Pamje të protestave të mbajtura në Selanik ditë më parë, foto nga arkivi

Organizatorët në Greqi kanë premtuar se do të mbajnë një protestë në Athinë gjatë ditës së sotme, për t’i bërë thirrje qeverisë që të mos bëjë kompromis në kontestin e emrit që ka ky vend me Maqedoninë.

Zëdhënësi i marshit, Michalis Patsikas, u ka thënë gazetarëve se protesta do të jetë “madhështore dhe diçka që nuk ka ndodhur kurrë më parë”.

“Do të dërgojë mesazh të qartë brenda dhe jashtë Greqisë”, ka thënë Patsikas, duke shtuar se pritet që rreth 1 milion persona të mblidhen afër sheshit Syntagma Square në kryeqytet.

Greqia përballet një kohë të gjatë me konfliktin për emrin me vendin fqinj për emrin “Maqedonia”.

Kjo ndodhi pas Maqedonia fitoi pavarësinë më 1991.

Liderët e të dy vendeve kanë thënë se kanë arritur përparim në zgjidhjen e problemit, duke përmendur shtimin e ndonjë prej parashtesave “e madhe” “e re” apo “veriore” në emrin e Maqedonisë.

Negociatori i Kombeve të Bashkuara, Matthew Nimetz ka shprehur optimizëm për vendet fqinje të Ballkanit duke përmendur këtë vit si kohën e zgjidhjes së kontestit.

Protesta në Greqi do të jetë e dyta në pak javë për këtë çështje.

Ato janë duke u organizuar dhe financuar nga grupe greke të diasporës, të përkrahur nga zyrtarë të penisionuar, grupe të kishave dhe disa tjera.

Më 21 janar në Selanik, ishin mbledhur mijëra protestues, pikërisht për çështjen e emrit.

Policia ka deklaruar se në protestë kanë qenë 90,000 persona, ndërsa organizatorët kanë pretenduar të kenë qenë 400,000 protestues.

Presidenti i Serbisë, Aleksandër Vuçiç, ka deklaruar se nuk do ta “fusë kokën në rërë siç kanë bërë tjerët” kur është fjala për Kosovën, raportojnë mediat serbe.

Ai ka shtuar se është i gatshëm për kompromis, por ka porositur se nëse dikush mendon që Serbia do t’i jep të gjitha dhe të mbetet pa asgjë, mashtrohet keq, transmeton Telegrafi.

Këto komente presidenti serb i bëri kur gazetarët e pyetën se çfarë po ndodh me dialogun e brendshëm për Kosovën, dhe për çfarë kompromisi është Serbia e gatshme të bëjë për një zgjidhje afatgjate.

“Në fund do të jenë qytetarët e Serbisë do të japin verdiktin për këtë çështje. A dëshiroj unë si president të sillem si të tjerët të fus kokën në rërë dhe të them, nuk ka problem do të presim edhe 200 vite derisa fëmijët dhe nipat tuaj të kalojnë nëpër problemet e njëjta që kemi kaluar edhe ne, baballarët dhe gjyshërit tanë, apo jeni të gatshëm të bëni siç do të jetë kompromisi për serbët dhe shqiptarët?”, ka shtuar Vuçiç.

BEOGRAD – Kosova ka gjasa të mëdha të bëhet anëtare e Kombeve të Bashkuara dhe këtë fakt tashmë po e pranojnë edhe në Serbi. Kështu është shprehur kryetari i Partisë Popullore në Serbi, Vuk Jeremic i cili akuzoi presidentin serb se po bën marrëveshje jo të duhura me Kosovën.

“Arritja e një kompromisi me Kosovën është një situatë shumë e komplikuar dhe kjo nuk është e mjaftueshme vetëm me bisedime me shqiptarët. Vetëm negociatat me modelin e Vuçicit, kur shqiptarët marrin gjithçka që kërkojnë. Ky proces është në fund, dhe Vuçici po e përgatit publikun se Kosova do të marrë karrigen në OKB”, ka thënë politikani serb, njofton lajmi.net.

Ish-ministri i Jashtëm serb ka folur edhe për Strategjinë e Zgjerimit të BE-së që do të publikohet të martën.

“Edhe çështja e integrimit evropian të Ballkanit Perëndimor është vënë në pikëpyetje me një letër të Spanjës, e cila relativizoi plotësisht pozicionin e Kosovës për anëtarësim në BE”, thekson Jeremic.

Presidenti Grek Prokopis Pavlopulos në fjalim patriotik gjatë një darke  në qytetin bregdetar peloponezian të Kallamatës organizuar nga kreu i bashkisë së këtij qytetie vuri edhe njëherë veten e tij në rreshtin e grekëve që e shikojnë me dyshim fqinjin e veriut Shqipërinë.

“Këto ditë e orë  janë shumë të rendësishme për Greqinë dhe popullin grek  që ka derdhur gjak për të siguruar shtetin dhe territorin tonë që kemi sot .. ” Duke patur si nëntekst problemet territoriale që ka Greqia me Shqipërinë, siç është problemi çam dhe Çamëria .

