Ish-lideri i Vetëvendosjes Albin Kurti do të qëndrojë në arrest shtëpie të paktën deri më 17 shkurt. Deputetit të Kuvendit të Kosovës nga Lëvizja Vetëvendosje, Albin Kurti, i është zgjatur masa e sigurisë arrest shtëpie.

Këtë lajm e konfirmoi avokatja e Kurtit, Hedije Ademi. Nën këtë masë të sigurisë atij do t’i duhet të qëndrojë deri më 17 shkurt të vitit të ardhshëm. Deputeti dhe ish lideri i Vetëvendosjes u arrestua më 28 nëntor në Prishtinë pasi kishte marrë pjesë dhe kishte mbajtur fjalim në një tubim të opozitës në qendër të Prishtinës.

Ndaj tij është ngritur aktakuzë për shkak të dyshimeve për hedhje të gazit lotsjellës në sallë të Kuvendit të Kosovës, gjatë seancave të Kuvendit. Fillimisht ndaj Kurtit ishte caktuar masa 30 ditë paraburgim, por më vonë kjo masë është zbutur në arrest shtëpie.