Presidenti amerikan Barak Obama tha se komentet kritike të kandidatit republikan Donald Trump në lidhje me familjen e një ushtari mysliman amerikan të vrarë në Irak, janë vetëm një shembull se përse ai nuk është i aftë për të qenë president i Shteteve të Bashkuara.

Presidenti u pyet për të shprehur mendimin e tij mbi komentet e zotit Trump gjatë një konference shtypi në Shtëpinë e Bardhë me kryeministrin e Singaporit, Lee Hsien Loong.

Presidenti vuri në dukje gjithashtu se komentet e zotit Trump për inkursionet ruse në Ukrainë, tregojnë se kandidati republikan nuk ka njohuritë themelore për çështjet ndërkombëtare bazë. Zoti Obama tha se kundërshtimet e tij ndaj zotit Trump nuk kanë lidhje me politikën partiake:

“Ka pasur presidentë republikanë me të cilët unë nuk kam qenë dakord, por nuk kam patur dyshim se ata mund të funksiononin si presidentë,” tha zoti Obama, duke përmendur ish-kandidatët Mitt Romney dhe John McCain. “Jam i sigurt, – tha Presidenti, – se ata do të vepronin në përputhje me disa nga normat dhe rregullat e njohura si dhe do të respektonin mirësjelljen themelore. Por rasti i tanishëm është ndryshe.”

Presidenti vuri në dukje se edhe disa republikanë të njohur kanë dënuar shumë nga deklaratat e zotit Trump. Ai tha se nuk beson që zoti Trump ndan pikëpamjet e shumicës së partisë së tij.

Presidenti Obama tha se çështja tani është se kur ata do t’i thonë “mjaft” kandidatit Trump dhe do të tërheqin mbështetje e tyre ndaj tij.

Trump përdor një epitet të ri për rivalen Clinton

Kandidati republikan për president, Donald Trump përdori një epitet të ri për rivalen e tij demokrate Hillary Clinton, duke e quajtur atë “djalli”.

Zoti Trump, duke folur dje në Pensilvani, komentoi me sarkazëm për kapitullimin e kandidatit Bernie Sanders në garën brenda Partisë Demokrate si dhe për vendimin e senatorit që mbështeti rivalen Clinton.

Zoti Trump tha për senatorin Sanders: “Ai bëri marrëveshje me djallin. Ajo është djalli.”

Kandidati Trump tha gjithashtu se zoti Sanders nuk kishte kurrsesi shanse për t’i fituar zgjedhjet, sepse gara paraprake në Partinë Demokrate ishte sipas tij “e manipuluar”.

Debati i kandidatit republikan për president Donald Trump me prindërit e një ushtari myslimano-amerikan të vrarë në Irak u ringjall përsëri të hënën.

Senatori i Arizonës John McCain, ish i burgosur lufte në Vietnam në vitet 1960, e qortoi kandidatin Trump për komentet përçmuese ndaj zotit Khizr Khan dhe gruas së tij Ghazala, për faktin që ata përmendën djalin e tyre në Kuvendin Kombëtar Demokrat javën e kaluar. I biri i tyre u vra nga një bombë në vitin 2004 në Irak.

Çifti Khan ka mbështetur zonjën Hillary Clinton, dhe ka vazhduar të flasë kundër zotit Trump në intervista televizive.

Zoti McCain përmendi se zoti Khan ka lënë të kuptohet se njerëz si kapiteni Humayun Khan, nuk duhet të lejohen në Shtetet e Bashkuara – pa folur për të shërbyer në ushtrinë amerikane.

“E kam të vështirë ta theksoj mjaftueshëm se sa shumë nuk jam dakord me deklaratën e zotit Trump”, tha senatori McCain. “Shpresoj se amerikanët e kuptojnë që komentet e tij nuk përfaqësojnë qëndrimet e Partisë sonë Republikane, të zyrtarëve apo të kandidatëve të saj.”

Kandidati republikan për president Donald Trump po i pakëson lëvdatat e tij për Rusinë dhe udhëheqësin e saj autoritar Vladimir Putin, të cilat i krijuan telashe. Pasi i bëri thirrje Rusisë të gjejë 30 mijë emaile të rivales demokrate Hillary Clinton, zoti Trump u tha gazetarëve se nuk e njeh personalisht zotin Putin dhe se nuk e ka quajtur kurrë një udhëheqës të madh, por vetëm një udhëheqës më të mirë se Presidenti Barack Obama. Zoti Putin i ka mirëpritur elozhet e zotit Trump, por rusët e zakonshëm nuk i besojnë atij shumë.

Në fillimet e fushatës së tij presidenciale, zoti Trump tha se nëse do të zgjidhej, ai do t’ia kalonte mirë me zotin Putin:

“Unë i pëlqej njerëzit që më kanë qejf. Madje edhe Putinin. Më kërkojnë që ta refuzoj, por ai ka thënë se Donald Trump është gjeni dhe udhëheqësi i ardhshëm.”

Presidenti rus ka reaguar më i kujdesshëm:

“Donald Trump është pompoz. Nuk kam dhënë vlerësim tjetër për të. Ajo që unë mirëpres është se zoti Trump ka thënë që është i gatshëm të restaurojë marrëdhëniet mes Rusisë dhe SHBA. Kjo nuk është diçka e gabuar. Të gjithë e mirëpresim, apo jo?”

Rusët e zakonshëm flasin më hapur për atë çfarë mendojnë rreth zotit Trump:

“Nuk më duket njeri pozitiv. Një president duhet të jetë modest, i përmbajtur dhe jo emocional. Si Putini ynë,”- thotë Galina, një qytetare e Moskës.

Gjithashtu, rusët nuk janë të sigurtë se zoti Trump mundet të transformojë marrëdhënien ndërmjet Shteteve të Bashkuara dhe Rusisë.

“Mendoj se do të ketë një impakt në marrëdhëniet tona me SHBA-në, por ai nuk do të jetë i madh. Në fund të fundit, çfarë ka rëndësi është ajo që kandidatët do të bëjnë dhe jo thëniet me të cilat të shokojnë; nuk është ky kriteri që duhet konsideruar në përzgjedhjen e një presidenti,” – thotë Kristina.

Zoti Trump nuk është lloji i personit që do të dëshironte zoti Putin, thotë një gazetar rus:

“Zotin Putin ndoshta shpreson në ndarjen e botës në zona influence me zotin Trump, por nuk mendoj se Donald Trump është ky lloj personi.”

Por këtë javë, Komiteti Kombëtar Demokrat dhe zyrtarët e fushatës Clinton e akuzuan Moskën për ndërhyrje në servera dhe vjedhje të emaileve ku tregohet qëndrimi preferencial ndaj zonjës Clinton përkundër rivalit Sanders. Qeveria amerikane po shqyrton me seriozitet këto akuza dhe mediat po shqyrtojnë lidhjet e biznesit të zotit Trump me Rusinë.

Zoti Trump sqaroi se pati folur me sarkazëm kur i bëri thirrje Rusisë të gjejë emailet e Hillary Clinton. Ai gjithashtu i uli tonet lavdëruese për zotin Putin.

Voal – Euralius dorëzoi mbrëmë në kuvend ligjin për vetingun të ripunuar bashkë me ultimatumin e SHBA-së dhe BE-së për ta miratuar nesër dhe jo në shtator.

Euralius ka përpunuar ligjin për vetingun, pas miratimit të ndryshimeve kushtetuese për reformën në drejtësi. Burime zyrtare të 27.al thanë se projektligji i punuar ka mbërritur mbrëmë tek deputetët e mazhorancës dhe opozitës me qëllim që ai të miratohet në seancën parlamentare të së enjtes.

Është fjala për Projektligjin “Për Rivlerësimin e Gjyqtarëve dhe Prokurorëve në Republikën e Shqipërisë”. Ky është një nga shtatë ligjet e reformës në drejtësi, i cili do të duhet të miratohet patjetër brenda korrikut.

Megjithse Kuvendi i Shqipërisë e kishe shtyrë për në shtator miratimin e shtatë ligjeve, ky projektligj me sa duket është i domosdoshëm të miratohet tani, brenda korrikut pasi është thelbësor për të bërë funksionale ndryshimet kushtetuese.

Bashkimi Evropian dhe SHBA i kanë kërkuar politikës shqiptare të mos shtyjë miratimin e shtatë ligjeve ose të paktën njërin prej tyre duhet ta miratojë medoemos brenda korrikut.

Është me kaq rëndësi ky ligj pasi ka të bëjë me nisjen e punës për prokurorët që do të kryejnë procesin e  vetingut.

Sipas projektit të ekspertëve ndërkombëtarë, dhjetë prokurorët do të duhet të nisen për trajnim në SHBA pranë FBI-së dhe i gjithë procesi i trajnimit do të duhet të përfundojë brenda tre muajve.

Sipas parashikimit të ndërkombëtarëve, pas trajnimit dhjetë prokurorët do të nisin punë në fundin e muajit tetor për të dhënë rezultatet e para të reformës në drejtësi në nëntor.

Për këtë arsye, ambasada e BE-së dhe SHBA-së ka kërkuar nga Kuvendi i Shqipërisë të miratojë shtatë ligjet brenda korrikut dhe në pamundësi për t’i miratuar të gjitha, të paktën një prej tyre duhet miratuar patjetër.

Ai është ligji ku përfshihet edhe procesi i vetingun, Projektligji “Për Rivlerësimin e Gjyqtarëve dhe Prokurorëve në Republikën e Shqipërisë”.

Kryetarja e Partisë Demokrate, Debbie Wasserman Schultz dha dorëheqjen të dielën, në prag të Kuvendit Kombëtar të partisë që do të emërojë zyrtarisht ish-sekretaren e Shtetit Hillary Clinton si kandidaten presidenciale të partisë për zgjedhjet e nëntorit.

Kryetarja e Komitetit Kombëtar Demokratik, hoqi dorë nga posti, mes zemërimit lidhur me emailat e nxjerra nga WikiLeaks që tregojnë se udhëheqësit e partisë ishin tallur dhe kishin kritikuar fushatën e Senatorit Bernie Sanders, një sfidë e papritur për fushatën e zonjës Clinton.

Zonja Wasserman Schultz, një anëtare e Kongresit nga Florida, pritej të jepte dorëheqjen në fund të javës.

WikiLeaks ka bërë publike afro 20 mijë emaile nga udhëheqësit e Partisë Demokratike gjatë një viti e gjysëm.

Pasi u njoftua për dorëheqjen e saj, ai nxorri një deklaratë ku thuhej “se “Debbie Wasserman Schultz mori vendimin e duhur për të ardhmen e Partisë Demokrate. Megjithëse ajo meriton të falenderohet për vitet e saj të shërbimit, partia ka tani nevojë për një udhëheqje të re që do të hapë dyert dhe të mirëpresë njerëz të rinj”.

Zonja Clinton prezantoi të shtunën zotin Kaine si kandidatin e saj për nën president, duke thënë se të dy ata “ofrojnë një vizion shumë të ndryshëm për Amerikën”, nga republikanët, duke theksuar se ky vizion është “ndërtimi i urave dhe jo i mureve”. Ajo tha se Kuvendi i Demokratëve javën e ardhshme do të përqëndrohet tek mesazhi se “diversiteti etnik” e bën më të fuqishme Amerikën.

Ndërkohë, një grup pune i Partisë Demokrate që po shqyrton rregullat e partisë, ka votuar kundër heqjes së sistemit të superdelegatëve, të kërkuar nga mbështetësit e ish-kandidatit Bernie Sanders.

Roli i superdelegatëve ishte tema kryesore e diskutimit në mbledhjen e Komisionit të Rregullave që u mbajt të shtunën.

Superdelegatët, zyrtarët e zgjedhur dhe ata të brendshëm të partisë, të cilët mund të votojnë për kandidatin e tyre të preferuar në kuvendin e partisë, mbështesin fuqishëm ish sekretaren Clinton. Ajo ka mbështetjen e 602 superdelegatëve kundrejt 48 prej tyre që janë zotuar se do të mbështesin rivalin e saj demokrat.

Senatori Bernie Sanders vazhdimisht ka thënë se ai dëshiron që roli i superdelegatëve të rishqyrtohet.

Në vend të kësaj, pas takimit të së shtunës ai mori premtimin e partisë për të krijuar një komision për hartimin e ndryshimeve në sistemin superdelegatëve, që duhet të dalë me një raport mbi këtë çështje në vitin 2018, dy vjet para zgjedhjeve të ardhshme presidenciale.

Senatori Sanders, megjithatë, ishte në gjendje të lërë gjurmë në platformën e fushatës së partisë. Një draft i platformës së partisë demokrate përfshin propozimet për rritjen e pagës minimale në nivel federal në 15 dollarë në orë, heqjen e dënimit me vdekje dhe shkollimin shkollim falas për disa studentë universiteti, parimet themelore të fushatës së zotit Sanders.

Demokratët duan të paraqesin veten në Kuvend si një parti e bashkuar. Megjithatë, publikimi iemaileve të Komitetit Kombëtar Demokrat, duke detajuar përçarjet mes Kuvendit Kombëtar të Partisë Demokrate dhe senatorit Sanders, mund të dëmtojnë synimin për unifikim të partisë.

