Të pesë ish-presidentët e gjallë të Shteteve të Bashkuara, janë paraqitur së bashku në një koncert për të mbledhur fonde për viktimat e uraganeve aktuale në Teksas, Floridë, Porto-Riko dhe Ishujt Virxhine.

Demokratët Barack Obama, Bill Clinton dhe Jimmy Carter, së bashku me republikanët, George Bush i vjetri dhe George Bush i riu, u paraqitën së bashku në skenën në Teksas, ku gjendet libraria presidenciale e ish-presidentit, George Bush i vjetri.

Presidenti aktual, Donald Trump, nëpërmjet një videoje i ka dërguar mesazh këtij tubimi, me ç’rast ish-presidentët i ka quajtur “disa prej shërbyesve më të mirë publikë të Amerikës”.

Ish-presidenti, George Bush i vjetri, 93 vjeçar, i cili e ka një formë të sëmundjes së parkinsonit, është paraqitur i ulur në karrocë.

Të ish-pesë presidentët e gjallë amerikanë, thanë se prej 7 shtatorit, i kanë mbledhur 31 milionë dollarë për ndihmë për viktimat e uraganeve.

Presidenti Donald Trump njoftoi të shtunën se do të autorizojë bërjen publike të dokumenteve sekrete që mund të japin më shumë informacion për vrasjen e Presidentit John F. Kennedy në vitin 1963.

“Nëse nuk marr ndonjë informacion të ri, do të lejoj si President që të hapen dosjet e (Presidentit) John F. Kennedy, që kanë qenë të bllokuara dhe të klasifikuara sekret për një kohë të gjatë”.

Pjesa e fundit e dosjeve sekrete ishte planifikuar të bëheshin publike me 26 tetor nëse presidenti nuk ndërhynte më parë, siç ishte parashikuar në Ligjin e vitit 1992 për Grumbullimin e të Dhënave për Vrasjen e Presidentit Kennedy.

Ligji parashikonte publikimin e të gjitha dokumentave brenda 25 vjetëve, nëse presidenti nuk gjykonte se publikimi i tyre do të dëmtonte marrëdhëniet me jashtë, operacionet ushtarake, zbulimin dhe rendin.

Ka më shumë se 3 mijë dokumenta, që nuk janë parë kurrë nga publiku dhe rreth 30 mijë të tjera, që janë publikuar me redaktime.

Shumë studiues të Kennedy-t besojnë se dokumentat e papublikuara mund të kenë detaje për udhëtimin e Lee Harvey Oswaldit në Mexico City, disa javë para se të vriste presidentin, përfshirë vizita në ambasadat sovjetike dhe kubaneze.

Oswald u tha hetuesve se vizitoi ambasadat për të marrë viza që të mund të hynte në Bashkimin Sovjetik dhe Kubë, sipas një trupe investigative të njohur si Komisioni Warren.

Më herët këtë javë, konsulenti republikan dhe njeri i besuar i Presidentit Trump, Roger Stone i tha në një intervistë drejtuesit të një emisioni radioje, Alex Jones dhe nxitës teorish konspirative që i kishte bërë thirrje Presidentin Donald Trump që t’i publikonte që të gjitha dosjet sekrete.

Drejtori i CIA-s, Mike Pompeo, tha se Koreja e Veriut, brenda disa muajsh, mund të jetë në gjendje të godasë Shtetet e Bashkuara me raketë bërthamore.

Duke folur në një forum të Fondacionit për Mbrojtje të Demokracive në Uashington, Pompeo tha se, megjithatë, ka dallim midis kapacitetit për të hedhur një raketë të vetme bërthamore dhe kapacitetit për të zhvilluar arsenal të armëve të tilla.

Në të njëjtin forum, këshilltari për siguri kombëtare i Shtëpisë së Bardhë, H.R. McMaster, tha se SHBA-ja është në garë me kohën për zgjidhjen e këtij problemi.

Koreja e Veriut ka nisur programin bërthamor disa dekada më parë dhe, këtë vit, ka shpeshtuar testet e armëve.

