Presidenti Joe Biden, zëvendëspresidentja Harris dhe anëtarë të ekipit të sigurisë kombëtare.

Presidenti i Shteteve të Bashkuara të Amerikës, Joe Biden, nëpërmjet një deklarate ka konfirmuar vrasjen e njërit prej liderëve kryesorë të grupit militant Shteti Islamik në Siri.

Në deklaratën e presidentit amerikan, konfirmohet se trupat amerikane kanë vrarë në Siri liderin e IS-it, Abu Ibrahim al-Hashimi al-Qurayshi.

“Falë aftësive dhe trimërisë së forcave tona të armatosura, ne kemi hequr nga fushëbeteja Abu Ibrahim al-Hashimi al-Qurayshi – liderin e ISIS. Të gjithë amerikanët janë kthyer shëndosh e mirë nga operacioni”, thuhet në deklaratën e lëshuar për media nga zyra e presidentit Biden.

Bideni ka bërë të ditur se operacioni është kryer nën drejtimin e tij dhe se është zhvilluar në veriperëndim të Sirisë.

Sipas presidentit amerikan, Biden, trupat amerikane kryen një operacion kundër terrorizmit me qëllim që bota të jetë një vend më i sigurt.

AP raporton se operacioni pasoi një seri sulmesh në rajon, duke përfshirë një sulm që zgjati gati dhjetë ditë me qëllim të marrjes nën kontroll të një burgu nga grupi militant IS, i cili po përpiqet të ringjallet.

Forcat speciale amerikane zbarkuan me helikopterë dhe sulmuan një shtëpi në një cep të kontrolluar nga rebelët në Siri, duke u përleshur për dy orë me persona të armatosur, thanë dëshmitarët, raporton AP.

Vendi ku u vra lideri i IS-it, është kryesisht i banuar nga njerëz që janë larguar kohë më parë nga luftimet që ndodhën në Siri.

Pas vrasjes së Abu Bakr al-Baghdadi më 27 tetor, 2019, grupi militant IS kishte shpallur për lider të ri, Abu Ibrahim al-Hashimi al-Qurayshin.

Më 19 dhjetor, 2018, asokohe presidenti amerikan, Donald Trump, kishte shpallur fitoren mbi grupin militant Shteti Islamik. Por grupe të IS-it kishin vazhduar të kontrollonin disa territore brenda Sirisë.

Më 23 mars, 2019, zyrtarisht IS-i humbi kontrollin mbi territorin e fundit që kishte nën kontroll në Baghouz.

Një numër i madh i pjesëtarëve të IS-it u arrestuan dhe ende vazhdojnë të mbahen nëpër burgje të ndryshme në Siri.

TIRANË

Përfaqësuesi ligjor i Presidentit të Republikës Ilir Meta, foli pas seancës së dytë në Gjykatën Kushtetuese.

Bledar Dervishaj deklaroi se Kushtetuta jonë që në preambul përmendet parimi për një proces të rregullt ligjor, dhe kur një proces i rregullt ligjor nuk u realizua ne s’kemi me ç’të merremi me asgjë tjetër se do provonte pavlefshmëri të produktit të tij.

“Nuk ka pasur, nuk ka lëndë për të iniciuar procesin e shkarkimit të presidentit. Ju i dëgjuat të gjitha ‘live’. Presidenti ka kërkuar që prej datës 1 korrik që ky proces të përfundonte brenda legjislaturës së Kuvendit të vjetër.
Komisionet e vjetra nuk ishin në periudhë fundore, ky i fundit u ngrit pas zgjedhjeve që nuk lejohet”, deklaroi Dervishaj. bw

TIRANË

Presidenti i Republikës Ilir Meta i kërkon kuvendit dhe krerëve të grupeve parlamentar bashkëpunim për të krijuar dekoratën e lartë shtetërore “Mbretëresha Geraldinë”.

Me anë të një letre dërguar Kuvendit, Presidenti Meta shprehet se viti 2022 shënon 100-Vjetorin e vendosjes së marrëdhënieve diplomatike mes Shqipërisë dhe Hungarisë dhe 20-Vjetorin e rikthimit në Atdhe të Familjes Mbretërore Shqiptare dhe kërkesa e tij vjen në kuadër të këtyre dy momenteve të rëndësishme për vendin tonë.

Ai thekson më tej në letrën e tij se dekorata e lartë “Mbretëresha Geraldinë” do t’u dedikohet kryesisht, grave dhe vajzave shqiptare dhe të huaja, që me dashuri e pasion japin kontribut dhe promovojnë vendin tonë dhe vlerat e tij historike e kulturore, trashëgiminë tonë të pasur e të çmuar dhe përkatësinë tonë të fortë europiane.

LETRA E PLOTË
Viti 2022 shënon 100-Vjetorin e vendosjes së marrëdhënieve diplomatike mes Shqipërisë dhe Hungarisë dhe 20-Vjetorin e rikthimit në Atdhe të Familjes Mbretërore Shqiptare.

Në kuadër të këtyre dy momenteve të rëndësishme për vendin tonë, kam kënaqësinë të kërkoj bashkëpunimin tuaj, për të bërë të mundur krijimin e dekoratës së lartë shtetërore “Mbretëresha Geraldinë”.

Kjo dekoratë do të jetë vlerësim dhe mirënjohje për Mbretëreshën Geraldinë, e cila e deshi Shqipërinë dhe iu përkushtua, gjatë gjithë jetës së saj, me dashuri e pasion.

Dekorata e lartë “Mbretëresha Geraldinë” do t’u dedikohet kryesisht, grave dhe vajzave shqiptare dhe të huaja, që me dashuri e pasion japin kontribut dhe promovojnë vendin tonë dhe vlerat e tij historike e kulturore, trashëgiminë tonë të pasur e të çmuar dhe përkatësinë tonë të fortë europiane.

Jam i bindur që kjo dekoratë e lartë do të rrisë, njëkohësisht, ndërgjegjësimin e shoqërisë sonë, mbi rolin thelbësor e të pazëvendësueshëm të grave e vajzave shqiptare, për sakrificat, përkushtimin dhe dedikimin e tyre ndaj familjes dhe shtresave më në nevojë dhe për kontributin e tyre të jashtëzakonshëm në zhvillimin e shoqërisë dhe të vendit tonë.

Propozoj që Dekorata “Mbretëresha Geraldinë” t’u jepet personaliteteve shqiptare dhe të huaja, kryesisht grave dhe vajzave, kontributi dhe shërbimet e shquara të të cilave, lartësojnë rolin e kombit dhe të gruas shqiptare brenda dhe jashtë vendit, nën moton e Mbretëreshës Geraldinë “Detyrë dhe Dashuri”.

Ish-kryeministri Sali Berisha ka folur për mediat paraditen e sotme, teksa ka mbërritur në parlament për të marrë pjesë në seancën plenare.

Duke iu referuar protestës së banorëve, ai akuzoi qeverinë se sillet me banorët si pushtuese dhe se dokumenti që iu ofrohet në këmbim të shtëpive është një mashtrim.

