Colleen Hyland deri tani Drejtoreshë për Çështjet e Evropës Jugore dhe Qendrore në Departamentin e Shtetit të SHBA, zëvendëson Alexander Kasanof i cili mbante postin e Zëvendës Ndihmës Sekretari amerikan të Shtetit për Ballkanin Perëndimor.

Colleen Hyland është një diplomate me përvojë të gjatë, e cila ka shërbyer në disa nga misionet më të rëndësishme diplomatike të SHBA-së në botë. Ajo ka qenë pjesë e stafit diplomatik amerikan në Bagdad, Kabul dhe Prishtinë, ku ka mbajtur pozitën e zëvendësambasadores së SHBA-së në Kosovë nga viti 2016 deri në 2019. Përvoja e saj në rajon dhe njohja e dinamikave politike në Kosovë dhe më gjerë pritet të jenë faktorë kyç në qasjen e SHBA-së ndaj Ballkanit Perëndimor.

Një aspekt veçanërisht i rëndësishëm i profilit të saj është angazhimi në luftën kundër korrupsionit, një problem madhor në shumë vende të Ballkanit Perëndimor. Po ashtu, fakti që ajo flet shqip e bën atë një figurë të njohur dhe të afërt për spektrin politik dhe qytetarët në Kosovë dhe rajon. Ky ndryshim në Departamentin e Shtetit vjen në një periudhë sfidash të mëdha për Ballkanin Perëndimor, veçanërisht në raport me tensionet ndërmjet Kosovës dhe Serbisë, si dhe përpjekjet për reforma demokratike dhe luftën kundër korrupsionit në vendet e rajonit. Me përvojën e saj dhe njohjen e situatës në terren, Colleen Hyland mund të luajë një rol të rëndësishëm në orientimin e politikës amerikane ndaj Ballkanit në muajt dhe vitet e ardhshme.

Megjithatë, mbetet për t’u parë nëse emërimi i saj do të jetë i përkohshëm apo i përhershëm dhe si do të ndikojë kjo në qasjen e SHBA-së ndaj çështjeve kyçe në rajon. bw