VOAL

Rajon

SHBA i bën thirrje presidentit Ivanov të rishqyrtojë vendimin

Uashingtoni i bëri thirrje të mërkurën presidentit të Maqedonisë Gjeorgje Ivanov të rishqyrtojë vendimin e tij për pezullimin e hetimeve ndaj skandalit të përgjimeve.

Zëdhënësi i Departamentit të Shtetit, John Kirby tha se pezullimi i hetimeve do të mbronte zyrtarët e korruptuar dhe do t’i mohonte drejtësinë popullit të Maqedonisë. “Vendimi do të dëmtonte më tej shtetin ligjor, integritetin e institucioneve gjyqësore, si dhe besueshmërinë e përkushtimit të udhëheqësve maqedonas ndaj vlerave themelore të NATO-s dhe Bashkimit Evropian”, thuhet në deklaratën e Departamentit të Shtetit.

Të martën, në mënyrë të papritur, Presidenti Ivanov njoftoise kishte vendosur të ndërpriste hetimet për skandalin e përgjimeve duke thënë se synonte t’i jepte fund “agonisë politike në të cilën ndodhej vendi prej një viti”.

Opozita në Maqedoni, po proteston për të dytën ditë duke kërkuar dorëheqjen e presidentit.

Protestuesit u mbodhën të mërkurën në mbrëmje para zyrave të presidentit ku qëlluan, me vezë, gurë e mjete të tjera. Më pas, ata çanë kordonin e policisë dhe shkuan para parlamentit. Megjithatë, protestuesit nuk arritën të shkonin para selisë së partisë VMRO-DPMNE në pushtet.

Nga ana tjetër, një tjetër grup protesuesish, që besohet se janë përkrahës të partisë VMRO-DPMNE, u nis drejt selisë së Lidhjes Social Demokrate të opozitës, për të shprehur revoltën kundër drejtuesve opozitarë.

Vendimi i Presidentit Ivanov për të mbyllur hetimet, për një prej skandaleve politike më të rënda të këtij vendi, u kritikua me forcë edhe nga Bashkimi Evropian, që e quajti atë një veprim që bie në kundërshtim me shtetin ligjor.

Bashkimi Evropian ndërmjetësoi një marrëveshje mes pozitës dhe opozitës pas skandalit të përgjimit. Skandali do të hetohej nga një prokuror i posaçëm dhe ish kryeministri Gruevski ra dakort që Maqedonia të zhvillojë zgjedhje të parakohshme, të cilat janë planifikuar për në qershor.

Parlamenti i vendit u shpërnda javën e kaluar, por opozita theksoi se do t’i bojkotojë zgjedhjet pasi nuk janë përmbushur kushtet për të cilat u ra dakort në marrëveshje që zgjedhjet të jenë të lira e të drejta.

Presidenti Ivanov është aleat i ish kryeministrit Gruevski i cili e mbështeti atë të zgjidhej në këtë post.

Hartmann: Vendimi i gjykatës për Sheshelin, manipulim i të kaluarës

Vendimi gjyqësor i shkallës së parë i Tribunalit të Hagës për liderin e radikalëve serbë, Vojislav Sheshel, manipulon në tërësi me të kaluarën, i zhvlerëson faktet dhe ngjarjet e vërtetuara në ish Jugosllavi, thotë në një intervistë për shërbimin e Ballkanit të Radios Evropa e Lirë, Florence Hartmann, ish zëdhënëse e Tribunalit të Hagës.

Hartmann, këto ditë është liruar nga burgu, ku ka vuajtur dënimin prej 7 ditësh, të cilin ia ka shqiptuar po ky tribunal.

Ajo ishte dënuar për mosrespektim të Gjykatës, për shkak se në librin e saj “Paqja dhe dënimi”, si dhe në tekstin me titull “Fshehja e fakteve kyçe për gjenocid”, ka shkruar se “gjykatësit e Tribunalit të Hagës kanë marrë pjesë në fshehjen e dokumenteve të rëndësishëm” të përfshirjes së Republikës Federative të Jugosllavisë në gjenocidin në Srebërnicë.

“Gjykatësi (Jean-Claude Antonetti), i cili, fatkeqësisht, është francez, thotë se Shesheli, në esencë, vetëm e ka shprehur mendimin politik; pra, se bëhet fjalë për lirinë e shprehjes së qëndrimit të tij politik, i cili nuk e ka dimensionin penal. Për njerëzit që e kanë përcjellë Sheshelin, kjo është shokuese. Unë vet, si gazetare e huaj, i kam përcjellë fjalimet dhe aktivitetet e tij dhe të njerëzve të tij në terren – në Hërtkovc, në Vukovar, në Bosnjën lindore”.

“Kam parë edhe rekrutimin e vullnetarëve në shtabin e radikalëve në mes të Beogradit, që nga viti 199i e më tutje. Të gjith ishin me flamuj të zi dhe me kafka në to. Gjithashtu, nuk ka asnjë dyshim që fjalimet e tij i kanë trimëruar njësitet paraushtarake në terren. prandaj, vendimi gjyqësor ka qenë mjaft i çuditshëm”, ka theksuar Hartmann.

Sipas saj, vendimi gjyqësor e mohon ndikimin e gjuhës së urrejtjes së një njeriu, i cili, ka qenë, siç e quan ajo, “zëdhënës ekstremist i Milosheviqit”, sepse “ ka folur atë që Milosheviqi vet nuk ka mundur ta thotë”.

Fjalimet e Sheshelit, siç thotë Hartmann, kanë pasur ndikim në formacionet paraushtarake në terren, sepse këto të fundit, në vazhdimësi janë thirrur në ato fjalime dhe “fjalimet e tij, në vazhdimësi i kanë përsëritur vrasësit e tij në terren”.

“Që gjykatësi i Tribunalit të Hagës, pas kaq vitesh gjykimi, të thotë se kjo nuk ka pasur ndikim dhe se kjo është vetëm shprehje e qëndrimeve të tij politike – kjo në tërësi është skandaloze. Ai në tërësi po manipulon me të kaluarën, gjë që është problem i madh për rajonin, sepse po i anulon tashmë faktet dhe ngjarjet e vërtetuara në ish Jugosllavi. Përveç kësaj, vendimi i gjykatësit francez, do të ketë pasoja në të tashmen e rajonit”.

“Ai është mohim i gjithë mandatit dhe mënyrës, në të cilën duhet të funksionojë procesi ligjor në Tribunal dhe kjo ka ndikim të drejtpërdrejtë edhe në potencialin e pajtimit dhe mirëkuptimit ndërmjet palëve të ndryshme, të cilat kanë marrë pjesë në luftë”, ka theksuar Hartmann.

Ajo ka shtuar se ndikimi do të shtrihet edhe në të ardhmen, sepse “porositë se nuk do të ketë kurrfarë pasojash penale në qoftë se dikush bën thirrje për dhunë dhe vrasje masive”.

Vendimi gjyqësor në rastin e Sheshelit, sipas Hartmann, nuk ka lidhje me drejtësinë dhe nuk ka lidhje as me pretendimet që Prokuroria nuk e ka argumentuar këtë apo atë.

Ajo thotë se edhe në rast që prokuroria ka bërë gabime, të cilat nuk mund të përjashtohen, shtrohet pyetja se a është e mundur që të bëhen aq gabime që e gjithë fajësia të shkarkohet nga njeriu, për të cilin ekzistojnë mjaft xhirime të regjistruara dhe mjaft dëshmitarë.

“Ajo që mua më brengos në veçanti, në këtë vendim gjyqësor, është këndi politik prej të cilit është bërë revidimi i të kaluarës politike. Duhet hetuar se çfarë në të vërtetë ka ngjarë aty”, theksoi Hartmann.

Ajo shpreh dyshimin se gjykatësi francez Antonetti ka agjendën e vet, por për të cilën ajo nuk ka njohuri.

“A ndan ai qëndrime të ngjashme politike sikurse Shesheli, këtë nuk e di, por është krejtësisht e mundshme dhe kjo duhet të hetohet”, ka theksuar Harmann.

Sipas saj, tashmë Shesheli e ka rrugën e hapur që të marrë mjaft mandate deputetësh ë Kuvendin e Serbisë, në zgjedhjet e 24 prillit. Kjo sipas saj, është rrjedhojë e vendimit gjyqësor, i cili siç thotë ajo, jo vetëm që e mohon të kaluarën, por edhe e orienton të ardhmen, në drejtimin që Serbia të mbetet në iluzionet dhe projektet, të cilat do ta largojnë nga Evropa.

“Pra, Antonetti, do ta trimërojë Serbinë kundër-evropiane, e cila do t’i shembë bisedimet e saj me Bashkimin Evropian”, u shpreh Hartmann.

Ajo ka shtuar se në rast se parashtrohet ankesë nga ana e Prokurorisë dhe në rast se Dhoma e apelit vlerëson që Këshilli Gjyqësor i shkallës së parë ka bërë shumë gabime, atëherë edhe mund të vendosë që gjykimi të rishikohet. Por, sipas saj, kjo mund të zgjasë, së paku, dy vjet.

Ivanov amniston politikanët e akuzuar; reagojnë ndërkombëtarët

Presidenti i Maqedonisë, Gjorgje Ivanov, ka vendosur të falë të gjithë personat që po hetohen nga Prokuroria Speciale për mashtrime zgjedhore, por edhe për veprime tjera të jashtëligjshme, në bazë të asaj që njihet si “aferë e përgjimeve”.

Në bazë të vendimit, nga ndjekja e mëtejme janë liruar ish-ministrat e Punëve të Brendshme dhe të Transportit, Gordana Jankullovska dhe Mile Janakievski, drejtori i policisë sekrete, Sasho Mijalkov, si dhe shumë politikanë e zyrtarë të tjerë, të dyshuar nga Prokuroria Speciale për shpërdorim të detyrës.

Vendimi i presidentit përfshin edhe liderin e partisë opozitare Lidhja Social-Demokrate, Zoran Zaev, i cili akuzohej nga Prokuroria Publike për rastin e njohur me emrin “Puçi“.

