shumë për qytetin, kontribuoi për vlerat më të mira që ne të gjithë aspirojmë e luftojmë për to. Si kryetar i “Shoqatës Tirana”, punoi pa u lodhur për të ruajtur trashëgiminë, shpirtin e qytetit e autenticitetin tiranas. Po gjithnjë duke përkrahur bashkëjetesën dhe frymën e miqësisë me secilin komunitet.Si anëtar i Këshillit Bashkiak Tiranë ai ishte një përfaqësues i palodhur i qytetarëve dhe një derë e hapur për këdo që kishte një shqetësim.

Pa Arbenin, Tirana është sot më e varfër, me një referencë që do të na mungojë të gjithëve.

Por ai ka lënë pas shumë punë të mira e rezultate dinjitoze, kujtime dhe vlera, siç është dhe dera e madhe Tafaj, nga ai vjen.

Ngushëllimet më të sinqerta për familjen, miqtë e të afërmit.

Qofsh i Parajsës mik i mirë [🙏🏻]

Berisha kërkon një minutë heshtje në nder të Sami Repishtit, e gjithë salla në këmbë, nderon figurën e profesorit

Kuvendi ka mbajtur sot një minutë heshtje për ndarjen nga jeta të profesorit Sami Repishti, akt ky i propozuar nga kreu i PD Sali Berisha.

“Një kolos i mendimit intelektual shqiptar, një avokat i pamposhtur i çështjes kombëtare, një luftëtar i paepur kundër diktaturës komuniste, një martir i gjallë”, u shpreh Berisha.

Prof. Sami Repishti lindi në Shkodër, Shqipëri, në vitin 1925; në Shkodër kreu studimet fillore e të mesme. Studimet universitare për histori moderne i filloi në Universitetin e Firenzes, Itali. Student 14 vjeçar u aktivizue në demonstratat e 7 prillit 1939 dhe ma vonë në lëvizjen e rezistencës kundër pushtuesve fashistë italianë dhe nazistë gjermanë. I zhgënjyem nga propaganda dhe ushtrimi i terrorit masiv komunist, ai mbeti demokrat parimor dhe intelektual jokonformist. Gjatë L2B humbi babën, viktimë e terrorit fashist, dhe kushërinin, viktimë e terrorit nazist.

 

Që nga viti 1945, me ardhjen e pushtetit diktatorial stalinist, ai u gjend në nji situatë që impononte, politikisht e moralisht, marrjen e nji qendrimi patriotik në lëvizjen klandestine antikomuniste. Me arrestimin e tij me 22.X.1946, studenti Repishti u torturue egërsisht për 14 muej; me 27.XI 1947 u dënue me 15 vjet burgim të randë, Më 1949, nana, motra dhe vëllai, të mitun, u internuen në Berat, dhe Veliqot, Tepelenë, viktima të komunizmit.

I liruem nga burgu, 1.VII.1956, punëtor krahu i përbuzun dhe i përndjekun, vendosi të arratisej në Jugosllavi, më 22.VIII.1959, tue lanë familjen në gjendje shumë të vështirë.

Si emigrant politik u mbajt 11 muej në izolim “incommunicado”, u dërgue në kampin Gerovo, Kroaci, u përjashtue në Itali më 1.IX.1961. Emigroi në Amerikë, 9.IV.1962. Në Botën e Lirë, refugjati Sami Repishti iu nënshtrue nji arsimimi rigoroz, dhe fitoi diplomën B.A.(1964), dhe M.A.(1969) pranë Queens College., dhe Ph.D. (Universiteti “la Sorbonne”, Paris (bursist i Qeverisë franceze) dhe Graduate Center of the City Universtiy of New York, (French, shkurt 1973). Për 26 vjet me radhë ka dhanë mësim në gjimnazet amerikane, kryetar i departmentit për gjuhët e hueja (1974-1990) dhe pedagog i jashtëm pranë Adelphi University, N.Y. (1972-1978).

Dr. Sami Repishti ashtë autor, kryesisht i dy vëllimeve: “Pika Loti-Tregime burgu” (1997), dhe “Nën hijen e Rozafës-Narrativë e jetueme” (2004) bashkautor dhe publicist me shkrime për problemin e “Shqipërisë Lindore”, Kosova e lirë u ba leitmotivi i jetës tij.

I aktivizuem në lamin politik, ai bashkëthemeloi e drejtoi disa organizata shqiptaro-amerikane: nga këta Rinia Shqiptare-Kosovare në Botën e Lirë dhe Këshilli Kombëtar Shqiptar-Amerikan (N.A.A.C) për shumë vite kanë qenë dy grupimet politike ma efektivë në emigracion. Në vitin 1965, ai ka dëshmue para Kongresit Amerikan për probleme kombëtare shqiptare, me lidhje të vazhdueshme me Departamentin e Shtetit dhe Shtëpinë e Bardhë. Prof. Repishti ashtë dekorue disa herë nga qeveritë shqiptare, amerikane, dhe kosovare.

