TIRANË – Ministri i Jashtëm të Shqipërisë, Ditmir Bushati, ka reaguar sot në lidhje me vendimin për pafajësinë e Vojisllav Sheshel.

Nëpërmjet një statusi në profilin e tij zyrtar në Facebook, Bushati e konsideron këtë vendim si një lajm të keq për drejtësinë ndërkombëtare dhe viktimat e luftërave të ish-Jugosllavisë.

“Tribunali Penal Ndërkombëtar për ish-Jugosllavinë shpalli të pafajshëm Vojislav Sheshelin, i cili akuzohej për krime lufte dhe krime kundër njerëzimit. Shesheli, njeriu që tallej me këtë institucion të rëndësishëm të drejtësisë ndërkombëtare, është tashmë i lirë të vijojë promovimin e gjuhës së urrejtjes. Vendimi i pafajësisë për këtë xhelat, përbën një goditje të rendë jo vetëm për besueshmërinë e Tribunalit Penal Ndërkombëtar për ish-Jugosllavinë, por edhe një mungesë respekti për viktimat dhe familjarët e tyre”- shprehet Bushati në reagimin e tij.

TIRANE- Ish-truproja i Sali Berishës President, Izet Haxhia, hapi një debat dy ditë më parë kur shkroi në “Facebook” lidhur me një skenar të shefit të tij për të vrarë Aleksandër Meksin në 1992. Sipas tij, Berisha i kishte premtuar Bashkim Koplikut postin e Kryeministrit dhe kjo mund të bëhej vetëm duke eliminuar Meksin, pasi ai kishte fituar në Këshillin Kombëtar garën me zv.kryeministrin e asaj kohe.

Për këtë ishte sajuar rrëzimi i avionit që do të sillte Meksin nga Roma në Tiranë. Në debat u përfshi vetë Meksi dhe djali i tij, të cilët pohuan se skenari ka ekzistuar. Por për Tritan Shehun, ministër i Shëndetësisë në vitin 1992 dhe një nga personat që doli në Rinas për të pritur Kryeministrin, incidenti me avionin erdhi vetëm për shkak të kushteve të këqija teknike të aeroportit. Në një intervistë për “Panorama Online”, ai flet për herë të parë për këtë çështje.

Zoti Shehu, ju keni qenë anëtar i qeverisë në vitin 1992?
Po, ashtu është, kam qenë ministër i Shëndetësisë dhe Mjedisit në atë qeveri me Kryeministër Z.Meksi.

Ju ishit prezent në Rinas për të pritur Z.Meksi në kthim të vizitës së tij të parë si Kryeministër nga Roma?
Është e vërtetë që kam qenë në Rinas për të pritur kthimin e delegacionit tonë qeveritar të kryesuar nga Kryeministri e me përbërjen e Z.Ruli, Z.Konda e dikujt tjetër, që nuk më kujtohet tani. Ishte një vizitë e shkurtër, e para e qeverisë në Bruksel, më tej në Romë e kthim. Kthimi nga Roma po bëhej me një avion të vogël shtetëror italian.

Pati probleme me avionin në ulje, ju çfarë kujtoni?
Në të vërtetë më kujtohen disa detaje. Së pari, pati një vonesë në ardhjen e avionit në Tiranë, kështu filloi të errej dhe të mos shikohej mirë, gjë që krijonte probleme në ulje. Nga sa u informova, kishte disa kohë që pista nuk ndriçohej natën. Kjo siç na u tha ishte pasojë e dëmtimit të sistemit të ndriçimit nga disa persona, që thoshin se ishin pronarët e tokës aty e kështu bënin presion. Të mos harrojmë se flasim për një periudhë kur në hapësirën brenda aeroportit dhe afër pistës kullotnin edhe lopë. Ishim menjëherë pas krijimit të qeverisë së parë demokratike dhe prej kohësh nuk kishte fluturime natën në atë aeroport. Në këto kushte u kërkua që makinat e ardhura të vendoseshin anës pistës për të bërë të mundur me dritat e tyre, dallimin e saj nga piloti. Dhe kështu u bë. Mbaj mend mirë që më tej avioni u duk e po vinte nga Veriu. Ai filloi uljen nga ajo pjesë e pistës në një muzg të thellë. Mbasi takoi tokën, bëri një kërcim të menjëhershëm disa metra lart e u ul përsëri me zhurmë, duke vazhduar kështu deri nga fundi jugor i pistës, ku ndaloi. Ne vrapuam drejt avionit e kur arritëm aty takova Meksin që kishte zbritur. Avionit i ishte thyer rrota e parë, kështu u tërhoq zvarrë në pistë, fatmirësisht pa krijuar ndonjë fatkeqësi të mundshme.

Izet Haxhia ka hapur një debat në media kur ka thënë se ka pasur një tentativë për të rrëzuar avionin me qëllim vrasjen e Aleksandër Meksit. Ju si mendoni?
Unë jua shpjegova si ndodhi ngjarja. Nuk kam asnjë dyshim që ishte vetëm një aksident si pasojë e një mungese të kushteve teknike prej disa kohësh në aeroport edhe në pistë, e ndriçimit, sigurisë etj. Ashtu ishin ato kohëra atëherë, menjëherë pas 22 marsit. Pak ditë pas këtij aksidenti u morën disa masa të shpejta për ta sjellë në njëfarë normaliteti aeroportin e Rinasit.

TIRANË- Ambasada e Shteteve të Bashkuara të Amerikës nuk është në dijeni të ndonjë takimi të Prokurorit të Përgjithshëm, Adriatik Llalla dhe zyrtarëve të FBI-së. Kështu ka deklaruar ambasada e SHBA-ve në Tiranë, në një reagim për Neës24.

“Nuk jemi në dijeni të ndonjë takimi të planifikuar midis Z. Llalla dhe zyrtarëve të lartë të FBI-së ose DEA”, thuhet në reagim.

Ndërkohë që ambasada rithekson faktin se procesi i mohimit të vizave aplikohet edhe për prokurorët.

“Më tej, është e sakte se procesi i mohimit të vizave për zyrtarët e korruptuar aplikohet edhe për prokurorët dhe vazhdon”, deklaron ambasada e SHBA.

Mediat raportuan dje se Kryeprokurori Adriatik Llalla ka udhëtuar drejt Shteteve të Bashkuara të Amerikës ku do të zhvillojë takime me drejtuesit e Byrosë Federale të Hetimit, ndërsa në fokusin të takimeve do të jenë lufta kundër terrorizmit, financimi i tij, byroja e hetimit, SPAK-u dhe krimi i organizuar.

Llalla së bashku me drejtoreshën e Marrëdhënieve me Jashtë Rovena Gashi dhe drejtuesin e Prokurorisë së Krimeve të Rënda Besim Hajdarmataj, kanë udhëtuar në drejtim të Uashingtonit, me qëllim marrjen e një sërë takimeve me krerët më të lartë të investigimit në SHBA.

