Qyteti Mineapolis pranoi të premten të paguajë 27 milionë dollarë për të përmbyllur një proces gjyqësor civil të çelur nga familja e George Floyd-it mbi vdekjen e tij ndërsa mbahej nga policia, edhe pse ndërkohë përzgjedhja e jurisë vazhdonte për gjyqin e ish-oficerit të policisë të akuzuar për vrasje.

Këshilli Bashkiak i Mineapolisit doli nga një seancë e mbyllur për të njoftuar shifrën rekord, e cila përfshin 500,000 dollarë për lagjen ku zoti Floyd u arrestua.

Avokati i familjes Floyd, Ben Crump, në një deklaratë të përgatitur, tha se ishte marrëveshja paraprake më e madhe ndonjëherë për një çështje të të drejtave civile dhe se “dërgon një mesazh të fuqishëm se jeta e afrikano-amerikanëve ka rëndësi dhe brutaliteti i policisë kundër njerëzve me ngjyrë duhet të marrë fund”.

George Floyd, i cili ishte afrikano-amerikan, u shpall i vdekur më 25 maj pasi Derek Chauvin, një ish-oficer policie i bardhë, i vendosi gjurin në qafë për rreth nëntë minuta. Vdekja e zotit Floyd shkaktoi disa herë protesta të dhunshme në Minneapolis dhe më gjerë dhe solli një reflektim kombëtar për drejtësinë racore.

“Shpresoj që dita e sotme të përqendrohet tek zërat e familjes dhe gjithçka që ata do të dëshironin të ndanin”, tha Kryetarja e Këshillit Lisa Bender. “Por unë dua që, në emër të të gjithë Këshillit Bashkiak, t’i shpreh ngushëllimet e mia më të thella familjes së George Floyd-it, miqve të tij dhe të gjithë komunitetit tonë që po vajtojnë për humbjen e tij”.

Familja e zotit Floyd ngriti padinë federale për të drejtat civile në korrik kundër qytetit, oficerit Chauvin dhe tre oficerëve të tjerë të pushuar nga puna të akuzuar për vdekjen e tij. Ajo pretendonte se oficerët shkelën të drejtat e zotit Floyd kur e ndaluan dhe se qyteti lejoi që një kulturë e forcës së tepruar, racizmit dhe mosndëshkimit të lulëzonte në forcën e tij policore.

Në vitin 2019, qyteti Minneapolis pranoi të paguante 20 milionë dollarë familjes së Justine Ruszczyk Damond, një grua e paarmatosur e cila u qëllua nga një oficer policie pasi ajo i telefonoi numrit të urgjencës për të raportuar se po dëgjonte kryerjen e një krimi të mundshëm që po ndodhte pas shtëpisë së saj.

Padia federale kërkonte dëmshpërblim të papërcaktuar dhe të veçantë në një shumë që do të përcaktohej nga një juri. Ajo gjithashtu kërkonte që të emërohej një zyrtar për t’u siguruar që qyteti të trajnojë dhe mbikëqyrë siç duhet oficerët në të ardhmen.

Ndërkohë, një anëtare tjetër e mundshme e jurisë u shkarkua të premten pasi ajo pranoi se kishte pikëpamje negative për të pandehurin.

Gruaja, e sapodiplomuar nga kolegji, tha se kishte parë videon e filmuar nga një kalimtar të arrestimit të zotit Floyd dhe kishte lexuar nga afër mbulimin e lajmeve për këtë çështje. Në përgjigje të një pyetësori për jurinë, ajo tha se ajo kishte një perceptim “disi negativ” për oficerin Chauvin dhe se ajo mendon se ai e mbajti shumë gjatë gjurin e tij në qafën e zotit Floyd.

“Munda të shikoj vetëm një pjesë të videos, dhe nga ajo që pashë, si njeri, mua kjo nuk më dha përshtypje të mirë”, tha ajo. Ajo tha se nuk e shikoi videon e kalimtarit të plotë sepse “unë thjesht nuk mundesha ta shikoja më”.

Gruaja në mënyrë të përsëritur tha se mund të linte mënjanë mendimet e saj dhe të vendoste për çështjen bazuar tek faktet, por avokati i oficerit Chauvin, Eric Nelson megjithatë përdori një nga 15 autorizimet që i jep ligji për të përjashtuar anëtarë të jurisë.

Me zgjedhjen e jurisë në ditën e katërt, gjashtë vetë janë përzgjedhur tashmë – pesë burra dhe një grua. Tre janë të bardhë, një është multi-racial, një është hispanik dhe një është afrikano-amerikan, sipas Gjykatësit të Qarkut Hennepin, Peter Cahill.

Gjykatësi Cahill ka caktuar tre javë për seleksionimin e jurisë, dhe deklaratat hapëse do të mbahen jo më shpejt se 29 marsi.

Shkarkimi i shpejtë i së premtes i ngjasonte shkarkimeve pararendëse në këtë çështje, për arsye të ngjashme. Të enjten, një grua u shkarkua pasi tha se “nuk mundej ta shikonte videon” ku oficeri Chauvin mban të mbërthyer në tokë zotin Floyd.

Avokati Nelson e pyeti në mënyrë të përsëritur gruan nëse ajo do të mund të ishte e drejtë pavarësisht nga opinionet e saj të forta.

“Duke parë në zemrën tuaj dhe duke parë në mendjen tuaj a mund të na siguroni se mund t’i lini mënjanë të gjitha ato, të gjitha ato, dhe të përqendroheni vetëm në provat që paraqiten në këtë sallë gjyqi?” – pyeti avokati Nelson.

“Unë mund t’ju siguroj. Por ashtu siç ju përmendët më parë, videoja do të jetë një pjesë e madhe e provave dhe nuk kam asnjë ndryshim mendimi për këtë”, u përgjigj ajo.

Identitetet e anëtarëve të mundshëm të jurisë po mbrohen dhe ato nuk tregohen në videon e transmetuar drejtpërdrejtë nga zhvillimi i procedurave.

Oficeri Chauvin dhe tre oficerë të tjerë u pushuan nga puna. Të tjerët përballen me një gjyq në gusht me akuzën se ndihmuan dhe inkurajuan autorin. Mbrojtja nuk ka thënë nëse zoti Chauvin do të dëshmojë për të mbrojtur veten. VOA

Presidenti Joe Biden shënoi një vit që kur pandemia e koronavirusit filloi të përhapej në Shtetet e Bashkuara, me fjalimin e tij të parë televiziv të enjten në mbrëmje, duke përkujtuar humbjen e më shumë se gjysmë milioni jetësh dhe ofruar shpresë për ditë më të mira përpara.

“Një vit më parë, ne u goditëm nga një virus që u prit pa përgjigje dhe u përhap në mënyrë të pakontrolluar. Për ditë, javë dhe muaj, refuzimi për ta pranuar këtë fakt rezultoi në më shumë vdekje, më shumë infeksione, më shumë stres dhe më shumë vetmi”, tha Presidenti Biden.

Ai tha se do të udhëzojë shtetet që deri më 1 maj të gjithë të rriturit të kenë të drejtën të vaksinohen për koronavirusin dhe u bëri thirrje amerikanëve të mbeten vigjilentë ndaj virusit, disa orë pasi nënshkroi një ligj për paketën stimuluese prej 1.9 trilionë dollarësh.

Zoti Biden foli me forcë për ndikimin e zymtë që pati virusi dhe tha se po punonte për të shpejtuar vaksinimet ndaj COVID-19 për të krijuar një ndjenjë më të madhe normaliteti në vend deri në Ditën e Pavarësisë amerikane më 4 korrik.

Kjo datë është një pikësynim i ri për presidentin, i cili ka paralajmëruar amerikanët se virusi do të vazhdojë të shkaktojë dhimbje dhe vdekje të mëtejshme. Mbi 530,000 njerëz kanë vdekur nga koronavirusi në Shtetet e Bashkuara, shifra më e lartë mes të gjiha vendeve. Bllokimet dhe kufizimet e lidhura me koronavirusin kanë shkaktuar humbjen e miliona vendesh pune.

“Gjetja e dritës në mes të errësirës është një karakteristikë tipike e amerikanëve. Në fakt, mund të jetë më tipikja”, tha ai.

Ndërsa një numër në rritje njerëzish që po vaksinohen përfitojnë nga paketa financiare, presidenti Biden shprehu optimizëm të përmbajtur në një vend që ashtu si pjesa tjetër e botës, është lodhur nga kufizimet pandemike dhe pasojat ekonomike.

Biden tha se po urdhëronte shtetet dhe territoret amerikane që të hapnin vaksinimet për të gjitha grupet e të rriturve të popullatës deri më 1 maj. Shtëpia e Bardhë ka thënë se do të ketë furnizim të mjaftueshëm me vaksina për të imunizuar popullatën deri në fund të majit. Rreth 10% e amerikanëve janë vaksinuar plotësisht deri tani.

Presidenti njoftoi gjithashtu një shtesë prej 4,000 trupash amerikane që do të ndihmojë në përpjekjet e vaksinimit, duke e çuar numrin e përgjithshëm në 6,000 dhe tha se familjet dhe miqtë duhet të jenë në gjendje të mblidhen përsëri në grupe të vogla deri më 4 korrik, një festë që shumë amerikanë e shënojnë me piknike, ushqime dhe fishekzjarre.

Shtëpia e Bardhë po kërkon gjithashtu ta zgjerojë grupin e njerëzve në gjendje të administrojnë vaksina, duke përfshirë dentistë, optometristë, paramedikë, veterinerë dhe studentë të mjekësisë.

Presidenti Biden bëri fushatë vitin e kaluar me premtimin se do ta menaxhonte pandeminë në mënyrë më efektive sesa presidenti republikan Donald Trump dhe ka synuar ta bëjë sjelljen e tij model, duke inkurajuar masa si mbajtja e maskave, diçka që zoti Trump e kiste shmangur.

Ai inkurajoi amerikanët që të vazhdonojnë me masat për frenimin e pandemisë – duke mbajtur maska, duke ruajtur distancën fizike dhe duke praktikuar një higjienë të mirë – për të ndaluar përhapjen e tij ndërsa ritmi i vaksinimeve rritet. Një numër shtetesh kanë lehtësuar kufizimet.

“Ne u përballëm dhe kapërcyem një nga periudhat më të vështira dhe të zymta në historinë e këtij vendi, më e errëta që kemi njohur. Ju premtoj që do të dalim prej saj më të fortë”, tha ai.

Fjalimi i zotit Biden në Shtëpinë e Bardhë po vjen 50 ditë pasi ai mori detyrën dhe pothuajse saktësisht një vit pasi pjesa më e madhe e ekonomisë amerikane pasi koronavirusi u përhap shtet pas shteti në një vend që ishte i papërgatitur për krizën më të madhe shëndetësore që nga epidemia e gripit të vitit 1918 .

Një shans për rimëkëmbje

Më herët të enjten, Presidenti Joe Biden nënshkroi duke e kthyer në ligj paketën stimuluese prej 1.9 trilionë dollarësh, një masë që synon të lehtësojë amerikanët e të forcojë ekonominë, në praninë e nënpresidentes Kamala Harris.

Paketa mori të mërkurën miratimin përfundimtar të Kongresit, duke i dhënë presidentit demokrat një fitore të madhe në këto muaj të parë të mandatit të tij. Zoti Biden dhe anëtarë të lartë të administratës së tij do të bëjnë një turne në shtete të ndryshme për të folur për meritat e legjislacionit dhe për ta shpjeguar atë.

“Ky ligj historik ka të bëjë me rindërtimin e shtyllës kurrizore të këtij vendi dhe synon t’u japë njerëzve të këtij vendi, – njerëzve që punojnë dhe njerëzve të klasës së mesme, njerëzve që ndërtuan vendin – një shans për të luftuar“, tha zoti Biden para nënshkrimit.

Paketa siguron 400 miliardë dollarë të cilat do të jepen në formë pagesash direkte prej 1400 dollarësh për shumicën e amerikanëve, 350 miliardë dollarë ndihmë për shtetet dhe qeveritë lokale, një zgjerim të pagesës për fëmijët dhe rritje të fondeve për shpërndarjen e vaksinave kundër COVID-19-s.

Projekt-ligji u miratua pa një votë të vetme nga republikanët, të cilët ishin ankuas se kostoja e saj ishte shumë e lartë.

Masat për izolimin filluan nën administratën e zotit Trump, i cili e minimizoi krizën në fazat e saj të hershme ndërsa bëri shpesh parashikimin se virusi do të zhdukej së shpejti, megjithëse administrata e tij bëri përpjekje për të përshpejtuar zhvillimin e vaksinave.

Ish- presidenti dhe gruaja e tij, Melania Trump, nuk u shfaqën në mesazh televiziv publik të enjten ku të gjithë ish-presidentët amerikanë që jetojnë dhe bashkëshortet e tyre, inkurajuan amerikanët të bënin vaksinat COVID-19.

Presidenti Joe Biden parashtroi një plan ambicioz pune për 100 ditët e tij të para në detyrë, duke premtuar veprim të shpejtë për gjithçka, që nga ndryshimi i klimës, reforma e emigracionit e deri tek pandemia e koronavirusit.

Në ditën e tij të 50-të në detyrë (të mërkurën), administrata e tij arriti një moment të rëndësishëm: miratimin përfundimtar në Kongres të paketës së tij masive të ndihmës ekonomike prej 1.9 trilionë dollarësh për koronavirusin. Projekt-ligji përfshin pagesa të drejtpërdrejta për miliona amerikanë dhe fonde për të ndihmuar Shtëpinë e Bardhë të realizojë një numër premtimesh të bëra gjatë fushatës së presidentit Biden, si rihapja e shkollave dhe vaksinimi i më shumë amerikanëve.

Në pesëdhjetë ditët e para në detyrë, presidenti Biden ka bërë përparime të mëdha për një numër premtimesh ndërsa mbetet ende punë për të përmbushur premtime të tjera që kërkojnë veprim. Ja disa nga arritjet në premtimet e tij kryesore:

PREMTIMET E PËRMBUSHURA

Presidenti Biden i dha përparësi zgjidhjes së problemit të pandemisë së koronavirusit gjatë javëve të tij të para në detyrë dhe fokusi në këtë çështje ka sjellë rezultate. Ai pritet ta realizojë synimin e tij për të bërë 100 milionë doza vaksine në 100 ditët e tij të para qysh në fund të javës së ardhshme. Shkalla e vaksinimeve tani është mesatarisht më shumë se 2 milionë vaksina në ditë. Janë bërë më shumë se 75 milionë doza që prej inaugurimit të zotit Biden.

Joe Biden ndërmori gjithashtu disa veprime të hershme duke përmbushur premtimet e bëra për politikat ndaj klimës. Ditën e Inaugurimit ai nënshkroi një urdhër ekzekutiv që pezullonte lejen për ndërtimin e naftësjellësit Keystone XL, ndaloi shpimet në Zonën Kombëtare Natyrore në Rrethin e Arktikut dhe urdhëroi rishikimin e rregullave të periudhës së Trumpit për mjedisin, shëndetin publik dhe shkencën. Një urdhër ekzekutiv i 27 janarit ndaloi kontratat e reja të shpimit për naftë dhe gaz në tokat federale dhe në det të hapur.

Presidenti Biden gjithashtu realizoi me lehtësi premtimet kryesore të bëra në fushatë për anulimin e politikave të ish-administratës Trump në pothuajse çdo fushë, që nga ndryshimi i klimës e deri tek imigracioni. Së pari, administrata Biden e ktheu vendin në Organizatën Botërore të Shëndetësisë dhe Marrëveshjen e Parisit për Klimën, ndaloi ndërtimin e murit kufitar, u dha fund kufizimeve të udhëtimit për njerëzit nga një numër vendesh me shumicë myslimane dhe krijoi një grup pune për të bashkuar familjet e ndara në kufirin SHBA-Meksikë.

Në lidhje me imigracionin, presidenti Biden u zotua për një projekt-ligj reformash bashkëkohore në Kongres brenda 100 ditëve të tij të para dhe ai u parashtrua muajin e kaluar, megjithëse presidenti Biden ka sinjalizuar se është i hapur për një qasje më të tërthortë nëse është e nevojshme. Presidenti Biden nënshkroi gjithashtu një urdhër ekzekutiv që udhëzon Këshilltarin e Sigurisë Kombëtare për të “ruajtur dhe forcuar” mbrojtjen e emigrantëve të rinj të sjellë në Shtetet e Bashkuara nga prindërit e tyre.

Joe Biden bëri gjithashtu disa lëvizje të për të përmbushur premtimin e tij për të forcuar standardet e etikës në administrate, duke përfshirë një urdhër ekzekutiv të 20 janarit që imponon një premtim etik mbi të emëruarit qeveritarë për aktivitete të tilla si lobimi dhe marrja e dhuratave, e që përfshin edhe ndalimin e ndërhyrjeve politike në Departamentin e Drejtësisë .

NË PROCES

Premtimet e tjera të zotit Biden mbeten një punë në vazhdim.

Strategjia kombëtare e presidentit Biden për COVID-19 parashikonte krijimin e 100 qendrave të reja të vaksinimit deri në fund të shkurtit, të mbështetura nga qeveria federale në të gjithë vendin. Deri tani, administrata ka krijuar rreth 20 vende për vaksinime masive të drejtuara nga qeveria federale dhe e plotësuar me trupa ushtarake në detyrë të dislokuara nga Pentagoni. Administrata thotë se në total, të paktën 441 qendra vaksinimi mbështeten tani nga qeveria federale. Shumë prej tyre nuk janë qendra të reja, por pothuajse të gjitha kanë zgjeruar kapacitetin me burimet federale shtesë.

Në lidhje me imigracionin, zoti Biden u zotua të kthejë rregullin e “akuzës publike” të vendosur nga administrata Trump për të dekurajuar emigrantët nga përdorimi i përfitimeve publike, të thjeshtojë procesin e natyralizimit dhe të reformojë sistemin e azilit në SHBA brenda 100 ditëve të tij të para. Një urdhër ekzekutiv që ai nënshkroi në fillim të shkurtit udhëzon agjencitë përkatëse të rishikojnë këto politika dhe të rekomandojnë ndryshime brenda 60 ditësh.

Administrata ka ndërmarrë disa veprime për të reformuar sistemin e azilit, duke përfshirë një lëvizje nga Departamenti i Sigurisë Kombëtare për të pezulluar një program të administratës Trump që kërkonte që azilkërkuesit të presnin në Meksikë ndërsa pretendimet e tyre merreshin në shqyrtim. Por presidenti Biden ende nuk ka artikuluar një plan për të menaxhuar fluksin e azilkërkuesve, përtej propozimit që të shpenzohen miliarda dollarë për të adresuar shkaqet themelore të këtij problemi në Amerikën Qendrore.

Presidenti ka mbajtur gjithashtu urdhëra të lidhura me pandeminë që lejojnë administratën e tij të dëbojë menjëherë njerëzit në kufi pa patur një mundësi për të kërkuar azil. Ndihmësit e presidentit Biden kanë thënë se nuk kanë plane të menjëhershme për t’i dhënë fund këtij autoriteti, të cilin ish presidenti Trump e futi në fuqi një vit më parë duke përdorur një ligj të paqartë të vitit 1944 për shëndetin publik.

Presidenti Biden premtoi gjithashtu t’i japë fund ndalimit afatgjatë të familjeve migrante. Agjencia e Imigracionit dhe Doganave sinjalizoi javën e kaluar se planifikon të ndërpresë përdorimin e një strukture të tillë, por do të vazhdojë të mbajë familjet për tre ditë ose më pak në dy objekte të tjera në Teksas. Administrata Biden po zgjeron kapacitetin në një numër objektesh që mbajnë fëmijët emigrantë, për të adresuar një rritje të vazhdueshme të të miturve të pashoqëruar që kalojnë kufirin.

Në lidhje me ndryshimin e klimës, zoti Biden u zotua të vendosë angazhime të zbatueshme nga vendet e tjera për të zvogëluar emetimet në transportin global dhe aviacion dhe të organizojë një samit botëror të klimës për të diskutuar premtime të reja dhe më ambicioze për të adresuar ndryshimet klimatike, brenda 100 ditëve të tij të para. SHBA do të zhvillojë një samit të tillë më 22 prill, që është edhe Dita e Tokës.

Rihapja e shkollave është një nga premtimet kryesore të fushatës së zotit Biden që ka provuar të jetë më e vështirë për t’u zbatuar, pjesërisht pasi vendimi u është lënë zyrtarëve lokalë dhe sindikatave të mësuesve.

Këtë muaj presidenti Biden udhëzoi shtetet t’u japin përparësi mësuesve të vaksinohen dhe njoftoi se po caktonte burime federale për vaksinimin e mësuesve në mars.

Administrata Biden shpreson që me miratimin e projekt-ligjit të ndihmës ekonomike për koronavirusin dhe shpërndarjen e miliona dollarëve për shkollat për të përmirësuar masat e sigurisë, mësuesit do të ndihen më të sigurtë për t’u kthyer në klasa.

Rreth 47% e nxënësve deri në klasën e 12-të kanë qasje fizike në shkolla çdo ditë.

PRITJA PËR VEPRIM

Administrata Biden ende nuk ka ndërmarrë veprime të rëndësishme mbi reformën në drejtësinë penale, përveç një urdhri ekzekutiv që përfundon kontratat e burgjeve private. Zoti Biden u zotua të krijojë një bord mbikqyrës policie brenda 100 ditëve të tij të para, por deri tani nuk ka pasur lëvizje të qartë në atë drejtim.

Premtime të tjera për 100-ditët e para që gjithashtu presin veprim: krijimi i një grupi pune në nivel kabinetit për t’u përqendruar në promovimin e pjesëmarrjes së sindikatës dhe një rishikim të FBI-së për çështjen e kontrollit të biografisë për blerjen e armëve.

Disa nga premtimet e zotit Biden për 100 ditët e para do të kërkojnë veprime në Kongres, si premtimi i tij për të riautorizuar Aktin e Dhunës Kundër Grave dhe për të rritur taksat ndaj korporatave. Zoti Biden premtoi gjithashtu të miratohet Akti i Barazisë, i cili ndalon diskriminimin në bazë të seksit, orientimit seksual dhe identitetit gjinor. Ky projektligj është miratuar në Dhomën e Përfaqësuesve por jo në Senat.

Disa nga premtimet e tij presin konfirmimin nga Senati të sekretarëve të Kabinetit të tij.

Sekretari i Shtetit Antony Blinken mbajti sot fjalimin e tij të parë të rëndësishëm si kryediplomat i vendit, ku parashtroi në linja të gjera politikën e jashtme të administratës Biden.

Ai riafirmoi vendosmërinë e administratës për më tepër angazhim në çështjet globale. “Bota nuk organizohet vetë,” tha zoti Blinken. Kur Amerika tërhiqet, ose dikush tjetër do të përpiqet të zerë vendin e saj, ose askush nuk del për të mbajtur barrën dhe kjo çon në kaos, tha ai.

Sekretari i Shtetit tha se për të mposhtur pandeminë, është e nevojshme që qeveritë, shkencëtarët dhe bizneset kudo në botë të punojnë së bashku. Ai tha se nga pandemia duhen nxjerrë mësimet e duhura dhe të investohet si duhet në të ardhmen për çështjet e shëndetit global.

Zoti Blinken premtoi se Amerika do të përdorë fuqinë e shembullit të saj. “Ne do të inkurajojmë të tjerët të bëjnë reforma të rëndësishme, të anulojnë ligje të këqia, të luftojnë korrupsionin dhe të ndalin praktikat e padrejta,” tha ai. Por ai shtoi se SHBA nuk do ta nxisin demokracinë përmes ndërhyrjeve të shtrenja ushtarake ose duke u përpjekur të përmbysin me forcë regjime autoritare.

“Ne i kemi provuar këto taktika në të kaluarën. Sado me qëllime të mira, ato nuk kanë funksionuar. Ato i kanë dhënë ‘nxitjes së demokracisë’ një emër të keq,” tha zoti Blinken.

Ai tha se zgjidhja e problemeve të demokracisë brenda SHBA ka rëndësi të dorës së parë për diplomacinë e saj jashtë. Përndryshe, tha ai, “ne do të bënim lojën e Rusisë dhe Kinës të cilët shfrytëzojnë çdo rast për të mbjellë dyshime rreth demokracisë sonë.”

Lidhur me imigracionin, Sekretari i Shtetit tha se një kufi i fortë është me rëndësi thelbësore për sigurinë e vendit, por shtoi se Amerika është vend imigrantësh dhe se duhet ta zgjidhë me diplomaci faktin që vit pas viti, njerëz nga vende të tjera rrezikojnë çdo gjë për të ardhur në Shtetet e Bashkuara.

Në fjalimin e tij, zoti Blinken tha se Amerika po bën një përpjekje të madhe për të rivendosur lidhjet me miqtë dhe aleatët. Por ai shtoi se partneriteti me ta nënkupton që secili do të bëjë pjesën që i takon dhe barra nuk do të mbahet vetëm nga SHBA.

Duke folur për revolucionin e sotëm teknologjik, Sekretari i Shtetit bëri thirrje për forcimin e aftësive mbrojtëse kompjuterike të vendit. Ai solli shembullin e ndërhyrjes kibernetike në kompaninë SolarWinds vitin e kaluar, për të cilën dyshohet Rusia dhe që u shoqërua me një depërtim masiv në rrjetet kompjuterike të qeverisë amerikane.

Zoti Blinken tha se Kina është i vetmi vend që ka fuqinë për të sfiduar seriozisht sistemin e qëndrueshëm dhe të hapur ndërkombëtar me të gjitha rregullat dhe vlerat e tij.

Ai i përshkroi marrëdhëniet me Kinën si komplekse, ku do të ketë edhe bashkëpunim por edhe qëndrime nga këndvështrimi i një kundërshtari. Sekretari i Shtetit tha se Amerika do të mbrojë vlerat për të cilat lufton, kur shikon se të drejtat e njeriut shkelen në Sinkiang ose kur demokracia nëpërkëmbet në Hong Kong.

SHBA, tha zoti Blinken, do ta angazhojnë Kinën nga pozitat e forcës.

Ai i përshkroi marrëdhëniet me Kinën si komplekse, ku do të ketë edhe bashkëpunim por edhe qëndrime nga këndvështrimi i një kundërshtari.

Sekretari i Shtetit tha se Amerika do të mbrojë vlerat për të cilat lufton, kur shikon se të drejtat e njeriut shkelen në Sinkiang ose kur demokracia nëpërkëmbet në Hong Kong. SHBA, tha zoti Blinken, do ta angazhojnë Kinën nga pozitat e forcës.

Drejtori i Byrosë Federale të Hetimeve Chris Wray po dëshmon në Kongresin amerikan lidhur me trazirat vdekjeprurëse të 6 janarit në Kapitolin amerikan. Ndër të tjera, ai po përballet edhe me pyetjet nëse FBI-ja komunikoi në mënyrë adekuate me agjencitë e tjera të zbatimit lidhur me mundësitë për dhunë më 6 janar.

Seanca në Komisionin e Senatit për Gjyqësorin, ku po dëshmon zoti Wray, pritet të dominohet nga pyetjet lidhur me përgatitjet e Byrosë Federale të Hetimeve për trazirat dhe hetimet që pasuan. Një tjetër temë e nxehtë pritet të jetë dhe mënyra se si FBI-ja po përballet me kërcënimin e sigurisë kombëtare nga nacionalistët e bardhë dhe ekstremistët e dhunshëm të brendshëm dhe nëse agjencia e tij ka burimet e duhura për të trajtuar këtë problem.

Dhuna në Kapitol e bëri të qartë se agjencia e zbatimit të ligjit që revolucionarizoi veten pas sulmeve të 11 shtatorit 2001, për t’u marrë me terrorizmin ndërkombëtar, tani po përpiqet të adresojë dhunën në rritje nga amerikanët e bardhë.

Administrata e Presidentit Joe Biden ka ngarkuar drejtorin e zbulimit kombëtarë për të punuar me FBI-në dhe Departamentin e Sigurisë Kombëtare për të vlersëuar kërcënimin.

Drejtori Wray ka mbajtur një profil relativisht të ulët që nga dhuna në Kapitolin amerikan dy muaj më parë. Megjithëse ka informuar ligjvënësit privatisht dhe ndarë të dhëna me organet lokale të zbatimit të ligjit për seanca dëgjimore, për zotin Wray dita e sotme shënon daljen e parë publike para Kongresit që nga zgjedhjet presidenciale të nëntorit.

FBI-ja po përballet me pyetje se si i trajtoi të dhënat e zbulimit në ditët para trazirës dhe nëse paralajmërimet për dhunë të mundshme u transmetuan tek zyrtarët e duhur.

Javën e shkuar, shefi i përkohshëm i policisë së Kapitolit tha se raporti i 5 janarit nga FBI-ja ra në dorën e hetuesve brenda forcës së policisë dhe tek njesia e zbulimit, por asnjëherë nuk u dërgua tek hallkat drejtuese.

Raporti në fjalë paralajmëroi në lidhje me postimet në internet që flisinin për “luftë” në kryqytetin amerikan me 6 janar. FBI-ja ka thënë se raporti i saj i përpiluar në të dhëna të paverifikuara, u nda me të gjithë aktorët që janë pesë e forcës kundër terrorizmit.

Një tjetër çështje që mund të ngrihet në seancën e sotme dëgjimore është edhe hetimi i FBI-së lidhur me hakerimin masiv rus të korporatave amerikane dhe agjencive qeveritare, kur hakerë me njohuri të larta injekuan një kod elektronik infektues në përditësimin e programeve kompjuterike.

Ish-Presidenti i SHBA Donald Trump u shfaq të dielën si republikani dominues i vendit, me përpjekjen që partia të fitojë përsëri kontrollin e Kongresit vitin e ardhshëm dhe ndoshta të kandidojë vetë përsëri për presidencën në vitin 2024.

Ai mbajti të dielën pasdite një fjalim në Konferencën vjetore të Veprimit Politik Konservator në Orlando të Floridës, ku ishin mbledhur qindra republikanë, ndër më të flaktët e kësaj partie. Ky ishte fjalimi i tij i parë i rëndësishëm pas humbjes së presidencës ndaj demokratit Joe Biden.

“Qëndroj sot para jush për të deklaruar se rrugëtimi i jashtëzakonshëm që nisëm së bashku katër vjet më parë është shumë larg nga të qënit i përfunduar”, tha zoti Trump.

“Jemi mbledhur këtë pasdite për të folur për të ardhmen – të ardhmen e lëvizjes sonë, të ardhmen e partisë tonë dhe të ardhmen e vendit tonë të dashur,” tha ai.

Por zoti Trump gjithashtu afirmoi synimin e tij si figura mbizotëruese e partisë, duke e lënë të hapur alternativën për të kandiduar përsëri pas tre vjetësh për një mandat tjetër katër-vjeçar në Shtëpinë e Bardhë.

“Ku i dihet. Unë mund të vendos t’i mposht demokratët për herë të tretë,” tha ish-presidenti nën brohoritjet e të pranishmëve, duke përsëritur pretendimin e pa mbështetur në fakte se i kishte fituar zgjedhjet e nëntorit 2020.

Ai argumentoi se partia është “e bashkuar”, pavarësisht disa ligjvënësve republikanë që thonë se ata duhet ta anashkalojnë ish-presidentin, mandati i vetëm i të cilit përfundoi me protesta të pafrytshme zgjedhore dhe me trazirat e 6 janarit në Kapitol.

Ish-presidenti tha se ai nuk ka në plan të krijojë një parti të re për të garuar me Partinë Republikane dhe shtoi se njoftime të tilla janë “lajme të rreme”.

BETEJA BRENDA REPUBLIKANËVE

Një betejë po zhvillohet brenda Partisë Republikane, ku disa nga figurat e njohura si udhëheqësi i pakicës së Senatit Mitch McConnell duan që ta anashkalojnë zotin Trump, ndërsa të tjerë, si aleati i ish-presidentit, Senatori Lindsey Graham, besojnë se e ardhmja e partisë varet nga energjia e bazës konservatore pro-Trump.

Rezultatet e një sondazhi të kryer me pjesëmarrësit në konferencë, i dhanë zotit Trump një mbështetje të fortë me 55 përqind, duke thënë se do të votonin për të në garën e emërimit presidencial republikan në vitin 2024. Guvernatori i Floridës, Ron DeSantis doli në vendin e dytë me 21 përqind.

Pa zotin Trump, DeSantis udhëhiqte me 43 përqind mes kandidatëve të tjerë, të cilët mëron shumë më pak vota.

Por jo të gjithë e mbështetën zotin Trump. Njëra pyetje e anketës ishte nëse Trump duhet të kandidojë përsëri në vitin 2024 dhe rezultati ishte i përzier: 68 përqind thanë se ai duhej të kandidonte ndërsa 32 përqind ishin kundër ose pa ndonjë opinion.

Deklaratat e zotit Trump në konferencë të paktën shërbejnë për të frenuar ndonjë kandidat tjetër të mundshëm republikan për 2024-ën, si senatorët Marco Rubio, Ted Cruz dhe Tom Cotton, ish-ambasadoren në Kombet e Bashkuara Nikki Haley ose të tjerë që aspirojnë presidencën.

E ardhmja e zotit Trump si figura mbizotëruese republikane e vendit mbetet një pyetje e hapur. Ai është i vetmi president në historinë e SHBA ndaj të cilit u ngritën dy herë akuza për shkarkim nga Dhoma e Përfaqësuesve dhe që u shpall i pafajshëm të dyja herët. Është gjithashtu presidenti i parë në 90 vjet që humbi kontrollin politik të Shtëpisë së Bardhë dhe të dy dhomave të Kongresit në një mandat të vetëm në detyrë.

Konservatorët në konferencën tre-ditore e kanë brohoritur përmendjen e emrit të tij. Shumë prej tyre madje kanë pozuar për foto me një statujë të madhe të artë të fytyrës së tij që ishte skalitur në Meksikë dhe që shëtiti nëpër sallën e konferencës.

Në fillim të shkurtit, Senati votoi 57-43, me shtatë republikanë që iu bashkuan të 50 demokratëve, për ta shpallur fajtor zotin Trump për nxitjen e një turme prej qindra mbështetësve që sulmuan Kapitolin, kur ligjvënësit po çertifikonin humbjen e tij në zgjedhje. Megjithatë, Senati nuk arriti shumicën e dy të tretave të nevojshme për shpalljen e tij fajtor.

Trazira la pesë të vdekur, duke përfshirë një oficer të Policisë së Kapitolit. Më shumë se 200 protestues janë arrestuar ndërsa hetimi vazhdon.

Konferenca republikane ishte një nga tubimet vjetore më të spikatura për konservatorët dhe erdhi në një kohë debatesh në rritje brenda Partisë Republikane nëse duhet apo jo që të distancohet nga ish-presidenti apo të vazhdojnë ta lidhë të ardhmen e saj me të.

Zoti Trump ka sinjalizuar se do të përpiqet të dëmtojë imazhin politik të 10 republikanëve në Dhomën e Përfaqësuesve që votuan për ta hequr atë në janar, një javë para se ai të linte detyrën dhe shtatë të tjerëve në Senat që u shprehën pro shpalljes së tij fajtor.

Senatori Mitch McConnell, udhëheqësi i pakicës republikane të Senatit, votoi për ta shfajësuar zotin Trump në gjyq, por më pas e kritikoi ashpër ish-presidentin për rolin e tij në nxitjen e sulmit në Kapitol, ku protestuesit thyen dritaret, shkatërruan zyrat e Kongresit dhe u përleshën me policinë.

Senatori McConnell tha se zoti Trump ishte “praktikisht dhe moralisht përgjegjës për provokimin e ngjarjeve” që çuan në trazirat në Kapitol.

Trump u kundërpërgjigj, duke e portretizuar senatorin si një politikan të zellshëm që nuk i qesh buza kurrë dhe tha nëse senatorët republikanë do të qëndrojnë me zotin McConnell, “ata nuk do të fitojnë dot përsëri”.

Sidoqoftë, senatori McConnell tha javën e kaluar se do të mbështeste zotin Trump për presidencën nëse votuesit republikanë e emërojnë atë përsëri në vitin 2024.

I pyetur nëse Trump ende kontrollon Partinë Republikane, senatori Rick Scott nga Florida tha në emisionin “Fox News Sunday”, se kjo është “parti e votuesve”. Por ai shtoi se beson që zoti Trump do “të jetë i dobishëm” në të ardhmen e afërt.

“Ne jemi në anën e duhur të çështjeve, ndërsa demokratët janë në anën e gabuar” tha senatori Scott.

Një ligjvënës republikan që votoi për ta shpallur fajtor zotin Trump, senatori Bill Cassidy i Luizianës, tha për CNN se nëse republikanët rimarrin Shtëpinë e Bardhë pas katër vjetësh, “kjo do të ndodhë sepse ne flasim për çështjet, jo duke vendosur një person (Trump ) në piedestal.”

“Konferenca e tanishme nuk përfaqëson të gjithë Partinë Republikane,” tha ai. “Nëse ne kthejmë në idhull një njeri të vetëm atëherë do të humbasim.” “Unë nuk mendoj se ai do të jetë i emëruari ynë,” tha senatori. “Ne kemi nevojë për një njeri që punon për të gjithë.”

SULME KUNDËR PRESIDENCËS BIDEN

Fjalimi i zotit Trump përfshinte sulme kundër Presidentit Biden, në përpjekje për t’u pozicionuar si kritiku kryesor i presidentit të ri, në çështje të tilla si imigracioni dhe siguria përgjatë kufirit të SHBA me Meksikën apo rihapja e ngadaltë e shkollave të mbyllura për shkak të pandemisë.

“Të gjithë e dinim që administrata Biden do të ishte e keqe – por askush nga ne nuk e imagjinonte se sa e keqe do të ishte dhe sa larg do të shkonte”, tha ish-Presidenti Trump. “Joe Biden ka pasur muajin e parë më katastrofik se sa çdo president në historinë moderne,” tha ai.

Shtëpia e Bardhë e ka bërë të qartë se nuk do t’i kushtojë vemendje fjalimit.

“Fokusi ynë sigurisht nuk është në atë që thotë Presidenti Trump” në konferencë, u tha zëdhënësja e Shtëpisë së Bardhë Jen Psaki javën e kaluar gazetarëve.

Sondazhet e hershme kombëtare tregojnë se votuesit i japin miratim të gjerë muajit të parë të zotit Biden si president, duke përfshirë edhe disa republikanë. Por ish-Presidenti Trump, edhe nëse refuzohet gjerësisht nga demokratët dhe një shumicë e të pavarurve, mbetet mjaft popullor mes shumë votuesve republikanë.

Raporti i agjencive amerikane të zbulimit liston 21 persona për të cilët SHBA ka besim të madh se ishin përgjegjës për vdekjen e gazetarit në emër të princit të kurorës. Zyrtarët amerikanë besojnë se princi saudit i kurorës Mohammed bin Salman miratoi operacionin për “kapjen ose vrasjen” e gazetarit, thuhet në dokumentin e sapo lëshuar.

Ky lajm është në përditësim

Presidenti i Shteteve të Bashkuara, Joe Biden, telefonoi mbretin Salman të Arabisë Saudite, ndërsa administrata e tij pritet të publikojë një version të deklasifikuar të mandatuar nga kongresi të një raporti të zbulimit, që pritet të vërë në pah se i biri i mbretit, princi i Kurorës, Mohammed bin Salman, ka miratuar vrasjen e gazetarit saudit, Jamal Khashoggi, në vitin 2018.

Sipas Shtëpisë së Bardhë, gjatë bisedës telefonike, presidenti Biden dhe mbreti Salman “diskutuan mbi sigurinë rajonale, duke përfshirë përpjekjet e ripërtërira diplomatike të drejtuara nga Kombet e Bashkuara dhe Shtetet e Bashkuara për t’i dhënë fund luftës në Jemen dhe angazhimin amerikan për të ndihmuar Arabinë Saudite që të mbrojë territorin e saj, teksa përballet me sulme nga grupe të lidhura me Iranin”.

Njoftimi i Shtëpisë së Bardhë mbi telefonatën, vuri në dukje lirimin e fundit të disa aktivistëve amerikanë sauditë dhe veprimtares saudite për të drejtat e grave, Loujain al-Hathloul nga paraburgimi dhe pohoi rëndësinë që Shtetet e Bashkuara u kushtojnë të drejtave universale të njeriut dhe sundimit të ligjit. Njoftimi nuk përmendi raportin mbi vrasjen e Jamal Khashoggit, i planifikuar për t’u publikuar pas telefonatës.

Shtëpia e Bardhë nuk dha një shpjegim se pse njoftimi nuk përmendi Khashoggin, i cili ishte një banor i ligjshëm i Shteteve të Bashkuara dhe me fëmijë me shtetësi amerikane.

Jamal Khashoggi, kolumnist në Washington Post, u josh në konsullatën Saudite në Stamboll më 2 tetor 2018 dhe u vra nga një ekip operativësh të lidhur me princin e kurorës. Ata më pas e copëtuan trupin e tij. Eshtrat e tij nuk u gjetën kurrë.

Riadi përfundimisht pranoi se gazetari Khashoggi u vra gabimisht në një operacion që shkoi keq, por mohoi çdo përfshirje të princit të kurorës

Roli i princit të kurorës, i njohur nga nistoret e tij MBS, në vrasjen e Jamal Khashoggit, është subjekt i raporteve të medias që nga fundi i vitit 2018. Administrata e ish presidentit Donald Trump hodhi poshtë kërkesat e ligjvënësve për të publikuar një version të deklasifikuar të raportit, pasi që Shtëpia e Bardhë i dha përparësi shitjes së armëve në mbretëri dhe aleancës me Riadin, mes tensioneve në rritje të Shteteve të Bashkuara me rivalin e saj rajonal, Iranin.

Rivlerësimi i marrëdhënieve ndërmjet Shteteve të Bashkuara dhe Arabisë Saudite, dhe synimi për të vënë theksin tek të drejtat e njeriut, është një zotim fushate i presidentit Biden. Që nga marrja e detyrës, ai i ka dhënë fund shitjes së armëve që Riadi mund të përdorë në Jemen dhe emëroi diplomatin veteran Timothy Lenderking si të dërguarin e posaçëm për të udhëhequr përpjekjet e diplomacisë amerikane “për t’i dhënë fund luftës në Jemen, një luftë e cila ka krijuar katastrofë humanitare”.

“Presidenti Biden dëshiron të jetë i qartë se rruga e vjetër nuk është rrugë e e re,” tha Gerald Feierstein, nënkryetar i Institutit për Lindjen e Mesme.

Administrata po kërkon gjithashtu të distancohet nga MBS, sundimtari 35 vjeçar de facto vendit. Zëdhënësja e Shtëpisë së Bardhë, Jen Psaki, shpesh ka theksuar se presidenti Biden do të komunikojë vetëm me mbretin saudit.

Ndërsa Shtetet e Bashkuara po rishikojnë marrëdhëniet me sauditët, Shtëpia e Bardhë po përpiqet të nxisë rivalin rajonal të Riadit, Iranin, që të veprojë në përputhje me marrëveshjen bërthamore që u prish pasi ish presidenti Trump u tërhoq prej saj në vitin 2018.

Marrëveshja e njohur si Plani i Përbashkët Gjithëpërfshirës i Veprimit u arrit nga Irani dhe P5 + 1 (Kina, Franca, Gjermania, Rusia, Britania e Madhe dhe Shtetet e Bashkuara) nën administrimin e ish presidentit Barack Obama, në vitin 2015.

Dhënia fund e shitjeve të armëve sulmuese në Riad është pjesë e kalkulimeve më të mëdha gjeopolitike që përfshin drejtpeshimin e këtyre dy fuqive rajonale, tha zoti Feierstein, i cili ishte gjithashtu ambasador në Jemen në kohën e ish presidentit Obama.

“Ideja është që nëse ka një zgjidhje politike të konfliktit në Jemen, kjo mundet, në fakt, të zvogëlojë tensionin në rajon…”. tha ai.

Krahasuar me Libanin dhe Irakun, Jemeni është një përparësi më e vogël e sigurisë kombëtare për Iranin. Zbutja e tensioneve mund të jetë një masë e ndërtimit të besimit për të nxitur Teheranin përsëri në bisedimet bërthamore dhe përfundimisht të trajtojë shqetësimet tjera, duke përfshirë programin e tij të raketave balistike dhe mbështetjen për milicitë në Irak dhe Liban. Në fakt, tha zoti Feierstein, rirreshtimi i presidentit Biden me sauditët në Jemen, mund të ndihmojë më tej interesat e Shteteve të Bashkuara në rajon.

Por, analistë të tjerë thonë se rivlerësimi i marrëdhënieve me Riadin dhe riangazhimi me Teheranin mund të ketë kundërefekt. Kjo mund të bëjë që sauditët të ndjehen të braktisur nga Shtetet e Bashkuara dhe t’i shtyjë ata drejt veprimeve kundër interesave amerikane, tha Bradley Bowman, nga Fondacioni për Mbrojtjen e Demokracive, një institucion pro-izraelit i njohur për qëndrimet kundër marrëveshjes bërthamore me Iranin.

Por, Kelsey Davenport, nga Shoqata për Kontrollin e Armëve, kërkimet e së cilës përqendrohen në programet bërthamore dhe raketore në Iran, tha se mënyra më e mirë për të parandaluar një garë rajonale bërthamore është rivendosja e marrëveshjes bërthamore.

“Përballja me programin bërthamor të Iranit do të parandalojë që Arabia Saudite të ndjejë nevojën që të barazohet me mundësitë e Iranit,” tha ajo.

Zonja Davenport theksoi se gjatë disa viteve të fundit, sauditët kanë hedhur bazat për të zhvilluar një armë bërthamore, nëse do të zgjidhnin të bënin një gjë të tillë.

“Nga pikëpamja e sigurisë së Shteteve të Bashkuara dhe qëndrueshmërisë rajonale, rivendosja e një marrëveshjeje bërthamore është një hap i parë i rëndësishëm për të siguruar që nuk do të ketë krizë me Iranin që kalon në një krizë bërthamore rajonale”, tha ajo.

Dhjetëra ish zyrtarë republikanë, të cilët e shohin partinë si të pavullnetshme për t’i rezistuar ish-Presidentit Donald Trump dhe përpjekjeve të tij për të minuar demokracinë amerikane, janë në bisedime për të formuar një parti të të qendrës së djathtë, thanë për agjencinë Reuters, katër persona të përfshirë në bisedime.

Diskutimet në fazën e hershme përfshijnë ish zyrtarë të zgjedhur republikanë, ish zyrtarë që kanë shërbyer në administratat republikane të Ronald Reaganit, George H.W. Bush, George W. Bush dhe Trump, ish-ambasadorë republikanë dhe strategë republikanë, thonë personat e përfshirë në bisedime.

Më shumë se 120 prej tyre zhvilluan një telekonferencë të premten për të diskutuar shkëputjen e grupit, i cili do të funksionojë mbi platformën e “konservatorizmit parimor”, duke përfshirë besnikërinë ndaj Kushtetutës dhe shtetin e së drejtës – ide që personat e përfshirë thonë se janë hedhur poshtë nga ish presidenti Trump.

Plani është futja e kandidatëve në disa gara, por edhe mbështetja e kandidatëve të qendrës së djathtë në të tjera, qofshin ata republikanë, të pavarur apo demokratë.

Evan McMullin, i cili ka qënë drejtor i politikave në Konferencën Republikane të Dhomës së Përfaqësuesve dhe kandidoi si i pavarur në zgjedhjet presidenciale të vitit 2016, i tha agjencisë Reuters se ai organizoi telekonferencën me ish zyrtarët e shqetësuar në lidhje me kontrollin e Trumpit ndaj republikanëve dhe kthesën anti-imigracionit që ka marrë partia.

Tre persona të tjerë konfirmuan për agjencinë Reuters telekonferencën dhe diskutimet për një parti të mundshme, por kërkuan të mos identifikohen.

Midis pjesëmarrësve ishin John Mitnick, këshilltar i përgjithshëm në Departamentin e Sigurisë Kombëtare në administratën Trump; ish-kongresmeni republikan Charlie Dent; Elizabeth Neumann, nëndrejtore kabinetit në Departamentin e Sigurisë Kombëtare në administratën Trump; dhe Miles Taylor, një tjetër ish-zyrtar i sigurisë kombëtare në administratën Trump.

Bisedimet nxjerrin në pah përçarjen e thellë brenda partisë mbi pretendimet e rreme të Trumpit për manipulimin e zgjedhjeve dhe sulmin vdekjeprurës të 6 janarit në Kapitolin. Shumica e republikanëve i qëndrojnë besnikë ish-presidentit, por të tjerët kërkojnë një drejtim të ri për partinë.

Pjesëmarrësit në telekonferencë thanë se ishin veçanërisht të tronditur nga fakti që më shumë se gjysma e republikanëve në Kongres – tetë senatorë dhe 139 ligjvënës të Dhomës së Përfaqësuesve- votuan për të bllokuar çertifikimin e fitores së Bidenit në zgjedhje vetëm disa orë pas rrethimit të Kapitolit.

Shumica e senatorëve republikanë gjithashtu kanë treguar se nuk do të mbështesin dënimin e Trumpit në gjyqin e Senatit nën akuza se nxiti dhunën në Kongres.

“Pjesë të mëdha të Partisë Republikane po radikalizohen dhe po kërcënojnë demokracinë amerikane”, tha zoti McMullin. “Partia duhet të përkushtohet përsëri ndaj të vërtetës, arsyes dhe idealeve themelore ose duhet të ketë dale diçka e re.”

‘Këta dështakët’

I pyetur në lidhje me diskutimet për një parti të tretë, Jason Miller, një zëdhënës i Trumpit, tha: “Këta dështakë u larguan nga Partia Republikane kur votuan për Joe Bidenin.”

Një përfaqësues për Komitetin Kombëtar Republikan iu referua një deklarate të fundit nga kryetarja Ronna McDaniel.

“Nëse vazhdojmë të sulmojmë njëri-tjetrin dhe të përqendrohemi në sulmet ndaj republikanëve, nëse kemi mosmarrëveshje brenda partisë tonë, atëherë do të humbasim vështrimin nga zgjedhjet e vitit 2022,” tha McDaniel në kanalin Fox News muajin e kaluar.

“E vetmja mënyrë për të fituar është të bashkohemi”, tha ajo.

Zoti McMullin tha se një shumicë e atyre që morën pjesë në telekonferencën e javës së kaluar mbështesnin idenë e një partie të tretë kombëtare, të shkëputur nga partia republikane. Një tjetër mundësi në diskutim është formimi i një “fraksioni” që do të funksiononte ose brenda partisë aktuale republikane ose jashtë saj.

Prokurorët në Qarkun Fulton të shtetit Xhorxhia kanë filluar një hetim penal lidhur me përpjekjet e ish-Presidentit Donald Trump për të përmbysur rezultatet e zgjedhjeve në këtë shtet.

Hetimi përfshin një telefonatë që ai i bëri Sekretarit të Shtetit Xhorxhia Brad Raffensperger në të cilën i bëri presion zyrtarit që të gjente vota të mjaftueshme për të përmbysur rezultatin.

Hetimi vjen ndërsa zoti Trump përballet me një gjyq të dytë në Senat me akuzën e “nxitjes së rebelimit” për rolin e tij në tyrazirat në Kapitol më 6 janar. Dhuna e asaj dite erdhi pas disa javë pretendimesh të rreme të ish-presidentit se mashtrimi zgjedhor e privoi atë nga fitorja, duke përfshirë shtetin e Xhorxhias ku ai humbi me rreth 12,000 vota më pak.

Sot nis në Senatin amerikan gjyqi i dytë historik ndaj ish-Presidentit Donald Trump. Ai akuzohet për nxitje të rebelimit një muaj më parë duke u kërkuar mbështetësve të tij të përballen me ligjvënësit në Kapitol ndërsa ata po çertifikonin fitoren e demokratit Joe Biden në zgjedhjet e nëntorit 2020.

Protesta u kthye në një përplasje të dhunshme. Rreth 800 mbështetës të zotit Trump sulmuan autoritetet e Kapitolit, thyen dyer e dritare, plaçkitën disa zyra të Kongresit dhe u përleshën me policinë. Si pasojë pesë persona mbetën të vdekur, mes tyre një oficer i policisë së Kapitolit, si dhe një protestuese e cila u qëllua nga një oficer policie.

100 senatorë, 50 për secilën palë, të cilët do të shërbejnë si anëtarë të jurisë gjatë procesit gjyqësor në Senat, ndodhen në një pozicion të pazakontë. Shumë prej tyre ishin dëshmitarë të kaosit të 6 janarit, ditë gjatë së cilës u detyruan të largohen nga kjo dhomë e Kongresit për arsye sigurie.

Që ish-presidenti të shpallet fajtor mbi akuzën e ngritur do të duheshin votat e dy të tretës së anëtarëve të Kongresit, ose demokratëve do t’u nevojiteshin votat e 17 republikanëve duke e marrë të mirëqenë që të 50 senatorët demokratë do të votojnë për shpalljen e tij fajtor. Në këto kushte, është pothuajse e garantuar që Senati do të votojë për lirimin nga akuza të ish-Presidentit Trump, ashtu sikundër një vit më parë kur ai u akuzua se i kishte bërë presion presidentit të Ukrainës që të siguronte informacione dëmtuese kundër zotit Biden, përpara zgjedhjeve të nëntorit të kaluar.

Por pavarësisht rezultatit zoti Trump do të jetë i vetmi president në historinë më shumë se dy shekullore amerikane ndaj të cilit janë ngritur dy herë akuza për shkarkimin nga Senati.

Një javë pas sulmit në Kapitol, Dhoma e Përfaqësuesve votoi me 232 vta pro dhe 197 kundër, për ngritjen zyrtarisht të akuzës ndaj zoti Trump. 10 republikanë iu bashkuan të 222 demokratëve, duke akuzuar zotin Trump për “nxitje rebelimi”.

Me përfundimin e mandatit të tij, më 20 janar, ditë kur u inaugurua Presidenti i ri i vendit Joe Biden, zoti Trump u nis drejt Floridës.

Ish-Presidenti ka refuzuar një kërkesë të demokratëve për të dëshmuar në gjyqin kundër tij në Senat dhe nuk pritet të marrë pjesë në të. Gjyqi mund të zgjasë një javë ose më shumë.

Nëntë ligjvënës të Dhomës së Përfaqësuesve të cilët do të shërbejnë si prokurorë të çështjes, thonë se zoti Trump, falë nxitjes së mbështetësve për për të msyrë drejt Kapitolit për të kundërshtuar humbjen e tij në zgjedhje, është “i vetmi përgjegjës” për trazirat që pasuan.

Zoti Trump u kërkoi mbështetësve të vinin në Uashington më 6 janar, duke folur rreth një zhvillimi që e përkufizoi si “të papranueshëm”. Në një tubim pranë Shtëpisë së Bardhë pak përpara se mbështetësit e tij të niseshin drejt Kapitolit, zoti Trump vazhdoi me breshërinë e pretendimeve të tij të pabazuara, të hedhura për javë të tëra për manipulim të zgjedhjeve që, sipas tij, i kushtuan atij mandatin e dytë në Shtëpinë e Bardhë.

Gjatë fjalimit të tij që zgjati më shumë se një orë, zoti Trump u tha mbështetësve “që në mënyrë paqësore e patriotike të bëjnë që zërat e tyre të dëgjohen” duke marshuar drejt Kapitolit.

Por ai gjithashtu i inkurajoi ata duke u thënë: “Vendi ynë ka duruar boll. Ne nuk do ta durojmë më dhe e gjitha kjo është për këtë qëllim. Dhe për të përdorur një term të preferuar për të gjithë ju, ne do ta ndalim vjedhjen”.

“Ne do të luftojmë”, shtoi ai. “Ne do të luftojmë me çdo kusht dhe nëse nuk luftojmë kështu, nuk do të kemi më shtet”, tha zoti Trump.

Në një argumentim ligjor të çështjes përpara gjyqit në Senat, prokurorët e çështjes thanë se: “Përgjegjësia e Presidentit Trump për ngjarjet e 6 janarit është e qartë” dhe se “sjellja e tij duhet të deklarohet e papranueshme në mënyrë të qartë e pa mëdyshje”, edhe pse ai nuk është më në detyrë.

Kushtetuta e Shteteve të Bashkuara mundëson heqjen e zyrtarëve të gjetur fajtorë për “krime dhe shkelje të rënda”. David Schoen dhe Bruce Castor, dy avokatët me eksperiencë që do të përfaqësojnë zotin Trump, argumentojnë se duke qenë se ai nuk është më president, ai nuk mund të hiqet nga detyra dhe se gjyqi ndaj tij është anti-kushtetues.

Sidoqoftë, Senati ka zhvilluar në të kaluarën gjyqe për ish-zyrtarë, duke mos u lejuar të shmangin një gjyq për shkelje të mundshme nëpërmjet dorëheqjes, siç ndodhi në një rast të vitit 1876, ose në rastin e zotit Trump, që la detyrën sepse i kishte mbaruar mandati. Për më tepër, prokurorët e Dhomës së Përfaqësuesve argumentojnë se zoti Trump nxiti trazirat dhe u akuzua nga Dhoma e Përfaqësuesve ndërsa ishte ende në detyrë.

Senatori Rand Paul i shtetit Kentaki, një mbështetës i vendosur i zotit Trump, u përpoq të bllokonte gjyqin për arsye të tilla kushtetuese, por pesë republikanë u bashkuan me të 50 senatorët demokratë në votimin 55 me 45 për ta vazhduar procesin. Por votimi gjithashtu sinjalizoi se mbështetja republikane për pafajësinë e zotit Trump mbetet e konsiderueshme, e mjaftueshme për të bllokuar shpalljen e tij fajtor.

Senatori Paul thotë se ekzistojnë “zero shanse për dënimin e tij”. Nëse zoti Trump do të shpallej fajtor, Senati, me një shumicë të thjeshtë votash, mund t’i ndalonte atij mbajtjen e funksioneve publike në të ardhmen.

Sot, avokatët e zotit Trump dhe anëtarët e Dhomës së Përfaqësuesve që shërbejnë sërish si prokurorë, pritet të debatojnë për kushtetueshmërinë e zhvillimit të gjyqit. Nëse Senati vendos që procesi të vazhdojë, prokurorët e Dhomës së Përfaqësuesve do të fillojnë të paraqesin argumentet e tyre të mërkurën, ndoshta duke shfaqur disa nga xhirimet e marra gjatë orëve të trazirave.

Në vazhdim, avokatët e presidentit do të përgjigjen me mbrojtjen e tij. Sipas një marrëveshjeje të njoftuar të hënën nga udhëheqësit e kongresit, secila palë do të ketë 16 orë përgjatë dy ditëve për të paraqitur argumentet.

Avokatët e zotit Trump kanë ngritur një mbrojtje të fuqishme dhe pretendojnë se ish-presidenti nuk mban asnjë përgjegjësi për atë që ndodhi më 6 janar.

Në një material përmbledhës të paraqitur të hënën, ata pretenduan se çështja kundër tij është një “teatër politik” i demokratëve anti-Trump. Avokatët e zotit Trump sugjeruan se ai thjesht po ushtronte të drejtën e tij të garantuar në kushtetutë për fjalën e lirë, kur ai kundërshtoi rezultatet e zgjedhjeve dhe thanë se ai inkurajoi qartazi mbështetësit e tij për t’u angazhuar në një protestë paqësore.

“Përkundrazi, kjo ishte vetëm një përpjekje egoiste e udhëheqjes demokrate në Dhomën e Përfaqësuesve për të shfrytëzuar ndjenjat e tmerrit dhe konfuzionit që përfshinë të gjithë amerikanët nga mbarë spektri politik, kur panë shkatërrimin në Kapitol më 6 janar nga disa qindra persona”, shkruajnë avokatët. “Në vend që të veprojnë për të shëruar kombin, ose të paktën duke u përqëndruar në ndjekjen penale të shkelësve të ligjit që sulmuan Kapitolin, Kryetarja e Dhomës së Përfaqësuesve (Nancy Pelosi) dhe aleatët e saj janë përpjekur të përdorin kaosin e momentit për përfitim politik”, shkruajnë ata.

Në përgjigje, demokratët e Dhomës së Përfaqësuesve që shërbejnë si prokurorë thanë se, “Ne jetojmë në një vend të qeverisur nga shteti ligjor, dhe jo nga dhuna e turmës e nxitur nga presidentë që nuk pranojnë dot humbjen në zgjedhje”.

“Provat për sjelljen e Presidentit Trump janë të shumta”, shkruajnë ata. “Ai nuk ka asnjë justifikim ose mbrojtje të vlefshme për veprimet e tij. Dhe përpjekjet e tij për t’i shpëtuar përgjegjësisë janë krejtësisht të kota. Siç thuhet në akuzë, Presidenti Trump shkeli betimin e detyrës së tij dhe tradhtoi popullin amerikan”, shkruajnë prokurorët.

Ish-Presidenti Donald Trump, ndaj të cilit është ngritur akuza se ka nxitur rebelim duke rezultuar në sulmin e dhunshëm në Kapitol më 6 janar, do të gjykohet nga Senati duke filluar nga e marta.

Më 6 janar ish-presidenti doli para përkrahësve, para se ata të niseshin drejt Kapitolit ku ligjvënësit po certifikonin rezultatin e zgjedhjeve. Ja disa pasazhe nga komentet e tij atë ditë.

— “Të gjithë ne këtu sot nuk duam që fitorja jonë në zgjedhje të vidhet nga demokratë të së majtës radikale që kanë marrë hov. Atë po bëjnë, po vjedhin së bashku me median e rreme. Atë kanë bërë dhe atë po bëjnë. Nuk do të pushojmë kurrë. Nuk do të pranojmë kurrë humbjen. Nuk pranohet humbja kur ka vjedhje votash”.

— “Vendi është ngopur. Nuk do të durojmë më. Po përdor një frazë të preferuar, të krijuar nga vetë ju: ne do të ndalim vjedhjen”.

— “Pas kësaj do të ecim drejt Kapitolit. Do të jem edhe unë me ju. Do të shkojmë. Do të brohorasim për senatorët, ligjvënësit e guximshëm. Ndoshta nuk do të na duhet të brohorasim shumë për disa prej tyre, pasi kurrë nuk mund ta marrësh nën kontroll vendin kur je i dobët. Duhet të tregosh forcë, të jesh i fortë”.

— “Kemi ardhur për t’i kërkuar Kongresit të bëjë atë që duhet dhe të numërojë vetëm elektorët nga zgjedhje të zhvilluara në mënyrë të ligjshme. E di se të gjithë ju këtu do të marshoni drejt Kapitolit në mënyrë paqësore, patriotike dhe të thoni fjalën tuaj”.

— “Do të luftojmë. Do të luftojmë si dreqi. Nuk do të keni më atdhe nëse nuk luftoni fort”.

— “Do të ecim nëpër Bulevardin Pensilvania. Sa më pëlqen Bulevardi Pensilvania! Do të shkojmë tek Kapitoli, do të përpiqemi të ndihmojmë ligjvënësit republikanë, ata të dobëtit sepse të fortët nuk kanë nevojë për ndihmën tonë. Do të përpiqemi t’u japim atë krenari dhe guxim që u duhet për të marrë përsëri vendin”.

Më 13 janar Dhoma e Përfaqësuesve ngriti akuza kundër zotit Trump. Dy javë pas trazirave, mandati Presidentit Trump përfundoi. Ai u largua drejt rezidencës së tij në brigjet e oqeanit Atlantik në Florida.

Ligjvënësit amerikanë propozuan këtë muaj dy projektligje mbi lirinë e shtypit dhe mbrojtjen e gazetarëve në botë.

Projektligji për Lirinë Globale të Shtypit lindi si përpjekje dypartiake nga Senatori demokrat Brian Schatz dhe republikani Todd Young për të krijuar një post në rang ambasadori për lirinë e shtypit dhe për të trajnuar zyrtarët diplomatikë amerikanë për të nxitur pavarësinë e medias dhe për të mbrojtur gazetarët e huaj.

Ndërkaq, Projektligji Jamal Khashoggi për Përgjegjësi mbi Lirinë e Shtypit i propozuar nga Senatorja Amy Klobuchar dhe ligjvënësi Adam Schiff u pagëzua në nder të gazetarit të vrarë Khashoggi, i cili punonte për të përditshmen amerikane Washington Post. Ky projektligj synon të mbajë përgjegjës ata që shënjestrojnë gazetarët.

“Projekligji ynë i ri rithekson angazhimin tonë për një media të lirë në SHBA dhe jashtë vendit, duke i dhënë autoritetin Departamentit të Shtetit të angazhohet në shkallë globale në këto çështje në mënyrë diplomatike,” tha javën e kaluar përmes një deklarate zoti Schatz, i cili kohët e fundit iu bashkua Komisionit të Senatit për Marrëdhënie me Jashtë.

Projektligji u përshëndet me entuziazëm nga aktivistët për lirinë e shtypit.

“Kur i mbyllet goja shtypit, korrupsioni, dhuna, pabarazia dhe abuzimi i autoritetit mund të shpëtojnë pa u diktuar,” tha sekretari i përgjithshëm i organizatës Gazetarët Pa Kufinj, Christophe Deloire. “Projektligji do të krijonte burime shtesë për qeverinë amerikane për të garantuar se zyrtarët qeveritarë punojnë për të krijuar një mjedis të sigurtë për gazetarët dhe për nxitjen e lirisë së shtypit në vende që ndjekin politika armiqësore ndaj gazetarëve”.

Annie Boyajian me Freedom House, tha se organizata e saj është “krenare që mbështet Ligjin për Lirinë Globale të Shtypit”.

“Me emërimin e një emisari për lirinë e shtypit do të krijohej vizibilitet për këtë çështje dhe do të krijohej një epiqendër për këtë përpjekje në Departamentin e Shtetit,” tha zonja Boyajian.

10 vjet më parë, Kongresi miratoi një ligj të ngjashëm. Ligji Daniel Pearl për Lirinë e Shtypit, i pagëzuar në kujtim të gazetarit të Wall Street Journal, i cili u rrëmbye dhe u ekzekutua nga ekstremistët në Pakistan në 2002, kërkon nga Departamenti i Shtetit të hartojë raporte me të dhëna mbi kufizimet mbi lirinë e shtypit, të cilat përfshihen në analizën vjetore të gjendjes së të drejtave të njeriut.

Në fjalimin e tij të parë mbi politikën e jashtme, Presidenti Joe Biden tha se “një shtyp i lirë është jetik për mirëqënien e një demokracie”. Në 2020, SHBA u renditën në vend të 45 nga 180 vende në Indeksin Global të Lirisë së Shtypit të përpiluar nga Gazetarët Pa Kufij.

Partia Republikane e shtetit Wyoming votoi me shumicë dërrmuese të shtunën për të dënuar ligjvënësen Liz Cheney për votimin pro ngritjes zyrtarisht të akuzës ndaj ish-Presidentin Donald Trump lidhur me rolin e tij në trazirat e 6 janarit në Kapitol.

Vetëm tetë nga 74 anëtarët e komitetit republikan votuan kundër.

“Ne kemi nevojë të respektojmë Presidentin Trump. Gjithçka që bëri Presidenti Trump ishte thirrja për një grumbullim paqësore dhe protestë për një zgjedhje të drejta e që do t’i nënshtroheshin një procesi shqyrtimi“, tha Darin Smith, i cili humbi përballë zonjës Cheney në garën mes republikanëve në vitin 2016 për një vend në Dhomën e Përfaqësuesve. “Partia Republikane duhet t’i bëjë asaj një paralajmërim”.

Në një deklaratë pas votimit zonja Cheney tha se ajo mbetet e nderuar të përfaqësojë Wyoming dhe se do të luftojë gjithmonë për çështje që kanë më shumë rëndësi për shtetin.

“Më kryesorja mes tyre është mbrojtja e Kushtetutës sonë dhe lirive që ajo garanton. Vota ime për ngritjen e akuzës u detyrua nga betimi që kam bërë përpara Kushtetutës“, tha ajo.

Zonja Cheney do të vazhdojë të mbetet numri tre i republikanëve të Dhomës së Përfaqësuesve, pas një votimi 145-61 të mërkurën.

Një trashëgimtare e supermarketeve Publix dhuroi rreth 300,000 dollarë për të financuar një tubim që i parapriu sulmit vdekjeprurës në Kapitol më 6 janar nga mbështetësit e ish-Presidentit Donald Trump, njoftoi të shtunën gazeta Wall Street Journal.

Gazeta tha se financimi nga Julie Jenkins Fancelli, donatore e njohur e fushatës së zotit Trump në vitin 2020, u bë i mundur nga moderatori i djathtë televiziv, Alex Jones. Sipas gazetës, paratë e saj u përdorën për të paguar pjesën më të madhe të tubimit në parkun Ellipse ku zoti Trump mbajti fjalim dhe u kërkoi mbështetësve të tij “të luftonin”. Krejt tubimi kushtoi rreth 500,000 dollarë.

Më shumë se 135 njerëz janë arrestuar në lidhje me sulmin e 6 janarit, në kohën kur Kongresi ishte mbledhur për të çertifikuar fitoren e demokratit Joe Biden në zgjedhjet e nëntorit. Pesë persona, përfshirë një polic të Kapitolit, humbën jetën.

Sipas gazetës, Alex Jones personalisht premtoi më shumë se 50,000 dollarë për tubimin, në këmbim të mundësisë për të folur aty. Jones, i cili ka publikuar teori komploti tashmë të diskredituara, ka intervistuar në emisionet e tij të njohura në TV dhe radio udhëheqësit e dy grupeve ekstremiste, Proud Boys dhe Oath Keepers, të cilat luajtën rol kryesor në trazirat e asaj dite.

Në një postim në Twitter, Supermarketet Publix shkruanin se dhuna në Kapitol më 6 janar ishte një tragjedi kombëtare. “Veprimet e mjerueshme që ndodhën atë ditë nuk përfaqësojnë vlerat, punën ose mendimet e Supermarketeve Publix,” thuhej në deklaratë.

Departamenti i Sigurisë së Kombëtare (DHS) publikoi të mërkurën një raport mbi terrorizmin duke paralajmëruar rreth potencialit për dhunë të vazhdueshme nga njerëz të motivuar nga ndjenja anti-qeveritare pas zgjedhjes së Presidentit Joe Biden. Buletini sugjeron se trazirat e 6 janarit në Kapitol mund të inkurajojnë ekstremistët e të krijojnë kushte për sulme të reja.

Në raport nuk citohej ndonjë kërcënim specifik, por vihej në dukje “një mjedis kërcënues edhe më i madh në të gjithë Shtetet e Bashkuara” që sipas Departamentit amerikan të Sigurisë Kombëtare “do të vazhdojë” me marrjen e detyrës nga zoti Biden më 20 Janar.

“Informacioni sugjeron që disa ekstremistë të dhunshëm të motivuar ideologjikisht e që kundërshtojnë ushtrimin e autoritetit qeveritar dhe tranzicionin presidencial, apo për shkak të pakënaqësive të tjera të perceptuara, të nxitura nga histori të rreme, mund të vazhdojnë të mobilizohen për të nxitur ose kryer akte dhunë“, thuhej në raport.

Aty nuk përmendej ndonjë lidhje ideologjike ose politike, por paralajmërohej më gjerësisht për “individë të irrituar me ushtrimin e autoritetit qeveritar dhe tranzicionin presidencial, si dhe ankesa të tjera të perceptuara e shkaqe ideologjike të nxitura nga histori të rreme”.

Këta individë, thuhej në raportin e Departamentit të Sigurisë Kombëtare, “mund të vazhdojnë të mobilizojnë një gamë të gjerë aktorësh të motivuar ideologjikisht për të nxitur ose kryer dhunë”.

Nuk është e pazakontë që qeveria federale të paralajmërojë organet lokale të zbatimit të ligjit përmes publikimit të raporteve e këshillave mbi mundësinë e kryerjes së akteve të dhunës lidhur me një datë ose ngjarje të veçantë, siç është 4 korriku.

Por ky raport i veçantë, i lëshuar përmes Sistemit Kombëtar Këshillues për Terrorizmin të këtij departamenti, dallon sepse vendos efektivisht administratën e Presidentit Biden në mesin e një debati të ngarkuar politik mbi mënyrën se si përshkruhet apo karakterizohen aktet e motivuara nga ideologjia politike dhe sugjeron se e sheh dhunën që synon përmbysjen e rezultatit të zgjedhjeve të ngjashme me terrorizmin.

Dokumenti sugjeron se zyrtarët e sigurisë kombëtare shohin lidhje mes dhunës së vitit të kaluar, dhe dhunës së motivuar nga ndjenjat anti-qeveritare, qofshin këto kundër kufizimeve për pandeminë e COVID-19, rezultatet e zgjedhjeve apo përdorimin e forcës nga policia. Ai veçon akte dhune me motive racore si ato të vitit 2019 që kishin në shënjestër komunitetin hispanik në Teksas, si dhe kërcënimin e paraqitur nga ekstremistët e motivuar nga organizatat e huaja terroriste.

Alarmi vjen në një kohë të tensionuar pas protestës së dhunshme në Kapitol nga mbështetësit e ish-Presidentit Donald Trump të cilët po kërkojnë të përmbysnin rezultatin e zgjedhjeve presidenciale. Raporti i Departamentit të Sigurisë Kombëtare flet edhe për sulmet e dhunshme në “ditët e fundit”, një referencë e dukshme për ngjarjet në Portland të Oregonit, të lidhura me grupet anarkiste.

Alarmi u lëshua nga sekretari në detyrë i Departamentit të Sigurisë Kombëtare, David Pekoske. I emëruari i zotit Biden për këtë post, Alejandro Mayorkas, nuk është konfirmuar ende nga Senati.