Akti rebel që pothuejse e vrau, e çliroi njikohësisht. Si i ri, ai u ndërgjegjsue për rolin e tij, nga dashunia për atdhe dhe etja për liri, nji i ri me sensibilitet të theksuem, besnik i vetëvetes, i jetës me dinjitet. Gjatë udhës, ai njohu ma mirë “Njeriun”, krijesën fisnike. Udhëtimi e solli në botën e nëntokës komuniste ku takoi viktimën dhe e deshti me pasion, nji dashuni për Krijesën që mundi edhe kercënimin e vdekjes,….

Sot, ai largohet nga kjo botë i shqetësuem që akoma nuk ka nji punë të organizueme me shkye perden e konspiracionit komunist. Akoma sot, Shqipëria nuk e ka pranue fajin publikisht: ajo jeton me nji ndërgjegje të randueme. Kjo gjendje fluide frikëson mendjet e ndrituna që kanë përqafue demokracinë. Në qoftë se akoma refuzojmë me përballue demonët e së kaluemes, breznitë e ardhme do të pësojnë rrjedhimet e paevitueshme.

Dr. Repishti ka folë, ka shkrue, ka denoncue pa kompromis këtë tragjedi që shtrembnon çdo gja dhe çdo mendim dhe shtron pyetjen a do të jemi në gjendje me rikrijue nji bashkësi vëllazënish e motrash të lirë, të ndërgjegjshëm për rolin e tyne në shoqëni e kryesisht të çliruem nga frika e persekutimit të organizuem shtetnor të “shtetit tonë”?

Pasiviteti sot mundëson ushtrimin e dhunës kundër të pafajshmit e lejon kryqëzimin e pafajnisë! Zemrat e djeguna si ajo e Sami Repishtit nuk gjejnë ngushëllim derisa të gjindet nji përgjigje.

Sot, ai largohet nga kjo botë me shqetësimin se Shqipëria lëkundet në mes të së vjetrës që nuk jep shpirt, dhe së resë pa fuqi me lindë. Ai do të lutet për nji rilindje premtuese – me ndihmën e Zotit!

Sot, ai largohet me dashuni për të gjithë, veçanërisht për herojt, dëshmorët e viktimët e regjimeve totalitare në Shqipëri dhe pa urrrejtje për të gabuemët dhe të mashtruemët.

Ai largohet tue çfaq mirënjohjen e tij të pakufishme për prindët e vet, Hava dhe Hafiz Ibrahim Repishti, dy viktima të diktaturave, për motrat Fejzije, Merjeme e Hadije, për vëllazënit Fahri e Vehbi e familjarët tjerë në Shqipëri që vuejtën aq shumë.

Sot, ai shpreh mirënjohjen ma të thellë për bashkëshorten e tij Diana Çipi, dashuninë e mirëkuptimin e saj të plotë; për djalin Daren e fëmijët Bryan, Julia e Nicole; për vajzën Ava Repishti-Safir, e fëmijët Åudrey T. e Ålexander H. Safir, që mundësuen rihymjen e tij në jetë “normale”, të gjithë burim gëzimi e kryenaltësie për mbi 60 vjet banimi në Shtetet e Bashkueme!

Dhashtë Zoti paqë në botë dhe mirëkuptim në mes të njerëzimit!

VLERESIME
– 4.IX.1986 –“…For as long as people like Dr. Repishti who has spent eleven years in Communist jails escape and seek refuge in the United States, the country of his freedom, our Nation and Democracy will flourish…” George W. Bush, N/President of the United States of America

-16.V.1995 –“I përkushtuar që në moshë të re çeshtjes së drejtësisë shoqërore, armik i betuar i diktaturës komuniste, intelektual dhe studjues erudit që të gjithë veprimtarinë e tij të pandërprerë e vuri në sherbim të çeshtjes kombëtare, të zhvillimit të kulturës shqiptare, mbrojti interesat kombëtare, sidomos punoi me përkushtim për të njohur të drejtat legjitime të popullit tonë në Kosovë, duke arritur që çeshtjen kosovare ta ndërkombëtarizojë në qarqet më të larta shtetrore të Evropës, të Amerikës dhe në Organizatat Ndërkombëtare”.
Dr.Sali Berisha,President, Repubika e Shqipërisë.

