Kryeredaktorja e gazetës “Zëri”, Arbana Xharra, në një postim në rrjetin social “Facebook” ka shkruar lidhur me protestën e sotme të organizuar nga partite opozitare (Vetëvendosje, AAK dhe Nisma).

Sipas saj, qytetarët e Kosovës kanë protestuar sot jo për arsyet pse ishin thirrur nga partitë opozitare, por për shkak të varfërisë, papunësisë e krizës ekonomike.

Postimi i plotë:

8 mijë nuk janë, po as 100 mijë… Pak rëndësi ka sa është shifra e saktë e protestuesve. Sheshi që nga paslufta s’ka qenë më i mbushur. Unë sot besoj se demarkacion e asociacion më së paku ka nxjerrë në rrugë qytetarët. Ata kanë dalë nga varfëria, papunësia, të diplomuarit e papunë, ata që fëmijët iu bredhin rrugëve e s’kanë shpresë për një vend pune, e shumë arsye të tjera. E po ashtu jam e bindur se këta qytetarë nuk kanë dalë as në përkrahje të opozitës, me pak përjashtim, sepse i njohin shumë mirë skandalet e atyre që dikur ishin në pushtet e krah të Hashim Thaçit, e të tjerë që e lusnin të ndajnë pushtetin bashkë. Sot qytetarët kanë dalë në rrugë nga zori, paperspektiva, izolimi…kundër këtij pushteti që për pak muaj detyrojë mbi 100 mije qytetarë të ikin nga Kosova!