Anthony Davis përfundoi ndeshjen e luajtur në “shtëpinë e tij” me një rekord prej 52 pikësh, duke thyer rekordin e legjendës së NBA-së, Wilt Chamberlain

NEW YORK – Anthony Davis ka udhëhequr Perëndimin drejt fitores me rezultatin 192-182 në përballjen kundër Lindjes në edicionin e 66-të të ndeshjes All-Star të ligës amerikane të basketbollit, NBA, që u mbajt në New Orleans, Louisiana.

Të dy ekipet e filluan ndeshjen me një sërë ngulitjesh spektakolare. Çereku i parë përfundoi me një përparësi të ngushtë të Lindjes me rezultatin 53 – 48. Megjithatë, Perëndimi arriti të përmbys rezultatin dhe të shkojë në pushimin e pjesës së parë me rezultatin 97 – 92.

Çereku i tretë rezultoi të jetë një spektakël tjetër, tani me shumë tre pikësh të shënuar, ndërkohë që në të katërtin, lojtarët e Perëndimit i bënë asistime të shumta Davisit nga New Orleans Pelicans për të shënuar pikë në favor të ekipit.

Davis përfundoi ndeshjen e luajtur në “shtëpinë e tij” me një rekord prej 52 pikësh duke thyer rekordin e legjendës së NBA-së, Wilt Chamberlain i cili në ndeshjen All-Star të vitit 1962 shënoi 42 pikë.

“Përfundova çerekun e tretë me 32 pikë dhe u thash djemve se dëshiroj të shënoj 50”, tha Davis në fund të takimit, në të cilin u shpall “MVP” (lojtari më i vlefshëm).

Qendra e Pelikanëve shënoi 26 herë nga 39 tentativa, ndërsa loja e mbrëmshme theu edhe disa rekorde tjera në All-Star.

Totali prej 101 pikëve të shënuara në çerekun e parë, 189 në pjesën e parë dhe 374 në total, paraqesin rekord të ri të ndeshjeve All –Star për pikë të shënuar në një çerek, në një pjesë dhe në total.

Kevin Durant nga Golden State Warriors shënoi 21 pikë, 10 kërcime dhe 10 asistime, duke përfunduar ndeshjen si lojtari i katërt në historikun e All-Star për “triple-double”. aa