Voal . Sekretari amerikan i Shtetit John Kerry tha sot në Tiranë se Shtetet e Bashkuara mbështesin reformat e ndërmarra dhe se vendi sipas tij është në rrugën e duhur. Duke folur pas takimit me kryeministrin Edi Rama, zoti Kerry nënvizoi se se Shtetet e Bashkuara janë të përgatitura dhe të gatshme që të jenë krah Shqipërisë në këtë transformim. Ai vlerësoi angazhimin e Shqipërisë në luftën kundër terrorizmit dhe ekstremizmit të dhunshëm, duke veçuar përgjegjësitë e veçanta që vendi ka dhe në rajon si një anëtar i NATO-s. Gjatë qëndrimit në Tiranë, Sekretari amerikan i Shtetit pati një takim dhe me kryetarin e opozitës Lulzim Basha dhe një grup deputetësh demokratë.

​

Sekretari amerikan i Shtetit mbërriti në Tiranë në orën 9:45 minuta. Në tapetin e kuq të shtruar në shkallët e avionit kishte dalë për ta pritur presidenti Bujar Nishani, një gjest i pazakontë nga pikëpamja protokollare. Ata qëndruan aty në këmbë për pak minuta gjatë së cilave, sic u njoftua më pas në një deklaratë, zoti Nishani “i shprehu mirënjohjen e thellë të shqiptarëve për të gjithë mbështetjen e pakursyer, veçanërisht për integrimin e vendit në strukturat Euroatlantike si dhe vendosmërinë e Shqipërisë në luftën kundër krimit të organizuar dhe korrupsionit”.

Menjëherë më pas, Sekretari amerikan i Shtetit u drejtua për në qendrën e kryeqytetit. Në godinën e qeverisë ai nisi takimet zyrtare fillimisht me Ministrin e Jashtëm Ditmir Bushati. Më pas shtrëngimi i duarve me Kryeministrin Edi Rama dhe disa minuta në zyrën e këtij të fundit. Në Sallën e Hartave, ku u zhvilluan bisedimet dy palëshe ishin katër ministra si dhe ish-kryeministri Pandeli Majko, kryetar i delegacionit parlamentar të miqësisë Shqipëri-SHBA.

Angazhimi në luftën kundër terrorizmit dhe reformat e ndërmarra në vend ishin dy boshtet mbi të cilat u zhvilluan bisedimet. Sekretari amerikan mbërriti në Tiranë nga Mynihu i Gjermanisë, ku ai mori pjesë në takimin e nivelit të lartë për sigurinë, e ku në fokus ishte pikërisht Lindja e Mesme dhe nevoja për t’u përballur e mposhtur ISIS-in. ​ “Mposhtja e ISIS nuk ka për të ndodhur thjesht për shkak të asaj që një vend i vetëm mund të bëjë. Kjo kërkon një koalicion të gjerë, dhe ne e kemi ndërtuar atë dhe Shqipëria, jam krenar dhe mirënjohës ta them, është anëtare themeluese në këtë koalicion. Shqipëria ka qenë aty që nga fillimi e gatshme për të qëndruar me të gjitha vendet për t‘iu kundërvënë ISIS-it”. Shqipëria, shtoi zoti Kerry, “nuk është thjesht një vend mik, por një vend anëtar i NATO-s dhe kjo sjell përgjegjësi të veçanta në rajon dhe jemi mirënjohës për anëtarësinë dhe partneritetin e saj në këtë aleancë”, u shpreh ai.

Por, më mirënjohëse është Shqipëria, e cila siç theksoi kryeministri Rama, “ka një lidhje speciale me Shtetet e Bashkuara, pa të cilat, as Shqipëria dhe as shqiptarët në tërësi nuk do të ishin sot më të respektuar se kurrë më parë në historinë e tyre”, tha ai. “Si miq, partnerë dhe aleatë të ngushtë, ne kemi punuar, jemi duke punuar dhe do të vazhdojmë të punojmë ngushtësisht me NATO-n, Organizatën e Kombeve të Bashkuara dhe organizata të tjera ndërkombëtare. Me Shtetet e Bashkuara nuk na ndan asgjë dhe na bashkon gjithçka. Trupat tona do të vazhdojnë misionin e tyre në Afganistan, përkrah atyre amerikane, e do të qëndrojnë aty së bashku me aleatin tonë të madh deri kur të jetë e nevojshme”.

