Pikërisht në këtë sallë ditën e nesërme 44 akademikë pritet t’i drejtohen kutisë së votimit për të zgjedhur kryesinë dhe këshillin ekzekutiv të Akademisë së Shkencave.

Procesi i votimit do të jetë i fshehtë, ndërkohë që për ata akademike të cilët nuk do jenë prezent mund të votojnë nëpërmjet postës.

Mendohet se procesin zgjedhor do ta udhëheqi akademiku më i vjetër.

I vetmi kandidat për pozicionin e kryetarit të Akademisë së Shkencave, është Akademiku Skënder Gjinushi. Reagimet nuk kanë munguar dhe një prej tyre është edhe akademiku Artan Fuga, i cili thotë se këto zgjedhje janë të paligjshme.

“Këto zgjedhje janë të paligjshme, pasi nuk janë në përputhje me ligjin dhe me statutin e akademisë. Pra kjo mase që është marrë me urgjence është një përpjekje për të uzurpuar akademinë, është në përpjekje për të marre pushtetin ne akademi dhe nuk ka lidhje fare me reformimin e saj, është një anti reformë dhe unë mendoj se këto zgjedhje do ta fusin akademinë në një krizë edhe më të madhe”, tha Artan Fuga per Top Channel.

Si kandidat i vetëm për postin e kryetarit të Akademisë së Shkencave, Akademiku Gjinushi shprehet se këtë herë është duke u votuar për alternativë.

“Pavarësisht që kjo po ndodh edhe në politikë, por sidomos në institucione të ngushta, këtë radhe po votohet për alternativë. Pra nuk është pa kandidaturë, nuk është pa garë, ka një vit e ca që bëhet garë mes një alternative ligjore, të mbështetur nga komuniteti, të mbështetur nga asambleja, të mbështetur nga Europa dhe një alternativë e cila synon de fakto politizimin e akademisë së shkencave”, tha Skënder Gjinushi.

Edhe per tre pozicionet e tjera të kryesisë së Akademisë së Shkencave, ashtu si në rastin e kryetarit, ka nga një kandidat në garë.

Dy ditë para protestës së opozitës, në godinat qeveritare kanë nisur masat paraprake për sigurimin e perimetrit rrethues.

Tek Kryeministria dhe Parlamenti janë vënë gardhet metalike dhe shtyllat janë lyer me graso, masa këto që janë marrë që orët e para të mëngjesit të së enjtes.

Në vijim pritet të sigurohet dhe dera e Kryeministrisë me fletë metalike, për të parandaluar hyrjen e protestueve brenda godinës. Në planin e masave janë angazhuar rreth 1500 efektiva policie.

Dy ditë para datës së lajmëruar, policia ka nisur marrjen e masave për protestën e opozitës më 25 maj.

Paraditen e të enjtes rreth godinës së qeverisë është vendosur gardhi metalik, ndërsa në bulevard janë lyer me graso të gjitha shtyllat ku janë të vendosur kamerat e sigurisë, por dhe altoparlantët që përdoren nga policia për thirrjet ndaj protestuesve.

Pas vendosjes së gardhit metalik, në trotuarin para Kryeministrisë është kufizuar dhe kalimi i këmbësorëve, vëren “Ora”.

Puna e Policisë dhe Gardës ka nisur që orët e para të mëngjesit për shkak edhe të seancës plenare, konkretisht me vendosjen e telit me gjemba përreth gjithë gardhit rrethues të godinës dhe të një tjetër gardhi metalik në rrugën pedonale.

Përreth Parlamentit janë vendosur dhe punonjës policie për të ruajtur rendin, sigurinë dhe mbarëvajtjen e seancës.

Pas masave të marra në terren, në orët në vijim pritet të hartohet dhe plani nga drejtuesit e Policisë dhe Ministrisë për ruajtjen e godinave shtetërore përfshi Kryeministrinë, Parlamentin, dy Drejtoritë e Policisë dhe Komisionin Qëndror të Zgjedhjeve.

Këto masa merren paraprakisht pasi gjatë protestave të fundit ka pasur një marshim të tubuesve nga Kryeministria, në drejtim të Parlamentit dhe Policisë së Shtetit dhe Drejtorisë së Tiranës.

Gjatë tubimeve të opozitës në kryeqytet janë angazhuar 1300 deri në 1500 efektiva policie.

Agron Tufa, drejtor i Institutit të Studimit të Krimeve dhe Pasojave të Komunizmit gjatë paraqitjes së raportit vjetor në Parlament ka kritikuar krerët e institucionet shqiptare se nuk kanë marrë masa për të larguar ish-oficerët e Sigurimit të Shtetit nga postet drejtuese.

Sipas Tufës, ish-oficerëve të Sigurimit po u krijohet mbrojtje dhe po u lejohet të mbajnë postet drejtuese në administratën shtetërore.

Sipas drejtorit të Institutit të Studimeve të Krimeve të Komunizmit, institucionet shtetërore nuk denjojnë të kthejnë përgjigje për ish-oficerët e Sigurimit të Shtetit, qoftë dhe për përputhshmërinë e diplomave që mbajnë postet drejtuese.

Për Agron Tugën për këto ish-oficerë kërkoi të ndiqet shembulli i Gjermanisë.

“Mënjanimi i ish-oficerëve të Sigurimit të shtetit të cilët janë në institucionet shumë të rëndësishme që financohet nga buxheti i shtetit, kanë arritur një nivel tejet të lartë, absurd dhe të papranueshëm për një shoqëri demokratike.

Me përjashtim të fare pak institucioneve në varësi të Kuvendit apo Kryeministrit, pjesa dërrmuese e institucioneve të varura dhe të pavarura të shtetit, as denjojnë t’i binden ligjit për informimin, duke shkelur kështu çdo të drejtë Kushtetuese mbi informimin.

Ne jemi të bindur se krerët e këtyre institucioneve i mbrojnë haptazi, e madje me arrogancë ish oficerët e sigurimit në poste drejtuese, kjo është e amoralshme sepse ky kontingjent nuk e ka vendin në institucionet e shtetit tonë demokratik, qoftë edhe për pa përputhshmëri diplome.

Në mënyrë të ngjashme ka vepruar Gjermania e cila e ka bërë fakt këtë edhe pa ligj lustracioni, duke mos i njohur diplomat e kësaj kategoria dhe praninë e tyre në administratë”, tha Agron Tufa në Parlament.

Një ditë pas letrës publike të dërguar nga Edi Rama drejtuar kreut të PD, ku i kërkon dialog pa kushte, ky i fundit sot ka lajmëruar se në orën 10:30 do të ketë një takim me aleatët në selinë blu.

Lulzim Basha dhe aleatët, sipas informacioneve të para, thuhet se do të diskutojnë për aksionin e mëtejshëm opozitar.

Ditën e djeshme Basha i është përgjigjur letrës së Ramës, duke u shprehur se nuk ka negociata me atë kryeministër.

Varfëria dhe më pas liria për të lëvizur e kanë nxitur një pjesë të popullsisë së Ballkanit të emigrojë, por  në Shqipëri kjo tendencë është shumë më e lartë, pas viteve ’90, ndonëse vendi ynë nuk ka pasur konflikte lufte, si pjesa më e madhe e shteteve fqinjë.

Për më tepër dëshira për të ikur është ringjallur dukshëm vitet e fundit, siç tregojnë dhe kërkesat e larta për azil, ku Shqipëria në vitin 2018 ishte e para në botë për numrin e popullsisë (6.6 aplikime për 1,000 banorë, dhe e dyta pas nesh është janë gjeorgjianët, me 4.6 aplikime për 1000 banorë, të ndjekur nga sirianët, me 4.4 aplikime).

Në total nga viti 2001, rreth 214 mijë persona kanë kërkuar azil në vendet e BE-së, duke kulmuar në 2015-n, me rreth 69 mijë persona, sipas të dhënave të mëparshme të Eurostat.

Kjo mani për të ikur po reflektohet dhe në shifrat e popullsisë.

Të dhënat e fundit të Eurostat për vendet potenciale kandidate për në Bashkimin Europian tregojnë se Shqipëria ka shënuar tkurrjen më të madhe të popullsisë nga migracioni neto në krahasim me të gjitha vendet e tjera të Ballkanit, për të dy vitet që janë marrë referencë, si në 2007 ashtu dhe në 2017, teksa më shumë persona ikin, sesa kthehen .

Shqipëria, së bashku me Kosovën dhe Malin e Zi është një nga tre vendet që raporton normë negative të migracionit netor për vitin 2017, por Eurostat thekson se kjo tendencë është shumë më e lartë në Shqipëri, me një migracion netor prej −5.2 për 1 000 banorë, e ndjekur nga Kosova me rreth -3 për 1000 banorë dhe Mali i Zi me më pak se -2 (shih grafikun).

Për Turqinë norma neto e migracionit ishte pozitive (1.6 për 1.000 banorë),  ndërsa për Maqedoninë, Bosnjën dhe Serbinë, flukset migratore pothuajse nuk kanë ndryshuar.

Në kahun tjetër, Shqipëria vijon të ketë një shtesë natyrore pozitive, ndonëse minimale, me lindjetqë i kalojnë vdekjet dhe norma natyrore e ndryshimit të popullsisë ishte rreth 3 për 1,000 banorë.

Shtesa natyrore e popullsisë është veçanërisht e lartë në Kosovë dhe Turqi, ku norma natyrore e ndryshimit të popullsisë ishte 11.4 për 1 000 banorë në Kosovë dhe 10.8 për 1 000 banorë në Turqi. Në kontrast, vdekjet në Bosnjë e Hercegovinë dhe Serbi i kalojnë lindjet dhe si rrjedhojë shtesa natyrore e popullsisë ra me 2.0 për 1 000 banorë në Bosnjë dhe Hercegovinë dhe me 5.5 për 1 000 banorë në Serbi.

Të dhënat e Eurostat tregojnë se Shqipëria ka një normë bruto të lindjeve prej 10.7 për 1,000 banorë, duke u renditur e katërta pas Kosovës (16.8), Turqisë (16.1), Malit të Zi (11.9), ndërsa në fund renditet Bosnja (8.3).

Për vdekjet kryeson Serbia me 14.8 vjekje për 1,000 banorë, ndërsa Shqipëria renditet e katërta, pas Malit të Zi (10.5), Bosnjës (10.4), Maqedonisë së Veriut (9.8). Norma më e ulët e vdekjeve është në Kosovë (5.4).

