Narko-shteti i Edi Ramës është në qendër të mediave në mbarë botën.

Washington Examiner , përmes një artikulli të gjatë, analizon si administrata e ish-presidentit, Joe Biden, ndihmoi narko-shtetin e Edi Ramës, amerikanët e preferuar të George Soros, dhe përndoqi politikisht deri në arrestim, liderin e njerëzve shqiptarë, Sali Berisha, me anë të prokurorëve të financuar nga miliarderi i ekstremit të largët, Soros.

Në një shkrim që bën skanerin e plotë të mënyrës se si ka funksionuar i gjithë sulmi ndaj Sali Berishës, ngjashmëria identike me rastin e Trump në SHBA, të cilat autorja e analizës, Tiana Lowe Doescher, e evidenton dhe disa lloje konkrete të krahasohen, e bën këtë analizë shteruese sa i përket mekanizmit që George Soros ka lidhje për të përndjekur liderët konservatorë në Shqipëri dhe SHBA.

 Artikulli i plotë i medias amerikane:

“Luftë juridike në Shqipëri? Si e ndihmoi Biden-i narkoshtetin e preferuar të Sorosit”

Nga Tiana Lowe Doescher

Sali Berisha i Shqipërisë është kampioni karizmatik i opozitës konservatore të vendit të tij kundër një elite të mplakur që mban pushtetin. Kur ishte në detyrë, ish-presidenti Joe Biden u përpoq ta dënonte me burgim të përjetshëm. Biden u ndihmua nga prokurorë të majtë ideologjikë, të financuar nga miliarderi George Soros. Berisha ndodhet gati 6000 km larg Shteteve të Bashkuara, në një vend pak të njohur si Shqipëria, por përvoja e tij politike ngjan me atë të presidentit Donald Trump. Ai ka luftuar kundër të njëjtit lloj kundërshtarësh dhe është përballur me të njëjtën lloj lufte juridike.

Së fundmi, kur e takova 80-vjeçarin Berisha në selinë e Partisë Demokratike Shqiptare në Tiranë, ngjashmëritë me Trump-in ishin befasuese. Nuk është thjesht kravata e tij e gjerë, e kuqe dhe e shndritshme apo flokët e tij të çelët dhe të krehur që të kujtojnë presidentin amerikan. Është edhe energjia e tij e pashteruar dhe obsesioni i tij për të kërkuar drejtësi, ose hakmarrje, ndaj armiqve të tij. Berisha ka qenë në arrest shtëpie për gati një vit, në apartamentin e tij të vogël. Për 256 ditë, ai nuk u akuzua për asnjë krim. Sipas tij, ishte qeveria amerikane nën Biden-in dhe ish-sekretarin e Shtetit Antony Blinken që e futën në këtë telash.

Me 31 janar 2019, kryeministri shqiptar Edi Rama e pyeti Berishën, i cili ishte paraardhësi i tij, nëse do të ishte i mirëpritur në SHBA.

Berisha e kaloi rininë e tij duke luftuar për të përmbysur diktaturën komuniste të Shqipërisë. Pas rënies së tiranisë, ai ishte kryeministri i demokracisë së re nga viti 2005 deri në vitin 2013. Pasi humbi postin ndaj Edi Ramës, kreut të Partisë Socialiste, Berisha ia dorëzoi drejtimin e Partisë Demokratike Lulzim Bashës, i cili ishte atëherë 44 vjeç.

Rama e kishte njohur Berishën që nga rënia e diktaturës komuniste. Në fillim të viteve ’90, Berisha ishte një figurë kyçe në çlirimin e Shqipërisë. Ndërkohë, Rama, 20 vjet më i ri, ishte një artist aspirant, i zhgënjyer nga Partia Demokratike, dhe ndodhej në Francë, duke u përpjekur të bënte karrierë si artist gjatë presidencës së Berishës. Deri në momentin kur Rama e pyeti Berishën për reputacionin e tij në SHBA, të dy e urreheshin prej vitesh.

“I thashë, ‘Po, mund të udhëtoj’,” tha Berisha. Rama iu përgjigj se Berisha nuk mund të shkonte në Amerikë sepse ishte nën sanksione për komplot kundër politikës së jashtme të SHBA-së.