VOAL – Gazetari Arjan Melonashi na shkruan rreth së vërtetës për atentatin ndaj ish kryeministrit Aleksandër Meksi. Melonashi, i cili në atë kohë, ishte gazetar në RTSH, ruan një kronikë të atyre ditëve, të cilën, për arsye teknike nuk e botojmë dot. Ja çfarë na shkruan gazetari Arjan Melonashi:

I dashur Skender, pashe ne faqen tuaj nje dic mes rrefimeve, kujtimeve e hamendjeve rreth nje atentati ndaj kryeministrit te kohes ne vitin 1992 Ju e dini fare mire se shi ne ate kohe, une nuk kisha raporte te mira me Sali Berishen, pasi ne te nisa te shoh nje udheheqes qe antikomunizmin e tij e shprehte dhe e zbatonte me metodat e me frymen me puritane komuniste, por te mendohet qe ne ate kohe ishte duke pergatitur nje atentat ndaj kryeministrit Meksi, me duket krejt e pavend. Ishte nje kohe shume e veshtire per Shqiperine dhe kujtoj qe drejtori i aeroportit te Rinasit me terhiqte per menge prej disa muajsh, per te gjetur mundesine te flisja ne Revisten Televizive per gjendjen katastrofike te aeroportit. Nuk dua te shkruaj me gjate, ende e kam te ruajtur kroniken e trasmetuar ne TVSH ne lajmet e ores 20 me 12 maj 1992 aksidenti i Aleksander meksit, me sa mbaj mend ndodhi te nesermen apo te pasnesermen ne darke. Kerkoj te falur per cilesine e filmit, gjithsesi eshte nje dokument qe besoj hedh drite atje ku me polemikat e ketyre diteve, po mundohet te hidhet hije.

Më thanë se z. Izet Haxhia më paska përmendur në një shkrim të tij, dhe vendosa të lexoj se çfarë shkruante. Po marr mundimin t’i përgjigjem, kjo në respekt të lexuesit.

Sa shkruan z. Haxhia për mua, është në pjesën më të madhe krejt e pavërtetë dhe shpifje. Në vijim po ndaloj më në hollësi në ato pjesë të shkrimit të zoti Haxhia, të cilat lidhen direkt me emrin tim.

Haxhia shkruan:

Marshalli tentoi […] me anën e mikut të tij, apo më saktë të dhëndrit të mikut te tij, e kam fjalën për Bashkim Koplikun vjehrri i të cilit, një sigurims famkeq ishte mik i ngushtë i Marshallit, që bëri edhe futjen e dhëndrit të tij Kopliku në PD nëpërmjet Berishës në një kohë kur Kopliku nuk kishte asnjë kontribut në PD.

Unë, Kopliku, ju them se e vërteta është si vijon:

E para:Nuk kam asnjë dijeni që z. Berisha të ketë qenë mik i vjehrrit tim, bile nuk e di ta ketë njohur ndopak. Dyshoj se është thjesht një shpifje, sepse vjehri im, i Koplikut është përjashtuar nga Partia Komuniste (PPSH) që në vitin 1974, është dëbuar nga Tirana, dhe pastaj është internuar.

Ai është liruar vetëm me ardhjen e demokracisë. Nëse z. Berisha do të kishte pasur miqësi me të, ky është një kompliment që  z.Haxhia i bën z.Berisha që paska mbajtur miqësi me një njeri të dënuar nga regjimi komunist, donte guxim e karakter të fortë, që në kohën e komunizmit, të kishe miqësi me një të dënuar politik.

E dyta:Koplikun nuk e ka futur ne PD z. Berisha, por demokratët e kolektivit të ndërrmarjes ku ai punonte, Uzina e Radio e Televizorëve Durrës (URT). Ishin demokratët e atij kolektivi, të cilët e zgjodhën Koplikun kryetar te seksionit të PD së Uzinës, me një votim të fshehtë, që në shkurt 1991.

Votimi u bë jo vetëm i fshehtë, por dhe me dy kandiatura, e me një pjesëmarrje prej rreth 100 demokratësh të Uzinës.

Pastaj, Kopliku u zgjodh kandidat për deputet i PD Durr`s, në një përzgjedhje me një diskutim të hapur në Konferencën e PD në Durrës.

Pastaj u zgjodh nga populli deputet, ne mars 1991; u emruar edhe kryetar i Bashkisë (ateherë Komiteti Ekzekutiv Pluralist Durrës), në korrik 1991; pati një aktivitet shumë të spikatur si deputet në Parlamentin e parë jokomunist të Shqipërisë; u rizgjodh deputet në mars të vitit 1992 etj.

Pas gjithë këtij kontributi, u emërua zevendëskryeministër e ministër i punëve të Brendshme, në prill 1992.

E treta: Kontributi i Koplikut në PD, vërtetë që fillon nga shkurti i viti 1991, dhe jo dy muaj përpara, në dhjetor 1991, kur u krijua PD.

Kjo “vonesë“ prej dy muajsh, vjen si pasojë se Kopliku hezitonte në bashkimin e tij me PD, sepse konstatonte se një pjesë e madhe e elementëve të PD-se së “dhjetorit 1990“, ishin njerëz me lidhje shumë të ngushta me regjimin komunist shqiptar, gjë që e bënte të dyshonte për qëllimet reale të kësaj partie.

Ishin punonjësit e Uzines (URT), jo vetëm demokratët, të cilët i kërkuan me ngulm Koplikut, kryeinxhinierit që ata sapo kishin zgjedhur vetëm para disa muajsh, të futej në PD, që “mos t’u lihej në dorë PD-ja ca maskarenjve“, siç kishin merak ata.

Sqaroj se Kopliku ishte dënuar që nga inxhinier të punonte punëtor, po në këtë uzine, vetëm disa vjet përpara, kur nuk pranoi të ndante gruan e tij, sepse i jati i saj u dënua politikisht nga komunizmi. Ishte po ky kolektiv, që e zgjodhi kryeinxhinier ne vitin 1990, kur komunizmi, në grahmat e fundit të jetës së tij, vendosi të eksperimentonte zgjedhjen e kryeinxhinierëve nga kolektivi.

 Haxhia shkruan:

Kopliku propozoi veten e tij për kandidat për kryeministër, kuptohet me porosi të Marshallit, i cili kur dëgjoi këtë vetëpropozim bëri sikur u ‘mërzit! edhe pse ishte vetë pas kësaj ,sepse po të donte mund ta ndalonte një votim të tillë. […] Meksi kishte fituar bindshëm ndaj Koplikut të cilit ju dha nga Marshalli posti i Ministrit të Brendshëm, […]…Por Kopliku nuk ishte i kënaqur me këtë post, donte atë të kryeministrit dhe ranë dakord me Marshallin që ai të mbante këtë post të ministrit të Brendshëm vetëm për gjashtë muaj,dhe pastaj Kopliku do bëhej kryeministër.

Unë, Kopliku, ju them se e vërteta është si vijon:

E para: Ka pasur një votim në Këshillin Kombëtar të PD, për të përcaktuar se kush do të ishte kryeministër. Por ky votim nuk ishte parashikuar nga organizatorët e Këshillit.

Votimi u detyrua nga anëtarët e Këshillit, që protestuan që të mos bëhesh votim vetëm me një kandidaturë, atë të Meksit, siç i ishte paraqitur Këshillit. Kërkesa në princip ishte demokratike dhe në përputhje me statutin e PD.

Për votimin edhe të kandidaturës së Koplikut, propozimi erdhi nga një anëtar i Këshillit, dhe u miratua nga shumë anëtar të tij, saqë drejtuesit e mbledhjes u detyruan ta votojnë.  Nuk ishte fare Kopliku që “propozoi veten“ siç shkruan z. Haxhia—Kopliku i përmbahej vendimit të Kryesisë së PD, që kishte paraqitur propozimet në Këshill.

Edhe vetë Koplikut i erdhi fare i papritur ky propozim nga salla, pra nga Këshill. Nga ana tjetër, z.Berisha jo vetëm “u mërzit“, por ai protestoi rëndë kundër këtij propozmi, duke pretenduar, por edhe duke orientuar dhe influencuar anëtarët e Këshillit, që mos të zgjidhej Kopliku, sepse “po të zgjidhej Kopliku kryeministër, i gjithë drejtimi i shteti do të bëhej nga njerëz nga Veriu“; i thoshte se president ishte z. Berisha (nga Tropoja), se kryetar i Kuvendit ishte z. Arbnori (nga Shkodra) të cilëve do t’u shtohej edhe Kopliku (që sipas z. Berisha ishte nga Shkodra).

