Avokatja e të drejtave të njeriut, Amal Clooney, ka shfaqur gatishmëri për ta marrë përsipër rastine e gazetarës nga Azerbajxhani, Khadija Ismayilova, në Gjykatën Evropiane për të Drejtat e Njeriut.

Ismaylova, një kontribuese e Radios Evropa e Lirë, Shërbimi i Azerbajxhanit dhe avokati i saj, kanë thënë se janë duke e konsideruar ofertën e Clooneyt.

Amal Clooney, gruaja e aktorit të Hollivudit George Clooney, viteve të fundit ka marrë përsipër disa raste të njohura në Egjipt, Armeni e Maldive.

Ajo ka mbrojtur kryesisht të burgosur që nga aktivistët e shoqërisë civile, konsiderohen të burgosur me motive politike.

Ismayilova është dënuar në shtator të vitit 2015 me shtatë vite e gjysme burgim nën akuzat që shihen si hakmarrje për shkak të raportimeve të saj në lidhje me bizneset masive të presidentit, Ilham Aliyev dhe anëtarëve të familjes së tij.