VOAL

SHBA

Nënpresidenti amerikan merr vaksinën kundër koronavirusit

Nënpresidenti amerikan, Mike Pence, duke u vaksinuar.

Nënpresidenti i Shteteve të Bashkuara, Mike Pence, mori të premten vaksinën kundër koronavirusit.

Ai mori dozën e parë të vaksinës Pfizer/BioNTech në Shtëpinë e Bardhë, së bashku me gruan e tij, Karen, dhe mjekun Jerome Adams.

Ngjarja u transmetua drejtpërdrejt në televizion.

Pence tha se vaksina është “e sigurt dhe efektive” dhe se shpejtësia me të cilën është zhvilluar është “mrekulli mjekësore”.

Shtëpia e Bardhë tha se transmetimi i vaksinimit të Pence në televizion ka për qëllim “të promovojë sigurinë dhe efikasitetin e vaksinës dhe të krijojë besim te populli amerikan”.

SHBA-ja ka nisur të hënën vaksinimin e popullatës me vaksinën Pfizer/BioNTech.

Vaksina është thënë se është 95 për qind efektive.

Tre milionë dozat e para të saj po shpërndahen në të 50 shtetet e SHBA-së.

SHBA-ja ka regjistruar numrin më të madh të të infektuarve dhe viktimave nga koronavirusi. rel

SHBA, dorëhiqet Prokurori i Përgjithshëm, William Barr

Presidenti Donald Trump tha të hënën se Prokurori i Përgjithshëm William Barr do të largohet nga posti në prag të Krishtlindjeve dhe Zëvendës Prokurori i Përgjithshëm Jeff Rosen do të bëhet Prokuror i Përgjithshëm në detyrë.

Zoti Barr, në një letër për Presidentin Trump postuar nga presidenti republikan në Twitter, tha se ai do të largohet nga posti më 23 dhjetor.

Letra vjen ndërkohë që zoti Barr kishte informuar presidentin rreth shqyrtimit që Departamenti i Drejtësisë kishte bërë lidhur me aludimet e fushatës së Presidentit Trump për mashtrim të votuesve në zgjedhjet e vitit 2020.

Në të, zoti Barr premton se pretendimet e ngritura nga Presidenti “do të vazhdojnë të ndiqen”.

Në letër, zoti Barr vlerëson gjithashtu atë që ai e quan rekord historik të Presidentit Trump, duke thënë se ai ka ndihmuar në rritjen e ekonomisë, forcimin e ushtrisë dhe frenimin e imigracionit të paligjshëm.

“Marrëdhënia jonë ka qenë shumë e mirë, ai ka bërë një punë të jashtëzakonshme!” tha Presidenti Trump për zotin Barr në Twitter.

Fati politik i zotit Barr ishte në diskutim që nga java e kaluar, kur ai deklaroi se një hetim i Departamentit të Drejtësisë nuk kishte gjetur asnjë shenjë manipulimesh të mëdha në zgjedhjet e nëntorit, duke hedhur poshtë pretendimet e Presidentit Trump.

Ekipi ligjor i Presidentit Trump e kishte akuzuar zotin Barr se dështoi të kryente hetimin e duhur.

Gjatë fundjavës, Presidenti Trump e sulmoi ashpër zotin Barr në Twitter pas një njoftimi në gazetën Wall Street Journal se Prokurori i Përgjithshëm kishte dijeni në fillim të këtij viti për një hetim mbi taksat e djalit të zotit Biden, Hunter.

Presidenti Trump ripublikoi në Twitter një koment të moderatorit të radios, Todd Starnes, i cili thoshte se zoti Barr duhet të shkarkohej. “Një zhgënjim i madh!” shkruante Presidenti Trump në Twitter.

Ekspertët amerikanë: Dyshohet se Rusia qëndron pas sulmit kibernetik ndaj Departamentit të Thesarit

VOA

Administrata e presidentit Trump pranoi të dielën se disa institucione të Shteteve të Bashkuara ishin bërë objekt i sulmeve kibernetike nga një qeveri e huaj.

Ekspertët e sigurisë kibernetike besojnë se ka të ngjarë që Rusia të qëndrojë pas sulmit ndaj Departamentit të Thesarit dhe atij të Tregëtisë, në një depërtim që media amerikane po e quan si një nga sulmet më të sofistikuara ndaj sistemeve të qeverisë amerikane në vite.

“I kemi kërkuar Agjencisë për Sigurinë Kibernetike dhe të Infrastrukturës si edhe FBI-së të hetojnë dhe nuk mund të komentojmë më shumë tani për tani“, tha Departamenti i Tregtisë në një deklaratë ku konfirmonte se një nga agjencitë e saj ishte bërë objekt i këtij sulmi.

Si FBI ashtu edhe krahu i sigurisë kibernetike të Departamentit të Sigurisë Kombëtare po hetojnë sulmet. Nuk janë të qarta përmasat e ndërhyrjes, motivi, apo nëse janë prekur agjenci të tjera.

“Qeveria e Shteteve të Bashkuara është në dijeni të këtyre njoftimeve dhe po ndërmarrim të gjitha hapat e nevojshëm për të identifikuar dhe riparuar dëmet e mundshme në lidhje me këtë situatë,” tha zëdhënësi i Këshillit të Sigurimit Kombëtar, John Ullyot.

Një zëdhënës i Kremlinit tha të hënën se Rusia nuk ishte e përfshirë në sulm.

Sipas agjencisë së lajmeve Reuters, që njoftoi e para për shkeljen, zyrtarët e Këshillit të Sigurimit Kombëtar të Shteteve të Bashkuara u takuan të shtunën në Shtëpinë e Bardhë për të diskutuar për sulmin, i cili përfshinte vjedhjen e informacionit në lidhje me politikat për internetin dhe telekomunikacionin.

Shkeljet vijnë një javë pasi FireEye, një kompani amerikane e sigurisë kibernetike me kontrata qeveritare dhe nga korporatat, tha se ishte vënë në shënjestër të një sulmi në të cilin hakera të një qeverie të huaj vodhën disa nga teknikat e saj kibernetike.

SHBA: Vaksinimi fillon të hënën

Të paketuara në kontenierë në temperatura tepër të ftohta, vaksinat kundër koronavirusit u nisën me kamionë nga një fabrikë në Kalamazu të Miçiganit në orët e para të së dielës drejt pikave të shpërndarjes në të gjithë Shtetet e Bashkuara.

Të hënën fillon vaksinimi kundër COVID-19, një sëmundje që paralizoi botën dhe goditi rëndë në veçanti Shtetet e Bashkuara. Aktualisht në këtë vend numërohen mbi 297,000 të vdekur dhe më shumë se 1 milion e 607 mijë të diagnostikuar me koronavirus, sipas universitetit Johns Hopkins.

Gjenerali Gustave Perna, shef i operacionit Shpejtësia Marramendëse, siç është pagëzuar projekti i qeverisë amerikane për prodhimin e vaksinës kundër koronavirusit, tha të shtunën në një konferencë shtypi se kompanitë e transportit do të furnizojnë fillimisht 150 qendra shpërndarjeje dhe deri të mërkurën gjithësej 450 qendra do të kenë marrë pako me vaksina.

Vaksina e prodhuar me bashkëpunim nga kompanitë Pfizer dhe BioNTech u miratua të premten në darkë për përdorim emergjent tek individë mbi moshën 16 vjeç. Ndërkohë do të vazhdojnë analizat klinike për të parë nëse edhe fëmijë nën 16 vjeç si dhe gratë shtatzëna mund të vaksinohen, pasi këto dy grupime nuk ishin përfshirë në numër të mjaftueshëm në provat klinike.

Të parët që do të vaksinohen janë punonjësit e shëndetësisë, pasuar nga persona të moshuar dhe me probleme ekzistuese shëndeti. Deri në fund të pranverës së ardhshme pritet që vaksina t’i ofrohet të gjithë popullatës amerikane. Vaksinimi kërkon dy doza, të bëra me distancë kohore prej tre javësh.

Ndërkohë, autoritetet po analizojnë edhe vaksinën kandidate të kompanisë Moderna.

Kolegji Elektoral finalizon të hënën zgjedhjet presidenciale; Presidenti mbetet sfidues

Kolegji Elektoral mblidhet të hënën për të zgjedhur zyrtarisht Joe Bidenin si fitues të zgjedhjeve presidenciale të 3 nëntorit, ndërkohë që Presidenti Trump vazhdon të mos e njohë rezultatin. Mijëra përkrahës të presidentit u mblodhën në Uashington me thirrjet për përmbysjen e rezultatit.

Procesi zgjedhor për presidentin e Shteteve të Bashkuara nuk quhet i përmbyllur deri kur elektorët nga të 50 shtetet amerikane, të zgjedhur në raport me popullatën dhe si reflektim i numrit të ligjvënësve e senatorëve që ka shteti përkatës në Kongres, hedhin votat më 14 dhjetor. Përveç dy shteteve amerikane, elektorët e të 48 shteteve të tjera duhet të votojnë për kandidatin që fitoi zgjedhjet në shtetin e tyre.

Të gjitha shtetet i kanë çertifikuar tashmë rezultatet dhe zoti Biden ka dalë fitues me 306 vota elektorale, ose 36 më shumë se minimalja e kërkuar për të siguruar fitoren. Për sa kohë që nuk do të ketë ndonjë shtyrje të shpalljes së rezultatit nga gjykata, të hënën zoti Biden pritet të shpallet fitues i zgjedhjeve presidenciale.

Gjykatat federale e shtetërore kanë hedhur poshtë dhjetëra padi të ngritura nga ekipi elektoral i presidentit në përpjekje për të skualifikuar vota, apo për të përmbysur rezultatin në shtete të lëkundura ku u shpall fitues zoti Biden. Gjykata e Lartë nuk pranoi të merrte në shqyrtim një padi të ngritur nga një prokuror i Teksasit për të anuluar rezultatin në katër shtete të tjera, duke mbyllur praktikisht pistat ligjore të presidentit.

Megjithatë, presidenti mbetet sfidues dhe ka sinjalizuar se nuk po heq dorë nga pretendimet e tij. “SAPO E KEMI FILLUAR BETEJËN, shkruante ai të shtunën në Twitter. “I FITOVA ZGJEDHJET ME DIFERENCË DËRRMUESE!”

Ndërkohë, po të shtunën, mijëra përkrahës të tij të zjarrtë u mblodhën në Uashington duke kërkuar që presidenti të mbetet në post për një mandat tjetër. Pati edhe përleshje mes përkrahësve dhe kundërshtarëve të presidentit. Katër vetë u dërguan në spital me plagë nga armë të ftohta dhe 23 u arrestuan, sipas rajonit policor të Uashingtonit.

Përleshje mes protestuesve pro dhe kundër Trumpit

Disa mijëra mbështetës të presidentit të Shteteve të Bashkuara, Donald Trump, zhvilluan protesta në të gjithë vendin më 12 dhjetor. Në Uashington, protesta degjeneroi në përleshje midis anëtarëve të një grupi të krahut të djathtë dhe kundër-protestuesve të majtë.

Turma të protestuesve pro-Trump u mblodhën në Uashington për të protestuar ndaj rezultateve të zgjedhjeve presidenciale të 3 nëntorit, që u fituan nga demokrati Joe Biden.

Mitingjet mbarëkombëtare, të organizuara nën moton “Ndal vjedhjet”, pasojnë deklarimet e përsëritura, por të pabazuara të presidentit Trump për manipulime të zgjedhjeve.

“WoW! Mijëra njerëz po grumbullohen në Uashington për “Ndal vjedhjen”. Nuk e dija për këtë, por unë do t’i shoh!”, shkroi presidenti Trump në rrjetin social Twitter.

Në një moment, helikopteri zyrtar i Trumpit fluturoi mbi turmën tre herë, ndërsa presidenti ishte në rrugën e tij për të marrë pjesë në një lojë futbolli Ushtri-Marinë në akademinë ushtarake amerikane në West Point në Nju Jork.

Ish-Këshilltari i Sigurisë Kombëtare, Michael Flynn, i cili u fal nga Trump pasi kishte gënjyer Byronë Federale të Hetimeve dhe ish- këshilltari i Trumpit, Sebastian Gorka, ishin midis folësve në tubimin në kryeqytet.

Gjatë natës, anëtarët e grupit “Djemt Krenarë” (Proud Boys), një grup i krahut të djathtë që e mbështesin Trumpin, po endeshin nëpër rrugë, duke u përleshur me protestuesit e majtë Antifa. Ata u përleshën edhe me protestuesit kundër Trumpit të lëvizjes Black Lives Matter.

Policia ndërhyri shpejt për t’i ndarë, duke përdorur gazlotsjellës ndaj të dyja palëve. Policia raportoi se katër persona u plagosën me thikë, por ishte e paqartë se cila palë sulmoi dhe cila ishte viktima. Përleshje midis dy grupeve u raportuan gjithashtu në kryeqytetin e Kalifornisë, Sakramento.

Një ditë më parë, Gjykata Supreme në SHBA e ka hedhur poshtë një proces gjyqësor të inicuar nga Teksasi dhe të mbështetur nga presidenti, Donald Trump, për të refuzuar fitoren e presidentit të zgjedhur, Joe Biden, në katër shtete.

Presidenti Trump tha në një postim në Twitter se “Gjykata e Lartë me të vërtetë na zhgënjeu. Pa mençuri, Pa guxim!”.

Video nga arkivi:

Gjykata deklaroi se Teksasi nuk ka të drejtë ligjore për të ndërhyrë në mënyrën se si shtetet e tjera zhvillojnë zgjedhjet.

Të katër shtetet – Pensilvania, Xhorxhia, Miçigani dhe Uiskonsini – i kishin bërë thirrje Gjykatës Supreme të refuzonte sfidën ligjore, duke thënë se çështja nuk kishte asnjë bazë faktike dhe ofroi pretendime “false”.

Që nga mbajtja e zgjedhjeve presidenciale më 3 nëntor, ekipi i fushatës së Trumpit ka sfiduar përmes proceseve gjyqësore në disa shtete rezultatet zgjedhore, mirëpo në shumicën e rasteve ka dështuar.

Presidenti i zgjedhur, Joe Biden pritet të inaugurohet më 20 janar.

Elez Biberaj mesazh stafit të Zërit të Amerikës: Zëri i Amerikës ka nevojë të ngutshme të mbrojë fort pavarësinë e tij editoriale të sanksionuar me ligj

8 dhjetor 2020

Kolegë të nderuar,

Koha gjatë së cilës kam qenë Drejtori juaj në Detyrë po përfundon. Ju mund të keni parë artikuj në shtyp ku njoftohet se Shefi Ekzekutiv i Agjencisë Amerikane për Median Globale (USAGM), Michael Pack, do të sjellë një drejtor të ri të Zërit të Amerikës. I uroj drejtorit të ri sukses në përmbushjen e misionit të Zërit të Amerikës.

I jam thellësisht mirënjohës zotit Pack për mundësinë për të shërbyer, po ashtu edhe ish-zyrtarit të USAGM, André Mendes, që më rekomandoi për këtë detyrë të rëndësishme.

Kur u emërova Drejtor në Detyrë, u zotova se do të bëja çmos për të respektuar Kartën e Zërit të Amerikës dhe për t’iu përmbajtur standardeve më të larta të gazetarisë. Kam bërë çdo përpjekje për ta përmbushur këtë zotim, duke mbrojtur integritetin editorial të Zërit të Amerikës dhe murin që e ndan atë nga ndërhyrjet e mundshme politike. Së bashku me kolegë të tjerë në poste drejtuese, kemi marrë masa për të forcuar procedurat editoriale, në mënyrë që raportimet tona të jenë të bazuara në fakte, të ekuilibruara dhe pa paragjykime.

Gjashtë muajt e kaluar kanë qenë mbase periudha me sfidat më të vështira në historinë e dekadave të fundit të Zërit të Amerikës. Për fat të keq, Zëri i Amerikës dhe USAGM kanë patur përplasje të shpeshta gjatë kësaj periudhe. Disa zyrtarë të agjencisë shkelën rregulla, protokolle dhe procese, që unë i konsideroj si të paprekshme dhe ishin mospërfillës ndaj dëmit që veprimet dhe vendimet e tyre patën tek operacionet dhe misioni i Zërit të Amerikës. Përpjekjet për të shkelur pavarësinë e gazetarëve të Zërit të Amerikës vunë në rrezik besueshmërinë tonë të fituar me shumë mund, në një kohë kur demokracia në shkallë globale ka bërë hapa pas dhe kur në mbarë botën janë shtuar kërcënimet ndaj vlerave dhe rolit të Amerikës si mbartësja e vlerave morale.

Unë kam bindjen se Zëri i Amerikës ka nevojë të ngutshme të mbrojë fort pavarësinë e tij editoriale të sanksionuar me ligj, pa presione politike, dhe në të njëjtën kohë, të respektojë standardet e veta për një gazetari me cilësi të lartë në mbështetje të lirisë dhe demokracisë. Vetëm atëherë Zëri i Amerikës mund të shërbejë me të vërtetë si një zë i Amerikës dhe të çojë përpara në mënyrë të efektshme objektivat tona të politikës së jashtme, të nxisë vlerat tona demokratike dhe të shërbejë si model i një shtypi të lirë për pjesën tjetër të botës.

Ky nuk është një mesazh lamtumire. Sapo drejtori i ri i Zërit të Amerikës të fillojë punën, unë do të kthehem në pozicionin tim të mëparshëm si Drejtor i Drejtorisë së Euroazisë.

