Protestat e studentëve të pakënaqur, nën moton “Protestë kundër diktaturës”, janë mbajtur në Serbi për të gjashtën ditë me radhë, kurse atyre u janë bashkuar edhe Sindikatat ushtarake të Serbisë.

Protesta e studentëve kundër zgjedhjeve presidenciale po cilësohet nga mediat serbe si protesta më masive në historinë e kohëve të fundit.

Kësaj proteste i’u bashkua Sindikata e ushtrisë dhe Sindikata e policisë së Serbisë, duke kërkuar zgjedhje të reja dhe të ndershme presidenciale.

Turma e protestuesve me parulla “Protestë kundër diktaturës” marshuan rrugët e Beogradit ku sipas vlerësimeve ishin rreth 80.000 njerëz.

Në Serbi kanë filluar protestat e të rinjve që nga 4 prilli. Nuk ka organizatorë zyrtarë, por të rinjtë thonë se nuk do të ndalen deri sa “Ai nuk largohet!” Fjala është për presidentin e sapozgjedhur Aleksandar Vuçiç.

Në Greqi po bien dukshëm depozitat bankare – vetëm në shkurt nga vendi në krizë janë larguar rreth 750 milionë euro. Ekspertët thonë se aktualisht kemi ashpërsimin më të madh të kontrolleve financiare.

Bashkimi Evropian në sprovë

Organizata për të drejtat e njeriut me seli në Shtetet e Bashkuara, Freedom House, vlerëson se nga Hungaria dhe Polonia deri te kandidati për anëtarësim në BE, Serbia, ende nuk ka pasoja për politikanët dhe partitë që minojnë institucionet e pavarura të vendeve të tyre.

Pasiguria në lidhje me politikën e jashtme të SHBA-së do të thotë se BE-ja do të duhet të jetë më kategorike me shtetet e veta anëtare dhe ato kandidate për anëtarësim. Zgjerimi i BE-së drejt vendeve baltike, Evropën Qendrore dhe Lindore, dhe vendet në Ballkan, ka ndihmuar në përhapjen e demokracisë liberale në të gjithë kontinentin. Ky është ende mjeti më i mirë për përparimin e sundimit të ligjit dhe institucioneve të përgjegjshme në rajon.

Krahas telasheve tjera si vala e emigrimeve, thuhet në raport kriza e llogaridhënies në BE, pamundësia për të marrë masa disiplinore kur udhëheqësit e shteteve anëtare dhe atyre që aspirojnë të jenë anëtare shkelin rregullat, është jo më pak kërcënuese për të ardhmen e demokracisë.

Nga Hungaria dhe Polonia deri te kandidati për anëtarësim, Serbia, ende nuk ka pasoja për politikanët dhe partitë që minojnë institucionet e pavarura të vendeve të tyre. Pa llogaridhënie, populistët do të vazhdojnë të prishin bashkimin nga brenda dhe të shtyjnë përpara tregimet nacionaliste që kërcënojnë paqen në Evropë. BE-ja duhet të reformohet në një mënyrë që e lejon atë të reagojë shpejt dhe në mënyrë efektive për sulmet ndaj demokracisë.

Raporti vë në pah se rezultati i Serbisë është tani më i keqi ndonjëherë që nga viti 2003, pavarësisht nga përparimi në negociatat për anëtarësim në BE.

Në Mal të Zi dhe Serbi, dy vende të Ballkanit, që janë më afër në procesin e anëtarësimit, zgjedhjet problematike në vitin 2016, shfaqën paqëndrueshmëri të brendshme, si dhe një kuptim të përciptë të demokracisë zgjedhore.

Dita e zgjedhjeve në Mal të Zi paraqiti një mbyllje mbarëkombëtare të aplikacioneve të mesazheve në telefonat celularë dhe akuza nga autoritetet që nacionalistët serbë kishin komplotuar një grusht shteti. Që nga shkurti i vitit 2017, prokurorët po kërkonin arrestimin e dy udhëheqësve të opozitës për një komplot të dyshuar. Kryeministri prej disa kohësh i vendit, Milo Gjukanoviç, dha dorëheqje pas zgjedhjeve, por fjalët për kthimin e tij filluan menjëherë pasi ai u tërhoq. Një “dalje në pension” kaq jetëshkurtër e tij ngjason me dy largimet e mëhershme nga politika në vitin 2006 dhe 2010.