“Drama e cila zhvillohet sot në Tiranë me banorët, ndaj të cilëve qeveria sillet si pushtuese, është dramë që ka në bazë vjedhjen dhe mashtrimin. Unë kam studiuar me vëmendje dokumentin që u ofrohet banorëve. Është absolutisht fund e krye mashtrimi. Ai nuk përbën marrëveshje, pro thjesht një akt vetëdeklarimi para noterit. Ndërkohë që një marrëveshje mes palëve kërkon firmën e të dy palëve dhe noterizimin e këtij dokumenti. Kërkon firmën e titullarit, lal Plehut, ose personit të autorizuar. Pra, e kam këtu në cantë atë akt-marrëveshje”, tha Berisha.

Ai tha më tej se mbështet protestën e tyre dhe iu bëri thirrje qytetarëve të Tiranës të solidarizohen me ta.

“Një territor iu jepet disa kompanive për t’u zhvilluar. Në të gjithë Tiranën kompanitë kanë zhvilluar territorin në marrëveshje individuale dhe ju nuk keni parë protesta të kësaj natyre. Përse ndodh këtu? Sepse është dora e zezë e vjedhjes së qeverisë. Këtu nuk lejohet që atë që do u jepet banorëve në përqindje të madhe e përvetëson qeveria dhe bashkia dhe zhvilluesve nuk iu mbetet fitimi i nevojshëm. Babëzia, hajnia kanë kufi vetëm qiellin. I mashtron duke iu kërkuar një vetëdeklarim të noterizuar. Kjo që ndodh është një akt i mirëfilltë çnjerëzor, dhunim flagrant i lirive dhe të drejtave të qytetarëve, mashtrim i tyre dhe një megavjedhje e madhe me kulla 30-katëshe që ndërtohen në trojet e tyre. Në Shqipëri dhe gjithë botën ekziston ligji i posedimit të pronës. Ligj që pas një afati të caktuar ai që posedon pronën është pronari dhe pronari dëmshpërblehet. Bashkia dhe qeveria prapa saj në mënyrë që t’i shpallin këta të paligjshëm, të marrin katet që duan për vete, sillen në këtë mënyrë ndaj banorëve. Mbështes plotësisht protestën e tyre. I bëj thirrje qytetarëve të Tiranës të solidarizohen me ta sepse kjo që po u ndodh atyre mund të ndodhë dhe me ta”, deklaroi Berisha.

(BalkanWeb)

Banorët e Paskuqanit, Laprakës, Kodrës së Priftit dhe ‘5 majit’ kanë dalë sot në protestë para parlamentit. Janë banorët që preken nga projektet e rindërtimit dhe të infrastrukturës së bashkisë. Ata kanë kërkuar ndërmjetësim nga parlamenti për transparencë për projektet si dhe kontratë të ligjshme me bashkinë për banesat e reja.

“Para parlamentit protestojnë 4 grupime qytetarësh nga Tiranë. Të parët janë banorët e ‘5 majit’, po kështu i janë bashkuar dhe banorët që preken nga zgjatimi i bulevardit në Laprakë, banorët eKodrës së Priftit dhe banorët e Paskuqanit. Kërkesat e tyre janë të njëjta, e para kërkojnë transparencë për projektin, për shtëpitë që po prishen dhe ku do të marrin shtëpi, pasi sipas tyre në asnjë nga territoret ku po hapet terreni për ndërtimin e banesave për të prekurit nga tërmeti nuk ka transparencë dhe as bisedime me banorët dhe banorët kërkojnë marrëveshje me bashkinë përmes kontratave të rregullta”, raportoi gazetari Erjon Skëndaj.

Ndërsa banorët thanë se kanë marrë kontratë të njëanshme nga bashkia, teksa bonusi i qirasë është qesharak sipas tyre.

“Jam banor i rrugës ‘5 maji’. Shtëpia ime është prishur ndër të parat. Parlamentit i kërkojmë që të bisedojë me bashkinë, të bëjë një ndërmjetësim dhe të na lidhë një kontratë të ligjshme, jo kontratë të njëanshme, që thotë na dhuro shtëpinë dhe unë të premtoj. Në kërkojmë që deputetët të ndërmjetësojnë për një kontratë të ligjshme. Bonusi i qirasë është qesharak. E kam marrë me qira 250 mijë lekë. Presim të reagojnë”, tha një banor.

“Jam banor i 5 majit. Kjo është shkresa që më ka dërguar Erion Veliaj mua si shpellar. Nuk jam jurist, por kulturën e kam më shumë se Erion Veliaj se 30 vite i kam në Europë. Kam 6 muaj që i kam dërguar shkresa Erion Veliajt. Kam që në 1992 aty. Kam që në 2009 që iu kërkoj këto shkresa”, tha një tjetër. bw

Anëtari i Komisionit të Rithemelimit të PD-së Belind Këlliçi ka komentuar mbajtjen e zgjedhjeve të 6 marsit.

Këlliçi theksoi se Sali Berisha ka mbajtur PD-në në pushtet për 13 vjet, duke shtuar se Lulzim Basha nuk ka për qëllim fitoren.

“Basha është zgjedhur kryebashkiak në Tiranë falë nesh. Lulzim Basha thoshte dikur se na duhet LSI si koalicion e sot ndryshon fjalët. Sa herë që PD ka pasur drejtues Sali Berishën, pritej fitorja. Berisha e mbajti PD-në 13 vjet në pushtet, kurse Basha do të marrë më shumë vota se në zgjedhjet më parë. Basha nuk ka qëllim fitoren.

Qytetarët e dinë se kush bashkëpunon me Ramën. Ne jemi opozita e vërtetë, që do të luftojmë regjimin e Edi Ramës. Bardh Spahia e të gjithë janë produkt të PD-së. Shtëpia e lirisë është këtu për t’ju dhënë qytetarëve administratorë të qyteteve, gjë që është shumë e rëndësishme”, deklaroi Këlliçi. syri.net

Ditën e diel u bënë publike emrat e kandidatëve për kryetar bashkie PD e perfaqesuar nga Komisioni i Rithemelimit të cilët do të përfaqësojnë koalicionin ‘Shtëpia e Lirisë’ në zgjedhjet e 6 marsit.

Në një proces historik që u zhvillua për herë të parë në Shqipëri, demokratët e Vorës, Lushjës, Durrësit, Shkodrës, Dibrës e Rrogozhinës zgjodhën me votë përfaqësuesin në garën e ardhshme për bashkitë e tyre.

Në një lidhje me Skype me emisionin e mëngjesit ‘Kafe Shqeto’ në Syri Tv, ishte i ftuar Premtim Kryemadhi i përzgjedhur për të garuar në zgjedhjet e 6 marsit në Bashkinë Dibër.

Ai tregoi se Primaret, dhe pse aplikuar për herë të parë në Shqipëri, ishin një proces mjaft i suksesshëm.