Serbia ka dhe popullsinë më të plakur, me 20% të saj që është mbi 65 vjeç, por ky tregues mbetet i lartë dhe për Shqipërinë, Maqedoninë e Veriut dhe Malin e Zi me rreth 15.16%. Më e ulëta, pesha e popullsisë mbi 65 vjeç është në Kosovë dhe Turqi, me rreth 10%.

Turqia dhe Kosova kanë dhe popullsinë më të re, me 23-25% të saj që e zënë të rinjtë nën 15 vjeç, ndërsa në Shqipëri, pesha e atyre që janë nën 15 vjeç ishte rreth 185 në 2017-n. Monitor

Një oficer i Kontaktit të Shqipërisë pranë Qendrës për Forcimin e Ligjit në Evropën Juglindore ka humbur jetën sot në Rumani, si pasojë e një aksidenti automobilistik. Oficeri, Ervin Dervina 41 vjeç mësohet se ka humbur jetën së bashku me bashkëshorten e tij, një shtetase rumune.

“Sot në Rumani, si pasojë e një aksidenti automobilistik, ka humbur jetën Ervin Dervina, Oficer i Kontaktit i Shqipërisë pranë Qendrës për Forcimin e Ligjit në Evropën Juglindore (SELEC), si dhe bashkëshortja e tij, shtetase rumune.

Policia e Shtetit shpreh dhimbjen dhe solidaritetin për familjarët e 41-vjeçarit dhe bashkëshortes, për humbjen e papritur dhe të parakohshme të të afërmve të tyre, si dhe është e angazhuar maksimalisht dhe në bashkëpunim të vazhdueshëm me autoritetet rumune për zbardhjen e shkaqeve të aksidentit.”-njofton policia.

Qendra e Lëvizjes VETËVENDOSJE! në Shqipëri shënoi çeljen e veprimtarisë së saj. ishin rreth 600 persona ata që morën pjesë në takin e parë. Drejtori i Qendrës në Shqipëri, Boiken Abazi shpjegoi pse kjo shtrirje nga Prishtian në Tiranë dhe synimin e kësaj organizate.

“Sot, pas gati 30 vitesh prej ndryshimit të regjimit, e kanë kuptuar të gjithë se ky nuk është tranzicion. Ky është vetë sistemi. Ekonominë e ka lënë pa prodhim, bujqësinë pa mbrojtje nga tregtia e pandershme, mbrojtjen e vendit pa ushtri me armatim bashkëkohor, dijen e ka lënë në mëshirën e fatit, ndërsa shëndetin publik në ligjet e pamëshirshme të tregut.

Ky sistem është edhe më brutal nëse je grua, fëmijë apo i moshuar. Edhe më keq nëse je nga periferia. Produkti me rendimentin më të lartë i këtij sistemi janë të përjashtuarit. Eksporti më i madh i këtij sistemi janë vetë shqiptarët. Sigurisht që zgjidhjet nuk arrihen lehtë, por ato janë këtu mes nesh, dhe presin. Presin që ne t’i njohim e t’i marrim përsipër. Presin angazhimin tonë, përkushtimin tonë, sakrificat tona, organizimin që i nxjerr ato në dritë e që i sjell ato në jetë. Ky organizim tashmë ka nisur…” – tha Abazi.

Çeljen e Qendrës së Lëvizjes VETËVENDOSJE! në Shqipëri, e përshëndeti edhe Albin Kurti që vuri theksin te bashkimi kombëtar.

“Bashkimi ynë kombëtar dhe Bashkimi Evropian as nuk e zëvendësojnë njëra-tjetrën dhe as nuk e pengojnë njëra-tjetrën. Është gabim të përdoret bashkimi kombëtar për ta frikësuar Bashkimin Evropian. Mënyra e tillë na lë edhe pa bashkim kombëtar, edhe pa Bashkim Evropian. E neve na nevojiten të dyja, pra, edhe bashkimi kombëtar, edhe Bashkimi Evropian.

Shqiptarët janë fuqi rajonale. Ne duhet ta pranojmë këtë fakt, ashtu qysh po e pranojnë fqinjët tanë. Bashkimi i Kosovës me Shqipërinë, bashkimi kombëtar i shqiptarëve, në Ballkan, bëhen paralelisht me krijimin e aleancës ballkanike Shqipëri-Kosovë-Kroaci-Bullgari, plus Sarajeva, Podgorica dhe Shkupi zyrtar, ku shqiptarët duhet të prijnë” – tha Kurti.

Në këtë aktivitet morën pjesë edhe anëtarë kryesie, deputetë dhe aktivistë të Lëvizjes nga Kosova, ndërsa nga Shqipëria mori pjesë ministri për Diasporën, Pandeli Majko. Pjesëmarrësit përfshinë gjithashtu gazetarë e pjesëtarë të shoqërisë civile, bashkë me qindra anëtarë e simpatizantë të Lëvizjes në Shqipëri.

Kënga “Prag” e kantautorit Bashkim Rodoni dhe interpretimi i prozës migjeniane “Idhuj pa krena”, prej regjisores dhe aktores së mirënjohur, Ema Andrea, ishin urimi special për këtë datë të rëndësishme.

Krerët e institucioneve, Kryeparlamentari Veseli dhe zyrtarë tjerë të PDK’së si Hajredin Kuçi e Nait Hasani, sot u përballën me një situatë jo fort të këndshme, kur një nga ish-të mbijetuarit e masakrës së Dubravës, Shefqet Kabashi, doli para tyre dhe iu tha se nuk e meritonin të ishin të pranishëm në këtë manifestim, raporton T7.

Derisa, Shefqet Kabashi po fliste, moderatorja e programit po mundohej të mbante nën kontroll situatë. Ish-ushtari i UCK-së, iu drejtua disa të mbijetuarve të masakrës së Dubravës, duke i përmendur edhe me emra madje si Hajredin Kuçin dhe Nait Hasanin, të cilët, sipas tij, e kanë quajtur tradhtar.

“Marre duhet me ju ardhë, ju nuk duhet me qenë këtu… Cilit protokoll mua këta më thonë tradhtar qita, qiky Kuçi e qiky Njazia e qiky Naiti me shokët e vet, unë nuk jam tradhtar, unë jam luftëtar i lirisë… Na keni marrë bukën, duam shtet demokrat e jo komunist”, tha ai.

Ndërsa, drejtori i burgjeve të Kosovës, Nehat Thaçi, ishte i pari i cili tentoi ta pengojë Kabashin, madje me forcë u mundua ta largojë, duke i thënë se ka kush vendos rend këtu.

“Ka kush vendos rend këtu, nëse nuk tërhiqesh me forcë të largoj, hiqe këndej qiteni jashtë”, tha ai.

E duke u larguar nga ambientet e burgut të Dubravës, Kabashi i shoqëruar nga policët me zë të lartë thoshte se “ju na keni bërë më zi se serbët”.

“Unë ha shqip, ju na keni bë ma zi se shkijet”, tha Kabashi.

I pranishëm në këtë manifestim ku po përkujtoheshin të rënët e masakrës në burgun e Dubravës ishte edhe kryetari i Kuvendit të Kosovës, Kadri Veseli, dhe shumë të mbijetuar të kësaj masakre, të cilët kërkuan që ata që e kryen këtë krimi të dënohet pasi autorët e kësaj masakra thanë se dihen.

Në masakrën e Dubravës, nga data 19 maj e deri 24 maj 1999, u vranë mbi 160 të burgosur, ndërsa masakrës i mbijetuan mbi 300 të tjerë.

Ndryshe, Shefqet Kabashi ishte dëshmitari kryesor në procesin gjyqësor kundër kryeministrit Ramush Haradinaj, i cili nga Gjykata e Hagës ishte dënuar me dy muaj heqje lirie për “refuzim të qëllimshëm për t’iu përgjigjur pyetjeve të prokurorëve”.

Kabashi kishte refuzuar të dëshmojë kundër Haradinajt në procesin e kaluar gjyqësor, kur kryeministri i Kosovës u shpall i pafajshëm.

Ish-ministri i Drejtësisë, Eduard Halimi shkruan se që prej ditës së sotme, Shqipëria është i vetmi vend në Evropë pa Gjykate Kushtetuese dhe pa Gjykate të Lartë, duke shtuar se drejtësia në vendin tonë ka hyrë në kolaps total.

Sipas tij, janë rreth 40 mijë dosje që presin të shqyrtohen në këtë gjykatë, duke nënvizuar se deri në fund të vitit, numri i tyre do të shkojë deri në 60 mijë.

Juristi Halimi shkruan se një qytetar apo një biznes do t’i duhet të presë deri në 8 vite për të shqyrtuar dosjen në këtë gjykatë.

Reagimi i plotë:  

Nga sot Shqipëria i vetmi vend ne Evropë pa Gjykate Kushtetuese dhe pa Gjykate te Larte.

Shkarkimi nga detyra i gjyqtarit te Gjykates se Larte Edmond Islamaj (te cilin e njohin te gjithë si një gjyqtar korrekt) ka si qellim te vetëm mbylljen përfundimtare te Gjykatës së Lartë.

Nga sot Shqipëria është jo vetëm pa Gjykate Kushtetuese por dhe pa Gjykate te Larte. Nga sot nuk mund te shqyrtohet ASNJE nga 40.000 dosjet qe prisnin ne rradhe dhe drejtësia përfundimisht është futur ne kolaps total. Ate qe Komisioni i Venecias thoshte ne dhjetor 2015 po dalin çdo dite.

Dhe ne këtë pike ata qe vuajne nga mungesa e ekzistencës se një sistemi gjyqësor normal hierarkik jane padyshim qytetaret e thjeshte dhe po aq shume biznesi. Sikur Gjykata e Lartë te krijohet ne fund te vitit kur te jene me shume se 60.000 dosje, çdo qytetari dhe cdo kompanie do ti duhej te pakten 7-8 vjet pritje për t’i ardhur radha.

#sundimiiligjit#neudhekryq

Gjykata ka lënë në burg Mario Zeqirin, 36 vjeçarin e arrestuar ditën e djeshme nga policia gjatë vijimit të Operacionit “Vol-vo 4” i nisur që në dimrin e vitit të kaluar ku u goditën 4 grupe kriminale.