Megjithëse presidenti grek Prokopis Pavlopulos nuk e përmendi me emër Çamërinë, ai foli shumë për eposin grek të Epirit  dhe veçanërishtë për “Jo “-në e madhe që Greqia dhe grekët i dhanë Musolinit në fund tetorit të vitit 1940 …

Megjithatë në fjalën e tij , zoti Pavlopulos foli edhe për perspektivën evropiane të fqinjëve grekë të Veriut, por duke mos harruar edhe një sërë kushtesh që paraprakisht duhen të plotësohen ..

Me këtë zoti president i Greqisë i mëshon akoma më shumë asaj që ka thënë më parë, që Shqipërinë do ta mbështesim për në BE , vetëm kur të plotësojë deri ne një të drejtat e minoritetit grek në Shqipëri./Partizan Cene/ Greqi

Menjëherë mbas bërjes publike të emrit të të akuzuarit si ekzekutor i 41 vjeçarit Devi Kasmi në Tiranë, policia greke  bastisi pronat dhe shtëpinë e tij në një fshat afër Artës .

I njohuri tashmë si ekzekutori Eftimios Eftimiu, personi në fjalë  ka qenë për gati 10 vjet anëtar i forcave speciale në skalionin e Veriut të Greqisë . 41 vjeçari  dyshohet se ka marrë një shumë të majme parash, pra është vrasës me pagesë . Policia greke  ka gjetur mjaft material kompromentus, por ajo që bën më shumë përshtypje , simbas njoftimit zyrtar të policisë , ishte gjetja në shtëpi të tij  një pistoletë me silenciator  dhe fisheke për përdorim të së njëjtës armë/ Partizan Cene/Greqi

Në intervistën që dha sot pas dite Ministri grek i Mbrojtjes të Qytetarit ( ministri i brendshëm ) Niko Toskas në kanalin shtetëror ERT-1, tha se nuk është i kërcënuar vetëm Ministri i Jashtëm, Nikos Kotzias, lidhur me përpjekjet që qeveria dhe veçanërishtë kryeministri po bëjnë për të mbyllur problemet shumë dekadëshe me fqinjët, Shqipërinë dhe Maqedoninë  por janë kërcënuar edhe dy ministra të tjerë, emrat e të cilëve nuk bëhen publik për momentin , për arsye hetimi.

Qysh mbrëmë mbas mesnate kur janë bërë publike letrat kërcënuese për ministrat policia shtetërore dhe sigurimi i shtetit  po punon për të gjetur autorët .

Në pyetjen e gazetarit se kush është arsyeja kryesore e këtyre kërcënimeve, zoti Toskas , u përgjigj , se kjo është e kuptueshme , pasi ka qarqe në Greqi që nuk duan as heqjen e ligjit të luftës me Shqipërinë dhe as njohjen e Maqedonisë me nje emër të ngjashëm./Partizan Cene/Greqi

Ambasadori amerikan në Serbi Kyle Scott

Ambasadori i Shteteve të Bashkuara në Serbi, Kyle Scott, ka vlerësuar sot se mitet e pavërteta për Amerikën, të cilat, siç ka theksuar ai, i plasojnë tabloidet e ndryshme në Serbi, janë bërë aq të shumta në numër, sa që populli serb “ka filluar të besojë në to”.

“Nëse i lexojmë tabloidet çdo ditë, do të mendoni se Amerika dëshiron vetëm gjëra të këqija për Serbinë, se Amerika është armik i Serbisë, se dëshiron kaos në Serbi dhe luftë në Ballkan. Të gjitha këto janë vetëm budallallëqe”, ka deklaruar ambasadori, Kyle Scott, sot në qytetin e Nishit.

Mëtutje, ai tha se politika e Shteteve të Bashkuara është e bazuar në atë që Serbia të jetë stabël dhe shtet i fortë, që jep kontribut në stabilitein e gjithë rajonit, raporton agjencia Beta nga Beogradi.

Ambasadori Scott më herët gjatë ditës në Universitetin e Nishit ka mbajtur ligjëratë në temën e komentimit të gabuar të politikës së Shteteve të Bashkuara në Serbi.

Bashkimi Evropian pret nga Serbia nënshkrimin e një dokumenti juridikisht obligues me Kosovën, pas të cilit Serbia do të mund të bëhej anëtare e BE-së.

Kështu ka thënë sot në Beograd presidenti i Serbisë, Aleksandër Vuçiç në konferencën për media me kryetarin e Parlamentit Evropian, Antonio Tajani.

Vuçiç ka theksuar se këtë ia ka thënë edhe presidenti Tajani, shkruan lajmi.net. Tajani ka saktësuar se kjo marrëveshje duhet të nënshkruhet para hyrjes formale të Serbisë në BE.

“Serbia është Evropë dhe është korrekte që të gjithë njerëzit në Ballkan sot të jetojnë në paqe”, ka thënë Tajani.

Vuçiç e ka falënderuar Tajanin për respektimin e Serbisë dhe popullit serb dhe për atë që e ka njohur mirë Serbinë dhe Ballkanin Perëndimor.

“Sikur Bashkimi Evropian të kishte më shumë njerëz të tillë, të cilët në atë mënyrë e respektojnë popullin serb, jam i bindur se edhe ne do të ishim më të vyeshëm dhe do të kishim rezultate më të mira”, tha presidenti serb.

Në mediat greke janë publikuar sot detaje të negociatave mes palëve greke dhe maqedonase, të cilat kanë arritur të bien dakord për çështjen e emrit.

Ndonëse as nga Athina dhe Shkupi zyrtar nuk ka asnjë konfirmim, mediat shkruajnë se me marrëveshje dypalëshe emri i ri i Republikës së Maqedonisë do të jetë “Republika gorna Makedonija” që përkthehet “Republika e Maqedonisë së Epërme”.

Ky është emri i arritur, ndonëse kishte pretendime të tjera nga palët, pasi Shkupi preferonte emërtimin “Nova Makedonija” (Maqedonia e Re).

Në vazhdim do të jenë burimet zyrtare ato të cilat do konfirmojnë ose hedhin poshtë zërat. Çështja e emrit, është ajo që mban të bllokuar Maqedoninë nga procesi i integrimit të vendit në strukturave euro-atlantike.

Ministri i Jashtëm Ditmir Bushati dhe homologu i tij grek Nikos Kotzias, vetëm pak ditë më parë zhvilluan një takim tre ditor në qytetin e Korçës.

Pas këtij takimi të dy ministrat u shprehën se u diskutuan për çështjet të cilat kanë sjellë “ngërçe” ndër vite për marrëdhëniet shqiptaro-greke.

Këto diskutime i konfirmoi dhe kryeministri  Edi Rama pas takimit që zhvilloi me kryeministrin grek  Aleksis Tsipras në Davos.

Por gjatë këtyre takimeve çështja çame nuk është diskutuar. Këtë thekson ministri i jashtë grek Kotzias.

Duke u  përgjigjur për deputetin e opozitës Kumutsakos, ministri grek tha se kjo çështje nuk përbën objekt dikutimi, Gjithashtu ai tha se: “Kemi një përmiresim spektakolar të klimes në marrëdheniet greko-shqiptare.”

Nikolla Gruevski, ish-lider i VMRO-së në seancë plenare. Fotografi nga arkivi

Partia e ish-kryeministrit të Maqedonisë, Nikolla Gruevski, VMRO-DPMNE është kthyer në Kuvend pas një pauze prej dy muajve, duke parashtruar mbi 35 mijë amendamente për Ligjin mbi përdorimin egjuhëve. Ky ligj ishte miratuar paraprakisht nga Kuvendi i Maqedonisë, por më pas ai nuk ishte nënshkruar nga presidenti Gjorge Ivanov.

Me këtë ligj, ishte parashikuar një shtrirje më e gjerë e përdorimit zyrtar të gjuhës shqipe në institucionet e pushtetit vendor dhe atij qendror.

Por, me këtë ligj nuk po pajtohet VMRO-DPMNE, e cila së fundit dërgoi në Kuvend 35 mijë amendamente, veprim ky që po cilësohet si bllokues i punës së këtij institucioni.

Nga kjo parti politike kanë theksuar se me dërgimin e mbi 35 mijë amendamenteve, nuk synohet bllokimi i Kuvendit dhe as të punohet kundër interesave të shqiptarëve. Por, siç thuhet, po punohet në harmonizimin e ligjit në fjalë me Kushtetutën e Maqedonisë.

“Ligji është sjellë në procedurë shumë jotransparente, pa konsultime me ekspertë. Nuk janë bërë konsultime me grupet më të vogla etnike dhe ajo që është më e rëndësishme, pa të drejtë, Ligjit të gjuhëve i është vendosur shenja evropiane, që të shmanget debati rreth tij”, ka theksuar deputeti i VMRO-DPMNE-së, Ilia Dimovski.

Ai njëherësh ka nënvizuar se nëse për shumicën parlamentare janë të rëndësishme reformat dhe integrimi, atëherë Talat Xhaferi si kryetar i Kuvendit duhet të ndryshojë dinamikën dhe rendin e ditës së seancave parlamentare, dhe të heq Ligjin e gjuhëve dhe të vendos ligjet që nevojiten për realizimin e reformave sipas planit të Qeverisë të njohur si plani 3-6-9.

“Me sa di , ligji për përdorimin e gjuhëve nuk është më prioritet, dhe këtë e tha edhe eurokomesari Han”, ka thënë Dimovski

Gjatë ditës kryeministri i Maqedonisë Zoran Zaev i ka bërë thirrje VMRO-DPMNE-së si parti opozitare që të jetë syçelë, të heq dorë nga amendamentet dhe të mos e bllokojë punën e Kuvendit, tani kur Maqedonia ka gjasa reale për fillimin e negociatave për anëtarësim në NATO.

“Unë jam Zoran Zaev, ai që udhëheq luftën për liri dhe demokraci. Demokracia për ne paraqet imperativ. Secili nga opozita ka të drejtë të dorëzojë amendamente dhe kjo duhet respektuar, por njëkohësisht duhet pasur parasysh se përmes kësaj të drejte bllokohet puna e Kuvendit“, ka theksuar kryeministri i Maqedonisë.

Ndërkaq, zëvendëskryeministri për çështje të integrimeve, Bujar Osmani vlerëson se VMRO-DPMNE si parti opozitare, duke propozuar mbi 35 mijë amendamente për Ligjin e gjuhëve, humbet shansin historik për të dëshmuar se kjo parti ka ndryshuar qasjen ndaj shqiptarëve.

Osmani është shprehur i bindur se Ligji i gjuhëve do të miratohet shumë shpejt, por siç është shprehur ai, në memorien e qytetarëve do të mbetet kundërshtimi i një partie politike, përkatësisht i VMRO-DPMNE-së.

“VMRO-DPMNE kishte një mundësi të shkëlqyer që të ketë një qasje sensitive ndaj çështjes shumë të ndjeshme, sepse në asnjë mënyrë avancimi i përdorimit të gjuhës shqipe në institucione nuk e rrezikon të drejtat e qytetarëve të tjerë, dhe aq më pak e kërcënon karakterin unitar të shtetit”, ka thënë Osmani.

“Sa më shumë që do t’i afrohemi mundësisë për t`u integruar në NATO dhe BE, aq më shumë do të ketë përpjekje për ta ngadalësuar këtë proces, qoftë nga forcat e brendshme qoftë nga forca jokonstruktive rajonale, qoftë dhe nga forcat më të larta gjeopolitike. Por, ne jemi të vendosur që t`i tejkalojmë këto sfida dhe nuk do të lejojmë që asnjë pengesë në këtë përpjekjen tonë historike, në përpjekjen e kësaj gjenerate për ta bërë vendin pjesë të BE-së dhe NATO-s”, ka thënë tutje Osmani.

Kurse, kryetari i Aleancës për Shqiptarët, Zijadin Sela i cili njëherësh është deputet, i ka bërë thirrje VMRO-DPMNE-së që të heq dorë nga amendamentet, duke nënvizuar se me këtë ligj nuk plotësohen tërësisht kërkesat e shqiptarëve, por krijohet mundësi që të realizojnë një të drejtë të mohuar.

Sela ka shprehur vërejtjet e tij edhe rreth emërimit të Ligjit të gjuhëve.

“Për ne është e papranueshme termi ‘përdorimi i gjuhës që e flasin 20 për qind e qytetarëve’. Askush nuk ka të drejtë që të shpik definicione për gjuhën tonë, ashtu siç reagojnë maqedonasit për çështjen emrit. Ajo është gjuha shqipe dhe ashtu duhet që të qëndrojë”, ka theksuar Zijadin Sela.

Para Kuvendit të Maqedonisë kanë protestuar përfaqësues të shoqatave të ndryshme maqedonase, siç kanë thënë, kundër miratimit të Ligjit të gjuhëve si dhe zgjidhjes së kontestit të emrit me Greqinë, që parasheh ndryshimin e Kushtetutës.

Ndryshe, Ligji për përdorimin e gjuhëve mori vizë me 69 vota nga Parlamenti më 11 janar, në mungesë të deputetëve të VMRO-DPMNE-së, por i njëjti është kthyer sërish në Parlament, pasi nuk u dekretua nga presidenti i Maqedonisë, Gjorge Ivanov.

Një grup qytetarësh, përfaqësues të shoqatave të ndryshme kanë protestuar edhe sot para ndërtesës së Kuvendit, kundër ligjit të gjuhëve si dhe ndryshimit të emrit kushtetues.

Protestuesit gjithashtu vazhduan të mbledhin firma kundër Qeverisë “Zaev”. Protestuesit kërkuan të mbrohet atdheu dhe ardhmëria e fëmijëve dhe të mos imponohet siç thanë dygjuhësia në Maqedoni.

“Dëshiroj t’i porosis gjithë maqedonasit në Maqedoni mos të humbin guximin, mos të bëhen tradhtar, kur të bëhet fjalë për Maqedoninë të dalin këtu dhe ta mbrojnë atdheun, ta mbrojnë të ardhmen e fëmijëve të tyre”.

“Përse, ju që jeni brenda, të kundërligjshëm dëshironi të flasim në gjuhë tjetër, në gjuhë të huaj. Gjuhë që nuk e njeh as gjyshja e as stërgjyshja ime, as nëna ime dhe askush tjetër nuk flet në gjuhë të huaj. Gjuha ime është maqedonishtja”.

Çështja e emrit të Maqedonisë pritet të sjellë në orët e ardhshme ndryshime në skenën politike të Greqisë.

Pas takimit të djeshëm të kryeministrit me të gjithë udhëheqësit e partive parlamentare, kreu i partisë “Grekët e Pavarur” të koalicionit qeveritar, Panos Kammenos, njëkohësisht ministër i Mbrojtjes, duket i ka thënë kryeministrit Tsipras se nëse do të vijë në Parlament një emër i përbërë që përmban termin “Maqedoni”, ai nuk do ta votojë propozimin.

Ai do të japë dorëheqjen bashkë me anëtarët e tjerë të partisë së tij nga postet qeveritare, duke krijuar kështu të çarën e madhe në koalicionin qeveritar të vendit. Por, në të njëjtën kohë, ai duket se ka thënë se nëse opozita do të përfitojë nga kjo dhe do të kërkojë votëbesimin e qeverisë në Parlament, ai do ta mbështesë qeverinë.

Ndërkohë, duket se propozimin për emrin e ri të fqinjit verior të Greqisë mund ta mbështesin në Parlament edhe deputetë nga partitë opozitare, midis tyre edhe ata të koalicionit demokratik, shumica e të cilit përbëhet nga socialistët e PASOK-ut, te të cilët thuhet se Tsipras mund të gjejë partnerët e ardhshëm të qeverisë.

Gjithashtu të dielën e parë të shkurtit pritet përsëri, në Athinë kësaj here, një miting madhështor si ai i Selanikut, në të cilin grekët do të kundërshtojnë që termi “Maqedoni” të jetë pjesë përbërëse e emrit të ri.

Athina dhe Shkupi nxitojnë të zgjidhin ndasitë e tyre 27-vjeçare për emrin, nën presionin e qytetarëve të tyre, por njëkohësisht edhe të BE-së dhe SHBA-ve, që duan që në samitin e BE-së në maj dhe në atë të NATO-s në qershor të jepet “drita jeshile” për procesin integrues të Shkupit.

Deklaratat e dhëna sot nga ministri serb i Mbrojtjes, Aleksandër Vulin se serbët e veriut të Kosovës do t’i mbrojë ushtria e Serbisë mund t’i kushtojnë me ndalim të hyrjes në territorin e Kosovës.

Lidhur me këtë këshilltari për media i ministrit të Jashtëm, Jetlir Zyberaj ka theksuar për Gazeta Blic se nuk ka informacion që Vulin ka kërkuar leje për vizitë në Kosovë.

Megjithatë, ai ka theksuar se kur dikush nga politikanët serb jep deklarata të tillë, natyrisht se do t’i refuzohet leja për vizitë.

“Fillimisht nuk dua të paragjykoj sepse i njëjti formalisht ende nuk ka parashtruar kërkesë për vizitë vendit tonë. Në rrethana të ngjashme kur persona që japin deklarata që nxisin dhunë dhe konflikte sipas mendësisë së Milloshevicit, kërkojnë leje për të vizituar Kosovën, vizita do t’u refuzohet”, tha ai për Gazeta Blic.

Sipas tij, Kosova është shtet sovran dhe rregullat e shtetit janë të obliguara t’i respektojne të gjithë.

Ndërkohë, zëvendëskryeministri i Kosovës, Enver Hoxhaj ka reaguar ndaj deklaratave të ministrit serb të mbrojtjes, Aleksandar Vulin i cili tha se ushtria serbe po monitoron situatën në veri të Kosovës pas vrasjes së Oliver Ivanoviqit.

“Deklaratat si kjo e Vulinit janë kërcënim për sigurinë në Kosovë dhe mund të shkaktojnë destabilizim. Gjendja në pjesën veriore është e qetë dhe e qëndrueshme. Institucionet përgjegjëse për siguri janë Policia e Kosovës, FSK-ja, KFOR-i dhe Eulex-I”, ka shkruar Hoxhaj.

Kryeministri grek Alexis Tsipras ka mbajtur një fjalim para kombit, se pas takimit me homologun e tij shqiptar Edi Rama, ai ishte gati për firmosjen e një marrëveshje strategjike me Shqipërinë dhe ka thënë “Ok”-in për hapjen e negociatave me BE-në.

Në një deklaratë nga pallati  “Maximos”, Tsipras tha se se ka arritur që të zgjidhë problemet me dy fqinjët e tij verior siç janë Maqedonia dhe Shqipëria.

“Unë premtoj se në vitet e ardhshme do të ndjek me një përgjegjësi patriotike një zgjidhje të pranueshme nga të dy palët.  Duke pasur parasysh se kjo është përgjegjësi e qeverisë greke dhe e imja, mund të them se kemi arritur një rol të rëndësishëm si lider në Ballkan”.

Tsipras deklaroi se për bisedimet me Shqipërinë fqinje, ai ka takuar Presidentin e Republikës dhe krerët e partive  politike, se ai ka hapur rrugën e një normalizimi të plotë dhe përmirësimit të marrëdhënieve dypalëshe midis dy vendeve.

“Jemi gati për një marrëveshje strategjike me Shqipërinë. Një marrëveshje që do të zgjidhë dallimet kritike dhe do të çojë në votën tonë për hapjen e e negociatave të pranimit të vendit tonë fqinj në BE”, deklaroi kryeministri grek, duke shtuar se ka një konsensus të të gjitha partive politike greke për të normalizuar marrëdhëniet me Tiranën.

“Ky është një shembull i rëndësishëm se si bëhet politika e jashtme në vendet fqinje, ku për çështje strategjike nuk ka ndarje dhe sulme mes mazhorancës dhe opozitës”, tha shefi i qeverisë së Athinës.

Ish-kryetari i Akademisë serbe, Nikolla Hajdin, deklaroi se Kosova është e humbur për Serbinë.

“Kosova është çështje e humbur. Do të duhej që ky popull të mësonte me kohë që Kosova është e humbur, sikurse ka deklaruar Dobrica Qosiq. Cila Kosovë serbe? Si e mendoni ende Kosovën në Serbi? A mund ta paramendoni një komunë në Serbinë Qendrore, apo në Vojvodinë me kryetar shqiptar? Nuk mundeni, natyrisht, as unë”, deklaroi akademiku Nikolla Hajdin.

Akademik Hajdin theksoi se nuk ka ndonjë politikanë që do intelektualët apo shkencëtarët, sepse“ata janë të dobishëm për vendin por pengesë për pushtetin”. Sipas tij, interesi i Serbisë është që të merret aq sa mund të merret nga Kosova.

“Kjo është që të ruajmë njerëzit tanë, të cilët janë atje dhe objektet fetare e trashëgimia kulturore të marrin mbrojtje ndërkombëtare”, konstatoi Hajdin, i cili ka qenë në krye të Akademisë serbe për tre mandate. Tutje ai shtoi se në Kosovë jetojnë afro 100.000 serbë, përfshirë edhe ata serbë të cilët jetojnë në Terazija (Beograd – sqarim yni) e që shkojnë në Prishtinë me aeroplan.

“Pra 100.000 serbë mund të kenë të drejta aq sa mund të kenë karshi 2 milionë shqiptarëve. Nuk mund të presim diçka më tepër”, vlerësoi Hajdin, transmeton RTK.

“Çka na duhet ai territor ku nuk ka serbë? Nuk ka vend në Evropë ku i përket pakicës. Në Hungari jetojnë shumica hungarezë, në Poloni jetojnë me shumicë polakë, ndërkaq në Kosovë shumica janë shqiptarë dhe nuk mund t’i kthejmë në serbë”, sqaroi Hajdin.

Është konfirmuar se nga zjarri që përfshiu shtëpinë në Tetovë kanë mbetur të vdekur nëna dhe katër fëmijë të saj. Kjo thuhet edhe nga dëshmitarë okularë që kanë ndjekur momentin e shpëtimit, por edhe nga ekipet e zjarrëfikësve që janë në kërkim të trupave.

Rreth orës 04:20 minuta në rrugën Goce Dellçev, zjarri ka kapluar shtëpinë e Sulejman Zulbeharit, i lindur në vitin 1940. Lajmi është konfirmuar edhe nga Njësiti i Zjarrfikësve në Tetovë. Fëmijët janë të moshës 4 dhe 13 vjeçare. Nëna Fatimja 39 vjeç si dhe tre janë djemtë dhe vajza e saj raportohet se kanë mbetur të vdekur.

Fillimisht është përfshirë kati i dytë i shtëpisë së vjetër, që sipas pronarit i cili gjatë zjarrit ka qenë duke fjetur në katin e parë të shtëpisë.

Zjarri është vënë nën kontroll, ndërsa me urdhër të Prokurorit vendi i aksidentit është duke u siguruar nga ana e policisë./INA Online

Kryeministri grek Alexis Tsipras i tha sot partnerëve evropianë në forumin ekonomik botëror të Davos në Zvicër se është e vështirë të jetosh më një fqinj agresiv si Turqia, në komentet që reflektojnë marrëdhënie të tensionuara mes dy vendeve aleate në NATO.

Tsipras foli në diskutimet për stabilizimin e situatës në Mesdhe dhe krizën e emigracionit. Ai përmendi sjelljen e fqinjit lindor teksa kujtonte se në vitin 2015 kur erdhi në pushtet, Greqia ndodhej në një kohë të vështirë krize financiare dhe emigracioni.

Por megjithë diferencat territoriale dhe të minoriteteve mes dy vendeve, Turqia e Greqia kanë bashkëpunuar vitet e fundit në marrëveshjen evropiane të reduktimit të fluksit të emigrantëve, të cilën Tsipras e quajti “e vështirë por e nevojshme”, duke iu referuar kritikave nga grupet e të drejtave të njeriut.

Rruga në Bashkimin Evropian çon edhe përmes përcaktimit të qartë të kufijve tanë, tha presidenti i Serbisë, Aleksandër Vuçiç.

Duke folur për mediat serbe në lidhje me euro-integrimet, Vuçiq tha se Serbisë “nuk do t’i lejohet hyrja në BE pa zgjidhje të qartë të çështjes së kufijve”.

“Kur do ta zgjidhim, është çështje tjetër. A duam ta zgjidhim ose jo? Populli do të duhet të thotë në një referendum se çfarë mendon”, tha Vuçiq.

Ai vuri në dukje se ambasadori i ri i Francës në Beograd i ka thënë atë që është e njohur – se Serbia do të duhej të bëjë marrëveshje ligjërisht të detyrueshme me Kosovën, e cila parashikon zgjidhje të çështjes së kufirit.

Vuçiq tha se konfliktet me shqiptarët “nuk kanë shanse dhe lumturi”.

Serbia, me Kushtetutë, e konsideron ende Kosovën pjesë të saj.

BEOGRAD – Ministri i Punëve të Jashtme të Serbisë, Ivica Daçiç, tha sot se dialogu mes Prishtinës dhe Beogradit do të vazhdojë atëherë kur pala serbe do të marrë informacione konkrete mbi zbardhjen e vrasjes së liderit të SDP-së, Oliver Ivanoviç ne Mitrovicë.

“Vrasja e liderit të SDP-së, Oliver Ivanovic, është një kërcënim për stabilitetin në rajon dhe vazhdimin e dialogut për normalizimin e marrëdhënieve mes Prishtinës dhe Beogradit” tha Daçiç.

Kreu i diplomacisë serbe shtoi se presin nga Prishtina zyrtare dhe nga autoritetet ndërkombëtare prezente në Kosovë zbardhjen sa më të shpejtë të krimit të kryer në veri të Mitrovicës.

“Pala jonë është e përkushtuar në dialog, por ne nuk do t’i vazhdojmë këto bisedime pa pranuar informacion konkret lidhur me krimin e ndodhur”-shtoi Daçiç, njofton Lajmi.net.

Daçiq foli edhe për anëtarësimin e Serbisë në Bashkimin Evropian, duke thënë që një gjë e tillë potencialisht do të ndodhë në vitin 2025 dhe kjo është gjë e mirë për shtetin serb.

Lidhja e Social Demokratëve të Vojvodinës sot e dënoi me forcë grafitet anti-shqiptare të shënuara në një ndërtesë private në Crvenkë, në pronësi të një personi me kombësi shqiptare.

Grafitet përmbajnë mesazhe kërcënuese si shenjë hakmarrë për vrasjen e Oliver Jovanoviç duke shkruar “Vdekje për shqiptarët”, në murin e një furre të bukës në pronësi të një shqiptari në Crvenkë.

Gjenerali Miomir Stojanoviç, ish-drejtori i Agjencisë Ushtarake të Sigurisë Serbe dhe ish-kryetari i Komitetit Parlamentar për Kontrollin e Shërbimeve të Sigurisë, ka vlerësuar se pas vrasjes së politikanit serb në veri të Mitrovicës, Oliver Ivanoviç, me siguri nuk qëndron faktori shqiptar, ka deklaruar Stojanoviq për mediet serbe

“Vlerësimi im se pas kësaj vrasjeje nuk qëndron faktori shqiptar, pasi që ata kanë mundur ta vrasin kur kanë dashur, por nuk e kanë bërë një gjë të tillë. Mendimi im është që kjo është vrasje me motive politike ose pjesë e grupeve kriminale në veri të Kosovës”, ka deklaruar Stojanoviq, transmeton “Zëri”.

Vrasjen me motive politike ky i fundit e ka sqaruar se kjo ka ndodhur në kohën kur kanë rifilluar bisedimet për Kosovën në Bruksel, ndërsa Ivanoviq ka qenë “shumë i respektueshëm mes komunitetit serb në Kosovë”.

Vrasja e kryetarit të Iniciativës Qytetare “Liria, Demokracia, Drejtësia” (SDP) Oliver Ivanoviç, ka ngritur shumë reagime dhe tensione ndërmjet Kosovës dhe Serbisë.

Mes shumë deklaratave dhe reagimeve, Ministri i Mbrojtjes së Serbisë, Aleksandër Vulin, ka dhënë një mesazh të qartë për zhvillimet e fundit në vend duke thënë se ushtria e Serbisë është e gatshme të reagojë ndaj çfarëdo kërcënimi për qytetarëve serbë kudo që jetojnë.

Vrasja e Oliver Ivanoviçit, liderit të Iniciativës Qytetare «Liri, demokraci, drejtësi» e ka tronditur me themel Serbinë e Kosovën, por i ka shqetësuar edhe të gjitha shtetet përreth, të cilat dëshmojnë për tensione të përditshme të ndërsjella të dy vendeve, shkruan portali kroat Dnevno.hr.

Ivanovicin e likuiduar, prokuroria e Kosovës e ka akuzuar për krime lufte mbi popullatën civile në Kosovë, të bëra në vitin 1999 e 2000, duke e paraqitur si komandues të formacioneve paramilitare.

I vrari «i ngacmonte» të tjerët për krime lufte

Dhe deri sa faji i kosovarëve për shumëkënd imponohet si e vetmja përgjigje e arsyeshme në pyetjen se «kush është vrasësi», ndërsa lufta parashihet si rrjedhë logjike, një burim i informuar mirë portalit tonë i ka zbuluar anën tjetër të tregimit.

«Nuk do të ketë kurrfarë pasojash e as që do të ndodhë kurrfarë lufte ndërmjet Serbisë e Kosovës. Është krejtësisht e sigurt se e ka likuiduar shërbimi sekret dhe se Serbia e ka miratuar këtë. Ivanoviqi, në fakt, është shkolluar në Zagreb dhe ka qenë bashkëpunëtor i KOS-it (shërbimit sekret të Armatës Popullore Jugosllave), ndërsa nuk është fshehtësi se ka qenë njeri i besueshëm i Aleksandar Vasileviqit, shefit të shërbimit të KOS-it. Vështirë është të shitet tregimi se shërbimet sekrete nuk kanë ditur se kjo do të ndodhë. Serbia zyrtare vrasjen e Ivanoviqit heshtazi e ka lejuar dhe, nëse nuk ngrihet shumë zhurmë e mediave, për këtë që pasnesër nuk do të flasë më askush». Teoria e burimit të portalit Dnevno.hr mbështetjen e mundshme e ka në faktin se vetëm dy ditë para atentatit, CIA sigurisht e informuar, ka dhënë paralajmërim alarmuese për Kosovën, me të cilin  ka tërhequr vërejtjen për terrorizëm të mundshëm dhe dhunë të motivuar politikisht, e cila paraqitet anembanë vendit.

Është vrarë për të ndaluar bisedimet për njohje? «Serbët nuk e kanë të panjohur ta heqin qafe cilindo politikan të tyre, i cili nuk u shkon për shtati. Ne kemi shërbim jashtëzakonisht të fortë të inteligjencës dhe të paralajmërimit. Kreu i ynë politik është i vetëdijshëm se duhet ta njohim Kosovën… Meqë Ivanoviqi me aktgjykimin për krime nuk u ka pëlqyer kosovarëve, ka qenë zgjidhje ideale për likuidim, me të cilin Serbia do ta drejtonte gishtin kah Kosova. Thjesht, kanë kërkuar mënyrë për t’i ndaluar bisedimet…».   Mbi urgjencën e zgjidhjes së situatës kosovare-serbe, këto ditë kanë bërë të ditur edhe mediat serbe. «Amerikanët tashmë po i humbasin nervat, sepse dëshirojnë ta mbyllin tregimin mbi Kosovën si shtet i pavarur me pranimin në OKB, gjë që pushteti aktual i Beogradit është dashur ta përfundojë në vitin 2015. Tash do të bëjnë gjithçka që të marrin atë që kanë planifikuar, sepse për shkak të premtimeve të kreut shtetëror serb se do të përfundojnë me Kosovën e kanë mbështetur Aleksandar Vuçiqin dhe pushtetin e tij, duke i mbyllur sytë para shuarjes së opozitës dhe censurën e mediave».

A është kjo vrasje zgjidhje të cilën e ka miratuar vetë Aleksandar Vuçiqi për t’iu shmangur njohjes së Kosovës, sigurisht se kurrë nuk do të merret vesh. Mirëpo, se si i është drejtuar në mënyrë dramatike publikut  ka zbuluar më shumë se sa është dashur. Vuçiqi, në fakt, ka shprehur dëshirën që Serbia t’i bëjë hetimet, ka premtuar zbulimin e vrasësit dhe i ka qëruar hesapet me të gjithë ata të cilët «kanë marrë guximin të mendojnë se ai personalisht ka ndonjë lidhje me këtë».

Dialogplus

Drejtori i Policisë serbe, Vladimir Rebiq, ka thënë se ende nuk kanë përgjigje nga EULEX-i dhe UNIMK-u lidhur me kërkesën e Serbisë për të përfshirë autoritetet në hetimin e vrasjes së Oliver Ivanoviçit.

VOAL – Në faqen e tij në internet, radiotelevizioni B92, njofton se presidenti Vuçiç do të kalojë të shtunën dhe të dielën në Kosovë, lajmin e ka bërë të ditur të martën kabineti i presidentit serb.

Vuçiçi, sipas B92, do të vizitojë Mitrovicën, Graçanicën dhe Llapja Sellën të shtunën në mbrëmje, në mënyrë që të qëndrojë e të bisdojë me serbët në Kosovë.

B92 njofton se më herët të martën Vuçiçi tha se vrasja e politikanit serb Oliver Ivanoviç në veri të Kosovës ishte një akt terrorist dhe Serbia do ta trajtojë si akt terrorist.

Sipas B92, Vuçiçi njoftoi se Serbia iu ka kërkuar EULEX-it dhe UNMIK-ut të marrë pjesë në hetimin në territorin e Kosovës.