“Ishte një proces model dhe gjej rastin të përshëndes dhe dy kandidatët e tjerë, dhe ju them se do të jenë bashkëpunëtorët e mi qoftë në fushatë apo në qeverisjen e pushtetit lokal. Realisht, problemet e Dibrës janë aq të mëdha sa duhet  shumë kohë t’i përmendim gjithsesi ne do të kemi nje program të detajuar nëse do ta fitojmë garën.”

Pyetur nga moderatorja Dori, se cilat janë disa nga pikat në të cilat ai do të bazohet nëse do të zgjidhet më datë 6 mars, Kyemadhi u shpreh: Dhe pse një mandat i shkurtër 1 vjeçar, ne do ta përdorim atë për të kthyer shërbimin tek qytetarët, duke angazhuar një staf profesional të përkushtuar. Ajo çfarë dua të sqaroj është se staf profesional nuk do të thotë ‘spastrim’.

Në Bashkinë Dibër ka punonjës të mirë por në nivele ‘specialist’ ndërsa në nivele ‘drejtuese’ lënë për të dëshiruar. Qytetarët në gjithë këto vite nuk po qeverisen, në 2 mandate kanë provuar 5 kryetar bashkie të partisë socialiste, çfarë tregon se ata nuk kanë më çfarë japin.

Z.Kryemadhi gjithashtu nuk la pa prekur dhe një nga temat më të nxehta për qytetin e Dibrës dhe një nga premtimet e pambajtura kundrejt Dibranëve, ‘Skavicën’.

‘Ndërtimi i hidrocentralit te Skavicës nuk doli sot është një problem që diksutohet gjatë dhe gjithmonë Partia Demokratike e ka mbështetur ndërtimin e digave të vogla që nuk janë shkatërruese për të. Sigurisht që për këtë do të merret edhe mendimi i qytetarëve dhe i Këshillit Bashkiak i cili dhe pse është i majtë, ata janë qytetar të Dibrës.

Do të jem në ballë të gjithë protestave për mbrojtjen e qytetarëve dhe jo të qeverisë në qendër’, u shpreh ai.

Për më shumë, ndiqni videon më poshtë:

Përfaqësuesi ligjor i Presidentit Meta, Bledar Dervishaj e ka konsideruar të pakuptimtë kërkesën për shkarkim pasi nuk ka çështje për shkarkim.

Në një prononcim për mediat pas përfundimit të seancës për shkarkimin e Metës, u shpreh se

“Në procese të tjera si ai për zgjedhjet vendore dhe në këtë u evidenduan shkelje në pozitat e gjyqtarëve. Në këtë moment kur janë evidentuar këto shkelje nga ana e gjyqtarit relator apo edhe shkelja e afatit për ta shqyrtuar këtë çështjeje ky është një shkak për ta vënë në dyshim anshmërinë.

Nëse një institucion tjetër të thërret si ekspert të pavaruar nuk mund të të thërrasi pastaj si mbrojtësin e vet sepse këtu bien parimet e anshmërisë. Nuk ka shkarkim se nuk ka çështjeje për shkarkim’. bw

Analisti Alfred Lela në një intervistë në Edicionin e Pasdites me moderatoren Armela Ferko në Syri Tv, ka komentuar zhvillimin e zgjedhjeve të 6 marsit.

Lela theksoi se tashmë kemi front të fuqishëm opozitar, duke shtuar se demokratët e Shkodrës nuk i besojnë më Lulzim Bashës.

“Opozita e Bashës u shpërbë, tashmë kemi front të qenësishëm opozitar. Ka luhatje tek aleatët e tjerë si Duka, Mediu, Idrizi etj. Ky front ka garë të dyfishtë, një pjesë të shtëpisë së dikurshme dhe përballë ka Ramën. Primaret janë shumë të mira, por ndër të tjera u realizua edhe një premtim që ishte dhënë në Foltore nga Sali Berisha. 6 marsi është test shumë i mirë politik për politikanët. Basha është në kaos dhe këtë e tregon edhe delegimi që i ka bërë Alibeajt nga Fieri në Vlorë.

Demokratët e dinë shumë mirë se bashkëpunimi me LSI nuk do të thotë asgjë, derisa rreziku i madh është Edi Rama, duhen bërë të gjithë bashkë kundër keqqeverisjes, pvarësisht siglave të partive. Demokratët e Shkodrës s’i besojnë më Bashës. Meta është i vetmi person në politikë që po frenon revanshin e paprecedent të kësaj qeverie”, deklaroi Lela.

News Bomb sjell komunikimet në Twitter që ka patur Ambasasorja Amerikane me Sokol Ballën.

Ambasadorja e SHBA në Tiranë, Yuri Kim duket se ka zgjedhur të shëtisë buzë liqenit të kryeqytetit këtë të dielë me diell.

Është gazetari i njohur Sokol Balla, ai që ka postuar një foto krah diplomates amerikane teksa e uron për shëtitjen dhe mendimet “freskuese”.

Ndërsa Kim i përgjigjet: “Faleminderit për shëtitjen dhe diskutimin freskues”.

Belina Zeneli, prokurore pranë Gjykatës së Shkallës së Parë Dibër që kishte në dorë dosjen “184 “,është shkarkuar nga detyra. Këshilli i Lartë i Prokurorisë ka pranuar kërkesën e Inspektoratit të Lartë të Drejtësisë për shkarkimi e Zenelit. Nga hetimi ka rezultuar se ajo kishte zvarritur disa akte procedurale përgjatë periudhës 2013-2021. Në njoftim thuhet se veprimet e saj kanë cenuar imazhin e organit të akuzës duke ulur besimin e publikut te sistemi i drejtësisë.

Njoftimi

Këshilli i Lartë i Prokurorisë pranoi sot kërkesën e Inspektorit të Lartë të Drejtësisë për dhënien e masës disiplinore “shkarkim nga detyra” për prokuroren B.Z. e Prokurorisë pranë Gjykatës së Shkallës së Parë Dibër. Hetimi ndaj magjistrates nisi pas ankesës së depozituar në ILD nga Prokurori i Përgjithshëm.

Nga hetimi disiplinor që përfshiu punën e magjistrates në periudhën 2013-2021, u konkludua se veprimet dhe mosveprimet e prokurores përbëjnë mospërmbushje të pajustifikuar dhe të përsëritur të funksioneve gjatë hetimit, duke sjellë zvarritje të pajustifikuara të akteve procedurale, të cilat janë të detyrueshme për zbatim nga ana e magjistratëve. Magjistratja ka kryer të njëjtën shkelje, gjatë periudhës kohore 2013- 2021, duke bërë që shkelja të jetë vazhduese. Veprimet e magjistrates B.Z. kanë sjellë pasoja në dhënien e drejtësisë dhe kanë cënuar imazhin e organit të akuzës duke ulur besimin e publikut tek drejtësia.