Në atë kohë, 1992, akoma nuk ishte instaluar diktatura në PD, dhe nuk e kishte në dorë të mos e respektonete kërkesën e Këshillit, as z. Berisha. Megjithatë, z. Berisha arriti që të pranohet që të bëhet votimi më antidemokratik i kohëve moderne: u votua duke thirrur emrin e çdo votuesi, dhe duke regjistruar votën e tij, që duhet të ishte shkoqur e me zë të lartë përkatësisht “Meksi“ ose “Kopliku“.

Në këtë votim, është shënuar vota e Koplikut, që ishte “Meksi“, dhe vota e z. Meksit, që ishte “Meksi“. Pra Kopliku ka votuar kundër vetes së vet. Votimi përfundoj në favor të favoritit të z. Berisha, z. Meksi, ku për Koplikun gjithsesi votuan rreth 12% e anëtarëve të Këshillit, pra me gjithëse votimi ishte i hapur dhe nominal, me gjithë orientimin e udhëheqësit, z. Berisha, për mos të votuar për Koplikun.

E dyta: Vërtetë që Kopliku nuk e donte postin e ministrit të Brendshëm, vërtetë që kishte kërkuar që të rrinte në këtë post vetëm “gjashtë muaj“, kjo me që eksperienca dhe vokacioni i tij nuk ishte për t’u marrë me policinë. Por jo që pastaj “të bëhej kryeministër“, siç shkruan z. Haxhia.

Dëshira e Koplikut, por edhe premtimi që iu dha atij nga kryesia e Partisë, kur anëtarët e kryesisë insistuan të pranonte postin e ministrit të Brendshëm, ishte që ai të kalonte më vonë në një post që merrej me problemet ekonomike, me të cilat kishte dëshirë të kontribuonte dhe ku kishte 24 vjet eksperiencë.

Haxhia shkruan:

… vjen në presidencë Kopliku, takohet me Marshallin […] Ka komunikuar njëherë nga tel. i shtëpisë së Mehmetit dhe pas kësaj telefonate me Koplikun është ngritur i mërzitur për t’u larguar nga shtëpia e Mehmetit.

Lajmi i shumëpritur për rrëzimin e avionit që mbante Meksin nuk kishte ardhur […], duke shpëtuar jetën e Meksit dhe pjesëtarëve të tjerë të delegacionit shqiptarë, dhe duke shuar ëndrrat e Koplikut për t’u bërë kryeministër.

Unë, Kopliku, ju them se e vërteta është si vijon:

E para: Vërtetë që Kopliku, në atë periudhë, deri sa ishte në fuqi “ligji themeltar“ (që zëvendësonte Kushtetutën e vendit), thirrej shpesh nga Presidenti, z. Berisha, ditën dhe natën, sepse me ligj presidenti e kishte të drejtën të thirrte në raport ministrat.

Por në asnjë moment, as z. Berisha, por as dhe Kopliku, nuk kishin ndër mend të vrisnim njeri, as kryeministrtin dhe as ministra, siç shkruan z. Haxhia, e siç fatkeqësisht po rishkruhet në masmedia shqiptare. Diskutimet tona me z. Berisha, ishin të përqendruara në qeverisjen sa më efikase të vendit.

E dyta: Me të vërtetë që Kopliku dhe z. Meksi kishin mendime të ndryshme për zgjidhjen e shumë problemeve të qeverisjes së vendit.

Por këto ishin qëndrime të dy personave që të dy mendonin sesi të shkonte puna sa më mirë, paçka se mënyrat e zgjidhjeve të secilit, shpesh nuk përputheshin, çka dhe është krejt normale në demokraci. Gjithsesi, kjo mospërputhje qe shkaku kryesor që bëri që dhe Kopliku të hiqesh nga Qeveria, më 1 janar 1995.

Në mbyllje

Në ndryshim me shumë kolegë të tjerë, kam dhënë përgjigje publike, kur është gënjyer e shpifur publikisht ndaj meje, si në këtë rastin me z. Haxhia. Bile shpesh edhe kur është shpifur për të tjerë, e jo vetëm për mua.

Shumë njerëz më kanë këshilluar të mos humb kohë me shpifësit, por unë kam vendosur ta humb këtë kohë, në respekt të lexuesit, në repekt të popullit tim që e dua, me gjithë se ka të metën e madhe: i pëlqen shpesh të dëgjojë shpifje e gënjeshtra.

Jam përpjekur disa herë që për shërimin e kësaj sëmundje të shoqërisë shqiptare, tolerimin e shpifjes dhe gënjeshtrës. Përpjekja ka konsistuar në shkrimet e mia, por edhe duke iu drejtuar drejtësisë, që shpifësit të dënohen, siç do ta dëshiroja ta bëja edhe kësaj here, kundër z. Haxhia.

Por shoqëria jonë shqiptare nuk ka qenë deri tani në gjendje të krijojë një shtet të së drejtës, ku sistemi i Drejtësisë të ishte pushteti më pak i korruptuar, e as të krijojë së paku një opinion mbarëpopullor mbytës kundër shpifjes dhe përkrahësve të saj.

Le të shpresojmë se populli ynë do të shkëputet nga kultura e shpifjes dhe gënjeshtrës, duke përvetësuar me kohë kulturën e së vërtetës dhe të së drejtës. Elita reale e popullit tonë ka rastin të kontribuojë, së paku duke dëshmuar ato që di, edhe kur bëhet fjalë si tani, thjesht për shpifjet e z. Haxhia.

Endri, djali i madh i Aleksandër Meksit

DITA i ka kërkuar dje një prononcim zotit Aleksandër Meksi, i cili u përgjigj shkurt mbi këtë incident. Ndërkaq, i pyetur nga DITA, djali i madh i ish-kryeministrit, Endri Meksi, ka sjellë një reagim më të plotë lidhur me këtë episod. Reagimin e bën edhe më interesant fakti që Endri ka qenë i pranishëm në atë ngjarje, nga një këndvështrim tjetër: Ai ishte duke pritur të atin në Rinas. Endri Meksi saktëson se udhëtimi i kthimit po bëhej nga Brukseli, pas një takimi me Komisionin Europian, ndërsa në Romë delegacioni ynë ishte tranzit.

Më poshtë, sqarimi i Endri Meksit:

Në avion ishin Genc Ruli, Gjergj Kondo dhe Fidel Ylli, përveçse Aleksandër Meksit. Nga Roma u nisën për arsyen e thjeshtë që nuk kishin asgjë për të bërë më aty, mbaruan vizitën dhe nuk ishin mësuar të qëndronin për vizita qejfi; në Shqipëri kishin në çdo rast situatë emergjence. Takimi ishte me Komisionin Europian në Bruksel, i pari me KE-në, dhe kaluan në Romë tranzit.

Unë ndodhesha në Rinas atë pasdite. Ishim në hapësirën e shërbimeve qeveritare bashkë me rojet dhe shoferët e makinave. Nuk arrij të kujtohem kush ishin të tjerët, por kishte dhe njerëz të tjerë.

Na njoftuan papritmas që duhet të dilnim në pistë sepse nuk kishte drita dhe duhet të ndriçonim pistën me dritat e makinave. Motivi i mungesës së dritave, na u tha që ishte dëmtimi i llambave në tokë prej deleve dhe lopëve që kalonin lirshëm në aeroport. Nga ky detaj më vjen të mendoj që nuk ishte diçka e parashikuar, sepse do të ishim pozicionuar kohë më parë. Në fakt u pozicionuam gabim, pavarësisht se nuk u fol më për këtë ngjarje. Them gabim sepse kur avioni po ulej, une vura re që ne po ndriçonim kundrejt avionit, dmth ishim përballë me të. Ishim pak makina, besoj jo më shumë se 10 copë. Pozicionimi i keq, besoj se ishte arsyeja përse avioni/piloti takoi tokën me rrotën e parë, e cila u thye në momentin e impaktit. Kuptohet, përvecse faktit që nuk kishte drita aspak. Avioni vazhdoi deri nga fundi i pistës me zvarritje e përplasje. Pati shumë shkëndija, por jo zjarr. Ne nxituam me makina të ndiqnim avionin. Pasagjerët nuk pësuan asnjë dëmtim. U fol më vonë që avioni kishte serbatorët në krah dhe prandaj dhe nuk shpërtheu. Nuk di sa ka qenë e vërtetë, sepse në realitet nuk u mor askush më me atë histori.

