“Zgjedhje më 30 qershor nuk do të ketë”. Kështu ka deklaruar kreu i LZHK-së Dashamir Shehi, pas një takimi që pati në selinë e PD mes kreut të PD-së Lulzim Basha dhe aleatëve.

Shehi theksoi se zgjedhjet e 30 qershorit janë të rëna moralisht por edhe me dokumente sepse nuk ka më shumë se 25 kandidatë përballë.

“Mesazhi kryesor i takimit ishte se zgjedhje më datë 30 nuk ka. Kjo është e para mesazhi kryesor. Më shumë se 25 kandidatë nuk ka konkurrues. Kanë rënë që tani moralisht zgjedhjet. Do sajojnë kandidatë. Që sot po ju paralajmërojmë se ka filluar manipulimi zgjedhor. Kanë rënë dhe me letra. Nuk do lejojmë zgjedhje më datë 30 qershor me gjithë aksionin e mundshëm opozitar, në 360 gradë. Këtu moral më për zgjedhjet nuk ka”, deklaroi ai.

Lideri i opozitës, Lulzim Basha, paralajmëroi dje përballje të fortë me krimin qeveritar për rikthimin e demokracisë në vend. Z.Basha pati dje një axhendë intensive pasi mblodhi forumet drejtuese të partisë dhe aleatët për intensifikimin e aksionit opozitar kundër Edi Ramës kryeministër. Kryesia e PD-së vendosi që protesta e radhës e opozitës do të jetë në 25 maj në orën 19:00. Në përfundim të mbledhjes, kreu i PD, Lulzim Basha akuzoi se vendi është në kushtet grushtit të shtetit. “Vendimi unanim është përballje me të gjitha mënyrat. Që nga ky moment ne jemi dhe do të jemi çdo ditë dhe çdo minutë të bashkuar si asnjëherë më parë në një përballje pa kthim me ushtarët dhe shërbëtorët e juntës kriminale në pushtet derisa të diktojmë kthimin te demokracia dhe zgjedhjet e ndershme. Kush ul kokën dhe nuk bëhet pjesë e kësaj beteje, do të jetë shërbëtor i krimit”, deklaroi kreu i PD-së.

Denoncimi
Lideri demokrat, Lulzim Basha, u shpreh se opozita nuk do ketë kthim pas dhe do vazhdojë të protestojë derisa të rrëzohet kjo qeveri, e cila sipas tij, është e lidhur me krimin. Basha bëri të qartë se zgjedhjet nuk do të mbahen, pasi 1 milion shqiptarëve u kanë skaduar kartat e identitetit. “Koalicioni opozitar ka shqyrtuar gjendjen e rëndë ku ndodhet vendi, pas asgjësimit të gjykatave dhe kapjes së prokurorit. Përmes përgjimeve provohet përfshirja e Edi Ramës në vjedhjen e votave. ‘Bild’ ka bërë një panoramë për narkoshtetin tonë, por ka zbuluar diçka që organet ligjzbatuese në Shqipëri, në dosjen 184 figuron vetë Rama duke u siguruar për skenarin e vjedhjes së votave. Gjylameti do ishte bashkë me Spiropalin në këtë dosje. Spiropali është pjesë e hetimeve për dosjen e Xibrakës. Nuk ka njeri që nuk e di që Edi Rama ka blerë votat. Këtë parlament e ka diktuar krimi. Jemi në kushtet e një grushti shteti. Edi Rama ka përcaktuar një kur përplasje me popullin. Kjo duket qartë në listën e kriminelëve për bashkitë e vendit, të cilat kryesohen nga vrasës, përdhunues, shokët e Elvis Roshit. Në Dibër të dy janë përcaktuar nga Ymer Lala. I pari është pjesë e dosjes, i dyti ish-sekretar i PD në Dibër.

Zgjedhje nuk do të ketë. Edhe formalisht vendi është me një regjistër të gjendjes civile të masakruar nga Rama dhe Lleshaj”, deklaroi z.Basha. Ai denoncoi skadimin e kartave të identitetit, duke e cilësuar si një mënyrë të qeverisë për manipulimin e zgjedhjeve. “Mbi 1 milion shqiptarëve u kanë skaduar kartat e identitetit. Vangjush Dako ikën nga gara dhe përcakton se kush do të garojë. Pyetja është a do vazhdohet që grushti i shtetit të çohet deri në fund për të çinstaluar tiraninë e krimit. Vendimi unanim i opozitës është përballje metë gjitha format. Nga ky moment ne jemi dhe do të jemi bashkë më qytetarët në një përballje pa kthim me ushtarët e juntës kriminale. Skenari tjetër është që Shqipëria të bjerë si shtet i së drejtës. Ne këtë skenar nuk e pranojmë, betejën do ta vazhdojmë kundër kësaj junte kriminale, e cila do të asgjësojë të ardhmen e shqiptarëve”, u shpreh Basha.

Nensi Dilo është studente e vitit të tretë në degën Mjekësi e Përgjithshme. Ajo rrëfen për mikrofonin e “Trending” të gjitha vështirësitë që hasen në jetën universitare në degën ku studion, ndërsa ka edhe një përgjigje të qartë për një nga realitetet më të shpeshta të studentëve të mjekësisë në Shqipëri.

Nensi na tregon se përse ajo dhe miqtë e saj zgjedhin Gjermaninë apo vende të tjera europiane për të studiuar e punuar. “Nuk janë legjenda urbane”, i përgjigjet ajo pyetjes së Melisës për kurset e gjermanishtes së studentëve të mjekësisë, ndërsa rrëfen se nga 200 studentë, shumica e tyre ose kanë nisur një të gjuhës gjermane ose kanë ndërmend ta bëjnë.

“Pjesa më e madhe e 200 studentëve që vijojnë tani Mjekësinë e Përgjithshme janë në kurse ose do të futen shumë shpejt në kurs gjermanishteje”, rrëfen Nensi.

Dy nga problematikat më të mëdha që hasin studentët shqiptarë gjatë studimeve në mjekësi janë praktika dhe literatura.

“Praktika është pak e vështirë. Është sistemi pak i keq, një pedagog ka 20 studentë, nuk mund të futen 20 studentë në një dhomë. Pjesa praktikë është e vaktët. Një nga problemet më të mëdha janë librat. Janë përkthime të shëmtuara të librave. Kemi disa libra të pedagogëve të ndryshëm. Secili poedagog ka librin e tij”, tregon Nensi.

Ajo thotë se librat e mjekësisë janë shumë të kushtueshëm, ndërsa e bindur deklaron se studentët e kësaj dege e kanë të pamundur të punojnë paralelisht me shkollën pasi mësimi fillon në 8 të mëngjesit e përfundon në 4 apo 5 të mbasdites. Por a është mjek një student shqiptar kur del nga universiteti? Nensi ka këtë përgjigjie.

“Mjeku gjithë jetën është student, atëherë kur quhet mjek, mjeku brenda tij vdes. Pas 6 viteve jemi teoricienë shumë të mirë, por mjekë praktikues jo”.

Deputetja e Partisë Socialiste, Blerina Gjylameti, doli sot në një deklaratë për shtyp nga selia e partisë, duke hedhur akuza të rënda në drejtim të opozitës, se ka paguar para, për artikuj në media të huaja. Konkretisht, Gjylameti i referohej një artikulli të Bild, shkruar nga reporteri kryesor i politikës, Peter Tiede.

Gjylameti tha ndër të tjera se “Ata që paguajnë para për të nxirë imazhin e Shqipërisë në botë, për të goditur ekonominë dhe turizmin, sot dalin dhe rrahin gjoksin krenarë për zullumet që i bëjnë Shqipërisë. Është e vërtetë, artikuj si ai i djeshmi në gazetën gjermane, i bëjnë dëm imazhit të vendit jashtë“.

Autori i shkrimit, Peter Tiede, i kontaktuar nga TPZ.al, u shpreh se deklarata e Gjylametit mbështetet në teori konspirative dhe sulme personale dhe se aludimi se ai ka marrë para është thjesht një çmenduri.

“Ajo sigurisht bën të njëjtin gabim që bëjnë ‘politikanë’ të tillë: ata vendosin vetë që të tjerët e kanë gabim. Shpresoj, për të mirën e saj, që ky të mos jetë rasti dhe që thjesht të ketë tymosur gjëra të gabuara, siç themi ne në Gjermani. Ka shumë nga këto “gjëra të gabuara”. Më vjen keq që zonjës i janë shteruar argumentat që në fjalinë e parë – dhe se i duhet të mbështetet në teori konsipirative dhe sulme personale. Aludimi se unë kam pranuar para, është thjesht një çmenduri”, u shpreh Peter Tiede.

Në shkrimin e prestigjiozes gjermane, thuhej se Shqipëria është shembulli kryesor, i një vendi kaotik në duar gangsterësh. Në shkrim gjithashtu përmendej edhe një bisedë e kryeministrit Rama, në dosjen 184.