Serbia mbajti zgjedhjet e dyta të parakohshme që nga viti 2012, edhe pse kryeministri Aleksandar Vuçiç dhe partia e tij kontrollonte një shumicë absolute në parlament. Nacionalizmi dhe gjuha e urrejtjes gjithashtu u rritën shumë në vitin 2016, me politikanë dhe tabloide pro qeveritare që i quajtën kundërshtarët politik dhe aktivistët e shoqërisë civile si tradhtarë që u shërbejnë interesave të huaja.

Në Maqedoni, ish-kryeministri Nikola Gruevski la të nënkuptohet se udhëheqësi i opozitës, Zoran Zaev, duhet të vritet. Ndërkohë, frikësimi i grupeve joqeveritare arriti një shkallë të re me një nismë të quajtur “Stop Operacionit Soros”, themeluar nga redaktorët e agjencisë shtetërore të lajmeve dhe dy portaleve pro-qeveritare të lajmeve.

Shumë politikanë përdorën ndarjet etnike për të çuar përpara qëllimet e tyre politike. Udhëheqësi i Republikës Serbe në Bosnje dhe Hercegovinë, Milorad Dodik, festoi themelimin e subjektit gjysmë autonom përkundër një vendimi nga Gjykata Kushtetuese e vendit.

Tensionet u rritën ndërmjet Kosovës dhe Serbisë para zgjedhjeve të fundit presidenciale të vendit, thuhet mes tjerash në raportin e Freedom House.

Preisdenti i Shqipërisë Bujar Nishani përshëndeti hapat drejt anëtarësimin të Malit të Zi në NATO, duke thënë se do të kontribuonte në sigurinë e rajonit.

“Anëtarësimi i Malit të Zi në aleancën politiko-ushtarake të Atlantikut të Veriut jo vetëm u shërben dhe rrit sigurinë e qytetarëve, por është një kontribut në të mirë të sigurisë së mbarë rajonit tonë, sepse rrit sigurinë dhe zgjeron hapësirën e lirisë në Ballkan duke qenë se kemi nevojë të garantojmë sa më shumë paqen dhe stabilitetin për vendet dhe popujt tanë. Qytetarët malazezë do të kuptojnë rëndësinë e të qenit në një aleancë politiko-ushtarake që i siguron paqen dhe stabilitetin,” tha presidenti i Shqipërisë, Bujar Nishani, i cili ndodhet për vizitë në Ulqin me rastin e Ditës së Komunës ku mori pjesë edhe presidenti malazez Filip Vujanoviq.

Presidenti Nishani i shprehu mirënjohjen homologut të tij malazez në emër të Shqipërisë dhe të qytetarëve shqiptarë për kujdesin e vazhdueshëm që tregon ndaj pakicës shqiptare si dhe për kontributin e vyer të dhënë gjatë gjithë këtyre viteve në drejtim të forcimit të miqësisë dhe marrëdhënieve mes dy vendeve.

“Edhe ne e provojmë bashkëjetesën dhe Mali i Zi është jo vetëm një vend fqinj, por edhe mik i Shqipërisë.” – theksoi Presidenti Nishani.

Nga ana e tij Presidenti i Malit të Zi Filip Vujanoviq, vuri në dukje se marrëdhëniet mes dy vendeve janë një model i përkryer i bashkëpunimit të mirë fqinjësorë, ai shprehu besimin se ato do të forcohen edhe më tej, sidomos bashkëpunimi ekonomik në fushat e turizmit, të energjisë, transportit detar, etj.

Presidenti Vujanoviq falënderoi Presidentin Nishani për ndihmën e çmuar dhe mbështetjen që dha Shqipëria për anëtarësimin e Malit të Zi në NATO, “pasi ndihma e fqinjëve vlerësohet së tepërmi duke qenë se ata mund të dëshmojnë më së miri për zhvillimin e vendit të tij, duke shtuar se marrëdhëniet janë të shkëlqyera, por anëtarësimi në Aleancën e Atlantikut të Veriut hap mundësi të reja bashkëpunimi, sidomos po të kihet parasysh fakti që i gjithë bregdeti i vendeve tona i përket totalisht hapësirës së Aleancës”, tha presidenti Vujanoviq.

Presidenti i Shqipërisë, Bujar Nishani dhe ai i Malit të Zi, Filip Vujanoviq po qëndrojnë sot në Ulqin ku u pritën nga kryetari i Komunës Nazif Cungu. Të dy Presidentët morën pjesë dhe përshëndetën veprimtarinë festive që u mbajt në Qendrën e Kulturës me rastin e Ditës së Ulqinit, gjatë së cilët kënduan dhe interpretuan artistë nga Mali i Zi, Shqipëria dhe Kroacia.

Gjuha shqipe bëhet zyrtare në: Podgoricë, Ulqin, Tivar, Plavë, Rozhajë dhe Tuz.

Sipas autoriteteve malazeze, gjuha shqipe, përveç në Ulqin, Tuz dhe Plavë, me ligjin e ri zyrtarizohet tani edhe në Rozhajë, Podgoricë dhe Tivar. Kjo përbën një hap të madh në drejtim të avansimit të drejtave të shqiptarëve në Mal të Zi.

Ndryshimi i ligjit mbi të drejtat dhe liritë e pakicave në Mal të Zi, parashikon zyrtarizimin e gjuhës së pakicave në të gjitha komunat ku ato përbëjnë 5% të popullsisë, raporton Fakte

Kandidati për president të Serbisë, Nenad Çanak, gjatë një interviste ekskluzive për gazetën “Zëri” ka thënë se retorika aktuale politike në Serbi nuk dallon shumë nga ajo e Millosheviqit.

 Kryetari i Partisë Radikale Serbe (SRS), Vojisllav Sheshel, i cili është kandidat për zgjedhjet presidenciale në Serbi, ka thënë se nëse ai zgjidhet President, do të luftojë ta orientojë Serbinë kah integrimi me Rusinë dhe ta largojë nga Bashkimi Evropian.

BEOGRAD– Kryeministri serb Aleksandër Vuçiç gjatë një interviste për të e e njohur austriake “Der Standard”, ku ka folur për zhvillimet e fundit. Në 2 prill do kandidojë si president, përkundër që si kryeministër disponon numër të madh të deputetëve. Në lidhje me pezullimin e dialogut Prishtinë-Beograd, ai fajin ua vendos shqiptarëve.

“Unë nuk bëj asnjëherë ndokënd fajtor, por parlamenti i Prishtinës vendosi për bllokimin e dialogut. Gjithashtu ata përkundër Kushtetutës kërkojnë krijimin e Ushtrisë së Kosovës, të na marrin të gjitha pronat tona në Kosovë dhe përgatiten për një instancë gjyqësore për ti fajësuar gjithë serbët për krimet e luftës. Atëherë ku ishte gabimi ynë? Unë e kam pyetur Isa Mustafën (kryeministrin e Kosovës) dhe nuk kam marrë asnjë përgjigje. Megjithatë ne jemi gati për të diskutuar me ata. Kur unë bisedova me Angela Merkel, nuk kritikova kolegët e mi të Kosovës. Unë paralajmërova se jemi të gatshëm të përfundojmë autostradën Prishtinë-Nish, që do ngrit bashkëpunimin dhe lehtësojë qarkullimin e kapitalit, mallrave dhe banorëve. Dhe këtë e kishte bërë më parë Titoja,” u shpreh Vucic.

Ai shton më tej se për të do ishte më e lehtë që të shprehej se Kosova ishte territor i Serbisë. “Në kohën e fushatës do ishte më e lehta të them – Kosova është territori ynë, dërgoni shqiptarët drejt Tiranës – por këtu nuk do e them. Unë besoj se ka gjëra më të rëndësishme dhe këtu bëhet fjalë për autostradat dhe lidhjet mes kombeve të ndryshme. Nëse ne jemi në gjendje të bisedojmë me njëri-tjetrin, të respektohemi dhe biznesmenët shqiptarë të sjellim drejt Serbisë dhe banorët tanë drejt Prishtinës dhe Tiranës, atëherë do ishte më e lehtë për zgjedhjen tjetër. Unë i urrej “zgjidhjet e mëdha dhe të drejta,” që nuk zgjidhin asgjë.”, theksoi ai.

Në lidhje me takimin e Sarajevës Vuçiç theksoi rëndësinë e tregut të përbashkët që do sillte tre deri në katër herë më shumë investitorë në rajonin ballkanik dhe se kamionët nuk do kishin radha të gjata siç “kamionët serbë presin 48 orë në Bosnjë.”. Presidenti Vuçiç ka folur edhe për valën e refugjatëve, ku shpreh “frikë nëse Turqia prish marrëveshjen me BE”, për përmirësimin e marrëdhënieve mes Serbisë dhe Kroacisë dhe ruajtjen e integritetit territorial të Bosnjës, përkundër që presidenti i Republika Srpska, Milorad Dodik, kërkon referendum për bashkimin e saj me Serbinë.

Alarm terrori në Athinë: në një qendër postare janë gjetur tetë paketa me ekpsloziv. Ato janë dërguar në adresat e shefit të Eurogrupit Jeroen Dijsselbloem, drejtorit të ESM Klaus Regling dhe institucionet financiare.

Ministri i Jashtëm i Malit të Zi, Srdjan Darmanoviç, i tha Zërit të Amerikës se vendet e NATO-s, të udhëhequra nga Shtetet e Bashkuara, mbështesin hetimet e autoriteteve të vendit të tij për komplotin e organizuar nga Rusia për rrëzimin e qeverisë malazeze dhe për bllokimin e anëtarësimit të vendit në NATO. Gjithashtu, Mali i Zi ka besim se Kongresi amerikan do ta ratifikojë së shpejti traktatin e anëtarësimit në NATO.

Ministri i Jashtëm i Malit të Zi, Srdjan Darmanovic, tha dje se vendet aleate në NATO, të udhëhequra nga SHBA-ja, mbështesin hetimin e prokurorëve malazezë të një komploti rus për të rrëzuar qeverinë pro-perëndimore të vendit dhe për të ndaluar kështu anëtarësimin në aleancën e Atlantikut.

Ministri Darmanovic i tha shërbimit në gjuhën serbe të Zërit të Amerikës se “Shtetet e Bashkuara ndihmuan më shumë, duke ofruar mbështetje dhe informacion”. Komentet e tij u bënë në të njëjtën ditë ndërsa zhvillohej një seancë dëgjimore në Kongresin amerikan për përfshirjen e Rusisë në zgjedhjet presidenciale amerikane.

Kërkesa e Malit të Zi për anëtarësim në NATO është duke u shqyrtuar nga Senati i Shteteve të Bashkuara.

Javën e kaluar, Senatori Rand Paul bllokoi votimin në plenare të traktatit për anëtarësim në NATO. Sipas mbështetësve, përllogaritet se mbi 90 senatorë janë në favor të anëtarësimit të Malit të Zi. Senatori republikan John McCain reagoi ashpër ndaj Senatorit Paul, duke e akuzuar se “punon për Vladimir Putinin”.

Ministri Darmanovic u shpreh se nuk pret të ketë pengesa të mëtejshme ndaj ratifikimin të anëtarësimit të Malit të Zi dhe se pret që vendi i tij të marrë pjesë si anëtar me të drejta të plota në samitin e radhës të NATO-s, që do të zhvillohet në muajin maj në Bruksel.

Persona të panjohur kanë sulmuar me gurë një autobus të linjës Vjenë-Prishtinë, në Krushevc të Serbisë. Raportohet se fatmirësisht nga sulmi ka pasur vetëm dëmeve materiale.

Pronari i kompanisë së autobusëve, Bexhet Bici, ka thënë për KTV-në se ky nuk është rasti i parë që autobusët e kësaj kompanie janë sulmuar në Serbi.

Bici ka thënë se ata e kanë njoftuar edhe policinë në Krushevac, por u kanë thënë se për shkak se sot është fundjavë nuk mund të bëjnë asgjë për rastin. Bici ka thënë se janë të shqetësuar për këto sulme që po u ndodhin, ndërsa ka shtuar se kanë nisur një autobus nga Prishtina për t’i marrë udhëtarët.

Presidenti turk Recep Tayyip Erdogan iu ka bërë thirrje qytetarëve të Turqisë në Evropë, për të rritur normat e tyre të lindjes dhe të bëjnë nga pesë fëmijë, duke thënë se një rritje e popullsisë turke do të jetë përgjigja më e mirë për të “vulgarizimin, armiqësinë dhe padrejtësinë” e BE-së, raporton Telegraph.uk duke iu thënë turqve që jetojnë në vendet e BE-së se ‘ju jeni e ardhmja e Europës’.

“Ju bëj thirrje qytetarëve të mi, motrave dhe vëllezërve në Europë. Vendi ku po jetoni dhe punoni është bërë tani atdheu juaj. Hapni më shumë biznese, dërgoni fëmijët tuaj në shkollat më të mira, jetoni me familjet tuaj në lagjet më të mira, mbani makinat më të mira, jetoni në shtëpitë më të mira”, vijoi ai gjatë një fushate në qytetin perëndimor Eskisehir.

Mesazhi u drejtohet 1.4 milion votuesve turq që jetojnë në Gjermani, si dhe popullsisë së madhe turke në Holandë, Austri, Bullgari dhe në Mbretërinë e Bashkuar.

Në kuadër të mbajtjes së referendumit turk në 16 prill, ku pritet të votohet për shtimin e kompetencave të presidentit Erdogan, Hollanda dhe Gjermania kanë ndaluar aktivitetet politike të Turqisë. Kjo solli akuza të ndërsjellta mes Turqisë dhe vendeve të BE.