UASHINGTON – Drejtori i parë Ekzekutiv i emëruar nga presidenti në krye të Agjencisë së Shteteve të Bashkuara për Mediat Globale (USAGM) shkeli rregulloren e brendshme të agjencisë që garanton pavarësinë editoriale, u përfshi në shpërdorim madhor të fondeve publike dhe abuzoi me autoritetin e tij, thuhet në një raport prej 145 faqesh të publikuar të mërkurën nga Zyra e Prokurorit të Posaçëm. Zëri i Amerikës është pjesë e USAGM-it.

Zyra e Prokurorit të Posaçëm (OSC) është një agjenci e pavarur, roli i së cilës është të hetojë shkeljet brenda qeverisë federale. Kjo agjenci, sinjalizoi USAGM-in në dhjetor 2020 për një sërë akuzash për shkelje nën drejtimin e zotit Michael Pack dhe kërkoi fillimin e hetimeve. USAGM-i angazhoi për këtë hetim tre ekspertë të pavarur, me përvojë në mbrojtjet, që u garantohen sinjalizuesve të brendshëm, si dhe për gazetarët.

Raporti i ekspertëve, i cili iu paraqit Zyrës së Prokurorit të Posaçëm, gjeti të dhëna për keqmenaxhim madhor në dy raste. Raporti thotë se drejtori ekzekutiv Pack u përfshi në shpërdorim madhor kur shpenzoi 1.6 milionë dollarë fonde për një kontratë të panevojshme me një firmë ligjore private dhe, se nuk respektoi pavarësinë gazetareske dhe integritetin e rrjeteve për të cilat ishte caktuar t’i mbikëqyrte.

Zoti Pack, me bindje politike konservatore, ish-producent filmash dokumentarë, u emërua nga ish-Presidenti Donald Trump në postin e drejtuesit të agjencisë që mbikëqyr gjashtë rrjete të pavarura lajmesh dhe entitete të tjera, ndër ta edhe Zërin e Amerikës. Shtatë muaj pas marrjes së detyrës, ai dha dorëheqjen në janar 2021, me kërkesë të Presidentit Joe Biden.

Raporti i pavarur përqëndrohet në gjashtë fusha, bazuar në ankesat e ardhura nga sinjalizuesit brenda agjencisë.

Tre hetuesit e pavarur zhvilluan 78 intervista, 64 prej të cilave me punonjës dhe ish-punonjës të agjencisë ose rrjeteve të saj. Hetuesit kërkuan të zhvillojnë intervista edhe me zotin Pack dhe 13 zyrtarë të lartë të ekipit të tij politik, si dhe me zyrtarët e emëruar nga zoti Pack si drejtues të këtyre rrjeteve. Kërkesat u refuzuan dhe nuk morën përgjigje, me përjashtim të dy rasteve.

Raporti publikon edhe korrespondencën mes Zyrës së Prokurorit të Posaçëm dhe zotit Pack, kur ai ishte ende në detyrën e drejtorit ekzekutiv, përmes së cilës OSC-ja vuri re se mundësitë e shkeljes së ligjit ishin të mëdha. Raporti thotë se zoti Pack u tha hetuesve se akuzat nuk meritonin të merreshin në konsideratë pasi sinjalizuesit “ishin nisur nga interesa personale”.

Disa nga gjetjet e raportit

Raporti arrin në përfundimin se zoti Pack abuzoi me postin në rastet e mëposhtme:

• Ai pezulloi padrejtësisht çertifikatat e sigurisë të gjashtë drejtuesve ekzekutivë dhe të një menaxheri “pa patur një arsye legjitime”.
• U përpoq të hiqte fondet federale që ishin caktuar për Fondin e Teknologjisë së Hapur, që financon punën kërkimore për shmangien e censurës nga qeveritë e huaja.
• Shkeli Ligjin për Transmetimet Ndërkombëtare duke u përpjekur të ndryshonte aktet nënligjore dhe kontratat e punës të drejtuesve të rrjeteve që emërohen nga drejtori ekzekutiv.
• Shkeli Ligjin për Privatësinë duke udhëzuar që materialet që kishin të bënin me punonjësit t’u dërgoheshin individëve jashtë agjencisë. Raporti i pavarur vë në dukje se zoti Pack veproi kështu megjithëse një firmë e jashtme ligjore i tha se ky veprim ishte në shkelje të ligjit.

Keqmenaxhimi madhor:

• Zoti Pack transferoi redaktorin përgjegjës për standardet gazetareske të Zërit të Amerikës, që ishte përgjegjës për ruajtjen dhe zbatimin e rregullave të etikës gazetareske, në një detyrë tjetër. Raporti thotë se me këtë veprim iu ndalua redaktorit që t’i përgjigjej pyetjeve nga gazetarët e Zërit të Amerikës për punën e tyre, si dhe që të organizonte një seminar për rregullat e etikës për raportimin e zgjedhjeve, në muajt e fundit përpara fushatës për zgjedhjet presidenciale të vitit 2020.
• Ai shpenzoi 1.6 milionë dollarë fonde për një firmë ligjore që do të hetonte personelin, kur kjo punë mund të ishte bërë nga vetë agjencia federale.
• Ai ndërmori veprime që nuk ishin në përputhje me detyrimin e përcaktuar në statut që drejtori ekzekutiv të respektojë pavarësinë dhe integritetin gazetaresk të rrjeteve.

Raporti i pavarur: zoti Pack shkeli “ligjet, rregullat dhe rregulloret”, si më poshtë:

• Një direktivë që kufizoi komunikimet e jashtme të agjencisë, nuk mori parasysh se USAGM-i ka detyrimin ligjor për të informuar Departamentin e Shtetit dhe entitete të tjera.
• Shkeli Aktin mbi Privatësinë, një ditë përpara se të jepte dorëheqjen, kur një këshilltar i lartë i tij, (emri i të cilit është fshirë në raport), u dha disa personave, që nuk janë pjesë e qeverisë, një material hetimor që lidhej me gjashtë drejtues të agjencisë.
• Zëvendësi i tij në detyrë, i cili mbulonte çështjet ligjore, zbatimin e rregulloreve dhe menazhimit të riskut, (emri i të cilit është fshirë) ka shkelur rregullat mbi ruajtjen e të dhënave, duke mos ruajtur komunikimet zyrtare, apo duke komunikuar nëpërmjet aplikacioneve me mesazhe të koduara, të cilat zhduken.

Shkelja e Aktit të Privatësisë mund të përbëjë një kundërvajtje që parashikon një dënim me gjobë deri në 5,000 dollarë.

Zyrtarët që kryen hetimet përcaktuan gjithashtu se disa nga ankesat e bëra nga sinjalizuesit, nuk mund të konsideroheshin si raste keqmenazhimi apo abuzimi nga zoti Pack.

Mes tyre përfshihen vendimet për largimin e drejtuesve të rrjeteve të transmetimeve, ndryshimin e anëtarëve të bordit, ngrirja e kontratave të punës, apo edhe e punësimeve e reja, përdorimi për qëllime të tjera i fondeve të Kongresit, si dhe refuzimi për të miratuar, apo përtërirë vizat J-1, për gazetarët e huaj që punojnë për agjencinë.

Në rastin e vizave, raporti i pavarur vë në dukje se zoti Pack dështoi të merrte në konsideratë ndikimin që do të kishin veprimet e tij në aftësinë e Zërit të Amerikës për të raportuar lajmet në disa gjuhë. Ai nuk ofroi asnjë alternativë të mundshme për punësimin e gazetarëve të huaj. Ndërsa ishte ende në detyrë, zoti Pack kishte premtuar të shpjegonte se mbi çfarë baze e mori vendimin, gjë që megjithatë nuk e bëri asnjëherë. Zoti Pack nuk iu përgjigj kërkesave të Zërit të Amerikës të mërkurën për të komentuar lidhur me këtë artikull.

David Seide, këshilltar i lartë në organizatën mbi Llogaridhënien e Qeverisë, një organizatë jofitimprurëse që mbron sinjalizuesit, e cila përfaqësonte rreth 30 të tillë, kur zoti Pack mbante detyrën e shefit ekzekutiv të USAGM-it, vë në dukje natyrën e paanshme, dypartiake të zyrës së Prokurorit të Posaçëm dhe e cilëson raportin si “befasues për nga shtrirja e tij”.

Zoti Seide tha se raporte të kësaj natyre, janë kaq të thellë dhe hyjnë në kaq shumë detaje “kur Zyra e Prokurorit të Posaçëm e di se integriteti i organizatës që po hetohet është në rrezik dhe kur duhet t’i dëshmohet botës se po bëhen përpjekje për ta trajtuar çështjen me paanashmëri e duke bërë një analizë objektive”.

Ndërsa e quajti raportin shterues, zoti Seide tha se sipas tij duhet bërë akoma më shumë, duke përfshirë referimin e disa çështjeve tek Departamenti i Drejtësisë për hetime të mëtejshme.

Në një deklaratë të mërkurën, shefja ekzekutive aktuale e Agjencisë së Shteteve të Bashkuara për Median Globale (USAGM), Amanda Bennett, përshëndeti procesin e hetimit dhe rezultatet e tij.

“Kur u bëra drejtoreshë ekzekutive në tetor të vitit 2022, u zotova të përqendrohem në misionin e USAGM-së, si një nga operacionet më të mëdha globale të medias në botë, me një mur të fortë editorial ndarës dhe standardet më të larta gazetareske”, tha zonja Bennett, një gazetare veterane, që ka drejtuar më parë Zërin e Amerikës.

“Agjencia ka ndërmarrë një sërë veprimesh korrigjuese dhe reformash, për të trajtuar shumë nga çështjet e identifikuara nga ekipi i pavarur i hetimit. Ne do ta vazhdojmë këtë punë”, tha ajo.

Në një letër drejtuar Presidentit Biden, që shoqëron publikimin e raportit, drejtori i Zyrës së Prokurorit të Posacëm Henry J. Kerner thotë se “raporti vërtetoi kryesisht veprimet thellësisht shqetësuese, të zbuluara nga sinjalizuesit. Megjithatë, jam i inkurajuar nga hapat që ka ndërmarrë agjencia për të kryer detyrat e saj dhe për të vendosur në vend reputacionin”.

Çështje besimi

Raporti përshkruan në mënyrë të detajuar se si zoti Pack dhe ekipi i tij besonin se punonjësit në rrjetet e lajmeve të financuara nga Kongresi, ishin të njëanshëm dhe të pabesueshëm.

Ekipi që ndihmonte zotin Pack hartoi një listë ku përfshiheshin disa zyrtarë të lartë të agjencisë federale, që duheshin shkarkuar, duke i cilësuar ata si përfaqësues të të ashtuquajturit “shtet i fshehtë”, të cilët “nuk ishin të besueshëm”.

Zoti Pack mori veprime konkrete ndaj disa prej këtyre individëve “pa bazë ligjore” pasi ata kishin sinjalizuar shkelje të mundshme, sipas raportit.

Më 5 qershor të vitit 2020, zoti Pack u takua me një zyrtar, emri i të cilit nuk identifikohet në raport, i cili kishte përpiluar një listë të personave që duheshin larguar”.

Në këtë dokument dhe në disa email-e që pasuan, zyrtari kishte përfshirë lidhje të dyshuara politike të këtyre personave duke i shoqëruar me komente të tilla si “eleminoni të gjithë ekipin anti-Trump”, “urren republikanët dhe Trump-in” apo: “nuk është në ekipin Trump”.

Disa nga shqetësimet më të mëdha gjatë kohës kur zoti Pack udhëhiqte USAGM-në lidhen me përpjekjet për të shfuqizuar rregulloren e brendshme që garanton pavarësinë editoriale të Zërit të Amerikës, duke e mbrojtur nga ndërhyrjet politike.