Ato përbëjnë shkelje shumë të rëndë disiplinore, që diskrediton pozitën dhe figurën e prokurorit gjatë ushtrimit të detyrës dhe Inspektori i Lartë i Drejtësisë i propozoi Këshillit të Lartë të Prokurorisë masën disiplinore “Shkarkim nga detyra”, parashikuar nga neni 105, pika 1, shkronja “dh” dhe neni 111, pika 2 të ligjit nr. 96/2016 “Për statusin e gjyqtarëve dhe të prokurorëve në Republikën e Shqipërisë”, i ndryshuar, si dhe neni 148/d, pika 2, shkronja “a” e Kushtetutës së Republikës së Shqipërisë, masë që u pranua nga Këshilli i Lartë i Prokurorisë.Lapsi

Ish-kryeministri Sali Berisha ka konfirmuar koalicionin me LSI-në. Berisha pohoi lajmin gjatë një konference për mediat ku po prezanton zyrtarisht gjashtë kandidatët e tij për kryetar bashkie që do të garojnë në zgjedhjet e pjesshme lokale të 6 marsit.

Në një konferencë me gazetarët, Berisha tha se emrat e dalë nga primaret nuk janë të zgjedhur nga baza e partisë, por janë të votuar nga vetë demokratët.

Gjithashtu ish-kryeministri Berisha u shpreh se po negociohet edhe me parti të tjera. Po ashtu Berisha tha se emri i koalicionit është: ‘Shtëpia e Lirisë’

‘Nuk ka liri të vërtetë pa votën e lirë. Dua të zotohem para jush se ky proces do të ridimensionohet dhe në të ardhmen do të përsoset me ekspertizën më të shkëlqyer. Shtetet e Bashkuara kryesojnë me praktikën demokratike. Ne kemi miq që kanë shprehur gatishmërinë dhe mbështetje për vendosje të primareve dhe gatishmëri për të asistuar forcën tonë politike në zbatimin e standardit të avancuar në përzgjedhjen e kandidaturave. Hapi që do të bëhet do të jetë cilësor pasi në të gjitha primaret, për veç kryetar partie do votojë me të drejtën e votës edhe simpatizantët. Besoj se PD nuk mund t’i garantojë shqiptarëve votën e lirë nëse ku ia garanton anëtarëve të saj. Para syve tuaj po ndodh një transformim i madh. I ftoj të gjithë anëtarët e PD ta shndërrojmë këtë energji, në një energji të fitores . Këta zotërinj janë të parët në historinë e vendit që dalin nga vullneti i lirë’, tha Berisha, ndërsa falënderoi Voltana Ademin për përkushtimin e saj.

KQZ ka njohur zotin Basha?

Berisha: Edi Rama me bandat e tij ka konfiskuar në një akt madhor kriminal politik siglën e PD. Ne e konsiderojmë atë të konfiskuar, qëllimi më madhor ishte që ne të mos merrnim pjesë në këtij zgjedhje. Ne marrim pjesë në zgjedhje sepse bojkoti i zgjedhjeve nuk është opsion për ne. Do të ketë një marrëveshje në koalicion në përputhje me ligjin dhe në atë marrëveshje do të paraqitet dhe logoja që çdo shqiptar e ka të qartë se logon e vërtetë e ka konfiskuar Edi Rama. Luzlim Brava është peng i Edvin Ramës dhe natyrisht që do e blindojnë në mënyrë skandaloze selinë  e PD siç mori për mbrojtje vrasës trafikantë. Unë kam besim tek anëtarët e PD që do t’i përgjigjen këtyre qëndrimeve të peng Bashës me injorim dhe sëbashku me demokratët do të votojnë.

A është Lëvizja Socialiste pjesë e koalicionit?

Berisha: Po është pjesë e koalicionit

Kush janë parti të tjera aleate?

Berisha: Po negociohet.

Berisha: Durrësi është viktimë e një peshkaqeni, do ia tregojmë vendin

5.545 demokratë morën pjesë në primaret e zhvilluara dje nga PD në gjashtë bashki të vendit.

Demokratët zgjodhën me votën e tyre kandidatët që pritet të garojnë në zgjedhjet e pjesshme të 6 marsit.

Numrin më të lartë të pjesëmarrjes e shënoi Shkodra me 1582 votues.

Më pas vjen Durrësi me 1546 votues. Ne Lushnje votuan 1056 demokratë. Në Dibër votuan 713 demokratë. Në Vorë votuan 332 demokratë dhe në Rrogozhinë votuan 316 demokratë.

FITUESIT

• Bashkia Dibër: fitues z. Premtim Riza Kryemadhi me  424 vota

• Bashkia Durrës: fitues z. Ardian Mihal Muka, me 1162 vota

• Bashkia Lushnjë: fitues z. Elton Ilir Bano me 671 vota

• Bashkia Rrogozhinë: fitues z. Hekuran Selman Xhani me 221 vota

• Bashkia Vorë: fitues z. Lulzim Sefer Vrana me 277vota

• Bashkia Shkodër: fitues z. Bardh Ali Spahia me 1011 vota

Berisha: Lulzim Pengu, peng i një dosje për pastrim parash

Edhe në Vaun e Dejës ku mbajti ‘Foltoren’ këtë të diel, në ditën kur po mbahen primaret për zgjedhjet e kandidatëve për kryetar bashkie më 6 mars, Sali Berisha nuk hezitoi të ngrejë akuza ndaj Lulzim ‘Bravës’, siç e quan ai.

Berisha u shpreh se Basha është peng i një dosje për pastrim parash. Ai u shpreh se Basha pranoi të largojë Berishën nga politika për të mos shkuar në burg.

‘Edi Rama është njëra anë. Sot siç e shifni ju, kallp opozitën, apo pengbashën nuk e mbështet vetëm Edi Rama, por fatkeqësisht e mbështesin edhe përfaqësues të vendit të madh të lirisë dhe kjo mbështetje është një lojë e rrezikshme me pluralizmin në Shqipëri.

Fatkeqësisht, sot Bashën nuk e mbështet vetëm Edi Rama, por edhe përfaqësues të vendit të madh të lirisë. Kjo mbështetje është një lojë e rrezikshme për pluralizmin në Shqipëri. Kë po mbështesin ata me përkrahjen ndaj Lul Bravës?

Ai peng i tyre, i marr me dosjen Muzin. Lulzim Basha është i marr peng me një dosje për larje parash në SHBA dhe Tiranë. Ai firmosi që për të mos shkuar në burg, do të largonte Sali Berishën nga politika. Kjo është e vërteta’, tha Berisha.

Berisha: Shqipëria plot me drogë e korrupsion, por ambasadorja nuk tha një fjalë

Lideri historik i demokratëve, Sali Berisha po zhvillon një bashkëbisedim me demokratët e zonës së Vaut të Dejës.

Gjatë fjalës së tij me demokratët, Berisha ka pyetur përfaqësuesit e SHBA në Tiranë se si ka mundësi që mbështesin Ramën, kur në Shqipëri shpërthen droga dhe korrupsioni.

‘Si ka mundësi që Shqipëria u mbush me drogë dhe ju nuk thatë asnjë fjalë. Si ka mundësi që kur drejtësia italiane solli dosjen e përfshirjes në trafiqe të ministrave, i krahasuat këto gjyqe, me proceset komuniste. Si ka mundësi që në Shqipëri shpërthejnë afera korruptive dhe nuk thoni një fjalë, një deklaratë.

Si ka mundësi që nga Shqipëria ikin investitorë të mëdhenj të huaj dhe ju nuk thoni një fjalë. Si ka mundësi që nga ky vend ikin 550 mijë qytetarë dhe ju nuk thoni asnjë fjalë kundër Ramës.

Si ka mundësi që shqiptarët nuk marrin dot drejtësinë dhe ju mbështesni reformën e dështuar në drejtësi. Si ka mundësi që ju mbështesni një njeri që kaloi nga humbja në humbje, nga afera në aferë?

Mos mendoni se mbështesin Lulzim Bashën. Jo mbështesin Edi Ramën. Këtë ne nuk mund ta pranojmë. Mbështetet Edi Rama sepse është mik me Sorosin. Ne jemi mik me SHBA-të. Kjo e primareve është praktikë e SHBA’, tha gjatë fjalës së tij, lideri historik i demokratëve, Sali Berisha.

Berisha: Më 2020, Rama 10% më shumë pushtet se Ramiz Aliaj në vitin 1991

Lideri historik i demokratëve, Sali Berisha po zhvillon një bashkëbisedim me demokratët e zonës së Vaut të Dejës.

Ai ka prezantuar një studim ku thuhej se Edi Rama në vitin 2020 kishte 10 përqind më shumë pushtet se Ramiz Aliaj në vitin 1991.

‘Edi Rama në vitin 2020 ka pasur 10% më shumë pushtet se Ramiz Aliaj në vitin 1991.

Në këtë gjë, kontribut të madh ka dhënë Xhorxh Sorrosi. A e keni dëgjuar ndonjëherë nga zonja Kim të thotë ndonjë fjalë? Asnjëherë.

Por ajo thërret gazetarë në ambasadë duke u thënë të mos transmetojnë foltoren, duke shkelmuar kushtetutën e SHBA. Sikur vjen nga mbretëria e censurës, jo vendi i lirisë. Kjo është e vërteta e pushtetit të Edi Ramës sot. Këtë e arriti me reformën ne drejtësi, mbështetjen e mafias së tij.

Rezultantja është 530 mijë shqiptarë të larguar nga Shqipëria. Praktikisht po na shkatërrohet e ardhmja.

Nuk mundet kurrë dikush të na caktojë kryetarin ne. Të na thotë se cili deputet të hyjë në parlament e cili jo, përveç se votës tuaj.

Duke mbetur miq të SHBA nuk mund të pranojmë Xhorxh Sorosin në Shqipëri. Nuk mund të pranojmë Ballkanin e Hapur, shitjen e Kosovës. Të gjithë këto projekte në favor të Serbisë dhe jo në favor të shqiptarëve’, tha lideri historik i demokratëve, Sali Berisha. syri.net

Lideri historik i demokratëve, Sali Berisha po zhvillon një bashkëbisedim me demokratët e zonës së Vaut të Dejës.

Në fjalën e tij, Berisha deklaroi se Lulzim Basha është marrë peng, me dosje korrupsioni dhe me afera korruptive.

‘Rama në një urrejtje ndaj demokracisë, arriti të marrë peng Lulzim Bravën, me afera korruptive. 800 mijë metra katrorë në portin e Durrësit, që është afera e shekullit i janë dhënë gjoja një arabi, i cili në një aspekt është një biznesmen i madh shumë, por edhe kaq i madh si mashtrues.

Ai ka marrë buzën e Savës në Beograd, për të investuar 4 miliardë euro, por deri tani pas 10 vitesh ka investuar 24 mln euro.

Portin e Durrësit e ka marrë Edi Rama dhe Lulzim Brava. E rezulton se përfaqësues i Emar në Shqipëri, është përfaqësuesi i Lulzim Bravës.

Ju e patë se çfarë bëri me selitë. Se në çmënyrë armiqësore u soll ai me demokratët që e kanë ndjekur 8 vite. E gjitha kjo sepse selia është parashikuar të shndërrohet në kullat e parkut të ‘4 hajdutëve’. Aty do të ndërtohen 4 kulla, gjejeni ju se sa ka marrë për vete Lulzim Brava.

Pluralizmin politik e rithemeluan, rivendosën, burrat dhe gratë, djemtë e vajzat si ju. Njerëz të idealeve, njerëz që nuk e shitën votën për 4 mijë lekë, paçka se pse prej kishte nga ata që nuk kishte darkë, nuk kishte me çfarë të blinte ilaçet, humbët edhe vendet e punës. Por ju nuk u shitët, nuk u dorëzuat. Pluralizmi ishte në zemrat tuaja’, tha gjatë fjalës së lideri historik i demokratëve, Sali Berisha.

Lideri historik i demokrateve, Sali Berisha ka mbajtur nje takim me demokratet ne Vaun e Dejës.

Berisha u shpreh se nënë Liza është një heroinë e vërtetë.

Ai shtoi se qeveria barbare prish shtëpitë dhe ndërton kulla për interesa personale.

‘Nënë Liza është heroike. Ajo donte të flijohej, sepse një shtet barbar e horrash, e njofton sot për nesër se do të prishë shtëpinë.

Në çdo shtet, vendet hapin rrugë, ndërtojnë blloqe të reja, por këta bëhen duke respektuar ligjet dhe të drejtat e qytetarëve, nuk i shkohet si pushtues tjetrit për t’ja prishur shtëpinë, kur je i detyruar t’i garantosh strehimin.

Rama ia prish shtëpinë për të ndërtuar kulla.

Në çdo vend të botës, prona dhe posedimi i pronës mbrohen me ligj dhe ai që ka shtëpinë aty prej vitesh, shteti është detyruar ta strehojë dhe të bjerë në marrëveshje me të.

Por këta nuk kanë moral e shpirt, por mendojnë vetëm për pasurim personal në kurriz të qytetarëve’, – u shpreh Berisha. syri.net

Lideri historik i Partisë Demokratike Sali Berisha e ka nisur këtë të dielë me një mesazh për demokratët në 6 degët ku votohet nga anëtarësia e Partisë Demokratike për të përzgjedhur kandidatët për drejtimin e bashkive që do të marrin pjesë në zgjedhjet e 6 marsit.

Ja postimi i plotë i Berishës:

Sot demokratët dhe demokratet e 6 degëve të Partisë Demokratike votojnë në Primare! Zoti e bekoftë votën e tyre të lirë! sb syri.net

Ashtu siç është bërë e ditur, të dielën janë primaret për kandidatët e Partisë Demokratike në 6 bashki të vendit.

Komisioni i rithemelimit ka bërë të ditur dhe vendet ku do të votojnë antarësia por edhe simpatizantët e PD për 6 bashki të vendit.

Shkodra do ketë 3 qendra votimi. Kështu QV me numër 1 do jetë në qytet te Pallati i Sportit, QV 2 që i takon zonave Velipojë, Bërdicë, Dajç, Ana e Malit do votojnë në Bërdicë, ndërsa QV 3 për Rrethinat, Shalën, Pult, Guri i ZI, Shosh do  votojnë në Rrethina.

Për kandidatët e Dibrës, Qendra e Votimit do jetë në Pallatin e Kulturës  së qytetit.

E njëjta gjë dhe për Durrësin, ku do të votohet në Pallatin e Kulturës “Aleksandër Mosiu”.

Në Lushnje do jetë zyra e PD së Degës, në Rrogozhinë tek bar “Atika”, ndërsa në Vorë tek zyra e PD së degës.

Procesi i votimit do të fillojë në orën tetë të mëngjesit dhe do të zgjasë deri në orën 17.00.

Komisioni i Rithemelimit njofton se ky proces mund të zgjatet në rast se ka ende votues në radhë. syri.net

Kryebashkiakja e Shkodrës Voltana Ademi u tërheq nga gara për të kandiduar në zgjedhjet vendore të 6 Marsit.

Ademi ka bërë një reagim në ‘Facebook’ lidhur me kandidimin, ndërsa shprehet se kishte besim tek mbështetja e qytetarëve.

Më tej ajo thekson se sot Shkodra dhe Shqipëria janë në një moment ku po diskutohen parimet elementare të demokracisë.

Reagimi i plotë:

Të dashur bashkëqytetarë,

Të nderuar demokratë,

Bashkëpunëtorë dhe miq të mi,

Prej 7 vitesh vazhdojmë së bashku një rrugëtim, i cili në shumë etapa nuk ka qenë i lehtë. Kur mora përsipër në vitin 2015 kandidimin si kryetare e Bashkisë së Shkodrës, e dija se nuk do të ishte një sfidë e lehtë.

Ndarja e re territoriale rriti ndjeshëm numrin e banorëve, sipërfaqen e administrimit por bashkë me to, edhe përgjegjësinë për të bërë më të mirën e mundshme për Shkodrën tonë.

E dija se mbështetja jo vetëm e demokratëve por të gjithë shkodranëve vullnetmirë, nuk do të më mungonte.

Në fakt, e kam ndjerë këtë mbështetje në çdo sekondë të punës sime. Kur ngarkesa e punës, problematikat e përditshme shtoheshin dhe kërkonin zgjidhje të shpejtë, shumë herë kam dalë nga zyra dhe jam takuar me njerëzit. Dëshira më është shtuar për të vijuar përpara, për të kapërcyer vështirësi e pengesa, bashkë me njerëzit dhe për njerëzit.

Në këto 7 vite, jam përpjekur të jap maksimumin tim, më të mirën time. Parime të punës sime në administrimin e shtëpisë sonë të përbashkët- Shkodrën, kanë qenë ndershmëria, përkushtimi dhe transparenca. Besoj se pavarësisht vështirësive që na kanë shoqëruar thuajse çdo ditë të punës sonë, edhe unë, edhe ne, të gjithë bashkë, kemi vendosur një tjetër “gur” të rëndësishëm në ecjen tonë përpara, me synim përmirësimin e jetës sonë.

Sot, Shkodra por edhe Shqipëria, janë në një moment kur diskutohen parimet më elementare të funksionimit të një demokracie. Çdo gjë, çdo hallkë e shoqërisë po monopolizohet ose është monopolizuar tashmë nga regjimi në fuqi. Secili prej nesh, edhe nëse nuk e thotë me zë të lartë, e mendon këtë fakt. Po vihet në dyshim edhe ekzistenca e një opozite të vertetë, e domosdoshme për të ruajtuar balancat e funksionimit normal të një shteti, i cili aspiron të jetë pjesë e kombeve të Bashkimit Europian.

Situata është alarmante. Por si për çdo gjë, siç edhe na kanë mësuar këto 7 vite të rrugëtimit tonë të përbashkët, ka një alternativë, ka një zgjidhje. Bashkimi, kundërvënia ndaj të keqes dhe fenomeneve negative që e shoqërojnë atë, duke u bazuar mbi vlerat tona, mbi të ato që na bashkojnë dhe jo tek ato gjëra të pakta, të vockla që për momentin, duket se mund të na ndajnë. Sigurisht, kjo pikë së pari kërkon që të gjithë ne, përpara interesit personal të momentit, dëshirës për të menduar si individ, duhet të mendojmë për Shkodrën, shtëpinë tonë të madhe të bukur. Këtë ia kemi detyrim kujtimit të të parëve tanë, neve por sidomos fëmijëve tanë. Përgjegjësia jonë është të mos mendojmë e punojmë për sot por për të nesërmen, që të jetë më e mirë se e sotmja.

Mbi këto baza e kam ndërtuar aktivitetin tim publik, në të gjitha pozicionet që më janë besuar, jo vetëm në politikë dhe administrimin vendor por edhe në mësimdhënie apo si profesioniste e lirë. Është e vështirë, ka mjaft pengesa por nuk ka rrugë tjetër veçse të ecësh përpara, drejt, duke u mbështetur përveç parimeve, edhe tek njerëzit vullnetmirë të cilët fatmirësisht nuk i kanë munguar e nuk do të mungojnë asnjëherë Shkodrës e Shqipërisë.

Siç jeni të gjithë në dijeni, Presidenti i Republikës ka dekretuar zgjedhje të pjesshme vendore për Bashkinë e Shkodrës. Këto zgjedhje, duhej të ishin bërë në vitin 2019, atëherë kur e përcaktonte Kushtetuta e ligji. Për arsye tashmë të ditura, për përgjegjësi të ushtruara apo të munguara edhe në tejkalim apo shkelje të ligjit, është vendosur që të zhvillohen me 6 mars 2022. Në periudhën zgjedhore maj- prill 2023, do të zhvillohen zgjedhjet e zakonshme vendore në të gjitha bashkitë e vendit. Ndërsa këto zgjedhje të pjesshme vendore, do ti japin Shkodrës siç edhe 6 bashkive të tjera, një drejtues vendor për një vit.

Me 5 janar të këtij viti, ne kemi miratuar buxhetin për vitin 2022, bazuar në prioritetet që vetë banorët e Bashkisë Shkodër kanë përcaktuar si prioritare. Jam shpresëplotë që implementimi i këtij buxheti, do të përmirësojë më shumë jetën tonë, me investime dhe sherbime më cilësore për të gjithë. Jam shumë e kënaqur që si në vitet e tjera, edhe në këtë vit të fundit të atij që mund të quhet “mandati i dytë”, kemi bërë një bashkëshpërndarje cilësore.

Për shkak edhe të prejardhjes sime familjare, prej shumë e shumë vitesh jam pjesë e familjes së madhe të demokratëve, Partisë Demokratike. Nga viti 1990, kam nisur një rrugëtim gradual, me bindjen se është alternativa më e mirë për Shkodrën e shkodranët, Shqipërinë e shqiptarët. Historia e 31 viteve të fundit, i jep të drejtë çdo antari të PD- së të krenohet dhe të gjejë motivim për të ecur përpara, pavarësisht “incidenteve” të momentit.

Ndjehem shumë e vlerësuar nga mbështetja që kam marrë e marr në vijimësi nga Partia Demokratike, antarët e saj, kolegët e miqtë e mi brenda familjes sonë politike.

Kjo mbështetje nga demokratët, më shoqëroi edhe në këto ditë. Në procesin e propozimit të kandidaturave për kryetar bashkie për zgjedhjet e 6 mars 2022, jam ndër më të votuarit. Mirënjohja dhe falenderimi janë më e pakta që unë shpreh për të gjithë demokratët e Bashkisë Shkodër, janë motivi që unë të mos ndalem por të eci bashkë me të gjithë drejt një Shkodre e Shqipërie më të mirë për të gjithë.

Unë jam kryetarja në detyrë e Bashkisë së Shkodrës. Për shkak të këtij pozicioni, të pozicioneve të mëparshme publike që më janë besuar por edhe për shkak të angazhimit tim dhjetëravjeçar në Partinë Demokratike, kam vendosur të mos marr pjesë në “primaret” që do të zhvillohen me 30 janar 2022 për përcaktimin e kandidatit për kryetar bashkie në Shkodër.

Gjykoj se futem në garë me një avantazh përballë të gjithë kolegëve të tjerë, për arsyet që përmenda më sipër.

Unë jam në mbështetje të çdo demokrati, të strukturave ndaj të cilave unë ndjehem e detyruar për vlerësimin në vijimësi.

Voltana Ademi nuk i shmanget asnjë sfide, por brenda familjes sonë politike, duhet të jemi të gjithë të barabartë në mes të barabartëve, të kemi mundësitë dhe hapësirat tona për të dhënë kontribut për PD- në, Shkodrën e Shqipërinë.

Zgjedhjet e zhvilluara këto 31 vite, edhe ato të 25 prill 2022, kanë evidentuar individë me mbështetje të gjërë jo vetëm brenda demokratëve por edhe qytetarisë shkodrane.

Zëri, mbështetja dhe vota ime, do të bashkohet me të gjithë demokratët e shkodranët, që me 30 janar 2022, në “primaret” e PD- së, të evidentojmë më të mirët, më të mirin, atë që ka mbështetjen më të gjërë. Është shërbimi më i mirë që i bëjmë Shkodrës, të sotmes e të nesermes.

Pas 30 janarit, do të jemi dhe duhet të jemi të gjithë bashkë, një skuadër edhe më e madhe, e fuqishme dhe e bashkuar, për të vazhduar rrugëtimin e pandalshëm për të mirën e shtëpisë sonë të përbashkët, Shkodrës.

Vetëm të gjithë bashkë fitojmë, vetëm të gjithë bashkë mundim të keqen e madhe që ka kapluar këtë vend, vetëm të gjithë bashkë do ta ndërtojmë të nesermen më të mirë se e sotmja!

Policia e Elbasanit ka vënë në pranga sot një inspektor të Drejtorisë së Tatimeve të Bashkisë së Elbasanit, Gentian Dukën, 44 vjeç, pasi ai zotëronte një arsenal të tërë armësh në shtëpinë e tij. Arrestimi u bë në kuadrin e një operacioni të koduar “Kral” për goditjen e personave që qarkullojnë me armë zjarri apo i mbajnë në banesë pa leje në bashkëpunim me Prokurorinë e Rrethit Gjyqësor

Gentian Duka banon në lagjen “Visarion Xhuvani” të qytetit të Elbasanit. Shërbimet e Policisë gjatë kontrollit të banesës së 44 vjeçarit, gjetën një kallashnikov, një pushkë sportive me dylbi, 500 copë fishekë luftarake pistolete, kallashnikov dhe mitraloz, një përforcues grushti,një thikë dhe 7 karikatorë.

Provat e mësipërme janë dërguar në Institutin e Policisë Shkencore në Tiranë për t’u ekzaminuar nëse janë përdorur në ngjarje të tjera kriminale. Gjithashtu po vazhdon puna për dokumentimin e mëtejshëm ligjor të kësaj ngjarje dhe të aktivitetit kriminal të këtij shtetasi nëse është i implikuar në ngjarje kriminale të ndodhura më parë.

Materialet i kaluan për veprime të mëtejshme hetimore Prokurorisë pranë Rrethit Gjyqësor Elbasan për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi, mbajtja, blerja apo shitja pa leje e armëve të ftohta”. syri.net

Fshati Llëngë në rrethinat e Pogradecit, ndonëse është një zonë e bekuar nga natyra, banesat numërohen me gishtat e njërës dorë. Llënga ka qenë një ndër zonat më të populluara në kufijtë e një qytetit të zhvilluar për kohën, me mbi 10 mijë banorë.

“Fshati përmendet për herë të parë në defterët Osmanë në vitin 1583”, thotë për A2 CNN mësuesi Ledjan Zeqollari. “Në atë kohë, mendohet se kishte rreth 160-170 shtëpi. Lulëzimin e kemi në vitet 1740-1750, gjatë lulëzimit të Voskopojës. Në këtë fshat, ka kaluar një degëzim i rrugës Egnatia. Mendohet që ka pasur 10 mijë banorë, pak a shumë një qytet për kohën kur flasim”.

Arsyet e braktisjes së kësaj zone, më mirë se kushdo tjetër i rendit pikërisht një prej zonjave të pakta që vijon të jetojë në këtë fshat. “Nga e keqja, nga varfëria, papunësia, mjekësia, arsimi, rruga. Sot 5 familje jemi”, thotë Tefta Verushi.

Konflikti Rusi-Ukrainë është kryefjala e mediave botërore këto ditë. Një konflikt që mund të dërgojë në një luftë mes dy vendeve është më prezentë se kurrë. Për të folur për këtë çështje, i ftuar në emisionin “FrontLine”, ishte ish-ambasadori Agim Nesho.

Ai tha gjatë fjalës së tij se Vladimir Putin e ka këtë betejë për të rikthyer fuqinë e ish-Bashkimit Sovjetik, një ëndërr e tija.

E po ashtu, Nesho shtoi se largimi i SHBA nga Afganistani, shtoi një farë sigurie te Rusia për të bërë ofensiva të tilla dhe për t’u ulur si e barabartë në tavolinën e bisedave mes vendeve më të mëdha botërore.

A do të kemi luftë mes dy vendeve?

Nesho: Putin do të avancojë strategjinë ruse për të arritur një fuqi botërore. Në Ballkan po tregohet lojtarë i fortë, ku ka pranë vetes vende si Serbia. Ai do të kthehet me SHBA dhe NATO-n si i barabartë në tavolinën e bisedimeve për të treguar fuqinë e ish-Bashkimit Sovjetik që është ëndrra e Putinit. Pas luftës së Dytë kemi pasur rendin liberal botëror për të ruajtur interesat dhe liritë në një botë ku respektohet ligji dhe të drejtat e njeriut. Duke u rritur e ndryshuar skema botërore me disa fuqi, këta kërkojnë të ndryshojnë tendencën e rendit botëror për arsye se vetë sistemin e tyre e kanë bërë në disa të pavërteta nga Perëndimi. Ne nuk do të bazohemi në ligje e principe, por duam ato zona influence.

Pse tani kjo mësymje e Rusisë?

Nesho: Një regjim gjysmë diktatorial kërkon të ngre frymën patriotike. Nuk është cështja vetëm te prezenca e NATO-s në Ukrainë. Ukraina po bëhet demokratike dhe po kthen sytë nga Perëndimi, kjo po e rrezikon atë. Revolucionet trembin më shumë Putinin se ky është një precedent që këto popuj kanë mundësi të kërkojnë disa të drejta. Në këtë mënyrë e sheh si një rrezik imediat veprimin që do të bëj në Ukrainë. Është një situatë ku edhe Perëndimi e sheh me interes. Nëse ajo dështon para një sulmi të Putinit bie e gjithë filozofia e rendit liberal botëror. Nuk veprohet në bazë të ligjeve e kartës së OKB që njihet sovraniteti i kombeve për paqe e stabilitet. Në 2014 u tregua i pa fuqishëm për të ndaluar Putinin ndaj marrjes së Krimesë. Kjo ka ndodhur sepse gjatë kësaj periudhe perëndimi ka pasur kriza të tij. Tërheqja e SHBA nga Afganistani është çelësi. Jo vetëm pse tërheqja nga Afganistani nuk ndodhi me metodikën e duhur, por tregoi se nuk ishte në të njëjtën mendim të atyre çështjeve që duhet të mbronte atje. Çështja në Afganistan vendosi në pikëpyetje SHBA, e deklaratën e Biden që tha se politika e SHBA nuk do të vijojë për të mbrojtur rendin dhe demokracitë në vende të tjera. Qeveritë diktatoriale shpesh boshllëqet nuk i lënë, por i shfrytëzojnë për interesat e tyre. Çështjet e GDP të Rusië s’ia kalojnë Italisë dhe nuk mund t’ia kalojë një superfuqie botërore si SHBA, por ama ka agresivitetin dhe vullnetin e një lidershipi për t’u ulur si e barabartë në një tryezë botërore. Në një luftë frontale nuk mund të pengohet ushtria ruse. Në Moskë flitet për një supermarci duke thënë se për 10 minuta pushtojnë Kievin. Gjithmonë diktatura të tilla ku ndihen të vetëngupura bëjnë gabime, e këtë gjë s’e shpëton as Rusia. Organizimi i Ukrainës s’është për një luftë frontale, por është e vendosur në njësi të vogla e të vendosur për të mbrojtur vendin e tyre.

Cilat janë vendet në Ukrainë që mund të sulmojë Rusia?

Nesho: Ka tre variante ku mund të sulmohet. Në radhë të parë janë interesat e Rusisë që tashmë i ka arritur. Ajo kërkon që marrëveshja e Minskut të pranohen nga Perëndimi si parakusht. Së dyti duan që të mos pranohet asnjëherë në NATO. Ukraina është një fushë dhe ka qenë vendi që Rusia ka qenë e zbuluar nga sulmet e fuqive të tjera. Distanca nga Moska është e afërt. Çështja është që drejtimet dhe projektet e tyre janë 3. Janë portet në Detin e Zi. Së dyti është Kakivi, një qytet që ka shumë rëndësi dhe skenari i tretë është një ofensivë direkte për në Kiev që do të mbrojë çështjen ruse dhe do të jetë një qeveri kukull për ta komanduar lehtësisht. Trupat që mendohen të jenë gjatë këtij konflikti do e çojnë para një katastrofe elektorale Putin, nëse mijëra ushtarë kthehen në një katastrofë njerëzore. Do të dëmtohet edhe ekonomia.

Ish-ambasadori Agim Nesho  nuk mendon se Vladimir Putin do të ndërmarrë një sulm ndaj Ukrainës. I ftuar në “Frontline”, në Neës 24, Nesho tha se nëse Rusia do të dalë kundër Perëndimit atëherë do t’i bashkëngjitet Kinës e cila do ta lërë në hije.

Nesho tha se Shqipëria duhet të bashkëveprojë me vendet e NATO-s që të dërgojë ndihmë në Ukrainë.

“Nuk mendoj se Putini do të futet në luftë sepse forca e federatës ruse është nëse gjen nje zgjidhje komplementare me Europën. Vetë diplomacia ruse ka këmbëngulur për të gjetur një kompromis. Nëse Rusia do të dalë kundër Perëndimit dhe do të vazhdojë ofensivën e saj, nuk do të mbetet hapësirë vetëm t’i bashkangjitet Kinës. Por Kina do t’i bëjë një trajtim që ta lërë në hije, në plan të dytë.

Politika e Kinës e shikon me agresivitet hapësirat e mëdha tokësore, sidomos në lindje. Madje është një konflikt i fshehur që mund të shpërthejë.
Nëse humbitet lidhja me Perëndimin, rruga e vetme e dhimbshme do të jetë t’i bashkohet Kinës. Çështja e diplomacisë do të jetë gjithmonë. Politika ruse nuk është shumë e drejtpërdrejtë. Kërkon që të provokojë në një mënyrë. Biden ka kërkuar një tjetër negociatë. Politika amerikane ka qenë shumë konsekuente. Gjermania ka qenë gjithmonë e ftohtë ndaj konflikteve të tjera. Social-demokratët kanë qenë më afër me një politikë që Rusia dhe Gjermania dhe të kenë gjithmonë një bashkëpunim që i sjell siguri Europës.

Ballkani

“Rusia i ka përdorur vendet që ka influencë, Serbinë duke ditur edhe investimet strategjike. Influenca ruse kërkon të jetë prezentë në Ballkan. Për Rusinë, Ballkani ëhtë një rajon që e ngre atë në rolin e një superfuqie. Ajo do të jetë edhe një fuqi domisuese në Mesdhe. Shqipëria ka hyrë në lojën e Vuçiç. Për të marrë një ror të madh ka ofruar veten një një projekt, si Ballkani i Hapur që të jetë një zgjidhje e çështjes së Ballkanit duke sjellë bashkëpunim me Serbinë. Shqipëria ka rënë pre e lojës serbo-ruse.

A duhet që Shqipëria të japë ndihmën e saj?

“Pse jo. Duhet koordinim me vendet e tjera të NATO-s. Pse Shqipëria mos të ndihmojë në një çështje të drejtë. Shqipëria hesht atëherë kur duhet të veprojë. bw