E nominuara e presidentit të zgjedhur amerikan, Donald Trump, për ambasadore të SHBA-së në OKB, ka thënë se Rusia nuk është vend që mund t’i besosh dhe se ky vend duhet të ndërmarrë “veprime pozitive” para se Uashingtoni të heq sanksionet kundër Moskës.

Guvernatorja e Karolinës së Jugut, Nikki Haley i ka thënë një komisioni të Senatit amerikan gjatë seancës dëgjimore për emërimin e saj ambasadore në OKB më 18 janar se Rusia po bënë përpjekje që të “shfaqë muskujt”.

“Unë nuk mendoj se mund t’iu besojmë atyre” ka thënë 44 vjeçarja Haley komisionit për Marrëdhënie me Jashtë të Senatit amerikan.

Haley, e cila e ka kritikuar Trumpin gjatë fushatës zgjedhore, ka pak përvojë në çështjet ndërkombëtare dhe se nuk ka folur shpesh publikisht rreth qëndrimeve të saj për politikën e jashtme.

Trump ka thënë se dëshiron përmirësimin e marrëdhënieve bilaterale me Rusinë të cilat janë përkeqësuar si pasojë e veprimeve të Moskës në Ukrainë dhe Siri.

Kjo ka nxitur kritikët që thonë se Trump është shumë i butë ndaj politikës së jashtme agresive të Moskës.

Senacan dëgjimore për konfirmimin e Haleyt po ndodhë derisa agjencitë amerikane të inteligjencës kanë thënë se Rusia ka ndërhyrë në zgjedhjet amerikane përmes sulmeve kibernetike që janë urdhëruar nga presidenti rus, Vladimir Putin.

Nëse konfirmohet nga Senati, Haley do e pasojë Samantha Poëer, një kritike e ashpër e aneksimit që Rusia ia ka bërë gadishullut ukrainas të Krimesë dhe përkrahjes që Moska iu ka dhënë separatistëve në Ukrainën lindore dhe presidentit sirian, Bashar al Assad.

Nënpresidenti amerikan Joe Biden paralajmëroi të mërkurën vendet evropiane se Rusia do të përpiqet të ndikojë në zgjedhjet e tyre, në të njëjtën mënyrë që siç thonë agjencitë amerikane të zbulimit, se Moska ndërhyri në zgjedhjet e nëntorit, të cilat i fitoi Donald Trumpi.

“Ndërsa shumë vende evropiane bëhen gati të mbajnë zgjedhje këtë vit, duhet të parashikojmë përpjekje të mëtejshme nga Rusia për të ndërhyrë në procesin demokratik. Ju them me siguri se do të ndodhë përsëri”, tha zoti Biden në fjalimin e tij të fundit në Davos të Zvicrës.

Ai akuzoi gjithashtu Rusinë për përpjekje për të shpërbërë atë që ai e quajti “rendin ndërkombëtar liberal” dhe për të rikthyer një botë ku superfuqitë ushtrojnë kontroll ndaj vendeve që janë në sferën e tyre të ndikimit. Përveç vënies në shënjestër të sistemeve demokratike, zoti Biden përmendi “agresionin rus kundër fqinjëve”, përfshirë veprimet në Ukrainë dhe përdormin e kontrollit të burimeve të energjisë si armë kundër vendeve të tjera.

Rusia e ka hedhur poshtë përfundimin e agjencive amerikane të zbulimit sipas së cilit, ajo ka ndërhytë në zgjedhje me synimin për të ndihmuar zotin Trump.

Zoti Biden u përpoq gjithashtu të siguronte vendet e NATO-s se Shtetet e Bashkuara mbeten të përkushtuara ndaj aleancës. Zoti Trump gjatë fushatës së tij, tha se NATO-s i ka ikur koha dhe la të kuptohet se Shtetet e Bashkuara nuk do t’i mbrojnë automatiisht anëtarët që nuk kanë paguar plotësisht detyrimet e tyre.

“Mburoja jonë më e rëndësishme për partneritetin transatlantic është përkushtimi i palëkundur i Shteteve të Bashkuara ndaj të gjithë aleatëve tanë të NATO-s. Është një detyrim i shenjtë, sipas së cilit një sulm ndaj njërit prej nesh është një sulm ndaj të gjithëve. Kjo nuk mund të vihet kurrë në diskutim”.

Nënpresidenti amerikan tha se në të ardhmen duhet të ndërmerren përpjekje për ta bërë Evropën më të pavarur përsa i takon energjisë, për të përmirësuar sigurinë kibernetike dhe për të luftuar keqinformimin.

Zoti Biden tha se bota është ndoshta më e sigurt se ç’ka qenë ndonjëherë më parë, por se me teknologjinë moderne dhe lehtësinë e qarkullimit të imazheve mund të krijohet përshtypja sikur ka “një kaos të vazhdueshëm”. Ai tha se përballë shqetësimeve të sotme, ekziston rreziku për t’u kthyer tek “një miopi politike” dhe politika nacionaloste që shekullin e kaluar shkaktuan luftra botërore.

Ai tha se ky rrezik duhet tejkaluar duke kujtuar “bujarinë” që solli planin për të rindërtuar Evropën pas Luftës së Dytë Botërore dhe “guximin që solli Kombet e Bashkuara”.

Ai e pranoi se ka një “pasiguri të prekshme për gjendjen e botës”, por tha se megjithëse Shtetet e Bashkuara luajnë një rol të rëndësishëm, sfidat e botës nuk mund të përballohen vetëm nga udhëheqja e Uashingtonit.

“Qoftë nëse i forcojmë lidhjet që na mbajnë të bashkuar, apo nëse i nënshtrohemi presioneve të tanishmme, çdo vendi i takon të bëjë vetë zgjedhjen e vet. Dhe ata do të përcaktojnë se çfarë vendesh dhe çfarë bote do t’u lëmë fëmijëve tanë”.

Zëdhënësi i Shtëpisë së Bardhë, Josh Earnest thotë se administratës së Presidentit të Zgjedhur Donald Trump, do t’i duhet të zgjedhën nëse do të mbajë anën e agjencive të zbulimit, apo Rusisë dhe WikiLeaks.

Zoti Earnest po i përgjigjej një pyetjeje për akuzën e Presidentit rus Vladimir Putin ndaj administratës së Presidentit Barack Obama se po përpiqej të sabotonte zotin Trump, duke përhapur informacion të rremë.