-15.VI.1996- “I dashur Sami, Jam i bindur se e kemi të përbashkët gëzimin për hapjen e Zyrës Informative Amerikane në Prishtinë, për të cilën Ju jeni angazhuar dhe keni punuar me terë qenien bashkë me miq amerikanë dhe veprimtarë të çeshtjes së Kosovës dhe të kauzës shqiptare në SH.B.A. Hapja e kësaj Zyre në Prishtinë padyshim ashtë kurorëzimi dhe sukses i juaji, prandej me lejoni t’ju shpreh përgëzimet më të përzemërta. Besoj se ju me dijen, përvojen dhe kurajon e pashembullt do të punoni edhe në të ardhmen për sensibilizimin e opinionit shtetror e publik amerikan për pavarësinë e Kosovës dhe çeshtjen shqiptare në përgjithësi. Në emër të popullit të Republikës së Kosovës dhe emrin tim personal, Ju falënderojmë edhe një herë për punën e madhe që bëni në Amerikë dhe ju urojmë shëndet”
Dr.Ibrahim Rugova, Kryetar,Republika. e Kosovës.

-6.VIII.1997- “Dear Sami: Thank you for your Letter of June 12 (1997) regarding the situation of ethnic Albanians in the Balkans… My Administration is equally concerned about human rights abuses, particularly with regard to Kosovo. Again, thank you for your active interest in this important issue”.
Sincerely, Bill Clinton” President of the United States of America

– 5.IX.2001-(The liberation of Kosova)…could not have prevailed had not you and the others spent years patiently educating the American public, and more important our political leaders, of the serious problem posed by Serb repression of the Albanians there. You maybe justly proud of what you have accomplished. No, you did not do it single-handedly, but I doubt that without your long efforts American political leaders could have acted as they did. With warm personal regards,
Sincerely,
Bill Ryerson” first US Ambassador to Albania (1991-1994)

– 25.XII.2003-“…Për mendimin tim, prof. dr. Sami Repishti qendron në krye të intelektualëve të diasporës shqiptaro-amerikane. Ai është pasardhës i denjë i Rilindasve sepse ka zbatuar me besnikëri idealet e tyre të larta”.
Peter R.Prifti, autor dhe historian.

– Korrik 2015- “Ju jeni njeriu që idealeve për shqiptarizëm u mbete besnik, dhe kështu i bëre borxh kombit tonë. Nji jetë e terë në shërbim të kombit; kjo është madhështia tek ju, misioni fisnik dhe jo i dalun mode…Ju jeni intelektuali me forma të mirëfillëta, luftar i thekur për demokraci në kuptimin e plotë të fjalës, kundër komunizmit pa kursim, e qendrim herkulian…”
Dr.Bujar Bukoshi, KM i Kosovës

– 17.VII.2015- “… Bejmë urimet tona duke kujtuar kontributin në luftën kundër totalitarizmit enverist, përpjekjet fisnike për Kosovën, punën e rrallë e të lavdrueshme në të mirën e kulturës shqiptare, ku veçojmë librat tuaj me karakter autobiografik”.
Ismail Kadare e Elena Kadare, dy monumentë të kulturës shqiptare.

– 15.IX.2016- “Me mirënjohje për vuajtjet dhe sakrificat e parrëfyeshme, përpjekjet mbinjerëzore dhe qendresën stoike ndaj diktaturës komuniste. Në nderim të veprimtarisë së palodhun atdhetare për çeshtjen kombëtare, si dhe në respekt të rolit dhe kontributit të çmuar dhënë për dekada me radhë si veprimtar i shquar i të drejtave të njeriut, farkëtues i lidhjeve të gjithanëshme shqiptaro-amerikane, duke u shndërruar në një simbol të rrallë e të vyer të shqiptarizmit”.
Bujar Nishani, President i Republikës së Shqipërisë.

– 17 .VI.2012 – “Dear Sami: One of the most important things I have done as President is read Americans like you…I would like to thank you for writing. I promise I will be there along with you continue to build a better, more prosperous, more diverse and inclusive America with a future full of hope. Thanks for writing; all the best…”
Barak Obama, President of the United States of America.

– 14..XII.2020….”Ish I burgosuri Sami Repishti është ndoshta personaliteti më i shquar dhe më i urti që shqiptarët kanë sot në SHBA. Sami Repishti është i dënuar politik, i arratisur nga Shqipëria në kohën kur komunistët e gëzonin pushtetin” Gazeta PANORAMA, Tiranë.

– 6.I.2021- Kjo dashuri famiijare dhe njerëzore që buroi pashterrësisht prej jush…jane çelsi i artë i jetës suej plot talandi, stuhi, e sukseseshme dëshmuar në veprat e jueja që mbeten vlerë kombëtare e mësimdhenëse për brezat e rij.”
Fotaq Åndrea, autor, ish Ambasador i R.Sh. pranë UNESCO. sn

110 milionë euro Becchettit- Grupi i PD kërkon interpelancë urgjente me Kryeministrin për ekzekutimin e pagesës…

Grupi Parlamentar i Partisë Demokratike, kërkon interpelancë urgjente me Kryeministrin për egzekutimin e pagesës 110 milionë euro të shtetit shqiptar për biznesmenin Becchetti.

