Presidenti i Serbisë, Aleksandër Vuçiq, ka paralajmëruar se në muajin shtator, mund të ketë “një lloj vazhdimi të Samitit të Berlinit”.

“Mendoj se duhet kohë, për të folur për disa gjëra. Ju e dini se unë e urrej ta gjuaj fajin në anën tjetër, të përmendi taksat (shënim i redaksisë: të cilat qeveria e Kosovës i ka vendosur për mallra nga Serbia dhe Bosnje e Hercegovina, në fund të vitit 2018). Le të presim që fuqitë e mëdha të bëjnë gjërat e tyre, pastaj ne do të dalim me qëndimin tonë”, tha Vuçiq.

Ai e bëri deklaratën, përderisa së bashku me presidentin e Francës, Emmanuel Macron, takuan përfaqësuesit e Zyrës Rajonale për Bashkëpunimin e të Rinjëve.

Në këtë takim, temë kyçe ka qenë bashkëpunimi rajonal dhe situata në Ballkanin Perëndimor.

Presidenti i Francës, Macron e përfundon të martën vizitën dyditore në Serbi.

Gjatë kësaj vizite ai ka thënë se Evropa duhet ta mbështesë rinisjen e dialogut për normalizim marrëdhëniesh midis Kosovës dhe Serbisë, në mënyrë që të gjendet një zgjidhje konkrete në muajt e ardhshëm.

Franca dhe Serbia nënshkruan një sërë marrëveshjesh në fushën e ekonomisë dhe atë të mbrojtjes.

Ministri i Jashtëm serb Ivica Daçiç tha të premten se puna e tij është të sigurojë që asnjë  vend tjetër të mos e njohë Kosovën.

“Unë do të shkoj kudo sepse kjo është puna ime,” tha Daçiç për RTS.

Kreu i diplomacisë serbe tha se Serbia është e suksesshme në politikën e saj të bindjes së vendeve për të tërhequr njohjen e Kosovës dhe se disa vende perëndimore janë të shqetësuar nga kjo.

Daçiç tha se shumë vende me të cilat Serbia po rinovon marrëdhëniet nuk janë vizituar për shumë dekada.

Shtypi i Prishtinës njoftoi se zyrtarët e Kosovës janë të pakënaqur sepse për më shumë se një vit asnjë vend i ri nuk e ka njohur zyrtarisht Kosovën./B92

Ambasadori i Francës në Serbi, Frederic Mondoloni, tha të premten në Beograd se vizita e presidentit francez, Emmanuel Macron, në Serbi, më 15 dhe 16 korrik, është shenjë e interesimit të Parisit për Serbinë si “partner i parë në rajon”.

Kjo vizitë, sipas tij, shpreh edhe interesimin e shtetit francez për Ballkanin Perëndimor.

“Kjo tregon një interes të ri të Francës për Ballkanin Perëndimor në përgjithësi, dhe dëshirën që marrëdhënies dypalëshe me Serbinë – sigurisht partnerin tonë të parë në rajon – t’i japim një shtysë të re”, tha ai.

Ambasadori njoftoi hapjen e një zyre rajonale të Francës në Beograd, për të ndihmuar në forcimin e lidhjeve “evropiane” dhe për të siguruar “tranzicionin drejt zhvillimit të qëndrueshëm”.

Presidenti i Francës, Emmanuel Macron pati thirrur një samit me vendet e Ballkanit Perëndimor më 1 korrik në Paris, mirëpo ai u anulua. Takimi, nën organizimin e Macronit dhe kancelares gjermane, Angela Merkel, ishte paralajmëruar gjatë një takimi të formatit të ngjashëm në Berlin, në fund të prillit.

Të dy udhëheqësit evropianë kishin provuar të bindin, Kosovën dhe Serbinë, të vazhdojnë dialogun, mirëpo palët nuk ishin tërhequr nga pozicionet e tyre.

Serbia kërkon heqjen e taksës ndaj mallrave serbe, në mënyrë që të vazhdojë dialogun, ndërkaq kryeministri i Kosovës, Ramush Haradinaj insiston në një kornizë marrëveshje për dialogun i cili, sipas tij, duhet të prodhojë njohjen e Kosovës nga ana e Serbisë.

Nikos Dendias, një grek me origjinë nga Himara është ai të cilit kryeministri i Greqisë Qiriakos Micotaqis i ka besuar drejtimin e politikës së jashtme.

Gazeta Dita ka zbuluar se si janë marrëdhëniet e tij me Shqipërinë?

60-vjecari me profesion avokat që ka lindur në ishullin e Korfuzit ka deklaruar shpesh me krenari origjinën e tij nga Shqipëria. Disa herë në studiot televizive ai eshte shprehur se të parët të tij ishin nga Himara. Një vit më parë kur Dendias ishte një nga zërat më të fortë të opozitës dhe ngrinte dyshime mbi politikën e jashtme të Aleksis Tsiprasit kritikoi në distancë dhe kryeministrin Rama.

“Më bën pershtypje të jashtezakonshme që kryeministri Rama nuk ka qëndrime pro greke. Më bën pershtypje sepse zoti Rama është çerek grek, gjyshen e tij Anagnosti e njihja ne Korfuz” thoshte ai kur qe në opozitë.

Po në atë kohë ai ka mbajtur qëndrime të ashpra edhe ndaj Shqipërisë:

Duhet të mbrojmë të drejtat tona, minoritetin grek në vendin fqinj dhe nuk mund të lejojme që vendi të bëhet terren për kërcenime. Shqiperia ka nevoje per marredhenie te mira me Greqine, edhe me BE. Kemi shume menyra dhe mjete per ti bere presion Shqiperisë. Ata nuk duhet mund të besojnë se mund të bëjne ç’te duan”, shprehej ai.

Hashim Thaçi mbrëmë ka kërkuar sqarim nga kryeministri i Maqedonisë së Veriut Zoran Zaev për telefonatën e tij me komikët rusë, se kinse ka marrëveshje mes Thaçit e dhe Vuçiçit për ndarjen e Kosovës.

Pavarësisht se Thaçi thotë se ideja që Kosova t’i jep 10 komuna Serbisë buron nga shkrimet e gazetës serbe Sputnik, një gjë të tillë nuk e thotë edhe kryeministri i Maqedonisë, Zoran Zaev.

Ai sot përsëri para mediave ka thënë se fjalët e tij kanë qenë të bazuara në atë që flitet në opinion dhe në atë që ka dëgjuar duke mos përmendur as edhe njëherë Gazetën Sputnik.

