Në Shtetet e Bashkuara, lëvizja e quajtur “Kurrë Trumpin”, një përpjekje e një grupi republikanësh për të penguar emërimin e Donald Trumpit si kandidati për president i partisë republikane për zgjedhjet e nëntorit, duket se ka marrë një goditje të fortë.

Komiteti i Partisë Republikane që përcakton rregullat e Kuvendit e hodhi poshtë një propozim, që do t’i lejonte delegatët javën e ardhshme në Kuvendin e partisë që mbahet në Cleveland të Ohio-s, për të votuar për një kandidat tjetër, veç atij që ka fituar në zgjedhjet paraprake të partisë dhe të shteteve.

Analistët thonë se komiteti me 112 anëtarë për rregulloren e Kuvendit e shtypi me sukses përpjekjen “Kurrë Trumpin”, për të mos lejuar që Donald Trump të jetë kandidati republikan për president.

Paul Manafort, kryetari i fushatës së zotit Trump tha në një intervistë për gazetën “The Washington Post” se përpjekja për të ndryshuar rregulloren do ta shkatërronte Partinë Republikane.

Do të ishte një vetëvrasje politike, tha Stephen Munisteri, njëri prej delegatëve dhe një figurë e rëndësishme e Partisë Republikane nga Teksasi, që të injorohen miliona votues, të cilët votuan për zotin Trump në zgjedhjet paraprake.

Trump ka qenë vazhdimisht një kandidat i debatueshëm për republikanët, për shkak të deklaratave të tij për pakicat, imigrantët, gratë dhe shumë prej republikanëve të tjerë.

Të dy ish-presidentët Bush dhe ish-kandidati republikan për president, Mitt Romney, thonë se nuk do të marrin pjesë në Kuvendin e Partisë javën e ardhsme. Por Donald Trump tani ka siguruar miratimin e partisë së tij. Ai është popullor në mesin e disa segmenteve të popullsisë amerikane, të cilët nuk i kushtojnë rëndësi komenteve të tij.

Ish-kryetari i Dhomës së Përfaqësuesve në Shtetet e Bashkuara, Newt Gingrich, ka propozuar testimin e të gjithë myslimanëve në SHBA, për të parë nëse besojnë në Ligjin e Sheriarit.

Nëse besojnë, ata duhet të dëbohen, ka thënë Gingrich.

Sheriati është një kod ligjor, që bazohet në Kuran dhe shkrime të tjera islamike.

Komentet e Gingrichit vijnë pas sulmit terrorist në Nicë të Francë, ku kanë mbetur të vrarë së paku 84 veta.

“Qytetërimi perëndimor është në luftë. Ne duhet të testojmë çdo person me prejardhje myslimane dhe nëse ata besojnë në Sheriat, duhet të dëbohen”, ka thënë Gingrich për Fox News.

“Sheriati është i papajtueshëm me qytetërimin perëndimor. Për myslimanët modernë, që kanë hequr dorë nga ai, jam i lumtur që i kemi qytetarë”, ka shtuar Gingrich.

Këshilli për Marrëdhëniet Amerikano-Islame ka dënuar sulmin në Nicë.

Mike Pence, është një politikan konservator i Partisë Republikane, me eksperiencë në Kongres, por që është kritikuar për politikat e tij të cilësuara si diskriminuese.

Pence udhëheq shtetin e Indianës që nga viti 2013 dhe është mbërthyer në një garë të ngushtë për rizgjedhjen e tij. Zyra e tij mbështet një shkurtim rekord të taksave, sidomos ndaj bizneseve, si dhe përpjekjet për një qeveri më të vogël.

Në fund të vitit të kaluar ai i urdhëroi agjencitë shtetërore të pezullonin fondet për grupe që ndihmonin refugjatët në Indiana, duke thënë se ato nuk do të lejoheshin para se qeveria të sigurohej se po zbatoheshin procedurat e duhura të sigurisë.

Ai ishte njëri prej disa udhëheqësve të shtetit të Indianës, të cilët u përpoqën të frenonin sistemimin e refugjatëve sirianë pas sulmeve terroriste në Paris. Një gjykatës federal e hodhi poshtë urdhërin e tij në mars, duke e quajtur diskriminues.

Mike Pence, po ashtu u kritikua nga grupe të të drejtave të homoseksualëve në vitin 2015, për një ligj shtetëror, për të cilin u tha se do t’i lejonte bizneset të shfrytëzonin besimin e tyre fetar kundër homoseksualitetit. Ky ligj do t’u mohonte disa shërbime homoseksualëve.

Por përveç pikëpamjeve të tij konservatore, si një buxhet më i vogël shtetëror dhe mbështetje për ushtrinë, Mike Pence është i kualifikuar në fushën e legjislacionit, që është e pëlqyeshme për të emëruarin republikan për president Donald Trump. Pence ka shërbyer për gjashtë mandate në Dhomën e Përfaqësuesve, pasi u zgjodh për herë të parë në vitin 2000.

Gjatë kohës kur ishte në Capitol Hill, Mike Pence ishte mes ligjvënësve republikanë, të cilët u përpoqën për anulimin e reformave historike në sistemin e shëndetësisë të Presidentit Barack Obama. Ai po ashtu ka shërbyer si anëtar i Komisionit të Jashtëm të Dhomës së Përfaqësuesve.

Gjatë procesit të zgjedhjeve partiake, Mike Pence fillimisht mbështeti kandidaturën e senatorit të Teksasit Ted Cruz, por ai vlerësoi njëkohësisht zotin Trump, duke thënë se biznesmeni “flet në emër të miliona punonjësve amerikanëve, të zhgënjyer nga mungesa e përparimit në Uashington, D.C.”

Kur Donald Trump siguroi emërimin e Partisë në muajin maj, Mike Pence u zotua se do të zhvillonte fushatë për të.

Kandidati republikan Trump tha në Twitter se ai do ta bëjë njoftimin të premten në orën 11 paradite në Nju Jork.

Ndër zgjedhjet e tij të mundshme janë Guvernatori i Indianës Mike Pence, i cili ishte i pranishëm në një takim për mbledhje fondesh me zotin Trump të martën, ish-Kryetari i Dhomës së Përfaqësuesve Njut Gingriç, dhe Guvernatori i Nju Xhersit Kris Kristi. Guvernatori Kristi, ish-rivali i zotit Trump për kandidat presidencial, shpalli mbështetjen e tij për manjatin pasi vetë u tërhoq nga gara përesidenciale para disa muajsh.

Disa media, duke përfshirë U.S. News & World Report dhe Politico, thonë se Pence ose Gingriç janë kandiatët kryesorë.

Paul Manafort, menaxher i fushatës së z. Trump mbështet guvernatorin Pence, sipas revistës së lajmeve U.S. News. Burime nga fushata e z.Trump i thanë revistës se ish kongresmeni shihet si njeri i besueshëm dhe i respektuar, por “edhe si njeri që mund të kontrollohet”.

Megjithatë, duket se fëmijët e z.Trump, si dhe bashkëshorti i Ivanka Trump, Jared Kushner, preferojnë z.Gingriç, sipas kompanisë mediatike Politico, e cila citon burime nga fushata e zotit Trump.

Ndërsa kandidati republikan lavdëroi guvernatorin Kristi në Fox News. Z. Trump dhe guvernatori Kristi kanë kohë që e njohin njëri-tjetrin:

“Kris Kristi është dikush për të cilin kam patur respekt për një kohë të gjatë”, i tha z. Trump gazetarit Bret Baier. “Ai është një profesionist i gjithanshëm. Është njeri i mirë. Shumë njerëz nuk e kuptojnë këtë”.

Z. Kushner, i cili luan një rol të rëndësishëm prapa skenave në fushatën e kandidatit Trump, nuk e pëlqen z.Kristi, sepse kur Kris Kristi ishte prokuror federal, dënoi me burgim babain e tij Çarles Kushner një dekadë më parë. Çarles Kushner pranoi se ishte fajtor për 18 akuza për kontribute të jashtëligjshme ndaj disa fushatave elektorale, evazione fiskale dhe përzierje me dëshmitarë në vitin 2005. Ai u dënua me dy vjet burg pas arritjes së marrëveshjes për pranimin e fajësisë të negociuar nga Kris Kristi.

Një burim anonim nga fushata, i cituar nga Politico, tha se “Z. Trump do ta bëjë vetë zgjedhjen e tij.”

Konventa Kombëtare Republikane do të mbahet javën e ardhshme më 18 deri në 21 korrik në Klivlend.

Kandidatja e pritshme presidenciale e Partisë Demokratike, Hillari Klinton po interviston gjithashtu politikanë për kandidatë për zëvendës president. Ajo pritet ta shpallë vendimin e saj javën e ardhshme.

Ndër të përmendurit është senatori nga Virxhinia Tim Kaine.

Burime nga rrethi i brendshëm i zonjës Klinton i thanë gazetës The Hill të mërkurën se z.Kaine “plotëson të gjitha kërkesat” si kandidat për nënpresident: një zëvendësues i fuqishëm në fushatë, por dikush me të cilin zonja Klinton sheh se mund të bashkëpunojë.

Në listën janë gjithashtu senatorja nga shteti Masaçusets Elizabeth Uarren, Sekretari i Punës Tom Perez, senatori nga Nju Xhersi Cory Booker dhe Sekretari i Strehimit Julian Kastro.

Zëdhënës nga fushata e zonjës Klinton thanë gjithashtu se do të shqyrtojnë kandidaturën e admiralit të Marinës Xhejms Stavridis, dekan i Shkollës Fletcher për Drejtësi dhe Diplomaci në Universitetin Tufts afër Bostonit dhe ish-komandant suprem i NATO-s.

Kuvendi Kombëtar Demokrat zhvillohet më 25-28 korrik në Filadelfia.

Presidenti i Shteteve të Bashkuara, Barack Obama, ka thënë se SHBA “nuk është as afër të qenët aty ku duhet të jetë” për të tejkaluar ndarjet midis policisë dhe komuniteteve që u shërben.

Obama ka thënë se duhet bërë më shumë për të krijuar besim te afrikano-amerikanët dhe hispanikët se dhuna e policisë do të hetohet siç duhet.

Ai i ka bërë këto komente në Uashington, pasi ka takuar aktivistë, politikanë dhe zyrtarë për sundimin e ligjit.

Deklaratat e presidentit pasojnë vrasjen e dy afrikano-amerikanëve nga policia në Luizianë dhe Minesotë.

Vrasjet kanë shkaktuar sulm hakmarrës nga një veteran afrikano-amerikan i ushtrisë, i cili ka vrarë pesë policë në Dallas, javën e kaluar.

Presidenti amerikan, Barack Obama ka arritur në Dallas ku po merr pjesë në homazhet ndërfetare për të nderuar policët e rënë disa ditë më parë derisa e ruanin një protestë paqësore në këtë qytet.

Kjo është hera e 11-të që Obama e viziton një rajon të SHBA-ve pas një tragjedie që përfshinë sulme me armë zjarri. Vizita po realizohet edhe në një kohë të rritjes së tensioneve racore në SHBA, pasi dy afrikano-amerikanë janë vrarë nga policia, për çka edhe po protestohej në Dallas derisa u kry sulmi.

Me qëllim që ta realizojë këtë vizitë, Barack Obama e ka shkurtuar turneun evropian javën e kaluar pasi mori pjesë në samitin dy ditor të NATO-s, në Varshavë.

Së bashku me Presidentin Obama, në aeroplanin presidencial “Air Force One” kanë udhëtuar edhe kundërshtar politik të tij, përfshirë Senatorin e Teksasit, Ted Cruz, me qëllim të lihen anash ndasitë në kohë tragjedish si ajo e Dallasit.

Në homazhet për policët e vrarë po merr pjesë edhe ish Presidenti amerikan, Xhorxh Bush i Riu.

Demonstratat për brutalitetin e policisë kundër meshkujve afrikano-amerikanë vazhduan në gjithë Shtetet e Bashkuara gjatë natës të së shtunës dhe në orët e para të së dielës.

Ditët e protestave filluan si reagim ndaj vrasjes së dy afrikano-amerikanëve javën e kaluar, një në Luiziana dhe tjetri në Minesota.

Të shtunën në Baton Rouge të Luizianës, DeRay McKesson, një anëtar i lëvizjes “Black Lives Matter” dhe një nga themeluesit një grupi aktivist të qujatur “Fushata Zero”, u arrestua ndërsa po regjistronte drejtpërdrejt në internet në një demonstratë për vrasjen nga policia të Sterling.

Policia e Baton Rouge thotë se arrestoi vetëm njerëz që dolën në rrugë në vend që të qendronin në trotuar.

Në Minesota, protestuesit bllokuan një autostradë kryesore pranë vendit ku u godit Philando Castile nga një oficer policie të mërkurën.

Policia amerikane ka vrarë një tjetër afro-amerikan të armatosur në Hjuston. Personi është vrarë nga agjentët pasi kishte nxjerrë një pistoletë dhe ua kishte drejtuar atyre.

Lajmin e bëjnë të ditur autoritetet lokale. Ngjarja ka ndodhur në jug të Hjustonit, Teksas, ku agjentët kanë vënë re personin e armatosur në rrugë, i cili thirrjes së tyre për të hedhur armën i është përgjigjur fillimisht duke e ngritur në ajër dhe më pas duke ua drejtuar.

Në këtë pikë, agjentët kanë hapur zjarr duke e qëlluar disa herë personin, një afro-amerikan, transmeton TCH.

Pasi është informuar mbi ngjarjet nga Evropa, ku ndodhet për samitin e NATO-s, presidenti Barack Obama ka vendosur të afrojë kthimin e tij në Shtetet e Bashkuara.

Kështu, presidenti do të mbërrijë nesërmbrëma në Uashington dhe në fillim të javës do të jetë në Dallas. Një i lënduar, që qan viktimat e tij e që, siç e përshkruajnë disa dëshmitarë, ka qenë skenë e një “lufte të vogël” që është kthyer në ditën më të zezë për policinë amerikane që prej 11 shtatorit 2001.

Drejtori i FBI, James Comey, iu ka thënë ligjvënësve amerikanë sot se kandidatja demokrate për presidente të ShBA-së, Hillary Clinton, nuk e ka gënjyer FBI-në rreth mënyrës se si i ka përdorur emailet si sekretare e Shtetit, dhe se nuk e ka shkelur ligjin, gjithashtu.

Comey ka thënë para panelit mbikëqyrës të udhëhequr nga republikanët në Dhomën e Përfaqësuesve se asnjë prokuror i arsyeshëm nuk do të kërkonte kallëzim penal për mënyrën e përdorimit të serverëve të emailit privat nga Hillary si sekretarësh e Shtetit, disa nga të cilët ishin përdorur për të transmetimin e informatave sekrete

Nuk do të jetë e lehtë për shqiptaro-amerikanen që kandidon si Demokrate në një zonë ku ka gati 20 vjet që fitojnë Republikanët dhe ku procesi në Partinë Demokrate përfundoi në konfuzion nga tërheqja e kandidates së parë.

Ndihmës-prokurorja nga Macomb, Suzana Shkreli ka tani shansin që të bëhet shqiptaro-amerikania e parë në histori që zgjidhet në Kongresin Amerikan.

Ajo është emëruar si kandidatja e preferuar nga Partia Demokrate për Distriktin e 8 Kongresional ku do të sfidojë kongresistin në fuqi, Republikanin Mike Bishop.

Demokratët shpresojnë se caktimi i shqiptaro-amerikanes do t’i japë fund gjendjes së konfuzionit të krijuar pasi kandidatja e tyre e parë, aktorja Melissa Gilbert, e njohur nga seriali televiziv “Little House on the Prairie” (Shtëpia e Vogël në Lëndinë) u tërhoq nga gara.

Aktorja hutoi Demokratët kur deklaroi se dhimbjet e mbetura nga një aksident i para disa vjetëve e bënin të pamundur konkurrimin e saj.
Problemi më i madh është se kjo tërheqje ndodhi shumë vonë. Kështu që në muajin gusht, kur Demokratët të paraqiten për të votuar për zgjedhjet paraprake ku do të caktojnë kandidaten e tyre për në nëntor, në fletëvotim do të jetë vetëm emri i Melissa Gilbert, transmeton shekulli. Demokratët duhet të shkruajnë me dorë emrin e Suzana Shkreli përndryshe do të mbeten me një kandidate që është tërhequr.

Është një gjendje e paqartë edhe sepse zyra e Sekretarit të Shtetit nuk ka bërë ende një vlerësim zyrtar të rastit të Milessa Gilbert.
Shqiptarët patën rastin ta njohin Suzana Shkrelin gjatë vizitës së saj të fundit në Shqipëri për të ndihmuar spcializimin dhe masat e autoriteteve aty në luftën kundër dhunës në familje.

Në SHBA, Suzana Shkreli punon në Njësinë e Mbrojtjes së Fëmijëve të Zyrës së Prokurorisë, në Kontenë Macomb.
“Si një prokurore e Kontesë Macomb në Njësinë e Mbrojtjes së Fëmijëve, unë përplasem me sfida të forta çdo ditë, për të mbrojtur fëmijët nga abuzimi seksual dhe dhuna”, thuhet në deklaratën e botuar nga fushata e saj.

Deklarata shton se, ndryshe nga ajo, kongresisti Mike Bishop dhe Kongresi në fuqi nuk guxojnë të përballen me sfidat e vështira.
“Prindërit e mi janë emigrant shqiptarë, klasë punëtore, që kanë punuar ditë e natë për të më ndihmuar motrën, vëllezërit dhe mua që të marrim një shkollim të mirë dhe të shkojmë në kolegj”, thuhet në deklaratën e saj që shpjegon se kjo është edhe arsyeja se pse Suzana Shkreli ka vendosur që karrierën e saj ta përdorë që të shprehë mirënjohjen duke ndihmuar që brezi që vjen pas saj të ketë të njëjtat mundësi.
“Në Kongres, do të punoj që të krijoj vende të mira punë, të përmirësoj shkollat, të mbaj armët larg nga duart e terroristëve, të kujdesem për veteranët, për t’i dhënë fund varësisë nga drogat dhe për të mbrojtur Sigurinë Sociale dhe Medicare”, rreshton ajo në listën e premtimeve të fushatës.

Suzana Shkreli ka një rrugë të gjatë për të arritur deri në Kongresin Amerikan. Së pari duhet të zgjidhë situatën në Partinë Demokrate, së dyti të marrë votëbesimin e demokratëve në muajin gusht dhe pastaj të bindë një zonë që ka 20 vjet që voton për Republikanët se është koha për ndryshim.

Për këtë sigurisht që do të ketë ndihmën e pakursyer të shqiptaro-amerikanëve. Po pa një organizim dhe fushatë të fortë në distriktin e tetë vështirë që ëndrra e saj të materializohet, sado ndihmë që të marrë nga jashtë.

Ajo vetë është optimiste për sfidën e re dhe e mbyll deklaratën e parë si candidate me dy fjalë kuptimplotë: “Jam gati!”

Voal – Votojeni edhe nëse nuk arrihet konsensusi

Pas negociatave mes palëve, apeleve të shumta publike, takimeve edhe kokë më kokë me deputetë të vecantë, ambasadori amerikan në vendin tonë, Donald Lu i është drejtuar sot me një letër gjithë deputetëtev të Kuvendit të Shqipërisë.

Ambasadori amerikan thekson se tani është koha që secili të vendosë për reformën, si një nga më të rëndësishmet për vendin.

“Është koha për të marrë një vendim, votimi është parashikuar më 21 korrik. Ka ende kohë që udhëheqësit të gjejnë një kompromis që të mbështetet nga opozita dhe mazhoranca. Nëse udhëheqësit politik nuk e duan konsensusin, ju bëjmë thirrje ta votoni reformën”, shkruan ambasadori amerikan.

Lu i kujton deputetëve të Kuvendit të Shqipërisë se në ndikimi politik në sistemin e drejtësisë kërcënon shoqërinë dhe dobëson aleancën.

“SHBA është një aleat strategjik i Shqipërisë. Ndikimi politik në sistemin tuaj të drejtësisë kërcënon shoqërinë dhe dobëson aleancën tonë. Si aleati NATO-s është në interesin kombëtar të SHBA që Shqipëria të mbetet një demokraci e fortë dhe e sigurtë”, shkruan më tej ai.

LETRA E PLOTE

Shtetet e Bashkuara kanë qenë dhe do të jenë gjithmonë aleati juaj strategjik në mbrojtje të sovranitetit të Shqipërisë dhe demokracisë shqiptare. Sot, korrupsioni dhe ndikimi politik në sistemin tuaj të drejtësisë kërcënojnë shëndetin e shoqërisë suaj dhe dobësojnë aleancën tonë. Si aleat i NATO-s, është në interesin kombëtar të Shteteve të Bashkuara që Shqipëria të mbetet një demokraci e fortë dhe e sigurt.

Prej gati dy vitesh kemi punuar në mbështetje të përpjekjeve tuaja për të reformuar sistemin tuaj të drejtësisë. Gjithashtu, kemi punuar në mënyrë konsekuente për tu siguruar që si zërat e opozitës, ashtu edhe të maxhorancës të kenë kontribuar në këtë reformë.

Komisioni i Posaçëm Parlamentar për Reformën në Drejtësi miratoi projekt reformën më 14 qershor. Votimi i plotë në Kuvend është planifikuar për datën 21 korrik. Tani është koha për të marrë një vendim.

Çështja e fundit

Përgëzojmë punën e bërë nga Komisioni i Posaçëm Parlamentar për Reformën në Drejtësi, si nga anëtarët e maxhorancës, ashtu edhe të opozitës. Si rezultat i punës së madhe dhe profesionalizmit të tyre, kanë krijuar një projekt që është më i mirë, më legjitim dhe më i pranuar më gjerësisht sesa projekti fillestar i ekspertëve të paraqitur në muajin shtator. Ky mbështetet si nga qeveria dhe nga opozita, me përjashtim të një çështjeje- kërkesës së opozitës për vendet e rezervuara.

Më e rëndësishmja, projekti i 14 qershorit i Komisionit të Posaçëm Parlamentar për Reformën në Drejtësi përmbush plotësisht standardet e Komisionit të Venecias dhe standardet europiane. Shtetet e Bashkuara dhe BE e kanë mbështetur këtë projekt. Kemi dëgjuar gjithashtu shqetësimet për paragrafin 88 të Opinionit Përfundimtar të Komisioni të Venecias.

Sugjerojmë që ndërsa merrni në konsideratë rekomandimet e Komisionit të Venecias, të lexoni që të dy paragrafët, si 61 dhe 88. Paragrafi 88 është një përmbledhje e të gjitha rekomandimeve të Komisionit të Venecias. Zgjedhja e komisionerëve të vlerësimit (vettingut) diskutohet më në hollësi në paragrafin 61. Për të përftuar një kuptim më të plotë mbi rekomandimet e Komisionit të Venecias ia vlen të lexohen të dy.

Sistemet proporcionale

Të dy paragrafët vërejnë se qeveria dhe opozita e kanë të vështirë të bien dakord për shumicën e cilësuar me 3/5 apo 2/3 e votave për zgjedhjen e anëtarëve të komisioneve. Komisioni i Venecias rekomandon që nëse të dy palët nuk mund të gjejnë kompromis, mund të marrin në konsideratë përdorimin e një sistemi proporcional. Ata nuk rekomandojnë apo përmendin kurrë modelin e vendeve të rezervuara.

Në fakt, ka një sërë sistemesh proporcionale, përfshi votën e vetme të transferueshme, votimin e balotazhit të menjëhershëm, votimin e shumëfishtë, eliminimin dhe votimin Kondorse. Secili prej këtyre sistemeve do të ishte tërësisht në përputhje me Komisionin e Venecias.

Shtetet e Bashkaura dhe Bashkimi Europian i kanë kundërshtuar vendet e rezervuara sepse kjo formulë do ti etiketonte menjëherë anëtarët e komisionit të vetingut ose pro qeverisë, ose pro opozitës. Vetingu ka për qëllim të kthejë besimin në gjyqësor duke larguar manipulimet partiake. Ndikimi i qartë politik sugjeron se modeli i vendeve të rezervuara do ta minonte këtë besim. Kemi vazhduar ta nxisim si qeverinë ashtu edhe opozitën të gjejnë një kompromis që është në përputhje me opinionin përfundimtar të Komisionit të Venecias dhe që do të shmangte etiketimin politik të anëtarëve të komisionit të vetingut.

