URBANIZËM MEDITERAN

E projektuam rrjetin e kanalizimit
u lidhën të gjitha lagjet
dhe u nisën për dalje në det
ai që e qelbi qytetin tha
të mos mbesim me kaq
të vazhdohet deri përtej detit
se na del horllëku para syve
ai që e qelbi qytetin më së shumti tha
kanalet të çelen thellë
që të mos pëlcasi erë e keqe
deri në daljen në det
pastaj me detin shohim e bëjmë

TE VARRI I YMER PRIZRENIT

Thonë se je nisur nga Prizreni
për t’u takuar me detin
dhe thonë kronikat
je zënë me parashikuesit e motit
që ta matnin zjarminë
barazi me temperaturën e detit
dhe thonë tash
specialistët parashikues të motit
sikur të mos haheshe me detin
shtypi i përditshëm
do të vazhdonte ta shënonte zjarminë
barazi me temperaturën e detit

Ulqin (Mëhalla e Re), 1983

DETI DHE LARJET NETËVE TË ERRËTA

det mos ço valë shsht…
çka s’lanë ky det netëve të errta
çka s’nxjerr ky det ditëve të bardha

ANAMALÇE

(Dëshmorëve anamalas të LNÇ)

Anamalasit nuk kanë njeri të madh
dhe kanë luftuar në luftërat botërore
i kanë pasur njerëzit e vegjël
në luftërat e mëdha
i kanë vënë një mbi një
e kanë rritur njeriun të gjatë me emër
Qazimosmanhajdarmarashbeqirshaqirhaxhimaloselimmujxhev…
anamalasit nuk kanë pasur asnjë luftëtar të madh
dhe kanë rënë në luftërat botërore
i kanë pasur njerëzit të vegjël
dhe vdekjet të mëdha
janë lodhur njëri pas tjetrit
e e kanë zgjeruar njeriun të gjerë me emër
Qazimosmanhajdarmarashbeqirshaqirhaxhimaloselimmujxhev…
dhe janë pasuruar me vdekjen e madhe
anamalasit nuk kanë pasur varre të të mëdhenjve
të rënët i kanë pasur të vegjël
i kanë ngritur një mbi një lapidar
i kanë varrosur në një të madh
dhe kanë shkruar epitaf të vogël për heroin
Qazimosmanhajdarmarashbeqirshaqirhaxhimaloselimmujxhev…

KUAJT E GOJËS

Në lojën e madhe të jetës
qetë kanë tërhequr parmendën
tagjinë
e kanë ngrënë kuajt
njerëzit
gjithnjë e më tepër kanë hyrë në hak
duke nxjerrë bukën për vete
tash kanë ndryshuar kohët
kanë mbetur vetëm kuajt
si pikturat e Gojës
qetë nuk çojnë hesap
në shekullin tjetër
e njerëzit
njerëzit si njerëzit
si qetë
si kuajt

KËNGË FATI

Koka
Dy duar për një kokë
sa shumë duar
sa pak kokë!

KROJET

Krojet e Ali Pashë Gucisë
burojnë diku thellë
e vijnë e na dalin në diell
Krojet e Ali Pashë Gucisë
burime shumë
po u zhduk njëri
tjetri del në rrjedhë
bashkohen në lumë

TA KESH SHTËPINË BRI LUMIT

Ta kesh shtëpinë bri lumit
domethënë
të rrish zgjuar në rrugën Stamboll-Berlin
domethënë
t’i hipësh valës kaluar për rrugë të gjatë
t’i hipësh valës kaluar për rrugë të gjatë
domethënë
ta kalosh për tri ditë rrugën Prizren-Berlin
ta kalosh tri ditë Prizren-Berlin
domethënë
të dashurohesh në Prizren
domethënë
të dashurohesh në lumë

SHPELLA E GADIMES

Në Shpellën e Gadimes
pa mure
Përkrenarja
ruhet në mermer
shkrihet në mermer
edhe Shpella e Gadimes
paska pasur mbret
pranë saj një pus
prapë pus
e pus
më tutje një lumë
lumi çon në Prizren
po po
mbi tokë e nën tokë
Prizren

GURI PËR KULLË E URË

(Rrënimi)
Në damarë të tokës
deshëm të ngrejmë kullë
e themelet i vumë në gur
ne punonim ditën
kullën na e rrënonin natën
deshëm t’i lidhim damarët
me urë guri
gjaku u helmua
damarët pëlcitën
e rrënuan natën urën

UBLA E KRAJËS

Ubla e Krajës
u çel për 1001 ditë
në vitin 1001
toka e ka ruajtur
damarin e burimit 1001 vjet
Ubla e Krajës është e thellë
ujin e ka të freskët
nivelin e ka të ruajtur
kur bënte thatësirë në Krajë
1001 ublat e Krajës
nuk ia shuanin etjen
shirat e vjeshtës ia kthenin nivelin
pranë Ublës së vjetër
u ngrit kisha e Shën Mërisë
që të marrë freskinë e ujit
e të bëhet e freskët…
si uji i Ublës së Krajës
kur bënte thatësirë në Krajë
kur kishës i qepej zjarri
1001 ublat e Krajës s’ia shuanin etjen
Ublës së vjetër
edhe sot e gjithë ditën
krajanët mbushin ujë në Ublën e vjetër
1001 mjeshtër
s’e ngrehin dot të papërlyerën e Krajës
Ubla e Krajës ka njomur 1001 thatësira