Ivanov, në një paraqitje të jashtëzakonshme, tha se vendimin e ka marrë për të ndihmuar në zgjidhjen e krizës politike që ka përfshirë Maqedoninë tanimë një vit e gjysmë.

“Me qëllim që të kontribuoj në zgjidhjen e krizës, në relaksimin e raporteve dhe uljen e tensioneve mes forcave politike dhe mbështetësve të tyre, i vetëdijshëm për pasojat për shtetin dhe qytetarët nëse nuk ndërmerret diçka dhe me besimin e fortë se po marr një vendim në interes të shtetit, kam vendosur që të urdhëroj ndërprerjen e të gjitha procedurave të nisura hetimore. Vendimi hyn në fuqi menjëherë dhe si të tillë do ta mbroj deri në fund“, tha Ivanov.

Ai shtoi se kriza nuk është në interes të shtetit, por të shërbimeve të huaja, të cilat edhe “po punojnë për destabilizimin e vendit”.

Por, vendimi i tij ka hasur në reagimin e fuqishëm të opozitës, e cila ka paralajmëruar nisjen e protestave.

Lideri i opozitës, Zaev, tha se presidenti është vënë në mbrojtje të, siç u shpreh, kriminelëve, të cilët kanë bërë mashtrime zgjedhore dhe krime tjera të rënda.

Me këtë vendim, tha Zaev, është rrënuar marrëveshja politike dhe se zgjidhja e vetme në mbrojtje të demokracisë mbetet rruga.

“Nuk do të lejojmë rrënimin e tërësishëm të shtetit. Së bashku me qytetarët do të rreshtohemi në anën e Maqedonisë. Nga sot, me qytetarët do ta kthejmë drejtësinë dhe sundimin e shtetit juridik. Kërkojmë që mbrojtësi i kriminelëve, personi Gjorgje Ivanov, menjëherë të japë dorëheqje. Nëse këtë nuk e bën, ai po e çon shtetin në gjendje të jashtëzakonshme, në kufijtë e shpërthimit“, deklaroi Zaev, duke kërkuar mbledhje të jashtëzakonshme të Kuvendit për shkarkimin e presidentit Ivanov.

Protestat para Presidencës në Shkup kanë nisur. Protestuesit, përkundër forcave të shtuara policore, kanë hedhur vezë dhe gjësende të forta, duke thyer xhamat e zyrës së Presidencës.

Vendimi i presidentit Ivanov ka shkaktuar reagime edhe nga përfaqësuesit ndërkombëtarë.

“Deklarata e presidentit maqedonas ngre brengosje serioze rreth angazhimit të Maqedonisë për sundimin e ligjit“, thuhet në reagimin e parë të ambasadës amerikane në Shkup.

“Nëse vendimi për të falur politikanët ka të bëjë me hetimet rreth dyshimeve nga materialet e përgjuara, atëherë kjo paraqet brengosje serioze. Hetimi i plotë i këtyre rasteve dhe procesi gjyqësor adekuat janë elemente kyçe të marrëveshjes politike“, thuhet në reagimin e ambasadorit britanik në Shkup, Charles Geret.

Vendimi i presidentit Ivanov vjen pak kohë pasi Gjykata Kushtetuese e Maqedonisë shfuqizoi një ndalesë të vitit 2007, me të cilën presidentit i jepet e drejta për të falur politikanë të dyshuar për mashtrime zgjedhore dhe vepra tjera, përfshirë edhe ato të pedofilisë.

Kandiq për rastin Dikoviq: Do të luftoj deri në Strasburg

Aktivistja serbe për të drejtat e njeriut, Natasha Kandiq, ka paralajmëruar se do të ngrejë ankesë në Gjykatën Evropiane për të Drejtat e Njeriut kundër vendimit të Gjykatës Themelore në Beograd, i cili kërkon nga Kandiq të paguajë 4,400 euro kompensim për shefin e shtabit të përgjithshëm të ushtrisë serbe, Lubisha Dikoviq.

Qendra për të Drejtën Humanitare ka thënë se ish-kryetarja e saj, Kandiq, është gjobitur nga gjykata serbe për “shkelje të nderit dhe të dinjitetit” të gjeneralit Dikoviq, duke thënë publikisht se ai ka pasur lidhje me krimet e kryera në Kosovë, gjatë luftës së viteve 1998-1999.

Kandiq ka kërkuar publikisht që Dikoviq, komandant i një njësie ushtarake në Kosovë gjatë luftës, të zëvendësohet.

Dikoviq ka mohuar pretendimet e Kandiqit dhe prokurorët serbë nuk kanë ngritur ndonjë akuzë kundër tij.

“Fondi për të Drejtën Humanitare do të ankohet. Nëse edhe pas ankesës, Gjykata Themelore në Beograd konfirmon vendimin, atëherë ekziston hapësirë për Gjykatën Evropiane për të Drejtat e Njeriut (në Strasburg). OJQ-të dhe shoqëria civile synojnë të rrisin pragun e lirisë së shprehjes”, ka thënë Kandiq për shërbimin e Ballkanit të Radios Evropa e Lirë.

Turqia godet veriun e Sirisë në kundërpërgjigje të sulmeve me raketa

Ushtria turke ka granatuar sot disa lokacione në veri të Sirisë, si kundërpërgjigje ndaj sulmeve të mëhershme që goditën qytetin e Kilisit sot gjatë ditës, njoftojnë zyrtarë të qeverisë.

Më herët, pesë raketa janë gjuajtur nga toka siriane në qytetin kufitar turk të Kilisit, duke lënë të paktën katër persona të lënduar, raporton agjencia shtetërore turke e lajmeve.

Raketat goditën këtë qytet dhe njëra prej tyre ka dëmtuar një shtëpi, raporton agjencia e lajmeve Anadolu.

Disa ambulanta janë dërguar në atë rajon dhe disa njerëz të lënduar janë shtruar në spital, njofton agjencia.

Ky incident ndodhi vetëm katër ditë pasi dy raketa ranë në afërsi të një parku në Kilis, dhe lënduan dy njerëz, duke detyruar autoritetet që t’i evakuojnë dy shkolla në atë zonë.

Nuk dihet se kush e ka bërë gjuajten e raketave, por disa zona në afërsi të kufirit Turqi-Siri kontrollohen nga grupi i Shtetit Islamik, nga milicia siriano-kurde dhe nga rebelët kundër-qeveritarë në Siri.

U hap Festivali i 11-të i tulipanëve në Stamboll

STAMBOLL) – Në kuadër të Festivalit të 11-të të Tulipanëve i cili organizohet nga Kryebashkia e Stambollit në sheshin “Sultanahmet” (Xhamia Blu) hapet për vizitorët “tapeti i tulipanëve” i cili përbëhet nga 563 mijë tuliapanë natyralë në një hapësirë një mijë e 728 metra katrorë.

Zëvendëskryetari i Këshillit të Kryebashkisë së Stambollit, Ahmet Bilal Kıymaz në një fjalim të hapjes tha se me nismën “tulipani kthehet në shtëpi” të nisur në vitin 2015, tulipanët të cilët emigruan nga ky vend kanë nisur sërisht të çelin në çdo cep të Stambollit.

Kıymaz duke theksuar se me kthimin e tulipanit në Stamboll ndryshon pamja e qytetit dhe hapet mundësia për biznese të reja, ka pohuar se : “Tashmë populli ynë me ardhjen e pranverës ka nisur të shikojë tulipanët në çdo cep të Stambollit. Kjo është një shenjë që lajmëron ardhjen e pranverës. Krahas kësaj bukurie në Turqi është formuar industria e tulipanit. Në këtë mënyrë, vendi ynë ka hyrë në mesin e vendeve eksportuese të tulipanëve”.

Maqedoni: Përleshen emigrantët me policinë, qindra të lënduar

Emigrantët mbrëmë janë përleshur me policinë e Maqedonisë pasi ata nuk ishin lejuar ta shkatërrojnë barrikadën me tela ndërmjet ndërmjet Maqedonisë dhe Greqisë.

Raportohet se policia ka përdorë gaz lotjsellës dhe plumba gome për t’i kthyer prapa emigrantët, që ishin përgjigjur me hedhje gurësh kundër policisë.

Organizata Mjekët pa Kufij tha se vullnetarët mjekësorë në terren u dhanë ndihmë mjekësore afro 300 vetëve, pasi kishin probleme me frymëmarrje nga gazi lotsjellës dhe lëndimet nga plumbat e gomës.

Së paku 6 të lënduar janë në spital.

Policia e Maqedonisë tha se 23 policë janë lënduar, prej tyre 5 me lëndime serioze.

Kjo dhunë u bë në vendkalimin kufitar Idomeni, ku më se 11 mijë emigrantë janë të vendosur në kamp në pjesën e kufirit grek.

Serbët në favor të lidhjeve me Rusinë kundër NATO-s dhe BE-së

Në të njëjtën kohë më tepër se 55 % mendojnë se Serbia duhet “të lidhet tradicionalisht me Rusinë”, 19 % nuk janë dakord me këtë, ndërsa 21.5 % janë të pavendosur.Vetëm 11.2 % mendojnë se “është mirë për Serbinë që të anëtarësohet në NATO dhe BE.” 14 % janë të pavendosur në këtë pyetje.Anketa për të marrë mendimin e opinionit tregoi se është rritur euro-skepticizmin i Serbisë në krahasim me 5 vite të shkuara – paçka se ky trend është i zakonshëm për vendet kandidate.Në lidhje me temat qendrore, temat prioritare, 38.5 % thonë se është standarti i jetesës dhe papunësia e madhe, 18.2 % mendojnë temat ekonomike, ndërsa 11.1 % të drejtat e punëtorëve dhe pensionistëve.

Kjo anketë ishte e B92 dhe CeSID gjatë fushatës elektorale./Tanjug

Serbia detyrohet të dëmshpërblejë për 14 të masakruarit në Podujevë më 1999

Është marrë aktgjykimi i parë në Serbi për dëmshpërblim për shkak të përgjegjësisë së shtetit të Serbisë për krimet në Kosovë. Në një komunikatë të Gjykata e Parë e Beogradit rikujton se më 28 mars të vitit 1999 pjesëtarët e njësisë së “Skorpionëve” vranë Podujevë 14 anëtarë të familjes Bogujevci e Duriqi, transmeton Koha.net.