Në një shkresë drejtuar Kryetares së Kuvendit Gazment Bardhi shkruan se “Megjithëse, Kryeministri Edi Rama dhe ish-Ministri i Financave Arben Ahmetaj e kanë mohuar në vazhdimësi se Shqipëria do të paguante dëmshpërblimin prej 110 milionë euro sipërmarrësit Becchetti dhe ortakëve të tij, proceset e iniciuara nga qeveria shqiptare pranë ICSID dhe tribunaleve të tjera ndërkombëtare nuk arritën të prodhonin asnjë ndryshim, sa i përket detyrimit të qartë të shtetit shqiptar për shlyerjen e plotë të faturës financiare të mbylljes dhe shkatërrimit të televizionit Agonset”.

“Në javën e dytë të nëntorit, mediat shqiptare raportuan gjërësisht se një përmbarues belg kishte arritur të ekzekutonte vlerën e plotë të dëmit në favor të biznesmenit italian nëpërmjet fondeve të Albcontrol, që mbaheshin të bllokuara në llogarinë e Eurocontrol prej dhjetorit 2020”. “Sipas raportimeve mediatike, në 12 nëntor 2024, Eurocontrol ka njoftuar zyrtarisht qeverinë shqiptare dhe kompaninë Albcontrol për kryerjen e ekzekutimit të plotë tëvendimit të ICSID”.

Kërkesa

Znj. Kryetare e Kuvendit,

Në prill 2021, opinioni publik shqiptar është njohur me vendimin “Becchetti dhe të tjerë kundër Shqipërisë”, të marrë nga Qendra për Zgjidhjen e Mosmarrëveshjeve të Investimeve pranë Bankës Botërore (ICSID), e cila kishte vendosur t’iu akordonte palëve paditëse një dëmshpërblim në vlerën 110 milionë euro nga Republika e Shqipërisë, përfshirë interesat dhe shpenzimet gjyqësore.

Ky shpërblim iu akordua palëve paditëse Becchetti dhe të tjerë, pasi nga faktet dhe provat e vëna në dispozicion, ICSID ka konstatuar se si rezultat i veprimeve të paligjshme të zyrtarëve të lartë shtetërorë, ku përfshihen Edi Rama, me detyrë kryeministër i Shqipërisë, Erion Veliaj, me detyrë Kryetar i Bashkisë Tiranë dhe Ëngjëll Agaci, me detyrë Sekretar i Përgjithshëm i Këshillit të Ministrave, në bashkëpunim me zyrtarë të tjerë të një rangu më të ulët si Enkelejd Joti, me detyrë drejtor i Qendrës Spitalore Universitare “Nënë Tereza” (asokohe), ish-drejtor i përgjithshëm i Top Channel, shtetasi Skerdi Drenova, me detyrë administrator i Operator të Sistemit të Transmetimit (asokohe), ish-zëvëndësdrejtor i përgjithshëm i Top Channel dhe shtetasi Gentian Sala, kryetar i Autoritetit të Mediave Audiovizive (asokohe), ish-drejtor i Top Channel dhe Digitalb, sipërmarrjet e biznesmenit italian Becchetti janë shkatërruar plotësisht.

Konkretisht ICSID, pasi shqyrtoi mesazhin e dërguar në datën 5 shtator 2014, nga Erion Veliaj, ish-Ministër i Mirëqënies Sociale dhe Rinisë, bisedën e zhvilluar në fillim të vitit 2014 me Ëngjëll Agacin, Sekretar i Përgjithshëm i Këshillit të Ministrave, statusin në Facebook të Edi Ramës, Kryeministër i Shqipërisë dhe deklaratat e tij në medianë qershor 2015, arriti në përfundimin se vendimi i sekuestrimit të Agonset ishte finalizimi i një fushate politike kundër sipërmarrësit Becchetti dhe ortakëve të tij. Për ICSID ishte e qartë se në këtë rast nuk kemi pasur të bëjmë me një proces të rregullt ligjor, por vetëm me një proces të motivuar politikisht, që kishte për qëllim mbylljen e televizionit dhe shkatërrimin e sipërmarrjeve të biznesmenit italian Francesco Becchetti në Shqipëri (shih paragrafin 724 të vendimit).

Megjithëse, Kryeministri Edi Rama dhe ish-Ministri i Financave Arben Ahmetaj e kanë mohuar në vazhdimësi se Shqipëria do të paguante dëmshpërblimin prej 110 milionë euro sipërmarrësit Becchetti dhe ortakëve të tij, proceset e iniciuara nga qeveria shqiptare pranë ICSID dhe tribunaleve të tjera ndërkombëtare nuk arritën të prodhonin asnjë ndryshim, sa i përket detyrimit të qartë të shtetit shqiptar për shlyerjen e plotë të faturës financiare të mbylljes dhe shkatërrimit të televizionit Agonset. Në javën e dytë të nëntorit, mediat shqiptare raportuan gjërësisht se një përmbarues belg kishte arritur të ekzekutonte vlerën e plotë të dëmit në favor të biznesmenit italian nëpërmjet fondeve të Albcontrol, që mbaheshin të bllokuara në llogarinë e Eurocontrol prej dhjetorit 2020. Sipas raportimeve mediatike, në 12 nëntor 2024, Eurocontrol ka njoftuar zyrtarisht qeverinë shqiptare dhe kompaninë Albcontrol për kryerjen e ekzekutimit të plotë tëvendimit të ICSID.

Megjithatë, deri në datën e paraqitjes së kësaj kërkese, nga ana e qeverisë shqiptare dhe kompanisë Albcontrol nuk ka pasur asnjë reagim a qëndrim zyrtar sa i përket vërtetësisë së raportimeve mediatike dhe në funksion të transparencës së plotë me taksapaguesit shqiptarë, të cilët për shkak të veprimeve arbitrare e të paligjshme të kryera nga zyrtarë të lartë të shtetit shqiptar, si Kryeministri, Kryebashkiaku i Tiranës dhe Sekretari i Përgjithshëm i qeverisë duhet të shlyejnë faturën më të lartë në historinë e arbitrazheve ndërkombëtare me palë shtetin shqiptar. Qeveria dhe kompania Albcontrol kanë për detyrë të informojnë Kuvendin e Shqipërisë, dhe nëpërmjet tij qytetarët shqiptarë lidhur me vërtetësinë e këtij procesi, përgjegjësit dhe pasojat e këtij dëmi kaq të lartë financiar.

Prandaj, duke pasur parasysh sa më sipër, në cilësinë e kryetarit të Grupit Parlamentar të Partisë Demokratike, në mbështetje të nenit 80 të Kushtetutës së Shqipërisë dhe neni 97 të Rregullores së Kuvendit, kërkojmë zhvillimin e një interpelance urgjente me Kryeministrin e Shqipërisë Edi Rama, me qëllim dhënien e informacioneve dhe shpjegimeve të detajuara lidhur me ekzekutimin e vendimit “Becchetti dhe të tjerë kundër Shqipërisë”, të Qendrës për Zgjidhjen e Mosmarrëveshjeve të Investimeve (ICSID). sn

 

Dumani: Kemi zbuluar lidhje të zyrtarëve me krimin e organizuar. Ose janë korruptuar ose janë anëtarë bandash

Kreu i SPAK, Altin Dumani, u shpreh se SPAK ka bashkëpunime me shumicën e vendeve të BE-së, ndërsa theksoi se Prokuroria Speciale ka rritur hetimet proaktive. Në këtë kuadër, Dumani tha se shtylla e suksesit të SPAK është bashkëpunimi ndërkombëtar. Dumani tha se nga hetimet për krimin e organizuar kemi evidentuar lidhjet e krimit me zyrtarë të niveleve të ndryshme, që janë korruptuar apo janë bërë pjesë e grupeve të krimit të organizuar.

“SPAK duhet të fokusohet në çështjet më të ndjeshme dhe që janë më vështirë për t’u hetuar”, u shpreh Dumani.

Ai tha se në fund të këtij viti SPAK do të përfaqësojë rolin e Komisionerit Publik në rastet kur mund të ketë ankesa në KPA ndaj vendimeve të KPK për gjyqtarët dhe prokurorët, përsa i takon procesit të Vetting.

 

“Kemi nevojë për bashkëpunimin e institucioneve të tjera në luftën ndaj korrupsionit”, tha Dumani, duke theksuar se korrupsioni nuk mund të luftohet i vetëm nga SPAK.

Duke marrë fjalën në takimin e Komisionit të Monitorimit të Këshillit të Europës,  tha se SPAK ka sekuestruar e konfiskuar 150 mln euro asete.

“SPAK është në vijën e parë të luftës ndaj korrupsionit, duke ndjekur një qasje të bazuar në transparencë bashkëpunim ndërkombëtar dhe rezultate konkrete. Pavarësia institucioneve, kapacitetet njerëzore dhe teknike kanë dhënë rezultate premtuese që janë përkthyer në çështje konkrete.

Krahas ushtrimit të ndjekjes penale për zyrtarë të lartë, SPAK ka në fokus edhe luftën kundër krimit të organizuar, ku falë bashkëpunimit me agjenci të huaja të zbatimit të ligjit, kemi bërë të mundur të godasim grupe të ndryshme kriminale, organizata të ndryshme kriminale të përfshirë në krime të dhunshme apo trafik droge. Krahas ushtrimit të ndjekjes penale, në fokus të SPAK është edhe identifikimi dhe konfiskimi i produkteve te veprës penale si për subjekte që janë ndjekur penalisht për veprën penale të korrupsionit dhe krimit të organizuar. Nga data e krijimit të SPAK deri ditën që flasim kemi sekuestruar një total asesh 150 mln euro”, tha Dumani.

Në fjalën e tij, kreu i SPAK tha se është ushtruar ndjekja penale ndaj zyrtarëve dhe ish-zyrtarëve të lartë, prokurorëve dhe gjyqtarëve, por edhe drejtuesve të pushtetit vendor, apo ish-drejtuesve të Bashkive.

Ai tha se numri i total i të paraburgosurve me kërkesë të SPAK është më pak se 9%.

“Kemi një laborator modern të përgjimeve, një laborator modern të ekspertizës kriminalistike, gjithashtu kemi investuar në mjete dhe teknologji bashkëkohore që na shërben në kryerjen e hetimeve të suksesshme”, tha Dumani.

Në vijim, kreu i SPAK tha se nga vitit 2020 deri në 2023 janë krijuar 32 skuadra të përbashkëta hetimore, nga të cilat 25 janë aktive. “Janë të angazhuara në hetimin e veprave të rënda nga trafiku i narkotikëve, te pastrimi i parave, kryer në bashkëpunim në formën e grupeve apo organizatave kriminale”, tha Dumani.

(BalkanWeb)

Protestë para Kryeministrisë kundër kampeve të emigrantëve, tubimi pritet të zhvendoset para ambasadës Italiane dhe delegacionit të BE

Para Kryeministrisë, në bulevardin Dëshmorët e Kombit, një grup të rinjsh po protestojë kundër marrëveshjes mes qeverisë shqiptare dhe asaj italiane, lidhur me qendrat pritëse të emigrantëve që kapen në det nga autoritetet e shtetit fqinj.

proteste

Të rinjtë shprehesh kundër këtyre kampeve duke thirrur në kor “marrëveshja ilegale, rezistenca globale”.

Pritet, që pas tubimit para Kryeministrisë, të shkojnë dhe të protestojnë tek Ambasada Italiane në Tiranë si dhe te delegacioni i BE.

protesteee

Kujtojmë se aktualisht në dy kampet që hapën dyert në tetor, nuk ka asnjë emigrant. Kjo për shkak se në dy raste që janë sjellë emigrantët, me vendim të një gjykate në Romë, ata janë kthyer sërish në Itali.

kampet ne gjader shengjin

Panorama

Kundër dhunimit të të drejtave të njeriut, qindra aktivistë të shoqërisë civile në Itali dhe Shqipëri protestë në Shëngjin për emigrantët

Aktivistë të shoqërisë civile në Itali dhe në Shqipëri janë bërë bashkë në një protestë kundër dhunimit të të drejtave të njeriut ndaj emigrantëve të ndaluar në brigjet italiane dhe planit për t’i dërguar në kampin e Gjadrit.

Protesta e tyre ka nisur në Shëngjin aty ku është qëndra e pritjes së emigrantëve për të vijuar më pas në Gjadër aty ku është vendosur kampi i emigrantëve. Pas dy lundrimeve të pasuksesshme më 15 tetor dhe 8 nëntor, kur anija Libra solli 16 dhe 8 emigrantë në Shëngjin, ndalimi i të cilëve u anulua më pas nga gjykata e Romës, qendrat tani janë bosh. bw

“U cënua siguria kombëtare e e Kosovës”- Sulmi në Zubin Potok, Begaj bisedë me Osmanin: Dënoj ashpër sulmin terrorist!

Presidenti i Republikës së Shqipërisë Bajram Begaj zhvilloi një bisedë telefonike me Presidenten e Republikës së Kosovës, znj. Vjosa Osmani ku dënoi ashpër aktet terroriste me lëndë eksplozive mbi Kanalin e Ibër-Lepenci që synojnë shkatërrimin e infrastrukturës kritike të Kosovës e cënon sigurinë kombëtare të Kosovës.

Presidenti mbështet fuqishëm të gjitha përpjekjet e Republikës së Kosovës për përballimin e situatës dhe hetimin e ndëshkimin e plotë të këtij akti sabotues e terrorist.

Një shpërthim i fuqishëm ndodhi të premten mbrëma në fshatin Varagë të Zubin Potokut, duke dëmtuar rëndë kanalin e ujit të Ibër-Lepencit.

Ky kanal është thelbësor për furnizimin me ujë të pijshëm për rreth 700 mijë banorë të Kosovës dhe për ftohjen e turbinave të termocentraleve të KEK-ut.

Kryetari i Zubin Potokut, Izmir Zeqiri, konfirmoi se shpërthimi ka shkaktuar dëme materiale të konsiderueshme, përfshirë përmbytjen një shtëpie.

“Në kanalin e Ibër-lepencit, në kanalin që përcjell ujin prej liqenit të Ujmanit dhe natyrisht është shumë jetik për qytetarët kjo rrjedhje e ujit. Është bërë dëmin bukur i rëndë në këtë kanal.

Pasojat janë të mëdha munden me qenë. Ekipet janë në terren, Ibër-Lepenci, polica, zjarrfikësit e të gjitha për të vlerësuar dëmin dhe sanimin  e dëmit.

Disa qytetarët kanë pësuar edhe nga rrjedha e ujit. Uji ka vërshuar shtëpinë e janë qytetari aty dhe ka bërë dëme materiale koxha shumë. Mirëpo dëme në njerëz nuk ka. Bëhet fjalë për qytetarë serbë, u informova edh prej tyre nëse kanë dëgjuar një shpërthim të madh”, ka thënë Zeqiri. bw

U godit 4 herë me thikë në sherrin ku u vra Martin Cani, del nga spitali 14-vjeçari Luis Meçja

11 ditë pas ngjarjes së rëndë te shkolla “Fan Noli” ku humbi jetën 14-vjeçari Martin Cani, ka dalë nga spitali shoku i viktimës, Luis Meçja, i cili u plagos në përballje me autorin.

Lajmi konfirmohet për BalkanWeb nga gazetarja Klodiana Lala.

Vrasja- Nga Manastirliu, te Proda e Felaj, emrat që fshihen pas gjakut të 14-vjeçarit

Dhjetë ditë pas vrasjes së 14-vjeçarit Martin Cani pranë shkollës 9-vjeçare “Fan Noli” në Tiranë, nga autori i dyshuar, M. Përlleshaj, dhimbjes së pakufijshme të familjes dhe trishtimit të madh që përfshiu opinionin publik, i është shtuar edhe dyshimi i fortë mbi mos-reagimin, madje edhe akuza më të rënda për fshehje të krimit, nga ana e institucioneve arsimore dhe ato ligjzbatuese.

Të paktën tre protesta qytetare para Ministrisë së Arsimit nuk e kanë luajtur aspak këtë institucion të marrë masa ose më së paku të tregojë nëse ka zhvilluar një hetim administrativ dhe cilat janë konkluzionet e mundshme mbi stafin pedagogjik dhe drejtuesit e shkollës.

Nën parimin “gjithçka harrohet shpejt”, Ministrja Ogerta Manastirliu dhe bashkëpunëtorët e saj po paraqesin në media plane e projekte për rritjen e sigurisë në shkolla, pa thënë më parë se çfarë dështoi në rastin e vrasjes së 14-vjeçarit.

Por, kur ka kaluar më shumë se një javë nga ngjarja tragjike, akuzat më të rënda publike po ngrihen mbi institucionet ligjzbatuese, Policinë në radhë të parë, e më tej Prokurorinë.

Për ngjarjen, tashmë është arrestua M. Përlleshaj, si autor i dyshuar. Por, të dhëna publike, të deklaruara nga aktorë të dorës së parë në ngjarje, flasin edhe për më së paku një autor tjetër, po 14-vjeçar.

Në sherrin mes të miturve, krahas vrasjes së M. Canit, ka mbetur i plagosur edhe një miku i tij, L. M., i cili prej ditësh qëndron në regjim spitalor. Babai i të plagosurit, por edhe vetë i dëmtuari i mitur, kanë deklaruar që në ditët e para se në sherr ka qenë edhe një goditës i dytë, K. Bekaj, gjithashtu 14-vjeçar.

Ky deklarim është një akuzë shumë e rëndë për Policinë, për atë të Tiranës, por edhe për Drejtorinë e Përgjithshme.

Pas gjithë këtyre ditëve, Policia nuk rezulton të ketë kryer veprime hetimore ndaj këtij personazhi që dyshohet si “goditës i dytë” me thikë.

Madje, në një reagim pas deklaratave publike të babait të djaloshit të plagosur, Policia reagoi në mënyrë cinike dhe kërcënuese.

“Policia e Shtetit vëren se burime të caktuara janë angazhuar në një fushatë mediatike dizinformimi, lidhur me vrasjen e 14-vjeçarit nga një bashkëmoshatar i tij, në një distancë rreth 200 metra nga shkolla “Fan Noli” në Tiranë”, u tha në një deklaratë të lëshuar në datën 24 nëntor, pa përmendur se “burime të caktuara dizinformimi” në fakt janë vetë i plagosuri dhe babai i tij.

Partia Demokratike në opozitë akuzoi Drejtorin e Përgjithshëm të Policisë, Ilir Proda, se po fsheh autorin e dytë të dyshuar, pasi prindërit e tij punojnë në SPAK dhe BKH.

Nuk është hera e parë për Policinë që gjendet nën akuza publike për fshehje krimesh, prishje vendngjarjesh e të tjerë.

Si rregull, veprimet e Policisë, edhe ato të dyshimtat, verifikohen dhe kontrollohen nga Prokuroria.

Në rastin konkret, prokuroria e Tiranës dhe prokurorja e çështjes, Alma Felaj, kanë mbajtur heshtje publike, nën argumentin e “zhvillimit të hetimeve” dhe “kryerjes së ekspertizave”.

Vrasja tragjike e M. Canit nuk ka elementë të sekretit hetimor. Ngjarja ka ndodhur në sy të shumë njerëzve, pjesa më e madhe e tyre të mitur të shkollës “Fan Noli”.