Kjo nuk ishte e vërtetë. Ai nuk ishte sanksionuar dhe nuk kishte komplotuar kundër politikës së jashtme të SHBA-së. Por dy vjet më vonë, me 19 maj 2021, Blinken i vendosi Berishës një nga dënimet më të rënda që mund të japë një sekretar shteti: shpalljen “non grata”. Blinken tha se Berisha, si kryeministër, ishte “përfshirë në akte korrupsioni, si keqpërdorimi i fondeve publike dhe ndërhyrja në proceset publike, duke përdorur pushtetin e tij për përfitime personale dhe për të pasuruar aleatët e tij politikë dhe familjarët në kurriz të besimit të publikut shqiptar te institucionet qeveritare dhe zyrtarët publikë.”

Nëntë ditë më vonë, Yuri Kim, ambasadorja e Biden-it në Shqipëri, u takua dhe bisedoi me zyrtarë të Strukturës së Posaçme kundër Korrupsionit dhe Krimit të Organizuar, ose SPAK. SPAK drejton një sistem gjyqësor të themeluar në vitin 2019, si rezultat i reformave në drejtësi të vitit 2016, të financuara pjesërisht dhe të mbështetura plotësisht nga administrata Obama dhe Fondacionet Shoqëria e Hapur të familjes Soros. Kim postoi se SPAK ishte “i përkushtuar për të sjellë drejtësi dhe për të siguruar që askush të mos jetë mbi ligjin. … Qoftë për korrupsion, krim të organizuar apo zgjedhje, kohës së pandëshkueshmërisë po i vjen fundi.”

Në verë, gjithçka ishte e qartë. Kim loboi te Basha, i cili ishte lideri i Partisë Demokratike “konservatore” të Shqipërisë, që të përjashtonte Berishën dhe t’i mohonte atij mandatin për të cilin ishte rizgjedhur atë prill. Basha u dorëzua dhe e përjashtoi Berishën nga Partia Demokratike dhe nga parlamenti. Pjesa më e madhe e Partisë Demokratike u rebelua, duke e rrëzuar Bashën nga drejtimi në fund të vitit 2021 dhe duke mbështetur Berishën për të rimarrë lidershipin në fillim të vitit 2022.

Por Biden-i nuk do ta lejonte këtë të ndodhte. 

Në një intervistë të vitit 2022 për Euronews Albania, Kim paralajmëroi: “Kjo është bërë e qartë nga zëvendësndihmëssekretari Gabriel Escobar, nga sekretari Blinken dhe nga presidenti: Nuk është normale dhe nuk është e pranueshme që dikush i akuzuar për korrupsion të rëndësishëm të jetë fytyra e këtij vendi, fytyra e një partie. Nëse kjo do të ndodhte, do të kishte pasoja. Pra, ne nuk po ju themi për kë të votoni, por mendojmë se duhet të bëni zgjedhje të informuara. Dhe në këtë drejtim, e kemi bërë shumë të qartë që nëse Partia Demokratike apo ndonjë parti drejtohet ose përfaqësohet nga dikush që është shpallur nga sekretari i shtetit për korrupsion të rëndësishëm, atëherë nuk mund të prisni një marrëdhënie normale.”

Berisha akuzoi Kim-in se kishte shtyrë sistemin gjyqësor shqiptar të përdorte drejtësinë si mjet kundër tij, një akt tronditës i ndërhyrjes së huaj në zgjedhje, të cilin Kim vetë e pranoi.

“Nëse ‘ndërhyrja në procesin gjyqësor’ do të thotë inkurajimi i gjyqtarëve dhe prokurorëve që të bëjnë punën e tyre pavarësisht kërcënimeve apo joshjeve, bërja e qartë se SHBA-së do të vazhdojë të mbështesë zbatimin e reformës në drejtësi në Shqipëri, nënvizimi se askush nuk është mbi ligjin dhe theksimi se të gjithë duhet të japim kontributin tonë në luftën kundër korrupsionit dhe pandëshkueshmërisë, atëherë PO, SHBA e ka bërë dhe do të vazhdojë ta bëjë pikërisht këtë, sepse lufta kundër korrupsionit dhe përpjekjet për të minuar demokracinë përbëjnë një interes thelbësor të sigurisë kombëtare të SHBA-së,” postoi Kim në Twitter më 22 prill 2022.