Zoti Putin tha se bërja publike javën e kaluar e një dosjeje me informacion të paverifikuar për sjellje të papërshtatshme ndaj zotit Trump, ishte pjesë e një përpjekjeje për “të sabotuar legjitimitetin presidentit të zgjedhur” pavarësisht nga fitorja “bindëse”, presidenciale e zotit Trump, siç u shpreh ai.

Presidenti rus e cilësoi “të rreme” një akuzë në dokument, sipas së cilës zoti Trump kishte kryer marrëdhënie seksuale në një hotel të Moskës në vitin 2013. Zoti Putin shtoi se personat përgjegjës për akuzat janë “më keq se prostitutat” dhe shtroi pyetjen se pse zoti Trump “kishte nevojë për prostituta”, kur kishte pasur marrëdhënie “me gratë më të bukura të botës”.

Agjencitë amerikane të zbulimit, nxorrën një raport që arrinte në përfundimin se Rusia, nën urdhrat e zotit Putin, kishte ndërhyrë për të sabotuar zgjedhjet presidenciale dhe kishte pasur si synim të ndihmonte zotin Trump të fitonte.

Zoti Earnest e mbrojti punën e agjencive të zbulimit në konferencën për shtyp në Shtëpinë e Bardhë, duke thënë se nuk është hera e parë që këto agjenci zbulojnë informacione që denoncojnë Rusinë.

“Jam i sigurt që Rusisë nuk i pëlqen t’i dëgjojë këto gjëra. Por në fund të fundit ka një dallim fare të qartë këtu dhe administratës së ardhshme do t’i duhet të vendosë se çfarë qëndrimi do të mbajë”, tha zoti Earnest.

Zoti Trump ka fajësuar agjencitë e zbulimit për rrjedhjen e informacionit të pavërtetuar, që e lidh gjithashtu zotin Trump me qeverinë ruse dhe shtroi pyetjen nëse drejtori i CIA-s, John Brennan ishte përgjegjës.

Në një mesazh në Twitter javën a kaluar, presidenti i zgjedhur e krahasoi komunitetin e zbulimit me Gjermaninë naziste.

Në një intervistë me gazetën “The Wall Street Journal”, zoti Brennan e cilësoi këtë krahasim si “të neveritshëm” dha tha se kritikat e zotit Trump për besueshmërinë e agjencive të zbulimit, ishin të pajustifikueshme.

Ai mohoi të kishte bërë publike dosjen e përgatitur nga një oficer britanik zbulimi në pension.

Në një conferencë për shtyp të martën në Moskë, Ministri i Jashtëm rus, Sergei Lavrov tha se marrëdhëniet me Shtetet e Bashkuara mund të përmirësohen kur zoti Trump të bëhet president.

“Nëse qëndron ajo që thotë Donald Trump dhe ekipi i tij për Rusinë, gatishmëria për t’u përpjekur për qëndrime të përbashkëta për zgjidhjen e problemeve të përbashkëta dhe freninim e kërcënimeve të përbashkëta, ne do të bëjmë të njëjtën gjë”, tha ai.

Departamenti amerikan i Thesarit vendosi sanksione financiare ndaj udhëheqësit nacionalist të serbëve të Bosnjes Milorad Dodik, për shkak të rolit të tij aktiv, për të penguar marrëveshjet e ndërmjetësuara nga Shtetet e Bashkuara, që i dhanë fund luftës së Bosnjes në vitin 1995.

Sanksionet e vendosura të martën, autorizojnë autoritetet amerikane të bllokojnë pronat ose pasuritë e zotit Dodik, që janë nën juridiksionin amerikan.

Milorad Dodik, i cili është president i Republikës autonome serbe të Bosnjes, është kritikuar nga perëndimi për fushatën e tij për të festuar Ditën e Republikës Serbe, duke sfiduar vendimin e gjykatës kushtetuese të Bosnje Hercegovinës.

Dita e Republikës përkujton shpalljen e “Republikës së Popullit Serb” në Bosnje, që u bë tre muaj para shpërthimit të konfliktit ndëretnik që zgjati tre vjet, 1992-1995, ku gjetën vdekjen 100 mijë vetë.

Shumica dërmuese e serbëve të Bosnjes votuan në shtator për të mbështetur referendumin e thirrur nga zoti Dodik për të vazhduar shënimin e kësaj dite.

Festa ngjalli emocione të thella mes të mbijetuarve të masakrës së Srebrenicës në vitin 1995, ku 8 mijë meshkuj myslimanë u vranë nga forcat serbe të Bosnjes, në krimin më të rëndë në Evropë, që nga Lufta e Dytë Botërore.

Marrëveshjet e paqes të Daytonit, që i dhanë fund luftës në Bosnje, e ndanë Bosnjen në dy njësi gjysmë të pavarura, Republikën Serbe dhe Federatën Muslimano-Kroate, të bashkuara nga një qeveri e dobët federale.

John Smith, zyrtar i lartë i Departamentit të Thesarit tha se “duke penguar marrëveshjet e Daytonit, Milorad Dodik përbën një kërcënim të madh për sovranitetin dhe integriten territorial të Bosnje Hercegovinës”.

Ambasadorja në largim e Shteteve të Bashkuara në OKB, Samantha Power, tha se Rusia është e angazhuar në veprime agresive dhe destabilizuese, të cilat, sipas saj, kërcënojnë rendin botëror.

Power i bëri këto komente të martën në Këshillin Atlantik, me seli në Uashington.

Ajo përmendi aneksimin e paligjshëm që i ka bërë Rusia gadishullit ukrainas të Krimesë dhe ndërhyrjen e Kremlinit në konfliktin në lindje të Ukrainës, pastaj mbështetjen për Qeverinë e Sirisë në luftën civile të këtij vendi, si dhe përpjekjet për të ndikuar zgjedhjet në demokracitë perëndimore përmes piraterimit të kompjuterëve dhe fushatave të dezinformacionit.

“Veprimet e Rusisë nuk krijojnë rend të ri botëror. Ato po e shkatërrojnë atë që ekziston”, tha Power.

Drejtori në largim i Agjencisë Qendrore të Zbulimit John Brennan, e hodhi poshtë sugjerimin e presidentit të zgjedhur Donald Trump se ai ishte personi që ka nxjerrë në media një raport të pabazë që përfshin pretendime se zyrtarë të fushatës së presidentit Trump kishin patur kontakte me operativë rusë.

Një artikull i gazetës Wall Street Journal të hënën citonte zotin Brennan të thoshte se ai “nuk kishte asnjë interes” t’i kushtonte dokumentacionit më shumë vëmendje dhe se zyrtarët e zbulimit e informuan zotin Trump rreth tij gjatë një takimi më 6 janar, pasi besonin se ai duhet të informohej për këtë dokumentacion.

Zoti Trump e ka kritikuar ashpër komunitetin e zbulimit gjatë javëve të fundit dhe ai ka patur edhe disa retorika me zotin Brennan.

“Agjencitë e zbulimit asnjëherë nuk duhet të lejojnë lajme të rreme të dalin në publik. Donin të më godisnin për herë të fundit. A jetojmë në Gjermaninë naziste?” – shkroi zoti Trump në Twitter javën e kaluar.

Drjetori i CIA-s Brennan i tha gazetës Wall Street Journal, se presidentët pritet që t’i sfidojnë konkluzionet e komunitetit të zbulimit, por se ai nuk i pranon akuzat për pandershmëri dhe mungesë të integritetit.

“Thuaju familjeve të atyre 117 oficerëve të CIAs që janë përjetësuar përgjithmonë në piedestalin e nderit, se të dashurit e tyre që dhanë jetën janë të ngjashëm me nazistët”, – tha Brennan.

Brennan tha në një intervistë të dielën se zoti Trump nuk e kupton sa duhet kërcënimin që përbën Rusia për botën dhe nënvlerësoi dëshirën e tij për të folur dhe për të shkruajtur mesazhe në twitter, duke thënë se kjo nuk është në interesat amerikane.

Presidenti i zgjedhur amerikan Donald Trump thotë se plani i tij për të zëvendësuar programin shëndetësor të presidentit Obama është formuluar deri në hollësitë më të vogla dhe do të paraqitet së shpejti.

Në një intervistë me gazetën Uashington Post, zoti Trump thotë se qëllimi i tij është krijimi i një sigurimi shëndetësor për të gjithë, por nuk pranoi të japë hollësi.

Në intervistë zoti Trump thekson se ulja e kostos së shërbimit shëndetësor mund të arrihet nëpërmjet trysnisë publike ndaj kompanive farmaceutike për të ulur çmimet e barnave.

Shfuqizimi i Aktit të Kujdesit të Përballueshëm Shëndetësor, i njohur gjithashtu si Obamacare, është përparësi kryesore që në fillim të mandatit të zotit Trump në Shtëpinë e Bardhë. Programi shëndetësor u miratua nga Kongresi në vitin 2010, kur demokratët ishin në kontroll. Por tani republikanët kanë shumicën në Senat dhe në Dhomën e Përfaqësuesve, dhe me zotin Trump si president, ata mund të marrin masa për të reformuar sistemin shëndetësor.

Javën e kaluar, Kongresi miratoi hapat e para drejt shfuqizimit të Aktit të Kujdesit të Përballueshëm Shëndetësor, edhe pse republikanët nuk kanë paraqitur një plan të qartë për të zëvendësuar programin Obamacare, i cili u dha sigurime shëndetësore më shumë se 20 milionë amerikanëve.

Pak ditë përpara betimit të Presidentit të ri Donald Trump, Senati me shumicë republikane po punon me ritëm të shpejtë për të konfirmuar të emëruarit që do të jenë pjesë e rrethit të brendshëm të administratës së re.

Uashingtoni po përgatitet për t’i dhënë lamtumirën një Presidenti dhe të mirëpresë një President të ri ndërsa nuk dihet se sa prej anëtarëve të kabinetit Trump do të jenë të konfirmuar në detyrë, përpara se ai të hyjë në Shtëpinë e Bardhë. Ligjvënës kryesorë republikanë kanë shqetësime për lidhjet me Rusinë e të të emëruarit për Sekretar Shteti, Rex Tillerson.

“A mendoni se Vladimir Putin dhe shpura e tij janë urdhëruesit e vrasjeve të panumërta të disidentëve, gazetarëve dhe kundërshtarëve politikë?” pyeti Senatori Marco Rubio.

“Nuk disponoj informacion të mjaftueshëm për të deklaruar një gjë të tillë”, u përgjigj zoti Tillerson.

“Këto nuk janë të klasifikuara. Ata njerëz kanë vdekur”, shtoi Senatori Rubio.

Republikanët kanë një anëtar më shumë në Komisionin e Marrëdhënieve me Jashtë të Senatit. Ndërsa pritet që të gjithë anëtarët demokratë të kundërshtojnë zotin Tillerson, emërimi i tij mund të bllokohet nëse vetëm një republikan voton kundër.

“Nëse duam të kemi qartësi morale në politikën tonë të jashtme, atëherë duhet të jemi të qartë. Jam gati të bëj gjënë e duhur dhe jo nga pikëpamja partiake,” deklaroi Senatori republikan Marco Rubio.

Të emëruar të tjerë mund të konfirmohen në ditët në vazhdim, pas dëgjesave të trazuara. Disa demokratë kanë shpallur kundërshtitë ndaj emërimit për Prokuror të Përgjithshëm të Senatorit republikan Jeff Sessions.​

“Nëse konfirmohet Senatori Sessions, jam thellësisht e shqetësuar për fatin e njerëzve me paaftësi fizike, me origjina të ndryshme racore, apo orientime të ndryshme seksuale”, deklaroi Senatorja demokrate Tammy Duckworth.

Por, duket se zoti Sessions do të konfirmohet nëse republikanët vazhdojnë ta mbështesin.

“Ai është një njeri me nder dhe integritet, i përkushtuar ndaj zbatimit besnik dhe të drejtë të ligjit”, tha Senatori republikan Chuck Grassley.

Disa të emëruar pritet të konfirmohen me mbështetje dypartiake, si p.sh. i emëruari për Sekretar Mbrojtjeje, Gjenerali James Mattis.

“Janë duke u zvogëluar hapësirat për bashkëpunim, ndërsa po shtohen fushat ku do të na duhet të përballemi me Rusinë”, deklaroi zoti Mattis.

Po kështu edhe i emëruari për drejtor i CIA-s, Ligjvënësi Mike Pompeo.

“Është e qartë se çfarë ndodhi, se si Rusia u përpoq të vidhte informacion dhe të ndikonte në demokracinë amerikane”, tha zoti Pompeo.

Ndërsa po përgatitet për të bërë betimin, zoti Trump po rrezaton vetëbesim për ekipin e tij.

“Na duhen njerëz të suksesshëm. Këta u bënë të tillë sepse janë të mençur. Jam shumë krenar për kabinetin. Mendoj se po ja dalin shumë mirë”, tha Presidenti i zgjedhur.

Gjatë kësaj jave, Senati do të mbizotërohet nga seancat e votimit për konfirmimet, ndërsa jashtë godinës së Kapitolit po bëhen rregullimet e fundit për inaugurimin.

Nënpresidenti i Shteteve të Bashkuara, Joe Biden, i bëri thirrje komunitetit ndërkombëtar që të ngrihet kundër, siç tha, agresionit rus, ndërsa i kërkoi administratës së re amerikane të Donald Trumpit që të jetë mbështetëse e fuqishme e Ukrainës.

Biden i bëri këto komente në Kiev, në vizitën e fundit si nënkryetar.

Ai tha se sanksionet amerikane kundër Rusisë, për shkak të aneksimit të Gadishullit ukrainas të Krimesë dhe përfshirjes së Moskës në konfliktin në lindje të Ukrainës, duhet të mbeten në fuqi derisa Moksa të zbatojë plotësisht Marrëveshjen e Minskut për Paqe në Ukrainë.

Biden tha se është e vështirë mbështetja në këtë marrëveshje kur dihet se Rusia refuzon t’i përmbahet asaj.

Duke folur pranë presidentit të Ukrainës, Petro Poroshenko, Biden tha se Ukraina duhet të vazhdojë të angazhohet për sundim të ligjiit dhe luftim të korrupsionit.

Poroshenko falënderoi Bidenin për mbështetjen e palëkundur për Ukrainën dhe falënderoi SHBA-në për zgjatjen e sanksioneve kundër Rusisë.

Disa ditë para ceremonive në Shtetet e Bashkuara për nder të udhëheqësit të Lëvizjes së të Drejtave Civile afrikano-amerikane, Martin Luther King, Jr., Donald Trumpi kritikoi ligjvënësin John Lewis, një tjetër udhëheqës për të drejtat civile.

Kritikat u bënë pasi zoti Lewis tha se ai nuk e konsideron zotin Trump “president legjitim” për shkak të asaj që Lewis beson se ishin përpjekje të Rusisë për të ndihmuar zotin Trump të fitonte presidencën.

Në një intervistë të premten në emisionin Meet the Press të rrjetit NBC, që transmetohet të dielën, zoti Lewis tha “Unë besoj se duhen bërë përpjekje për të punuar me të tjerët. Por do të jetë e vështirë. Do të jetë shumë e vështirë. Unë nuk e konsideroj presidentin e zgjedhur si president legjitim”.

Në disa postime në Twitter të shtunën në mëngjes, presidenti i zgjedhur tha se në vend që ta kritikojë atë, ligjvënësi Lewis duhet të përqëndrohet t’u shërbejë njerëzve që ai përfaqëson.

Një tjetër ligjvënës demokrat foli kundër presidentit të zgjedhur duke thënë “Ne nuk do ta lejojmë Donald Trump-in të groposë imazhin e Statujës së Lirisë”. Komenti u bë të shtunën nga senatori Chris Van Hollen i Merilendit, në një kishë historike afrikano-amerikane në qendër të Uashingtonit.

Zoti Van Hollen po fliste në një nga dhjetra tubimet dhe protestat e mbajtura në të gjithë Amerikën të shtunën, gjashtë ditë para inaugurimit të presidentit të ri.

Donald Trump u bë një figurë polarizuese gjatë fushatës së tij me komentet anti-emigrantëve, premtimet e tij për të ndërtuar një mur në kufirin me Meksikën, dhe premtimit të tij për të marrë masa të ashpra kundër myslimanëve që vijnë në vend.

Në Uashington, kleriku Al Sharpton udhëhoqi një marshim po ashtu të shtunën. “Ne kemi ardhur t’i themi demokratëve dhe republikanëve të moderuar në Senat dhe Dhomën e Përfaqësuesve që të bëhen të guximshëm”, tha ai duke i bërë thirrje politikanëve që të mos lejojnë zotin Trump dhe përkrahësit e tij republikanë të ndërmarrin projekt-ligje që do të veprojnë kundër interesave të të varfërve dhe klasës punëtore.

Një ditë pas inaugurimit të zotit Trump, më 21 janar, rreth 200 mijë njerëz nga i gjithë vendi priten të marrin pjesë në Marshimin e Grave për të protestuar presidencën e re.

Që nga fitorja befasuese e zotit Trump në nëntor, protesta kundër presidencës së tij janë mbajtur rregullisht në të gjithë vendin.

Michael Flynn, këshilltar për siguri kombëtare i presidentit të zgjedhur amerikan, Donald Trump, e ka marrë një thirrje nga ambasadori i Rusisë, muajin e kaluar, në ditën e njejtë kur presidenti, Barack Obama, i ka shpallur sanksionet e reja kundër Rusisë, për akuzat për ndërhyrje në zgjedhjet në Shtetet e Bashkuara.

E përditshmja, Washington Post, dhe agjencitë e lajmeve, Reuters dhe Associated Press, raportuan se një zëdhënës i Trumpit ka konfirmuar mbrëmë se këshilltari, Michael Flynn, kishte pasur së paku një thirrje telefonike me ambasadorin e Rusisë, Sergey Kislyak, në ditën e njejtë, kur ishin shpallur sanksionet dhe vendimi për dëbimin e 35 diplomatëve rusë.

Fushata e zotit Trump fillimisht tha se bisedat telefonike kanë ndodhur një ditë para shpalljes së sanksioneve më 29 nëntor, por më vonë ka pranuar se një thirrje ishte bërë në ditën e shpalles së valës më të re të sanksioneve amerikane kundër Rusisë.