Në nëntor të 2020-s një gjykatës federal lëshoi një urdhër paraprak që ndalonte zyrtarët të ndërhynin në pavarësinë editoriale dhe të drejtat që gëzojnë gazetarët e Zërit të Amerikës bazuar në Amendamentit të Parë të Kushtetutës.

Duke i bërë një vlerësim dështimit të zotit Pack për të respektuar pavarësinë editoriale, në raportin e pavarur, citohen veprimet e tij kontradiktore. Zoti Pack udhëzoi një të emëruar politik, që të hetonte një video të Shërbimit Urdu, të Zërit të Amerikës, e cila shihej si me qasje partiake, por nuk ndërmori asnjë veprim, kur u njoftua se Zyra e Transmetimeve për Kubën, i dha një zyrtari të Shtëpisë së Bardhë, një material (filmik), lidhur me një grup, që mbështeste presidentin e atëhershëm (zotin Trump). Zyrtari ia dërgoi materialin me email një audience të brendshme amerikane, dy muaj para zgjedhjeve të 2020-s. Sipas rregullave të agjencisë gazetarët e USAGM-së kanë detyrimin të marrin të gjitha masat që përmbajtja e materialeve të tyre të mos shpërndahen për audiecat e brendshme.

Zoti Pack gjithashtu dështoi të ndërmerrte veprime ose të ndërhynte kur kreu i sapoemëruar prej tij, i Zërit të Amerikës, Robert Reilly, u hakmor kundër korrespondentes së Shtëpisë së Bardhë, Patsy Widakuswara, pasi ajo i bëri “një pyetje logjike Sekretarit të Shtetit”. Zoti Reilly e kishte ftuar sekretarin e atëhershëm Mike Pompeo, të merrte pjesë në një seancë pyetje-përgjigjesh në Zërin e Amerikës, por ai nuk i bëri zotit Pompeo, asnjë nga pyetjet që kishin paraqitur gazetarët e agjencisë. Më pas, zonja Widakuswara i bëri një pyetje zotit Pompeo, teksa ky i fundit po largohej nga ndërtesa e Zërit të Amerikës.

Këtë të mërkurë, ish presidenti Donald Trump do të kthehet në valët televizive të rrjetit CNN. Ai do të shfaqet në CNN gjatë një forumi publik 2 orësh në shtetin e Nju Hemshër, i cili pritet të mbizotërohet nga diskutimi mbi zgjedhjet presidenciale.

Dalja e Trumpit në CNN vjen vetëm një ditë pasi një juri civile e Nju Jorkut e shpalli atë fajtor për abuzim seksual ndaj ish-gazetares dhe shkrimtares E. Jean Carrol, rreth tri dekada më parë.

Forumi, zhvillimi i të cilit u bë i ditur për publikun javën e kaluar, pritet të ngjallë interes të madh, pasi bashkon dy palët, rrjetin televiziv dhe kandidatin për president, që prej një kohe të gjatë kanë shkëmbyer kritika dhe kanë patur kundërshti.

Por vëmendja u shtua edhe më shumë të martën, pas vendimit unanim të një jurie prej 9 anëtarësh të Nju Jorkut, se ish-Presidenti është përgjegjës për abuzim seksualisht ndaj zonjës E. Jean Carroll dhe më pas ka dëmtuar reputacionin e saj, duke e quajtur gënjeshtare, por juria rrëzoi pretendimet e saj se ai e kishte përdhunuar. Juria vendosi që zoti Tramp t’i paguajë zonjës Carroll një dëmshpërblim prej 5 milionë dollarësh.

Ndonëse vendimi për këtë çështje civile, nuk parashikon dënim sipas kodit penal, ai risjell në vëmendje numrin e madh të hetimeve me të cilat po përballet zoti Trump.

Në muajin mars, juria e madhe e Manhatanit votoi për ngritjen e 34 padive penale ndaj tij për falsifikim të të dhënave të biznesit në Nju Jork, për pagesa të fshehta për një aktore të filmave pornografikë, e cila pretendon se ka patur marrëdhënie jashtëmartesore me të.

Ai përballet gjithashtu me hetime të tjera në shtetin e Xhorxhias dhe në Uashington lidhur me dyshimet për ndërhyrjet e tij në zgjedhjet presidenciale të 2020.

Prokurori i posaçëm i Departamentit të Drejtësisë, Jack Smith po kryen hetime mbi rrethanat e mbajtjes së dokumenteve të klasifikuara nga ish-Presidenti Trump në shtëpinë e tij, pas largimit nga detyra, si dhe për pengim të mundshëm të drejtësisë.

Po ashtu, kjo ngjarje rikthen vëmendjen mbi pikëpyetjet rreth mënyrës së trajtimit të grave, ndër vite, nga zoti Trump, duke shtuar pritshmëritë se ai do të detyrohet t’u përgjigjet pyetjeve të vështira të gazetares së CNN-it Kaitlan Collins, e cila do drejtojë diskutimin, si dhe të audiencës.

E. Jean Caroll është njera, prej më shumë se 12 grave që ndër vite, kanë akuzuar zotin Trump për ngacmim apo abuzim seksual, pretendime që ai i ka mohuar.

Historikisht, zoti Trump nuk ka ka patur reagime të mira kur është vënë në trysni për mënyrën e sjelljes ndaj grave; rasti më i njohur është ai i vitit 2015, gjatë debatit të parë të kandidatëve republikanë për zgjedhjet presidenciale, ku zoti Trump u përplas me drejtuesen televizive në atë kohë të rrjetit Fox News, Megyn Kelly, duke bërë komente fyese ndaj saj.

Marrëdhëniet e zotit Trump me televizionin CNN janë më kundrathënëse se ato që ai ka patur në atë kohë me televizionin Fox News .

Zoti Trump e ka cilësuar CNN-in si “rrjet lajmesh të rreme” dhe ka bërë sulme personale ndaj gazetares Collins. Në një rast, asaj iu ndalua të merrte pjesë në një ngjarje të hapur për median, në Shtëpinë e Bardhë, pasi ekipi i zotit Trump u zemërua nga disa pyetje me zë të lartë, që ajo kishte bërë në një veprimtari të mëparshme në Zyrën Ovale.

Megjithatë, ekipi i zotit Trump e vlerësoi ftesën e televizionit CNN si një mundësi për t’iu qasur një rrjeti më të gjerë votuesish, veç atyre që ndjekin platformat televizive që mbështesin zotin Trump.

“Presidenti Trump është vënë në provë dhe ka fituar. Ai nuk i shmanget asgjëje, por përballet me gjithçka”, tha zëdhënësi i fushatës së zotit Trump, Steven Cheung.

Paraqitja do të shërbejë gjithashtu edhe për të pasqyruar një tjetër kontrast me guvernatorin e Floridës Ron DeSantis, i cili shihet si kundështari kryesor republikan i zotit Trump dhe që pritet që të nisë fushatën në javët e ardhshme.

Zoti DeSantis përgjithësisht i është shmangur mediave kryesore, por ka qenë i hapur ndaj rrjetit Fox News, që dikur përfaqësonte një media besnike të zotit Trump, por që tani ish presidenti e kritikon vazhdimisht.

Si kundërpërgjigje, ekipi i zotit Trump e ka kthyer vëmendjen ndaj mjeteve të reja të komunikimit, përfshirë podcast-e mjaft të dëgjuara nga republikanët, apo video për përdorim në mediat sociale që shpesh herë shihen nga mijëra përdorues.

Po ashtu, gazetarë nga një sërë mediash janë ftuar të udhëtojnë me avionin e tij. Ekipi ka organizuar një seri ndalesash që nuk janë bërë publike, në restorante lokale dhe vende të tjera, për të treguar se si ai ndërvepron me mbështetësit e tij, në dallim nga zoti DeSantis, që ngjall më pak frymëzim.

Mbetet e paqartë se si, apo nëse vendimi i ditës së martë, do të ketë ndonjë ndikim në garën presidenciale.

Ngritja e akuzave penale ndaj ish presidentit Trump në Nju Jork duket se deri tani ka përmirësuar pozicionin e tij tek republikanët, ndërsa kundërshtarët e tij kryesorë, i shmangën komentet të martën në mbrëmje, me disa përjashtime të vogla.

Ish-guvernatori i shtetit të Arkansasit, republikani Asa Hutchinson, një kritik i zëshëm i zotit Trump, i cilësoi akuzat “një tjetër shembull të sjelljes së pajustifikueshme të Donald Trumpit”.

Sipërmarrësi në fushën e teknologjisë Vivek Ramaswamy i doli në mbrojtje ish presidentit dhe ngriti dyshime, nëse rasti do të ishte gjykuar, nëse personi i akuzuar nuk do të kishte qenë Donald Trumpi.

Megjithatë, edhe përpara vendimit të djeshëm, bashkëbisedimi me qytetarët, që do transmetohet drejpërdrejt në CNN, ngjarja më e madhe televizive mbi zgjedhjet presidenciale të 2024, ka nxitur mëdyshje tek mbështetësit e të dy kaheve politike.

Demokratët kanë ngritur pikëpyetje nëse duhej t’i jepej hapësirë në kohën me të ndjekur televizive të rrjetit CNN njeriut që vazhdon të ngrejë pretendime të pavërtetuara për humbjen e tij në zgjedhjet e vitit 2020.

Republikanët nga ana tjetër pyesin se përse zoti Trump do të shfaqet në CNN, duke shtuar mundësitë për rritjen e besueshmërisë së rrjetit televiziv, të cilin ai zakonisht e ka shpërfillur duke e cilësuar si “rrjet i lajmeve të rreme”.

Një këshilltar i zotit Trump, i cili nuk ishte i autorizuar të fliste publikisht dhe foli në kushte anonimiteti, tha se drejtuesit e televizionit CNN arritën ta bindnin ish-presidentin gjatë negociatave.

Këshilltari gjithashtu vuri në dukje se zoti Trump shënoi sukses në vitin 2016 duke dalë edhe në media të tjera, veç atyre ku tradicionalisht dalin republikanët.

Përmes një një deklarate të postuar para vendimit të jurisë së Nju Njorkut, ish-presidenti u shpreh se televizioni CNN ishte “me të drejtë i dëshpëruar” që ai të dilte në ekranin e tij.

“Ata më bënë një ofertë, që nuk mund ta refuzoja!” shkroi ai në platformën Truth Social. “Mund të jetë fillimi i një CNN të ri, jo më me lajme të rreme, ose mund të kthehet në një katastrofë për të gjithë, duke përfshirë edhe mua. Le të shohim se çfarë do të ndodhë? Mbrëmjen e së mërkurës në orën 20:00!!!”

Zoti Donald Trump e ka abuzuar seksualisht ish-gazetaren dhe shkrimtaren E. Jean Carroll dhe më pas ka dëmtuar reputacionin e saj duke e quajtur gënjeshtare, në këtë përfundim dolën të martën 9 anëtarët e jurisë së Nju Jorkut, pasi peshuan për rreth tre orë argumentet dhe faktet lidhur me një padi civile kundër ish-presidentit.

Juria i hodhi poshtë pretendimet e zonjës Carroll se ajo ishte përdhunuar, por e gjetën zotin Trump përgjegjës për abuzim seksual dhe për shpifje ndaj zonjës Carroll pasi ajo i bëri publike akuzat e saj.

Ky i fundit pritet t’i paguajë zonjës Carroll një dëmshpërblim prej 5 milionë dollarësh.

Vendimi i jurisë vjen në një kohë kur zoti Trump po zhvillon fushatën për t’u rizgjedhur në krye të Shtëpisë së Bardhë.

Juria e përbërë nga gjashtë burra e tre gra mori një vendim unanim lidhur me rastin.

Ish-gazetarja dhe shkrimtarja E. Jean Carroll e akuzoi zotin Trump për përdhunim. Sipas saj, ngjarja ka ndodhur në një dyqan luksoz në Manhatan në vitin 1996.

Por zoti Trump e ka mohuar një gjë të tillë duke i cilësuar akuzat mashtrim. Ditën e hënë, gjatë paraqitjes së argumenteve mbyllëse, avokati i zotit Trump, Joe Tacopina, tha se historia e zonjës Carroll është shumë e dyshimtë për t’u besuar. Sipas zotit Tacopina, ajo e ka sajuar ngjarjen me qëllimin për të shitur një libër me kujtime të publikuar në vitin 2019, si dhe për të denigruar politikisht zotin Trump. Por të martën juria vendosi në favor të shkrimtares.

Në klimën e polarizuar politike që ekziston në vend, duket e pamundur që verdikti i jurisë të ketë ndikim tek mbështetësit kryesorë të zotit Trump, të cilët i shohin sfidat e tij ligjore, si pjesë të një përpjekjeje të bashkërenduar nga kundërshtarët e tij, për ta dëmtuar atë.

Zoti Donald Trumpi i ka quajtur pretendimet e shkrimtares se ai e kishte përdhunuar në një dyqan në Manhattan në mesin e viteve 1990, “historinë më qesharake dhe më të neveritshme”.

Komentet e tij u bënë në një deklaratë të paraqitur në gjykatë javën e kaluar. Ish-presidenti tha se akuzat ishin “të sajuara” dhe se sulmi nuk ndodhi kurrë. Avokatët e akuzueses E. Jean Carroll luajtën për rreth 30 minuta pjesë nga deponimi i zotit Trump, duke përfshirë mohimin e prerë të tij se e sulmoi atë në mesin e viteve 1990 në një dhomë zhveshjeje të dyqanit Bergdorf Goodman.

“Nëse do të kishte ndodhur, do të ishte raportuar brenda pak minutash,” thotë zoti Trump në deponimin e tij, duke pretenduar se blerësit dhe punonjësit në “dyqanin shumë të ngarkuar” do të kishin dëgjuar sulmin dhe do të kishin njoftuar autoritetet.

Këshilltari i lartë i Departamentit amerikan të Shtetit, Derek Chollet, tha të hënën në mbrëmje se ka biseduar me kryeministrin e Kosovës, Albin Kurti, për rëndësinë e themelimit të Asociacionit të komunave me shumicë serbe, për të cilin pritet të diskutohet të martën në mbrëmje në Bruksel, në takimin e nivelit të lartë politik, Kosovë – Serbi.

Zoti Chollet shkroi në Twitter se pati “një bisedë shumë të mirë me kryeministrin Kurti për takimin e 2 majit mbi normalizimin e marrëdhënieve me Serbinë në kuadër të bisedimeve të lehtësuara nga Bashkimi Evropian, rëndësinë e zbatimit të menjëhershëm të Asociacionit të komunave me shumicë serbe dhe partneritetin e fuqishëm ndërmjet Shteteve të Bashkuara dhe Kosovës”.

Kryeministri Kurti shkroi ndërkaq se me zotin Chollet është diskutuar rendi i ditës së takimit të së martës, ndërsa theksoi rëndësinë që marrëveshja bazë dhe pajtimi për zbatimin e saj “duhet të zbatohen në tërësi dhe në mirëbesim”.

Të martën presidenti i Serbisë, Aleksandar Vuçiç dhe kryeministri i Kosovës Albin Kurti, pritet të takohen në Bruksel në kuadër të bisedimeve për zbatimin e një marrëveshjeje të mbështetur nga perëndimi për normalizimin e marrëdhënieve ndërmjet të dyja vendeve.

Takimi që pritet të mbahet në orët e mbrëmjes është i pari i nivelit të lartë politik pas pajtimit në Ohër për rrugën e zbatimit të marrëveshjes që u arrit më 27 shkurt në Bruksel.

Bashkimi Evropian tha se pret që palët “të miratojnë Deklaratën për Personat e Zhdukur si pikë të parë të rendit të ditës, e cila do të pasohet nga prezantimi dhe diskutimi mbi projekt statutin e Asociacionit t ë Komunave me shumicë Serbe.

Projekt statuti thuhet të jetë harruar nga një ekip menaxhues i përbërë nga katër pjesëtarë të komunitetit serb, në mesin e të cilëve një deputete në parlamentin e Serbisë.

Ministri i Administrimit të Pushtetit Lokal në Kosovë, Elbert Krasniqi, shkroi se sipas një vendimi të vitit 2020 parashihet që Ekipi Menaxhues të bashkërendohet më ministrinë e tij dhe t’i raportojë asaj. Por, ky ekip, tha ai, nuk i është përgjigjur një ftese për takim.

Kryetari i Parlamentit të Kosovës, Glauk Konjufca, tha javën e kaluar se mos raportimi nga ana e ekipit menaxhues është qasje e papërgjegjshme ndaj institucioneve të vendit.

Beogradi thotë se kusht për kthimin e serbëve në institucionet e Kosovës por edhe zbatimin e marrëveshjes për normalizimin e marrëdhënieve është themelimi i Asociacionit të komunave me shumicë serbe. Për këtë arsye me 23 prill me kërkesën e Beogradit, votuesit serbë bojkotuan zgjedhjet e organizuara nga autoritetet e Kosovës në veriun e banuar më shumicë serbe.

Pas atyre zgjedhjeve, presidenti serb kritikoi ashpër zyrtarët perëndimorë, duke i quajtur ata gënjeshtarë dhe mashtrues dhe tha se pakica serbe në Kosovë nuk do të tolerojë më “pushtimin” e huaj.

Marrëveshja e mbështetur edhe nga Shtetet e Bashkuara, kërkon marrëdhënie të mira fqinjësore, njohje të dokumenteve dhe simboleve dhe respektim të sovranitetit dhe tërësisë tokësore të njëra tjetrës. Ajo kërkon që palët të mos pengojnë njëra tjetrën në proceset integruese, por nuk kërkon njohje të ndërsjellë. Plani parasheh edhe përmbushjen e të gjitha marrëveshjeve të arritura më parë në bisedimet e ndërmjetësuara nga Bashkimi Evropian, përfshirë atë për Asociacionin e komunave me shumicë serbe në Kosovë.

Zyrtarë të Bashkimit Evropian kanë thënë se Kosova dhe Serbia duhet të zbatojnë në tërësi marrëveshjen dhe çdo refuzim për ta bërë një gjë të tillë do të ketë pasoja negative.

Charles McGonigal, zyrtari i lartë në pension i FBI-së, i akuzuar tani për shkeljen e ligjeve të sanksioneve dhe për pastrim parash, është zhdukur kryesisht nga titujt kryesorë që nga akuza ndaj tij nga Departamenti i Drejtësisë pothuajse tre muaj më parë. Siç raportoi ky kontribues, skandali McGonigal, i cili përfaqëson një njollë serioze në reputacionin e Byrosë, përfshin shumë më tepër sesa lidhje të dyshimta me oligarkët rusë.

Çështja ka një dimension madhor ballkanik, që duket se është edhe më shpërthyes se këndi i Kremlinit. Ndërsa punonte për FBI-në, McGonigal e injektoi veten në politikën shqiptare, duke shërbyer si mjet i rëndë për qeverinë socialiste në pushtet atje, duke përfshirë kryeministrin e saj, Edi Rama. Përpjekjet e tij mund të kenë përfshirë një operacion për të zhvatur dhjetëra milionë dollarë nga biznesmenët shqiptarë në këmbim të ndihmës nga McGonigal për të qëndruar në mirësinë e Uashingtonit.

Ky aspekt ballkanik i skandalit të McGonigal ka marrë një mbulim të pakët në mediat amerikane, pavarësisht implikimeve shqetësuese për Shtëpinë e Bardhë, duke pasur parasysh lidhjet e ngushta mes administratës së Biden dhe qeverisë së Ramës. Në të kundërt, media shqiptare ka raportuar gjerësisht për këtë çështje të fëlliqur, nisur nga ndryshimet shpërthyese që përmban, veçanërisht sa i përket lidhjeve të socialistëve të Ramës dhe trafikut ndërkombëtar të drogës.

Kohët ndryshojnë dhe fakti i jashtëzakonshëm që dekada e qeverisjes së Ramës përkon me shndërrimin e Shqipërisë në vendin kryesor të kontrabandës së drogës në të gjithë Europën, po përflitet përtej Ballkanit. Tani që Mbretëria e Bashkuar ka një problem serioz me narkotrafikun shqiptar, mediat e tyre më në fund po venë re se gangsterët nga ai vend i vogël ballkanik janë bërë burimi i preferuar i Europës për narkotikët e paligjshëm. Në Ekuadorin e largët, media po vëzhgon se krimi i organizuar shqiptar dhe droga e tyre kanë bërë që problemi i dhunës në atë vend të Amerikës së Jugut të shkojë keq e më keq.

Siç ka raportuar Washington Examiner, administrata e Biden shfaq një ‘tolerancë të çuditshme’ për qeverinë Rama, pavarësisht përfshirjes së saj të fshehtë në tregtinë e drogës. Megjithatë, tani mund t’i vijë fundi. Skandali i McGonigal ka hapur derën e hetimeve reale të lidhjes drogë-krim-korrupsion të Shqipërisë dhe ato mund të zbulojnë më shumë sesa mund të tolerojë Shtëpia e Bardhë.

Mbi të gjitha, Shqipëria ka zgjedhjet që vijnë më 14 maj. Skandali i McGonigal ka zënë vend kryesor në diskutimet politike atje. Rama dhe qeveria e tij kanë tani një krizë në duart e tyre, e cila mund t’i rrëzojë ata pas një dekade në pushtet.

Vizita e Gabriel Escobar në mes të prillit për takime me politikanë të lartë të Shqipërisë mori vëmendje sepse ai është Zëvendës Ndihmës Sekretari i Shtetit, përgjegjës për çështjet në Ballkanin Perëndimor. Nuk ndodh çdo ditë që Uashingtoni të dërgojë kryediplomatin e saj në rajon për të kontrolluar Shqipërinë e vogël. Zyrtarisht kjo kishte të bënte vetëm me një biznes rutinë si ‘forcimi i demokracisë’ përpara zgjedhjeve.

Megjithatë, Escobar dukej jashtëzakonisht i barabartë në komentet e tij për mediat lokale. Siç u shpreh ai në një intervistë televizive, ‘vizita ime këtu nuk është absolutisht e lidhur me zgjedhjet lokale. Është pjesë e konsultimeve të rregullta që kemi me aleatët e ngushtë. Dhe Shqipëria është një aleate e ngushtë’.

Ai vazhdoi i pyetur për zgjedhjet e ardhshme: “Ne nuk jemi në gjendje të zgjedhim kandidatë apo anëtarë të partive politike. Marrëdhënia jonë me Shqipërinë është me popullin e Shqipërisë, jo me një parti dhe jo me një person”.

Është i vështirë të keqkuptohet komenti i Escobar, i cili e bën të qartë se, ndërkohë që administrata e Biden mund të preferojë të shohë Ramën dhe Partinë e tij Socialiste në pushtet, asgjë nuk do të ndryshojë mes Shteteve të Bashkuara dhe Shqipërisë, pavarësisht se kush fiton zgjedhjet.