Në lidhje me çfare thotë Izeti, në fakt nuk kam asnjë info sepse nuk është folur më për këtë histori. Por një detaj që e kujtuam pas këtij shkrimi ishte që Bashkim Kopliku erdhi për vizitë menjëherë në shtëpinë tonë. Nuk mund të them se kishim marrëdhënie të afërta duke qenë se marrëdhëniet në qeveri midis atij dhe Leka Meksit ishin konfliktuale, por as nuk jam në gjendje të jap një opinion sot mbi çfarë u tha nga Izeti.

Por as nuk habitem! Ka detaje të 1996-1997 që tregojnë akoma më shumë… Ndoshta për një herë tjetër.

Ish kryeministri Aleksandër Meksi, në një postim në faqen e tij në facebook ka reaguar ndaj thënieve të Izet Haxhisë në gazetën Dita. Meksi shkruan:

“Më ka tronditur ky rrëfim i Izet Haxhisë.

Ngjarja është e vërtetë. Kështu ka ndodhur.

Por nuk i kam ditur dhe nuk jam interesuar asnjëherë për prapaskenat  dhe rrethanat se si ka ndodhur.

Nuk mund të flas më tepër për momentin.”

Vazhdon dhuna e mësuesve ndaj nxënësve.

Rasti i fundit ka ndodhur në shkollën “Selim Alliu” të Peshkopisë, ku një mësuese ka nxjerrë para dërrasës së zezë disa nxënës dhe u qëllon atyre me një litar. Nuk dihet arsyeja, por mesa duket një sherr mes nxënësve ka bërë që mësuesja të marrë këtë masë disiplinore. Në fund të videos, mësuesja merr litarin dhe ia vendos në fyt një nxënësi dhe në këtë moment bashkëmoshatari i tij e shkëput filmimin nga frika, raporton Jetaoshqef.al.

Shpresojmë që Ministria e Arsimit t’i shikojë këto pamje dhe të marrë masa.

Një nga mësueset më të njohura të qytetit verior të Shkodrës, ndërroi jetë dje gjatë orës së mësimit. Alda Kaçorri, 53 vjeç, pësoi një infarkt teksa jepte mësim në orën e fizkulturës.

Kaçorri, një nga volejbollistet e njohura të Vllaznisë së viteve ’80 dhe njëkohësisht trajneria e ekipit të të rejave të volejbollit të këtij klubi, u transportua menjëherë në Urgjencën e Spitalit Shkodër, por mbërriti e pajetë në duart e mjekëve.

Nga verifikimet paraprake të ekspertizës policore dhe nga të dhënat e marra prej mjekëve, rezulton se mësuesja ka pësuar infarkt si pasojë e të cilit ka ndërruar jetë. Policia ka nisur hetimet për zbardhjen e plotë të rrethanave në të cilat ka ndodhur ngjarja, ndërkohë po merren në pyetje edhe nxënësit.

Misioni i Fondit Monetar Ndërkombëtar përfundoi sot vizitën 2-javore në Tiranë për rishikimin e shtatë të programit të bashkëpunimit me Shqipërinë.

Drejtuesja e Misionit, Anita Tuladhar, deklaroi para shtypit se Shqipëria duhet të çojë përpara me më shumë shpejtësi reformat themelore ekonomike.

Sipas saj, konsolidimi fiskal duhet të vazhdojë, buxheti po zbatohet sipas parashikimit, rregullimet në politikat monetare janë të nevojshme por nevojiten reforma strukturore për të përmirësuar klimën e biznesit.

Zonja Tuladhar tha se synimi i qeverisë për rritje ekonomike 3.4 për qind është ende herët si fillim viti, ndërsa inflacioni është nën 2 % për shkak të uljes së çmimeve në karburante etj., dhe presioneve të ulëta inflacioniste nga jashtë.

Drejtuesja e Misionit të FMN-së, Tuladhar, tha gjithashtu se kreditë e këqija në banka duhen ulur më tej, ndërsa sistemi bankar është likuid, i qëndrueshëm dhe i mirëkapitalizuar.

Ajo theksoi se shpresonte që të vazhdonin përmirësimet edhe në sektorin energjitik, i cili është jetik për ekonominë e vendit.

Po ashtu, edhe lufta kundër informalitetit po jepte rezultatet e para. Por kryesori, sipas misionit të FMN-së, mbetet konsolidimi i treguesve makro-ekonomikë.

Voal – Mes shumë paradokseve që ndodhin në vendin tonë, shikojmë edhe një banor të Tetovës me origjinë myslimane, z. Arben Llalla, i cili merr përsipër të japë leksione të së Drejtës Kanonike dhe orientime për Kishën Orthodhokse të Shqipërisë. Ai shtrembëron me mani patologjike dhe gënjeshtra dinake, ngjarje dhe vendime të Kishës Orthodhokse Autoqefale të Shqipërisë, duke u përpjekur në këtë mënyrë të mashtrojë opinionin publik. Deri më tani nuk ka dalë ndonjë Orthodhoks të bëjë diçka të ngjashme kundër ndonjë komuniteti tjetër fetar. Është më se e sigurt, se artikujt e mbushur me dashakeqësi dhe shpifje të pabaza të z. Llalla, që boton dhe riboton (në disa portale online: botasot.info, mapo.al, kosovarimedia.com, gazetanewborn.net, ina-online.net, shqiptari.eu, në datat 16.03.2016 si dhe në gazetën “Ballkan”, në datën 18.03.2016), helmojnë atmosferën e paqes dhe harmonisë midis komuniteteve fetare në Shqipëri.
Sa i takon romanit shpifës kundër Kishës sonë që bëri në lidhje me një prift orthodhoks nga Vlora, të atë Ilia Qirio, me qëllim të vetëm të akuzojë me retorika fyese Kryepiskopin Orthodhoks, të vërtetën e ka zbuluar vetë atë Ilia me një letër të tijën, që u botua në Illiriapress.com 18.03.2016. Në këtë letër del në pah nderimi i madh që Kryepiskopi Anastas ka treguar gjithmonë për atin e tij, të cilën e hirotonisi episkop dhe përkujdesjen për familjen e episkopit Kozma Qirio. Priftërinjtë orthodhoksë nuk kanë nevojë për “prokurorin” e vetëshpallur z. Llalla për të mbrojtur të drejtat e tyre. Problemet dhe plagët- midis të cilave edhe pagimi i shumës të 23 milionë lekësh tek një qytetar jo orthodhoks i Vlorës, që rrëmbeu me forcë një pronë kishtare dhe ndërtoi një restorant të tijin),- është Kryepiskopi ai që përpiqet ti shërojë pa bërë zhurmë.
Kryepiskopi jonë z. Anastasi është bërë shënjestra e përhershme i shkruesit i këtyre artikujve, i cili, bashkë me qarqet që e përdorin, përpiqet ta baltosë duke fabrikuar sajesa. Por, autoriteti i tij mbarë orthodhoks, që nuk mund vihet aspak në dyshim dhe kontributi i tij i jashtëzakonshëm në Kishë për më tepër se 60 vite, njihet nga qindra mijëra besimtare brenda dhe jashtë Shqipërisë.