1.
265 Dëshmorë të Policisë së Shtetit i ka Shqipëria jonë. Ma i fundit është Artan Cuku i Lurës, i shpallun më 9 të prillit 2019. Ndoshta janë dhe ma shumë. Unë kaq di. Veçse për diçka jam i sigurtë: kur u përurue memoriali mjaft domethanes “Muri i Kujtesës” para Ministrisë së Brendshme në Tiranë, vet Kryeministri i Shqipërisë, Edi Rama, deklaroi: “Janë plot 264 yje, të vendosur në këtë mur…”(Portali “Kryeministria”. Kronika “Muri i Kujtesës” për të mos harruar. Tiranë, 19 shtator 2016).
Ne jemi vend i vogël që “të prodhojmë” kaq shumë dëshmorë brenda territorit tonë pa pasë asnjë luftë sulmuese nga të tjerët, pas pasë luftna civile ndërveti. Për të ardhur keq të jetë kaq e madhe “industria e martirëve” të Policisë së Shtetit tonë mbishekullor. Ende kjo “industri” (më falni për krahasimin) po “prodhon” martirë të Policisë së Shtetit, dëshmorë të saj. Mos ndodhtë edhe përgjatë protestave e demonstratave të 13 javëve të fundit gjatë përballjeve deri tejet ekstreme Polici e Shtetit-Protestues të Opozitës, Qytetarë Shqiptarë!
Më duket se në këtë lloj “industrie të Martirëve të Policisë” jemi të pangjashëm, të rrallët, të vetmit në Ballkan e në Europë. Ndoshta mund të krahasohemi me disa vende të Lindjes së Mesme apo Amerikës Latine.
Po, pse të shkojmë kaq larg! Le të krahasohemi me shtetin tjetër shqiptar në Ballkan, me Kosovën tonë. Ata kanë 20 policë të vrarë në 20 vite–nga 37 vjeçari Lazim Rexhepi i vramun në Novosellë më 11 shtator 2001 e deri tek ma i fundit rast: 42 vjeçari Izet Demaj, i vramun në Vrellë të Istogut (Burimi) më 27 dhjetor 2018. I ka këto të dhana faqja e Policisë së Shtetit të Kosovës, e ditës së sotme të majit 2019.
Kosova në këto 20 vite Shtet i lirë e i Pavarun (1999-2019) i ka 20 Dëshmorë të Policisë së Shtetit të saj të ri, një ndër shtetet ma të rinj të botës, çka i takon mesatarisht nga 1 dëshmorë në çdo vit. Shqipëria i ka 265 Dshmorë të Policisë së Shtetit në këto 30 vite të Demokracisë (1990-2019), çka i takon mesatarisht rreth 10 dëshmorë në çdo vit kalendarik (!)
Shqipëria me 107 vite Shtet i Pavarun i ka mbi 16 herë ma shumë policë të vramun se sa Kosova e porsa dalë nga Lufta me Serbinë, nga Lufta e NATO-s për Lirinë e saj, nga “E Treta Luftë Botërore” e shekullit XX.
E çka me thanë: e di vet Politika e Tranzicionit tonë të tejzgjatun, e cila e ka Demokracinë tonë të përgjakur edhe me gjakun e rreth 300 policëve shqiptarë në 30 vjet të Shtetit të së Drejtës e të Vërtetës…(!)

2.
Shqipëria është ndër shtetet me numrin ma të lartë të policëve në Europë. Vjet, më 2018, i kishte 392 policë për 100 mijë banorë. Kjo, sipas të dhanave të EuroStat. Përndryshe, rreth 74 policë ma shumë se mesatarja e Bashkimit Europian. Krahasimisht: për çdo 254 shqiptarë kemi 1 polic për të na e garantue qetësinë, sigurinë, jetën tonë.
Këto shifra nuk mund të dëshmojnë se Shqipëria është një “shtet policor”, por ngjarjet e javëve të fundit të mbiforcës e mbidozës të Policisë së Shtetit me shkopinj gome e gazra gjithfarësh lidhur me Protesta-Demonstrata të Opozitës, si dhe rasti ma i fundit, i djehit, i 11 majit 2019, po na çojnë drejt një realiteti të tillë të padëshirueshëm e të pa meritueshëm. Politika, Policia, Populli, Shqipëria duhet ta dijnë e ta mësojnë se nuk kemi nevojë për martirë e dëshmorë të rinj të Policisë së Shtetit.
Edhe fqinjë tanët euro-atlantik në kufi toke e deti kanë ma shumë policë për 100 mijë banorë të popullsisë së tyne se sa mesatarja e BE-së, se sa Shqipëria jonë, si Greqia e Italia, Qipro, Kroacia, Malta, etj. Dhe këto, sigurisht e realisht, nuk janë “shtete policore”, pasi Shteti Policor nuk vjen nga numri i policëve, por nga qëllimet dritëshkurtna e vizione këqija të Politikës të çdo krahu politik e të çdo kohe politike, nga “bamat e Policisë së Shtetit” ndaj qytetarëve të vet si në Protestat-Demonstrat e fundit të 2019-tës. E shenjat janë mjaft fatale, si në rastet kur gazi-lotsjellës (e siç po i thonë edhe me dozim helmatues) shkon deri te Materniteti i Tiranës–tek foshnjat e porsa linduna aty, që frymojnë për herë të parë në jetën e kohën shqiptare, tek Biblioteka Kombëtare Shqipërisë kur kur një akademiku mbi 80 vjeçar ia loton sytë mbi veprën e tij shkencore të hapur në tavolinën e punës, etj. Nuk duhet që policët me uniformen e re të Policisë së Shtetit të na i kthejnë kohët e vjetra të terrorit e përndjekjes policiore, të sjelljeve neo-fashiste e neo-komuniste mbi popullin e vet, edhe kur ata dalin në demonstrate, edhe kur ata duan të mbrojnë sipas mendjes e mënyrës së vet pronën e tyre shtëpi apo diçka tjetër, sepse edhe shteti kapitalist është i pronës së qytetarit, i lirisë e sigurisë të qytetarëve të shtetit të vet.

3.
Nga të dhënat e fundit të Drejtorisë së Përgjithshme të Policisë, në Shqipëri numërohen rreth 10,985 policë në të gjithë vendin. Çështje e tyre, në planifikim e veprimtarim, pasi ne duam të kemi të siguruar Rendin e Qetësinë Publike, jetën tonë ta kemi të qetë e të sigurtë në çdo shtëpi e bashki, në çdo rrugë e mjedis shqiptar nga Lazarati i Gjirokastrës deri në bjeshkë të Dobërdolit të Tropojës, nga liqeni i Shkodres tek i Ohrit, nga Materniteti i Tiranës deri tek Kryeministria, Kuvendi e Presidenca e Shqipërisë.
Ajo që na shqetëson ne si shqiptarë, si qytetarë shqiptarë, si njerëz që ende mendojmë mirësisht për këtë vend e jetojmë keqësisht në këtë vend, ka të bajnë me faktin e trajtuem në këtë shkrim se po kemi numer të neltë të Dëshmorëve të Policisë së Shtetit, kur në rreth 11 mijë policë kemi rreth 300 të vrarë, Dëshmorë të Policisë së Shtetit, pa shenjue me shifra ata që ende nuk janë shpallë të tillë po kanë mbetë “viktima”(!), pa llogaritun se pothuaj kaq sa kemi “Dëshmorë të Atdheut” i ka ky At-Dhe policë me plagë në trup, të mbetun invalid. Janë shumë, tepër shumë…(!)
Shqipëria e jonë, sipas Kombeve të Bashkuara (UNODC), ka mbi 2.5 vrasje të ndryshme për cdo 100 mijë banorë të saj, një shifër nga ma të lartat në Ballkanin problematik, duke qënë pas Malit të Zi e para Kosovës, Maqedonisë, Serbisë e Bosnje-Hercegovinës.
Shteti ynë, ndër shtetet ma të varfëra në botë, ka dhanë e jep me miliona USD për policët e vrarë e të plagosur, për Dëshmorët e Invalidët e Policisë së Shtetit, që jepen nga kontributet përditore të popullit, ndaj Policia e Shtetit nuk duhet të ndjekin popullin e vet me shkopinj gome në krahë, me gaz lotsjellës edhe në institucione e shtëpija, me blloqe gjobash në dorë gjithkahit e gjithkund. Ne nuk jemi që Policia e Shtetit të ketë martirë e dëshmorë jo vetëm kaq shumë, po asnji, ashtu sikurse edhe Policia e Shtetit dhe asnji polic i vetëm nuk duhet ta “martirizojnë” popullin e vet, ta “viktimizojnë” popullin e tij.

