Deputeti i PD, Xhelal Mziu kërkon bashkimin e demokratëve, duke nisur nga heqja dorë e ankimimit në Gjykatë ndaj Kuvendit të 11 Dhjetorit dhe vendimeve të marra. 

Në një shënim të gjatë në Facebook, Mziu shprehet se grupi parlamentar demokrat duhet të jetë i unifikuar.

Ai thekson se duhet të shpallet i pavlefshëm çdo vendim i mëparshëm lidhur me përjashtimet nga PD.

Deklarata
Si bashkohet Partia Demokratike!

Partia Demokratike është në situatën më kritike, çfarë e bënë të domosdoshme bashkimin e plotë të saj, duke mos përjashtuar askënd nga PD apo gara dhe duke shfrytëzuar të gjithë energjinë, potencialin dhe kontributin e gjithëseicilit, që Partia Demokratike të jetë mazhorancë qeverisëse në zgjedhjet vendore dhe qendrore!

Një shembull ilustrues:

Zgjedhjet në 6 mars në Bashkinë Dibër folën qartë (përjashtuar vjedhjes masive të rilindjes), ja fakti!

Në 25 Prill 2021.

PD=14,000 + LSI=3.000=17.000 vota, ndërsa PS=11.000 vota.

Në 6 Mars 2022.

PD=4.500+4.500=9.000 vota, ndërsa PS=14.000 vota.

Pra, Opozita humbi 8 mijë vota nga konflikti,

Rilindja u rrit 3.mijë vota nga vjedhja (pavarësisht se Dibranët janë më keq se një vit më parë)!

Platforma dhe hapat përbashkues, që duhet të aprovohen dhe ndiqen nga grupi parlamentar si e vetmja strukturë përfaqësuese dhe përgjegjëse e PD, që të kemi një PD fituese në zgjedhjet vendore të vitit 2023!

1. Unifikimi total i grupit parlamentar të Partisë Demokratike, sipas 25 prillit 2021.

2. Heqja dorë nga ankimimi në gjykatën e apelit të vendimit për Partinë Demokratike!

3. Shpallja NUL e çdo përjashtimi, që nga kryesia PDSH, këshilli kombëtar e çdo zgjedhje apo emërim të bërë në strukturën drejtuese e deri në bazën e PD (nga PD apo Foltorja)!

4. Ndalimin i menjëhershëm i konflikteve dhe debateve të brendshme dhe pa vlerë brenda PD.

5. Hartimi i një programi e grafiku zgjedhjesh nga baza deri në Kuvendin Kombëtar përbashkues të PD!

6. Grupi parlamentar i PD si e vetmja strukturë e çertefikuar të jetë pjesa substanciale e grupeve të punës në terren nga dy palët, ku zgjedhjet nga Seksioni, Grupseksioni dhe deri në rang Kryetar dege të jenë deri në korrik 2022, më sakt:

A. Zgjedhje të reja në seksione Maj 2022.

B. Zgjedhje të reja në Grupseksione Maj-Qershor 2022.

C. Zgjedhje e Kryetarëve të Degëve në bazë dege dhe Bashkie në Qershor-Korrik 2022.

D. Zgjedhje e Kryetarit të PDSH Korrik ose Gusht 2022.

E. Organizimi i Kuvendit Kombëtar Përbashkues i PD dhe zgjedhja e strukturave të Këshillit Kombëtar të PD, etj në Korrik ose deri Gusht 2022.

F. Mbledhja e Këshillit Kombëtar dhe Zgjedhja e Kryesisë dhe strukturave të tjera drejtuese të PD Gusht ose në Shtator 2022.

H. Të hartojmë një platformë konkuruese qeverisëse të PD (të shpaloset në shtator ose tetor), që të binden jo vetëm demokratët por dhe apolitikët, pse jo dhe socialistët që Shqipëria meriton një qeverisje ndryshe nga sot, një qeveri që i bënë qytetarët shqiptarë që të ndjehen si qytetarët e BE këtu në Shqipëri.
Këtë duhet dhe mundet që ta bëj vetëm Partia Demokratike.

Kjo është ajo çfarë duhet të bëj grupi i punës i përbashkët i grupit parlamentar të PD por dhe eksponent të tjerë, që të kemi një PD më të madhe se me 25 prill dhe fituese në raport me rilindjen.

Historia jo e largët ose koha, do të dënoj me forcë këdo që është kundër bashkimit pakushte të Partisë Demokratike!

Demokratët dhe shqiptarët janë në krizë të thellë, ne po Ju humbim shpresën atyre.

Shqipëria çdo ditë po bëhet më e vogël nga dje dhe për fajin tonë!

Komisioni i Organizimit dhe Kontrollit të Operacioneve Elektorale të Partisë Demokratike njofton që është mbyllur procesi i votimit në PD Dega Elbasan.

Pas numërimit të fletëve të votimit, kryetar i PD Dega Elbasan u shpall Blendi Ferdinand Himçi me 66% të votave.

Në garë ishin edhe Eliona Gremi, Sonila Daiu, Klodjana Çapja dhe Elior Vila.

Zgjedhjet u zhvilluan sipas parimit një anëtar, një votë. syri.net

Dega e Partisë Demokratike në Vlorë do të zgjedhë të dielën kryetarin e ri. 

Në garë janë katër kandidatë, Atird Hoxha, Edmond Banushaj, Fatjon Fejzaj dhe Lorenc Danaj.

Deputeti i PD, Bujar Leskaj, njëherazi drejtues i qarkut, fton anëtarët e PD që të marrin pjesë në zgjedhje pasi vota e tyre e lirë do t’i shërbejë edhe procesit të bashkimit të demokratëve.

“Kryetari i ri i degës së PD Vlorë duhet që nga e nesërmja e zgjedhjes së tij të ndërmarrë hapa konkrete për bashkimin e demokratëve dhe, mbi të gjitha, duhet të tregojë me akte konkrete, që Partia Demokratike, nuk ka të tepërt asnjë anëtar të saj, asnjë demokrat, asnjë themelues, asnjë qytetar, që, mbi të gjitha, do Shqipërinë“, thotë Leskaj.

Postimi
Nesër në Vlorë zhvillohen zgjedhjet për kryetarin e ri të degës së PD!

Të katër kandidatëve për kryetar të degës, Atird Hoxha, Edmond Banushaj, Fatjon Fejzaj, Lorenc Danaj, u uroj suksese në këtë proces të vështirë, por të domosdoshëm të riorganizimit që nga themeli të Partisë Demokratike. Natyrisht njëri do të zgjidhet, por realisht fiton procesi.

Nesër demokratët e Vlorës do të shprehen me votën e tyre të lirë, e cila duke qenë në themel dhe në ADN-në e Partisë Demokratike, përcjell mesazhin e bashkimit dhe përfaqëson fitoren e demokracisë.