Ka qenë një nder dhe privilegj të drejtoja Zërin e Amerikës gjatë kësaj periudhe të trazuar, por historike. Dëshiroj të shpreh falenderimet e mia të përzemërta për të gjithë, për mbështetjen, profesionalizmin dhe përkushtimin tuaj në misionin tonë fisnik.

Me respekt,
Elez Biberaj

Biden nominon Gjeneralin e pensionuar Lloyd Austin si Sekretar të Mbrojtjes

Presidenti i zgjedhur amerikan, Joe Biden ka përmendur emrin e Gjeneralit të pensionuar ushtarak, Lloyd Austin, si të zgjedhurin e tij për Sekretar të Mbrojtjes.

Nëse miratohet nga Senati, Austin, 67-vjeçar, do të jetë afrikano-amerikani i parë që do të drejtojë Pentagonin.

“Përgjatë shërbimit të tij të dedikuar – dhe për shumë kohë që kemi kaluar në Shtëpinë e Bardhë dhe me trupat tanë jashtë shtetit – Gjenerali Austin ka treguar udhëheqësi shembullore, karakter dhe komandë”, ka thënë Biden në deklaratën e tij.

“Ai është tejet i kualifikuar për t’u përballur me sfidat dhe krizat që kemi aktualisht”.

Fushata e Bidenit e ka konsideruar Austinin “lider të besueshëm dhe të testuar në kohë krizash, që ka udhëhequr disa prej operacioneve më komplekse dhe më me ndikimin në historinë e forcave të armatosura”, duke cituar fushatën e grupit ekstremist, Shteti Islamik dhe tërheqjen e gati 150,000 trupave ushtarake nga Iraku.

Austin ka kaluar 41 vjet si zyrar karriere.

Ai ka shërbyer si zëvëndës-shefi i parë me ngjyrë në ushtri më 2012 dhe më vonë ka udhëhequr Komandën Qendrore në SHBA, para se të pensionohej më 2016.

Nominimi i tij kërkon konfirmim nga Senati, ku do të mund të përballet me kundërshtime nga ligjvënësit që besojnë në udhëheqësi civile të Pentagonit.

Shumë senator demokratë veçse kanë thënë se janë kundër konfirmimit të tij për atë arsye.

Zyrtarët në Xhorxhia kundërshtojnë pretendimin e presidentit Trump për manipulim të votimit

Zyrtarët në shtetin e Xhorxhias kundërshtuan të dielën pretendimin e Presidentit republikan Donald Trump se sfiduesi demokrat Joe Biden fitoi përmes manipulimeve shtetin jugor të SHBA-ve, duke deklaruar se presidentit të zgjedhur Joe Biden i takojnë 16 votat elektorale të këtij shteti.

Brad Raffensperger, zyrtari më i lartë i zgjedhjeve të këtij shteti, tha për emisionin “This Week” të kanalit ABC News se si një republikan konservator ai ishte i “zhgënjyer” që presidenti Trump humbi në shtetin e Xhorxhias, por njerëzit “e thanë fjalën e tyre” dhe ” asgjë që do të përmbyste vullnetin e tyre”.

Trump të shtunën i kërkoi guvernatorit republikan të shtetit, Brian Kemp, të thërriste një seancë të posaçme të legjislaturës së Xhorxhias për ta përmbysur votimin atje dhe për t’i akorduar elektorët e këtij shteti për presidentin Trump, gjë që nuk do të ishte e mjaftueshme për të ndryshuar avantazhin jozyrtar të zotit Biden 306-232 në Kolegjin Zgjedhor që përcakton rezultatin e zgjedhjeve presidenciale të SHBA.

Kemp refuzoi kërkesën e presidentit Trump. Guvernatori i Xhorxhias, republikani Geoff Duncan, i tha të dielën rrjetit CNN se ai “absolutisht” beson se zoti Kemp nuk do të pranojë kërkesën e presidentit Trump që guvernatori të bindë ligjvënësit e shtetit të anulojnë fitoren e zotit Biden në atë shtet.

Biden: Do t’iu kërkoj amerikanëve të mbajnë maska për 100 ditë

Presidenti i zgjedhur amerikan Joe Biden tha të enjten se një ndër vendimet e tij të para si president do të jetë t’u kërkojë amerikanëve të mbajnë maska për 100 ditë.

Në një intervistë me gazetarin Jake Tapper të CNN-it, zoti Biden tha, “Ditën e parë të inaugurimit, unë do t’i kërkoj publikut që të vendosë maskën për 100 ditë. Vetëm 100 ditë me maska – jo përgjithmonë, vetëm 100 ditë. Dhe mendoj se do të shohim një pakësim të ndjeshëm” të rasteve të koronavirusit, që kanë arritur në shifra rekord ditët e fundit me një rritje të numrave të vdekjeve ditore.

Sipas Universitetit Johns Hopkins, më shumë se 14 milionë njerëz janë infektuar dhe më shumë se 275,000 të tjerë kanë vdekur nga COVID-19 në Shtetet e Bashkuara.

Guvernatori i Kalifornisë Gavin Newsom thotë se shteti i tij pritet të lëshojë urdhër për qëndrimin në shtëpi të banorëve. Urdhrat do të fillojnë kur njësitë e kujdesit intensiv në spitalet brenda pesë rajoneve të këtij shteti të arrijnë në më shumë se 85% të kapacitetit, diçka që nuk ka ndodhur ende, por pritet të ndodhë së shpejti.

Në Korenë e Jugut, një shtim i rasteve me COVID-19 bëri që zyrtarët e shëndetit publik t’u bëjnë thirrje njerëzve të heqin dorë nga festat e Krishtlindjeve dhe të Vitit të Ri, duke i organizuar festime në internet.

Koreja e Jugut njoftoi të premten 629 raste të reja të koronavirusit, shifra më e lartë në nëntë muaj në një vend që ka qenë model në kontrollin e virusit.

Kryeministri i Italisë nënshkroi një urdhër të enjten që kufizon udhëtimet brenda vendit nga periudha e pushimeve të Krishtlindjeve deri në 6 janar. Do të bëhen përjashtime për punë, si dhe arsye shëndetësore dhe emergjente.

Italia regjistroi të enjten 23,255 raste të reja me COVID dhe 933 vdekje.

Ndërsa Shtetet e Bashkuara përgatisin planet për të filluar përdorimin e vaksinës COVID-19, zyrtarët paralajmëruan të enjten se hakerat po vënë në shënjestër kompanitë thelbësore për shpërndarjen e saj.

Në një postim në blog të publikuar të enjten, kompania IBM tha se ka zbuluar një komplot mashtrimi që synon bizneset përgjegjës për ruajtjen e vaksinës në temperaturat e ulta të nevojshme.

Bush, Clinton dhe Obama do të vaksikohen përpara kamerave për të promovuar fushatën e vaksinimit anti-Covid

Voal.ch – Bush, Clinton dhe Obama do të vaksikohen përpara kamerave për të promovuar fushatën e vaksinimit anti-Covid.

Presidentët Barack Obama, George W. Bush dhe Bill Clinton thanë se ishin gati të vaksinoheshin para kamerave.

Tre ish-presidentët amerikanë, sipas raportit të CNN kanë rënë dakord të bëhen vullnetarë kur do të autorizohen vaksinat e para.

Qëllimi është që të përcjellë besimin te opinioni publik mbi sigurinë dhe efikasitetin e produkteve të autorizuara nga autoritetet federale.

Nisma do të vinte nga Bush i cili, siç tha shefi i tij i kabinetit të Shtëpisë së Bardhë, Freddy Ford, kontaktoi virologun Anthony Fauci dhe epidemiologen Deborah Birx për të pyetur se si mund të ndihmonte në promovimin e fushatës së vaksinimit.

Bush do të kishte pranuar të paraqitej si vullnetar dhe të filmohej gjatë vaksinimit, duke përfshirë gjithashtu Klintonin dhe Obamën në këtë çështje.

“Nëse Fauci thotë se vaksina është e sigurt, unë e besoj atë dhe absolutisht do ta bëj,” tha Obama./CNN/eb

Hetime të mundshme ndaj një skeme korrupsioni në Shtëpinë e Bardhë

Sipas dokumentave të publikuara të martën, Departamenti amerikan i Drejtësisë po heton shkelje të mundshme penale për korrupsion në këmbim të faljeve presidenciale.

Dokumenti i publikuar nga kryetarja e Gjykatës së Distriktit të Kolumbias, është i retushuar dhe emrat e tre personave në të janë mbuluar.

Në këtë dokument zbulohet se prokurorët federalë kërkuan qasje në fund të gushtit tek disa paisje dixhitale të konfiskuara nga qeveria.

Për këtë nevojitej leja e gjykatës, pasi përmbajtja e paisjeve përfshinte edhe shkëmbimet me email me një avokat, biseda të cilat mund të jenë të mbrojtura nga ekskluziviteti i marrëdhënies avokat – klient. Prokurorët argumentuan se kjo ishte thyer në momentin që materialet u ishin bërë të ditura palëve të treta.

Prokurorët i thanë gjykatës se prisnin të gjenin prova se disa individë në mënyrë të paligjshme “vepruan si lobistë tek zyrtarët e lartë të Shtëpisë së Bardhë… për të siguruar një falje ose pezullim dënimi” për dikë, emri i të cilit është i retushuar në dokument.

Dokumenti gjithashtu flet për “një skemë konspirative korrupsioni”, e cila ofronte “kontribut domethënës politik në shkëmbim të një faljeje ose pezullim dënimi”.

Dokumenti tregon se prokurorëve u është dhënë leja të merrnin paisjet e kërkuara, për të gjetur materiale me të cilat do të ballafaqonin çdo subjekt apo objekt të hetimit. Sidoqoftë, nuk ka patur deri më tani asnjë raport publik ku të sugjerohet se janë ngritur akuza ndaj dikujt në kuadrin e këtij hetimi.

Shtëpia e Bardhë refuzoi një kërkesë të Zërit të Amerikës për të komentuar për këtë çështje. Orë më vonë, Presidenti Trump shkruajti në Twitter, “Hetimet për faljet janë Lajme False!”.

Në një tjetër artikull të martën, gazeta The New York Times njoftoi se Presidenti Donald Trump ka diskutuar me këshilltarët mundësinë e dhënies së faljeve paraprake për djemtë e tij, Eric dhe Donald Jr., si dhe për vajzën e tij Ivanka dhe avokatin personal Rudy Giuliani.

Kanali televiziv ABC News njoftoi të martën se ndihmësit e Presidentit Trump i kanë diskutuar këto lloj faljesh.

Në një mesazh në Twitter, zoti Giuliani mohoi të ketë diskutuar një falje të mundshme për veten me Presidentin Trump.

“Gazeta New York Times gënjen sërish. Nuk e kam zhvilluar kurrë bisedën, për të cilën gënjejnë duke ia atribuar një burimi anonim”, shkruajti zoti Giuliani.

As zoti Giuliani dhe as ndonjëri prej zotërinjve Trump nuk janë akuzuar për shkelje penale federale dhe nuk është e qartë se sa do të qëndronte ligjërisht një falje paraprake. Presidenti amerikan mund të lëshojë falje për krime federale, për jo për krime në nivelin e shteteve amerikane apo në nivelin e qeverisjes lokale.

Presidenti Trump ka bërë disa falje të bujshme dhe shkurtime dënimi për aleatët e tij.

Javën e kaluar ai fali Michael Flynn-in, i cili shërbeu për pak kohë si këshilltari i tij për sigurinë kombëtare në fillimet e mandatit të Presidentit Trump. Në muajin korrik, Presidenti Trump shkurtoi dënimin e këshilltarit të tij të hershëm, Roger Stone.

zëri i amerikës

Barr: Nuk ka prova për mashtrim të gjerë në zgjedhje

Prokurori i Përgjithshëm i SHBA, William Barr, tha të martën se Departamenti i Drejtësisë nuk ka gjetur prova për mashtrim të gjerë të votuesve që do të ndryshonin rezultatin e zgjedhjeve presidenciale.

Komentet e tij vijnë megjithë pretendimet e përsëritura të Presidentit Donald Trump se zgjedhjet janë vjedhur dhe refuzimin e tij për të pranuar humbjen ndaj Presidentit të zgjedhur Joe Biden.

Në një intervistë për agjencinë e lajmeve Associated Press, zoti Barr tha se prokurorët e SHBA-së dhe agjentët e FBI-së kanë punuar për të analizuar ankesat specifike dhe informacionin që kanë marrë, por nuk kanë zbuluar asnjë provë që do të ndryshonte rezultatin e zgjedhjeve.

“Deri më sot, ne nuk kemi parë mashtrim në një shkallë që mund të kishte ndikuar në një rezultat të ndryshëm zgjedhor,” tha zoti Barr.

Komentet marrin kuptim të veçantë sidomos sepse bëhen drejtpërdrejt nga Prokurori i Përgjithshëm, i cili ka qenë një nga aleatët më të flaktë të presidentit. Para zgjedhjeve, zoti Barr kishte hedhur në mënyrë të përsëritur idenë se votat me postë mund të ishin veçanërisht të ekspozuara ndaj mashtrimeve.

Avokati i zotit Trump, Rudi Giuliani, reagoi duke e kritikuar zotin Barr se dështoi sipas tij të hetonte siç duhej provat për mashtrim në zgjedhje.

“Me gjithë respektin për Prokurorin e Përgjithshëm, Departamenti i Drejtësisë nuk ka bërë asnjë përpjekje për të hetuar, qoftë edhe në dukje,” tha zoti Juliani, ish-prokuror federal dhe kolegia e tij Jenna Ellis në një deklaratë të përbashkët.

Muajin e kaluar, zoti Barr lëshoi një direktivë për prokurorët amerikanë në të gjithë vendin duke i lejuar ata të ndiqnin çdo “pretendim thelbësor” për parregullsi votimi, nëse ekzistonin, para çertifikimit të zgjedhjeve, edhe pse nuk kishte ndonjë provë për mashtrim të përhapur. Kjo direktivë u jepte prokurorëve mundësinë për të anashkaluar politikën tradicionale të Departamentit të Drejtësisë, e cila normalisht ndalon veprime të tilla të hapura para çertifikimit të zgjedhjeve. Menjëherë pas lëshimit të memorandumit, zyrtari më i lartë për krimet në këtë departament njoftoi dorëheqjen.

Ekipi i fushatës së zotit Trump, i drejtuar nga Rudy Giuliani, ka ngritur pa asnjë provë aludime për një komplot të gjerë të demokratëve për të hedhur miliona vota të paligjshme në sistem. Ata kanë ngritur padi të shumta gjyqësore në shtetet fushë-betejë, duke pretenduar se vëzhguesit partiakë të zgjedhjeve nuk ishin në gjendje të shihnin qartë procesin e numërimit dhe se për këtë arsye duhet të kishte ndodhur diçka e paligjshme. Pretendimet janë hedhur poshtë në mënyrë të përsëritur nga gjyqtarët, edhe nga gjyqtarë të emëruar nga presidentë republikanë, të cilët kanë deklaruar se prova të tilla nuk ekzistojnë.

Republikanë të niveleve lokale në disa shtete i kanë shkuar pas zotit Trump, duke hedhur pretendime të ngjashme të pambështetura në prova.

Vetë Presidenti Trump i ka hedhur poshtë si të manipuluara zgjedhjet me anë të komenteve në Twitter apo në intervista, megjithëse administrata e tij ka thënë se zgjedhjet e vitit 2020 ishin më të sigurtat e zhvilluara ndonjëherë.

zëri i amerikës

Biden do të nominojë Janet Yellen si Sekretare të Thesarit

Presidenti i zgjedhur amerikan, Joe Biden ka përmendur emrin e ish-shefes së Rezervave Federale, Janet Yellen si të nominuar për Sekretare të Thesarit.

Nëse konfirmohet nga Senati, ajo do të kthehet në gruan e parë që do ta mbajë këtë pozitë.

Ajo është një prej shumë grave të zgjedhura për pozita kyçe në fushën e ekonomisë.

Ekipi i Bidenit ka thënë se nëse ato konfirmohen, do të thyejnë barrierat racore që ekzistojnë në Shtetet e Bashkuara.

Biden është zotuar se do të krijojë një administratë diverse.

Më herët ai ka formuar tërësisht nga gratë, ekipin përgjegjës për mediat.

Ai po ashtu ka njoftuar për formimin e Komitetit për Inaugurim Presidencial, para se të bëjë betimin më 20 janar.

Ky Komitet do të jetë përgjegjës për organizimin e aktiviteteve të lidhura më inaugurim.

Ditë më parë, Biden ka prezantuar ekipin e tij për siguri kombëtare, i cili ka konsideruar se do të rikthejë udhëheqësinë amerikane në botë, pas largimit të presidentit aktual, Donald Trump.
Kë ka zgjedhur Biden?

Shumë nga zgjedhjet që ka bërë Biden janë kolegë nga administratat e ish-presidentit Barack Obama, ku presidenti, tashmë i zgjedhur, ka shërbyer si nën-president.