“Biseduam me Thaçin, kërkoi sqarim. Këmbeva edhe mesazh me presidentin e Serbisë, Aleksandar Vuçiq. Dëshiroj edhe një herë të shfrytëzoj rastin nëse me deklaratën i kam prekur qytetarët apo presidentin e Kosovës nuk e kam pasur këtë qëllim. Ne jemi vende shumë miqësore. Unë shpresoj, të paktën e ndjej ashtu, se jam mik i qytetarëve të Kosovës. Asnjëherë nuk kemi pasur detaje për procesin negociues, siç deklarova edhe paraprakisht. E gjithë ajo që është temë e bisedimeve në çfarëdo kuloaresh kur bisedojmë prej asaj çfarë është e pranishme në opinion dhe ngjashëm. Edhe presidenti Thaçi, edhe presidenti Vuçiq e dinë se ne nuk dimë dhe nuk kemi ndarë informacione”, deklaroi sot Zoran Zaev.

Ndërkaq paraprakisht Presidenti i Kosovës Hashim Thaçi tha kinse Zaev i ka thënë se informatat për shkëmbim të territoreve mes Kosovës dhe Serbisë dhe dhënien e 10 komunave e ka marrë nga Gazeta Sputnik.

“Unë mbrëmë kam zhvilluar një bisedë telefonike me Zaevin, rreth 20 minuta. Ai më ka thirrur për t’u sqaruar me atë që ai ka biseduar me njerëzit që e kanë thirrur. Më ka thënë qartë se kjo ka qenë një rrethanë ku ka rënë pre e mashtrimit. Gjoja se 10 komunat që do t’i jepen Serbisë janë të bazuara në thashetheme dhe dezinformata dhe në të dhënat e Gazetës Sputnik dhe thashethemet ruse. Më ka kërkuar falje mua personalisht dhe Kosovës dhe në të njëjtën kohë ka potencuar se ato që ai ka folur me mashtruesit, të cilët e kanë thirrur në telefon, se nuk ka asnjë fakt, asnjë evidencë, as informacion zyrtar për atë që ka deklaruar, por të gjitha janë të bazuara në thashetheme” tha sot para mediave Hashim Thaçi.

Në bisedën telefonike të publikuar nga komedianët rus, Zaev dëgjohet duke thënë se ka informata për ndarjen e Kosovës dhe se në marrëveshje parashihet që 10 komuna kosovare t’i jepen Serbisë. Sipas tij, në lojën për shkëmbimin e territoreve janë të përfshirë edhe Rusia dhe Turqia.

Presidenti i Serbisë, Aleksandër Vuçiq tha se ai e bëri “një pjesë të mirë të punës”, në furnizimin e serbëve në Kosovë për nevojat themelore, të paktën për muajin e ardhshëm.

“Ia arritëm të sigurojmë një pjesë të mirë, por si e bëmë këtë, nuk do të flas”, i tha Vuçiq, Radio Televizionit të Serbisë.

I pyetur për zgjidhjen e problemit të Kosovës, ai tha se kjo pyetje është mbi të gjitha “për shqiptarët dhe serbët”.

“Nëse do të na kishin lënë të qetë, me siguri se deri tani do të kishim rënë dakord. Por problemi është se Kosova nuk është një pyetje e ish-Jugosllavisë, kurrë nuk ka qenë një çështje e popujve që jetojnë atje”, tha Vuçiq.

Që nga nëntori i vitit të kaluar, Qeveria e Kosovës ka vendosur tarifën ndaj mallrave serbe, duke nxitur reagimin e Beogradit, dhe pezullimin nga ana e tij, të pjesëmarrjes në bisedimet për normalizimin e raporteve, që po zhvilloheshin me lehtësimin e Bashkimit Evropian.

Ditë më parë, afaristët në veri të Kosovës, i mbyllën për një periudhë dyditore të gjitha dyqanet, duke thënë se nuk kanë furnizim me mallra nga Serbia për shkak të tarifës.

Qeveria e Kosovës kundërshton heqjen e tarifës duke kërkuar njohjen nga ana e Serbisë të pavarësisë së Kosovës.

Grekët votuan të dielën në zgjedhjet e para parlamentare që kur vendi doli nga tri programe ndërkombëtare të shpëtimit, por ende po përballet me krizën financiare gati dhjetëvjeçare.

Pas numërimit të më tepër se gjysmës së votave, doli se zgjedhjet i ka fituar Kryetari i Partisë Konservatore Kyriakos Mitsotakis.

Kryeministri Alexis Tsipras pranoi humbjen në zgjedhjet e së dielës dhe telefonoi menjëherë rivalin e tij konservator Kyriakos Mitsotakis, për ta uruar për fitoren.

Rezultatet paraprake tregojnë se Partia Konservatore “Demokracia e Re” e zotit Mitsotakis ka fituar 39.7 për qind të votave, ndërsa “Partia Syriya” e zotit Tsipras ka marr; 31.5 për qind.

Parashikohet që Mitsotakis të ketë siguruar një shumicë të konsiderueshme të vendeve në Parlamentin grek.

Në një fjalim që mbajti të dielën në mbrëmje në qendër të Athinës, zoti Tsipras tha “Qytetarët e bënë zgjedhjen e tyre, ne e respektojmë plotësisht votën e popullit.”

Zgjedhjet u organizuan tre muaj para afatit, pas humbjes së kryeministrit Alexis Tsipras në zgjedhjet për Parlamentin Evropian.

Anketat flisnin se grekët janë të vendosur të kundërshtojnë prirjen e fundit evropiane të rritjes së mbështetjes për partitë populiste dhe udhëheqësi konservator opozitar, Kyriakos Mitsotakis, ishte favorit i zgjedhjeve të sotme.

Votimet e së dielës ndodhin në një periudhë kur vendi po rimëkëmbet nga një krizë e rëndë financiare që shkaktoi shkallë të lartë të papunësisë e varfërisë.

Mbijetesa e saj varej deri në verën e kaluar nga programet ndërkombëtare të shpëtimit dhe Greqia u detyrua të kryej reforma të thella, përfshirë shkurtimet masive të shpenzimeve dhe rritjen e taksave, për t’u kualifikuar për kreditë e shpëtimit

Alexis Tsipras, 44 vjeçar, përveç masave të shpëtimit, ai arriti një marrëveshje me Maqedoninë fqinje për ndryshimin e emrit të saj. Marrëveshja e mbështetur nga aleatët perëndimor, zemëroi shumë grekë të cilët e shohin përdorimin e emrit të Maqedonisë si shprehje të synimeve ekspansioniste ndaj krahinës greke me të njëjtin emër.

Kyriakos Mitsotakis, i biri i ish kryeministrit grek dhe vëlla i ish ministrit të Jashtëm grek, është zotuar ta bëjë Greqinë më miqësore ndaj bizneseve, të tërheqë investime të huaja, të modernizojë burokracinë greke dhe të ulë taksat./VOA

Ligjvënësi amerikan dhe Kryetar i Komisionit për Marrëdhënie me Jashtë të Dhomës së Përfaqësuesve, Eliot Engel vazhdoi të dielën viziton në Shkup. Ai u prit nga kryetari i Parlamentit të Maqedonisë së Veriut, Talat Xhaferi.

