VOAL

VOAL

Trumpi: Do të takohesha me Putinin para inaugurimit

Donald Trumpi gjatë një fushate të tij

Kandidati republikan për president amerikan Donald Trump, thotë se nëse zgjidhet do ta shqyrtonte mundësinë e takimit me presidentin e Rusisë, Vladimir Putin, para inaugurimit në janar të vitit të ardhshëm.

Këto komente të zotit Trump të bëra mbrëmë vonë në një intervistë për një radio, ishin të fundit që kanë tërhequr vërejtjen për afinitetin e tij ndaj liderit rus, qeveria e të cilit është akuzuar për përzierje në zgjedhjet e Shteteve të Bashkuara.

“Problemi është se Putin nuk ka aspak respekt për Obamën”, i tha Trump moderatorit të radios, Michael Savage, dhe ka shtuar se “nëse fitoj më 8 nëntor, mund ta shoh vetveten në takimin me Putinin para fillimit të administratës sime”.

Rivale e Donald Trumpit në zgjedhjet më 8 nëntor është kandidatja demokrate, Hillary Clinton.

Dy gra të tjera akuzojnë Trumpin për ngacmime të padëshiruara seksuale

Dy gra të tjera po akuzojnë kandidatin republikan Donald Trump për ngacmime të padëshiruara seksuale ndaj tyre.

Një pjestare e emisionit televiziv “The Apprentice,” u tha gazetarëve se biznesmeni e puthi dhe e sulmoi në hotelin ku ajo kishte shkuar për të diskutuar një punë të mundshme. Summer Zervos ishte pjestare e emisionit në vitin 2006.

Në një artikull të publikuar sot nga Gazeta Washington Post, Kristin Anderson tha se Trump bëri ngacmime seksuale të padëshiruara ndaj saj në një klub nate në Nju Jork në fillim të viteve 1990.

46 vjeçarja, banore në Kaliforninë e Jugut tha se ajo e shtyhu dhe u ngrit nga një kolltuk ku ishte ulur. Anderson tha se ajo dhe shoqëruesit e saj “u neveritën” nga incidenti, që ajo tha se zgjati më pak se 30 sekonda.

Anderson tha se ishte e rezervuar për të treguar historinë e saj publikisht, por u bind pasi gazeta New York Times dhe revista People Magazine publikua në fillim të javës historinë e një gruaje që ishte sulmuar seksualisht nga Trump.

Trump i mohoi të gjitha akuzat gjatë një mitingu sot në Greensboro të Karolinës së Veriut. “Unë po sulmohem pamëshirshëm me gënjeshtra dhe fyerje,” u tha Trump përkrahësve. “Nuk e kam idenë se kush janë këto gra.” Ai shtoi se akuzat janë “100 përqind të fabrikuara.”

Më parë, kandidati i tij për nënpresident, Mike Pence, premtoi se do të publikoheshin prova që hedhin poshtë pretendimet kundër zotit Trump.

“Para se të përfundojë kjo ditë, do të ketë më shumë prova që do të vënë në pikëpyetje akuzimet e fundit,” tha zoti Pence në një program televiziv sot paradite.

“E di që ka më shumë informacione që do të bëhen publike dhe do të mbështesin pretendimin e tij se të gjitha këto akuza janë kategorikisht fallco”, shtoi Pence.

Në disa intervista televizive sot paradite, Pence fajësoi agjencitë e medias për pretendimet e “pabaza” kundër Trumpit, i cili thotë se akuzuesit e tij janë pjesë e një konspiracioni ndërkombëtar për ta diskredituar atë si udhëheqës të një lëvizje jashtë politikës.

“Makineria e Clintonit është në qendër të kësaj strukture të fuqishme” tha Trumë gjatë një mitingu të enjten në West Palm Beach të Floridas. “Kushdo që sfidon kontrollin e tyre konsiderohet seksist, racist, ksenofob dhe moralisht i deformuar.”

Obama: Shoqëria vlerësohet nga mënyra e trajtimit të grave

Kandidatja demokrate Hillary Clinton nuk kishte mitingje të planifikuara për fushatën sot, por Presidenti Barack Obama bëri fushatë në emër të saj në një tubim në Klivlënt të Ohajos. Obama adresoi polemikat e Trumpit duke iu referuar deklaratave të bëra të enjten nga zonja e pare, Michelle Obama. Pa përmendur emrin e Trumpit, zonja Obama tha se deklaratat e bëra prej tij në lidhje me gratë dhe trupat e tyre ishin “mizore” dhe “të frikshme”.

“Një nga matësit e çdo shoqërie është mënyra sesi trajton gratë”, tha presidenti. “Si i trajton vajzat? A trajtohen ato me respect dhe dinjitet? Dhe në se besoni se jemi më mirë nga ato që kemi dëgjuar, lajmi i mirë është, siç e theksoi edhe dje Michelle, se mund të bëjmë diçka për këtë”, tha presidenti.

Trump, ndërkohë ka kundërshtuar me forcë akuzat e bëra nga gratë në gazetat The New York Times, The Palm Beach Post, dhe revistën People Magazine se i ka sulmuar seksualisht ato. Në një miting në Florida, Trump i cilësoi historitë si “totalisht dhe absolutisht fallco”.

Trump kërkoi që Gazeta të tërhiqte artikullin dhe kërcënoi se do të ndërmerrte veprime ligjore. Një avokat i gazetës tha se New York Times i qëndron besnik artikullit dhe mirëpret shansin për ta takuar zotin Trump në gjyq.

Michelle Obama dënon komentet e Donald Trumpit

Zonja e Parë, Michelle Obama dënoi personalisht komentet e Donald Trumpit për gratë. Ajo u bëri thirrje votuesve të refuzojnë kandidaturën e tij dhe vulgaritetin në rritje të fushatës dhe të mbështesin kandidaten demokrate Hillary Clinton.

Zonja e Parë Michelle Obama u tha përkrahësve të zonjës Clinton në shtetin verilindor Nju Hempshër se komentet e kandidatit republikan Donald Trump për gratë nuk duhet të hidhen poshtë thjesht si “një episod shqetësues në një sezon të trishtuar zgjedhjesh”:

Kjo nuk ishte vetëm një bisedë e fëlliqur. Kjo nuk ishte vetëm bisedë meshkujsh. Ky është një individ i fuqishëm që flet lirisht dhe hapur për sjelljen seksuale grabitqare dhe në fakt që mburret rreth puthjeve dhe sulmet ndaj grave duke përdorur një gjuhë aq të turpshme sa që shumë prej nesh shqetësohemi për fëmijët kur hapim televizorin.”

Gjatë një mitingu për kandidaten demokrate Hillary Clinton në Manchester, zonja e parë tha se fjalët e zotit Trump e kanë tronditur jashtë mase:

“Komentet e turpshme rreth trupave tanë, mosrespektimi i ambicjeve dhe intelektit tone, besimi se mund të bësh gjithçka ndaj një gruaje. Është e neveritshme, e frikshme. Dhe e vërteta dhëmb.”

Në intervistat me gazetën New York Times të mërkurën, dy gra akuzuan Trumpin se i kishte prekur në mënyrë të papërshtatshme – pretendim që kandidati republikan e quajti të sajuar.

Raporti u pasua nga një seri akuzat nga disa gra të tjera, duke i bërë më shumë presion zotit Trump ndërsa ai mbetet prapa zonjës Clinton në anketat e opinionit.

Fushata e tij po mundohej të përballonte krizën pas videos së javës së kaluar që tregonte kandidatin duke u mburrur në vitin 2005 rreth ngacmimeve ndaj grave dhe sulmeve të padëshiruara seksuale.

Fushata e zotit Trump publikoi një letër që avokati i tij i dërgoi gazetës ku i kërkon asaj të tërhiqte shkrimin, duke e quajtur atë shpifje dhe duke kërcënuar me veprime ligjore në se gazeta nuk e bënte këtë.

Një anketë e opinionit tregon se një në pesë republikanë mendojnë se komentet e zotit Trump për gratë e skualifikojnë atë për të marrë presidencën. Anketa tregon gjithashtu se ai është 8 pikë pas zonjës Clinton.

Akuza kundër Trumpit për sulme seksuale

Disa gra kanë akuzuar kandidatin republikan për president të SHBA-së, Donald Trump, për sulme seksuale.

Gazeta New York Times ka publikuar një raport që citon Jessica Leeds, nga Nju Jorku, duke thënë se Trump i ka prekur gjinjtë dhe ka bërë përpjekje t’ia fusë dorën nën fund.

Leeds ka thënë se rasti ka ndodhur në një fluturim, rreth 30 vjet më parë.

Një tjetër grua, Rachel Crooks nga Ohajo, i ka thënë gazetës se Trump e ka puthur në buzë përkundër dëshirës, në kompleksin Trump Towers në Nju Jork, më 2005.

Në anën tjetër, gazetarja e revistës People, Natasha Stoynoff, ka publikuar një artikull për një incident të vitit 2005, duke thënë se Trump e ka mbështetur për mur dhe se i “ka futur gjuhën në fyt”.

Fushata e Trumpit i ka hedhur poshtë të gjitha pretendimet.

Ato vijnë pak ditë pas daljes në publik të një videoje nga vitit 2005, ku Trump bën komente vulgare për gratë. Trump ka kërkuar falje për këtë incizim.

Uragani Nicole niset drejt SHBA-ve, në Bermude gjendje gadishmërie

Qendra për informim për uragane (NHC) e SHBA-ve tha se pret që sot uragani Nicole me shpejtësi prej 130 kilometra në orë të godase Bermudet

NJU JORK – Pas uraganit shkatërrues Matthew pritet që Bermudet t’i godasë stuhia tropikale Nicole e cila është transformuar në uragan.

Qendra për informim për uragane (NHC) e Shteteve të Bashkuara të Amerikës (SHBA) tha se pret që sot uragani Nicole me shpejtësi prej 130 kilometra në orë të godasë Bermudet.

Zyrtarët paralajmëruan banorët që të jenë në gadishmëri për shkak të uraganit. Ministri i Sigurisë i Bermudeve, Jeff Baron tha se uragani paraqet kërcënim serioz ndaj Bermudeve dhe pritet të godasë SHBA-të. aa

FBI po heton lidhur me përfshirjen e Rusisë në sulmet kibernetike

Fushata e kandidates demokrate për presidente amerikane, Hillary Clinton, tha se agjencia FBI po zhvillon hetime nëse Rusia ka dorë në depërtimin dhe rrjedhjen e emailave të një këshilltari të lartë, gjatë javës së kaluar.

Kryesuesi i fushatës, John Podesta, tha mbrëmë vonë se ka mësuar për hetimet gjatë fundjavës, kur ishte kontaktuar nga FBI-ja, për sulmet në emailat e tij, disa prej të cilëve janë publikuar nga faqja në Internet, WikiLeaks, më 7 tetor.