Gjashtë përzgjedhjet kyçe janë:

Antony Blinken është nominuar si Sekretar Shteti – pozita më e rëndësishme në politikën e jashtme. Ai pritet të menaxhojë politikën e jashtëm të Bidenit që ka të bëjë me kthimin e lidhjeve me aleatët perëndimorë.
Ish-Sekretari i Shtetit, John Kerry do të drejtojë përpjekjet e administratës së ardhshme për të luftuar ndryshimet klimatike. Ai ka qenë nga një arkitektët e Marrëveshjes së Parisit për Klimën, nga e cila është tërhequr presidenti Trump
Avril Haines, ish zëvendës-drejtore e Agjencisë Qendrore të Inteligjencës (CIA), është nominuar si drejtorja e parë për Inteligjencë Kombëtare.
Alejandro Mayorkas është burri i parë latin që është nominuar për të shërbyer si Sekretar për Siguri Kombëtare.
Jake Sullivan është nominuar si Këshilltar për Siguri Kombëtare në Shtëpinë e Bardhë. Ai ka shërbyer si Këshilltar për Siguri Kombëtare i Bidenit, gjatë mandatit të dytë presidencial të Obamas.
Diplomatja Linda Thomas-Greenfield është nominuar si ambasadore e SHBA-së në Kombet e Bashkuara. Ajo ka shërbyer gjatë presidencës Obama, duke përfshirë pozitën si sekretare për çështjet afrikane gjatë periudhës 2013-2017. rel

Arizona çertifikon fitoren e Joe Bidenit

Zyrtarët e Arizonës çertifikuan fitoren e ngushtë në këtë shtet të Joe Bidenit ndaj Presidentit Donald Trump.

Sekretarja demokrate e Shtetit Katie Hobbs dhe Guvernatori Republikan Doug Ducey këmbëngulën në integritetin e zgjedhjeve edhe pse avokatët e zotit Trump edhe të hënën argumentuan tek nëntë ligjvënës republikanë se zgjedhjet u shoqëruan me manipulime, por pa ofruar prova mbi këto pretendime.

Zoti Ducey tha se “ne i zhvillojmë mirë zgjedhjet këtu në Arizona. Sistemi është i fortë”.

Zoti Biden e fitoi Arizonën me 0.3 për qind më shumë ose me një diferencë pak më poshtë se 10,500 vota, nga rreth 3.4 milionë votave të hedhura gjithsej në këtë shtet. Ai është demokrati i dytë në 70 vite që fiton Arizonën.

Çertifikimi gjithashtu i hap rrugën demokratit Mark Kelly për të marrë vendin e tij në Senatin amerikan, duke zyrtarizuar fitoren e tij në një proces zgjedhor të veçantë për të zëvendësuar të ndjerin John McCain. Zoti Kelly pritet të bëjë betimin të mërkurën në Uashington.

Presidenti i zgjedhur Joe Biden po bën përgatitjet e para zyrtare për inaugurimin e tij më 20 janar, duke bërë publike emrat e komitetit përurues që do të koordinojë veprimtaritë për ditën që ai dhe Nënpresidentja e zgjedhur Kamala Harris do të marrin detyrën.

Zoti Biden pritet të emërojë presidentin e universitetit shtetëror të Delauerit, Tony Allen për të shërbyer si shef ekzekutiv i komitetit përurues presidencial dhe shefin operativ të fushatës Maju Varghese si drejtor ekzekutiv të grupit.

Komiteti përurues punon në koordinim me grupin e planifikimit të Kongresit për të bashkërenduar ceremoninë në Kapitol si dhe organizon ballon zyrtare dhe aktivitete të tjera që lidhen me betimin. Formati i aktiviteteve mbetet i paqartë ndërsa infektimet e reja me koronavirus vazhdojnë të rriten në të gjithë vendin.

Në një deklaratë të hënën, komiteti përurues tha se do të punojë duke patur “përparësi garantimin e sigurisë për njerëzit dhe parandalimin e përhapjes së COVID-19-s gjatë përfshirjes së të gjithë amerikanëve” në festime.

zëri i amerikës

Rinumërimi i votave në Uiskonsin rikonfirmon fitoren e demokratit Joe Biden

Uiskonsini përfundoi rinumërimin e votave të zgjedhjeve presidenciale të dielën, duke konfirmuar fitoren e demokratit Joe Biden ndaj presidentit Donald Trump në një nga shtetet vendimtare. Presidenti Trump ishte zotuar se do të kundërshtonte rezultatin në gjykatë edhe para se të përfundonte rinumërimi.

Qarku Dane ishte qarku i dytë dhe i fundit që përfundoi rinumërimin, duke njoftuar për 45 vota shtesë për zotin Trump. Qarku Miluoki, qarku tjetër i madh dhe me shumicë dërrmuese liberale të shtetit në qendër të një rinumërimi që kishte kërkuar zoti Trump, i njoftoi rezultatet të premten, me 132 vota më shumë për zotin Biden.

Të marra së bashku, të dyja qarqet pothuajse nuk e ndryshuan fare epërsinë e zotit Biden prej rreth 20,600 votash, duke i dhënë fituesit edhe 87 vota të tjera.

“Siç e kemi thënë, rinumërimi thjesht rikonfirmoi fitoren e Joe Bidenit në Uiskonsin,” tha Danielle Melfi, e cila drejtoi fushatën e zotit Biden në Uiskonsin, në një deklaratë për agjencinë Associated Press.

Pa një precedent për përmbysjen e një epërsie aq të madhe sa ajo e zotit Biden, Presidenti Trump pritej gjerësisht t’i drejtohej gjykatës pasi të mbaronte rinumërimi. Fushata e tij sfidoi mijëra fletëvotime të hedhura në mungesë gjatë rinumërimit, dhe madje edhe para se të përfundonte ai, Trump shkruante në Twitter se do të padiste.

“Rinumërimi në Uiskonsin nuk ka të bëjë me gjetjen e gabimeve në numërim, ka të bëjë me gjetjen e njerëzve që kanë votuar në mënyrë të paligjshme dhe ajo padi do të bëhet pas rinumërimit, të hënën ose të martën,” shkroi Trump të shtunën. “Kemi gjetur shumë vota të paligjshme. Na ndiqni!”

Zyrtarët e fushatës së zotit Trump nuk iu përgjigjën menjëherë kërkesave të agjencisë AP për komente të dielën.

Afati i fundit për të çertifikuar votimin është e marta. Çertifikimi bëhet nga kryetari demokrat i Komisionit dypartiak Zgjedhor të Uiskonsinit.

Aleanca e Votuesve të Uiskonsinit, një grup konservator, ka hapur tashmë një proces gjyqësor kundër zyrtarëve shtetërorë të zgjedhjeve që kërkojnë të bllokojnë çertifikimin e rezultateve. Padia përfshin shumë nga pretendimet që pritet të bëjë edhe zoti Trump. Avokatët e guvernatorit Tony Evers i kanë kërkuar Gjykatës së Lartë të shtetit të hedhë poshtë padinë. Evers, një demokrat, tha se ankesa është një “përzierje shtrembërimesh ligjore” që përdor keqinterpretime faktike në një përpjekje për t’u hequr të drejtën e votës miliona banorëve të Uiskonsit.

Një padi tjetër e paraqitur gjatë fundjavës nga banori i Uiskonsit, Dean Mueller argumenton se fletët e votimit të hedhura në kuti të posaçme votimi janë të paligjshme dhe nuk duhet të numërohen.

Avokatët e zotit Trump janë ankuar në lidhje me fletëvotimet në mungesë kur votuesit e identifikuan veten si “të izoluar për një kohë të pacaktuar”, duke i lejuar ata të hedhin votën pa treguar një dokument identifikimi; fletëvotimet që kanë një zarf çertifikimi të plotësuar me dy ngjyra të ndryshme boje, që tregon se një punonjës i sondazhit mund të ketë ndihmuar në plotësimin e tij; dhe fletëvotimet në mungesë për të cilat nuk është dikumentuar ndonjë kërkesë, të tilla si fletëvotimet personale në mungesë.

Zyrtarët e zgjedhjeve në të dy qarqet numëruan ato fletëvotime gjatë rinumërimit, por i shënuan ato si prova me kërkesë të fushatës së zotit Trump.

Fushata e Presidentit Trump tashmë ka dështuar në përpjekje të tjera në gjykatë, duke mos pasur prova për mashtrime të përhapura, për të cilat ekspertët gjerësisht pajtohen se nuk ekzistojnë. Sfidat ligjore të zotit Trump kanë dështuar në Arizona, Xhorxha, Miçigan, Nevada dhe Pensilvani./VOA

SHBA regjistron mbi 200.000 raste të reja me COVID-19

New York

Numri i personave të vdekur nga koronavirusi i ri (COVID-19) në SHBA është rritur në 271.038, prej të cilëve 1.388 kanë humbur jetën në 24 orët e fundit, transmeton Anadolu Agency (AA).

SHBA vazhdon të mbetet vendi me numrin më të lartë të rasteve të konfirmuara dhe të viktimave.

Të dhënat nga faqja e internetit “Worldometer” tregojnë se në 24 orët e fundit, numri i të infektuarve me koronavirus në SHBA është rritur për 201.377, duke e çuar numrin e përgjithshëm në 13.458.011.

Ndërkaq, në mbarë vendin, deri më tani janë shëruar rreth 7,95 milionë të infektuar, ndërsa numri i testeve ka shkuar në mbi 189 milionë.

Aktualisht, shteti i Teksasit është më i godituri në SHBA, me 1.235.838 raste të konfirmuara, ndërkohë që numri më i lartë i vdekjeve është regjistruar në New York, me gjithsej 34.437 viktima.

Pas SHBA-së, numrin më të madh të të infektuarve e kanë regjistruar India me mbi 9,3 milionë raste dhe Brazili me mbi 6,2 milionë.

Gjykatësi federal, jo kërkesës së presidentit për të rrëzuar rezultatin në Pensilvani

Në SHBA, një gjykatë federale apeli hodhi poshtë kërkesën e ekipit të Presidentit Donald Trump për të mos lejuar Presidentin e zgjedhur Joe Biden të shpallet fitues i shtetit të Pensilvanisë.

Vendimi është një tjetër hap prapa në përpjekjet e zotit Trump për të përmbysur rezultatet e zgjedhjeve të 3 nëntorit.

Në vendimin e tij, Stephanos Bibas, në emër të një trupi gjykatës me tre gjyqtarë shkroi: “Zgjedhjet e lira dhe të ndershme janë gjaku i demokracisë sonë. Akuzat për padrejtësi janë serioze. Por t’i quash zgjedhjet të pandershme, kjo nuk i bën ato të tilla”. “Akuzat kërkojnë aludime serioze dhe më pas prova. Në këtë rast ne nuk kemi as njërën, as tjetrën.”

“Do të shkojmë në Gjykatën e Lartë” shkroi në Twitter pas vendimit Jenna Ellis, avokate e ekipit të zotit Trump, duke iu referuar një apelimi që planifikon të bëjë ekipi. “Makineria gjyqësore aktiviste në Pensilvani vazhdon të mbulojë akuzat për mashtrim masiv,” shkruante ajo.

Pensilvania çertifikoi këtë javë zotin Biden si fitues, i cili mori votën popullore në këtë shtet. Sipas ligjit të Pensilvanisë, kandidati që fiton votën popullore në shtet merr të 20 votat elektorale të tij.

Presidenti Trump ka refuzuar të pranojë humbjen ndaj rivalit të tij demokrat dhe vazhdon të pretendojë, pa prova, për mashtrim të gjerë të votuesve.

Por ai tha të enjten se do të largohet nga Shtëpia e Bardhë nëse zoti Biden fiton Kolegjin Elektoral.

zëri i amerikës

Trumpi: Largohem nëse Biden fiton Kolegjin Elektoral

Presidenti i SHBA Donald Trump tha të enjten se do të largohet nga Shtëpia e Bardhë, nëse Kolegji Zgjedhor voton për Presidentin e zgjedhur Joe Biden.

Edhe pse ai përsëriti pretendimet e pabazuara për mashtrim masiv të votuesve, kjo deklaratë e sjell atë më afër pranimit të humbjes në zgjedhjet e 3 nëntorit.

Duke folur para gazetarëve me rastin e festës së Falënderimeve, republikani Trump tha se nëse demokrati Biden, i cili do të bëjë betimin më 20 janar, çertifikohet si fitues i zgjedhjeve nga Kolegji Elektoral, ai do të largohet nga Shtëpia e Bardhë.

Por zoti Trump shtoi se do të ishte e vështirë për të që të pranonte humbjen në rrethanat aktuale. Gjithashtu, ai nuk pranoi të thoshte nëse do të merrte pjesë në inaugurimin e zotit Biden.

“Këto zgjedhje ishin një mashtrim,” këmbënguli zoti Trump në Shtëpinë e Bardhë, ndërsa vazhdoi të mos ofronte prova konkrete për parregullsi masive në votime. Më herët ai foli përmes një videokonference me ushtarakët amerikane për t’u uruar festën.

Joe Biden i fitoi zgjedhjet me 306 vota të Kolegjit Elektoral, shumë më tepër sesa 270 që nevojiteshin, kundrejt 232 të fituara nga Presidenti Trump. Elektorët do të mblidhen më 14 dhjetor për të zyrtarizuar rezultatin. Zoti Biden mori gjithashtu 6 milion vota popullore më shumë sesa Zoti Trump.

Presidenti Trump deri tani ka refuzuar të pranojë plotësisht humbjen, megjithëse javën e kaluar, me presionin në rritje nga radhët e tij republikane, ai ra dakord të lejonte zyrtarisht ekipin e zotit Biden të fillonte procesin e tranzicionit.

I pyetur nëse do të largohej nga Shtëpia e Bardhë nëse Kolegji Elektoral voton për zotin Biden, Presidenti Trump tha: “Sigurisht që do ta bëj. Padyshim që do ta bëj. Dhe ju e dini këtë”.

“Por unë mendoj se do të ketë shumë gjëra që do të ndodhin nga tani deri në 20 janar. Shumë gjëra,” tha ai. “Është gjetur mashtrim masiv. Jemi bërë si një vend i botës së tretë.”

Përpjekjet e dëshpëruara të zotit Trump dhe të ndihmësve të tij për të përmbysur rezultatet në shtetet kryesore, ose me procese gjyqësore ose me presion ndaj ligjvënësve të shtetit, kanë dështuar dhe alternativat e tij po shterrojnë.

Në Shtetet e Bashkuara, një kandidat bëhet president duke siguruar votat elektorale dhe jo duke fituar shumicën e votave popullore në shkallë vendi. Elektorët, të shpërndarë në 50 shtetet plus Distriktin e Kolumbias (Uashington DC), kryesisht në bazë të popullatës, janë besnikë të partive që i kanë zgjedhur dhe zotohen të mbështesin kandidatin që ka fituar votën popullore në shtetin e tyre.

Biden: Amerika nuk do ta humbë luftën me virusin

Në mesazhin me rastin e Ditës së Falenderimeve, Presidenti i zgjedhur Biden tha se vendi do ta kapërcejë pandeminë dhe u bëri thirrje amerikanëve të vazhdojnë betejën kundër koronavirusit.

Zoti Biden i bëri komentet në një kohë kur Shtetet e Bashkuara po përballen me një rritje të ndjeshme të infektimeve të reja dhe kur po shtohet pasiguria ushqimore për shumë amerikanë.

Presidenti i zgjedhur Joe Biden u bëri thirrje amerikanëve të dyfishojnë pëpjekjet dhe të vazhdojnë betejën kundër përhapjes së virusit.

“Mos u dorëzoni nga mërzija. E di që mundemi dhe që do ta mposhtim virusin. Amerika nuk do ta humbë këtë luftë,” tha zoti Biden.

Ish-nënpresidenti Biden e kaloi festën në qytezën bregdetare Rehoboth të shtetit Delauer, ku ai dhe bashkëshortja Jill kanë një shtëpi pushimi. Vajza e çiftit, Ashley Biden me bashkëshortin, e kaluan festën me ta.

Presidenti Trump zakonisht e ka kaluar këtë festë në shtëpinë e tij të pushimit në Mar-a-Lago, por këtë radhë qëndroi në Shtëpinë e Bardhë.

SHBA, rekord ditor infeksionesh me koronavirus

Shtetet e Bashkuara regjistruan numrin më të lartë të viktimave si pasojë e koronavirusit që nga muaji maj. Rritje rekord pësoi dhe numri i infeksioneve të shënuara brenda një dite, rreth 200 mijë raste, shifra më e lartë ditore që prej fillimit të pandemisë.

Ndërkohë më shumë se 89 mijë persona janë shtruar në spital prej ditës së mërkurë, një tjetër shifër rekord që vjen mes shqetësimesh se dita e Falenderimeve do të çojë në rritje të infeksione ndërsa shumë njerëz nuk i kanë shmangur grumbullimet familjare me rastin e festës.

Zyrtarët në shumë shtete kanë vendosur kufizime për të ngadalësuar përhapjen e virusit.

Gjykata e Lartë lëshoi një urdhër të përkohshëm që bllokon shtetin e Nju Jorkut të vendosë kufizime pjesëmarrjeje në objektet e kultit në ato zona ku është shënuar një rritje e rasteve me koronavirus.

Në një votim 5 me 4, gjykata mbështeti Dioqezën Katolike të Bruklinit dhe dy kongregacione Hebreje Ortodokse që sfiduan urdhrin e guvernatorit Andrew Cuomo. Kryetari i Gjykatës së Lartë John Roberts ishte i vetmi gjykatës konservator që nuk iu bashkua vendimit të shumicës.

Koreja e Jugut, një nga pikat e hershme të nxehta të pandemisë ndodhet gjithashtu në mesin e një rritjeje të re të rasteve, duke raportuar më shumë se 500 infeksione në ditë, për herë të parë që nga fillimi i marsit.

