Treguesi i bursës së Nju Jorkut Dow Jones kaloi për herë të parë shifrën 20,000 në shkëmbimet e së mërkurës.

Dow Jones është treguesi më i njohur i tregut të aksioneve. Premtimet e presidentit të ri Donald Trump për të shkurtuar rregulloret dhe për të ulur taksat mund të kenë shërbyer si inkurajim për investitorët. Bizneset shpesh ankohen se taksat dhe rregulloret e shumta ua bëjnë më të vështirë fitimet.

Disa analistë thonë se politikat e zotit Trump mund të rrisin inflacionin dhe normat e interesit, të cilat mund t’i bëjnë bankat më fitimprurëse. Kjo mund të jetë arsyeja se përse firmat e mëdha financiare si Goldman Sachs dhe JPMorgan kanë arritur fitime të mëdha kohët e fundit.

Sipas një raporti të ri, numri i falimentimeve ka rënë përsëri në nivelet e para krizës financiare. Gjykatat federale amerikane thonë se në vitin 2016 janë paraqitur më pak se 800 mijë raste falimentimesh, një rënie prej gati gjashtë për qind nga viti paraardhës dhe niveli më i ulët që nga viti 2006.

Presidenti i SHBA Donald Trump urdhëroi të mërkurën ndërtimin menjëherë të një muri përgjatë kufirit jugor të vendit me Meksikën, për të penguar emigracionin e paligjshëm. Ai u zotua në të njëjtën kohë të përballet me qindra qytete amerikane që kanë refuzuar të ndihmojnë autoritetet federale të identifikojnë dhe deportojnë emigrantët pa dokumenta.

Presidenti i ri i nënshkroi urdhërat ekzekutive për emigracionin para se të fliste në Departamentin e Sigurisë Kombëtare, agjencia federale e ngarkuar me mbrojtjen e kufirit. “Një shtet pa kufij nuk është shtet,” tha zoti Trump përpara punonjësve të agjencisë.

Urdhërat ekzekutivë do të shërbejnë për të ritheksuar një nga temat kryesore që i dhanë zotit Trump një mandat katër-vjeçar në Shtëpinë e Bardhë, pohimin e tij se emigrantët e paligjshëm kërcënojnë sigurinë e vendit dhe u kushtojnë punëtorëve amerikanë vendet e punës. Gjatë mitingjeve të shumta të fushatës, mbështetësit e tij thërrisnin vazhdimisht “Të ndërtojmë murin!”.

FILE – Illegal immigrant Layios Roberto waits outside the offices of Coalition for Humane Immigrant Rights in Los Angeles, Aug. 15, 2012.

Presidenti Trump tha se ndërtimi i murit do të fillojë brenda disa muajsh. Ai ka theksuar përsëri se për murin do të paguajë Meksika, edhe pse ajo vazhdimisht ka refuzuar. Zoti Trump ka theksuar se pagesa ndoshta do të jetë në një formë “të komplikuar”, duke sinjalizuar se nuk është fjala për një pagesë të drejtpërdrejtë nga Qyteti i Meksikos në Uashington.

Zëdhënësi i Shtëpisë së Bardhë Sean Spicer tha të mërkurën se SHBA do të ndërtojnë objekte paraburgimi përgjatë kufirit për të strehuar emigrantët që hyjnë në vend, të cilëve do t’u jepet një “biletë për t’u kthyer në vendin e origjinës.”

Ai tha se administrata Trump do t’i japë fundit programit “kap dhe lësho” për emigrantët, të cilin ai e quajti të rrezikshëm.

Zyrtarët thonë se zoti Trump po shqyrton gjithashtu një ngrirje prej katër muajsh për të gjitha pranimet e refugjatëve në SHBA si dhe një ndalim për të paktën 30 ditë për hyrjen në Shtetet e Bashkuara të çdo personi nga Iraku, Irani, Libia, Siria, Somalia, Sudani dhe Jemeni, vende me shumicë myslimane.

Këtu mund të përjashtohen njerëzit që përballen me përndjekje fetare në vendin e tyre.

FILE – U.S. Customs and Border Patrol agent passes along a section of border wall in Hidalgo, Texas.

Siguria Kombëtare

Zoti Trump shpesh kritikonte gjatë fushatës pranimet e refugjatëve në vend, duke thënë: “Ne nuk kemi asnjë ide se kush janë këta njerëz.” Ai fillimisht propozoi një ndalim për të pranuar persona nga vendet muslimane, duke u bërë objekt kritikash të ashpra. Më vonë ai e ndryshoi qëndrimin, duke përfshirë në këtë kagori vetëm vende të lidhura me terrorizmin.

Presidenti i ri kërkon ndërtimin e një muri përgjatë gjithë gjatësisë prej 3,200 kilometrash të kufirit SHBA-Meksikë. Aktualisht ekziston një barrierë vetëm në një pjesë të kufirit, e cila patrullohet me automjete, dhe monitorohet me avionë pa pilot, me kamera me rreze infra të kuqe si dhe me mjete të tjera.

Zoti Trump thotë se Kongresi fillimisht do të autorizojë qeverinë të përballëjë koston e murit prej rreth 10 miliardë ose më shumë dollarë, ndërsa pastaj kjo të rimbursohet nga qeveria meksikane.

Presidenti meksikan Enrique Pena Nieto pritet të vizitojë Shtëpinë e Bardhë javën e ardhshme për të diskutuar çështjet e sigurisë kufitare dhe të tregtisë midis dy vendeve fqinje.

Zoti Trump ka thënë se ndërtimi i murit do të jetë diçka e lehtë, edhe pse të tjerë nuk janë aq të sigurt për këtë, për shkak të terrenit të thyer përgjatë kufirit.