Dy herë në muajin korrik, ka lëshuar raketë me rreze të gjatë veprimi që potencialisht mund të arrijë tokën amerikane. Në shtator, Phenjani ka testuar po ashtu bombë hidrogjeni.

Shtëpia e Bardhë tha se çlirimi i Rakës, bastionit të fundit të madh të militantëve të Shtetit Islamik në Siri, do të hapë një fazë të re në konfliktin afatgjatë atje.

Zëdhënësja Sarah Sanders tha se rënia e Mosulit në Irak dhe çlirimi i Rakës në ditët e ardhshme e bëjnë të qartë se kalifati i vetëshpallur i grupit ekstremist po shkatërrohet.

Forcat siriane, të mbështetura nga SHBA-ja, kanë thënë të mërkurën se e kanë dëbuar Shtetin Islamik nga Raka dhe se tani po heqin minat tokësore dhe po i pastrojnë rrugët.

Mustafa Bali, zëdhënës i Forcave Demokratike Siriane, tha se po bëhen përgatitje për deklarimin zyrtar të çlirimit të qytetit.

Sanders tha se SHBA do të përqendrohet tani në ndalimin e dhunës në pjesë të tjera të Sirisë.

Ajo tha se presidenti amerikan, Donald Trump, është pranë përmbushjes së premtimit kryesor të fushatës: mposhtjes së Shtetit Islamik.

Kryetari i Komitetit të Shërbimeve të Armatosura në Senatin e Shteteve të Bashkuara, John McCain, tha se do të mbajë peng kandidatët për postet e Departamentit të Mbrojtjes, të nominuar nga Trump, derisa Pentagoni të ofrojë më shumë informata mbi strategjinë e re të luftës në Afganistan.

Duke folur për gazetarët në Capitol Hill, McCain tha se komiteti i tij ka nevojë për detaje të strategjisë në mënyrë që të sigurojë forcat e armatosura të SHBA-së në Afganistan me trajnime dhe pajisje të përshtatshme.

McCain shprehu keqardhje siç tha ai për mungesën e komunikimit me Sekretarin e Mbrojtjes, Jim Mattis.

“Kam pasur marrëdhënie më të mira pune me Sekretarin e Mbrojtjes të Presidentit Barack Obama, Ash Carter, sesa që kam me një mik të vjetër prej 20 vjetësh”, tha McCain për Mattis.

Megjithatë “ne nuk do të rrimë pa e pasur një pamje të qartë të asaj që po ndodh”, ka shtuar McCain.

Në ueb faqen e Departamentit të Drejtësisë, janë paraqitur 17 nominimet që kanë mbetur peng nga bllokada e McCainit.

Dy senatorë udhëheqës të Shteteve të Bashkuara e kanë akuzuar administratën e presidentit, Donald Trump, për zvarritje të zbatimit të legjislacionit të ri për forcimin e sanksioneve kundër Rusisë, duke thënë se administrata ka dështuar për të dhënë informacion lidhur me sektorët e mbrojtjes dhe të inteligjencës së Rusisë.

Letra e publikuar mbrëmë, është e dyta e këtij lloji nga senatori demokrat, Ben Cardin, dhe ai republikan, John McCain, që e kritikojnë Shtëpinë e Bardhë për dështim të implementimit të masës, që presidenti Trump me hezitim e ka nënshkruan më 2 gusht.

Akti i Kundërshtimit të Armiqve të Amerikës Nëpërmjet Sanksioneve, të cilin Kongresi i Shteteve të Bashkuara e ka miratuar me shumicë bindëse, i ka forcuar sanksionet ekzistuese dhe kërkon nga administrata e Trumpit që në mënyrë efektive të kërkoj leje nga Kongresi për tërheqje eventuale të sanksioneve.

Ky ligj, po ashtu, e kishte përcaktuar afatin 1 tetor që administrata të publikoj “rregulla dhe udhëzime të tjera” për individët ose entitetet që operojnë në emër të inteligjencës apo sektorëve të mbrojtjes së Rusisë, për sanksione potenciale.

Nuk ka pasur përgjigje të menjëhershme të Shtëpisë së Bardhë ndaj kësaj letre të senatorëve Cardin dhe McCain.

Presidenti i Shteteve të Bashkuara dhe senatori republikan, Bob Corker, kanë shkëmbyer mesazhe fyese në Twitter.

Derisa Trump e ka fajësuar ish-presidentin amerikan, Barack Obama, për marrëveshjen me Iranin, Corker është shprehur se Trump po e drejton vendin drejt një “Lufte të tretë botërore”.

“Senatori Bob Corker më është ‘lutur’ që ta mbështes të rikandidojë në shtetin e Tenesi”, Trump i kishte thënë jo, dhe Corker kishte hequr dorë nga gara, ka shkruar Trump në Twitter.

Tutje, presidenti Trump ka shtuar duke thënë se “ Bob Corker është përgjegjës për marrëveshjen me Iranin…”

Ndërsa senatori Corker është përgjigjur po ashtu në twitter duke shkruar se “Është turp që Shtëpia e Bardhë është bërë një qerdhe për të rritur”.

Që kur kishte shpallur pensionimin e tij nga Senati, Croker është përballur me kritika nga presidenti, Donald Trump.

Departamenti amerikan i shtetit i ka bërë thirrje Rusisë që t’i gjej dhe dënojë ata që e kanë urdhëruar vrasjen e gazetares së njohur investigative ruse, Anna Politkovskaya, në vitin 2006.

Në kumtesën e mbrëmshme, një ditë para 11 vjetorit të vrasjes së gazetares Politkovskaya, zëdhënësja e Departamentit amerikan të shtetit, Heather Nauert, tha se raportimet e kësaj gazetareje “kanë vënë dritë në shkeljen e të drejtave të njeriut në Rusi dhe për vuajtjet e viktimave të luftës në rajonin e Kaukazit Verior”.

“Ne vazhdojmë të kërkojmë nga autoritetet e Rusisë që ta identifikojnë dhe dënojnë personin apo personat që urdhëruan, planifikuan dhe e financuan këtë krim të tmerrshëm”, tha Nauert.

Anna Politkovskaya, kritike e ashpër e presidentit të Rusisë, Vladimir Putin, raportimet e së cilës e kanë zbuluar korrupsionin e nivelit të lartë në Rusi dhe abuzimet e të drejtave të njeriut në rajonin Çeçeni në Rusi, është vrarë më 7 tetor të vitit 2006, në ndërtesën ku banonte në Moskë.

Në vitin 2014, dy persona janë dënuar me burgim të përjetshëm dhe dy të tjerë me burgim, për përfshirjen e tyre në këtë vrasje.

Por, të afërmit dhe kolegët e gazetares së vrarë thonë se drejtësia nuk do ta kryejë detyrën e saj, derisa ata që e urdhëruan vrasjen e saj të identifikohen dhe dënohen.

Meqë Politkovskaya ishte vrarë në ditën kur Putin e shënon ditëlindjen e tij, janë përhapur spekulime se vrasja e saj mund të ishte “dhuratë” për presidentin rus.

Mediat raportojnë se hakerët e mbështetur nga qeveria ruse, vodhën materiale shumë të rëndësishme të spiunazhit të SHBA-së, pasi një kontraktues i Agjencisë Kombëtare të Sigurisë (NSA), i kishte vendosur materialet në kompjuterin e tij në shtëpi.

Autoritetet e SHBA-së, besojnë se vjedhja e supozuar, së pari e raportuar nga Wall Street Journal, mund të jetë kryer duke shfrytëzuar souftuerin antivirus të krijuar nga kompania me bazë në Moskë, Kaspersky Lab.

Uashtingtoni muajin e kalura i ndaloi agjencitë federale të Shteteve të Bashkuara që të përdorin produketet e Kasperskyt, duke konkluduar për “lidhje të dyshimta në mes të zyrtarëve të Kasperksit dhe inteligjencës ruse dhe agjencive tjera qeveritare”.

Kremlini ka dënuar këtë ndalim dhe themeluesi i kompanisë Eugen Kaspersky, vazhdimisht ka mohuar se kompania e tij ka lidhje me inteligjencën ruse.

