Prokuroria Speciale po merr në pyetje të arrestuarit nga Serbia në territorin e Malit të Zi.

Prokuroria ka bërë me dije se të arrestuarit, përveç tjerash, dyshohen se “kanë planifikuar që ta arrestojnë kryeministrin e Malit të Zi”.

“Ka dyshime të bazuara se në fillim të muajit tetor në Serbi dhe Mal të Zi është krijuar organizata kriminale, me qëllim të ndikimit në pushtetin ekzekutiv dhe atë të drejtësisë në Mal të Zi”, thuhet në kumtesën e Prokurorisë Speciale, të cilën e transmeton Televizioni shtetëror i Malit të Zi.

Prokuroria thekson se ekiston “dyshimi i bazuar se organizata kishte planifikuar që në periudhën e publikimit të rezultateve të zgjehdjeve parlamentare, me përdorim të armëve, të sulmojnë qytetarët e mbledhur përpara Kuvendit të Malit të Zi dhe pjesëtarët e Drejtorisë së policisë, dhe pastaj të marrin hapësirat e Kuvendit, me qëllim të deklarimit të fitores zgjedhore të partive të caktuara politike”.

Dyshohet gjithashtu se, “plani i organizatës kriminale ishte që të arrestonte kryeministrin e Malit të Zi”, thuhet në kumtesë.

Prokuroria si organizator të grupit e ka përcaktuar B.D., për të cilin thotë se “të shtunën në orët e hershme të mëngjesit ka hyrë në Mal të Zi me qëllim të realizimit të planit criminal dhe të komandimit me personat e armatosur me qëllim të marrjes së Kuvendit të Malit të Zi dhe të institucioneve të tjera shtetërore”.

“Anëtarët e organizatës kriminale kanë marrë udhëzime që të shpërndajnë paraprakisht armët me qëllim të realizimit të mëtejmë të planit criminal”, thuhet në kumtesën e Prokurorisë Speciale.

“Shtetasit serbë u arrestuan kur kanë dashur që të kontrollojnë deponë e fshehur dhe të përgatitur paraprakisht si dhe armatimin dhe municionon”, thuhet në kumtesë.

Mali i Zi: Merren në pyetje të arrestuarit nga Serbia

Në Prokurorinë Speciale ka filluar marrja në pyetje e personave nga Serbia të arrestuar në territorin e Malit të Zi.

Më heret, drejtori i Drejtorisë së Policisë së Malit të Zi, Slavko Stojanoviq, ka konfirmuar arrestimin e 20 personave nga Serbia, ndërkohë që për një tjetër policia është në kërkim me dyshimin se “në territorin e Malit të Zi kanë kryer vepër penale të krijimit të organizatës kriminale” dhe vepër penale të “terrorizmit”.

“Është e saktë se pjesëtarët e Drejtorisë së Policisë, gjatë natës së kaluar, në bashkëpunim me Agjencinë për sigurinë kombëtare dhe në koordinim dhe urdhër të Prokurorisë Speciale shtetërore, duke vepruar në përputhje me shënimet operative dhe të intelegjencës të cilat i ka poseduar policia, kanë arrestuar 20 persona, shtetas të Republikës së Serbisë, ndërkohë që një person tjetër, gjithashtu shtetas i Republikës së Serbisë, është në kërkim”, thuhet në një kumtesë të policisë.

Në kumtesë gjithashtu thuhet se “ata, siç dyshohet, kanë hyrë në Mal të Zi dhe kanë pasur për qëllim që fillimisht të marrin pushkë automatike dhe pastaj që sonte të kryejnë sulme në institucionet e shtetit, policinë dhe pjesëtarët e organeve shtetërore, duke mos përjashtuar edhe mundësinë e sulmeve mbi zyrtarët e lartë shtetërorë”.

“Drejtoria e policisë në lidhje me këtë zhvillim, në përputhje me procedurën, i ka dorëzuar prokurorisë informatën e planifikuar për opinion”, thuhet në kumtesën e Drejtorisë së Policisë.