Disa ditë para përfundimit të mandatit të saj në vitin 2023, Kim u takua me Altin Dumanin, kreun e SPAK-ut, dhe fushata e presionit amerikan pati sukses në vendosjen e Berishës në arrest shtëpie. Ai nuk do të akuzohej për një krim për nëntë muaj. Në fund të vitit 2024, Ilir Meta, lideri tjetër i partisë së dytë opozitare, u arrestua gjithashtu dhe u vunë nën hetim nga SPAK.

Berisha nuk është dobësuar fizikisht nga izolimi. Djali i tij thotë se ai ecën 10,000 hapa në ditë ose më shumë duke bërë xhiro në apartamentin e tij. Ai është gjithashtu i kalitur nga betejat, gati të ngrihet kundër syrgjynosjes së tij të brendshme dhe të paralajmërojë se nëse fondacioni Soros mund të krijojë një gjykatë për të burgosur kundërshtarët e socialistëve në Shqipëri, e njëjta gjë mund të ndodhë me pjesën tjetër të Perëndimit.

“Në vitin 1992, kur George Soros erdhi për herë të parë në Shqipëri… e mirëprita,” u ankua Berisha. “Pashë që në vendet e tjera ish-komuniste, OJQ-të po luanin një rol shumë të rëndësishëm, ndaj e mirëprita. Por hap pas hapi, pashë që OJQ-të e sponsorizuara nga Sorosi ishin ekstremisht të majta dhe një ditë, Sorosi i vendosi të gjitha nën ombrellën e Partisë së vjetër Komuniste.”

Duket si një teori konspirative, por ishte profetike. Në vitin 2016, Fondacionet e Shoqëria e Hapur të Sorosit, ose OSF, udhëhoqën reformën më të gjerë të kushtetutës së Shqipërisë që nga viti 1998, me mbështetjen e administratës Obama dhe të paktën 9 milionë dollarë nga Agjencia Amerikane për Zhvillim Ndërkombëtar.

“George Sorosi, ekspertë dhe ish-gjyqtarë e prokurorë komunistë, përfshirë njeriun që hartoi kushtetutën më të keqe në botë,” ishin të përfshirë, tha Berisha, duke iu referuar kushtetutës komuniste të Shqipërisë që kodifikoi ateizmin në vitet 1970. “Unë isha një asistent i ri në atë kohë dhe u mblodhëm në një sallë të madhe, gjoja për të debatuar për draftin e kushtetutës. Në atë sallë ishte sekretari i komitetit qendror të partisë për propagandën, Ramiz Alia. Në atë takim, Alia pyeti: ‘A duhet ta quajmë Shqipërinë shteti i diktaturës së proletariatit dhe a duhet ta quajmë Shqipërinë si shteti i parë ateist?’ Dikush u ngrit dhe tha: ‘Mendoj se jo, shoku Ramiz Alia, sepse ato nuk ishin në kushtetutën e mëparshme.’ Por një tjetër u ngrit dhe tha: ‘Jo, duhet të jemi krenarë që e sanksionojmë fenë, sepse forma më e pastër e demokracisë është diktatura e proletariatit, dhe duhet të jemi krenarë për luftën që kemi bërë kundër feve, duke e sanksionuar në kushtetutë si shteti i parë ateist në botë.’ Dhe ky njeri ishte Luan Omari, nipi i Enver Hoxhës. Ky njeri u zgjodh nga OSF Albania si mendja pas reformës në drejtësi.”

Në letër, Berisha po ndiqet penalisht për 400 metra katrorë tokë. Ky territor i vogël ka qenë objekt mosmarrëveshjeje që nga vitet 1940, kur imperialistët italianë nën Mussolinin nisën të grabisnin tokat shqiptare. Berisha vlerëson se gjysmë milioni prona u rikthyen te shqiptarët pasi ishin grabitur nga fashistët italianë ose komunistët shqiptarë. SPAK thotë se personi që e mori në zotërim këtë tokë në vitin 2008 ishte Jamarbër Malltezi, dhëndri i Berishës. Si Berisha, ashtu edhe Malltezi u akuzuan për korrupsion pasiv kriminal 16 vjet më vonë.

John Schindler, një ish-analist i Agjencisë Kombëtare të Sigurisë (NSA) i specializuar në Ballkan, tha se kjo ndjekje penale është një luftë juridike. “Berisha absolutisht nuk është i korruptuar sipas standardeve shqiptare dhe është shumë më pak i korruptuar sesa socialistët që drejtojnë vendin që nga viti 2013,” tha Schindler. “Është thjesht skandaloze që qeveria amerikane ka dalë në mbrojtje të regjimit të Ramës në këtë pikë të persekutimit të kundërshtarëve të tyre politikë.”