Agjencia Reuters i ka cituar tre zyrtarë që kanë thënë se pesë thirrje telefonike kanë ndodhur atë ditë.

Një diplomat i lartë amerikan u bëri thirrje udhëheqësve të Serbisë dhe Kosovës që të angazhohen në dialog dhe të zbutin mosmarrëveshjet lidhur me arrestimin e ish-Kryeministrit të Kosovës, Ramush Haradinaj, i cili akuzohet për krime lufte nga zyrtarët në Beograd.

Hoyt Brian Yee, Zëvendës Ndihmës Sekretar i Shtetit për çështjet evropiane dhe euroaziatike, i tha shërbimit serb të Zërit të Amerikës se është me rëndësi të mos lejohet që asnjë incident, qoftë arrestim apo tensione të tjera dypalëshe, të ndikojë në procesin e rëndësishëm për normalizimin e marrëdhënieve midis vendeve fqinje.

Duke vepruar në bazë të një urdhër-arresti të Serbisë, policia franceze ndaloi më 4 janar ish-Kryeministrin e Kosovës Ramush Haradinaj. Autoritetet serbe synojnë ta gjykojnë atë vepra penale që ata thonë se lidhen me luftën në Kosovë. Të enjten, një gjykatë franceze e apelit e liroi me kusht zotin Haradinaj, por e urdhëroi atë të qëndrojë në Francë në pritje të një rishikimi të kërkesës serbe për ekstradim. Dje, Serbia kërcënoi se do të refuzojë të ekstradojë personat e kërkuar nga Franca, nëse autoritetet franceze nuk e dorëzojnë zotin Haradinaj.

Kjo çështje kërcënon procesin e brishtë të normalizimit të marrëdhënieve mes Serbisë dhe Kosovës, gjë që do t’i shtonte mundësitë e integrimit të dy vendeve në Bashkimin Evropian.

“Ne i nxisim udhëheqësit përgjegjës për dialogun mes Kosovës dhe Serbisë që të vazhdojnë të bisedojnë dhe të gjejnë zgjidhje,” tha zoti Yee. “Ky incident, – tha ai, – mund të zgjidhet nëpërmjet institucioneve, në përputhje me ligjin në Francë, ose jashtë Francës. Këto lloj incidentesh mund të zgjidhen dhe ne jemi të sigurt se do të zgjidhen”, tha diplomati amerikan.

Së paku tetë anëtarë të Kongresit të Shteteve të Bashkuara kanë thënë se do ta bojkotojnë ceremoninë e inaugurimit të presidentit të zgjedhur amerikan, Donald Trump, ndërsa disa prej tyre si arsye e kanë cituar dëshminë se rusët mund ta kenë ndihmuar Trumpin që të zgjedhet.

“Nuk e shoh këtë president të zgjedhur si president legjitim”, tha anëtari i Dhomës Përfaqësuese të Kongresit, John Lewis, demokrat nga Gjeorgjia.

“Mendoj se rusët morën pjesë për ta ndihmuar këtë njeri”, i tha rrjetit NBC zoti Lewis, që është anëtar i Partisë Demokratike, duke iu refereuar raporteve të inteligjencës së Shteteve të Bashkuara ku theksohet se rusët kishin ndërhyrë në zgjedhje nëpërmjet sulmeve kibernetike dhe mënyrave të tjera, me qëllim që të ndihmohej zoti Trump.

Lewis tha se rusët “ndihmuan në shkatërrimin e kandidaturës së Hillary Clintonit”.

Mospraninë në inaugurimin e presidentit të zgjedhur, Donald Trump, më 20 janar, e kanë paralajmëruar edhe ligjëvënësit e tjerë demokratë, Raul Grijalva, Nydia Velazquez, Barbara Lee, Earl Blumenauer, Katherine Clark, Jared Huffman dhe Luis Gutierrez.

Shumica prej tyre si arsye e kanë cituar atë që ata e vlerësuan si “mosrespekt” për femra, minoritete dhe persona të jashtëm.

Michael Flynn, këshilltari për sigurinë kombëtare i presidentit të ardhshëm amerikan, Donald Trump, muajin e kaluar ka biseduar në telefon me ambasadorin rus në SHBA, e raporton Reuters njoftimin e dhënë nga zëdhënësi i Trump, Sean Spicer.

Biseda është bërë me qëllim të planifikimit të një bisede telefonike në mes të presidentit të zgjedhur amerikan dhe liderin rus, Vladimir Putin.

Sipas këtij njoftimi, biseda telefonike planifikohet pas inaugurimit të Trumpit më 20 janar.

Biseda telefonike e cila është bërë më 28 dhjetor ka ndodhur pas shkëbimit të disa mesazheve telefonike në mes të Flynn dhe ambasadorit rus, për Krishtlindje.

Presidenti i Shteteve të Bashkuara, Barack Obama, i ka dhënë nënpresidentit Joe Biden Medaljen Presidenciale të Lirisë, që është nderi më i lartë civil në SHBA.

Obama ka thënë se Biden ka pasur besim tek amerikanët, dashuri për vendin dhe se ka kaluar gjithë jetën në shërbim.

Çmimi vjen në kohën kur Obama dhe Biden po përgatiten të lënë zyrën, pasi presidenti i zgjedhur, Donald Trump, do të inaugurohet më 20 janar.

Biden ka thënë se “ka qenë pjesë e udhëtimit të një njeriu të shquar, i cili ka bërë gjëra të jashtëzakonshme”.

Biden ka thënë se planifikon të mbetet aktiv në politikat e Partisë Demokratike.

Presidenti i zgjedhur Donald Trump pranoi për herë të parë se Rusia depërtoi në kompjuterat e Komitetit Kombëtar Demokrat në një përpjekje për të ndërhyrë në zgjedhjet presidenciale të Shteteve të Bashkuara. Në një konferencë për shtyp dje, presidenti i ardhshëm amerikan mohoi gjithashtu me forcë një njoftim të pakonfirmuar se Rusia kishte informacion personal komprometues për të. Ai përsëri kritikoi ashpër agjencitë amerikane të zbulimit.

Në konferencën e pare për shtyp që kur fitoi zgjjedhjet, Donald Trump e pranoi se beson se Russia depërtoi në kompjuterat e Komitetit Kombëtar Demokrat në një përpjekje për të ndikuar në zgjedhjet presidenciale të 8 nëntorit:

“Përsa i takon sulmit kibernetik, mendoj se ishte Rusia. Por ne sulmohemi edhe nga vende dhe persona të tjerë.”

Në një qëndrim që duket se e minimizon incidentin, ai përmendi sulmet kibernetike të Kinës ndaj Shteteteve të Bashkuara dhe paaftësinë e Partisë Demokrate për të mbrojtur kompjuterat:

“Komiteti Kombëtar Demokrat, ishte krejtësisht i ekspozuar ndaj ndërhyrjeve. Ata bënë një punë shumë të dobët. Mund të kishin pasur masa mbrojtëse, si ne”.

Zoti Trump denoncoi gjithashtu me force një njoftim të pakonfirmuar se Rusia kishte informacion të papërshtatshëm dhe komprometues për të.

“Është lajm i rremë. Është shpifje. Nuk ka ndodhur”.

Zoti Trump vlerësoi Presidentin rus, Vladimir Putin që tha se raporti ishte i pavërtetë dhe falenderoi organizatat e medias që vendosën të mos ta botojnë atë, si dhe sulmoi agjencitë e zbulimit:

“Ata e panë se sa i pakuptimtë ishte njoftimi që u bë publik ndoshta nga agjencitë e zbulimit që nëse është e vërtetë do të ishte një një njollë në reputacionin e tyre”.

Ai gjithashtu kritikoi ashpër CNN-in që transmetoi njoftimin për këto akuza.

Me një numër të madh dosjesh me dokumenta financiare dhe ligjore me vete, zoti Trump njoftoi se nuk do të heqë dorë nga pronësia e bizneseve të tij, ose ti vërë ato nën kontrollin e njerëzve të panjohur gjatë presidencës.

Zoti Trump tha se djemtë e tij do ta menaxhojnë biznesin dhe nuk do ta diskutojnë me të.

Por disa, si analisti Larry Sabato, thonë se kjo nuk është e mjaftueshme:

“Asnjë zyrë ose ekspert etike i pavarur në vend, beson se kjo është e mjaftueshme. Por është e qartë që vetëm kaq do të mund të marrim”.

Por zoti Trump këmbëngul që hapat që ai ka marrë, do të jenë të mjaftueshme për të shmangur çdo konflikt interesi ndërsa është president.

Një zyrtar i lartë i inteligjencës i ka thënë presidentit të zgjedhur, Donald Trump se agjencitë amerikane të inteligjencës nuk e kanë shkruar e as rrjedhur në media një dokument ku hidhen dyshime se operativët rusë kanë mbledhur “informacione komprometuese” për Trumpin.

Drejtori i Inteligjencës Kombëtare amerikane, James Clapper, ka thënë se ai ka biseduar me Trump më 11 janar, pasi është publikuar lajmi se Trump, derisa është informuar për sulmet kibernetike ruse, i është thënë se dyshohet që operativët e inteligjencës ruse kanë mbledhur informacione komprometuese personale dhe financiare rreth Trumpit.

“E nënvizova se ky dokument nuk është prodhim i komunitetit të inteligjencës amerikane dhe se nuk besoj që rrjedhja në media është bërë nga dikush brenda komunitetit”, ka thënë Clapper, duke shtuar se rrjedhjet e “dëmtojnë sigurinë kombëtare”.

Para së gjithash, ka thënë ai, agjencitë e inteligjencës nuk e kanë vlerësuar burimin e këtyre informacioneve si “të besueshëm”.

Sipas Associated Press, dosja përmban informacione të paverifikuara rreth bashkëpunimit të afërt të rrethit të brendshëm të Trumpit me rusët sa i përket sulmeve kibernetike ndaj llogarive të demokratëve. Aty, duke u mbështetur në burime anonime, raportohet se ka edhe pretendime të paverifikuara për aktivitete seksuale të Trumpit.

Trump është zemëruar shumë nga raportimet e mediave rreth dosjes duke e quajtur “lajm të rremë”. Ai gjithashtu ka akuzuar agjencitë e inteligjencës se e kanë rrjedhur dokumentin në media.

Barack Obama është presidenti i parë amerikan që përdor gjerësisht mediat sociale dhe në përfundim të fjalimit të tij të martën mbrëma, ai dërgoi mesazhin më popullor në Twitter përmes llogarisë së tij presidenciale në këtë media.

“Faleminderit për gjithçka. Kërkesa ime e fundit është sikurse ajo e para. Ju kërkoj që të keni besim, jo tek aftësia për të krijuar ndryshim, por tek e juaja”, – shkruante Presidenti tel llogaria e tij në Twitter @POTUS.

Deri të mërkurën në mesditë ky mesazh i Presidentit ishte ridërguar 500 mijë herë në Twitter, një shifër kjo që ja kalon mesazhit të tij më popullor, mbi vendimin e Gjykatës së Lartë për të shfuqizuar vendimet e disa shteteve që ndalonin martesën mes homoseksualëve.

Llogaria në Twitter e Presidentit, @POTUS, ka mbi 13 milionë pasues, ndërsa ajo personale @BarackObama ka mbi 80 milionë pasues.
Llogaria presidenciale në Twitter @POTUS do t’i kalojë Presidentit të zgjedhur Donald Trump, sapo ai të marrë zyrtarisht detyrën më 20 janar.

Llogaria në Twitter e zotit Trump, @RealDonaldTrump ka aktualisht 19.5 milionë pasues.

WASHINGTON — Presidenti i zgjedhur Donald Trump hodhi poshtë me indinjatë pretendimet se Rusia kishte informacion që mund ta komprometonte atë.

Pasi e shprehu reagimin ndaj njoftimeve të së martës, ai e përsëriti mohimin e tij në konferencën e parë për shtyp si president i zgjedhur të mërkurën.

“Mendoj se është e paturpshme që informacioni u bë publik. Unë e lexova informacionin jashtë atij takimi. Janë lajme të rreme. Nuk është vërtetë”. tha ai.

Shtypi amerikan shkruante se dyshimi që Rusia mund të ketë patur fakte kompromentuese, dihej që në muajt e fundit të vitit të kaluar nga disa gazetarë dhe politikanë në Uashington.

Informacioni, sipas shtypit amerikan që po raporton për të, nuk është i konfirmuar.

Njoftimi për ekzistencën e fakteve kompromentuese ndaj zotit Trump, është hartuar në bazë të raporteve të një ish agjenti të zbulimit britanik, që ka kontakte të shumta në Rusi, puna e të cilit në të kaluarën në Shtetet e Bashkuara është konsideruar e besueshme, gjithmonë sipas njoftimeve të shtypit amerikan.

CNN-i, tha se FBI-ja ishte njoftuar që në gusht të vitit të kaluar, disa muaj përpara zgjedhjeve të nëntorit.

“Ajo që ka ndryshuar është fakti që agjencitë amerikane të zbulimit i kanë kontrolluar raportet e ish agjentit britanik dhe rrjetin e tij të gjerë të kontakteve në Evropë dhe kanë arritur në përfundimin se ai dhe burimet e tij janë të besueshme për t’u përfshirë në informacionin që i dhanë presidentit të zgjedhur Trump”, sipas raportimit të CNN-it.

Avokati i zotit Trump, Michael Cohen u tha gazetarëve se akuzat janë të rreme dhe ishin shpikur për të hedhur dritë negative ndaj zotit Trump.
Në Moskë, zëdhënësi i Presidentit rus, Dmitry Peskov that ë mërkurën se pretendimet kanë si synimtë dëmtojnë marrëdhëniet amerikano-ruse.

Presidenti i zgjedhur amerikan, Donald Trump, e ka pranuar se Rusia ka kryer sulme kibernetike në institucione, duke shtuar se Vladimir Putin është përgjegjës.

Trump i ka bërë këto deklarata gjatë konferencës me gazetarë më 11 janar, të parën prej muajit korrik dhe me gjasë e fundit derisa të nis detyrën zyrtarisht si president, më 20 janar.

Fitorja zgjedhore e Trumpit në nëntor është përcjellur me konkludimet e agjencive amerikane të inteligjencës që thonë se qeveria ruse ka përkrahur hakerët që kanë ndërhyrë në serverët e partive politike amerikane.

Trump e ka pranuar se disa sulme kibernetike kanë ndodhur, por ai e ka hedhur poshtë mundësinë që kjo të ketë ndikuar në votim.

Gjatë konferencës me gazetarë që është mbajtur në zyret e tij në Manhatan të qytetit të New Yorkut, Trump është munduar të zbusë rëndësinë e të gjeturave të inteligjencës, duke thënë se Rusia është vetëm një nga shumë shtetet që “na kanë hakuar”.

Mirëpo, ai gjithashtu i ka bërë jehonë konkludimeve të inteligjencës që thonë se Putini personalisht i ka urdhëruar hakerët që të ndërhyjnë në partitë politike amerikane dhe të vjedhin emailat e tyre.

“Ai nuk duhet ta bëjë këtë. Ai nuk do e bëjë më. Rusia do të ketë më shumë respekt kur unë të udhëheqë se sa kur të tjerët e udhëheqin vendin”, ka thënë ai.

Trump: Marrëdhëniet e mira me Putinin janë pasuri

Presidenti i zgjedhur amerikan, Donald Trump ka thënë se ai nuk e di nëse do të ketë marrëdhënie të mira me presidentin e Rusisë, Vladimir Putin, por tha se një marrëdhënie e mirë do të ishte një “pasuri”.

Fitorja e Trumpit në zgjedhjet e nëntorit ka rënë në hije nga konkludimet e agjencive amerikane të inteligjencës që thonë se qeveria ruse ka përkrahur hakerë të cilët kanë ndërhyrë në serverët e partive politike amerikane.

Trump e ka pranuar se disa prej sulmeve kibernetike kanë ndodhur, por e ka hedhur poshtë mundësinë se kjo të ketë ndikuar në votim.

Gjatë konferencës me gazetarë, ai ka shprehur besim se do të jetë në gjendje të përmirësojë marrëdhëniet e dëmtuara me Kremlinin.

“Nuk e di nëse do t’ia kalojë mirë me Vladimir Putinin”, ka thënë Trump.

Ai ka shtuar: “Nëse Putini e pëlqen Donald Trumpin, unë këtë e konsiderojë si pasuri, jo pengesë sepse ne kemi marrëdhënie tejet të këqija me Rusinë”.

Presidenti i zgjedhur amerikan, Donald Trump, raportin që thuhet se përmbanë informacione komprometuese të mbledhura nga Rusia e ka quajtur “lajm të rremë” i hartuar nga “njerëz të sëmurë”.

Trump e tha këtë gjatë konferencës me gazetarë në zyret e tij në Manhatan të qytetit të New Yorkut dhe pas raportimeve të shumta që fokusohen në rolin që Rusia mund ta ketë luajtur në përpjekjet për të ndikuar në zgjedhjet presidenciale amerikane.

Këto ngjarje kanë arritur kulmin më 10 janar kur media të ndryshime raportuan për një dosje me informacione sekrete që i është dorëzuar presidentit Barack Obama javën e kaluar në përmbajtjen e të cilës thuhet se ka material komprometues personal dhe financiar për Trumpin.

Trump, i cili është zotuar se do të punojë për marrëdhënie më të mira me Moskën, edhe para konferencës e ka hedhur poshtë raportin përmes disa postimeve në Tëitter.

“LAJME TË RREME – GJUETI TOTALE POLITIKE E SHTRIGAVE!”, ka shkruar ai në njërin prej cicërimave.

“Rusia asnjëherë nuk bërë përpjekje të më shantazhojë. NUK KA FARE TË BËJË ME RUSINË – S’KA MARRËVESHJE, S’KA KREDI, NUK KA ASGJË!”, ka thënë ai në postimin e dytë.

Konferenca e sotme me gazetarë është e para e Trumpit prej korrikut dhe me gjasë e fundit derisa ai formalisht të nis mandatin presidencial më 20 janar. (REL)

Përgatiti: Artan Haraçia

I nominuari i presidentit të zgjedhur të SHBA-së Donald Trump, për sekretar të shtetit, tha se Rusia “paraqet rrezik’ dhe ka injoruar interesat e SHBA-së, deklarata këto që vijnë përkundër kritikave për lidhjet e tij me qeverinë ruse.

Ish kryesuesi i ExxonMobil, Rex Tillerson tha në një seancë dëgjimore të konfirmimit përpara komitetit për marrëdhënie me jashtë të Senatit se SHBA-ja përballet me “kërcënime të konsiderueshme” në mbarë botën, përfshirë edhe nga Rusia.

“Derisa Rusia kërkon respekt dhe peshë në skenën ndërkombëtare, aktivitetet e saj të fundit kanë injoruar interesat e Amerikës” ju tha Tillerson ligjvënësve në një dëshmi të përgatitur.

Ai tha se Moska “paraqet rrezik’ dhe se aleatët e SHBA-së kanë të drejtë që të alarmohen për “Rusinë e ringjallur”.

Por ai la të kuptohet se të dyja vendet duhet të kërkojnë bashkëpunim kudo që është e mundur, përfshirë edhe përpjekjet në luftën kundër terrorizmit.

Tillerson, ka udhëhequr më parë aktivitetet afariste të Exxon-it në Rusi, përfshirë edhe një marrëveshje zhvillimore në Arktik me gjigantin shtetëror të naftës Rosneft që u ndalua pasi Washingtoni vendosi sanksione ndaj Rusisë pas aneksimit të Krimesë më 2014.

Tillerson, që publikisht ka kundërshtuar sanksionet, ka marrë një çmim miqësie nga Presidenti I Rusisë Vladimir Putin për aktivitetet e tij afariste në vend.

Seanca dëgjimore e konfirmimit zhvillohet në kohën kur inteligjenca e SHBA-së ka akuzuar Putinin për urdhërimin e një fushatë ndikuese që përfshinte edhe sulmet kibernetike për të ndikuar në zgjedhjet presidenciale të 8 Nëntorit, të cilat i ka fituar Trump.

Kremlini i ka kundërshtuar akuzat dhe Trump ka hedhur dyshime mbi vlerësimet.

Tillerson përballet me pyetjet rreth Rusisë në Senatin amerikan

Rex Tillerson, njeriu të cilin presidenti i zgjedhur i SHBA-së, Donald Trump, e do për diplomatin kryesor të tij pritet të përballet me pyetje të ashpra për lidhjet e tij me Vladimir Putinin dhe për qëndrimet e tij ndaj sanksioneve ndaj Rusisë në një seancë dëgjimore që ka nisur në Senat.

Ish kryesuesit të ExxonMobil, Rex Tillerson-it, i duhet gjithashtu të bindë anëtarët e komitetit për marrëdhënie me jashtë të Senatit amerikan se mund të tejkalojë mungesën e përvojës në qeverisje dhe të jetë një sekretar efektiv i shtetit.

Seanca dëgjimore po bëhet në kohën kur janë shtuar shqetësimet e demokratëve dhe republikanëve për veprimet dhe qëllimete presidentit të Rusisë, Vladimir Putin, për të cilin agjencitë amerikane të inteligjencës thonë se ka urdhëruar një fushatë të hakerimit dhe rrjedhjes së informacioneve me qëllim të minimit të besimit në procesin demokratik në SHBA, ndihmojë Trumpin dhe të diskreditojë rivalen e tij në zgjedhje Hillary Clinton.

Tillerson ka arritur marrëveshje me kompaninë ruse të naftës Rosneft dhe ka takuart disa herë Putinin, i cili e ka dekoruar me çmimin Urdhri i Miqësisë në vitin 2013.

Ai ka kundërshtuar sanksionet e SHBA-së ndaj Rusisë në vitin 2014 pas aneksimit të Krimesë.

Por, Rex Tillerson, të cilin presidenti i zgjedhur Donald Trump e ka propozuar për sekretar të shtetit, do të shpreh gjatë seancës dëgjimore në Senat shqetësimin për shkak të veprimeve të Rusisë në mbarë botën dhe do të kërkojë që vendet anëtare të NATO-s duhet të jenë të alarmuara për shkak të sjelljeve gjithnjë e më agresive të Rusisë.

Kështu thuhet në një tekst të një fjalimi të Tillerson, që ekipi i presidentit të zgjedhur Trump iu ka dërguar mediave më 10 janar

Por komentet e tij që shprehin shqetësimet për Rusinë duket se bien ndesh me pikëpamjet e shprehura nga Trump mbi nevojën për lidhje më të mira me atë vend.

“Aleatët tanë të NATO-s kanë të drejtë të jenë të shqetësuar me një Rusi të rigjallëruar” do të thotë Tillerson duke goditur edhe adminsitratën Obama.

“Në mungesë të një lidershipi amerikan kjo derë ka mbetur e hapur dhe sinjale të gabueshme”

“Derisa Rusia kërkon respekt dhe të tregohet e rëndësishme në skenën globale, aktivitetet e saj kanë treguar mospërfillje ndaj interesit amerikan” thuhet në këtë tekst.

“Rusia duhet ta dijë se ne do të jemi përgjegjës për përkushtimet tona dhe ato të aleatëve tonë dhe se Rusia duhet të mbahet përgjegjëse për veprimet e saj”.

Jeff Sessions, i nominuari i presidentit të zgjedhur, Donald Trump, për prokuror të përgjithshëm, ka shprehur përkushtim që të qëndrojë kundër zotit Trump, nëse është e nevojshme, duke thënë se ai do ta kundërshtojë ndalesën e hyrjes së myslimanëve në Shtetet e Bashkuara.

Këto komente ai i bëri mbrëmë, gjatë dëgjimit dhe pyetjeve në një komitet të Senatit amerikan për konfirmimin e emërimit të tij, që zgjati më se 10 orë.

Zoti Sessions, që është senator republikan nga Alabama, tha se ai nuk do ta mbështesë ndalesën me të cilën dikujt nuk i lejohet hyrja në Shtetet e Bashkuara, në bazë të religjionit dhe se synimet e Trumpit ishin t’i kufizojë njerëzit nga vendet që i strehojnë terroristët, e jo të gjithë myslimanët.

Zoti Trump në një pikë të fushatës së tij, ka folur për propozimin që myslimanëve përkohësisht tu ndalohet hyrja në Shtetet e Bashkuara.

Në postin e prokurorit të përgjithshëm, Jeff Sessions, do të shërbej si zyrtari më i lartë i agjencive të zbatimit të ligjit në Shtetet e Bashkuara dhe është pëgjegjës për dhënie të këshillave të paanshme juridike për presidentin dhe agjencitë ekzekutive.