Reformat e ndërmarra në vend zunë një pjesë të rëndësishme të deklaratës së Sekretarit amerikan të Shtetit, i cili foli për një përparim domethënës. “Prova është absolutisht e qartë dhe Shqipëria duhet të jetë e kënaqur, që vendi juaj po lëviz në drejtimin e duhur, ju jeni në rrugën e duhur. Jam besimplotë në vullnetin me të cilin është përqafuar legjislacioni që ka lidhje me luftën ndaj korrupsionit, jam i inkurajuar që reformat tuaja kanë marrë udhë”, u shpreh zoti Kerry.

Ai theksoi në mënyrë të veçantë miratimin e të ashtuquajturit ligj për dekriminalizimin, të cilin e konsideroi si një hap të rëndësishëm e kurajoz që pengon kalimin e kriminelëve në politikë. Shtetet e Bashkuara së bashku me Bashkimin Europian u angazhuan fort për këtë ligj, ashtu sikundër dhe për realizimin e reformës në Drejtësi. “Jam i inkurajuar shumë nga paketa e Reformës në Drejtësi që është duke u shqyrtuar për të përmirësuar gjyqësorin dhe për të lejuar një goditje më të madhe kundër korrupsionit. Dëshiroj të theksoj se kjo është dicka që udhëheqja juaj ka ndërmarrë, se ata po punojnë fort në mënyrë që të realizohet dhe janë të përkushtuar për një qeverisje më llogaridhënëse, dhe kjo kërkon mbështetjen e çdo shqiptari. SHBA janë absolutisht të përgatitura dhe të gatshme dhe jam këtu ta konfirmoj në emër të presidentit Obama që ne jemi me ju në këtë transformim dhe rrugëtim. Por, në fund vetëm shqiptarët mund të miratojnë ligjet e duhura e të ngulmojnë për zbatimin efektiv të tyre“, nënvizoi Sekretari amerikan i Shtetit.

Edhe kryeministri Rama deklaroi se Reforma në Drejtësi kishte qenë një nga pikat e diskutimit: “Objektivi ynë i përbashkët, edhe për shkak të implikimeve të drejtpërdrejta që ecuria e reformës ka në procesin e integrimit europian, është që marsi të jetë muaji i votimit në Kuvend të paketës së ndryshimeve kushtetuese. Kam shumë besim se do t’ia dalim dhe fakti që nuk jemi vetëm, por me Shtetet e Bashkuara në krah, e bën krejtësisht të arsyeshëm optimizmin për sukses, në këtë ndërmarrje historike për Shqipërinë e shekullit të XXI-të”.

Pesha që Sekretari Kerry i dha veçanërisht reformës në Drejtësi, e bëri të qartë se kjo cështje do të ishte më pas temë qëndrore e bisedës dhe me kryetarin e opozitës Lulzim Basha. Ky i fundit pas takimit deklaroi se “duke forcuar demokracinë e brendshme është investimi më i mirë, më i fuqishëm në të ardhmen europiane dhe euroatlantike të Shqipërisë dhe gjithë rajonit. E në këtë kontekst është dhe ecja përpara me reforma shumë të rëndësishme, siç është reforma në drejtësi, në përputhje me rekomandimet, normat, standardet e pranuara bashkërisht, siç janë ato të Komisionit të Venecias, si dhe çështja kyçe e demokracisë shqiptare – çështja e zgjedhjeve të lira e të ndershme, për të cilat opozita kërkon angazhimin e partnerëve tanë si një reformë kyçe pa të cilën Shqipëria nuk mund të bëjë përpara”.

