Të gjithë ne, në prag të nisjes të seancës të jashtëzakonshme të 26 shkurtit, dëgjuam se si përpara kamerave u justifikuan disa deputetë të LDK-së. Ata flisnin me fjalorin e “matufëve servilë” siç po i quan me të drejtë Arbana Xharra, sikur po i drejtoheshin bagëtisë e jo popullit, i cili nuk ha kurrë bar.
Ato deklarata ishin të shëmtuara për dy arsye themelore:
e para sepse binin ndesh me elektoratin që u dha votën, pasi prania e tyre ishte kuorum për Thaçin
e dyta sepse ishin spekulative, me qëllim mashtrimin e opinionit publik, se ata kinse kishin shku aty sepse prania e tyne ishte shpëtim për Kosovën!
Hahaha, storie për Stupcat!
Siç e shihni nuk po i përmend fare emrat e tyne, sepse këta politikanë kanë hyrë në politikë për shkak të veprave të lavdishme të familjarëve të tyre, por jo për shkak të veprave të tyre.
Natyrisht që populli ka besu tek ata. Deri në momentin e fundit, Kosova i kishte sytë tek ata, duke shpresuar se edhe ata do të vepronin sikur familjarët e tyre, nëse nuk do t’i kishin vrarë, e ata do të ishin në sallën e atij Kuvendi. Sikur ata të ishin gjallë, natyrisht që kreun e LDK-së nuk do ta kishte kapur kasta e kryemercenarit Isa Mustafa.
Teuta Rugovën nuk e përfshij midis tyre. Ajo i frymëzon respekt njerëzve, sepse është e thjeshtë dhe nuk përpiqet të përfitojë dritën e reflektorëve për hir të Babait të saj.
Por po kujtoj me këtë rast, se çfarë ka bërë PDK-ja dhe Thaçi që Rugova të mos zgjidhej President i Kosovës.
A e ka pranu Thaçi Rugovën pas vdekjes ?
Jo, nuk e ka pranu. E ka pranu vetëm për demagogji, si ajo buqeta me lule që i dha Teutës, ashtu si lidërshipi i LDK-së prej 2006, që të gjitha veprimet në kundërshtim me vullnetin e elektoratit të LDK-së, i bën duke u betuar se janë rugovistë dhe vijues të rrugës të Ibrahim Rugovës, duke spekuluar me fotot e Rugovës, me vizitat në varrin e tij apo në familjen e tij, kur në fakt janë pjesë e një kaste të inkriminuar.
Por tash këtyre që deklaruan përpara kamerave se ata shkuan për të votuar kundër Thaçit, po u del se jo vetëm kanë shkuar për të plotësuar kuorumin, por edhe kanë votuar proThaçit.
Ky konkluzion del thjeshtë, duke u nisur nga deklarata e kryeministrit të Serbisë Aleksandër Vuçiç dhe vetë Listës Sërpska sipas të cilave 11 deputetët e pakicës serbe kanë votuar kundër Thaçit.
Atëherë le të nisim pak matematikën e thjeshtë.
Në sallë ishin 81 deputetë, prej të cilëve Thaçi ka marrë 71 vota.
11 deputetët e Lista Sërpska kanë votuar kundër, por ata natyrisht i kanë bërë nderin e madh Thaçit, duke i treguar se pa praninë e tyre, ai nuk do të kishte mundur të zgjidhej president. Sepse nuk do të kishte kuorum.
Prej këtej del se të 71 votat me të cilat Thaçi u shpall president, vijnë nga të gjithë 70 deputetët e pranishëm me etni shqiptare, të PDK-së dhe LDK-së, përfshi edhe deputetët që shpallën se do të votonin kundër Thaçit, të cilëve nuk po du me ua përmend emrat. Plus nga Lista Sërpska duhet të ketë votuar një deputet proThaçit. (Dhe kjo vërtetohet sipas deklarimit të zvkryeministrit nga pakica serbe Branimir Stojanoviç që ka thënë për radio Dukagjinin se ka qenë vetëm deputeti Sllobodan Petroviq që votuar për Thaçin president)
Pse ndodhi kjo?
Kur në raundin e parë mori vetëm 50 vota, Hashim Thaçin e kapi paniku. Kamerat e tregonin si nxinte, ndërsa Isa Mustafa i kishte vënë duart në kokë.
Dhe atëhere si e pamë të gjithë ne, Thaçi nuk u përmbajt dot dhe ia bëri me sy Isës, i cili gjatë pauzës i detyroi të gjithë deputetët e pranishëm të LDK-së, duke i kurdisur si të ishin kukulla, që ta votonin, përfshi edhe ata që kishin shpallë publikisht për cirk se po shkonin kinse mos me e votu Thaçin.
Në fakt, mosvotimi i Thaçit do të ishte shumë i lehtë, mjafton që ata që dilnim para kamerave të mos ishin paraqitur në Kuvend, sikur 5 deputetët e tjerë.
Por veprimet të tilla, të përgjegjëshme i bëjnë njerëz që kreditet i fitojnë me personalitetin e tyre.
Të gjithë u bëmë dëshmitarë se, si deputetët e LDK-së, iu bindën Thaçit dhe Isës, si të ishin bagëti,
por populli dhe opinioni publik jo,
populli dhe opinioni publik nuk janë bagëti,
ata janë sy e mendjeçelë!
Komentet