Turqia dhe Bashkimi Evropian kanë rënë dakord për të lehtësuar tensionet që kanë errësuar perspektivën evropiane të Ankarasë, pas puçit të dështuar më 15 korrik.

Shefja e politikës së jashtme të BE-së, Federica Mogherini, dhe komisionari për zgjerim, Johannes Hahn, gjatë qëndrimit në Ankara, thanë se duhet të hapen kapituj të rinj për Turqinë dhe se liberalizimi i vizave mbetet në tryezë.

“Kemi vendosur të vazhdojmë punën në të gjitha fushat, në liberalizimin e vizave e përditësimin e unionit doganor. Do të përfshijmë po ashtu mbështetjen tonë për Turqinë në përpjekjen e saj për të strehuar një numër të madh të refugjatëve sirianë”, tha Mogherini.

Zyrtarët evropianë kanë takuar ministrin e Jashtëm turk, Mevlut Cavusoglu, dhe minsitrin për Çështje Evropiane, Omer Celik.

Përpjekja e Turqisë për t’iu bashkuar BE-së daton qysh në vitet 1960.

Bisedimet formale kanë nisur në vitin 2005, por kohëzgjatja e procesit ka shkaktuar zemërim në Ankara.