Ligjvënësi Engel, sipas një komunikate nga kabineti i zotit Xhaferi, ka shprehur mbështetjen e fuqishme amerikane për anëtarësimin e Maqedonisë së Veriut në NATO dhe ka përshëndetur përcaktimin e Shkupit për marrëdhënie të mira fqinjësore dhe për guximin për zgjidhjen e çështjeve të hapura.

Zoti Xhaferi është shprehur se ligjvënësi ka dhënë një kontribut të rëndësishëm në mirëqenien e rajonit dhe për suksesin e Maqedonisë së Veriut drejt integrimit në NATO.

Zoti Engel mbrëmë u takua me Kryeministrin Zoran Zaev. Autoritetet maqedonase shprehen mirënjohëse për rolin e ligjvënësit amerikan dhe konkretisht, për letrën që Engel së bashku me kolegun e tij Michael McCaul i dërguan Sektrearit të Shtetit Mike Pompeo në lidhje me mbështetjen e Maqedonisë së Veriut për integrimet Euroatlantike.

Shkupi e shikon Amerikën si një partner të rëndësishëm strategjik, që në vazhdimësi e ka përkrahur në çdo plan vendin e vogël ballkanik.

Zoti Engel tha se “Maqedonia e Veriut po shkon drejt kahjes së duhur”.
Ndalesa e tij në Shkup është pjesë e turneut që bëri në Beograd, Preshevë, Prishtinë e Tropojë.

Kryeministri i Republikës së Kosovës, Ramush Haradinaj, e ka përsëritur vazhdimisht që marrëveshja finale ndërmjet Kosovës dhe Serbisë duhet të përfundojë me njohje reciproke në kufijtë ekzistues, dhe me integrim të Kosovës në NATO e Kombe të Bashkuara.

Megjithatë kryeministrja e Serbisë, Ana Brnabiq, thotë se Serbia nuk ka fare nevojë për njohjen e Kosovës pasi që është anëtare e Kombeve të Bashkuara.

“Unë nuk e di se cili është kuptimi që Kosova ta njohë një shtet që është anëtar i Kombeve të Bashkuara. Ne absolutisht nuk kemi nevojë për njohjen e Prishtinës”, ka thënë ajo, shkruan ‘Novosti’, transmeton Gazeta Express.

Sipas saj ky qëndrim i palës kosovare është një tregues që Kosova nuk është duke dëshiruar vazhdimin e dialogut.

Kryetarja e Qeverisë serbe ka thënë se ֛çështja e njohjes reciproke nuk është fare në tavolinën e diskutimeve.

“Ramush Haradinaj nuk dëshiron dialog, ndërsa në anën tjetër bëhët kinse dëshiron zgjidhje për dialogun”, ka shtuar Brnabiq.

Përveç tjerash Brnabiq sot ka deklaruar se kryeministri Haradinaj i ka thënë se është ‘lajm i rremë’ se Kosova ua ka ndaluar hyrjen në Kosovë të gjithë zyrtarëve serbë. Një gjë të tillë e kanë konfirmuar edhe nga Qeveria e Kosovës, ndërsa nga MPJ-ja e Behgjet Pacollit kanë insistuar se një vendim i tillë që ua ndalon hyrjen zyrtarëve serbë është marrë në koordinim me Qeverinë./GazetaExpress/

Athinë

Presidenti i Serbisë, Aleksandër Vuçiq, ka thënë se situata në veri të Kosovës, është komplekse dhe po bëhet gjithnjë e më e vështirë, veçanërisht në spitalin e Mitrovicës së Veriut.

Vuçiq tha se vështirësitë më të mëdha të furnizimit në atë pjesë janë për shkak të taksës së vendosur nga Prishtina, ndaj mallrave nga Serbia dhe Bosnje e Hercegovina.

Duke komentuar hapjen e pikave të shitjes nga ana e autoriteteve të Prishtinës, pasi për dy ditë me rradhë, afaristët serbë i mbyllen dyqanet, presidenti Vuçiq tha se kjo është bërë me qëllim që “serbët të harrojnë lidhjen me atdheun e tyre”.

“Objektivi kryesor i këtyre masave të Prishtinës, është ta marrë veriun e Kosovës, dhe të dëbojë popullsinë serbe nga mbarë Kosova”, tha Vuçiq.

Të hënën, afaristët serbë në veriun e Kosovës, i mbyllën dyqanet pasi thanë se nuk posedojnë furnizim me mallra, për shkak të taksës 100 për qind të vendosur nga autoritetet në Prishtinë për mallrat nga Serbia.

Qeveria e Kosovës më pas vendosi të hapë pika të shitjes mobile për banorët e asaj pjese.

Gjatë një takimi të martën në mbrëmje, të Shoqatës së Afaristëve të veriut, u vendos që të mërkurën të hapen gjitha pikat e shitjes në veri.

Autoritetet në Serbi disa herë kanë thënë se veriu i Kosovës po ballafaqohet me “krizë humanitare”, por këto pretendime janë kundërshtuar nga ana e institucioneve të Kosovës, duke e quajtur këtë “inskenim të Beogradit”.

Prej ca kohësh politikanët në Beograd japin gjithnjë e më shumë deklarata për ndikimin vendimtar të Amerikës në procesin e zgjidhjes së ҫështjes së Kosovës, gjë që bie në kundërshtim me deklaratat e mëparshme. Kur Prishtina insistonte për përfshirjen e Amerikës në procesin e Kosovës, Beogradi i refuzonte idetë e tilla, duke theksuar se në këtë rast Serbia do të kërkonte që në dialog të përfshihej edhe Rusia.

Megjithatë, sidomos pas anulimit të samitit në Paris, që në Beograd mes të tjerash shihet edhe si një humbje e Bashkimit Evropian (BE), është evidente se tani gjithnjë e më shumë shpresat varen në fuqinë politike dhe diplomatike të Amerikës.

Ministri serb i Punëve të Jashtme Ivica Dačić tha se dështimi i samitit në Paris tregoi se pa SHBA asgjë nuk mund të kryhet, dhe pak më vonë dërgoi një serë komplimetsh në adresë të administratës amerikane, duke thënë se: administrata e Trumpit ka qenë shumë korrekte përsa i përket dialogut me Prishtinën dhe se pas një kohe të gjatë nuk është paraqitur si problem, por si një faktor që ҫon përpara dialogun”

Por ndoshta më ilustrative ishte deklarata e kryetarit të delegacionit parlamentar të Serbisë në Asamblenë e NATO-s, Dragan Shormaz, i cili theksoi se „do të kishte qenë më mirë që ҫështja e marrëdhënieve të Beogradit dhe Prishtinës të përfundohej para zgjedhjeve në SHBA vitin e ardhshëm, me ndihmën e Donald Trumpit dhe SHBA”. Shormaz theksoi më tej se presidenti i Serbisë Aleksandar Vuҫiҫ po punon për përmirësimin e raporteve me SHBA dhe se rezultatet janë të dukshme.