Pamela Taylor, whose home is on the south side of the border fence, stands near a sign she erected, in Brownsville, Texas.

Ndërkohë, administrata e re po përpiqet të vendosë se si do të veprojë me urdhrin e ish presidentit Barack Obama, që lejon fëmijët e imigrantëve të cilët kanë hyrë ilegalisht në SHBA bashkë me prindërit, të qëndrojnë në vend dy vjet pa u deportuar.

Zëdhënësi i Shtëpisë së Bardhë, Spicer tha se zyrtarët e administratës së re do t’i shqyrtojnë rastet e fëmijëve pa dokumente në mënyrë humane.

Gjatë fushatës, zoti Trump deklaroi se të gjithë ata që kishin hyrë në SHBA ilegalisht do të ishin objekt deportimi, por më vonë ai e zbuti qëndrimin, duke thënë se fillimisht vetëm personat me të kaluar kriminale do të deportoheshin, ndërsa ata që zbatonin ligjin do të shqyrtoheshin më vonë.

Presidenti amerikan Donald Trump bëri thirrje për hetim në shkallë të gjerë lidhur me atë që ai e quan manipulim votash në zgjedhjet presidenciale të nëntorit. Ai ritheksoi bindjen se votat e miliona emigrantëve pa dokumente i kushtuan atij fitoren në votën popullore.

Zoti Trump i njoftoi planet për hetime sot në mëngjes në Twitter.

Dje, zëdhënësi i Shtëpisë së Bardhë Sean Spicer u përsëriti gazetarëve pretendimin se 3 deri në 5 milionë emigrantë votuan në mënyrë të paligjshme për rivalen demokrate Hillary Clinton, pohim që zoti Trump e përmendi gjatë një takimi të hënën me udhëheqësit e Kongresit.

“Kjo është një bindje që ai ka,” tha zoti Spicer. I pyetur nga gazetarët se çfarë prova ka presidenti për një pohim të tillë, zëdhënësi tha se zoti Trump “ka kohë që e beson këtë, bazuar në studimet dhe informacionet që ka.”

Por, zyrtarët e zgjedhjeve që kanë analizuar votimet e 8 nëntorit thonë se nuk ka pasur pothuajse asnjë shenjë për manipulim votash, aq më pak në atë shkallë për të cilën flet zoti Trump.

Disa gazetarë në koferencën e shtypit në Shtëpinë e Bardhë e pyetën zëdhënësin se përse administrata nuk ndërmerr një hetim, në qoftë se presidenti beson se ka pasur mashtrime në shkallë të gjerë.

Zoti Spicer tha se presidenti Trump është i bindur në fitoren e tij në Kolegjin Elektoral dhe synon të përqëndrohet në përmbushjen e premtimeve të fushatës. Ai shtoi se një hetim i mëtejshëm është i mundur.

Kryetari republikan i Dhomës së Përfaqësuesve, Paul Ryan, u tha gazetarëve se ai nuk ka parë ndonjë provë manipulimesh me votën në zgjedhjet e 2016-s. Ndërkohë, udhëheqësi republikan i shumicës në Senat Mitch McConnell tha se mashtrime me votën edhe ndodhin. “Ka gjithmonë argumente nga të dyja palët lidhur me përmasat dhe shpeshtësinë me të cilën ato ndodhin,” u tha ai gazetarëve.

Senatori i Karolinës së Jugut, Lindsey Graham, një prej kandidatëve republikanë që u mund nga zoti Trump në zgjedhjet paraprake, i bëri thirrje presidentit të mos e përsërisë pretendimin e tij, duke thënë se në qoftë se zoti Trump ka prova, atëherë duhet të thotë se përse i beson ato.

Zonja Clinton fitoi votën popullore me rreth 3 milion më shumë. Por zoti Trump fitoi në votën e Kolegjin Elektoral, sistemi që përdoret në SHBA për të përcaktuar fituesin e zgjedhjeve presidenciale.

Senati amerikan e ka konfirmuar mbrëmë vonë nominimin e presidentit amerikan, Donald Trump për ambasadore të SHBA-së në OKB me 96 vota pro dhe vetëm 4 kundër.

Guvernatorja e Karolinës Jugore, Nikki Haley e ka fituar përkrahjen e shumicës së senatorëve demokratë sepse ajo ka dëshmuar se nuk i përkrah përpjekjet republikane për zvogëlimin e fondeve amerikane për OKB-në.

Senatori demokrat, Ben Cardin, ka deklaruar se Haley gjithashtu ka thënë se “Krimea nuk është ruse” megjithë aneksimin që ia ka bërë Moska këtij gadishulli ukrainas në vitin 2014 dhe se ajo i ka ofruar mbështetje të fuqishme mbrojtjes së sovranitetit të Ukrainës.

Udhëheqësi i Komisionit të Senatit për Marrëdhënie me Jashtë, Bob Corker, ka thënë se Haley, vajza e imigrantëve indian, do të jetë një “avokate e fuqishme” për interesat amerikane në OKB.

Senati pritet të votojë se shpejti edhe për kandidatin e Trumpit për Sekretar të Shtetit, Rex Tillerson, ish shefi i kompanisë, Oxxon Mobil, i cili mezi ka arritur ta marrë miratimin e Komisionit të Senatit për Marrëdhënie me Jashtë më 23 janar.

Kandidatura e Tillersonit arriti të sigurojë së fundi edhe përkrahjen e senatorit demokrat, Joe Manchin, i cili në vitin 2018 do të kërkojë votën për tu rizgjedhur senator në një shtet që e ka mbështetur fuqishëm presidentin Donald Trump gjatë zgjedhjeve presidenciale.

Presidenti amerikan, Donald Trump ka nënshkruar urdhërat për avancimin e projekteve kontraverse për ndërtimin e tubacioneve të naftës që ishin bllokuar nga administrata e Barack Obamës.