Mario Zeqiri ishte shpallur në kërkim si pjesë e grupit kirminal të Avdylajve në Shijak

Njoftimi i policisë mbi arrestimin e Zeqirit

Operacioni policor i koduar “Vol-Vo 4” . Ndalohet një tjetër person i shpallur në kërkim në kuadër të këtij operacioni.

Specialistët për Hetimin e Narkotikëve në Drejtorinë Vendore të Policisë Durrës, në bashkëpunim me Forcat e posaçme Operacionale në DVP Durrës, pas informacioneve të marra dhe një pune të mirë organizuar, bënë kapjen dhe ndalimin e shtetasit të shpallur në kërkim më datë 22.10.2018, në kuadër të operacionit policor të koduar “Vol-Vo 4” dhe konkretisht shtetasin:

• Mario Zeqiri 36 vjeç, banues në lagjen Kodër, Sukth, Durrës.

Mario Zeqiri ishte i shpallur në kërkim, pasi Gjykata e Shkallës së Parë për Krimet e Rënda, Tiranë, në datë 22.10.2018 ,ka vendosur ndaj tij masën e sigurimit “Arrest me burg” për veprat penale “Prodhim dhe shitja e narkotikëve”, “Trafikim i narkotikëve”, “Grup i strukturuar kriminal” si dhe “Pastrimi i produkteve të veprës penale”.

Materialet hetimore i kaluan Prokurorisë Pranë Gjykatës së Shkallës së Parë Durrës për veprime të mëtejshme.

Ish- ministri socialist i Financave, Arben Malaj, një ndër figurat e rëndësishme në PS i kërkon publikisht Ramës të tërhiqet përkohësisht dhe të japë një zgjidhje për situatën ku po kalon vendi. I ftuar në emisionin “Tempora” mbrëmjen e 21 majit në Oranews, Malaj tha se Rama duhet të mendojë për trashëgiminë e tij politike dhe të ofrojë një zgjidhje.

Arben Malaj: “Unë publikisht ia kërkoj Edi Ramës. Nuk jam nga ata prapa shpine që ta godasë. Ai duhet të mendojë për trashëgiminë e tij politike. Ai mund të mbijetojë përmes konflikteve por për atë që do të lërë pas, nesër do i vijë turp. Ai duhet të ofrojë zgjidhje. Zgjidhja, është nëse kemi ngecur dhe ekonomia përditë e më shumë po përkeqësohet dhe kërkohet një qeveri teknike dhe atij nuk i thuhet ik nga kryetar partie, ik nga deputet por i thuhet krijo një spacio për disa muaj, që vendi të fitojë një besim tjetër nga politika, sepse akuzat nga të gjitha krahët, jo vetëm PD ndaj PS por dhe PS ndaj PD, i gjithë ambienti politik ka arritur në një pikë që kredibiliteti publik i njerëzve tek politika është minimale. Të tërhiqet përkohësisht.

Më tej i kujton zgjedhjet e 2005 kur PS u tërhoq për të mirën e vendit.

Arben Malaj: Apeli im publik edhe për Ramën. Ai mund të bëjë çfarë të dojë me pushtetin e tij por nuk qeveriset më pas zgjedhjeve pa pjesëmarrjen e opozitës. Në 2005 PS kishte mundësinë të merrte mandatin e tretë dhe është lëvizur për 2-3 vota dhe në balotazh. Ne kemi diskutuar brenda PS-së – dhe ishte koha që ne vajtëm në zgjedhje me protesta, nuk u votuan ministrat e PS-së, vendi ishte në një situatë të vështirë politike, dhe gjëja më e mirë për vendin ishte rrotacioni politik sesa mbijetesa jonë me mandat të tretë. Kjo është përgjegjshmëri qytetare dhe politike.

Malaj tha se iku me dëshirën e tij nga PS: “Mes karriges dhe lirisë për të menduar i lirë zgjodha lirinë. Ika vetë nuk më përzunë. Unë do isha anëtar i thjeshtë”

Posta kufitare e Peshkëpisë në Gjirokastër u përball prillin e vitit 1994 me një sulm agresorësh grekë, të cilët pasi vranë rojen ushtarin Arsen Gjini dhe komandantin e repartit kapiten i Parë Fatmir Shehu plagosën efektivë të tjerë dhe grabitën gjithë armatimet në tërheqje e sipër.

Fiqiri Shehu vëllai i komandantit të postës kufitare, kapitenit të vrarë Fatmir Shehu kërkoi edhe një herë gjetjen e vrasësve.

Shoqatat patriotike dhe përfaqësues të shoqërisë civile nga godina e ish – postës kufitare të Peshkëpisë, një objekt plotësisht i degraduar pas 25 vitesh, kanë kërkuar vlerësimin e figurave që kanë kontribuar për të mbrojtur kufijtë kombëtare dhe kthimin e dinjitetit për qindra efektivë të rënë në krye të detyrës. Ata kanë marrë nismën për nënshkrimin e një peticioni drejtuar ministrisë së brendshme ku kërkojnë vendosjen e emrave të dy dëshmorëve të Peshkëpisë kësaj ish – poste kufitare dhe një tjetër të ngjashmeje në kufi.

E regjistruar si një prej ngjarjeve më enigmatike të ndodhura përgjatë vijës kufitare me shtetin grek ngjarja e Peshkëpisë ka mbetur ende e pazbardhur, ndërsa ndër vite dëshmitarët kanë pohuar se agresorët që flisnin greqisht mund të jenë ndihmuar edhe nga bashkëpunëtorë shqiptarë.

Historiani Paskal Milo i ftuar në “Provokacija” është shpreh se asnjëherë nuk është ndikuar nga politika në studimet mbi historinë.

Ai është shprehur se nuk ka pasur qasje pozitive ndaj regjimit, madje ishte larguar nga Tiranë si djali i armikut të popullit, pasi ka qenë i persekutuar.

Paskal Milo: “Asnjëherë! Ta them me sinqeritetin më të madh. Nuk kam bërë koncesionin më të vogël përsa i përket ndikimit të politikës në studimet e mia historike. Në mënyrë absolute! E di pse, qoftë edhe për një arsye që ti mund ta quash banale, unë në periudhën e komunizmit kam qenë i persekutuar në një farë mase, nuk kam qenë në burg.

Por unë jam larguar nga Tirana më motivacioni djali i armikut të popullit. Dhe këtë shumë pak njerëz e dinë sepse unë nuk bëj propagandë për këtë punë. Për 8 vite të tëra nuk më është lejuar të shkruaj. Më është ndaluar të shkruaj. E drejta themelore e një intelektuali. Unë nuk kam pas ndonjë qasje pozitive ndaj regjimit.

Pas viteve ’90 se unë pas viteve ’90 u futa në politikë si shumë intelektualë të tjerë isha profesor universiteti u ktheva, se 5 vjet shkova në Fier si dënim dhe kur edha kam ardhur me qasjen super të qendërzuar që të merrem me studime historike pa u influencuar nga politika”.

Duke komentuar votuesit e majtë dhe veçanërisht ata socialistë Milo i etiketon si dele që vihen ne rresht për të votuar.

“Mos guxo, asnjë shqiptar nuk e kursen sakrificën për liri, unë i pari”, ka qenë ky paralajmërimi i qartë i kreut të PD-së, Lulzim Basha, ndaj kryeministrin Edi Rama.

I pranishëm në Berat, Basha theksoi se nuk do të lejojnë zhvillimin e zgjedhjeve, ndërsa i bëri thirrje Ramës që të tërhiqet sa nuk është vonë, duke shtuar se beteja e nisur prej tyre është “betejë për jetë a vdekje”.

“Kam një paralajmërim të qartë për atë që bëhet gati të konsumojë veprën penale grusht shteti, mos guxo, asnjë shqiptar nuk e kursen sakrificën për liri, unë i pari. Nuk na ndalon dot, nuk e dorëzojmë demokracinë.

Ju një grusht njerëzish që për përfitimet tuaja, jeni mbledhur si një grusht, nëse tentoni grushtin e shtetit më 30 qershor, do t’ju arrestojmë do t’ju dërgojmë para drejtësisë. Kjo është një betejë për jetë a vdekje. Tërhiquni sa nuk është vonë, përndryshe sovrani do t’ju gjykojë”, tha kreu i PD-së.

Shkarkimi i ujërave të ndotura në gropa septike mbetet një problem në qytetin bregdetar të Durrësit.

Gjatë mbledhjes së Task-Forcës në këtë qytet, ministri i Mjedisit kërkoi që institucionet të shtojnë numrin e kontrolleve për t’i paraprirë problematikave.

“Nga shifrat rezulton se 18 subjekte turistike i bëjnë ende shkarkimet e ujërave të ndotura në gropa septike.

Bizneset janë njoftuar, por jemi përsëri vonë. Gropat septike duhen eliminuar”, tha ministri Klosi.

Rruga e Llogarasë në Vlorë, një nga rrugët më problematike gjatë sezonit turistik ka pësuar dëmtime të shumta, shkarje të tokës dhe ngushtimet në pika të ndryshme.

Vetëm pak ditë nga hapja e sezonit turistik, në ngjitje të Llogarasa ka kamionë të shumtë të cilët kanë nisur punën për rehabilitimin e këtij segmenti.

“Shpresojmë, edhe pse me vonesë, se nuk është momenti i përshtatshëm ky, mund ta bënin gjatë dimrit… shpresojmë t’i kryejnë sa më shpejt dhe me cilësi”.

Në sezonet e kaluara këtu ka patur bllokim të qarkullimi për disa orë, pa llogaritur trafikun e përditshëm.

Kjo rrugë që kalon nëpër qafën e Llogarasë lidh Vlorën dhe Orikumin. Më pas shkon drejt Palasës, Dhërmiut, Jalës dhe Himarës. Praktikisht është arteria kryesore për një pjesë të jugut dhe në sezonin turistik lëvizja e mjeteve ka qenë përherë e vështirë.

Kreu i Dhomës së Tregtisë dhe Industrisë Nikolin Jaka, ka zbardhur detaje nga përplasja e sotme në Forumin Ekonomik Mbarëshqiptar, midis Shqipërisë dhe Kosovës, ku Shqipëria sipas palës kosovare është vendi numër 2 pas Serbisë përsa i përket barrierave financiare që vendos ndaj mallrave kosovare.

