Presidenti Joe Biden u dërgoi sot një letër ligjvenësve demokratë ku thekson se “është plotësisht i vendosur” për të qëndruar në garën presidenciale, mes shqetësimeve të ngritura publikisht dhe privatisht se demokratët mund të humbasin Shtëpinë e Bardhë dhe Kongresin në nëntor.

Një pjesë e vogël ligjvenësish demokratë të Dhomës së Përfaqësuesve i kanë bërë thirrje publike zotit Biden të tërhiqet nga gara. Por 81 vjeçari ka qenë në pozita mbrojtëse që prej paraqitjes së tij të dobët gjatë debatit presidencial të 27 qershorit kundër republikanit Donald Trump.

Në letrën drejtuar demokratëve në Kongres, zoti Biden shprehet se ai është në dijeni të shqetësimeve të tyre, por shton se tani është koha për të forcuar radhët.

“Ne kemi një detyrë dhe kjo është të mundim Donald Trump-in”, shkruan presidenti.

“Edhe 42 ditë na ndajnë nga Konventa Demokrate dhe 119 ditë nga zgjedhjet e përgjithshme”, vazhdonte ai më tej.

“Çdo dobësim i vendosmërisë, ose mungesa e qartësisë rreth detyrave që kemi përpara ndihmon Trumpin dhe na dëmton ne. Është koha për t’u bashkuar dhe për të ecur përpara si një parti e bashkuar dhe për ta mposhtur Donald Trump-in”

Por edhe një seri aktivitetesh publike të presidentit pas debatit nuk i kanë dhënë fund pikëpyetjeve të demokratëve nëse ai mund të fitojë, apo nëse mund ta përballojë një mandat tjetër katër vjeçar në krye të Shtëpisë së Bardhë.

Të njëjtin qëndrim zoti Biden mbajti edhe gjatë një interviste telefonike po sot për rrjetin televiziv MSNBC, ku këmbënguli se “demokratët e thjeshtë” duan që ai të qëndrojë në garë.

Zoti Biden tha se ishte i irrituar me thirrjet e zyrtarëve të partisë që ai të largohej.

“Ata janë emra me peshë, por nuk më intereson se çfarë mendojnë ata”, tha zoti Biden.

“Nuk do të largohem”, shtoi ai më tej.

Demokratët po përballen me një betejë të vështirë për të ruajtur shumicën e ngushtë, 51 me 49, ndaj republikanëve në Senat.

Disa në parti shohin rimarrjen e shumicës në Dhomën e Përfaqësuesve si shansin e tyre më të mirë të siguruar një balancë të pushtetit, nëse zoti Trump do të rizgjidhej në krye të Shtëpisë së Bardhë.

Zyrtarë të administratës thanë se zoti Biden do të vazhdojë të takohet me votuesit në ditët në vijim.

Në të njëjtën kohë ai planifikon të kontaktojë edhe ligjvënësit që i njeh prej dekadash, mes përpjekjesh për të qetësuar shqetësimet mbi shanset e tij për të fituar në nëntor.

Presidenti Joe Biden kritikoi vendimin e Gjykatës së Lartë mbi imunitetin presidencial, që u pa si një fitore për kundërshtarin e tij, ish Presidentin Donald Trump, duke e cilësuar një precedent të rrezikshëm në dëm të popullit amerikan.

Përmes deklaratave të qeta dhe të matura të dhëna nga Shtëpia e Bardhë zoti Biden tha se vendimi nënkupton se ka pak të ngjarë që zoti Trump të dalë në gjyq përpara zgjedhjeve të 5 nëntorit për rolin e tij në përpjekjet për të përmbysur rezultatin e zgjedhjeve të vitit 2020.

Në vendimin e së hënës, Gjykata e Lartë u shpreh se ish-presidentët kanë imunitet absolut nga hetimet për veprimet e tyre zyrtare, si dhe asnjë lloj imuniteti për veprimet jozyrtare, një vendim që njeh për herë të parë një lloj imuniteti presidencial nga hetimi.

“Ky komb u themelua mbi parimin se nuk ka mbretër në Amerikë. Askush nuk është mbi ligjin, as Presidenti i Shteteve të Bashkuara”, tha zoti Biden. Me vendimin e Gjykatës së Lartë, tha ai “kjo ka ndryshuar rrënjësisht”.

Ai shtoi se “unë do të respektoj kufijtë e pushtetit presidencial, siç kam bërë për tre vjet e gjysmë, por çdo president, përfshirë Donald Trumpin, tani do të jetë i lirë të injorojë ligjin”.

Presidenti Biden po kandidon për një mandat tjetër përballë kundërshtarit Donald Trump dhe ka qenë kritik ndaj veprimeve të rivalit të tij në lidhje me sulmin e 6 janarit 2021 ndaj Kapitolit nga mbështetësit e zotit Trump.

“Tani, njeriu që dërgoi njerëzit në Kapitol po përballet me mundësinë për t‘u dënuar penalisht për atë që ndodhi atë ditë. Populli amerikan meriton të ketë një përgjigje nga gjykatat përpara zgjedhjeve të ardhshme”, tha zoti Biden duke iu referuar zotit Trump.

Këto ishin deklaratat e tij të para në Shtëpinë e Bardhë pas debatit të parë presidencial me zotin Trump, ku paraqitja e tij, e cila u cilësua si e dobët, nxiti thirrjet që ai të tërhiqej nga gara.

Udhëheqës të lartë demokratë përjashtuan të dielën mundësinë e zëvendësimit të Presidentit Joe Biden në garën për Shtëpinë e Bardhë, pas një paraqitjeje të dobët në debat, ndërsa u bënë thirrje anëtarëve demokratë që të përqendrohen në pasojat që do të kishte fitorja e presidencës nga republikani Donald Trump.

Pas shkëmbimit të akuzave disa ditore lidhur me paraqitjen e zotit Biden dhe rezultatin e zgjedhjeve të nëntorit, udhëheqësit demokratë kundërshtuan me vendosmëri thirrjet që partia e tyre të përzgjidhte një kandidat më të ri për të konkurruar në garën presidenciale.

Presidenti 81-vjeçar, Joe Biden, e kaloi të dielën në vendpushimin presidencial “Camp David” me pjesëtarë të familjes, ku e ardhmja e tij politike mund të ketë qënë një nga temat e bisedimeve.

Ndërsa vazhdojnë thirrjet që zoti Biden të tërhiqet nga gara, një anketë pas debatit, nga rrjeti televiziv CBS, tregon një rritje nga 36% në muajin shkurt në 46% tani të demokratëve që besojnë se zoti Biden nuk duhet të kandidojë për president.

“Fatkeqësisht, e vërteta është se Biden duhet të tërhiqet nga gara, për të mirën e vendit, të cilit i ka shërbyer në mënyrë kaq të admirueshme për gjysmë shekulli”, shkruante të dielën në editorialin e saj gazeta “Atlanta Journal-Constitution”, duke theksuar si të nevojshme daljen e tij në pension.

“Absolutisht jo”, tha Senatori Raphael Warnok i Xhorxhias, i cili shihet si një nga demokratët e mundshëm për të zëvendësuar zotin Biden.

“Debate të dobëta ndodhin”, tha ai në emisionin televiziv “Meet the Press” të rrjetit NBC. “Pyetja qëndron se kur ka punuar Donald Trump-i për të tjerët, përveç vetes dhe njerëzve si ai? Unë jam me Joe Biden-in dhe është detyra jonë të sigurohemi që ai të fitojë në nëntor”.

Udhëheqësi i pakicës demokrate në Dhomën e Përfaqësuesve, Hakeem Jeffries, i cili mund të bëhet kryetar vitin e ardhshëm nëse partia e tij siguron shumicën në nëntor, e pranoi paraqitjen e dobët të Presidentit Biden në debatin e parë me kandidatin republikan Donald Trump.

“Besoj se një pengesë nuk është asgjë më shumë se një shtysë për një rikthim të fuqishëm”, tha ai për rrjetin MSNBC. “Pra, momenti në të cilin jemi tani është një moment rikthimi dhe do të kërkojë mbështetjen tonë, të artikulojmë një mesazh largpamës se pse platforma demokrate është e pajisur më së miri për t’i trajtuar sfidat me të cilat përballet populli amerikan”.

Një tjetër figurë e lartë demokrate në Dhomën e Përfaqësuesve, James Clyburn, pajtohet. “Ai duhet të qëndrojë në këtë garë dhe duhet ta demonstrojë këtë përmes aftësive të tij për ta udhëhequr vendin”, tha ai për rrjetin CNN.

Republikanët i kritikuan ashpër pretendimet e demokratëve se paraqitja e dobët është diçka që ndodh.

“Ideja se Biden-i kishte një natë të keqe, nuk përbën thelbin. Ai ka patur një presidencë problematike dhe një debat katastrofik”, tha për rrjetin CNN Senatori Lindsey Graham, republikan nga Karolina e Jugut.

Por gjatë debatit presidencial, kandidati Trump lëshoi një breshëri kritikash, shumë prej të cilave, të pavërteta të përsëritura prej shumë kohësh, mes tyre pretendimet për një valë krimesh nga emigrantët, se demokratët mbështesin vrasjen e bebeve të sapolindura dhe se ai në fakt i fitoi zgjedhjet e vitit 2020.

Paraqitja e presidentit Joe Biden në debatin e së enjtes, e përshkruar si jo e njëtrajtshme, me pauza dhe e shkëputur, i ka lënë të shqetësuar edhe mbështetësit të tij më të fortë dhe ka ngritur çështjen e zëvendësimit të tij si kandidat për president i Partisë Demokrate.

Megjithëse disa ligjvënës demokratë janë bashkuar në mbështetje të presidentit, duke thënë se një paraqitje e dobët nuk nënkupton fundin e kandidimit, është sidoqoftë teknikisht e mundshme që presidenti të zëvendësohet si kandidat i demokratëve. Por, do të duhej të ndodhnin disa gjëra për të mundësuar një tranzicion pa probleme.

Edhe në ato rrethana, gjetja e një kandidati të ri do të ishte për partinë një proces i vështirë, në rastin më të mirë.

Së pari, presidenti Biden duhet të tërhiqet me vullnetin e tij. Ai nuk ka treguar shenja për këtë.

Më herët këtë vit, çdo shtet amerikan mbajti zgjedhjet paraprake. Sipas rregullave të Partisë Demokrate, në sistemin e tanishëm për votimin paraprak, delegatët që ka fituar presidenti Biden kanë detyrimin të votojnë për të.

Nëse presidenti Biden do të zgjidhte që të tërhiqej, delegatët do të ishin atëherë të lirë të votonin për kë të dëshironin gjatë Konventës Kombëtare Demokrate, të planifikuar të mbahet në 19 gusht në Çikago, e cila do të shndërrohej kështu në një konventë të hapur.

Në këtë pikë procesi do të vështirësohej. Përpara se të vendosej sistemi i zgjedhjeve paraprake, konventat ishin të hapura dhe delegatët vinin të merrnin pjesë përgjithësisht të paangazhuar ndaj një kandidati të caktuar. Ata takoheshin me delegacione të kandidatëve të ndryshëm dhe negocionin për të arritur marrëveshje me ta.

Me një konventë të tillë do të përballeshin demokratët në gusht, me disa kandidatë që do të kërkonin mbështetjen e delegatëve dhe me disa raunde votimesh për të zgjedhur kandidatin. Kjo do të sillte ndoshta një konventë të zgjatur, që do të vazhdonte për më shumë ditë.

Kjo gjithashtu do t’i vendoste demokratët nën trysninë e afateve për të siguruar regjistrimin e kandidatit të tyre të ri në zgjedhjet në të 50 shtetet amerikane.

Komitetit Kombëtar Demokrat iu desh të organizonte një takim virtual për të regjistruar përpara konventës praninë e delegatëve që do të propozonin zotin Biden. Kjo për shkak se një ligj në shtetin Ohajo kërkon që kandidati i emëruar të jetë përzgjedhur përpara datës 7 gusht, pra dy javë përpara konventës së demokratëve, në mënyrë që të kualifikohet për të figuruar në fletëvotimet në këtë shtet.

Një propozim për të shtyrë afatin në Ohajo, me qëllim lehtësimin e procedurës për demokratët, u refuzua nga legjislatura e këtij shteti me shumicë republikane.

Presidenti Joe Biden u përpoq fuqishëm të premten për të qetësuar shqetësimet në radhët e demokratëve për paraqitjen e tij gjatë debatit me ish-presidentin Donald Trump. Ndërkohë zyrtarët e zgjedhur të partisë u bashkuan përreth tij, në përpjekje për të ndalur idetë për zëvendësimin e tij si kandidat për president i Partisë Demokrate.

Hezitimi i tij gjatë debatit dhe komentet e zbehta në veçanti në fillim të debatit, ushqyen frikën në radhët e vetë anëtarëve të partisë së tij, se në moshën 81-vjeçare, ai nuk është në nivelin e duhur për detyrën e drejtimit të vendit për katër vite të tjera. Kjo krijoi një moment krize për fushatën e tij elektorale dhe për presidencën e tij, ndërsa anëtarë të partisë së tij filluan të kontaktojnë zëvendësuesit e mundshëm, si dhe donatorët dhe mbështetësit që nuk mund ta përmbanin më shqetësimin për paraqitjen e tij të dobët përballë ish-presidentit Trump.

Presidenti Biden duket se i pranoi kritikat gjatë një tubimi në Raleigh, të Karolinës së Veriut, duke thënë se “nuk debatoj më aq mirë si dikur”. Por, ai shtoi se “e di si ta bëj këtë punë. Di si t’i realizoj gjërat”. Në një fjalim prej 18 minutash, presidenti Biden dukej shumë më i gjallëruar krahasuar me paraqitjen e një nate më parë dhe kritikoi ashpër ish-presidentin Trump për “gënjeshtrat” e tij dhe për fushatën e tij që synon “hakmarrje dhe shpagim”, siç u shpreh presidenti Biden.

“Zgjedhja në këto zgjedhje është e thjeshtë”, tha presidenti Biden. “Donald Trump-i do ta shkatërrojë demokracinë tonë. Unë do ta mbroj”.

Ai shtoi, duke aluduar për kandidimin e tij: “Kur të rrëzojnë, duhet të ngrihesh sërish”.

Që përpara debatit, mosha e presidentit Biden kishte qenë një pikë e dobët për votuesit dhe paraqitja në përballjen e së enjtes në mbrëmje duket se përforcoi shqetësimet e thella të publikut. E gjithë kjo ndodhi përpara audiencës më të madhe që ai ndoshta do të mundet të ketë deri në ditën e zgjedhjeve.

Në prapaskenë, zyrtarët e fushatës së tij elektorale kaluan orë të tëra duke punuar për të qetësuar shqetësimet dhe për të ruajtur mbështetjen e donatorëve dhe të zyrtarëve. Ligjvënësit demokratë pranuan të premten paraqitjen e dobët të presidentit Biden, por u përpoqën të ndalnin idetë për zëvendësimin e tij si kandidati kryesor për president. Ata u përpoqën ta zhvendosin vëmendjen tek sulmet dhe deklaratat e ish-presidentit Trump, që ata shpresojnë se do t’iu rikujtojnë votuesve turbullirat e përditshme gjatë presidencës së tij.

“Presidenti nuk pati vërtet një mbrëmje të mirë, por po kështu ishte edhe për Donald Trump-in, me gënjeshtra pas gënjeshtrave dhe vizionin e tij të errët për Amerikën”, tha guvernatori i Karolinës së Veriut, Roy Cooper, duke folur për agjencinë e lajmeve Associated Press të premten, pak orë pasi do të prezantonte presidentin Biden në Raleigh. “Nuk mund ta çojmë sërish Donald Trump-in në Shtëpinë e Bardhë. Ai është një rrezik ekzistencial për vendin tonë”.

Udhëheqësi demokrat në Dhomën e Përfaqësuesve, Hakeem Jeffries u përgjigj me një “jo” të prerë, kur u pyet të premten nëse presidenti Biden duhej të tërhiqej. Por, ai shtoi se do të ndiqte me interes se si presidenti do ta trajtonte në tubimin e së premtes paraqitjen e tij gjatë debatit.

“Pres me padurim të dëgjoj nga presidenti Biden”, tha ai. “Dhe derisa të artikulojë një vizion të tijin për Amerikën, do t’i rezervoj komentet rreth çdo gjëje që lidhet me momentin ku gjendemi tani. Mund të them vetëm se mbështes kandidaturën e tij”.

Ligjvënësi demokrat Ritchie Torres tha se “që nga paraqitja e djeshme, më është dashur të marr më shumë qetësues se zakonisht”.

“Njerëzit më kanë pyetur nëse ndihem mirë me debatin. Duhet ta dini se një presidencë e Donald Trump-it do më trazonte shumë më tepër se paraqitja në debat e Joe Biden-it”.

Ekipi elektoral i presidentit Biden e përshkroi tubimin në Raleigh, si më të madhin të mbajtur deri më tani, në shtetin ku ish-presidenti Trump fitoi me një diferencë të ngushtë në vitin 2020. Në vazhdim, presidenti Biden do të udhëtojë drejt Nju Jorkut për një fundjavë aktivitetesh me donatorë të mëdhenj, për të cilët fushata e tij ka nevojë më shumë se ndonjëherë më parë në përpjekjet për t’ia kaluar ish-presidentit Trump.

Sipas rregullave të tanishme të Partisë Demokrate, do të ishte e vështirë, në mos e pamundur, zëvendësimi i presidentit Biden si kandidati zyrtar i partisë, pa dëshirën e tij, ose pa vullnetin e zyrtarëve të partisë për të ndryshuar rregulloret në konventën kombëtare që mbahet në gusht.

Aleatët e Presidentit Biden dëshironin mbi të gjitha që ai të demonstronte gjatë debatit se ishte i fortë dhe plot energji, për t’u dhënë fund pikëpyetjeve të ngritura rreth aftësive fizike dhe mprehtësisë mendore të demokratit 81-vjeçar.

Por Presidenti Biden nuk i përmbushi pritshmëritë e tyre modeste në arenën më të madhe të politikës amerikane.

Në fund të debatit 90 minutësh, aleatët e presidentit demokrat, hartuesit e strategjive dhe drejtues të tjerë të fushatës i zuri paniku pas vështirësive që zoti Biden shfaqi gjatë debatit, pauzave të pakëndshme dhe një të folure të zbetë që shpesh ishte e vështirë të kuptohej.

Publikisht dhe privatisht, demokratët ngritën pikëpyetje nëse partia mund, ose duhet ta zëvendësojë zotin Biden si kandidatin e Partisë Demokrate në zgjedhjet e nëntorit përballë ish presidentit 78 vjeçar, Donald Trump.

“Unë nuk jam e vetmja që po i thyhet zemra tani. Ka shumë njerëz që e panë debatin sonte dhe u ndjenë tmerrësisht keq për Joe Biden-in”, tha ish-Senatorja demokrate Claire McCaskill për rrjetin MSNBC. “Nuk e di nëse mund të bëhet diçka për ta rregulluar këtë situatë”.

Për momentin, pyetja kryesore për zotin Biden është nëse dëmi është i përhershëm. Por shumë votues ende nuk e kanë përqendruar krejtësisht vëmendjen tek votimet e nëntorit. Presidenti Biden dhe aleatët e tij kanë miliona dollarë që ende nuk i kanë përdorur për reklama dhe fushatë intensive në shtetet e pavendosura.

Por ka raste kur një kandidat e ka rikuperuar fushatën pas një paraqitje të dobët në debatin me rivalin. I tillë ishte dhe rasti i debatit të Presidentit Barack Obama në vitin 2012 me kandidatin republikan, Mitt Romney. Senatori demokrat John Fetterman mundi rivalin republikan në vitin 2022 pas një debati të vështirë, ndërsa zoti Fetterman kishte kaluar një goditje në tru.

Ekipi elektoral i Presidentit Biden shpresojnë, që në fund të fundit, votuesit do të mbështesin një politikan 81-vjeçar, që gëzon vlerësime të dobëta për punën e tij, në një ri-përballje që pak amerikanë e duan.

Pavarësisht këtyre, ekipi i zotit Biden këmbënguli se presidenti ishte në një pozicion unik për të ndaluar kthimin e zotit Trump në Shtëpinë e Bardhë, sikurse bëri katër vjet më parë.

Prej kohësh ata kanë parashikuar se mbështetja për Presidentin Biden do të rritej ndërsa fushata demokrate të theksonte mjaftueshëm udhëheqjen kaotike të zotit Trump. Por pas paraqitjes së dobët të zotit Biden në debatin presidencial, shenjat janë të pakta se ekziston një besim i tillë.

“Ishte një fillim i ngadaltë. Kjo është e qartë për të gjithë. Unë nuk do të debatoj për këtë pikë”, tha Zëvendëspresidentja Kamala Harris në një intervistë për rrjetin CNN pas debatit. “Por ajo që ka rëndësi është alternativa në nëntor, këto janë një nga zgjedhjet më të rëndësishme të jetës tonë”.

Mbështetësit e Presidentit Biden u përpoqën të shmangnin komentet pas debatit në Atlanta kur u pyetën nga gazetarët. Ata vunë në dukje një listë të gjatë pohimesh të rreme nga zoti Trump gjatë debatit. Gjatë debatit, zoti Trump nuk doli kundër atyre që shkaktuan trazira në ndërtesën e Kongresit amerikan më 6 janar të vitit 2021.

Guvernatori i Kalifornisë, Gavin Newsom, një kandidat i mundshëm për president në të ardhmen dhe mbështetësi kryesor në debatin në Atlanta, u bëri thirrje demokratëve që të mos i zërë paniku.

“Unë mendoj se është e padobishme dhe e panevojshme. Duhet ta mbajmë kokën lart”, tha zoti Newsom në një intervistë për rrjetin MSNBC. “Ne duhet ta mbështesim këtë president. Ne nuk dorëzoheni për shkak të një debati. Kush e bën këtë?”

Megjithatë, shenjat e ankthit ishin të dukshme mes demokratëve, ndërsa disa prej tyre kanë dalë hapur me idenë për të gjetur një alternativë tjetër për zgjedhjet e nëntorit.

Presidenti Biden e filloi debatin me një gafë, duke pretenduar se kishte krijuar 15,000 vende pune. Numri i saktë është më shumë se 15 milionë vende të reja pune gjatë mandatit të tij, një nënvlerësim dramatik nga një kandidat, që po përpiqet të rifitojë besimin e votuesve në aftësitë e tij për të udhëhequr ekonominë e vendit.

Zoti Biden tha gjithashtu se “një dozë e insulinës kushton 15 dollarë tani, në krahasim me 400 dollarë.” Por kostoja e insulinës për amerikanët e moshuar, të cilët janë pjesë e programit të sigurimeve shëndetësore të qeverisë, është ulur në 35 dollarë bazuar në ligjin e pakësimit të inflacionit, të cilin Presidenti Biden e nënshkroi në vitin 2022. Kjo ulje e kostos së ilaçit të insulinës hyri në fuqi në vitin 2023, duke detyruar shumicën e kompanive të sigurimeve shëndetësore që ta ulin në 35 dollarë koston e ilaçit.

Izraeli filloi një ofensivë të gjerë ushtarake në Rripin e Gazës pas sulmit të militantëve të Hamasit në Izraelin jugor më 7 tetor, në të cilin u vranë 1200 njerëz, kryesisht civilë, dhe u morën peng 250 të tjerë.

Sipas ministrisë së shëndetësisë në Rripin e Gazës, të kontrolluar nga Hamasi, që Shtetet e Bashkuara e kanë shpallur organizatë terroriste, nga sulmet izraelite janë vrarë mbi 37600 njerëz. Ministria e shëndetësisë në Rripin e Gazës nuk bën dallim mes luftëtarëve dhe civilëve në raportet e saj mbi numrin e viktimave.

Debati ishte një shans për të dy kandidatët që të flisnin për planet dhe vizionin e tyre për vendin dhe të fitonin mbështetjen e votuesve të pavendosur.

Në Atlanta të Xhorxhias, një shtet i pavendosur dhe i rëndësishëm për zgjedhjet presidenciale, ishin të pranishëm politikanë republikanë, që mendohet se janë në listën e kandidatëve për nënpresident, përfshirë senatorin nga Ohajo JD Vance, ish guvernatorin e Dakotës së Veriut Daug Bergum, senatorin nga Karolina e Jugut Tim Scott dhe senatorin nga Florida Marco Rubio.

Luiziana është bërë shteti i parë amerikan që kërkon që “Dhjetë Porositë” e Biblës të shfaqen në çdo klasë të shkollave publike, lëvizja e fundit nga një legjislaturë e dominuar nga republikanët që nxit një axhendë konservatore nën një guvernator të ri.

Ligji i nënshkruar të mërkurën nga guvernatori republikan, Jeff Landry, kërkon shfaqjen në madhësinë e një pllakate të “Dhjetë Porosive” me shkronja të mëdha që mund të lexohen lehtësisht, në të gjitha klasat e shkollave publike, që nga klasa e parë e deri në auditorët e universiteteve që financohen nga shteti.

Kundërshtarët shprehin dyshime për kushtetutshmërinë e ligjit dhe u zotuan ta sfidojnë atë në gjykatë.

Mbështetësit e ligjit thanë se masa nuk është vetëm fetare, por ka edhe rëndësi historike. Në tekstin ligjor, “Dhjetë Porositë” janë “dokumentet themelore të qeverisë sonë shtetërore dhe kombëtare”, thonë përkrahësit.

Pankartat duhet të vendosen nëpër klasa deri në fillim të vitit 2025. Ato do të shoqërohen me një sqarim që i cilëson “Dhjetë Porositë” si “pjesë të rëndësishme të arsimit publik amerikan për gati tre shekuj”.

Në bazë të ligjit nuk do të përdoren fonde shtetërore, por vendosja e tyre do të mbulohet nga donacionet.

Ligji gjithashtu “autorizon”, por nuk kërkon, shfaqjen e simboleve të tjera në shkollat publike, përfshirë “Marrëveshjen Mayflower”, e nënshkruar nga pelegrinët fetarë në bordin e anijes Mayflower në vitin 1620, që shpesh cilësohet si “Kushtetuta e Parë e Amerikës” apo Deklaratën e Pavarësisë, mes të tjerash.

Kundërshtarët zotohen ta sfidojnë ligjin

Pak pasi guvernatori nënshkroi ligjin të mërkurën në “Shkollën Katolike Zoja Fatime” në Lafayette, grupet dhe organizatat e të drejtave civile, që duan ta mbajnë fenë jashtë qeverisë, premtuan të ngrenë një padi për ta sfiduar vendimin.

Ligji i pengon studentët që të arsimohen në mënyrë të barabartë dhe do t’i bëjë fëmijët e besimeve të tjera të ndihen të pasigurt në shkolla, thuhet në një deklaratë të përbashkët të “Unionit Amerikan për Liritë Civile, Amerikanët e Bashkuar për Ndarjen e Kishës nga Shteti” dhe “Fondacionit Liria nga Feja”.

“Edhe midis atyre që mund të besojnë në disa variante të ‘Dhjetë Porosive’, teksti mund të ndryshojë sipas besimit fetar ose traditës. Qeveria nuk duhet të mbajë anë në këtë debat teologjik”, thuhet në deklaratë.

Ligji i debatueshëm vjen gjatë një epoke të re të udhëheqjes konservatore në Luiziana nën guvernatorin Landry, i cili zëvendësoi në muajin janar guvernatorin demokrat me dy mandate, John Bel Edwards.

Republikanët zotërojnë një supershumicë në legjislaturë dhe kanë fituar zgjedhjet për të gjitha postet drejtuese në shtetin e Luizianës, çka u ka hapur rrugën ligjvënësve që të nxisin një axhendë konservatore.

Edhe shtete të tjera kanë dalë me projektpropozime të ngjashme, përfshirë Teksasin, Oklahomën dhe shtetin Jutah. Përveç Luizianës, asnjë shtet tjetër nuk ka arritur të miratojë ligje të tilla si rezultat i kërcënimeve për sfida ligjore lidhur me kushtetutshmërinë.

Një ligj i ngjashëm u shpalli jokushtetues

Betejat ligjore për shfaqjen nëpër klasa të “Dhjetë Porosive” të Biblës nuk janë të reja.

Në vitin 1980, Gjykata e Lartë e Shteteve të Bashkuara u shpreh se një ligj i ngjashëm i shtetit Kentaki binte ndesh me Amendamentin e Parë të Kushtetutës amerikane, i cili e ndalon qeverinë të përcaktojë një fe zyrtare, ose të miratojë ligje që favorizojnë një fe ndaj një tjetre, ose të kufizojë ushtrimin e lirë të saj.

Gjykata konstatoi se ligji nuk kishte qëllim laik, por i shërbente një synimi qartësisht fetar.

UILMINGTON – Djali i Presidentit Joe Biden, Hunter Biden u shpall fajtor të martën për tre vepra penale që lidhen me blerjen e një arme në vitin 2018 kur sipas prokurorëve, gënjeu në një formular për blerje armësh, duke thënë se nuk ishte përdorues droge apo nuk kishte varësi nga droga.

Presidenti amerikan Joe Biden, përmes një deklarate pas vendimit tha se ai dhe Zonja e Parë gjithmonë do t’i qëndrojnë pranë djalit të tyre “me dashurinë dhe përkrahjen tonë.” Ai tha se do ta respektojë vendimin e jurisë dhe se do të vazhdojë ta respektojë procesin gjyqësor ndërkohë që djali i tij po shqyrton mundësinë ta apelojë vendimin.

“Shumë familje, të dashurit e të cilëve janë përballur me varësinë nga droga, e kuptojnë ndjenjën e krenarisë kur i shohin ata që i duan të tejkalojnë sfidat dhe të tregojnë forcë dhe vendosmëri gjatë rimëkëmbjes,” thuhet në deklaratë.

Presidenti Biden tha se po shkon në Delauerë që të jetë me djalin e tij.

Juria e shpalli zotin Biden fajtor për pretendime të rreme në formularin për blerje armësh dhe për mbajtjen e një arme në shkelje të ligjit për 11 ditë.

Në një deklaratë pas shpalljes fajtor, Hunter Biden falenderoi familjen dhe miqtë për përkrahjen, por shprehu zhgënjimin me vendimin.

“Mirënjohja që ndjej sot për dashurinë dhe përkrahjen gjatë kësaj ndaj Melisës, familjes, miqve dhe komunitetit tim, është më e madhe se sa zhgënjimi nga vendimi”, tha ai. “Tërheqja nga varësia është e mundshme me bekimin e Zotit dhe unë jam i bekuar që e përjetoj çdo ditë këtë dhuratë.”

Në kohën kur u dha vendimi i jurisë, zoti Hunter Biden shikoi pa reagim. Më pas, ai përqafoi avokatët e tij dhe mezi buzëqeshi. Ai puthi bashkëshorten e tij, Melissën, me të cilën doli së bashku nga gjykata.

Avokati mbrojtës Abbe Lowell tha se “natyrisht që jemi të zhgënjyer” nga vendimi për shpalljen fajtor të zotit Biden. Por përmes një deklarate, avokati Lowell tha se ekipi i tij do të respektojë procesin dhe do të shfrytëzojë të gjitha mundësitë ligjore për ta sfiduar vendimin.

Reagimi i republikanëve ishte i shpejtë dhe toni i tyre ishte i ndryshëm.

Ligjvënësi James Comer, kryetar i Komisionit për Mbikëqyrje të Kongresit, që po heton familjen e Presidentit Biden gjatë dy viteve të fundit, tha se ndonëse vendimi shënon “një hap drejt përgjegjësisë”, nuk do të ketë drejtësi “derisa Departamenti i Drejtësisë të ketë hetuar të gjithë ata që janë të përfshirë në skemat korruptive të familjes Biden.”

Hunter Biden përballet me një dënim maksimal prej 25 vitesh në burg, por shkelësve të ligjit për herë të parë nuk u jepen dënime kaq të rënda. Është e paqartë nëse gjykatësja e rastit Maryellen Noreika do ta dënojë atë me vuajtje të dënimit në burg.

Hunter Biden dhe kandidati republikan për president Donald Trump, rivali kryesor politik i Presidentit Joe Biden, janë gjetur fajtor nga juritë në këtë vit zgjedhor.

Presidenti Biden ka qëndruar larg gjykimit në Delauer dhe ka folur shumë pak rreth rastit, duke u kujdesur që të mos krijojë përshtypjen se po ndërhyn në një çështje penale të cilën e ka ngritur Departamenti i Drejtësisë i administratës së tij. Por të gjithë aleatët e tij janë të shqetësuar për ndikimin që ky gjykim – dhe tani dënim – do të ketë tek Presidenti 81 vjeçar, i cili për një kohë të gjatë ishte i preokupuar me shëndetin dhe varësinë e djalit të tij të vetëm të gjallë.

Që të dy, zoti Hunter Biden dhe zoti Trump kanë thënë se janë viktima të politikës së çastit. Por ndërkohë që zoti Trump ka vazhduar të bëjë pretendime të pabaza se dënimi i tij është “sajuar”, Joe Biden deklaroi se do të pranojë rezultatet e vendimit dhe nuk do ta falë djalin e tij.

Sfidat ligjore të zotit Hunter Biden nuk përfundojnë këtu. Në shtator ai do të përballet me një gjykim në Kalifoni për akuzat se nuk ka paguar tatim në vlerë prej 1.4 milionë dollarë dhe ligjvënësit republikanë kanë bërë të ditur se do të vazhdojnë hulumtimet ndaj tij në përpjekjet e tyre në procesin për ta shkarkuar presidentin. Prokurorët që po hetojnë zotin Hunter Biden nuk kanë akuzuar Presidentin Biden për ndonjë shkelje.

Presidenti i Shteteve të Bashkuara Joe Biden arriti të mërkurën në Francë për të shënuar 80-vjetorin e zbarkimit të forcave aleate në Normandi. Ai planifikon gjithashtu që gjatë vizitës të theksojë nevojën për një aleancë të fortë transatlantike përballë agresionit rus në Ukrainë.

Presidenti Biden do të takohet me presidentin e Ukrainës dhe me veteranë amerikanë, pjesëmarrës në sulmin për të marrë nën kontroll plazhet në Normandi në vitin 1944, tha këshilltari i sigurisë kombëtare, Jake Sullivan. Presidenti Biden do të flasë, siç tha zoti Sullivan, për sakrificat që bënë heronjtë dhe veteranët para 80 vjetësh. Zoti Sullivan gjithashtu theksoi se Presidenti do të theksojë se “është detyrimi ynë të vazhdojmë misionin e tyre për të luftuar për liri”.

Zoti Sullivan, i cili foli me gazetarët në bordin e avionit gjatë rrugës për në Paris, tha se Presidenti Biden do të mbajë gjithashtu një fjalim të premten në Normandi. Gjatë fjalimit, Presidenti do të flasë për “luftën ekzistenciale midis diktaturës dhe lirisë”.

Ushtarëve iu desh të lëviznin mes të shtënave të armikut për të fituar betejën që përfundimisht çoi në çlirimin e Francës dhe në fundin e Gjermanisë naziste.

“Ai do të flasë për rrezikun e veprimeve që çojnë në izolim dhe rrezikun që nëse iu nënshtrohemi diktatorëve dhe nuk përballemi me ta, ata do të vazhdojnë dhe Amerika dhe e tërë bota do të paguajë një çmim të lartë”, tha ai.

Presidenti Biden do të marrë pjesë gjithashtu në një pritje shtetërore të organizuar nga presidenti francez Emmanuel Macron. Ai do të ketë një takim edhe me presidentin ukrainas Volodymyr Zelenskyy, i cili është ftuar në ceremonitë që kujtojnë betejën vendimtare që çoi në fundin e Luftës së Dytë Botërore.

Presidentët amerikanë rregullisht marrin pjesë në ceremonitë që shënojnë këtë përvjetor.

“Presidenti do të shkojë në Normandi për të përkujtuar sakrificat dhe trimërinë e ushtarëve, aleatëve dhe amerikanëve, të cilët luftuan atë ditë, duke marrë pjesë në Operacionin ‘Overlord’ që çoi drejt fundit të Gjermanisë naziste. Ky operacion gjithashtu shënoi fillimin e një rendi ndërkombëtar të bazuar në rregulla, që ne të gjithë vazhdojmë ta gëzojmë edhe sot”, tha për Zërin e Amerikës, zëdhënësi i Këshillit të Sigurisë Kombëtare, John Kirby në Shtëpinë e Bardhë.

Këtu, thonë analistët, historia jep mësime.

“Zbarkimi ishte deklarata ushtarake e Aleatëve Perëndimorë se regjimet autoritare nuk mund të ndryshonin kufijtë me forcë”, thotë Mark Cancian, kolonel në pension i marinës amerikane dhe këshilltar në Qendrën për Studime Strategjike dhe Ndërkombëtare. “Ai përcolli mesazhin që vendet nuk mund të pushtohen dhe se regjimet autoritare të tipit të Gjermanisë naziste, shtypja e tmerrshme e popujve, veçanërisht e hebrenjve, jo vetëm që ishin të papranueshme, por nuk do të do të lejoheshin të ndodhnin”.

Analistët thonë se objektivat e zotit Biden për Ukrainën do të

mbeten nën hijen e një tjetër konflikti, që ai e ka përkrahur duke ngjallur pakënaqësi.

“Edhe pse padyshim Ukraina është përparësia kryesore për evropianët, ata po shohin se si politika e administratës së Presidentit Biden për Gazën po minojnë sigurinë evropiane në dy mënyra të ndryshme”, thotë Trita Parsi, nënkryetare e Institutit Quincy.

“Para së gjithash, kjo po shkatërron besueshmërinë që ka komuniteti i gjerë ndërkombëtar dhe vendet e pjesës jugore të botës tek perëndimi. Çdo bisedë për një rend ndërkombëtar të bazuar në rregulla, nuk do të merrej seriozisht, duke pasur parasysh atë që ka bërë administrata e Presidentit Biden”.

Ky udhëtim në Francë, një aleat i ngushtë i Uashingtonit, po bëhet pak para mbajtjes së disa takimeve të nivelit të lartë, duke përfshirë Konferencën për Paqe për Ukrainën. Aty pritet të mblidhen udhëheqësit e Grupit të 7 vendeve më të zhvilluara të botës. Më pas do të mbahet edhe një takim i nivelit të lartë të NATO-s.

Zëri i Amerikës e pyeti zotin Sullivan për rëndësinë e këtyre takimeve diplomatike për paqen në Evropë dhe më gjerë.

“Unë mendoj se ne duhet t’i dërgojmë një mesazh të qartë [presidentit rus Vladimir] Putin se ai nuk mund të ketë sukses dhe as të shkaktojë përçarje mes nesh”, u përgjigj ai. “Këto janë dy mesazhe që i kemi bërë më se të qarta, nga të cilat nuk do të heqim dorë. Kjo do të jetë një mundësi e shkëlqyer gjatë javëve të ardhshme për ta ritheksuar me forcë mesazhin tonë”.

Korrespondentja e Zërit të Amerikës, Patsy Widakuswara kontribuoi në këtë artikull

Sekretari i Mbrojtjes i Shteteve të Bashkuara, Lloyd Austin, tha gjatë një takimi të lartë për sigurinë të shtunën se lufta me Kinën nuk ishte as e afërt dhe as e pashmangshme, pavarësisht përshkallëzimit të shpejtë të tensioneve në rajonin e Azi-Paqësorit. Shefi amerikan i mbrojtjes theksoi rëndësinë e ripërtëritjes së dialogut midis tij dhe homologut kinez, për të shmangur “përllogaritjet e gabuara dhe keqkuptimet.”

Zoti Austin i bëri komentet gjatë takimit të forumit të mbrojtjes Shangri-La në Singapore. Në prag të takimit, zoti Austin u takua për më shumë se një orë me Ministrin e Mbrojtjes të Kinës, Dong Jun. Ky ishte takimi i parë personal midis zyrtarëve të lartë të mbrojtjes që nga viti 2022. Kina i ndërpreu komunikimet ushtarake me Shtetet e Bashkuara pas një vizite nga kryetarja e atëhershme e Dhomës së Përfaqësuesve të SHBA, Nancy Pelosi në Tajvan.

Pekini dhe Uashingtoni nuk kanë ndryshuar qëndrimet për Tajvanin. Kina pretendon se ishulli është pjesë e territorit të saj dhe nuk ka përjashtuar përdorimin e forcës për ta marrë Tajvanin. Kina po ashtu ka pretendime për Detin e Kinës Jugore, duke shkaktuar konfrontime të drejtpërdrejta mes Kinës dhe vendeve të tjera të rajonit, veçanërisht me Filipinet.

Ndërsa nuk pranoi ofronte detajoje specifike të bisedës me homologun kinez, zoti Austin tha se gjëja më e rëndësishme ishte se të dy drejtuesit po bisedonin përsëri.

Ministri i Mbrojtjes i Kinës, Dong Jun, do të mbajë një fjalim të dielën në forumin për sigurinë që zhvillohet çdo vit në Singapore. Vitet e fundit Pekini i ka zgjeruar me shpejtësi kapacitetet ushtarake detare ndërsa forcon pretendimet për pothuajse të gjithë Detin e Kinës Jugore.

Shpallja fatjor e Donald Trumpit për 34 vepra penale shënon fundit e procesit historik gjyqësor penal ndaj ish Presidentit, por beteja për këtë çështje vazhdon.

Tani është koha e dënimit dhe mundësisë së dënimit me burg. Një proces i gjatë ankimimi. Dhe në të njëjtën kohë, kandidati i pritshëm republikan për president, duhet të vazhdojë të përballet me tre çështje të tjera penale dhe me fushatën elektorale, në fund të së cilës, ekziston mundësia që të kthehet përsëri në krye të Shtëpisë së Bardhë.

Juria në Manhatan e shpalli zotin Trump fajtor për falsifikimin e dokumenteve, si pjesë e një skeme për të ndikuar zgjedhjet e 2016, duke fshehur një pagesë ndaj një aktoreje të filmave pornografikë, e cila thotë se kishte patur një marrëdhënie intime me ish-Presidentin.

Zoti Trump u tha gazetarëve se ishte “i pafajshëm”.

Disa nga elementët kryesorë që duhet mbajtur parasysh pas vendimit të jurisë.

Shpallja fatjor e Donald Trumpit për 34 vepra penale shënon fundit e procesit historik gjyqësor penal ndaj ish Presidentit, por beteja për këtë çështje vazhdon.

• Kur caktohet masa e dënimit? Gjykatësi njoftoi se do ta shqiptojë vendimin më 11 korrik, vetëm disa ditë para se republikanët ta zgjedhin zyrtarisht si kandidat për president
• E drejta e zotit Trump për të votuar: Ai mund të dënohet dhe të banojë në Florida, por përsëri mund të votojë, për sa kohë nuk është në burg në shtetin e Nju Jorkut.
• A do të ndikojë dënimi i zotit Trump në zgjedhjet presidenciale? Mbetet e paqartë nëse shpallja e tij fajtor për vepra penale do të ketë ndikim tek votuesit.

BURGIM?

Pyetja e madhe që shtrohet tani është nëse zoti Trump mund të burgoset. Përgjigja nuk dihet. Gjykatësi Juan Merchan njoftoi se masën e dënimit do ta shqiptojë më 11 korrik, vetëm disa ditë para Kuvendit Kombëtar Republikan, ku zoti Trump pritet të shpallet zyrtarisht kandidati i Partisë Republikane për president.

Akuza e falsifikimit të të dhënave të biznesit është një nga veprat më të lehta penale në shtetin e Nju Jorkut. Për këtë vepër parashikohet dënim deri në katër vjet burg, megjithëse dënimi në fund i takon gjykatësit dhe nuk ka asnjë garanci se ai mund të vendosë që zoti Trump të qëndrojë pas hekurave.

Masat e të tjera të dënimit mund të përfshijnë gjobë ose dënim me kusht. Po ashtu ekziston mundësia që gjyqtari të lejojë zotin Trump të mos vuajë asnjë masë dënimi derisa të ketë përfunduar i gjithë procesi i apelimit të vendimit.

Dënimi nuk e ndalon zotin Trump që të vazhdojë fushatën e tij. Bashkëshortja e djalit të ish-presidentit Trump, Lara Trump, e cila është bashkëkryetare e Komitetit Kombëtar Republikan, tha në një intervistë në rrjetin Fox News të enjten se nëse zoti Trump dënohet dhe nëse dënohet me arrest shtëpie, ai do t’i bënte virtualisht tubimet elektorale dhe takimet e tjera në kuadër të fushatës.

MUNDËSITË PËR APELIMIN E VENDIMIT

Pasi zoti Trump të dënohet, ai mund të kundërshtojë dënimin në gjykatën e apelit dhe ndoshta në gjykatën e lartë të Nju Jorkut. Avokatët e Trump tashmë kanë hedhur bazat për të apeluar, duke kundërshuar akuzat dhe vendimet gjatë procesit gjyqësor penal.

Avokatët e e zotit Trump e kanë akuzuar gjyqtarin Juan Manuel Merchan për njëanshmëri, duke përmendur faktin se e bija drejton një kompani, klientë të së cilës, ndër të tjerë kanë qenë Presidenti Joe Biden, Nën Presidentja Kamala Harris dhe demokratë të tjerë. Gjykatësi refuzoi kërkesën e mbrojtjes për t’u larguar nga çështja, duke u shprehur i sigurt në “aftësinë për të qenë i drejtë dhe i paanshëm”.

Avokatët mund të hedhin në apel vendimin e gjykatësi për të kufizuar dëshminë e një eksperti.

Avokatët e zotit Trump donin të thërrisnin për të dëshmuar Bradley A. Smithin, një profesor i juridikut të cilin ish-presidenti Bill Clinton e pati emëruar në Komisionin Federal Zgjedhor (FEC). Mbrojtja synonte të rrëzonte pretendimin e prokurorisë se pagesat janë bërë në shkelje të ligjeve për financimin e fushatave elektorale.

Por në fund, pala mbrojtëse nuk e thirri atë për të dëshmuar pasi gjykatësi Merchan vendosi që zoti Smith mund të jepte informacion në lidhje me Komisionin Federal Zgjedhor, por, atij nuk i lejohet të interpretonte se si ligjet për financimin e fushatave zgjedhore lidhen me faktet e procesit gjyqësor ndaj zotit Trump, apo të jepte ndonjë opinion, nëse veprimet për të cilat akuzohet ish-presidenti mund të kenë shkelur apo jo këto ligje.

Mbrojtja mund të argumentojë gjithashtu se anëtarët e jurisë u lejuan në mënyrë të papërshtatshme të dëgjonin dëshmi nga aktorja pornografike Stormy Daniels në lidhje me marrëdhënien e pretenduar intime me zotin Trump me të në vitin 2006.

Donald Trump u bë ish-presidenti i parë që u dënua për vepra penale të enjten pasi një juri në Nju Jork e shpalli atë fajtor për falsifikimin e dokumenteve, si pjesë e një skeme për të ndikuar zgjedhjet e 2016, duke fshehur një pagesë ndaj një aktoreje të filmave pornografikë, e cila thotë se kishte patur një marrëdhënie intime me ish-Presidentin.

Juria, e cila u tërhoq për afro 10 orë për të dalë me vendim, e shpalli zotin Trump fajtor për 34 akuzat që ishin ngritur ndaj tij.

Ndërsa lexohej vendimi, ai qëndronte me një vështrim të ngrirë , ndërsa nga jashtë sallës së gjyqit dëgjoheshin brohorima nga njerëzit mbledhur aty jashtë, si kundërshtarë edhe përkrahës të tij.

“Ky ishte një gjyq i manipuluar”, tha zoti Trump duke dalë nga salla e gjyqit. “Vendimi i vërtetë do të jepet më 5 nëntor nga populli. Ai e di se çfarë ka ndodhur dhe të gjithë e dinë çfarë ndodhi këtu”, u shpreh ai.

Vendimi i fut Shtetet e Bashkuara në një terren të panjohur përpara zgjedhjeve presidenciale të 5 nëntorit, kur zoti Trump pritet të jetë kandidati i pritshëm republikan përballë presidentit demokrat Joe Biden.

Zoti Trump pritet ta apelojë vendimin dhe do të ndeshet me një realitet të ri, të pazakontë, ndërsa kthehet në fushatë elektorale, por tani si i dënuar për krime.

Gjykatësi Juan Merchan njoftoi se masën e dënimit do ta shqiptojë më 11 korrik, vetëm disa ditë para Kuvendit Kombëtar Republikan në shtetin Viskonsin, ku zoti Trump pritet të shpallet zyrtarisht kandidati i Partisë Republikane për president.

Falsifikimi i të dhënave të biznesit është një vepër penale për të cilën parashikohet një dënim me burg deri në 4 vjet, edhe pse prokurorët nuk janë shprehur nëse do të kërkojnë dënim me burg dhe është e paqartë nëse gjykatësi do të caktonte një masë të tillë edhe nëse i kërkohej. Dënimi, apo edhe burgimi, nuk e pengon zotin Trump të vazhdojë garën për Shtëpinë e Bardhë.

Prokurorët thonë se zoti Trump falsifikoi të dhënat për të fshehur rimbursimet për ish-avokatin e tij Michael Cohen, i cili i pati paguar aktores së filmave pornografikë Stormy Daniels 130 mijë dollarë në javët e fundit të fushatës elektorale të vitit 2016, që ajo të mos bënte publike pretendimet e saj për një marrëdhënie seksuale me zotin Trump të një dekade më parë.

Ish-presidenti dhe njëkohësisht kandidati i pritshëm për president i Partisë Republikane ka deklaruar pafajësinë, ka mohuar të ketë patur marrëdhënie seksuale me zonjën Daniels dhe thotë se pagesat për zotin Cohen u evidentuan siç duhet në regjistrat e kompanisë, si shpenzime ligjore.

Zoti Trump përballet edhe me tre çështje të tjera penale, por rasti që u shqyrtua në Nju Jork mund të jetë i pari që mbyllet përpara zgjedhjeve të nëntorit, duke ia shtuar edhe më shumë rëndësinë vendimit.

Edhe pse ndërlikimet ligjore dhe historike mbi vendimin janë të dukshme, pasojat politike nuk dihen, pasi vendimi më tepër mund t’i forcojë opinionet ekzistuese për zotin Trump, sesa të ndikojë për t’i ndryshuar ato.

Për çdo kandidat tjetër, një dënim nën akuza kriminale do të thoshte përfundim i garës për president, por karriera politike e zotit Trump i ka rezistuar dy përpjekjeve në Kongres për ta shkarkuar, akuzave për abuzim seksual, hetimeve të ndryshme, që nga lidhjet e mundshme me Rusinë, tek ato për përpjekje për të përmbysur rezultatin e zgjedhjeve dhe në një plan më personal, komentet e tij, që u bënë publike, se mund të bënte me gratë ç’të donte meqë ishte i famshëm.

Akuzat për të cilat i u shpall fajtor janë gjithsesi më pak të rënda sesa akuzat e tjera me të cilat ai ndeshet në tre çështje të tjera penale, ku ai është akuzuar për përpjekje për të minuar demokracinë amerikane dhe për mbajtje të paligjshme të dokumenteve tepër sekrete.

Republikanët nuk kanë dhënë ndonjë sinjal se po e tërheqin mbështetjen ndaj zotit Trump. Kryetari i Dhomës së Përfaqësuesve Mike Johnson përmes një deklarate u shpreh se kjo është “një ditë e turpshme për historinë e Amerikës”. Ai e quajti gjyqin një “proces tërësisht politik dhe jo ligjor”.

UASHINGTON – Presidenti amerikan Joe Biden u zotua në Ditën e të Rënëve se vendi do të vazhdojë veprën e tyre për një vend më të bashkuar, “për të cilin ata jetuan dhe për të cilin dhanë jetën”.

Duke mbajtur fjalimin në një ceremoni solemne përkujtimore në Varrezat Kombëtare të Arlingtonit, presidenti Biden tha se secila gjeneratë duhet të sigurohet që sakrifica e ushtarakëve të vendit nuk ishte e kotë.

“Liria nuk ka qenë kurrë e garantuar”, tha presidenti Biden nën qiellin gri mbi amfiteatrin e memorialit. “Çdo gjeneratë duhet që ta fitojë vetë, të luftojë për të, ta mbrojë në betejën mes autokracisë dhe demokracisë, mes makutërisë së pak personave dhe të drejtave të shumicës”.

Ai shtoi: “Në këtë ditë, u mblodhëm sërish për të reflektuar, për të kujtuar dhe mbi të gjitha për t’iu ripërkushtuar të ardhmes për të cilën ata luftuan, një të ardhmeje të bazuar tek liria, demokracia, mundësitë dhe barazia. Jo vetëm për disa, por për të gjithë”.

Përpara fillimit të ceremonisë, presidenti Biden, së bashku me nënpresidenten Kamala Harris dhe sekretarin e Mbrojtjes Lloyd Austin, vendosi një kurorë në Varrin e Ushtarit të Panjohur.

Në fjalën e tij, presidenti Biden përmendi përvjetorin këtë javë të vdekjes së djalit të tij Beau, i cili shërbeu në Irak dhe më vonë vdiq nga kanceri në tru, për të cilin presidenti ka fajësuar periudhën që i biri shërbeu pranë vendeve ku digjeshin materialet toksike. Krahas ushtarakëve të vdekur, presidenti synon kështu të theksojë rëndësinë e nderimit të shërbimit edhe të ushtarakëve që janë kthyer në atdhe me lëndime.

“Vitin e kaluar, departamenti i Çështjeve të Veteranëve ofroi më shumë shërbime dhe përpunoi më shumë aplikime se kurrë ndonjëherë më parë në histori”, tha presidenti Biden duke vlerësuar për këtë meritat e ligjit që garanton mbulim automatik për disa probleme shëndetësore të veteranëve që mund të jenë si rezultat i shërbimit të tyre ushtarak. “Prej shumë kohësh pasi luftonin për vendin tonë, këtyre veteranëve u duhej të luftonin për të marrë mbulimin e duhur shëndetësor, për të marrë trajtimin të cilin e kishin fituar. Jo më”, tha presidenti.

Ditën e të Rënëve, presidenti Biden e filloi me organizimin e një mëngjesi në Shtëpinë e Bardhë për zyrtarët e administratës, drejtuesit ushtarakë, veteranët dhe anëtarët e familjeve të të rënëve, të njohura si familjet e Yllit të Artë.

Ish Presidenti Donald Trump u përball me reagime forta gjatë fjalimit në Kuvendin e Partisë Libertariane të shtunën në mbrëmje, ndërsa shumë prej të pranishmëve u dëgjuan të bërtisnin duke e fyer dhe kritikuar atë për çështje si politikat ndaj COVID-19, rritjen e lartë të deficitit federal apo për gënjeshtra me arritjet e tij politike.

Kur ai u ngjit në podium, shumë pjesëmarrës reaguan në formë tallëse ndërsa disa mbështetës që mbanin kapele me mbishkrimin “Ta bëjmë Amerikën të madhe” brohorisnin “SHBA, SHBA”.

Ishte një moment i rrallë i përballjes së zotit Trump ishte me kritikët e tij të hapur, diçka e pazakontë për dikë që është mësuar të mbajë fjalë në tubime me njerëz që e pëlqejnë.

Libertarianët, të cilët i japin përparësi qeverisë së vogël dhe lirive individuale, janë shfaqur shpesh skeptikë ndaj ish-presidentit dhe ftesa që ai të mbante fjalim në kuvendin e tyre shkaktoi ndasi brenda këtij grupi.

Ish Presidenti u përpoq të mos i jepte shumë rëndësi, duke iu referuar katër padive penale ndaj tij, duke u shprehur me shaka se “nëse nuk kam qenë libertarian më parë, me siguri që tani jam”.

Zoti Trump u përpoq të lavdëronte “kampionët e vendosur të lirisë në këtë sallë” dhe e cilësoi Presidentin Joe Biden një “tiran” dhe “presidentin më të keq në historinë e Shteteve të Bashkuara”, duke nxitur disa nga të pranishmit të të bërtisnin: “Je ti”.

Libertarianët do të zgjedhin kandidatin e tyre për Shtëpinë e Bardhë gjatë kuvendit të tyre kombëtar, i cili përfundon të dielën.

Për muaj me rradhë, anketimet kanë treguar se shumica e votuesve nuk duan një përsëritje të përballjes si ajo në 2020 mes zotit Trump dhe Presidentit Joe Biden.

Kevin Munoz, një zëdhënës i ekipit të fushatës së Presidentit Biden, kritikoi zotin Trump dhe republikanët kryesorë për qëndrimet e tyre ndaj abortit dhe mbështetjen e vendosjes së kufizimeve në shoqërinë civile, duke thënë në një deklaratë të shtunën, se “liria nuk është e lirë në Partinë Republikane të Trumpit dhe kjo fundjavë do të jetë thjesht një rast më shumë për ta kujtuar një gjë të tillë”.

Të premten nuk do të vazhdojë gjyqi, sepse ish Presidenti Trump do të marrë pjesë në ceremoninë e diplomimit të djalit të tij Barron, në një shkollë të mesme në Florida. Marrja në pyetje e zotit Cohen nga avokati Todd Blanche rifillon të hënën.

Në Nju Jork po vazhdon procesi gjyqësor penal ndaj ish-Presidentit Donald Trump.

Ish avokati i tij, Michael Cohen u rikthye në sallën e gjyqit sot, pasi dha një dëshmi prej gati 9 orësh ditën e martë. Ai është dëshmitari i fundit, por njëkohësisht edhe dëshmitari kyç i prokurorisë në çështjen në ngarkim të ish-Presidentit.

Në qendër të gjyqit ndaj ish Presidentit Trump është shuma prej 130,000 dollarësh, me të cilën Michael Cohen pagoi aktoren e filmave pornografikë Stormey Daniels, për të siguruar heshtjen e saj për një marrëdhënie të dyshuar seksuale me zotin Trump.

Donald Trump akuzohet se falsifikoi të dhënat e biznesit gjatë rimbursimit të zotin Cohen në vitin 2017. Zoti Cohen e kishte paguar me fondet e tij zonjën Daniels. Rimbursim u regjistrua si shpenzim ligjor i kompanisë së presidentit Trump.

Marrja në pyetje e zotit Cohen paraqet një moment kyç për avokatët mbrojtës të zotit Trump, sepse duhet të bindin anëtarët e jurisë se ai nuk duhet besuar. Deri më tani, mbrojtja ka argumentuar se synimi i zotit Cohen është të hakmerret ndaj ish-presidentit dhe se është i gatshëm të thotë gjithshka vetëm e vetëm që zoti Trump të shkojë pas hekurave.

Të martën zoti Cohen tha se ai i dëshiron që zoti Trump të dënohet.

Në dëshmi, ndër të tjera, ai u shpreh se ish presidenti ishte i zemëruar për faktin që ish-aktorja e filmave pornografikë Stormy Daniels, po përpiqej ta shiste në vitin 2016 historinë e saj, mbi një takim të dyshuar seksual me të. Zoti Cohen tha se zoti Trump i kishte thënë se, nëse historia bëhej publike, do t’i shkaktonte një dëm serioz fushatës së tij për t’u zgjedhur.

Akuza thotë se mashtrimi me të dhënat e biznesit nga ana e zotit Trump për rimbursimin që i bëri ish avokatit Cohen synonte të ndikonte fushatën zgjedhore dhe përbën krim penal.

Kjo është java e katërt e procesit. Megjithatë ka ende 2 pikëpyetje të mëdha. Së pari nëse zoti Trump do të dëshmojë për të dhënë versionin e tij të ngjarjeve. Ai ka thënë se dëshiron të dalë si dëshmitar, por nuk dihet nëse do ta bëjë vërtet këtë. Po ashtu, mbetet e paqartë nëse mbrojtja do të sjellë ndonjë dëshmitar dhe sa mund të sjellë.

Ish Presidenti ka mohuar të ketë patur marrëdhënie intime me aktoren Daniels dhe po ashtu është shprehur i pafajshëm për të 34 akuzat që rëndojnë ndaj tij, nga ato për kundërvajtje, e deri në vepra penale të dënueshme me deri katër vjet heqje lirie.

Gjyqi ndaj tij po shkon drejt fundit dhe procesi ka një rëndësi të madhe politike duke marrë parasysh se zoti Trump pritet të jetë i emëruari i Partisë Republikane për zgjedhjet presidenciale të 2024.