SHBA dhe BE kërkojnë miratimin e shtatë ligjeve që shoqërojnë paketën e ndryshimeve ligjore të reformës në drejtësi, sa më shpejt të jetë e mundur.

Në një reagim të Delegacionit të Bashkimit Evropian në Tiranë, thuhet se, pritet që kjo të ndodhë më 11 gusht në një seancë të jashtëzakonshme parlamentare.

Ambasadorja e BE-së, Romana Vlahutin e ka konfirmuar një gjë të tillë edhe gjatë intervistës për “Ora News”, ku tha se është e pa mundur që Parlamenti të miratojë para datës 11 gusht shtatë ligjet në pritje.

Deklarata e delegacionit të BE:

BE së bashku me SHBA-të kanë kërkuar miratimin e shpejtë të shtatë ligjeve, dhe të parin ligjit e vlerësimit (vetting), në mënyrë që të përshpejtohet zbatimi i paketës së Reformës në Drejtësi.

Kjo gjë i është bërë e ditur të gjithë udhëheqësve politikë, dhe Kryetari i Kuvendit Meta ka konfirmuar se si Kryetar i Kuvendit është i gatshëm të thërrasë mbledhjen e një seance të jashtëzakonshme të Kuvendit me të hyrë në fuqi Ndryshimet Kushtetuese (më 11 gusht), meqenëse krerët e grupeve parlamentare kanë rënë dakort për këtë.

Miratimi i shpejtë i ligjeve zbatuese është parakusht për nisjen e zbatimit të Reformës në Drejtësi, dhe i një rëndësie themelore për rrugën evropiane të Shqipërisë.

Drafti u është shpërndarë të gjithë anëtarëve të Komisionit të Posaçëm për Reformën në Drejtësi gjysmën e dytë të muajit qershor.