Tymi dhe flaka kanë mbuluar një pjesë të Los Angelosit përderisa 20 mijë hektarë tokë pune jashtë djegur jashtë kontrollit në pjesën veriore të qytetit duke detyruar mbi 1 mijë persona të largohen nga shtëpitë e tyre, shkruan dailymail.

Zjarri i nisur nga nxehtësia e madhe dhe i ndihmuar nga era, nisi në Santa Clarita. Më shumë se 20 mijë hektarë toke janë shkatërruar transmeton zeri.info.

Mbi 900 zjarrfikës janë duke “luftuar” me zjarrin.

Autoritetet thonë se trupi i një personi të vdekur është gjetur në mesin e tymit, shkruan dailymail, transmeton zeri.info.

Ndërkohë qindra persona janë evakuar nga shtëpitë e tyre.

Kandidatja demokrate për presidente, Hillary Clinton dhe senatori i Virgjinias Senator Tim Kaine zhvilluan për herë të parë bashkë fushatë, me një mesazh optimizmi, pas Kuvendit të Republikanëve, ku shumë nga folësit paralajmëruan se Amerika është në rënie. Mitingu u zhvillua në Universitetin e Majamit, në Florida.

Zonja Clinton e prezantoi zotin Kaine si kandidatin e saj për nën president, duke thënë se të dy ata “ofrojnë një vizion shumë të ndryshëm për Amerikën”, nga republikanët, duke theksuar se ky vizion është “ndërtimi i urave dhe jo i mureve”. Ajo tha se Kuvendi i Demokratëve javën e ardhshme do të përqëndrohet tek mesazhi se “diversiteti etnik” e bën më të fuqishme Amerikën.

Zonja Clinton e përshkroi zotin Kaine si një njeri që lufton për pakicat, i cili përfaqëson “gjithshka që nuk e kanë Donald Trump dhe Mike Pence”. Ajo theksoi mbështetjen e tij për kufizimin e armëve, për të drejtën e grave për abort, të drejtat e homoseksualëve dhe për reformën e imigracionit.

Zoti Kaine foli disa herë spanjisht gjatë fjalimit të tij, gjatë të cilit ai përmendi familjen, vlerat e saj, dhe për karrierën e tij si kryetar bashkie, guvernator dhe senator. Ai tha se familja e tij mishëron vlerat amerikane të “besimit, familjes dhe punës.”

58 vjeçari Kaine ka lindur në Minesota dhe ai ka studjuar për juridik në Universitetin prestigjioz të Harvardit.

Voal – Departamenti amerikan i Shtetit tha se miratimi i reformës në drejtësi është një hap historik për demokracinë e Shqipërisë.

Zëdhënësja Elizabeth Trudeau uroi popullin e Shqipërisë dhe tha se “miratimi i njëzëshëm i reformës është një deklaratë e fuqishme e bashkimit kombëtar.” Udhëheqësit e Shqipërisë, tha ajo, e kanë venë vendin në anën e duhur të drejtësisë në histori dhe e kanë çuar më tej në rrugën euroatlantike.

“Ky sukses, – tha zëdhënësja, – i takon popullit dhe shoqërisë civile shqiptare, që nuk hoqën dorë nga kërkesat e tyre për ndryshim. Shtetet e Bashkuara janë të angazhuara ta ndihmojnë Shqipërinë për ta vënë në zbatim këtë reformë me sukses.”

Kandidatja e pritshme demokrate për presidente Hillary Clinton duket se është pranë shpalljes së kandidatit të saj për nënpresident.

Ajo po shqyrton kandidaturat e një grupi të vogël pretendentësh për këtë post, në krye të të cilëve është senatori Tim Kaine i shtetit Virginia.

Gazeta Wall Street Journal, duke citur burime nga Partia Demokrate, tha se zonja Clinton mund ta bëjë njoftimin qysh sot dhe se Tim Kaine besohet se do të jetë kandidati i saj për nënpresident.

Dje zonja Clinton bëri fushatë me zotin Kaine në Virginia. Mes pretendentëve të tjerë janë senatori Cory Booker i Nju Xhersit dhe Sekretari i Bujqësisë, Tom Vilsack. Zonja Clinton pritet ta bëjë njoftimin përmes Twitterit.

Kuvendi i Republikanëve u mbyll të enjten mbrëma në Klivlend të Ohajos, me fjalimin e kandidatit për President Donald Trump, pika kulmore e një jave që pati momente befasuese dhe dramatike dhe që tregoi se ndasitë e krijuara nga fushata ende nuk janë zhdukur në Partinë Republikane.

Ngjitja e pazakontë e manjatit miliarder, pa përvojë politike në njërën prej dy forcave mbizotëruese politike në Shtetet e Bashkuara, duke u bërë kandidati i saj, është një rast i pashembullt në politikën amerikane.

Në fillim të fjalës së tij zoti Trump, tha se e pranonte emërimin me përulësi dhe me mirënjohje.

“Ne do të jemi një vend bujarie dhe ngrohtësie, por edhe një vend i ligjit dhe rendit”, tha ai.

Ai u prit me entuziazëm nga të pranishmit.

Shumë shpejt, ai u përqendrua tek rastet e dhunës në Shtetet e Bashkuara.

“Amerikanët që po shohin sot këtë fjalim, i kanë parë imazhet e dhunës të kohëve të fundit në rrugët tona dhe kaosin në komunitetet tona. Shumë kanë qenë personalisht dëshmitarë të dhunës dhe disa edhe viktima të saj. Kam një mesazh për të gjithë ju: Krimi dhe dhuna që sot ka prekur vendin tonë, do të përfundojë së shpejti. Që nga 20 janari 2017, do të vendoset siguria”.

Një pjesë e mirë e fjalimit të zotit Trump, ishte përqendruar tek sulmet ndaj rivales së pritshme të tij, Hillary Clinton. Madje kritikat e ashpra vinin në qendër njëkohësisht administratën e presidentit Obama dhe zonjën Clinton si pjesë e saj.

“Amerika është më pak e sigurt – dhe bota shumë më pak e qëndrueshme – sesa kur zoti Obama mori vendimin që të vinte Hillary Clintonin në krye të politikës së jashtme të Amerikës”, tha ai.

Ai shtoi se me siguri presidenti Obama është penduar për atë vendim.

“Instinktet e saj të dobëta, dhe gjykimi i saj i keq – diçka që e ka vënë në dukje edhe Bernie Sanders – kanë shkaktuar shumë nga katastrofat që po shfaqen sot”.

Ai premtoi se mund ta ndryshojë gjendjen dhe përcolli mesazhin se gjërat duhet të ndryshojnë.

“Përsa kohë të udhëhiqemi nga politikanë që nuk vënë Amerikën para së gjithash, atëherë vendet e tjera nuk do ta trajtojnë Amerikën me respekt. Kjo do të ndryshojë kur unë të marr detyrën”.

Ai tha se çdo ditë zgjohet i vendosur që të përmirësojë jetën për të gjithë qytetarët e vendit që ai tha se “janë neglizhuar, injoruar dhe braktisur”.

Toni i zotit Trump la të kuptohet se ai po përpiqet ta ndryshojë imazhin si një njeri me një retorikë të ashpër që është bërë objekt kritikash të shumta.

Por edhe më pak se 24 orë para fjalimit, ai ngjalli debate kur tha për gazetën New York Times, se do të vërë kushte për mbrojtjen e aleatëve të NATO-s ndaj një sulmi të mundshëm, një qëndrim që u kundërshtua menjëherë nga Uashingtoni dhe vende të tjera.

Përveç kësaj, refuzimi i Senatorit Ted Cruz për të mbështetur kandidaturën e zotit Trump, nxori në pah përçarjet dhe mosmarrëveshjet që ekzistojnë mes republikanëve.

Zoti Trump u prezantua nga vajza e tij, Ivanka, e cila paraqiti një anë më personale të tij dhe u tha të pranishmëve se ai do të luftojë për të gjithë.

Me përfundimin e Kuvendit Republikan në Klivlend, vëmendja zhvendoset tek kampi demokrat. Zonja Clinton mendohet se do të deklarojë emrin e personit që do të zgjedhë si kandidat për nënpresident këtë fundjavë.

Të hënën në Filadelfia, hapet Kuvendi i Partisë Demokrate ku zonja Klinton do të emërohet zyrtarisht si kandidate e partisë së saj.

Deklaratë nga Ambasadori i SHBA Donald Lu pas votimi të reformës :

“Përkushtimi juaj e ka bërë Shqipërinë një vend më të drejtë dhe më demokratik.

Përgëzoj parlamentin për gjetjen e konsensusit nën trysni jashtëzakonisht të madhe.”

SHBA janë krenare që kanë mbështetur hartimin dhe negocimin e kësaj pakete reforme të fortë…”

…presim me kënaqësi të vazhdojmë partneritetin tonë jetëgjatë, e cila tani është shumë më e fortë.”

Miratimi i reformës në drejtësi, mbi të gjitha, është një fitore për popullin shqiptar.”