21 Mars 2016
Nga Kryepiskopata e Hirshme

Një avion i vogël me 1 helikë është kapur nga radarët e ushtrisë italiane gjatë mëngjesit të djeshëm, pasi ishte duke ardhur nga Shqipëri për në drejtim të Barit.

Kjo ka bërë që ushtria italiane të ngrejë në fluturim dy avionë Eurofighter, të cilët kanë arritur avionin e vogël dhe e kanë shoqëruar deri jashtë hapësirës ajrore të tyre.

Media italiane shkruan se avioni ishte nisur nga Shqipëria. Ngjarja ka ndodhur të dielën, por nuk ka shumë informacione shkruan Bari Today. Pasi është nxjerrë nga hapësira italiane, avioni i vogël ka humbur gjurmët.

Dyshimet janë se avioni përdorej për trafik lëndësh narkotike.

Presidenti i Republikës së Shqipërisë Bujar Nishani dekretoi lirimin nga detyra të dy ambasadorëve shqiptarë.

Besiana Kadare lirohet nga detyra e kryediplomates pranë Organizatës së Kombeve të Bashkuara për Edukimin, Shkencën dhe Kulturën (UNESCO). Besiana eshte vajza e shkrimtarit te njohur Ismail Kadare.

Po ashtu Kujtim Xhani, nuk do të jetë më ambasador në Republikën Popullore Demokratike të Koresë, në Republikën e Koresë dhe në Republikën Socialiste të Vietnamit.

Përshëndetje Përkrahës të Peticionit,

Lidhja Demokratike e Kosovës reagon ndaj deklaratave të kryetarit të AAK-së, Ramush Haradinaj, i cili ka lëshuar deklarata etiketuese dhe shpifëse ndaj liderit të LDK-së, njëherësh kryeministër i Republikës së Kosovës, Isa Mustafa, thuhet në një reagim të Lidhjes Demokratike të Kosovës.

“Lidhja Demokratike e Kosovës i bën thirrje zotit Haradinaj që të tërhiqet nga shpifjet dhe akuzat, gjuhë të cilën siç duket e ka mësuar së fundi gjatë partneritetit me grupet radikale të majta në kuadër të “koalicionit të molotoVëVe”, thuhet më tutje në komunikatë.

Më tutje, në reagimin e LDK-së thuhet se kjo parti i bën të qartë zotit Haradinaj se ai është njeriu i fundit që mund t’i shes moral në këto aspekte kujtdo në Kosovë, e aq më pak LDK-së.

LDK ka kërkuar nga Haradinaj të sqarojë prejardhjen e pasurisë së tij, apo, siç kanë thënë,aferën e fundit të privatizimit të qindra hektarëve tokë nëpër Kosovë.

“LDK-ja kërkon nga zoti Haradinaj dhe mësuesit e tij të rinj në opozitë që të heqin dorë nga sulmet e ulëta verbale e fizike, si mjete për të synuar marrjen e pushtetit”, thuhet ndër të tjera në komunikatën e LDK-së.

Voal – Voal.ch shkruan se në një intervistë për Frankfurter Allgemeine Zeitung GmbH, dhënë  gazetarit Christian Geinitz në Tiranë, kryeminstri Rama komenton krizën e refugjatëve, duke lavdëruar vendet e Ballkanit që nuk janë pjesë e BE dhe duke kritikuar nga ana tjetër vendet e BE që nuk kanë patur sjellje aspak të denjë ndaj refugjatëve:

“Ballkani Perëndimor është treguar shumë më europian se shumë vende anëtare të BE-së, të cilat kanë paraqitur një imazh të turpshëm në krizën e refugjatëve”, ka thënë kryeministri i Shqipërisë, Edi Rama për F.A.Z. në Tiranë.

“Maqedonia dhe Serbia kanë regjistruar, transportuar dhe furnizuar me ushqime qindra-mijëra emigrantë gjatë rrugës së tyre drejt BE-së, duke mos qenë anëtarë të BE-së, ndërsa më parë refugjatët kanë qenë në Greqi në një hapësir Schengen”, ka theksuar Rama. Refugjatët kalonin nga Serbia në Kroaci dhe Slloveni, rishtas në një zonë Schengen. „Kjo tregon dobësitë e Europës të fragmentarizuar“, ka kritikuar Rama. „por kështu nuk mund të vazhdohet më, prandaj rruga përmes Ballkanit është mbyllur.“

Një akord me Turqinë për kthimin e refugjatëve klandestinë dhe krijimin e mundësive për hyrjen e tyre legale është i vonuar, thotë Rama për F.A.Z.. “Marrëveshjet duhet të kishin qenë kryer në fillim. Dhe Europa duhet ta zgjidhi menjëherë pa arritur kriza kulmin e saj, sugjeron kryeministri i Shqipërisë, në lidhje me negociatatat midis BE-së në Bruksel me Turqinë.

“Është koha për të zhvilluar një linjë mbrojtëse europiane në Turqi. Ankaraja mund të zhvillojë një rol fondamental për të ndalur avancimin e refugjatëve drejt Greqisë dhe për të ndalur trafikimin e qënieve njerëzore “.

Në mënyrë eksplicite Rama lavdëron përpjekjet e Kancelares Merkel.

“Për fat të mirë është Angela Merkel. Pa përpjekjen e saj për të arritur një akord europian me Turqinë, puna do të shkonte shumë më keq”.

Rama i konsideron fallsitete pretendimet se Turqia po i kërkon BE një thes me para, heqjen e vizave për qytetarët turq dhe shpejtimin e hyrjes të saj në BE.

“Nuk besoj se Turqia po shantazhon dikënd. Ajo i përgjigjet BE-së që ka mbajtur një qendrim të stërzgjatur dhe pa strategji të qartë. Nëse sot Ankaraja tregon një farë krenarie, kjo është e natyrëshme.”

“Lideri i Partisë Socialiste të Shqipërisë, që qeveris vendin prej 2013, ka kërkuar një program të përbashkët europian për refugjatët”, sepse për ndryshe “drama mund të kthehet në një tragjedi të Europës”.

Në këtë dritë Rama sheh anëtarësimin e Turqisë, Shqipërisë dhe vendeve të ish-Jugosllavisë në BE. “Kemi nevojë për një Europë të integruar, jo me shumë vrima. Nuk është fjala për zgjerim por për plotësim. Kjo vlen për Turqinë dhe vendet e Ballkanit Perëndimor”.

Tirana i ka kërkuar mbështetjen Italisë për të forcuar kontrollin e kufijve sepse Roma kishte frikë se trafikantët do t’i sillnin refugjatët përmes Adriatikut nga Shqipëria në Itali, por deri tani nuk ka evidenca të tilla, thotë Rama për F.A.Z.

“Ne nuk ndërtojmë mure, por kufijtë nuk i hapim sepse nuk mund të mbajmë nën kontroll limitin e refugjatëve”.

“Është një plan emergjent, por ky plan është modest nëse kihet parasysh potenciali i fluksit të refugjatëve. Shqipëria nuk mundet që ta mbrojë e vetme Europën. Së bashku me italianët po, si një qendrim europian, kësisoj do të garantohen kufijtë dhe do të mbrohen refugjatët që të mos bien në duart e trafikantëve.  Shqipëria, ka pranuar që të presë refugjatë, por duhet një politikë e kordinuar në nivel eurpian dhe ndërkombëtar për të krijuar pikat e pritje, prej nga të bëhet shpërndarja e refugjatëve në vende të tjera të BE-së. Shqipëria po mban përgjegjësinë e saj, përfundoi kryeministri i Shqipërisë, dhe ndihemi në këtë materie, nënvizoi Kryeministri i Shqipërisë, si të jemi pjesë e BE-së. /Shqipëroi E.Buçpapaj

Mimoza Hafizi, deputete socialiste në qarkun e Shkodrës është shprehur me kritika të ashpra për drejtimin që u është bërë strukturave të partisë në këtë qark.