Sekretari amerikan i Shtetit gjeti disa momente për t’u përshëndetur dhe me qytetarë shqiptarë, fillimisht kur ai po shkonte drejt takimit me përfaqësuesit e opozitës, dhe më pas, në mbyllje të vizitës, pas përfundimit të një bashkëbisedimi me një grup të rinjsh shqiptarë. I nxitur nga insistimi i një qytetari nga Kosova, Sekretari amerikan i Shtetit, pati dhe një mesazh për Prishtinën: “Mesazhi im është. Vazhdoni të ecni përpara”/ZA

Në SHBA, Senatori Ted Cruz mundi miliarderin Donald Trump në votimet e shtetit Ajova për kandidatët republikanë presidencialë, duke përmbysur ndjeshëm rezultatet e anketave.

Cruz, ligjvënës konservator nga Teksasi, mori 28 për qind të votave, krahasuar me 24 për qind të zotit Trump, i cili vetëm pak përpara votimeve kryesonte në shumicën e anketave.

Senatori Marco Rubio i Floridës, doli i treti me 23 për qind, rezultat që u komentua si i papritur për shumë analistë.

Kandidatët e tjerë republikanë nuk e kaluan pragun e 10 përqindshit.

Mes kandidatëve demokratë, ish-Sekretarja e Shtetit Hillary Clinton dhe Senatori i Vermontit Bernie Sanders, i cili e përshkruan veten si socialist demokrat, ruajtën një rezultat pothuajse të barabartë, 49.8% me 49.6%.

Ish guvernatori i shtetit Maryland, kandidati demokrat Martin O’Malley, i cili u paraqit dobët në garë, njoftoi pezullimin e fushatës së tij.

Pezullimin e fushatës e njoftoi edhe kandidati republikan, Mike Huckabee, ish-guvernator i shtetit Arkansas, i cili fitoi në Ajova në garat e vitit 2008.

Rezultatet e votimeve në Ajova ofrojnë provën e parë lidhur me atë se çfarë mendojnë votuesit për kandidatët, pas një viti fushate të ashpër dhe hamendjesh të shumta.

Njerëz të shumtë mbushën mbrëmë kisha, shkolla dhe ndërtesa të tjera publike kudo në shtetin Ajova, ku ata morën pjesë në një sistem votimi në të cilin votuesit deklarojnë hapur se cilin kandidat do të mbështesin. Ky sistem i quajtur “caucus”, praktikohet në disa shtete.

Votimi i radhës, kësaj here me sistemin e quajtur “primary”, do të zhvillohet në shtetin Nju Hempshër më 9 shkurt.

Zëri i Amerikës:  Zoti Ambasador, faleminderit shumë që jeni sot me Zërin e Amerikës. U bë një vit që kur ju erdhët në Shqipëri. A mund të ndani me ne përvojën tuaj gjatë kësaj kohe?

Ambasador Donald Lu: Faleminderit shumë për ftesën për të qenë me ju te Zëri i Amerikës. Ajo që më ka bërë më shumë përshtypje vitin e kaluar, ishin imazhet që kam parë në Shqipëri. Dhe disa imazhe ishin të bukura, si ngjitja deri te një ujvarë në Valbonë, apo një takim me të rinj të shkëlqyer në një darkë iftari në Ndroq. Ndërsa disa imazhe të tjera më vunë në mendime, si për shembull vizita në Spac, apo bisedat me njerëz në Bregun e Lumit në Tiranë, të cilët përballen me vështirësi shumë të mëdha. Por kam besim se 2016-a do të sjellë më shumë ndryshime pozitive që do të prekin të gjitha jetët tona.

Zëri i Amerikës: Ju jeni angazhuar fuqimisht për të punuar nga afër me politikanët shqiptarë për gjetjen e zgjidhjeve të shumë çështjeve të rëndësishme dhe të komplikuara. Si kanë qenë këto marrëdhënie, të lehta, tw vështira, apo frustruese?