Dyshime për arrestim të ‘grupit paramilitar’ në Mal të Zi

Gjatë ditës, ndërkaq, një numër i mediave në Mal të Zi publikoi lajmin se, të shtunën në mbrëmje, policia malazeze ka arrestuar dhjetëra pjesëtarë të një grupi kriminal paraushtarak, që dyshohet se ka planifikuar, siç thuhet, “shkaktimin e trazirave” dhe “akte të dyshuara terroriste si dhe konflikte të armatosura”.

Informata nuk është konfirmuar zyrtarisht nga Drejtoria e Policisë së Malit të Zi dhe as nga institucionet e tjera shtetërore.

Presidenti i Malit të Zi, Filip Vujanoviq dhe kryeministri, Milo Gjukanoviq, nuk e kanë pohuar por as edhe mohuar lajmin, në deklaratat e tyre të dhëna, por kanë thënë se ‘presin që institucionet shtetërore të deklarohen publikisht’.

Sipas informatës së publikuar, por të pakonfirmuar, në krye të grupit është ish shefi i xhandarmerisë së Serbisë, Bratislav Bata Dikiq.

Gjukanoviq: Nuk pres incidente

Kryemninistri i Mali të Zi, Milo Gjukanoviq, ka deklaruar se për arrestimin e Bratislav Dikiqit ka po aq njohuri sa janë publikuar në media, dhe pret që zgjedhjet parlamentare të kalojnë në një atmosferë të qetë dhe të rregullt.

“Kam informata të cilat i keni edhe ju, pra ato që janë publikuar në media. Në kontaktet që kam pasur me organet shtetërore kam marrë sigurimin se është në përgatitje e sipër deklarata për shtyp, me të cilën od t’i drejtohen organet shtetërore opinionit publik në një fazë përfundimtare. Pres që së shpejti të marrim informatën e plotë rreth kësaj”, tha Gjuknoviq..

Ndërkohë, kryeministri i Serbisë, Aleksandar Vuçiq, tha të dielën se nuk ka asnjë shënim për arrestimin e një grupi paraushtarak krininal në Mal të Zi.

Ministri i brendshëm i Serbisë, Nebojsha Stefanoviq, ka deklaruar se informatën për arrestimin e supozuar të një grupe krimninale paraushtarake, e ka parë në media.

“Unë e kam parë në media këtë informatë. Përvec kësaj që kam parë nuk kam informacione më shumë”, tha Stefanoviq për gazetarët në Bujanovc, transmeton Radio Televizioni i Serbisë.

Stefanoviq tha se duhet pritur që prokuroria në Mal të Zi të publikojë informatën për supozimet e publikuara në media.(REL)

Në Mal të Zi të dielën po mbahen zgjedhjet parlamentare në të cilat 17 lista zgjedhore me 34 parti politike konkurrojnë për 81 vende në parlament. Zgjedhjeve u parapriu një fushatë tejet e ashpër midis Partisë Demokratike Socialiste të kryeministrit Milo Gjukanoviç dhe të një grupi të partive opozitare pro-ruse, të cilat janë kundër anëtarësimit në NATO.

Partia në pushtet po përballet më sprovën më të rëndë në 27 vjet dhe në zgjedhje shpreson që zotimi i saj për ta anëtarësuar vendin në NATO dhe për ta afruar me Bashkimin Evropian, do të fitojë mbi pretendimet e opozitës për korrupsion dhe nepotizëm.

NATO=ja i bëri ftesë për anëtarësim shteti të vogël Ballkanik me rreth 620 mijë banorë .

Kryeministri Milo Gjukanoviç, 54 vjeçar, i paraqiti votimet si zgjedhje ndërmjet integrimeve perëndimore nëse fiton partia e tij ose shndërrimit të vendit në “koloni ruse”, nëse fiton opozita.

Ai akuzoi opozitën se është paguar nga rusët, një pretendimi që është hedhur poshtë nga opozita por edhe Rusia.

Opozita thotë se pohimet e tilla të kryeministrit janë përpjekje për të mbuluar kulturën e favorizimeve që zoti Gjukanoviç ka lejuar të lulëzojë gjatë dominimit prej një çerek shekulli. za

Turqia është e vendosur të marrë pjesë në një operacion të planifikuar nga forcat e koalicionit për të dëbuar grupin militant Shteti Islamik nga qyteti Mosul i Irakut.

Presidenti Recep Tayyip Erdogan tha të premten se vendi i tij do të zbatojë një “plan B” nëse nuk përfshihet.

“Jemi të vendosur për t’iu bashkuar forcave të koalicionit në Irak, për të siguruar unitetin e Irakut. Nëse forcat e koalicionit nuk e duan Turqinë, ne do të zbatojmë planin B. Nëse ai nuk funksionon, do të zbatojmë planin C”, tha Erdogan.

Deklarata e tij vjen në kohën e tensioneve të larta midis Turqisë dhe Irakut.

Ushtarët turq trajnojnë njësitë myslimane sunite dhe forcat Peshmerga kurde për luftë kundër Shtetit Islamik.

Bagdadi kundërshton praninë e ushtrisë turke në veri të Irakut.

Kryeministri i Irakut, Haider al-Abadi, ka thënë se Turqia rrezikon të nxisë luftë rajonale.

Mosuli, qytet i rreth 1.5 milion banorëve, ka qenë qendra e kalifatit të vetëshpallur nga Shteti Islamik në Irak, qysh në vitin 2014.

Forcat e koalicionit, të udhëhequra nga SHBA-ja, pritet të nisin ofensivën për rikthimin e tij brenda këtij muaji.

Këshilli i Ministrave të Komunitetit të Energjisë i caktoi afat Serbisë deri më 31 dhjetor të këtij vitit që të përmbushë detyrimet që kishte marrë përsipër në bisedimet për normalizimin e marrëdhënieve me Kosovën në fushën e energjisë.

Afati u përcaktua në takimin e 14-të Këshillit të Ministrave të Komunitetit të Energjisë që u mbajt në Sarajevë të Bosnje e Hercegovinës.

Gjatë punimeve të Këshillit, përfaqësuesit e Shqipërisë dhe Kosovës ngritën shqetësimin e për bllokadën që i ka bërë Serbisë vënies në punë të linjës së interkonjeksionit mes dy vendeve.

Në qershor të këtij viti, Kosova dhe Shqipëria përuruan linjën 400 kilovatëshe ndërmjet tyre, me një gjatësi totale prej 241.1 kilometrash. Autoritetet e të dyja vendeve e cilësuan atëbotë si një ‘autostradë energjetike” dhe një vepër të madhe të një tregu të përbashkët të energjisë.

Por, funksionimi i linjës kërkon që sistemi i transmetimit të energjisë në Kosovë (KOSTT) të njihet nga rrjeti evropian i transmetimeve (ENSO-E), përkatësisht të njihet ndarja e sistemit të transmetimit të Kosovës nga sistemi i transmetimit të Serbisë, që ishte pjesë e bisedimeve të ndërmjetësuara nga Bashkimi Evropian.

Këshilli i Ministrave të Komunitetit të Energjisë vendosi që t’i jap Serbisë afat deri më 31 dhjetor të këtij viti për të zgjidhur bllokadën që lidhet me pavarësimin e sistemit të transmetimit të energjisë në Kosovë.

Në konferencën e Sarajevës është miratuar edhe një listë e projekteve me interes për vendet anëtare të Komunitetit të Energjisë, në të cilën përfshihen projekte me interes strategjik si gazsjellësi Shqipëri-Kosovë dhe linja 400 kV Shqipëri-Maqedoni.

Komuniteti i Energjisë me seli në Vjenë është themeluar në tetor të vitit 2005. Që nga 1 korriku i vitit 2013, palë në traktat janë Bashkimi Evropian dhe Shqipëria, Bosnja dhe Hercegovina, Kroacia, Kosova, Maqedonia, Moldavia, Mali i Zi, Serbia dhe Ukraina. Qëllimi kryesor i organizatës është zgjerimi i tregu të energjisë së Bashkimit Evropian në vendet e Evropës Juglindore dhe më tej, në bazë të një kuadri ligjërisht të detyrueshëm.

Drejtori rajonal i Policisë së Kosovës për rajonin e Mitrovicës, Nehat Thaçi, është dërguar nga burgu i Nishit në Beograd, ku është marrë në pyetje në Gjykatën Speciale.

Avokati i tij, Sead Spahoviq, i tha Radios Evropa e Lirë se Thaçi i ka mohuar të gjitha akuzat që e ngarkojnë atë me veprën e ‘terrorizmit’.

“Fillimisht e kanë pyetur nëse është anëtar i UÇK-së. Ai e ka mohuar dhe i ka thënë prokurorit se është një listë e anëtarëve të UÇK-së dhe se lehtë mund të shihet se emri i tij nuk figuron aty, dhe kjo është çështja thelbësore me të cilën ngarkohet. Meqë për këtë nuk ka dëshmi, ai menjëherë do të duhej të lirohej”, tha Spahoviq.

Ai thotë se kërkesa për heqjen e masës së paraburgimit për klientin e tij do t’i dorëzohet të martën gjykatësit, dhe shtoi se Thaçi është marrë në pyetje pas 15 ditë të arrestimit të tij.

“Nehat Thaçi është burgosur padrejtësisht. Gjykata në vendimin e saj pas arrestimit thotë se ai ka refuzuar që t’i përgjigjet thirrjeve të gjykatës, se ka ikur, se është fshehur dhe kështu me radhë. Por, ne sot jemi vërtetuar se në shkresa nuk ekziston asnjë dëshmi se ai është thirrur ndonjëherë në mënyrë të rregullt nga cilido organ i Republikës së Serbisë. Me këtë as që ka qenë ë mundur t’i vihet masa e paraburgimit”, tha Spahoviq.

Policia serbe e arrestoi Nehat Thaçin më 29 shtator në vendkalimin kufitar në Konçul dhe me vendimin e një gjykate të lartë në Nish iu shqiptua masa e paraburgimit prej 20 ditësh.

Arrestimi i Thacit u bë mbi bazën e një fletarresti të lëshuar nga organet serbe për, siç thuhet, kryerjen e veprës penale të ‘terrorizmit’. (REL)

Në bazë të shënimeve të autoriteteve në Republikën Serbe, referendumi në të cilin qytetarët janë deklaruar në pyetjen: “A e përkrahni që 9 janari të shënohet dhe kremtohet si Ditë e Republikës Serbe”, ka patur sukses.

Në bazë të të dhënave nga 30.76 vendvotimeve të numëruara, me ‘Po”, në pyetjen e referendumit, i janë përgjigjur 99.80 për qind e votuesve. \

Komisioni Republikan ka deklaruar se pjesëmarrja në referendum ka qenë ndërmjet 56 dhe 60 për qind

Është paralajmëruar që në ndryshimet e ardhshme të Ligjit për festat në Republikën Serbe qytetarët që nuk duan nuk kanë nevojë që ta festojnë 9 janarin si Ditë të Republikës Serbe.

Më herët Gjykata Kushtetuese e Bosnjë Hercegovinës pati marrë vendim për vendosjen e masës së përkohshme me të cilën ndalohet mbajtja e referendumit.

Në Republikën Serbe, janë mbyllur vendvotimet e referendumit për 9 janarin si ditën e këtij entiteti, të cilin e ka kontestuar si kundër kushtetues Gjykata Kushtetuese e Bosnjë dhe Hercegovinës.

Kryetari i Komisionit për mbajtjen e referendumit, Sinisha Karan, thotë se tashmë mund të thuhet se referendumi ishte i plotfuqishëm, marrë parasysh se deri në ora 17 dalja e qytetarëve në referendum ishte më e madhe se 50 për qind nga numri i përgjithshëm i të regjistruarve në listat e votuesve.

Deri në ora 17 në referendum kanë marrë pjesë 51.17 për qind e votuesve të regjistruar.

Me ligj është e paraparë që referendum është i plotfuqishëm nëse deklarohet më shumë se gjysma e shumicës së qytetarëve që kanë të drejtë vote dhe që janë të regjistruar në listë votuese.

Por përfaqësuesi i lartë në Bosnjë dhe Hercegovinë, Valentin Inzko, më herët ka deklaruar se askush nuk e konteston të drejtën e “Republikës Serbe që të shënoj ditën e saj, por duhet që njëkohësisht, vendimi i Gjykatës Kushtetuese të Bosnjë dhe Hercegovinës i nëntorit të vitit 2015, të zbatohet deri sa referendumi është i papranueshëm dhe nuk ka fuqinë kushtetuese dhe ligjore”.

Zyrtarët boshnjakë janë kundër referendumit, sepse konsiderojnë se është anti-Dayton dhe një akt kundër kushtetues.

Kundër referendumit janë edhe Këshilli Drejtues për zbatimin e paqes (PIC), Zyra e Përfaqësuesit të Lartë në Bosnjë dhe Hercegovinë, Ambasada e SHBA-së, Bashkimi Evropian dhe vendet fqinje Kroacia e Serbia.

Presidenti i Republikës Serbe, Milorad Dodik, tha se nuk “frikësohet nga sanksionet eventuale”.

Rriten tensionet ndërsa serbët e Bosnjës mbajnë referendum të ndaluar

Referendumi i së dielës ka çuar në debatin më të ashpër ndërmjet zyrtarëve myslimanë të Bosnjës dhe atyre serbë të Bosnjës, prej Marrëveshjes së Dejtonit në vitin 1995, të ndërmjetësuar nga Shtetet e Bashkuara.

Me këtë marrëveshje ishte krijuar Republika Serbe, si njëra nga dy entitetet përbërëse të Bosnjë Hercegovinës.

Në referendum është shtruar pyetja nëse dëshirohet që 9 janari të mbetet “Ditë e Shtetësisë”.

Në këtë datë është festa e Kishës Ortodokse Serbe dhe përvjetori i Deklaratës së ligjvënësve serbë të Bosnjës në vitin 1992, me të cilën ishte shpallur pavarësia nga Bosnja. Ky zhvillim e kishte shkaktuar luftën trevjeçare etnike në këtë vend.

Kritikët e referendumit thonë se ai i shton tensionet etnike dhe e forcon ndjenjën separatiste brenda këtij entiteti.

Joserbët, këtë datë e shohin si simbol të dëbimit të tyre nga territori i kontrolluar nga serbët e Bosnjës dhe si indikacion se Republika Serbe është vend ku do të jetojnë vetëm serbët.

Më 17 shtator, Gjykata Kushtetuese e Bosnjë Hercegovinës me seli në Sarajevë, e ka ndaluar referendumin, duke theksuar se festa e 9 janarit është ilegale dhe i diskriminon boshnjakët myslimanë dhe kroatët katolikë.

Dragan Llukaq, ministër i Brendshëm në Republikën Serbe dhe shef i komisionit zgjedhor, tha të dielën në një konferencë për shtyp në Banjallukë se, “çdo gjë ka shkuar mirë” dhe se nuk ka pasur raporte për incidente.

Ai theksoi se ka pasur mungesë të votuesve në hapësirat boshnjake të Republikës Serbe, dhe shtoi se më tepër se dhjetëra vendvotime as që janë hapur për votim.

Për këtë referendum më së tepërmi është angazhuar presidenti nacionalist i këtij entiteti, Millorad Dodik.

Kritikët e tij e akuzojnë atë se po përpiqet të krijojë kushte për referendumin e ardhshëm, me gjasë në vitin 2018, me pyetjen nëse Republika Serbe do të duhej të shkëputej nga Bosnjë e Hercegovina.

Një zhvillim i tillë, në mënyrë efektive, do të nënkuptonte përfundim të Marrëveshjes së Dejtonit, me të cilën pati përfunduar lufta në Bosnjë në periudhën 1992-95.

Raportohet se rezultatet e para të referendumit do të dihen gjatë natës.

Përgatiti: Fatmir Bujupi