4.
Pak vite ma herët e botova nji shkrim për “Dëshmorin e Policisë së Shtetit”, Azem Ali Mëshin e Kosturrit të Hasit, i dekoruar me “Medalja e Artë e Shqiponjës”, i vramun në qershor 1999 nga një bandë kriminale në zonën Kombinat të metropolit Tiranë. Ai, sivjet, më 20 qershor 2019, do të ishte duke e festuar me bashkëshorten e vajzën e tij të vetme, me vllaznit e motrat, me vllazni e farefisni të tij, me shoqëninë e tij, 51 vjetorin e Lindjes.
Atëherit, aty, në atë shkrim timin, e pata cek nji fakt: Kanadaja euro-atlantike e ka pasë në vitin 1992 policin e fundit të vrarë në ndjekje të një krimineli. E thonë se nuk ka ndodh rast tjetër në këto rreth tre dekada kohore. Në varrimin e tij morën pjesë 2 milionë kanadezë. Prej asaj kohe të vrasjes të këtij polici, Kanadaja e ka shenjue dhe e përkujton gjithnji si “Dita e Policisë”.
E, tue u interesue për me e shkruejt një libër modest për një djalë të shquar hasjan, për Dëshmorin e Policisë së Shtetit, në qershorin e 2019-tës të lindjes e vdekjes së tij, m’u desht të kisha dhe Listën e Dëshmorëve të Polcisë së Shtetit të Shqipërisë. E kisha një të tillë të 8 shkurtit 2005 të nxjerrë nga Portali i Policisë së Shtetit, po tashti nuk e gjen ma aty, pasi e kan hjekë atë. Nuk i dihet: për arsye koti apo ploti, po ndoshta kemi të bajmë me çmenduri apo budallallek, me pakujdesi apo papërgjegjësi, me skuthlek apo debillek. Kjo nuk dihet, përveç faktit se ndoshta e kie ma të lehtë me e marrë një leje arme që vret se sa një fletë me Listën e Dëshmorëve të vrarë të Policisë së Shtetit (!) Nuk është hera e parë dhe as e fundit që e ngre në media këtë çështje…që kërkon interesim të pakët shtetëror e me vlera të larta morale e politike shqiptare.
Hapeni Portalin e Policisë së Shtetit të Kosovës e, ndryshe nga ç’ngjet në Shqipëri, aty do të gjeni Listen e Dëshmorëve të Policisë së Shtetit të Kosovës. Pra, kemi të bajmë me vlerësim të Dëshmorëve të Policisë së Shtetit, me një nga aktet e format e nderimit të emrit e veprimtarisë së tyre. E, pas kësaj, mos më thoni se “Kosova ende nuk po nderton Shtet”(!), e pse Kosova i ka vetëm 20 Dëshmorë të Policisë së Shtetit (!).
E nuk është çështja që mungon vetëm Lista e Dëshmorëve të Policisë së Shtetit në Portalin e saj. Jo. Kemi të bëjmë dhe me dy çështje të tjera.
Para Ministrisë së Brendshme në Tiranë e kemi Memorialin “Muri i Kujtesës” me 264 yje, po ata janë veç yje dhe Yje janë Vërtetë, po ata kanë dhe emra e mbiemrat e vet e në kujtesën e Kombit të vet. Pra, emrat e tyne nuk janë as në Portal dhe as në Memorial, sado gjetje e paraqitje e bukur të jetë për sytë, vendndodhjen e historinë.
Numri i Dëshmorëve të Policisë së Shtetit ka raste që merr pikëpyetje saktësie, prej thënieve e kundërthënieve të disa politikanëve e zyrtarëve të lartë të Shtetit Shqiptar, që të duhet me kërkimue për të vërtetën plotore. Kryeministri i Shqipërisë, Edi Rama, në ditën e përurimit të Memorialit “Muri i Kujtësës”, e vendosi yllin e 264-tët, atë të Dëshmorit ma të ri të atëhershëm të Policisë së Shtetit, Ardian Kodra- ish punonjës i FNSH të Shkodrës, ra në krye të detyrës në Torovicë. Ministri i ri i Ministrisë së Punëve të Brendshme, Sandër Lleshaj, më 5 maj 2019, me za e figurë, edhe në televizione, portale e gazeta, e fjalathotë se “Shqipëria ka 224 Dëshmorë të Policisë së Shtetit. Nuk do të thotë pak, të heqësh 41 dëshmorë nga Lista e Policisë së Shtetit (!) Nëse kemi të bajmë me lapsus publik, atëherit duhet dhe sqarim e falje publike prej tij.
Sigurisht duhen studime plotore nga politologë, historianë, sociologë, etj. që të analizojnë shkaqet e pasojat e zhvillimeve politike-sociale, ekonomike-kulturore, etj. në këto tre dekadat e fundit e, shpesh herë përtej e jashtë normaliteteve të traditës shqiptare e euroatlanitkës së sotme, se përse Shqipëria jonë ka kaq shumë Dëshmorë të Policisë së Shtetit, po si përmbyllje, mundena me thanë dy-tri fjalë: Nuk është çështja që 20 prej tyre ti çojmë tëk Varrezat e Dëshmorëve të Kombit në Tiranë, përkrah 810 heronjve e dëshmorëve të tjerë, por të interesohemi për bashkëshortet e fëmijët e shtëpijat e të 265 policëve të vrarë e po kaq me plagë në trupat e tyre Shqipëria nuk ka nevojë për dëshmorë, martirë, viktima e invalidë të tjerë të Policisë së Shtetit Shqiptar, ndaj t’i vlerësojmë e nderojmë në 365 ditë të vitit këta që kemi: 265 Dëshmorët e Policisë së Shtetit Shqiptar.

Ramiz LUSHAJ

Johann David Wadephul dhe Christian Schmidt

ARISTIR LUMEZI/ Kryeministri Rama dhe kreu demokrat Basha shfaqën dje shenja tërheqjeje nga pozicionet e mëparshme, duke pranuar të ulen për dialog.

Pas deklaratës së zëvendëskryetarit të Grupit Parlamentar të Unionit Kristiandemokrat (CDU/CSU) në Bundestag, e njëherazi kryesues i grupit të punës së Ballkanit Perëndimor, Johann David Wadephul, si dhe raportuesit për Shqipërinë në Komisionin për Çështjet e Jashtme, Christian Schmidt, që kërkuan dy ditë më parë dialog pa kushte mes opozitës dhe qeverisë, palët lëvizën nga pozicionet e tyre.

Si Basha, edhe Rama kanë bërë dy ditë rresht bashkëbisedime me gazetarët për të treguar pozicionet e tyre të reja.

“Të dyja palët janë njësoj përgjegjëse për paqen e brendshme dhe për krijimin e kushteve për çeljen e negociatave të anëtarësimit. Ata që nuk janë të gatshëm ta bëjnë këtë menjëherë, janë duke e çuar veten drejt izolimit politik. Ne jemi të gatshëm për të ndihmuar në kapërcimin e krizës”, thuhet në deklaratën e dy politikanëve gjermanë. Mësohet se selitë diplomatike kanë lëvizur dy ditët e fundit, kur ka qenë edhe afati i fundit për regjistrimin e kandidatëve në KQZ. Kreu demokrat ishte më i qartë dje për të marrë pjesë në angazhimin gjerman.

“Jam njohur këto 24 orë me qëndrimet e partnerëve ndërkombëtare. U kam komunikuar miqve ndërkombëtarë se mirëpres angazhimin e tyre për zgjidhjen e krizës politike në vend. PD dhe opozita kanë qenë dhe janë gati të përfshihen në një proces të vërtetë politik me ndihmën e partnerëve tanë ndërkombëtarë për të zgjidhur këtë krizë dhe për t’iu kthyer shqiptarëve sovranitetin nga një qeveri dhe Parlament ilegjitim”, u shpreh dje Basha.

Ndërsa Kryeministri Rama, edhe pse u shpreh i vendosur për të mos negociuar për datën e zgjedhjeve për shkak të Kushtetutës, tha se do të ulej të fliste me Lulzim Bashën për të përmirësuar kuadrin ligjor për të gjitha shqetësimet e opozitës.

Pritet që deri në fund të javës të kemi një produkt të këtij ndërmjetësimi ndërkombëtar, edhe pse Rama u shpreh se nuk ka nevojë për të huajt për të dialoguar me Bashën. Por e shkuara e afërt dhe e largët na kujton gjetjen e zgjidhjeve në minutën e fundit, duke shkuar dhe në ndërhyrjet në Kushtetutë dhe ndryshimin e datës së zgjedhjeve.

Në maj 2017, pas afro tre muaj proteste, pasi ngriti një çadër para zyrës së Kryeministrit, duke kërkuar dorëheqjen e tij, Rama e Basha ranë dakord me propozimet e “Paketës McAllister”, e cila u pasurua dhe me disa propozime të zyrtarit të Departamentit amerikan të Shtetit, Hoyt Yee.

Marrëveshja mes tyre i jepte më shumë garanci opozitës për të kontrolluar qeverinë dhe administratën që të mos përfshiheshin në fushatën zgjedhore dhe të pranonin rezultatin e zgjedhjeve.

Ndonëse data e zgjedhjeve edhe në 2017 ishte caktuar, 18 qershori, Presidenti Nishani, në zbatim të marrëveshjes Rama-Basha, i shtyu ato me një javë, duke dekretuar datën e re, më 25 qershor 2017. Dhe në 2007, kriza e certifikatave e ngritur nga PS në opozitë çoi në një marrëveshje mes opozitës dhe maxhorancës, duke shtyrë datën e zgjedhjeve nga 20 janari në 18 shkurt 2007.

Pas dhunës së ushtruar nga policia gjatë protestës së ditës së shtunë ndaj Sahit Dollapit, ky i fundit i është nënshtruar një operacioni në spitalin e traumës.

Sekretari Organizativ i Partisë Demokratike u operua në shpatull dhe sipas informacioneve të marra nga burimet operacioni ka qenë i suksesshëm dhe gjendja e tij shëndetësore duket e stabilizuar.

Sekretari Oranizativ i PD-së u dhunua me shkopinj gome nga Forcat e Ndërhyrjes së Shpejtë gjatë momentit që po mundohej të largohej me vrap prej tyre.

Kreu i PD, Lulzim Basha, një ditë pas protestës së mbajtur në Tiranë, ka dalë në një komunikim me mediat.

Basha pasi ka falënderuar të gjithë ata që dolën në këtë protestë, të cilën ai e quajti madhështore dhe marshimin më të madh, ka dhënë edhe disa mesazhe.

Mesazhin e parë Basha e ka dhënë  për qeverinë, duke bërë me dije se kjo protestë nuk do të ndalojë deri në largimin e kreut të qeverisë, Edi Rama, ndërsa mesazhin e dytë e ka dhënë për të gjithë të arrestuarit gjatë protestave, duke thënë se drejtësia për ta do të vihet në vend.

Basha është shprehur se ka marrë mesazhe nga ndërkombëtarët, dhe se e mirëpret angazhimin e tyre për të zgjidhur krizën politike në vend, ndërsa ka shtuar se PD dhe opozita janë gati të përfshihen në një proces politik me ndihmën e ndërkombëtarëve, por me kushtin për largimin e Ramës dhe qeveri tranzitore.

Pjese nga fjala e Bashes:

Ky ishte një mesazh kombëtar i qartë dhe i prerë për këto dhe në veçanti për pengmarrësin e Shqipërisë, demokracisë dhe drejtësisë, që ka bllokuar derën e BE, se nuk ka dhe nuk do të ketë asnjë hap pas, bashkimi ynë ka marrë përmasa që i tejkalojnë kufijtë politik të mbështetësve.

Përshëndes të gjithë ata socialist që iu  bashkuan dje kësaj protestë, duke dhënë mesazh se kjo që kemi nisur është një beteje për të transformuar vendin dhe nuk është betejë për pushtet.

Kjo pjesëmarrje dëshmoi besimin e madh që qytetarët kanë tek kauza e vendosmërisë sonë të hekurt për të mos bashkëpunuar me krimin.

Zemra e protestës vazhdon të jetë kryeqyteti, mirënjohje qytetarëve të Tiranës, por edhe më të madhe e atyre që erdhën nga çdo skaj i vendit.

Do ta ndryshojmë fatin e vendit, nuk do ta lëmë në duart e një njeriu që ka marrë peng të ardhmen e shqiptarëve.

Mesazhin e dytë e kam për ata dhjetëra të shoqëruar të shtunën që u bashkohen të arrestuarve të tjerë më parë, dua tu them se nuk jeni vetëm. Sakrifica juaj për demokraci është shënuar në kujtesën e opozitës, por dhe në mirënjohjen e të gjithë shqiptarëve. Ju siguroj se çdo e drejtë  e juaj  e dhunuar do të vihen në vend, dhunuesit do vihen para drejtësisë, duke nisur me pinjollin e Ramës.

Shqiptarëve ju them se nuk do ta lëmë reformën në drejtësi  të përfundojë duke i lënë në dorë të Ramës dorë të gjitha institucionet,  është një ndër qëllimet kryesore të protestës, të ndajmë institucionet nga krimi.

Mesazhet e partnerëve tanë janë të qartë, ata thonë fut në burg kriminelët, ky fut protestuesit, ata thonë s’ka zgjedhje pa opozitë, ky mendon se do shkojë në zgjedhje…

Koha e kriminelit ka mbaruar.

Sot shqiptarët e kanë marrë fatin në dorë, asgjë nuk do na pengojë në rrugën tonë drejt BE.

Ky mesazh kumboi mbrëmë në entuziazmi i protestës, që nuk e fiku as shiu dhe jo më ta fikë një barbar që përdor dhunë shtazarake kundër qytetarëve të vet.

Populli dhe opozita do e vazhdojnë këtë betejë deri në fund.

E mirëpres angazhimin e ndërkombëtarëve për zgjidhjen e krizës politike në vend. PD dhe opozita janë gati të përfshihen në një proces politik me ndihmën e ndërkombëtarëve.

Largimi i Ramës është çelësi që i hap rrugën këtij procesi politik, dhe një qeveri tranzitore.

Presidenti i Partive Popullore Europiane, PPE Joseph Daul ka reaguar pas protestave të opozitës së bashkuar në Shqipëri.

Daul përmes një statusi në “Twitter” shprehet se dënon dhunën në protesta, kurse shton se palët duhet të ulen në tryezë bisedimi për dialog.

Reagimi i presidentit të PPE Joseph Daul:

Dënojmë fuqishëm përdorimin e dhunës gjatë demonstratave të fundit në Shqipëri. Të gjitha palët e përfshira duhet të kthehen në një dialog të ndershëm politik, të adresojnë shqetësimet dhe shkaqet rrënjësore, të rrisin retorikën dhe të qëndrojnë larg çdo lloj dhune.

Ish-deputeti i Partisë Demokratike, Enkelejd Alibeaj, ka zbuluar detaje se çfarë i thanë Forcat e Ndërhyrjes së Shpejtë, Sekretarit Organizativ të kësaj partie, Sahit Dollapit në momentin e prangosjes gjatë protestës mbrëmjen e të shtunës.

“Policia e ka identifikuar që ishte ai, në të gjitha protestat ka mbajtur të gjitha korrespodencat me policinë. Ky akt donte të tregonte që policia do ushtronte dhunë dhe ndaj zyrtarëve politikë. Arben Baro i thotë policëve: Mbyteni! Se duhet të çonte deri në fund porosinë e Sandër Lleshaj. Jo vetëm që ia hoqi kundra gazin, por… E identifikoi e dinte kush ishte. Mbyteni… dhe iu vërsulën. Donte të vazhdonte demonstrimin e forcës”, thotë Alibeaj në një lidhje për emisionin “Opinion”.

Ai tregoi dhe gjendjen e vështirë shëndetësore të zotit Dollapi, për të cilin tha se ka bërë një operacion në këmbë si dhe ka dhe probleme me zemrën.

Alibeaj tha se në 30 qershor nuk do të ketë zgjedhje, ndërsa dha një koment edhe dhe për ndërkombëtarët.

“Janë pjesë e qenësishme e politikes së këtij vendi. Do t’i informojë për çdo gjë deri në artikulimet periferike se si është realiteti sot. Është detyra jonë. Do jetë e vështirë nga investimi shumë dimesional i Ramës për të krijuar një fasadë, jo të vërtetë siç është realiteti”, u shpreh ai.

Partia Demokratike përmbylli protestën-marshim me një fjalim të kryetarit Basha përpara mbështetësve nga selia e kësaj partie. Basha tha midis të tjerash se ky ishte një mision brezash.

Gjatë fjalës, u prish mikrofoni për të cilën Basha tha nuk është aq i fortë sa protestuesit, pasi e prishi shiu.

“Me bindjen se Shqipëria nuk do të kthehej më kurrë 3 muaj më parë në thundrën e errësirës, mirënjohje për të gjithë ju për këtë marshim madhështor proteste. Mirënjohje për të gjithë agjëruesit e Ramazanit, Zoti ua shpërbleftë sakrificën. Sot treguam se nuk ka forcë të ndalë për kauzën tonë zgjedhje të lira e të ndershme se nuk ka forcë të na detyrojë të ulemi të bëjmë pazare e kompromis me të keqen, e keqja duhet të ikë. Me një kohë kaq të shkurtër, me një njoftim prej 24 orësh, me mbi 3 tre orë, nuk na pengoi shiu i bekuar. Në përfundim jemi edhe më të vendosur për të sakrifikuar gjithçka për lirinë”.

(Në këtë moment prishet mikrofoni, Basha thotë: “Juve nuk ka çfarë t’ju bëj, por mikrofonin e prishi shiu. Nuk është kaq i fortë sa protestuesit. Prej hekuri është por jo aq sa ju).

Më pas, kreu demokrat shoi: Forca jonë është pjesëmarrja dhe vendosmëria dhe kësaj force nuk i bën dot ballë Edi Rama. Misioni ynë është mision brezash, për të gjithë ata të djathtë dhe të majtë që sot e kanë kuptuar se vetëm përmes bashkimit, do të mund ta gjejnë të ardhmen e tyre. Ku ftoj ta përmbyllim këtë marshim-proteste”.

TIRANE

Pak para protestës së opozitës, ambasada e Italisë në Tiranë ka një apel  për qytetarët e saj dhe një mesazh për opozitën e cila organizon protestën.

“E hënë, 13 maj 2019, duke filluar rreth orës 18.00, do të ketë një protestë politike që do të përfshijë qendrën e Tiranës, në veçanti Bulevardin Deshmoret dhe Kombit, pranë Zyrës së Kryeministrit.

Rekomandohet të shmangni grumbullimet dhe të ndiqni përditësimet përmes shtypit dhe në përgjithësi të përdorni kujdesin maksimal. Gjithashtu duhet të theksohet se ngjarja mund të ketë ndikim në trafik.”- njofton  ambasada.

Kur na ndajmë rreth një orë e gjysëm nga fillimi i protesës kombëtare të opozitës, Ambasada e SHBA-ve ka dhënë një mesazh të fortë në adresë të kryetarit të PD-së Lulzim Basha si dhe kryetares së LSI-së Monika Kryemadhi.

Përmes një postimi në rrjetin social, Ambasada e SHBA-ve në Tiranë i ka kërkuar opozitës që ta mohojë dhe dënojë publikisht dhunën e ushtruar nga simpatizantët e opozitës në protestë, madje të bashkëpunojë në hetimin për të identifikuar ata persona që kanë kryer akte dhunë.

“Protestat paqësore janë thelbësore për demokraci të shëndetshme dhe e drejta e qytetarëve për t’u mbledhur dhe për të protestuar kundër qeverisë së tyre është themelore. Megjithatë, forca dhe dhuna nuk kanë vend në një proces demokratik. Ne dënojmë dhunën e pranishme gjatë protestave të 11 majit në Tiranë dhe përgjegjësit e saj. Dhuna çoi në plagosje dhe dëmtime të pronës, përfshirë edhe dëmtim të vendbanimit së Ambasadorit të OSBE-së. Këto veprime të dhunshme ishin të paligjshme dhe jodemokratike. Ne iu bëjmë thirrje udhëheqësve të opozitës, veçanërisht Kryetarit të Partisë Demokratike, Lulzim Basha dhe Kryetares së Lëvizjes Socialiste për Integrim, Monika Kryemadhi, që të dënojnë publikisht veprimet e dhunshme të mbështetësve të tyre, të bashkëpunojnë me çdo hetim që synon të identifikojë çdo person që i kreu ato dhe vënien e tyre përpara përgjegjësisë, si dhe të sigurojnë që të gjitha protestat e ardhshme publike të jenë të qeta dhe paqësore.“-shkruhet ne reagim.

Një mesazh i është përçuar dhe qeverisë, ku sugjerohet që autoritetet të tregojnë vetëpërmbajtje edhe sikur të provokohen.

“Edhe autoritetet ligjzbatuese kanë përgjegjësi për të vepruar me vetëpërmbajtje, përfshirë edhe rastet kur iu përgjigjen provokimeve. Protestat e dhunshme po dëmtojnë përpjekjet e Shqipërisë për reforma demokratike dhe perspektivën e vendit për të bërë përpara në rrugën drejt Bashkimit Europian. Shtetet e Bashkuara nxisin të gjitha palët që të zmbrapsen nga përplasjet dhe të përfshihen në një dialog konstruktiv, që synon t’i japë fund ngërçit politik.”-perfundon reagimi/Express

Ambasada Britanike ka reaguar vetëm disa minuta para protestës së opozitës.