Ambasador Donald Lu: Shumë pyetje interesante. Këtë pyetje ma bëjnë vazhdimisht dhe në mënyra të ndryshme. Si diplomat amerikan, për mua është shumë e pazakontë që punoj në një vend ku amerikanët janë kaq të mirëpritur; të mirëpritur nga populli i Shqipërisë, por edhe nga udhëheqësit e saj. Ne kemi marrëdhënie mjaft të mira me çdo parti politike, por edhe me çdo pjesë të qeverisjes. Përvoja ime është e jashtëzakonshme, sepse kam marrëdhënie pune mjaft të ngushta për një gamë shumë të gjerë çështjesh.

Zëri i Amerikës: Dekriminalizimi ishte një ndër ligjet më të vështira që u miratua nga parlamenti. Kemi parë disa hapa të vegjël deri tani, disa politikanët që janë tërhequr, apo të tjerë që ndoshta pritet ta lënë parlamentin. Megjithatë, a mendoni se ky ligj është i mjaftueshëm për të këputur lidhjet mes politikës dhe botës së krimit?

Ambasador Donald Lu: Mendoj se çështja e krimit dhe e politikës është shumë e rëndësishme, jo vetëm në Shqipëri, por edhe në mjaft vende të tjera. Mendoj se shqiptarët duhet të jenë shumë krenarë për përparimin që kanë parë gjatë një viti të shkuar. Në zgjedhjet e kaluara vendore, ne pamë udhëheqës partish politike nga e djathta dhe nga e majta, që hoqën nga lista kandidatë me të kaluar kriminale. Kemi parë gjithashtu që Kuvendi u pezulloi imunitetin një numri deputetësh, që përballeshin me akuza penale. Siç e dini, zoti Ndoka dhe zoti Frroku dhanë dorëheqjen nga vendet e tyre në parlament. Zoti Doshi dhe zoti Prenga përballen aktualisht me akuza penale. Gjithashtu shpresojmë shumë që, si rrjedhojë e ligjit për dekriminalizimin, disa anëtarë të klasës politike do të largohen nga politika. Ka një pjesë në këtë ligj që më pëlqen mjaft. Është pjesa ku thuhet se ligji kërkon që çdo person në një post të zgjedhur zyrtar duhet të plotësojë me shkrim një deklaratë, ku thuhet: jam dënuar në Shqipëri në këtë apo atë kohë, për këtë ose atë krim, apo në çdo vend tjetër të planetit. Pra, duhet të deklarosh se kur e ke kryer krimin dhe nëse je dënuar. Në qoftë se nuk e bën dhe gënjen në deklaratë, kjo në vetvete është një krim për të cilin ndiqesh penalisht. Ky është ligji më i fortë në Evropë për dekriminalizimin dhe një mjet tepër i fuqishëm për të ndarë botën e krimit dhe të politikës.

Zëri i Amerikës: Sa të thella janë lidhjet mes politikës dhe krimit në Shqipëri?

Ambasador Donald Lu: Të them të drejtën, nuk jam polic, as nuk jam ekspert për botën e krimit. Si njeri që ka jetuar këtu një vit, do të thosha se ekzistojnë disa lidhje serioze midis këtyre dy botëve dhe ka shumë rëndësi për të gjithë shqiptarët, që të mbështesin procesin e ndarjes së këtyre dy botëve. Kam punuar në vende të tjera ku, kriminelët përpiqen të shërbejnë në parlament, ose në politikë për hir të imunitetit që përfitojnë nga kjo. Por në një vend normal, në një demokraci normale, asnjë kriminel nuk dëshiron të jetë në politikë. Kjo është diçka e keqe për biznesin, tërheq vemendje te aktivitetet kriminale. Këtë duam ne që të ndodhë në Shqipëri, pra që kriminelët të thonë: do t’i bëja dëm punëve të mia, po të futesha në politikë.

Zëri i Amerikës: Zoti Ambasador, ju jeni investuar në reformën në Drejtësi. Pak kohë më parë thatë se “ndiheni të inkurajuar që udhëheqësit shqiptarë kanë rënë dakort të mbështesin opinionin e Komisionit të Venecias”. Por diskutimet mbi rekomandimet e këtij komisioni duket sikur i kanë thelluar mosmarrëveshjet. A jeni të shqetësuar nga zhvillimet e fundit?