Gjysma amerikane e kësaj çështjeje është shumë kurioze sepse, ndryshe nga vendet e tjera ballkanike, Shqipëria shmang lidhjet e ngushta me Rusinë ose Kinën dhe është ndoshta vendi më pro-amerikan në rajon. As socialistët e Ramës dhe as demokratët e Berishës nuk kanë lëkundur mbështetjen e tyre për SHBA-në apo dëshirën për t’u anëtarësuar në Bashkimin Europian. Por Rama ka lidhje kriminale.

Gjatë administratës së parë të Trump-it, ai u takua disa herë me Charles McGonigal, një agjent i FBI-së i caktuar për të udhëhequr hetimin mbi Russiagate në New York nga drejtori i atëhershëm James Comey. McGonigal mori të paktën 225,000 dollarë nga Agron Neza, një ish-oficer i inteligjencës shqiptare që e lidhi atë me Ramën. McGonigal e bindi FBI-në të hapte një hetim kundër një lobisti amerikan që punonte kundër socialistëve të Ramës. McGonigal përfundimisht u arrestua dhe u dënua me 28 muaj burg për fshehjen e pagesave të Nezës nga FBI.

Rama mohon çdo keqbërje, dhe Blinken duket se e mbështeste.

“Me 15 shkurt, Charles McGonigal do të dënohej në gjykatën e Uashingtonit,” tha Berisha. “Si për çudi, me 16 shkurt, në Tiranë, Blinken erdhi në një vizitë të papritur dhe nuk u takua me asnjë nga opozita. Në një konferencë për shtyp me Ramën, Blinken e quajti atë një lider të shkëlqyer dhe të jashtëzakonshëm. Të nesërmen, Charles McGonigal u dënua me dy vjet e katër muaj pasi u korruptua nga Rama dhe për tradhtimin e interesave të Shteteve të Bashkuara.”

Rama lidhet gjithashtu me trafikun e drogës në Shqipëri. Saimir Tahiri, ministër i Brendshëm nga viti 2013 deri në 2017, dha dorëheqjen për shkak të trafikut të drogës. Parlamenti i kontrolluar nga socialistët u përpoq të bllokonte arrestimin e Tahirit, por ai u dënua për shpërdorim detyre. Pasardhësi i tij, Fatmir Xhafaj, gjithashtu dha dorëheqjen pas akuzave për përfshirje në trafik droge pasi vëllai i tij u dënua në një gjykatë italiane. Olsi Rama, vëllai më i vogël i kryeministrit, i cili punoi për OSF-në nga viti 1993 deri në 1997, u hetua për lidhje të ngushta me trafikun e drogës. Olsi Rama pranoi se kishte udhëtuar me makinë me një trafikant të dënuar për shpërndarje kokaine, por SPAK njoftoi në fund të vitit 2024 se “hetimet nuk kanë arritur të gjejnë prova” që vërtetojnë përfshirjen e tij në krim. Kryeministri ka përsëritur vazhdimisht se ai dhe vëllai i tij janë të pafajshëm.

Shqipëria është bërë narkoshteti kryesor autokratik i Europës. Nga viti 2018 deri në 2020, Europol arrestoi 266 shqiptarë për trafik kokaine në Europë, më shumë se çdo kombësi tjetër. Burimi tjetër më i madh europian i trafikantëve të kokainës ishte Holanda, me vetëm 51 qytetarë të arrestuar. Sipas revistës gjermane Bild, hetuesit gjermanë e dinë se 32 banda shqiptare kontrollojnë të gjithë tregtinë e kokainës në kontinent.

Atëherë, pse Biden dhe Blinken punuan për të eliminuar kundërshtarët e Ramës?

“Një lidhje Blinken-Soros duhet të jetë një faktor këtu,” tha Schindler. “Mendoj se një pjesë e kësaj është një afinitet ideologjik, një ndjenjë se ajo që Rama dhe socialistët po bëjnë në Shqipëri, me shumë ndihmë nga Soros dhe OSF, ata janë të gjithë në të njëjtën skuadër me Partinë Demokratike të SHBA. … Do të thosha se Shqipëria është bërë një vend jashtëzakonisht i korruptuar, një narkoshtet, dhe ka sasi të mëdha parash të paligjshme që derdhen në Shqipëri. A ka të bëjë kjo me këtë? Ndoshta po. Kam informacion të besueshëm se inteligjenca amerikane e ka ditur prej vitesh përfshirjen personale të Ramës në aspekte të krimit shtetëror. … Inteligjenca amerikane e di të gjithë këtë, dhe administrata Biden ka thënë qartazi se kjo ishte në rregull. Nuk dua të spekuloj shumë, por kur ka aq shumë para droge që qarkullojnë diku, ku përfundojnë ato? Jo vetëm që nuk e dimë, por askush zyrtarisht në Uashington nuk po pyet.”

Ndërsa Biden ka thënë se presidenca e tij është vija e fundit e mbrojtjes së demokracisë, Departamenti i tij i Shtetit ka shpenzuar kohë dhe kapital politik për të eliminuar opozitën demokratike ndaj kryeministrit socialist të shtetit që drejton tregtinë europiane të drogës. Ishte një gjykatë e financuar nga Amerika, e nxitur nga ambasadorja amerikane, që e burgosi Berishën.

Në daljen e tij nga Departamenti i Shtetit, Blinken e njohu Altin Dumanin, kreun e SPAK, si një “kampion global kundër korrupsionit,” dhe Biden nënshkroi një urdhër ekzekutiv për të sekuestruar çdo pasuri në SHBA të “çdo personi të akuzuar” nga Departamenti i Shtetit në Ballkanin Perëndimor. Ishte një gjest simbolik, por domethënës. Ndërkohë, marrëdhënia mes Ramës dhe rrjetit të Sorosit nuk ka qenë kurrë më e afërt. Alex Soros, i cili ka trashëguar perandorinë miliarda dollarëshe të të atit, kalon rregullisht pushimet në Shqipëri me Ramën, të cilin e quan “vëllai im në Tiranë” në rrjetet sociale. Biden i dha George Sorosit Medaljen Presidenciale të Lirisë, dhe Alex e përfaqësoi të atin.

Në nëntor 2024, Berisha u lirua nga arresti shtëpiak në pritje të gjyqit për një çështje teknike. Protestuesit demokratë, të cilët mblidheshin rregullisht poshtë dritares së Berishës për ta dëgjuar gjatë arrestimit të tij, dolën për të festuar, por u sulmuan me gaz lotsjellës nga forcat e sigurisë. Mëngjesin kur e intervistova Berishën në zyrën e tij, SPAK shkoi në gjykatë duke kërkuar rikthimin e arrestit të tij shtëpiak. Thirrja e Berishës për një qeveri të re “teknike” para zgjedhjeve të 11 majit u refuzua, dhe megjithëse demokratët po luftojnë për rikthimin e Berishës në pushtet, sondazhet ende favorizojnë Ramën.

Ndërkohë, Berisha po i bën thirrje Trump-it, zgjedhjen e të cilit e quajti “një mrekulli për njerëzimin.”

“Do t’i kërkoj SHBA-së, sipas rregullave, të rishqyrtojë një vendim që bazohet në lobimin e korruptuar të Edi Ramës dhe George Sorosit,” tha Berisha.

Duke marrë parasysh paralelet midis gjyqeve të Berishës dhe rikthimit të Trump-it, kjo është një strategji që mund ta bindë presidentin. Të dy, Berisha dhe Trump, u gjykuan nga prokurorë të financuar nga Sorosi mbi akuza të fryra, me qëllimin e hapur për të forcuar shanset elektorale të të majtëve në pushtet.

“Ky është një vend europian, anëtar i NATO-s, që ne jemi të detyruar ta mbrojmë sipas Nenit Pesë të NATO-s. Ky është një mik i Shteteve të Bashkuara. Kjo duhet të na interesojë edhe sepse kjo tregon se njerëzit e Sorosit, miliarderët me një agjendë politike, kanë transformuar plotësisht një vend të tërë sipas dëshirës së tyre. Dhe nëse mund ta bëjnë këtë me Shqipërinë, mund ta bëjnë edhe diku tjetër,” tha Schindler. “Modeli i përdorur në Shqipëri duhet t’i frikësojë të gjithë në Perëndim. Kjo nuk është një gjë e mirë. A besoj se njerëzit e Sorosit do ta bëjnë këtë në Amerikë nesër? Jo, por kjo u tregon atyre një model që funksionon.”

/Tiana Lowe Doescher është kolumniste për ekonominë në Washington Examiner – Syri.net