Podesta tha se i është thënë se ato janë përfshirë në hetimin që po zhvillohet lidhur me sulmet kibernetike kundër organizatave të Partisë Demokratike nga inteligjenca e Rusisë.

Këto komente u bënë derisa Shtëpia e Bardhë ka njoftuar se presidenti amerikan, Barack Obama, po i shqyrton opsionet për “përgjigje proporcionale” për verifikimin e incidenteve lidhur me ndërhyrjet ruse.

Trumpi sulmon figura të Partisë Republikane për pabesi

Kandidati republikan për president Donald Trump po sulmon zyrtarë të lartë të partisë së tij që janë shprehur se nuk do ta mbështesin në garën presidenciale.

Zoti Trump, në një koment në Twitter sulmoi Kryetarin e Dhomës së Përfaqësuesve, republikanin Paul Ryan duke e cilësuar një “udhëheqës shumë të dobët dhe joefektiv” pasi zoti Ryan tha dje para një grupi republikanësh se nuk do të bënte më fushatë për kandidatin republikan për president dhe nuk do t’u dilte më në mbrojtje komenteve të tij fyese që kanë irrituar shumë votues.

Me tërheqjen e zotit Ryan, tha kandidati Trump “tani ndjehem shumë mirë që jam çliruar nga prangat dhe mund të luftoj për Amerikën në mënyrën time”. Ai tha se demokratët gjithmonë kanë treguar më shumë besnikëri ndaj njëri-tjetrit se republikanët.

Paul Ryan, i cili vazhdon ta mbështesë zotin Trump, aludoi se zonja Clinton do t’i fitonte zgjedhjet e nëntorit. Zoti Ryan ka thënë se nuk do të bëjë fushatë për Trumpin, por do të vazhdojë fushatën për kolegët republikanë që partia e tij të vazhdojë të ruajë kontrollin e Dhomës së Përfaqësuesve.

Në një tjetër koment në Twitter, zoti Trump tha se e kishte fituar debatin e së dielës me zonjën Clinton, por shtoi se “është vështirë të dalësh mirë kur Paul Ryan dhe të tjerë nuk japin asnjë mbështetje”.

Një numër i konsiderueshëm zyrtarësh të zgjedhur republikanë, përfshirë ish-kandidatin për president John McCain, kanë tërhequr mbështetjen për Donald Trumpin gjatë ditëve të fundit ose i kanë bërë thirrje kandidatit republikan të dalë nga gara pasi ditët e fundit u bënë publike regjistrime të 11 vjetëve më parë, ku dëgjohet zëri i zotit Trump duke bërë komente të ulëta për gratë dhe duke u mburrur se sillet me gratë siç do vetë, pasi është njeri i famshëm. Megjithë këto presione, Donald Trumpi ka thënë se nuk ka për t’u tërhequr në asnjë mënyrë nga gara.

Zoti Trump ka kërkuar ndjesë për komentet që u regjistruan pa dieninë e tij dhe u bënë publike javën e kaluar.

Bie mbrojtja për Trumpin pas komenteve për gratë

Kryetari i Dhomës së Përfaqësuesve në SHBA, Paul Ryan, tha se nuk do të mbrojë kandidatin republikan për president, Donald Trump, pas komenteve vulgare që ka bërë për gratë.

Ryan, i cili është edhe vetë republikan, tha se nuk do të bëjë fushatë me Trumpin përpara zgjedhjeve të 8 nëntorit.

Në vend të kësaj, ai tha se do të bëjë fushatë për kandidatët republikanë të Kongresit.

Trump ka shkruar në Twitter se Ryan nuk duhet të humbë kohë duke e luftuar atë.

Në një video të vitit 2005, e publikuar të premten, Trump tregon se si ka dashur të ketë marrëdhënie seksuale me një grua të martuar dhe bën komente të pista për gratë.

Fushata e kandidates demokrate për presidente, Hillary Clinton, tha se është “shumë vonë” për liderët republikanë që të kthehen kundër Trumpit.

Debati i dytë presidencial, ja kush fitoi

Përballja e dytë mes republikanit Donald Trump dhe demokrates Hillary Clinton mund të ketë qenë ndër më të ashprat në historinë e debateve presidenciale amerikane, por analistët thonë se kjo nuk ka gjasa të ndryshojë faktin që zonja Clinton ka dalë përpara tij në anketa, një muaj para zgjedhjeve të 8 nëntorit.

Studiuesi i shkencave politike, Stephen Wayne i Universitetit Georgetown në Washington, i tha Zërit të Amerikës se debati ka mundësi ta ketë forcuar mbështetjen për të dy kandidatët, por jo domosdo ka ndryshuar rrjedhën e fushatës, ku zonja Clinton ruan një avantazh mesatar prej pesë përqind dhe udhëheq në shtetet e rëndësishme që vendosin fatin e zgjedhjeve.

Megjithatë, një sondazh i NBC News / Wall Street Journal, i kryer gjatë fundjavës, pas publikimit të komenteve vulgare të zotit Trump, tregon se avantazhi i zonjës Clinton është rritur edhe më shumë: 46-35 përqind. Një tjetër sondazh, “Rasmussen Reports” jep rezultatin 45-38 përqind në favor të zonjës Clinton.

Politologu John Sides i Universitetit George Washington, thotë se Trump doli më mirë në debat, por kjo nuk do të jetë e mjaftueshme për të përmirësuar rezultatet e tij në sondazhe.

Wayne thotë se debati mund të ketë shërbyer për të bashkuar më tepër rreth zonjës Clinton demokratët që kanë shqetësime lidhur me të. Sipas tij, edhe zoti Trump e ka konsoliduar bazën e mbështetësve, por nuk ka kaluar dot përtej kësaj. “Mendoj se debati zbuloi karakterin e dy kandidatëve, përforcoi pikëpamjet tona rreth tyre si dhe dobësitë e tyre,” thotë analisti.

Wayne thotë se kandidati Trump “tregoi se nuk kishte njohuri për çështjet”, ndërsa ajo ishte e përgatitur mirë për të mbrojtur veten dhe për të mbështetur çështjet tradicionale për demokratët”. Një anketë e rrjetit CNN menjëherë pas debatit arrinte në përfundimin se Clinton doli fituese me një diferencë 57-34 për qind.

Bashkëshortja deklaratë për fjalët e “pahijshme” të Trumpit

Ndërkohë që data e zgjidhjeve presidenciale në SHBA po afron, disa emra brenda Partisë Republikane vazhdojnë presionin për “dorëheqjen” e Trumpit nga gara presidenciale.

UASHINGTON – Vazhdon të ketë reagime brenda dhe jashtë partisë ndaj videos e cila përmban fjalë “të pahijshme” dhe që thuhet se i përket kandidatit për president të Partisë Republikane dhe biznesmenit Donald Trump.

Ndërkohë që data e zgjedhjeve presidenciale në SHBA po afron, disa emra brenda Partisë Republikane vazhdojnë presionin për “dorëheqjen” e Trump nga gara presidenciale.

– “Fjalët e bashkëshortit tim, të papranueshme”

Një reagim për fjalët e “pahijshme” të Trumpit ka ardhur edhe nga bashkëshortja e tij, Melania Trump, e cila është shprehur: “Fjalët e bashkëshortit tim janë të papranueshme dhe të turpshme. Këto fjalë nuk përfaqësojnë njeriun që njoh unë.” aa

SHBA: Uragani i vazhdon shkatërrimet, megjithëse i dobësuar

Zyrtarët amerikanë thonë se uragani Matthew vazhdon të krijoj rrëmujë përgjatë bregdetit Atlantik, pasi më parë në Haiti ka shkaktuar shkatërrime.

Megjithatë, duket se është dobësuar, pasi i ka vërshuar komunitetet, ka shkaktuar ndaljen e rrymës elektrike dhe i ka dëmtuar rëndë rrugët.

Tash në kategorinë 1, ky është uragani më i fuqishëm, që e ka goditur bregun lindor amerikan në një dekadë dhe është fajësuar për vdekjen e së paku 10 personave në Shtetet e Bashkuara, ndërsa në Haiti nga ai e kanë humbur jetën së paku 877 vetë.

Presidenti amerikan, Barack Obama, ka kërkuar nga banorët e viseve të rrezikuara, që t’i kenë parasysh rekomandimet e autoriteteve lokale.

“Tregoni kujdes ndaj asaj që juve u thonë zyrtarët lokalë. Nëse ata ju thonë të evakuoheni, ju duhet të largohen nga andej dhe të lëvizvni në terren më të lartë”, tha dje në Uashington, presidenti amerikan, Barack Obama.

Reagime të forta të republikanëve kundër kandidatit Donald Trump

Paul Ryan, kryetar i Dhomës së Përfaqësuesve

 

Me një numër në rritje të republikanëve që po bëjnë thirrje për kandidatin presidencial Donald Trump për t’u larguar nga gara, disa njoftime po thonë se anëtarë të lartë të Komitetit Kombëtar Republikan janë duke eksploruar mundësitë për largimin e tij nga gara, pavarësisht pengesave procedurale dhe faktin se mbetet vetëm një muaj deri në ditën e zgjedhjeve.

Politico njoftoi të shtunën se udhëheqësit republikanë po e kalojnë fundjavën duke rivlerësuar strategjinë e tyre të zgjedhjeve pas një regjistrimi të Trumpit 11 vjet më parë ku ai bën komente denigruese ndaj grave.

Disa udhëheqës republikanë po tërhiqen nga mbështetja për kandidatin republikan Donald Trump, pas videos së vitit 2005 që u publikua dje, ku ai dëgjohet të bëjë komente denigruese seksuale ndaj grave. Në kohën kur është regjistruar kjo bisedë me një gazetar, zoti Trump ishte i martuar me bashkëshorten e tij të tanishme, Melanian.

Ndërsa në të kaluarën, miliarderi Trump pati arritur të merrte me vështirësi një mbështetjeje nga brenda Partisë Republikane, komentet e tij në videon e publikuar bënë që shumë udhëheqës të kësaj partie të deklarojnë se nuk do të votojnë për të. Disa shtuan se nuk do të votojnë as për kandidaten Hillary Clinton, duke krijuar kështu rrethanat e rrezikshme të moshedhjes së votës për asnjërin kandidat, ose për votimin për kandidatë të tretë që nuk kanë shanse për të fituar garën për në Shtëpinë e Bardhë.

Kreu i Dhomës së Përfaqësuesve, Paul Ryan, tha se ndjehet “i neveritur” nga komentet e zotit Trump dhe njoftoi se ai nuk do të marrë pjesë në festivalin e përvitshëm të vjeshtës në shtetin Wisconsin, ku ai ishte i planifikuar të shfaqej së bashkë me zotin Ryan dhe kryetarin e Partisë Republikane, Reince Priebus.

