Ndihmës Sekretari amerikan i Shtetit për Evropën, Jim O’Brien i quajti “të pakoordinuara dhe provokuese” veprimet e qeverisë së Kosovës, pas mbylljes së komunave paralele serbe në veri të vendit.

“Shtetet e Bashkuara janë të shqetësuara nga veprimet e vazhdueshme të pabashkërenduara dhe provokuese të Qeverisë së Kosovës”, shprehet zoti O’Brien në një postim në platformën X, duke i bërë jehonë një deklarate të mëparshme të Ambasadës amerikane në Prishtinë.

Në postimin e tij, zoti O’Brien tha se Shtetet e Bashkuara i bëjnë thirrje “Kryeministrit Kurti dhe qeverisë së tij që të konsultohen dhe të bashkërendohen me komunitetin ndërkombëtar dhe të ndërpresin veprimet e pabashkërenduara që ndikojnë negativisht në partneritetin tonë”.

“Ne vlerësojmë punën e atyre, përfshirë EULEX-in dhe KFOR-in, që parandalojnë dhunën dhe bëjmë thirrje për vetëpërmbajtje të vazhdueshme nga të gjitha palët”, shprehet zoti O’Brien.

Më herët të premten ambasada amerikane në Prishtinë tha se operacioni i autoriteteve të Kosovës për mbylljen e komunave paralele serbe në veri të vendit, “nuk ishte i bashkërenduar” dhe vazhdimi i veprimeve të tilla paraqet “përkeqësim real dhe në rritje të partneritetit tonë”.

Autoritetet mbyllën të premten komunat paralele serbe në veri, në një veprim që ka të ngjarë të nxisë tensione të reja, me gjithë thirrjet e diplomacisë perëndimore për shmangien e “hapave të njëanshëm” në zonë.

Në një reagim të publikuar nga ambasada amerikane në Prishtinë, thuhet se “qeveria e Shteteve të Bashkuara përsërit shqetësimin dhe zhgënjimin e saj me veprimet e vazhdueshme të pabashkërenduara të qeverisë së Kosovës që vazhdojnë të kenë një ndikim të drejtpërdrejtë dhe negativ ndaj pjesëtarëve të komunitetit etnik serb dhe komuniteteve të tjera pakicë në Kosovë”.

Policia e Kosovës, tha se operacioni në katër komunat në veri të vendit u zhvillua për të ndërprerë veprimtaritë në “pesë objekte të cilat janë shfrytëzuar në cilësi të komunave ilegale, e të cilat janë në kundërshtim me rendin juridik kushtetues”.

Ministri i Pushtetit Lokal, Elbert Krasniqi, tha se “janë mbyllur institucionet paralele ilegale të vetëqeverisjes Lokale, të cilat kanë funksionuar nën direktiva të Serbisë duke cenuar kushtetutshmërinë dhe ligjet e Republikës së Kosovës”.

Ministri Krasniqi tha se “komunat e mbyllura janë Qarku i Mitrovicës së Kosovë, Komuna paralele e Mitrovicës, Komuna paralele e Zveçanit, Komuna paralele e Zubin Potokut dhe Komuna paralele e Leposaviqit”.

Më herët gjatë këtij viti, autoritetet mbyllën shtatë komuna të tjera paralele serbe në pjesë tjera të vendit.

Në reagimin e ambasadës amerikane thuhet mes tjerash se “çështjet që kanë të bëjnë me strukturat e mbështetura nga Serbia në Kosovë duhet të trajtohen përmes dialogut të lehtësuar nga Bashkimi Evropian. Ky veprim nuk ishte i bashkërenduar me asnjë element të bashkësisë ndërkombëtare”.

Në reagim theksohet se Shtetet e Bashkuara dhe partnerët ndërkombëtarë kanë kërkuar vazhdimisht nga qeveria e Kosovës që ta ketë përparësi bashkërendimin dhe të mos ndërmarrë veprime të njëanshme për çështjet që përfshihen në agjendën e bisedimeve.

“Dështimi i Qeverisë së Kosovës për t’iu përgjigjur këtyre kërkesave, pasqyron një përkeqësim real dhe në rritje të partneritetit tonë. Siç e kemi theksuar më parë, veprimet e pabashkërenduara të qeverisë së Kosovës i vënë në rrezik më të madh qytetarët e Kosovës dhe ushtarët e KFOR-it, përshkallëzojnë në mënyrë të panevojshme tensionet rajonale dhe dëmtojnë emrin e Kosovës si një partner i besueshëm ndërkombëtar”.

Më tej në reagim thuhet se ndërsa “qeveria e Shteteve të Bashkuara është krenare që ka mbështetur themelimin dhe profesionalizimin e Policisë së Kosovës gjatë shumë viteve si pjesë e angazhimit tonë për të promovuar sigurinë dhe qëndrueshmërinë, instrumentalizimi i vazhdueshëm i policisë së Kosovës nga qeveria për të kryer veprime të pabashkërenduara nuk është në përputhje me premtimin e Kosovës se do të “vazhdojë këshillimin dhe bashkërendimin me komunitetin ndërkombëtar. Veprimet e qeverisë do të ndikojnë edhe në cilësinë dhe natyrën e bashkëpunimit tonë me ministrinë e Punëve të Brendshme dhe elementët vartës të saj”.

Kosova i cilëson institucionet komunale të emëruara nga Beogradi të paligjshme.

Shuarja e institucioneve paralele serbe është paraparë me marrëveshjen e vitit 2013, për normalizimin e marrëdhënieve Kosovë-Serbi, por zbatimi i saj ka ngecur.

Zyrtarët e Serbisë reaguan me zemërim ndaj operacionit të sotëm. Shefi i zyrës për Kosovën në qeverinë e Serbisë, Petar Petkoviç, tha se ky veprim “do të ketë pasoja afatgjata në procesin e normalizimit të marrëdhënieve” dhe sipas tij “ka për qëllim të nxisë konflikte në veri”.

Ai tha se me mbylljen e këtyre institucioneve (kryeministri Albin) Kurti “dëshiron të shuajë jetën e serbëve në veri të Kosovës dhe të realizojë spastrimin përfundimtar etnik”.

Në fillim të muajit gusht autoritetet mbyllën Postën e Serbisë në veri dhe shpalosën planet për të hapur urën kryesore mbi lumin Ibër në Mitrovicë për trafikun e makinave.

Të enjten Presidenti francez Emmanuel Macron u shpreh i shqetësuar me ato që i quajti “veprime të njëanshme” të Kosovës, që sipas tij, nuk paraqesin shenja të mira drejt normalizimit të marrëdhënieve me Serbinë.

Gjatë një vizite që e përmbylli të premten në Serbi, ai tha se Franca do të vëzhgojë “kushtet në të cilat jeton komuniteti serb në Kosovë”, duke nënvizuar se “në këtë aspekt, jemi veçanërisht të përkushtuar në formimin e Asociacionit të komunave me shumicë serbe”, që është pjesa më e vështirë e bisedimeve Kosovë – Serbi.

Kryeministri i Kosovës, Albin Kurti, tha të premten qeveria e tij është duke vendosur sundim të ligjit dhe rendit publik, si dhe duke siguruar paqe dhe siguri për të gjithë qytetarët e Kosovës, pa dallim.

“Në këtë aspekt duam edhe bashkëpunimin e ngushtë, edhe mbështetjen ndërkombëtare, përfshirë këtu edhe Francën, që e konsiderojmë vend mik, aleat dhe partner shumë të rëndësishëm edhe në Bashkimin Evropian, edhe në NATO”, tha kryeministri Kurti.

Perëndimi kërkon nga Kosova që çështjet që lidhen me situatën në veri të Kosovës të trajtohen në kuadër të dialogut në Bruksel.

Në intervistën e saj të parë të rëndësishme të fushatës presidenciale të enjten, Nënpresidentja Kamala Harris mbrojti qëndrimet e saj të reja, duke hequr dorë nga pikëpamjet liberale në raport me disa çështje.

Por ajo këmbënguli se “parimet e saj nuk kanë ndryshuar”.

Zonja Harris u intervistua nga rrjeti televiziv CNN së bashku me guvernatorin e Minesotës, Tim Walz, i cili kandidon krah saj për postin e nënpresidentit.

Nënpresidetja u pyet në mënyrë specifike lidhur me ndryshimin e qëndrimeve të saj në raport me ndalimin e shpimeve për nxjerrjen e naftës si dhe dekriminalizimit e kalimit të paligjshëm të kufirit, pozicione që i kishte mbështetur kur kandidoi për herë të parë si presidente, në vitin 2020.

Ajo tha se nuk ka në plan t’i ndalë shpimet, një çështje kyç kryesisht për ekonominë e shtetit të Pensilvanisë, ndërsa shtoi se “duhet të ketë pasoja për ata që kalojnë kufirin pa leje”.

“Mendoj se aspekti më i rëndësishëm dhe më domethënës i perspektivës dhe vendimeve të politikës sime është se parimet e mia nuk kanë ndryshuar“, tha zonja Harris.

Gjatë intervistës së saj zonja Harris tha se ajo beson se mbi këto çështje “është e rëndësishme të arrihet konsensus dhe mirëkuptim se si mund të zgjidhen problemet”.

Intervista me gazetaren Dana Bash të rrjetit televiziv CNN, vjen në një kohë kur zgjedhësit po përpiqen ende të mësojnë më shumë rreth kandidates demokrate, brenda një harku kohor jashtëzakonisht të ngjeshur.

Presidenti Joe Biden i dha fund garës për t’u rizgjedhur vetëm pesë javë më parë.

Megjithëse ka dhënë disa intervista gjatë kohës që Presidenti Biden vazhdonte të ishte në garë, zonja Harris nuk kishte dhënë asnjë intervistë të thelluar, prej momentit kur mori stafetën e demokratëve për garën për Shtëpinë e Bardhë.

Ajo tha se puna me Presidentin Biden ishte “një nga nderet më të mëdha të karrierës së saj” si dhe tregoi mbi momentin kur ai e kishte telefonuar për ta njoftuar se do të tërhiqej nga gara dhe se do ta mbështeste atë si kandidate për presidente.

“Ai më tha se çfarë kishte vendosur të bënte dhe unë e pyeta: “A je i sigurt?” ai tha: “Po”. Kështu e mësova këtë gjë”.

Zonja Harris tha se nuk i kishte kërkuar Presidentit Biden që ta mbështeste për garën presidenciale pasi siç tha: “ai ishte shumë i qartë se do të më mbështeste”.

Gjatë intervistës Nënpresidetja Harris mbrojti punën e administratës Biden lidhur me kufirin jugor dhe imigracionin. Ajo vuri në dukje se e kishte për detyrë të përpiqej të trajtonte “shkaqet që qëndrojnë në rrënjë të problemit” në vendet e tjera, që janë dhe burimi i emigracionit.

“Ne kemi ligje që duhen zbatuar, e që përcaktojnë masat për ata që kalojnë kufirin tonë në mënyrë të paligjshme. Për këtë duhet të ketë pasoja”, tha zonja Harris.

E pyetur mbi luftën e Izraelit në Gazë, pas sulmit të Hamasit më 7 tetor, zonja Harris tha se ajo “pamëdyshje është e palëkundur në angazhimin për të mbrojtur Izraelin dhe kapacitetet e tij për të mbrojtur veten”.

Por nënpresidentja përsëriti gjithashtu atë që ka thënë prej muajsh, se ofensiva izraelite ka shkaktuar një numër të lartë vdekjesh mes popullatës civile.

Zonja Harris u pyet edhe mbi komentet e ish-Presidentit Donald Trump mbi identitetin e saj racor. Zoti Trump ka sugjeruar në mënyrë të rreme se zonja Harris ka ndryshuar mënyrën se si e prezanton veten për arsye politike, duke thënë se ajo papritur nisi të thoshte që ishte zezake.

Zonja Harris, me prindër zezakë dhe Azia Jugore, i cilësoi komentet e zotit Trump si “i njëjti avaz i vjetër”.

Ajo nuk komentoi gjatë mbi këtë çështje, duke i kërkuar gazetares Bash të kalonte tek pyetja tjetër.

Zoti Trump dhe zonja Harris do të përballen në një debat më 10 shtator. Në një postim të enjten në mbrëmje, dukej se zoti Trump po i kushtonte vëmendje intervistës.

Pasi u përmend çështja e debatit, ai shkroi në median sociale:

“Mezi pres të debatoj me shoqen Kamala Harris dhe ta ekspozoj atë si mashtruese“.

Zoti Trump shkruante më tej se kundërshtarja e tij demokrate “ka ndryshuar çdo pozicion të saj të mbajtur prej kohësh, për gjithçka. Amerika nuk do të lejojë kurrë që një marksiste të përdorë zgjedhjet për qëllimet e saj politike, e të bëhet presidente e vendit”.

Debati do të jetë takimi i parë që zonja Harris dhe zoti Trump kanë zhvilluar ndonjëherë me njëri-tjetrin.

Dy kundërshtarët politikë duket se qenë në të njëjtin ambjent vetëm kur zoti Trump ka mbajtur fjalime përpara Kongresit dhe zonja Harris ka qenë e pranishme aty, në cilësinë e senatores.

Në pjesën e dytë të intervistës gazetarja e CNN-it u përqëndrua edhe tek zoti Walz. Ai u pyet rreth informacioneve të pasakta që ka dhënë mbi të shkuarën e tij, duke filluar nga mënyra se si i ka përshkruar 24 vitet e shërbimit që ka kryer në Gardën Kombëtare.

Në një videoklip të vitit 2018, zoti Walz fliste kundër dhunës me armë zjarri duke u shprehur: “Ne mund të sigurohemi që këto armë sulmuese, që unë i kam mbajtur në luftë, të jenë i vetmi rast, ku ato të përdoren”, shprehej ai në atë kohë.

Kritikët thonë se komentet e zotit Walz sugjeronin se ai kishte qenë në luftë, gjë që siç thonë ata, nuk është e vërtetë.

Duke sqaruar deklaratat e tij zoti Walz tha se ishte shprehur gabim pas një sulmi me armë zjarri në një shkollë, duke shtuar se: “Gramatika ime nuk është gjithmonë e saktë”.

I pyetur në lidhje me deklaratat që dukej se tregonin se bashkëshortja e tij kishte mbetur shtatzënë përmes fekondimit artificial in-vitro, kur në fakt kishin përdorur një trajtim tjetër, ai tha se besonte se shumica e amerikanëve e kishin kuptuar se çfarë donte të thoshte.

Më pas ai foli lidhur me kundërshtimin që republikanët i bëjnë se drejtës për abort.

Ndërkaq një sondazh i kompanisë Gallup tregon se entuziazmi i demokratëve lidhur me zgjedhjet në nëntor është rritur gjatë muajve të fundit.

Rreth 8 në 10 demokratë ose 80 % tashmë thonë se janë më entuziastë se zakonisht lidhur me zgjedhjet, krahasuar me 55% që ishin në mars.

Entuziazmi i republikanëve është rritur shumë më pak gjatë së njëjtës periudhë. Aktualisht rreth dy të tretat e republikanëve thonë se janë më entuziastë se zakonisht për votimet.

Në një mjedis të mbushur plot me njerëz, për një tubim të enjten në Savanah të Xhorxhias, zonja Harris inkurajoi demokratët të punonin fort për ta zgjedhur atë në nëntor.

“Ne jemi këtu për të thënë të vërtetën dhe një nga gjërat që dimë është se kjo do të jetë një garë e ngushtë deri në fund“, tha ajo.

Zonja Harris foli për një sërë të shqetësimesh që kanë demokratët. Ajo tha se zoti Trump do të kufizonte më tej të drejtat e grave, duke kujtuar se kur ishte në Shtëpinë e Bardhë ai kishte emëruar tre anëtarë të Gjykatës së Lartë, që ndihmuan në rrëzimin e vendimit historik që garantonte mbrojtje për abortin, Roe kundër Wade.

Ajo tha se zoti Trump do të shfuqizonte Aktin e Kujdesit të Përballueshëm Shëndetësor ndërsa ngriti pikëpyetje mbi veprimet që mund të ndërmerrte ish-presidenti nëse vinte sërish në pushtet duke pasur parasysh imunitetin dhënë presidentëve, falë një vendimi të Gjykatës së Lartë.

“Imagjinoni Donald Trumpin pa asnjë kufizim“, tha ajo.

Tubimi në Xhorxhia ishte fundit i një turneu dy-ditor me autobus në pjesën jugore të këtij shteti. Zonja Harris do të zhvillojë fushatë javën tjetër në Ditën e Punës në Detroit dhe Pitsburg me në krah Presidentin Biden ndërsa procesi zgjedhor po afrohet me shpejtësi.

Fletët e para të votimit me postë do t’u dërgohen votuesve pas dy javësh.

Prokurori i Posaçëm amerikan, Jack Smith, ka ngritur aktakuzë të re kundër ish-presidentit amerikan, Donald Trump, për dyshimet se ai ishte përpjekur ta zhbënte rezultatin e zgjedhjeve presidenciale të vitit 2020.

Aktakuza e re e ngarkon Trumpin me akuzat e njëjta kriminale sikurse ajo e vjetra, por përmban disa ndryshime pas aktvendimit të Gjykatës Supreme se ish-presidenti gëzon imunitet të gjerë nga ndjekja penale.

Aktakuza e re përqendrohet në rolin e Trumpit si kandidat politik që kërkonte rizgjedhjen, në vend se si president i vendit asokohe.

Më 1 korrik, Gjykata Supreme tha se Trumpi gëzon imunitet nga ndjekja penale për veprimet që i kishte ndërmarrë si president.

Zyra e Prokurorit të Posaçëm tha se aktakuza e përditësuar, e dorëzuar në gjykatën federale në Uashington, “pasqyron përpjekjet e Qeverisë për t’i respektuar dhe zbatuar vendimet e Gjykatës Supreme”.

Në një reagim në platformën e vet Truth Social, Trump e quajti aktakuzën e re “dëshpërim” dhe “përpjekje për ta ringjallur gjuetinë e vdekur të shtrigave”. Ai tha se aktakuza e re i ka “të gjitha problemet e aktakuzës së vjetr dhe duhet të hidhet poshtë menjëherë”.

Aktakuza e re i heq referencat ndaj akuzave të cilat mund të cilësohen si veprime zyrtare për të cilat Trumpi gëzon imunitet, sipas vendimit të Supremes. Kjo përfshin akuzat se Trumpi u përpoq ta përdorte Departamentin e Drejtësisë në përpjekjet e tij të dështuara për ta zhbërë humbjen në zgjedhje, përfshirë duke kryer hetime të rrejshme dhe duke u thënë shteteve – gabimisht – se është vërejtur mashtrim i madh në zgjedhje.

Gjykata Supreme tha në vendimin e saj se bashkëveprimi i presidentit me Departamentin e Drejtësisë është veprim zyrtar dhe për këtë ai gëzon imunitet.

Aktakuza e re heq edhe referencat ndaj komunikimit të Trumpit me zyrtarët e qeverisë federale – si avokatë të lartë të Shtëpisë së Bardhë – të cilët i kishin thënë atij se nuk kishte dëshmi për mashtrim që do ta ndryshonin rezultatin e zgjedhjeve 2020. Ajo i heq edhe referencat ndaj deklaratave të caktuara të Trumpit, përfshirë një pretendim që ai e kishte bërë në një konferencë për media në Shtëpinë e Bardhë dy ditë pas zgjedhjeve për një kosh të dyshimtë të mbushur me vota në Detroit.

Por, aktakuza e re përmban njërën prej akuzave më tronditëse të ngritura nga Smith, se Trumpi mori pjesë në një skemë të orkestruar nga aleatët për rekrutimin e pjesëtarëve të rrejshëm zgjedhorë në terren në shtetet ku demokrati Joe Biden kishte fituar, të cilët do të dëshmonin rrejshëm se Trumpi i kishte fituar ato shtete.

Gjithashtu aktakuza ruan edhe dyshimet se Trumpi i kishte bërë trysni nënpresidentit Mike Pence për ta hedhur poshtë ligjshmërinë e votave dhe se Trumpi dhe aleatët e tij e shfrytëzuan kaosin në Capitol më 6 janar, në përpjekje për ta shtyrë edhe më shumë certifikimin e fitores së Bidenit.

Trump është sërish kandidat republikan për president në zgjedhjet e 5 nëntorit, dhe këtë herë ai do të garojë kundër zëvendëspresidentes Kamala Harris, e cila, sipas sondazheve, ka një epërsi të vogël ndaj tij në nivel kombëtar.

Në maj, Trump u bë presidenti apo ish-presidenti i parë amerikan që dënohet për vepër penale.

Një gjykatë në Nju Jork e shpalli Trumpin fajtor për falsifikimin e regjistrave biznesore për të ndikuar jashtëligjshëm në zgjedhjet presidenciale të vitit 2016, përmes pagesave për heshtjen e një aktoreje të pornografisë, e cila tha se kishte kryer marrëdhënie seksuale me të. REL

Guvernatori i Minesotës, Tim Walz, ka pranuar nominimin e partisë së tij për të kandiduar për nënpresident të Shteteve të Bashkuara. Gjatë fjalimit në Kuvendin Kombëtar të demokratëve ai falënderoi të pranishmit për sjelljen “e gëzimit” në zgjedhjet që janë transformuar nga hyrja në garë e nënpresidentes amerikane, Kamala Harris.

“Jemi të gjithë këtu sonte për një arsye të bukur dhe të thjeshtë: E duam këtë vend”, tha Walz para mijëra delegatëve që mbanin në duar pankarta ku shkruhej “Trajneri Walz”.

Shumë amerikanë nuk kishin dëgjuar kurrë për Walzin para se Harris ta zgjidhte për kandidat për nënpresident dhe ky fjalim ishte mundësi që ta prezantonte veten. Ai foli për përvojën e tij si trajner futbolli, për shërbimin në Gardën Kombëtare dhe për problemet e familjes së tij me fertilitetin – të gjitha këto pjesë të biografisë së tij që republikanët kanë vënë në pikëpyetje që kur Harris e zgjodhi atë.

Ekipi i fushatës së Harrisit tha se Walz kishte punuar në fjalimin e tij për disa ditë dhe ai për herë të parë përdori teleprompterin, duke bërë prova në mënyrë që të ishte i përgatitur. Ai u tha të pranishmëve se “nuk kam mbajtur shumë fjalime si kjo, por më kanë këshilluar shumë”.

“Disa njerëz nuk e kuptojnë se çfarë duhet të bësh për të qenë fqinj i mirë”, tha Walz. “Për shembull, Donald Trump dhe JD Vance”.

Trump, kandidati republikan për president, kritikoi Kuvendin e demokratëve duke e quajtur “qesharak” dhe theksoi se ai është shpesh është temë e fjalimeve. Ai po ashtu foli për ish-presidentin Barack Obama, i cili gjatë fjalimit në Kuvend të martën ishte mjaft kritik, duke thënë se Obama ishte “i ndyrë”.

Ndërkaq, gjatë fjalimit Walz foli për fëmijërinë e tij në Nebraska dhe për karrierën e tij si mësues dhe trajner futbolli në Minesota. “Faleminderit që keni sjellë gëzim në këtë luftë”, i tha ai turmës.

Por, ai po ashtu kritikoi kandidatin republikan për nënpresident, JD Vance, dhe kritikoi disa politika të republikanëve.

“Përderisa shtetet tjera po ndalonin librat në shkolla, ne po çrrënjosnim urinë nga shkollat tona”, tha ai.

Walz është kritikuar se ka ekzagjeruar karrierën e tij. Gruaja e tij gjatë kësaj jave e sqaroi se ajo nuk i ishte nënshkruar fertilizimit sipas metodës in vitro, siç kishte pretenduar Walz disa herë. Por, ajo tha se i ishte nënshkruar trajtimeve të tjera të fertilitetit. Republikanët po ashtu kanë kritikuar për deklaratat e bëra nga Walz më 2018, i cili kishte thënë se kishte mbajtur armë në luftë. Edhe pse ai ka shërbyer në Gardën Kombëtare për 24 vjet, ai asnjëherë nuk ishte dislokuar në një zonë lufte.

Walz ka përfshirë sfidat e familjes së tij me ferilitet në narrativin e tij, si një mënyrë për t’u afruar me votuesit që janë të shqetësuar me heqjen e të drejtave riprodhuese në SHBA. Por, Gwen Walz në një deklaratë të lëshuar të martën tregoi për përvojën e saj dhe tha se i është nënshtruar një trajtimi tjetër e jo in vitro.

“Nëse nuk keni përjetuar asnjëherë jofertilitetin, ju siguroj se e njoh dikë që e ka përjetuar”, tha Tim Walz të mërkurën.

Të mërkurën, në Kuvendin e demokratëve kishte edhe persona me të cilët Trump ishte ballafaquar gjatë karrierës së tij: Bill Clinton, presidenti i 42-të i SHBA-së dhe Oprah Winfrey, një prezantuese ikonike.

Gjatë adresimeve, të dizajnuar për të kritikuar Trumpin, Clinton dhe Winfrey e paraqitën ish-presidentin si një njeri vetjak, ndërkaq Harrisin si një person të përqendruar më shumë në nevojat e përditshme të amerikanëve sesa në nevojat e saj.

“Sipas meje kemi një zgjedhje të qartë. Kamala Harris për njerëzit. Personi tjetër që ka dëshmuar është vetëm për vete, ‘unë, unë dhe unë’”, tha Clinton, i cili mbajti një fjalim në Kuvendin Kombëtar Demokratik pothuajse 10 minuta më të gjatë se fjalimi i Walzit, që ishte njeriu kryesor i natës.

Winfrey ndërkaq ofroi mbështetje për Harrisin. “Mirësjellja dhe respekti janë opsion në këto zgjedhje”, duke ftuar amerikanët që të zgjedhin Harrisin dhe Walzin në zgjedhjet presidenciale të nëntorit. REL

Një Parti Demokrate e rigjallëruar u mblodh mbrëmjen e së hënës për të dëgjuar fjalën përshëndetëse të Presidentit Joe Biden, vendimi i të cilit për t’i dhënë fund rikandidimit, çliroi energji të reja me ngjitjen në krye të garës të Nënpresidentes Kamala Harris.

Kuvendi Kombëtar Demokrat që filloi punimet të hënën në Çikago ka peshë të veçantë për këtë parti, vetëm një muaj pas ndërrimit të kandidatëve në mes të garës elektorale. Kjo mbrëmje e parë ishte konceptuar si një kalim i stafetës tek kandidatja e përzgjedhur nga vetë Presidenti Biden, megjithëse fillimisht si vetëm zëvendëse e tij.

Dukshëm i prekur pas fjalimeve të bashkëshortes së tij, Zonjës së Parë Jill Biden dhe vajzës së tij Ashley Biden, presidenti foli përpara delegatëve, që e pritën me ovacione të zgjatura, duke bërë thirrje për të votuar për kandidaten demokrate për presidente, Kamala Harris. Ai rikujtoi momentet e vështira kur pati bërë betimin për të marrë detyrën e presidentit, mes periudhës së vështirë të pandemisë dhe atyre që i quajti kërcënime ndaj demokracisë amerikane.

“Besoja atëherë dhe besoj tani, se progresi ishte dhe është i mundur, ashtu siç është i arritshëm dhe se ditët tona më të mira janë ende përpara”, tha Presidenti Biden. “Dimrin e kemi lënë pas. Qëndroj përpara jush me zemër mirënjohëse për të raportuar se demokracia ka mbizotëruar. Demokracia”.

Presidenti Biden përsëriti thënien e tij se “jemi në një betejë për vetë shpirtin e kombit amerikan”.

“Kandidova në vitin 2020 për shkak të atyre çfarë pashë në Charlottesville në gusht 2017, kur ekstremistët u shfaqën me pishtarë në duar, me simbole naziste dhe me slogane anti-semite të dëgjuara në Gjermaninë e viteve 1930, supremacistë të bardhë, të inkurajuar nga presidenti në Shtëpinë e Bardhë që e shikonin si aleatin e tyre”, tha Presidenti Biden.

Ai tha se kandidoi për një Amerikë me shanse të barabarta për të gjithë, të vendosur për të lëvizur përpara dhe për të mos u rikthyer tek urrejtja dhe dhuna e çfarëdolloj forme.

Pasi radhiti arritjet për programet sociale, përfaqësimin e pakicave në gjyqësor, rikonsolidimin e ekonomisë të goditur nga pandemia, Presidenti Biden u zotua se ashtu si ai vetë, edhe zonja Harris do t’u kundërvihet në skenën ndërkombëtare regjimeve totalitare.

“Asnjë komandant i përgjithshëm nuk duhet të përkulet përpara një diktatori siç vepron Trump-i me Putinin. Unë nuk e kam bërë kurrë këtë dhe ju premtoj se Kamala Harris nuk do ta bëjë këtë kurrë”, tha Presidenti Biden.

Ai e kritikoi ashpër kandidatin republikan për president, Donald Trump, se e la Evropën dhe NATO-n në gjendje të dobësuar dhe se u desh shumë punë për ta forcuar Evropën sërish dhe madje për ta zgjeruar NATO-n me anëtarësimin e Finlandës dhe Suedisë.

Presidenti Biden tha se Presidenti Putin mendonte se do ta merrte kryeqytetin e Ukrainës, Kievin, brenda tre ditëve. “Tre vite më vonë, Ukraina është ende e lirë“, tha Presidenti Biden.

Presidenti përmendi se kur mori detyrën, pritshmëria e përgjithshme ishte se Kina do t’ia kalonte në mënyrë të pashmangshme Shteteve të Bashkuara, por se kjo prishmëri nuk dëgjohet më e tillë. Ai vuri në dukje punën e bërë për t’i dhënë fund luftës në Gazë nëpërmjet një marrëveshjeje për lirimin e pengjeve dhe armëpushimin.

Duke denoncuar dhunën ndaj Kapitolit më 6 janar 2021, Presidenti Biden tha se ish-Presidenti Trump nuk do e pranojë rezultatin e zgjedhjeve nëse nuk i fiton ato. Duke bërë thirrje që të votohet për kandidaten demokrate për presidente dhe kandidatët demokratë për në Kongres, ai vlerësoi karakterin e zonjës Harris, duke thënë se ajo do të jetë një presidente historike për të cilën do të jemi të gjithë krenarë.

Pak më herët, zonja Harris i bëri një surprizë delegatëve duke u shfaqur vetë në skenë mbrëmjen e së hënës, duke i paraprirë kështu mesazhit të Presidentit Biden.

“Joe, faleminderit për udhëheqjen tënde historike, për një jetë të tërë në shërbim të vendit tonë, dhe për gjithçka tjetër që do të vazhdosh të bësh”, tha ajo. “Të jemi mirënjohës përgjithmonë”.

Një mesazh mbështetjeje u dha më herët edhe nga ish-Sekretarja e Shtetit dhe ish-kandidatja e Partisë Demokrate për presidente, Hillary Clinton. Ajo përshëndeti Presidentin Biden për vendimin e tij, duke thënë se “tashmë po shkruajmë një kapitull të ri në historinë e Amerikës”.

Zonja Clinton, e cila ishte bërë gruaja e parë kandidate për presidente e një partie kryesore në Shtetet e Bashkuara, bëri thirrje për zgjedhjen e zonjës Harris si presidentja e 47-të e Shteteve të Bashkuara. Duke iu referuar betejës për përfaqësimin e grave në politikë, ajo tha se “kur një barrierë rrëzohet për një prej nesh, e hap rrugën për të gjithë ne të tjerët”.

Demokratët shpresojnë që kuvendi gati njëjavor do të forcojë pozitat e zonjës Harris në përballjen me kandidatin republikan Donald Trump, rikthimi i të cilit në garë shihet nga demokratët si një rrezik ekzistencial. Duke u bërë kandidate për presidente vetëm rreth një muaj më parë, zonjës Harris i duhet tashmë të fitojë mbështetjen e një vendi të ndarë, që e sheh atë më pozitivisht, por që ende nuk ka marrë një vendim për zgjedhjet e ardhshme.

Kryeministri i Kosovës, Albin Kurti, është duke qëndruar në Shtetet e Bashkuara, për të marrë pjesë në Konventën Kombëtare Demokratike në Çikago, e cila fillon sot.

Konventa Kombëtare e demokratëve nis më 19 gusht në Çikago, më pak se një muaj pas largimit të pritur të presidentit aktual, Joe Biden, nga gara presidenciale.

Kjo ngjarje, që do të shfaqet nëpër televizione, i ofron mundësinë nënpresidentes Kamala Harris, tashmë e konfirmuar si e nominuara e demokratëve për president, që t’i prezantojë qëndrimet e veta para një audience kombëtare.

Javën e kaluar, ambasadori amerikan në Prishtinë, Jeffery Hovenier, tha se Kurti planifikon të marrë pjesë në Konventën Kombëtare Demokratike me ftesë të Institutit Kombëtar Demokratik, duke shtuar ky institut i ka ftuar edhe kryetarët e partive tjera të Kosovës.

“Por, të jemi të qartë, kjo nuk është ftesë nga Qeveria amerikane”, tha Hovenier.

Ndërkohë, zyra e Kurtit tha se kryeministri do të ketë edhe takime të ndryshme dypalëshe gjatë qëndrimit në Shtetet e Bashkuara, pa dhënë hollësi të tjera.

Kurti udhëton për në SHBA në një kohë kur Uashingtoni po inkurajon Qeverinë e Kosovës që t’i kthehet “angazhimit konstruktiv” me të, BE-në, NATO-n dhe partnerët e tjerë ndërkombëtarë.

SHBA-ja ka shprehur zhgënjim me vendimin e fundit të autoriteteve në Kosovë për mbylljen e nëntë degëve të Postës së Serbisë, në veri të Kosovës, që sipas zyrtarëve në Kosovë, punonin pa licencë.

Zëdhënësi i Departamentit amerikan të Shtetit, Matthew Miller, deklaroi më 7 gusht se me vendimet e vazhdueshme të pakoordinuara, Kosova po vë në rrezik mundësitë që Uashingtoni i ka ndihmuar që të krijojë.

SHBA-ja e ka kundërshtuar gjithashtu synimin e Qeverisë së Kurtit për hapjen në këtë kohë të urës mbi lumin Ibër për qarkullim edhe të automjeteve – e cila ndan Mitrovicën në jug me shumicë shqiptare dhe në veri me shumicë serbe. REL

Kuvendi Kombëtar i Partisë Demokrate nis punimet mbrëmjen e së hënës në qytetin e Çikagos. Gjatë aktivitetit katërditor, që shënon pikën kulmore për demokratët, pritet të mbahen fjalime në mbështetje të kandidates për Shtëpinë e Bardhë, Kamala Harris, por nuk do të mungojnë dhe sulmet ndaj kundërshtarit të saj republikan, Donald Trump.

Demokratët kanë zgjedhur drejtuesit më të lartë në vend dhe një sërë figurash të spikatura për të mbajtur fjalime në mbështetje të kandidates së tyre për Shtëpinë e Bardhë. Kamala Harris u bë pjesë e garës presidenciale më pak se një muaj më parë pas tërheqjes së Presidentit Joe Biden mes një trysnie në rritje në radhët e udhëheqësve të Partisë Demokrate.

Presidenti demokrat u paraqit dobët në një debat me rivalin republikan, Donald Trump në fund të qershorit, ndërsa rënia e mbështetjes në sondazhe tregoi se ai kishte të ngjarë të humbiste përballë pararendësit të tij.

Presidenti Biden, 81 vjeç, shprehu mbështetjen për Nënpresidenten Harris e cila është 59 vjeçe. Zoti Biden do të flasë të hënën në kuvend për t’u treguar 4,000 delegatëve dhe audiencës se pse ajo e meriton ta pasojë atë duke u bërë presidentja e 47 e vendit.

Nëse fiton, Kamala Harris do të bëhet presidentja e parë grua në Shtetet e Bashkuara, dhe udhëheqësja e dytë me origjinë afrikano-amerikane që drejton Shtëpinë e Bardhë. Ajo ka edhe origjinë indiane. Në vitin 2009, demokrati Barack Obama bëri betimin si presidenti i 44 i Shteteve të Bashkuara dhe udhëhoqi vendin deri në janar të vitit 2017, duke u bërë presidenti i parë me ngjyrë në historinë e Shteteve të Bashkuara.

Por më e rëndësishmja për demokratët është se një sërë sondazhesh kombëtare tregojnë se zonja Harris aktualisht gëzon më shumë mbështetje se rivali i saj republikan dhe udhëheq në shtetet fushëbetejë, që kanë të ngjarë të përcaktojnë rezultatin e zgjedhjeve amerikane.

Zoti Obama do të flasë në kuvend të martën ndërsa ish Presidenti Bill Clinton do t’u drejtohet delegatëve të mërkurën. Nënpresidentja Harris do të mbajë fjalimin e saj të enjten, natën e fundit të kuvendit, ku do të pranojë zyrtarisht emërimin e Partisë Demokrate si kandidate për postin e presidentes së Shteteve të Bashkuara.

Në fillim të muajit, kandidatja demokrate për presidente, Kamala Harris dhe kandidati për nënpresident, Tim Walz, siguruan emërimin përmes një votimi elektronik.

Gjatëdhjetë vjeçari Tim Walz, i cili është në mandatin e dytë si guvernator i Minesotës, ka qenë mësues në shkollë të mesme dhe ka shërbyer për 12 vjet si ligjvënës në Dhomën e Përfaqësuesve të shtetit të tij.

Gjatë 5 viteve e gjysmë në krye të Minesotës, ai ka zbatuar një axhendë liberale, por ishte pak i njohur në qarqet e politikës amerikane deri para përzgjedhjes së tij nga zonja Harris për të kandiduar për Shtëpinë e Bardhë. Ai u përzgjodh përballë dy figurave më të njohura demokrate. Këshilltarët thonë se zonja Harris mendon se ai është figura më e përshtatshme për të bashkëpunuar nëse i fiton zgjedhjet e 5 nëntorit.

Demokratët që mendonin se Presidenti Biden ishte shumë i moshuar për të kandiduar, jo më të shërbente për katër vjet të tjera, shprehën menjëherë mbështetjen për zonjën Harris. Presidenti Biden është tre vjet më i madh në moshë se republikani Donald Trump.

Megjithëse Kamala Harris ka përfaqësuar në të kaluarën Kaliforninë në Senatin amerikan dhe aktualisht është Nënpresidente e Shteteve të Bashkuara, sikurse zoti Walz, është deri diku një figurë e panjohur për publikun amerikan.

Për shumë votues amerikanë, fjalimi për pranimin e emërimit mund të jetë hera e parë që e dëgjojnë atë të flasë pas një kohë të gjatë.

Që nga momenti që u mori stafetën për garën presidenciale, zonja Harris u është përgjigjur vetëm në pak raste pyetjeve të gazetarëve që mbulojnë fushatën e saj.

Ajo ka refuzuar të zhvillojë një konferencë të gjerë për shtypin ose të intervistohet nga një gazetar apo gazetare me peshë në televizionet kryesore amerikane. Ajo ka thënë se do të zhvillojë intervista të tilla në fund të gushtit.

Zonja Harris ka tërhequr mijëra mbështetës nëpër tubime në shtetet fushëbeteja, duke përcjellë mesazhe të shkruara me kujdes, dhe kujtuar votuesve se ajo e filloi karrierën politike si prokurore lokale dhe më pas u bë prokurore e përgjithshme e Kalifornisë.

“Në këto detyra, jam ndeshur me individë të të gjitha llojeve. Pra më kuptoni kur them se e njoh llojin e Donald Trump-it”, tha ajo gjatë një fjalimi.

Një juri e shpalli zotin Trump përgjegjës në çështjet civile për abuzim seksual me një grua dhe më pas shpifje ndaj saj, ndërsa një juri tjetër në maj e shpalli atë fajtor për 34 akuza penale që lidhen me pagesën e parave për të blerë heshtjen e aktoreje të filmave pornografikë.

Në fillim të vitit, një gjykatës arriti në përfundimin se zoti Trump i kishte manipuluar të dhënat e biznesit për të siguruar kredi të favorshme nga bankat dhe tarifa të leverdishme nga kompanitë e sigurimeve dhe e urdhëroi atë të paguante një dëmshpërblim prej rreth 300 milionë dollarë.

Republikani Trump e ka sulmuar ashpër rivalen Harris si një intelektuale e peshës së lehtë. Ai ka thënë se zonja Harris nuk është e zgjuar sa duhet për t’u përballur me pyetjet e vështira të gazetarëve.

Disa republikanë i kanë kërkuar zotit Trump që të heq dorë nga sulmet personale ndaj zonjës Harris dhe të vërë në shënjestër politikat e saj, por ai nuk ka pranuar.

“Unë kam të drejtë për sulme personale”, tha ai për gazetarët të enjten. “Duhet ta bëj sipas mënyrës sime”.

Ndërsa shumica e delegatëve në kuvend janë rreshtuar plotësisht pas zonjës Harris, disa dhjetëra të tjerë kanë thënë se janë “të pavendosur” për kandidaturën e saj, në shenjë proteste ndaj mbështetjes së administratës së Presidentit Biden për Izraelin në luftën e tij kundër militantëve të Hamasit në Gaza.

Demokratja Harris e ka mbështetur gjerësisht Izraelin, ndërsa ka bërë thirrje për një armëpushim në luftën 10-mujore. Ajo ka refuzuar të mbështesë një nga kërkesat e disa prej delegatëve pro-palestinezë, embargon e ndihmave ushtarake për Izraelin.

Departamenti amerikan i Shtetit tha të mërkurën se hapja e urës së Mitrovicës në këto momente do të rriste gjasat për dhunë dhe i bëri thirrje qeverisë së Kosovës që “të mos ta ndërmarrë këtë veprim të pakoordinuar”.

Një zëdhënës i Departamentit të Shtetit i tha Zërit të Amerikës se Shtetet e Bashkuara nuk mbështesin “asnjë lëvizje për të ndryshuar statusin aktual të urës së Mitrovicës në këto momente”.

“Hapja e urës për trafikun e automjeteve tani rrit potencialin për dhunë dhe vë në rrezik popullatën vendase si dhe ushtarët e KFOR-it – përfshirë amerikanët – të cilët po punojnë për të mbështetur paqen dhe sigurinë në Kosovë”, thuhet në deklaratën e zëdhënësit.

DASH-i i bën thirrje qeverisë së Kosovës të mos ta ndërmarrë këtë veprim që e konsideron si “të pakoordinuar dhe të njëanshëm”.

Shtetet e Bashkuara i bëjnë thirrje qeverisë që ta diskutojë këtë çështje në kuadër të Dialogut të lehtësuar nga BE-ja.

“Ky është një pozicion që ne e ndajmë me partnerët tanë të Kuintit – Francën, Gjermaninë, Italinë dhe Mbretërinë e Bashkuar – si dhe me BE-në dhe NATO-n. Dhe është një qëndrim që e kemi bërë shumë të qartë, si publikisht ashtu edhe privatisht”, vazhdon deklarata e zëdhënësit.

Departamenti i Shtetit thotë se objektivi i Shteteve të Bashkuara është që të punojnë me qeverinë e Kosovës për të krijuar kushtet në të cilat ura të mund të hapet për qarkullimin e automjeteve.

“Prandaj, i bëjmë thirrje Qeverisë së Kosovës që t’i kthehet angazhimit të ngushtë dhe konstruktiv me Shtetet e Bashkuara dhe partnerët e tjerë ndërkombëtarë”, përfundon deklarata.

Kryeministri i Kosovës, Albin Kurti, tha sot gjatë një mbledhjeje të qeverisë se hapja e urës nuk është kundër askujt dhe aq më pak kundër aleatëve të Kosovës.

“Qeveria e Republikës së Kosovës dhe unë si kryeministër besojmë thellësisht se liria e lëvizjes dhe sundimi i ligjit në njërën anë dhe paqja e siguria në anën tjetër janë të mundura bashkë dhe të duhura për vendin, shoqërinë dhe shtetin, qytetarët dhe komunitetet. Ne do të vazhdojmë konsultimet dhe koordinimet me partnerët tanë, hapja e urës nuk është kundër askujt”, tha ai.

Forcat paqeruajtëse të udhëhequra nga NATO-ja në Kosovë kanë shtuar praninë e tyre në urën kryesore mbi Ibër në Mitrovicë, që shënon edhe vijën ndarëse ndërmjet dy komunave të këtij qyteti.

Diplomacia perëndimore ka theksuar vazhdimisht që kur qeveria e Kosovës shprehu synimin për hapjen e urës se nuk është momenti I duhur për një gjë të tillë.

Kryeministri Kurti ka këmbëngulur se hapja e urës do t’i shërbente lëvizjes së lirë.

Një i ri austriak i cili u arrestua bazuar në dyshimet për komplot për sulm në një koncert të këngëtares Taylor Swift në Vjenë planifikonte të kryente një sulm vetëvrasës që do të kishte shkaktuar “gjakderdhje” dhe ishte betuar për besnikëri ndaj Shtetit Islamik, tha kancelari austriak Karl Nehammer të enjten.

I dyshuari po planifikonte një sulm vdekjeprurës në mesin e rreth 20,000 adhuruesve të këngëtares Swift që do të mblidheshin jashtë stadiumit Ernst Happel të Vjenës, tha më herët, Omar Haijawi-Pirchner, drejtor i Sigurisë dhe Zbulimit austriak.

Dy të rinj të tjerë austriakë të moshës 17 dhe 15 vjeç u arrestuan të mërkurën për komplotin.

Rrjeti amerikan ABC citoi burime të zbatimit të ligjit dhe inteligjencës të ishin shprehur se autoritetet austriake kishin marrë informacion mbi rrezikun në koncertin e këngëtares Swift nga inteligjenca amerikane.

Zëdhënesi i Departamentit të Shtetit tha të enjten se Shtetet e Bashkuara kishin qenë në komunikim me autoritetet austriake mbi dyshimet për një komplot për një sulm gjatë koncertit të këngëtares amerikane, por nuk konfirmoi njoftimet se autoritetet amerikane të zbulimit u kishin dhënë atyre informacione mbi një sulm të planifkuar.

“Ne kemi qenë në kontakt me qeverinë austriake mbi këtë çështje. Është praktike që ne ndajmë informacion me aleatët dhe parnterët tanë mbi aktivitetet terroriste njësoj siç ata ndajnë informacion me ne”, tha zëdhënësi Matthew Miller gjatë një komunikimi me gazetarët.

Autoritetet austriake arrestuan të mërkurën një shtetas të Austrisë 19 vjeçar me origjinë nga Maqedonia e Veriut, si të dyshuar për përfshirje në një komplot të dështuar për të sulmuar koncertet e këngëtares Taylor Swift, tashmë të anuluara, që planifikoheshin të mbaheshin në Vjenë

Ministria e Punëve të Brendshme të Maqedonisë së Veriut, i tha të enjten Zërit të Amerikës se autoritetet austriake kane kërkuar nga kjo ministri “kontrollin e një personi me origjine nga Maqedonia e Veriut, i cili dyshohet për përfshirje në planifikim të një një sulmi terrorist në Vjenë”.

Shkupi sipas përgjigjes dhënë Zërit të Amerikës “po vepron në bazë të kërkesës së parashtruar” nga autoritetet austriake, por nuk dha më shumë hollësi se nga cila pjesë e vendit e kanë origjinën prindërit e të dyshuarit.

Sipas mediave në Maqedoninë e Veriut i dyshuari quhet Beran Aliji, i lindur në Austri, por me origjinë nga Gostivari.

Ndërkohë autoritetet austriake thanë se gjetën materiale të grupit të Shtetit Islamik dhe al-Kaidës në shtëpinë e të dyshuarit të dytë për përfshirje në komplot.

“Situata ishte serioze, situata është serioze. Por mund të themi se u parandalua një tragjedi”, tha të enjten në Vjenë, ministri i Brendshëm Gerhard Karner.

Autoritetet e sigurisë thanë se i dyshuari i dytë, një shtetas austriak 17-vjeçar me origjinë turke dhe kroate, u arrestua nga forcat e posaçme të policisë pranë stadiumit ku planifikohej mbajtja e koncerteve këtë javë. Emrat e të dyshuarve nuk u publikuan në përputhje me rregullat austriake të privatësisë.

Zyrtarët austriakë të sigurisë pretenduan se dy të rinjtë donin të kryenin një sulm jashtë stadiumit, duke vrarë sa më shumë njerëz që të ishte e mundur duke përdorur thika ose mjete shpërthyese artizanale.

Ata u thanë gazetarëve në një konferencë për shtypin në Vjenë se i dyshuari kryesor, një 19-vjeçar austriak me origjinë nga Maqedonia e Veriut, rrëfeu plotësisht planet e tij të sulmit. Ata thanë se ai ishte “qartësisht i radikalizuar në frymën e Shtetit Islamik dhe mendon se është e drejtë të vriten të pafetë”.

“Ai deklaroi se donte ta kryente sulmin duke përdorur eksploziv ose armë të ftohta, armë këto që janë gjetur. Ai po i shqyrtonte të dyja opsionet. Qëllimi i tij ishte të vriste veten dhe një turmë të madhe në koncert”, tha Omar Haijawi-Pirchner, drejtor i Sigurisë dhe Zbulimit austriak.

Autoritetet publikuan një fotografi të mbuluar të 19-vjeçarit i cili kishte lënë punën me 25 korrik, duke deklaruar se “kishte ende plane të mëdha”.

I dyshuari i dytë ishte punësuar pak ditë më parë në një kompani që ofron shërbime në mjediset e koncerteve. Hetuesit thanë se gjetën materiale të gjera në lidhje me grupin e Shtetit Islamik dhe al-Kaida në shtëpinë e tij.

Anulimi koncerteve pikëlloi adhuruesit e këngëtares Taylor Swift në të gjithë botën, shumë prej të cilëve kishin shpenzuar mijëra euro për udhëtime dhe akomodime në kryeqytetin e shtrenjtë të Austrisë për të ndjekur koncertet.

“Do të flas për veten dhe miqtë e mi. Jemi të shokuar. Anulimi i koncertit na ka mërzitur, por githashtu jemi mirënjohës që autorët e këtyre planeve u kapën para se të vepronin”, thotë Emma Soto, një ardhuruese e këngëtares Taylor Swift që udhëtoi nga Shtetet e Bashkuara në Austri.

Sipas Franz Ruf, drejtori i sigurisë publike në ministrinë e Brendshme të Austrisë, në shtëpinë e të dyshuarit 19-vjeçar u gjetën lëndë kimike dhe pajisje teknike.

Në një intervistë të enjten me programin Oe1 të transmetuesit publik ORF, zoti Ruf tha se hetuesit po vlerësojnë provat e sekuestruara nga shtëpia e të dyshuarit. Vetëm pak javë më parë, 19-vjeçari kishte postuar në një llogari në internet një betim për besnikëri ndaj udhëheqësit aktual të grupit Shteti Islamik, shtoi ai.

Zëvendës kancelari i Austrisë Werner Kogler, shkroi në platformën e sociale X se “për shumë njerëz, një ëndërr është shkatërruar sot. Në tre mbrëmje në Vjenë, dhjetëra mijëra adhurues të këngëtares Swift duhet të kishin festuar së bashku”.

“Më vjen shumë keq që ua mohuan këtë. Adhuruesit e Swiftit qëndrojnë së bashku, urrejtja dhe terrori nuk mund ta shkatërrojnë atë”, shkroi zoti Kogler të mërkurën vonë.

Fqinjët e 19 vjeçarit të arrestuar, thanë të enjten se familja e tij jetonte shumë e mbyllur.

“Ne nuk i shihnim ata në oborrin e shtëpisë së tyre apo fëmijët e tyre jashtë”, tha një fqinje, duke qëndruar në pragun e saj.

“Ata ishin gjithmonë miqësorë dhe përshëndesnin, por ideja për të shkuar tek ata për të pirë kafe së bashku ose për të ardhur për të na parë, nuk ndodhi”, tha ajo.

Sipas fqinjës, familja e të dyshuarit u zhvendos në Ternitz, një orë larg me makinë në jug të kryeqytetit austriak dhe afër kufirit hungarez, rreth pesë vjet më parë.

“Ata u shpërngulën këtu nga Vjena. Ata janë vjenez me prejardhje nga Maqedonia (e Veriut)”, shtoi ajo.

*Pjesë të këtij materiali u morën nga agjencitë e lajmeve Associated Press dhe Reuters.

Rrjeti ABC tha të enjten se kandidati republikan për president të Shteteve të Bashkuara Donald Trump dhe rivalja e tij demokrate Kamala Harris, do të debatojnë me 10 shtator në këtë rrjet, ndërsa zoti Trump tha se dëshiron të shtojë dy debate të tjera atë muaj në rrjetet Fox dhe NBC.

Në një konferencë për shtypin në rezidencën e tij në Palm Beach të Floridës, zoti Trump tha se donte debate edhe me 4 dhe 25 shtator. Ai nuk dha hollësi nëse do të kishte një audiencë dhe nuk ishte menjëherë e qartë nëse fushata e tij i kishte bërë një propozim kampit të zonjës Harris.

Fushata e nënpresidentes amerikane nuk bëri ndonjë koment të menjëhershëm mbi dëshirat e zotit Trump, ndërsa është pajtuar me debatin e planifikuar për datën 10 shtator.

“Dëgjova se Donald Trump më në fund është zotuar të debatojë me mua me 10 shtator. Pres me padurim”, shkroi të enjten në rrjetin X, nënpresidentja Harris.

Ish presidenti Trump kishte sugjeruar më parë se ai mund të tërhiqej nga debati në rrjetin ABC, i cili ishte planifikuar përpara se zonja Harris të zëvendësonte presidentin Joe Biden si kandidate presidenciale, më pak se tre javë më parë.

Konferenca e sotme ishte paraqitja e parë publike e zotit Trump që kur zonja Harris zgjodhi të martën guvernatorin e Minesotës Tim Walz, si kandidat të saj për postin e nënpresidentit.

Zonja Harris dhe zoti Walz kanë mbajtur tubime në Pensilvani, Miçigan dhe Wisconsin këtë javë, duke tërhequr dhjetëra mijëra pjesëmarrës, në një shenjë të re se si përfshirja e saj e vonshme në garë, ka ngjallur demokratët.

Ngritja e saj e shpejtë ka bërë që ekipi i zotit Trump të përpiqet të riorganizojë strategjinë dhe mesazhet e tij. Anketat tregojnë se zonja Harris ka fshirë epërsinë që zoti Trump kishte shënuar ndaj presidentit Joe Biden dhe demokratët kanë grumbulluar qindra miliona dollarë nga votuesit dhe donatorët e mëdhenj brenda disa javësh.

I pyetur të enjten se si e ka ndryshuar qasjen e tij përballë sfidës së re nga zonja Harris, zoti Trump këmbënguli se nuk e ka bërë një gjë të tillë.

Në një seancë pyetje-përgjigjesh me gazetarët, që zgjati më shumë se një orë, Zoti Trump kaloi nga tema në temë, duke pretenduar se zonja Harris dhe zoti Walz janë kandidatë të dobët që tashmë po binin në anketa.

Pavarësisht kësaj, ai u ankua q nuk është në gjendje të përballet me zotin Biden në zgjedhje, duke sugjeruar se presidenti ishte viktimë e një komploti kundër kushtetues për ta larguar atë nga maja e Partisë Demokratike.

Presidenti Biden hoqi dorë nga gara nën trysninë e kolegëve demokratë të shqetësuar për shanset e tij për fitore në zgjedhjet e 5 nëntorit, pas një debati të dobët kundër zotit Trump.

Ish presidenti Trump gjithashtu u tall me numrin e pjesëmarrësve në fushatën e zonjës Harris, ndonëse tubimet e saj janë krahasuar së fundmi me tubimet e tij. Ai pretendoi në mënyrë të rreme se madhësia e turmës së cilës iu drejtua më 6 janar të vitit 2021, ditën kur mbështetësit e tij sulmuan Kapitolin, ishte po aq sa ajo që mbushi Parkun Kombëtar në Uashington për fjalimin e Dr. Martin Luther Kingut në vitin 1963 “I Have a Dream”.

“Ne në fakt kishim më shumë njerëz”, tha zoti Trump. “Por, në rregull, sepse më pëlqente Dr. Martin Luther Kingu”.

Duke i bërë jehonë një kritike të kohëve të fundit nga fushata e tij, zoti Trump kritikoi zonjën Harris se nuk ka dhënë asnjë intervistë për shtypin që nga fillimi i fushatës së saj.

Zoti Trump ka dhënë një varg intervistash në media, megjithëse ato zakonisht janë miqësore me të dhe me prirje të djathtë. Të mërkurën, ai mori pjesë në programin e mëngjesit “Fox & Friends”.

Zonja Harris dhe zoti Walz u takuan me punëtorët e prodhuesve të makinave në Detroit të enjten, pasi morën mbështetjen e sindikatës së tyre, si pjesë e një përpjekjeje për të mobilizuar punëtorët në shtetet thelbësore të betejës elektorale.

Fushata e zonjës Harris anuloi tubimet të enjten në Karolinën e Veriut dhe të premten në Xhorxhia, ku stuhia tropikale Debby po sjell shira të dendur dhe përmbytje të rrezikshme. Demokratët do të shkojnë në Arizona dhe Nevada më vonë këtë javë, duke vizituar dy shtete të tjera që mund të luajnë një rol thelbësor në zgjedhjet e 5 nëntorit.

Kandidati republikan për postin e nënpresidentit, senatori JD Vance nga Ohajo, gjithashtu anuloi veprimtaritë e fushatës në Karolinën e Veriut të enjten për shkak të stuhisë. Ai i ka kaluar ditët e fundit duke ndjekur zonjën Harris dhe zotin Walz në të gjithë vendin, një lëvizje e pazakontë që synon të sigurojë një “kontrast”, u tha ai gazetarëve të mërkurën.

TAIPEI, Tajvan – Duke filluar nga mësimdhënia në një shkollë të mesme në Kinë e deri tek përvoja e tij si anëtar i një komisioni të rëndësishëm të Kongresit mbi marrëdhëniet midis Pekinit dhe Uashingtonit, kandidati demokrat për nënpresident Tim Walz ka patur lidhje prej disa dekadash me Kinën që fillojnë që nga koha e protestave për demokraci të vitit 1989 në sheshin Tiananmen.

Zoti Walz ishte mësues i historisë dhe kulturës amerikane, si dhe i gjuhës angleze në shkollën e mesme Foshan në krahinën jugore kineze Guangdong në vitin 1989, vitin kur qindra mijëra studentë kinezë protestuan kundër Partisë Komuniste Kineze në pushtet në sheshin Tiananmen.

“Kina po hapej dhe kjo ishte arsyeja që shkova”, deklaroi zoti Walz në një intervistë për portalin ‘The Hill’ në Uashington, në vitin 2007. Gjatë mësimdhënies njëvjeçare në Kinë, nxënësit i dhanë nofkën “Fushat e Kinës” për shkak të mirësisë së tij.

Koha që qëndroi në Kinë, ndikoi në përshtypjet e tij për jetën e kinezëve nën Partinë Komuniste.

“Po të kishin një udhëheqje të mirëfilltë, arritjet e tyre nuk do të kishin kufi”, deklaroi ai në një intervistë për gazetën ‘Star Herald’ në vitin 1990, duke e përshkruar përvojën e mësimdhënies në Kinë si “njërën nga gjërat më të vlefshme” për të.

Interesimi i tij për Kinën nuk u ndal aty. Pas kthimit në Shtetet e Bashkuara, zoti Walz dhe bashkëshortja e tij themeluan një kompani të quajtur “Shkollimi përmes aventurave të udhëtimit” për të organizuar ekskursione verore të nxënësve amerikanë në Kinë.

Pesë vjet pas protestave në Sheshin Tiananmen dhe shtypjes së dhunshme të tyre nga qeveria kineze, zoti Walz u kthye në Kinë me bashkëshorten e tij për të kaluar atje muajin e mjaltit dhe me vete morën dy grupe nxënësish amerikanë. Ai dhe bashkëshortja e tij vazhduan të organizojnë programe verore për nxënësit amerikanë në Kinë deri në vitin 2003.

Aktivist për të drejtat e njeriut në Kinë

Pasi u zgjodh ligjvënës në Dhomën e Përfaqësuesve në vitin 2007, zoti Walz vazhdoi të përqendrohet në çështjet që lidhen me Kinën. Si ligjvënës në Kongres, ai ishte pjesë e Komisionit ekzekutiv të Kongresit për Kinën, synimi i vetëm i të cilit është të merret me të drejtat e njeriut në Kinë.

Brenda një periudhe të shkurtër, zoti Walz u bë kritik i zëshëm i qeverisë kineze. Ai takoi rregullisht aktivistë të profilit të lartë nga Kina dhe Hong Kongu, përfshirë aktivistin Joshua Wong dhe udhëheqësin shpirtëror të Tibetit, Dalai Lama.

Në një intervistë për Zërin e Amerikës në vitin 2014, zoti Walz përkujtoi përshtypjet si dëshmitar i protestave të studentëve në Sheshin Tiananmen. “E mbaj mend që u zgjova me 4 korrik me lajmin që kishte ndodhur e paimagjinueshmja”, deklaroi ai.

Ndonëse shumica e amerikanëve në atë kohë vendosën të largohen nga Kina për shkaqe sigurie pas protestave në Sheshin Tiananmen në vitin 1989, zoti Walz tha se ai besonte se ai “ishte një moment i rëndësishëm për të shkuar” në Kinë, ngaqë dëshironte të sigurohej se “ajo që po ndodhte duhej treguar”, si dhe për t’u përcjellë kinezëve mesazhin se bota e jashtme është me ta.

Veç angazhimit me aktivistë nga Kina dhe Hong Kongu, zoti Walz po ashtu propozoi bashkë me ligjvënës tjerë disa rezoluta për çështje të rëndësishme të të drejtave të njeriut në Kinë, përfshirë rezolutat që kërkonin lirimin e nobelistit kinez Liu Xiaobo dhe aktivistit Huang Qi. Ai po ashtu ka nënshkruar në cilësinë e garantuesit Deklaratën për të Drejtat e Njeriut dhe Demokracinë në Hong Kong në vitin 2017.

Në njërën nga deklaratat e tij si ligjvënës në vitin 2016, zoti Walz theksoi rëndësinë e “dialogut konstruktiv” me Pekinin për të siguruar “mbrojtjen e kulturës tradicionale të Tibetit dhe ekologjinë e brishtë të tij.”

“Shtetet e Bashkuara u themeluan mbi idenë e lirive universale dhe unë besoj se duhet të vazhdojmë të nxisim qeverinë kineze që të mos ua kufizojë lirinë fetare tibetianëve”, deklaroi ai.

Politika e jashtme

Krahas të qenit kritik i zëshëm për të drejtat e njeriut në Kinë, zoti Walz gjithashtu ka shprehur shqetësim rreth përpjekjeve të Kinës për të zgjeruar praninë e saj në Detin e Kinës Jugore në vitin 2016, duke iu referuar planeve të Pekinit për të ndërtuar ishuj artificialë në ujërat e kontestuara, si dhe ka kundërshtuar përpjekjet e Uashingtonit për të zvogëluar buxhetin ushtarak.

Përkundër qëndrimit të tij të palëkundur për të drejtat e njeriut në Kinë dhe pranisë ushtarake, zoti Walz ka theksuar rëndësinë e vazhdimit të bashkëpunimit me Kinën. “Unë nuk jam në kategorinë e njerëzve që mendojnë se me Kinën duhet patjetër të kemi marrëdhënie armiqësore,” deklaroi ai në një intervistë për portalin ‘Agri Pulse.’

“Mendoj se duhet të qëndrojmë të palëkundur rreth asaj që Pekini po bën në Detin e Kinës Jugore, por ka shumë fusha të tjera bashkëpunimi ku mund të punojmë,” shtoi zoti Walz.

Disa analistë thonë se lidhjet e thella të zotit Walz me Kinën dhe e kaluara e tij në diplomacinë midis Kinës dhe Shteteve të Bashkuara mund t’i ndihmojë dyshes demokrate të marrin vendime të informuara për politikën e jashtme, sidomos në çështjet që lidhen me Kinën.

“Mendoj se shumë njerëz që janë të shqetësuar për politikën e jashtme amerikane në këtë pjesë të botës, janë të lehtësuar me përzgjedhjen e tij si kandidat demokrat për nënpresident, për faktin se në këtë kombinim është dikush që është i informuar, që ka jetuar në rajon dhe që nuk e fillon nga e para përsa i përket politikës së jashtme amerikane në Azinë Lindore,” deklaroi profesori i shkencave politike Lev Nachman nga Universiteti Kombëtar i Tajvanit.

Ai tha se përmes përshtypjeve njerëzore që zoti Walz ka ndarë me publikun për kinezët, tibetianët dhe banorët e Hong Kongut, guvernatori i Minesotës mund t’i japë më shumë nuanca debatit për Kinën në Shtetet e Bashkuara.

“Ai mund të artikulojë nevojën për të kritikuar autoritarizmin e Kinës dhe shkeljet e të drejtave të njeriut në pjesë të ndryshme të botës në një mënyrë që nuk i përçmon kinezët, si dhe duke mos mbështetur retorikën e frikës që mbizotëron aktualisht në Shtetet e Bashkuara kur flitet për marrëdhëniet mes dy vendeve ,” deklaroi zoti Nachman për Zërin e Amerikës.

Kamala Harris me të shoqin Doug Emhoff, dhe Tim Walz me të shoqen Gwen Walz, në Filadelfia.

E nominuara demokrate për presidente, Kamala Harris, dhe kandidati i saj për nënpresident, guvernatori i Minesotas, Tim Walz, bënë fushatë për herë të parë së bashku më 6 gusht në Filadelfia.

Në fjalimin e tij para një turme prej më shumë se 10.000 personash në Universitetin Temple, Walz tregoi për fëmijërinë e tij në një qytezë të vogël në Nebraska, për shërbimin e tij 24-vjeçar në Gardën Kombëtare Ushtarake dhe për karrierën e tij si arsimtar në një shkollë të mesme dhe trajner futbolli.

“Nxënësit e mi më inkurajuan që të garoja për një post publik”, tha ai. “Ata panë në mua atë që unë shpresoja të rrënjosja te ta: angazhimin për të mirën e përbashkët dhe besimin se një person mund të bëjë dallimin”.

Gjatë fjalimit, ai po ashtu kritikoi të nominuarin republikan për president, Donald Trump, dhe kandidatin e tij për nënpresident, senatorin JD Vance.

“Ai tallet me ligjet tona, ai mbjell kaos dhe ndarje”, tha Walz për Trumpin.

“Ai u ngri gjatë krizës me COVID-in, e përplasi për toke ekonominë tonë dhe numri i krimeve të dhunshme ishte i lartë gjatë [mandatit presidencial] Donald Trumpit. Le të mos i numërojmë krimet që ai ka kryer”, shtoi Walz.

Harris hyri në garë për Shtëpinë e Bardhë pasi presidenti Joe Biden u tërhoq nga gara për rizgjedhje para pak më shumë se dy javësh.

Walz kritikoi politikat e republikanëve për kufizimin e të drejtave riprodhuese të grave, një temë që po përcjell republikanët që kur Gjykata Supreme amerikane më 2022 i dha fund të drejtës kushtetuese për abort.

“Edhe nëse ne nuk bëjmë një zgjidhje të tillë për vete, është një rregull i artë: shikoni punën tuaj”, tha ai, teksa kjo deklaratë u prit me ovacione nga të pranishmit.

Harris, që foli para Walzit, e prezantoi atë, duke ai listuar të gjithë titujt – bashkëshort, baba, mësues, trajner, veteran, kongresist dhe guvernator – dhe në fund tha se pas zgjedhjeve të 5 nëntorit ai do të bëhet nënpresidenti i ri i SHBA-së.

“Ai është një njeri që i bën të tjerët të ndihen mirë dhe i inspiron ata që të kenë ëndrra të mëdha”, tha ajo.

Harris tha se Walz është “një lider që mund të ndihmojë në bashkimin e shtetit tonë dhe që të lëvizim përpara si dhe është një luftëtar për shtresën e mesme”.

“Fushata jonë nuk është vetëm një luftë kundër Donald Trumpit. Fushata jonë, kjo fushatë, është luftë për të ardhmen”, tha ajo.

Harris njoftoi për zgjedhjen e Walzit si kandidat për nënpresident më 5 gusht.

Walz, 60-vjeçar, më 2006 u zgjodh nga një zonë me prirje republikane për t’u bërë anëtar i Dhomës së Përfaqësuesve të Kongresit amerikan, dhe shërbeu aty për 12 vjet, para se të fitonte pozitën e guvernatorit të Minesotas, më 2018.

Walz ka çuar përpara një agjendë progresive që përfshin shujta falas në shkolla, synimet për luftim të ndryshimeve klimatike, ulje taksash për klasën e mesme dhe rritje të numrit të ditëve të pushimit për punëtorët e Minesotas.

Trump dhe Vance e kanë kritikuar Walzin, menjëherë pasi Harris njoftoi se e kishte zgjedhur atë për të garuar për postin e nënpresidentit.

Sipas Trump dhe Vance, ai është shumë liberal.

“Kjo është dyshja më radikale e së majtës në historinë amerikane”, shkroi Trump në platformën e tij sociale.

Vance ndërkaq e kritikoi Walzin për mënyrën se si ai menaxhoi protestat pasi George Floyd, një person me ngjyrë, u vra në Mineapolis nga një zyrtar policor më 2020, duke thënë se ai nuk ishte i vendosur mjaftueshëm për t’u përballur me protestuesit.

Amerikanët gjatë zgjedhjeve zakonisht fokusohen në kandidatin për president, por kandidati për nënpresident mund të ndihmojë apo mund të dëmtojë kandidatin për president në bazë të të kaluarës së tyre, popullaritetit që kanë në shtetin e tyre dhe aftësisë për të fituar vota në shtete të rëndësishme apo për të marrë votat e votuesve të pavarur.

Pas tubimit zgjedhor në Filadelfia, Harris dhe Walz planifikojnë të vizitojë edhe shtetet e tjera kyçe, përfshirë Viskonsinin, Arizonën dhe Nevadën. Vance po ashtu bë bën një turne të ngjashëm, me ndalesa që përfshijnë Miçiganin dhe Viskonsinin. REL

MINIAPOLIS – Kandidatja demokrate për presidente, Kamala Harris zgjodhi Guvernatorin e Minesotës, Tim Walz si kandidatin e saj për nënpresident. Demokrati 60 vjeçar dhe veteran i ushtrisë arriti të ngjitej në krye të listës të kandidatëve të mundshëm falë disa paraqitjeve televizive ku ra në sy stili i tij i drejtpërdrejtë dhe i thjeshtë i komunikimit, disa ditë pasi Presidenti Joe Biden u tërhoq nga gara për një mandat të ri. Ai e ktheu shtetin e tij në një bastion të politikave liberale. Zoti Walz u zgjodh guvernator në vitin 2018 dhe shumica demokrate në kuvendin e shtetit të tij, i mundësoi atij dhe përfaqësuesve demokratë të shfuqizojnë kufizimet për abortin, të mbrojnë kujdesin për ndryshim gjinie tek të miturit dhe të legalizojë përdorimin e marihuanës. Ai ka shërbyer për 24 vjet në Gardën Kombëtare.

Ja disa fakte nga jeta dhe karriera e zotit Walz.

Tim Walz vjen nga zonat rurale e Amerikës

Është vështirë të gjesh një përfaqësues më të mirëfilltë të zonave rurale të Shteteve të Bashkuara. I lindur në qytetin West Point, në shtetin e Nebraskës, një qytet me rreth 3,500 banorë në veriperëndim të Omahës, zoti Walz ka shërbyer në Gardën Kombëtare dhe ka punuar si mësues në Nebraska.

Ai dhe bashkëshortja e tij u zhvendosën në Mankato, në pjesën jugore të Minesotës, në vitet ‘90. Atje ai u bë mësues i shkencave shoqërore dhe trajner i futbollit në shkollën e mesme Mankato West. Njëri nga ekipet e trajnuara nga ai fitoi vendin e parë në kampionatin e shkollave në nivel shteti në vitin 1999. Ai ende krenohet me të kaluarën e tij si sindikalist atje.

Zoti Walz shërbeu për 24 vjet në Gardën Kombëtare duke marrë një nga gradat më të larta ushtarake atë të majorit, para se të dilte nga ushtria në vitin 2005.

Aftësia e tij për të bërë për vete votuesit konservatorë

Në garën e tij të parë për t’u zgjedhur në Kongres në vitin 2006, zoti Walz fitoi ndaj ligjvënësit republikan Gil Gutknecht, i cili kishte shërbyer për gjashtë mandate. Ai fitoi votat në një distrikt kryesisht rural, në pjesën jugore të Minesotës ku votuesit ishin të pakënaqur me presidentin e atëhershëm republikan George W. Bush dhe luftën në Irak.

Gjatë gjashtë mandateve në Dhomën e Përfaqësuesve, zoti Walz u bë kampion i çështjeve të veteranëve.

Ai gjithashtu ka treguar thjeshtësinë e tij, mes të tjerash përmes postimeve në rrjetet sociale me vajzën e tij, Hope.

Pesha e kandidatit Walz në shtetet e pjesës rurale të Amerikës

Ndonëse zoti Walz nuk është nga një prej shteteve që mund të përcaktojnë rezultatin e zgjedhjeve si Uiskonsini, Miçigani dhe Pensilvania, ai vjen nga një shtet fqinj me to. Ai po ashtu mund të vazhdojë të sigurojë dominimin e demokratëve në Minesotë.

Ky është një aspekt i rëndësishëm pasi ish Presidenti Donald Trump e ka portretizuar Minesotën si shtet për të cilin do të zhvillohet betejë e ashpër këtë vit, ndonëse votuesit e tij nuk kanë zgjedhur një republikan në poste në shkallë kombëtare që nga viti 2006. Asnjë kandidat republikan nuk ka arritur të fitojë shumicën e votave në Minesotë që nga fitorja e bindshme e Presidentit Richard Nixon në vitin 1972, por zoti Trump tashmë ka bërë fushatë në këtë shtet.

