VOAL – Në një postim në faqen e saj në facebook, gazetarja e njohur Arbana Xharra, në një reagim ndaj një shkrimi përçmues të gazetarit Andi Bushati për skuadrën përfaqësuese të Kosovës në futboll, ia kujton autorit të shkrimit se ai e fyen Kosovën nga pozitat e gjeneratës së izoluar të kohës së diktaturës dhe të mosnjohjes së realitetit të Kosovës.

Ky është postimi i saj i plotë.

Andi Bushati, u mendova dy herë a ia vlen të merrem me shkrimin tënd primitiv, shpirtngushtë dhe idiotesk. Ti provon të shfaqesh mendjehapur karshi mendimeve ndryshe derisa vazhdon me fyerje të atyre qytetarëve, që thjesht e duan Kosovën. Na etiketon “izolatrik”… Por e kuptoj përse. Sepse pa fajin tënd ti je gjenerata e izoluar. Unë ty nuk të paragjykoj që je kaq i kufizuar… Nuk të modernizon as leku që ke fituar pas çlirimit nga diktatura e as disa vizita të vonshme jashtë shtetit dhe aq më pak gardëroba firmato. Kur thua se ne nuk e shohim “atdheun më larg se dera e Presidencës, Ministrisë, medies apo biznesit”, po duket sikur po flisni për veten tuaj. Nuk keni pasur kohë të mësoni se kush jemi ne, sepse keni pasur prioritet të tjera, prapë pa fajin tuaj. Nuk keni kohë as tash të na njihni sepse shihni deri aty ku fillon e mbaron interesi i lekut. Prapë këto pasoja të rënda që keni, janë pa fajin tuaj! E sheh unë nuk të paragjykoj, sepse ka kohë që i kemi tejkaluar provincializmat!