Gjykata me aktvendimin e saj detyron shtetin e Serbisë të paguajë 210.826 euro kompensim dëmesh për 14 gra e fëmijëve të vrarë në mars të vitit 1999 para shtëpive të tyre në Podujevë. Ata u vranë nga pjesëtarët e Ministrisë së Punëve të Brendshme të Serbisë “Skorpioni”. Njoftimin e ka bërë publik përfaqësuesi juridik i Fondit për të Drejtën Humanitare të Beogradit.

Sipas FDH-së ky është aktgjykimi i parë në Serbi me të cilin shteti i Serbisë detyrohet të kompensojë për krime lufte të bëra ndaj civilëve shqiptarë gjatë luftës në Kosovë.

Mirëpo, FDH nuk është e kënaqur me shumën e paraparë për kompensim dhe thekson se është më pak se gjysma e shumës së kërkuar përmes padisë ndaj shtetit dhe se është në shpërputhje të theksuar me vendimet e Gjykatës Europiane për të Drejtat e Njeriut, që ka të bëjë me mbrojtjen e të drejtës për jetë.

Për këtë arsye FDH ka parashtruar ankesë në Gjykatën e Apelit të Beogradit, me të cilën kërkon miratimin e shumës së kërkuar.

Në komunikatën e FDH theksohet se përgjegjësia e shtetit mbështetet në nenin 172 të Ligjit për marrë-dhëniet obligative, sipas të cilit shteti është përgjegjës për dëmet që “organet e tij i shkaktojnë personit të tretë gjatë kryerjes ose në lidhje me kryerjen e funksioneve të saj”.

Po ashtu FDH rikujton se në oborrin e Gashëve në Podujevë pjesëtarët e njësisë së “Skorpionëve” vranë me pushkë automatike gra e fëmijë.

U vranë: Sala Bogujevci (39) dhe djemtë e saj Shpendi (13) e Shpëtimi (10); Shefkate Bogujevci (43) dhe e bija e saj Nora (15) si dhe vjehrra e saj Shehidja (67), po ashtu kushërira e saj Nefise Llugaliu (55) me të kunatën Fezdrijen (21); Fitnete Duriq (36) dhe katër fëmijët e saj – Dafina (9), Arbër (7), Mimoza (4) dhe Albina (2), si dhe e vjehrra e saj Isma (69).

Po ashtu qenë vrarë edhe Hamdi Duriqi dhe Selman Gashi, të cilët komunikata e FDH nuk i përmend.

Pushkatimin e mbijetuan me plagë të rënda pesë fëmijë – Saranda, Fatosi, Jehona, Liria dhe Genc Bogujevci.

Për këtë krim më 2010 morën dënime të plotfuqishme Dragan Borojeviq, Miodrag Shollaja dhe Dragan Mediq, ndërsa Zhelko Gjukiq u dënua pas procesit të përsëritur më 2011.

Para këtyre, për këtë krim ishte dënuar edhe Sasha Cvjetan.

Presidentja e Kroacisë takon komandantin e KFOR-it

Komandanti i KFOR-it, Guglielmo Luigi Miglietta ka pritur sot në një takim presidenten e Kroacisë Kolinda Grabar-Kitaroviç, në Shtabin e Përgjithshëm të KFOR-it.

Miglietta dhe presidentja Kitaroviç diskutuan rreth situatës së përgjithshme në Kosovë dhe zhvillimeve të fundit mbi sigurinë në rajon, transmeton kp.

“Ata u pajtuan për rëndësinë e rolit të KFOR-it që vepron në mënyrë të paanshme si reagues i tretë i sigurisë për të ruajtur një ambient të qetë dhe të sigurt dhe liri të lëvizjes për të gjithë njerëzit në Kosovë”, thuhet në një komunikatë të KFOR-it.

Sipas komunikatës takimi gjithashtu ishte një mundësi për gjeneralin Miglietta që të theksojë profesionalizmin e lartë të ushtarëve kroatë në përmbushjen e mandatit të KFOR-it.

Aktualisht,ushtarët e Forcave të armatosura kroate zbarkohen kryesisht në Kampin “Bondsteel” në njësitin e helikopterëve. Ushtarët e tjerë kroatë janë pjesë të Stafit të Shtabit të Përgjithshëm të KFOR-it, në Kampin “Film City”.

Gjithashtu, Kitaroviç ka konfirmuar që “Kroacia është plotësisht e angazhuar në ruajtjen e stabilitetit në Evropën jug-lindore dhe do të vazhdojë të kontribuojë në KFOR për një Kosovë demokratike dhe paqësore”.

Prishtinë: Presidentja kroate Kolinda Grabar Kitaroviç e pranishme në përurimin e Presidentit të Kosovës

VOAL – PRISHTINË, 8 PRILL – Në përurimin e sotëm të Hashim Thaçit, Republikën e Kosovës dhe kombin shqiptar në tërësi i nderon me praninë e saj Presidentja e Republikës së Kroacisë Kolinda Grabar Kitaroviç. Zonja Grabar Kitaroviç është e pranishmja më e rëndësishme në këtë përurim.

Prania e kryetares së nderuar të Kroacisë është me rëndësi të veçantë sidomos për shkak të rolit tejet të rëndësishëm të Kroacisë dhe të presidentes së saj në proeceset e sotme rajonale dhe evropiane dhe në miqësinë me kombin shqiptar.

Mali i Zi, propozohet zyrtarizimi i gjuhës së minoriteteve në rajonet ku ata përbëjnë 5 përqind

Gjithashtu, ligji i ri prashikon formimin e një këshilli i cili do të përfaqësonte institucionin kryesor të të gjitha pakicave kombëtare, e cila do të formohej nga Qeveria e Malit të Zi

PODGORICË – Propozimi për ndryshimin dhe plotësimin e Ligjit për të drejtat dhe liritë e pakicave parashikon zyrtarizimin e gjuhës së pakicave në zonat ku ato përbëjnë pesë përqind të popullsisë.

Me këtë rast sot në Podgoricë janë mbajtur konsultimet përfundimtare publike për tekstin e ndryshimeve dhe plotësimeve të propozuara, të organizuar nga Ministria për të drejtat e njeriut dhe të pakicave.

Gjithashtu, ligji i ri prashikon formimin e një këshilli i cili do të përfaqësonte institucionin kryesor të të gjitha pakicave kombëtare, e cila do të formohej nga Qeveria e Malit të Zi.

Leon Gjokaj, drejtori i përgjithshëm për mbrojtjen dhe avancimin e të drejtave të minoriteteve dhe komuniteteve të tjera pakicë në Ministrinë për të Drejtat e Njeriut dhe Minoriteteve të Malit të Zi, tha se ndryshimet dhe plotësimet në Ligjin për të drejtat e minoriteteve janë në pajtim të plotë me mendimin e Komisionit Evropian dhe të Venecias.

Frytet e dialogut: Serbia dekoron liderët e 30 vendeve afrikane që s’e kanë njohur Kosovën

Kështu ka deklaruar për gazetën “Danas” të Beogradit këshilltari për Politikë të Jashtme i kryetari serb Ivan Mërkiq, transmeton Koha.net .

Mërkiq ka shtuar se krahas Sudanit, po për arsyen e mosnjohjes së Kosovës, janë dekoruar edhe 30 shtete të tjera afrikane. “U erdhi radha vendeve afrikane, e po këtë mirënjohje e kanë marrë edhe vendet aziatike që nuk e kanë njohur pavarësinë e Kosovës. Pos kryetarit të Sudanit këtë mirënjohje e kanë marrë kryetarë të 30 shteteve afrikane”, ka thënë Mërkiq.

Ai ka shtuar se është dekoruar edhe kryetari i Komisionin të Unionit Afrikan Erastus Mvença si dhe kryetari i Afrikës Jugore Jacob Zuma.“BE ka kontaktuar lidhur me këtë çështje dhe ne kemi dhënë sqarime” ka thënë Mërkiq. Në pyetjen e gazetës nëse Nikoliqi, para dekorimit ë kryetari të Sudanit ka pasur njohuri se Omar el-Bashir është i akuzuari për gjenocidi e krime lufte dhe arratisur nga drejtësia e Hagës, Mërkiq ka thënë se “ky dekorim nuk ka pasur si të anashkalohet”. Omar e Bashar akuzohet për vrasjen e më shumë 300 mijë personave dhe zhvendosjen e mbi dy milionë njerëzve gjatë krizës në Darfur në periudhën 2003 – 2008.

Pos kryetarit të Sudanit Nikoliq ka dekoruar edhe kryetarët e Algjerisë, Angolës, Botsuanës, Guinesë Ekuatoriale, Eritresë, Etiopisë, Zambisë, Republikës së Kepit të Gjelbër, Zimbabvesë, Afrikës Jugore, Sudanit Jugor, Kamerunit, Kenisë, Kongos, Republikës Demokratike të Kongos, Madagaskarit, Malit, mbretit të Marokut, kryetarët e Mauriciusit, Mozambikut, Namibisë, Nigerisë, Ruandës, Sao Toma e Principe, Sejshelit, Tunizisë, Ugandës si dhe të Republikës së Afrikës Qendrore.

Gjuriq: Serbia ka vetëm kufi të brendshëm me Kosovën

Drejtori i Zyrës për Kosovën në Qeverinë e Serbisë, Marko Gjuriq tha sot se me Prishtinën nuk mund të ketë kurrfarë bisedash mbi kinse demarkacionin e kufijve, meqë ndërmjet Kosovës e Serbisë Qendrore nuk ekzistojnë kufij.

Vetëm shteti i Serbisë ka kufijtë e vet dhe brenda atyre kufijve është e pranuar në Kombet e Bashkuara, raportojnë mediet e Beogradit deklaratën e sotshme të Gjuriqit, transmeton Koha.net.

Gjuriq po ashtu e ka quajtur lojë të Kosovës masën e reciprocitetit për autobotet e kamionët me lëndë të rrezikshme nga Serbia.