Ambasador Donald Lu: Armand, kam shumë besim se në vitin 2016, në pranverë 2016, Shqipëria do të ketë një reformë të thellë të gjyqësorit. Përse kam kaq shumë besim? Së pari, është mjaft e qartë se populli shqiptar e kërkon këtë reformë. Së dyti, Komisioni i Venecias ka folur qartë dhe me zë të lartë. Ata kanë thënë se kjo reformë është thelbësore për Shqipërinë dhe është e ngutshme. Bashkimi Evropian ka thënë se kjo reformë do t’i hapë dyert, dëshirës së Shqipërisë për bisedimet e anëtarësimit. Së fundi, kjo reformë ka mbështetjen e plotë dhe entuziaste të partnerit strategjik të Shqipërisë, Shteteve të Bashkuara të Amerikës. Është shumë e vërtetë se 10 ditë më parë, komisioni parlamentar ad hoc, për reformën në drejtësi, i dërgoi Komisionit të Venecias projektligjin bashkë me komentet dhe opinionet e partive politike. Me këtë vendim të rëndësishëm, përfundoi puna e ekspertëve dhe ekspertët kanë bërë një punë fantastike – ekspertët e nivelit të lartë, ekspertët e opozitës dhe ata të ministrisë së Drejtësisë. Por tani është çasti që politikanët të bëjnë punën e tyre. Është e nevojshme që udhëheqësit e partive politike të punojnë së bashku për gjetjen e një formule, e cila të mund të mbështetet si nga opozita ashtu edhe nga qeveria.

Zëri i Amerikës: A mendoni se politikanët shqiptarë kanë axhenda të fshehta pas qëndrimeve publike që ata kanë patur për cështjen e reformës?

Ambasador Donald Lu:  Shumë gazetarë ma kanë bërë këtë pyetje, – në se politikanët shqiptarë kanë kurajon e duhur ta miratojnë reformën. Unë do ta përmbysja argumentin dhe do të shtroja pyetjen:  si munden të mos e miratojnë? Populli shqiptar është në favor të reformës, Të gjithë partnerët ndërkombëtarë të Shqipërisë kanë thënë se e mbështesin reformën. Ne i bëjmë thirrje popullit shqiptar ta mbështesë reformën dhe t’i mbajë udhëheqësit e tij përgjegjës për të. Në të njejtën kohë, populli shqiptar do të gëzojë mbështetjen tonë, të komunitetit ndërkombëtar, të Uashingtonit, të Brukselit, por edhe të cdo kryeqyteti të Bashkimit Evropian, për të qënë aktivisht i përfshirë në miratimin e reformës. Ne mendojmë se kjo reformë do të jetë hapi më i rëndësishëm përpara i demokracisë shqiptare në këto 25 vite.

Zëri i Amerikës: Ju dhe kolegia juaj, ambasadorja e Delegacionit të Bashkimit Europian, jeni kritikuar se jeni përfshirë më shumë se ç’duhet në politikën shqiptare, se keni shkuar përtej mandatit tuaj si ambasador, apo se keni qenë i njëanshëm. Si u përgjigjeni ju këtyre kritikave?

Ambasador Donald Lu:  Unë do të pyesja, cili është roli i një ambasadori të huaj? Në mëndjen time, detyra kryesore për një ambasador të huaj është të punojë për zbatimin e interesave kombëtare të vendit të tij. Në rastin tim, të interesave të Shteteve të Bashkuara. Dhe unë kam udhëzime shumë të qarta nga shefat e mi më të lartë në Departamentin e Shtetit dhe në Shtëpinë e Bardhë, që përparësia kryesore e qeverisë amerikane në Shqipëri është të mbështesë reformat, në mënyrë që Shqipëria të anëtarësohet në Bashkimin Evropian. Dhe cila është reforma kryesore e nevojshme për këtë proces? Qartazi është reforma në drejtësi. Shqiptarët mund të presin që unë si ambasador, ne si ambasadë, do të vazhdojmë të flasim pa frikë për këtë çështje dhe ne ftojmë gjithë shqiptarët të bëhen pjesë e një dialogu kombëtar për këtë çështje të rëndësishme.

Zëri i Amerikës: Korrupsioni mbetet thembra e Akilit në jetën politike shqiptare. Deri tani nuk kemi parë përpjekje serioze dhe një luftë serioze kundër këtij fenomeni, i cili nuk ka shkuar përtej niveleve të ulta. Ju keni përmendur ministra të korruptuar. Ku mbështeten akuzat apo deklarimet tuaja?

Ambasador Donald Lu:  Korrupsioni ekziston në të gjitha vendet, ekziston edhe në Shtetet e Bashkuara.  Ka anëtarë kongresi, ka gjykatës në vendin tim, që janë në burg për korrupsion. Lufta ndaj tij nuk është fituar, lufta ndaj tij duhet të zhvillohet çdo ditë. Dhe në fund të fundit, ka të bëjë me vullnetin e një vendi, që ose ta pranojë korrupsionin dhe të paguajë rryshfetet, ose të ngrihet me kurajo dhe ta luftojë korrupsionin. Kur punoja në Azinë Qendrore, në Kirgistan, para 13 vjetësh, në universitete filloi një lëvizje e vogël, e qetë. Studentët u ngritën duke thënë “nuk e durojmë dot më tej korrupsionin, nuk do t’u paguajmë më rryshfete profesorëve, nuk do të paguajmë më për notat tona”. Ata nënshkruan një angazhim “nuk do të paguajmë më rryshfete”. Lëvizja e tyre u përhap me shpejtësi në Kirgistan nëpër universitete, më pas edhe në sektorë të tjerë të shoqërisë dhe u përhap edhe në vende të tjera të Azisë Qendrore. Është e fuqishme kur studentët ngrihen kundër korrupsionit. Ajo që shohim sot në Shqipëri, edhe në Universitetin e Tiranës, po shohim një dëshirë, një përpjekje, për t’u ngritur kundër korrupsionit. Kjo do të sjellë ndryshimin e mentalitetit të korrupsionit, Kjo do të sjellë fundit e korrupsionit.

Zëri i Amerikës:  Zoti Ambasador, si do t’i përshkruanit marrëdhëniet mes SHBA-ve dhe Shqipërisë. Cilat janë përparësit kyçe të Shteteve të Bashkuara?

Ambasador Donald Lu: Unë kam punuar në shërbimin diplomatik për gati 25 vjet. Kurrë nuk kam punuar në një vend që ka marrëdhënie kaq të ngushta me Shtetet e Bashkuara. Marrëdhëniet po forcohen dita-ditës. Ne punojmë së bashku në shumë fusha. Ne kemi tre përparësi kryesore si amerikanë, në Shqipëri. Së pari, e kam thënë edhe më parë, është të mbështesim reformat, që të ndihmojmë Shqipërinë të anëtarësohet në BE. Së dyti, ne jemi të angazhuar të ndihmojmë Shqipërinë të bëhet një aleat më i fortë në NATO. Së treti ne duam të mbështesim popullin shqiptar që të zhvillojë institucionet demokratike. Veç reformës në drejtësi, këtë vit kemi në plan edhe tri përparësi të tjera: të vazhdojmë të punojmë drejt realizimit të nismës për krijimin dhe trajnimin e një Byroje Kombëtare Hetimi, bazuar në FBI-në amerikane, përmes së cilës shqiptarët do të hetojnë rastet e korrupsionit. Së dyti, ne po bashkëpunojmë shumë afër me Ministrinë e Mbrojtjes dhe vendet e tjera të NATO-s, për të modernizuar format e armatosura të Shqipërisë, kryesisht disa njësi të rëndësishme të ushtrisë, që të shërbejnë krahas forcave të NATO-s kudo në botë. Dhe së fundmi ne jemi shumë të angazhuar për zhvillimin e sektorit të organizatave jo-qeveritare në Shqipëri dhe të shtypit të pavarur, që të shërbejnë si vëzhguese të abuzimeve nga qeveria ose opozita.