Kur Guvernatori demokrat Mark Dayton vendosi të mos kandidonte për një mandat të tretë në vitin 2018, zoti Walz kandidoi dhe fitoi këtë post nën parullën “Një Minesotë”.

Zoti Walz po ashtu flet me elokuencë për çështjet që janë me rëndësi për votuesit e shteteve që dikur ishin zona industriale të zhvilluara. Ai ngre zërin për kauzat demokrate, përfshirë për sindikatat, të drejtat e punëtorëve dhe pagën minimale prej 15 dollarësh për orë pune.

Përvoja me një qeverisje të ndarë mes demokratëve dhe republikanëve

Në mandatin e tij të parë si guvernator, zoti Walz u përball me realitetin politik të një Dhome Përfaqësuesish të udhëhequr nga demokratët dhe Senatit të udhëhequr nga republikanët në nivel shteti, që u rezistoi propozimeve të tij për të përdorur taksat më të larta për të shtuar buxhetin për shkollat, kujdesin shëndetësor dhe rrugët. Por ai dhe ligjëvënësit e tjerë ndërmjetësuan arritjen e kompromiseve, duke siguruar zgjidhje dypartiake dhe lënien mënjanë të ndasive.

Bashkëpunimi ndërpartiak u bë më i vështirë gjatë vitit të dytë të mandatit të tij ndërkohë që ai përdori kompetencat e tij gjatë pandemisë së COVID-19 për të mbyllur bizneset dhe shkollat. Republikanët u rezistuan këtyre vendimeve gjë që i detyroi disa drejtues agjencish të largohen. Republikanët po ashtu kritikuan zotin Walz për atë që ata vlerësuan se ishte një përgjigje e vonuar ndaj trazirave ndonjëherë të dhunshme që pasuan vrasjen e George Floyd-it nga një polic i Mineapolisit në vitin 2020.

Pozitat e zotit Walz u lehtësuan gjatë mandatit të tij të dytë, pasi mundi kandidatin republikan Scott Jensen, një mjek i njohur për rezervat e tij ndaj vaksinimit. Demokratët fituan kontrollin në dy dhomat e legjislaturës, duke i dhënë mundësinë qeverisjes që të miratonte politika liberale, të mundësuara nga një suficit të konsiderueshëm buxhetor.

Zoti Walz dhe ligjvënësit hoqën pothuaj se të gjitha kufizimet e abortit në Minesotë që ishin vendosur nga republikanët në të kaluarën, mbrojtën trajtimin për përcaktimin gjinor të të miturve transgjinorë dhe legalizuan përdorimin e marihuanës.

Ata refuzuan thirrjet e republikanëve për të shfrytëzuar suficitin për të ulur taksat dhe me to financuan ushqim falas për fëmijët në shkolla, arsim falas në universitetet publike për studentët e familjeve që kishin më pak se 80 mijë dollarë në vit, program për leje familjare dhe shëndetësore me pagesë dhe sigurime shëndetësore për të gjithë pavarësisht statusit të banorëve.

Një gjuhë e thjeshtë dhe e qartë

Zoti Walz i quajti të emëruarin republikan Donald Trump dhe kandidatin e tij për nënpresident JD Vance “shumë të çuditshëm” në një intervistë në televizionin amerikan MSNBC muajin e kaluar. Shoqata e Guvernatorëve Demokratë – të cilën e drejton zoti Walz – e shpërndau shprehjen e tij në një postim në platformën X. Në një intervistë në CNN së fundmi, Guvernatori Walz e përsëriti këtë karakterizim ndërkohë që përmendi faktin që zoti Trump i referohej shpesh në fjalimet e tij personazhit Hannibal Lecter , vrasësit serial të filmit “Heshtja e Qengjave”, interpretuar nga Anthony Hopkins.

Kjo frazë u shndërrua shpejt në një slogan të paraqitjeve të zonjës Harris dhe demokratëve të tjerë dhe ka gjasa të bëhet fjala që do të mbahet mend nga këto zgjedhje padyshim të pazakonta të vitit 2024.

UASHINGTON – Kandidatja demokrate për presidente Kamala Harris takohet të dielën në rezidencën e saj me secilin nga tre kandidatët kryesorë për nënpresident: guvernatorin e Minesotas, Tim Walz, senatorin Mark Kelly nga Arizona, si dhe guvernatorin e Pensilvanisë, Josh Shapiro, në procesin për të përzgjedhur njërin prej tyre.

Zonja Harris pritet ta njoftojë ndoshta që të hënën vendimin e saj, përpara se të bëjë paraqitjen e parë publike së bashku me kandidatin për nënpresident gjatë një aktiviteti elektoral që pritet të mbahet të martën në Filadelfia. Ekipi i saj elektoral po planifikon gjithashtu një njoftim nëpërmjet mediave sociale, i thanë agjencisë së lajmeve Reuters zyrtarë në dijeni të çështjes.

Zonja Harris u takua të shtunën me grupin e punës që ka marrë në shqyrtim kandidaturat. Ndër anëtarët e grupit të punës është edhe ish-prokurori i përgjithshëm Eric Holder, firma ligjore e të cilit, “Covington & Burling LLP”, analizoi gjendjen financiare dhe historikun e kandidatëve. Zoti Holder dhe kolegët e tij paraqitën një përshkrim të detajuar të secilit prej kandidatëve, thanë persona në dijeni të procesit.

Zonja Harris bëri gjithashtu një takim 90-minutësh të premten me sekretarin e Transporteve, Pete Buttigieg. Kandidatët do të informohen ndoshta të hënën në mbrëmje, ose të martën në mëngjes nëse janë përzgjedhur.

Përzgjedhja e personit që do të kandidojë së bashku me të, është një ndër vendimet më të rëndësishme për karrierën politike të zonjës Harris, ndërsa po përpiqet të ngrejë me shpejtësi një fushatë elektorale për ta sfiduar ish-Presidentin Donald Trump në zgjedhjet e 5 nëntorit, pasi Presidenti Joe Biden u tërhoq nga kandidimi muajin e kaluar.

Kandidatët në listë janë të gjithë burra të bardhë, të cilët kanë tërhequr historikisht në zgjedhje votuesit në zonat rurale, të bardhët apo të pavarurit.

Vendimi që do të marrë zonja Harris do të ndikojë gjithashtu drejtimin e ardhshëm të Partisë Demokrate, duke fuqizuar edhe për zgjedhjet e tjera në të ardhmen, kandidatin që do të përzgjidhet tani.

Zoti Shapiro, një ndër kandidatët kryesorë, është përballur me kritika të ashpra nga e majta, në veçanti nga grupet progresiste dhe aktivistët pro-palestinezë, për mbështetjen që i jep Izraelit dhe për mënyrën se si menaxhoi protestat që u bënë në universitete për shkak të luftës në Gazë.

“Duhet korrigjuar politika për Gazën dhe duhet një axhendë politikash në favor të klasës punëtore, përfshirë një axhendë pro afrikano-amerikanëve”, tha Nina Turner, e cila ka qenë bashkëkryetare e fushatës elektorale të Bernie Sandersit në vitin 2020 dhe është gjithashtu studiuese në Institutin për Racën, Pushtetin dhe Ekonominë Politike, një organizatë kërkimore progresive. “Përzgjedhja e guvernatorit Shapiro do ta hiqte këtë mundësi”.

Ka patur gjithashtu pikëpyetje rreth mënyrës se si ai pati menaxhuar një ankesë për ngacmim seksual ndaj një ndihmësi të tij të hershëm. Gjithashtu, sindikata e Punëtorëve të Bashkuar të Automobilëve (UAW), e cila dha rishtazi mbështetjen për kandidimin për presidente të zonjës Harris, e ka kritikuar zotin Shapiro për thirrjet për të zgjeruar programet që mundësojnë kanalizimin e më shumë parave të taksapaguesve drejt shkollave private.

Disa organizma të tjera sindikale e kanë akuzuar zotin Kelly se ka kundërshtuar projektligje që ata thonë se do të fuqizonin sindikatat.

Shawn Fain, president i sindikatës UAW, tha se megjithë mbështetjen për kandidimin për presidente të zonjës Harris, sindikata e tij me 370 mijë anëtarë nuk mbështet kandidaturat e zotërinjve Kelly dhe Shapiro.

Zoti Walz është bërë ndër të preferuarit e progresistëve dhe grupeve të të rinjve, të cilëve u pëlqejnë kritikat që ai bën ndaj ish-Presidentit Trump.

Në moshën 60-vjeçare, zoti Walz është vetëm një vit më i moshuar se zonja Harris, por kritikët thonë se ai duket shumë më i moshuar, një disavantazh i mundshëm për fushatën elektorale, që po përpiqet të tejkalojë tërheqjen nga gara të Presidentit Biden për shkak të shqetësimeve për moshën e tij të madhe.

Zoti Walz iu përgjigj këtyre kritikave në rrjetin X, duke thënë se pamja e tij është e atillë për shkak se ka qenë mësues në shkollën e mesme dhe se ka “mbikqyrur mencën për 20 vite. Nuk largohesh nga ajo punë me flokë në kokë. Besomëni”, shkruajti ai.

Ndërsa kandidatja demokrate për presidente Kamala Harris pritet të përballet në zgjedhje me kandidatin republikan Donald Trump, qëndrimet e saj për politikën e jashtme po ndiqen me vëmendje, si kur bëhet fjalë për mbështetjen ushtarake për Izraelin dhe Ukrainën, përballjen me Kinën, apo krizën e emigrantëve në kufirin jugor të Shteteve të Bashkuara. Siç njofton korrespondentja e Zërit të Amerikës, Patsy Widakuswara, pritet që programi elektoral i zonjës Harris të ofrojë një vazhdimësi të politikave të administratës së Presidentit Biden, me disa ndryshime për sa i përket përparësisë së çështjeve.

Mijëra emigrantë nga Amerika Qendrore kalojnë çdo vit përmes Meksikës, drejt kufirit me Shtetet e Bashkuara. Koordinimi me vendet e këtij rajoni për të trajtuar shkaqet e emigracionit, ishte një ndër detyrat që i ishin caktuar Nënpresidentes Kamala Harris, duke e ekspozuar atë kështu ndaj kritikave nga rivali i saj në zgjedhje, ish-Presidenti Donald Trump.

“Ishte një dështim, një nënpresidente e dështuar dhe një administratë e dështuar, ndërsa miliona njerëz kalojnë kufirin. Asaj i ishte ngarkuar përgjegjësia për kufirin”, tha ish-Presidenti Trump.

Zonjës Harris nuk i është lënë drejtimi për çështjet e kufirit. Por për emigracionin, ajo jep një mesazh të fortë gjatë fushatës elektorale, duke vënë në dukje përvojën e saj si prokurore në Kaliforni.

“Unë jam përballur me bandat ndërkombëtare, kartelet e drogës dhe trafikantët e qenieve njerëzore që vinin në vendin tonë në rrugë të paligjshme. Kam ngritur çështje hetimore ndaj tyre dhe i kam fituar paditë. Donald Trump nga ana tjetër, flet shumë për sigurimin e kufirit, por nuk ka bërë asgjë”, tha zonja Harris.

Nëse fiton zgjedhjet, zonja Harris thotë se do të rikthejë projektligjin e propozuar nga Presidenti Joe Biden për kufirin, që u rrëzua nga ligjvënësit republikanë që mbështesin ish-Presidentin Trump.

Ajo thotë se do ta vazhdojë mbështetjen për Ukrainën, duke shmangur njëkohësisht një luftë të drejtpërdrejtë me Rusinë, si dhe do të punojë për të ruajtur unitetin me vendet e NATO-s.

Ajo pritet gjithashtu të forcojë bashkëpunimin në rajonin Indo-Paqësor.

“Shtetet e Bashkuara qëndrojnë përkrah Filipineve përballë frikësimit dhe kërcënimeve në Detin e Kinës së Jugut”, tha zonja Harris.

Vazhdimësi pritet të ketë edhe në lidhje me Kinën.

“Do të vazhdojë, siç ka thënë, përpjekjet për ulje të rrezikshmërisë së Kinës. E dimë se kur kandidoi në vitin 2020, ishte kundër vendosjes së tarifave. Por ashtu siç veproi Presidenti Biden, edhe ajo duket se ka ndryshuar mendim. Pra gjasat janë për një vazhdimësi”, thotë Robert Daly, nga Qendra Wilson.

Për çështjen e Gazës, zonja Harris mbështet qëndrimin e Presidentit Biden, me synimin për arritjen e një armëpushimi dhe parandalimin e një lufte rajonale.

Sidoqoftë, për shkak të zemëratës në pjesë të mëdha të elektoratit demokrat për mbështetjen e vendosur të Presidentit Biden për Izraelin, zonja Harris ka shprehur ndjeshmëri shumë më të madhe për viktimat në radhët e palestinezëve.

“Nuk mund t’ia lejojmë vetes të mos kemi ndjeshmëri ndaj vuajtjeve dhe unë nuk do të qëndroj e heshtur”, tha ajo.

Zonja Harris mbështet gjithashtu poilitikën e Presidentit Biden për një stil drejtues duke u mbështetur tek aleatët dhe partnerët.

Ajo është përqëndruar gjithashtu tek rreziqet jotradicionale ndaj sigurisë, ndërsa kryeson Këshillin Kombëtar për Hapësirën dhe nxit politikat e administratës për inteligjencën artificiale dhe klimën.

“Kur njerëzit thonë se ‘ajo pati emigracionin në portofolin e saj dhe ne kemi tashmë një problem të tmerrshëm me emigracionin’, ata nuk kanë parasysh këtu rolin e plotë që ajo ka luajtur në çdo rajon të botës”, thotë Linda Robinson, nga Këshilli për Marrëdhëniet me Jashtë.

Megjithëse ka patur katër vite udhëtime në mbarë globin dhe takime me rreth 150 kryetarë shtetesh dhe qeverish, ish-Presidenti Trump thotë se ajo është pa përvojë dhe pa arritje.

“Ajo është një majtiste radikale që do ta shkatërrojë vendin tonë”, tha ish-Presidenti Trump.

Dhe cila është përgjigja e saj?

“Nëse keni diçka për të më thënë, ma thoni në sy”, tha zonja Harris.

Kandidati republikan për president dhe rivalja e tij e mundshme demokrate po vazhdojnë fushtatat në garën për Shtëpinë e Bardhë. Ish-Presidenti Donald Trump hodhi dyshime mbi identitetin racor të Nënpresidentes Kamala Harris, ndërsa zonja Harris e sfidoi zotin Trump për të debatuar.

Me më pak se 100 ditë para zgjedhjeve, korrespondenti i Zërit të Amerikës Scott Stearns i hedh një vështrim mbështetjes që gëzojnë dy kandidatët për momentin.

Kandidati republikan për president, Donald Trump u tha mbështetësve në shtetin fushëbetejë të Pensilvanisë se kundërshtarja e tij e mundshme demokrate është një mashtrim.

“Shefat e Partisë së majtë radikale Demokrate kanë vendosur një kandidate kukull që u shërben vetëm atyre. Kamala Harris mori zero vota. Ajo kontrollohet nga donatorët dhe ndërmjetësit e pushtetit që i mundësuan kandidaturën, ata që shkatërrojnë qeverinë tonë dhe që marrin miliarda e miliarda dollarë”, tha ai.

Më herët gjatë ditës, zoti Trump pati një diskutim që ngjalli reagime me disa gazetare afrikano-amerikane. Ai hodhi dyshime mbi identitetin racor të zonjës Harris, nëna e së cilës është indiane ndërsa babai afrikano-amerikan.

“Ajo gjithmonë është prezantuar me origjinën dhe trashëgiminë indiane. Nuk e dija se ishte e afrikano-amerikane deri para disa vitesh, kur u kthye në një afrikano-amerikane. Tani do që të njihet ashtu. Pra, nuk e di nëse është indiane apo afrikano-amerikane”, tha zoti Trump.

Nënpresidentja Harris është vetë-identifikuar prej kohësh si afrikano-amerikane dhe indiano-amerikane.

Që kur u bë kandidate e mundshme demokrate për presidente, mbështetja për të është baraz me atë për republikanin Trump në shtatë shtete kyçe, kryesisht për shkak të rritjes së përkrahjes së votuesve të rinj, afrikano-amerikanë dhe hispanikë, sipas rezultatit të sondazheve të agjencisë së lajmeve “Bloomberg” dhe kompanisë “Morning Consult”.

“Gara po merr një kthesë të re dhe ka shenja se Donald Trumpi po e ndjen atë. Ju mund ta keni vërejtur”, tha zonja Harris.

Ajo tha në një tubim të martën në Xhorxhia se zoti Trump duket se ka shumë për të thënë për të, por nuk dëshiron të diskutojë me të në debatin e planifikuar për shtator.

“Donald, shpresoj se do ta rimendosh debatin me mua, sepse siç thotë një shprehje ‘nëse ke diçka për të më thënë ma thuaj në sy’”, tha zonja Harris.

Ajo pritet ta shpallë kandidatin për nënpresident gjatë ditëve në vijim, në prag të Kuvendit të Partisë në Çikago ku do të synojë të bindë votuesit se ajo është zgjedhje më e mirë sesa zoti Trump.

Në Karolinën e Veriut, votuesja Wanda Cherry thotë se pas kalimit të kandidaturës nga Presidenti Biden tek Nënpresidentja Harris, entuziazmi është rritur.

“Më vjen mirë që presidenti e kuptoi se kemi nevojë për dikë më të ri për të udhëhequr vendin, dikë që ka zgjuarsinë dhe vullnetin për të garuar”, tha ajo.

Votuesi në Xhorxhia, T. Stanley nuk beson se zonja Harris është gati për postin e presidentes.

“Së pari, fakti se është kandidate më tmerron, sepse nuk është e përgatitur për të qenë presidente”, thotë ai.

Një votues tjetër në Xhorxhia thotë se zonja Harris ka rigjallëruar garën presidenciale.

“Do të votoj për të dhe jam i gëzuar për këtë. Në përgjithësi mendoj se ajo është pak liberale në shumë çështje, por për ta mbrojtur demokracinë tonë, patjeter se do ta votoj”, thotë Phil Ownbey.

Në Kaliforni, votuesja Marina George thotë se mbështetja për zotin Trump është mjaftueshëm e fortë për të mposhtur çdo kundërkandidat.

“Edhe me Kamala Harrisin, apo këdo që vendosin, ata nuk do të fitojnë. Kjo thjesht po e përshpejton dhe thellon humbjen e Partisë Demokrate. Gjithçka që ata po bëjnë po shkon në favor të republikanëve”, thotë ajo.

Në nivel kombëtar, sondazhi i agjencisë Bloomberg e nxjerr zonjën Harris baraz me zotin Trump, me më pak se 100 ditë para ditës së zgjedhjeve.

Zëvendëspresidentja Kamala Harris i është përgjigur komenteve raciste të ish-presidentit Donald Trump ndaj saj. Harris tha se populli amerikan meriton më mirë dhe se meriton një lider që të kuptojë se dallimet tona nuk na ndajnë.

“Ishte e njëjta shfaqje e vjetër – përçarje dhe mosrespekte. Populli amerikan meriton një lider që thotë të vërtetën, një lider që nuk përgjigjet me armiqësi dhe zemërim kur përballet me faktet. Ne meritojmë një lider që të kuptojë se dallimet tona nuk na ndajnë. Ato janë një burim thelbësor i forcës sonë. ”, tha Harris.

Në intervistën e tij të mërkurën në Çikago, Trump vuri në dyshim identitetin racor me ngjyrë të Harris, ku ngriti pikëpyetje nëse ajo është indiane apo me ngjyrë.

“Ajo ishte gjithmonë me origjinë indiane dhe ajo vetëm po promovonte trashëgiminë indiane. Unë nuk e dija se ajo ishte me ngjyrë deri disa vite më parë, kur ajo u bë me ngjyrë dhe tani ajo dëshiron të njihet si me ngjyrë. Pra nuk e di, a është indiane apo me ngjyrë?”, tha ai në kongresin e Shoqatës Kombëtare të Gazetarëve të me Ngjyrë në Çikago të mërkurën.

Harris, babai i të cilit është xhamajkan dhe nëna indiane, ndoqi Universitetin Howard. Ajo është zëvendëspresidentja e parë femër në historinë e SHBA-së dhe gjithashtu gruaja e parë me ngjyrë që mban këtë detyrë.

Vërejtjet e Trump erdhën ndërsa Harris po shijon vrullin e votimit në fushatën e saj ende të re për presidente pasi presidenti Joe Biden u tërhoq nga gara më 21 korrik. Fushata e Trump është vendosur “të sulmojë” Harris dhe duket se deklaratat e fundit të ish-presidentit janë pjesë e kësaj strategjie. Komenti i tij ndaj Harris nuk është pritur mirë në rrjet ku komentuesit i kanë cilësuar fjalët e tij të turpshme. sn

Kë do ta zgjedh Kamala Harris si kandidat për nënpresident? Në ditët në vijim, kjo do të jetë pyetja më e madhe politike në Shtetet e Bashkuara pas tërheqjes së Presidentit Joe Biden nga gara për t’u rizgjedhur në Shtëpi të Bardhë edhe për një mandat dhe që kur Nënpresidentja Kamala Harris u bë kandidatja e pritshme demokrate. Kandidati republikan Donald Trump tashmë zgjodhi senatorin J.D. Vance si kandidatit për nënpresident.

Për momentin, Kamala Harris po bën fushatë vetëm. Në mesin e atyre që mund t’i bashkohen asaj si kandidat për nënpresident janë një numër guvernatorësh përfshirë atë të Karolinës Veriore Roy Cooper, një demokrat që ka fituar në një shtet që votoi pro republikanit Donald Trump për president, apo Guvernatori Josh Shapiro i Pensilvanisë, një shtet i konsideruar jetik nga të dy partitë për të fituar në nëntor.

Në listë është edhe astronauti Mark Kelly, aktualisht senator nga Arizona.

Me Kuvendin Kombëtar të Partisë Demokrate vetëm disa javë larg, procesi i përzgjedhjes së kandidatit për nënpresident do të jetë i shpejtë.

“Rreziku i një procesi të përshpejtuar është që ka gjëra që mund të anashkalohen. Gabimet do të ishin shmangur nëse do të ishte një proces normal. Por ajo nuk ka zgjidhje tjetër. I duhet të veprojë me shpejtësi dhe të bëjë zgjedhjen e duhur”, thotë analisti William Galston nga Instituti “Brookings”.

Zgjedhja e duhur nuk mbështetet në ndonjë teori shkencore. Ajo ka të bëjë me përzgjedhjen e kandidatit që sjell më shumë vota, sidomos në një numër të vogël shtetesh të diskutueshme, përcaktuese pëpr rezultatin e zgjedhjeve.

Përzgjedhja e kandidatit për nënpresident nënkupton një përqendrim tek gjeografia më shumë se tek karakteri.

“Mendoj se dikush nga shtetet e pjesës qendrore apo edhe nga pjesa jugore e Shteteve të Bashkuara do të jenë zgjedhja më e mirë. Guvernatori i Kentakit, Andy Beshear mendoj se do të ishte zgjedhje e mirë. Duhet të sigurohemi që kemi kandidatura të baraspeshuara ngaqë kemi një kandidat nga Kalifornia”, thotë delegati demokrat, Jay Chen.

Zonja Kamala Harris është nga Kalifornia. Dhe meqë kalkulimet politike përjashtojnë mundësinë që kandidatët për president dhe nënpresident të jenë nga i njejti shtet, Guvernatori i Kalifornisë, Gavin Newsom, i cili pritet të jetë kandidati për president në të ardhmen, përjashtohet nga ekuacioni.

A mund të kandidohen dy gra? Guvernatorja Gretchen Whitmer drejton shtetin e rëndësishëm dhe të papërcaktuar të Miçiganit, por siç duket ajo nuk dëshiron të hyjë në histori përmes kësaj mënyre.

“Nuk do të largohem nga Miçigani. Jam krenare që jam guvernatore e këtij shteti dhe i kam qëndruar pranë këtij parimi. E di që të gjithë gjithmonë kanë dyshime dhe ma bëjnë vazhdimisht këtë pyetje. Ju po e bëni punën tuaj, por unë do rri këtu”, deklaroi Guvernatorja e Miçiganit, Gretchen Whitmer.

Popullariteti si guvernator apo suksesi si ligjvënës në Kongres nuk është garanci që një kandidat mund të korr sukses si pjesë e dyshes në zgjedhjet presidenciale, thotë autori i dy librave mbi postin e nënpresidentit, Joel K. Goldstein.

“A janë gati të shkëlqejnë në skenën kombëtare? Ajo dallon shumë nga gara brenda një shteti apo distrikti”, thotë zoti Goldstein nga Universiteti “Saint Louis”.

Njeriu i dytë në presidencë po ashtu duhet të jetë dikush që votuesit e pranojnë si dikë që është vetëm një hap larg të qenit president.