PRISHTINË – Mëngjesi i së martës ka nisur me një aksion të gjerë policor në Prishtinë në kërkim të zyrtarëve të Lëvizjes Vetëvendosje.

Në aksionin e nisur në orën 6, policia ka arrestuar deputetin e Vetëvendosjes, Glauk Konjufca, i cili është shef i Grupit Parlamentar të Vetëvendosjes dhe ka kërkuar nëpër shtëpitë e tyre edhe Xhelal Sveçlën dhe Sali Zybën, por pa mundur t’i gjejë. Banesa e këtij të fundit është në të njëjtin bllok me atë të deputetit tjetër të VV-së, Albin Kurti.
Ndjekjet e zyrtarëve të Vetëvendosjes kanë të bëjnë me rastin e shkatërrimit të veturave të EULEX-it, në vitin 2009.

POLICIA: PO ZBATOJMË URDHËR-ARRESTET

Zëdhënësi i Policisë së Kosovës, Daut Hoxha ka konfirmuar për “Zeri.info” se PK-ja ka realizuar disa aksione të arrestimeve, duke u bazuar në disa urdhëresa të organeve kompetente.

“Policia rregullisht kryen arrestime në bazë të urdhëresave të gjykatës. Detyrat dhe autorizimet janë të përcaktuara me ligj si dhe zbatimi i urdhëresave të organeve të drejtësisë. Kemi të bëjmë me zbatim të urdhëresave”, ka thënë ai.