Thashethemet shqiptare pretendojnë se vizita e Escobar përfshinte qartësimin e qëndrimit nga Departamenti i Shtetit për Ramën dhe qeverinë e tij. Pas padisë së McGonigal, Departamenti i Drejtësisë po shqyrton të gjitha lidhjet e huaja të personit të rënë nga FBI-ja, përfshirë Shqipërinë. Çdo hetim i tillë do të përplasej shpejt me lidhjet e qeverisë Rama me krimin e organizuar dhe tregtinë e drogës.

Kjo ka krijuar panik në qarqe të caktuara, dhe megjithëse është e lehtë të hedhësh poshtë thashethemet politike lokale, duket se përfshin disa të vërteta.

Nga burime të qeverisë amerikane kam kuptuar se komuniteti i inteligjencës, i cili ka vite që ka njohur lidhjet e pakëndshme të narkotrafikut të qeverisë Rama, posedon dosje të trasha sekrete që tregojnë këtë histori të pakëndshme.

Pëshpërimat nga Departamenti i Drejtësisë thonë se po hetohen lidhjet me Shqipërinë deri në nivelet më të larta.

Por ky hetim nuk synon vetëm Ramën. Departamenti i Drejtësisë thuhet se po shqyrton edhe socialistët kryesorë, përfshirë Erion Veliajn, kryebashkiak i kryeqytetit të vendit dhe një aleat i ngushtë i Ramës.

Lidhjet me reputacion të Veliajt me krimin e organizuar ndërkombëtar, lidhjet me trafikun e drogës dhe pastrimin e parave, janë raportuar, kështu që nuk është e habitshme që ai po vihet nën vëzhgimin e Uashingtonit.

Në një mënyrë tipike ballkanike, disa politikanë shqiptarë pretendojnë se Veliaj, duke nuhatur gjakun në ujë dhe duke e parë veten si pasaardhës të kryeministrit, po ndihmon fushatën e shtypit kundër Ramës.

Pavarësisht kësaj, skandali i McGonigal ka ndryshuar lojën në Shqipëri. Për një dekadë, Edi Rama ka shpëtuar duke e kthyer vendin e tij, aleat të NATO-s dhe SHBA, në një narkoshtet në Europë.

Duket se administrata e Biden më në fund është mbushur nga kjo marrëveshje e neveritshme. Do të dimë më shumë pas zgjedhjeve në Shqipëri pas dy javësh.

—–

John R. Schindler served with the National Security Agency as a senior intelligence analyst and counterintelligence officer.

Gazeta britanike, Daily Mail, publikoi sot një intervistë me Allison Guerriero, ish- e dashura e agjentit të FBI, Charles McGonigal.

Guerriero tregon në intervistë se si gruaja e McGonigal, Pamela, nisi të ekspozonte jetën e saj luksoze pas arrestimit të bashkëshortit.

Edhe pse i shoqi është nën akuzë për pastrim parash dhe shkelje të sanksioneve amerikane, sërish Pamela McGonigal nuk është ndalur në ekspozimin e jetës luksoze.

Megjithatë, Daily Mail sjell edhe një episod interesant. Ajo thotë se përpara arrestimit të McGonigal, e shoqja kishte bërë një postim ku tregonte se ishte ftuar në Shtëpinë e Bardhë.

“Vetëm shtatë javë përpara arrestimit të tij, gruaja e McGonigal postoi me krenari një foto të një ftese për mbërritjen zyrtare të presidentit francez, Emmanuel Macron në Shtetet e Bashkuara në dhjetor të vitit 2022. Ajo shkroi: “Isha shumë e lumtur që mora pjesë në ceremoninë e mbërritjes shtetërore të presidentit dhe zonjës Macron në Shtëpinë e Bardhë”. Ajo nuk thotë nëse burri i saj ishte me të”, shkruan gazeta.

Daily Mail shkruan se për dosjen ruse të oligarkut Oleg Deripaska, janë ngritur pesë akuza, secila me një dënim maksimal prej 20 vitesh burg.

“Prokuroria amerikane ka hapur një çështje të veçantë kundër McGonigal, duke pretenduar se ai ka pranuar 225 mijë dollarë nga një individe që ishte ish-agjent i inteligjencës për Shqipërinë. Dokumentet pretendojnë se mes gushtit 2017 dhe shtatorit 2018, ai fshehu marrëdhënien nga FBI.

Ai akuzohet se ka udhëtuar jashtë vendit me ‘individin me interesa biznesi në Europë’ dhe ka takuar shtetas të huaj.

Takimet përfshinin edhe takime informale me kryeministrin e Shqipërisë, si dhe me një ish-zyrtar të lartë shqiptar të punësuar në një konglomerat energjetik kinez.

McGonigal u deklarua i pafajshëm për akuzat e Deripaskës në Nju Jork dhe dy ditë më vonë u deklarua njësoj i pafajshëm në Uashington në çështjen e Shqipërisë”, shkruan gazeta.

Daily Mail tregon edhe për rastin kur Allison Guerriero gjeti një qese me dollarë në apartamentin e saj. Sipas saj, ishin 80 mijë dollarë.

“Mendova se paratë ishin për ndonjë aksion të FBI-së ose për ndonjë burim,” tha ajo. “Nuk e mendoja se ishin të tijat. U habita që ai kishte para të mëdha në apartament”. McGonigal, që u tërhoq nga FBI në vitin 2018, tha se i kishte fituar duke luajtur bixhoz në bejsboll.

Guerriero tha pas ndarjes së ajo i dërgoi një email shefit të McGonigal, me detaje të lidhjes dhe pretendimet për lidhjet e tij me Shqipërinë.

Ajo tha për Daily Mail se e fshiu atë email.

Denoncimi i Allison Guerriero: Gruaja e McGonigal nisi të ekspozonte jetën luksoze pas arrestimit të tij

NJU JORK – Fillimisht, ajo mendoi se po ta ndihmonte Donald Trumpin për të blerë veshje të brendshme grash në një dyqan luksoz do të ishte thjesht “diçka argëtuese në Nju Jork”.

Sipas E.Jean Carroll, madje edhe kur ish-sipërmarrësi e orientoi drejt dhomave të ndërrimit, ndërsa sfidonin njëri-tjetrin për të provuar një palë të brendshme transparente, ajo imagjinoi diçka të ngjashme me një skeç që kishte shkruar për emisionin humoristik “Saturday Night Live”.

Por shumë shpejt, “e gjithë arsyeja që isha gjallë në atë moment ishte për t’u larguar nga ajo dhomë”, dëshmoi zonja Carroll të mërkurën në gjyqin për padinë e saj për përdhunim.

“Jam këtu pasi Donald Trump-i më përdhunoi, dhe kur shkruajta për këtë, ai tha se nuk ka ndodhur. Ai gënjeu dhe dëmtoi reputacionin tim dhe unë jam këtu që të përpiqem të rifitoj jetën time”, u tha zonja Carroll anëtarëve të jurisë gjyqësore.

Ndërsa ajo u ul në bankinë ku shpesh u përlot, nga larg zoti Trump përsëriti këmbënguljen e tij se pretendimi i zonjës Carroll për një përdhunim në vitin 1996 është krejtësisht sajesë. Ai e quajti çështjen “një mashtrim i sajuar”.

“Kjo është një histori mashtruese & false – Gjueti Shtrigash!”, shkruajti zoti Trump në platformën e tij të mediave sociale, Truth Social. Komentet e tij e shtynë gjykatësin që të paralajmërojë avokatët e zotit Trump se ai mund t’i sjellë kështu vetes probleme të mëtejshme ligjore.

Ish-Presidenti Trump nuk ka marrë pjesë deri tani gjatë procesit gjyqësor, por avokatët e tij thanë të martën se ai ndoshta mund të vendosë të dëshmojë.

Gjyqi vjen ndërsa ish-presidenti po kërkon të marrë sërish nominimin republikan për të kandiduar për president, dhe disa javë pasi u vetëdeklarua i pafajshëm për akuza të tjera penale që kanë të bëjnë me pagesat për të fituar heshtjen e një aktoreje pornografike, e cila thotë se ka patur marrëdhënie seksuale me të.

Zonja Carroll, ish-autore 79 vjeçare e artikujve ku jepte këshilla, ishte pothuajse në rolin e dëshmitares. Pasi qau duke u thënë anëtarëve të jurisë se “të kem mundësinë të shfaqem në gjykatë do të thotë gjithçka për mua”, ajo e mblodhi veten me shpejtësi dhe nuk pranoi të bënte pushim.

“Nuk do të rri këtu duke qarë dhe të humbas kohën e të gjithëve”, tha ajo.

Zonja Carroll dëshmoi se u shkëmbye me zotin Trump tek dyert rrotulluese të dyqanit luksoz Bergdorf Goodman në mbrëmjen e një të enjteje në pranverën e vitit 1996. Në atë kohë, ajo po shkruante për revistën Elle, pasi kishte shkruar më parë edhe për emisionin e humorit “SNL”. Në atë kohë, zoti Trump ishte manjat i pasurive të patundshme dhe i njohur në rrethet sociale të Nju Jorkut.

Ajo tha se ai i kërkoi këshilla për të përzgjedhur një dhuratë për një grua, dhe se ajo ndihmoi me kënaqësi. Si një shkrimtare që ofronte këshilla, të merrte kërkesë nga zoti Trump për ta ndihmuar me dhuratat “ishte një mundësi e mrekullueshme”, dhe zonja Carroll mendoi se kështu do të dilte edhe me një histori argëtuese, tha ajo.

Ajo dëshmoi se pati sugjeruar një kapele, por se ai kishte anuar tek të brendshmet, dhe se shumë shpejt filluan të bënin humor për të brendshmet. E argëtuar dhe flirtuese, ajo vazhdoi lojën, duke qeshur edhe kur ai mbylli derën e dhomës së veshjes, ndoshta madje edhe kur e shtyu drejt murit.

Por në vazhdim, ai e përdhunoi, megjithë refuzimin e saj. Ajo arriti më në fund ta shtyjë me gjunj dhe u largua.

Zonja Carroll tha se për dekada të tëra, ajo u tregoi vetëm dy shoqeve pasi kishte frikë se zoti Trump do të hakmerrej, pasi ajo mendonte se ishte faji i saj dhe sepse mendonte se shumë njerëz fajësojnë viktimat e përdhunimit për atë që u ndodhi.

Ish-Presidenti Trump, 76 vjeç, ka thënë se nuk ka qenë në dyqan me zonjën Carroll dhe se nuk kishte dijeni se kush ajo ishte në momentin kur e bëri këtë histori publike për herë të parë.

Zonja Carroll pritet ta vazhdojë dëshminë edhe gjatë të enjtes, kur avokatët e zotit Trump do të kenë ndoshta mundësinë për t’i drejtuar asaj pyetje.

Të martën u hap procesi gjyqësor mbi pretendimin e ish-gazetares së revistës Elle. E. Jean Carroll se zoti Trump e përdhunoi atë para gati tre dekadash në dhomën e ndërrimit të një dyqani veshjesh. Përzgjedhja e jurisë u bë më herët të martën. Ish-presidenti thotë se mes tyre nuk ka ndodhur asgjë.

E. Jean Carroll do të dëshmojë para jurisë se sulmi që ndodhi brenda pak minutash në vitin 1996 “ia ndryshoi përgjithmonë jetën “, tha avokatja e saj, Shawn Crowley, në një deklaratë hapëse.

“E mbushur me frikë dhe turp, ajo heshti për dekada. Megjithatë, përfundimisht, heshtja u bë e pamundur, “tha avokatja Crowley duke shtuar se kur zonja Carroll e theu atë heshtje në libër autobiografik në vitin 2019, presidenti i atëhershëm “përdori platformën më të fuqishme në botë për të gënjyer për atë që kishte bërë, për të sulmuar integritetin e zonjës Carroll dhe për të fyer paraqitjen e saj”.