Raportet mbi vjedhjen e dyshuar të NSA thanë se hakerët u kanë dhënë informata Rusisë, se si agjencia e spiunazhit amerikan shkel rrjete të huaja dhe mbron vetën nga sulmet kibernetike.

NSA nuk ka komentuar mbi këto raportime.

Të gjithë ish-pesë presidentët amerikanë, që janë gjallë, parashihet të marrin pjesë në një koncert në një universitet në Teksas, për t’i ndihmuar viktimat e uraganit. Koncerti do të mbahet më 21 të këtij muaji.

Në kumtesën e mbrëmshme, theksohet se Barack Obama, George W. Bush, Bill Clinton, George H.W. Bush dhe Jimmy Carter, do të paraqiten së bashku në koncertin në Universitetin A&M në Teksas.

Me këtë koncert do të tubohen fonde për viktimat e stuhive natyrore, që e kanë goditur pjesën jugore të Shteteve të Bashkuara dhe rajonin e Karaibeve.

Kjo shpallje u bë nga Libraria e Fondacionit Presidencial, George H.W. Bush, ku, po ashtu, theksohet se “të gjitha shitjet e biletave dhe të ardhurat e tjera” do të përdoren për ripërtritjet nga shkatërrimet e shkaktuara nga stuhitë në Teksas, Floridë dhe në Karaibe, përfshirë territorin amerikan, Porto-Riko.

Në Teksas jeton familja Bush, nga e cila George H.W. dhe djali i tij, ishin presidentë të Shteteve të Bashkuara.

Kurt Volker, i dërguari special i Shteteve të Bashkuara për përpjekjet për ndaljen e konfliktit në pjesën lindore të Ukrainës, tha se do të takohet me ndihmësin e Kremlinit, Vladislav Surkov, në kryeqytetin Beograd në Serbi.

“Ne do të takohemi me kolegun rus më 7 tetor në Beograd për të diskutuar se si ta shpejtojmë implementimin e marrëveshjes së Minskut dhe ta ripërtrijmë integritetin territoril të Ukrainës”, ka shkruar sot herët në mëngjes zoti Volker në rrjetin Twitter.

Ky do të jetë takimi i dytë ndërmjet amerikanit Kurt Volker dhe Vladislav Surkovit, që është përfaqësues i presidentit të Rusisë, Vladislav Surkov, për konfliktin në pjesën lindore të Ukrainës.

Kryetari demokrat i Komisionit të Zbulimit të Senatit thotë se “ekziston një konsensus i gjerë” se rusët kanë siguruar përmes hakerimit dokumente politike dhe e kanë bërë të njohur informacionin e siguruar, në përpjekje për të patur ndikim tek zgjedhjet presidenciale të vitit 2016.

Senatori i Virxhinias Mark Warner i bëri këto komente në një konferencë shtypi që tha të mërkurën lidhur me hetimin që po zhvillon Komisioni i Senatit për ndikimin e Rusisë në zgjedhjet presidenciale amerikane. Konferencën e shtypi senatori demokrat e dha së bashku me Kryetarin republikan të Komisionit, senatorin republikan të Karolinës së Veriut, Richard Burr.

Komisioni i Zbulimit i Senatit është njëri prej disa komisioneve që janë duke zhvilluar hetime lidhur me ndërhyrjen ruse në zgjedhjet presidenciale të Shteteve të Bashkuara dhe për mundësinë e bashkëpunimit mes Rusisë dhe anëtarëve të ekipit të fushatës së zotit Trump.

Senatori Warner tha se përpjekja e Rusisë për të patur ndikim tek zgjedhjet amerikane, po ashtu përfshin edhe disa përpjekje për të testuar dobësitë e sistemeve zgjedhore të 21 shteteve amerikane.

Senatori Burr tha se Rusia nuk ka mundur të ndikojë në procesin e numërimit të votave. Ai tha se Komisioni i Senatit është duke e vazhduar hetimin lidhur me mundësinë e bashkëpunimit të ekipit të zotit Trump me Rusinë gjatë fushatës elektorale, por ai shtoi se ende nuk ka ka një përfundim të qartë për atë që ka ndodhur.

Senatori demokrat Mark Warner tha se qeveria federale duhe të mbajë “një qëndrim më agresiv” lidhur me ndërhyrjen ruse, meqenëse hetimi i deritanishëm ka treguar për depërtimin rus në sistemet elektorale të 21 shteteve amerikane.

Megjithëse senatori republikan Burr theksoi se hetimi ende nuk ka arritur në konkluzione, ai tha se beson që komisioni nuk mund të presë derisa të përfundojë i gjithë hetimi. Ai tha se publiku duhet ta dijë se Rusia mund të ndërhyrë përsëri.

Shumica e ekipit të sigurisë kombëtare të presidentit Trump bie dakord me përfundimin e komunitetit të zbulimit se Rusia ka ndërhyrë në zgjedhjet e vitit të kaluar në favor të tij. Por Presidenti nuk ka thënë se ai u beson atyre.

Gjatë hetimit, anëtarët e komisionit si dhe stafi i hetuesve kanë zhvilluar kryesisht intervista me dyer të mbyllura me disa anëtarë të rrethit të ngushtë të presidentit dhe komunitetit të zbulimit.

Pavarësisht provokimeve të tij të vazhdueshme dhe gatishmërisë për t’u angazhuar në retorikë të nxehtë, zyrtarët e lartë të zbulimit amerikan thonë se udhëheqësi i Koresë së Veriut, Kim Jong Un nuk është i çmendur.

“Kim Jong Un është një aktor shumë racional,” tha të mërkurën zëvendësndihmës drejtorja e Qendrës së Misionit të Koresë në Agjencisë Qendrore të Zbulimit, CIA.

“Me përjashtim të retorikës agresive, Kim Jong Un nuk ka dëshirë të përballet me forcat e komandës së përbashkët (të Shteteve të Bashkuara dhe Koresë së Jugut)”, tha Yong Suk Lee në një konferencë për zbulimin në Uashington, të organizuar nga CIA.

“Kim Jong Un dëshiron atë që të gjithë sundimtarët autoritarë duan, të qeverisë për një kohë të gjatë dhe të vdesë paqësisht në shtratin e tij”, tha zonja Lee.

Vlerësimi i agjencive të zbulimit duket se është në kundërshtim me retorikën që përdoret nga Presidenti i Shteteve të Bashkuara, Donald Trump.

Në një seri mesazhesh në Twitter, Presidenti Trump e ka quajtur udhëheqësin e Koresë së Veriut një “njeri të vogël raketash” dhe në një mesazh të postuar muajin e kaluar, ai tha se Kim është “padyshim një njeri i çmendur”.

Megjithatë, zonja Lee dhe zyrtarë të tjerë të CIA-s besojnë se ka pasur një “qëllim të caktuar” në mënyrën se si udhëheqësi i Koresë së Veriut po vepron në skenën botërore.

Një gjykatë në Shtetet e Bashkuara, ka urdhëruar qeverinë e Iranit, të paguajë 63.5 milionë dollarë ish-marinsit amerikan, Amir Hekmati i cili ishte mbajtur në burgjet iraniane për katër vite.

Gjykatësja e qarkut, Ellen Huvelle, vendosi në favor të 33 vjeçarit me origjinë iraniane, Hekmati, pasi Irani nuk arriti t’i përgjigjej ankesës.

Hekmati ishte ndaluar në gusht të vitit 2011, pasi ai ishte kthyer në Iran për të vizituar familjen e tij.

Ai ishte akuzuar për spiunazh dhe i ishte shqiptuar dënim me vdekje. Dënimi ishte hedhur poshtë më vonë, nga Gjykata Supreme e Iranit dhe ai u dënua me 10 vjet burgim.

Hekmati ishte liruar në janar të vitit 2016 së bashku me disa të burgosur tjerë amerikanë, pasi Uashingtoni kishte falur dhe liruar shtatë iranianë.

Hekmati kishte paditur Iranin në vitin 2016, nën akuzën se ishte torturuar dhe mashtruar për të dhënë deklaratë të pavërtetë derisa ishte në Tehran.

Bashkë me Hekmatin, ishin liruar edhe gazetari i Washington Post, Jason Rezaian dhe dy amerikanë tjerë me origjinë iraniane.