Në një deklaratë zyrtare, Ambasada Britanike ka dënuar dhunën e në protestën e 11 majit, ndërsa u kanë bërë thirrje liderave të opozitës që të sigurojnë që protestat të jenë paqësore.

Deklarata e plotë:

E drejta për të protestuar është një përbërës thelbësor i një demokracie të shëndetshme. Por protestat duhet të jenë paqësore.

Ne dënojmë dhunën që u zhvillua gjatë protestës së 11 majit që plagosi si policinë dhe protestuesit dhe shkaktoi dëme në pronë.

Ne u kërkojmë liderëve të opozitës të dënojnë dhunën dhe të sigurojnë që protestat që ata mbajnë janë paqësore dhe të mbahen në përputhje me ligjin.

Ne gjithashtu kërkojmë që policia të tregojë përmbajtje dhe të respektojë sundimin e ligjit që ata mbështesin. Ne dënojmë me gjithë zemër frikësimin e ambasadorit të OSBE-së dhe dëmet e shkaktuara në qëndrimin e tij zyrtar. Nuk ka vend për një veprim të tillë në një demokraci moderne.

Ne i bëjmë thirrje të gjitha palëve të hyjnë në dialog, e cila është mënyra e vetme në të cilën bllokimi i tanishëm mund të zgjidhet. Dhuna dhe retorika nuk janë përgjigja.

JUXHIN MUSTAFARAJ/ Sekretari Organizativ i PD-së, Sahit Dollapi, u la i lirë mëngjesin e së hënës pas arrestimit të dhunshëm që Forcat e Ndërhyrjes së Shpejtë i bënë gjatë protestës së opozitës te Parlamenti.

Vendimi për lirimin nga Policia, Dollapit iu komunikua në Spitalin e Traumës ku gjendet edhe aktualisht si pasojë e dhunës së ushtruar gjatë shoqërimit. “Panorama” u interesua pranë Spitalit të Traumës në lidhje me gjendjen shëndetësore të Sekretarit Organizativ të PD-së dhe mësoi se nga Reparti i Ortopedisë, Dollapi është nën kujdesin e mjekëve në Repartin e Kirurgjisë.

Të njëjtat burime bëjnë me dije se për shkak të frakturave të marra gjatë shoqërimit, Dollapi mund t’i nënshtrohet edhe një ndërhyrjeje kirurgjikale. Sekretari Organizativ i PDsë, Sahit Dollapi, u vizitua dje edhe nga kryetari i opozitës, Lulzim Basha. Sipas kreut të PD-së, funksionari i lartë i PD-së për shkak të plagëve të marra ka kaluar një natë pa gjumë. “Ka kaluar një natë pa gjumë për shkak të lëndimit të rëndë që ka marrë. Mjekët po e mbajnë nën kontroll”, deklaroi Basha pas vizitës së Dollapit.

MJEKIMI

Sipas mjekëve të Spitalit të Traumës, Sahid Dollapi është mbajtur në observim deri në orët e mëngjesit dhe pas mjekimit të nevojshëm, pasi gjendja është stabilizuar, është dërguar në pavijon. Mësohet se ai ka pësuar dëmtim të ligamentit të gjurit në njërën këmbë dhe shembje të shpatullës. Të njëjtin fakt përmendi edhe avokatja e Popullit, Erinda Ballanca, e cila në dalje nga Spitali i Traumës tha se Sekretari Organizativ i Partisë Demokratike, Sahit Dollapi, i dëmtuar në një përballje me forcat e Rendit gjatë natës është në gjendje të qëndrueshme.

Ballanca tha se pas ekzaminimeve është evidentuar një shembje në shpatull dhe një lëndim në gju, por janë përjashtuar komplikacione të tjera. “Në spital vazhdon të jetë nën observim mjekësor pacienti S.D., i moshës 56 vjeç, i cili mbërriti në orën 00:30 të mëngjesit të datës 12 maj 2019, i shoqëruar nga ekipi i urgjencës paraspitalore, pasi ankonte dhimbje të gjymtyrëve. Në urgjencën e SUT u krye protokolli i plotë mjekësor.

Gjendja e përgjithshme shëndetësore rezultoi e mirë dhe jashtë rrezikut për jetën. Aktualisht, pacienti po qëndron nën përkujdesjen e mjekëve”, tha zyrtarisht Ministria e Shëndetësisë. Sekretari Organizativ i Partisë Demokratike është larguar nga ambientet e Drejtorisë së Policisë së Tiranës pak pas mesnatës së djeshme. Ai u dërgua në Spitalin e Traumës për të marrë ndihmën mjekësore.

Partia Demokratike kërkoi lirimin e menjëhershëm të tij dhe tha se ai u dhunua nga Policia me urdhër të Lleshajt dhe Ramës. Po ashtu edhe Presidenti i Republikës, Ilir Meta, kërkoi që Dollapi të lirohej menjëherë dhe të dërgohej në spital për të marrë ndihmën mjekësore. Ai u ndalua të shtunën nga Policia para Parlamentit dhe u dhunua me shkop gome nga efektivët e FNSH-së.

Kreu i PD-së, Lulzim Basha, në një tryezë me gazetarët theksoi edhe një herë se kushti i opozitës është largimi i Edi Ramës si kryeministër.

I pyetur nëse do të ishte e gatshme opozita të ulej në një tryezë me kryeministrin për të shmangur përplasje civile, Basha u përgjigj se kjo do ta kthente betejën në pazar, ndërsa theksoi prerë se një gjë e tillë nuk do të ndodhë.

Kreu i demokratëve shtoi se është mision kombëtar për të mos lejuar, sipas tij, zgjedhje false.

“Ose te futemi me kobure në brez, që siç ju thashë, ne e kemi refuzuar, ose rruga politike që kemi ndjekur duke djegur mandatet dhe duke thirrur qytetarët të vendosin ata kë do të zgjedhin deputet apo kryebashkiak. Kjo betejë bëhet që kjo e drejtë t’u kthehet qytetarëve, sepse kjo e drejtë është asgjesuar nga Edi Rama me krimin. Do ta përsëris për të gjithë ata që kanë iluzionin se me Edi Ramën do të ketë zgjedhje më 30 qershor.

Do të ketë një tentativë të Edi Ramës për të përsëritur 2017 dhe 2016. Ndryshimi këtë herë është që përvec kandidatëve të krimit, do të ketë kandidatë fals nga opozita false. Kjo nuk do të ndodhë. Për ne është mision kombëtar të mos lejojmë zgjedhje të diktuara nga krimi. Do të ketë vetëm zgjedhje të lira e të ndershme. Ne kemi treguar edhe rrugën e vetme që këto mund të garantohen pa favorizuar palët, pa i dhënë pushtet në tavolinë asnjë pale.

Ka dy palë zgjedhje që Edi Rama merr pushtet në tavolinë me krimin. Kjo nuk ka për të ndodhur më. Hapi i parë i zgjidhjes së krizës është largimi i kryeministrit të lidhur me krimin. I mirëkuptoj ata që më thonë se po kërkon shumë pak. Sepse ky duhet të ishte në burg për ato që kanë bërë. Kjo që po kërkojmë është e panegociueshme. Është e panegociueshme, sepse nuk ka mënyrë tjetër për t’i shërbyer interesit publik. Gjithçka tjetër do ta shndërronte këtë në atë që jemi akuzuar me të padrejtë, për një Pazar”, tha Basha.

Kryeministri Edi Rama është duke mbajtur një konferencë me gazetarë, për të diskutuar situatën në vend pas protestë së opozitës.

Në fjalën e tij, Rama ka komentuar sjelljen e Policisë së Shtetit si  ehe arrestimin e sekretarit Organizativ të PD, Sahit Dollapi.

“Në sjelljen e Policisë së Shtetit ndaj protestave krahasim me të shkuarën nuk vlen për të thënë shikoni se sa mirë dhe se sa me dinjitet sillen dhe punon sot policia e shtetit. E shkuara na ka rezervuar kujtime shumë të rënda, që nuk kanë asnjë lidhje me asnjë standard të funksionimit të një policie shteti në një vend demokratik. Sot për shkak të histerisë me të cilën organizatorë, por dhe disa media e trajtuan incidentin me një nga organizatoret kryesorë të dhunës me detyron të kujtojë se kjo polici përpara pak kohësh në 2011 nuk u qëllua me asnjë guriçkë, e jo më me bomba e me zjarr dhe nga kjo godinë u urdhërua vrasja e 4 protestuesve të pafajshëm. U urdhërua shkrehja e karikatorëve të kallashnikovëve ndaj protestuesve, u turr e gjithë trupa e FNSH dhe arrit të futej deri tek kullat përballë.  Do të kishte qenë perfeksion i gjithë qëndrimi i policisë, nëse ato dy tre sekonda dy punonjës policie nuk do të kishin goditur me shkop gome dikë që iku policisë me vrap. Dikush që i ikën policisë me vrap ka një arsye. Në vende me demokraci shumë të konsoliduar se e jona do e kishte pësuar shumë më keq. Mos harroni që të veprosh në ato kushte, të jesh në flakë e në presion shtazarak. Mirëkuptoj ata punonjës policie”, u shpreh kryeministri Rama.

TIRANË

Eksperti i çështjeve zgjedhore në Partinë Demokratike, Çlirim Gjata ka shkuar në ambientet e spitalit të Traumës, ku ka vizituar sekretarin organizativ të selisë blu,  Sahit Dollapi, i cili u dhunua dje nga Policia në protestën e opozitës.

Sipas Çlirim Gjatës, sekretari Dollapi vijon të qëndrojë i shtrirë dhe  nuk lëviz dot për shkak të lëndimeve që mori dje në pjesën e gjurit dhe të shpatullës.

Ai tha se Sahit Dollapi tentoi t’i ikte policisë pasi kishte dëgjuar urdhrin të dhënë për FNSH-në: “Kapeni  dhe mbyteni”.

“Dollapi ka dëmtim të gjurit dhe shpatullës. Qëndron i shtrirë se nuk lëviz dot. Ka kohë që vuan si nga gjuri dhe nga këmba që do ta operojë. Policia ushtroi dje terror ndaj qytetarëve. Ka mbytur me gaz qytetarët pa shkak. Sahit Dollapi ishte personi ky që ndaloi turmën të mos përplasej me policinë duke ndalur dhunën ndaj uniformave blu. Dollapi vrapoi sepse dëgjoi urdhrin kapeni mbyteni që u bëhej policëve të FNSH nga drejtuesit e tyre. Reagimi i policisë pasi zoti Dollapi hoqi kundra gazin dhe e njohën. Gjata tha se protesta vazhdon, u kemi dalë borxhit Ramës që njerëzit nuk mund të menaxhohen pasi janë të irrituar nga kjo qeveri”-tha ai, raporton gazetari Erjon Skëndaj.

Përkrahësit e opozitës kanë nisur protestën e paralajmëruar sot para Drejtorisë së Policisë së Tiranës.

Ata kanë kërkuar lirimin e protestuesve të arrestuar një ditë më parë nga policia.

Ish-deputeti i PD-së, Ervin Salianji ka deklaruar sot se protestat e opozitës janë demokratike dhe ato nuk kanë qenë në proporcion me dhunë që ushtroi policia një ditë më parë.

Salianji tha në një prononcim për mediat se protestat do të vijnë duke u radikalizuar.

“Të gjithë protestat tona janë demokratike, dhe e djeshme ishte protestë demokratike dhe jo në proporcion me dhunën e ushtruar nga policia. 
Por protestat do të vijnë duke u radikaluzuar sepse nuk mund të lejojmë instalimin e një diktature në vitin 2019”, ka thënë Salianji

Pas deklaratës së OSBE-së në Tiranë se drejtuesit e protestës do të mbanin përgjegjësi penale për dhunën gjatë protestës së sotme të opozitës, disa të rinj protestues i kanë shkuar në pallatin ku jeton Bernd Borchardt dhe i kanë shkruar në hyrje “Borchard të të vijë turp” në gjuhën angleze.

” Organizatorët e protestës së mbrëmjes të sotme duhet të mbajnë përgjegjësinë politike për dhunën kriminale të ushtruar nga disa prej ndjekësit e tyre. Mendimet tona shkojnë me familjet e të plagosurve. OSBE-ja do të vijojë të nxisë opozitarizmin efikas dhe dialogun në Shqipëri. Por ne i dënojmë plotësisht ata që përpiqen të përdorin dhunën si një rrugë të shkurtër politike; ata do të dështojnë.”, thuhej në deklaratën e OSBE-së e cila më vonë nxori dhe një deklaratë tjetër ku dënonte edhe dhunën e policisë.

” Prezenca e OSBE-së e ka ndjekur protestën e sotme minutë pas minute. Ne përsërisim qëndrimin tonë të palëkundur që dhuna nuk është përgjigja. Gjithashtu, reagimi i rëndë ndaj dhunës nuk ndihmon”, thuhej në njoftimin e dytë.

Ish-kryeministri Sali Berisha deklaron Sara Jurik nga Norvegjia ndodhet në gjendje të rëndë në spital pas lëndëve toksike të hedhura nga policia. “E reja norvegjeze, sekretarja e pergjithshme e EDS, Sara Jurik ne gjendje te rende ne spital nga helmimi me lendet toksike te hedhura kunder protestuesve paqesore nga Edvin Kristaq Krimi dhe Vasal Kimiku! Krim”, shkruan Berisha.

Protesta pa ndërprerje. Kështu kanë vendosur mbrëmjen e djeshme strukturat e PD-së dhe LSI-së.

Protesta e radhës kombëtare do të mbahet të hënën në orën 18:30. Por ndërkohë ditën e sotme pritet një tjetër aksion nga opozita.

“Nesër në orën 11:30 do protestojmë përpara Drejtorisë së Policisë së Tiranës. Mos mungoni të hënën, t’i japim një grusht klikës që na ka pushtuar”, u shpreh Basha pas mbledhjes së kryesisë.

Të gjitha degët e PD-së së Tiranës do të marshojnë drejt Policisë së Tiranës në shenjë proteste kundër arrestimit të sekretarit organizativ të PD-së, Sahit Dollapi.

Opozita zhvilloi ditën e djeshme një protestë për më shumë se 5 orë, të organizuar në tre pika, Kryeministria, Parlamenti dhe Drejtoria e Policisë së Tiranës.

Kryetari demokrat Lulzim Basha thirri pak pas mesnatës të së shtunës, një mbledhje urgjente të strukturave drejtuese të Partisë së tij, dhe partive të tjera aleate, pas afro 5 orësh të gjata që u shoqëruan me tensione, akte dhune e përplasje me policinë, fillimisht para godinës së qeverisë, më pas para parlamentit dhe në fund para Drejtorisë së Policisë së Tiranës. Në përfundim të mbledhjes ai njoftoi vendimin për të thirrur një tjetër protestë të hënën pasdite “në përgjigje të vendosur të dhunës shtazarake të regjimit kriminal të Edi Ramës dhe të palëkundur në qendrimin tonë për të larguar qeverinë e krimit”.

Kryetari demokrat Lulzim Basha njoftoi gjithashtu se të dielën do të protestohet para Drejtorisë së Policisë për të kërkuar “lirimin e qytetarëve të arrestuar, të dhunuar barbarisht nga kriminelët me uniformë”.

Mësohet se janë me dhjetra pjesmarrësit në protestë të cilët janë shoqëruar nga policia, për aktet e dhunës, pre e të cilave ranë dhe disa operatorë e gazetarë. Ndërkohë që sipas ministrisë së Brendshme, janë të paktën 13 punonjës policie të cilët janë lënduar.

Përplasjet te Drejtoria e Policisë

Tensioni mes protestuesve dhe forcave të Rendit shënoi një tjetër pikë kulmore para Drejtorisë së Policisë, drejt së cilës krerët e opozitës u nisën rreth orës 22.20 minuta. Pak më parë atje ishte dërguar Sekretari organizativ i Partisë Demokratike Sait Dollapi, i ndaluar nga policia para selisë së parlamentit. Zoti Dollapi ndodhej aty me një kundërgaz në dorë, ku pati një shkëmbim verbal me një punjoës të policisë i cili dukej se e urdhëronte të largohej, dhe më pas i ka kërkuar kolegëve të tij që ta ndalonin. Në këtë moment zoti Dollapaj është përpjekur të largohet me vrap. Ai është rrëzuar ndërsa po largohej. Rreth tij, u mblodhën disa prej efektivëve të Ndërhyrjes së Shpejtë, të cilët e kanë goditur me shkopinj gome. Nga selia e Partisë Demokratike, kryetari Lulzim Basha u shpreh se zoti Dollapaj “është dhunuar në mënyrë barbare” dhe kërkoi lirimin e tij të menjëhershëm.

Mbërritja e mbështetësve të opozitës para Drejtorisë së Policisë, është shoqëruar sërish me tensione. Hedhja e tymuesve, apo dhe gurëve nga manifestuesit është pasuar edhe këtu nga kundërpërgjigjia me gaz lotsjellës nga ana e policisë. Disa kazanëve të mbeturinave ju vu flaka, ndërsa njësitë e Ndërhyrjes së Shpejtë ndërhynë dhe me pompat e ujit, duke mbajtur larg manifestuesit.

Për gjendjen e krijuar reagoi dhe Presidenti Ilir Meta, sipas të cilit “situata para Drejtorisë së Policisë është absurde. Sahit Dollapi duhet të shoqërohet për në spital për të marrë ndihmën e parë për lëndimet dhe jo të mbahet në polici”.

Më herët, kryeministri Edi Rama në Twitter kishte shprehur “respekt për trupat e Policisë së Shtetit që me profesionalizmin e tyre nderuan uniformën e shtetit përballë një turme të udhëhequr nga dëshpërimi i politikës qorre. Shërim të shpejtë për policët e plagosur dhe ndëshkim për dhunuesit e tyre e për zjarrvënësit e institucioneve”, përfundon postimi i zotit Rama.

Prania e OSBE-së në Tiranë e cila më herët kishte dënuar aktet e dhunës, doli me një reagim të dytë pas zhvillimeve para Drejtorisë së Policisë, ku po mbahej zoti Dollapi. “Ne përsërisim qëndrimin tonë të palëkundur që dhuna nuk është përgjigja. Gjithashtu, reagimi i rëndë ndaj dhunës nuk ndihmon”.

Zoti Dollapi, afër mesnatës u dërgua për të marrë ndihmë mjekësore në spital, i shoqëruar nga punonjës të Policisë.

Përplasjet para Parlamentit

Tensioni erdhi në rritje gjatë protestës së opozitës, e cila nga bulevardi ku nisi përpara sheshit të godinës së Qeverisë, u transferua rreth orës 21.00 përpara godinës së Parlamentit. Sapo kanë mbërritur aty, nga mbështetësit e opozitës, një shi bombash Molotov u lëshua drejt hyrjes qëndrore, e cila u mbulua nga flakët. Policia ndërhyri me pompat e ujit për të shuar zjarrin, dhe më pas me gaz lotsjellës për të shpërndarë protestuesit.

Për afro 45 minuta protestuesit afroheshin duke lëshuar bomba Molotov, ndërsa policia përgjigje me hedhjen e ujit dhe gazin lotsjellës. Njësitë e Ndërhyrjes së Shpejtë më pas avancuan të shoqëruara dhe nga automjetet ujëhedhëse, duke pastruar të gjithë zonën përqark.

Sipas Ministrisë së Brendshme, janë të paktën 13 punonjës të policisë të cilët kanë mbetur të plagsur dhe janë dërguar në spital.

Për gjendjen e krijuar reagoi ambasada amerikane duke dënuar “dhunën e pranishme gjatë protestës së sotme. Objektivi i deklaruar i opozitës për ta bërë demokracinë e Shqipërisë më të fortë shkon kundër dhunës që është duke u ushtruar nga protestuesit. Dhuna është thelbësisht jodemokratike dhe duhet të ndalojë. Drejtuesit e protestës kanë përgjegjësinë të nxisin qetësi. Iu bëjmë thirrje të gjitha palëve që të tregojnë vetëpërmbajtje”.

Më pas pati dhe një reagim nga OSBE-ja: “Organizatorët e protestës së mbrëmjes të sotme duhet të mbajnë përgjegjësinë politike për dhunën kriminale të ushtruar nga disa prej ndjekësit e tyre. Mendimet tona shkojnë me familjet e të plagosurve. OSBE-ja do të vijojë të nxisë opozitarizmin efikas dhe dialogun në Shqipëri. Por ne i dënojmë plotësisht ata që përpiqen të përdorin dhunën si një rrugë të shkurtër politike; ata do të dështojnë

Përplasjet para Kryeministrisë

Në fakt, protesta e mbrëmjes të së shtunës, e 12-ta në radhë që nga 16 Shkurti kur Partia Demokratike, Lëvizja socialiste për Integrim dhe aleatët e së djathtës u larguan nga parlamenti duke hequr dorë nga mandatet e deputetëve të tyre, nisi me tensione që në hapje të saj. Tymuese dhe qeska me bojë nisën të hidheshin drejt dritareve te ndërtesës që në momentet e para. Ato u pasuan nga shishe të shumta Molotov, jo vetëm drejt portës qendrore të Kryeministrisë por dhe drejt godinës përballë të Parlamentit. ​Mësohet se afër 1500 forca të policisë janë angazhuar për manifestimin e sotëm. E gjithë zona rreth godinës së Kryeministrisë është e rrethuar me një gardh metalik sikurse dhe rrugët anësore që të çojnë drejt saj. ​

Një grup manifestuesish arritën të çajnë gardhin e policisë përballë hyrjes kryesore, ndërkohë që dret saj nuk rreshtnin hedhjet e shisheve Molotov. Policia ju drejtua me thirje të njëpasnjëshme që të largohen dhe më pas përdori gazin lotsjellës. Zoti Basha i cili në ato momento po mbante fjalën e tij, e ndërpreu atë për disa minuta derisa situata u qetësua përkohësisht.

Për një kohë të gjatë, tymueset dhe shishet Molotov vijuan të hidheshin drejt godinës së qeverisë. E njejta panoramë u përsërit më pas dhe në zonën pas saj, ku sërish policia ndërhyri me gazlotsjellës.

Gjendja u qetësua më pas. Përmes një videoprojektori, opozita mbuloi fasadën e Kryeministrisë me ato që janë parrullat e saj kryesore, “Rama ik”, Qeveri e Krimit” e të tjera slogane kundër ekzekutivit të drejtuar nga Edi Rama, deri kur protestuesit u ftuan nga drejtuesit e opozitës që t’I drejtoheshin selisë së Parlamentit.

Ministri i Brendshëm Sandër Lleshaj reagoi përmes një statusi në Tëitter, pak pasi tensioni në shesh erdhu duke u rritur. “Me Molotov nuk ndërtohet demokracia, por synohet të shkatërrohet Shqipëria. Por kjo gjë është e pamundur! Ftoj qytetarët e përgjegjshëm të distancohen nga sulmi ndaj institucioneve. Askush nuk mund ta djegë Shqipërinë përsëri!”, shkruan zoti Lleshaj.

​Për situatën e krijuar ndërhyri dhe presidenti Ilir Meta. “Jam duke ndjekur me shumë shqetësim protestën e opozitës dhe u kërkoj të gjithëve të ruajnë qetësinë, të evitojnë aktet e dhunës dhe konfrontimet, që mund të shkaktojnë lëndime në njerëz dhe dëme ndaj institucioneve”, shkruan kreu i Shtetit.

Ndërsa kryeministri Edi Rama reagoi më vonë në Twitter. “Çfarë trishtimi një lider opozite që me zë të ikur i thotë qeverisë “Aman ik!”,ndërkohë që ata rrotull tij hedhin zjarr mbi godinën e saj! Uroj që kujt vete ende pas kësaj politike qorre, t’i jetë hapur sonte syri nga zjarri që qeverisë s’ka ç’i bën,po Shqipërisë i bën veç dëm!”, shruajti kryeministri.

Opozita kërkon dorëheqjen e tij dhe krijimin e një qeverie kalimtare që të garantojë organizimin e zgjedhjeve të lira e të ndershme. Ajo ka vendosur të bojkotojë dhe zgjedhjet vendore të 30 Qershorit, duke kërcënuar se nuk do të lejojë mbajtjen e tyre. Edhe sonte gjatë fjalimit të tij zoti Basha theksoi se “nuk do të ketë zgjedhje me krimin, dhe me Edi Ramën. Zgjedhje më 30 Qershor nuk do të ketë”, theksoi zoti Basha duke shtuar se bëhet fjalë për “një betejë për jetë a vdekje”.

Nga ana e saj shumica ka përsëritur se “zgjedhjet vendore do të zhvillohen në datën e caktuar dhe më 30 Qershor qytetarët do të zgjedhin kryebashkiakët e tyre”, ripërsëriti pak ditë më parë, kryeministri Edi Rama.

Duke reaguar për atë që po ndodh para drejtorisë së policisë, Presidenti Ilir Meta e konsideron absurde, duke kërkuar që Sait Dollapi të transportohet për në spital dhe jo të mbahet në këtë drejtori.

 Ora 22:50- Ashtu si te Parlamenti, edhe para drejtorisë së policisë, janë përdorur botet me ujë për të shpërndarë protestuesit e opozitës.

Atje ndodhet edhe kryetari i Partisë Demokratike, Lulzim Basha. Protestuesit u transferuar tek Drejtoria e Policisë pas arrestimit të Sait Dollapit.

 Ora 22:35 – Protestuesit kanë hedhur fishekzjarrë dhe kapsolle në drejtim të forcave të rëndit, ndërkohë që efektivët u janë përgjigjur me gaz lotsjellës. Militantet e opozitës u drejtuan në Drejtorinë e Policisë së Tiranës, pas shoqërimit dhe dhunës që Policia ushtroi ndaj Sait Dollapit, Sekretarit Organizativ të PD-së.

Ora 21:45 – Forcat e Ndërhyrjes së Shpejtë të Policisë shoqëruar me autobote uji, kanë ndërhyrë për të larguar protestuesit zona përpara ndërtesës së Parlamentit.

Forcat e Ndërhyrjes së Shpejtë kanë dalë deri në pedonale, duke larguar me forcë protestuesit. Këta të fundit, vazhdojnë të hedhin bomba molotov. Policia ka marrë nën kontroll të gjithë segmentin e rrugës “Xhorxh Bush” përpara Parlamentit.

Ora 21:17 – Bomba molotov nga ana e protestuesve dhe gaz lotsjellës nga ana e policisë. Kjo është ajo që po ndodh përpara ndërtesës së Parlamentit të Shqipërisë.

Krahas kësaj, protestuesit po hedhin edhe fishekzjarrë duke shkaktuar zhurma të forta.

Pjesa më e madhe e protestuesve janë zhvendosur nga Bulevardi Dëshmorët e Kombit. Përpara ndërtesës së Parlamentit ndodhet kreu i PD-së, Lulzim Basha, kryetarja e LSI-së, Monika Kryemadhi dhe ish-kryeministri Sali Berisha.

Ora 20:59 -Pas rreth dy orë e gjysmë, protestuesit e opozitës janë larguar nga ndërtesa e Kryeministrisë. Ata po marshojnë drejt Parlamentit.

Ora 20:05- Kur kanë kaluar rreth 1 e 30 minuta nga nisja e protestës së katërt të opozitës, protestuesit e opozitës po zhvendosen në pjesën e pasme të Kryeministrisë në afërsi të ndërtesës së TVSH-së.

Protestuesit po rrëzojnë kangjellat mbrojtëse të vendosura në pjesën e pasme të Kryeministrisë.

Ora 19:50 Protestuesit e opozitës kanë hedhur sërish bomba moltov në drejtim të Kryeministrisë.

Në një kohë që Lulzim Basha vazhdon fjalimin, dera e Kryeministrisë është përfshirë në flakë, ndërkohë që efektivët e policisë dhe zjarrefikëset kanë hedhur ujë për të ndaluar flakët.

Efektivët e policisë janë pajisur me maska anti-gaz.

19:35 – Situata përpara ndërtesës së Kryeministrisë është e tensionuar. Teksa janë hedhur shumë bomba molotov tek dera e ndërtesës së qeverisë, disa protestues janë përplasur me forcat e rendit.

Në të njëjtën kohë, po mbante fjalim edhe Lulzim Basha, i cili u kërkoi protestuesve që të mos sulmojnë punonjësit e policisë.

Basha: Asnjë prej nesh këtu nuk ka ardhur të lëndojë e të prekë asnjë prej vëllezërve dhe motrave tona me uniformë. Qëllimi ynë këtu është të dërgojmë një mesazh të prerë dhe final kryehajdutit, kryebanditit në krye të qeverisë s ëpaligjshme, Edi Ramës dhe skotës së tij të hajdutëve. Dhe mesazhi ynë për të është “Rama ik”.
Ndaj le të vazhdojmë miqtë e mi qëndresën tonë, misionin tonë, protestën tonë, sepse misionin tonë nuk ka forcë që ta ndalë.këtë betejë ne nuk e bëjmë për pushtet, këtë betejë ne nuk e bëjmë për parti, këtë betejë ne nuk e bëjmë për karrige, këtë betejë nuk e bëjmë për mandate. Mandatet tona ishin të vetmet mandate të pastra nga krimi dhe paratë e drogës, por ne ua kthyem qytetarëve

Ora 19:15 – Tensionohet situata para Kryeministrisë. Protestuesit janë përleshur me forcat e rendit.

Ata kanë arritur të çajnë kordonin policor, ndërkohë që ndaj godinës së kryeministrisë janë hedhur lëndë plasëse molotov.

Lëndë djegëse molotov është hedhur dhe në drejtim të godinës së Parlamentit.

Ora 19:03 – Pas gati rreth 30 minuta nga nisja e protestës, disa protestues kanë hedhur bojë në drejtim të mureve të ndërtesës së Kryeministrisë.

Ndërkohë, kreu i PD-së, Lulzim Basha është nisur nga selia e partisë për t’iu bashkuar protestuesve.

Basha është i shoqëruar edhe nga qindra studentë demokratë nga vendet e BE-së.

Nga ana tjetër, edhe kryetarja e LSI-së, Monika Kryemadhi ka dalë nga godina e partisë së drejtuar prej saj për t’u bashkuar në sheshin Dëshmorët e Kombit.

Ora 18:45 –Protestës së opozitës u janë bashkuar edhe aktorët dhe shoqëria civile pjesë e “Aleancës për Teatrin”.

Ora 18:32- Protestuesit e opozitës janë grumbulluar në orën 18: 30 minuta në selinë e Partisë Demokratike, ku Lulzim Basha ka dal personalisht nga zyra për të takuar ish-deputetin, Klevis Balliu dhe banorët e “Astirit”.

Ndërkohë që turma ka filluar të mblidhet në Bulevardin Dëshmorët e Kombit.

Me flamur kombëtar dhe të Partisë Demokratike, protestuesit po mblidhen në Bulevardin Dëshmorët e Kombit.

Me thirrje “Rama Ik”, “E duam Shqipërinë si gjithë Evropa” apo “Shqiptarët e bashkuar kanë për të fituar”, protestuesit e opozitës po zhvillojnë sot protestën e 4 kombëtare.

Shumë prej protestuesve janë të pajisur me kundra gaz.

Sekretari organizativ i Partisë Demokratike, Sait Dollapi, është dhunuar nga forcat e Ndërhyrjes së Shpejtë përpara ndërtesës së Parlamentit.

Kamerat kanë kapur momentin kur Dollapi rrëzohet në tokë ndërsa goditet me shkopinj gome nga forcat e policisë, të cilët e kanë shoqëruar më pas drejt makinës.

TIRANË

Një tjetër skenografi e opozitës në bulevard. Qytetarët e mbledhur në protestën e thirru nga opozita kanë ndezur të gjithë telefonat e tyre celularë duke i ngritur lartë si pjesë e protestës së tyre kundër qeverisë dhe kryeministrit Edi Rama. Protestuesit kanë nisur marshimin rreth Kryeministrisë.

TIRANE

Ndërsa situata u tensionua kryedemokrati Basha apeloi protestuesit të mos qëllojnë në drejtim të forcave të policisë. Basha tha se beteja është me atë që e konsideron qeveri të krimit dhe jo me punonjësit e policisë

“Mos sulmoni policinë beteja jonë është e lidhur me krimin, me qeverinë e krimit, beteja jonë nuk do të përfundojë. Asnjë s’ka ardhur të lëndojë apo të prekë vëllezërit e motrat me uniformë, qëllimi për një mesazh të prerë e final kryebandit Edi Ramës, dhe mesazhi për të është : Rama ik. Le të vazhdojmë qëndresën tonë protestën tonë, misionin tonë s ka forcë që e ndal.

Këtë betejë nuk e bëjmë për pushtet, për parti për karrige, nuk e bëjmë për mandate, mandatet tona ishin të pastra nga krimi e droga por ne ia kthyem qytetarëve sepse nuk do të ketë më parlament fasade e zgjedhje false.  Nuk ka gaz lotsjellës e brutalitet policor ta ndalë e ta shpërndajë vullnetin tonë sot. Bashkohuni miqtë e mi, vëllezër e motra. Protesta vazhdon e do të vazhdojë.

Beteja do të vazhdojë deri në fitore. E duam Shqipërinë si e gjithë Evropa. Asgjë më kriminale nuk ka se pasi të vjedhësh taksat e popullit ti përdorësh ato për të helmuar protestuesit. Prandaj si garancia e vetme për kushtetutë dhe ligj, me një kërkesë, me një mision, me një qëllim, “E duam Shqipërinë sie  gjithë Evropa”.” U shpreh kryedemokrati Basha.

Ish-oficeri i Antidrogës në Fier Antonio Nazeraj ka fituar ditën e sotme azil në shtetin e Holandës. Ai ka qenë për tetë vite oficer antidroge në qytetin e Fierit , ndërsa sot ai dhe familja e tij kanë marrë mbrojtje nga drejtësia holandeze.

Nazeraj së bashku me Dritan Zaganin kanë qenë pjesë të njësisë Antidrogë të Policisë Fier.  Gjithashtu efektivi Nazeraj dha dorëheqjen nga policia në vitin 2017.

Në një intervistë të dhënë për mediat holandeze, Nazeraj kishte shprehur qartësisht frikën e kthimit në Shqipëri. Ai  pohoi në gusht të 2018 se kishte frikë nga ekstradimi për në Shqipëri.

“Unë nuk e shoh Shqipërinë si një vend të sigurt për veten time, kam frikë nga grupet kriminale që unë kam hetuar më parë, të cilët kanë marrë kontrollin e trafikut të drogës dhe po marrin mbështetje të fortë politike”, u shpreh Nazeraj.

Më tej ai theksoi se kur të kthehej (në rast ekstradimi)  në Shqipëri do të jetë i vdekur, për shkak se ai kishte hetuar shumë grupe kriminale, të cilat siç deklaronte ai në gusht, kishin mbështetje edhe nga ana e politikës. “Kur të kthehem (në Shqipëri), jam 100 për qind i vdekur”-ka theksuar ai për median holandeze në gusht të 2018.

Major Klodian Tanushi, humbi jetën gjatë ditës së sotme në Letoni, katër ditë pas ngjarjes së rëndë pas shpërthimit të lëndë shpërthyese.

Atë ditë, gjeti vdekjen edhe ushtarakja tjetër shqiptare, Zarife Hasanaj, e cila u përcoll sot për në banesën e fundit me nderime shtetërore si Dëshmore e Atdheut.

Kush është Klodian Tanushi?

Major Tanushi ka lindur në Dibër më 31 tetor 1980. Është i martuar dhe babai i tre fëmijëve.

Në vitin 1999 ka përfunduar shkollën e mesme profesionale “Nazmi Rushiti” në profilin Motorist Xhenerik. Nga viti 2000 deri në vitin 2003 ka ndjekur studimet në Akademinë Ushtarake.

Ka kryer kurse funksional EOD Niveli I-rë “Për asgjësimin e municioneve me eksploziv”.

Ka marrë pjesë ne kursin “EUFOR Mine Avvareness Instructor Course”.

Pas përfundimit të Akademisë është titulluar oficer dhe me urdhër nr.9628 datë 18.09.2003 ka marrë gradën e Nëntogerit. Në vitin 2006 ka marrë gradën e Togerit, në vitin 2010 ka marrë gradën e Kapitenit dhe në vitin 2017 ka marrë gradën e Majorit.

Gjatë karrierës së tij ushtarake ka kryer detyra si: Komandant Toge, Komandant Kompanie, Shef Seksioni, Specialist Operacionesh. Aktualisht me detyrë Komandant i Togës së pare të EOD.

Në 20.12.2018 është dërguar me mision në Operacionin Ushtarak të NATO-s në Riga, Letoni në përbërje të Grup-batalionit kanadez me detyrë Komandant i Kontigjentit shqiptar dhe përfaqësues i lartë ushtarak, me afat qëndrimi 6-mujor.

Gjatë karrierës së tij është vlerësuar me Medaljen e “Karrierës” nga Komandanti i Forces, Medaljen e “Shërbimit” nga Shefi i Shtabit të Përgjithshëm, Medalje shërbimi në Mision jashtë vendi si dhe Medaljen “Për pjesëmarrje në shërbime ndërkombëtare” nga Ministri i Mbrojtjes.

Ish-ministri i Jashtëm Besnik Mustafaj thotë se ideja për korrigjimin e kufijve vjen nga Serbia dhe nuk është propozim i Hashim Thaçit.

Sipas tij, korrigjimi i kufijve nuk është ashtu siç e paraqet presidenti kosovar, që Kosova do të marrë territor e nuk do të japë.

Ai thotë se ndryshimi i kufijve ka qenë gjithmonë tezë e Beogradit, të cilët kanë pretenduar të marrin veriun e Kosovës.

Mustafaj thotë se ideja e korrigjimit të kufijve i është paraqitur secilit politikan, mirëpo atë e kanë marrë parasysh vetëm presidenti i Kosovës, Hashim Thaçi dhe kryeministri i Shqipërisë, Edi Rama.

“Unë besoj që çdo njeri, që ka qenë ministër i Jashtëm, ia kanë paraqitur këtë gjë, mirëpo askush nuk e ka përfillur. Ata kanë gjetur presidentin Hashim Thaçi për t’ia paraqitur këtë ide, dhe Rama është i dyti, i cili e ka marrë parasysh”, tha Mustafaj në KTV në Kosovë.

Ai thotë se Edi Rama nuk e njeh fare historinë shqiptare dhe nuk ka ndjeshmëri dhe nuk e kupton interesin dhe territorin e kombit.

“Rama është kollaj të manipulohet”, thotë ai.

Mustafaj kritikoi gjatë intervistës bashkëpunimin mes Kosovës dhe Shqipërisë në fushën e kulturës dhe artit. Ai tha se dy qeveritë shqiptare kanë bërë shumë pak që të arrihet ky bashkëpunim.