Vazhdim i lëvizjeve të gabuara

E gjithë seria e deklaratave tregon se Serbia nuk ka një strategji të mirëmenduar në politikën e jashtme, e kjo është vetëm vazhdim i lëvizjeve të gabuara të diplomacisë serbe, si në rastin kur kreu i shtetit u përfshi në fushatën e Hillary Klintonit, vlerëson për DW Naim Leo Beshiri, drejtor i Institutit të Çështjeve Evropiane.

„Kjo tani më duket si një përpjekje për të qëndruar në anën e Amerikës, e cila në mënyra të ndryshme përpiqet të lajë hesapet me BE. Nga ana tjetër Amerika e ka njohur Kosovën, por nuk është edhe aq kundër idesë së rishikimit të kufijve dhe këtu ndoshta presidenti Vuҫiҫ ndoshta ka gjetur vend për bisedime. Në Serbi do të konsiderohej si humbje më e vogël, nëse do të merreshin disa territore, edhe pse të gjitha analizat tregojnë se kjo do të sillte përfitime afatshkurtra, dhe do të hapnin shumë ҫështje të tjera në afat më të gjatë, veҫanërisht kur është fjala për Bosnnjë-Hercegovinën”, paralajmëron Beshiri.

Kosova – si një kartë për t‘i bërë presion BE

Unë dyshoj që Amerika të ketë ndonjë plan konkret për Kosovën, thotë për DW komentuesi i ҫështjeve të politikës së jashtme, Boshko Jakshiҫ, dhe shton: „Dështimi i BE për të bërë hapa përpara në dialog ka hapur ҫështjen e zmadhimit të rolit të SHBA. Ashtu si presidenti amerikan u bëri thirrje presidentëve të Serbisë dhe të Kosovës që të mos e humbasin shansin historik, tani edhe Departamenti i Shtetit i ofron ndihmë Brukselit të dobësuar, por thonë pa patur qëllim që të shtyjnë mënjanë evropianët. Akoma nuk e dimë se cila është përmbajtja e këtij shansi historik, ka mundësi që të mos e dinë as amerikanët – por e qartë është se Uashingtoni mund ta përdorë Kosovën për të vazhduar presionin ndaj aleatëve evropianë, për ta kuptuar përfundimisht se kush është i zoti i shtëpisë”, thotë Jakshiҫ.

Serbia pa veprime serioze

Nga ana tjetër, nëse shikoni faqet kryesore të mediave pranë pushtetit, Amerika vazhdon të jetë armiku numër një i Serbisë dhe këtë moment e thekson për DW edhe Naim Leo Beshiri. Kjo, sipas fjalëve të tij, nuk i shërben vullnetit të deklaruar publikisht nga Serbia, për të përmirësuar marrëdhëniet me Amerikën:

“Aktualisht në administratën amerikane ka një të ashtuquajtur garniturë antiestablishment, e cila i trajton në një mënyrë disi më të lehtë marrëdhëniet ndërkombëtare, gjë që në një farë mënyre është më pranë mentalitetit këtu dhe si Serbia i sheh këto marrëdhënie, kështu që në këtë moment është një klimë e favorshme, që Serbia të gjejë bashkëbisedues në Uashington. Por unë në fakt nuk shoh asnjë fushatë serioze, apo aktivitet të Serbisë në Uashington, që mund të sillte një pozitë më të mirë të Serbisë, kur është fjala për Kosovën”, vëren Beshiri.

Vuçiç para KS të OKB

Beogradi dhe Prishtina janë momentalisht në të njëjtën sintoni, sepse Serbia dhe Kosova mendojnë se roli i Amerikës do të jetë kyҫ për zgjidhjen e problemit të Kosovës. Kjo mund të nënkuptojë që të dyja palët nuk besojnë në fuqinë e Bashkimit Evropian për ta ҫuar deri në fund këtë proces, dhe po krijohet përshtypja se Uashingtoni po shihet gjithnjë e më shumë si negociator kryesor apo si partner në këto bisedime në vend të Brukselit. Boshko Jakshiҫ mendon se kjo është dukja në vështrim të parë, por se Beogradi në këtë kontekst kalon pa parë disa gjëra shumë të rëndësishme, para së gjithash që Uashingtoni natyrisht nuk do të heqë dorë nga pavarësia e Kosovës:

“Le të mos harrojmë se Uashingtoni prej kohësh përsërit të njëjtën mantër, që njohja reciproke është mënyra më efikase dhe më e shpejtë për zgjidhjen e problemit të Kosovës. Nëse Beogradi është i gatshëm të dëgjojë Uashingtonin, atëherë kjo mund të nënkuptonte që Beogradi i afrohet ndonjë varianti konsensi për pavarësinë e Kosovës”, thotë Jakshiҫ.

Kosova nuk është prioritet

Përpjekjen e Beogradit që në bashkëpunim me Uashingtonin të përshpejtohet procesi për Kosovën, apo që ai të përfundojë disi deri në fund të mandatit të parë të Trumpit, Naim Leo Beširi e sheh si një iluzion të zakonshëm.

“Mund të themi se kjo mund të ndodhë, nëse presidenti Trump e ka vënë Kosovën lart në agjendën e tij, por kjo momentalisht nuk është absolutisht e vërtetë dhe nuk ekzistojnë as shenjat, që do të jetë. Nëse Trump fiton mandatin e dytë, ekziston mundësia që Amerika të merret më shumë me rajonin.

Por këtu dua të them për të gjithë Ballkanin, sepse Amerika nuk është e interesuar veҫanërisht për Serbinë apo për vende të tjera të rajonit, por Ballkanin ata e shohin si të tërë. Dhe kjo përsëri mund të nënkuptojë që Amerika të heqë dorë nga ideja e rishikimit të kufijve, sepse ajo është e keqe për të gjithë rajonin”, vlerëson Beshiri.

Zgjidhja në kohën e Trumpit

Nxitimi, që është i dukshëm në Beograd dhe theksi në rolin amerikan për Kosovën, interpretohet si frikë nga kthimi i administratës demokrate në Uashington. Serbia vlerëson, dhe për këtë ka folur edhe ministri Daҫiҫ, se fitorja e kandidatit të demokratëve do të ishte një lajm shumë i keq për Serbinë dhe praktikisht kthim i administratës së Klintonit. Prandaj edhe retorika në Serbi është kthyer në periudhën pas fitores së Donald Trumpit, kur ka patur shpresa të mëdha dhe është pritur një mirëkuptim më i mirë nga administrata e re amerikane. Prandaj edhe Boshko Jakshiҫ paralajmëron se edhe këtë herë ҫdo gjë mund të përfundojë si në fillimin e mandatit të Trumpit, kur kemi parë tituj ‘Trump, o serb!’.

„Ne priremi të jemi euforikë, por postulatet bazë të politikës amerikane megjithatë nuk do të ndryshojnë. E qartë është se do të vazhdohet me presione të mëtejshme ndaj Serbisë, në mënyrë që të pajtohet me disa zgjidhje, të cilat edhe sot e kësaj dite zyrtarisht i refuzon”, përfundon Jakshiҫ./DW

Presidenti i Republikës Serbe, Milorad Dodik i ka dërguar ftesë presidentit të Kosovës, Hashim Thaçi për të marrë pjesë në Samitin e Banja Llukës.

Mirëpo, Dodik ka theksuar se kjo ftesë nuk është për Thaçin si president i Republikës së Kosovës.

Ai ka thënë se Thaçi mund të marrë pjesë si përfaqësues i Prishtinës në këtë Samit.
“Nëse ai do të vijë si Prishtinë dhe nën fusnotë, le të vijë. Nëse nuk është problem për të, pse të jetë për ne”, ka deklaruar Dodik.

Më tej Dodik ka thënë se e ka bërë të qartë qëndrimin e tij për Thaçin duke shtuar se ai duhet të kuptojë që Kosova është pjesë e Serbisë.

Sipas kabinetit të Dodikut, pjesëmarrja e Kosovës në SEECP u zgjidh në vitin 2014 me pëlqimin e të gjithë pjesëmarrësve që nuk e njohin Kosovën: Serbia, Greqia, Rumania, Moldavia dhe Bosnje Hercegovina.

KOSOVË

Kryesuesi i Presidencës së Bosnje e Hercegovinës Milorad Dodik i ka dërguar ftesë zyrtare presidentit të Kosovës Hashim Thaçit për të marrë pjesë në samitin e Procesit të Bashkëpunimit në Evropën Juglindore, njofton portali Klix.ba.

Sipas Klix, presidenti Thaçi javën e ardhshme do të marrë vendimin nëse do t’i përgjigjet ftesës. Mediat boshnjake përkujtojnë se presidenti i Kosovës muajin e kaluar ka refuzuar të marrë pjesë në konferencën vjetore të BERZH-it në Sarajevë për shkak se Bosnja nuk e ka pranuar Kosovën, transmeton KP.

Samiti do të fillojë më 1 korrik 2019, ndërsa janë planifikuar takime të ministrave dhe presidentëve të vendeve të Evropës Jugore në Jahorinë dhe në zyrën e Presidencës së BeH. Sipas Klix, presidentët e shteteve të rajonit do të priten në qilimin e kuq para ndërtesës së Presidencës së BeH, ku do të jenë të vendosur pjesëtarët e Forcave të Armatosura të BeH.

Ftesa me nënshkrimin e Dodik tashmë u janë dërguar presidentëve të rajonit, sikurse edhe presidentit Thaçi, nëpërmjet Ministrisë së Punëve të Jashtme të BeH, shkruan Klix. Po ashtu, ftesat janë dërguar edhe në adresat e të gjitha ministrive të Jashtme të vendeve të Samitit të Procesi i Bashkëpunimit në Evropën Juglindore- SEECP.

Kryetari i Lidhjes së Social-Demokratëve të Vojvodinës, Nenad Çanak, në një intervistë për gazetën Blic të Serbisë, ka deklaruar se Kosova nuk është pjesë e Serbisë, dhe se këtë realitet Serbia duhet ta pranojë në mënyrë që të zgjidhej përfundimisht problemi.

Ai shtoi se duke e njohur Kosovën, “neve na shtohen garancitë ndërkombëtare se interesat kulturore dhe ekonomike të Serbisë në Kosovë do të jenë të mbrojtura, e mbi të gjitha të përcaktuara”, transmeton Gazeta Express.

“Kosova nuk është Serbi, por një vend ku jetojnë disa njerëz që kanë njësi të plotë shtetërore”, tha Çanak.

Çanak, i cili është nga Vojvodina, e jo shpesh herë ka kërkuar më shumë autonomi për krahinën veriore të Serbisë, ka thënë se edhe Vojvodina duhet të zhvillohet duke e pasur pasurinë e vet e jo të ardhurat e saj të menaxhohen nga “disa zyra në Beograd”.

Ai gjithashtu tha se ka bashkëpunim të ngushtë me liderët e opozitës, por më së shumti bashkëpunon me liberalin Çedomir Jovanoviç.

Drejtori i Zyrës për Kosovën në Qeverinë e Serbisë, Marko Gjuriq, u takua në Berlin me një delegacion të Prishtinës, për t’u përgatitur për takimin në Paris, por takim atje nuk do të ketë, tha presidenti i Serbisë, Aleksandar Vuçiq, transmeton Shërbimi i Ballkanit i Radios Evropa e Lirë.

Vuçiq u tha gazetarëve në Minsk, ku po qëndron për vizitë, se ai e ka dërguar Gjuriqin në atë takim dhe se kjo nuk është sekret.

“Nuk ka asnjë sekret, është përgatitje për takimin në Paris. Marko Gjuriqin e kam dërguar atje (në Berlin) dhe kam thënë se Serbia do të jetë konstruktive dhe se duam vazhdimin e dialogut dhe heqjen e taksës. Por shqiptarëve kjo nuk u bie në mend dhe nuk ka rezultate”, tha Vuçiq.

Qeveria e Kosovës deri tash nuk e ka konfirmuar takimin në Berlin, të cilit iu referua Vuçiq.

Vuçiq tha se edhe gjermanët dhe francezët e kanë kuptuar se kush nuk dëshiron dialog dhe kush e frenon atë dhe “kush dëshiron që në vend të Evropës, dikush tjetër të merret me dialog”.

Dialogu midis Kosovës dhe Serbisë për normalizimin e marrëdhënieve, i cili ka nisur qysh në vitin 2011, është ndërprerë në fund të vitit të kaluar, për shkak të taksës që Kosova u ka vënë prodhimeve të importuara nga Serbia.

Vuçiq këmbëngul se dialogu nuk do të vazhdojë pa heqjen e taksës.

Qeveria e Kosovës, e udhëhequr nga kryeministri Ramush Haradinaj, thotë se taksa nuk do të hiqet derisa Serbia ta njohë Kosovën – edhe pse thirrje për heqjen e saj kanë bërë edhe Bashkimi Evropian, edhe Shtetet e Bashkuara.

Më 1 korrik në Paris është paralajmëruar mbajtja e një takimi midis përfaqësuesve të Kosovës dhe Serbisë, nën organizimin e kancelares gjermane, Angela Merkel, dhe të presidentit të Francës, Emmanuel Macron.

Presidenti i Serbisë, Aleksandar Vuçiq, tha se gjatë dhjetë ditëve të ardhshme do ta ftojë përsëri presidentin e SHBA-së, Donald Trump, të vizitojë Serbinë, si dhe do të “përpiqet të flasë” për Kosovën me disa bashkëpunëtorë të ngushtë të Trumpit. Ai tha se do të kërkojë mbështetjen për një zgjidhje kompromisi për çështjen e Kosovës.

Vuçiq i bëri këto komente kur u pyet për festimin në Kosovë të 20 vjetorit të hyrjes së trupave të NATO-s, dhe deklaratën e bërë nga zëvendës-ndihmës sekretari amerikan i shtetit, Metthew Palmer, se SHBA-ja do të vazhdojë të jetë në anën e Kosovës.

“Natyrisht që Amerika është në anën e Kosovës dhe do ta mbrojë atë. Këtë e bëjnë edhe Gjermania dhe vendet e tjera të Kuint-it, dhe për ne problemi është më i madh dhe më i vështirë”, tha Vuçiq.

Ai shtoi se ky është një problem kyç për Serbinë, por se vendi do të vazhdojë të luftojë për interesat kombëtare.

“Qëllimi ynë është që Serbia të mos ketë armiq, dhe se me ata që dikur ishim, përpiqemi të kemi marrëdhënie normale dhe të balancuara,” tha Vuçiq.
Zëvendës-ndihmës sekretari amerikan i shtetit, Metthew Palmer, në një intervistë për Radion Evropa e Lirë, u bëri thirrje Prishtinës dhe Beogradit të kthehen në tryezën e bisedimeve duke deklaruar se zgjidhja më e mirë është njohja e ndërsjellë. Ai, sërish porositi autoritetet e Kosovës të heqin taksën ndaj mallrave serbe, në mënyrë që të mundësohet vazhdimi i dialogut.

Presidenti i Serbisë, Aleksandar Vuçiq, ka thënë se ai pajtohet për përcaktimin e kufirit me Kosovën duke theksuar se kjo do të ishte “absolutisht gjëja më e shëndetshme për Serbinë dhe serbët”.

Ai i tha Televizionit Prva, se një referendum në këtë temë do të thirret nëse ai do të ketë diçka për t’i ofruar popullit, megjithatë, siç ka thënë, ende nuk ka një propozim konkret.

“Unë jam për përcaktimin e kufirit dhe për këtë nuk turpërohem, por serbët janë kundër kësaj, dhe unë e kam kuptuar porosinë e popullit. Ne, nuk jemi të gatshëm të dëgjojmë të vërtetën për Kosovës, edhe kur të gjithë e dinë atë. Njerëzit nuk dëshirojnë ta pranojnë sepse kjo prek emocionet e tyre”, ka thënë Vuçiq.

Duke folur për sesionin e ardhshëm të Këshillit të Sigurimit të OKB-së, për gjendjen në Kosovë, Vuçiq tha se seancat e Këshillit të Sigurimit janë gjithmonë të rëndësishme për “çështjen e statusit”, por ai vlerësoi se samiti i Parisit në fillim të korrikut, i organizuar nga presidenti i Francës, Emmanuel Macron dhe kancelarja gjermane, Angela Merkel është “shumë i rëndësishëm”, megjithatë, siç tha ai, nuk është e sigurtë nëse ai do të mbahet fare.

Gjykata e Lartë në Podgoricë e ka dënuar Vllado Zmajeviqin me 14 vjet burg për krime lufte kundër popullatës civile në Kosovë.

Ai u shpall fajtor për vrasjen e katër civilëve shqiptarë në fshatin Zhegër të Gjilanit në vitin 1999.

Kryetari i Trupit Gjykues, Dragoje Jovoviq, në shpjegimin e aktgjykimit të tij, deklaroi se dëshmitë e paraqitura padyshim se “vërtetuan se krimet e luftës janë kryer, pasi për ato kanë dëshmuar dëshmitarët, por edhe vetë i akuzuari e ka pranuar në fazën e parë hetimore, por më vonë i ka mohuar ato deklarata”.

Zmajeviq ka të drejtë të apelojë aktgjykimin në Gjykatën e Apelit.

Në gusht të vitit 2016, Prokuroria Speciale e Mali të Zi për krim të organizuar dhe krime lufte konfirmoi se kishte arrestuar Vllado Zmajeviqin (47 vjeç) nga Nikshiqi me dyshimin se “ka kryer krime lufte kundër popullatës civile në Kosovë më 1999”.

Drejtori i Fondit për të Drejtën Humanitare në Kosovë, Bekim Blakaj i kishte thënë Radios Evropa e Lirë, se Vllado Zmajeviq ishte i pari në listë për krimet në Zhegër të Gjilanit.

Në bazë të hulumtimeve gjatë vitit 2000, Fondi ka dokumentuar se në këtë krim janë vrarë gjashtë persona, më 29 dhe 30 mars 1999.

“Në bazë të dëshmive të dëshmitarëve, më 29 mars 1999, tetë autobusë, sipas të gjitha gjasave, me vullnetarë të Ushtrisë Jugosllave, kanë arritur në fshat dhe kanë vrarë gjashtë persona. Natyrisht, të gjithë civilë të përkatësisë shqiptare, në mesin e të cilëve edhe pleq dhe gra”, kishte deklaruar Blakaj.

Në një konferencë rajonale në Shkup të titulluar “ Integrimet europiane në udhëkryq” nën organizimin e Klubit të Podgoricës, pjesë e të cilit janë ish –Presidentë dhe Kryeministra të vendeve të rajonit Kroacisë, Malit të Zi, Kosovës, Maqedonisë, Shqipërisë, Bosnjës dhe Sllovenisë janë kritikuar idetë për korrigjimin e kufijve

Në një deklaratë të ish – Presidentëve të rajonit ku kanë marrë pjesë ish –Presidenti i Kroacisë Stipe Mesiq, ish –Presidenti i Kosovës Fatmir Sejdiu, Ish – Presidenti i Shqipërisë Alfred Mojsiu, ish- Presidenti i Maqedonisë Branko Crvenkovski dhe ish udhëheqës tjerë të rajonit është miratuar edhe një deklaratë ku theksohet se “ ne anëtarët e Klubit të Podgoricës shprehim gatishmërinë tonë që të bëjmë gjithçka që të parandalojmë që Ballkani Perëndimor përsëri të jetë viktimë e ideve dhe trendëve retrograde”

Klubi i Podgoricës ndër të tjera ka theksuar se është e një rëndësie të veçantë që BE të aprovojë datën e fillimit të negociatave për anëtarësim të Shqipërisë dhe Maqedonisë së Veriut në BE.

“Shtyrja e mëtejme e këtyre vendimeve në kontekstin e tashmë gjeopolitik dhe gjeoekonomik mund të ketë ndikim të dëmshëm edhe në nivel të brendshëm edhe në atë rajonal. Jemi dëshmitarë të sfidave të rendit global që bazohet në vlerat e përbashkëta dhe demokratike të shoqërive dhe mundësinë që ato të kenë ndikim negativ në Ballkanin Perëndimor” thuhet në deklaratën e ish-Presidentëve dhe kryeministrave.

Më pas ata kanë bërë edhe një referencë direkte në lidhje me situatën në Kosovë e në Bosnjë e Serbi duke theksuar se idetë retrograde të ndarjeve që i shkojnë kundër bashkëpunimit rajonal e që nxisin izolacionizëm, politikën e kthimit prapa dhe që bazohen në popullizëm në vend se të bazohen në vlerat e përbashkëta dhe standardet europiane, për fat të keq, nuk janë vetëm kujtime të largëta historike por përbëjnë një kërcënim serioz për Ballkanin Perëndimor.

Javën e kaluar në Parlamentin e Serbisë, është mbajtur një seancë në të cilën është diskutuar për Kosovën. Aty kanë marrë pjesë edhe krerët e shtetit serb, përfshirë presidentin serb, Aleksander Vuçiq.

E një seancë të tillë e kishte bojkotuar opozita serbe, por jo edhe kreu i Partisë Liberale Serbe, Çedmoir Jovanoviq, i cili me fjalimin e mbajtur kishte heshtur të gjithë, madje edhe Vuçiqin, Gjuriqin e Sheshelin.

Jovanoviq fare pa iu trembur syri, i thoshte Vuçiqit se shqiptarët e Kosovës kanë të drejtë të kenë shtetin e tyre, sikurese çdo popull tjetër, duke ia përsëritur disa herë, se ajo që është humbur një herë nuk mund të humbet për të dytën.

“Nuk mund të humbet diçka për herë të dytë, ajo që ne në Kosovë kemi humbur. Sado e rëndë që mund të jetë kjo, nuk mundet. Nuk mund të qëndrosh dy herë në ujë të njëjtë”, ka thënë Jovanoviq, transmeton Gazeta Express.

Sipas tij, me Kosovën mund të fitohet vetëm një gjë, paqja.

“Thuajeni atë që duhet thënë patjetër. Ne në Kosovë, mund të fitojmë atë që asnjëherë si popull nuk e kemi pasur, paqen zotri president. Paqen mund ta fitojmë”, ka shtuar kreu i liberalëve të Serbisë.

Gjatë fjalimit të tij, Jovanoviq i ka kujtuar Vuçiqit se shqiptarët janë populli i fundit në Ballkan, që ka luftuar për çlirim kombëtar. Ai përsërit që Serbisë para paqes më Kosovën, i duhet paqe me vetveten.

“Populli shqiptar është populli i fundit ballkanik, që bëri luftën e tij për çlirim kombëtar. Për shtetin e tij kombëtar, në një kohë që askush nuk e bën. Me më pak, ose më më shumë gjak, siç kanë qenë të gjitha luftërat kombëtare në Ballkan. Neve na nevojitet paqe me shqiptarët. Por para kësaj paqe, na duhet paqe me vetveten .. paqe me vetën tonë”

Ai thotë se nuk duhet humbur kohë dhe se duhet filluar bisedimet për paqe, duke thënë se taksa e vendosur nga Kosova nuk është problem i Serbisë, por i një lufte të brendshme politike ndërmjet Haradinajt dhe Thaçit.

Megjithatë Jovanoviq thotë se këtë luftë të brendshme në Kosovë, dikush po e shfrytëzon për të bllokuar dialogun.

“Shikoni se si është bota në të cilën po jetojmë. Është turbulluar nga koka. Të gjithë thonë se duhet të presim edhe pak, të presim edhe pak. Hajde të presim pra. Por ne nuk kemi kohë. Tashmë koha nuk numërohet me vite, por me muaj. Patjetër që duhet të vazhdohen bisedimet. Kush e di se çfarë do të dali tjetër pas asaj taksës. Haradinaj nuk dëshiron që ta shoh Hashim Thaçin se si e bën Kosovën shtet. Por a është ky problemi ynë? Jo. Nuk është ky problemi ynë, është i tyre. A e ka shfrytëzuar dikush këtë problem të tyre, për të bllokuar bisedimet?. PO!. “, ka shtuar ndër të tjera Jovanoviq.

Politikani serb thotë që nëse Serbia nuk ndihmon veten dhe shqiptarët që të bëjën Kosovën një shtet normal, atëherë shumë probleme të tjera do të lindin.

“Nëse ne nuk e ndihmojmë shqiptarët dhe veten që ta bëjnë Kosovën shtet normal, do të bashkohet me Shqipërinë, pastaj do të hapet problemi i Maqedonisë, pastaj do të hapet problemi i Malit të Zi, i veriut të Greqisë”, është shprehur Çedomir Jovanoviq, transmeton Gazeta Express.

Jovanoviq në këtë fjalim në Kuvend para syve të Vuçiqit e Gjuriqit, përsëriste vazhdimisht faktin se Kosova ka të drejtë të ketë shtetin e vet.

“Duhet të bëjmë gjithçka për të vendosur paqe me shqiptarët. Ai popull sigurisht që duhet të ketë shtetin e vet. Ai popull duhet patjetër që të ketë shtetin e vet, siç duhet edhe ne”, shprehet Jovanoviq.

Në fund thotë se duhet gjetur një kompromis me shqiptarët, por jo një kompromis në të cilin janë të përziera politika të vejtra, të cilat i kanë sjellë Serbisë vetëm humbje.

“Gjeni një kompromis, por në atë kompromis të mos ketë politika të vjetra, dhe nuk guxon të ketë asnjë mirëkuptim për idetë humbëse që na kanë sjellë në këtë situatë”, ka përfunduar Jovanoviq.

E gjatë gjithë këtij fjalimi të Çedomir Jovanoviq, Vuçiq dhe Gjuriq qëndronin të heshtur./GazetaExpress/

Ministri i Mbrojtjes së Serbisë, Aleksander Vulin, i ka reaguar ashpër presidentit të Maqedonisë Veriore, Stevo Pendarovski, i cili ka kundërshtuar ashpër idenë e Hashim Thaçit dhe Aleksander Vuçiqit, për korrigjim të kufijve ndërmjet Kosovës dhe Serbisë.

Vulin ka thënë se si i zgjidhin punët e veta Kosova dhe Serbia, nuk është një temë që i takon të flasë Pendarovskit.

“ Se si dëshiron të zgjidh Serbia problemet e brendshme nuk është temë për presidentin e Maqedonisë fqinje. Nëse idjea për korrigjim të kufijve është e ‘tmerrshme dhe e papranueshme për shekullin 21”, atëherë lë ta tërheq Maqedonia njohjen për Kosovën’, ka thënë Vulin.

Vulin ndër të tjera ka thënë se Pendrovski duhet të respektojë Serbinë, duke shtuar se ndoshta duhet të flasë pak edhe për nismën e Thaçit dhe Ramës për krijimin e “Shqipërisë së Madhe”, shkruan B92, transmeton Gazeta Express.

Pendarovski dje ka thënë se ideja për prekje të kufijve nuk i përket shekullit 21, dhe sipas tij nuk mund të ketë diçka më të keqe, se sa dikush të përpiqet të shtyjë një ide të tillë përpara./GazetaExpress/

Presidenti i Serbisë, Aleksandar Vuçiq, tha se është absolutisht i bindur se gjërat do të zhvillohen në drejtimin, që, sipas tij, e ka paralajmëruar presidenti i Kosovës, Hashim Thaçi, kur ka folur për mundësinë e bashkimit të Kosovës me Shqipërinë.

“Jam absolutisht i bindur se gjërat do të zhvillohen në këtë dejtim. Ne do të reagojmë në mënyrë serioze dhe të përgjegjshme, por të ashpër dhe të vendosur”, tha Vuçiq, transmetojnë mediat serbe.

Ditë më parë, presidenti i Kosovës, Thaçi, tha se po krijohen rrethana të reja, të cilat, sipas tij, e ofrojnë bashkimin e Kosovës me Shqipërinë si zgjidhjen më të mirë.

Thaçi inkurajoi Parlamentin e Kosovës dhe atë të Shqipërisë të nxjerrin deklaratën e bashkimit.

Por Vuçiq tha se komuniteti ndërkombëtar e ka siguruar se një gjë e tillë nuk do të ndodhë.

“Para tri ditësh iu kam thënë përfaqësuesve evropianë për këtë që po më pyesni (bashkimin e Kosovës dhe Shqipërisë) dhe ata më kanë thënë: Aleksandar, kjo nuk do të ndodhë. Ne nuk do ta lejojmë kurrë”, tha Vuçiq, por shtoi se pikërisht këto deklarata janë arsyeja përse ai beson se një gjë e tillë do të ndodhë.

Kosova, qysh në vitin 2011, është në proces të bisedimeve për normalizimin e marrëdhënieve me Serbinë.

Por procesi ka ngecur qysh në fund të vitit të kaluar, për shkak të, siç është thënë, taksës që u ka vënë Kosova prodhimeve të importuara nga Serbia.

GREQI

Athina zyrtare ka reaguar pas marrjes së rekomandimit pozitiv nga Komisioni Europian për Shqipërinë për negociatat. Ministria e Jashtme e Greqisë deklaron se mbështet bashkimin e Shqipërisë me Unionin duke përmbushur të gjitha kushtet dhe duke evidentuar sërish çështjen e minoritetit grek në Shqipëri.

Sipas Ministrisë së Jashtme greke, respekti për minoritetin është i lidhur drejtpërdrejt me perspektivën europiane të vendit. Greqia kërkon garantim të së drejtës për vetëvendosje të minoritetit në të gjithë territorin shqiptar.

“Greqia po punon për të përmirësuar, marrëdhëniet dypalëshe me Shqipërinë dhe mbështet në mënyrë të palëkundur mënyrën me të cilën i bashkohet unionit evropian, duke përmbushur te gjitha kushtet e caktuara.
Siç është e qartë dhe në raportin përkatës të Komisionit Europian respekti për të drejtat e minoritetit grek është i lidhur drejtpërdrejt me perspektivën europiane të Shqipërisë dhe është pjesë integrale e 5 prioriteteve për hapjen e negociatave me Bashkimin Evropian.
Në këtë kontekst, ne presim garantim të plotë të së drejtës së vetëvendosjes së minoritetit në të gjithë territorin e Shqipërisë. Një masë e premtuar nga Shqipëria për t’u miratuar deri në maj 2018″, deklaron MPJ greke.

Ministri i Jashtëm i Kosovës, Behgjet Pacolli, i ka dërguar një porosi kryeministres së Serbisë, Ana Brnabiq se ajo nuk do të mund të hyjë në Kosovë për sa kohë ndjek një ideologji raciste dhe të sëmurë kundër popullit të Kosovës dhe ndërmjet etnive që jetojnë këtu.

Regimi i shefit të diplomacisë kosovare vjen pasi kryeministrja serbe shqiptarët e Kosovës sot i quajti “njerëz që vijnë nga mali”.

Pacolli, përmes një postimi në Facebook, ka thënë se “I pështirë dhe krejtësisht të papranueshëme komentet e Kryeministres serbe Ana Brnanic në prani të shefit të Delegacionit të BE-së në Serbi, Sem Fabrizi ndaj Kosovës “që kemi të bëjmë me njerëz që vijnë nga mali”.

Postimi i Pacollit në Facebook:

“I pështirë dhe krejtësisht të papranueshme komentet e Kryeministres serbe Ana Brnanic në prani të shefit të Delegacionit të BE-së në Serbi Sem Fabrizi ndaj Kosovës ‘që kemi të bëjmë me njerëzit që vijnë nga mali’. 

Ky racizëm i institucionalizuar në Serbi, që ka brumin në ideologjinë ultranacionaliste të sëmurë që promovon Qeveria e Ana Brnabicit. 

Shpresoj që Evropa sot të kuptojë se me çfarë lloj njerëzish kemi të bëjmë, me ata që kanë mbështetur vrasjet masive dhe mohojnë krimet e luftës të kryera nga Beogradi në ish-Jugosllavi.

E them me përgjegjësi që sa të jem unë ministër i jashtëm i Republikës së Kosovës, nuk do të lejojë që Kryeministrja serbe të hyjë në Kosovë, për sa kohë që ajo të ndjek një ideologji raciste dhe të sëmurë kundër popullit të Kosovës dhe ndërmjet etnive që jetojnë këtu”, ka shkruar Pacolli.

Mediat serbe kanë raportuar se kryeministrja serbe, Ana Brnabiq, në një konferencë shtypi sot në Beograd, me shefin e delegacionit të BE-së në Serbi, Sem Fabrizio, duke folur për zhvillimet e fundit në raportet mes Kosovës dhe Serbisë, ka fyer rëndë shqiptarët e Kosovës, duke thënë se “keni punë me njerëz të cilët faktikisht kanë dalë nga mali. Për ata është njësoj nëse atje ka luftë ose jo, dhe kjo më shqetëson”.

Serkan Golge

Një shkencëtar turko-amerikan, i cili ka punuar për agjencinë hapësinore të Shteteve të Bashkuara NASA, u lirua nga një burg në Turqi.

Serkan Golge, i cili është mbajtur tre vjet në izolim nën akuza që lidhen me terrorizmin, u lirua pas një bisede telefonike midis presidentit turk, Recep Tayyip Erdogan, dhe presidentit amerikan, Donald Trump.

Shpjegim zyrtar për lirimin e 40-vjeçarit nuk u dha.

Uashingtoni i ka kërkuar vazhdimisht Turqisë të lirojë Golgen.

Golge është arresuar në vitin 2016, derisa ka qenë për pushime në Turqi.

Arrestimi ka pasuar përpjekjen e ushtrisë turke për grushtshtet kundër Erdoganit.

Ai është akuzuar për pjesëmarrje në një organizatë terroriste dhe është dënuar në shkurt të vitit 2018 me shtatë vjet e gjysmë burgim.

Dënimi i tij është reduktuar në pesë vjet pas një apeli.

“E mirëpresim lajmin për lirimin nga burgu të Serkan Golges”, tha zëdhënësja e Departamentit amerikan të Shtetit, Morgan Ortagus.

Golge ka studiuar efektet e rrezatimit tek astronautët që udhëtojnë drejt planetit Mars.

Gruaja e tij tha se puna e tij është ndërprerë pasi ai është dënuar.