Kryetari i ri i degës së PD Vlorë duhet që nga e nesërmja e zgjedhjes së tij të ndërmarrë hapa konkrete për bashkimin e demokratëve dhe, mbi të gjitha, duhet të tregojë me akte konkrete, që Partia Demokratike, nuk ka të tepërt asnjë anëtar të saj, asnjë demokrat, asnjë themelues, asnjë qytetar, që, mbi të gjitha, do Shqipërinë.

Gjatë gjithë kësaj kohe, kryefjala jonë ka qenë “BASHKIMI”, sepse asnjëherë nuk kemi pasur dyshimin se pavarësisht divergjencave, kundërshtarët nuk janë ata që mendojnë ndryshe brenda familjes së madhe të Partisë Demokratike, por kundërshtari ynë i vetëm është një dhe vetëm një: sekti Rama në pushtet!

Jo bashkim me përjashtime, por bashkim, që nuk përjashton ASNJË demokrat nga proceset e riorganizimit dhe fton të gjithë kontributorët që nga 1990 e deri më sot. Sepse, në fund të fundit, duhet bashkim nëpërmjet diversitetit, legalizimit dhe respektimit të fraksioneve; debatit të lirë e lirisë së shprehjes së mendimit ndryshe!

Procesi i riorganizimit të Partisë Demokratike në qendër dhe në bazë aktualisht po bëhet me një përgjegjësi të lartë ndaj Partisë Demokratike, demokratëve të bashkuar dhe shqiptarëve, të cilët qëllimin e tyre final kanë përballjen me sektin Rama, për të fituar në zgjedhjet e ardhshme.

Harxhuam shumë kohë të çmuar e energji në luftën tonë të brendshme. Ndoshta u bënë edhe gabime nga të dyja palët. Gabime në organizim që krijuan idenë e mënjanimit të padrejtë të ndonjë demokrati, por që do të korrigjohen gjatë rrugës. Duhet që edhe ne, drejtuesit e lartë të PD dhe deputetët të kërkojmë ndjesë. Me qytetari, ndershmëri dhe sinqeritet. Të gjithë deputetët pa përjashtim e fituam mandatin nga puna, përpjekjet, përkushtimi i demokratëve të thjeshtë. Ndaj duhet të dimë të mbajmë edhe përgjegjësi! Për të mirën e Partisë Demokratike, demokratëve, Shqipërisë e shqiptarëve.

Natyrisht, këtë regjim, e rrëzon vetëm një Parti Demokratike, e bashkuar, e hapur dhe e fortë; e cila duke respektuar votën e lirë, diversitetin e ideve, lirinë e shprehjes, fraksionet dhe respektimin e tyre; do të jetë fituese, do të përthithë të gjitha forcat progresiste të shoqërisë shqiptare, do të jetë SHPRESË për të ardhmen dhe ASPIRATË për ndryshim.

Duke besuar thellësisht tek BASHKIMI, unë jam i bindur që në Kuvend do të marrin pjesë të gjithë deputetët, anëtarët e Këshillit Kombëtar, drejtuesit e vjetër dhe të rinj të degëve e strukturave në bazë, sepse vetëm kështu i shërbejmë procesit të ringritjes së partisë dhe interesit të demokratëve.

Sot flitet shumë për Bashkimin, por duhet punuar edhe më shumë për Bashkimin real, sidomos kur ndonjëri punon ende për përjashtimin, pengimin, ndarjen!

Një gjë e tillë do të ishte katastrofike! Asnjë gabim në riorganizim, asnjë përjashtim ndoshta i padrejtë, asnjë qejfmbetje, nuk duhet të prevalojë mbi Kuvendin bashkues të demokratëve. Askush nuk i shërben bashkimit dhe PD me pengim të Kuvendit të 30 prillit.

Partia Demokratike është aset, është “pronë” e të gjithë demokratëve.

Vetëm kështu PD mund të përmbushë misionin e saj të madh si opozitë për të shpëtuar Shqipërinë nga ky regjim i ngritur mbi korrupsionin, vjedhjen e qytetarëve dhe vjedhjen e shpresës, varfërimin dhe largimin e tyre nga Shqipëria.

Sepse kundërshtari i vërtetë i demokratëve dhe i shqiptarëve është Rama dhe sekti i tij!

Platforma e prezantuar të shtunën nga Enkelejd Alibeaj për bashkimin e PD, jo vetëm nuk gjen mbështetjen e shumicës së grupit parlamentar, por deputetët as nuk e njohin Alibeajn si kryetar grupi. Flamur Noka dhe Edi Paloka, sollën në vëmendje Kuvendin e 11 dhjetorit, duke theksuar se Basha-Alibeaj kanë frikë nga përballja me vullnetin e demokratëve. Në të njëjtën linjë ishin edhe reagimet e deputetëve Tritan Shehu e Ervin Salianji, të cilët deklaruan se në vend të bashkimit, Alibeaj po nxit përçarje.

SYRI TV

Platforma përçarëse e prezantuar këtë të shtunë nga Enkelejd Alibeaj në emer të bashkimit të PD, nuk ka gjetur mbështetjen e grupit parlamentar, shumica e së cilit as e njohin Alibeajn si kryetar të grupit.

Anëtari i Komisionit të Rithemelimit, Flamur Noka në një prononcim për mediat i është përgjigjur deklaratave të Enkelejd Alibeaj, i cili e quajti procesin e zgjedhjeve në bazë ‘përçarës të partisë dhe i njëanshëm.

Sipas Nokës, Basha –Alibeaj ka frikë nga përballja me vullnetin e demokratëve.

“Grupi parlamentar është një organ shumë i rëndësishëm i Partisë Demokratike. Partia Demokratike është e vendosur të respektojë dhe të garantojë të drejtat statutore të cdo organi, por mbi të gjitha është vullneti i anëtarësisë së Partisë që vendos qëndrimin politik të saj. Me këtë rast, theksoj, se askush nuk do mundet më të organizojë procese ku 1958 karrike të lexohen si 5004 delegatë. Askush nuk do mundet më, të zëvendësojë votën e lirë me blinda apo gaz lotsjellës. Askush nuk mundet më të manipulojë me firma fiktive vullnetin e deputetëve dhe grupit parlamentar të PD. Koha e përjashtimeve ka përfunduar dhe bashkë me të dhe koha kur vullneti i shumicës injorohej. Bashkimi vjen përmes votës së lirë”, u shpreh Noka.

Ndërsa deputeti Edi Paloka, solli në vëmendje Kuvendin e 11 Dhjetorit, ku duket qartë se shumica dërrmuese e demokratëve mbështesin Komisionin e Përkohshëm të Rithemelimit, dhe liderin historik Sali Berisha.

Paloka shprehu keqardhje për miqtë dhe kolegët e tij që me dije apo vetëdije kanë firmosur nismën e Alibeajt.

“Thjesht keqardhje për miqtë dhe kolegët që në rastin më të mirë, nuk kanë lexuar se çfarë ju kanë vënë përpara…Keq nëse nuk e kanë kuptuar! Shumë keq nëse e kanë kuptuar dhe nënshkruar me vetëdije të plotë!”, thotë Paloka.

Kundër kësaj platforme ka dalë edhe deputeti Ervin Salianji, dikur mbështetës i grupimit Basha, por që pas zhvillimeve të fundit në kampin blu, mendon ndryshe.

Sipas Salianjit, në vend të bashkimit, Alibeaj po nxit përcarjen. Ai thekson me tej se  Forma, mënyra dhe përgatitja e këtij dokukenti mbyllin rrugën për çdo diskutim të përbashkët dhe krijojnë premisat për ndarjen përfundimtare të Partisë Demokratike!

“Dorëheqjet duke mos hequr dorë nuk janë zgjidhje ashtu si çdo proçes i njëanshëm është i dëmshëm për Partinë Demokratike!

Pas deklarimit publik të ketij dokumenti mbyllet dera për çdo zë racional dhe për të mbrojtur çdo interes që zgjedhjet brenda partisë të jenë gjithpërfshirëse! Ofertat publike apo ultimatumet janë një gjuhë që nuk i rrijnë për shtat as një komunikimi normal me kundërshtarin politik dhe jo më me pjesëtarët e të njëjtës familje politike. Forumet e partise aty jane, mungon vetem vullneti ne rastin me te mire apo akoma me keq synimi per ta ndare PD në pjese!”, thotë ai.

Në të njëjtën linjë ishte edhe deputeti Tritan Shehu, i cili në një reagim në SYRI TV,  tha se Alibeaj nga  ana morale, politike, e ka humbur të drejtën për të qenë Kryetar i Grupit Parlmantar të PD-se.

“Duhet të jemi realistë: Kryetari i Grupit Parlamentar është gjithëpërfshirës, nuk mund të jetë z. Alibeaj. Formalisht ai mund të thotë që jam, por moralisht dhe politikisht nuk mund të jetë, kjo është e sigurt. Aq më shumë kur merr atribute që tejkalon kompetencat e Grupit Parlamentar, se Grupi ka dhe një kryesi“, tha Shehu.

Më herët lidhur me këtë platformë kanë reaguar edhe depuetët të tjerë të PD, si Edmond Spaho, Luçiano Boçi etj, të cilët jo vetëm e mbështesin, por deklarojnë se nuk e njohin Alibeajn si kreun e grupit parlamentar.

Ish-kryeministri Sali Berisha ka shpërndarë një video të vjetër nga koha kur Edi Rama është anëtarësuar në PS.

‘No comment!’, shkruan Berisha në Facebook.

Në fjalimin e tij para kolegëve socialistë Rama pranon se është i padisiplinuar dhe menjëherë ka marrë fjalën Musa Ulqini i cili pranon se në PS pranohen edhe njerëz problematik si Edi Rama.

Rama: Përgjithësisht i pamësuar me idenë e disiplinës partiake por ju siguroi se nuk kam hyrë në PS duke përfituar nga mungesa aktuale e disiplinës.

Ulqini: Në partinë tonë pranohen edhe njerëz si ato që janë pranuar deri tani por edhe njerëz problematikë si Edi Rama. syri.net

Lideri historik i demokratëve, Sali Berisha, në një konferencë për shtyp nga selia blu, komentoi kongresin e socialistëve.

“Kongresi i një mafie shtetërore, ose le ta quajmë kongresi i Cosa Nostra-s. Kjo u faktua te tematika kryesore e këtij kongresi. Shqiptarët, që prisnin me padurim të dëgjonin se si do u lehtësohen dhimbjet e mëdha që u krijon rritja e çmimeve, nuk morën asnjë përgjigje.

Kongresmenët u ulën mbi dengje kashte, rrahën gjoksin dhe u përgjëruan për fshatarët apo për të tjerët, por e vërteta është se kongresi i tyre, në vend të lajmeve të rëndësishme për lehtësimin e dhimbjeve të përditshme të qytetarëve, i informoi ata se narkoshteti ka vendosur të ligjërojë produktet e krimit të tij të shëmtuar. Ka vendosur të ligjërojë kanabisin, madje bazuar në mashtrimin kombëtar, në anketën e mashtrimit kombëtar. U zotuan me solemnitet se nëse shqiptarët janë dakord për përdorim individual, do lejohet edhe përdorimi individual. Praktikë kjo e shkatërrimit kombëtar.

Gjithçka në kuvend u bë që të mbulohej me retorikë, me dengje kashte, flakët e inceneratorëve. Të mbulohej kjo aferë, me të cilën që nga Edi Rama deri te vartësit e Alqi Bllakos dalin para jush si një organizatë kriminale, që ka vjedhur qindra milionë dhe do vidhnin qindra të tjerë. Vetëm në një aferë.

Nuk u tha asnjë fjalë se përse Edi Rama si kreu i organizatës mafioze të inceneratorëve firmosi kontratën me negocim të mbyllur. Kjo do të thotë negocim në shpellat e mafies. Zyra e kryeministrit është shndërruar në shpellë. Ajo lejon kontratën me negocim të mbyllur. Sepse kryejuristi i organizatës kriminale, Agaçio, që lumturon bosët e mafias me dhjetëra e dhjetëra hektarë tokë, në vend që të respektonte Kushtetutën dhe të thoshte se kjo nuk mund të firmoset, argumenton se kjo është legjitime,” tha Berisha.

“Ata që kanë pasur ndonjë vërejtje apo dyshim se po abuzohet duke e quajtur SPAK-un, si SPAK i partisë, u gjetën në mënyrë të zhgënjyer. Në mënyrë të përsëritur, Edi Rama, kreu i organizatës, u deklaroi shqiptarëve se SPAK është vepër i PS, është fëmija e saj, pjellë e saj dhe këtë duhet ta dijë Shqipëria dhe bota.

Në diktaturë, ju nuk keni jetuar, por institucionet si prokuroria, gjykatat, policia, ushtria, quheshin armë të partisë. Ekzakt kjo që u them unë. Armë në duart e partisë. Armë në duart e diktaturës së proletariatit. Këtë herë nuk është më diktaturë e proletariatit. Këtë herë flitet për armë të PS apo të narkoshtetit.

Kreu i organizatës kriminale ngarkoi me detyrë SPAK-un e partisë duke i thënë që e dua Sali Berishën në burg dhe në djall opozitën. Në historinë 30-vjeçare të këtij vendi, kuvende të  tilla edhe Partia e Punës ka zhvilluar, por kaq të paskrupullt, kaq të hapura, përpiqej që të maskonte diçka”.

‘Problemi i Edi Ramës është se me Sali Berishën nuk e tërheq dot më zvarrë opozitën’

Ambasadori i Gjermanisë në vendin tonë, Peter Zingraf ka komentuar situatën në Partinë Demokratike.

Sipas tij, PD duhet të rigjejë veten dhe të kthehet në një alternativë për qytetarët ku të flitet për përmbajtjen e saj dhe jo për personat.

Duke folur nga Korça, Zingraf  tha se PD duhet të zhvillojë procese transparente dhe të zgjedhë një udhëheqës që është i orientuar nga e ardhmja dhe të kthehet në një opozitë të fortë që do të kontrollonte qeverinë.

“Në fakt përgjigja ime do duhej të kishte qenë këto janë çështje të brendshme të një partie rreth të cilave nuk do të duhej të shprehesha. Por më duhet të them gjithsesi diçka rreth kësaj sepse kemi të bëjmë me të ardhmen politike të një partneri të ngushtë sikurse është Shqipëria për Gjermaninë.

Çdo vend, i cili kërkon të ketë një sistem demokratik funksional, do duhet të ketë gjithashtu dhe një opozitë të fortë, e cila do duhet të shërbente për kontrollin e qeverisë sepse në fund të fundit zgjedhësit do duhet të kenë alternativen e duhur. Ndaj do dëshiroja shumë që PD të mund të rigjente në njëfarë mënyre veten sepse kjo do të ishte e rëndësishme për vendin pasi vitin e ardhshëm kemi zgjedhje.

Do doja gjithashtu që e gjitha kjo të ndodhte në kuadër të proceseve transparente dhe nga pikëpamja juridike të pastra dhe që partia të mund të gjejë një udhëheqje të sajën e cila të jetë e orientuar nga e ardhmja dhe të mund të arrije të bëjë gjithçka çka do duhej të bënte një opozitë dhe më së fundi të flitej rreth përmbajtjeve e jo rreth personave”, është shprehur ai. syri.net

Deputeti i Partisë Demokratike Agron Shehaj thotë se kjo parti po shkon drejt bashkimit. I ftuar në emisionin “Të Paekspozuarit” në MCN TV, Shehaj tha se zgjedhjet e pjesshme të 6 marsit treguan se shumica është me liderin historik të PD, Sali Berisha.

“PD vjen nga një përçarje e madhe që fillimin e ka nga vendimi i Bashës për të përjashtuar Berishën. Berisha nuk e pranoi atë vendim, e konsideroi të padrejtë.

Ai mblodhi Kuvendin në mënyrë legjitime, tha jemi shumica dhe vendosim të rithemelojmë PD-në. Zgjedhjet e treguan qartë se sa e përçarë është partia, nga është shumica dhe nga është pakica.

Ishte një moment përçarje dhe po shkojmë drejt bashkimit. Nuk ka asnjë diskutim. Nuk duhet të ngatërrojmë përçarjen dhe raportet brenda grupit parlamentar me raportet brenda anëtarësisë.

Në anëtarësi përçarja është shumë më e vogël sesa mund të duket dhe shumë më e vogël sesa është në grupin parlamentar”, tha Shehaj.

Gazetari i Radio Francë, Genc Burimi ka folur në Task Force në SYRI TV me Sonila Meçon, ku ka kërkuar që Grupi i Rithemelimit të përjashtojë deputetin Enkelejd Alibeaj dhe Gazment Bardhi nga Grupi Parlametar i PD-së.

Burimi ka theksuar se ‘pas kësaj këta njerëz nuk dalin më të kakarisin, as Alibeaj as Basha pasi këta janë të shporrur’.

Burimi: A ka sot tagrin sot Grupi i Rithemelimit ti dërgojë një letër kryetares së Kuvendit Nikolla se ky deputet dhe ky deputet nuk është më në grupin parlamentar të PD-së?

Grupi i Rithemelimit mund ti përzërë ata nga PD-ja dhe ti çojë letër Nikollës që këta nuk janë më anëtarë të grupit parlamentar të PD-së.

Në Francë partia e Macron e tradhton komplet në parlament dhe shkon te Le Pen dhe ti më thua mua që këta të mblidhen dhe të përjashtojnë veten, kjo nuk funksionon pasi partia ësthë më e madhe.

Pas kësaj këta njerëz nuk dalin më të kakarisin, as Alibeaj as Basha pasi këta janë të shporrur. Dhe në parlament Rama nuk ka më tradhtar dhe negocion me demokratët e vërtetë.

Pjesa që nuk i nënshtrohet grupit të rithemelimit të shporret. Nëse Rama dhe Nikolla ndërhyjnë atëherë të mbushen sheshet dhe të lihen problemet brenda partisë.

Në limitet e afatit ligjor, SPAK ka marrë vendimin të bëjë rekurs për ish-ministrin e Brendshëm Saimir Tahiri.

Ish-ministri u dënua nga Apeli i GJKKO me 3.4 vite burg, ndërsa SPAK kishte kërkuar 12 vite heqje lirie.

SPAK argumenton se vonesa e rekursit kishte të bënte me pritjen e zbardhjes se vendimit.

Gjykata rrëzoi SPAK për akuzat e trafikut të drogës dhe grupit kriminal të ngritura ndaj Tahirit

Gjykata e Posaçme e Apelit për Korrupsionin dhe Krimin e Organizuar e shpalli fajtor ish-ministrin për shpërdorim detyre duke lënë në fuqi dënimin me 5 vjet burg. Për shkak të gjykimit të shkurtuar Tahiri do të vuajë 3 vite e 4 muaj burg. syri.net

Piruetat/ Dy fytyrat e Ramës për “Open Balkan”

Mosaprovimi nga kancelari gjerman Shultz i projektit të Ballkanit të Hapur dhe këmbëngulja e tij për të vënë theksin tek forcimi i Procesit të Berlinit e ka bërë Edi Ramën të ndryshojë sërish strategji. Nëse për një kohë të gjatë ai është rrekur të mbrojë para shqiptarëve tezën se nisma e tij dhe e presidentit Vuçiç mbështetet nga Brukseli, tani ai ka kaluar në një tjetër regjistër: Ai po përdor farsën e këshillimit kombëtar për të thënë se e ka obligim nga populli i tij të shkojë përpara me këtë projekt. “Mua nuk më intereson mendimi i të tjerëve, por ai i qytetarëve”, tha kryeministri këtë të martë gjatë një konference shtypi në Berlin (video poshtë).

Kryeministri Edi Rama u prit në një takim nga kancelari gjerman, Olaf Scholz.

Në konferencën e përbashkët për shtyp, kancelari gjerman kërkoi avancimin e Procesit të Berlinit, si e vetmja alternativë për bashkëpunimin rajonal, duke mos njohur nismën për Ballkanin e Hapur.

Avancimi i procesit të Berlinit ishte porosia kryesore, e  kancelarit gjerman, Olaf Scholz, i cili injoroi nismën e Ballkanit të Hapur, gjatë takimit që zhvilloi me kryeministrin Edi Rama, në Berlin. Në konferencën e përbashkët për shtyp, pas  takimit kokë me kokë, mes Ramës dhe Scholz, kancelari gjerman u angazhua personalisht, për avancimin e Procesit të Berlinit, si i vetmi instrument për tregun e përbashkët rajonal.

Të martën, Rama u pyet për këtë çështje nga gazetarët shqiptarët, por si zakonisht shpërtheu ndaj atyre që kundërshtojnë nismën në Tiranë.

“Procesi i Berlinit filloi të humbiste impaktin edhe për shkak se çfarë u parapa në Procesin e Berlinit dhe çfarë u vendos në tryezë nuk u implementua kurrë jo nga Gjermania, por nga vendet e Ballkanit Perëndimor. Sa i përket atyre në Tiranë që janë kundër, aq më pak shoh problem sepse nuk më intereson fare, më intereson mendimi i qytetarëve”, tha Rama.

Rama u pyet lidhur me armatimin e Serbisë me sistemin mbrojtës anti-raketor, por sipas Ramës kjo nuk ka pse ta shqetësojë farë Shqipërinë.

Më tej Rama u shpreh se Serbia ka bërë hapa inkurajues në OKB, dhe se Ballkani Perëndimor deri tani ka treguar se është bashkë.

“Nuk jam i shqetësuar për armatimin e Serbisë. Nuk shoh arsye për t’u shqetësuar sot për sot. Është më e rëndësishme që ne t’i fryjmë erës së paqes dhe të mbajmë sa më shumë bashkë Ballkanin Perëndimor edhe me ndihmën e aleatëve tanë strategjik, si Gjermania. Nuk shoh se si një sistem mbrojtje nga raketat mund të jetë shqetësues për ne? Serbia ka bërë hapa. Ka bërë hapa inkurajues në OKB. Dhe Ballkani deri më tani është bashkë. Bashkëpunimi në rajon është me rëndësi të madhe për shkak të konfliktit në Ukrainë”, u shpreh Rama. syri.net

Kryeministri Edi Rama është pyetur në një konferencë me gazetarët shqiptarë në Berlin për vendimin e DASH që ka shpallur “non grata” ish-deputetin e PS, Aqif Rakipi, djali i të cilit është sot në Parlament i zgjedhur kandidat nën siglën e PS.

I pyetur nëse ndihet se ka marrë vendimin e duhur për të zgjedhur kandidat për deputet djalin e Aqif Rakipit që sot është non grata, Rama nuk preferoi të komentonte.

Pyetje: Zgjodhët një kandidat që sot është deputet pa ndonjë kontribut në parti babai i të cilit është shpallur “non grata”, a ndiheni se keni marrë vendimin e duhur?

Rama: Të vijmë deri në Berlin për të folur për kandidatët e PS në Tiranë më duket pak e sforcuar, kështuqë kalojmë në pyetjen tjetër. syri.net

Ish kryeministri Sali Berisha ka bërë me dije se në Tiranë kanë mbërritur prej disa ditësh 20-30 prokurorë evropianë.

I ftuar në emisionin ‘Politiko’, Berisha thotë se kanë në dorë dosje ‘përvëluese’ siç i cilëson ai për Tiranën, Beogradin, Shkupin, ndërsa shton se përmes telefonave ‘BQ’, janë duke u përgjuar dhe transkriptuar biseda të dyshimta.

“Në Tiranë janë 20-30 prokurorë evropianë. Kanë disa ditë. Keni dëgjuar historinë e telefonave BQ. Janë dosjet më përvëluese për Tiranën, Beogradin, Shkupin.

Kur unë ia shihja, në parlament thosha kush e di pse mbajnë dy telefona, ato paskan qenë telefona të tillë. Atyre po u lëviz tepeleku tani. Janë disa emra, janë socialistë.

Ditë e natë punohet për transkriptim, me një numër të madh përkthyesish, teknikësh. Nuk ka pasë kurrë një vërshim i tillë në Tiranë. Ka një marrëveshje me konventa ndërkombëtare”, u shpreh Berisha në ‘Politiko’. syri.net

Ish-kryeministri Sali Berisha deklaroi nga foltorja e Kuvendit se nisma Ballkani i Hapur është denoncuar nga BE në të gjitha nivelet dhe përfaqësues të lartë të SHBA.

Sipas Sali Berishës nisma ‘Open Balkan’ është një make-up ndaj Vuçiçit, i cili nuk njeh genocidin në Kosovë.

” Ballkani i Hapur është denoncuar nga BE në të gjitha nivelet dhe përfaqësues të lartë të SHBA.

Ballkani i Hapur s’ka qëllim veçse tualet ndaj një njeriu që s’njeh genocidin në Bosnjë dhe Kosovë, ka emrin Aleksandër Vuçiç.

Olta Xhaçka ka një bashkëshort strategjik, lëre pastaj kur shkon në Jalë, e denoncojnë oficerët, në kundërshtim me të gjitha ligjet.”-tha Berisha. syri.net

Demokratët dje kanë zgjedhur drejtues kandidatin Resmi Shanaj, me profesion mësues, i cili ka marrë 277 vota.

I dyti është renditur Astrit Xhafaj me 80 vota.

Ndërsa vota të pavlefshme kanë qenë 12.

Në këto zgjedhje morën pjesë 356 anëtarë të PD në Mallakastër.

Të pavlefshme – 12 vota

Në këto zgjedhje PD aplikoi për herë të parë në Shqipëri, sistemin elektronik për regjistrimin dhe verifikimin e zgjedhësve në garën për kryetar të PD në rrethe.

Kryetari i ri i degës së PD, Astrit Xhafaj në mesazhin e tij para mediave, u shpreh se do të punojë për bashkimin e partisë.

Njoftimi
Komisioni i Organizimit dhe Kontrollit të Operacioneve Elektorale të Partisë Demokratike njofton që mbarëvajtja e zgjedhjeve për Kryetar dege të PD Mallakastër ishte shumë e mirë.

Procesi i votimit u mbyll në orën 18.00. Numri i votuesve në total ishte 369, duke shënuar pjesëmarrje të lartë.

Pas numurimit të fletëve të votimit, Kryetar i PD dega Mallakastër u shpall Z. Resmi Bilbil Shanaj me 277 vota.

Komisioni I Organizimit dhe Kontrollit të Operacioneve Elektorale falenderon të gjithë anëtarët që u bënë pjesë e procesit të votimit për zgjedhjen e Kryetarit të degës së tyre sipas parimit “një anëtar një votë”, për një Parti Demokratike më të bashkuar, më të forte e më të hapur. 

Ndërkohë, Komisioni i Organizimit dhe Kontrollit të Operacioneve Elektorale që në nisje të procesit përcolli mesazhe për të gjithë anëtarët e PD-së në Mallakastër, që të bëhen pjesë e procesit të votimit për zgjedhjen e Kryetarit të degës së tyre sipas parimit “një anëtar një votë”, për një Parti Demokratike më të bashkuar, më të fortë e më të hapur.

Drejtuesit e policisë shqiptare në pikën kufitare të Kosovës në Vërmicë janë arrestuar mëngjesin e sotëm.

Gazeta kosovare Express raporton se në aksionin që po zhvillohet në Vërmicë, deri tani janë arrestuar të gjithë udhëheqësit e Policisë së Shqipërisë në këtë pikë kufitare.

Ata dyshohen për veprat penale “marrje e ryshfetit” dhe “keqpërdorim i pozitës apo autoritetit zyrtar”.

Sipas burimeve të Gazetës Express, atje pritet të arrestohen rreth 20 policë të Kosovës dhe 40 të Shqipërisë.

Inspektorati Policor i Kosovës dhe Prokuroria Speciale në bashkëpunim me autoritetet e Shqipërisë janë duke vazhduar aksionin “Pika”, që para disa javësh përfundoi me arrestimin e mbi 50 zyrtarëve policorë.

“Hetimi përfshin edhe bashkëpunim me prokurorë nga SPAK-u (Struktura e Posaçme kundër korrupsionit dhe krimit të organizuar e Republikës së Shqipërisë) dhe zyrtarët e AMP-së Agjencisë për Mbikëqyrje Policore (agjencia homologe e IPK-së në Shqipëri)”, thuhet në komunikatën e IPK’së.

Presidenti Ilir Meta komentoi në emisionin ‘Çim Peka Live’ aferën korruptive të inceneratorëve duke thënë se drejtësia është peng i pushtetit.

Meta theksoi se nëse drejtësia vonon, do të merret vetë me çështjen e inceneratorëve. Ndër të tjera Meta deklaroi se Rama është koka e skemës së vjedhjes me inceneratorët.

“Kemi një drejtësi që prej kohësh ka rënë në gjunjë para shumicës dhe presionit politik. Mjafton të shohim aferën e tmerrshme të inceneratorëve për të kuptuar se ku ndodhet sot drejtësia.

Do ketë një ridimensionim dhe përshkallëzim të veprimit opozitar, për këtë të jeni të sigurt dhe kjo është shumë e rëndësishme, sepse duhet një vullnet i ri politik në Shqipëri për ndryshime të vërteta.

Për të zgjuar pikërisht qytetarin shqiptar dhe për t’i thënë atij që është ai Zot i këtij vendi. Drejtësia është në gjunjë para pushtetit. Ose do të ngrihet, ose në rrënojat e saj do ngrihet një drejtësi e re.

Me çështjen e hetimit të inceneratorëve do merrem vetë. Pres reagim të përgjegjshëm nga drejtësia, por nëse ky reagim vonon atëherë me këtë zbardhjen e kësaj çështje do merrem vetë.”-tha Meta.

Kryeministri Edi Rama është përpjekur t’ju shmanget pytjeve mbi inceneratorët, madje deri aty sa edhe të ngihet nga karrigia gjatë pyetjes së moderatorit Blendi Fevziu në ‘Opinion’.  

Duke i publikuar shifrat që qeveria ka shpenzuar për inceneratorët, Fevziu e pyeti lidhur me kostot që ka inkapsulimi dhe incenerimi i mbetjeve, por Rama u çua dhe nisi të bisedonte me publikun në sallë, madje duke i kërkuar edhe kafe.

Por, kjo gjë nuk është pritur mirë nga kreu i qeverisë, i cili nuk dha një përgjigje shteruese për këtë çështje.

Fevziu: Kryeministri nuk përgjigjet dot për një çështje.

Rama: Nuk po të ndjek…

Feziu: A mund të përgjigjesh?

Rama: Na sjellni një kafe ju lutem.

Fevziu: Ke shpenzuar 40 milionë euro për inceneratorin e Tiranës nga 23 që duhet të paguaje. 60 milionë për dy të tjerët, Fieri dhe Elbasanin. Është djegësi i parë dhe i dytë.

Rama: Për Tiranën nuk paguajmë asnjë lekë.

Afera më e madhe korruptive në Shqipëri, ajo e inceneratorëve duket se është afera e cila nuk do të mbyllet lehtë për kryeministrin Rama dhe vartësve të tij të cilët kanë zbatuar urdhrat.

Ipeshkëvi i Rrëshenit, Dom Gjergj Meta ka reaguar pas deklaratave të kryeministrit Edi Rama se do të legalizojë kultivimin e kanabisit për qëllime mjekësore.

Në postimin e tij në Facebook, Gjergj Meta e ka quajtur legalizimin e kanabisit si ‘kalë Troje’ i drogave më të rënda në jetën e shumë të rinjve, sidomos në një vend ku ka papunësi dhe varfëri midis tyre.

‘Më keq akoma nuk dua të besoj se një nismë e tillë është dorëzim i shtetit përballë mafies së kultivimit të lëndëve narkotike’, ka theksuar Gjergj Meta.

Postimi i plotë i Dom Gjergj Metës:

LEGALIZIMI I KANABISIT SI KALË TROJE …

Për momentin po kufizohem të them se legalizimi i kanabisit (qoftë edhe për qëllime kinse mjekësore) është Kali i Trojës i drogave më të rënda në jetën e shumë të rinjve, sidomos në një vend ku ka papunësi dhe varfëri midis tyre. Ky legalizim mund të jetë gjithashtu paradhoma e shumë fenomeneve të tjera të dëmshme për shoqërinë, sikurse monopolet apo logjikat mafioze.

Personalisht më çudit fakti që një popullsi aq “konservatore” si kjo e jona qenka aq pro legalizimit të kanabisit, nëse është e vërtetë që procesi i konsultimit nga ana e qeverisë ka sjellë në këto rezultate.

Nuk do të doja të besoja se disa nga këto ide janë si dikur “…me propozim nga poshtë e vendim nga lart” (për kujtesë më 9 maj 2020 kryeministri ka thënë se ka një vit që qeveria po punon me draftin e ligjit për legalizimin e kanabisit, d.m.th. qysh më 2019).

Më keq akoma nuk dua të besoj se një nismë e tillë është dorëzim i shtetit përballë mafies së kultivimit të lëndëve narkotike.

Kaq për momentin për lajmin e mundësisë së legalizimit të kanabisit që u artikulua këto dy ditë.

D. Gjergji

Koncesioni i inceneratorëve është një ndër aferat korruptive më skandaloze.

Bëhet fjalë për tre kontrata koncesionare, 178 milionë euro, për tre inceneratorë, në Fier, Elbasan dhe në Tiranë.

SPAK tashmë ka vënë në pranga një ish-ministër dhe një ish-deputet, pas hetimeve në lidhje me inceneratorët e Fierit dhe Elbasanit.

Por, në lidhje me incenerarorin e Tiranës, i cili është më i madhi, me një kontratë koncesionare 128 milionë euro, por që fitimet duket të jenë marramendëse, SPAK po ecën me hapin e breshkës.

Ndërkohë sot, CNA.al sjell sot të tjera të dhëna zyrtare, që tregojnë se shumat e frikshme që përfiton kompania koncesionare e inceneratorit të Tiranës.

Kompanitë që ndërtojnë në kryeqytet, pra ato që hapin gropat e ndërtimit, paguajnë incenerarorin e Tiranës për çdo mbetje apo dhe, që hedhin.

Ndërkohë, sot sjellim dokumentet që tregojnë se kompania koncesionare, në vetëm 3-4 vite ka marrë nga subjektet private në Shqipëri, rreth 20 milionë dollarë.

Pra, kompania e inceneratorit të Tiranës, përveç 40 milionë dollarë në katër vite, të cilat i ka marrë nga Qeveria shqiptare për mbetjet e Bashkisë së Tiranës, ka marrë edhe 20 milion dollarë të tjera, nga subjektet private.

Pagesa këto të bëra nga subjekte të ndryshme që kanë të bëjnë me hedhjen e dherave, mbetjeve, hapjen e gropave të ndërtimit.

Kompania e inceneratorëve ka marrë 40 milionë dollarë vetëm për Tiranën.

Pra, kompani të ndryshme, të cilat për shkak të aktivitetit që kryejnë, punimeve e të tjera, janë detyruar t’i paguajnë rreth 20 milionë dollarë inceneratorit të Tiranës, Klodian Zotos dhe të tjerëve pas tij.

Një investim 128 milionë euro, në 30 vite sipas kontratës koncesionare, ka marrë vetëm në tre apo katër vitet e para rreth 60 milionë dollarë.

Pra, 50% të investimit e ka përfituar vetëm në tre apo katër vite. Sipas të dhënave zyrtare 40 milionë dollarë janë dhënë nga Bashkia e Tiranës dhe 20 milionë dollarë të tjera janë paguar nga subjektet e mëposhtme, nga disa qindra kompani.

Kompanitë kanë çuar dhera, mbetje, etj.

Këto kompani që kanë paguar këto para shtesë të cilat i kanë marrë kompanitë e inceneratorëve, janë kosto e shtuar për qytetarët shqiptarë, sepse kryesisht janë dhera, punime, që i paguajnë qytetarët në finale, me faturat për një blerje apartamenti apo shërbime të tjera.

Edhe një herë kjo tregon sesa “spektakolar” ka qenë studimi i fizibilitetit, apo ofertat që ka dorëzuar Klodian Zoto dhe të tijtë tek Qeveria shqiptare. Ku për 128 milionë euro investim, për një kontratë koncesionare 30-vjeçare, ka marrë rreth 60 milionë dollarë në vetëm 3-4 vite.

Të ardhurat e bëra mbi studimin e fizibilitetit, i cili në fakt ka edhe një fshehje të madhe, me një përllogaritje të thjeshtë, nëse do ta shumëzonim me 2 deri në 10 herë këto të ardhura, me tre apo katër vitet e para, shuma totale e të ardhurave nga koncesioni, nuk është 430 milionë euro, siç pretendohet. Por, shkon afërsisht 600 milionë euro.

Shifër e thënë nga ekspertët.

Kjo e llogaritur mjaft thjeshtë.

Për tre deri në katër vite, Qeveria shqiptare jep 40 milionë dollarë, ndërkohë janë edhe rreth 20 milionë dollarë të tjera nga kompanitë e ndryshme private. Pra, bëhen 60 milionë dollarë, për vetëm tre deri në katër vite.

Dhe në qoftë se këto i shumëzojmë me dhjetë herë, sa është afati koncesionar në total, shuma është marramendëse.

Gjithashtu këtu nuk përfshihen të ardhurat që kompania koncesionare ka nga shitja e plastikës, kauçukut, riciklimi i letrës, apo dhe shitja e energjisë elektrike nga inceneratori i munguar.

Pasi po ti fusim dhe këto, sipas studimit të fizibilitetit, vlera do të ishte shumë herë më e madhe se 600 milionë euro, të ardhura në total.

E ndërsa firma ka deklaruar për 30 vite 120 milionë euro fitim, nga këto të dhëna vërtetohet pretendimi i ekspertëve se studimi i fizibilitetit 430 milionë euro, thuajse është gati në gjysmën e vlerës së tij reale, pasi vlera reale është gati 600-700 milionë euro.

Pra, kompania koncesionare Integrated Energy BV SPV, për 30 vite nga pretendimi se mund të fitonte 120 milionë euro, shkohet tek fakti, ky i provuar sipas pagesave zyrtare dhe pagesave të bëra nga biznesi, pa futur shifra të tjera si ricklimi, shitja e energjisë etj, të fitojë qindra milionë euro. Shifrat janë marramendëse.

Në çdo lloj përllogaritje 430 milionë euro, duket se është një hiç në krahasim me realitetin.

Pasi fitimi mund të shkojë 600-700 milionë euro.

Ndërkohë që vetëm fizibiliteti thotë për 430 milionë euro.

Nga ana tjetër, në 3-4 vite merr rreth 60 milionë dollarë. Këtë vetëm sipas pagesave të bëra nga subjekte private dhe të Qeverisë.

Sërish po e theksojmë, ku nuk përfshihen paratë që kompania përfiton nga riciklimi, nga pastika, nga kauçuku, nga shitja e skrapit, apo dhe paratë që do të përfitonte nga shitja e energjisë elektrike, por inceneratori mungon. Po ti futesh të gjithë këtyre përllogaritjeve, shifra është krejtësisht ndryshe nga studimi i fizibilitetit.

Vlerat janë shumë më të mëdha, fitimi është shumë herë më i madh, ndoshta dy apo tre herë më shumë sesa deklarohen nga kompanitë e inceneratorëve, nga studimi i fizibilitetit dhe kontrata e nënshkruar me Qeverinë shqiptare. /CNA.al

Inceneratori i Sharrës është sekuestruar nga përmbarimi gjyqësor, pasi kompania ‘Integrated Energy BV’, në pronësi të Klodian Zotos ka detyrime të pashlyera ndaj një nënkontraktori. Ndonëse qeveria shqiptare i ka paguar miliona euro rregullisht Klodian Zotos, ky i fundit duket se nuk ka qenë korrekt me pagesat ndaj palëve të treta.

Nga SYRI TV

Kompania koncensionare e landfillit të Sharrës, ‘Integrated Energy BV’ është vënë nën sekuestro nga Përmbarimi, për shkak të detyrimeve të pashlyera ndaj një shoqërie nënkontraktore.

Përmbaruesi gjyqësor Besnik Bajraktari ka vendosur sekuestron mbi kompaninë koncensionare, pasi Gjykata e Tiranës ka lëshuar urdhërin e ekzekutimit për pagesa të pakryera ndaj një shoqërie private me seli në Fushë-Krujë.

Sipas Urdhërit për sekuestrim, kompania koncensionare me drejtues të parë Klodian Zoton, ka detyrime të papaguara për shoqërinë ‘R.T. Elis’ që prej vitit 2017. Kompania ‘Integrated Energy BV’ dhe qeveria shqiptare kanë nënshkruar në fund të gushtit 2017 kontratën koncensionare për ndërtimin e impiantit të përpunimit të mbetjeve në Tiranë. Prej asaj kohe, koncensionari është paguar me mbi 48 miliardë lekë të vjetra ose më shumë se 40 milionë euro.

Pagesat e fundit në radhë janë kryer në fillim të Prillit të këtij viti, nga Bashkia e Durrësit dhe e Kavajës, për një vlerë totale rreth 250 milionë lekë të vjetra. Por, pavarësisht shumave gjigante, Koncensionari i Sharrës duket se nuk është korrekt me pagesat për shoqëritë nënkontraktore.

Kontrata koncensionare për ndërtimin e impiantit të mbetjeve urbane në Sharrë është pjesë e një hetimi të nisur nga Prokuroria Speciale për çështjen e inceneratorëve.

Kompania ‘Integrated Energy BV’ është me seli në Amsterdam të Hollandës dhe ka fituar kontratën me kosto koncesionare 128 milionë euro në kohën që drejtohej nga Klodian Zoto, i shpallur në kërkim ndërkombëtar për aferën e inceneratorëve.

Lideri historik i PD-së, Sali Berisha ka treguar për gazetarët se çfarë u diskutuar në 2 orë e 30 minuta mbledhje të Komisionit të Rithemelimit.

Berisha theksoi se në mbledhje u diskutua për çështje organizative të PD-së dhe Kuvendin e ardhshëm të 30 prillit.

‘Diskutuam për kuvendin e ardhshëm të PD-së.

U diskutua për listat me të cilat do të votohet. Tani disponohen listat e vitit 2019, 2021. Listat do të ju dërgohen degëve të PD-së, për të përcaktuar emrat që do të votojnë.

Kam besim se çdo anëtar i PD-së do të votojë, shprehë vullnetin e tij për kryetarin e degës, grupseksionit dhe me radhë.

Edhe njëherë dua të garantoj çdo anëtar të PD-së, se formulari i shpërndarë nuk ka asnjë qëllim tjetër veç pajisjes me dokumentet e partisë dhe jo për qëllime votimi. Këtu duhet të jemi shumë të qartë.

U ra dakord që çdo proces për të cilin një anëtar i PD-së, ka objeksion ti nënshtrohet procesit të përbashkët të auditit, përputhjes së tij me statutin.

Në këtë diskutim të zgjeruar folëm për zgjerimin e spektrit të organizatave, dhe bashkëpunimit me organizata të tjera, veç atyre partnere.

PD është drejt hapjes së mëtejshme të kësaj force politike. U ngrit grup pune për të hartuar udhëzuesit e ngritjes së degëve të PD në emigracion dhe diasporë. Ishte një mbledhje kushtuar probleme organizative të PD-së’, tha për gazetarët lideri historik i demokratëve, Sali Berisha.

Berisha: Guvernatorja nuk mund të caktojë kryetarin e PD

Berisha: Deklarata e Kim, dështim i paralajmëruar. Me Bashën, PD ishte kthyer në seksion të Guvernatores

Burimet bëjnë me dije se ka dhënë dorëheqjen nga posti i drejtorit të Hekurudhave Ani Dyrmishi.

Ai e mbante këtë post prej më shumë se 4 vitesh, ndërkohë që arsyet e dorëheqjes nuk janë bërë ende publikë.

Dyrmishi po ashtu është anëtar i Këshillit Bashkiak të qytetit të Durrësit, ndërkohë që gjatë ushtrimit të detyrës së drejtorit të hekurudhave, i është vendosur dhe një sasi tritoli në makinën e tij.

Në një rast të dytë, makina e përdorur prej tij është qëlluar me breshëri armësh.

Dyrmishi ishte futur në listën e zezë të drejtuesve të institucioneve nga kryeministri Edi Rama, e megjithatë ai qëndroi në krye të Hekurudhës për më shumë se 4 vite.

Ani Dyrmishi ka mbajtur poste të rëndësishme edhe më heret si drejtor i Hipotekës së Durrësit. syri.net

Ish-deputeti demokrat Aldo Bumçi në një intervistë për RTV ORA komentoi situatën në Partinë Demokratike. Bumçi u shpreh se rëndësi ka vullneti i demokratëve që është shprehur me votën e 11 dhjetorit dhe 6 marsit.

Sa i përket deklaratave të ambasadores Yuri Kim, Bumçi theksoi se ajo s’mund të caktojë kryetarin e Partisë Demokratike. Në lidhje me çështjen e presidentit ai tha se nuk ka diskutime dhe se PD-ja do të mbledhë forumet e saj dhe do të dalë në një qëndrim institucional.

“Rëndësi ka vullneti i demokratëve që është shprehur me votën e 11 dhjetorit dhe 6 marsit. Ne jemi shumicë edhe pse nuk kemi pasur logu duke dalë me një diferencë të madhe me kandidatët e Bashës.

Kjo është një çështje e vërtetuar dhe është shprehur edhe gjykata më pas. Gjykata na dha të drejtën ligjore për selinë dhe për logon. Ky është edhe vullneti i demokratëve dhe shqiptarëve. Çdo qëndrim tjetër do të thotë të mos respektosh qytetarët e këtij vendi.

Në lidhje me çështjen e presidentit nuk ka diskutime ende që kanë nisur. PD-ja do të mbledhë forumet e saj dhe do të dalë në një qëndrim institucional dhe legjitim.

Ambasadorja mund të takojë kë të dojë, por se cili do të jetë krye i PD-së caktohet nga vota dhe kjo do të thotë të mos respektosh vullnetin e votuesve. Vlera e demokracisë dhe botës së lirë është respektimi i votës së qytetarëve.”-tha Bumçi.