Fjala është për projektet “Keystone XL” dhe tjetri Dakota Access që janë nënshkruar sot nga presidenti Trump.

Ish presidenti Obama kishte bllokuar projektin “Keystone XL” në fund të vitit 2015 duke thënë se ai e dëmton përpjekjen amerikane për të siguruar një marrëveshje për ndryshimet klimatike.

Në vitin 2016 ishte ndaluar edhe projekti për ndërtimin e tubacionit të naftës “Dakota Access”.

Fisi i indianëve të Amerikës, “Sioux” në zonën “Standing Rock” dhe përkrahësit e saj thonë se projekti kërcënon ujin e pijës dhe zonat e mbrojtura të indiano-amerikanëve.

Në Shtëpinë e Bardhë, presidenti Trump ka thënë sot se “nga tash e tutje ne do të fillojmë të ndërtojmë tubacione në Shtetet e Bashkuara”.

Presidenti Donald Trump u takua sot me drejtues të tre prodhuesve të mëdhenj amerikanë të makinave, General Motors, Ford dhe Fiat Chrysler, të njohur si tre të mëdhenjtë. Ai i kërkoi atyre që ta zgjerojnë prodhimin në Shtetet e Bashkuara, jo jashtë vendit.

Dje Presidenti priti në Shtëpinë e Bardhë drejtuesit e korporatave më të mëdha amerikane, të cilëve u kërkoi që të krijojnë vende të reja pune në sektorin e prodhimit në Shtetet e Bashkuara.

Zoti Trump i ka kritikuar më parë prodhuesit amerikanë të makinave për zgjerimin e operacioneve në Meksikë dhe i vlerësoi ata, kur njoftuan planet për shtimin e vendeve të punës në Shtetet e Bashkuara.

Presidenti Trump i paralajmëroi drejtuesit e bizneseve se do të përpiqet ta bindë Kongresin që të miratojë rritjen e taksës kufitare, ndoshta me 35 për qind, për kompanitë që e eksportojnë prodhimin jashtë vendit dhe pastaj i sjellin mallrat për t’iu shitur konsumatorëve amerikanë, në Shtetet e Bashkuara.

Guvernatori i Kalifornisë, Jerry Brown, mbrëmë vonë ka shpallur gjendje të jashtëzakonshme në rajonet e këtij shteti, për të ndihmuar në ripërtritjen e dëmeve të shkaktuara nga stuhitë e fuqishme gjatë dhjetorit dhe janarit.

Kalifornia, që ka vuajtur nga thatësia, është goditur fquishëm nga të reshjet e mëdha, së pari gjatë fillimit të dhjetorit, e pastaj edhe në janar, që kanë vazhduar edhe gjatë fundjavës së kaluar, raporton AFP.

“Kam parë se kushtet e rrezikut ekstrem për sigurinë e njerëzve dhe të pasurisë ekzistojnë, për shkak të dëmeve nga stuhia”, tha guvernatori, Jerry Brown.

Ai e ka urdhëruar zyrën e shërbimeve të emergjencës së Kalifornisë që “t’i ndihmoj qeveritë lokale”.

Derisa zyrtarët ende janë në procesin e vlerësimit të dëmeve nga erërat e fuqishme, konsiderohet se ato janë “në dhjetëra miliona dollarë”.

Gjendja e jashtëzakonshme është shpallur në 50 prej 58 qarqeve të Kalifornisë.

Megjithqë stuhia ka sjellur të reshura të mëdha të shiut dhe borë në male, zyrtarët nuk besojnë se kjo do ta përfundoj thatësinë, që vlerësohet se ishte më e madhja në historinë e këtij shteti.

Shtëpia e Bardhë ka tërhequr vërejtjen se synon ta ndalë Kinën nga marrja e territorit në ujërat ndërkombëtare në Detin Jugor Kinez, duke ndërtuar ishuj mbi shkëmbinjtë nënujorë dhe përdorimi i tyre për qëllime mbrojtëse.

Por, Kina ka tërhequr vërejtje se çfarëdo përpjekjeje për ndaljen e fushatës së saj do të kërkonte që nga ana e Shteteve të Bashkuara të “udhëhiqej luftë”.

Zëdhënësi i Shtëpisë së Bardhë, Sean Spicer, mbrëmë i ka përsëritur komentet e mëhershme të të nominuarit për sekretar amerikan të shtetit, Rex Tillerson, se Kina nuk duhet të lejohet të ketë qasje në ishujt, që i ka ndërtuar në hapësirat kontestuese në Detin Jugor Kinez.

“Nëse këta ishuj janë në fakt në ujërat ndërkombëtare dhe nuk janë pjesë përkatëse e Kinës, atëherë po, ne do të jemi të sigurt se ne i mbrojmë territoret ndërkombëtare që të përvetësohen nga një shtet”, tha zëdhënësi Spicer.

Senati i Shteteve të Bashkuara mbrëmë vonë me lehtësi e ka konfirmuar Mike Pompeo për drejtor të CIA-s, ndërsa Komiteti për marrëdhënie të jashtme i Senatit me vetëm një votë më tepër e miratoi Rex Tillersonin për sekretar amerikan të shtetit.

Të dy këta kandidatë janë nominuar nga presidenti, Donald Trump.

Senati votoi 66 për dhe 32 kundër, që ish-kongresisti, Mike Pompeo, të bëhet drejtor i ri i agjencisë CIA.

Nga ana tjetër, në Komitetin për marrëdhënie të jashtme të Senatit, për zotin Tillerson votuan 11 vetë, ndërsa kundër tij ishin 10 anëtarë të këtij komiteti.

Kryesuesi i komitetit, Bob Corker, tha se “nuk ka dyshim” se Tillerson është kandidat i mirë dhe e ka përmendur punën e tij udhëheqëse në korporatën energjetike, Exxon Mobil.

Por, senatori demokrat, Ben Carden, tha se e kundërshton Rex Tillersonin në bazë të përgjigjeve të tij në pyetjet lidhur me sanksionet kundër Rusisë dhe çështjet e tjera të rëndësishme globale, që më tepër tingëllonin sikur përgjigjej një ekzekutiv biznesor e jo një sekretar i ardhshëm i shtetit.

Megjithatë, Tillerson pritet që do të konfirmohet në përbërjen e plotë të Senatit, ku republikanët e kanë shumicën prej 52 anëtarëve.

Presidenti Donald Trump ka vetëm disa ditë që ka hyrë në Shtëpinë e Bardhë, por një grup për etikën ka në plan ta hedh në gjyq presidentin, për siç thonë ata, shkelje të një klauzole jo fort të njohur të kushtetutës amerikane.

Grupi “Qytetarët për Përgjegjësi dhe Etikë”, që njihet shkurt me emrin CREW dhe i ka zyrat në kryeqytetin amerikan, thotë se ka në plan që të depozitojë sot padinë në një gjykatë federale në Manhatan të Nju Jorkut.

Klauzola për shpërblimet i ndalon fuqitë e huaja, përfshi qeveritë, që të ofrojnë pagesa apo dhurata për presidentin pa miratimin e Kongresit.

Sipas gazetës “The New York Times”, e cila njoftoi e para për këtë çështje të dielën, padia nuk kërkon ndonjë shpërblim monetar, por po i kërkon gjykatës që të ndalojë presidentin që të marrë pagesa nga subjektet e huaja.

Qytetarët për Përgjegjësi dhe Etikë, apo CREW, thotë se zoti Trump ka refuzuar të heqë dorë tërësisht nga bizneset e tij.

“Ai tani po merr para në dorë dhe favore nga qeveritë e huaja përmes të ftuarve dhe evenimeteve në hotelet e tij, qirave në ndërtesat e tij dhe marrëveshjeve të rëndësishme imobilare jashtë vendit”, thotë CREW.

Sherri Dillon, një prej avokateve të zotit Trump, tha në fillim të janarit se, “Askush nuk do të kishte menduar kur u hartua Kushtetuta se pagesa e faturës së hotelit do të konsiderohej pagë.”

Drejtori ekzekutiv i CREW, Noah Bookbinder tha përmes një deklerate se, “..nuk deshëm të arrinim në këtë pikë. Patëm shpresuar se Presidenti Trump do të ndërmerrte hapat e nevojshëm për të shmangur shkeljen e Kushtetutës para se të merrte detyrën.”

Eric Trump tha për gazetën “The New York Times” se padia në fjalë ishte “ngacmim për përfitime politike” dhe e karakterizoi atë si “veprim për të ardhur keq”.

Presidenti Trump tha kohët e fundit se po krijonte në trust ku dy djemt e tij, Donald Trump Jr. dhe Eric së bashku me një prej drejtuesve të lartë të Organizatës Trump, do të drejtonin interesat e biznesit të tij global.

Plani nuk përmbushi kërkesat që ai të shiste të gjitha interesat ekonomike dhe vënien e pasurisë së tij në një trust sekret ku ai nuk mund të kishte dijeni mbi investimet.

Analistët për etikën thonë se nëse Trump nuk i vë pasuritë e tij në një trust sekret, kjo do të shkaktonte pikëpytje të njëpasnjëshme nëse veprimet e tij si president do të sillnin përfitime për interesat e tij financiare.

CREW thotë se kur Presidenti Trump të negociojë marrëveshje tregtare me shtete të ndryshme, “populli amerikan nuk do të ketë se si ta dijë nëse ai do të jetë duke menduar për përfitimet e Trumpit biznesmen.”

“Presidenti Trump ka sloganin ‘Amerika së Pari’, tha zoti Bookbinder. “Kjo të bën të mendosh se ai do të zbatojë në mënyrë rigoroze klauzolën e Kushtetutës për shpërblimet e huaja, pasi ajo është shkruar për të siguruar që zyrtarët e qeverisë kanë në mendje interesat e amerikanëve dhe jo të qeverive të huaja.”

Norm Eisen, jurist për etikën në ish administratën e Presidentit Obama, është anëtar i ekipit ligjor të grupit CREW. Ai tha për gazetën ‘The Times’ se padia është një mënyrë për të bërë publike taksat federale të zotit Trump dhe për të vlerësuar siç duhet marrëveshjet tregtare të presidentit dhe për të parë se sa u detyrohet qeverive të huaja si Kina apo Rusia.

Lideri udhëheqës demokrat në Senatin e Shteteve të Bashkuara, Charles Schumer, nga Nju Jorku, tha se planifikon paraqitjen e ligjislacionit dypartiak, me të cilin do të kërkohej që presidenti Donald Trump, do të duhej të kishte miratimin e Kongresit, për tërheqje të sanksioneve, që aktualisht janë të imponuara kundër Rusisë.

Zoti Schumer i tha dje rrjetit ABC se nisma ishte mbështetur edhe nga kolegët e tij republikanë, John Mccain dhe Lindsay Graham.

Ata planifikojnë që legjislacioni do të paraqitet më vonë këtë javë.

Senatori Schumer, duke e cituar involvimin e Rusisë në konfliktin ushtarak në Ukrainë dhe ndërhyrjen e dyshuar të saj në zgjedhjet presidenciale amerikane, tha se Moska paraqet “rrezik, me të cilin ne nuk jemi ballafaquar kurrë në këtë masë në historinë amerikane”.

Gjatë fushatës presidenciale, Donald Trump, ka shfaqur shpresë për raporte më të afërta dhe e ka lavdëruar presidentin rus, Vladimir Putin.

Nga stuhitë e fuqishme në gjithë pjesën juglindore të Shteteve të Bashkuara, gjatë ditës së djeshme, janë vrarë së paku 18 vetë.

Më së shumti fatalitete janë raportuar në Xhorxhia, ku kanë vdekur 14 persona.

Guvernatori i Xhorxhias ka shpallur gjendje të jashtëzakonshme në shtatë rajone, në mënyrë që me procedurë të shpejtuar të lirohen burimet për ndihma në kuadër të përpjekjeve për ripërtritje.

Rreziku nga erërat e fuqishme mbetet edhe mëtutje, kanë thënë autoritetet.

Senatori republikan nga Arizona, John McCain ka thënë se ai do e përkrahë ish shefin e kompanisë, Exxon Mobil, Rex Tillerson të bëhet Sekretari i Shtetit, megjithë lidhjet e tij të ngushta me Rusinë dhe presidentin Vladimir Putin.

McCain i ka thënë sot televizionit amerikan, ABC se “nuk ka qenë vendim i lehtë” marrja e këtij vendimi dhe se ai është “shumë i kujdesshëm” në përkrahjen që i jep Tillersonit ditën kur Senati do të votojë për miratimin e tij, më 23 janar.

McCain ka thënë se Tillerson e ka bindur atë se e meriton përkrahjen pas disa takimeve private. Ai ka shtuar se ai gjithashtu beson se presidentëve të rinj duhet dhënë mundësinë kur janë në pyetje përzgjedhjet për postet në administratën e tyre.

Krahas Tillersonit, Senati pritet që nesër gjithashtu të votojë për emërimin e Mike Pompeo në krye të Agjencisë Qëndrore të Inteligjencës, CIA.

Por, lideri i demokratëve në Senat, Chuck Schumer ka thënë sot se Partia Demokratike nuk do të ngutet të votojë nominimet e presidentit Donald Trump.

Schumer ka thënë se do të ketë “debate të hollësishme” për shumicën e nominimeve.

Vetëm dy nominime të presidentit Trump janë miratuar deri më tash.

Shtëpia e Bardhë ka thënë se presidenti Donald Trump do të takohet në Uashington me kryeministren britanike, Theresa May më 27 janar dhe me presidentin meksikan, Enrique Pena Nieto, më 31 janar.

Vizita e May shënon takimin e parë me një lider të huaj për Trumpin prej inaugurimit të tij, ka thënë zëdhënësi i Shtëpisë së Bardhë, Sean Spicer.

Trump ka shprehur përkrahje për May dhe përpjekjet e saj për të larguar Britaninë e Madhe prej Bashkimit Evropian.

Vizita e presidentit meksikan mund të jetë me pak më shumë telashe, pas deklarimeve nga Trump për imigrantët meksikanë, ndërtimin e një muri, dhe plani që Meksika të paguaj për të, ka ofenduar jo pak në atë shtet.

Spicer ka thënë se të dy liderët do të diskutojnë për tregti, imigracion dhe siguri.

Spicer gjithashtu ka thënë se Trump ka biseduar më 21 janar me kryeministrin kanadez, Justin Trudeau dhe se gjatë ditëve në vijim do të vendoset për një takim.

Presidenti amerikan, Donald Trump iu ka thënë zyrtarëve të Agjencisë Qendrore të Inteligjencës (CIA) se ka respekt të madh për agjencinë në fjalë, duke hedhur poshtë raportimet se ai është në konflikt me komunitetin amerikan të inteligjencës, raporton Reuters.

Në vizitën e parë të tij në këtë agjenci qeveritare si president, Trump e ka lavdëruar këtë organizatë duke iu thënë zyrtarëve që kishin dal në punë vetëm të takohen me të, se ai i do ata dhe do t’i përkrahë.

“Unë jam 1000 % me ju”, i ka thënë Trump stafit të CIA-s gjatë vizitës në drejtorinë e agjencisë në Langley, Virgina.

Kohë më parë mediat amerikane kanë thënë se Trump ka zemëruar agjencitë amerikane të inteligjencës pasi nuk është pajtuar me konkludimet e tyre se Rusia ka kryer sulme kibernetike ndaj procesit zgjedhor amerikan, me qëllim që ta ndihmojnë Donald Trumpin të fitojë zgjedhjet.

“Më lejoni të them se arsyeja pse ju jeni vizita ime e parë” si president është se unë ju përkrahë dhe respektoj në tërësi, ka thënë presidenti amerikan duke hedhur poshtë raportimet e mediave se ai është në konflikt me komunitetin amerikan të inteligjencës.

Si një nga vendimet e para, presidenti i ri amerikan, Donald Trump ka vendosur ngrirjen e përgjithshme të rregulloreve të reja më 20 janar, duke ndaluar kështu urdhërat e nisura nga parardhësi i tij, Barack Obama.

Ngrirja aplikohet ndaj një numri të gjërë të rregullave prej atyre që kanë qëllim ndalimin e ndryshimeve klimatike, ndërprerjen e krimeve në “Wall Street” e deri te propozimi për zvogëlimin e polisave të sigurimit për hipoteka, por edhe programin e ashtuquajtur “Obamacare” që ofron siguri shëndetësore për miliona amerikanë.

Memorandimi nga shefi i stafit të Shtëpisë së Bardhë, Reince Priebus thotë se agjencitë federale duhet të ndalojnë punën në bazë të këtyre rregulloreve dhe të mos dorëzojnë për publikim asnjë rregullore të përfunduar në Regjistrin Federal derisa të emëruarit e Trumpit t’i rishikojnë ato.

Dekreti shtynë për kohë të pacaktuar këto rregullore pasi shumica e të nominurave nga presidenti Trump nuk janë konfirmuar ende nga Senati.

Memorandumi i Priebus gjithashtu kërkon që edhe rregulloret që janë publikuar në Regjistrin Federal, por nuk kanë filluar të zbatohen ende, të shtyhen për 60 ditë derisa të bëhet rishikimi i tyre.

Priebus ka thënë se Drejtori i Buxhetit i Shtëpisë së Bardhë mund të bëjë përjashtime për rregullore kritike që të fillojnë së zbatuari.

Dokumenti është i ngjajshëm me atë që shefi i stafit të Obamës e ka ndërmarrë, një ditë pas inaugurimit të Obamës në vitin 2009.

Pak pasi u inaugurua si presidenti i 45-të i Shteteve të Bashkuara, Donald Trumpi nënshkroi dokumente që e bëjnë atë zyrtarisht komandant të përgjithshëm të forcave të armatosura.

Zoti Trump po ashtu nënshkroi një ligj që lejon gjeneralin në pension James Mattis të marrë detyrën e sekretarit të mbrojtjes. Gjenerali Mattis doli në pension 3 vjet e gjysmë pas një shërbimi ushtarak prej mbi 40 vjetësh. Në bazë të Ligjit për Siguri Kombëtare, duhet që një ushtarak të ketë qenë në pension nga ushtria për të paktën shtatë vjet para se të marrë në dorë drejtimin e Pentagonit. Javën e kaluar Kongresi i hapi rrugën konfirmimit të shpejtë të Gjeneralit Mattis duke mbështetur që ai të përjashtohet nga rregulla në mënyrë që të bëhet shefi i Pentagonit megjithëse ka dalë në pension si gjeneral i marinës në 2013.

Sekretari i zotit Trump për shtypin tha përmes llogarisë në Twitter se presidenti nënshkroi edhe dy dokumente që zyrtarizojnë emërime në detyrë si dhe një proklamatë për një ditë kombëtare patriotizmi.

Presidenti Trump i nënshkroi dokumentet në prani të udhëheqësve republikanë të Kongresit, udhëheqëses demokrate të Dhomës së Përfaqësuesve, Nancy Pelosi dhe në prani të fëmijëve dhe nipërve të tij.

Për këtë artikull kontribuan: Ramon Taylor në Jacumba, CA, Aru Pande në York, PA, Aline Barros në Lumberton, NC, Kane Farabaugh në Ottawa, IL, Mohamed Olad Hassan në Minneapolis, MN.

Në një kodër pranë Jacumba, të Kalifornisë, fare pranë kufirit SHBA-Meksikë, dy pika karburanti rivalizojnë njëra-tjetrën nën hijen e flamurit amerikan.

Është një pamje tipike amerikane: vendasit dhe të ardhurit mbushin karburant dhe largohen drejt shkretëtirës. Por, kjo vendndodhje ndikohet prej murit të kufirit, si nga pjesa që është ndërtuar, po ashtu edhe nga pjesa që nuk është ngritur ende.

“Njerëzit vijnë nga Meksika dhe marrin vendet e punës që mund t’i kishin njerëzit këtu në SHBA”, thotë Patrick, nga qyteti kufitar El Centor, mbështetës i Presidentit të zgjedhur Donald Trump dhe votues për herë të dytë për republikanët.

Votuesi i pavarur Jairo Carcamo e përshkruan Hillary Clinton si “të shitur” dhe Donald Trump si “një racist”, por është i gatshëm megjithatë t’i japë shansin presidentit të 45-të të përmbushë premtimet e tij pozitive për ekonominë. Ai sidoqoftë nuk mendon se muri kufitar është pjesë e zgjidhjes.

Ai thotë se “nëse zoti Trump dëshiron të sigurojë kufirin për të mos lejuar hyrjen e trafikantëve të drogës dhe njerëzve të këqinj, kjo është gjë e mirë. Por, duhen lënë të kalojnë njerëzit e mirë. Neve na duhen njerëz punëtorë, na duhen emigrantë, pasi një amerikan nuk del në fushë për të mbledhur mollë për vetëm 4 dollarë shportën”.

Patti Myers Wiseman, një demokrate e kahershme, mendon se nuk ka asnjë vlerë t’i jepet një shans Trump-it. Mospublikimi i deklarimit të tij taksave dhe mungesa e eksperiencës politike mjaftojnë që ajo ta konsiderojë presidentin “të pakualifikuar”.

Zonja Wiseman thotë se “ai nuk ka paguar taksa prej shumë vitesh për shkak të boshllëqeve ligjore. Ai po thotë se në muajt në vazhdim do të anullojë sigurimin shëndetësor Obamacare dhe gjëra të tjera. Mendoj se do të përfundojë i shkarkuar për shkelje.”

Ndërsa ajo përfundon cigaren që ka në dorë, zonja Wiseman zbulon se frika e saj më e madhe nuk është ekonomia, apo deklarata e taksave, por mundësia e një lufte të papritur. “Butoni i kuq”, thotë ajo.

York, Pennsylvania

“Ai di shumë marifete. Është i zgjuar, është biznesmen. Nëse doni të bëni diçka të mrekullueshme për këtë vend, ai do ta arrijë”, thotë greko-amerikani Yani Pripas, i cili ka ardhur në SHBA në vitin 1975. Pronar i dyqanit “Greek Super Foods” në tregun qendror të Yorkut, ai votoi dy herë për Presidentin Barack Obama, por këtë vit vendosi për zotin Trump.

Ai dëshiron që zoti Trump ta bëjë jetën në Amerikë siç ishte në vitet 1970-të. “Njerëzit ishin të lumtur. Kishin të ardhura. Nuk kishte kaq shumë të huaj në vend”, thotë ai.

Ditën përpara inaugurimit, një grup njerëzish që drekojnë aty çdo ditë u mblodhën në tregun në qendër të York-ut. Grupi përbëhet nga republikanë dhe demokratë, juristë, një sherif, dhe pronarë biznesesh. Ata takohen dhe bisedojnë rreth jetëve të tyre, komunitetit dhe sot, i flasin Zërit të Amerikës rreth politikës.

“Ende nuk po e besoj dot. Do të shkoj në inaugurim dhe me shumë ngazëllim. Është inaugurimi im i parë”, thotë Louis Rivera, i cili u zhvendos në York bashkë me të shoqin rreth një vit më parë. Ai ka votuar për demokratët që nga viti 2008.

Por, ai nuk është dhe aq i ngazëllyer për perspektivën e katër viteve të ardhshme. “Tashmë pres më të keqen, për shkak të gjërave që kanë thënë Trump, por le t’i japim atij mundësinë të ndryshojë dhe të përqafojë të gjithë”, thotë Rivera.

Jenna Geesey mendon se administrata Trump është zgjidhja për të dalë nga ngërçi.

“Shpresoj të mbajë premtimet për forcimin e sigurisë kombëtare dhe reformimin e sistemit tonë të kujdesit shëndetësor. Për një periudhë të stërzgjatur ka patur një ngërç pa aktivitet dhe pa legjislacion të vërtetë në ndihmë të klasës së mesme”, thotë Jenna.

Juristja me bindje të forta demokrate, Audrey Woloshin, thotë se “që unë të ndjehem më komod me udhëheqësinë e tij, zoti Trump duhet të shndërrohet në një folës më të mendueshëm dhe më shumë diplomat”. Ajo thotë se është “krejtësisht kundër” pozicioneve filozofike dhe ideologjike të zotit Trump, si dhe të anëtarëve të kabinetit të tij, dhe se për këtë arsye ajo “ka shumë frikë”.

A market in downtown York, Pennsylvania. (M. McKiterrick/VOA)

Lumberton, Karolina e Veriut

Qyteti Lumberton ka një nivel papunësie prej 2.5% më të lartë se sa mesatarja kombëtare.

Drejtori i Komisionit të Zhvillimit Industrial të Karolinës së Veriut, Gregory Cummings, thotë se “në periudhën 1996-2001, humbëm rreth 8 mijë vende pune. Humbëm në metalurgji dhe në tregun e tekstileve që ishte biznesi ynë kryesor. U goditëm shumë rëndë”.

Viti 1996 ishte viti i dytë i zbatimit të marrëveshjes së Tregtisë së Lirë të Amerikës së Veriut – NAFTA.

“Kur zoti Trump thotë se NAFTA nuk ishte një marrëveshje e vërtetë e tregtisë së lirë, por se favorizonte vetëm në një drejtim, ai merr kështu menjëherë vëmendjen e njerëzve të këtushëm”, thotë Phillip Stephens, kryetar i Partisë Republikane për bashkinë Robeson.

Pronari i një biznesi të vogël, Tanner Smith, ka jetuar në Lumberton gjatë gjithë jetës së tij, dhe ka qenë gjithnjë demokrat. Por, këtë radhë votoi për republikanët.

Por, çfarë pret prejt Trump-it? “Të mbajë premtimet e tij dhe të veprojë me shpejtësi për vendet e punës”, thotë zoti Smith.

Demokratja, India Lowry, e cila nuk votoi për zotin Trump bën një punë të dytë në një dyqan ushqimesh gjysëm të gatshme. “Është shqetësuese që shumicën e mallrave e marrëm nga Kina”, pranon ajo.

Biznesmeni Alton Locklear, votues i zotit Trump, thotë se falenderon Zotin që presidenti i ri do të lëvizë vendin në drejtim të ndryshëm. “Kam folur me shumë njerëz në komunitetin tim për të shtuar vendet e punës dhe ata janë të ngazëllyer”, thotë ai.

Ai thotë se qyteti Lumberton është një qytet fetar, me kisha në çdo cep.

“Dua të flas hapur. Trump tha të gjitha gjërat që ne kemi patur në mendje, për çfarë duhet bërë për ekstremizmin islamik, emigracionin dhe taksat që paguajmë”, thotë zoti Locklear.

A scene in downtown Lumberton, North Carolina. (M. McKiterrick/VOA)

Ottawa, Illinois

Misri nuk do të mbillet në fushat e Illinois deri në muajin prill, kështu që këtu ka ende kohë për të menduar dhe diskutuar për ndryshimin e administratës.

Fermeri Monty Whipple plugon arat ku dikur punonte i ati dhe xhaxhai, rreth 19 kilometra pranë qytetit Ottawa. Por, gjërat kanë ndryshuar gjatë viteve të fundit, duke u ndërvarur më shumë nga tregtia.

Zoti Whipple votoi për zotin Trump, si zgjidhja e vetme e mbetur: “Ne eksportojmë shumë prodhime, që nga gruri dhe mishi; industria e bagëtisë ndërvaret nga eksportet. Zoti Trump është pozicionuar fort kundër disa prej marrëveshjeve të tregtisë që janë miratuar në të kaluarën, si NAFTA dhe të tjera”.

Agjenti i siguracioneve për fermerët, Robert Hasty, thotë se është më shumë republikan se sa demokrat, por se nuk vendosi dot të votojë për zotin Trump.

Zoti Hasty thotë se është më tepër konservator nga pikëpamja politike, por se ndjehet gjithnjë e më shumë liberal nga pikëpamja sociale: “Jam i shqetësuar për aspektin moral, për gjërat që ai ka thënë dhe ka bërë. Kam dy vajza të vogla dhe më duken trazuese gjërat që ai ka thënë nga podiumi”.

Minneapolis, Minnesota

Somalezët filluan të vijnë në Minneapolis në vitet 1980-të. Deri në vitin 2013, komuniteti ishte rritur në 250 mijë persona, me qindra biznese të tyret.

Somalezët anojnë nga demokratët, por janë aktivë në të dyja partitë. Shërbimi në gjuhën somaleze i Zërit të Amerikës konstatoi se ata janë të gatshëm të ndryshojnë preferencat duke zgjedhur ndërmjet dy partive.

Faduma Yusuf është një republikane krenare që kandidoi për këshillin bashkiak të qytetit Minneapolis në vitin 2013. Por, ajo votoi për zotin Obama në vitin 2008, dhe për Mitt Romney-n në vitin 2012. Këtë vit, ajo nuk votoi.

“Kur pashë Trump-in të ofendojë komunitetin tim somalez dhe komunitetin emigrant, dhe kur i emërtoi terroristë njerëzit që erdhën këtu për të mbijetuar dhe për një jetë më të mirë për veten dhe fëmijët, atëherë vendosa të mos votoj për të”, thotë zonja Yusuf.

FILE – Female members of Minnesota’s Somali community.

Aktivisti social Faisal Derie votoi dy herë për zotin Obama, por këtë vit, vendosi për zotin Trump.

“Mendoj se do të jetë një ndër presidentët më të mirë në historinë e Shteteve të Bashkuara, nëse jo më i miri. Mendoj se do ja dalë shumë mirë si president, dhe se do punojë mirë me botën dhe udhëheqësit demokratë. Duke qenë se është biznesmen dhe jo nga një eksperiencë politike, mendoj se do të ndjejë vuajtjet e njerëzve të varfër”, thotë zoti Derie.

Samsam Aden, një studente somalezo-amerikane që erdhi në Minneapolis katër vite më parë si refugjate, votoi për zonjën Clinton, pasi thotë se e ardhmja e saj është e pasigurtë nën administratën Trump.

“Unë dhe tre vëllezërit dhe motrat e mia patëm ëndrrën për t’u arsimuar dhe për të përcaktuar se çfarë do të bëhemi në atdheun tonë të ri. Por, tani që një burrë që kërcënon komunitetin tim po drejton vendin, ne jemi të pasigurtë se çfarë do të na sjellë e ardhmja. Në përgjithësi, nuk jam optimiste për të ardhmen e myslimanëve në SHBA”, thotë zonja Aden.

Për këtë artikull kontribuoi edhe Abdi Mahamud Mascade, nga Minneapolis.

Ndër njerëzit e shumtë që po mblidhen në Uashington për inaugurimin e presidentit të ri, Donald Trump, pritet të ketë edhe plot protestues, të cilët kundërshtojnë rezultatin e zgjedhjeve që i dha zotit Trump fitoren dhe janë gjithashtu kundër planeve të tij për vendin. Demonstrata më e madhe pritet të jetë Marshimi i Grave në Uashington që është planifikuar të zhvillohet nesër. Një grup protestuesish po bëhen gati të shprehin opinionin e tyre në qytetin Angola të shtetit Indiana:

Mesazhi i protestës Marshimi i Grave është mjaft i thjeshtë: të drejtat e grave janë pjesë e të drejtave të njeriut, pa dallim nga raca, kombësia, feja, statusi i imigracionit, orientimi seksual, gjendja ekonomike, mosha apo aftësitë fizike. Jacob McNeal thotë ky mesazh duhet të përqafohet nga të gjithë, pa dallim gjinie:​

“Është e kuptueshme që të ketë mospajtime në opinione. Por në këtë rast kemi të bëjmë me një pikëpamje krejt tjetër për demokracinë – kësaj i thonë totalitarizëm. Nuk u votua për demokraci dhe prandaj po ngre zërin”.

Ky protestues bën pjesë në një organizatë lokale në Indianën veriore, të krijuar pas zgjedhjeve. Organizata të tilla u formuan në mënyrë të pavarur në të gjithë vendin, me ndihmën e medias sociale. Ata e kanë të qartë se grupe të veçanta e kanë të vështirë të arrijnë synimet në mënyrë të pavarur, por kur bashkohen bëhen një forcë tepër e madhe dhe është e vështirë që të injorohen nga presidenti i ri apo politikanë të tjerë.

Sarah Young, e cila ka në plan të marrë pjesë në marshimin në Uashington, thotë se shqetësimi i saj kryesor janë programet për shëndetin e gruas.

“Programet që u ofrojnë grave mundësi për kontrollin familjar, si dhe kontrolle shëndetësore kanë ndikuar më shumë për fuqizimin e gruas në shekullin e 20-të dhe tani në shekullin e 21-të se çdo gjë tjetër. Nëse duam t’i ruajmë këto suksese, duhet të ruajmë programet e kujdesit shëndetësor”.

Tema të tjera që kanë mobilizuar protestuesit janë masat për të ndalur dhunën kundër gruas, mbrojtja e mjedisit, të drejtat e punëtorëve, të personave me aftësi të kufizuara, të imigrantëve dhe të komunitetit homoseksual.

Lou Ann Homan nuk do të vijë vetë në Uashington për të marrë pjesë në protesta, por ajo ka në plan ta ngrejë zërin në komunitetin e saj:

“Do të ketë marshime në të gjithë vendin, në çdo komunitet të vogël e qytet të madh. Një grup i madh prej nesh do të mblidhemi në Ft. Wayne për të treguar se jemi të shqetësuar”.

Sipas përllogaritjeve, mbi 600 tubime do të organizohen në mënyrë paralele në pika të ndryshme të globit. Në Indiana, grupi i protestuesve shpreson se do të formohen rrjete të reja bashkëpunimi për të mbështetur e përmirësuar jetën e çdokujt. Ata besojnë se paqja është e pamundur në një botë ku s’ka barazi për të gjithë.