Zëri i Amerikës:  Ju keni zgjedhur të flisni shqip në shumë raste. Së pari urime për mënyrën se si ju e flisni, pasi është një gjuhë e vështirë. Nëse mundem, pse keni zgjedhur të flisni kaq shpesh në shqip, madje dhe për cështje të rëndësishme? A mos druheni se mesazhet tuaja mund të keqinterpretohen?

Ambasador Donald Lu: Faleminderit për pyetjen. Përpiqem të përdor cdo ditë gjuhën shqipe, sepse ambasadori Rayerson më ka thënë dicka. Ambasadori Rayerson ishte ambasadori i parë amerikan pas komunizmit dhe ai flet një shqipe të jashtëzakonshme. Ai më ka thënë se e vetmja mënyrë për të mësuar një gjuhë është të kesh kurajon, kurajon për ta përdorur atë. Dhe ai më tha gjithashtu se kjo është e vetmja rrugë që të nisesh të kuptosh shqiptarët e zakonshëm dhe jo vetëm elitat politike. Gjatë jetës sime kam mësuar 8 gjuhë dhe padyshim gjuha shqipe është më e vështira, por dhe më e bukura.

Presidenti amerikan, Barack Obama, ka miratuar reforma në sistemin e burgjeve federale, që përfshijnë ndalimin e izolimit për të burgosurit e mitur dhe kufizimin e përdorimit të kësaj mase edhe për të rriturit.

Në një tekst të botuar të hënën vonë në The Washington Post, Obama tha se ka më shumë se 100 mijë të dënuar me izolim në Shtetet e Bashkuara dhe kjo praktikë shkakton pasoja “shkatërruese psikologjike”.

“Shtetet e Bashkuara janë vend i mundësisë së dytë, por përvojat e izolimit shpesh e dëmtojnë atë mundësi”, tha ai. “Ata që i nënshtrohen shpesh kësaj praktike, kanë problem të mbajnë pastaj vendet e punës, të ribashkohen me familjet dhe të bëhen anëtarë të vyeshëm të shoqërisë”.

Aktualisht ka rreth 200 mijë të burgosur federal dhe Obama tha se eliminimi i izolimit për të miturit dhe ata që kanë kryer veprime “më të lehta” do të ndikojë tek rreth 10 mijë njerëz.

Vetëm disa prej të prekurve janë të mitur, meqë sipas të dhënave të Zyrës së Burgjeve, vetëm 26 të burgosur janë nën moshën 18 vjeçare.

Presidenti është duke miratuar rekomandimet nga një raport Departamentit të Drejtësisë që ishte përgatitur pasi që ai urdhëroi një rishikim të masës së izolimit në muajin korrik.

“Ka raste kur zyrtarët korrektues nuk kanë zgjidhje, pos që të bëjnëndarjen burgosurve nga pjesa tjetër e tyre, kryesisht kur kjo është mënyra e vetme për të garantuar sigurinë e të burgosurve, personelit dhe publikut,” thuhet në raportin e Departamentit të Drejtësisë. “Por, besojmë fuqishëm se kjo praktikë duhet të përdoret rrallë, të zbatohet në mënyrë të drejtë dhe të jetë subjekt i kufizimeve të arsyeshme.”

Obama i bëri thirrje gjithashtu Kongresit të miratojë legjislacionin për reformimin e sistemit të drejtësisë për ta bërë atë “më të zgjuar, më të drejtë, më pak të shtrenjtë dhe më efektiv.”

Ai shkruan se janë 2.2 milion veta në burgjet federale, shtetërore dhe ato lokale, mbajtja e të cilëve kushtin 80 miliardë dollarë dhe shumë prej tyre vuajnë dënime panevojshëm të gjata.

“Besojmë se kur njerëzit bëjnë gabime, meritojnë një mundësi për t’i ripërtërirë jetët e tyre”, tha Obama