Hartuesit e politikave në Shtetet e Bashkuara kanë ngritur shqetësime që lidhen me sigurisë kombëtare mbi paratë kineze që rrjedhin në bizneset e reja amerikane në fusha të tilla si inteligjenca artificiale dhe robotika. Por në Silicon Valley, në qendrën botërore për teknologjinë e lartë dhe inovacionin, mendojnë se lidhjet me Kinën u shërbejnë të dy vendeve, në mënyrë reciproke. Korrespondetja e Zërit të Amerikës Michelle Quinn njofton.

Në Kongresin amerikan egziston një qëndrim i qartë se Kina kërcënon sigurinë amerikane.

“Ju siguroj se kërcënimi që Kina paraqet është i vërtetë dhe se rreziqet që na shqetësojnë po zbatohen tashmë. Mosveprimi ynë ka vetëm pasoja negative dhe ne duhet të synojmë të parandalojmë çdo pasojë negative në vendin tonë“, thotë senatori republikan John Cornyn.

Ligjvënësit i druhen përparimeve të Kinës drejt teknologjisë që lidhet me mbrojtjen, të tilla si inteligjenca artificiale dhe robotika.

Por në Silicon Valley, egziston shqetësimi se një goditje ndaj investimeve kineze do të pengojë rritjen dhe inovacionin.

“Ata nuk duan të shohin që kjo të ndodhë nëpërmjet tarifave, që kanë ndikim të fortë për të mbyllur tregtinë apo politikat pra të një qasje sikurse një goditje me vare ndaj investimeve kineze, të cilat në përgjithësi kanë qenë të dobishme“, thotë Sean Randolph, i Institutit Ekonomik të Zonës së Gjirit.

Këtu, në atë që vlerësohet si takimi i parë mes SHBA-së dhe Kinës mbi teknologjinë artificiale, fokusi është vendosur tek gjetja e terrenit të përbashkët. Pjesmarrësit thonë se të dy vendet po ecin përpara në aplikimin e kësaj teknologjie në fusha të tilla si kujdesi shëndetësor, makinat e dronët dhe mund të mësojnë nga njëri-tjetri.

“Bashkëpunimi në fushën e teknologjisë është në të mirë të njerëzimit. Nuk mendoj se kemi të bëjmë me një situatë kur një vend është kundër një tjetri” thotë Tao Wang i kompanisë Saic Capital.

“Pavarësisht nga presioni apo dallimet gjeopolitike, parë nga këndvështrimi teknologjik, ne po shohim mundësitë të zgjidhim problemet e shoqërisë, qofshin ato që lidhen me kujdesin shëndetësor, kompiuterat apo transportin“, thotë Helen Liang partnere në menaxhim e kompanisë “Foundersx Ventures”.

Helen Liang është partnere në drejtimin e një firme të specializuar për të ndihmuar kompanitë që të zhvillojnë marrëdhënie biznesi. Ata po përpiqen të fusin në tregun arsimor të Kinës një prej investimeve të tyre të quajtura Piper, një çante kompjuterike që mund ta bësh vetë.

Kompanitë si Piper kanë parë gjithmonë nga Kina për shkak të numrit të madh të klientëve potencialë. Por më shumë kompani në fushën e teknologjisë artificiale po kërkojnë aktualisht ndihmë lidhur me inovacionin.

“Ne jemi mësuar me modele biznesesh që krijojnë thyerje në treg, të cilat dalin nga Silicon Valley, po këtu kjo gjë po ndryshon. Tani jemi në FinTech për shembull, duke parë modele të reja biznesi që dalin nga Kina“, thotë Nicolas Miaihe president i kompanisë Shoqëria e së Ardhmes.

“Çarja” është një term i preferuar në Silicon Valley, që përshkruar se si teknologjitë e reja mund të çojnë në rezultate të jashtëzakonshme dhe të paparashikueshme në një industri. Ky potencial entuziasmoi këta sipërmarrës, por shqetësoi ligjvënësit në Uashington.

Sekretari amerikan i Shtetit Mike Pompeo thotë se sanksionet ndaj Koresë së Veriut do të vazhdojnë të qëndrojnë në fuqi, deri në përfundimin e çarmatimit bërthamor, plotësisht të verifikueshëm, siç është rënë dakord me udhëheqësin koreanoverior Kim Jong Un.

Zoti Pompeo foli sot (të dielën) në një konferencë shtypi në Tokjo me homologët nga Koreja e Jugut dhe Japonia.

“Çarmatimi bërthamor është një përkufizim i gjërë dhe koreano-veriorët e kuptojnë dhe nuk e kanë kundërshtuar. Së dyti, ata e kuptojnë se çarmatimi bërthamor nuk ka kuptim pa verifikim, edhe kjo pranohet. Do të ketë një verifikim që lidhet me çarmatimin e plotë bërthamor. Për këtë kanë rënë dakord Presidenti Trump dhe kryetari Kim.”

Shefi i diplomacisë amerikane i cilësoi si produktive bisedimet me zyrtarët e lartë të Koresë së Veriut.

Agjencia zyrtare e lajmeve të Koresë së Veriut, KCNA, i përshkroi bisedimet si “jashtëzakonisht shqetësuese”, ndërsa citoi një zyrtar të ministrisë së jashtme, të paidentifikuar, të ketë thënë se “mënyra më e shpejtë” për të patur një Gadishull Korean pa armë bërthamore do të ishte përmes një qasjeje me faza, nga të dyja palët.

Zoti Pompeo tha se diplomatët koreano-veriorë nuk patën kundërshtime në diskutimet që ai zhvilloi me ta në Phenian. Ai tha se shpreson që do të ecet përpara në negociatat me Korenë e Veriut.

Kryediplomati amerikan tha se një pjesë e madhe e diskutimeve ishte rreth afatit kohor për çarmatimin e Koresë së Veriut dhe fillimi i deklarimit të armëve të shkatërrimit në masë.

Zoti Pompeo nuk dha detaje, por tha se kishin shpenzuar një kohë të mirë për trajtimin e këtyre dy çështjeve dhe se besonte që ishin bërë përparime në çdo elemtent të diskutimeve.

Presidenti Trump e ka ngarkuar zotin Pompeo që të mbikëqyrë realizimin e premtimeve që kryetari Kim bëri në takimin e Singaporit për çarmatimin bërthamor të gadishullit Korean.

Shtetet e Bashkuara po festojnë të mërkurën Ditën e Pavarësisë. Këtë vit, amerikanët shënojnë 242 vjetorin e shkëputjes nga Britania me piknikë, parada dhe fishekzjarre në gjithë vendin.

Presidenti Donald Trump dhe Zonja e Parë, Melania, do të mbajnë një piknik për familjet e ushtarakëve në Shtëpinë e Bardhë.

Festa e 4 korrikurt përfshin traditën e leximit të Deklaratës së Pavarësisë në shkallët e Arkivave Kombëtare në Uashington. Brenda godinës, dokumenti origjinal është i ekspozuar së bashku me Kushtetutën dhe Karta e të Drejtave.

Pas leximit, fillon një paradë para ndërtesës së Arkivave në shëtitoren e quajtur Constitution (Kushtetuta) dhe vazhdon deri në zonën mes Shtpisë së Bardhë dhe monumentit për nder të Presidentit të parë amerikan, George Washington. Mijëra vetë dalin nëpër rrugë për të ndjekur paradën.

Në Uashington mbahet gjithashtu një concert para selisë së Kongresit, Kapitolit, ku interpretojnë grupe dhe këngëtarë të njohur dhe Orkestra Simfonike Uashingtonit.

Festimet mbyllen me një shfaqje madhështore fishekzjarresh, pas perëndimit.

Yeni Gonzalez, nga Guatemala, kaloi ilegalisht kufirin e Shteteve të Bashkuara dhe u veçua nga fëmijët e saj. Zëri i Amerikës po ndjek përpjekjet që ajo po bën për të marrë fëmijët nga qendrat e largëta ku ata po mbahen. Siç njofton nga Arizona korrespondentja e Zërit të Amerikës, Celia Mendoza, ky është vetëm një ndër rastet e 2 mijë fëmijëve të veçuar nga familjet e tyre.

Pasi u mbajt për 43 ditë nga autoritetet amerikane të emigracionit dhe pasi e ndanë nga tre fëmijët e saj në kufirin jugor ndërsa po përpiqej të kalonte ilegalisht, Yeni Gonzalez u lirua me kusht.

Ajo foli me Zërin e Amerikës pasi doli nga qendra e mbajtjes së emigrantëve në Eloy, të shtetit Arizona.

“Do të filloj të kërkoj fëmijët e mi… Ka qenë shumë e vështirë për mua. Mu thye zemra në njëmijë copa kur më morën fëmijët nga krahët”, thotë zonja Gonzalez.

Ajo u mbajt për 5 javë në këtë qendër të emigracionit në Eloy të Arizonës, 3800 kilometra nga Nju Jorku, ku janë dërguar fëmijët e saj, pasi u veçuan kur po kalonin kufirin ilegalisht.

Yeni u merakos.

“U luta që të më kontaktojnë me telefon dhe më thanë ‘jo, nuk ka telefonata’. Iu luta që të mësoja diçka për fëmijët e mi, prej të cilëve nuk kam dëgjuar prej ditësh dhe më thanë ‘e di çfarë? Ti do të deportohesh në Guatemala dhe fëmijët e tu do të mbeten në duart e kësaj qeverie”, rrëfen zonja Gonzalez.

Gjatë intervistës për Zërin e Amerikës, Yeni tha se nuk ishte në dijeni të politikës për “Tolerancë Zero” që e ndau nga fëmijët e saj. Ajo tha se po ta kishte ditur, nuk do t’i sjellë fëmijët.

Tashmë ata ndodhen në Nju Jork, në qendrën Cayuga. Lirimi i Yenit me kusht u mundësua nga donacionet.

“Garancia u pagua nga disa familje, nëna të qytetit të Nju Jorkut. Falë Zotit më dërguan konfirmim me mesazh se kishin paguar garancinë prej 7500 dollarësh”, thotë Jose Orechena, avokati i Yenit.

Lirimi i saj koinçidoi me vizitën në qendrën e emigracionit në Tucson të Arizonës, nga Zonja e Parë, Melania Trump, e cila po e ndjek nga afër situatën e familjeve pa dokumenta dhe punën që po bëjnë autoritetet.

“Jam këtu për t’ju mbështetur dhe për t’ju dhënë ndihmën time për çfarë nevojitet për fëmijët dhe familjet”, tha zonja Trump.

Administrata Trump thotë se do të ribashkojë familjet.

“Ata bashkohen rrjedhimisht me familjarët, por sipas legjislacionit tonë për sa kohë që prindi mbahet në paraburgim, fatkeqësisht ata nuk mund të bashkohen dhe do të vazhdojnë të mbahen”, tha Alex Azar, Sekretar i Shëndetësisë dhe i Shërbimeve Njerëzore.

Yeni Gonzalez mezi pret të përqafojë sa më parë fëmijët e saj.

Rreth 100 myslimanë amerikanë po kandidojnë për poste publike këtë vit, shumë prej tyre demokratë që shpresojnë të bëhen pjesë e “valës blu” gjatë zgjedhjeve të mesmandatit në muajin nëntor. Gazetari i Zërit të Amerikës, Kane Farabaugh, ka shoqëruar një ish-ligjvënëse të shtetit Miçigan, e cila e dëshiron aq shumë zgjedhjen në Kongres, saqë bëri fushatë elektorale gjatë gjithë muajit të Ramazanit. Ajo fokusohet më pak tek gjinia e saj dhe besimi i saj fetar, sesa tek trajtimi i nevojave të komunitetit që ajo synon të përfaqësojë.

Gjatë orëve më të ngrohta të ditës… Përgjatë trotuareve aq të nxehta sa mbi to mund të skuqësh vezë… Rashida Tlaib shkon derë më derë në këtë lagje të qytetit Detroit, në kërkim të votave.

Ajo po e bën gjithë këtë punë pa ngrënë ushqim dhe pa pirë ujë gjithë ditën.

Arsyeja është se zonja Tlaib është myslimane, çka do të thotë se ajo agjëron gjatë muajit të shenjtë të Ramazanit.

“E di se në mediat sociale besimi im fetar përmended më shumë, por tek dyert e shtëpive nuk ma vënë në dukje”, thotë zonja Tlaib, e cila po kandidon për t’u zgjedhur në Kongresin e Shteteve të Bashkuara në zonën zgjedhore 13-të, në shtetin Miçigan.

Zonja Tlaib nuk është fillestare në politikë, pasi ajo ka shërbyer më parë në legjislaturën e shtetit të Miçiganit. Ajo është bijë emigrantësh palestinezë, por në këto rrugë të qytetit Detroit, në një lagje me shumicë afrikano-amerikane, ajo është vendase, ka lindur këtu, dhe ka ndjekur shkollat e zonës.

“Njerëzit më shumë i prek lidhja e drejtpërdrejtë me lagjen”, thotë zonja Tlaib.

Ajo pranon se pak nga njerëzit që ajo takon mund ta dinë se ajo është pranë shkrimit të historisë… sërish.

“U them se isha gruaja e parë myslimane që u zgjodha në legjislaturën e shtetit Miçigan, dhe se nëse zgjidhem në Kongresin amerikan, do të jem e para e tillë në historinë e tij”, thotë zonja Tlaib.

“A e ka të sigurtë fitoren? Jo. A ka ndonjë shans? Po. Ajo është një kandidate e jashtëzakonshme”, thotë Osama Siblani, botues i “Arab American News”.

Gazeta e përjavshme “Arab American News” ka kryesisht audiencë popullsinë e madhe arabo-amerikane të Miçiganit juglindor.

Zoti Siblani thotë se kandidatura e zonjës Tlaib dhe e dy kandidatëve të tjerë myslimano-amerikanë që po konkurrojnë në procese të tjera zgjedhore, dëshmon për një rizgjim të ri politik në komunitet.

“Dikur fshiheshim. Ndryshonim emrat tanë. Megjithë 11 shtatorin dhe epokën Trump, ne lëvizim përpara; kandidojmë në zgjedhje, fitojmë, dhe kemi ndikim domethënës tek shoqëria jonë”, thotë zoti Siblani.

“Në rrafshin kombëtar, kjo është një fushatë historike. Njerëzit që më mbështesin, si p.sh. një myslimane në Tampa që më tha ‘të lutem fito, pasi po fitove ti, ne atëherë do t’i përkasim këtij vendi’. I thashë se ne jemi që tani fitimtarë, pasi ky këtu është absolutisht vendi yt. Ka domethënie shumë më të madhe”, tregon zonja Tlaib.

Që të fitojë, asaj do t’i duhet mbështetje përtej komunitetit arabo-amerikan të Miçiganit… shumica e të cilëve nuk jetojnë në zonën elektorale që ajo kërkon të përfaqësojë dhe nuk votojnë dot për të.

Zonja Tlaib përballet me disa sfidantë që synojnë të zënë vendin e Ligjvënësit John Conyers Junior, i cili dha dorëheqjen në dhjetor pas akuzave për sjellje të papërshtatshme seksuale. Kandidati që do të përzgjidhet nga demokratët gjatë zgjedhjeve paraprake, ka shanse të mëdha drejt Kongresit amerikan, pasi për momentin nuk ka asnjë kandidat të shpallur nga republikanët.

Presidenti i Shteteve të Bashkuara, Donald Trump nuk ka pranuar që ta përjashtojë mundësinë që ta njohë aneksimin e gadishullit ukrainas të Krimesë nga Rusia. Kjo lëvizje vjen vetëm pak ditë para samitit të planifikuar të Trumpit, me presidentin rus, Vladimir Putin.

I pyetur nga gazetarët më 29 qershor se nëse janë të vërteta raportimet se Uashingtoni mund të heqë dorë nga kundërshtimi i aneksimit të Krimesë nga Rusia, Trump tha se “ne duhet ta shikojmë” këtë çështje.

Trump ka dhënë përgjigje të ngjajshme edhe kur është pyetur nëse do ta konsiderojë mundësinë që të heqë sanksionet amerikane ndaj Rusisë, që janë vendosur pas aneksimit të Krimesë. Ai ka thënë se qëllimi i samitit me Putinin është përmirësimi i marrëdhënieve Uashington-Moskë.

“Do të shohim se çfarë do të bëjë Rusia”, është shprehur Trump.

Komentet e Trumpit për shqyrtimin e heqjes së sanksioneve ndaj Rusisë, që ishin vendosur pas aneksimit të Krimesë më 2014 vijnë pas raportimeve në media, ku citoheshin liderët evropianë, të cilët kanë thënë se Trump gjatë takimit të G7-s ka diskutuar privatisht se Krimea duhet të jetë pjesë e Rusisë, sepse shumica e popullsisë është rusishtfolëse.

Trump, gjatë fushatës presidenciale më 2016, gjithashtu kishte refuzuar që të përjashtonte mundësinë e njohjes së territorit në Ukrainë të aneksuar nga Rusia dhe vazhdimisht është zotuar se do të përmirësojë marrëdhëniet me Moskën.

Por, që prej se është zgjedhur president, Trump ka ndjekur qëndrimin e SHBA-së të trashëguar nga paraardhësi i tij, Barack Obama, i cili pati thënë se me aneksimin e Krimesë është shkelur e dretja ndërkombëtare dhe vendosi sanksione mbi Rusinë dhe të njëjtën gjë bëri edhe Bashkimi Evropian.

Refuzimi i Trumpit për të riafirmuar kundërshtimin e SHBA-së ndaj ndërhyrjes ruse në Ukrainë, mund të ngjallë frikë tek aleatët evropianë, përpara takimit të ardhshëm të NATO-s, që mbahet muajin e ardhshëm.

Pas takimit të NATO-s më 11 korrik, Trump do të udhëtojë për në Helsinki për të marrë pjesë në samitin e parë kokë më kokë me Putinin më 16 korrik.

Gjatë kësaj jave u njoftua për takimin Trump-Putin. Presidenti amerikan ka thënë se ky takim është një përpjekje për të përmirësuar marrëdhëniet, pas një viti të tensionimit të tyre, për shkak të mbështetjes së Moskës ndaj Sirisë, pas sulmeve të dyshuara me armë kimike dhe pas njoftimeve se Rusia qëndron prapa një sulmi me agjent nervor, ndaj një ish-spiuni rus në Angli.

Teksa ka folur me gazetarët më 29 qershor, Trump gjithashtu ka thënë se në takimin me Putinin do ta ngrisë edhe çështjen e ndërhyrjes së dyshuar ruse në zgjedhjet presidenciale amaerikane ml 2016.

“Do të flas me të për gjithçka”, ka thënë Trump.

“Ne do të flasim për Ukrainën, do të flasim për Sirinë. Ne do të flasim për zgjedhjet…Ne nuk duam që askush të ndërhyjë në zgjedhje”, ka thënë presidenti amerikan.

Zëdhënësi i Kremlinit ka thënë më 29 qershor se Putini është i përgatitur që t’i tregojë Trumpit se Moska nuk ka tentuar që të ndikojë në zgjedhjet amerikane.

“Nëse çështja për ndërhyrjen në zgjedhje do të ngritet nga presidenti i SHBA-së, atëherë presidenti rus do të përsërisë qëndrimin se Rusia nuk ka mundur dhe nuk ka të bëjë asgjë me këtë situatë, ku insinuatat për këtë çështje janë hedhur poshtë”, është shprehur zëdhënësi i Kremlinit, Dmitry Peskov.

Përderisa ndëryrja në zgjedhjet amerikane vazhdimisht është hedhur poshtë nga Putini dhe Trump, për këtë çështje janë kryer disa hetime në Kongres, që kanë dalë me përfundime të ndryshme. Për këtë çështje është emëruar edhe këshilltar i posaçëm.

Agjencitë e inteligjencës, këshilltari i posaçëm dhe komitete të ndryshme të inteligjencës kanë ardhur në përfundim se Rusia ka tentuar që të ndikojë në zgjedhjet e vitit 2016, përmes fushatave të ndryshme në mediat sociale dhe përmes formave të tjera.

Përgatiti: Mimoza Sadiku

Ndihmës Sekretari amerikan i Shtetit për Evropën Wess Mitchell tha se Evropa është bërë përsëri skenë e konkurrencës serioze strategjike. Në një seancë dëgjimore në Senat, diplomati amerikan tha se Evropa po përballet me presione në shumë fronte si fushatat strategjike nga ana e Rusisë dhe Kinës, vala rekord e emigracionit, ambicjet e Iranit në Mesdhe dhe një krizë besimi në institucionet evropiane.

Rusia dhe Kina janë veçanërisht agresive në Evropën Qendrore dhe Lindore dhe përparësia jonë është të frenojmë agresionin rus, tha ndihmës sekretari Mitchell.

“Ne kërkojmë një marrëdhënie më të mirë me Rusinë. Por kjo mund të ndodhë vetëm kur Rusia të ndalë sjelljen e saj agresive,” tha zoti Mitchell.

Ndihmës sekretari amerikan i Shtetit tha se Shtetet e Bashkuara po rrisin angazhimin e tyre në Ballkanin Perëndimor.

Ai tha se e sheh zgjidhjen e çështjes së emrit të Maqedonisë të një përmase si marrëveshja e Dejtonit që i dha fund konfliktit të viteve 90 në Ballkan. Ai tha se efektet e suksesit të marrëveshjes mes Greqisë dhe Maqedonisë do të shërbejnë si një mundësi e mirë për të vazhduar zgjidhjen e problemeve të tjera në Ballkan, si dialogu mes Kosovës dhe Serbisë dhe gjendja në Bosnje-Hercegovinë.

Presidenti Donald Trump u takua të hënën pasdite në Shtëpinë e Bardhë Mbretin Abdullah II të Jordanisë.

Presidenti dhe Zonja e Parë Melania Trump i pritën në Dhomën Ovale mbretin Abdullah dha bashkëshorten e tij Mbretëreshën Rania.

Shtëpia e Bardhë tha se Presidenti Trump dhe mbreti jordanez prekën në takim çështje si “terrorizmi, kërcënimi nga Irani, kriza në Siri, si dhe përpjekjet për një paqe afatgjatë mes izraelitëve dhe palestinezëve.”

Këshilltari i Presidentit dhe njëkohësisht dhëndërri i tij, Jared Kushner, u takua kohët e fundit me zotin Abdullah, gjatë vizitës së tij në Lindjen e Mesme, që synonte të hidheshin bazat për një plan paqeje mes izraelitëve dhe palestinezëve.

Plani mendohet se mund të kundërshtohet nga palestinezët, ngaqë Trump njohu Jeruzalemin si kryeqytetit të Izraelit, një çështje e shumëdebatur në Lindjen e Mesme.

Presidenti i SHBA Donald Trump thotë se do të nënshkruajë një urdhër ekzekutiv mbi emigracionin për të trajtuar çështjen e ndarjes së familjeve emigrante në kufi.

“Ne duam të mbajmë së bashku familjet,” tha Presidenti Trump në Shtëpinë e Bardhë. “Do të nënshkruajmë së shpejti një urdhër ekzekutiv”, tha ai.

Komentet e tij erdhën pas njoftimeve se Sekretarja e tij e Sigurisë Kombëtare Kirstjen Nielsen kishte hartuar një akt ekzekutiv për t’u nënshkruar nga zoti Trump, që udhëzonte këtë departament për t’i mbajtur familjet së bashku në paraburgim pasi të ishin ndaluar gjatë kalimit të kufirit.

Administrata Trump është vënë nën kritika të ashpra lidhur me politikën e saj për ndarjen e familjeve emigrante kur kalojnë ilegalisht kufirin jugor të SHBA.

Ndërkohë Presidenti amerikan Donald Trump iu rikthye të mërkurën sulmeve të tij ndaj medias dhe opozitën demokrate për mënyrën se si ata po e përshkruajnë politikën e administratës së tij për të ndarë familjet e imigrantëve kur ata kalojnë në mënyrë të paligjshme kufirin jugor amerikan.

Zoti Trump thotë se mediat kryesore amerikane “nuk po përmendin sigurinë e vendit kur flasin për imigracionin e paligjshëm”. Sipas tij “ligjet amerikane të emigracionit janë më të dobtat dhe më të këqijat se kudo në botë” dhe se demokratët “nuk do të bënin asgjë për t’i ndryshuar”.

“Është faji i demokratëve, ata nuk po na japin votat e nevojshme për të miratuar legjislacionin e duhur për emigracionin“, shkruante zoti Trump duke injoruar faktin që republikanët kontrollojnë të dyja dhomat e Kongresit. “Ata duan kufij të hapur, që ushqejnë krime të tmerrshme, republikanët duan sigurinë. Por unë po përpiqem të bëj diçka” ”, shkruante zoti Trump.

Shtetet e Bashkuara u tërhoqën të martën nga Këshilli i Kombeve të Bashkuara për të Drejtat e Njeriut, duke e akuzuar atë për “subjektivizëm kronik ndaj Izraelit”, një hap që aktivistët paralajmërojnë se do ta bëjë edhe më të vështirë përparimin e të drejtave të njeriut në nivel global.

Duke qëndruar përkrah sekretarit amerikan të shtetit, Mike Pompeo, ambasadorja amerikane në OKB, Nikki Haley, kritikoi Rusinë, Kinën, Kubën dhe Egjiptin për pengimin e përpjekjeve të Shteteve të Bashkuara për reformimin e këshillit. Ajo gjithashtu kritikoi vendet që ndajnë vlerat amerikane dhe e inkurajuan Washingtonin të qëndrojë, por “nuk ishin të gatshëm të sfidojnë seriozisht status quo-në”.

Administrata e presidentit Donald Trump kishte kërcënuar prej një kohë të gjatë se do të largohej nga këshilli prej 47 anëtarësh me seli ne Gjenevë, nëse ai nuk riorganizohet.

“Shikoni anëtarësinë e këshillit dhe shihni një mosrespektim të tmerrshëm për të drejtat më themelore”, tha ambasadorja Haley, duke vënë theksin tek Venezuela, Kina, Kuba dhe Republika Demokratike e Kongos.

Nikki Haley tha gjithashtu se “përqendrimi i pabarabartë dhe armiqësia e pafundme ndaj Izraelit, është një provë e qartë se këshilli është i motivuar nga paragjykimet politike e jo nga të drejtat e njeriut”.

Sekretari Pompeo, tha se nuk kishte dyshim se këshilli dikur kishte një “vizion fisnik”.

Por “sot duhet të jemi të sinqertë. Këshilli i të Drejtave të Njeriut është një mbrojtës i dobët i të drejtave të njeriut”, tha ai.

Tërheqja e Uashingtonit është refuzimi i fundit i një angazhimi shumëpalësh, pas tërheqjes së Shteteve të Bashkuara nga marrëveshja e Parisit për klimën dhe marrëveshja bërthamore me Iranin.

Ajo pasoi edhe kritikat e shtuara ndaj Shteteve të Bashkuara për ndarjen e fëmijëve nga prindërit emigrantë në kufirin me Meksikon. Komisionari i Kombeve të Bashkuara për të Drejtat e Njeriut, Zeid Ra’ad al-Hussein, i bëri thirrje të hënën Washingtonit t’i jap fund politikës së “paskrupullt”.

Grupet për të drejtat e njeriut e kanë kritikuar administratën e presidentit Trump që nuk i ka bërë të drejtat e njeriut përparësi të politikës së jashtme

Ambasadorja Haley tha se tërheqja e Shteteve të Bashkuara nga Këshilli, “nuk është tërheqje nga përkushtimi ynë ndaj të drejtave të njeriut”.

Dymbëdhjetë grupe të të drejtave të njeriut dhe të ndihmës, përfshirë edhe organizatat, Save the Children dhe CARE, i shkruan sekretarit Pompeo duke paralajmëruar se tërheqja “do ta bëjë më të vështirë përparimin e të drejtave të njeriut dhe ndihmën për viktimat e abuzimeve gjithandej nëpër botë”.

Grupi hebraik i të drejtave të njeriut, qendra Simon Wiesenthal, mirëpriti tërheqjen amerikane dhe u bëri thirrje vendeve të tjera që të bëjnë të njëjtën gjë.

Këshilli mblidhet tri herë në vit për të shqyrtuar shkeljet e të drejtave të njeriut në të gjithë botën. Ai ka mandatuar hetues të pavarur për të shqyrtuar situatën në Siri, Korenë e Veriut, Mianmar dhe Sudanin Jugor. Rezolutat e tij nuk janë ligjërisht të detyrueshme, por kanë peshë morale.

Kur Këshilli u krijua në vitin 2006, administrata e presidentit amerikan, Xhorxh W. Bush, e shmangu atë.

Gjatë mandatit të presidentit Barack Obama, Shtetet e Bashkuara u zgjodhën dy herë radhazi nga Asambleja e Përgjithshme e OKB-së. Në vitin 2016, pas një vit pushimi, Washingtoni u rizgjodh për mandatin e tij të tretë.

Nikki Haley tha një vit më parë se Uashingtoni po rishikon anëtarësinë e tij dhe bëri thirrje për reforma dhe eliminimin e një “subjektivizmi kronik ndaj Izraelit”. Trupi ka një pikë të përhershme të rendit të ditës mbi shkeljet e dyshuara të kryera nga Izraeli në territoret e okupuara palestineze gjë të cilën Washingtoni donte që të hiqej.

Muajin e kaluar këshilli votoi për të hetuar vrasjet në Gaza dhe e akuzoi Izraelin për përdorimin e forcës së tepruar. Shtetet e Bashkuara dhe Australia ishin të vetmet që votuan kundër.

Presidenti Donald Trump pritet ta vërë theksin tek forcimi i ekonomisë dhe përpjekjet diplomatike me Korenë e Veriut, gjatë fushatës për të mbështetur republikanët në zgjedhjet e kongresit të këtij viti, ku përcaktohet fati i kontrolli të senatit dhe Dhomës së Përfaqësuesve. Aktualisht ky kontroll është në duart e republikanëve dhe demokratët e opozitës pritet të fitojnë terren duka ia ndërlikuar atij shpresat për rizgjedhje në vitin 2020.

Donald Trumpi shpreson që imazhet e përpjekjeve të tij diplomatike me Korenë e Veriut, do t’i ndihmojnë republikanët që të ruajnë kontrollin e Dhomës së Përfaqësuesve dhe Senatit.

“Por Kina ka bërë një punë të mrekullueshme. Po ashtu edhe President Xi dhe Presidenti Moon. Të gjithë po bashkëpunojmë falë meje”.

Por ditët e fundit, vëmendja është zhvendosur tek kufiri jugor i Shteteve të Bashkuara dhe protestat kundër politikës për “tolerancë zero” së administratës ndaj imigracionit të paligjshëm, që përfshin ndarjen e fëmijëve nga prindërit.

Demokratët si kongresmeni Jerrod Nadler, po ngrenë zërin.

“Këto janë gabimet e një administrate që flet në emrin tonë, por së cilës i mungon një kompas moral”.

Sekretarja e Sigurisë Kombëtare, Kirstjen Nielsen po e mbron këtë qëndrim.

“Ne duhet të bëjmë punën tonë. Nuk do të kërkojmë ndjesë se po bëjmë punën tonë.”

Zoti Trump është ndoshta në qendër të fushatës për zgjedhjet e kongresit këtë vit dhe kandidatë republikanë si Katie Arrington në Karolinën e Jugut, e mbështesin atë pa rezerva.

Kandidate republikane

“Ne jemi partia e Presidentit Donald Trump.”

Por disa republikanë paralajmërojnë kundër kultit të individit të Presidentit, përfshirë senatorin që po del në pension, Bob Corker.

“Nuk është e shëndetshme për asnjë parti që të përfundojë me një situate kulti individi përsa i takon presidentit”.

Mbështetja e ulët në sondazhe për presidentin Trump, është rritur së fundmi por pozita e tij vazhdon të jetë politikisht e luhatshme. Ndërsa afrohen zgjedhjet e Kongresit, thotë eksperti i sondazheve, Frank Newport.

“Shifrat për mbështetjen e zotit Trump nuk janë pozitive. Çdo president do që të ketë mbi 50 për qind miratim dhe për zotin Trump është 42, 43 për qind. Megjithatë këto shifra nuk janë shumë të ndryshme nga ato të disa presidentëve, një vit pas pas marrjes së detyrës”.

Presidentët Ronald Reagan, Bill Clinton dhe Barack Obama përsuan humbje në zgjedhjet e mesit të mandatit në mandatin e tyre të parë, një prirje që mund të vazhdojë edhe për zotit Trump, thotë analisti Bill Galston.

“Duket se demokratët janë më entuziastë për zgjedhjet e këtij viti sesa republikanët. Gjithashtu historikisht, partia e Presidentit humb terren në zgjedhjet që mbahen dy vjet pas zgjedhjes”.

Zoti Trump pritet t’i përqendrojë përpjekjet për të rritur mirëqenien në vend dhe paqen në arenën ndërkombëtare, ndërsa përpiqet të ndihmojë republikanët dhe veten në nëntor.