Sipas Jakas, qeveria kosovare i ka bërë një paralajmërim të fortë sot qeverisë shqiptare, ku i ka thënë se nese nuk shikon barrierat e vendosura për disa produkte atëherë brenda dy muajsh do të përballet me reciprocitet nga pala kosovare,

“A e dini që Shqipëria rendita e dyta pas Serbisë për barrierat që vendos ndaj mallrave të Kosovës. Madje sot Ministri kosovar tha se ka ndërhyë në sondazhe pasi Shqipëria ishte kokë më kokë me Serbinë përsa i përket barrierës ndaj mallrave të Kosovës.

Këtu në Shqipëri nuk ka asgjë tjetër vetëm se folklorizëm dhe spektakël ndaj Kosovës.

Ministri Limaj shpalosi qartë sot një platformë, madje bëri edhe një sfidë “më gjeni një barrierë që Kosova bën ndaj prodhimeve shqiptare dhe ne e heqim menjëherë.”

Dhe këtu hyn edhe historia e barrierave të vendosura ndaj miellit që vjen nga Kosova.

Nuk mund ta godasësh një produkt pa ekspertizë dhe të bindemi që kjo është e drejta që kjo dëmton një target të sipërmarrësve.

Sot ministri i Indusitrsë së Kosovës tha se: ‘Nëse Shqipëria për një periudhë dy mujore, ne do jemi me reciprocitet për mallrat që vijnë nga Shqipëria në Kosovë, Dhe këtu bëhet fjalë për miellin, pataten dhe birrën. Janë tre produkte ku Qeveria e Kosovës insiston fort dhe që kërcënon se do të kalojn në reciprocitet.”, tha Jaka në Syri.net

Një ekip i Agjencisë Evropiane të Kufijve (Frontex) do t’i bashkohet policëve të Shqipërisë në patrullime tokësore dhe detare për të ndihmuar në luftimin e krimit. Bashkëpunimi përfshin edhe çështjet e sigurisë sa i përket emigrantëve.

Ky është bashkëpunimi i parë i këtij lloji që Bashkimi Evropian e ndërmerr në territorin e një vendi që nuk është anëtar i bllokut, thanë në Tiranë, komisionari për Migrim i Bashkimit Evropian, Dimitris Avramopoulos dhe shefi i Frontex-it, Fabrice Leggeri.

Komisionari Avramopulos tha se marrëveshja është “një moment historik në bashkëpunimin e BE-së me rajonin”.

Ndërkaq, shefi i Frontex-it, Fabrice Leggeri bëri të ditur se nuk ka asnjë afat kohor për këtë bashkëpunim të forcave të sigurisë shqiptare dhe atyre të BE-së.

Pesëdhjetë oficerë, 16 makina patrullimi dhe një furgon që vijnë nga 12 vende anëtare të BE do të vendosen përgjatë kufirit Shqipëri-Greqi.

Ministri i Brendshëm i Shqipërisë, Sander Lleshaj tha se kishte një rritje prej gjashtë herë në numrin e kalimeve të paligjshme të emigrantëve nga kufiri grek në Shqipëri krahasuar me një vit më parë.

Shqipëria nuk është një rrugë e preferuar për emigrantët, por disa hyjnë në Shqipëri për të lëvizur më pas drejt Evropës Veriore.

BE-ja ka nënshkruar marrëveshje të ngjashme me Maqedoninë e Veriut, Serbinë, Bosnjë-Hercegovinën dhe Malin e Zi.

Shqipëria shpreson që këtë vit të nisë negociatat për anëtarësim në Bashkimin Evropian.

Autoriteti i Aviacionit Civil shqiptar, u bën apel gjithë pasagjerëve që do të udhëtojnë ditën e sotme, e martë 21 maj nga Tirana drejt Italisë dhe anasjelltas, se për shkak të një greve që pritet të jetë 24 orëshe në vendin fqinj, do të ketë anulime dhe vonesa të fluturimeve.

Vonesat dhe anulimet e më shumë se gjysmës së fluturimeve vijnë si pasojë e një greve të pilotëve, teknikëve dhe asistentëve të fluturimit të kompanisë Alitalia, Blue Panorama dhe Blue Air.

“Për të shmangur pritjet e gjata, këshillojmë të gjithë personat që kanë parashikuar të udhëtojnë nga dhe drejt Italisë ditën e martë, që të kontrollojnë dhe të komunikojnë me kompanitë ku kanë rezervuar biletat e udhëtimit, për tu njohur me statusin e fluturimit”, njofton Autoriteti i Aviacionit Civil.

Ka nisur në Shqipëri operacioni i misionit “FRONTEX”. Komisioneri për Emigrimin dhe Punët e Brendshme, Dimitris Avramopulos në Bashkimin Europian, e cilësoi këtë mision një etapë të re të bashkëpunimit mes Shqipërisë dhe Bashkimit Europian.

“E dimë që sot jemi këtu për të celebruar një ngjarje të rëndësishme një etapë të re për Shqipërinë e BE. 6 muaj më parë në Tiranë nënshkrova marrëveshjen këtë marrëveshje statusore me këtë komb të madh për menaxhimin e kufirit. Kjo marrëveshja është e para dhe e vetmja e këtij lloji, desha ta theksoj është operacioni i parë në botë, me një vend jo shtet anëtar të BE. Kjo jo vetëm shënon një fazë të re mes BE e Ballkanit por është edhe një hap më tej drejt operacionalizimit të agjensisë. Mënyra e vetme është të punojmë ngushtësisht së bashku si fqinj e partner.

Ajo që ndodh në Shqipëri e Ballkan prek BE e anasjelltas. Siguria e qytetarëve është në qendër të vëmendjes tonë. Shqipëria është vendi i parë në Ballkan me të cilin BE po shkon para me këtë kapitull të ri. Është një hap i rëndësishëm që na bashkon më shumë. Duhet të jemi vigjilentë. Marrëveshja statusore do na ndihmojë në këtë përpjekje. Këto janë elementë të rëndësishëm të bashkëpunimt. Lëvizja pa viza është një arritje madhore, që sjell të mira për të gjitha palët, ndaj duhet ta ruajmë si të tillë. Skuadrat do kryjenë kontrolle e vëzhgime për të parandaluar kalime të paautorizuara. Shqipëria mbetet përgjegjëse për ruajtjen e kufirit të saj, asnjë pikë dyshimi sa i përket sovranitet kombëtar. Skuadrat mund të ushtrojnë kontroll në prani të rojës kufitare shqiptare.

Sfidat i kemi të përbashkëta, dhe e tillë duhet të jetë edhe përgjigjja jonë. Marrëveshja statusore do të na lejojë të punonjmë më mirë së bashku. Prioriteti kyc të kemi marrëdhënie të forta me fqinjët në partneritet, ju përfshin ju. Shqipëria është pjesë e familjes europiane, sfidat i kemi të përbashkëta, ato nuk njohin kufij”, u shpreh Avramopulos.

TIRANË

Presidenti i vendit, Ilir Meta ka marrë pjesë sot në iftarin e shtruar nga Kryegjyshata Botërore Bektashiane për muajin e shenjtë të Ramazanit.

Kreu i shtetit thotë se pjesëmarrja në një sofër gjithëpërfshirëse të iftarit është shenjë e respektimit në Zot dhe një mundësi për të ndarë vlerat hyjnore të njerëzimit.

“I nderuar të merrja pjesë sot në darkën e iftarit të organizuar nga Kryegjyshata Botërore Bektashiane. Pjesëmarrja në një sofër gjithëpërfshirëse të iftarit, nuk është vetëm shenjë respekti ndaj besimit në Zot, por dhe një mundësi për të përjetuar e ndarë së bashku vlerat më të mira hyjnore dhe njerëzore. I lumtur t’i uroja dhe Kryegjyshit Botëror të Bektashinjve, Hirësisë së Tij Haxhi Baba Edmond Brahimajt: “Gëzuar 60-vjetorin e lindjes!”, që këtë vit përkoi në Muajin e Shenjtë të Ramazanit!

Agjerim të lehtë e të pranuar për të gjithë besimtarët!🇦🇱”-shkruan Meta.

Altin Avdylaj

Hetimet e dosjes 339 do të vijojnë me marrjen në pyetje të të gjithë drejtuesve të shtabit elektoral të PS-së, që u angazhua në fushatë për zgjedhjet e vitit 2017.

Burime të “Tv Klan” pranë organit të akuzës thanë se të gjithë drejtuesit e shtabit elektoral të Partisë Socialiste, që u angazhuan në fushatë në Qarkun e Durrësit, apo edhe zyrtarë lokalë, po pyeten nga prokurorët Vladimir Mara dhe Dritan Premçi.

Ata kanë marrë dëshmitë e disa prej tyre, ndërsa pritet që dhënia e sqarimeve të vijojë edhe në ditët në vijim. Këtë të enjte, për më shumë se 5 orë, kryebashkiaku i Durrësit, Vangjush Dako, iu përgjigj pyetjeve të prokurorëve Mara dhe Premçi lidhur me njohjen me vëllezërit Avdylaj. Dako ka rrëfyer në Prokurori njohjen me Astrit dhe Altin Avdylaj dhe ka mohuar të ketë dijeni mbi blerjen e votave.

Sipas “TV Klan”, kryebashkiaku i Durrësit ka sqaruar se persona të ndryshëm mund t’u kenë ofruar para votuesve, por ai nuk ka qenë në dijeni apo për më tepër ta ketë aprovuar këtë gjë. Në përgjimet e bëra publike, deri tani Vangjush Dako është regjistruar vetëm një herë duke folur me Altin Avdylin, i njohur ndryshe si “Niçja”, ndërsa në një përgjim të dytë del “Niçja” dhe një tjetër person.

Mësohet se pyetja e Vangjush Dakos dhe shtabit elektoral të Partisë Socialiste që u angazhuan në fushatë në Qarkun e Durrësit në zgjedhjet e vitit 2017 ka ardhur për shkak të përfundimit të zbardhjes së disa dhjetëra CD-ve të reja me përgjime nga ajo që njihet si dosja 339. Përgjimet e kësaj dosje gjatë operacion “Vol-vo 4” çuan në shkatërrimin e 4 grupeve kriminale që merreshin me trafikun e drogës dhe tjetërsimin e pronave në bregdet.

Ndërsa hetimi për blerjen e votave në Durrës u veçua në një tjetër dosje, 339/1. Lidhur me këtë dosje, opozita radikalizoi qëndrimet e saj, pas publikimit në media të disa fragmenteve dhe bisedave ku vëllezërit Avdylaj komunikonin në lidhje me blerjen e votave në Qarkun e Durrësit, duke përmendur edhe kryebashkiakun, Vangjush Dako.

Në rrugicat e Dhoksatit, fshat në Gjirokastër, është thuajse e pamundur të ndeshesh me ndonjë të ri.

Edhe pse popullsia atje ka përjetuar që në vitet e hershme emigracionin dhe largimin e të rinjve, ky fenomen është bërë edhe më i dukshëm pas viteve 2000. Nga 120 familje që kishte dikur ky fshat, tashmë ka vetëm 20-25, ku pjesa më e madhe janë pleq. Qarku i Gjirokastrës po përjeton tkurrjen më të madhe të popullsisë, me diferencën më të madhe midis lindjeve dhe vdekjeve në vend.

Monitor përllogariti lindjet, vdekjet dhe shtesën natyrore në qarqet e vendit për vitin 2018, ku Gjirokastra, Korça dhe Vlora kanë një shtesë natyrore negative, që do të thotë numri i vdekjeve është më i lartë se i lindjeve.

Pasojat negative të kësaj situate do të çojnë në uljen e popullsisë në moshë pune, rënie të produktivitetit dhe rritjen e të moshuarve. Ato bëhen edhe më të dukshme kur iu shtohet edhe emigrimi.

Numri i lindjeve për 1000 banorë në Gjirokastër  gjatë 2018-s ishte 8.6, përkundrejt 12.1 vdekjeve për 1000 banorë. Në mënyrë natyrale, pa marrë në konsideratë lëvizjet migratore, popullsia atje u pakësua me 3.5 individë për çdo 1000 banorëtë qarkut.

E njëjta situatë vlerësohet të jetë edhe në qarkun e Korçës, i cili shënoi gjithashtu një diferencë negative të lindjeve dhe vdekjeve. Gjatë2018-s për çdo banorë në këtë qark pati 2.2 individë më pak. Diferencë negative ka shënuar dhe qarku i Vlorës (shiko grafikun dhe tabelën).

Nga ana tjetër, Kukësi është qarku me shtesën natyrore më të lartë në vend, kur për çdo 100 banorë atje, shtesa natyrore është rreth 6. Ndonëse Kukësi nuk është qarku me lindjet më të larta. Sipas përllogaritjeve të Monitor, në Kukës pati 12.4 lindje të reja për çdo 1000 banorë, përkundrejt 6.6 vdekje.

Lindjet më të larta u shënuan në qarkun e Dibrës, ku sipas tëdhënave të INSTAT dhe përllogaritjeve të Monitor ishin 13.1 lindje për 1000 banorë, ndërsa vdekjet 7.7. Shtesa natyrore nëqarkun e Dibrës është ndër më të lartat në vend me 5.5 për çdo 1000 banorë.

Edhe në qarkun e Tiranës, në të cilin është përqendruarthuajse 1 e treta e popullsisë, lindjet /1000 banorë ishin gati sa dyfishi i vdekjeve, me një shtesë natyrore prej 4.9/1000 banorë.

Në Berat, Fier apo Shkodër, shtesa natyrore e popullsisë ka mbetur në vend numëro, pasi diferenca mes lindjeve dhe vdekjeve është më e vogël se 1.

LONDËR

Në përfundim të vizitës së tij në Parlamentin Britanik dhe Dhomën e Lordëve, lideri  i Partisë Demokratike, Lulzim Basha ishte i ftuar nderi në një darkë pune me anëtarë të parlamentit dhe Dhomës së Lordëve në Londër.

Mes pjesëmarrësve në këtë darkë pune ishte Lordi George Robertson, ish-Sekretar i Përgjithshëm i NATO-s dhe anëtar i Dhomës së Lordëve, ndërsa Basha vuri në dukje se pa garantimin e votës së lirë nuk mund të këtë stabilitet dhe zhvillim në Shqipëri.

Kryedemokrati Lulzim Basha gjatë qëndrimit në Londër ishte i shoqëruar edhe nga aleati i tij, kreu i Partisë Republikane, Fatmir Mediu.

Siç njofton zyra e shtypit të PD-së, në darkë ishin të pranishëm edhe deputetët Crispin Blunt, Sir Mark Lyall Grant, dhe Gavin Ëilliamson, anëtar i Parlamentit Britanik dhe lidershipit të Konservatorëve dhe ish-ministër i Mbrojtjes. Gjithashtu në darkë ishte i pranishëm edhe Sir Hugh Orde, ish Kryedrejtuesi i Shërbimeve të Sigurisë në Irlandën e Veriut.

Në qendër të diskutimeve ishte siguria dhe stabiliteti në Europën Juglindore dhe kriza politike në Shqipëri. Në fjalën e tij gjatë darkës, kryetari i opozitës shprehu mirënjohjen për ndihmën e çmuar të Britanisë së Madhe për kapërcimin me sukses të sfidave jetike për paqen dhe stabilitetin në Ballkan, në veçanti, në luftën e Kosovës dhe procesin e pavarësimit të saj, në konfliktin e armatosur në Maqedoni e Marrëveshjen e Ohrit dhe, së fundmi, Marrëveshja e Prespës që shërben për të konsoliduar perspektivën afatgjatë euroatlantike të rajonit, duke garantuar anëtarësimin e saj në NATO.

Basha ndau me miqtë e shquar britanikë qëndrimin e qartë dhe të vendosur të Partisë Demokratike se përpjekjet dhe diskursi mbi kufijtë dhe shkëmbimin e territoreve shkon kundër këtyre arritjeve, duke kërcënuar paqen dhe stabilitetin rajonal.

“Autokratët e korruptuar përbëjnë një kërcënim për demokracinë dhe stabilitetin. Kriza e thellë ne Shqipëri ilustron qartë se pa demokraci dhe sundim të ligjit nuk mund të ketë stabilitet dhe as zhvillim ekonomik. Forcimi i institucioneve demokratike, kontrolli dhe kufizimi i pushteteve, drejtesia e pavarur dhe zgjedhjet e lira janë parakusht për integrimin e vendeve tona në BE. Zgjedhjet e lira dhe të ndershme janë jetike për demokracinë dhe legjitimitetin e qeverisë para qytetarëve. Për këtë qëllim hapi më emergjent është shkëputja e lidhjeve të provuara mes krimit të organizuar dhe politikës” vuri në dukje Basha.

Lideri i opozitës i njohu bashkëbiseduesit me propozimet e PD dhe opozitës së bashkuar për daljen nga kriza përmes një procesi të lirë zgjedhor nën kujdesin e një qeverie tranzitore, e cila do t’i çlirojë duart drejtësisë për t’i dhënë fund pandëshkueshmërisë së politikanëvë të kapur në bashkëpunim me krimin për vjedhjen e zgjedhjeve dhe do të përmbushë të gjitha parakushtet e ngarkuara me ligj për të gararantuar votën e lirë.

“Vetëm një qeveri e dalë nga vota e lirë mund të luftojë krimin e organizuar që e ka shndërruar Shqipërinë, sipas raportit të Departamentit amerikan të Shtetit, në një bazë operacionale të rrjeteve kriminale, që veprojnë nga Amerika në Europë dhe Lindjen e Mesme.

Basha i njohu miqtë britanikë edhe me programin e Partisë Demokratike, në veccanti, me masat që do të marrë përmes vetingut të politikanëve dhe goditjes me tolerancë zero të krimit dhe konfiskimit të aseteve kriminale. Kreu i opozitës shpjegoi se këto masa synojnë t’u japin fund trafiqeve dhe pastrimit të parave të pista të krimit, në mënyrë qe të hapet rruga për Shqipërinë e standarteve europiane me barazai para ligjit, liri dhe mundësi për të gjithë qytetarët e saj.

Ne përfundim të vizitës së tij në Londër Zoti Basha shprehu mirënjohjen për takimet e frytshme të nivelit të lartë dhe interesin e madh me të cilin autoritetet britanike përcollën krizën politike në Shqipëri. Ai shprehu bindjen se me ndihmën e Mbretërisë së Bashkuar dhe partnerëve tanë strategjikë euroatlantikë,  Shqipëria do ta kapërcejë këtë krizë dhe do t’i japë fund tranzicionit të tejzgjatur përmes reformave të thella politike që do të cimentojnë kontrollin demokratik të qeverisjes nga qytetarët dhe sundimin e ligjit.

“Për Partinë Demokratike është prioritet strategjik forcimi dhe zgjerimi i bashkëpunimit me Mbretërinë e Bashkuar jo vetëm në fushën e sigurisë dhe luftën kundër krimit, por në veçanti, në fushën ekonomike.

Dy anije luftarake të NATO-s janë ankoruar në portin e Durrësit. Kjo vizitë e anijeve të NATO-s në Shqipëri vjen në kuadër të 10 vjetorit të anëtarësimit në këtë aleancë. Dy luftanijet do të zhvillojnë edhe një stërvitje me trupat tona detare në Durrës.

Pas ankorimit në Durrës ka mbajtur fjalën Komandanti i Fregatës holandeze, Sjoerd Feenstra i cili ka theksuar rëndësinë e bashkëpunimit dhe forcimit të marrëdhënieve mes vendeve antare.

“Në kuadër të 10 vjetorit të Anëtarësimit të Shqipërisë në NATO, jemi këtu për të vlerësuar kontributin tuaj. Në këtë kuadër do të zhvillojmë edhe një stërvitje të përbashkët. Theksoj se është shumë i rëndësishëm bashkëpunimi dhe forcimi i marrëdhënieve mes vendeve anëtare të aleancës!” deklaroi Feenstra.

Luftanija holandeze dhe ajo kandadëze janë pjesë e grupit të Anijeve të Gatshme të NATOS-s (Standing NATO Maritime Group 2 SNMG2.

Kreu i PD-së, Lulzim Basha ka përsëritur edhe njëherë kushtet e opozitës për zgjidhjen politike të krizës ku ka hyrë vendi.

I pranishëm në një vizitë në Westminster, Basha theksoi se nuk mund të ketë zgjedhje të lira pa u ndëshkuar politikanët që u kapën në bashkëpunim me krimin e organizuar duke vjedhur vota.

Sipas Bashës, mënyra e vetme për zgjidhjen politike të krizës është largimi i qeverisë dhe kryeministrit si dhe krijimi i një qeverie tranzitore.

“Zgjedhjet e diktuara nga krimi janë rrënja e krizës, sepse kanë prodhuar një parlament të diktuar nga krimi dhe jo nga vota e shqiptarëve. Politikanet që janë kapur në bashkëpunim me krimin e organizuar për të vjedhur zgjedhjet e 2017-ës, duhet të ndëshkohen dhe jo të promovohen. Pa shkëputur lidhjet e krimit me politikën nuk mund të ketë zgjedhje të lira dhe të ndershme. Largimi i qeverisë dhe kryeministrit të kapur në flagrancë duke bashkëpunuar me krimin për të shkatërruar procesin zgjedhor të 2017 dhe krijimi i një qeverie tranzitore janë mënyra e vetme për zgjidhjen politike të krizës” – theksoi Basha.

Kryetari i PD Lulzim Basha dhe delegacioni që e shoqëron, zhvilluan një takim me kryesuesit e Grupit Parlamentar bipartizan për Shqipërinë në Parlamentin Britanik, deputetët John Grogan (kryetar i grupit) dhe Martin Vickers (nën kryetar). Zyra e shtypi pranë PD, bëri me dije se në këtë takim u diskutua gjerësisht për shkaqet e krizës politike në Shqipëri, për krizën kushtetuese, mungesën e Gjykatës Kushtetuese, mungesën e Gjykatës së Lartë, mungesën e një Prokurorie të pavarur që nuk i mbyll, por i heton dosjet e krimit të lidhur me pushtetin.

Komunikatë për median : 17 maj 2019
Për njoftim : Komunitetit shkencor të vendit
Kryetarit të delegacionit të BE në Tiranë : z. Luigi SORECA
Presidentit : Z. Ilir Meta
Kryetarit të Kêshillit të ministrave : Z. Edi Rama
Kryetarit të Kuvendit : Z. Gramoz Ruçi
Kryetarit të opozitës : Z. Lulzim Basha

—————————————-

Akademia e Shkencave e Shqipërisë njofton zyrtarisht se në datën 24 maj do të kryhen zgjedhjet për kryetar dhe ekipin e ri drejtues të saj.

Pa u ndaluar aktualisht te fakti që zgjedhjet atje bëhen si gjithmonë pa kandidatura konkurrente, dhe realizohen sipas parimit të qëmotit, si farsë, ku kryetarit bëhet nënkryetar dhe nënkryetari ribëhet kryetar, veçoj se kandidatura e vetme për kryetar të Akademisë të Shkencave është paraqitur ajo e z. Skënder Gjinushi, aktualisht kryetar i Partisë Socialdemokrate, e shpallur në 30 prill si parti aleate në koalicionin ASE të forcave politike qeveritare, një politikan karriere prej disa dekadash.

Kam dyshimin e arsyetuar dhe mbështetur në fakte objektive e dokumente shkresore zyrtare se Akademia e Shkencave është bërë monedhë shkëmbimi midis disa grupimeve politikanësh dhe burokratësh në pushtet dhe grupit uzurpator të Akademisë të Shkencave.

« Na jepni drejtimin e Akademisë të Shkencave, t’ju japim mbështetje për zgjedhjet e ardhshme politike për pushtetin lokal të 30 qershorit 2019 ! »

Është fare e qartë që në kushtet e degradimit të plotë të Akademisë të Shkencave të Shqipërisë, të dështimit të procesit të reformimit të saj, politika ka vënë dorë, po merr drejtimin, po pushton duke uzurpuar edhe Akademinë e Shkencave të Shqipërisë !

Politizimi i shkencës dhe i kërkimit shkencor është akt i fundit i këtij kobi kombëtar ! Mendja e shqiptarit do të drejtohet zyrtarisht nga politika ! Ndarja e pushteteve si vlera bazë e demokracisë pô dhunohet aq fort saqë nuk do të ketë më asnjë dallim midis drejtimit politik dhe gjykimit shkencor !

Brenda javës që vjen ky kob shpallet fakt i kryer me mbështetjen e atyre akademikëve që e pranojnë këtë për të ruajtur thjesht interesat e tyre egoiste, në kundërshtim të plotë dhe të hapur me parimet dhe vlerat e shkencës, sidomos me moralin e saj.

Eshtë një ngjarje e paprecedent që nga koha e themelimit të kësaj akademie ! Edhe në periudhën e diktaturës, qoftë edhe formalisht, kurrë Akademia e Shkencave nuk ka pasur në krye të saj një njeri politik, madje as anëtar partie, por personalitete shkencore, madje të parreshtuara hapur me pushtetin e kohës !

Politizimi i shkencës nëpërmjet kapjes nga politika e Akademisë të Shkencës është një parametër që mat shkallën e politizimit të institucioneve dhe përbën një puç institucional, duke anashkaluar të gjitha ligjet dhe parimet demokratike, duke i treguar grushtin e politikës të gjithë komunitetit shkencor të vendit.

Nuk është rastësi pushtimi i pritshëm i shkencës shqiptare nga politika. Ai po kryhet në kushtet kur rrugën ja ka hapur vetë ministrja e arsimit qytetarja Besa Shahini duke lënë në mes të rrugës detyrën e vet institucionale dhe duke shpalosur platforma personale antiinstitucionale të pambështetura në asnjë ligj, ja ka hapur rrugën grupi i deputetëve socialistë kryesuar nga deputetja qytetarja Eglantina Gjermeni, që duke shpërfillur komunitetin shkencor të vendit shpall si iniciativë ligjore të vetën faktikisht dokumentin e formuluar nga grupi i kryesuar nga z. Skënder Gjnushi, dhe me komplicitetin e drejtueseve të Komisionit parlamentar për edukim dhe mjetet e informimit publik, ku spikat përfaqësuesja e shumicës, qytetarja deputete Milva Ekonomi, ndërkohë që kryetarja e këtij komisioni, e opozitës së re, as nuk ndihet ta ndalojë farsën që bëhet nën hundën e saj.

Pas pushtimit të Akademisë të Shkencave nga ana e politikës, Kryetari i ri i kësaj akademie mund edhe të shpalli largimin nga kryesia e partisë së tij në aleancë me qeverinë, por kjo është tanimë pa asnjë vlerë edhe nëse ndodh !

Të gjitha procedurat e ndjekura prej muajsh kanë privilegjuar këtë akt pushtimi !

Duke qenë edhe kryetar i grupit reformues, caktuar po me urdhër politik nga ana e ministres të arsimit, Kryetari i pritshëm i Akademisë të Shkencave është në konflikt të hapur interesi që vetëm të marrët dhe uzurpuesit nuk do të duan ta shohin.

Reforma dhe marrja e pushtetit në Akademi bëhen kështu njësh !!! Kjo pikërisht e dështoi reformën e vërtetë të Akademisë të Shkencave në Shqipëri !

Në këto kushte, i angazhuar deri në fund për ta shpëtuar Akademinë e Shkencave nga rrënimi përfundimtar, pa interes të veçantë personal të asnjë lloji, pa konflikt interesi,

u bëj thirrje krerëve të shtetit shqiptar që ta ndalin këtë aventurë fatkeqe,

i bëj thirrje opozitës ta denoncojë politikisht këtë akt të paprecedent në asnjë nga akademitë e shkencave të Europës a të Botës,

i bëj thirrje zotit Lugi Soreca si përfaqësues i BE në Tiranë të ngrejë zërin kundër kësaj katastrofe që po ndodh në mes të ditës kundër vlerave europiane të marrëdhënieve mes shkencës dhe politikës,

i bëj thirrje komunitetit shkencor të vendit :

Ngrihuni më këmbë për të mbrojtur jo thjesht dinjitetin tuaj, por për të bërë detyrën për të cilën na paguan shoqëria dhe i detyrohemi kombit !

Përsa më takon, në ditët në vazhdim do të publikoj faktet e pakundërshtueshme të këtij pushtimi fatkeq të politikës ndaj simbolit të rrënuar të shkencës dhe dijes kombëtare !

Me respekt,

Artan Fuga

Një vulë mbi 400-vjeçare, me rëndësi historike, është “zhdukur” në rrethana të mistershme nga zyrat e Arkivës së Shtetit, në Tiranë.

Objekti është cilësuar me rëndësi të veçantë historike dhe i përket një fermani të Manastirit të Kamenës, që ndodhet mes Delvinës dhe fshatit Kakodhiq.

Burime nga Prokuroria e Tiranës thanë për “Panorama” se ngjarja është referuar si vjedhje nga Policia e Tiranës disa ditë më parë.

Ndërsa denoncimi është bërë nga vetë drejtori i Përgjithshëm i Arkivave, në datë 10 maj 2019, ditë kur edhe ai kishte marrë dijeni për mungesën e vulës në vendin e caktuar.

Drejtori ka njoftuar Policinë për humbjen e saj, pa saktësuar rrethanat nëse ishte vjedhur nga dikush.

Megjithëse të gjitha rrethanat flasin për një vjedhje të organizuar, nisur edhe nga fakti se një ditë para se të zhdukej objekti, kamerat ishin fikur. Për herë të fundit, vula e fermanit të Manastirit të Kamenës është parë më datë 7 maj, nga të gjithë punonjësit e Sektorit të Evidencës, në Drejtorinë e Përgjithshme të Arkivave. Sipas të njëjtave burime, në materialin e referuar nga Policia, thuhet se mungesa e objektit është konstatuar në Godinën B, ku bëhet skanimi i formateve të mëdha, që ndodhet brenda rrethimit të Arkivës së Shtetit.

Për këtë ngjarje u është marrë deklarim 15 punonjësve, në cilësinë e personit që ka dijeni për veprën penale. Ndërsa aktualisht, Prokuroria është në pritje të një akti ekspertimi, pas ekzaminimit që i është bërë fermanit të Manastirit të Kamenës në Drejtorinë e Policisë Shkencore.

DENONCIMI

Në materialin e referuar në Prokurorinë e Tiranës thuhet se në datë 10 maj 2019, pas një njoftimi të dhëna nga drejtori i Përgjithshëm i Arkivave, për humbjen e një vule të një fermani të Manastirit të Kamenës, oficerët e Policisë kanë shkuar në vendin e ngjarjes. Fermani i humbur datonte rreth viteve 1600.

Oficerët që kanë shkuar pranë Drejtorisë së Përgjithshme të Arkivave kanë konstatuar se: Në ambientet e Drejtorisë së Përgjithshme të Arkivave, konkretisht në Godinën B, ku bëhej edhe skanimi i materialeve të formateve të mëdha, ishte konstatuar mungesa e një vule, e cila ishte pjesë përbërëse e një fermani të Manastirit të Kamenës. Vula kishte qenë e lidhur nëpërmjet disa penjve me këtë ferman dhe për herë të fundit është parë që ka qenë në vendin e saj në datën 7 maj 2019, nga të gjithë punonjësit e Sektorit të Evidencës në Drejtorinë e Përgjithshme të Arkivave.

Më pas është marrë nga Përgjegjësi i Sektorit të Evidencës për t’u çuar për skanim në zyrën e kompanisë “AlfaScan Sh.p.k”, pasi një studiues kishte bërë kërkesën dhe pagesën për t’u njohur me këtë material.

Fermani ka qëndruar përgjatë datës 7 maj 2019 dhe 8 maj 2019 në zyrën e kompanisë “AlfaScan Sh.p.k”, e cila operon brenda Drejtorisë së Përgjithshme të Arkivave, në katin e dytë të saj. Pasi materiali është lënë për dy ditë aty, më datë 9 maj 2019, rreth orës 14:30, është marrë për t’u skanuar nga shtetasi A.M. dhe duke qenë se është me format të madh, është dërguar pranë Godinës B, e cila është brenda rrethimit të Drejtorisë së Përgjithshme të Arkivave.

MOMENTI KUR U ZBULUA MUNGESA

Pasi është hapur për t’u skanuar, është konstatuar se në fermanin e Manastirit të Kamenës mungonte vula. Menjëherë pas këtij momenti ka marrë dijeni për ngjarjen edhe drejtori i Përgjithshëm i Arkivave. Bëhet fjalë për datën 10 maj 2019, kur vetë ai ka njoftuar Policinë. Drejtori është shprehur se pasi kishte shkuar pranë institucionit, punonjësit e kishin vënë në dijeni rreth këtij fakti dhe pasi kishte lajmëruar eprorët e tij, ka lajmëruar Policinë e Shtetit.

Prej datës 10 maj 2019 është bërë një hetim i mirëfilltë mbi këtë ngjarje, duke bërë këqyrjen e vendit të ngjarjes, konkretisht fermanit të Manastirit të Kamenës, në prezencën e ekspertit kriminalist dhe është bërë kontrolli i vendeve. Konkretisht është ushtruar kontroll i imtësishëm në të gjitha zyrat ku kishte qëndruar fermani, që nga dalja nga magazina e deri në momentin e konstatimit të mungesës së vulës.

Gjithashtu, është bërë pyetja në cilësinë e personit që ka dijeni për veprën penale i të gjithë stafit të Seksionit të Evidentimit, si dhe stafit të kompanisë “AlfaScan Sh.p.k”. Në materialin referues theksohet se gjatë hetimit ka rezultuar se kamera që ndodhet brenda ambienteve të zyrës së kompanisë “AlfaScan Sh.p.k”, ka ndërprerë filmimet në datë 9 maj 2019, në orën 10:20 dhe sipas deklarimit të inxhinierit të kësaj kompanie, kishte skaduar licenca e marrë nga Agjencia Kombëtare e Shoqërisë së Informacionit, e cila kishte një afat prej 180 ditësh.

Nga ana e oficerëve të Policisë së Shtetit është marrë kontakt edhe në mënyrë zyrtare me Agjencinë Kombëtare të Shoqërisë së Informacionit për të saktësuar kohën e aktivizimit dhe të përfundimit të kësaj licence dhe nëse e ka lajmëruar kompania “AlfaScan Sh.p.k” për përfundimin e saj.

Kreu i Partisë Demokratike Lulzim Basha ka deklaruar për herë të parë se edhe atij kur ishte ministër i Jashtëm i ishte propozuar nga Serbia ndryshimi i kufijve. Të njëjtën deklaratë bëri edhe pak ditë më parë Besnik Mustafaj.

Basha tha gjithashtu se këto ide të Ivica Daçiçit, nuk ia kishte marrë mendja se do t’i dëgjonte si ide origjinale nga goja e Edi Ramës dhe e Hadhim Thaçit.

“Në lidhje me historinë e hapjes sërish të diskutimit të kufijve. Një miku ynë i përbashkët, ish-Ministri i Jashtëm Besnik Mustafaj tha para pak ditësh se çdo ministri të Jashtëm i është propozuar ndryshimi i kufijve të Kosovës. S’e kam thënë më parë, por po e them tani nga Londra: Po, po. Edhe mua më është propozaur. Kanë ardhur, në atë kohë,  autoritetet serbe dhe më kanë paraqitur idenë e ndryshimit të kufijve të Kosovës. Këtë e di unë, e di udhëheqja aktuale e Kosovës, se i kam informuar, e dinë partnerët tanë nga Uashingtoni në Londër, nga Brukseli në Berlin.

Ju thashë më parë që jam i tmerruar nga papërgjegjësia totale, me të cilën ata mendojnë se mund të rikthejnë kohën e Millosheviçit apo kohën e luftërave të periudhës së Kongresit të Berlinit. Këta mendojnë akoma si të jenë në shekullin e 19-të. Po kurrë nuk ma kishte marrë mendja se idetë që do të dëgjoja nga goja e Vuk Jeremiçit dhe Ivica Daçiç, do t’i dëgjoja më vonë si ide origjinale nga goja e Edi Ramës dhe e Hadhim Thaçit. Këtë nuk ma kishte marrë mendja kurrë!”, tha Basha.

35 akademikë në pozita të rregullta, të përhershme apo të asociuar ka Shqipëria dhe mes të gjithëve iu tek vetëm Skënder Gjinushit për t’u bërë kryetar i Akademisë së Shkencave. Mes tyre që plotësojnë kriterin e moshës ka disa, por që ose nuk denjojnë të lakojnë emrin nëpër mediat e qeverisë ose kanë bërë pazaret e tyre. Dhe kështu i vetmi që pranoi t’i bëhet fytyra shollë edhe nga shpullat, si gjithmonë është ai, i pështirosuri nga të tijët dhe të tjerët, por i servilosur deri në palcë, ai që arrin të shfaqet aty ku s’duhet, në shkencën e menderosur tashmë shqiptare.

I vetmi që ka reaguar sot e përtej të djeshmes është Akademiku Artan Fuga, i cili mos mendoni se ka interesa për t’u bërë kryetar vetë meqënëse kundërshton Gjinushin. Jo, ai reagon se ka guxim intelektuali dhe nuk ka frikë burracaku apo pseudo intelektuali të ngritur përmes lëpirjeve e qëndrimeve në hijen e pemëve të mbetura ende me sharm akademie në oborrin pranë kalasë.

Anëtarët e asamblesë kishin kohë një muaj të shpallnin kandidaturat, por nuk e bënë. Ata në heshtje, me mosveprimet e tyre po mbështesin prehistorikun e padokumentuar gjëkundi si shkencëtar në faqet ndërkombëtare të shkencës. E tregoi këtë edhe Taulant Muka, shkencëtari i ri që ka nisur fushatën e çjerrjes së maskave të medemek shkencëtarëve shqiptarë që duket se kanë mbirë si kërpudha pas shiut të dendur në vend.

Gjithashtu ata po lejojnë si kurrë më parë, në krye të shkencës një figurë të politizuar e dalë boje duke cituar Prof Artan Fugën, i cili në shkrimin e tij të sotëm të publikuar nga FlasShqip (lexo këtu) shprehet se “Është një ngjarje e paprecedent që nga koha e themelimit të kësaj akademie! Edhe në periudhën e diktaturës, qoftë edhe formalisht, kurrë Akademia e Shkencave nuk ka pasur në krye të saj një njeri politik, madje as anëtar partie, por personalitete shkencore, madje të parreshtuara hapur me pushtetin e kohës!”

Unë mendoj se nëse u ka mbetur një fije sedër profesionale, respekti për punën e tyre e të paraardhësve të tyre, respekti për emrin që kanë ndërtuar me mund e djersë, të paktën disa akademikë të shquar duhet t’i dalin përballë Gjinushit të dallavereve dhe aspak të shkencës. Nëse këta akademikë pranojnë Gjinushin do të thotë që s’kanë asnjë lidhje me paraardhësit e tyre që themeluan akademinë, Prof. Aleks Buda, Kolë Popa, Petrit Radovicka, Bedri Dedja, Eqerem Çabej, Mahir Domi e të tjerë, që pavarësisht sistemit ishin të gjithë shkencëtarë (përjashto ata që vinin nga fusha e marksizëm-leninizmit).

Disa ndoshta do t’i mirëkuptoja në pamundësinë e tyre për shkak të ndërthurjes së lidhjeve personale me ato profesionale si për shembull Prof. Mejdanin, por nëse shumica e akademikëve do të kishin lidhje shoqërore, partie, fisnore apo krushqie me Gjinushin do t’i binte që të tërhiqeshin në heshtjen e tyre siç edhe po bëjnë.

E në fund të fundit le t’i mbetet gjuajtja përfundimtare e topit presidentit, i cili është mësuar të hajë e të presë goditje si para ashtu edhe pas shpine. Në fund të fundit ç’do t’i ndodhte vendit me një institucion më tepër në kolaps? Asgjë! ERTV do vazhdojë të transmetojë arritjet e sukseset e mëdha të qeverisë.

Shkas për këtë shkrim u bë telefonata e një miku të vjetër, anëtar i Parlamentit Europian prej shumë vitesh. Ai ka mbajtur disa herë edhe poste ministrore në një nga vendet e mëdha të Bashkimit Europian. Miku im ishte i shqetësuar për kërcënimin ndaj ambasadorit të OSBE-së dhe po më kërkonte që unë të përcillja në rrugë informale këshillën e tij për drejtuesit e Partisë Demokratike, me qëllim që ata të dënonin hapur dhe pa vonesë këtë akt jo vetëm të shëmtuar, por edhe të dëmshëm për imazhin e opozitës.

– Po çfarë i kanë thënë? Si e kanë kërcënuar? – e pyeta unë.

Pa hyrë në hollësitë e bisedës sonë, miku im nuk dinte asgjë konkrete lidhur me përmbajtjen e këtij kërcënimi. Ai dinte vetëm se ambasadori i OSBE-së në Tiranë është kërcënuar, njoftim që e kishte marrë nga burime zyrtare brenda Parlamentit Europian. Unë i tregova pa shtuar as hequr asnjë fjalë çfarë kishte ndodhur. Madje i nisa edhe me Watsapp fotografinë e murit të pallatit ku jeton ambasadori, në hyrje të të cilit ishte shkruar “Ambassador Borchardt, shame on you”. (Ambasadori Borchardt, turp për ju!)