Zoti Preibus u shpreh për komentet e zotit Trump se “asnjë grua nuk duhet të përshkruhet kurrë me këto terma”.

Kreu i maxhorancës në Senat, Mitch McConnell tha se “këto komente janë të pështira dhe të papranueshme në asnjë rrethanë” dhe shtoi se zoti Trump duhet t’u kërkojë falje të gjitha grave dhe vajzave.

Kreu i maxhorancës në Dhomën e Përfaqësuesve, Kevin McCarthy, gjithashtu bëri thirrje që zoti Trump të bënte një ndjesë të plotë dhe të padiskutueshme.

Senatori i shtetit Utah, Mike Lee, i bëri thirrje kandidatit Trump të largohet nga gara, duke e cilësuar atë një “shpërqëndrim nga çështjet reale me të cilat përballemi sot”.

Senatori Mark Kirk, i cili po kandidon për rizgjedhje në shtetin Illinois, u shpreh në Twitter se zoti Trump duhet të largohet nga gara dhe se Partia Republikane “duhet të vërë në lëvizje rregulloren për një zëvendësim emergjence”.

Komentet e tij u dënuan ndër të tjerë edhe nga ish-kandidatët republikanë Marco Rubio dhe Jeb Bush. Ish-kandidati republikan për president që u përball me Presidentin Obama në vitin 2008, Senatori John McCain, i cili u shpreh se Donald Trump duhet të vuajë personalisht pasojat e sjelljes së tij.

Ligjvënësi i shtetit Utah, Jason Chaffetz, kryetar i Komitetit të Mbikqyrjes së Dhomës së Përfaqësuesve tha se “nuk mundet më të mbështesë me ndërgjegje zotin Trump për president”. Zoti Chaffetz tha se komentet e zotit Trump ishin “disa nga më të urryerat dhe nga më ofendueset që mund të imagjinohen”.

Gary Herbert, guvernatori i shtetit Utah, i quajti komentet e zotit Trump “përtej ofezës dhe të papërshkrueshme”.

Konsultenti politik konservator Frank Luntz u shpreh se kjo kasetë do të krijojë dëm real.

Ndërkohë, mediat transmetuan sot një xhirim të regjistruar ku zoti Trump kërkon ndjesë për komentet e tij dhe ku premton se do të bëhet një njeri më i mirë. Megjithë këtë ndjesë publike, në po të njëjtin mesazh, kandidati Trump përmend se ish-presidenti Bill Clinton, pati “abuzuar realisht me gratë” dhe se bashkëshortja e tij, kandidatja Hillary Clinton, u pati bëri presion viktimave të të shoqit.

Hillary Clintoni i quajti deklaratat “të tmerrshme” dhe tha përmes tweeter-it “Nuk mund ta lejojmë këtë njeri të bëhet president”.

Zoti Trump përballet nesër në mbrëmje me rivalen demokrate Hillary Clinton gjatë debatit të dytë televiziv.

Gjermani: Bllokadë e qytetit për shkak të dyshimeve për sulm

Pamje e pjesëtarëve të policisë gjermane

Policia gjermane thotë se sot po e evakuon një ndërtesë në qytetin lindor, Shemic, për shkak të dyshimeve se ishte planifikuar një sulm me bombë. Banorëve u është thënë që të qëndrojnë në shtëpitë e tyre.

Policia duket se po përdorë forcë për të hyrë në ndërtesë, derisa në rrjetin Twitter ka shkruar: “eksplodimi i dëgjuar ishte një masë e policisë për hyrje, pasi personi përkatës nuk mund të gjendet”.

“Ju lutemi të mbeteni në banesat tuaja brenda hapësirës së bllokuar nga policia dhe t’i ndiqni instruksionet e policisë”, ka shkruar policia e Saksonisë në rrjetin Twitter.

Policia tha se ka ndërmarrë vendosje të madhe të trupave në një lagje të qytetit Shemic.

Një zëdhënëse e policisë ka refuzuar të paraqes detaje të tjera.

SHBA për të parën herë publikisht e akuzoi Rusinë për sulme kibernetike

Shtetet e Bashkuara për të parën herë publikisht e kanë akuzuar Rusinë për orkestrim të një vale të sulmeve kibernetike, kundër organizatave politike amerikane dhe zyrtarëve të lartë aktualë dhe të dikurshëm, me ç’rast Uashingtoni thotë se ishte synim “për përzierje në procesin zgjedhor në Shtetet e Bashkuara”.

Mëtutje në deklaratën e mbrëmshme të Zyrës së drejtorit të inteligjencës kombëtare dhe të Departamentit për siguri të brendshme, theksohet se është “e sigurt” se qeveria e Rusisë i ka “drejtuar” depërtimet në emailat e individëve dhe grupeve, përfshirë Komitetin Kombëtar Demokrat (DNC).

“Ne besojmë, bazuar në gjërësinë dhe ndjeshmërinë e këtyre përpjekjeve, se vetëm zyrtarët më të lartë të Rusisë kanë mundur t’i autorizojnë këto aktivitete”, thuhet në deklaratë.

Trumpi kërkon ndjesë për komentet denigruese seksuale të vitit 2005

Kandidati republikan për president Donald Trump kërkoi ndjesë të premten pas bërjes publike të një videoje regjistruar në vitin 2005, ku ai tregon se si u afrohet grave për të kërkuar favore seksuale.

Përmes një deklarate Trump shprehet: “Kërkoj ndjesë në se dikush është ofenduar”, duke iu referuar një artikulli të botuar fillimisht në gazetën “Washington Post”, e cila siguroi videon me komentet denigruese të Trumpit rreth grave.

Kur bëri komentet Trump ishte duke folur me gazetarin Billy Bush të emisionit televiziv “Access Hollywood”, në një bisedë private, në prani të vetëm disa pak personave, në një autobuz që po e çonte Trumpin në emisionin televiziv. Trump ndërkohë kishte mikrofonin në trup.

Në regjistrim ai thotë: “Gratë e bukura më tërheqin menjëherë, si me magnet dhe filloj t’i puth. Nuk më pritet, i puth menjëherë”. Dhe më tej vazhdon: “Kur je i njohur, ato të lënë të bësh ç’të duash”.

Trump vazhdon me komente të tjera vulgare se si u kërkon favore seksuale grave, duke folur në mënyrë shumë të hapur.

Në deklaratën ku kërkon ndjesë Trump thotë se: “Ato ishin biseda private, që ndodhën shumë vite më parë. Bill Clinton më ka thënë gjëra shumë më të shëmtuara në fushën e golfit, që as nuk u afrohen këtyre që kam thënë unë”.

Kryetari republikan i Dhomës së Përfaqësuesve, Pol Rajën, tha se ishte i neveritur nga ajo që kishte dëgjuar dhe se kandidati republikan nuk do të marrë pjesë në një konferencë të partisë të shtunën, ku ishte planifikuar të fliste.

Edhe republikanë të tjerë të lartë, si kryetari i Komitetit Kombëtar Republikan, Reince Priebus, i dënuan komnentet.

Ngjarja ka bërë jehonë në median sociale, duke u kthyer në armën më të fuqishme që ka patur në dorë deri tani Partia Demokrate për të bindur gratë e pavendosura dhe votues të tjerë që të mbështesin zonjën Clinton.

Estonia e Finlanda: Avionët rusë shkelin hapësirën ajrore

Estonia ka denoncuar këtë të premte shkeljen e hapësirës së saj ajrore nga një avion rus, vetëm pak orë pasi fqinji i saj Finlanda bëri të ditur se dy avionë të ngjashëm kishin kaluar mbi territorin e saj, në një kohë që përgatitet të firmosë një marrëveshje për mbrojtje me Shtetet e Bashkuara.

Moska mohon në fakt dërgimin e avionëve mbi kufijtë e këtyre dy shteteve, por një analist ka thënë se fluturimet mund të jenë ndërmarrë si një shenjë kujtese për influencën e Rusisë në këtë rajon, pasi vendet e Baltikut po hedhin sytë drejt forcimit të marrëdhënieve me Perëndimin.

Ministria estoneze e Mbrojtjes tha se një avion luftarak rus hyri në hapësirën e saj ajrore për më pak se një minutë, ndërsa pajisja e transponderit ishte fikur rreth orës 2:38 të mëngjesit me orën lokale.

Helsinki, nga ana e tij, bëri të ditur se dy avionë të “SU-27” kishin shkelur hapësirën e tij ajrore gjatë pasdites së të enjtes, pikërisht mbi Gjirin e Finlandës, apo vija kufitare që ndan atë nga Estonia.

“Ne i konsiderojmë të tilla incidente si tepër serioze”, tha ministri finlandez i Mbrojtjes, Jussi Niinisto. “Fakti që kemi dy shkelje të dyshuara të hapësirës në të njëjtën ditë përbëjnë një rast të jashtëzakonshëm”. Inkursione të së shkuarës kanë ndërmarrë edhe avionë rusë transporti, por asnjëherë avionë luftarakë, deklaroi më tej ai.

Ministria ruse e Mbrojtjes e hodhi poshtë këtë raport, duke thënë se avionët ushtarakë “SU-27” kishin zhvilluar fluturime stërvitore të enjten dhe të premten mbi ujëra neutralë, sipas asaj që raportojnë agjencitë ruse të lajmeve.

Finlanda po bëhet gjithnjë e më e shqetësuar në lidhje me aktivitetet ushtarake të Rusisë, dikur sundimtar i saj, me të cilën ndan një kufi tokësor prej 1.300 km, veçanërisht pas aneksimit nga Moska të gadishullit ukrainas të Krimesë në shkurt të vitit 2014.

Si kundërpërgjigje, Finlanda ka përforcuar bashkëpunimin me Suedinë dhe është kujdesur edhe për marrëdhënie më të ngushta me NATO-n. Të premten, Helsinki zyrtar nënshkroi një marrëveshje bashkëpunimi të fushës së mbrojtjes me Shtetet e Bashkuara, që mbulon trajnimin dhe ndarjen e informacioneve, por nuk kërkon edhe asistencë ushtarake.

“Fakti që Shtetet e Bashkuara janë të interesuara për situatën e sigurisë në Europën Veriore është pozitiv, sikurse edhe bashkëpunimi me vendet e tjera të rajonit. Ne e shohim këtë si një element stabilizues”, tha Niinisto. Ai refuzoi të spekulonte nëse Rusia është përpjekur të tregojë forcën e saj përpara takimit të tij me zv.sekretarin amerikan të Mbrojtjes, Robert Work.

Kerry: Regjimi i Asadit dhe Rusia të hetohen për krime lufte

UASHINTGTON – Sekretari Amerikan i Shtetit, John Kerry, ka deklaruar se duhet të hapen hetimet ndaj regjimit të Asadit dhe Rusisë për krime lufte, për shkak të bombardimit të civilëve dhe spitaleve në Siri. aa

SHBA: 6 ushtarë akuzohen se u kanë shitur pajisje ushtarake rusëve

Departamenti i Drejtësisë në SHBA ka ngritur aktakuzë ndaj tetë personave, përfshirë gjashtë ushtarë. Ata po akuzohen se kanë vjedhur pajisje të ndjeshme ushtarake në vlerë prej më shumë se 1 milion dollar dhe i kanë shitur në Rusi, Kazakistan, Ukrainë, Moldavi dhe vende të tjera përmes eBay.

Ushtarët, që janë nga Tennessee, kanë vjedhur nga baza ushtarake pajisje dhe i kanë shitur online, ka thënë departamenti.

Ushtarët kanë vjedhur teleskop të snajperëve, pjesë të pushkëve, pjesë të armëve automatike, raketa hedhës, helmeta, pajisje të komunikimit, furnizimi mjekësore, ka njoftuar qeveria amerikane.

Këto pajisje më pas ishin shitur për konsumatorët nga Rusia, Kina, Hong Kongu, Kazakistani, Ukraina, Lituania, Moldavia, Malajzia, Rumania dhe Meksika.

Autoritetet në SHBA kanë thënë se janë duke u munduar që të gjejnë blerësit e këtyre pajisjeve ushtarake me qëllim që t’i kthejnë këto pajisje të cilat sipas tyre janë “jashtëzakonisht të rrezikshme”.

Të akuzuarit nëse gjenden fajtor mund të përballen me pesë vjet burgim dhe të dënohen me gjobë prej 250 mijë dollarë.

Uragani i përbindshëm Mathew, drejt Floridës pasi la qindra të vdekur në Karaibe

Uragani Matthew është cilësuar si “përbindësh” dhe vërtetë “stuhi e shekullit” derisa po përparon drejt bregut lindor të Floridës.

Matthew tashmë ka lënë pas vetes qindra të vrarë në Karaibe, përfshirë 283 në Haiti.

Të enjten vonë, Matthew goditi pjesën perëndimore të ishujve Bahama, derisa po lëvizte drejt Floridës ku pritet te godasë të premten.

Stuhia e fuqishme e shkallës së katërt sjell me vete erëra të forta që arrijnë në 210 kilometra në orë.

Zyrtarët e Floridës i quajtën “të marrë” ata që kanë vendosur të mos evakuohen, duke theksuar se nuk mund të shpjegojnë mjaftueshëm se sa e rrezikshme është kjo stuhi dhe çfarë shkatërrimesh mund të shkaktojë mbi shtetin.

Presidenti Barack Obama tashmë e ka shpallur gjendjen e jashtëzakonshme në Florida dhe në Karolinën e Jugut.

Kryetari i Floridës ka aktivizuar 3 mijë e 500 trupa të Gardës Kombëtare. Ekspertët thonë se pjesë të shtetit mund të jenë të pabanueshme për javë të tëra pas stuhisë.

Zëdhënësi i Administratës Federale për menaxhimin e emergjencave, Raphael Lemaitre, i tha Zërit të Amerikës se agjencia ka personel dhe burime të tjera të gatshme për të vepruar.

“Kemi furnizime në terren të shpërndara në zonën që mund të goditet. Gjëra si ujë, ushqime, batanije e shtretër. Po ashtu kemi personel në terren”, tha Lemaitre.

Matthew la pas vetes skena të dhimbshme mjerimi në Haiti, shteti më i varfër në hemisferën perëndimore.

Qeveria tha se të paktën 283 veta kanë humbur jetën dhe numri mund të rritet jo vetëm për shkak të stuhisë por edhe kolerës dhe rreziqeve të tjera pas stuhisë.

Presidenti i përkohshëm i Haitit, Jocelerme Privert, i cili fluturoi përmbi siujdhesë në një avion të rojës bregdetare amerikane, e përshkroi situatën si “katastrofale”.

Kombet e Bashkuara thanë se afro 6 milionë haitianë janë prekur nga stuhia dhe 350 mijë veta kanë nevojë për ndihmë të menjëhershme.

Marina amerikane ka vene në dispozicion nëntë helikopterë ushtarak, një aeroplanmbajtëse dhe trupa për t’ju përgjigjur kërkesës së Haitit për ndihmë. Disa nga helikopterët janë të pajisur me mjete të kërkim shpëtimit dhe disa për transportimin e furnizimeve.

Haiti ka shtyrë zgjedhjet presidenciale të së dielës.

Uragani Matthew ka shkaktuar shkatërrime në Kubë por nuk ka pasur të vdekur.

Revista The Atlantic mbështet Hillaryn – më parë ka mbështetur vetëm Abraham Lincolnin dhe Lyndon B. Johnsonin

‘Trump kandidati më i papërshtatshëm në 227 vjet histori të presidencës’

VOAL – Revista The Atlantic ia ka dhënë mbështetjen e  saj historike Hillary Clintonit. Në 159 vjet të historisë së saj, revista prestigjioze e ka bërë këtë gjë vetëm në dy raste të tilla, më 1860 me Abraham Lincolnin e më 1964 me Lyndon B. Johnsonin. Editorial që mbështet Clintonin përmban një sulm të rëndë ndaj Trumpit, duke e përcaktuar “kandidatin tejet më të papërshtatshëm të një partie të madhe në 227 vjet të historisë së presidencës amerikane”, si dhe “një demagog, një ksenofob, një seksist, një injorant dhe një gënjeshtar”. ansa

SHBA, përballen kandidatët për nënpresident

Në SHBA, dy kandidatët për nënpresident, demokrati Tim Kaine dhe republikani Mike Pence u përballën mbrëmë në debatin e vetëm me tyre, shpesh duke ndërprerë njëri-tjetrin dhe duke argumentuar qëndrimet mbi emigracionin, ekonominë dhe sigurinë e vendit.

Ata shprehën mendime mjaft të ndryshme rreth pothuajse të gjitha çështjeve me rëndësi për vendin.

Kaine, senator i shtetit Virxhinia, dhe Pence, guvernator i shtetit të Indianës, u përpoqën të mbrojnë kandidatët përkatës për president, Hillary Clinton dhe Donald Trump, shpesh duke u përplasur ashpër në çështje të ndryshme.

Zoti Kaine kërkoi që kandidati republikan Trump të publikojë taksat, që shumë demokratë besojnë se do të tregojnë se ai ka paguar pak, ose aspak tatime federale mbi të ardhurat për vite me rradhë. Zoti Pence e mbrojti miliarderin Trump si një biznesmen të zgjuar që ka krijuar mijëra vende pune.

Kandidati për nën-president, Senatori Tim Kaine gjatë debatit

Kandidati për nën-president, Senatori Tim Kaine gjatë debatit

Kandidatët ndërpresin njëri-tjetrin

Gazetarja e televizionit CBS News, Elaine Quijano, e cila moderoi debatin në Universitetin Longwood në Farmville të Virginias, i qortoi disa herë kandidatët për ndërprerjet që u bënin njëri-tjetrit. Ndërprerjet ishin të tilla që publiku shpesh nuk arrinte të dëgjonte se çfarë thoshin.

Zoti Kaine tha se shkurtimet e taksave të propozuara nga zoti Trump do të favorizonin amerikanët e pasur dhe do ta kthenin ekonominë amerikane në recesion. Zoti Pence e kundërshtoi, duke ngritur akuzën se planet ekonomike të zonjës Clinton do të sillnin edhe më shumë dëm, duke rritur ndjeshëm taksat dhe duke hequr kufizimet në shpenzimet e qeverisë.

Kandidatët e ndërprenë njëri-tjetrin edhe gjatë një segmenti kur u pyetën për krimin kibernetik, në të cilin Pence ngriti çështjen e përdorimit të një serveri privat emaili nga zonja Clinton kur ishte sekretare shteti.

Në lidhje me Sirinë, kandidati Pence tha se një udhëheqje e fortë amerikane do të parandalonte ngjarje të tilla si lufta civile në Siri. Ai bëri thirrje gjithashtu për sulme ushtarake në Siri, nëse Rusia nuk tërhiqet.

Gjatë një segmenti, në të cilin zoti Kaine kritikoi kandidatin Trump për fyerje kundër grave, pakicave dhe të tjerëve, zoti Pence u përgjigj duke thënë se zonja Clinton ka fyer më shumë amerikanë kur e cilësoi një pjesë të mbështetësve të zotit Trump si një “shportë qaramanësh”.

Në pjesën më të madhe të kohës, kandidatët dilnin shpesh nga tema për të kritikuar kandidatët presidencialë të palës rivale.

Guvernatori i Indianës Mike Pence i përgjigjet Senatorit Tim Kaine

Guvernatori i Indianës Mike Pence i përgjigjet Senatorit Tim Kaine

Kandidatët reklamojnë përvojat

Gjatë debatit, secili kandidat për nënpresident foli mbi përvojën e tij. I pyetur se përse do të ishte në gjendje të merrte drejtimin e vendit nëse e kërkonte nevoja, zoti Kaine përshkroi përvojën e tij politike në të gjitha nivelet e qeverisjes – si një këshilltar qyteti, si kryetar bashkie, si zëvendës guvernator dhe si senator.

Ai vlerësoi kandidaten Clinton, duke thënë se ajo ka një pasion për t’u shërbyer të tjerëve, ndërsa zoti Trump shikon në radhë të parë interesat e veta.

Nga ana e tij, zoti Pence tha se edhe ai ka patur një përvojë politike të dobishme në jetë, duke u ngritur nga një bir i një qyteti të vogël të Indianës, e deri te përfaqësimi i këtij shteti në Kongres dhe fitorja në zgjedhje si guvernator.

Ai mori në mbrojtje zotin Trump duke akuzuar rivalët Clinton dhe Kaine se bëjnë një fushatë që bazohet në fyerje.

Përtej çështjeve për të cilat diskutuan kandidatët, rëndësia e vërtetë e këtij debati qëndron tek ndryshimi që mund të sjellë ai në tërheqjen e mbështetjes së votuesve të pavendosur.

Në vitin 2008, përballja mes kandidatëve për nënpresident Joe Biden dhe Sarah Palin tërhoqi audiencën më të madhe ndonjëherë në debate të tilla, 70 milionë shikues.

Debati i dytë Clinton-Trump është planifikuar për të dielën në Seint Luis të shtetit Mizuri.

Ambasadori Lu: Koha e gjykatësve dhe prokurorëve të korruptuar ka përfunduar

Voal – Ambasadori amerikan në vendin tonë tha se koha e gjykatësve dhe prokurorëve të korruptuar ka përfunduar. Deklarata u bë gjatë ceremonisë së Diplomimit në Shkollën e Magjistraturës.

Në fjalën e tij ambasadori Lu tha se “Kam qënë fajtor për shumë gjëra në jetën time. Këto dy vitet e fundit, kam qënë fajtor për kritikat ndaj integritetit dhe profesionalizmit të gjykatësve dhe prokurorëve në Shqipëri.” 

Duke iu drejtuar brezit të ri të gjykatësve, kreu i diplomacisë amerikane u shpreh se të rinjtë do të kthejnë besimin tek drejtësia.

Donald Lu: Koha e gjykatësve dhe prokurorëve të korruptuar ka përfunduar. Sot është dita juaj.  

Ky është momenti që një brez i ri gjykatësish dhe prokurorësh të lënë gjurmë në këtë botë. 

Shqiptarët duhet të mbushen me shpresë se brezi juaj do të jetë brezi që do të rikthejë shpresën dhe besimin se do të ketë drejtësi për të gjithë.

Ata duan të besojnë se brezi juaj do ta përdorë këtë mundësi të çmuar të reformës në drejtësi për t’u siguruar që të gjithë njerëzit – fajtorë dhe të pafajshëm – do të trajtohen me respekt në këtë shoqëri.

Kam qënë fajtor për shumë gjëra në jetën time. Këto dy vitet e fundit, kam qënë fajtor për kritikat ndaj integritetit dhe profesionalizmit të gjykatësve dhe prokurorëve në Shqipëri. 

Tani është detyra juaj t’i tregoni botës se mund të bëni më shumë. Se mund t’i kryeni me profesionalizëm detyrat tuaja – pa para korruptimi, pa ndikim nga politika, dhe pa u frikësuar nga kriminelë të rrezikshëm.

Do të përballeni me sfidën për t’u bërë brezi që ndërton besimin e njerëzve. T’u tregoni atyre që mund të bëni më shumë, më mirë. T’u tregoni atyre që jeni profesionistë, të drejtë dhe të mençur.

Keni për të ngjitur një mal të lartë. Por me kurajo të madhe dhe vendosmëri, të gjithë ne kemi besim se do t’ia dilni.

Urime për të gjithë të diplomuarit, mësuesit dhe prindërit e tyre. Ta kujtojmë këtë ditë si dita e parë e brezit të ri të profesionistëve të drejtësisë në Shqipëri!

donald-lu-1-655x356

Dy diplomatë amerikanë janë droguar në Rusi vitin e kaluar, Washingtoni i shqetësuar

Dy zyrtarë amerikanë që po udhëtonin me pasaporta diplomatike janë droguar teksa kanë marrë pjesë në një konferencë, vitin e kaluar, në Rusi.

Njëri prej tyre madje është hospitalizuar, për sic erdhën në përfundim zyrtarët, të kishte qenë pjesë e një sjelljeje të ngacmimit të Rusisë ndaj diplomatëve amerikanë, e cila po përshkallëzohet.

Incidenti ka ndodhur në një bar ose në hotelin ku diplomatët amerikanë po qëndronin, pasi ishin duke marrë pjesë në një konferencë të Kombeve të Bashkuara kundër korrupsionit, që u mbajt në nëntor në Shën Petërsburg.

Kjo gjë ka ngritur shqetësimin e Departamentit Amerikan të Shtetit, që ka shprehur indinjatën në Moskë, thonë zyrtarët e qeverisë amerikane, të cilët kanë njohuri për këtë ngjarje.

Por ngjarja nuk ishte dramatike deri në qershor, kur një diplomat i akredituar i SHBA-së, u ndalua para ambasadës amerikane në Moskë, të cilin zyrtarët në Uashington e ekzaminuan dhe konstatuan se ishte droguar në nëntor dhe arritën në përfundim që kjo ishte pjesë e një modeli të caktuar.

Departamenti i Shtetit ka sugjeruar se ngacmime të tilla janë shndërruar në shqetësim në dy vitet e fundit.

Sipas zyrtarëve të qeverisë së SHBA-së edhe një tjetër ish-zyrtar ka pasur njohuri për rastin e drogimit të diplomatëve të cilët ishin pjesë e delegacionit të SHBA-së, që po merrnin pjesë në konferencën kundër korrupsionit që u mbajt më 2-6 nëntor në Rusi.

Kjo ishte konferenca e parë zyrtare në të cilën Moska ua lejoi pjesëmarrjen përfaqësuesve të qeverisë amerikane; pasi SHBA, Bashkimi Evropian dhe aleatët vendosën sanksione kundër Rusisë për shkak të aneksimit të Krimesë më 2014.

Sipas listës së pjesëmarrësve, në konferencë kanë marrë pjesë njerëz nga e gjithë bota, përfshirë edhe 21 persona nga byro të ndryshme brenda Departamentit të Drejtësisë së SHBA-së dhe po ashtu disa amerikanë të tjerë, përfshirë akademikë dhe përfaqësues të organizatave joqeveritare.

Radio Evropa e Lirë ka kontaktuar me disa persona nga organizatat joqeveritare që kanë qenë të pranishëm në këtë konferencë por ata kanë thënë se nuk kanë qenë në dijeni për këtë incident.

Një zyrtar i qeverisë amerikane i ka thënë Radios Evropa e Lirë se hetuesit amerikanë kanë ardhur në përfundim se dy amerikanëve – një burri dhe një gruaje – iu është hedhur në pije një lloj droge që përdoret për raste të përdhunimit, në ndonjë bar në Shën Petërsburg ose në hotelin ku po qëndronin.

Njëri nga amerikanët ishte dërguar në një klinikë për trajtim dhe i ishin marrë mostra të gjakut në mënyrë që të përcaktohej se nga çfarë vuante, por në spitalin ku ai po qëndronte gjatë ekzaminimit papritur kishte pasur ndërprerje të energjisë elektrike dhe stafi mjekësor nuk kishte mundur të analizonte mostrat e marra, ka thënë një zyrtar.

Më pas ky person ishte dërguar jashtë vendit për trajtim mjekësor, por mostrat nuk kishin mundur të merreshin dhe të analizoheshin pasi ishte shumë vonë.

Për shkak se zyrtarët që kishin marrë pjesë në këtë konferencë nuk ishin zyrtarë të lartë të Departamentit të Drejtësisë, Departamenti i Shtetit kishte vendosur që lidhur me këtë rast të protestonte kundër Moskës qetësisht.

Një notë proteste i ishte dërguar Moskës, por zyrtarët rusë kanë kërkuar të dhëna konkrete që dëshmojnë se zyrtarët janë droguar. Amerikanët nuk kanë mundur të ofrojnë prova të tilla.

Në fund, zyrtarët e SHBA-së kanë thënë se përgjigja që iu kanë dhënë zyrtarët rusë hetuesve lidhur me këtë incident ishte se “pa të dhëna të tjera, nuk mund të bëhet më shumë”.

Ambasada ruse nuk i është përgjigjur Radios Evropa e Lirë për të komentuar këtë ngjarje.

Incidentet e drogimit të të huajve nëpër baret në Rusi nuk janë të pazakonta dhe ato shpesh bëhen me qëllim të grabitjes. Departamenti i Shtetit ka udhëzues specifik për qytetarët amerikanë lidhur me rrezikun me të cilin mund të ballafaqohen nëpër baret në Rusi.

Por, rasti i dy zyrtarëve amerikanë nuk është i ngjashëm me këto incidente tipike, pasi ato zakonisht ndodhin nëpër klube të natës dhe bare që frekuentohen shumë.

Zyrtarët amerikanë nuk ishin bashkë në kohën kur janë droguar. Po ashtu nuk ka indikacione se ata kanë qenë viktima të grabitjes, ka thënëpër Radion Evropa e Lirë, zyrtari i qeverisë amerikane. (REL)

“Trumpi kërkoi të takohet me komunitetin mysliman në SHBA”

Në lidhje me zgjedhjet presidenciale, Jammal tha se Doland Trump, i cili ka tërhequr vëmendjen me komentet e tij në lidhje me myslimanët, është përpjekur të takohet me myslimanët

CHICAGO – Sekretari i Përgjithshëm i Këshillit të Organizatave Islame në SHBA (USCMO), Oussama Jammal, deklaroi se kandidati për president të SHBA-ve nga radhët e Partisë Republikane, Donald Trump, kishte kërkuar që të takohet me komunitetin mysliman në SHBA gjatë festës së Kurban Bajramit, por kjo kërkesë ishte refuzuar.

Jammal ka dhënë një intervistë për gazetarin e AA-së në lidhje me zhvillimet në botë dhe SHBA. Në lidhje me njërin nga zhvillimet më të përfolura në SHBA, zgjedhjet presidenciale, Jammal tha se Doland Trump, i cili ka tërhequr vëmendjen me komentet e tij në lidhje me myslimanët, është përpjekur të takohet me myslimanët.

“Nuk mund ta pranojmë kërkesën e tij pa e qartësuar së pari pozicionin e tij”

Menaxheri përgjegjës për fushatën parazgjedhore të Donald Trump në shtetin Illinois, siç tha Jammal, ka kontaktuar me USCMO para festës së Kurban Bajramit. “Menaxheri tha që Trump dëshiron të takohet dhe t’i adresohet komunitetit mysliman gjatë festimit të Kurban Bajramit që u mbajt në Stadiumin Toyota Park në Chicago me pjesëmarrjen e 25 mijë personave. Duke pasur parasysh vlerësimet paraprake agresive të Trump ndaj myslimanëve dhe fushatën e tij parazgjedhore kundër myslimanëve, ne ua bëmë me dije se nuk mund ta pranojmë kërkesën e tij pa e qartësuar së pari pozicionin e tij”, u shpreh Jammal.

“Ligji i 11 shtatorit”, dorëzohet padia e parë kundër Arabisë Saudite

Stephanie DeSimone e cila ka humbur bashkëshortin në sulmet e ndërmarra në Pentagon, pretendohet se ajo ka bërë përgjegjëse Arabinë Saudite për sulmin

UASHINGTON – Pas miratimit të projektligjit i cili i njeh mundësinë që familjet e viktimave të 11 shtatorit në SHBA të hapin padi ndaj qeverisë së Arabisë Saudite, njoftohet se një grua amerikane që ka humbur bashkëshortin në sulm ka ngritur padi ndaj këtij vendi.

Stephanie DeSimone e cila ka humbur bashkëshortin në sulmet e ndërmarra në Pentagon, pretendohet se ajo ka bërë përgjegjëse Arabinë Saudite për sulmin.

DeSimone në padinë e ngritur në Washington, ka mbrojtur qëndrimin se Arabia Saudite ka ofruar mbështetje financiare për Al-Kaidën.

Sipas lajmeve në shtypin amerikan në dokumentin e paraqitur në gjykatë thuhet se “nuk do të ishin të mundura planifikimi dhe kryerja e sulmeve të 11 shtatorit nëse Al-Kaida nuk do të kishte mbështetjen e Arabisë Saudite.” aa

Sondazhet tregojnë Hillary Clintonin në avantazh

Sipas “RealClear Politics”, zonja Clinton radhitet tashmë në nivel kombëtar me 3% më shumë pikë se sa zoti Trump. Anketimi, që u publikua nga rrjeti “Fox News” ditën e premte, u zhvillua gjatë një hapësire kohore tre-ditore, pas debatit të zhvilluar ditën e hënë. Zonja Clinton vlerësohet me 43% përballë zotit Trump me 40%. Kjo është një rritje me 1% krahasuar me një sondazh pararendës që “Fox News” pati zhvilluar përpara debatit, në mesin e muajit shtator.

Një tjetër sondazh tregon se shumica e personave që mbështesin kandidatë të partive të treta, nuk janë ende të përkushtuar plotësisht ndaj tyre, duke sugjeruar kështu mundësinë e zhvendosjes drejt kandidatëve Clinton dhe Trump dhe për rrjedhojë edhe mundësinë e ndryshimit të dinamikave të garës. Anketimi i kryer nga “Associated Press-GfK” tregon se 70% e mbështetësve të kandidatëve të tretë mund të ndryshojnë mendim. Votuesit e pavendosur janë të ndarë pothuajse njëlloj ndërmjet zotit Trump dhe zonjës Clinton.

Me vetëm 5 javë që mbesin nga votimet e datës 8 nëntor, kandidatët presidencialë po i afrohen fundit të një fushate rraskapitëse.

Clinton e Trump pajtohen: Merkel është lidere favorite e tyre

Kandidatja presidenciale demokrate në Shtetet e Bashkuara, Hillary Clinton, mbrëmë vonë e ka veçuar kancelaren gjermane, Angela Merkel, kur është pyetur se kush është lider favorit i saj në botë.

“Më pëlqejnë shumë liderë botërorë, por njëra nga favoritet e mia është Angela Merkel”, tha Hillary Clinton, gjatë fushatës së saj në Çikago, dhe ka shtuar se mendon se ajo “është një lidere e jashtëzakonshme dhe e fuqishme gjatë kohëve të vështira në Evropë, që ka implikime të dukshme për pjesën tjetër të botës, e veçanërisht në vendin tonë”.

“Lidershipi i saj dhe qëndrueshmëria në krizën e euros dhe trimëria e saj në ballafaqim me krizën e refugjatëve, është diçka që më impresionon”, tha Hillary Clinton.

Donad Trump, kandidati republikan për president amerikan në zgjedhjet e 8 nëntorit, vazhdimisht e ka kritikuar kancelaren Merkel, për politikat e saj liberale të migrantëve. Por, mbrëmë ai e ndryshoi qëndrimin e tij ndaj saj, i pyetur se kush është lideri i tij favorit botëror.

“Mendoj se Merkel është me të vërtetë lidere e madhe botërore”, i tha zoti Trump rrjetit, New England Cable News, megjithqë theksoi se vazhdon të jetë “i dëshpëruar” me politikat e saj të migrimit.

Obama: Nuk e përdor termin “terrorizmi islam” sepse është trillim

Obama ishte i ftuar në programin e CNN, ku foli për politikën e jashtme amerikane dhe prioritetet e sigurisë së vendit të tij

UASHINGTON – Presidenti i Shteteve të Bashkuara të Amerikës (SHBA), Barack Obama deklaroi se organizatat terroriste si DAESH dhe Al-Kaeda manipulojnë me Islamin për qëllimet dhe interesat e tyre.

Obama ishte i ftuar në programin e CNN, ku foli për politikën e jashtme amerikane dhe prioritetet e sigurisë së vendit të tij.

Duke folur për krizën në Siri, Obama theksoi se prioritet i SHBA-ve për këtë është siguria e trupave amerikane.

“Kudo në botë, ndodhin gjëra të këqija. Gjatë vlerësimit ne duhet të shohim nëse dërgimi i trupave amerikane në atë rajon do të na sjellë rezultate të mira. Të gjitha palët në Siri kanë bindje të thellë, se në rast se nuk dërgojmë një numër të madh të ushtarëve tanë atje, nuk shohin ndonjë skenarë për ndalimin e luftës civile”, ka thënë Obama. aa

Obama: Kongresi gaboi me ligjin për 11 shtatorin

Presidenti i Shteteve të Bashkuara, Barack Obama, tha se Kongresi ka bërë “gabim” me prishjen e vetos së tij mbi ligjin që lejon veprime gjyqësore kundër Arabisë Saudite, për shkak të sulmeve të 11 shtatorit.

Obama tha se ligji vë një “precedent të rrezikshëm” për individët në të gjithë botën që të padisin Qeverinë amerikane.

Kongresi, të mërkurën, ka prishur për herë të parë fuqinë e vetos së Obamës.

Legjislacioni, i njohur si Drejtësi kundër Sponsorëve të Terrorizmit, hap rrugën për familjet e vitktimave që të padisin çdo anëtar të Qeverisë saudite, të dyshuar për rol në sulmet e 11 shtatorit.

Pesëmbëdhjetë nga 19 rrëmbyesit e aeroplanëve më 11 shtator, 2001, kanë qenë shtetas sauditë, por Arabia Saudite, aleat i rëndësishëm i SHBA-së, ka mohuar çdo rol në sulmet, që kanë lënë afro 3,000 njerëz të vrarë.

Ndonëse inteligjenca e SHBA-së ka ngritur dyshime për disa lidhje të rrëmbyesve, ajo nuk ka arritur të dëshmojë se zyrtarët sauditë kanë siguruar mbështetje financiare për të dyshuarit.

“Shqetësimi im nuk ka të bëjë asgjë me Arabinë Saudite”, tha presidenti Obama, duke folur për televizionin CNN.

Ai tha se ligji mund të ekspozojë kompanitë amerikane, trupat dhe zyrtarët përballë padive të mundshme jashtë shtetit.

“Unë nuk dua që të arrijmë në një situatë, ku për shkak të punës që bëjmë nëpër botë, të bëhemi subjekt i padive private”, tha Obama.

Drejtori i CIA-s, John Brennan, tha po ashtu se ligji bart “pasoja të rënda” për sigurinë kombëtare”.

Senati ka votuar me 97 vota kundër vetos së Obamës dhe me vetëm një votë për. Në Dhomën e Përfaqësuesve, ndërkaq, 348 vota kanë qenë kundër dhe 77 për. Me këtë votim, propozimi është bërë ligj.

“Ishte një votë kryesisht politike. E kuptoj. Por, puna ime si komandant i forcave ushtarake është të shikoj se si do të ndikojë kjo në misionin tonë të përgjithshëm”, tha Obama.

Zëdhënësi i Shtëpisë së Bardhë, Josh Earnest, u tha gazetarëve se votimi ka qenë “gjëja më e turpshme që ka bërë Senati i Shteteve të Bashkuara në disa dekada”.

Por, mbështetësit e ligjit thonë se ai mund të zbatohet vetëm për aktet e terrorizmit që kanë ndodhur brenda tokës amerikane dhe kritikojnë, siç thonë, prioritetin që u jep Obama marrëdhënieve me Arabinë Saudite.

“Shtëpia e Bardhë dhe krahu ekzekutiv janë më të interesuar në konsideratat diplomatike. Ne jemi më të interesuar për familjet dhe drejtësinë”, tha senatori demokrat, Chuck Schumer.

Obama, gjatë dy mandateve të presidencës së tij, ka përdorur 12 herë të drejtën e vetos, por, deri më tash, asnjëra prej tyre nuk është shtypur.

Udhëheqësi i pakicës demokrate në Senat, Harry Reid, ka qenë i vetmi që ka votuar kundër ligjit.

Përgatiti: Valona Tela

Pasuria e Trumpit është zvogëluar për 800 milionë dollarë

Revista amerikane e biznesit Forbes tha se pasuria e kandidatit republikan për president të Shteteve të Bashkuara, Donald Trump, është zvogëluar.

Forbes vlerësoi se pasuria e tij ka rënë për 800 milionë dollarë qysh në vitin 2015.

Sipas revistës, manjati i patundshmërisë aktualisht ka pasuri në vlerë neto prej 3.7 miliardë dollarësh.

Forbes, e cila ka vlerësuar pasurinë e Trumpit për më shumë se tri dekada, tha se rënia ka kryesisht të bëjë me “zbutjen” e tregut të pronës në Nju Jork.

James Comey: Hakerët rusë vazhdojnë të ndërhyjnë në zgjedhjet në SHBA

Drejtori i FBI-së, James Comey, tha se vazhdon të ketë përpjekje për të ndërhyrë në bazën e të dhënave të votuesve amerikanë.

Ai tha se FBI po vëzhgon nga afër hakerët rusë, që mund të tentojnë të prishin zgjedhjet në SHBA.

FBI, në muajin gusht, ka paralajmëruar 50 shtete të SHBA-së që të forcojnë sigurinë zgjedhore, pasi hakerët kanë sulmuar databaza online në Illinois dhe Arizonë.

“Natyrisht, jemi duke bërë punë shumë të madhe, përmes hetuesve të inteligjencës, për të kuptuar se çfarë duan rusët me zgjedhjet tona”, tha Comey para Kongresit.

Zgjedhjet presidenciale në SHBA mbahen më 8 nëntor.

Disa vëzhgues thonë se presidenti rus, Vladimir Putin, do fitoren e kandidatit republikan, Donald Trump, përballë demokrates Hillary Clinton.

SHBA emëron ambasador në Kubë pas 55 vitesh

Obama ka paraqitur si kandidat për ambasador në Havana Jeffrey DeLaurentis

UASHINGTON – Shtetet e Bashkuara të Amerikës (SHBA) emëruan për herë të parë ambasador në Kubë pas 55 vitesh të ndërprerjes së marrëdhënënieve diplomatike në vitin 1961.

Presidenti amerikan Barack Obama ka paraqitur si kandidat për ambasador në Havana Jeffrey DeLaurentis i cili aktualisht kryen detyrën si i ngarkuarai me punë në ambasadën amerikane në Kubë.

Një tjetër afro-amerikan vritet nga policia në SHBA

Shefi i policisë, Jeff Davis, ka njoftuar se 30 vjeçari afro-amerikan që u qëllua nga policia në El Cajon në afërsi të San Diegos ka humbur jetën në spitalin ku ai ishte dërguar për mjekim

EL CAJON – Njoftohet se një afro-amerikan ka humbur jetën pasi është qëlluar nga policia në Californi të SHBA-së. Shefi i policisë, Jeff Davis, ka njoftuar se 30 vjeçari afro-amerikan që u qëllua nga policia në El Cajon në afërsi të San Diegos ka humbur jetën në spitalin ku ai ishte dërguar për mjekim.

Dy policët pasi pas një denoncimi kanë qëlluar mbi afro-amerikanin identiteti i të cilit ende nuk është publikuar pasi ia kishte nxjerrë nga xhepi një objekt dhe ia kishte drejtuar policëve, është shprehur Davis. aa

Obama: Peresi ka ndryshuar kursin e historisë njerëzore

Kryeministri i Izraelit, Benjamin Netanyahu përmes një deklarate për media ka shprehur “dhimbjen të thellë personale” për vdekjen e ish-presidentit Shimon Peres.

Ndërkaq, presidenti amerikan Barack Obama ka thënë se Peres ka qenë një prej pak njerëzve “që ka ndërruar kursin e historisë njerëzore jo vetëm përmes rolit të tij në ngjarjet humane por edhe përmes zgjerimit të imagjinatës sonë morale”.

Edhe ministri i jashtëm gjerman, Frank-Walter Steinmeier ka vlerësuar punën e Peres për përmirësimin e marrëdhëneve në mes të Gjermanisë dhe Izraelit pas Luftës së Dytë Botërore.

“Me dëshirën e tij të palëkundër për ta bashkuar të kalurën dhe të ardhmen, Shimon Peres iu dedikua miqësisë unike në mes të Izraelit dhe Gjermanisë”, ka thënë Steinmeier përmes një deklarate.

Peres ka vdekur sot në moshën 93 vjeçare pas një sulmi në zemër.

Carteri e akuzon Rusinë për rritje të ushtrimeve atomike

Ashton Carter gjatë një konference me gazetarë në Pentagon më 29 gusht të këtij viti

Rusia duket se ka më tepër gatishmëri për të vendosur armatime atomike sot se sa gjatë Luftës së Ftohtë, tha mbrëmë vonë, sekretari amerikan i mbrojtjes, Ashton Carter.

Mëtutje, duke folur në një bazë ajrore ushtarake në Dakotën Vriore, ai e ka akuzuar Moskën për “frikësim atomik”, derisa ndërmerr më tepër ushtrime atomike dhe angazhohet në më tepër retorikë të zëshme bërthamore.

“Është fakt i sigurt se përdorimi më i mundshëm i armatimit atomik sot nuk është këmbimi bërthamor masiv i tipit të Luftës së Ftohtë, por kthimi jo i mençur në sulme më të vogla por të tmerrshme dhe të paprecedente, për shembull nga Rusia ose Koreja Veriore”, tha Ashton Carter.

Ai, po ashtu, ka shprehur shqetësim për ecjen e Rusisë kah shqyrtimi i përgjithshëm i sistemeve të armatimit atomik, bile edhe derisa sekretari Carter ka shpallur se Shtetet e Bashkuara do të ecin përpara me ndërtimin e gjeneratës së re të armatimit atomik, me çmim prej më tepër se 100 miliardë dollarë.

Ashton Carter konsideron se forcimi atomik rus i “shtron pyetjet serioze për përkushtimin e liderëve të saj për stabilitetin strategjik, qëndrimin e tyre për marrëveshjet e krijuara afatgjata kundër përdorimit të armatimit atomik dhe nëse ata e respektojnë kujdesin e thellë që e kanë treguar liderët e periudhës së Luftës së Ftohtë, sa i përketë kërcënimit nga armatimi bërthamor”.

SHBA dënon mbajtjen e referendumit në Republikën Sërpska

Zëdhënësi i Departamentit amerikan të Shtetit Mark Toner tha se autoritetet në RS referendumin e kanë mbajtur në kundërshtim me vendimin e Gjykatës Kushtetuese të Bosnjë e Hercegovinës

UASHINGTON – Departamenti amerikan i Shtetit e ka dënuar mbajtjen e referendumit në Republikën Sërpska (RS) gjatë të dielës për 9 janarin si Ditë e Republikës Sërpska).

Zëdhënësi i Departamentit amerikan të Shtetit Mark Toner në njoftimin me shkrim theksoi se autoritetet në RS referendumin e kanë mbajtur në kundërshtim me vendimin e Gjykatës Kushtetuese të Bosnjë e Hercegovinës.

“SHBA-të dënojnë këtë referendum jolegal”, theksoi Toner i cili shtoi se referendumi pamundëson zbatimin e Marrëveshjes së Dejtonit dhe se SHBA-të do të mbështesin institucionet lokale kur është në pyetje reagimi për organizimin e referendumit. aa

Shkëmbime të ashpra në debatin Clinton-Trump

Kandidatët për president Hillary Clinton dhe Donald Trump u përballën të hënën mbrëma në debatin e parë mes tyre, ndërkohë që janë mbërthyer në një garë të fortë për Shtëpinë e Bardhë.

Zoti Trump kritikoi zonjën Clinton se për 30 vjet nuk kishte bërë asgjë për krijimin e vendeve të punës. “Sekretare, ju nuk keni një plan”, tha zoti Trump.

“Donaldi jeton në botën e tij,” u përgjigj zonja Clinton.

I pyetur se përse nuk deklaron taksat, Donald Trump tha se ai do t’i publikojë ato kur zonja Clinton të publikojë të 33 000 emailat që janë fshirë.

Zonja Clinton pranoi se kishte bërë gabim për çështjen e serverit privat dhe se nëse do t’i jepej një shans tjetër do të vepronte ndryshe.

Sulmet kibernetike ishin një temë për të cilën u debatua. Zonja Clinton kritikoi rivalin Trump për lavdërimet ndaj Presidentit rus, Vladimir Putin, dhe ndaj sugjerimit të tij që Rusia të piratojë qeverinë amerikane.

Kandidatët folën për grupin Shteti Islamik. “Jam i tëri për NATO-n, por ajo duhet të fokusohet te terrorizmi,” tha zoti Trump, i cili shtoi se NATO-ja duhet të dërgojë trupa në Lindjen e Mesme për të çrrënjosur ISIS-in.

Zonja Clinton tha se NATO-ja po e lufton terrorizmin, dërgoi trupa në Afganistan pikërisht për të luftuar terrorizmin.

Ajo kritikoi zotin Trump për çështjen e armëve bërthamore, që ajo tha se ai i trajton me shkujdesje. Qëndrimi i tij për armët bërthamore është thellësisht tronditës, – tha zonja Clinton. Ajo tha se SHBA do t’i respektojë marrëveshjet me aleatët.

Trump u përgjigj: Armët bërthamore janë kërcënimi më i madh ndaj vendit tonë.

Ai foli për çështjen e gjykimit dhe temperamentit që duhet të kenë kandidatët. “Unë kam gjykim shumë më të mirë se sa ajo dhe një temperament shumë më të mirë. Temperamenti im është arma ime më e fortë,” tha zoti Trump.

Zoti Trump kritikoi ashpër marrëveshjen me Iranin. Është marrëveshja më e keqe që është bërë ndonjëherë në histori, tha ai.

Rivalja Clinton kundërshtoi. Ajo e quajti marrëveshjen me Iranin të suksesshme.

Clinton: Cila do të ishte alternativa e zotit Trump në këtë rast?

Trump: Për të qenë president duhet të kesh forcë dhe ajo nuk e ka këtë forcë.

Clinton: Ju flisni për forcë ndërkohë që unë kam vizituar dhe negociuar me kaq shumë vende.

Trump: Ju keni shumë përvojë, por një përvojë të keqe.

Kandidati Trump tha se zonja Clinton ka shpenzuar qindra miliona dollarë për reklama kundër meje dhe kjo nuk është e ndershme.

Zonja Clinton tha se do ta mbështeste rezultatin e zgjedhjeve. Dikush do të fitojë e dikush jo, tha ajo.

Zoti Trump tha se qëllimi i tij është që Amerika të bëhet përsëri madhështore. “Nëse ajo fiton, unë absolutisht do ta mbështes rezultatin”, tha ai.

Njëqind milionë njerëz mendohet se e ndoqën debatin në Universitetin Hofstra në afërsi të Nju Jorkut. Kjo është audienca më e madhe ndonjëherë që ndjek një debat presidencial në SHBA.

Është hera e parë që amerikanët panë dy kandidatët ballë për ballë në të njëjtin podium. Sondazhet politike i jepnin zonjës Clinton një avantazh të lehtë para debatit.

Clinton dhe Trump tashmë i kanë bërë të qarta qëndrimet e tyre mbi shumë çështje jetike, duke përfshirë ekonominë, emigracionin, ushtrinë dhe terrorizmin, prandaj debati kishte të bënte më tepër me çështjet e temperamentit, besueshmërisë dhe shkallën e pëlqimit të votuesve për secilin kandidat.

Gruaja dhe fëmijët e zotit Trump ishin në sallë, po ashtu edhe ish-Presidenti Bill Clinton dhe vajza e çiftit Clinton, Chelsea.

Debati ndahej në gjashtë segmente 15-minutëshe. Temat kryesore ishin tre: Drejtimi i Amerikës, arritja e begatisë dhe siguria e Amerikës.

Nga tre debatet presidenciale, debati i parë është tradicionalisht më i ndjekuri, dhe zhvillohet në një moment kritik, thotë Matthew Dallek i Universitetit “George Washington”. “Tashmë rezultatet janë shumë më të barabarta se ç’pritej, kështu që debati ka peshë më të madhe për të dy kandidatët”, thotë ai.

Debatet televizive presidenciale filluan në vitin 1960, me një debat ndërmjet Richard Nixon dhe John Kennedy. Që nga ajo kohë, debatet televizive kanë ndikuar në disa gara presidenciale. “Në një vit normal, debatet janë mënyra e vetme për ta ndryshuar garën pas mbarimit të konventave të partive. Është momenti kur numri më i madh i njerëzve ndjekin garën nëpërmjet mediave,” thotë profesori për qeverisjen në Universitetin “George Mason”, Jeremy Mayer.

Mundësi dhe rreziqe

Të dy konkurrentët vuajnë prej një mospëlqimi të lartë nga votuesit dhe debatet ofrojnë mundësi të reja, por edhe rreziqe. Zoti Meyer thotë se “debati mund t’u ofrojë kandidatëve një shans të dytë për të krijuar një tjetër përshtypje, ose për të çimentuar përshtypjen negative”.

Gjatë viteve të fundit, debatet presidenciale nuk kanë patur ndikimin e zgjedhjeve të mëparshme. Profesori Wayne thotë se: “Mund të na kujtohen dy debate të rëndësishme në historinë amerikane: debati i vitit 1960, ndërmjet demokratit John Kennedy dhe republikanit Richard Nixon; si dhe ai i vitit 1976, ndërmjet republikanit Gerald Ford dhe demokratit Jimmy Carter. Në të dyja këto debate u bënë gabime dhe paraqitjet nuk ishin të duhurat, duke ndikuar për rrjedhojë në rezultatin e zgjedhjeve.”

Do të ketë gjithsej tre debate presidenciale, si dhe një përballje ndërmjet dy kandidatëve për zëvendëspresident, demokratit Tim Kaine dhe republikanit Mike Pence.

Çfarë pritet sot nga debati Trump – Clinton?

Mbrëmja e sotshme mund të shndërrohet në një moment përcaktues për fushatën presidenciale në SHBA.

Debati i parë presidencial ndërmjet demokrates Hillary Clinton dhe republikanit Donald Trump vlerësohet se do të ndiqet nga 100 milionë amerikanë, të cilët do të jenë në gjendje për herë të parë të peshojnë kandidatët në një skenë përballë njëri-tjetrit.

Debati do të jetë me tepër rëndësi për të dy kandidatët, të cilët do të ndiqen me vëmendje jo vetëm për gjërat që do të thonë, por edhe për mënyrat se si do t’i thonë.

Cili do të jetë Donald Trump?

Debati do të jetë një moment kyç për zotin Trump, i cili gjatë javëve të fundit ka ngushtuar diferencën në sondazhe me zonjën Clinton, pjesërisht për arsye se e ka paraqitur veten më të disiplinuar se në të kaluarën. Ai gjithashtu është përqëndruar më shumë tek tematika e tij qendrore.

“Do ta bëjmë Amerikën sërish të fortë. Do ta bëjmë Amerikën sërish të sigurtë dhe madhështore!”, u tha zoti Trump mbështetësve të tij të mbledhur në një tubim në Fort Myers, në Florida, një shtet i rëndësishëm ku ai ka rezultuar i barabartë me zonjën Clinton gjatë sondazheve të fundit.

Nga ana e saj, zonja Clinton synon që gjatë debatit të sigurojë mbështetësit e saj dhe të promovojë mesazhin për ndërtimin e një ekonomie më gjithëpërfshirëse. Ajo u shpreh gjatë një tubimi në Orlando, të Floridës, se “ne kemi të gjithë vlerë. Në Shtetet e Bashkuara të Amerikës, në vendin më të mirë në botë, ne besojmë se të gjithë lindin të barabartë!”.

Rritet vëmendja ndërsa sondazhet po tregojnë rezultate të afërta

Nga tre debatet presidenciale, debati i parë është tradicionalisht më i ndjekuri, dhe po zhvillohet në një moment kritik, thotë Matthew Dallek i Universitetit “George Washington”. “Tashmë rezultatet janë shumë më të barabarta se ç’pritej, kështu që debati ka peshë më të madhe për të dy kandidatët”, thotë ai.

Debatet televizive presidenciale filluan në vitin 1960, me një debat ndërmjet Richard Nixon dhe John Kennedy. Që nga ajo kohë, debatet televizive kanë ndikuar në disa gara presidenciale. “Në një vit normal, debatet janë mënyra e vetme për ta ndryshuar garën pas mbarimit të konventave të partive. Është momenti kur numri më i madh i njerëzve ndjekin garën nëpërmjet mediave,” thotë profesori për qeverisjen në Universitetin “George Mason”, Jeremy Mayer.

Sa po përgatiten?

Zoti Trump dhe zonja Clinton duket se po përgatiten në mënyra të ndryshme për debatin. Zonja Clinton mendohet se i ka kushtuar më shumë energji përgatitjes për debatin, duke u përballur madje me persona në rolin e zotit Trump.

Ndërsa nga kampi i kandidatit republikan mësohet se puna e tij përgatitore ka qenë më pak intensive. Ai vetë madje shpotiti zonjën Clinton gjatë një tubimi në Pennsylvania, duke u shprehur se: “disa thonë se po përgatitet për debatin; të tjerë thonë se ajo po fle gjumë”.

Demokratët shpresojnë se kandidati republikan do të shfaqet i pakujdesshëm në debat dhe në përputhje me paraqitjen e tij gjatë debateve paraprake republikane. Por, duket se stafi i ri i fushatës së zotit Trump ka patur sukses në ruajtjen e përqëndrimit të tij dhe në shmangien e kryerjes së sulmeve personale.

Një tjetër audiencë

Të dy kandidatët u paraqitën mirë gjatë debateve paraprake të partive të tyre. Një mendim ekziston se zoti Trump fitoi nominimin republikan duke e shfrytëzuar në maksimum mundësinë dhe duke sulmuar rivalët Jeb Bush, Marco Rubio dhe Ted Cruz.

Por, zoti Trump do të jetë përpara një audience tjetër gjatë debateve me zonjën Clinton. Ai do të mundohet të përmirësojë imazhin e tij me votuesit e moderuar republikanë dhe të pavendosurit, të cilët nuk do të fitoheshin nëpërmjet llojit të sulmeve partiake që ai përdori gjatë debateve paraprake.

Zonja Clinton do të ndërtojë mbi eksperiencën e saj të mëparshme gjatë debatit paraprak me rivalin kryesor, Senatorin Bernie Sanders. Zonja Clinton ia doli mbanë përgjithësisht të ruante staturën gjatë debateve me zotin Sanders dhe madje e vendosi atë shpesh në pozita mbrojtëse, duke ngritur pikëpyetje mbi prakticitetin e disa prej propozimeve të tij.

Por, zonja Clinton përballet gjithashtu me sfida. Anketimet tregojnë se shumica e votuesve nuk i besojnë. Mënyra e debatueshme se si ajo menaxhoi çështjen e serverit të email-it të saj privat gjatë periudhës që ishte Sekretare Shteti vazhdon ta ndjekë atë edhe gjatë këtyre javëve të fundit parazgjedhore.

Natyra e paparashikueshme e zotit Trump përbën gjithashtu një sfidë për zonjën Clinton, ndërsa ajo përgatitet për debatin, thotë profesori Stephen Wayne, i Universitetit “Georgetown”. “Çështja është se Donald Trump nuk është aq i disiplinuar si Hillary Clinton. Nëse e prek në diçka personale, ai ka tendencën të reagojë në mënyrë personale.”

Mundësi dhe rreziqe

Të dy konkurrentët vuajnë prej një mospëlqimi të lartë nga votuesit dhe debatet ofrojnë mundësi të reja, por edhe rreziqe. Zoti Meyer thotë se “debati mund t’u ofrojë kandidatëve një shans të dytë për të krijuar një tjetër përshtypje, ose për të çimentuar përshtypjen negative”.

Gjatë viteve të fundit, debatet presidenciale nuk kanë patur ndikimin e zgjedhjeve të mëparshme. Profesori Wayne thotë se: “Mund të na kujtohen dy debate të rëndësishme në historinë amerikane: debati i vitit 1960, ndërmjet demokratit John Kennedy dhe republikanit Richard Nixon; si dhe ai i vitit 1976, ndërmjet republikanit Gerald Ford dhe demokratit Jimmy Carter. Në të dyja këto debate u bënë gabime dhe paraqitjet nuk ishin të duhurat, duke ndikuar për rrjedhojë në rezultatin e zgjedhjeve.”

Do të ketë gjithsej tre debate presidenciale, si dhe një përballje ndërmjet dy kandidatëve për zëvendëspresident, demokratit Tim Kaine dhe republikanit Mike Pence.

SHBA: Sonte debati i parë presidencial

Hillary Clinton dhe Donald Trump

Kandidatët për president të Shteteve të Bashkuara, Hillary Clinton dhe Donald Trump, mbajnë sonte debatin e parë presidencial, i cili, sipas disa vlerësimeve, mund të tërheqë mbi 100 milionë shikues.

Gjasat për fitore, të dy kandidatët i kanë të mëdha. Por shikuesit nuk do t’i kushtojnë vëmendje vetëm asaj që thonë, por edhe si e thonë dhe si reagojnë ndaj njëri-tjetrit.

Debati do të jetë moment kyç për Trumpin, i cili, në javët e fundit, i është afruar Clintonit në sondazhe.

“Do ta bëjmë Amerikën të fortë përsëri. Do ta bëjmë të sigurt dhe madhështore”, u tha Trump mbështetësve në Florida, në njërin nga shtetet vendimtare.

Clinton duket se e sheh debatin si mundësi për të siguruar mbështetësit e saj se do të ndërtojë një ekonomi më gjithëpërfshirëse.

“Të gjithë ne kemi vlerë. Në shtetet e Bashkuara të Amerikës, vendin më të madh në botë, ne besojmë se të gjithë lindim të barabartë”, tha Clinton, po ashtu në Florida.

I pari prej tre debateve, i cili tradicionalisht është më i shikuari, vjen në kohën kur ka ndryshuar loja, tha për Zërin e Amerikës analisti Matthew Dallek, nga Universiteti George Washinton.

“Tani, sondazhet janë me rezultat shumë më të ngushtë sesa mendohej, andaj debati do të jetë i rëndësishëm”, tha ai.

Debatet televizive presidenciale kanë nisur në vitin 1960 me Richard Nixonin dhe John Kennedyn. Qysh atëherë, debatet kanë pasur ndikim, por jo të domosdoshëm, në zgjedhjet presidenciale.

Debati i sotëm do të nisë në orën 21:00, sipas kohës lokale, në kanalin NBC dhe do të moderohet nga Lester Holt. Ai pritet të hapë një varg të gjerë temash, nisur nga siguria kombëtare deri te rritja ekonomike.

E para është aktualizuar shumë këtë muaj, si pasojë e disa sulmeve qe kanë goditur Nju Jorkun, Nju Xhërsin dhe Minesotën.

Asnjëri prej sulmeve nuk ka rezultuar me fatalitet, por ato u kanë shërbyer dy kandidatëve që të ashpërsojnë retorikën kundër njëri-tjetrit.

Clinton tha se rivali i saj republikan, Trump, me gjuhen e tij anti-myslimane, u ka dhënë “ndihmë dhe ngushëllim” terroristëve islamikë.

Trump, në anën tjetër, tha se Clinton mbështet politikën me kufij të hapur, përkundër faktit se qindra migrantë “kanë qenë të implikuar në terrorizëm dhe aktivitete të lidhura me terrorizmin brenda Shteteve të Bashkuara”.

“Debati presidencial është ndër mënyrat e vetme për të ndryshuar rezultatin. Është momenti që ndiqet nga më shumë njerëz”, tha për Zërin e Amerikës Jeremy Mayer, profeson në Universitetin George Mason.

Po sipas tij, të dy kanëdidatët vujanë nga një nivel i lartë i mospëlqimit nga votuesit dhe debati ofron mundësi, por edhe rrezik.

“Ajo çfarë mund të bëjë debati është t’i ofrojë kandidatit një shans të dytë që të krijojë një përshtypje ndryshe ose të çimentiojë përshtypjen negative”, tha Mayer.

Deri në zgjedhjet e nëntorit do të ketë tre debate presidenciale dhe një ndërmjet kandidatëve për nënpresident, demokratit Tim Kaine dhe republikanit Mike Pence.

Përgatiti: Valona Tela

Send this to a friend