Koha për të marrë një vendim

Së fundmi, ka ende kohë që udhëheqësit politikë të gjejnë një kompromis që të mund të mbështetet si nga opozita, ashtu edhe nga maxhoranca. Duhet ta mbështesim të gjithë kërkimin për kompromis. Megjithatë, nëse udhëheqësit politikë nuk e duan kompromisin dhe nuk bien dakord për një tekst të përbashkët, ju bëjmë thirrje që ju ta votoni reformën. Paragrafi 87 (bashkëngjitur) i raportit të Komisionit të Venecias thotë se projekti i tanishëm i reformës është një propozim koherent e i shëndoshë dhe se është në përputhje me standardet evropiane.

Shtetet e Bashkuara besojnë se kjo reformë është jetike për të ardhmen e vendit tuaj. Ju bëjmë thirrje që më 21 korrik të votoni pro reformës në Drejtësi.

Sinqerisht

Donald Lu

Bashkëngjitur: Opionioni Përfundimtar i Komisionit të Venecias, paragrafët 61, 87 dhe 88.

Projekt Opinioni përfundimtar për projekt ndryshimet e rishikuara kushtetuese për gjyqësorin

61. Faza e dytë është zgjedhja e kandidatëve me 3/5 e votave në parlament. Opozita, si në rastin e KLGJ dhe KLP insiston që anëtarët e KPK të zgjidhen me 2/3 e votave. Komisioni i Venecias përsërit që të gjitha zgjidhjet do të ishin të ligjshme;megjithatë për të shmangur ngërcin politik, i cili është tepër i mundur në një rast të një pragu tepër të lartë, ligjbërësi mund të konsiderojë modele të tjera alternative të zgjedhjes së anëtarëve të KPK-së dhe të DHSK-së. Thënë kjo, Komisioni i Venecias përsërit që i takon ligjëbërësit shqiptar të zgjedhë një sistem të duhur për zgjedhjen e anëtarëve të KPK dhe të gjyqtarevë të DHSK.

87. Projekt ndryshimet kushtetuese përmbajnë propozime të qëndrueshme për strukturën e ardhshme institucionale të gjyqësorit shqiptar; teksti në tërësi është koherent dhe në përputhje me standardet evropiane. Komisioni i Venecias beson që projekt ndryshimet mund të finalizohen pa vonesë dhe t’i paraqiten për votim parlamentit.

88. Me qëllim përgatitjen e tekstit përfundimtar, Komisioni i Venecias i rekomandon autoriteteve shqiptare që t’i kushtojnë vëmendje çështjeve të mëposhtme:

Nëse palët në procesin politik nuk pranojnë shumicën e cilësuar të kërkuar për anëtarët jo gjyqtarë të KLGJ, KLP,KPK dhe DHSK, ata mund të zgjedhin një sistem proporcional që garanton përfaqësimin e opozitës mes organeve kolektive ose cdo model tjetër të përshtatshëm që do të siguronte ndikimin e opozitës në procesin e përzgjedhjes;

Projekt ndryshimet duhet të specifikojnë metodën e emërimit të Kryeprokurorit të Posaçëm dhe mekanizmat e llogaridhënies nga ana e tij/saj;

Mandati i organeve vlerësuese (KLK dhe DHSK) duhet të shkurtohet ndjeshëm; gjyqtarët e DHSK në përfundim të mandatit të tyre duhet të përfshihen automatikisht në gjyqësor;

Gjyqtarët dhe prokurorët në proces vlerësimi duhet të kenë të drejtë të ankomojnë në GJK për shkeljen e të drejtave të tyre themelore, me disa përjashtime të arsyeshme të diktuara nga domosdoshmëria e procesit të vlerësimit.

Kompetencat e vëzhguesve ndërkombëtar duhet të qartësohen; ata duhet të kenë të drejta procedural, por jo kompetenca vendim-marrëse. Mekanizmi i transferimit të juridiksionit mbi çështjen nga një panel/dhomë tek një tjetër duhet të rishikohet