Rritja vjen pas një muaji që qeveria vendosi të lehtësojë kufizimet e rrepta për distancim fizik në Seul dhe në rajonet përreth.

Të enjten Rusia njoftoi një rritje rekord rastesh të shënuara brenda një dite me mbi 25 mijë infeksione, duke e çuar totalin e përgjithshëm në rreth 2.2 milionë. Numri i vdekjeve gjithashtu shënoi një shifër rekord, 524 vdekje brenda 24-orësh.

Në Gjermani u shënuan 400 viktima të reja duke e çuar numrin në më shumë se 15 mijë që nga fillimi i pandemisë.

Qeveria gjermane vendosi në fillim të nëntorit të mbyllë restorantet, baret dhe objektet sportive për të luftuar një rritje rekord të numrit të infeksioneve.

Kancelarja Angela Merkel dhe guvernatorët e shteteve ranë dakord të mërkurën vonë në mbrëmje të zgjasin kufizimet deri më 20 dhjetor.

Në të gjithë botën që prej fillimit të pandemisë janë shënuar më shumë se 60.4 milionë të infektuar nga COVID-19 dhe 1.4 milionë viktima. Shtetet e Bashkuara kanë nurmin më të lartë të viktimave, pasuar nga Brazili me 170 mijë, India me 135 mijë dhe Meksika me 103 mijë të vdekur.

zëri i amerikës

Trumpi fal ish-këshilltarin e sigurisë kombëtare Michael Flynn

Presidenti Trump shpalli falje të plotë për këshilltarin e tij të parë të sigurisë kombëtare, Michael Flynn, të cilit iu desh të përballej me një betejë të gjatë ligjore me prokurorët federalë, si rrjedhojë e hetimit për çështjen e Rusisë.

Presidenti Trump e njoftoi lajmin në Twitter në prag të festës së Falënderimeve.

“Është nderi im i madh të njoftoj se Gjeneralit Michael T. Flynn i është dhënë Falje e Plotë. Urime@GenFlynn dhe familjes së tij të mrekullueshme; e di që tani ju do të kaloni një festë Falënderimesh vërtet fantastike!” shkruante ai.

Falja i jep fund një odiseje të gjatë ligjore për zotin Flynn, i vetmi anëtar i administratës Trump ndaj të cilit u ngritën akuza si pjesë e hetimit për Rusinë, të kryer nga prokurori i posaçëm Robert Mueller.

Ai pranoi fajësinë në vitin 2017, për akuzat se kishte gënjyer FBI-në rreth kontakteve të tij me ambasadorin rus në Uashington.

Flynn ishte ndër ndihmësit e parë të presidentit që pranoi fajin në hetimin e prokurorit Mueller dhe për muaj të tërë ai bashkëpunoi mjaft me prokurorët. Bashkëpunimi ishte aq i gjerë saqë prokurorët nuk rekomanduan burgim dhe lanë të kuptohej se do të ishin të kënaqur me një lirim me kusht.

Më vonë, Flynn ndërroi avokatë dhe taktikë, duke argumentuar se prokurorët e çështjes e kishin futur në kurth dhe e kishin bërë të gënjente në lidhje me bisedat që kishte patur në dhjetor 2016 me ambasadorin rus Sergei Kislyak.

Departamenti i Drejtësisë ka mohuar në mënyrë të përsëritur aludimet për gabime të prokurorisë. Në dhjetor 2019, gjyqtari i Gjykatës së Qarkut Emmet Sullivan i hodhi poshtë të gjitha pretendimet e zotit Flynn.

Në janar të këtij viti, prokurorët federalë i kërkuan gjyqtarit ta dënonte zotin Flynn me deri në gjashtë muaj burg, duke argumentuar se: “I pandehuri nuk ka nxjerrë mësime. Ai është sjellë sikur ligji të mos kishte vlerë për të dhe sikur veprimet e tij të mos kishin ndonjë pasojë”.

Flynn ka qenë gjithashtu kreu i Agjencisë së Inteligjencës së Mbrojtjes në Pentagon, por u detyrua të largohej në vitin 2014 pjesërisht për shkak të stilit të tij të menaxhimit dhe opinioneve se si duhej luftuar militantizmi islamik.

Ai iu bashkua fushatës zgjedhore të zotit Trump në vitin 2016. Në Kuvendin Kombëtar Republikan të atij viti, ai nxiti mbështetësit e zotit Trump të brohorisnin me thirrjet “Burgoseni!”, duke iu referuar kandidates demokrate Hillary Clinton.

Ish-ndihmës të tjerë të zotit Trump u dënuan për krime federale pas hetimit për Rusinë.

Miku dhe këshilltari i tij i vjetër Roger Stone u dënua në 20 shkurt me tre vjet e katër muaj burg për pengim të drejtësisë, manipulim të dëshmitarëve dhe mashtrim të ligjvënësve që hetonin ndërhyrjen ruse në zgjedhjet e 2016-s. Në korrik 2020, Presidenti Trump e reduktoi dënimin e tij.

Paul Manafort, ish-kryetar i fushatës së zotit Trump, u dënua vitin e kaluar me 3,5 vjet burg, pasi u shpall fajtor për lobim të paligjshëm dhe manipulim të dëshmitarëve. Kjo, së bashku me fajësinë për një çështje tjetër, e çonte dënimin e tij të përgjithshëm në më shumë se 7 vjet.

Falja e zotit Flynn pritet të dënohet nga kritikët, të cilët kanë thënë se veprimet e Presidentit Trump për të ndihmuar miqtë e tij, janë ndërhyrje në sistemin e drejtësisë.

Krerët demokratë në Dhomën e Përfaqësuesve e dënuan faljen.

Qysh në muajin mars, Presidenti Trump tha se po shqyrtonte fuqimisht mundësinë e një faljeje të plotë për zotin Flynn. Ai tha se FBI-ja dhe Departamenti i Drejtësisë ia kishin “shkatërruar” jetën zotit Flynn dhe familjes së tij dhe përmendi një raport të paspecifikuar, të pabazuar në fakte se zyrtarët kishin humbur disa dokumente që lidheshin me ish-këshilltarin e tij.

Vendimi i sotëm gjithashtu hap derën për falje të mundshme të ish-këshilltarëve të tjerë të zotit Trump që u paditën si pjesë e hetimit për Rusinë, përfshirë ish-kreun e fushatës së tij, Manafort.

Donald Trump pritet të largohet nga Shtëpia e Bardhë më 20 janar, kur frenat e pushtetit t’i kalojnë Presidentit të zgjedhur Joe Biden.

zëri i amerikës

Raportohet se Trumpi synon ta falë ish-këshilltarin Michael Flynn

Ish-Këshilltari amerikan për Siguri Kombëtare, Micheal Flynn.

Presidenti amerikan, Donald Trump synon të shfrytëzojë mundësinë e faljes së ish-Këshilltarit për Siguri Kombëtare, Micheal Flynn, i cili është deklaruar fajtor më 2017 për gënjim të Byrosë Federale të Hetimeve (FBI) rreth kontakteve të tij me rusët, kanë raportuar mediat amerikane.

Trump u ka thënë ndihmësve të tij se planifikon të shtojë Flynnin në një seri të faljeve që do t’i bëjë publike pak ditë para përfundimit të mandatit, kanë raportuar mediat si Axios dhe New York Times, duke cituar burime të paidentifikuara.

Bisedimet sekrete të Flynnit me ambasadorin rus në Uashington në dhjetor të vitit 2016, kanë qenë pikë kyçe e hetimeve për ndërhyrjen e Moskës në zgjedhjet presidenciale të vitit 2016 dhe rreth asaj nëse ka pasur koordinim në mes të fushatës së Trumpit dhe Qeverise ruse në zgjedhje.

Trump pati shkarkuar Flynnin në shkurt të vitit 2017, mirëpo presidenti ka pretenduar se hetimet kanë qenë “gjueti shtrigash” politike dhe se Flynn është “burrë i mirë”.

Flynn, general ushtarak i pensionuar dhe ish-udhëheqës i Agjencisë për Inteligjencë në Mbrojtje, është deklaruar fajtor dy herë për gënjim të FBI-së për bisedat që ka pasur me ambasadorin rus në SHBA, gjatë tranzicionit presidencial në fund të vitit 2016 dhe të fillim të vitit pasues.

Mirëpo ai ka synuar të tërheqë deklaratën e tij, duke thënë se prokurorët i kanë shkelur të drejtat dhe e kanë shtyrë drejt një marrëveshjeje pranimi.

Përmes një veprimi befasues, në maj të këtij viti Departamenti amerikan i Drejtësisë ka tërhequr rastin kundër Flynnit, duke thënë se gënjeshtrat e supozuara drejt FBI-së, nuk kanë qenë të rëndësishme.

Mirëpo një gjyqtar federal që ka shqyrtuar rastin e Flynnit ka kërkuar kërkim më të thellë gjyqësor lidhur me këtë çështje.

Një falje eventuale nga ana e Trumpit do ta largonte këtë rast nga gjykatat. rel

Biden: Amerika, gati të udhëheqë botën

Presidenti i zgjedhur Joe Biden deklaroi të martën se SHBA është “gati të udhëheqë botën, jo të tërhiqet prej saj,” duke sinjalizuar një kthesë të fortë nga strategjia “Amerika në plan të parë” e ndjekur nga Presidenti Trump gjatë katër vjetëve të fundit.

Ndërkohë që përgatitet të marrë udhëheqjen e vendit më 20 janar, zoti Biden tha se Shtetet e Bashkuara janë “gati të përballen me kundërshtarët, jo të flakin aleatët. Jemi gati të ngremë zërin në mbështetje të vlerave tona”.

Nga qendra ku drejton punën e tranzicionit në Uillmington të shtetit Delauer, presidenti i zgjedhur prezantoi ekipin e tij të politikës së jashtme dhe të sigurisë kombëtare.

“Këta individë mishërojnë bindjen time esenciale se Amerika është më e fortë kur punon me aleatët e saj,” tha ai. “Në këtë mënyrë do ta mbajmë Amerikën vërtetë të sigurtë, pa u angazhuar në konflikte të armatosura të panevojshme dhe do të mbajmë nën kontroll kundërshtarët tanë si dhe terroristët”.

Individët e zgjedhur për poste të larta, sidomos sekretari i ardhshëm i shtetit, Antony Blinken, kanë një botëkuptim globalist, të ndryshëm nga administrata Trump.

Nën administratën e Presidentit Trump, SHBA shpesh u gjend në pozita jo të përputhshme me aleatët tradicionalë perëndimorë, ndërkohë që zoti Trump dukej se preferonte një qëndrim më të butë ndaj udhëheqësve autokratë si Presidenti rus Putin, Presidenti turk Erdogan dhe udhëheqësi koreano-verior, Kim Jong Un.

Zoti Biden tha: “Amerika udhëheq jo vetëm me fuqinë e saj, por me fuqinë e shembullit të saj”.

Ai tha se zyrtarët që ka zgjedhur “jo vetëm që do të ndreqin, por do t’i japin formë të re politikës së jashtme dhe sigurisë kombëtare për brezin e ardhshëm. Ata do të më thonë atë që është e nevojshme të di, jo ato që dua të di unë”.

Politika e jashtme amerikane nën administratën Biden ka të ngjarë të përqendrohet në një qasje shumëpalëshe dhe diplomatike që synon të riparojë marrëdhëniet e Uashingtonit me aleatët kryesorë dhe të ndjekë rrugë të reja për çështje të tilla si ndryshimi i klimës.

Zoti Biden tha se ishte befasuar nga telefonatat me udhëheqësit botërorë për faktin “se sa me padurim po presin ata që Shtetet e Bashkuara të afirmojnë rolin e tyre historik si udhëheqës global kudo në Paqësor, Atlantik dhe në të gjithë botën.”

Zyrtarët e përzgjedhur, shumica e të cilëve do të kërkojnë konfirmimin e Senatit, u paraqitën me Zotin Biden dhe me Zëvendës Presidenten e zgjedhur Kamala Harris në një aktivitet të organizuar për këtë qëllim në Uilmington të shtetit Delauer.

Zoti Antony Blinken ka lidhje të ngushta me Presidentin e zgjedhur Biden. Ai ka shërbyer në role të nivelit të lartë të sigurisë kombëtare kur zoti Biden ishte nënpresident gjatë administratës Obama.

Zoti Biden tha se përzgjedhja nga e tij e zotit Antony Blinken, do të rikthejë moralin dhe besimin në Departamentin e Shtetit, që përgjigjet për marrëdhëniet diplomatike të vendit.

Ndër emërimet e tjera për kabinetin e presidentit të ardhshëm Joe Biden, janë Linda Thomas-Greenfield, ish-ndihmës sekretare shteti, si ambasadore amerikane në OKB dhe Jake Sullivan si këshilltar i sigurimit kombëtar. Zonja Thomas-Greenfield, afrikano-amerikane, është eksperte e politikave ndaj Afrikës dhe ka qenë në post të lartë gjatë administratës Obama.

Zoti Biden përzgjodhi gjithashtu zotin Alejandro Mayorkas për të kryesuar Departamentin e Sigurisë Kombëtare dhe ish Senatorin John Kerry si i dërguar i posaçëm i Presidentit për klimën.

Avril Haines u emërua drejtore e inteligjencës kombëtare, gruaja e parë që do të shërbente në një rol të tillë. Ajo ka qenë nëndrejtore e CIA-s nga viti 2013 në 2015 dhe gjithashtu zv / këshilltare e sigurimit kombëtar.

Janet Yellen, ish kryetare e Rezervës Federale pritet të emërohet si Sekretare e Thesarit.

Megjithëse nuk janë të njohur gjerësisht nga publiku amerikan, ish-zyrtarët Blinken dhe Sullivan e kanë ndihmuar zotin Biden të hartojë strategjinë që do të përfshijë afrim të menjëhershëm me aleatët e Amerikës, pasi lindën antagonizma nga politika e Presidentit Trump “Amerika, e Para”. Strategjia e administratës së ardhshme demonstron gatishmërinë për t’iu përgjigjur bashkarisht problemeve globale, si pandemia dhe krizave ekonomike.

Presidenti i zgjedhur, Joe Biden është zotuar ta rikthejë vendin në marrëveshjen bërthamore me Iranin, nëse Teherani rifillon respektimin e termave; rikthim në Paktin e Parisit për klimën; anulimin e planeve për daljen nga Organizata Botërore e Shëndetësisë dhe anulimin e rregullores ekzistuese që nuk lejon mbështetjen me fonde federale të grupeve bamirëse që diskutojnë abortin. Këto masa do të anulonin politika të administratës Trump dhe disa prej tyre pritet të hyjnë në fuqi shumë shpejt pas inaugurimit të residentit të ardhshëm më 20 janar.

Në fjalën e tij të martën, presidenti i zgjedhur Biden u bëri thirrje senatorëve të konfirmonin të emëruarit e tij mbi një bazë dy-partiake, një njohje e nënkuptuar kjo e pengesave që Senati, i kontrolluar nga republikanët, mund t’i nxjerrë administratës së tij.

Presidenti i zgjedhur ndau vizionin e tij për një politikë të jashtme të bazuar mbi një rol udhëheqës të Shteteve të Bashkuara në botë dhe mbi forcimin e aleancave në rajonin Azi-Paqësorit.

“Diplomat mes Diplomatësh”

Zoti Blinken, 58 vjeçar, ka ngritur prej kohësh nevojën që SHBA të marrë një rol udhëheqës në botë, duke komunikuar e bashkëpunuar me aleatët, përndryshe atë rol do ta marrin vende si Kina, që kanë interesa krejt ndryshe.

“Megjithëse mund të duket si barrë nganjëherë, alternativa, për sa u përket interesave dhe jetëve të amerikanëve, do të ishte shumë më e keqe,” tha zoti Blinken në një intervistë me agjencinë e lajmeve Reuters në tetor.

I pyetur nëse SHBA mund të dëshmojë përmirësim me zotin Blinken në postin e sekretarit të shtetit, në vend të zotit Mike Pompeo, zëdhënësi i Ministrisë së Jashtme kineze, Zhao Lijian e anashkaloi pyetjen duke thënë se nuk komenton për çështje të brendshme amerikane. Ai nënvizoi se Kina është e gatshme për përmirësim në komunikimin me SHBA.

Zoti Blinken nënvizoi se Kina ishte e gatshme të përmirësonte komunikimin, të forconte bashkëpunimin dhe të adresonte mospajtimet me SHBA.

Persona që e kanë njohur nga afër zotin Blinken, e quajnë “diplomat mes diplomatësh”, me një të folur të qetë, por me njohuri të forta mbi praktikat e detajet e politikës së jashtme.

Pasi kandidatja demokrate Hillary Clinton humbi zgjedhjet presidenciale në 2016, zoti Blinken ishte një ndër themeluesit e grupit konsulent WestExec Advisors që ofron këshilla mbi rreziqet gjeopolitike.

Zoti Blinken, i diplomuar si jurist, hyri në politikë në vitet 1980, duke ndihmuar për grumbullim fondesh kandidatin demokrat në zgjedhjet presidenciale, Michael Dukakis. Ai ishte një ndër ekspertët për përgatitjen e fjalimeve të ish-presidentit Bill Clinton si dhe më pas një ndër këshilltarët për sigurinë kombëtare. Gjatë administratës Obama, ai punoi për të kufizuar numrin e trupave amerikane të dislokuara në pjesën më të madhe të misioneve jashtë vendit.