Gjyqi po mbahet në një gjykatë civile federale, që do të thotë se pavarësisht nga rezultati, zoti Trump nuk rrezikon të shkojë në burg. Atij madje nuk i kërkohet që të jetë i pranishëm në gjykatë dhe avokatët e tij kanë treguar se me shumë gjasa ai nuk do të dëshmojë.

Gjyqi vjen gjithashtu një muaj pasi zoti Trump u deklarua i pafajshëm në një çështje penale që lidhet me pagesat e bëra për të heshtur akuzat për marrëdhënie jashtëmartesore me dy gra.

Gjyqi do të përfshijë gjithashtu pretendimin për shpifje të zonjës Carroll kundër ish presidentit Trump për komentet nënçmuese që ai bëri për të në përgjigje të akuzave për përdhunim.

Ajo thotë se pasi u takua rastësisht me zotin Trump në dyqanin Bergdorf Goodman të Manhatanit, ai i kërkoi asaj ta ndihmonte për të blerë të brendshme femrash si dhuratë. Ajo thotë se ata filluan të ngacmonin njëri-tjetrin për të provuar të brendshmet e grave.

Zonja Carroll thotë se ata përfunduan vetëm në dhomën e zhveshjes së dyqanit, ku zoti Trump e shtyu atë pas një muri dhe e përdhunoi para se ajo ta luftonte dhe të ikte.

Që kur ajo i bëri akuzat për herë të parë në librin autobiografik në vitin 2019, zoti Trump e ka kundërshtuar fuqishëm akuzën për përdhunim. Ai tha se as nuk e njihte zonjën Carroll, ish bashkëpunëtore për një kohë të gjatë e revistës “Elle”.

Anëtarët e jurisë pritet të dëgjojnë dëshminë edhe të dy grave të tjera që thonë se janë sulmuar seksualisht nga ish presidenti Trump.

Jessica Leeds do të dëshmojë se zoti Trump u përpoq të fuste dorën nën fustanin e saj gjatë një fluturimi në vitin 1979 derisa ishin të ulur pranë njëri tjetrit. Ajo thotë se nuk ishte përzgjedhja e saj të ulet afër tij.

Natasha Stoynoff, ish-gazetare e revistës People, do të dëshmojë se ish presidenti e shtyu atë pas një muri dhe e puthi me forcë në rezidencën e tij në Florida, kur ajo shkoi atje më 2005 për të intervistuar zotin Trump dhe gruan e tij Melania Trump, e cila në atë kohë ishte shtatzënë.

Emrat e anëtarëve të jurisë do t’i fshihen publikut dhe avokatëve, për t’i mbrojtur nga ngacmimet e mundshme.

Gjykatësi Lewis A. Kaplan, i cili do të kryesojë gjyqin, refuzoi një kërkesë të avokatëve të zotit Trump që anëtarëve të jurisë t’u thuhej se ish-presidenti donte t’ia kursente qytetit përçarjen që mund të shkaktonte prania e tij.

Zoti Kaplan vuri në dukje se ish presidenti ka një ngjarje të fushatës parazgjedhore në Nju Hempshër të planifikuar për të enjten, ditën e tretë të gjyqit.

“Nëse Shërbimi Sekret mund ta mbrojë atë në atë aktivitet, sigurisht që Shërbimi Sekret, Shërbimi i Marshallëve dhe Qyteti i Nju Jorkut mund të kujdesen për sigurinë e tij në këtë gjykatë federale shumë të sigurt”, shkroi gjykatësi Kaplan në një urdhër.

Ish presidenti mund të vendosë të marrë pjesë në gjyq. Nëse ai nuk shkon, juria mund të shohë fragmente nga marrja në pyetje e tij, e cila u regjistrua në video.

Presidenti i Shteteve të Bashkuara, Joe Biden, njoftoi se do të garojë në zgjedhjet presidenciale të vitit 2024.

Ai këtë njoftim e bëri përmes një videoje promovuese.

Në videon prej tre minutash, Biden, presidenti i 46-të i SHBA-së, tha se të drejtat e abortit, mbrojtja e demokracisë, të drejtat e votimit dhe siguria sociale do të jenë çështjet më kryesore gjatë garës presidenciale të vitit 2024.

Ai tha se votuesit do të përballen me zgjedhjen mes asaj nëse gjenerata e re do të ketë “më shumë apo më pak liri”dhe “më shumë apo më pak të drejta”.

“Çdo gjeneratë e amerikanëve është përballur me një moment kur janë dashur të mbrojnë demokracinë, të ngrihen për të drejtat e tyre personale, të ngrihen për të drejtat e votimit dhe të drejtat civile. Ky është momenti ynë”, tha Biden.

Për dallim nga slogani i fushatës zgjedhore të vitit 2020, kur Biden tha se amerikanët ishin “në betejë për shpirtin” e kombit, slogani për zgjedhjet e vitit 2024 thotë: “Le ta çojmë punën deri në fund”.

Nëse rizgjidhet, Biden do të ishte 86-vjeçar në fund të mandatit të dytë presidencial. Ai pritet të përballet me një garë të lehtë brenda partisë së tij, pasi nuk ka rivalë seriozë në mesin e Partisë Demorkatike. Megjithatë, ai ka një detyrë të vështirë për të vazhduar që të mbajë mandatin presidencial në një shtet të ndarë.

“Liria, liria personale është thelbësore për ne amerikanët. Nuk ka asgjë më të rëndësishme, asgjë më të shenjtë”, tha Biden në video-adresim.

Biden e përshkroi Partinë Republikane si “ekstremiste”, që sipas tij po tenton të heqë qasjen në të drejtën për abort, në sigurinë sociale, të kufizojë të drejtat e votimit dhe të ndalojë librat me të cilët ata nuk pajtohen.

“Në mbarë vendin, ekstremistët MAGA [mbështetësit e ish-presidentit amerikan, Donald Trump] janë rreshtuar për të na i hequr liritë”, tha Biden.

Ish-presidenti amerikan, Donald Trump, më herët ka shpallur kandidaturën e tij për garën presidenciale. Trump kishte humbur garën zgjedhore ndaj Bidenit më 2020.

Lajmi është duke u përditësuar

Raketa e re gjigante ‘Starship’, prodhuar nga kompania ‘SpaceX’, shpërtheu të enjten në fluturimin e saj të parë provë. Shpërthimi i raketës pa ekuipazh ndodhi disa minuta pasi u ngrit nga platforma e lëshimit. Më pas ajo ra në ujërat e gjirit të Meksikës.

Kompania e ‘SpaceX’ e Elon Musk-ut, synonte ta dërgonte raketën 120 metra të gjatë, në një udhëtim rreth botës, që do të niste nga pjesa jugore e Teksasit, pranë kufirit me Meksikën. Raketa ishte pa ekuipazh apo satellitë në të.

Pritej që disa minuta pas ngritjes raketa të shkëputej nga platforma shtytëse e saj, gjë që nuk ndodhi. Raketa filloi të bjerë dhe 4 minuta nga nisja e fluturimit, shpërtheu, duke u rrëzuar në oqean.

Kompania kishte në plan ta përdorë raketën kozmike ‘Starship’ për të dërguar njerëz dhe ngarkesë në Hënë, dhe me vonë edhe në Mars. NASA pritet të përdorë një raketë të tillë, ‘Starship’, për ekipin e saj të ardhshëm që pritet të shkelë në Hënë. Tashmë njerëz të pasur, të cilët duan të vizitojnë Hënën, po rezervojnë bileta.

‘SpaceX’ tentoi ta nisë raketën në fillim të javës, por lëshimi u anulua për shkak të disa problemeve teknike.

Raketa ‘Starship’ është shumë e fuqishme dhe tejkalon me lehtësi raketat hënore të NASA-s. Ajo është projektuar që të jetë plotësisht e ripërdorshme, gjë që ka ulur në mënyrë dramatike koston e prodhimit të tyre.

Presidenti i Shteteve të Bashkuara të Amerikës, Joe Biden, tentoi t’i zbusë shqetësimet lidhur me rrjedhjen e supozuar të dokumenteve të klasifikuara amerikane javën e kaluar. Ndërkohë, mediat amerikane raportojnë se një arrestim lidhur me këtë rast pritet të bëhet së shpejti në shtetin e Masaçusets.

Biden tha se rrjedhja e këtyre dokumenteve – ku jepen detaje rreth aftësive ushtarake të disa aleatëve dhe kundërshtarëve të SHBA-së – nuk zbuloi asgjë shumë të vlefshme.

Departamenti amerikan i Drejtësisë ka hapur një hetim zyrtar për këtë çështje pasi iu referua ky rast nga Pentagoni, që po vazhdon të punojë në vlerësimin e dëmeve të shkaktuara nga rrjedhja e dokumenteve.

Mediumi amerikan Washington Post raportoi më 12 prill se personi që dyshohet se publikoi dokumentet në platformën për komunikim Discord, ishte një entuziast i armëve i cili punonte në një bazë ushtarake. Ky medium raportoi duke u bazuar në intervista të bëra me dy anëtarë të këtij grupi të paidentifikuar.

Dokumentet thuhet se u postuan muaj më parë, por nuk tërhoqën vëmendje deri kur mediumi amerikan The New York Times raportoi për këto dokumente.

Wall Street Journal (WSJ) dhe Reuters, duke u thirrur në burime, raportuan se një arrestim lidhur me këtë rast është i pashmangshëm. WSJ shkruan se arrestimi mund të bëhet qysh të enjten, më 13 prill.

“Po zhvillohet një hetim i plotë, siç e dini, në komunitetin e inteligjencës dhe Departamentin e Drejtësisë. Dhe ata po afrohen”, u tha Biden gazetarëve në Dublin më 13 prill, duke komentuar për herë të parë publikisht pas rrjedhjes së dokumenteve.

Biden, i cili është duke e bërë një vizite katër-ditore në Irlandën e Veriut dhe Republikën e Irlandës, shtoi se ai “nuk është i shqetësuar për rrjedhjen”.

Më herët, Shtëpia e Bardhë tha se Biden nuk diskutoi për këtë çështje gjatë takimit të kësaj jave me kryeministrin britanik, Rishi Sunak, në Irlandën e Veriut.

Numri i dokumenteve të zbuluara, disa prej të cilave thuhet se shënoheshin me etiketën “top sekret”, nuk është i ditur.

Ato supozohet se përfshijnë informacione të ndjeshme rreth Ukrainës, Koresë së Jugut, Izraelit dhe shumë vendeve të tjera. Administrata e Bidenit ka frikë se rrjedhja e informacionit mund t’i dëmtojë marrëdhëniet e SHBA-së me aleatët kryesorë dhe partnerët strategjikë të saj.

Grupi në Discord dyshohet se përfshinte njerëz nga Rusia dhe Ukraina, sipas mediumit, dhe ishte i fokusuar në një “dashuri reciproke për armët, pajisjet ushtarake dhe Zotin”. Platforma Discord është e famshme në mesin e adhuruesve të video lojërave online.

Personi që postoi dokumentet, i cili përdorte një llogari me nofkën OG, dyshohet se u tha anëtarëve të grupit se ndonjëherë punonte në një pjesë të bazës ushtarake “që ndalonte telefonat celularë dhe pajisjet e tjera elektronike”.

Zëvendësministrja e Mbrojtjes e Ukrainës, Hanna Malyar, tha në televizionin ukrainas më 12 prill se “rreziku i rrjedhjeve është shumë minimal” sepse vetëm një “rreth shumë i ngushtë njerëzish” është në dijeni të planifikimeve ushtarake ukrainase.

Zyrtarët amerikanë po punojnë për identifikimin e burimit të dokumenteve të klasifikuara ushtarake dhe të shërbimeve të zbulimit, që u shfaqën në internet, me detaje nga mbrojtja ajrore e Ukrainës, deri te agjencia izraelite e inteligjencës, Mossad.

Disa ekspertë perëndimorë të sigurisë dhe zyrtarë amerikanë thonë se dyshojnë se mund të jetë dikush nga Shtetet e Bashkuara që i ka nxjerrë dokumentet sekrete.

Zyrtarët thonë se gjerësia e temave të trajtuara në dokumente, të cilat prekin luftën në Ukrainë, Kinën, Lindjen e Mesme dhe Afrikën, sugjerojnë se ato mund të jenë nxjerrë nga një amerikan dhe jo nga një vend aleat.

“Vëmendja tani është përqendruar tek mundësia që kjo të jetë një rrjedhje nga SHBA-të, pasi shumë nga dokumentet kanë qenë në duart e amerikanëve”, thotë Michael Mulroy, ish-zyrtar i lartë i Pentagonit.

Zyrtarët amerikanë thanë se hetimi është në fazat e hershme dhe ata që e drejtojnë atë nuk e kanë përjashtuar mundësinë që elementë pro-rusë të jenë pas rrjedhjes. Kjo shihet si një nga shkeljet më serioze të sigurisë që nga koha kur mbi 700,000 dokumente, video dhe raporte diplomatike, u shfaqën në faqen e internetit “WikiLeaks” më 2013.

Pas zbulimit të dokumenteve, agjencia e lajmeve “Reuters” ka shqyrtuar më shumë se 50 dokumente të etiketuara “Sekret” dhe “Tepër Sekret” që u shfaqën për herë të parë muajin e kaluar në rrjetet sociale, duke filluar me ‘Discord’ dhe ‘4Chan’.

Reuters nuk ka arritur të verifikojë në mënyrë të pavarur vërtetësinë e dokumenteve. Disa, që japin shifra të viktimave në fushën e betejës nga Ukraina, duket se ishin ndryshuar për të minimizuar humbjet ruse.

Nuk është e qartë pse të paktën njëri dokument është shënuar i paklasifikuar, por përfshin informacione tepër sekrete. Disa dokumente janë të shënuara “NOFORN”, që do të thotë se ato nuk mund t’u jepen shtetasve të huaj.

Departamenti amerikan i Mbrojtjes tha të dielën se agjenci të shumta po punojnë për të vlerësuar ndikimin e rrjedhjes së dokumenteve tepër sekrete tek siguria kombëtare.

“Departamenti i Mbrojtjes vazhdon të shqyrtojë vlefshmërinë e dokumenteve që qarkullojnë në faqet e rrjeteve sociale dhe që duket se përmbajnë materiale të ndjeshme dhe tepër sekrete”, tha në një deklaratë zëdhënësja e Pentagonit, Sabrina Singh.

Zonja Singh tha se siguria kombëtare është përparësia më e lartë për Pentagonin dhe se zyrtarët amerikanë janë “angazhuar me aleatët dhe partnerët dhe kanë informuar komisionet përkatëse të Kongresit për zbulimin”.

Një nga dokumentet, i datës 23 shkurt dhe i shënuar “Sekret”, përshkruan në detaje se si Ukraina, me normën aktuale të përdorimit, rrezikon të mbesë pa sisteme të mbrojtjes ajrore deri më 2 maj.

Një informacion i tillë mund të jetë i dobishëm për forcat ruse dhe Ukraina tha se presidenti i saj dhe zyrtarët e lartë të sigurisë u takuan të premten për të diskutuar mënyrat për të parandaluar rrjedhjet.

Vëzhgimi i aleatëve

Një dokument tjetër, i shënuar “Tepër Sekret” nga një informacion i mbledhur nga Agjencia Qëndrore e Inteligjencës (CIA) që mban datën 1 mars, thotë se shërbimi sekret i Izraelit “Mossad” po inkurajonte protesta kundër planeve të kryeministrit Benjamin Netanyahu për të forcuar kontrollin mbi Gjykatën e Lartë të Izraelit.

Dokumenti vinte në dukje se SHBA-të e siguruan këtë informacion përmes një mënyre që sugjeron se Shtetet e Bashkuara kishin spiunuar një nga aleatët e saj më të rëndësishëm në Lindjen e Mesme.

Në një deklaratë të publikuar të dielën, zyra e kryeministrit Netanyahu e cilësoi informacionin si “të pavërtetë dhe pa asnjë bazë”.

Një dokument tjetër jep detaje të diskutimeve të brendshme midis zyrtarëve të lartë të Koresë së Jugut në lidhje me presionin e SHBA-së mbi Seulin, për të ndihmuar furnizimin me armë të Ukrainës dhe politikën e saj për të mos e bërë këtë.

Një zyrtar presidencial i Koresë së Jugut tha të dielën se vendi ishte në dijeni të raporteve në lidhje me dokumentet e klasifikuara dhe se planifikon të diskutojë “çështjet e ngritura” me Uashingtonin.

Dy zyrtarë amerikanë, duke folur në kushte anonimiteti, thanë se ndërsa ekzistonte shqetësimi për rrjedhjen në Pentagon dhe agjencitë e inteligjencës, dokumentet flasin për atë se si ishte situata para më shumë se një muaji dhe ato nuk përmbajnë vlerësimet më të fundit.

Dy zyrtarët thanë se ushtria dhe agjencitë e inteligjencës po hulumtonin proceset e tyre për të kuptuar se deri në çfarë niveli shpërndahen informacionet e klasifikuara brenda SHBA-së.

Zyrtarët po shikojnë se çfarë motivesh do të kishte një zyrtar amerikan ose një grup zyrtarësh për të nxjerrë informacione të tilla të ndjeshme, tha një nga zyrtarët që foli për Reuters.

Ai tha se hetuesit po shikonin katër ose pesë teori, që nga mundësia e një punonjësi të pakënaqur, deri tek një kërcënim i brendshëm, që në mënyrë aktive donte të minonte interesat e sigurisë kombëtare të SHBA.

Presidenti Joe Biden tha të hënën se ka në plan të rikandidojë në zgjedhjet presidenciale të vitit 2024, por nuk është ende gati ta shpallë zyrtarisht vendimin.

“Kam në plan të kandidoj, por nuk jemi ende gati ta shpallim një vendim të tillë”, tha Presidenti Biden në një intervistë për emisionin “Today” të rrjetit televiziv NBC-së, përpara një aktiviteti në Shtëpinë e Bardhë lidhur me festën e Pashkëve.

Si Presidenti Biden ashtu edhe Nënpresidentja Kamala Harris kanë thënë se do të kandidojnë së bashku.

Këshilltarët kryesorë të Shtëpisë së Bardhë pritet të marrin vendimin përfundimtar për nisjen e fushatës për rizgjedhje të zotit Biden, njoftoi ‘NBC News’, duke cituar disa burime të paidentifikuara.

“Vendimi është marrë, por atij nuk i pëlqen trysnia që po i bëhet për ta shpallur një vendim që ai tashmë e ka marrë”, tha një burim në dijeni të çështjes për rrjetin NBC.

Kryetari i Dhomës së Përfaqësuesve, Kevin McCarthy, u takua të mërkurën me Presidenten e Tajvanit, Tsai In-wen, në Kaliforni, dhe e quajti atë “një mike të madhe të Amerikës”.

Në fillim të takimit të tyre, zoti McCarthy tha se “jam optimist se do të vazhdojmë të gjejmë mënyra për popullin e Amerikës dhe të Tajvanit që të punojmë së toku për të mbështetur lirinë ekonomike, demokracinë, paqen dhe stabilitetin”.

Zonja Tsai u përgjigj duke thënë se “jemi më të fortë kur punojmë së bashku”.

Por, ajo edhe paralajmëroi se rreziqet ushtarake nga Kina, e cila e konsideron Tajvanin pjesë të territorit të saj, “nuk duhen nënvlerësuar”. Ajo tha se Tajvani kërkon “një status quo paqësore” dhe se “kërkon të bëhet një partner i qëndrueshëm për botën”.

Bisedimet e planifikuara kanë ngjallur kundërshtimin nga Kina. Pekini njoftoi një operacion të përbashkët lundrimi dhe patrullimi në pjesën veriore dhe qendrore të ngushticës së Tajvanit, ndërsa Ushtria Çlirimtare Popullore tha se kishte vendosur dy destrojerë dhe një fregatë në Detin e Kinës Lindore për të bërë stërvitje me municion luftarak.

Operacionet mendohet se janë një ndëshkim për Tajvanin për dy ndalesat e presidentes në Shtetet e Bashkuara, në më pak se një javë.

Autoritetet kineze nuk dhanë hollësi për operacionin në ngushticën e Tajvanit, apo nëse marina kineze do të dërgonte edhe anije vëzhgimi.

Ligjvënësi Hakeem Jeffries, udhëheqësi i pakicës demokrate në Dhomën e Përfaqësuesve, tha se u takua me zonjën Tsai javën e kaluar në Nju Jork.

“Patëm një bisedë shumë frutdhënëse rreth sigurisë së ndërsjellë dhe interesave ekonomike mes Amerikës dhe Tajvanit”, tha Ligjvënësi Jeffries. “Diskutuam gjithashtu për përkushtimin tonë të përbashkët për demokracinë dhe lirinë”.

Ligjvënësi Jeffries tha në një deklaratë se takimi i tij me zonjën Tsai “është në përputhje me, dhe nuk përfaqëson asnjë devijim nga, marrëdhënia jozyrtare e gjatë midis Shteteve të Bashkuara dhe Tajvanit”. Shtetet e Bashkuara kanë politikën e “një Kine”, e cila pranon se Pekini e konsideron Tajvanin si pjesë të Kinës. Por megjithatë, Shtetet e Bashkuara dërgojnë ndihma ushtarake në ishullin e vetëqeverisur për ta ndihmuar atë të mbrohet.

Presidenti amerikan Joe Biden ka thënë shpesh se Shtetet e Bashkuara do ta mbronin ushtarakisht Tajvanin nëse Kina do ta sulmonte atë, megjithëse Shtetet e Bashkuara ka shtuar gjithashtu me shpejtësi se politika e “një Kine” nuk ka ndryshuar.

Zonja Tsai nuk e ka vizituar Uashingtonin dhe ka thënë se po kalon tranzit nëpër Shtetet e Bashkuara, me dy ndalesat e saj në kuadrin e një vizite në vende aleate në Amerikën Qendrore, në Guatemala dhe Belize. Hondurasi kohët e fundit njoftoi se po ndërpret lidhjet me Tajvanin në shenjë mbështetjeje ndaj Kinës.

Vitin e kaluar, zonja Tsai priti Kryetaren e atëhershme të Dhomës së Përfaqësuesve, Nancy Pelosi në Tajvan dhe Kina reagoi duke organizuar stërvitjet më të mëdha ushtarake me municion luftarak prej dekadash përreth Tajvanit.

Konsullata e Kinës në Los Anxhelos tha përpara takimit të së mërkurës se zonja Tsai po angazhohej në bisedime të tilla për të “bërë teatër politik”.

Jerome Cohen, ish-profesor në Shkollën Juridike të Universitetit të Nju Jorkut, i tha Zërit të Amerikës se duke u takuar me zotin McCarthy në Kaliforni, zonja Tsai mori një rrugë më diplomatike sesa pritja e zotit McCarthy në Tajvan që mund të provokonte llojin e përgjigjes që Kina bëri për vizitën e zonjës Pelosi.

“Nuk duhet të ketë baza për një reagim të fortë të Pekinit”, i tha zoti Cohen shërbimit në gjuhën kineze të Zërit të Amerikës. “Kjo e bën Republikën Popullore të Kinës të duket shumë keq dhe e papjekur në një kohë kur Pekini dhe Uashingtoni duhet të përpiqen të bashkohen për të përmirësuar marrëdhëniet, jo për t’i përkeqësuar ato”.

Robert Ross, profesor i shkencave politike në Kolegjin e Bostonit, i tha Zërit të Amerikës se takimi i së mërkurës nuk synon domosdoshmërisht të japë ndonjë rezultat konkret.

“Për Tsai Ing-wen, kjo ka të bëjë thjesht me vendosjen e një pranie në botë, vendosjen e pranisë së saj si udhëheqëse e Tajvanit dhe suksesin e saj për t’u takuar me udhëheqësit amerikanë”, tha zoti Ross.

“Për Kryetarin, objektivi i tij është të vendosë kredencialet e tij si një mbështetës i Tajvanit dhe si dikush që kundërshton Kinën. Takimi me presidenten e Tajvanit i mundëson atij që të thotë: ‘Unë po i rezistoj Kinës’. Ata nuk duan që unë ta bëj këtë, por unë do ta bëj gjithsesi”.

* Disa nga të dhënat për këtë artikull u morën nga agjencitë e lajmeve Associated Press, Agence France-Presse dhe Reuters.

Ish-presidenti i Shteteve të Bashkuara të Amerikës, Donald Trump, është deklaruar i pafajshëm lidhur me 34 akuza për vepra penale për falsifikim të regjistrave biznesorë, në një gjykatë në Manhatan të Nju Jorkut të martën, 4 prill.

Teksa largohej nga salla e gjyqit, Trump nuk bëri asnjë koment dhe injoroi pyetjet e gazetarëve, edhe pse atij nuk i është kërkuar të qëndrojë i heshtur lidhur me rastin.

Prokurori i rastit, Alvin Bragg, tha se Trump i ka falsifikuar vazhdimisht regjistrat biznesorë për të fshehur krimet e kryera si pjesë e “komplotit për të minuar integritetin e zgjedhjeve të 2016-ës”.

Në aktakuzën e publikuar online thuhet se Trump akuzohet për “falsifikim të të dhënave të biznesit në Nju Jork për të fshehur informacione të dëmshme dhe aktivitete të paligjshme nga votuesit amerikanë para dhe pas zgjedhjeve të vitit 2016”.

“Trump më pas bëri përpjekje të mëdha për ta fshehur këtë sjellje, duke shkaktuar dhjetëra regjistra të rreme në të dhënat e biznesit për të fshehur aktivitetin kriminal, përfshirë këtu përpjekjet për t’i shkelur ligjet e zgjedhjeve shtetërore dhe federale”, thuhet më tutje.

Në aktakuzë thuhet se ishin bërë pagesa prej 30 mijë dhe 150 mijë dollarësh ndaj një ish-roje të Kullës Trump, i cili pretendonte se kishte një histori për një fëmijë që Trump e kishte jashtë martese, dhe për një një grua që pretendonte se kishte një marrëdhënie seksuale me Trump.

Ndërsa gjykatësi Juan Merchan bëri të ditur se seanca e radhës gjyqësore do të mbahet më 4 dhjetor të këtij viti.

Së bashku, këto akuza mbartin një dënim maksimal prej 136 vjet burgim, sipas ligjit të Nju Jorkut. Por, nëse ai dënohet në një gjyq, dënimi raportohet se do të ishte shumë më i vogël se kaq, sipas agjencisë së lajmeve Reuters.

Akuzat u ngritën pas një hetimi lidhur me një pagesë që ai dyshohet t’ia ketë bërë yllit të pornografisë, Stormy Daniels, në përpjekje e sipër për ta blerë heshtjen e saj, gjatë fushatës presidenciale të vitit 2016, për një aferë të supozuar.

Pagesa besohet se është kryer në mënyrë të ligjshme, mirëpo supozohet se Trump e ka regjistruar atë si shpenzim biznesor. Falsifikimi i regjistrave biznesorë përbën shkelje në Nju Jork.

Shtëpia e Bardhë nuk ka pranuar t’i komentojë këto zhvillime.

“Ky është një rast në zhvillim dhe ne nuk do ta komentojmë,” tha sekretarja e shtypit Karine Jean-Pierre. “Presidenti do të përqendrohet te populli amerikan, siç bën çdo ditë”.

Gjatë rrugëtimit të tij, pak para se të arrinte në gjykatë, Trump postoi në platformën e tij “Truth Social”.

“Duke u nisur për në Manhatin e Poshtëm, në ndërtesën e Gjykatës. Duket kaq SURREALE – UA, ata do të më arrestojnë. Nuk mund ta besoj se kjo po ndodh në Amerikë”, shkroi Trump.

Trump, 76-vjeçar, është ish-presidenti i parë amerikan që përballet me akuza penale.

Ish-presidenti republikan, i cili ka mohuar keqbërjen, e ka quajtur aktakuzën “persekutim politik” dhe ka parashikuar se kjo do t’i dëmtojë demokratët në zgjedhjet e vitit 2024.

Avokatët e Trump kanë thënë se ish-presidenti “nuk ka kryer asnjë krim” dhe se ata “do ta luftojnë fuqishëm këtë ndjekje politike në gjykatë”.

Ndërkohë, në qytet u mbajt një tubim në shenjë përkrahje për Donald Trump, i organizuar nga përfaqësuesja republikane e Dhomës së Përfaqësuesve, Marjorie Taylor Greene.

Greene argumentoi se Trump “po i bashkohej disa prej njerëzve më të mrekullueshëm në histori [duke u] arrestuar sot”.

“Nelson Mandela u arrestua, u vu në burg. Jezusi u arrestua dhe u vra nga qeveria romake”, tha ajo.

Akuzat penale me të cilat përballet zoti Donald Trump në Nju Jork rrjedhin nga tre raste të veçanta, ku ish-presidenti dhe bashkëpunëtorët e tij akuzohen se kanë bërë pagesa për të blerë heshtjen e tre individëve gjatë fushatës së tij presidenciale në vitin 2016.

Pagesat, thotë aktpadia, u bënë për të blerë heshtjen e dy grave që pretendojnë se kanë patur marrëdhënie intime me zotin Trump, shumë vite më parë, dhe një pagesë për të blerë heshtjen e një punonjësi të kullës Trump i cili pretendonte se zoti Trump kishte një fëmijë në një lidhje jashtëmartesore.

Zoti Trump është akuzuar për 34 vepra penale të falsifikimit të të dhënave të biznesit. Më herët të martën ai u dorëzua pranë autoriteteve në Nju Jork dhe deklaroi se ishte i pafajshëm ndaj të gjitha akuzave.

Prokurori i Qarkut të Manhatanit, Alvin Bragg, tha gjatë një konference shtypi se rasti historik i zyrës së tij kundër ish-Presidentit Donald Trump synon të “sigurojë që të gjithë janë të barabartë përpara ligjit”, ndërsa bëri të njohura akuzat.

RASTI I PUNONJËSIT NË KULLËN TRUMP

Fillimisht, prokurori Bragg foli për rastin që përfshinte një ish-portier të kullës Trump, i cili ishte paguar 30,000 dollarë pasi ai pretendonte se kishte të dhëna që zoti Trump kishte një fëmijë në një lidhje jashtëmartesore.

Ish-punonjësi Dino Sajudin u pagua nga kompania mëmë e tabloidit “National Enquirer” në këmbim të nënshkrimit mbi të drejtat e përhershme (të lajmit të shitur nga ai) lidhur me thashethemet se presidenti kishte një fëmijë me një punonjëse në “Trump World Tower”, një gradaçielë në pronësi të zotit Trump që ndodhet pranë Kombeve të Bashkuara.

Në bazë të kontratës mes zotit Sajudin dhe firmës “American Media Inc.”, zoti Sajudin nuk mund të flasë për thashethemet apo kushtet e marrëveshjes së tij ose përndryshe duhet të paguajë një milion dollarë.

Në një intervistë me agjencinë e lajmeve Associated Press në gusht të vitit 2017, gruaja në qendër të thashethemeve mohoi të kishte pasur lidhje me zotin Trump.

KAREN MCDOUGAL

Prokurori përmendi gjithashtu edhe rastin e ish-modeles së revistës “Playboy”, Karen McDougal, e cila mori 150,000 dollarë nga firma “American Media Inc.”, pasi pretendoi se kishte një lidhje 10-mujore me zotin Trump në mesin e viteve 2000.

Paratë ishin për të blerë të drejtat e lajmit nga aktorja McDougal, por në fakt që të mos publikohej kurrë, një praktikë e njohur si “kap dhe asgjeso”, tha prokurori.

Kompania mëmë e tabloidit “National Enquirer” e ka pranuar se pagesat janë bërë posaçërisht për të ndihmuar fushatën presidenciale të zotit Trump.

Prokurori Bragg tha se zoti Trump i tha “në mënyrë eksplicite” avokatit Michael Cohen, i cili më parë punonte për Organizatën Trump, që të rimbursonte me para kesh firmën “American Media Inc.”. Më pas, avokati Cohen i sugjeroi zotit Trump se pagesa duhet të bëhej nga një kompani guaskë.

Marrëdhëniet e supozuara mes aktores McDougal dhe zotit Trump u mbajtën të fshehta deri pas publikimit të një shkrimi nga gazeta “Wall Street Journal”, disa ditë përpara zgjedhjeve të vitit 2016. Zoti Trump i ka hedhur poshtë pretendimet e saj.

STORMY DANIELS

Rasti i tretë përfshin aktoren e filmave pornografikë, Stormy Daniels, e cila u pagua 130,000 dollarë në këmbim të heshtjes së saj, për siç thuhet, një takim intim me zotin Trump në Liqenin Taho të Nevadës në vitin 2006. Trump i ka hedhur poshtë akuzat.

Prokurori Bragg tha se 12 ditë përpara zgjedhjeve më 8 nëntor 2016, avoakti Cohen i kishte dërguar 130,000 dollarë avokatit të aktores Daniels duke përdorur një korporatë guackë të financuar përmes një banke në Manhatan.

Aktorja e filmave pornografikë, emri i vërtetë i së cilës është Stephanie Clifford, u pagua pasi njoftoi se ishte e gatshme të fliste ose me tabloidin “National Enquirer” ose në televizion, për të konfirmuar takimin intim.

Në prill të vitit 2018, zoti Trump këmbënguli para gazetarëve në avionin presidencial “Air Force One” se ai nuk kishte dijeni për pagesën e bërë për aktoren Daniels përmes avokatit Cohen.

Por prokurori Bragg tha të martën, gjatë konferencës së shtypit, se zoti Trump e rimbursoi avokatin Cohen pas fitores së tij në vitin 2016 me para nga dy burime: një trust që mbante asetet e Organizatës Trump dhe nga llogaria e tij personale bankare.

TRUMP NË FLORIDA

Ish-Presidenti Donald Trump thotë se seanca e së martës në gjykatë “ishte shokuese për shumë njerëz pasi nuk kishte asgjë të re, dhe për rrjedhojë, pa baza”. Zoti Trump shkroi në rrjetin social ndërsa po udhëtonte me avion nga Nju Jorku drejt rezidencës së tij në Florida.

“Praktikisht, çdo ekspet ligjor është shprehur se çështja nuk ka baza. Nuk është bërë asgjë në rrugë të paligjshme”, shkruante zoti Trump.

Avioni i zotit Trump mbërriti në Florida dhe autokolona e tij u drejtua për në rezidencën e tij Mar-a-Lago ku qindra mbështetës po e presin. Zoti Trump pritet të flasë pas mbërritjes në rezidencë.

Pak më parë ish-presidenti amerikan Donald Trump ka hyrë në gjyq, në pritje të njohjes me 34 akuza penale.

Ndërkohë kanë dalë pamjet e para nga salla e gjyqit.

Ish-presidenti shihet i ulur në bankën e të akuzuarit së bashku me ekipin e tij të mbrojtjes, ndërkohë që mediat botërore deklarojnë se Trump do ta shpallë veten të pafajshëm ndaj akuzave.

BBC raporton se Trump është deklaruar i pafajshëm për 34 akuza.

Trump është i pari ish-president amerikan që përballet me akuza penale. Ai u padit nga një juri e Manhatanit javën e shkuar për një çështje nga viti 2016 për pagesat që i janë bërë “pornostares” Stormy Daniels për të mbajtur të fshehtë një raport intim mes tyre, edhe pse akuzat pritet që të specifikohen në vijim.

Ish-Presidenti Donald Trump mbërriti të hënën në Nju Jork, përpara dorëzimit të tij tek autoritetet dhe paraqitjes para një gjykatësi, ku do t’i lexohen akuzat penale të ngritura ndaj tij nga një juri e madhe. Deri tani nuk dihet se për çfarë akuzash rëndojnë ndaj zotit Trump.

Pas mbërritjes në aeroportin LaGuardia të Nju Jorkut, zoti Trump zbriti nga avioni i tij i vetëm dhe u fut në një makinë SUV të zezë, pa u përshëndetur nga askush. Vetëm grupe të vogla dhe të rralla mbështetësish kishin dalë në rrugë ndërsa autokolona e tij përdori një eskortë policie për ta çuar në Manhattan.

Ndërkohë qyteti më i madh i vendit është përfshirë nga masa të forta sigurie dhe autoritetet paralajmëruan të gjithë ata që synojnë të shkaktojnë shqetësime se “Nju Jorku nuk është një arenë për të shfryrë zemërimin e tyre”.

Zoti Trump dhe mbështetësit e tij kanë kritikuar hetimet si dhe padinë penale të ngritur kundër tij, që rrjedh nga një pagesë për të siguruar heshtjen e aktores së filmave pornografikë Stormy Daniels, bërë në ditët e fundit të fushatës presidenciale të zotit Trump në vitin 2016. Kthimi i tij në këtë qytet, hap një kapitull të paprecedentë në historinë amerikane. Zoti Trump është ish-presidenti i parë që përballet me akuza penale ndërsa ai ndodhet në mesin e një fushate të tretë për Shtëpinë e Bardhë.

Ish-presidenti planifikon të qëndrojë sot në Kullën Trump dhe më pas të martën ai do t’u dorëzohet autoriteteve për procedim e lexim akuzash nga gjykatësi i çështjes.

Pas paraqitjes në gjykatë, zoti Trump planifikon të kthehet në Mar-a-Lago për një konferencë shtypi të martën në mbrëmje. Të paktën 500 persona janë ftuar në konferencë, sipas një republikani të njohur me planet dhe që foli anonimisht për ta diskutuar situatën. Mes të ftuarve janë anëtarë të Kongresit që kanë mbështetur fushatën presidenciale të zotit Trump, si dhe donatorë dhe mbështetës të tjerë.

Ish-presidenti përforcoi gjithashtu forcoi ekipin e tij ligjor të hënën, duke shtuar një avokat të tretë të profilit të lartë, Todd Blanche. Një ish-prokuror federal, Blanche ka përfaqësuar më parë ish-kryetarin e fushatës së zotit Trump, Paul Manafort.

Deri më tani, zyrtarët nuk kanë parë një fluks njerëzish që vijnë në qytet, sikurse ishte rasti në Uashington në ditët para sulmit të dhunshëm të 6 janarit 2021 ndaj Kapitolit.

Megjithatë, autoritetet paralajmëruan se mbajtja e një arme pranë zonave të caktuara të qytetit, përfshirë gjykatat, do te konsiderohej një vepër penale.

“Ndërsa mund të ketë disa persona që mendojnë të vijnë në qytetin tonë nesër, mesazhi ynë është i qartë dhe i thjeshtë: kontrolloni veten”, tha kryebashkiaku i Nju Jorkut Eric Adams. “Nju Jorku është shtëpia jonë, jo një shesh lojrash për zemërimin tuaj. Ne jemi qyteti i madh më i sigurt në Amerikë, sepse respektojmë sundimin e ligjit”, shtoi ai.

Autoritetet po planifikojnë të rrisin masat e sigurisë rreth Kullës Trump si dhe të mbyllin rrugët aty pranë. Ata kanë ndërmarrë hapa për të mbyllur dhe siguruar katin e gjykatës ku ish-presidenti do të paraqitet para një gjykatësi të martën pasdite.

Mbështetësit e zoti Trump, përfshirë një nga mbrojtësit e tij më të vendosur në Kongres, ligjvënësja republikane Marjorie Taylor Greene e Xhorxhias, kanë planifikuar një tubim në Nju Jork të martën para mesditës, ndoshta përpara se zoti Trump të dilë para gjykatësit. Zoti Adams ndërmori hapin e pazakontë duke i drejtuar një thirrje ligjvënëses.

“Megjithëse nuk kemi kërcënime specifike, njerëz si Marjorie Taylor Greene, e cila njihet për përhapjen e dezinformatave dhe gjuhës së urrejtjes, ka deklaruar se do të vijë në qytet”, tha zoti Adams. “Ndërsa ndodheni këtu në qytet, duhet që të dëshmoni sjelljen tuaj më të mirë“.

Ekipi ligjor i zotit Trump pritet të sfidojë aktakuzën, dhe kanë bërë të ditur se do të përqendrohen në përdorimin e asaj që ata e quajnë një çështje të dobët e ngritur kundër ish-presidentit, në avantazhin e tij.

Zoti Trump pritet të përballet me akuza të shumta për falsifikimin e të dhënave të biznesit, përfshirë të paktën një vepër penale, në aktakuzën e lëshuar nga një juri e madhe në Manhattan javën e kaluar. Hetimet lidhur me pagesat e bëra për të siguruar heshtjen e aktores së filmave pornografike Stormy Daniels dhe ish modeles së revistës Playboy Karen McDougal.

Ato thonë se kanë pasur marrëdhënie seksuale me zotin Trump një gjë që ai e ka hedhur poshtë duke mohuar gjithashtu se ka kryer ndonjë veprim të paligjshëm. Ai thotë se çështja ndaj tij është e motivuar politikisht.

Republikanët kryesorë, duke përfshirë disa nga rivalët e mundshëm të zotit Trump brenda partisë për garën presidenciale e kanë denoncuar çështjen kundër tij. Presidenti Joe Biden dhe demokratët kryesorë kanë qëndruar përgjithësisht të heshtur lidhur me rastin.

Akuza penale e ngritur ndaj ish-Presidentit Donald Trump në Nju Jork, rrjedh nga një pagesë për të siguruar heshtjen e aktores së filmave pornografikë Stormy Daniels, bërë në ditët e fundit të fushatës presidenciale të zotit Trump në vitin 2016.

Pagesa prej 130,000 dollarësh, u bë nga avokati i zoti Trump, Michael Cohen, i njohur ndryshe si personi që arrinte të mbyllte marrëveshje kryesisht të pista. Pagesa u bë si pjesë e një skeme për të mbajtur të fshehura histori rreth marrëdhënieve jashtëmartesore të manjatit të pasurive të paluajtshme, që mund të ishin të dëmshme për të.

Zoti Cohen ka thënë se ai e ka bërë pagesën me udhëzimin e zotit Trump dhe se më vonë është rimbursuar nga Organizata Trump, kompania e pasurive të paluajtshme të ish-presidentit, që e regjistroi në financat e saj, si një shpenzim për shërbime ligjore.

Zoti Cohen pranoi fajësinë për këtë rast dhe u dënua në vitin 2018, por prokurorët federalë nuk ngritën paditi ndaj ish-presidentit, duke ia kaluar çështjen Prokurorit të Qarkut të Manhatanit, për të hetuar nëse në këtë rast ishin shkelur ligjet e shtetit të Nju Jorkut.

Në dokumentet e gjykatës për rastin e zotit Cohen në vitin 2018, prokurorët federalë thonë se zoti Cohen, duke punuar me urdhër të zotit Trump, u përpoq të parandalonte akuzueset gra, që të dilnin publikisht gjatë fushatës së 2016-ës, e të rrëfenin marrëdhëniet seksuale, që pretendonin se kishin patur me ish kandidatin për president.

‘Kap dhe vrit’

Krahas zotin Cohen, një lojtar kyç në këto përpjekje ishte edhe David Pecker, drejtuesi i ‘American Media’ (AMI), një kompani që në atë kohë publikonte tabloidin ‘National Enquirer’.

Zoti Pecker, një mik i vjetër i zotit Trumpit, kishte ofruar ndihmën e tij në trajtimin e historive problematike të zotit Trump me gra, duke identifikuar histori, që mund të bliheshin dhe më pas të mos publikoheshin. Praktika njihet në industrinë mediatike si “kap dhe vrit”, ku gazetat, apo televizionet angazhohen nëpërmjet pagesave për të parandaluar një individ që ta bëjë publike një ngjarje që mund të dëmtojnë një palë të tretë. Në këtë rast ky do të ishte ish-Presidenti Donald Trump.

Në gusht të vitit 2016, ‘American Media’ ra dakord t’i paguante ish-modeles së revistës ‘Playboy’, Karen McDougal, 150,000 dollarë për të drejtat e historisë së saj, në lidhje me marrëdhënie të përfolura seksuale, që ajo kishte pasur me zotin Trump në 2006 dhe 2007. Historia e saj u ‘mbyll në sirtar’.

Dy muaj më vonë, një përfaqësues i zonjës Daniels informoi përfaqësuesit e kompanisë ‘American Media’, se ylli i pornografisë do të dilte publikisht me histoinë e saj, për një marrëdhënie seksuale që kishte patur me zotin Trump, por ishte e gatshme ta shiste historinë e saj.

Pasi nuk arriti të siguronte një marrëveshje me zonjën Daniels, zoti Pecker vuri agjentin e saj në kontakt me zotin Cohen, i cili negocioi një marrëveshje prej 130,000 dollarësh për të ‘blerë heshtjen e saj’, shkruanin prokurorët në dokumentat që datojnë gushtin e vitit 2018.

Pagimi i parave për të siguruar heshtjen e një personi nuk është i paligjshëm. Por prokurorët federalë thonë se regjistrimi i pagesës si një shpenzim ligjor për kompainë, konsiderohet si shkelje e ligjeve federale për financimin e fushatës zgjedhore.

Zoti Trump ka pranuar se zoti Cohen është rimbursuar për shumën prej 130,000 dollarësh, që i ka paguar zonjës Daniels. Sipas tij, pagesa u bë për të ndaluar ato që ai i ka quajtur ‘akuza të rreme, me synim zhvatjen’. Por ai ka hedhur poshtë se këto pagesa kishin lidhje me fushatën e tij për president, për t’u konsideruar si kontribut financiar.

Ndërsa nuk dihet se për çfarë është akuzuar ish-presidenti nga prokuroria e Manhatanit, ekspertët ligjorë thonë se ka të ngjarë që akuzat penale të jenë përqendruar tek falsifikimi i të dhënave të biznesit.

Sipas ligjit të Nju Jorkut, falsifikimi i të dhënave të biznesit konsiderohet zakonisht kundërvajtja ligjore. Por kur kjo shkelje bëhet për të fshehur një krim tjetër, ajo ngrihet në shkallën e një vepre penale të dënueshme deri në katër vjet burg.

Nuk është e qartë nëse në padinë penale, ka akuza të tjera, apo sa të tilla mund të jenë ngritur ndaj ish-Presidenti Donald Trump.