Deputeti i PD, Bujar Leskaj ka ngritur disa shqetësime lidhur me rrezikun që i kanosen qytetit të Vlorës nga TEC-et e lundruese, që siç ka paralajmëruar kryeministri Edi Rama, do të përdoren për prodhimin e energjisë elektrike pas disa javësh.

Në një postim në rrjetet sociale, Leskaj rendit si shqetësuese teknologjinë e vjetër të këtyre anijeve që shërbejnë si TEC-e, kostoja më e lartë se energjia që prodhojnë duke përllogaritur rreth 63 mijë dollarë shpenzime në ditë apo dhe ndotja që shkaktojnë në mjedis në dëm të turizmit.

“Këtë ndotje taksapaguesit shqiptarë do ta paguajnë 63.000 USD në ditë! Këtë ndotje të mjedisit, këtë dëm të turizmit, këtë korrupsion e shpërdorim sekti Rama përsëri do ta hedhë mbi shpinën e qytetarëve shqiptarë! Kësaj katastrofe duhet t’i themi NDAL! Për të gjitha këto fakte duhet të mbështesim ambientalistët dhe shoqërinë civile, të cilat po ngrenë zërin dhe po sensibilizojnë opinionin qytetar kundër një marrëzie të tillë”, shkruan Leskaj.

Reagimi
Rreziqet që i kanosen Vlorës nga TEC-et lundruese!

Së pari, anijet janë të një teknologjie shumë të vjetër. Të prodhuara në vitin 1997, si pasojë nuk përmbushin kushtet që kërkon koha sot.

Së dyti, po t’u referohemi shifrave për TEC-in lundrues mësojmë se kostoja e tij do të jetë shumë më e lartë se energjia nëpërmjet impianteve fotovoltaike, pa llogaritur koston mjedisore, si rrjedhojë e një superndotjeje, e cila do të krijohet nga djegja e naftës bruto, mazutit, pikërisht në gjirin turistik të Vlorës, duke asfiksuar industrinë e turizmit aty, duke ndotur ajtin, dëmtuar bujqësinë e blegtorinë dhe duke zhdukur plazhet. Ndërkohë duke qënë se procesi i ftohjes do bëhet në det të hapur, jeta detare në sipërfaqe të gjera në Gji të Vlorës do të zhduket.

Së treti, këto anije janë marrë me qira për dy vite. Nga shifrat e deklaruara mësohet se shteti do t’i paguajë kompanisë 63.000 $ në ditë për 2 vjet. Nëse kjo shifër do t’u jepej si subvension familjeve dhe bizneseve te vogla e të mesme, cilat do të ishin përfitimet?

Së katërti, marrëveshja parashikon se ai TEC gati 30 vjeçar që është edhe teknologji e vjetër do të mbetet në Gji të Vlorës e për të cilin do duhen shumë shpenzime të tjera për ta demontuar e për ta çuar për skrap!

Së fundmi, por jo më pak e rëndësishme. Sipas konventës së Aahrusit, ratifikuar nga Kuvendi i Shqipërisë qysh në vitin 2001 për TEC duhet kryer Vlerësim i Ndikimit në Mjedis e Social (VNMS) i pavarur dhe publiku duhet të marrë pjesë në vendimmarrje para se të bëhet kontrata. Nëse kontrata firmoset pa kryer më parë këtë procedurë kemi thjesht një krim mjedisor që dënohet me ligj.

Këtë ndotje taksapaguesit shqiptarë do ta paguajnë 63.000 USD në ditë!

Këtë ndotje të mjedisit, këtë dëm të turizmit, këtë korrupsion e shpërdorim sekti Rama përsëri do ta hedhë mbi shpinën e qytetarëve shqiptarë!

Kësaj katastrofe duhet t’i themi NDAL!

Për të gjitha këto fakte duhet të mbështesim ambientalistët dhe shoqërinë civile, të cilat po ngrenë zërin dhe po sensibilizojnë opinionin qytetar kundër një marrëzie të tillë.