Ajo ka theksuar se partinë socialiste në Shkodër  e drejtojnë disa aventurierë, që të vetmin qëllim kanë të përfitojnë ekonomikisht.

“Armikun më të madh, PS e Shkodrës e ka pasur brenda vetes. Prej vitesh në PS-në e Shkodrës janë vendosur aventurierë që e kanë parë partinë si mundësi përfitimi ekonomik. Prej vitesh unë kam qenë e përjashtuar për të marrë drejtimin e strukturave të PS-së në Shkodër. Kërkojmë të jemi parti evropiane, nuk do të pranoja asnjë model tjetër partie. Motoja jonë rreth 8 muaj ka qenë jo më fiktivitet. Edhe një pjesë e organizatave në Shkodër nuk janë formatuar se është respektuar statuti. Por a ka sens që të bëhet kjo gjë dhe të mos respektohet statuti për kreun e partisë.”, është shprehur Hafizi.

Deputeti kritik Ben Blushi e merr fjalën në kongresin e Partisë Socialiste. Në nisje të fjalës së tij, Blushi u prit me duartrokitje.

“Sot kam ardhur këtu si i barabartë në mes të barabartëve. Ajo që duhet të them sot është se jemi pronar të një prone të përbashkët dhe kjo quhet PS. Por PS ka shqisat e saj, barazia është e saj, bashkim është muskuli i saj, drejtësia është dora e saj, liria është shpirti i saj. Ne socialistët kemi vetëm një detyrë, ti mbajmë këto shqisa në harmoni”.

“Në këtë parti si çdo parti, ka një shumicë ka dhe një pakicë. Ka një shumicë absolute që kërkon parti të përbashkët për të gjithë, ka dhe një pakicë që kërkon parti për vete. Kam ardhur sot të flas në emër të kësaj shumice që mund të jetë e heshtur, por ekziston. Është duke pritur aty të çlirohet. Është një zemër e zënë ngrohtë në grusht.

Të gjithë bashkë, duhet të kemi një gjë të përbashkët, kjo është e vërteta. A jemi të barabartë në këtë parti? A po respektojmë rregullat që kemi vendosur bashkarisht? A po i japim dikujt më shumë fuqi? A ka shkelje në jetën e PS? A ka pasur shkelje gjithë këto vite?

A mund të fajësohet dikush se po flet në emër të kësaj të vërtetë? Për fat të keq unë mendoj se po ndodh.  E vërtetat po mbytet në PS. Një pakicë po kthehet shumicë pa votim në këtë parti.

“Sot do të ju them disa të vërteta”, u shpreh Blushi.

Nuk ka zgjedhje prej 3 vitesh.

Rama i vetmi kryetar në Europë ka mandat 7-vjeçar.

Që referendumet nuk bëhen për persona por vetëm për çështje.

Që asnjë ndryshim statutor nuk do ketë fuqi prapavepruese.

Që në PS janë futur pa votim njerëz me precedentë penalë.

Që borxhi është rritur.

Që taksat për të pasurit nuk janë rritur.

Që ekonomia nuk është rritur siç prisnim.

Që arsimi i mesëm nuk është i detyrueshëm siç duhet të ishte.

Që shëndetësia falas nuk është bërë.

Që kemi naftën më shtrenjtë se çdo vend.

Që ndërtimet janë bllokuar për arsye që nuk janë arsye.

Që nuk kemi hapur dot 300 mijë vende pune.

Që emigracioni është shtuar.

Që unë nuk jam Saliu, por po qeverisim si Saliu pa Saliun.

Të gjitha kanë ndodhur në 3 vjet.

Ne nuk jemi vetëm, ky nuk është opinion, është fakt.

Zgjedhje po pengohen, ky është fakt.

Nëse doni të provojmë kush është shumica dhe pakica, ka një rrugë, të shkojmë në zgjedhje.

Asgjë më shumë dhe asgjë më pak se sa zgjedhje.

T’i heqësh të drejtën e votës një partie është njësoj si t’i heqësh zemrën. Çfarë ka këtu për t’u mos u kuptuar, për t’u ndarë?

Asgjë nuk ka kur nuk bën zgjedhje. Prandaj unë ju ftoj për zgjedhje.

I gatshëm të njoh çdo zgjidhje që buron nga zgjedhjet. E ftoj Edi Ramën në zgjedhje sepse do ishte në nderin e ne të dyve dhe në dinjitetin e PS.

Shqipëria ka dhe do të ketë të drejtë me apo pa ne, sepse Shqipëria është më shumë se partia. Ju ftoj dhe njëherë në zgjedhje. Faliminderit!

I nderuar zotëri, përgënjeshtroj dhe hedh poshtë me përçmim dhe indinjatë të thellë dy shkrimet tuaja të datave 8 dhe 16 mars 2016 në lidhje me personin tim. Ju si zakonisht shpreheni me përbuzje dhe ofendoni pa të drejtë Kryepiskopin Anastas, por kësaj radhe përpiqeni të përdorni persona dhe rrethana të caktuara për të arritur qëllimin tuaj. Problemin që ngrini ju, unë e zgjidh brenda Kishës dhe nuk kam kërkuar ndihmë jashtë saj e aq më pak, nga ju. Në artikullin tuaj ju flisni me një gjuhë të ashpër dhe ofenduese për të ulur figurën e Kryepeshkopit Anastas, i cili punon me mish e me shpirt për ringritjen e Kishës Orthodhokse. Unë e dua dhe e respektoj Kryepiskopin tim dhe këtë e kam trashëguar nga babai im Izmot Kozma Qirjo, për të cilin ju shprehni një “admirim”, i cili shfaqet vetëm së fundmi, çka më bën të mendoj se nuk është i natyrshëm dhe as i ndjerë.

Askush nuk mund të mohojë se im atë ka qenë një nga mbështetësit më të flaktë të Kryepishkopit Anastas që në mbërritjen e tij në vend, fillimisht si Eksark Patriarkal dhe në vazhdim si Kryepiskop i Kishës sonë. Ai ka qenë një nga pritësit e Kryepiskopit në mbërritjen e tij në aeroportin e Rinasit dhe gjithashtu askush nuk mund të mohojë, e aq më pak ju, mbështetjen e ndërsjellët dhe bashkëpunimin midis tyre si në Seminarin Teologjik ashtu edhe në të gjithë sektorët e tjerë të aktivitetit të KOASH-it. Ishte iniciativa e Kryepiskopit Anastas dhe pranimi vullnetmirë i tim eti që bënë të mundur ngritjen e tij në gradën episkopale dhe më tej krijimin e Sinodit të parë të KOASH-it pas persekutimit në bashkëpunim me Kryepriftërinjtë e shenjtë anëtarë të tij.

Kryepiskopi Anastas ka ndjekur nga shumë pranë shëndetin dhe ecurinë e tim eti, deri në ditën e fundit të jetës së tij. Ka kryer për të, të gjitha nderimet dhe ceremonitë që i përkasin një kryeprifti orthodhoks dhe i ka qëndruar pranë familjes në momente të vështira. Ai kujdeset që prej ditës së largimit nga jeta të babait tim, për nënën time, e cila jeton në një banesë të vënë në dispozicion nga Kryepiskopi Anastas dhe një pension të lidhur prej Kishës në mënyrë që të ketë një jetë dinjitoze. Unë gjithashtu banoj në një banesë, e cila është prone e kishës e blerë me kontributin e Kryepiskopit tonë të dashur. Ku është pra “persekutimi” dhe “kryqëzimi” im zoti Llalla? Jeta dhe puna kanë probleme siç kanë patur edhe në të shkruarën dhe do të kenë patjetër edhe në të ardhmen, por siç jua përmenda edhe më sipër, ato do të zgjidhen përherë brenda Kishës, me urtësi dhe lutje. Me dashamirësi ju bëj thirrje që të mos përsërisni shpifje të tilla dhe njëkohësisht i lutem Zotit që t’ju falë gjithë marrëzitë tuaja.

Së fundmi, ju them dhe ju siguroj se unë dhe im atë kemi qenë gjithmonë përkrah Kryepiskopit tonë Anastas dhe unë në gjurmët e babait tim do të ngelem i tillë deri në fund të jetës sime.

At Ilia Qirjo

Famullitar i Kishës së Shën e Premtes

Skrofotinë, Vlorë. 18 mars 2016

TIRANË – Besnik Vladi, vëllai i Fatmir Vladit, dëshmitarit kyç në procesin gjyqësor për vrasjen e kryekomisar Dritan Lamaj, para pak ditësh është përjashtuar nga programi i mbrojtjes së dëshmitarëve.

Voal – Të shtunën, më 19 mars do të përkujtohen në vendlindjen e tij, Gjakovë, luftëtari, patrioti, burri i shquar i kombit tonë, Fadil Hoxha. Si bashkëkohës, bashkëpunëtor dhe dëshmitar okular i një pjese të rëndësishme të veprimtarisë së tij ndjehem krenar që po shkruaj këto radhë për këtë luftëtar e shtetar të rrallë, në këtë ditë të shënuar të 100 – vjetorit të lindjes së tij.

Unë pata fatin të njihesha me Fadilin në zjarrin e luftës për çlirimin e Kosovës, kur ai e drejtonte atë me guxim e largpamësi.

Që të vlerësosh realisht figurën e Heroit të Popullit Fadil Hoxha, veç njohjes personale, duhet të njihesh edhe me kujtimet e vlerësimet që i kanë bërë bashkëkohësit dhe sidomos, të atyre që luftuan e punuan krahas tij. Duhet të lexosh ç’është shkruar për jetën e veprimtarinë e Fadilit.

Atëherë mund të thuash se ke njohur rrugën plot zigzage që ka përshkuar Fadil Hoxha gjatë jetës së tij. Kështu njihesh me përpjekjet e tij që në moshën e adoloshencës, si u shkëput nga familja, si kaloi kufirin mes vështirësish e pengesash, nga dëshira për t’u shkolluar dhe se si ia arriti qëllimit.

Fadili, si shumë djem kosovarë që shkolloheshin në Shqipëri, ishte ndër të parët që përqafoi idetë përparimtare e liridashëse të kohës, pasi kishte ndjerë shtypjen e lirive nacionale, nën sundimin e regjimit të egër serb.

Këta djem të shkolluar u përfshinë të parët në Luftën Antifashiste Nacionalçlirimtare në Shqipëri. Më pas u bënë grupi kryesor që drejtoi Luftën Nacionalçlirimtare kundër nazifashizmit për çlirimin e Kosovës.

Por për ta përfshirë popullin e Kosovës në Luftën Nacionalçlirimtare, Fadil Hoxhës e shokëve të tij u duhej të kapërcenin shumë pengesa e vështirësi; duhej të shkëputeshin lidhjet e popullit të mashtruar me pushtuesit nazifashitë e qeveritë kuislinge. Ishte koha kur me bashkimin e një pjese të Kosovës me Shqipërinë, populli kishte fituar një sërë të drejtash që iu ishin mohuar nga pushtuesi serbë. Kjo e ndihmonte propagandën fashiste ta paraqiste pushtimin fashist si çlirim, megjithëse e kishte pushtuar Shqipërinë me forcën e armëve dhe synonte ta kthente atë në koloni italiane. Duhej sqaruar populli se kurrsesi nuk mund të kishte Shqipëri të pushtuar e Kosovë të lirë. S’ka liri me okupator brenda vendit.

Fadil Hoxha, bashkë me ekipin drejtues, kaluan vështirësi të jashtëzakonshme, por arritën t’i shkëpusnin lidhjet e popullit të Kosovës me nazifashizmin dhe ta radhisnin Kosovën me Frontin Antifashist të kombeve. Kjo ishte ndër meritat kryesore, pasi lidhjet me nazifashizmin rrezikonin shpërnguljen e kosovarëve nga trojet e tyre etnike, siç ndodhi në shumë vende të Europës. Kështu nuk u zbatua plani i akademikut shovinist Sava Çubrolloviqit. Ndërkohë që 50.000 kosovarë ishin përfshirë në luftë kundër nazistëve, Tito nuk mund të përzinte familjet e tyre.

Vërtetë që nuk u arritën objektivat e Konferencës historike të Bujanit, por shqiptarët mbetën në trojet e tyre.

U deshën shumë përpjekje, luftë e gjak, por sot Kosova është e lirë dhe e pavarur, shtet sovran.

Fadil Hoxha, si burrë shteti, me aftësi e dinjitet, me zgjuarsi e largpamësi të jashtëzakonshme, duke shfrytëzuar më së miri konjukturat e brendshme politike në ish-Federatën Jugosllave, arriti ta bëjë Kosovën pjesë kushtetuese të Federatës.

Pas largimit të forcave të Divizionit tonë për në Sanxhak, shovinistët serbë provokuan ngjarjet e Drenicës, për të zbatuar planin e Çubrolloviqit, duke akuzuar Fadilin se ai është shkaktari e duke e shkarkuar nga funksioni i komandantit të Shtabit të Forcave të Kosovës.

Edhe në këto kushte tepër të vështira, Fadil Hoxha nuk i pushoi përpjekjet e luftën për të mbrojtur të drejtat e bashkëkombësave brenda Federatës. Kështu ai bëri të mundur që të ruhet gjuha e të shkollohet rinia kosovare në gjuhën shqipe; doli hapur kundër shpërnguljes të shqiptarëve nga trojet e tyre për në Turqi; kundër largimit të shqiptarëve nga administrata; kundër reprezaljeve që bëheshin ndaj shqiptarëve, nën pretekstin e mbledhjes së armëve, etj.

Kontributi i Fadil Hoxhës bëri të mundur që të ruhej uniteti i Krahinës së Kosovës, të cilën shovinistët serbë kërkonin ta ndanin sinë kohën e krajlëve, ose siç ndanë Krahinën e Sanxhakut mes Serbisë dhe Malit të Zi.

Nga arritjet më madhore të Fadilit e të Grupit që ai drejtonte qe arsimimi i rinisë së Kosovës me gjuhën amtare në shkollat e të gjitha niveleve e profileve; arritje këto që kulmuan me hapjen e Universitetit të Prishtinës e krijimin e institucioneve kulturore, përfshi Akademinë e Shkencave e Arteve të Kosovës, ku mbaruan studimet e larta dhjetëra mijë intelektualë dhe nga ku dolën profesorë e akademikë të shquar.

Njerëzit e shkolluar punojnë për ngritjen e ndjenjës kombëtare të popullit, nxisin e drejtojnë kërkesat të drejta nacionale për liri demokratike e njerëzore. Ata qenë të parët që u ngritën në demonstrata, që rrëmbyen armët dhe u bënë udhëheqës të Luftës Çlirimtare dhe udhëheqës të shtetit demokratik. Pa njerëz të shkolluar nuk drejtohet as lufta e aq më tepër shteti.

Për zhvillimin e arsimit e Kulturës në Kosovë, Fadil Hoxha dhe grupi që ai drejtonte, punuan me largpamësi e perspektivë. Është meritë e tyre që u lanë trashëgiminë më me vlerë brezave të kombit.