Policia, ashtu edhe Prokuroria, i kanë që ditën e parë emrat e personave të përfshirë, kanë dinamikën e ngjarjes, siç e ka edhe publiku, nëpërmjet dëshmive të shumë dëshmitarëve okularë.

Prokuroria ka në dorë të tregojë nëse Policia e ka fshehur ngjarjen, nëse ka shmangur persona nga përgjegjësia penale dhe, nëse ka ndodhur diçka e tillë, për cilat arsye ka vepruar në këtë mënyrë.

Por, nga ana e prokurorisë po mbahet një “heshtje peshku”, duke shtuar më shumë dyshimet se ka element të rëndësishëm të krimit që po mbahen të fshehur dhe po mbulohen.

Një postulat akademik thotë që “drejtësia jo vetëm duhet të jepet, por edhe të duket që po jepet”. Në rastin e 14-vjeçarit, M. Cani, deri më tani, “drejtësia nuk duket se po jepet”.

Ndoshta është shpejt, por gjaku i 14-vjeçarit u tha, shoqëria në përgjithësi, por sidomos prindërit nuk po arrijnë të kalojnë traumën. Ndaj, akuzat publike për “fshehje autorësie” kanë nevojë për një përgjigje. Sot, jo nesër!/Boldnews.al

“Ftoj opozitarët e rinj të na bashkohen”, Berisha thirrje Ramës pas lirimit: Krijo qeverinë teknike!

Kreu i Partisë Demokratike, Sali Berisha, mbajti fjalimin e tij të parë pas lirimit nga arresti shtëpiak, duke u drejtuar mbështetësve të tij në oborrin e selisë blu.

Ai theksoi se fitorja e tij dhe e opozitës ishte rezultat i bashkimit dhe qëndresës së demokratëve, duke i falënderuar ata për mbështetje. Megjithatë, Berisha kishte edhe një mesazh të qartë për kryeministrin Edi Rama.

Ai i bëri thirrje Ramës që të krijonte një qeveri teknike, duke e paralajmëruar se “narkopushteti” po merrte fund dhe se mosbindja civile ishte gati të vazhdonte. “Mos e zvarrit kot narkopushtetin tënd,” tha Berisha, duke shtuar se “vetë Zoti ka thënë, që të kthehem unë pastroni shtëpinë. Ne do pastrojmë shtëpinë tonë!”

 

Në fund të fjalës, Berisha ftoi edhe opozitarët e rinj dhe qytetarët e ndershëm, përfshirë ata që punojnë në administratë, të bashkohen me PD-në për të vazhduar luftën për një Shqipëri më të drejtë. “Boll keni vuajtur,” tha ai, duke siguruar se opozita do të vazhdojë të luftojë për kauzën e saj. bw

“U krye dhe kjo punë”, Berisha flet nga selia e PD: Kam thyer rekord këtë vit, 330 fjalime. Tani veprimi do jetë kryefjala ime

Kreu i PD-së Sali Berisha ka mbërritur në selinë e PD-së i pritur nga qindra mbështetës, teksa ka dhënë edhe një mesazh. Berisha tha se këtë vit ka thyer rekordin e tij për numrin e fjalimeve, 330 të tilla, por se tani veprimi do jetë kryefjala e tij.

Ai theksoi se pas një kohe të gjatë që Shqipëria nuk sheh një ditë të mirë, sot është një ditë e mirë për shqiptarët, për opozitarët, një ditë shprese.

“Të dashur miq, u krye dhe kjo punë. Në historinë e drejtësisë europiane, sot goditjet më fatale. Përshëndes çdo shqiptar me mirënjohjen më të madhe. Sot Shqipëria u ndriçuar nga rrezet e para të rikthimit të pandalshëm të demokracisë. Sot është dita kur monstrat e demokracisë Edi Rama dhe George Soros dështuan përfundimisht. Dështuan në tentativën e tyre për të shkatërruar opozitën shqiptare, në grushtin e shtetit që i bënë asaj. Sot ne së bashku, sakrifica e 330 ditëve, mundi triumfoi dhe u shpërblye.

 

Ne qëndruam për të vërtetën, për vlerat që besojmë. Pas një kohe të gjatë që Shqipëria nuk sheh një ditë të mirë, sot është një ditë e mirë për shqiptarët, për opozitarët, një ditë shprese. Por sot është një ditë e mirë dhe për ata që nuk janë opozitarë. Sepse sot nuk fitoi Sali Berisha, sot ka fituar e vërteta, ka fituar ligji dhe Kushtetuta, ka fituar Kushtetuta. Këtë vit unë kam thyer rekordin tim për numrin e fjalimeve, 330 të tilla. Tani veprimi do jetë kryefjala e Sali Berishës. Veprimi do jetë kryefjala jonë e përbashkët”, deklaroi Berisha. bw

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend