Aktori i mirënjohur, Mehdi Malkaj, ka qenë një ndër të parët që ka hapur sot protestën para Bashkisë së Tiranës, protestë kundër korrupsionit galopant në këtë bashki. 

Ai e shprehu revoltën e tij ndaj korrupsionit që po përfshin këtë institucion.

Malkaj theksoi se qytetarët nuk mund të rrinë më pasivë përballë këtij abuzimi. Ai bëri thirrje për angazhim dhe qëndresë deri në realizimin e kërkesave të tyre.

‘Tungjatjeta të gjithëve, zonja dhe zotërinj, zotërinj policë. Për ju kam një pyetje: a nuk e keni kuptuar ende kë po mbroni?
A nuk e keni kuptuar akoma dhe rrini këtu në shi, në borë, në breshër?
A nuk e keni kuptuar që është një bastard, një kriminel, një hajdut, një qelbësirë, një… një… një që i ka të gjitha? Dhe ju prapë rrini këtu? Dhe keni frikë nga ne?

Keni frikë nga ne, që vijmë këtu buzagaz, vijmë të qeshur, vijmë për të drejtat tona, të cilat janë edhe të drejtat tuaja.

Çfarë bëni, more zotërinj? Jeni rralluar, por jeni akoma këtu për të na e bërë kurrizin copë.

Është turp për ju!

Zonja dhe zotërinj, kemi arritur në një pikë ku gjërat nuk mbajnë më. Ne nuk lëvizim, sepse kemi një kauzë.

Ne do të rrimë këtu, në shi, në breshër, në borë, derisa gjërat të vihen në vendin e vet.’- u shpreh Malkaj. sn

Analisti Enton Abilekaj, i ftuar në emisionin “Çim Peka Live” në Syri TV, dha mendimin e tij për temën që po trajtohet në lidhje me kapjen e drejtësisë së re.

Abilekaj theksoi: “Këta të sistemit të drejtësisë bëjnë atë që u kërkohet, të marrin pjesë në një lojë politike që drejtohet nga Edi Rama. Nëse Rama sot do të bëjë një lojë politike me Veliajn, ata janë gati dhe përdoren nga Rama.

Nëse do të donin të vinin drejtësi në rastin e Veliajt, janë katër apo pesë çështje të hapura në Prokurori dhe për njërën nga ato do të ishte sot nën akuzë. Nuk kanë dashur këtë, por duan që në mënyrë të kontrolluar të hetojnë Erion Veliajn, të godasin imazhin e tij, dhe në mënyrë po aq të kontrolluar me një urdhër politik ta arrestojnë apo mos ta arrestojnë.

Nuk duhet të shohim dokumentet a duhet të arrestohet Veliaj, a ka bërë shkelje apo jo, sepse dokumentet flasin qartësisht. Nuk besoj se ka njeri aq naiv sa që me dokumentet që kanë dalë, të mos mendojë se ai duhet të arrestohet.

Ne kemi kolegë gazetarë që në SPAK u thonë që çfarë kemi kapur nga “Dosja 5D”, Veliaj nuk shpëton dot, por nuk ndodh asgjë. Ajo është një arkivë shantazhi që përdoret nga Edi Rama. Merret dosja e Elbasanit dhe kujt do ja fusim aty, ja fusim Artan Hoxhës dhe Elton Qynos. Dosja del në mënyrë selektive kundër armiqve të partisë, kundër atyre që Edi Rama ka vendosur të godasë sot. SPAK-u është një institucion që punon i gjithi për Edi Ramën”.

Kryedemokrati Sali Berisha theksoi se opozita nuk ka hequr dorë nga kërkesa e saj për qeveri teknike përpara zgjedhjeve të majit, pasi sipas tij, Edi Rama nuk mund të mbajë zgjedhje të lira e të ndershme.

I ftuar në Debat me Alba Alishanin, Berisha shton se opozita pasi kaloi krizën, tashmë ka një mbështetje të madhe ndërkombëtare dhe këtë e tregojnë dhe rezolutat e miratuara kundër qeverisë Rama.

Berisha: Opozita është e interesuar që të ketë zgjedhje sa më parë. Është një datë e zgjedhur nga qeveria. Ne nuk kemi hequr dorë nga kërkesa për qeveri teknike. Si parim ne nuk bojkotojmë zgjedhjet. Ne edhe sot nuk i pranojmë zgjedhjet. Ato janë një farsë. Të gjitha partitë e botës i quajnë fasadë. Rezolutat nuk shprehin mendimin tonë, por të vërtetën mbi zgjedhjet. Do të bëjmë gjithçka kundër diktaturës. Nuk janë shpalosur të gjitha format e mosbindjes. Ne jemi në betejë me diktaturën. Kjo diktaturë nuk rrëzohet me votë. Por diktaturat nuk bëjnë zgjedhje të lira. Edi Rama arriti të mashtrojë shumë edhe në botë. Opozita pati probleme, por sapo u ngrit dhe u bashkua, doli nga izolimi me ndërkombëtarët. Tre rezoluta nuk kanë ekzistuar kurrë kundër një qeverie në Tiranë. Ne po punojmë me të gjitha format për qeveri teknike.  sn

Në fjalën e tij në Kuvendin e Shqipërisë, sekretari i Përgjithshëm i Partisë Demokratike, Flamur Noka akuzoi mazhorancën për keqmenaxhim dhe rrënim të shtresës së mesme. Ai theksoi se qeveria aktuale ka shkatërruar profesionet e lira dhe ka krijuar kushte të papërballueshme për qytetarët, ndërsa vetë është zhytur në korrupsion dhe abuzim me pushtetin.

Noka përmendi dështimet në bujqësi, siguri ushqimore dhe mbështetjen për biznesin e vogël, duke akuzuar qeverinë për lidhje me krimin e organizuar dhe vjedhje të fondeve publike. Ai vlerësoi opozitën për mbështetjen ndaj shtresës së mesme dhe angazhimin për drejtësi sociale.

Në vazhdim të fjalës së tij, Noka bëri thirrje për mosbindje civile, duke paralajmëruar një pjesëmarje masive në protestë ditën e hënë në Tiranë. Ai u zotua se Partia Demokratike do të vazhdojë të luftojë për zgjedhje të lira dhe të ndershme, duke i cilësuar patronazhistët dhe mbështetësit e qeverisë si përgjegjës për deformimin e demokracisë. Noka theksoi se ndryshimi është i pashmangshëm dhe se opozita do të jetë në ballë të përpjekjeve për të shpëtuar vendin nga keqqeverisja.

Fjala e sekretarit të Përgjithshëm të PD, Flamur Noka në Parlament: 

Po ju kthehem sot ju që keqpërdorni, ju që merrni peng individë të opozitës dhe që i keqpërdorni më shumë se kushdo tjetër.
Po ju them ju, sot ju intereson të mos diskutohet për këtë projektligj, sepse ju profesionet e lira, shtesën e mesme e shkatërruat, bëtë gjithçka për ta rrënuar. Ju keqpërdorni ortakët e Engjëll Agaçit dhe Erion Veliajt, për të ndaluar fjalën e opozitës në këtë kuvend.
Pse, sepse ju dogji shumë fitorja e opozitës në Gjykatën Kushtetuese për atë tatim që i kishit vënë ju dhe kjo banda këtu mbrapa, për profesionet e lira.
Ata fituan sot sepse i mbështeti opozita. Sepse ju doni ti zhduknit, të iknin, të merrnin arratinë dhe të largoheshin nga Shqipëria sepse po formësonin shtresën e mesme që ju e keni aq shumë tmerr dhe që sulltani juaj nuk e zë gjumi, kur mendon se në Shqipëri po gjallon dhe po merr frymë.
Sepse është pikërisht kjo shtresë e mesme që i përkasin dhe profesionet e lira, ajo që është motorri i intelektualizmës dhe motori i ekonomisë në një shoqëri, jo vetëm në Shqipëri, por kudo dhe kjo është që ju tmerron ju.
Dhe çfarë po bëni? I keni masakruar me gjoba, i keni masakruar me kërcënime, u jeni turrur çdo profesioni për ti nënshtruar ose larguar nga Shqipëria.
Ju keni provuar se keni aftësi vetëm për të prodhuar kriza, kriza për njerëzit e lirë dhe thjeshtë dhe vetëm vjedhje e babëzi për veten tuaj. në çdo sektor e kudo, është dora juaj, janë tentakulat tuaja. Shikoni sot ju që bëni hartime dhe na tregoni përralla.
Konsumi për frymë i popullisisë në vitin 2005 ishte sa 26% e mesatares Europiane. Për 8 vite qeveria e Sali Berishës e çoi në 37% sa mesatarja Europiane, ky është zhvillim ekonomie. Por çfarë betë ju për 11 vite dhe e keni vitin e 12. E keni çuar nga 37% në 41%. 4 për qind për 3 mandate. Ndërsa konsumi për frymë i juaji është 50-fishuar, jo 5-fishuar sepse kështu e keni ju konceptin ndaj qytetarëve, sepse derrat e majmë nuk pyesin, sepse kur mbushet kjo sallë dhe ajo stallë në qeveri me derra të majmur, nuk pyet kush për halle dhe hallexhinj.
Shikoni se çfarë u keni bërë shqiptarëve.
Tek Bujqësia i futët duart tek fondet e BE-së për të vjedhur sepse ju vetëm vjedhje dini të bëni dhe i latë sot fermerët pa 110 milionë euro subvencione që duhej të merrnin nga BE-ja.
Nuk po flas për rendin dhe sigurinë.
Sepse listën tuaj Encrochat dhe SKY e kanë treguar qartë, se e bën krimi i organizuar, listën ku kryeministri juaj është i pari dhe gjithë të tjerët.
Sepse ju punoni për Oltën. Olta e Gjallicës, investitore strategjike kështu jeni ju, kjo lloj sëre është mazhoranca këtu.
Nuk po flas për sigurinë ushqimore, as për siguri të tjera sepse këtu shqiptarët nën pushtetin tuaj hanë ushqimet më të kalbura që vijnë nga çdo cep i botës, pa standarde pa kontroll. Por ju jo. Ju hani cilësi dhe standarde të larta. Ju hani haviar, ju hani te Nysreti, modelin e tij keni, për qytetarët as nuk doni të ja dini.
Dhe prandaj sot shqiptarët kanë kthyer sytë nga PD dhe opozita, sepse ju keni vërtetuar se nuk jeni në gjendje të prodhoni as edhe një moment për Shqipërinë e shqiptarët.
E vetmja zgjidhje që do të vijë në këtë vend do të vijë jo prej jush, por nga vullneti i qytetarëve dhe këtë zgjidhje do ta ofrojë PD dhe opozita se ne kemi detyrë dhe nuk do të ndalemi për ti dhënë zgjidhje Shqipërisë dhe këtij populli.
Ne e kemi detyrë të ua imponojmë ndryshimin ju në çdo formë dhe mënyrë, sepse guaska juaj do të thyhet, sepse është guaska e hajdutëve.
Zgjedhjet e lira dhe të ndershme janë e vetmja rrugë për ti dhënë shpresë dhe ndryshimit për ti dhënë rrugë.
Ju si përherë jeni turrur përsëri pas votës për ta vjedhur dhe plaçkitur dhe jo pas punës dhe përkushtimit ndaj qytetarëve. Por po ju them përsëri. Kush do të guxojë të prekë votën, ta mendojë mirë. Patronazhistët tuaj do të trajtohen si kriminelë, emër për emër dhe do të listohen e do të mbajnë përgjegjësi para ligjit dhe kudo.
Po ju them se ka vetëm një rrugë.
Mosbindja civile është rruga e vetme që do ti japë shpëtim Shqipërisë dhe do ta pastrojë Shqipërinë nga kjo farë e keqe që quhet Rilindje e cila nisi brenda PS-së, e zhduku PS-në, ia mori frymën dhe tani po tenton ti marrë frymën, ta asfiksojë shoqërinë shqiptare se ekonominë po e po.
Ka vetëm një rrugë, mosbindje civile.
Ditë e hënë të gjithë shqiptarët do të kenë aktin tjetër të mosbindjes civile. Ditën e hënë në ora 17:00, Tirana nuk do të jetë në duart e pushtetarëve, as në duart e këtyre barbarëve, por ditën e hënë Tirana në ora 17:00 do të jenë në duart e qytetarëve.
As të mercenarëve që keni përdorur ju, ta harroni sepse e keni zakon, kur s’ia dilni vetë përdorni mercenarë kundër opozitës.
Ndaj po ju them, mercenarët ti gëzojë Rama, ti gëzojë Lali vjedhësi, ti gëzojë edhe Engjëll Agaçi juaj që i ka ortakë, por rrugëtimin e opozitës kurrë nuk e frenoni, kurrë nuk e ndaloni.
Kjo Parti Demokratike, këtu, ata që nuk janë këtu, që janë tek qytetarët e thjeshtë, ky popull opozitar do të ju japë një leksion të mirë; ligji dhe vetëm ligji, e drejta dhe vetëm e drejta do të prevalojë si kryekauza jonë për të shpëtuar këtë vend dhe për ti dhënë ndryshimin që duhet.
Shqiptarët presin ndryshimin, shqiptarët ditën e hënë në ora 17:00 do ti bien kambanave të ndryshimit duke i’u dhënë pushtetin qytetarëve dhe dua i’a hequr këtyre hajdutëve tradhtarëve. sn

Deputeti opozitar, Agron Shehaj kërkoi interpelancë me zëvendëskryeministren Belinda Balluku për aksin Thumanë-Kashar. Shehaj tha se ka 6 muaj që kërkon interpelancën me Ballukun, por kjo e fundit nuk vjen.

Kryetarja e Kuvendit, Elisa Spiropali tha se zv.kryeministrja ndodhet jashtë vendit, por në fakt ajo u shfaq në sallën e Kuvendit.

Kjo gjë shkaktoi irritimin e opozitës. Ishte deputeti demokrat Dashnor Sula që hodhi akuza të rënda ndaj Spiropalit për gënjeshtare.

Kujtojmë se mes Spiropalit dhe Ballukut është regjistruar një përplasje e fortë edhe gjatë mbledhjes së grupit parlamentar socialist.

Me tone të ashpra, Balluku fshikulloi Spiropalin për keqmenaxhimin e seancës plenare të javës së shkuar ku u shkaktua kaos pasi mazhoranca futi me shpejtësi projektligjin për faljen e gjobave.

Balluku akuzoi Spiropalin se po favorizonte opozitën duke iu dhënë hapësirë të pamerituar dhe në shkelje të rregullores sipas zv.kryeministres. Jo vetëm kaq, por Balluku shkoi edhe më tej duke aluduar se kryetarja e parlamentit është nën një presion prej Gazment Bardhit, i cili i dikton edhe sjelljen në seancë plenare.

Balluku ngriti insinuata që Spiropali po shantazhohet nga kreu i Grupit Parlamentar të Partisë Demokratike. sn

Mamaja e Martin Canit, 14-vjeçari që humbi jetën një muaj më parë në ngjarjen e rëndë në shkollën “Fan Noli”ka prekur zemrat e gjithëve me fjalët e thëna në protestën që po mbahet para Ministrisë së Arsimit.

Ajo ka kërkuar dorëheqjen e të gjithë atyre që nuk mbrojtën dot vogëlushin e saj.

“Kam rritur e edukuar një fëmijë, kam punuar vetë në arsim, e kam rritur me vuajtje, por ma morën, ja morën ëndrrat, me morën jetën e shpresat. Kërkoj të japin dorëheqjen ata që nuk e mbrojtën Martinin, që nga dera e shkollës e deri tek ministrja dhe Rama.
Martini ishte një fëmijë i buzëqeshur, e kam cdo moment në sy! Kishte ëndrra të mëdha”, tha ajo.

Kryetari i Partisë Demokratike, Sali Berisha ka bërë sërish thirrje për mosbindje civile. Sipas tij, kjo është rruga e vetme me anë të të cilës do të largohet regjimi.

Për liderin e opozitës Sali Berisha, një avantazh i madh është fitorja e Donald Trump në SHBA. ‘Avantazh është pa diskutim goditja fatale që mori në SHBA nga fitorja e Donald Trump, Xhorxh Soros dhe perandoria e tij e të keqes. Miliarderi që përdorte çdo qindarkë për agjendë politike çnjerëzore’, theksoi kryedemokrati, Sali Berisha gjatë fjalës së tij.

Pjesë nga fjala e kreut të PD, Sali Berisha:

Unë po ndalem vetëm në këto, por kur cenohet- se ka një hierarki në të drejta, më themelorja është e drejta e jetës, po kur tjetri vdes jo nga sëmundja, por se ti nuk i jep ilaçin për të mjekuar sëmundjen, ose kur ti vepron siç veprove me të ndjerën Ina Kasimati, që ia dhe ilaçin tjetër që nuk duhej të ishte, ti mohon edhe të drejtën e jetës.

Këtu u mohohet e drejta e jetës.

Të gjitha çështjet që ju keni shtruar, janë çështje jetike.

Asgjë nuk ka më të rëndësishme për një komb, më të çmuar për shpirtin e tij se sa arti dhe kultura.

Rrallë ndonjëherë në histori mund të kenë qenë në situatën e sotme.

Ato institucione që ekzistojnë në Tiranë, shumica nuk funksionojnë, në rrethe janë formale. Artistët e vërtetë luftohen. Simboli më i shëmtuar i kësaj ishte minimi i teatrit. Por po kaq i shëmtuar është fjalimi i Edi Ramës në qeveri në mbrojtje të Neronit që hodhi në erë teatrin. Ai bëri shumë mirë që e hoqi atë, thotë, me një urrejtje të paimagjinueshme.

Është shumë e vërtetë që të përndjekurit politikë, është një proces që duhet ridimensionuar në ndërgjegjen kombëtare.

E kam thënë dhe e them prapë, nuk lejoi e majta evropiane të dënohej komunizmi. Dhe kur u rrëzuan, ata kushërinj me ta ishin sepse meritonte një gjyq ndërkombëtar. E meritonte një ‘never again’. Po të ishte për viktima, komunizmi ka pasur 100 deri në 200 milionë, Lufta e Dytë ka pasur gjer në 20-30 milionë. Viktima njerëzore këto janë të komunizmit.

Megjithatë, ne u garantoj se nuk do rreshtim për të bërë çdo përpjekje për t’u dhënë përgjigje problemeve të pazgjidhura kësaj shtrese me kontribute të jashtëzakonshme.

Po kështu fermerët, janë si të thuash, qytetarë të ndaluar në Shqipëri. Përfaqësojnë 40 përqind, absolutisht oferta e vetme për ta, largohuni sa më parënga vendi juaj.

Shpopullimi është në gjenocid i vërtetë. Nëse arreston 38 mijë se nuk paguajnë dritat, në një kohë kur prej tyre të paktën 25 mijë nuk mund t’i paguajnë, ti atyre u thua ikni. Nëse brenda një viti prish 9 mijë lokale e banesa dhe mburresh me ta, ti u thua ikni. Nëse ti drejtësinë, ua ke mohuar procesin, duhet të presin 14 vjet, atëherë ai ka dy alternativa, ose vetëgjyqësi, ose largim nga ky vend.

Të rinjtë i largon vetë se ai që nuk kap mesataren, ikën nga ky vend.

Pra, Shqipëria sot është një diktaturë bande dhe diktaturat, e vërteta është, në histori janë larguar me armë, por janë larguar edhe me mosbindje civile.

Se në vetvete janë kalbësira, po të marrësh strukturën e brendshme, ato janë kalbësira.

Na përket ne që jemi të përkushtuar ndaj këtyre të drejtave, që besojmë tek këto drejta, të bëjmë gjithçka me mosbindje civile për të ecur drejt largimit të këtij regjimi.

3 rezoluta janë miratuar, nuk është e pakët ajo. Këto rezoluta ndërkombëtare janë tekstuale me ato që thashë unë këtu.

Por këto nuk e largojnë regjimin, regjimin e largon mosbindja civile e shqiptarëve.

Avantazh është pa diskutim goditja fatale që mori në SHBA nga fitorja e Donald Trump, Xhorxh Soros dhe perandoria e tij e të keqes. Miliarderi që përdorte çdo qindarkë për agjendë politike çnjerëzore.

Në disa aspekte, Xhorxh Soros tejkaloi Marksin. Nuk kam lexuar që të thoshte Marksi se internacionale do jetë bota e re pa gjini. Kurse Soros vendosi në agjendë identitetin njerëzor. vendosi në agjendën e fuqisë më të madhe të botës. Dilte ajo e thoshte se të gjithë emigrantëve ilegalë do ua paguaj operacionin për ndryshimin e gjinisë.

Këto shpresojmë të jenë arkivuar.

Por këto nuk duhet të na dekurajojnë ne, përkundrazi duhet të na bëjnë të luftojmë më shumë me vetëdijen se ky është mision dhe nuk ka asgjë më të madhe që mund të bëjë një njeri se sa të luftojë për një mision të drejtë, se sa të mbrojë ato të vërteta që beson.

Prandaj ju ftoj që të bëjmë gjithçka për shpëtimin e Shqipërisë nga kjo narkodiktaturë dhe u garantoj se PD, së bashku me ju, do u japë përgjigjen më të merituar dhe në mënyrën më të vendosur, problematikave të mëdha, dhe në disa aspekte dhe të tmerrshme, se të përzësh nga vendi nga viti 2014 deri në vitin 2022, 1 milionë shqiptarë vetëm në hapësirën e Shengenit, kjo është gjëja më e rëndë që mund t’i ndodhë një vendi.

Por kombet kanë një energji pozitive të brendshme, e cila në qoftë se arrihet të shfrytëzohet, shndërrohet në forcë jetike për ta.

Ndaj dhe të bëjmë çdo gjë për t’i dhënë përgjigje këtij regjimi.

Kam bindjen më të madhe se këto probleme do madhin zgjidhjen e merituar në qeverisjen e ardhshme, në të cilën zërat tuaj do jenë zëra që do pasqyrohen dhe dëgjohen plotësisht. sn

Aktivitetet e fabrikave të prodhimit të veshjeve dhe këpucëve pësuan rënie të fortë këtë vit në të gjithë treguesit, prodhimit, shitjes dhe pagave.

Sipas të dhënave të INSTAT në tremujorin e tretë të vitit 2024 indeksi i punësimit në industrinë e fabrikave të tekstilit shënoi rënie me 20.8 për qind në krahasim me të njëjtën periudhe të një viti më parë, ndërsa indeksi i pagave në të njëjtën periudhë shënoi rënie me 21%

Në fabrikat e këpucëve indeksi i punësimit shënoi tkurrje me 11.4 për qind, ndërsa indeksi i pagave me 10 për qind.

INSTAT ka vonuar publikimin e treguesve të punësimit që nga tremujori i parë i vitit 2024, por indekse të tërthorta tregojnë se punësimi në fabrikat fason ka pësuar rënie rreth 20 për qind këtë vit. Kjo tkurrje ishte lajmëruar edhe më parë nga shoqatat dhe përfaqësues të sektorit.

Në dy vitet e fundit prodhuesit shqiptarë po kalojnë periudhën më të vështirë të dekadës së fundit, ku kombinimi i shumë faktorëve me ndikim negativ e ka bërë të paqartë perspektivën.

Rënia e vazhdueshme e euros, rritja e kostove të fuqisë punëtore dhe kërkesa e dobët në tregjet e jashtme i kanë vënë fabrikat shqiptare në të gjithë sektorët në vështirësi. Më të voglat po falimentojnë dhe shumë të tjera kanë ndryshuar strategjitë duke u përshtatur me situatën e re. Prodhimi për zinxhirët më të lartë të vlerës po aplikohet nga shumë njësi prodhimi për të mbajtur të ardhurat nën kontroll.

Të dhënat e 11 mujorit 2024 tregojnë se eksportet e veshjeve dhe këpucëve shënuan rënie me 16.5 % në vlerë. Rënia e industrisë së fasonit nisi në gjysmën e dytë të vitit 2023 dhe vijoi përgjatë 2023 dhe 2024.

Kursi i këmbimit dhe rritja e pagës minimale e bënë Shqipërinë jo-konkurruese. Shumë kontrata u zhvendosen nga Shqipëria në destinacione më të lira.

Teksa çmimet e prodhimit në Shqipëri ndryshuan nga rritja e pagës minimale dhe rënia e euros në një kohë që tregjet europiane shfaqen rënie të kërkesës për veshje nga kriza e inflacionit, klientët historike të Shqipërisë po zhvendosen në vende të tjera ku ka kosto më të lira prodhimi.

Nga ana tjetër harta globale e prodhimit të modës po ndryshon. Prodhuesit, veçanërisht nga qendrat tradicionale si India, po zgjerojnë operacionet e tyre në rajone të reja si Afrika, Lindja e Mesme, Turqia dhe Amerika Latine. Këto lëvizje synojnë të kapërcimin e kufizimeve gjeografike në kërkim të kostove më të ulëta të punës, akses në lëndët e para dhe afërsi me tregjet e konsumit në Evropë dhe Amerikë.

Ky diversifikim gjeografik është pjesërisht një përgjigje ndaj ndërprerjeve të zinxhirit të furnizimit gjatë pandemisë dhe tensioneve të vazhdueshme gjeopolitike.

Teksa makineritë po marrin gjithnjë e më shumë detyra të kryera tradicionalisht nga njerëzit, ata kërkojnë punonjës të kualifikuar për drejtimin e tyre./Monitor