Fadili e brezi i tij, brenda ish – Federatës Jugosllave strukturuan shtetin e Kosovës dhe përgatitën kuadrin drejtues, në luftë me shovinistët serbë që këmbëngulnin që postet drejtuese partiake e shtetërore në Kosovë t’i mbanin serbët, me qëllim që me kohë Kosovën t’ia bashkëngjitnin Serbisë.

Fadili me shokë shfrytëzuan me shumë zgjuarsi situatën e krijuar pas Plenumit të Partisë Komuniste Jugosllave të Brionit, në të cilin, me shkarkimin e Rankoviqit nga detyra mori goditje shovinizmi serb. Ata avancuan kërkesat për rritjen e pozitës të Krahinës të Kosovës brenda Federatës. Dhe kështu arritën ta bëjnë Kosovën pjesë konstituive të Federatës Jugosllave.

Me Kushtetutën e vitit 1974, Kosova u bë shtet, pa emrin Republikë. Kjo për faktin se Kosovës iu caktuan kufijtë shtetërorë – këto kufij që ka edhe sot Republika e Kosovës, dhe populli kosovar fitoi të drejta të barabarta me gjithë kombet tjera brenda Federatës.

Kufijtë shtetërorë ruajtën unitetin territorial të Kosovës.

Po të mos ishin përcaktuar kufijtë e saj në Kushtetutën e 1974-trës, rrezikohej që t’i jepeshin Serbisë pjesë të Kosovës; rrezikohej Mitrovica me rrethinat që edhe gjatë okupacionit fashist nuk iu bashkuan Shqipërisë por ishin në vartësi të pushtetit ushtarak nazist. Por ishin pikërisht këto kufij që shërbyen si bazë edhe për Paketën Ahtisari, të cilit ne shqiptaret i jemi mirënjohës përjetë.

Në fund dua të them se Fadili me shokë, nuk mund ta ndanin Kosovën nga ish – Federata Jugosllave, kur ajo kishte mbetur pjesë e saj pas luftës. Po ata, me përpjekje të vazhdueshme, duke luftuar pa pushim shovinizmin serb arritën t’i bënin Kosovën e shqiptarët të barabartë me kombet tjerë të Federatës.

Sot kujtojme me respekt e nderim të veçantë 100-vjetorin e lindjes të këtij burri të shquar të Kosovës e gjithë kombit tonë. Ai do të mbetet në histori si një nga figurat e shquara të kombit tonë.

*Kryetar i OBVL – Hero i Popullit dhe Nderi i Kombit i Shqipërisë

Teksa qeveria është në negociata me Tirana International Airport për heqjen e ekskluzivitetit të fluturimeve ndërkombëtare nga Rinasi, duket se në Shqipëri po mbërrin një aeroport i ri. Në Qendrën Kombëtare të Regjistrimit është regjistruar një kompani e re e quajtur Saranda International Airport.

Kompania zotërohet në masën 34 për qind nga një shtetas me emrin Donald Shena, ndërsa 66 për qind e aksioneve të saj i përkasin një shoqërie me emrin American Capital Group

Në dokumentin e regjistrimit të kompanisë saktësohet se objekti i saj do të jenë shërbimet aeroportuale  “Objekti i kompanisë është kryerja e shërbimeve aeroportuale, përpunimi i avionëve, shërbimi i pasagjerëve, bagazheve dhe mallrave, bar – restorante të tjera në funksion të objektit,” thuhet në dokument.

Prej vitit 2001 që kur qeveria e Fatos Nanos nënshkroi marrëveshjen e konçesionit të Rinasit, në Shqipëri fluturimet ndërkombëtare kanë qenë monopol i këtij aeroporti. Pas 15 vitesh operimi, duket se më në fund kompania gjermane, që administron aeroportin e Rinasit ka ka pranuar të lëshojë monopolin e fluturimeve ndërkombëtare duke i hapur kështu rrugën ndërtimit të aeroporteve të tjera në vend.

/Syri.net/

Studiuesi Auron Tare është revoltuar nga një emision në kanalin TCH ku një ish-drejtues i Sigurimit shqiptar e nxirrte Mehmet Shehun si agjent të CIA-s.

Me një reagim në Facebook, Tare shkruante, se nëse dikush do të kishte marrë mundimin te lexonte pak do të kishte mësuar se Shtetet e Bashkuara të Amerikës nuk kanë pasur një Shërbim Sekret deri në datën 12 Qershor 1942.

Reagimi i plotë i Auron Tares:

Mehmet Shehu agjent i CIA-s? Keshtu thote nje ish-drejtues i larte i Sherbimit te Inteligjences ne kohen e komunizmit.

Mire qe gazetaria e sotme nuk lexon apo nuk kerkon te hulumtoje per te kuptuar pak me shume se per cfare flitet, por qe drejtues te larte te ish-Sigurimit te jene kaq pak te informuar mbi historine e sherbimeve?

Te ben pershtypje profesionalizmi i ceket i ketyre drejtuesve te cilet dikur kane drejtuar nje prej institucioneve me te rendesishme te Shtetit.

Nëse e dikush do kishte mare mundimin te lexonte pak do te kishte mesuar se Shtetet e Bashkuara te Amerikes nuk kane pasur nje Sherbim Sekret deri ne daten 12 Qershor 1942 ku me direktive te posaçme te Presidentit Rusvelt u krijua OSS nen drejtimin e Kolonelit Irlandez William “Bill” Donovan. (OSS 1943-1945. )

Ne kundershti me Britaniket te cilet kishin nje tradite te hershme te spiunazhit te shperndare ne te gjitha kolonite e tyre si dhe ne vendet me interes per ta, Amerikanet nuk kane pasur interes per spiunazh global e aq me shume ne vende te humbura ballkanike si Shqiperia deri sa hyne perfundimisht ne Luften Boterore.

Harry Fulz me siguri do te qeshte me naivitetet shqiptare nëse do te ishte ende gjalle.

Fatkeqesisht askush nuk ka dashur te lexoje dosjen e Fultz e cila shume qarte tregon se Fultz nuk ka pasur asnje ide, kontakt apo deshire te jete i perfshire ne spiunazh ne favor te amerikaneve ne periudhen kur ai drejtonte shkollen teknike.

Ai ishte nje drejtor shkolle i perkushtuar ndaj te rinjve shqiptare duke krijuar nje prej oazeve perendimore ne Shqiperi, ne 1943 kur amerikanet zbarkuan ne Itali dhe ne Bari u hap Zyra per Ballkanin e cila ishte para pregatitur ne Egjypt, brenda saj ishte edhe Seksioni Shqipta.

Me ne krye nje oficer amerikan Dale McAdoo me pseudonimin “Tank” u pa qarte se ne Ballkan duheshin njerez te cilet e njihnin mire vendin. Per kete arsye OSS ftoi Harry Fultz i cili e njihte mire Shqiperine te drejtonte Zyren e Shqiperise.

Pra ne 1943 periudhe kur Mehmet Shehu ishte tashme nje personalitet i levizjes komuniste.

Qe Shehu mund te kete pasur komunikim me ish-mesuesin e dikurshem nga 1943 e deri sa Fultzi u largua nga Shqiperia kjo mund te pranohet por qe Fultzi te kete rekrutuar nxenesit e tij te Shkolles Teknike ne vitet 20-30 kjo nuk ka asnje baze faktike deri me sot. Per ke do ti rekrutonte? Per nje organizate qe nuk egzistonte?

Fatkeqesisht ende sot flitet pa dokumenta por vetem me hamendje. Qe Fultzi nuk ka pasur lidhje me CIA-n e mevonshme kjo eshte shume e qarte per kedo qe ka pasur deshiren te njihet me dosjen e Fultzit ne Arkiven Amerikane…