Gjatë fushatës së zotit Biden, ai ka qenë një ndër këshilltarët e tij më të ngushtë, edhe për tema përtej politikës së jashtme. Ai njihet si person i besuar i zotit Biden, pasi ka punuar me të që në përpjekjet e tij të pasuksesshme për të konkurruar për president në 2008. Në fillim të mandatit të zotit Biden si nënpresident, Antony Biden punoi si këshilltar i tij për sigurinë kombëtare dhe si drejtor i stafit për Komisionin e Senatit për Marrëdhënie me Jashtë gjatë kohës që zoti Biden ishte kryetar i këtij komisioni.

Jake Sullivan ka punuar më parë si këshilltar i zotit Biden për sigurinë kombëtare, gjatë kohës kur ai ishte nënpresident. 43-vjeçari që është diplomuar në universitetin Yale, ka qenë po ashtu pjesëmarrës në programin prestigjoz Rhodes në Universitetin e Oksfordit dhe ka marrë emër se di të zgjidhë punë prapa skenave. Zoti Sullivan ishte pjesë e bisedimeve përmes kanaleve jozyrtare dhe manovrave që çuan në marrëvreshjen e vitit 2015 me Iranin, e cila u anulua nga Presidenti Trump.

Zoti Sullivan kishte në portofolin e tij një numër temash të politikës së jashtme e të brendshme, përfshirë probleme të shëndetit publik dhe përgjigjen ndaj goditjes së ekonomisë nga pandemia dhe u bë shumë shpejt pjesë e ekipit të tranzicionit për presidentin e zgjedhur Biden.

SHBA: I hapet rruga tranzicionit presidencial

Presidenti i zgjedhur Joe Biden nisi sot një fazë të re në tranzicionin e tij drejt Shtëpisë së Bardhë pasi administrata Trump i lejoi atij qasje në fonde dhe burime të tjera që do t’i mundësojnë të marrë frenat e pushtetit në janar.

Njoftimi i Administratës së Shërbimeve Qeveritare të hënën mbrëma se do të njihte zyrtarisht tranzicionin e zotit Biden erdhi pas pretendimeve të pambështetura në fakte, të bëra nga Presidenti Trump, se në zgjedhjet e 3 nëntorit kishte patur mashtrim në shkallë të gjerë.

Në një postim në Twitter, Presidenti Trump ofroi mbështetje për fillimin e tranzicionit të pushtetit.

Kritikët kanë thënë se refuzimi i tij për të pranuar rezultatet minon demokracinë si dhe aftësinë e administratës së re për të luftuar kundër pandemisë së koronavirusit.

Dy zyrtarë të administratës Trump thanë se ekipet e zotit Biden mund të fillojnë të komunikojnë me zyrtarët e agjencive qeveritare, duke filluar që nga e marta.

Një zëdhënëse e Pentagonit, tha se Departamenti i Mbrojtjes ishte kontaktuar nga ekipi Biden-Harris.

Në zgjedhjet e 3 nëntorit, zoti Biden mori 306 vota elektorale kundrejt 232 të marra nga Presidenti Trump. Ai siguroi gjithashtu një epërsi prej më shumë se 6 milion votash popullore në shkallë vendi.

Trump jep dritën e gjelbër

Presidenti Donald Trump tha të hënën se kishte udhëzuar administratoren e agjencisë federale të Shteteve të Bashkuara që është e ngarkuar me procesin e tranzicionit, që “të bëjë atë që duhet bërë”, megjithëse shtoi se ai do t’i vazhdonte sfidat ligjore.

Me zhvillimet e fundit, përpjekjet e presidentit Donald Trump për të përmbysur rezultatin e zgjedhjeve të 3 nëntorit, që kishin pësuar disa disfata, duket se po i afrohen përfundimit.

Presidenti Trump shkruante në Twitter se administratorja e GSA-së Emily Murphy dhe ekipi i saj duhet “të bëjnë atë që duhet bërë në lidhje me protokollet fillestare dhe i kam thënë ekipit tim të bëjë të njëjtën gjë”.

Dhënia e autorizimit nga GSA do të thotë që ekipi i zotit Biden tani do të ketë fonde federale dhe një zyrë për të kryer tranzicionin gjatë dy muajve të ardhshëm.

“Unë e marr seriozisht këtë rol dhe, për shkak të zhvillimeve të fundit që përfshijnë sfida ligjore dhe vërtetime të rezultateve të zgjedhjeve, po e dërgoj këtë letër sot për t’i bërë ato burime dhe shërbime të disponueshme për ju,” shkruante në letrën për presidentin e zgjedhur, Biden, administratorja e GSA-së, Murphy.

Megjithëse në Twitter, Presidenti Trump shkruante se i kishte rekomanduar zonjës Murphy të fillonte tranzicionin, ajo vetë shkruante në një letër për agjencinë e saj, se vendimi ishte “vetëm i saji”.

Më parë GSA kishte thënë se zonja Murphy, një e emëruar nga zoti Trump në vitin 2017, do të “konfirmonte” ose do të miratonte zyrtarisht, tranzicionin kur fituesi të ishte i qartë.

“Përkundër raporteve të medias dhe sugjerimeve, vendimi im nuk u mor nga frika ose favoritizmi”, shkruante zonja Murphy.

Akti Presidencial për Tranzicionin i vitit 1963 nuk parashikon ndonjë afat të prerë brenda së cilit duhet të veprojë GSA, por agjencia ka vepruar historikisht pasi organizatat e medias parashikojnë fituesin, gjë që ndodhi më 7 nëntor.

Reagimet e republikanëve

Të hënën senatori nga Tenesi, Lamar Alexander që është në përfundim të mandatit dhe ka bërë vazhdimisht thirrje për fillimin e tranzicionit, lëshoi një deklaratë të re duke thënë që zoti Trump duhej “të vinte vendin para së gjithash” dhe të ndihmonte administratën e zotit Biden të ketë sukses.

“Kur ke një jetë publike, njerëzit mbajnë mend veprimin e fundit që ndërmerr”, tha ai.

Senatori Republikan Rob Portman nga Ohajo i bëri thirrje të hënën Administratorse së Shërbimeve të Përgjithshme që të vinte në dispozicion paratë dhe personelin e nevojshëm për tranzicionin. Senatori Portman, një nga anëtarët kryesorë të Komisionit për Sigurinë Kombëtare dhe atij për Çështjet Qeveritare në Senat, tha gjithashtu se zoti Biden duhet të marrë informacione të nivelit të lartë mbi sigurinë kombëtare dhe planin e shpërndarjes së vaksinës për koronavirusin.

Senatorët Alexander dhe Portman, të cilët të dy kanë mbështetur zotin Trump, iu bashkuan një numri në rritje të zyrtarëve republikanë të cilët ditët e fundit i kishin kërkuar PresidentitTrump që të fillonte tranzicionin menjëherë.

Senatorja republikane Shelley Moore Capito e Virxhinias Perëndimore gjithashtu bëri thirrje për një tranzicion të qetë, duke thënë në një deklaratë të hënën se “në një moment të caktuar, zgjedhjet e vitit 2020 duhet të përfundojnë.”

Ndërkohë më shumë se 100 ish-zyrtarë republikanë të sigurisë kombëtare – përfshirë ish-Drejtorin e Sigurisë Kombëtare Tom Ridge, ish-Drejtorin e CIA-s Michael Hayden dhe ish-Drejtorin e Zbulimit Kombëtar John Negroponte – thanë në një deklaratë se refuzimi i zotir Trump për të pranuar dhe lejuar një tranzicion të rregullt”, përbën një kërcënim serioz” për procesin demokratik të Amerikës. Zyrtarët që nënshkruan letrën kanë shërbyer për katër presidentë republikanë, përfshirë zotin Trump.

Deklarata u bëri thirrje “Udhëheqësve Republikanë – veçanërisht atyre në Kongres – të kërkojnë publikisht që Presidenti Trump të pushojë sulmin e tij anti-demokratik ndaj integritetit të zgjedhjeve presidenciale.”

Ish-zyrtarë republikanë, thirrje partisë për presion ndaj presidentit

Më shumë se 100 ish-zyrtarë republikanë të sigurisë kombëtare u kërkuan të hënën udhëheqësve të partisë të dënojnë refuzimin e Presidentit Trump për të pranuar humbjen në zgjedhje. Ata e cilësuan këtë qëndrim si sulm të rrezikshëm dhe anti-demokratik ndaj institucioneve amerikane.

Një grup i përbërë me disa nga zyrtarët më të lartë të sigurisë kombëtare në administratat republikane të ish-presidentëve Ronald Reagan, George H.W. Bush, George W. Bush dhe Donald Trump, kritikuan dështimin e pjesës më të madhe të ligjvënësve republikanë për të njohur si fitues të zgjedhjeve demokratin Joe Biden.

Grupi, i njohur me emrin “Ish-Zyrtarë Republikanë të Sigurisë Kombëtare për Bidenin”, i formuar në gusht, i cili ka bërë fushatë kundër zotit Trump, u shpreh në një letër të hapur me kritika më të forta në adresë të udhëheqjes republikane në Kongres.

Pjesa më e madhe e republikanëve kanë qëndruar të heshtur, ndërkohë që Presidenti Trump nuk njeh rezultatin e zgjedhjeve, duke ngritur pretendime të pambështetura në fakte për mashtrime të përhapura. Ekipi ligjor i presidentit ka ngritur një numër padish gjyqësore për të rrëzuar rezultatin e zgjedhjeve që ka nxjerrë fitues zotin Biden.

“Duke inkurajuar taktikat e vonesave të presidentit, ose duke qëndruar të heshtur, udhëheqësit republikanë vënë në rrezik demokracinë amerikane dhe sigurinë kombëtare të vendit,” thuhet në letër.

Pjesëtarët e grupit përfshijnë Gjeneralin në pension, Michael Hayden, i cili ka qenë drejtor i CIA-s; William Webster, i vetmi zyrtar që ka qenë në krye të CIA-s dhe FBI-së; si dhe John Negroponte, drejtori i parë i shërbimeve kombëtare të zbulimit.

Zoti Biden ka siguruar 306 vota elektorale, ndërsa Presidenti Trump ka marrrë 232 vota elektorale. Zoti Biden po ashtu kryeson në votën popullore me një diferencë prej më shumë se 6 milionë votash krahasuar me presidentin.

zëri i amerikës

Antony Blinken pritet të emërohet Sekretar amerikan i Shtetit

Presidenti i zgjedhur amerikan, Joe Biden pritet të zgjedhë këshilltarin e tij dhe diplomatin veteran, Antony Blinken si Sekretar Shteti, kanë raportuar një mori mediash amerikane më 22 nëntor.

Nëse nominohet dhe konfirmohet nga Senati, Blinken do të ketë detyrë krijimin e një qasje të re të diplomacisë amerikane dhe bashkëpunimit global, pas katër vjetëve të politikës “Amerika e Para” e presidentit aktual, Donald Trump, e cila është përcjellë me ndasi në institucionet ndërkombëtare dhe përplasje me aleatët dhe konkurrentët.

Biden do ta bëjë këtë njoftim më 24 nëntor, teksa do të publikojë emrat e parë në kabinetin e tij.

Jake Sullivan, ndihmës i ngushtë i ish-Sekretares amerikane të Shtetit, Hillary Clinton, pritet të emërohet Këshilltar për Siguri Kombëtare i Bidenit.

Emërimi i Blinkenit, që është raportuar fillmisht nga Bloomberg dhe më vonë është konfirmuar edhe nga media tjera, vjen teksa Biden vazhdon të zgjerojë administratën e tij, pavarësisht tentimeve të Trumpit për të përmbysur rezultatin zgjedhor.

Ish-nënpresidenti amerikan është zotuar se do të nisë presidencën më 20 janar, teksa kombi amerikan përballet me pandeminë e koronavirusit dhe krizën ekonomike të shkaktuar nga ajo.

Pasi të marrë pozitën e presidentit, Biden planifikon të rikthehet në Marrëveshjen e Parisit për Klimën dhe të kthejë mbrapsht anëtarësimin në Organizatën Botërore të Shëndetësisë.

Me Blinkenin në krye të diplomacisë amerikane, administata Biden do të synojë të shmangë përshkallëzimin e tensioneve me Iranin, të rindërtojë marrëdhëniet me aleatët dhe të menaxhojë marrëdhëniet tejet të tensionuara me Kinën. rel

Biden njofton të martën anëtarët e parë të Kabinetit të tij

Presidenti i zgjedhur amerikan Joe Biden ka në plan të emërojë anëtarët e parë të kabinetit të tij të martën, tha një prej ndihmësve të tij kryesorë të dielën edhe pse Presidenti Donald Trump u ka bërë thirrje republikanëve ta ndihmojnë atë në përpjekjen e tij ligjore për të përmbysur rezultatin e zgjedhjeve.

Në një intervistë për rrjetin televiziv ABC, Ron Klain, i cili do të shërbejë si shef i kabinetit i zotit Biden në Shtëpinë e Bardhë, nuk pranoi të thotë se drejtuesit e cilave agjenci pritet të caktojë zoti Biden. Por presidenti i zgjedhur tha javën e kaluar se kishte marrë vendim rreth sekretarit të ri të Thesarit dhe se përzgjedhja e tij përfaqësonte “të gjithë elementët e Partisë Demokrate, nga ato progresiste tek ato të moderuara”. Ndërsa zoti Biden pritet të bëhet presidenti i 46-të i vendit me inaugurimin e tij më 20 janar, zoti Trump ka refuzuar të pranojë rezultatin e zgjedhjeve. Të dielën, udhëheqësi në largim i SHBA-së shkruante për ndjekësit të tij në Twitter se: “ne do të gjejmë një numër masiv votash të manipuluara… Republikanë, luftoni me forcë”.

Por lufta ligjore e zotit Trump ka qenë e pafrytshme deri më tani. Zyrtarët e fushatës së tij kanë humbur ose janë tërhequr nga 34 procese gjyqësore ku ngrinin pretendime për manipulim me votat si dhe gjatë procesit të numërimit në shtetet kyçe, në të cilat ishte parashikuar të fitonte zoti Biden. Zoti Trump nuk ka arritur të ndryshojë rezultatin në asnjë shtet, duke lënë të paprekur shumicën e votave elektorale ende jozyrtare të fituara nga zoti Biden, gjithsej 306, kundrejt 232 që ka fituar zoti Trump.

Humbja më e fundit ligjore e zotit Trump lidhej me garën në Pensilvani, Zoti Biden fitoi 20 votat elektorale të këtij shteti me një diferencë prej 81,000 votash. Pasi u njoftua vendimi, një mbështetës kryesor republikan i zotit Trump në këtë shtet, senatori Pat Toomey, nxiti zotin Trump të pranonte humbjen në zgjedhje.

Pas një rinumërimi me dorë të 5 milionë votave, shteti i Xhorxhias çertifikoi të premten fitoren e zotit Biden, ndërsa Pensilvania dhe shteti i Miçiganit mund të bëjnë të njëjtën gjë të hënën. Ndërkohë zyrtarët e fushatës së zotit Trump kanë kërkuar një tjetër rinumërim votash në Xhorxhia.

Pavarësisht dështimit të disa padive ligjore, zoti Trump ka refuzuar të autorizojë administratën e tij për të bashkëpunuar me zotin Biden për kalimin e pushtetit.

Zoti Klain kritikoi drejtuesen e Administratës së Shërbimeve të Përgjithshme, Emily Murphy, e cila është emëruar nga zoti Trump, për refuzimin deri më tani siç tha ai, për të njohur zotin Biden si fituesin e këtyre zgjedhjeve. Një gjë e tillë do të mundësonte që fondet federale të viheshin në dispozicion për transferimin e kontrollit të qeverisë. “Shpresoj që administratorja e GSA-së të bëjë punën e saj”, tha zoti Klain, duke iu referuar zonjës Murphy.

Ai tha se përpjekjet e presidentit republikan për të përmbysur rezultatet ishin të turpshme “dhe anti-demokratike”.

“Një numër rekord amerikanësh refuzuan presidencën e Trumpit dhe që nga ajo kohë Donald Trumpi ka refuzuar demokracinë“, tha zoti Klain.

Ai shtoi se me rritjen e rasteve të koronavirusit në Shtetet e Bashkuara, inaugurimi i zotit Biden do të jetë ngjarje më e vogël krahasuar me atë që zhvillohet tradicionalisht, një ngjarje e madhe në shkallët e Kongresit, pasuar nga një drekë me ligjvënësit kryesorë, një paradë që nis në bulevardin Pensilvania deri në Shtëpinë e Bardhë si dhe një mbrëmje gala. Por ai tha se planet nuk janë finalizuar ende.

“Do të festojmë, por thjeshtë duam ta bëjmë atë në një mënyrë të sigurt“, tha ai.

Pensilvani, gjyqtari federal hedh poshtë padinë e Presidentit Trump për zgjedhjet

Përpjekjet e Presidentit amerikan Donald Trump për të përmbysur rezultattin e zgjedhjeve të 3 nëntorit morën një tjetër goditje të shtunën kur një gjyqtar federal hodhi poshtë një padi gjyqësore të ngritur nga fushata e tij që kërkonte të zhvlerësonte miliona vota të hedhura me postë në Pensilvani.

Gjyqtari Matthew Brann deklaroi se ekipi i Presidentit Trump nuk kishte arritur të provonte se kishte pasur manipulim në shkallë të gjerë me votat në zgjedhjet e 3 nëntorit, të cilat zoti Trump i humbi ndaj rivalit demokrat Joe Biden.

“Kësaj gjykate i janë paraqitur argumente ligjore pa bazë dhe me akuza spekulative,” shkroi gjyqtari në vendimin e tij.

Ai shtoi se (Trump) “nuk ka asnjë autoritet t’i heqë të drejtën e votës qoftë edhe një personi të vetëm, pa folur pastaj për miliona qytetarë”.

Në padinë gjyqësore, të drejtuar nga avokati personal i zotit Trump, Rudy Giuliani, bëhej përpjekje për të ndaluar zyrtarët të çertifikonin fitoren e zotit Biden në Pensilvani, me argumentin se disa qarqe gabimisht i kishin lejuar votuesit të ndreqinin gabimet në fletët e tyre të votimit.

Avokati i Presidentit Trump, Rudi Giuliani

Kjo ishte më e bujshmja ndër dhjetëra paditë gjyqësore të ngritura nga Presidenti Trump dhe aleatët e tij republikanë pas zgjedhjeve. Ata po përpiqen gjithashtu të zhvlerësojnë ose ndryshojnë rezultatet përmes rinumërimeve dhe trysnisë së drejtpërdrejtë mbi ligjvënësit në disa shtete.

Fushata e Presidentit Trump ka dy ditë afat për të kërkuar një rinumërim në shtetin Xhorxhia, ku zyrtarët çertifikuan të premten zotin Biden si fitues, pas një verifikimi me dorë të çdo vote. Ekipi ligjor i zotit Trump ka thënë se planifikon një proces gjyqësor në këtë shtet, por nuk ka dhënë hollësi.

Miçigan, trysni për të shtyrë çertifikimin e rezultatit zgjedhor

Komiteti Kombëtar Republikan dhe Partia Republikane e Miçiganit i kërkuan me anë të një letre bordit shtetëror të zgjedhjeve në Miçigan ta shtyjë procesin e çertifikimit 14 ditë për të lejuar një kontroll të fletëve të votimit në qarkun më të madh të këtij shteti.

Letra vjen ndërkohë që Qarku Uejn, i cili përfshin qytetin me shumicë afrikano-amerikane të Detroitit, është bërë një qendër e përpjekjeve të Presidentit Donald Trump për të përmbysur rezultatet e zgjedhjeve të 3 nëntorit në shtetet që ishin vendimtare në humbjen e tij përballë demokratit Joe Biden.

Dy republikanë në bordin e këshillit zgjedhor të qarkut u përpoqën ta tërheqin votën e tyre në favor të çertifikimit të rezultateve të këtij qarku, pas një thirrjeje telefonike që morën nga vetë Presidenti Trump. Sekretarja e Shtetit e Miçiganit, demokratja Jocelyn Benson, tha se çertifikimi nuk mund të ndryshohet.

Bordi shtetëror, i cili përfshin dy demokratë dhe dy republikanë, do të mblidhet të hënën për të çertifikuar rezultatet e zgjedhjeve dhe do të ketë deri në 20 ditë afat për ta bërë këtë.

Letra bën thirrje për një “kontroll të plotë dhe transparent” në qarkun Uejn, duke përmendur “anomali të shumta dhe raporte të besueshme për parregullsi procedurale” akuza të ngritura nga një kandidat republikan që humbi vendin në senat.

Zyra e Sekretares së Shtetit rekomandoi të premten që bordi i shtetit të çertifikonte rezultatet, të cilat e nxjerrin zotin Biden fitues në Miçigan me 154,187 vota më shumë.

Ajo tha se kishte gabime të vogla në numërim dhe në raportim, por se ato ishin “gabime tipike njerëzore, të ngjashme me ato që kanë ndodhur në zgjedhjet e kaluara” pa ndikim në rezultatet.

I pyetur për këtë çështje, një zëdhënës i Departamentit të Shtetit të Miçiganit vuri në dukje se ligji i shtetit nuk lejon auditim votash para çertifikimit dhe tha: “Gjyqtarët e emëruar si nga republikanët ashtu edhe demokratët kanë gjetur se pretendimet për mashtrim zgjedhor masiv janë krejtësisht të pabaza.”

Disa grupe kanë paraqitur kundërshtime, duke thënë se do të ndërmarrin veprimet e tyre ligjore.

Të premten, një grup votuesish afrikano-amerikanë në Detroit dhe një organizatë për të drejtat e votimit ngritën padi në gjykatën federale duke akuzuar Presidentin Trump dhe fushatën e tij për shkeljen e Aktit të të Drejtave të Votimit të vitit 1965.

Aty thuhet se ekipi i Presidentit Trump pretendon në mënyrë të rreme për manipulim votash dhe po përpiqet ta përmbysë rezultatin në Miçigan dhe në shtete të tjera me presione ndaj zyrtarëve për të mos çertifikuar rezultatin ose për të zgjedhur elektorë pro zotit Trump.

“Për të realizuar këtë strategji, të pandehurit po kërkojnë hapur t’u heqin votuesve afrikano-amerikanë të drejtën e votë,” thuhej në padi. Më shumë se 78% e banorëve të Detroitit janë afrikano-amerikanë, sipas të dhënave amerikane të regjistrimit të popullsisë.

Disa avokatë në Detroit gjithashtu i kanë kërkuar një gjykatësi të qortojë fushatën e zotit Trump për përhapjen e “dezinformimit”.

Sipas ligjit amerikan, zgjedhjet presidenciale i fiton ai kandidat që arrin të sigurojë të paktën 270 vota të Kolegjit Elektoral me 538 anëtarë. Kjo përcaktohet nga vota popullore në çdo shtet. Zoti Biden fitoi në Miçigan me më shumë se 150,000 vota dhe duket se i ka siguruar të 16 votat elektorale në këtë shtet.

Ligjvënësit nga Miçigani në Shtpinë e Bardhë

Në një përpjekje të vështirë për të zhbërë fitoren e zotit Biden në Miçigan – dhe mundësisht në disa shtete të tjera – Presidenti Trump u takua mbrëmë me udhëheqjen republikane të legjislaturës së këtij shteti.

Pas takimit në Shtëpinë e Bardhë, ligjvënësit e Miçiganit publikuan një deklaratë të përbashkët, ku thuhej: “Ne nuk jemi vënë ende në dijeni për ndonjë informacion që do të ndryshonte rezultatin e zgjedhjeve në Michigan. Ne do të ndjekim ligjin,” thanë ata.

Por të shtunën, Presidenti Trump tha se media e kishte lexuar gabim deklaratën e tyre. “Do të provohet se ka patur mashtrim në masë me votat,” shkruante ai në Twitter.

Akuzat e presidentit ndezin pasionet e bazës së tij

Akuzat e Presidentit Trump kanë vazhduar të ndezin pasionet mes bazës së tij republikane.

Qindra mbështetës u mblodhën të shtunën përpara selisë së legjislaturës së shtetit Xhorxhia në Atlanta. Videot e postuara në internet tregonin folës që denonconin mediat për faktin që parashikuan zotin Biden si fitues të zgjedhjeve, si dhe disa udhëheqës republikanë të këtij shteti për çertifikimin e rezultateve.

Në vendin e protestës u dërgua policia me veshje speciale për t’i ndarë ata nga kundërprotestuesit që ishin mbledhur aty pranë.

zëri i amerikës

Trysni për të shtyrë çertifikimin e rezultatit zgjedhor në Miçigan

Bordi shtetëror, i cili përfshin dy demokratë dhe dy republikanë, do të takohet të hënën për të çertifikuar rezultatet e zgjedhjeve dhe do të ketë deri në 20 ditë afat për ta bërë këtë.

Zyra e Sekretares së Shtetit rekomandoi të premten që bordi i shtetit të çertifikonte rezultatet, të cilat e nxjerrin zotin Biden fitues në Miçigan me 154,187 vota.

Disa grupe kanë paraqitur kundërshtime, duke thënë se do të ndërmarrin veprimet e tyre ligjore.

Disa avokatë në Detroit gjithashtu i kanë kërkuar një gjykatësi të qortojë fushatën e zotit Trump për përhapjen e “dezinformimit”.

Por të shtunën, Presidenti Trump tha se media e kishte lexuar gabim deklaratën e tyre. “Do të provohet se ka patur mashtrim në masë me votat,” shkruante ai në Twitter.

Trump pëson dy goditje të tjera në përpjekjet e tij për të përmbysur rezultatin zgjedhor

Përpjekjet e presidentit Donald Trump për të përmbysur rezultatin e zgjedhjeve, morën një goditje tjetër më 20 nëntor, kur shteti i Xhorxhias certifikoi fitoren e presidentit të zgjedhur, Joe Biden, teksa ligjvënësit republikanë nga shteti i Miçiganit u larguan nga një takim në Shtëpinë e Bardhë të papërgatitur që të shkojnë kundër vullnetit të votuesve.

I përballur me një sërë humbjesh në gjykata, për shkak të mosparaqitjes së dëshmive që do të mbështesnin pretendimet e tij për parregullsi në zgjedhje, disa analistë thonë se presidenti amerikan, Donald Trump po ndërmerr një hap të paprecedent në përpjekje për të “përmbysur” procesin e Kolegjit Zgjedhor.

Pas përpjekjeve të fundit të dështuara të Trumpit për të përmbysur rezultatin, lidershipi i republikanëve në shtetin e Miçiganit, përfshirë edhe liderin e Senatit dhe të Dhomës së Përfaqësuesve, u thirrën në Shtëpinë e Bardhë, në përpjekje për t’i bindur ata që të ndihmojnë në përmbysjen e rezultatit në këtë shtet kyç.

Pas këtij takimi në Shtëpinë e Bardhë, lideri i Senatit në Miçigan, Mike Shirkey dhe kryetari i Dhomës së Përfaqësuesve, Lee Chatfield, thanë se pretendimet për mashtrime zgjedhore duhet të hetohen, por ata lanë të kuptohet se nuk janë të bindur nga pretendimet që ka bërë Trump deri tash për këtë çështje.

“Deri tani ne nuk jemi në dijeni për ndonjë informacion që do të mund të ndryshonte rezultatin zgjedhor në Miçigan dhe si liderë të ligjvënësve, ne do t’i bindemi ligjit dhe do të ndjekim procesin zgjedhor sa i përket këtij shteti”, thanë ata përmes një deklarate për media.

“Kandidatët që fitojnë më së shumti vota fitojnë zgjedhjet dhe votat elektorale të Miçiganit, shtuan ata.

Asnjë nga përpjekjet e presidentit Trump nuk pritet që ta ndryshojnë rezultatin e zgjedhjeve presidenciale të 3 nëntorit, ku demokrati Joe Biden ka fituar mbi 270 vota elektorale, të nevojshme që të zgjidhet president.

Por, presidenti Trump dhe aleatët e tij republikanë kanë bërë pretendime të pambështetura se ka pasur mashtrime zgjedhore dhe kanë sulmuar sistemin zgjedhor.

Ndërkaq, në shtetin e Xhorxhias, Sekretari i Shtetit, republikani Brad Raffensperger edhe zyrtarisht ka certifikuar fitoren e Bidenit në këtë shtet, pas rinumërimit të votave, që konfirmuan fitoren e ngushtë të Bidenit kundrejt Trumpit.

“Si republikanët e tjerë, unë jam i zhgënjyer, kandidati ynë nuk ka fituar votat elektorale të Xhorxhias”, tha ai.

Me votat elektorale të Xhorxhias, Biden ka 306 vota elektorale dhe Trump 232. rel

Ligjvënësit e Miçiganit: Nuk kemi informacion që do të ndryshonte rezultatin e zgjedhjeve

Udhëheqësit kryesorë republikanë të legjislaturës së shtetit Miçigan thanë pas një takimi me Presidentin Donald Trump të premten se ata nuk kishin ndonjë informacion që do të ndryshonte rezultatin e zgjedhjeve presidenciale në këtë shtet, ku demokrati Joe Biden mundi republikanin Trump.

“Ne ende nuk jemi vënë në dijeni për ndonjë informacion që do të ndryshonte rezultatin e zgjedhjeve në Miçigan dhe, si udhëheqës legjislativë, do të ndjekim ligjin dhe procesin normal në lidhje me elektorët e Miçiganit,” thanë në një deklaratë të përbashkët udhëheqësi i shumicës republikane të Senatit të Miçiganit Mike Shirkey dhe kryetari i Dhomës së Përfaqësuesve Lee Chatfield.

Sekretarja e Shtypit e Shtëpisë së Bardhë, Kayleigh McEnany tha më parë se takimi i Presidentit Donald Trump me ligjvënësit nga shteti i Miçiganit nuk do të ishte për t’u treguar atyre si të veprojnë dhe se aty nuk do të merrnin pjesë zyrtarë të fushatës.

Presidenti Trump u takua në Shtëpinë e Bardhë me udhëheqësit e legjislaturës së Miçiganit ndërsa fushata e tij vazhdon të sfidojë fitoren e zotit Joe Biden, bazuar në akuza të paprovuara për mashtrim të votuesve.

Pas dështimit me disa sfida në gjykatë për të minuar fitoren e zotit Biden duke vënë në dyshim ligjshmërinë e votave të numëruara, presidenti dhe këshilltarët e tij ligjorë po lidhen drejtpërdrejt me udhëheqësit legjislativë republikanë të shtetit, për të parë nëse ata janë të gatshëm të ndërmarrin hapa për të ndryshuar vullnetin e votuesve.

Takimi duket se ishte pjesë e fushatës së pazakontë pas-zgjedhore të Presidentit Trump për të bllokuar fitoren e Presidentit të zgjedhur Biden në Miçigan dhe në shtetet e tjera fushë-betejë, me synim përmbysjen e rezultateve zgjedhore në mbarë vendin.

Zoti Biden, e fitoi Miçiganin me 154,000 vota më shumë. Por ky shtet ende nuk i ka çertifikuar rezultatet, ndërsa zoti Trump dhe aleatët e tij vazhdojnë të përpiqen të bindin gjyqtarët dhe ligjvënësit e shtetit për të mos përfillur votën popullore, por që elektorët të zgjidhen nga legjislatura e shtetit, ku republikanët kanë shumicën.

Takimi u planifikua pasi Presidenti Trump ndërmori hapin e pazakontë për t’u telefonuar personalisht dy zyrtarëve zgjedhorë të qarkut Uejn të Miçiganit në fillim të kësaj jave, të cilët ranë dakord të çertifikonin rezultatet. Por zyrtarët thanë se më vonë ata shfaqën dëshirën për ta rishikuar vendimin e tyre pasi kishin folur me Presidentin Trump.

Zoti Trump shkoi më tej, duke i ftuar dy ligjvënësit republikanë të Miçiganit në Shtëpinë e Bardhë për bisedime, ndërkohë që zyrtarët shtetërorë të zgjedhjeve përgatiten të konfirmojnë zotin Biden si fitues.

Qarku Uejn, i cili përfshin Detroitin, është më i populluari në Miçigan dhe ku u votua me shumicë për zotin Biden.

Të premten, kur udhëheqësi i shumicës republikane të Senatit në Miçigan, Mike Shirkey, po nisej nga Detroiti për në Uashington, ai u përball me një numër aktivistësh që mbanin pankarta me fjalët: “Respektoni Votën” dhe “Mbroni Demokracinë”.

Në fillim të kësaj jave, zoti Shirkey tha se Biden është presidenti i zgjedhur. Ai tha se asnjë përpjekje për t’ia dhënë votat elektorale të Miçiganit Presidentit Trump “nuk do të ndodhë”, sipas portalit të lajmeve “Bridge Michigan”.

Përpjekje të Presidentit për të përmbysur rezultatin e zgjedhjeve

Presidenti Donald Trump dhe aleatët e tij po ndërmarrin hapa gjithnjë e më të dëshpëruara për të përmbysur rezultatin e zgjedhjeve të vitit 2020, përfshirë thirrjen e legjislatorëve të shtetit të Miçiganit në Shtëpinë e Bardhë si pjesë e një përpjekjeje me pak gjasa për sukses për të përmbysur fitoren e Joe Bidenit.

Ndër taktikat e përdorura së fundmi: thirrjet telefonike personale të presidentit me zyrtarët lokalë të zgjedhjeve që po përpiqen të anulojnë çertifikimin e zgjedhjeve në Miçigan, përpjekjet e një sfide ligjore që Pensilvania të mos respektojë votën popullore dhe presioni ndaj zyrtarëve të zgjedhjeve në Arizona për të vonuar çertifikimin e votave.

Ekspertët e ligjit zgjedhor i shohin këto si përpjekjet e fundit të dëshpëruara, nga ekipi i fushatës së presidentit Trump dhe thonë se është e sigurt që zoti Biden do të hyjë në Zyrën Ovale në janar. Por ekziston një shqetësim i madh se përpjekja e zotit Trump po i bën dëm të konsiderueshëm besimit të publikut në integritetin e zgjedhjeve amerikane.

Senatori i shtetit Jutah, Mitt Romney, një nga kritikët më të zëshëm të presidentit Trump nga radhët e partisë republikane, akuzoi zotin Trump për përdorimin e “presionit të hapur ndaj zyrtarëve shtetërorë dhe lokalë për të rrëzuar vullnetin e popullit dhe për të përmbysur rezultatin e zgjedhjeve”.

Senatori Romney shtoi se “është e vështirë të imagjinohet një veprim më i dëmshëm, më jodemokratik nga një president amerikan në detyrë.”

Vetë agjencia e sigurisë së zgjedhjeve e administratës së presidentit Trump deklaroi se zgjedhjet presidenciale të vitit 2020 ishin më të sigurtat në histori. Disa ditë pasi u lëshua kjo deklaratë, presidenti Trump shkarkoi drejtuesit e agjencisë.

Lëvizjet gjithnjë e më të dëshpëruara dhe kaotike nuk kanë asnjë shans të arsyeshëm për të ndryshuar rezultatin e zgjedhjeve të vitit 2020, në të cilat zoti Biden ka marrë më shumë vota se çdo kandidat tjetër presidencial në histori dhe ka siguruar 270 votat e Kolegjit Zgjedhor të nevojshme për të fituar.

Por pretendimet e vazhdueshme e të pabaza të presidentit republikan, puna e tij për të lëkundur zyrtarët lokalë që çertifikojnë rezultatet dhe refuzimi i aleatëve të tij për të pranuar se ai humbi zgjedhjet ka të ngjarë të ketë një ndikim negativ për një kohë të gjatë në vend. Bastionet e mbështetësve të tij nuk besojnë se ai humbi.

“Është një përpjekje për të bërë që gjysma e vendit të besojnë se ka vetëm dy mundësi, ose fitore ose zgjedhjet janë vjedhur,” thotë Justin Levitt, një studiues i së drejtës kushtetuese dhe profesor në universitetin e Drejtësisë Loyola. “Dhe kjo nuk është një demokraci”.

Fjalia "Çdo votë të numërohet" në një ekran gjigand realizuar nga një organizatë para legjislaturës në Lansing të Miçiganit. (Foto e agjencisë AP) — Fjalia “Çdo votë të numërohet” në një ekran gjigand realizuar nga një organizatë para legjislaturës në Lansing të Miçiganit. (Foto e agjencisë AP)

Dy anëtarët republikanë të Bordit të Zgjedhjeve të Qarkut Wayne në shtetin e Miçiganit njoftuan të mërkurën në mbrëmje se nuk kanë besim se zgjedhjet ishin të drejta dhe të paanshme. “Ka pasur një mungesë të dukshme transparence gjatë gjithë procesit,” thanë ata. Por zyrtarët e zgjedhjeve thane se nuk ka pasur prova të manipulimit ose mashtrimit të votave në Miçigan.

Aleatët e presidentit Trump i kanë mëshuar faktit se presidenti Trump udhëhiqte në fillim në Miçigan dhe disa shtete të tjera natën e zgjedhjeve dhe ky rezultat ndryshoi pasi erdhën votat më vonë, duke e përdorur këtë si provë të dyshimtë.

Por një fluks masiv i fletëvotimeve me postë si pasojë e pandemisë së koronavirusit ishin kryesisht për zotin Biden, i cili inkurajoi mbështetësit e tij të votonin me postë dhe ato vota ishin të fundit që u numëruan. Kështu që u duk se presidenti Trump kishte një avantazh kur në të vërtetë nuk e kishte.

Në fakt, zoti Biden shënoi një fitore të thellë në Wayne, një bastion i demokratëve, duke siguruar dyfishin e votave që mori Presidenti Trump. Sipas rezultateve ende jozyrtare, zoti Biden ka fituar në Miçigan me një diferencë prej 154 mijë votash.

Në fillim të kësaj jave, dy anëtarët republikanë të qarkut bllokuan çertifikimin e votave atje. Ata më vonë u tërhoqën dhe rezultatet u çertifikuan. Por një person në dijeni të kësaj çështjeje tha se presidenti Trump i telefonoi Monica Palmer-it dhe William Hartmann-it, të martën në mbrëmje pas rishikimit të votimit për të shprehur mirënjohje për mbështetjen e tyre. Më pas, të mërkurën, Palmer dhe Hartmann firmosën një dëshmi ligjore ku thonë se besojnë se vota e qarkut “nuk duhet të çertifikohej”.

Sipas sekretarit të shtetit të Miçiganit, ata nuk mund të tërheqin votat e tyre,. Bordi i zgjedhjeve me katër anëtarëve pritet të takohet të hënën dhe është gjithashtu i ndarë me dy demokratë dhe dy republikanë.

Më parë, avokati personal i zotit Trump, Rudy Giuliani dhe avokatë të tjerë mbajtën një konferencë shtypi duke pretenduar një komplot të gjerë zgjedhor të demokratëve që përfshinte shumë shtete dhe makina të dyshuara votimi.

Por zyrtarët e zgjedhjeve në të gjithë vendin kanë thënë vazhdimisht se nuk ka patur mashtrim të përhapur.

Shumë nga akuzat për mashtrim burojnë nga vëzhguesit e zgjedhjeve, të cilët depozituan dëshmi ligjore që janë përfshirë në procese gjyqësore në shtetet e fushës së betejës përmes të cilave synohet vonesa e çertifikimit të votave.

Në Pensilvani, ku ekipi i fushatës së presidentit Trump po sfidon rezultatet e zgjedhjeve në gjykatën federale, një ekip ligjor i udhëhequr nga Rudy Giuliani sugjeroi në një çështje ligjore të depozituar të mërkurën që gjyqtari të urdhërojë legjislaturën shtetërore të udhëhequr nga republikanët të zgjedhë elektorët në Kolegjin Zgjedhor, duke hedhur potencialisht 20 vota elektorale për zotin Trump. Një gjyqtar anuloi një seancë dëgjimore për çështjen.

zëri i amerikës

Biden vazhdon punën për formimin e stafit të tij të Shtëpisë së Bardhë

Presidenti i zgjedhur Joe Biden i shtoi stafit të ndihmësve kryesorë katër ish-zyrtarë të administratës Obama-Biden, ndërsa vazhdon punën për formimin e ekipit të tij të Shtëpisë së Bardhë.

Cathy Russell, ish-shefe e stafit të zonjës Jill Biden gjatë administratës Obama, do të shërbejë si drejtore e Zyrës së Personelit Presidencial në Shtëpinë e Bardhë, që merret me vlerësimin e aplikantëve për role të ndryshme brenda administratës. Louisa Terrell, ish-këshilltare legjislative e presidentit në administratën Obama dhe ish-zëvendës shefe e stafit të zotit Biden në Senat, do të jetë drejtore e Zyrës së Çështjeve Legjislative të Shtëpisë së Bardhë. Ajo është tashmë pjesë e ekipit të tranzicionit dhe merret me marrëdhëniet me Kongresin.

Carlos Elizondo, ish-sekretar i çështjeve sociale për zonjën Jill Biden gjatë administratës Obama, do të jetë në të njëjtin rol, sekretar social për zonjën e parë. Ndërsa Mala Adaga do të shërbejë si drejtoreshë e politikave për zonjën Biden. Zonja Adaga më parë ka punuar si drejtore për arsimin e lartë dhe familjet e ushtarakëve në Fondacionin Biden, prandaj roli i saj i ri është një tregues për fushat ku mund ta përqëndrojë aktivitetin e saj zonja Biden.

Njoftimet vijnë vetëm disa ditë pasi Presidenti i zgjedhur Biden bëri të ditur emrat e atyre që do të jenë këshilltarët e tij më të ngushtë në stafin e lartë të Shtëpisë së Bardhë. Mes tyre janë Jen O’Malley Dillon, që do të shërbejë si zëvendës shefe e stafit dhe kongresmeni Cedric Richmond si drejtor i Zyrës së Angazhimit Publik në Shtëpinë e Bardhë. Në fund të javës së kaluar, zoti Biden njoftoi se ndihmësi i tij i vjetër Ron Klain do të jetë shefi i tij i stafit.

Megjithëse këto njoftime krijojnë një ide për ekipin e Shtëpisë së Bardhë që zoti Biden po fillon të ndërtojë, ai ende nuk ka caktuar dikë në rolin e koordinatorit për COVID-in, as individët në rolet kryesore të komunikimit me publikun. Ekipit të tij do t’i duhet të bëjë mijëra emërime të tjera në stafin e administratës së ardhshme që do të nisë punën në janar. Aktualisht, ekipi është duke shqyrtuar aplikimet dhe po lidhet me kandidatët e mundshëm për rolet kryesore.

Zoti Biden ka dhënë shenja se planifikon të bëjë disa nga emërimet për kabinetin e ri rreth Ditës së Falënderimeve dhe tha të enjten se tashmë ka marrë vendim se cili do të jetë Sekretari i tij i Thesarit.

zëri i amerikës

Joe Biden feston ditëlindjen

Presidenti i zgjedhur amerikan Joe Biden feston në 20 nëntor ditëlindjen e tij të 78. Si figurë e hershme e jetës politike në Uashington, zoti Biden ka treguar një interesim të madh për çështjet ndërkombëtare. I hedhim një vështrim karrierës së tij.

Joseph Biden u zgjodh në Senat në vitin 1972 kur ishte 29 vjeç.

Disa javë më vonë, familja e tij u godit nga tragjedia. Gruaja dhe vajza e tij e vogël humbën jetën në një aksident me makinë, ndërsa dy djemtë u plagosën rëndë.

Zoti Biden mendoi të hiqte dorë nga vendi i tij në Senat, por pastaj vendosi të qëndrojë.

Ai kaloi 35 vjet në Kongres, ku ka qenë një zë i njohur për çështjet e politikës së jashtme.

Zoti Biden është takuar me shumë figura politike ndërkombëtare, përfshirë ish-presidentin çek Vaclav Havel.

Ai kandidoi dy herë pa sukses për president, duke përfshirë garën e vitit 2008, prej nga u tërhoq pas zgjedhjeve paraprake në Iowa.

Në vitin 2008, kandidati demokrat për president Barack Obama e zgjodhi atë si kandidat për nën president, duke marrë parasysh përvojën e gjatë të zotit Biden.

Donald Trump, i cili në atë kohë njihej si manjat i pronave të patundshme dhe si ylli i spektaklit televiziv The Apprentice, u pyet se ç’reagim kishte për emërimin e zotit Biden si kandidat për nënpresident:

“Ishte një zgjedhje e pazakontë dhe shumë njerëz mendojnë se do të jetë interesante. Të shohim se ç’do të ndodhë,” tha ai.

Gjatë administratës Obama, nënpresidenti Biden e vazhdoi punën diplomatike.

Ai vizitoi Kosovën në vitin 2009 dhe më pas në 2016, kur mori pjesë në ceremoninë e emërimit të një rruge me emrin e dalit të tij të ndjerë Joseph “Beau” Biden.

Zoti Biden tha se ripajtimi është i domosdoshëm, duke inkurajuar udhëheqësit e Kosovës që të përmbyllin çështjet që lidhen me fqinjësinë e mirë dhe të forcojnë luftën kundër krimit të organizuar dhe korrupsionit.

“Demokracia e vërtetë është një proces që kërkon punë të vazhdueshme. Çdo qytetar ka për detyrë të votojë, të jetë i angazhuar dhe të ndihmojë tjetrin,” tha ai.

Në nëntor 2016, dy mandatet e Presidentit Obama u pasuan nga fitorja e zotit Trump për republikanët, që habiti shumë njerëz. Kandidati Trump mposhti me rezultat të ngushtë rivalen demokrate Hillary Clinton.

Presidenti Trump ndoqi politikën Amerika e Para, brenda dhe jashtë vendit.

Zoti Biden kandidoi përsëri për Shtëpinë e Bardhë dhe fitoi garën brenda demokratëve për zgjedhjet e vitit 2020.

Fushata e Presidentit Trump e akuzoi atë për përdorimin e lidhjeve të tij në Ukrainë në favor të biznesit të të birit.

Gjatë debatit të fundit presidencial, Presidenti Trump pretendoi se djali i zotit Biden, Hunter kishte marrë rrogë të majme nga një firmë ukrainase.

Zoti Biden u përgjigj se akuza ishte hetuar disa herë dhe se nuk kishte patur ndonjë shkelje.

Një hetim i Senatit i udhëhequr nga republikanët nuk gjeti prova për shkelje nga ana e zotit Biden në lidhje me Ukrainën.

Gjatë më shumë se 30 viteve në Senat, zoti Biden ka kryesuar disa komisione, si ai i marrëdhënieve me jashtë dhe i gjyqësorit.

Ai ka premtuar se do ta udhëheqë vendin në një rrugë shumë të ndryshme nga ajo e katër viteve të shkuara nën Presidentin Donald Trump, për çështje që variojnë nga koronavirusi dhe kujdesi shëndetësor te mjedisi, arsimi dhe politika e jashtme.

Zoti Biden mbështet një strategji për të luftuar kundër militantëve ekstremistë jashtë vendit me forca speciale dhe sulme ajrore, në vend të dërgimit të trupave amerikane në terren.

Ai ka mbështetur disa ndërhyrje ushtarake amerikane, përfshirë atë në Irak në vitin 2003, për të cilin tani thotë se ishte një gabim. Ai anon nga diplomacia dhe nga zgjidhjet përmes aleancave dhe institucioneve globale.

Zoti Biden është një mbështetës i fortë i NATO-s. Ai ka paralajmëruar se Moska po shkatërron themelin e demokracisë perëndimore duke u përpjekur të dobësojë NATO-n, të ndajë Bashkimin Evropian dhe të minojë sistemin zgjedhor amerikan.

Ai thotë gjithashtu se Rusia po përdor institucionet financiare perëndimore për të pastruar miliarda dollarë dhe për të ndikuar politikanët.

Presidenti i zgjedhur Biden ka bërë thirrje për rritjen e pranisë amerikane në Azi-Paqësor dhe forcimin e aleancave me Japoninë, Korenë e Jugut, Australinë dhe Indonezinë.

Ai bashkohet me Presidentin Trump në dëshirën për t’i dhënë fund luftërave në Lindjen e Mesme dhe në Afganistan, por mendon se SHBA duhet të mbajnë një forcë të vogël atje për t’iu kundërvënë terrorizmit.

Ai thotë se vendimet e zotit Trump për të dalë nga traktatet dypalëshe dhe ndërkombëtare si marrëveshja bërthamore me Iranin apo marrëveshja e Parisit për klimën, kanë bërë që vendet e tjera të dyshojnë tek fjala e Uashingtonit.

Zoti Biden ka shprehur dëshirën për t’i ftuar të gjitha vendet demokratike në një samit për të diskutuar se si të luftohet korrupsioni dhe autoritarizmi dhe si të mbështeten të drejtat e njeriut.

Ai ka shprehur mbështetje “të hekurt” për Izraelin dhe është për një zgjidhje me dy shtete në konfliktin e gjatë midis Izraelit dhe Palestinezëve. Ai thotë se do ta mbajë në Jeruzalem ambasadën amerikane, të cilën Presidenti Trump e zhvendosi atje nga Tel Avivi.

Presidenti i zgjedhur e ka kritikuar diplomacinë e Presidentit Trump ndaj Kim Jong Unit, duke thënë se diplomacia e bisedimeve “kokë më kokë” i dha legjitimitet udhëheqësit të Koresë së Veriut dhe nuk e ka bindur Phenianin të heqë dorë nga armët e tij bërthamore. zëri i amerikës

Joe Biden fiton në Xhorxhia

President-elect Joe Biden speaks at The Queen theater in Wilmington, Del., Nov. 19, 2020.

Joe Biden ka fituar në shtetin e Xhorxhias dhe 16 votat e saj elektorale, një fitore e jashtëzakonshme për demokratët që ka zgjeruar hartën e tyre elektorale në juglindje të vendit.

Fitorja e zotit Biden rrit epërsinë e tij në Kolegjin Zgjedhor ndaj Presidentit Donald Trump. Biden u shpall fitues i zgjedhjeve presidenciale më 7 nëntor pasi fitoi në Pensilvani, Miçigan dhe Uiskonsin, shtete të ciliat Presidenti Trump i kishte fituar në zgjedhjet e vitit 2016.

Biden tani ka 306 vota elektorale kundrejt 232 votave të Presidentit Trump.

Zoti Trump fitoi Xhorxhian në vitin 2016, duke marrë 5 përqind më shumë vota se demokratja Hillary Clinton.

Në vitin 2020, demokratët u përqendruar shumë në këtë shtet, duke e parë atë si një mundësi për fitore, dy vjet pasi demokratja Stacey Abrams humbi ngushtë garën për guvernatore të shtetit. Të dy vendet e Senatit në Xhorxhia kanë shkuar në balotazh, duke rritur më tej profilin politik të shtetit.

Xhorxhia nuk kishte votuar për një kandidat demokrat për president që nga viti 1992, kur Bill Clinton u bë president i vendit.

zëri i amerikës

Ish-oficeri amerikan deklarohet fajtor, spiunonte për rusët

Një ish-oficer i Forcave Speciale Amerikane u deklarua fajtor të mërkurën lidhur me akuzat se u kishte siguruar informacione sekrete ushtarake, agjentëve rusë të zbulimit.

Peter Rafael Dzibinski Debbins, 45 vjec, i cili u arrestua në muajin gusht, u deklarua fajtor për akuzën e shpërndarjes së informacionit të mbrojtjes tek një qeveri e huaj.

Ai do të dënohet në shkurt dhe përballet me burgim të përjetshëm thuhej në një deklaratë të Departamentit të Drejtësisë.

Sipas dokumenteve të gjykatës, zoti Debbins, i cili shërbente në forcat elitë të Beretave të Gjelbërta, kishte udhëtuar herë pas here në Rusi mes viteve 1996 dhe 2011 dhe u kishte dhënë agjentëve rusë të zbulimit informacione të ndjeshme të ushtrisë amerikane. Sipas prokurorëve amerikanë në 1997 atij i ishte vendosur emri i koduar “Ikar Lesnikov” dhe kishte nënshkruar një deklaratë që vërtetonte se ai donte t’i “shërbente Rusisë”.

“Debbins pranoi sot se ai ka shkelur besimin më të lartë ndaj vendit duke u dhënë rusëve informacione të ndjeshme që lidhen me sigurinë kombëtare”, tha në një deklaratë John C. Demers, Ndihmës Prokurori i Përgjithshëm për Sigurinë Kombëtare. “Debbins shkeli betimin që kishte bërë, tradhëtoi vendin e tij dhe anëtarët e ekipit të Forcave Speciale me qëllimin për të dëmtuar Shtetet e Bashkuara dhe për të ndihmuar Rusinë”, shtoi ai.

Sipas dokumenteve të gjykatës nëna e zoti Debbins ka lindur në ish-Bashkimin Sovjetik dhe ai kishte treguar “interes rreth Rusisë të paktën pjesërisht për shkak të origjinës së nënës së tij”.

Udhëtimin e parë drejt Rusinë zoti Debbins e ka kryer në vitin 1994, kur ishte 19 vjeç, kohë gjatë së cilës u njoh me bashkëshorten e tij, vajzën e një oficeri rus, në qytetin e Chelyabinsk-ut.

Në vitin 1996, ndërsa ndiqte studimet në universitetin e Minesotës si anëtar i Korpusit të Trajnimit të Oficerëve Rezervë (ROTC), zoti Debbins vizitoi Chelyabinsk-un kohë gjatët së cilës dyshohet se ishte rekrutuar nga agjentët rusë të zbulimit, sipas dokumenteve të gjykatës. Qyteti i Chelyabinsk-ut ndodhet pranë një baze ushtarake ruse.

ROTC është program trajnimi për oficerët amerikanë që ndjekin kolegjin apo universitetin.

Zoti Debbins shërbeu në ushtrinë amerikane nga 1998 deri në 2005, fillimisht si oficer në njësinë kimike dhe më vonë si kapiten në Forcat Speciale. Prokurorët amerikanë thonë se ai iu bashkua Forcave Speciale nxitur nga rusët.

Në vitin 2008, tre vjet pas largimit nga detyra aktive, zoti Debbins u dha agjentëve rusë emrat e një numri ish-anëtarësh të ekipit të tij të Forcave Speciale. Sipas Departamentit të Drejtësisë Rusia e kishte kërkuar këtë informacionin për të “vlerësuar nëse mund t’u afrohej për t’u kërkuar të bashkëpunonin me shërbimet ruse të zbulimit”.

zëri i amerikës

Engel: Të hetohet çdo kush që ka kryer krime lufte, jo vetëm shqiptarët

Komiteti për Punë të Jashtme në Dhomën e Përfaqësuesve i SHBA-së, të cilin e kryeson kongresisti Eliot Engel, ka thënë se çdo kush që ka kryer krime të luftës në Kosovë, pa marr parasysh etninë, duhet të sillet para drejtësisë.

Ky reagim erdhi pas raportimeve të mediave se trupa të shqiptarëve të vrarë gjatë luftës 1998-99 janë gjetur në një varrezë masive në Serbi, afër kufirit me Kosovën.

Engel ka kritikuar edhe më herët Gjykatën Speciale me seli në Hagë e cila deri tash është duke hetuar vetëm shqiptarët për krime të pretenduara se janë kryer gjatë dhe në muajt e parë pas mbarimit të luftës në qershor të vitit 1999.

“Çdo kush që ka kryer krime lufte, pavarësisht nga përkatësia etnike, duhet të dalë para drejtësisë. Pikë. Por, drejtësia nuk duhet të shihet përmes një prizmi nga i cili mund të kalojnë imazhe të vetëm një etnie. Tash për tash, duket se kjo po ndodhë në Kosovë me Gjykatën Speciale, dhe diçka duhet të ndryshojë”, thuhet në një deklaratë në llogarinë e Twitter-it të Komitetit për Punë të Jashtme në Dhomën e Përfaqësuesve që kryesohet nga Engel.

“Ata ende po gjejnë trupa të varrosur në Serbi, viktima të (fushatës së) Millosheviqit për pastrim etnik në Kosovë”, thuhet më tutje.

Më datë 16 nëntor, në afërsi të Rashkës në Serbi, janë gjetur mbetje mortore të cilat dyshohet se i përkasin viktimave shqiptare nga Kosova.

Informacionin mbi zbulimin e mbetjeve mortore në Kizhevak, afër kufirit me Kosovën, fillimisht më 16 nëntor e bëri të ditur drejtori i Institutit të Mjekësisë Ligjore në Prishtinë, Arsim Gërxhaliu. Ai konfirmoi për Radion Evropa e Lirë se bëhet fjalë për mbetjet mortore të shqiptarëve të Kosovës.

Në lokalitetin e njëjtë janë bërë gërmime edhe në vitin 2015.

Kosova përfiton 33 milionë dollarë ndihmë nga SHBA-të

Prishtina

Shtetet e Bashkuara të Amerikës do t’i dhurojnë Kosovës 33 milionë dollarë amerikanë, ndihmë kjo që lidhet me Objektivat Zhvillimore të USAID-it për pesë vitet e ardhshme.

Marrëveshja është nënshkruar të mërkurën nga u.d. e Presidentes, Vjosa Osmani, e cila ka thënë se përmes këtij projekti synohet shërbimi më i mirë ndaj qytetarëve nga institucionet llogaridhënëse dhe efektive të qeverisjes, si dhe rritja e mundësive për pjesëmarrje gjithëpërfshirëse demokratike dhe ekonomike.

“Investimi i vazhdueshëm i SHBA-ve përmes projekteve të ndryshme është konfirmim i përkushtimit të përhershëm të qeverisë dhe popullit amerikan kundrejt rritjes së mirëqenies dhe zhvillimit të përgjithshëm social e ekonomik të Republikës së Kosovës dhe qytetarëve të saj”, ka thënë u.d. Presidentja Osmani përmes një deklarate për shtyp.

SHBA-të janë një nga mbështetësit më të mëdhenj të Kosovës si në aspektin ekonomik ashtu edhe në atë politik.

Biden takim me këshilltarët për Sigurinë Kombëtare

Presidenti i zgjedhur amerikan Joe Biden u takua të martën me këshilltarët e tij të sigurisë kombëtare, por jo me ekspertë qeveritarë të zbulimit, pasi Presidenti Donald Trump vazhdon të bllokojë procesin e tranzicionit të demokratëve për në Shtëpinë e Bardhë.

Sipas ekipit të tranzicionit, zoti Biden dhe Nënpresidetja e zgjedhur Kamala Harris po diskutojnë mbi çështje botërore me ekspertët e tyre në fushën e diplomacisë, zbulimit e të mbrojtjes.

Ditët e fundit ligjvënës të shumtë republikanë kanë thënë se zyrtarët e qeveritare të zbulimit duhet të informojnë zotin Biden përpara inaugurimit të tij në 20 janar edhe pse zoti Trump vazhdon me sfidat e tij ligjore për të përmbysur fitoren e parashikuar të zotit Biden, me synimin për të qëndruar në detyrë për një mandat tjetër katër vjeçar.

Ligjvënësit republikanë thonë se dorëzimi tek zoti Biden i informacioneve ditore që i jepen presidentit nga zbulimi amerikan lidhur me kërcënimet ndaj sigurisë kombëtare dhe ato globale janë thelbësore për të, për marrjen e pushtetit. Sipas tyre paditë e zotit Trump me anë të të cilave pretendohet parregullsi në votime si dhe në numërimit e votave mund të vazhdojnë paralelisht.

Por zoti Trump ka pretenduar vazhdimisht se është ai fituesi i zgjedhjeve dhe ka refuzuar të pranojë humbjen. Numërimi i votave në shtete të veçanta tregon se zoti Biden ka fituar më shumë se 270 vota elektorale minimumi i duhur për të fituar garën për president.

Zyrtarët e zgjedhjeve në të gjithë vendin i kanë thënë Zërit të Amerikës dhe mediave të tjera amerikane se ata nuk kanë gjetur prova për manipulim të gjerë të votave, por vetëm raste relativisht të vogla parregullsish gjatë procesit të votimit, të cilat siç thonë ata, nuk do të ishin të mjaftueshme për të përmbysur rezultatin e zgjedhjeve edhe nëse zoti Trump do të të fitonte proceset gjyqësore.

Që zoti Biden të nisë zyrtarisht procesin e tranzicionin, duke u informuar nga organet e zbulimit dhe duke pasur qasje të gjerë tek agjenci të shumta qeveritare, shefi i Administratës së Shërbimeve të Përgjithshme duhet të nënshkruajë një dokument që vërteton se zoti Biden i ka fituar zgjedhjet. Zoti Trump e ka bllokuar kryerjen e një veprimi të tillë nga kjo agjenci.

Përveç takimit me këshilltarët e sigurisë kombëtare, të martën zoti Biden emëroi shtatë ndihmës kryesorë të tij në Shtëpinë e Bardhë, krahas dy të tjerëve të caktuar për të ndihmuar bashkëshorten e tij, Jill Biden. Javën e kaluar, zoti Biden emëroi ndihmësin e tij të kahershëm, Ron Klain në detyrën e shefin e tij të kabinetit në Shtëpinë e Bardhë.

Po kështu Steve Ricchetti, një ekspert politik karriere, u emërua këshilltar i presidentit, ligjvënësi i Luizianës Cedric Richmond u emërua këshilltar i lartë i zotit Biden dhe drejtor i zyrës për Marrëdhëniet me Publikun në Shtëpinë e Bardhë ndërsa Jennifer O’Malley Dillon, menaxherja e fushatës zgjedhore të zotit Biden, u emërua zëvendës shefe e kabinetit.

Mike Donilon, një nga ndihmësit e hershëm të zotit Biden, u emërua këshilltar i lartë i tij, Dana Remus, avokate e fushatës së zotit Biden, u emërua si këshilltare e presidentit, Julie Rodriguez, një ish-ndihmëse e zonjës Harris, do të shërbejë në detyrën e drejtoreshës së zyrës për çështjet ndërqeveritare në Shtëpinë e Bardhë, Annie Tomasini, një tjetër ndihmëse prej kohësh e zotit Biden, do të jetë drejtoresha e operacioneve të Zyrës Ovale, zyrë që merret me aktivitetet e përditshme të presidentit.

Julissa Reynoso Pantaleon, ish-ambasadorja amerikane në Uruguaj, u emërua shefe e kabinetit të zonjës Jill Biden. Ndihmësi për një kohë të gjatë, Anthony Bernal do të jetë këshilltari i lartë i saj.

“Stafi kryesor i Shtëpisë së Bardhë përbëhet nga individë që demonstrojnë përkushtim ndaj Presidentit të zgjedhur për ndërtimin e një administrate që dëshmon përvojë në qeverisje dhe do të jetë gati të japë rezultate për familjet amerikane që në ditën e parë të punës“, tha ekipi i tranzicionit të zotit Biden.

Presidenti Trump shkarkon kreun e agjencisë për sigurinë e zgjedhjeve

Marrë nga Associated Press

Presidenti Donald Trump shkarkoi të martën drejtorin e agjencisë federale që garantoi besueshmërinë e zgjedhjeve të vitit 2020.

Zoti Trump shkarkoi drejtorin e Agjencisë për Sigurinë Kibernetike dhe të Infrastrukturës, Christopher Krebs me një postim në Twitter, duke thënë se deklarata e tij e fundit në mbrojtje të sigurisë së zgjedhjeve ishte “shumë e pasaktë”.

Shkarkimi i zotit Krebs, një i emëruar i zotit Trump, vjen pasi presidenti po refuzon të pranojë fitoren e Presidentit të zgjedhur, demokratit Joe Biden dhe po largon nga detyra zyrtarë të nivelit të lartë që i konsideron si jo besnikë sa duhet. Ai pushoi nga puna Sekretarin e Mbrojtjes Mark Esper më 9 nëntor, pjesë e ndryshimeve më të gjera që vendosën besnikët e zotit Trump në pozicione të larta të Pentagonit.

Zoti Krebs, një ish-ekzekutiv i Microsoftit, drejtoi agjencinë e njohur si CISA, që nga krijimi i saj pas ndërhyrjes ruse në zgjedhjet 2016 deri në zgjedhjet e nëntorit. Ai u vlerësua nga të dyja krahët e politikës ndërsa CISA bashkërendonte përpjekjet federale, shtetërore dhe lokale për mbrojtjen e sistemeve zgjedhore nga ndërhyrjet e huaja ose të brendshme.

Ai nuk pati ndonjë prirje për të rënë në sy, megjithëse shprehu besim përpara votimeve të nëntorit tek siguria e zgjedhjeve dhe më pas, hodhi poshtë akuzat se numurimi i votimeve ishte shoqëruar me mashtrime. Disa herë, ai u duk se po e kundërshtonte drejtpërdrejt zotin Trump, një lëvizje befasuese nga një zyrtar i Departamentit të Sigurisë Kombëtare, një agjenci që ka ngjallur kritika se është shfaqur se ishte shumë e afërt me synimet politike të presidentit.

CISA lëshoi deklarata ku hidhte poshtë pretendimet se një numër i madh të vdekurish rezultonin si votues ose që dikush mund të ndryshonte rezultatet pa u diktuar.

Ai gjithashtu shpërndau një deklaratë nga një koalicion zyrtarësh federalë dhe shtetërorë duke arritur në përfundimin se nuk kishte prova që votat ishin komprometuar ose ndryshuar në zgjedhjet e 3 nëntorit dhe se këto votime ishin më të sigurtat në historinë amerikane.

Zoti Krebs shmangu kritikat e drejtpërdrejta ndaj presidentit dhe u përpoq të qëndronte mbi grindjet politike, megjithëse ai u përpoq të kundërshtonte dizinfromatat që vinin nga presidenti dhe mbështetësit e tij. “Nuk është detyra jonë të kontrollojmë vërtetësinë e asaj që thotë presidenti,” tha ai në një konferencë me gazetarët në prag të zgjedhjeve.

CISA punon me zyrtarë shtetërorë dhe lokalë që menaxhojnë zgjedhjet në Shtetet e Bashkuara si dhe me kompani private që sigurojnë pajisjet e votimit për të garantuar sigurinë kibernetike dhe rreziqe të tjera gjatë monitorimit të votimit dhe numërimit të votave nga një dhomë kontrolli në selinë e saj pranë Uashingtonit. Agjencia punon gjithashtu me industrinë dhe shërbimet për të mbrojtur bazën industriale të vendit dhe rrjetin e energjisë nga kërcënimet.

Agjencia gëzon një reputacion të mirë mes autoriteteve që u shërben – shtetit dhe zyrtarëve lokalë të zgjedhjeve që mbështeten në këshillat dhe shërbimet e saj në një kohë sulmesh kibernetike pothuajse të vazhdueshme – si dhe në Kongres, ku ligjvënësit kohët e fundit propozuan një rritje të buxhetit të saj vjetor prej rreth 2 miliardë dollarë.

Mes njoftimeve të fundit se zoti Krebs kishte frikë se mund të pushohej nga puna, kongresmeni Bennie Thompson, kryetar i Komisionit të Dhomës së Përfaqësuesve për Sigurinë Kombëtare, kishte thënë se ishte i shqetësuar dhe i dërgoi një mesazh drejtorit për ta pyetur nëse ishte mirë. Përgjigja ishte,, “tani për tani”, tha demokrati nga Misisipi.

“Është për të ardhur keq nëse dikujt me një talent të tillë i mbyllet goja,” tha zoti Thompson. “Nuk kam parë asnjë prirje partiake tek ai. Ai ka qenë një profesionist i përkryer.”

Kongresmeni Jim Langevin, një demokrat nga Rhode Island i cili merret me çështjet e sigurisë kibernetike, u kishte bërë thirrje kolegëve të tij republikanë që ta mbronin atë para se të hiqej nga posti.

“Chris Krebs dhe CISA kanë punuar aq mirë nën udhëheqjen e tij sepse ai dhe ekipi i tij thjesht kanë bërë punën dhe nuk u morën me politikë partiake,” tha Langevin.

Agjencia kishte pasur fillime të vështira. Pak përpara se Presidenti Barack Obama të largohej nga zyra, Shtetet e Bashkuara i përcaktuan sistemet zgjedhore si infrastrukturë kritike të sigurisë kombëtare, si digat ose termocentralet, si rezultat i ndërhyrjes nga Rusia, gjë që përfshinte depërtimin e sistemeve të zgjedhjeve shtetërore si dhe dizinformimin masiv.

Disa zyrtarë të zgjedhjeve në shtete dhe republikanët, duke dyshuar për ndërhyrje federale në territorin e tyre, ishin kundër këtij kategorizimi. Shoqata Kombëtare e Sekretarëve të Shtetit miratoi një rezolutë në kundërshtim me lëvizjen në shkurt 2017. Por administrata e Presidentit Trump mbështeti përcaktimin dhe përfundimisht zyrtarët skeptikë të shteteve e mirëpritën ndihmën.

zëri i amerikës

Faqja 36 prej 134« Fillimi ‹ Prapa 32 33 34 353637 38 39 40 Para ›Fundi »

New York

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL