Sekretari amerikan i Shtetit, Mike Pompeo ka organizuar konferencën e parë të Shteteve të Bashkuara mbi lirinë e besimit, duke mbledhur në Uashington zyrtarë qeverish, udhëheqës fetarë, aktivistë për të drejtat civile dhe pjesëtarë të shoqërisë civile nga e gjithë bota.

Zoti Pompeo tha për faqen elektronike të Vatikanit se misioni i takimit që filloi të martën është “shumë i drejtpërdrejtë dhe i rëndësishëm”. Ai tha se synimi është “të përhapet fjala për rëndësinë e lirisë së besimit për çdo individ në botë”.

“Njerëz të të gjitha besimeve duhet të kenë të drejtën të ushtrojnë besimin e tyre ashtu si zgjedhin, ose të mos ushtrojnë një besim fetar nëse nuk duan,” tha zoti Pompeo.

Sekretari i Shtetit tha se në Uashington janë ftuar 40 ministra të jashtëm për konferencën tri-ditëshe. Ky është numri më i madh i shefave të diplomacisë të mbledhur ndonjëherë në Departamentin e Shtetit.

Siç u shpreh zoti Pompeo, administrata Trump sheh një lidhje të thellë mes lirisë së besimit, të drejtave të njeriut dhe interesave ekonomike.

“Kur njerëzve u jepet mundësia të veprojnë lirisht për sa i përket besimit, ata kanë aftësinë të arrijnë vepra madhore. Investitorët preferojnë vende ku ka liri të gjerë feje. Ata i shohin vendet me liri fetare si vende më të hapura dhe më pak të rrezikshme,” tha Sekretari i Shtetit, Pompeo.

Në një intervistë për Rrjetin e Transmetimeve të Krishtera, zoti Pompeo tha se konferenca do të dalë me një numër nismash që do të njoftohen gjatë punimeve.

Presidenti amerikan, Donald Trump, paralajmëroi presidentin iranian, Hassan Rouhani, që “asnjëherë të mos kërcënojë Shtetet e Bashkuara”, në një koment në twitter, pak kohë pasi që sekretari amerikan i shtetit, Mike Pompeo, mbajti një fjalim kritik ndaj udhëheqësve të Iranit.

“Për presidentin iranian, Rouhani: Kurrë më mos i kërcënoni Shtetet e Bashkuara, ose do të përballeni me pasoja çfarë kanë pësuar shumë pak deri tash në histori. Nuk jemi më vendi që do të rrijë duarkryq përballë fjalëve tuaja të marra të dhunës e vdekjes. Kujdes”, shkroi presidenti Trump të dielën vonë.

Ai u është përgjigjur kësisoj raportimeve të së dielës që citonin presidentin iranian Rouhani të ketë paralajmëruar presidentin Trump, “që të mos luaj me bishtin e luanit”.

“Amerika duhet ta kuptojë mirë se paqja me Iranin është nëna e paqes dhe lufta me Iranin është nëna e të gjitha luftërave”, citohet të ketë thënë ai.

Sekretari Pompeo, tha gjatë një fjalimi në Kaliforni se qeveria e Iranit është shndërruar në makth për qytetarët e Iranit.

Shefi i diplomacisë amerikane tha se Shtetet e Bashkuara nuk kanë frikë që të ushtrojnë trysni mbi qeverinë iranianë në nivelin më të lartë, duke u bërë thirrje aleatëve të Shteteve të Bashkuara që t’i bashkohen trysnisë financiare mbi qeverinë e Teheranit.

“Kjo vlen posaçërisht për aleatët në Lindjen e Mesme dhe në Evropë, qytetarët e të cilëve janë terrorizuar nga veprimtaritë e dhunshme të regjimit për dekada të tëra”, tha sekretari Pompeo.

Ai tha se administrata e presidentit Trump, nuk do të heshtë përballë, siç tha ai, krimeve dhe shkeljeve të shumta të qeverisë iraniane.

Kjo përfshinë kleptokracinë, thaë sekretari Pompeo, duke nënvizuar se ata në krye kanë shpenzuar mirëqenien e njerëzve në terrorizëm e vjedhje dhe në zellin për të përhapur revolucionin islamik në vende të tjera.

Sekretari Pompeo tha se ekonomia e Iranit “është e shkëlqyer”, por vetëm për elitën, duke akuzuar ajatollahët dhe udhëheqësit e lartë për mbushje të xhepave të tyre me miliarda dollarë, ndërsa një e treta e iranianëve jetojnë në varfëri.

“Gjykuar nga pasuria e tyre e madhe, ata duken më të shqetësuar me pasuritë sesa me besimin”, tha ai. “Këta njerëz të shenjtë hipokritë kanë ngritur të gjitha llojet e skemave mashtruese që të bëhen disa prej burrave më të pasur në botë, ndërsa njerëzit e tyre vuajnë”.

Derisa sekretari Pompeo po fliste për mungesën e lirisë së shprehjes në Iran, ndërpre nga një protestues. Sekretari qëndroi i qetë para se të theksonte se iranianët duhet të kenë të njëjtën liri të shprehjes.

Sekretari njoftoi gjithashtu se BBG, që mbikëqyrë Zërin e Amerikës, po ndërmerr hapa të rinj për t’i ndihmuar iranianët të shmangin censurën e internetit. BBG gjithashtu po hap një kanal të ri 24 orësh në gjuhën farsi në televizion, radio dhe rrjetet sociale.

Ai tha se synimi i Shteteve të Bashkuara është që të shohë iranianët të jetojnë brenda vendit të tyre njësoj sikurse edhe iranianët ne Shtetet e Bashkuara.

Në SHBA, ligjvënësit demokratë po përpiqen të detyrojnë një përkthyese të qeverisë për të dëshmuar rreth asaj që është diskutuar gjatë takimit kokë më kokë të Presidentit Donald Trump me udhëheqësin rus Vladimir Putin në Helsinki, megjithëse analistët ligjorë thonë se kjo nuk ka gjasa të ndodhë – përveç rastit nëse vetë presidenti e lejon këtë.

Trump dhe Putin u takuan privatisht për më shumë se dy orë të hënën në Helsinki.

Në takim ishin të pranishëm vetëm përkthyesit dhe hollësitë e asaj që u diskutua mbeten të panjohura.

Demokratët duan ta detyrojnë përkthyesen e qeverisë, Marina Gross, të dëshmojë përpara ligjvënësve, ndërkohë që republikanët po e bllokojnë përpjekjet e tyre.

Thirrja që përkthyesja të dëshmojë ngre pikëpyetje në lidhje me ligjshmërinë, privilegjin ekzekutiv dhe kodin etik për përkthyesit, të cilët krenohen me konfidencialitetin dhe me besimin që u jepet.

“Nuk ka asnjë precedent për të kërkuar që përkthyesja të detyrohet të dëshmojë,” tha për Zërin e Amerikës studiuesi William Pomeranz.

Pomeranz, i cili është zëvendës drejtor i Institutit Kennan për Studimet e Avancuara Ruse të Qendrës Woodrow Wilson në Uashington, tha se ai nuk pret që përkthyesja të merret në pyetje nga Kongresi “veçanërisht për shkak se vetë synimi i takimit Trump-Putin ishte që të ishte një bisedë jashtë protokollit”.

Zyrtari më i lartë i zbatimit të ligjit në Shtetet e Bashkuara, që po mbikëqyr hetimin lidhur me ndërhyrjen ruse në zgjedhjet e vitit 2016, i ka dalë në mbrojtje procesit të ndjekjes penale të agjentëve të huaj, të cilët mund të mos dalin kurrë përpara një gjykate amerikane.

Duke folur të enjten në një forum për sigurinë në Kolorado, zëvendës Prokurori i Përgjithshëm Rod Rosenstein tha se shtrirja e zbatimit të ligjit në Shtetet e Bashkuara nuk duhet të nënvlerësohet.

“Ka shumë njerëz që mendonin se ishin të sigurt nën mbrojtjen e qeverive të huaja, kur kryen krime kundër Amerikës, por më vonë e kanë gjetur veten në burgjet amerikane”, tha ai.

Një javë më parë, zoti Rosenstein njoftoi akt-padinë e Prokurorit të Posaçëm Robert Mueller ndaj 12 shtetasve rusë për akuza që lidhen me ndërhyrjen e Rusisë në zgjedhje.

Drejtori i Zbulimit Kombëtar amerikan, Dan Coats tha se kërcënimi i Rusisë ndaj Shteteve të Bashkuara vazhdon dhe se duhet të ndërmerren masa për të parandaluar një ndërhyrje ruse në zgjedhjet e këtij viti për Kongresin.

Duke folur në Kolorado, zoti Coats tha se është e pamohueshme që rusët qëndrojnë në krye të sulmeve kibernetike kundër Shteteve të Bashkuara si dhe të përpjekjeve për të përçarë SHBA nga aleatët, duke minuar vlerat bazë të vendit.

Ai tha gjithashtu se nuk ka dyshim që presidenti rus Vladimir Putin është drejtpërdrejt përgjegjës për këto veprime.

Zoti Coats pranoi se ishte befasuar nga lajmi se zoti Putin ishte ftuar të vizitonte Shtëpinë e Bardhë.

Drejtori i Zbulimit Kombëtar tha se agjencitë amerikane të inteligjencës do të shohin se çfarë rreziqesh të mundshme do të paraqiste një vizitë e tillë dhe do t’ia ofronte informacionin presidentit Trump.

Departamenti i Shtetit ka denoncuar kërkesën e Rusisë për të marrë në pyetje disa shtetas amerikanë në këmbim të lejimit të një hetuesi amerikan që të marrë në pyetje 12 zyrtarë rusë të paditur nga Prokurori i Posaçëm Robert Mueller për ndërhyrjen e tyre në zgjedhjet amerikane.

Njëri nga amerikanët që Kremlini dëshiron ta marrë në pyetje është ish ambasadori i Shteteve të Bashkuara në Rusi. Shtëpia e Bardhë tha të mërkurën se presidenti amerikan nuk ka përjashtuar mundësinë e lejimit të zyrtarëve rusë për të marrë në pyetje amerikanët.

Gjatë samitit të Helsinkit mes Presidentit të amerikan Donald Trump dhe homologut të tij rus Vladimir Putin, udhëheqësi rus ofroi një marrëveshje. Ai tha se Prokurori i Posaçëm amerikan Robert Mueller mund të vijë në Rusi dhe të hetojë 12 rusët e paditur nëse Kremlini mund të marrë në pyetje 11 amerikanë që dyshohet se kanë bërë veprime të paligjshme në Rusi.

Synimi kryesor i Moskës është investitori me qendër në Londër, Bill Browder, i cili i ka prishur marrëdhëniet me Kremlinin. Vladimir Putin pretendon se bashkëpunëtorët e zotit Browder kanë realizuar fitime të mëdha në Rusi pa paguar taksa dhe se disa nga paratë janë transferuar jashtë vendit me ndihmën e oficerëve amerikanë të zbulimit.

Departamenti i Shtetit të mërkurën hodhi poshtë pohimet e Rusisë, duke i quajtur ato “absolutisht absurde”.

“Ne vazhdojmë t’u bëjmë thirrje autoriteteve ruse që të punojnë me Departamentin amerikan të Drejtësisë për të ndjekur ata në Rusi të cilët në fakt kanë kryer skemën mashtruese të cilës i referohet Rusia dhe që kishte në shënjestër jo vetëm zotin Browder, por edhe kompaninë e tij dhe të tjerët, si dhe popullin rus në përgithësi”, tha Heather Nauert, Zëdhënëse e Departamentit të Shtetit.

Por Shtëpia e Bardhë nuk e ka hedhur poshtë ofertën e Putinit.

“Ka patur disa biseda për këtë, por Shtetet e Bashkuara nuk kanë ndërmarrë asnjë angazhim. Presidenti do të punojë me ekipin e tij dhe ne do t’ju njoftojmë nëse do të ketë ndonjë zhvillim mbi këtë çështje”, tha Sarah Sanders, zëdhënëse e Shtëpisë së Bardhë.

Prokurorët rusë duan të marrin në pyetje disa ligjvënës amerikanë, oficerë të sigurisë dhe diplomatë, duke përfshirë ish-ambasadorin e amerikan në Rusi Michael McFaul. Zoti McFaul i ka kërkuar Shtëpisë së Bardhë të dënojë në mënyrë kategorike atë që ai e quajti “kërkesë qesharake nga Putini”. Por edhe para samitit të Helsinkit, McFaul shprehu shqetësimin rreth qëndrimit të Presidentit Trump ndaj Rusisë.

“Frika ime më e madhe është se Presidenti Trump do të jetë shumë miqësor dhe lavdërues me Vlaidmir Putinin”, tha ish ambasadori amerikan në Ukrainë.

Trump të mërkurën i hodhi poshtë këto kritika.

“Asnjë president nuk ka qenë më i ashpër se sa unë kundër Rusisë. Ju duhet të shikoni se çfarë kemi bërë, shikoni sanksionet, shikoni ambasadorët që ne kemi tërhequr”, tha Presidenti Trump.

Në një zhvillim tjetër, një grua që dyshohet se është agjente e Rusisë është arrestuar në Shtetet e Bashkuara. Ministria e jashtme ruse thotë se arrestimi i së dielës ishte një përpjekje për të minuar suksesin e samitit Trump-Putin para se ai të ndodhte.

Presidenti i SHBA, Donald Trump tha të mërkurën se ai nuk beson se Rusia po vazhdon të verë në shënjestër Shtetet e Bashkuara me sulme kibernetike, koment që bie ndesh drejtpërdrejt me një vlerësim të bërë javën e kaluar nga Dan Coats, drejtori i zbulimit kombëtar amerikan.

Presidenti Trump, gjatë një takimi me kabinetin e tij në Shtëpinë e Bardhë, tundi kokën dhe tha “jo” kur u pyet nëse Rusia ende po përpiqet të ndërhyjë në zgjedhjet amerikane.

Coats tha javën e kaluar në një institut studimor të Uashingtonit se “Infrastruktura digjitale që i shërben vendit është nën sulm të drejtpërdrejtë”, dhe veçoi pa mëdyshje Rusinë si “aktorin e huaj më agresiv”.

Senatori republikan Lindsey Graham citoi hendekun e gjerë midis pikëpamjeve të Presidentit Trump dhe zotit Coats mbi Rusinë, duke thënë: “Një mospërputhje e madhe midis deklaratës së Presidentit Trump dhe paralajmërimit të Coats. Është e domosdoshme t’i shkojmë deri në fund asaj që po ndodh, për të mbrojtur veten përpara zgjedhjeve të vitit 2018. Pikëpamja ime personale: rusët po e bëjnë përsëri.”

Presidenti Trump u tha gazetarëve: “Punët me Rusinë po shkojnë shumë mirë, ndoshta më mirë se në kohën e çdo presidenti tjetër; Asnjë president nuk ka qenë aq i fortë sa unë me Rusinë”.

Më parë, në një varg komentesh në Twitter, zoti Trump komentoi përsëri për samitin e tij të me Presidentin rus Vladimir Putin, duke thënë se kritikët e tij vuanin nga “sindroma anti-Trump”.

“Disa njerëz e urrejnë faktin që unë kalova mirë me Presidentin Putin,” shkruante në Twitter. “Për ata është mirë të hapnim një luftë sesa të shihnin këtë.”

“Shumë njerëz me inteligjencë e pëlqyen performancën time në konferencën për shtyp në Helsinki,” tha zoti Trump. “Putin dhe unë diskutuam shumë tema të rëndësishme në takimin tonë të mëparshëm. Ne shkuam mirë, gjë që me të vërtetë shqetësoi shumë urryesit, të cilët donin të shihnin një ndeshje boksi.”

Komentet e presidentit në Twitter erdhën disa orë pasi ai deklaroi se e pranonte përfundimin e komunitetit amerikan të zbulimit se Rusia ndërhyu në zgjedhjet presidenciale të vitit 2016, duke marrë mbrapsht komentet e tij të së hënës, ku mbështeste mohimin e zotit Putin për ndërhyrjen e Moskës.

Zoti Trump tha se pasi shqyrtoi një transkript të komenteve të tij në Helsinki, e kuptoi se kishte folur gabim.

Por ai shtoi se veprimet ruse nuk patën ndikim në rezultatin e fitores së tij ndaj demokrates Hillary Clinton dhe përsëriti deklaratën e tij të shpeshtë duke mohuar se ka pasur ndonjë bashkëpunim të fshehtë mes fushatës së tij dhe operativëve rusë. Prokurori i posaçëm i SHBA, Robert Mueller, vazhdon hetimin e tij 14-mujor për ndërhyrjen ruse.

Presidenti Trump tha gjithashtu se administrata e tij do të bëjë gjithçka mundet për të penguar përpjekjet e Rusisë për të ndërhyrë në zgjedhjet e nëntorit në Kongres.

“Ne do ta ndalojmë këtë,” u zotua Presidenti.

REAGIME NË KONGRES

Mbrojtja që Presidenti Trump i bëri samititt të Helsinkit me Presidentin rus Vladimir Putin, nuk e ka shuar aspak zemërimin në Kongres, ku ligjvënësit kërkuan të mërkurën përgjigje nga administrata dhe bënë thirrje për miratimin e ligjeve që ndëshkojnë Moskën.

“Amerikanët dhe anëtarët e këtij komisioni meritojnë të dinë se për çfarë po bie dakord presidenti me autokratët e huaj pas dyerve të mbyllura,” tha demokrati kryesor në Komisionin e Senatit për Marrëdhëniet me Jashtë, Bob Menendez i Nju Xhersit.

Menendez shprehu habi për deklaratat e Rusisë që sinjalizonin gatishmëri për të nisur punën për marrëveshje bashkëpunimi në fushën e sigurisë, për të cilat presidentët Trump dhe Putin thuhet se kanë rënë dakord gjatë takimit të tyre.

“Mediat pro-Kremlinit në këtë moment po shpërndajnë më shumë informacione … sesa ato që di unë si demokrati më i lartë në këtë komision, sesa di çdo anëtar tjetër i komisionit dhe sesa dinë amerikanët”, tha senatori.

Sekretari i Shtetit Mike Pompeo pritet të dëshmojë përpara komisionit javën e ardhshme. Kreu i komisionit, republikani Bob Corker, tha se nuk janë vetëm demokratët që kërkojnë përgjigje.

Një aktiviste ruse 29-vjeçare për të drejtën e armëmbajtjes, e dyshuar si agjente e fshehtë e Moskës mund të ketë qenë në kontakt me operativët e Kremlinit ndërsa jetonte në Shtetet e Bashkuara, thanë prokurorët të mërkurën në dokumentet e paraqitura në gjykatë, ku ajo akuzohet gjithashtu se ka përdorur seksin dhe mashtrimin për të krijuar lidhje në qarqe me influencë.

Maria Butina, është vëzhguar nga FBI-ja duke ngrënë privatisht me një diplomat rus, i dyshuar si operativ i zbulimit në javët e para se ai të largohej nga SHBA, marsin e kaluar, thanë prokurorët. Ajo gjithashtu kishte informacione kontakti për njerëz që hetuesit besojnë se ishin punonjës të Shërbimit Federal rus të Sigurisë, pasuese e KGB-së.

Faktet e paraqitura nga prokurorët, që synonin ta bindnin gjykatësin për ta mbajtur Butinën në paraburgim, u shtohen pohimeve të Departamentit të Drejtësisë, sipas të cilit ajo punonte fshehurazi për të vendosur linja komunikimi të fshehtë me Kremlin dhe për të depërtuar në organizata politike amerikane, duke përfshirë Shoqatën Kombëtare të Armëve si dhe të mblidhte informacione që ia raportonte një zyrtari të lartë rus.

Prokurorët pohuan gjithashtu se ajo kishte një marrëdhënie personale me një operativ politik amerikan dhe i kishte ofruar seks një personi tjetër në këmbim të një posti brenda një grup interesi.

Dokumentet e gjykatës nuk përmendin individët ose grupin e interesit.

Butina pret të dalë në gjyq nën akuzat për komplot dhe për veprimtari si agjente e huaj për Rusinë e paregjistruar pranë autoriteteve amerikane. Një gjykatës urdhëroi të mërkurën që Butina të mbahet në burg, ndërkohë që çështja vazhdon të trajtohet në sistemin gjyqësor.

Duke përmendur lidhjet e saj të zbulimit, prokurorët argumentojnë se Butina përbën një rrezik “ekstrem” për largim nga SHBA, ku ajo jeton me një vizë studenteje.

Avokati i saj i ka quajtur dyshimet rreth saj të ekzagjeruara dhe ka mohuar se Butina është agjente ruse.

Butina u arrestua gjatë fundjavës pas shenjave se planifikonte të largohej nga zona dhe ndoshta nga vendi.

Presidenti amerikan Donald Trump duket se e vuri në dyshim detyrimin e SHBA për të mbrojtur Malin e Zi në kuadrin e NATO-s.

“Mali i Zi, – tha ai – ka njerëz shumë agresivë. Ata mund të bëhen agresivë dhe… urime, jemi pastaj në Luftën e Tretë Botërore”.

Presidenti i bëri komentet gjatë një interviste me komentatorin Tucker Carlson të rrjetit Fox News, pasi u pyet se përse duhet që ushtarët amerikanë të shkojnë në Mal të Zi për ta mbrojtur atë vend nga një sulm i mundshëm.

Presidenti Trump i ka kritikuar shpesh anëtarët e tjerë të NATO-s rreth kontributit të tyre financiar për aleancën, duke thënë se SHBA mbajnë pjesën më të madhe të barrës.

NATO-ja, e themeluar në vitin 1949 për të frenuar kërcënimin ushtarak të Bashkimit Sovjetik, mbështetet në epërsinë ushtarake të Shteteve të Bashkuara për t’u përballur me një mori kërcënimesh në kufijtë e Evropës, duke përfshirë Rusinë.

Angazhimi për mbrojtje reciproke është shtylla e aleancës së NATO-s.

Biseda Carlson-Trump në Fox News.

CARLSON: Përse duhet që djali im të shkojë në Mal të Zi për ta mbrojtur atë nga sulmi? Përse të jetë kështu?

TRUMP: E kuptoj çfarë po thoni. Unë kam shtruar të njëjtën pyetje. Mali i Zi është një vend i vogël me njerëz shumë të fortë.

CARLSON: Po. Unë nuk jam kundër Malit të Zi, ose Shqipërisë.

TRUMP: Jo, por meqë ra fjala, ata janë njerëz shumë të fortë. Ata kanë njerëz shumë agresivë. Ata mund të bëhen agresivë dhe… urime jemi pastaj në Luftën e Tretë Botërore. Unë e kuptoj këtë, por kështu janë ndërtuar gjërat.

Nga të gjitha pyetjet e ngritura për Presidentin Donald Trump dhe Presidentin rus Vladimir Putin pas takimit të tyre në Helsinki, asnjë nuk përmendi financierin britanik të lindur në Shtetet e Bashkuara, Bill Browder.

Por presidenti Putin e veçoi atë gjithsesi duke sugjeruar se do t’i jepte Prokurorit të Posaçëm Robert Mueller qasje tek 12 rusët e akuzuar për ndërhyrje në zgjedhjet e vitit 2016 në SHBA, nëse hetuesit rusë mund të merrnin në pyetje mashtruesit me taksat.

“Për shembull, bashkëpunëtorët e biznesit të zotit Browder kanë fituar mbi 1.5 miliardë dollarë në Rusi, dhe nuk kanë paguar asnjë taksë, as në Rusi, as në Shtetet e Bashkuara, por paratë e tyre kanë ikur nga vendi”, tha zoti Putin, duke përsëritur akuzat që janë konsideruar prej kohësh si të pabazuara.

Browder, Drejtor Ekzekutiv i kompanisë Hermitage Capital, ka qenë forca lëvizëse prapa Aktit Magnitsky, një ligj amerikan i vitit 2012 që autorizon sanksione kundër abuzuesve të të drejtave të njeriut në Rusi, që ngrin pasuritë e tyre dhe ndalon hyrjen e tyre në Shtetet e Bashkuara.

I titulluar pas avokatit të zotit Browder, Sergei Magnitsky, i cili vdiq mes akuzave për rrahje dhe neglizhim mjekësor në një burg rus pas punës së tij për të ekspozuar një skemë të mashtrimit të taksave nga zyrtarët rusë, ky ligj amerikan, që është miratuar më vonë edhe në shtatë vende të tjera, mund të jetë kërcënimi më i madh për pasuritë e mëdha personale të liderit rus.

Qeveria ruse, e cila ka mohuar akuzat për mashtrim dhe zyrtarisht ia atribuoi vdekjen e Magnitskyit një goditjeje në zemër, ka vazhduar ta ndjekë Browderin, së fundmi duke kërkuar që ai të ndalohej ndërsa ishte në Spanjë. (( www.voanews.com/a/putin-critic-browder-detained-released-by-spanish-police/4415846.html ))

Vetëm pas mbërritjes së tij në një stacion policor, autoritetet zbuluan se urdhri i Interpolit ndaj zotit Browder kishte skaduar.

Browder i tha Shërbimit rus të Zërit të Amerikës se fakti që udhëheqësi rus përsëri e përmendi atë me emër në një forum publik të profilit të lartë, provon se sanksionet perëndimore po ndihen në Moskë.

((http://old.themoscowtimes.com/sitemap/free/2006/7/article/putin-has-no-answers-in-browder-visa-case/203711.html ))

“Mendoj se Putin po e merr personalisht çështjen për shkak të gjithë suksesit që kam pasur në miratimin e aktit Magnitsky kudo në botë,” tha Browder. “Ai nuk e fshehu faktin se shfuqizimi i Aktit Magnitsky është prioriteti i tij i vetëm më i madh i politikës së jashtme. Ai duket qartë se është shumë i tronditur dhe i mërzitur nga të gjithë njerëzit e ndryshëm që janë sanksionuar sipas këtij akti dhe programeve të tjera të sanksioneve, dhe kjo përbën thembrën e tij të Akilit “.

Browder i ka thënë Zërit të Amerikës në intervista të mëparshme se një nga arsyet kryesore përse Putini e urren Aktin Magnitsky, është se ai u kërkon njerëzve përreth tij të kryejnë krime shumë të rënda në emër të tij, siç janë sekuestrimi i pasurive dhe pronave private në mënyrë të paligjshme.

Presidenti Donald Trump, deklaroi në krah të udhëheqësit rus Vladimir Putin, se nuk shihte ndonjë arsye për të besuar se Moska ndërhyri në zgjedhjet, të cilat e bënë atë president të SHBA në vitin 2016.

Të gjitha agjencitë kryesore të zbulimit amerikan kanë arritiur në përfundimin se ka pasur një ndërhyrje të tillë nga Rusia gjatë zgjedhjeve dhe kjo çështje është fokusi i një hetimi të madh federal që ka vënë në shënjestër jo vetëm rusët, por edhe anëtarë të stafit të fushatës zgjedhore të zotit Trump.

“Presidenti Putin ishte jashtëzakonisht i fortë dhe i fuqishëm në mohimin e tij sot,” tha Presidenti Trump duke folur rreth kësaj çështjeje.

Nga ana e tij, zoti Putin tha se i kishte deklaruar Presidentit Trump gjatë bisedimeve të tyre se “shteti rus nuk ka ndërhyrë kurrë dhe nuk planifikon të ndërhyjë në procesin e brendshëm të zgjedhjeve amerikane”.

Zoti Trump u tha gazetarëve në një konferencë shtypi në pallatin presidencial të Finlandës se ai e kaloi një “kohë të gjatë” në bisedime duke trajtuar çështjen e ndërhyrjes ruse.

Presidenti amerikan tha se nuk e kritikoi drejtpërdrejt homologun e tij rus lidhur me këtë çështje apo ndonjë tjetër, për të cilën Uashingtoni dhe Moska kanë dallime të mëdha.

Politikanët amerikanë, në të dy anët e spektrit politik, si dhe ish-zyrtarë amerikanë të zbulimit dhe diplomatë filluan t’i kritikojnë ashpër komentet e zotit Trump, edhe para se presidenti të hipte në avion për t’u kthyer në SHBA.

Udhëheqësit, optimistë

Të dy udhëheqësit i karakterizuan bisedimet mes tyre si të mira.

“Pritshmëritë tona janë të bazuara në realizëm, por shpresat tona janë të bazuara në dëshirën e Amerikës për miqësi, bashkëpunim dhe paqe”, tha Presidenti Trump. “Dhe unë mendoj se mund të flas edhe në emër të Rusisë, kur e them këtë.”

Të dy presidentët kaluan më shumë se dy orë duke folur ballë për ballë në prani të vetëm përkthyesve. Ky diskutim u pasua nga bisedime më të gjera me praninë e ndihmësve.

“Marrëdhënia jonë kurrë nuk ka qenë më e keqe se sa është tani, megjithatë, kjo ndryshoi që nga rreth katër orë më parë,” deklaroi presidenti i SHBA në konferencën e shtypit.

Hetimi vazhdon

Takimi i së hënës erdhi tre ditë pasi prokurori i posaçëm Robert Mueller paditi 12 oficerë të inteligjencës ruse, duke i akuzuar ata për ndërhyrje në zgjedhje për të ndihmuar zotin Trump të fitonte Shtëpinë e Bardhë.

Të hënën, Presidenti Putin në konferencën e shtypit, ftoi hetuesit e zotit Mueller për të vizituar Rusinë.

Udhëheqësi rus sugjeroi gjithashtu që zoti Mueller t’u dërgonte një kërkesë autoriteteve ruse lidhur me personatg e akuzuar në SHBA.

“Organet tona ligjzbatuese janë plotësisht të aftë ta bëjnë marrjen në pyetje dhe të dërgojnë materialet e duhura në Shtetet e Bashkuara”, tha zoti Putin.

Rusia nuk ka traktat ekstradimi me Shtetet e Bashkuara, prandaj nuk ka gjasa që t’i dorëzojë të dyshuarit në Shtetet e Bashkuara për t’u gjykuar.

Paditë e reja bënë që një numër senatorësh amerikanë, mes tyre edhe një republikan, të kërkonin që zoti Trump të anulonte samitin e tij me Presidentin Putin.

Në konferencën e shtypit zoti Putin u pyet nëse qeveria e tij kishte informacion kompromentues mbi Presidentin e SHBA, një referencë për të ashtuquajturën “Dosje Steele” që përmban informacione të paprovuara për njërën nga vizitat e zotit Trump në Moskë kur ishte biznesmen.

“Kam qenë vetë oficer i shërbimit të fshehtë, dhe e di se si bëhen dosjet,” u përgjigj zoti Putin. Ai shtoi se është “marrëzi e plotë” të imagjinohet se Rusia përpiqet të mbledhë materiale komprometuese për çdo figurë të rëndësishme amerikane të biznesit që viziton vendin.

Gjatë javës së tij në Evropë, zoti Trump i sfidoi aleatët tradicionale të SHBA në çdo hap – duke filluar nga një samit i NATO-s në Bruksel, ku ai kritikoi krerët europianë se nuk shpenzojnë më shumë për mbrojtjen.

Ai e vuri veten në mes të një polemike të brendshme politike në Londër, ku i tha një gazete se kryeministrja Theresa May kishte injoruar këshillat e tij rreth asaj se si duhej bërë dalja e Britanisë nga Bashkimi Evropian.’

Ai gjithashtu deklaroi se Boris Johnson, i cili ishte larguar nga kabineti i zonjës May si ministër i jashtëm për mosmarrëveshjet rreth planit të saj për çështjen Brexit, “do të ishte një kryeministër i shkëlqyer”.

Një ndihmëse e një zyrtari të lartë qeveritar rus nën sanksionet amerikane, u akuzua të hënën për komplot për t’u infiltruar në organizatat amerikane, si pjesë e operacioneve të ndikimit të Moskës në Shtetet e Bashkuara.

Maria Butina, 29 vjeçe, u arrestua të dielën nën akuzat për komplot për të vepruar si agjente e qeverisë ruse në Shtetet e Bashkuara, pa njoftuar prokurorin e përgjithshëm. Butina u paraqit para një gjykatësi federal në Gjykatën e Qarkut në qarkun e Columbias, në pritje të një seance dëgjimore të mërkurën.

Sipas një dëshmie të FBI-së, në periudhën ndërmjet viteve 2015 dhe 2017, Maria Butina punoi si ndihmëse e një zyrtari të lartë të Bankës Qendrore Ruse, që më parë shërbeu në legjislaturën e vendit. Në dëshmi nuk identifikohet zyrtari rus, por thuhet se ai u vu nën sanksionet e Departamentit amerikan të thesarit në muajin prill.

Në muajin prill Departamenti amerikan i thesarit, shpalli sanksionet kundër 17 zyrtarëve të lartë qeveritar rusë, përfshirë Alexander Torshin, zëvendës guvernator i Bankës Qendrore ruse.

Maria Butina akuzohet se derisa paraqitej si studente në Shtetet e Bashkuara, punoi nën drejtimin e Torshinit për të avancuar interesat ruse në Shtetet e Bashkuara. Si pjesë e përpjekjeve të saj, ajo ndërveproi me dy qytetarë amerikanë të paidentifikuar, për të organizuar takime dhe darka me amerikanë me ndikim.

Butina u takua me amerikanin e parë në Moskë në vitin 2013. Amerikani punoi me Butinën “për të organizuar së bashku prezantime me amerikanë që kanë ndikim në politikën e Shteteve të Bashkuara, duke përfshirë një organizatë që promovon të drejtën për mbajtjen e armëve … me qëllim të avancimit të agjendës së Federatës Ruse”, thuhet në dëshminë e FBI-së.

Shtetasi i dytë i paidentifikuar amerikan u përfshi në një seri komunikimesh nëpërmjet postës elektronike në vitet 2016 dhe 2017, që tregojnë përpjekjet e Butinës që “të organizojë një seri darkash në distriktin e Columbias dhe në New York, duke përfshirë shtetas rusë dhe amerikanë që kanë ndikim në politikën e Shteteve të Bashkuara”, thuhet në dëshmi.

Dëshmia e përshkruan Rusinë si një nga “kërcënimet kryesore të shërbimeve shtetërore të zbulimit ndaj interesave të Shteteve të Bashkuara, bazuar në aftësitë, qëllimin dhe hapësirën e gjerë operacionale”.

Një Juri e Madhe federale ngriti të premten akuza ndaj 12 oficerëve të shërbimeve ushtarake ruse të zbulimit, për depërtim në vitin 2016 në rrjetin kompjuterik të kandidates demokrate për presidente të SHBA-së Hillary Clinton dhe Partisë Demokratike.

Presidenti amerikan, Donald Trump, tha të hënën në një konferencë të përbashkët shtypi me presidentin rus, Vladimir Putin, se ndërsa ai kishte besim në agjencitë e zbulimit të Shteteve të Bashkuara, i beson mohimit të Putinit se Rusia ndërhyri në zgjedhjet amerikane.

Një numër figurash politike në Shtetet e Bashkuara reaguan pas komenteve të Presidentit Donald Trump në Helsinki, i cili nuk mbajti anën e agjencive amerikane të zbulimit, që kanë arritur në përfundimin se Rusia ndërhyri në zgjedhjet presidenciale të vitit 2016.

Në konferencën e përbashkët të shtypit me udhëheqësin rus Vladimir Putin pas samitit të tyre, Presidenti amerikan tha se udhëheqësi rus e kishte “mohuar me forcë” ndërhyrjen e Moskës. Ai e quajti “një fatkeqësi për vendin tonë” hetimin 14 mujor të prokurorit të posaçëm Robert Mueller mbi lidhjet e mundshme të fushatës së zotit Trump me rusët.

Komentet e Presidentit Trump shkaktuan reagime të menjëhershme në Shtetet e Bashkuara.

Senatori republikan Lindsey Graham, në përgjithësi një përkrahës i Presidentit Trump, tha në Twitter: “Një mundësi e humbur nga Presidenti Trump për t’i kërkuar me ngulm llogari Rusisë për ndërhyrjen në vitin 2016, dhe për t’i bërë një paralajmërim të fortë atij kundër ndërhyrjes në zgjedhjet e ardhshme. Përgjigja e Presidentit Trump do të shihet nga Rusia si një shenjë e dobësisë dhe do të krijojë më shumë probleme.”

Një tjetër senator i njohur republikan, John McCain, tha: “Konferenca e sotme e shtypit në Helsinki ishte një nga paraqitjet më të turpshme të një presidenti amerikan. Është e vështirë të matet dëmi i shkaktuar nga naiviteti i Presidentit Trump, egoizmi, ekuivalenca e rreme dhe simpatia për autokratët.”

Paul Ryan, republikan i lartë në Dhomën e Përfaqësuesve të SHBA, tha: “Nuk ka dyshim se Rusia ka ndërhyrë në zgjedhjet tona dhe vazhdon përpjekjet për të minuar demokracinë këtu dhe në mbarë botën”. Ai shtoi se “Nuk ka ekuivalencë morale mes Shteteve të Bashkuara dhe Rusisë, e cila mbetet armiqësore ndaj vlerave dhe idealeve tona më themelore”.

Edhe ligjvënësit demokratë shprehën zemërimin e tyre ndaj komenteve të Presidentit Trump. Senatori Mark Warner nga Virxhinia, anëtar i Komisionit të Senatit për Zbulimin, që ka rënë dakord me vlerësimin e agjencive amerikane të zbulimit se Rusia ndërhyri në zgjedhjet të vitit 2016 dhe u përpoq të ndihmonte zotin Trump kundër rivales së tij demokrate Hillary Clinton, tha: “Është e turpshme që Presidenti mori anën e Putin-it për zyrtarët e tij të zbulimit dhe fajësoi Shtetet e Bashkuara për sulmin e Rusisë mbi demokracinë tonë”.

Udhëheqësi i demokratëve në Senatin amerikan, Chuck Schumer tha se zoti Trump i fajësoi të gjithë me përjashtim të fajtorit. Ai tha gjithashtu se Presidenti amerikan “i zuri besë fjalës së KGB-së dhe jo të CIA-s.”

Edhe senatorët e tjerë demokratë Elizabeth Warren, Tim Kaine dhe Bill Nelson kritikuan ashpër komentet e Presidentit Trump në lidhje me ndërhyrjen ruse në zgjedhjet amerikane. za

Presidenti amerikan Donald Trump tha të ejten se ai mori një letër “shumë të mirë” nga udhëheqësi i Koresë së Veriut Kim Jong Un që vlerëson përpjekjet e udhëheqësit amerikan për përmirësimin e marrëdhënieve mes dy vendeve dhe për të zbatuar një deklaratë të përbashkët të nënshkruar nga udhëheqësit në Samitin e tyre të Singaporit në muajin qershor.

((https://twitter.com/realDonaldTrump/status/1017446575474335744))

Presidenti Trump postoi në Twitter një fotografi të letrës së bashku me përkthimin në anglisht, duke thënë se përmbajtja e letrës së udhëheqësit koreanoverior tregon se “po bëhen përparime të mëdha”.

“Unë besoj fuqimisht se vullneti i fortë, përpjekjet e sinqerta dhe qasja unike nga unë dhe Shkëlqesia Juaj zoti President që ka për qëllim një të ardhme të re mes Koresë së Veriut dhe Shteteve të Bashkuara me siguri se do të realizohet”, thuhet në letrën e udhëheqësit koreanoverior Kim Jong Un.

Letra u publikua në të njëjtën ditë kur doli njoftimi se zyrtarë të Koresë së Veriut nuk u paraqitën për një takim me homologët e tyre amerikan të enjten për të biseduar mbi kthimin e trupave të amerikanëve që vdiqën gjatë Luftës së Koresë në fillim të viteve 1950, në një shenjë të re të rritjes së tensioneve mes dy vendeve.

Zyrtarët amerikanë prisnin që negociatorët e Koresë së Veriut të paraqiteshin për diskutime në zonën e çmilitarizuar të Gadishullit Korean pasi Sekretari i Shtetit Mike Pompeo mendoi se kishte arritur një marrëveshje për këtë takim në diskutimet e javës së kaluar në Phenian rreth zotimit të Koresë së Veriut për t’i dhënë fund programit të saj të armëve bërthamore .