– Vetëm kaq është? – më pyeti ai.  – Nuk ka diçka tjetër?

– Vetëm kaq. Nuk ka asgjë tjetër.

Pastaj, me dëshirën për ta kuptuar më thellë çështjen, miku im më pyeti nëse në kulturën tradicionale shqiptare damkosja me “turp” nxiste ndjenja urrejtje, të cilat sigurisht do të linin vend për ta menduar kërcënimin. Një pyetje e tillë në gojën e mikut tim vinte pse ai, me aq  tekst sa kishte ngjarja, nuk po e shihte ku ishte kërcënimi në kuptimin e vërtetë të kësaj fjale. I shpjegova se edhe në kulturën tradicionale shqiptare, një vlerësim i tillë nuk shkonte përtej një degradimi moral të njeriut. Aq më pak mund të përbëjë kërcënim sot, kur turpi i burrit është bërë një shfaqje banale në shoqëri. Turpi ka rëndësi vetëm atje ku nderi ka rëndësi. Pra, turpi në Shqipëri e ka humbur vlerën si emocion, sepse vetë nderi në thelbin e tij e ka humbur rëndësinë.

Me Bernd Borchardt jemi miq qysh në fillim të viteve 2000, kur ai erdhi në Tiranë si ambasador i Gjermanisë. Pas përfundimit të mandatit këtu, ai shkoi në Kosovë për të drejtuar Eulex. Jemi takuar po ashtu edhe në Prishtinë, kur unë isha Ministër i Jashtëm. Dhe kjo miqësi vazhdon me kthimin e tij në Tiranë, në krye të zyrës së OSBE-së. Shihemi herë pas here për kafe. Kam qenë i ftuar për darkë edhe në shtëpinë e tij. Po  i përmend këto fakte për të pohuar vlerësimin tim për të si njeri dhe si diplomat. Me kaq sa e njoh, mbetem i bindur se ai e ka kuptuar shumë mirë që fjala e shkruar në hyrje të pallatit, ku ai banon, nuk përmban ndonjë kërcënim. Rrjedhimisht, mbetem i çuditur si pranoi ai të marrë rolin e një viktime të paqenë, duke u bërë protagonist deklaratash deri në nivelin më të lartë të diplomacisë evropiane, shoqëruar kjo edhe me teatrin e rojave që nxitoi t’i vinte qeveria e Ramës për ta marrë në mbrojtje, pra, për ta bërë edhe më të dukshëm kërcënimin që rëndonte mbi të.

Unë do ta kuptoja që ambasadori Borchardt të ndjehej i fyer dhe ta shprehte me plot zërin indinjatën e tij. Jo thjesht për solidaritet prej miku, por për parim do t’i bashkohesha në shprehjen e kësaj indinjate. Sepse ajo fjalë është një akt etik i papranueshëm nga ana e atij që e ka shkruar edhe shpresoj të mos përsëritet kurrë më ndaj një diplomati të huaj në Tiranë. Ma merr mendja se ambasadori Borchardt do të dilte shumë më i larë nëse këtë ngjarje të vogël, do ta trajtonte natyrshëm si një fyerje personale, morale, siç edhe është në të vërtetë. Konventat ndërkombëtare, në të cilat aderon edhe Republika e Shqipërisë, nuk i marrin në mbrojtje diplomatët kundrejt vlerësimeve morale, qofshin ato edhe padrejtësisht degraduese. Nga ana tjetër, duke e mbajtur incidentin brenda caqeve banale të përmbajtjes së tij, ambasadori Borchardt do t’i kishte hequr Kryeministrit Rama mundësinë për ta bërë manipulimin e tij të radhës me faktet, siç e bëri, duke dërguar skuadrën me roja. Në fjalë të fundit, me dëshirën apo pa dëshirën e tij, ambasadori i OSBE-së u përdor në këtë rast nga Kryeministri i Shqipërisë.

Rojet përreth banesës, zyrës apo çdo vendi ku gjendet ambasadori, për sytë e të huajve janë sot treguesi më domethënës për pasigurinë që sundon në vend. Përfshirja e këtij incidenti në raportet ndërkombëtare e prish imazhin e Shqipërisë shumë më tepër edhe se vjedhja e miliona eurove në pistën e aeroportit apo vrasjet për larje hesapesh midis bandave në Vlorë apo në Shkodër. E kam fjalën për imazhin që ndikon në udhëtimin e të huajve drejt Shqipërisë, kryesisht si turistë. Kërcënimi i një ambasadori nxjerr në pah pikërisht atë pasiguri, nga e cila tremben të huajt. Kryeministri ynë as që i mendon gjërat nga kjo anë. Ai madje gëzohet kur i jepet rasti të hedhë baltë mbi opozitën. Kështu veproi edhe kësaj here. Pa bërë asnjë hetim, ai nxitoi të niste drejt Brukselit, Vjenës apo Strasburgut mesazhe, ku fajësonte opozitën si kërcënuese të ambasadorit. Është pikërisht ky kryeministër, i cili ankohet kundër atyre që shajnë Shqipërinë në gjuhë të huaj.

Nga ana e saj opozita iu përgjigj në të njëjtën mënyrë. Domethënë, pa asnjë profesionalizëm. Ajo akuzoi Ramën si porositës të “kërcënimit”, me qëllim për t’i kthyer aleatët europianë kundër saj (opozitës). Pra, de facto e pranoi  se ambasadori ishte kërcënuar. Sigurisht që as Partia Demokratike nuk bëri ndonjë hetim për të arritur në këtë përfundim mbi fajësinë. Por ajo ndoqi rrugën e Ramës: shpifjes iu përgjigj me shpifje, duke përforcuar kështu tek “aleatët europianë” bindjen se, pavarësisht të vërtetës rreth fajtorit, ambasadori ishte kërcënuar. Opozitës do t’i mjaftonte një distancim nga ky akt, duke kërkuar një hetim serioz për përgjegjësit. Dhe, po t’ia thoshte zemra, le t’i shprehte ambasadorit mbështetjen e vet për të kryer detyrën. Nuk nevojitej asgjë më tepër.

Ish-kreu i grupit të LSI-së, Petrit Vasili ka deklaruar sot se Policia ka arrestuar një tjetër studente për shkrimet në pallatit të ambasadorit të OSBE-së, Bernd Borchardt.

Për ish-deputetin e LSI-së, Policia ka ndaluar sot studenten Viosana Kokla, e cila sipas Vasilit “gozhdoi” kryeministrin Rama gjatë debatit për protestat e studentëve.

“Turp. Skandal. Policia sapo ndalon studenten Viosana Kokla për Borchard. Studentja Viosana Kokla ndalohet nga policia për hesap te Borchard. Edi Rama shfrytëzon Borchard për tu hakmarrë me Viosanen studentes se arkitekturës qe e kryqëzoi kryeministrin.

Turp. Turp. Turp Policia nuk ndalon kriminelet dhe te korruptuarit por me urdher te Edi Rames do qe tju mbylle gojen te rinjve. Shiheni VIDEON kur kryqezohej Edi Rama.

Emri i saj u lakua si nga te rinjte qe kishte shenuar parullen qe beri buje ne murin e pallatit te ambasadorit te OSBE-se, ne vendin tone, Borchardt. Shenimi “turp te kesh”, me pas u lakua gjere e gjate si sulm i hapur ndaj ambasadorit. 

Sot, Ana Azizaj, ka folur me ze e figure, teksa me nje shenim te gjate ne faqen e saj ne rrjetet sociale, thote se edhe pse nuk ehste ajo qe e ka bere ate shenim, nuk ngurron te perserise “turp te keni” per pergjegjesit e situates ne vend.

“Nuk ka rendesi reforma qe nderrmerret kur vazhdon i sherben Rilindjes, nuk ka rendesi vetingu kur i sherben Rilindjes, nuk kane me rendesi fotot dhe vidiot 3D per te menduar qe Shqiperia eshte mire, nuk kane me rendesi batutat e Kryeministrit, rendesia ne kete moment eshte Shqiperia. Cdo qeveri duhet ti trembet popullit te saj. Ndaj une zgjedh te mos hesht une zgjedh te protestoj. Shqiperia eshte e shqiptareve ndaj po vazhdoje e po them turp te keni per situaten qe jemi”- shkruan ajo.

Postimi i saj ne FB

Turp te kesh
Kjo fjali kaq e shkurter beri te ndahej Shqiperia ne dy opinione kunder nderkombtareve dhe pro nderkombtareve, kunder qeverise dhe pro qeverise. Pavarsisht qe parrulla nuk eshte shkruar nga mua une e them me plot gojen Turp te kesh.
Ne Shqiperi mendoje nuk eshte monenti te ndahemi ne gjysme, jemi ne situaten ku askush nuk do te jetoje me ne Shqiperi, jemi ne gjendjen ku askush nuk do te shkollohet ne Shqiperi, jemi ne situate ku askush nuk beson me ne sistemin tone te drejtesise, jemi ne situaten ku askush seshte me i sigurte ne Shqiperi, jemi ne situaten ku askush se di cprodhime ushqimore konsumon me ne Shqiperi, jemi ne situaten ku vazhdojne te duan te na coptojne kufinjte, jemi ne situaten ku rinia nuk punesohet ne Shqiperi, jemi ne situaten ku profesioni i mjekut eshte rrenuar ne Shqiperi, jemi ne situaten ku artin mundohen ta zhdukin ne Shqiperi, jemi ne situaten ku duhet te jemi NJE.
Nuk ka rendesi qeveria, nuk ka rendesi flamuri partiak nuk ka rendesi mendimi i atyre qe komentojne anglisht per situaten ne Shqiperi, e verteta eshte Shqiperia nuk eshte mire. Nuk ka rendesi reforma qe nderrmerret kur vazhdon i sherben Rilindjes, nuk ka rendesi vetingu kur i sherben Rilindjes, nuk kane me rendesi fotot dhe vidiot 3D per te menduar qe Shqiperia eshte mire, nuk kane me rendesi batutat e Kryeministrit, rendesia ne kete moment eshte Shqiperia.
Cdo qeveri duhet ti trembet popullit te saj. Ndaj une zgjedh te mos hesht une zgjedh te protestoj.
Shqiperia eshte e shqiptareve ndaj po vazhdoje e po them turp te keni per situaten qe jemi.
🇦🇱💪🏻❤️