“Nga ana jonë nuk ka asnjë problem, thjesht duhet të qetësohen separatistët”, ka thënë Gjuriq.

Serbi: Panama Papers – Dalin emrat e atyre që fshehin emrat e politikanëve

Rrjeti për hetimin e krimit dhe korrupsionit, KRIK në Serbi publikoi të martën emrat më të njohur nga Serbia që përfshihen tek “Dokumentet e Panamasë”, përkatësisht që kanë shfrytëzuar shërbimet e studios ligjore panameze Mossack Fonseca

Disa nga emrat e përfshirë kanë qenë nën hetime ose të akuzuar për vepra penale që kanë të bëjnë me të bërit biznes me “në parajsat fiskale”.

Në mesin e emrave është ai i afaristit Valdimir Deliç, mik familjar dhe partner afarist i kryetarit të Beogradit Sinisha Mali. Emri i afaristit kundërthënës serb Igor Sabo, i cili ishte ndjekur edhe për keqpërdorime në procesin e privatizimit në Serbi.

Në dokumentet e Panamasë përfshihen edhe emrat e personave që besohet se ishin të lidhur me ish presidentin serb Sllobodan Millosheviç dhe aferën e fshehjes së një miliard markash gjermane gjatë viteve të 90-ta në Qipro.

Sipas projektit “dokumentet e Panamasë”, paratë dhe bizneset ruse hyjnë shpesh në Serbi të fshehura pas kompanive të regjistruara në “parajsat fiskale”. Në mesin e tyre janë katër rusë të pasur që në atë mënyrë bëjnë biznes në Serbi dhe disa prej tyre janë në listën e personave që u është ndaluar udhëtimi në Bashkimin Evropian.

Oligarku rus, Igor Rotenberg, shkruan KRIK, në rrugë të tilla ka blerë aksionet e kompanisë ndërtimore “PPT Inzhenjering“.

Nëpërmjet rrugëve të tilla, afaristi serb Milan Popoviç ka hyrë në partneritet me oligarkun rus Konstantin Malofejev, i afërt me presidentin rus Vladimir Putin.

Emra pilotësh, njerëzish të botës së modës, futbollistësh dhe atkitektësh nga Serbia, sipas KRIK, janë të përfshirë në dokumentet e Panamasë, sikurse edhe emra nga Jordania, India e vende të tjera që bëjnë biznes në Serbi.

Vojisllav Sheshelit i ndalohet hyrja në Kroaci për 20 vjet

Politikani serb Vojisllav Sheshel nuk mund të shkelë në tokën kroate për 20 vitet e ardhshme ose përndryshe do të arrestohet. Kjo sepse Ministria e Brendshme e Kroacisë ka vendosur një ndalim prej 20 vjetësh për Sheshel-in, shkruan e përditshmja kroate Jutarnji List, përcjell Klan Kosova.

Ndalimi i Sheshelit, që fillimisht u shpall i pafajshëm nga Tribunali i Hagës është bërë me Ligjin për të Huajt. Siç shkruan Jutarnji List ligji parasheh që “ndalohet hyrja dhe qëndrimi i të huajve kur vërtetohet se ai person përbën një kërcënim për rendin publik dhe sigurinë kombëtare”. Ligji përcakton se ndalimi nuk mund të jetë më i shkurtër se tre muaj, ose më i gjatë se 20 vjet.

Skandali ‘Panama paper’: Do të publikohen raste nga Ballkani

Voal – Udhëheqës dhe zyrtarë të ndryshëm në Ballkan kërcënohen seriozisht për publikim dokumentesh në lidhje me fshehje dhe pastrim parash.

Lajmin e publikimit të këtyre dokumentave e bëjnë me dije disa hetues të krimit të organizuar dhe korrupsionit.

Paralajmërimi, vjen menjëherë pas publikimit të një prej firmave më të mëdha ligjore në Panama, “Mossack Fonseca”, nga e cila kanë rrjedhur informacione që zbulojnë se si pushtetarë në të gjithë botën përdorin kompani të huaja, për të fshehur miliarda dollarë pasuri jashtë vendeve të tyre.

Një nga këta është Miranda Petruçiç nga Projekti për Raportimin e Krimit të Organizuar dhe Korrupsionit, e cila ka theksuar për REL, se në Ballkan mund të zbulohet një numër i interesant rastesh të tilla.

“Ne kemi pasur qasje në një bazë të të dhënave prej 2.6 terabajtësh. Kjo është rrjedhja më e madhe që ka ndodhur ndonjëherë dhe bëhet fjalë për 11.5 milionë dokumente.

Ka (raste) në Serbi, në Bosnje dhe në gjithë rajonin.

OÇRP ka mbuluar Azinë qendrore, Evropën lindore, Rusinë, Ballkanin dhe Kaukazin.

Tash për tash jemi fokusuar në ato tregime që kanë qenë prioritet, si presidenti i Rusisë, i Ukrainës, i Azerbajxhanit, i Kazakistanit. Pasi të dalë cikli i parë, do të fokusohemi edhe në këtë rajon dhe tregimi do të jetë i shkëlqyer”, ka thënë Patruçiç, e cila është redaktore rajonale e OÇRP-së.

Dokumentet që kanë rrjedhur deri më tash, e që janë emëruar si “Panama Papers”, vënë sidomos theksin te krerët e Rusisë, Ukrainës dhe Azerbajxhanit.

Thuhet se ata janë të angazhuar në operacione të dyshimta për të fshehur pasurinë jashtë vendit.

Stefanoviç: Serbia e gatshme ta ndihmojë policinë krahinore të Kosovës

” …edhe pse është reale që ne në Kosovë nuk kami kapacite të plota operacionale për veprim”, ka thënë Stefanoviç

BANJA LLUKË – Ministri i Brendshëm i Serbisë, Nebojsha Stefanoviç, tha sot se Ministria e Brendshme e Serbisë është e gatshme të “ofrojë ndihmë për forcat e policisë krahinore në Kosovë dhe se atje bëjnë gjithçka për të pasur siguri absolute në të gjithë vendin”.

Stefanovic qëndroi në Banja Llukë, ku ishte për shënimin e Ditës së policisë të Republikës Sërpska, kur u pyet nëse frikësohet për incidente të reja në veri të Kosovës në pjesët ku jetojnë serbët, tha se shpreson “që kjo më nuk do të ndodhë”.

“Gjithmonë duhet të shqetësoheni kur ka situata të tilla të krizës, por ne si Republika e Serbisë përpiqemi të kontribuojmë në stabilitetin absolut në të gjithë territorin, edhe pse është reale që ne në Kosovë nuk kami kapacite të plota operacionale për veprim”, ka thënë Stefanoviç. aa

Vuçiçi: Konteksti i vendimeve gjyqësore për Sheshelin dhe Karaxhiçin iu shkon përdore ekstremistëve në Serbi

Kryeministri i Serbisë, Aleaksandër Vuçiç, tha të premten se retorika nacionaliste në rajon mund të ringjallet. Ai i bëri këto komente një ditë pasi që Gjykata Ndërkombëtarë për krime lufte ne hapësirat e ish Jugosllavisë, liroi nga të gjitha akuzat, udhëheqësin e radikalëve serbë, Vojisllav Sheshel.

Vuçiç, dikur bashkëpunëtor i ngushtë i Vojisllav Sheshelit, nga i cili u nda në vitin 2008, tha se politikat e Sheshelit mund të dëmtojnë Serbinë dhe përpjekjet e saj për anëtarësim në Bashkimin Evropian.

Pas një gjykimi maratonik, Gjykata e Hagës liroi të enjten 61 vjeçarin Vojisllav Sheshel, kryetar i Partisë ultranacionaliste Radikale Serbe, duke e shpallur të pafajshëm për të gjitha akuzat që e ngarkonin atë për nxitje të urrejtjes etnike në luftërat që përfshinë ish Jugosllavinë gjatë viteve të 90-ta, duke lënë pas vetes mbi 130 mijë të vrarë.

Lirimi i tij shkaktoi tronditje në mesin e viktimave në njërën anë dhe kremtime të mbështetësve të tij të cilët festuan edhe në qytetin lindor boshnjak të Srebrenicës, skenë e gjenocidit të kryer nga forcat serbe në vitin 1995.

“Politikat e tilla e kthejnë Serbinë prapa në jostabilitet, mundime dhe vështirësi ekonomike. Politikat e tilla do të na izolonin na të gjitha në Ballkan dhe në Evropë”, tha të enjten kryeministri serb në një konferencë me gazetarë.

“Forcat nacionaliste janë duke u ringjallur kudo. Unë do ta luftoj këtë me të gjitha mjetet demokratike”, tha ai, duke nënvizuar se e ka ndërgjegjen e pastër për të kaluarën e tij.

Ai tha se Gjykata e Hagës “ka dështuar të përmbushë rolin e tij themelor”, për ripajtimin e kombeve në Ballkan. Madje “ka ngulur gozhdë në arkivolin e Ballkanit të përgjumur”.

Ai tha se koha e shpalljes së vendimit për Sheshelin dhe dënimi i një jave më parë i udhëheqësit të serbëve të Bosnjës, Radovan Karaxhiç me 40 vjet heqje lirie për gjenocid dhe krime lufte, po u shkon përdore ekstremistëve meqë ka përkuar me fushatën para zgjedhjeve të 24 prillit në Serbi.

Partia Përparimtare serbe e Vuçiçit, ka 135 deputetë në parlamentin 250 vendesh të Serbisë dhe qeverisë bashkë me Partinë Socialiste te Serbisë, që dikur drejtohej nga ish presidenti serb Sllobodan Millosheviq, i cili vdiq në Hagë në vitin 2006 derisa po gjykohej për krime lufte dhe gjenocid në Kroaci, Bosnjë dhe Kosovë.

Mbrëmë takim Biden-Erdogan në Uashington

Nënpresidenti amerikan Joe Biden u takua mbrëmë në Uashington me Presidentin turk Recep Tayyip Erdogan. Zyrtarët turq kanë shprehur zhgënjim lidhur me mospajtimet mes dy palëve për çështjen e grupit paraushtarak kurd në Siri, të njohur me inicialet YPG.

YPG është krahu i armatosur i Partisë Bashkimi Demokratik Kurd, një forcë politike me influencë. Shtetet e Bashkuara e konsiderojnë këtë grupim si një forcë efektive kundër ISIS në Sirinë veriore. Megjithatë, Turqia thotë se Bashkimi Demokratik Kurd ka lidhje me Partinë Punëtore të Kurdistanit, PKK, e cila lufton për autonomi në pjesën juglindore të Turqisë.

Presidenti Erdogan ndodhet në Uashington për Takimin e Sigurisë Bërthamore.

Më parë këtë vit, zoti Biden vizitoi Turqinë ku kritikoi udhëheqësit e vendit për shtypjen e lirisë së shprehjes.

Kovaç: Vendimi ndaj Sheshelit e shkatërron procesin e pajtimit

Ministri i Jashtëm kroat Miro Kovaç në një deklaratë zyrtare pas vendimit ndaj Sheshelit në Hagë thotë se vendimi është fyes dhe i dëmshëm për procesin e pajtimit

ZAGREB – Ministri i Jashtëm dhe i Çështjeve Evropiane të Kroacisë, Miro Kovaç në një deklaratë zyrtare pas gjykimit të Sheshelit në Hagë thotë se vendimi ishte fyes dhe i dëmshëm për vazhdimin e procesit të pajtimit.

“Gjykimi i sotëm i Tribunalit Ndërkombëtar Penal për ish-Jugosllavinë, shpalli të pafajshëm Vojisllav Sheshelin për krime kundër njerëzimit. Ky vendim për të gjithë viktimat e politikës serbo-madhe agresive është fyes dhe tronditës, dhe shkatërrues për procesin e pajtimit mes njerëzve dhe shteteve fqinje. Të gjithë ata në botë që nxisin lufta, duke bërë thirrje për spastrim etnik dhe politik të dhunshëm për ndryshimin e kufijve të njohur ndërkombëtarisht, me këtë kanë fituar një këst blanko”, ka thënë ministri i i Jashtëm kroat, Miro Kovaç.

Kovaç para MPJ-së tha se vendimi jo i plotfuqishëm i Dhomës Gjyqësore të Tribunalit Ndërkombëtar Penal për ish-Jugosllavinë, do të shqyrtohet në mënyrë të detajuar dhe do të përgatitet reagim konkret.

Erdogani do të takohet me Obamën

UASHINGTON – Presidenti turk, Recep Tayyip Erdogan, në kuadër të takimeve dypalëshe në SHBA do të takohet me presidentin amerikan, Barack Obama.

Nga burimet e Presidencës së Turqisë mësohet se takimi Erdogan-Obama do të zhvillohet pas pritjes që do të organizohet për nder të krerëve të qeverive dhe shteteve të cilët ndodhen në SHBA për Samitin e Sigurisë Bërthamore në Shtëpinë e Bardhë. aa

Lirimi i Sheshelit, reagojnë pengjet boshnjake që mbaheshin në kampet serbe

Vojisllav Sheshel u lirua më herët gjatë ditës nga të gjitha nëntë pikat e akuzës për krime lufte në Kroaci, Vojvodinë dhe Bosnjë e Hercegovine

SARAJEVË – Ish pengjet boshnjake që janë mbajtur në kampet serbe të përqendrimit në Bosnjë e Hercegovinë (BeH) kanë reaguar ashpër lidhur me vendimin e Tribunalit të Hagës për ta liruar udhëheqësin e çetnikëve serbë njëherësh lider i Partisë Radikale Serbe.

Vojislav Sheshel u lirua më herët gjatë ditës nga të gjitha nëntë pikat e akuzës për krime lufte në Kroaci, Vojvodinë dhe BeH.

Shqiptimi i dënimit u ndoq edhe në zyrat e Lidhjes së Pengjeve nga kampet serbe të përqendrimit BeH.

Kreu i organizatës Jasmin Meshkoviç duke mosbesuar në verdiktin e shqiptuar tha se është i habitur.

“Nuk di njeriu të flasë apo të heshtë. Mendoj se me këtë është arritur kulmi. Duke dëgjuar verdiktin fitova përshtypje se nuk ka pasur prokurori, sikur kjo prokurori është mbledhur sot”, tha ai.

Almin Gjeloviç tha se qëllimi është amnestimi i Serbisë nga lufta në BeH. aa

Komanda e ushtrisë turke zotohet për demokraci

Ushtria e Turqisë ka përgënjeshtuar raportet se është formuar një mekanizëm tjetër hierarkik brenda ushtrisë

ANKARA – Shtabi i Përgjithshëm i ushtrisë turke është zotuar në përkushtimin e saj për demokracinë duke përgënjeshtuar raportet se është formuar një mekanizëm tjetër hierarkik brenda ushtrisë.

Në një deklaratë të lëshuar, ushtria nënvizon se demokracia është përkushtimi i saj i vetëm, dhe se mekanizmat e saj ligjor dhe administrativ janë aktive brenda Forcave të Armatosura të Turqisë.

Deklarata u bë si kundërpërgjigje e pohimeve në disa media kundër të cilave ushtria ka ngritur padi penale.

“Është jashtë mendjes që të bëjmë formacione ilegale jashtë hierarkisë komanduese”, thuhet në deklaratë.

Armata tha se është duke luftuar terrorizmin e brendshëm dhe të jashtëm në përputhje me detyrat të cilat dalin nga kushtetuta dhe ligjet në lidhje me sigurinë e vendit dhe shtetasve të tij, ndërsa për komentet nëpër disa media tha se janë dekurajuese për moralin e ushtarëve, që është njëra nga shtyllat e ushtrisë. aa

Turkish Airlines shpallet aviokompania e vitit

Revista prestigjioze e specializuar në sektorin e aviacionit, Air Transport News, ka shpallur kompaninë turke të fluturimeve “Turkish Airlines” aviokompani të vitit

ANKARA – Revista prestigjioze e specializuar në sektorin e aviacionit, Air Transport News, ka shpallur kompaninë turke të fluturimeve “Turkish Airlines” aviokompani të vitit.

Në një deklaratë thuhet se çmimi është votuar nga ekspertët dhe lexuesit e magazinës në fjalë të cilët kanë vlerësuar lartë cilësinë e shërbimeve, inovacionet, produktet e reja, përgjegjësinë e korporatës dhe kontributin shoqëror.

Gjatë eventit “Çmimet e Air Transport News 2016” për shpallje të më të mirëve, njësiti i kompanisë, “Turkish Cargo” u shpall aviokompania Kargo më e mirë ndërsa “Turkish Technic” që merret me mirëmbajtjen, u shpall kompania më e mirë në lëmin e saj.

Aeroporti Ndërkombëtar Ataturk, i cili menaxhohet nga kompania TAV është shpallur aeroporti i vitit.

Numri i destinacioneve të cilat mbulohen nga kompania turke është rritur nga 264 në 284 gjatë kuartalit të fundit të vitit 2014, përfshirë 49 fluturime vendore dhe 235 ndërkombëtare në 113 shtete.

Kapacitetet e aviokompanisë në vitin e kaluar u rritën për 13.6 përqind me shifrat prej 61.2 milionë pasagjerë gjatë vitit.

“Ashtu siç rritet rrjeti i Turkish Airlines duke ofruar më shumë shërbime, ashtu rritet edhe tendenca jonë për të kënaqur klientët tanë”, tha kreu i kompanisë Ilker Ayci.

“Në synojmë që në vitin 2023 të rrisim numrin e pasagjerëve tanë nga 60 milionë në 120 milionë, ndërsa numrin e avionëve nga 300 në mbi 450. Kur të përfundojë kompletimi i aeroportit të ri në Stamboll Turkish Airlines do të arrijë një moment të ri”, thuhet në deklaratën e Ayci.

Kompania Turkish Cargo në dekadën e fundit ka shënuar rritje prej 18 përqind për çdo vit.

Kreu i aeroportit TAV Sani Sener, tha se Ataturku është shndërruar në aeroportin e tretë në Evropë për sa i përket pasagjerëve.

“Gjatë këtij procesi ka pasur disa zhvillime të mëdha në aeroport për të ofruar një eksperiencë të mirë për pasagjerët” ka thënë ai. aa

Kroacia tregon muskujt

Qeveria e re e qendrës së djathtë kërcënoi Serbinë me integrimin Europian, gjë që futi në telashe marrëdhëniet mes dy vendeve, por kjo është vetëm një nga elementët e nervozizmit në rajon.

Në një nga lëvizjet e saj të para si ministër i ri i jashtëm, Miro Kovac i tha punonjësve të ministrisë së tij të mos e përdorin më termin “rajon” kur i referohen vendeve të ish-Jugosllavisë. “Rajoni është një koncept i mjegullt, kështu që në të ardhmen, termi më i saktë ‘fqinjët’ do të përdoret,” tha Kovac kur ai mori postin në janar.

Termi “rajon” ndërkohë do t’i rezervohet vetëm vendeve fqinje që janë sakaq anëtare të BE-së, të tillë si Austria, Hungaria, Italia e Sllovenia.

Njoftimi qe më shumë se sa thjeshtë dallim gjuhësor dhe ka pasoja të qarta gjeografike dhe politike, duke sugjeruar se qeveria e re synon të vendosë theksin te marrëdhëniet me vendet anëtare të BE-së më shumë se sa te marrëdhëniet me pjesën tjetër të Ballkanit.

Në deklaratat e para zyrtare, Kovac këmbënguli se ai do t’i kushtojë vëmendje të posaçme marrëdhënieve të mira të fqinjësisë, veçanërisht me Bosnjën dhe Serbinë.

Gjithsesi, marrëdhëniet me Serbinë janë në pikën e tyre më të ulët në shumë kohë pasi Kroacia kërcënoi javën e kaluar se do të bllokojë hapjet e Kapitujve 23 dhe 24 të bisedimeve për anëtarësim mes Serbisë dhe Bashkimit Europian.

Duke renditur të gjitha problemet kyçe në marrëdhëniet plot telashe mes dy vendeve, si dhe pjesës tjetër të rajonit, Kroacia tha: “Kushtet që Serbia duhet të plotësojë për të hapur kapituj të rëndësishem si kapitulli 23 mes të tjerave, janë respekti për të drejtat e njeriut [veçanërisht ato të minoriteteve]… bashkëpunim i plotë me Gjykatën Ndërkombëtare Penale për Ish-Jugosllavinë dhe… anulimi i juridiksionit për të ngritur akuzë dhe gjykuar krimet e luftës për të gjithë territorin e ish-Jugosllavisë”.

Lëvizja e kroatëve për të bllokuar rrugën e Serbisë drejt BE-së vjen në një kohë të papërshtatshme për politikanët serbë, të cilët më së shumti janë duke bërë fushatë për zgjedhje të parakohëshme vendore dhe parlamentare, zgjedhje që do të zhvillohen më 24 prill.

Ministri i jashtëm i Serbisë Ivica Daçiç njoftoi se Serbia do të protestojë ndaj Kroacisë dhe Brukselit për veprimet “e padrejta” të qeverisë së re të Kroacisë.

“Kjo nuk është hera e parë ë Kroacia ka vepruar në mënyrë të padrejtë në marrëdhëniet me fqinjët,” tha Daçiç, duke e akuzuar Kroacinë se po përpiqej të minonte integrimin e Serbisë në BE.

Daçiç iu përgjigj me kundërakuza mbi trajtimin e minoritetit serb në Kroaci, duke thënë: “Është më mirë që ata të zgjidhin fillimisht problemet që serbët po kanë në Kroaci dhe të veprojnë në përputhje me kriteret e BE-së”.

Dueli verbal vijoi ndërsa zëvendëskryeministri i Kroacisë Bozo Petrov, i tha medias se kjo është “kohë për katharsis” për Serbinë, duke nënkuptuar se Beogradi duhet të përballet fillimisht me rolin që ka luajtur në shpërbërjen e ish-Jugosllavisë dhe në luftërat që pasuan.

Pas kësaj, zëvendëskryeministri i Serbisë Rasim Ljajic, deklaroi se politikanët kroatë qenë “duke treguar muskujt patriotikë” kundër Serbisë, tashmë prej muajsh.

Menjëherë pas zgjedhjeve të Kroacisë, disa analistë politikë pretenduan se fitorja e së djathtës do t’i përmirësonte marrëdhëniet mes Zagrebit dhe Beogradit, me argumentin se të djathtët kanë tendencën të bien dakord më lehtë dhe më shpejtë se sa të majtët.

Serbia në të vërtetë bëri përpjekje për të përmirësuar marrëdhëniet mes dy vendeve.

Kryeministri i Serbisë Aleksandar Vuçiç, papritur mori pjesë në ceremoninë e inagurimkit të presidentes së Kroacisë Kolinda Grabar Kitarovic shkurtin e kaluar, pavarësisht se ish presidenti i kroacisë Ivo Josipovic dhe ish-kryeministri Zoran Milanovic, nuk patën marrë pjesë në inaugurimin e presidentit të Serbisë Tomislav Nikolic në maj, 2012.

Në prak të shpalljes së rezultateve të zgjedhjeve në Kroaci nëntorin e kaluar, Vuçiç qe nga të parët që uroi Tomislav Karamarko, kreun e Bashkimit Demokratik të Kroacisë, HDZ, për fitoren e partisë së tij.

Biseda telefonike e Vuçiç parapriu një njoftim zyrtar të rezultateve, gjë që u pa si lëvizje për pajtim mes vendeve.

Që nga koha e zgjedhjeve, të dy vendet kanë diskutuar për një vizitë në Kroaci nga Vuçiç, por deri tani kjo ide nuk është realizuar.

Burime pranë udhëheqësisë kroate thanë se Zagrebi e ka lënë iniciativën në pritje pa zhurmë, e pakënaqur nga fakti se vetëm një javë para se vizita të kryhej në janar, Vuçiçi shkoi në Bosnjë për të festuar ditën kombëtare të Republikës Srpska, pjesës serbe të Bosnjës, festë të cilën Gjykata Kushtetuese e Bosnjës e ka cilësuar të paligjshme.

Një vizitë e mundshme nga presidenti i Serbisë Nikolic, e cila është diskutuar tashmë që prej një viti, u vendos gjithashtu në pritje në të njëjtën mënyrë pasi Nikolic vitin e kaluar nxiti Papën të ndalojë kanunizimin e Aloysius Stepinac, një kryepeshkopi të Zagrebit gjatë Luftës së Dytë Botërore, i cili është një figurë e debatuar.

Lëvizja e Kroacisë për të bllokuar rrugën e Serbisë drejt BE-së është në thelb një përsëritje e asaj që Sllovenia bëri kur Kroacia po lëvizte drejt anëtarësimit. Qeveria në Ljubljanë bllokoi procesin për dy vjet, duke cilësuar si shkak mosmarrëveshjen për kufirin detar mes dy vendeve.

Ndërsa marrëdhëniet mes Zagrebit dhe Ljubljanës janë përmirësuar formalisht që kur Kroacia hyri në BE, ato kanë mbetur te ftohta dhe të tensionuara pasi mosmarrëveshja nuk është zgjidhur ende.

Tensionet u rritën sërish pasi Sllovenia ngriti një gardh me tela me gjemba pranë disa pikave të kalimit kufitar me Kroacinë si barrierë kundër refugjatëve.

Përveç kësaj, të dy vendet kanë mendime të ndryshme mbi çështjen nëse një proces arbitrazhi ndërkombëtar aktualisht i pezulluar mbi statusin e kufirit, duhet të vijohet apo jo.

Arbitrazhi u pezullua pasi Kroacia u tërhoq vitin e kaluar, pasi një bisedë telefonike e përgjuar tregoi se Sllovenia po lobonte pranë Gjykatës së Arbitrazhit për të dhënë një vendim favorizues për të.

Presidentja Grabar Kitarovic i ngriti të dyja çështjet kur ajo u takua me presidentët e Sllovenisë dhe Austrisë, Borut Pahor dhe Heinz Fischer, në Varazdin në Kroacinë e veriut javën e kaluar.

Pala Kroate tha se e mirëkuptonte dëshirën e Sllovenisë për të mbrojtur veten nga dallga e emigrantëve, por gjithsesi priste heqjen e gardhit kufitar sa më parë të qe e mundur.

Marrëdhëniet e Kroacisë me Bosnjën janë më të mira se sa ato me Serbinë apo Slloveninë. Gjithsesi, gjatë një vizite të kohëve të fundit të presidencës tripalëshe të Bosnjës në Zagreb, çështje të pazgjidhura dolën në sipërfaqe gjatë bisedimeve me Presidenten e kroacisë Kolinda Grabar Kitarovic.

Çështjet e diskutuara nuk u deklaruan publikisht, por dukshëm ato përfshijnë mosmarrëveshjet aktuale mbi vijat kufitare si dhe planet e Kroacisë për të ndërtuar një urë në gadishullin e Peljesac për të lidhur qytetin e Dubrovnikut me pjesën tjetër të Kroacisë dhe duke anashkaluar rrugën ekzistuese që kalon në territorin e Bosnjës.

Zyrtarët e Bosnjës kanë frikë se kjo urë do të bllokojë daljen në det për anije të mëdha të qytezës së vetme bregdetare të Bosnjës, Neum.

Në anën tjetër, Kroacia fitoi disa pikë në Bosnjë pasi mbështeti me forcë dëshirën e Sarajevës për të marrë statusin e vendit kandidat për anëtarësim dhe pasi presidentja kroate deklaroi se vendi i saj nuk i mbështeste dëshirat e disa kroatëve të Bosnjës për krijimin e një entiteti federativ të veçantë për këtë popullsi në Bosnjë.

Megjithatë, duke parë tendencat aktuale politike në Kroaci dhe orientimin më nacionalist të qeverisë së re, disa zyrtarë kanë frikë se ky pozicion mund të ndryshojë në të ardhmen.

Nëse ndodh kjo, tensionet shtesë në “rajon” dhe “fqinjësi” ka gjasa do të vijnë. /Reporter.al/

Vendimi ndaj Vojisllav Sheshelit më 31 mars

Gjykata Penale Ndërkombëtare për krimet në ish-Jugosllavi do të japë vendimin e saj kundër udhëheqësit radikal serb Vojisllav Sheshel më 31 mars në mungesë të tij, pasi ai ka refuzuar të kthehet në Hagë. Vojisllav Sheshel vuan nga kanceri në mëlçi dhe për këtë arsye në vitin 2014 gjykata e lejoi atë të kthehej në Serbi. Shesheli akuzohet për nxitje të vrasjeve gjatë luftërave të viteve 1990 në ish-Jugosllavi.

Gjykata e OKB-së për krimet e luftës në ish-Jugosllavi do të japë vendimin e saj më 31 mars mbi rolin e politikanit ultra-nacionalist të Serbisë Vojisllav Sheshelj të akuzuar për nxitjen e luftërave të viteve 1990 në Ballkan.

“Shkoj në Hagë për të përfaqësuar më shumë se 10 mijë vullnetarë të Partisë Radikale Serbe, të gjithë heronj serbë dhe luftëtarë të lirisë”, do të shprehej Vojsllav Shesheli para se të shkonte në Hagë.

Ai ka qenë në paraburgim që nga dorëzimi i tij në vitin 2003 në gjykatën e OKB-sëpër krimet e luftës në ish-Jugosllavi.

Vojisllav Sheshel, i cili vuan nga kanceri i mëlçisë, u lirua për arsye shëndetësore në nëntor të vitit 2014.

Por katër muaj më vonë gjykatësit në Hagë kërkuan kthimin e tij në Hagë, duke thënë se ai kishte shkelur kushtet e lirimit. Shesheli u kishte deklaruar përkrahësve se ai nuk do të kthehej kurrë më në Hagë.

Muajin e kaluar, ish-udhëheqësi i partisë nacionaliste e sfidoi gjykatën duke i vënë zjarrin flamujve të BE-së dhe NATO-s para një gjykate në Beograd.

Por Gjykata e Hagës, nuk këmbënguli për ta detyruar atë të kthehej në Hagë, në bazë të arsyetimit se ai kishte nevojë për trajtim mjekësor, duke shmangur kështu mundësinë e një përplasjeje mes Bashkimit Evropian dhe Serbisë, nëse vendi nuk do të arrinte ta zbatonte urdhërin e gjykatës.

Javën e kaluar, Gjykata Penale Ndërkombëtare dënoi me 40 vjet burg, ish udhëheqësin e serbëve të Bosnjës, Radovan Karaxhiç nën akuzat për gjenocid lidhdur me masakrën e vitit 1995 në Srebrenicë.

Në Beograd, rreth 5,000 përkrahës të Partisë Radikale Serbe protestuan kundër dënimit të Karaxhiçit.

Vojisllave Shesheli u tha protestuesve se vendimi mbi Karaxhiçin ishte “një vendimi kundër të gjithë kombit serb”.

Konstitucionalistja serbe Vesna Rakic Vodinelic: Beogradi ta njohë Prishtinën me modelin e dy Gjermanive

Voal – Vesna Rakic Vodinelic, një nga pedagoget më të njohura të së drejtës kushtetuese në Serbi, propozon që Serbia të marrë modelin e ish-Gjermanisë Perëndimore në Kushtetutë në lidhje me Kosovën. Pra ta njohë si shtet i pavarur, por në Kushtetutë të ketë cilësimin për njohjen e së drejtës së rikthimit

Pas Luftës së Dytë Botërore, Gjermania u nda në dy shtete: Gjermania Perëndimore dhe ajo Lindore që ishin me kampe të kundërta politike dhe funksiononin si njësi territoriale të veçanta. Ata e njohën njëri-tjetrin dhe u bashkuan me vullnet të përbashkët.

Në një intervistë për gazetën e Beogradit, Danas, Rakic tha: “Nëse marrim parasysh të ashtuquajturat marrëveshje të Brukselit, pavarësisht nga qëndrimet e mija politike personale që Kosova funksionon si shtet i pavarur, edhe pse vendi është i papranuar ndërkombëtarisht, unë besoj se në preambulën kushtetuese, në vend të zgjidhjeve të sotme që nuk korrespondojnë me realitetin, duhet të lexohet si një zgjidhje të kushtetutës (Grundgesetz), pikërisht ajo që ka pasur Gjermania ish-perëndimore. Në fakt, unë nuk mendoj se për Kosovën nuk duhet të kemi pretendime territoriale por historike dhe kulturore për kishat dhe manastiret.

Ndërkaq, duke iu referuar Kushtetutës aktuale, profesoresha Rakic thotë se ajo shkel të drejtat e kombësive të tjera.

“Para së gjithash, Serbia duhet të përcaktohet si një republikë e të gjithë atyre që jetojnë në të, ndryshe nga dispozita të Kushtetutës në të cilën është përcaktuar si një shtet i popullit serb dhe të tjerëve që jetojnë në të. Kjo është e rëndësishme sepse, në bazë të Konventës Evropiane për Mbrojtjen e të Drejtave të Njeriut, të gjitha të drejtat e njeriut të renditura në Konventën e OKB-së, gëzojnë në mënyrë të barabartë të gjitha të drejtat, pavarësisht nga përkatësia etnike, fesë, gjuhës ose karakteristikave të tjera personale, dhe kjo duhet mbrojtur nga i gjithë sistemi i dispozitave kushtetuese”, tha Rakiq.

Ajo propozon që pakicat të kenë të drejtë të zgjidhen me proporcion në organet e larta kushtetuese si Gjykata e Lartë, ajo Kushtetuese etj.

Plani i Serbisë – ‘kolonizimi’ i Kosovës me mbi 20 mijë serbë

Plani i Zyrës për Kosovën në Qeverinë e Serbisë, sipas zëvendësdrejtorit të saj, Dushan Kozarev, parashikon ndërtimin e 10 deri në 15 vendbanime të reja në veri dhe në jug, në të cilat do të vendosen mbi 20 mijë serbë nga Serbia. Një vendbanim i tillë ka nisur në Zveçan, fare pranë lagjes “Kroi i Vitakut”. Opozita këtë e quan kolonizim të Kosovës

Qeveria e Serbisë ka planifikuar t’i zhvendosë në Kosovë mbi 20 mijë serbë nga Serbia nëpërmes një projekti për ndërtimin e vendbanimeve të reja, në veri të Kosovës, por edhe në jug të vendit.

Dushan Kozarev, zëvendësdrejtor i Zyrës për Kosovën në Qeverinë e Serbisë, u ka thënë medieve serbe se është mbajtur takimi i parë i grupit rajonal që ka marrë iniciativën për zgjidhjen e përhershme të personave të zhvendosur nga Kosova, ku është biseduar për format dhe mënyrën e kthimit të serbëve në Kosovë, të cilët janë zhvendosur në pjesë të ndryshme të Serbisë.

Sipas Kozarevit, mënyra e deritashme e kthimit të serbëve në Kosovë nuk ka arritur efektet e dëshiruara.

“Plani ynë është që në të ardhmen të organizohet kthimi nëpërmes ndërtimit të vendbanimeve, ndërsa e para do të jetë ‘Lugina e Diellit’, që do të ndërtohet në Zveçan, në veri të Kosovës. Do t’i ndërtojmë vendbanimet në gjithë Kosovën dhe të shohim se a mund të kthehen prej 1 mijë deri 1500 njerëz në secilin vendbanim dhe që aty të jetojnë me dinjitet. Kjo duhet të zbatohet edhe në 15 vende të tjera në Kosovë. Të shohim se me çfarë fondesh do të mundë t’i ndërtojmë vendbanimet”, ka thënë Kozarev

Beogradi: Për autostradën Nish-Prishtinë-Durrës jemi në bisedime me Tiranën

Pos autostradës, është planifikuar që Serbi e Shqipëria të lidhen edhe përmes hekurudhës nga Kraleva përmes Prishtinës deri në Tiranë

Autostrada nga Nishi nëpër Prishtinë për në Durrës, për të cilën kanë biseduar disa herë kryeministri i Serbisë dhe ai i Shqipërisë, do të duhej të ishte një investim jo vetëm për Serbinë por edhe për gjithë rajonin e Ballkanit Perëndimor.

Sipas vlerësimeve të para investimi do të jetë me vlerë rreth një miliard euro e një pjesë e mjeteve do të duhej siguruar nga fondet evropiane, transmeton Koha.net. RTS thotë se kjo arterie do të duhej të rigjallëronte dhe të përforconte ekonominë e Serbisë Jugore.

Autostrada nga Nishi deri në Prokuple e Kurshumli te Merdari është e gjatë 120 kilometra.

Segmenti i ri përmes Durrësit e Vlorës do të lidhet me Adriatikun përmes Korridorit 10 nga lindja,veriu dhe jugu i Evropës por edhe me korridorin 4 që shpie nga Bullgaria e Rumania

Lajmet për ndërtimin e kësaj autostrade i ka gëzuar banorët e kësaj ane të cilët thonë se ajo do të hapë tregje të reja për ta.

“Ne tashmë po bisedojmë me disa firma nga Shqipëria. Rruga do ta përshpejtojë transportin e mallrave deri atje”, thotë pronari i frigoriferëve për ruajtjen e perimeve në Prokuple Sasha Bogdanoviq.

Në Kurshumli thonë se kjo rrugë do të sjellë investime të reja dhe atje mendojnë se ajo është shpresë për këtë rajon në kufi me Kosovën.

“Kurshumlia pothuaj ka mbetur pa banorë për shkak të gjendjes ekonomike. Presim që investitorët e rinj të vijnë në këtë anë pas ndërtimit të autostradës”, thotë kryetar i komunës së Kurshumlisë Radolub Vidiq.

Nga Nishi deri në Durrës autostrada do të jetë e gjatë 384 kilometra.

Pos autostradës, është planifikuar që Serbi e Shqipëria të lidhen edhe përmes hekurudhës nga Kraleva përmes Prishtinës deri në Tiranë.

Beograd, mijëra marshojnë kundër NATO-s

Në Beograd, mijëra njerëz marshuan të dielën kundër NATO-s dhe Perëndimit, duke mbajtur parulla që lëvdonin presidentin rus Vladimir Putin.

Protestuesit dënuan një marrëveshje të qeverisë për marrëdhënie më të ngushta me NATO-n dhe që i lejon trupat e KFOR-it të kalojnë pa pengesa kufirin me Serbinë.

Marshimi u organizua me rastin e 17-vjetorit të fushatës ajrore të NATO-s kundër Serbisë, si rrjedhojë e shtypjes së përgjakshme serbe kundër shqiptarëve të Kosovës në vitin 1999.

Protestuesit, të lidhur me grupe të ekstremit të djathtë mbanin parulla pro-ruse dhe u shprehën kundër pranimit të Serbisë në Bashkimin Evropian dhe në NATO.

Mirko Tepavac: Në pozitë më fatkeqe ka qenë populli shqiptar në Kosovë se sa ai serb

Voal – Në librin e Aleksandar Nenadović “Mirko Tepavac – sećanja i komentari” – 1988, kushtuar Mirko Tepavac, (1922-2014), politikan dhe diplomat serb, botues i gazetës serbe Politika, drejtor i Radio Beogradit, ambasador në Hungari, Ministër i jashtëm i Jugosllavisë dhe President i Lëvizjes Europiane serbe , pyetjes se a është vërtetë aq e rëndë pozita e serbëve dhe e malazezëve në Kosovë, apo vlerësimet e tilla janë të motivuara nga synimi për dramatizimin (jo vetëm Qosiq) të “çështjes së pazgjidhur serbe”, Mirko Tepavac ishte përgjigjur: “Në pozitë më fatkeqe, edhe atëherë, edhe më vonë, më tepër ka qenë populli shqiptar se sa ai serb në Kosovë. Edhe atëherë edhe më vonë, ka qenë pakrahasimisht më rëndë të jesh shqiptar në Serbi, sesa serb në Kosovë”.

2016-03-27_12-16-35

Beograd, në kujtim të shqiptarëve të vrarë në Kosovë

Pjesëtarë të dy organizatave joqeveritare në Serbi, Nisma e të Rinjve për të Drejtat e Njeriut dhe Nisma Ime, ecën në këmbë të shtunën nga qendra e Beogradit deri Batajanicë, zonë ku ndodhen poligonet e stërvitjes së forcave serbe, për të shënuar përvjetorin e masakrës në Suharekë të Kosovës.

Parakalimi prej 20 kilometrash u zhvillua nën moton “Tepër të rinj për të kujtuar; të vendosur për të mos harruar”.

Më 26 mars të vitit 1999, dy ditë pas fillimit të fushatës së bombardimeve të NATO-s kundër Serbisë, 48 anëtarë të familjes Berisha në Suharekë u vranë nga forcat serbe. Në mesin e të vrarëve, 14 ishin nën moshën 15 vjecare, përfshirë edhe dy foshnje.

Trupat e tyre më pas ishin dërguar në Prizren për t’u varrosur në dy fshatra të kësaj komune dhe më pas ishin zhvarrosur për t’u dërguar në Serbi në përpjekje për të fshehur gjurmët e mizorive.

Në vitin 2001, në Batajnicë afër Beogradit është zbuluar një varrezë masive me trupat e rreth 800 shqiptarëve të Kosovës, përfshirë edhe një pjesë të të vrarëve në Suharekë. Tre nga anëtarët e familjes kanë mbijetuar, ndërsa disa nga trupat e të vrarëve ende nuk janë gjetur.

Organizatorët e parakalimit të së shtunës thanë se duan të vënë në pah rolin e organeve shtetërore në krimet në Kosovë dhe të protestojnë kundër politikës zyrtare që “rehabiliton përgjegjësit”.

“Është shumë afër qendrës së Beogradit dhe është e pabesueshme që për të dihet shumë pak”, tha Jana Vujiq nga Nisma e të Rinjve për të Drejtat e Njeriut.

Trupat e shqiptarëve të vrarë gjatë luftës në Kosovë janë gjetur edhe në tri vende të tjera në Serbi, Peruçac, Petrovo Selo dhe Rudnicë të Rashkës në Serbinë Jugore.

Edhe 17 vjet pas luftës, ende nuk dihet për fatin e 1 mijë e 666 personave, pjesa më e madhe e të cilëve, shqiptarë të Kosovës.

Karaxhiçi: Ndjehem për mrekulli dhe me ndërgjegje të pastër

Radovan Karaxhiçi, tashmë i dënuar për gjenocid nga Tribunali i Hagës si përgjegjës për vrasjen e mijëra boshnjakëve, ka thënë për ‘Kurir’ se ndjehet me ndërgjegje të pastër.

Kryetari i parë i serbëve të Bosnjës, të asaj që quhet Republika Srpska, ka thënë se ndjehet me ndërgjegje të pastër dhe ka lajmëruar se do ta apelojë vendimin.

Ai u ka uruar serbëve që të punojnë së bashku për të ardhmen e tyre, transmeton Koha.net.

“Ndjehem për mrekulli, ndërgjegjja ime është e qetë dhe unë jam i bindur se drejtësia do të mbizotërojë. Nuk jam viktimë e vetme, dhe nuk ndjehem viktimë”, ka thënë Karaxhiç.

Vuçiçi me patriarkun Irinej diskutuan verdiktin e Karaxhiçit

“Serbia nuk mund të lejojë kurrfarë kërcënimi për ekzistimin dhe mbetjen e RS, në përputhje me këto dhe ligjet që na obligojnë”, tha kryeministri serb Vuçiç

BEOGRAD – Kryeministri serb Aleksandër Vuçiç dhe Patriarku Irinej i Kishës Ortodokse Serbe në Patriarkanën, pas takimit të sotëm, deklaruan se kanë biseduar në lidhje me atë që ka të bëjë me popullin serb, unitetin e tij dhe pasojat politike dhe ligjore të gjykimit të Radovan Karaxhiçit në Tribunalin e Hagës.

“Biseduam edhe rreth një teme shumë bashkëkohore, çështja e Republikës Sërpska. Ai është populli ynë, po mbahen marrëdhënie të mira me Republikën Sërpska dhe ne do ti vazhdojmë këto edhe si kishës dhe si shtet. Në komunitet duhet të ndihmojnë njëri-tjetrin, për të ruajtur arritjet e popullit serb, të ruajnë entitetin e tyre, kulturën, emrin, dhe të ruajnë veten si popull serb. Ky është një obligim i shenjtë si për kishën ashtu edhe për shtetin. Është duke u punuar rreth saj dhe do të punohet në të ardhmen”, tha Patriarku.

Kryeministri serb Vuçiç ka thënë se një nga temat ishin edhe marrëdhëniet mes Serbisë dhe entitetit të BeH-së, Republikës Sërpska, si dhe pasojat politike dhe ligjore të gjykimit të shkallës së parë të shqiptuar ndaj ish-president të Republikës Sërpska, Radovan Karaxhiç në Tribunalin e Hagës, i cili u dënua me 40 vjet burg për gjenocid, krime kundër njerëzimit dhe shkelje të ligjeve dhe zakoneve të luftës.

“Sa i përket Rebuplikës Sërpska; ne duhet të respektojnë Marrëveshjen e Dejtonit, integritetin e BeH-së, por edhe integritetin e Republikës Sërpska, dhe Serbia nuk mund të lejojë kurrfarë kërcënimi për ekzistimin dhe mbetjen e RS, në përputhje me këto dhe ligjet që na obligojnë, si dhe në përputhje me Marrëveshjen e Dejtonit. Ne ashtu do të veprojmë edhe në të ardhmen”, tha Vuçiç

Seanca e jashtëzakonshme e qeverisë serbe, e planifikuar në ora 11:30, në të cilën, sipas informacioneve jozyrtare do të diskutohej rreth gjykimit të Radovan Karaxhiç, për shkak të takimit me patriarkun Irinej, që zgjati një orë e gjysëm, seanca ishte shtyrë për në ora 12:30.

Gjykimi i dy gazetarëve në Turqi

Në Turqi, dy gazetarë dolën sot në gjyq nën akuzat se kanë nxjerrë sekrete shtetërore dhe kanë ndihmuar një organizatë terroriste me raportimet e tyre për kontrabandën e dyshuar të armëve në Siri.

Xhan Dundar dhe Erdem Gyl të gazetës Xhumhuriyet mund të dënohen me burgim të përjetshëm nëse shpallen fajtorë. Ata janë akuzuar për publikimin e imazheve që datojnë në janar të vitit 2014 të kamionëve me destinacion Sirinë për të cilat gazeta thotë se provojnë që Turqia ka kontrabanduar armë në Siri.

Turqia thotë se gazetarët kanë ndihmuar një lëvizje islamike të kryesuar nga kleriku që jeton në SHBA, Fethullah Gulen. Turqia ka një rekord të dobët të të drejtave të njeriut dhe një histori akuzash ndaj gazetarëve.

Organizatat për lirinë e medias i kanë bërë presion Ankarasë të tërheqë akuzat kundër gazetarëve Dundar dhe Gyl.

Muzeu serb me skulpturë dylli të Putinit

Një muze në Serbi ka vendosur për ekspozim një figurë nga dylli të presidentit rus, Vladimir Putin.

Figura është paraqitur nga Muzeu i Figurave nga Dylli i Jagodinës në Serbi, përpara një mase prej mijëra njerëzish.

Ministri i Jashtëm i Serbisë, Ivica Daçiq e ka lavdëruar Putinin dhe e ka quajtur Rusinë mike të vjetër të Serbisë, si dhe një “partnere të fuqishme politike”.

Putini është i huaji i parë që paraqitet në këtë muze. Sipas disa rrjeteve televizive vendore, figura e tij nga dylli ka tërhequr një masë prej rreth 2500 njerëzisht, kurreshtarë për ta parë këtë vepër.

Daçiqi tha se modeli i Putinit, i veshur me një kostum të zi, këmishë të bardhë dhe krevatë të kuqe, është “vepra artistike më e bukur e muzeut dhë që i ngjan më shumë origjinalit”.

Në këtë muze janë paraqitur më herët edhe 30 figura të tjera, si ajo e Sllobodan Millosheviqit dhe Zoran Xhinxhiqit.

Erdogani thotë se Turqia e kishte deportuar njërin nga sulmuesit e Brukselit

Presidenti turk, Recep Tayyip Erdogan thotë se një nga sulmuesit e Brukselit ishte kapur në qershor në Turqi dhe se ai ishte deportuar në Belgjikë.

Erdogan tha sot se autoritetet belge e kishin liruar të dyshuarin, pavarësisht paralajmërimeve nga ana e Turqisë se ai ishte “luftëtar i huaj”.

Presidenti turk nuk e përmendi emrin e sulmuesit, por tha se ai person ishte arrestuar në kufirin e Turqisë me Sirinë, në Gaziantep, dhe se Turqia zyrtarisht i kishte njoftuar autoritetet belge për deportimin e tij më 14 korrik.

Erdogan tha se “përkundër paralajmërimeve tona se ai person ishte luftëtar i huaj terrorist, Belgjika nuk kishte gjetur asnjë lidhje të tij me terrorizmin”.

Beograd – E aktivizoi bombën brenda furre dhe u vra

Autoritetet e Serbisë thonë se një person sot e ka aktivizuar një granatë dore brenda një furre në qendër të Beogradit dhe është vrarë.

Nuk është raportuar për viktima të tjera nga ky rast.

Dëshmitarët thanë se ky person i kishte detyruar të gjithë njerëzit që ishin brenda furrës, të largoheshin nga ajo dhe pastaj e ka aktivizuar granatën.

Policia tha se po zhvillon hetime për motivet e këtij sulmi me bombë.

Sipas mediave lokale, pronar i kësaj furre është Bratisllav Petkoviq, ish-ministër i kulturës dhe ish-këshilltar i presidentit, Tomisllav Nikolliq.

Faqja 72 prej 84« Fillimi ‹ Prapa 68 69 70 717273 74 75 76 Para ›Fundi »

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL