Nga 13 kandidatët e listës “Guxo” të Vjosa Osmanit, shtatë kanë arritur të sigurojnë ulëse në Kuvendin e Kosovës.

Vjosa Osmani, personi më i votuar në zgjedhjet e parakohshme parlamentare 2021, ka fituar mbi 300 mijë vota, ndërkaq pas saj renditen gjashtë bashkëpunëtorët e saj.

Lista e plotë:

Vjosa Osmani

Donika Gërvalla

Haxhi Avdyli

Faton Peci

Doarsa Kica Xhelili

Jeta Statovci

Burim Karameta.

Ka vdekur sot Enver Krasniqi, prokuror i Prokurorisë Speciale të Kosovës. Prokurori Krasniqi ka vdekur para rreth një ore.

Lajmin për vdekjen e prokurorit Enver Krasniqi e ka konfirmuar për kallxo.com Blerim Isufaj, kryeprokuror i Prokurorisë Speciale.

Ai ka thënë se vdekja e prokurorit është natyral. Prokurori Enver Krasniqi ishte duke hetuar rastin e vjedhjes së 2.1 milionë eurove nga Thesari i shtetit.

Vjedhja e 2,1 milionë eurove ka ndodhur më 21 tetor 2020.Ditë më parë, Prokuroria Speciale njoftoi se janë bllokuar 600 mijë euro të vjedhura dhe se dy persona të dyshuar janë në paraburgim, ndërkohë që janë ngrirë 34 llogari bankare.

Kryetari i Lëvizjes Vetëvendosje Albin Kurti, u ka nisur letra presidentit të Turqisë, Recep Tayyip Erdogan dhe kryeministrit izraelit Benjamin Netanyahu, në të cilat është zotuar për thellim të bashkëpunimit, kur të formojë qeverinë e re në Kosovë.

Në letrën dërguar Erdoganit, Kurti ka thënë se turqit në Kosovë dhe shqiptarët në Turqi janë ura e miqësisë në mes të të dyja vendeve.

“Ne vlerësojmë rolin e turqve në Kosovë dhe ata do të vazhdojnë të kenë rol të rëndësishëm edhe në qeverinë time”, ka thënë Kurti.

Në letrën dërguar Netanyahut, lideri i LVV-së ka përshëndetur arritjen e marrëdhënieve diplomatike mes Kosovës dhe Izraelit, dhe se ky hap për Kurtin nënkupton mundësi “për të fuqizuar bashkëpunimin ekonomik, politik dhe kulturor”.

“Kombi ynë ka respektuar historikisht komunitetin hebre. Si kryeministër i ardhshëm i Republikës së Kosovës, më vjen mirë që do të adresoj çështjet me rëndësi për komunitetin hebre dhe trashëgimin në shtetin tonë”, është thënë mes tjerash në letër.

Më 1 shkurt, Kosova dhe Izraeli në një ceremoni virtuale, kanë zyrtarizuar vendosjen e marrëdhënieve diplomatike.

Ministri i Punëve të Jashtme të Izraelit, Gabriel Ashkenazi atë ditë ka deklaruar se ka miratuar kërkesën e ministres në detyrë të Punëve të Jashtme dhe Diasporës së Kosovë, Meliza Haradinaj-Stublla që Kosova të hapë ambasadën në Jerusalem.

Së fundmi në Kosovë ka pasur debate lidhur me vendin se ku do të vendoset ambasada kosovare në Izrael.

Ambasada turke në Prishtinë kishte kundërshtuar më herët hapjen e ambasadës së Kosovës në Jerusalem.

Në takimin e 1 marsit mes liderit të Vetëvendosjes, dhe ambasadorit turk në Prishtinë Çağri Sakar, Kurti ka paralajmëruar se do ta shqyrtojë çështjen se në cilin qytet do të vendoset ambasada, në Tel Aviv apo Jerusalem, duke shtuar se për këtë gjë do të shohin “edhe dokumentacionin e qeverisë në ikje”.

Megjithatë, Kurti ka thënë se vendosja e marrëdhënieve diplomatike mes Kosovës dhe Izraelit është e rëndësishme dhe “mundësi e mirë për zhvillim”. rel

Komisioni Qendror i Zgjedhjeve tha se të premten në mesnatë ka përfunduar procesi i vlerësimit të pakove me fletëvotime nga jashtë, ku janë refuzuar rreth 20 mijë e 400 zarfe me fletëvotime.

Zëdhënësi i KQZ-së, Valmir Elezi, gjatë një konference për media të shtunën, tha se janë pranuar rreth 53 mijë e 600 zarfe të ardhura nga jashtë për zgjedhjet e 14 shkurtit.

“Këto janë vetëm të dhëna preliminare sepse shërbimi votues është duke rishikuar bazën e të dhënave nga ku do të kemi të shifra e sakta dhe përfundimtare të numrit të fletëvotime nga jashtë vendit të cilat do të numërohen në Qendrën për Numërim dhe Rezultate”, tha Elezi.

KQZ-ja, shtoi Elezi, pret që gjatë të dielës të nisë numërimi i 31 mijë e 500 votave me kusht dhe rreth 2 mijë e 800 votave të personave me nevoja të veçanta. Ai tha se pas numërimit të votave me kusht, do të nisë edhe numërimi i fletëvotimeve të ardhura përmes postës.

Në Qendrën për Numërim dhe Rezultate, ndërkaq po vazhdon rinumërimi i 552 vendvotime. Deri më tani, sipas KQZ-së janë numëruar 88 për qind e këtyre vendvotimeve dhe ky proces pritet të përmbyllet më vonë gjatë ditës së shtunë.

Për zgjedhjet e parakohshme parlamentare të 14 shkurtit, të drejtë vote kanë pasur mbi 1.7 milion qytetarë të Kosovës.

Sipas të dhënave preliminare, Lëvizja Vetëvendosje ka fituar 47.85 për qind të votave, Partia Demokratike e Kosovës 17.41 për qind, pasuar nga Lidhja Demokratike e Kosovës me 13.08 për qind dhe Aleanca për Ardhmërinë e Kosovës ka fituar 7.43 për qind të votave. rel

Me 50 vota për, dhjetë kundër dhe nëntë abstenime, Komisioni për politikë të jashtme i Parlamentit Evropian ka miratuar raportin për Kosovën të përgatitur nga Viola Von Cramon-Taubadel, deputete e të Gjelbërve nga Gjermania.

Me këtë raport, Parlamenti Evropian u bën thirrje edhe një herë pesë shteteve të Bashkimit Evropian, të cilat nuk e kanë njohur Kosovën, që ta bëjnë një gjë të tillë. Spanja, Sllovakia, Rumania, Qiproja dhe Greqia janë pesë vende anëtare të BE-së nuk e kanë njohur pavarësinë e Kosovës.

Në një komunikatë të lëshuar nga PE-ja pas këtij votimi, thuhet se “deputetët nënvizojnë se pavarësia e Kosovës është e pakthyeshme dhe njohja nga të gjitha shtetet e BE-së do të ishte në dobi të normalizimit të raporteve mes Kosovës dhe Serbisë”.

Deputetët evropianë po ashtu kanë përsëritur edhe thirrjen për liberalizimin e vizave për Kosovën, pasi Komisioni Evropian qëmoti ka konstatuar se Kosova i ka përmbushur të gjitha kriteret e kërkuara.

Para se të votohej për raportin si tërësi, ishte votuar për amendamentet e veçanta të prezantuara nga deputetët e Parlamentit Evropian.

Raportuesja për Kosovën, Viola Von Cramon, e cila edhe e kishte përpiluar tekstin e raportit, është shprehur e kënaqur me miratimin e këtij raporti.

“Ky rezultat tregon se shumica në Parlamentin Evropian e mbështesin Kosovën në rrugën evropiane. Ne qartë shohim potencialin e këtij vendi, por edhe të Bashkimit Evropian. Por, ende ka punë përpara për Kosovën. Së pari na duhet një stabilitet politikë për zbatimin e reformave të nevojshme”, ka thënë Von Cramon teksa ka komentuar votimin për raportin për Kosovën.

Ajo ka thënë se edhe BE-ja ka “detyra të shtëpisë” për të bërë.

“Prandaj kemi bërë thirrje për Këshillin (e BE-së) që më në fund të miratojë vendimin për liberalizimin e vizave për qytetarët e Kosovës”, ka thënë Von Cramon.

Në raport, Kosova kritikohet për mungesë të progresit të duhur në shumë fusha, sidomos në zbatimin e prioriteteve të agjendës së reformave evropiane.

Deputetët shprehën keqardhje për vazhdimin e jostabilitetit politik dhe u kanë bërë thirrje të gjitha forcave politike në Kosovë që të angazhohen për reformën e sistemit politik, në mënyrë që të përmirësohet qartësia ligjore dhe procesi i formimit të qeverisë.

Po ashtu, kërkohet që Kosova të sigurojë reformën e sistemit gjyqësor në mënyrë që ai të jetë më transparent, efikas dhe pa ndërhyrje politike. Në të njëjtën mënyrë, kërkohet edhe reforma e administratës publike.

Në raport përmendet se Kosova ka një “mjedis pluralist dhe të gjallë mediatik”, por kërkohet që të garantohet transparencë e plotë e pronësisë së mediave dhe pavarësia dhe liria nga ndikimet politike.

Anëtarët e Parlamentit Evropian kanë përsëritur thirrjet që raportet e Kosovës me Serbinë të mbetet prioritet dhe kusht për avancimin e të dyja vendeve në procesin e integrimeve evropiane.

Ata kanë kërkuar nga qeveritë e të dyja shteteve që të përmbahen nga çfarëdo veprime që mund të pengojnë krijimin e besimit mes palëve, që do ta vinin në rrezik vazhdimin konstruktiv të dialogut. Nga Kosova është kërkuar që të përballet edhe me problemet e brendshme në qasjen e saj ndaj dialogut me Serbinë, që ndërmjetësohet nga BE-ja.

Të njëjtën ditë në Komisionin e politikës së jashtme është miratuar edhe Raporti për Serbinë. Edhe Serbisë i është dërguar porosia që të jetë konstruktive në dialog me Kosovën.

Deputetët kanë kritikuar fushatën kundër BE-së në Serbi, përfshirë edhe në mediat e financuara nga shteti. Ata kanë kërkuar që udhëheqësit politikë në Serbi të shprehen qartë dhe pa hezitim për orientimin pro-evropian të Serbisë. Po ashtu, eurodeputetët kanë kërkuar nga Serbia që t’i bashkohet qëndrimeve të BE-së në çështjet e politikës së jashtme.

Raportet për Serbinë dhe Kosovën, të miratuara në Komisionin e politikës së jashtme, do të barten në formën e propozimeve për rezolutë në seancë plenare të Parlamentit Evropian. rel

Politikani serb në Kosovë, Nenad Rashiq, ka organizuar një konferencë për media për të folur për rrahjen e djalit të tij nga një grup personash në Llapnasellë të Graçanicës.

Ai tha se Nikolla, djali i tij, ka pësuar lëndime të trupore si: prerje të buzëve, thyerje të dhëmbëve e gjakderdhje të madhe, raporton T7.

Teksa shtoi se ai është sharë para se të sulmohej, duke theksuar se dyshon se “sulmi ka qenë i organizuar dhe i planifikuar”.

Tutje, Rashiq tha se sulmuesit kanë pasur me vete thika, çekiq dhe boksa të hekurit.

“Çfarë kam dashur të theksoj në këtë konferencë që 15 vite merrem me politike dhe tentoj të jem sa më objektiv për fat të keq tek ne ka një burim negativ, vlerat tona morale janë kthyer përmbys. Kemi familje që s’kanë fëmijë të edukuar, kështu vijmë deri tek dukuritë si këto. Lus organet, policinë dhe prokurorinë, jo për Nikollen djalin tim që e ka paguar shtrenjtë, por edhe për fëmijët e tjerë”, tha ai ndër të tjera.

Zëdhënësi i Lëvizjes Vetëvendosje, Përparim Kryeziu ka reaguar pas vendimit që disa vota të diasporës të shpallen të pavlefshme, raporton Gazeta Express.

Në një shkrim në Facebook, Kryeziu ka thënë se kjo është dëshmia përfundimtare që procesi i votimit nga jashtë duhet të ndryshohet.

“E drejta për të votuar është e drejtë dhe njësi themeltare e demokracisë, për çka shteti demokratik dhe institucionet e tij kanë përgjegjësi që të gjejnë mënyrat më të përshtatshme për të garantuar ushtrimin e saj. Procesi i votimit duhet gjithmonë të jetë i lehtë dhe inkurajues.

Nëse nga rreth 200 mijë të regjistruar për votim nga jashtë dhe qindra euro pagesa për shërbim postar, një numër shumëfish më i vogël i tyre mbërrijnë në Kosovë me kohë, e shumëfish më i vogël numërohen si vota të vlefshme atëherë këtu problemi është sistemor e institucional. Prandaj edhe ndërhyrja duhet të jetë e këtillë”, ka thënë ai.

Sipas zëdhënësit të LVV-së, ky subjekt do të procedojë në Kuvend që të bëhet ndryshimi i ligjit në mënyrë që mërgata të ketë të drejtë të votojë në ambasada dhe konsullata.

“Me t’u formuar institucionet, ndër hapat e parë që Lëvizja VETËVENDOSJE! do të ndërmarrë në Kuvend është ndryshimi i ligjit ashtu që mërgata të ketë të drejtë të votojë edhe në ambasada dhe konsullata të Republikës së Kosovës. Bashkatdhetarët janë qytetarë të Republikës. Ata janë pjesë e pandashme e zhvillimit të vendit dhe vendimmarrjes në vend”, tha ai./GazetaExpress/

Shkrimi i plotë:

Numri i madh i raportuar i votave të pavlefshme nga mërgata është dëshmia përfundimtare që procesi i votimit nga jashtë duhet të ndryshohet menjëherë.E drejta për të votuar është e drejtë dhe njësi themeltare e demokracisë, për çka shteti demokratik dhe institucionet e tij kanë përgjegjësi që të gjejnë mënyrat më të përshtatshme për të garantuar ushtrimin e saj. Procesi i votimit duhet gjithmonë të jetë i lehtë dhe inkurajues. Nëse nga rreth 200 mijë të regjistruar për votim nga jashtë dhe qindra euro pagesa për shërbim postar, një numër shumëfish më i vogël i tyre mbërrijnë në Kosovë me kohë, e shumëfish më i vogël numërohen si vota të vlefshme atëherë këtu problemi është sistemor e institucional. Prandaj edhe ndërhyrja duhet të jetë e këtillë. Me t’u formuar institucionet, ndër hapat e parë që Lëvizja VETËVENDOSJE! do të ndërmarrë në Kuvend është ndryshimi i ligjit ashtu që mërgata të ketë të drejtë të votojë edhe në ambasada dhe konsullata të Republikës së Kosovës. Bashkatdhetarët janë qytetarë të Republikës. Ata janë pjesë e pandashme e zhvillimit të vendit dhe vendimmarrjes në vend.

Gjermania dhe Franca bënë thirrje për formimin e shpejtë të Qeverisë së re të Kosovës dhe për zgjedhjen e presidentit, sapo të finalizohen rezultatet e zgjedhjeve.

Në një postim në Twitter, ambasadori gjerman në Kosovë, Jorn Rohde, tha po ashtu se dy vendet “i urojnë qytetarët e Kosovës, Albin Kurtin, Lëvizjen Vetëvendosje dhe Vjosa Osmanin për rezultatin zgjedhor”.

Lëvizja Vetëvendosje, e udhëhequr nga Albin Kurti, i ka fituar zgjedhjet parlamentare të 14 shkurtit në Kosovë.

Vjosa Osmani ka qenë kandidate e listës së Vetëvendosjes për presidente.

Rezultatet janë ende preliminare, pasi kanë mbetur pa u numëruar votat nga diaspora, votat me kusht dhe votat e personave me nevoja të veçanta.

Kosova është me ushtruese të detyrës së presidentit, zonjën Osmani, qysh në nëntor, kur Hashim Thaçi ka dhënë dorëheqje nga pozita për t’u përballur me akuzat për krime lufte në Hagë.

Javën e kaluar, edhe ambasadori i Shteteve të Bashkuara në Kosovë, Philip Kosnett, u ka bërë thirrje partive fituese në Kosovë, që të formojnë Qeverinë “shpejt dhe me efikasitet”. rel

Qendra e numërimit të votave në Prishtinë.

Komisioni Qendror i Zgjedhjeve (KQZ) në Kosovë njoftoi se 3,435 zarfe me fletëvotime nga diaspora janë refuzuar.

Zëdhënësi i KQZ-së, Valmir Elezi, në një konferencë të mbajtur në Qendrën e Numërimit dhe Rezultateve (QNR), tha se “deri më tani, nga 11,653 pako të supozuara me fletëvotime që i janë nënshtruar procesit të vlerësimit, janë aprovuar 8,212 zarfe me fletëvotime, ndërsa janë refuzuar 3,435”.

Ai tha se arsyet e refuzimit të tyre janë të ndryshme.

“Disa prej këtyre pakove janë dërguar nga persona që nuk janë të regjistruar si votues jashtë Kosovës, gjatë periudhës së aplikimit. Po ashtu, disa prej tyre janë dërguar nga persona që janë refuzuar në periudhën e aplikimit. Rastet e tjera të refuzuara kanë të bëjnë me faktin se ato janë dërguar nga votues të paidentifikuar, apo ka pasur votim grupor”, tha Elezi.

Elezi foli edhe për procesin e rinumërimit të votave në 12 vendvotime në disa komuna.

Rinumërimi duhet të bëhet pasi gjatë pranimit të materialit zgjedhor, fletëvotimet nga këto vendvotime nuk kanë mundur të pranohen si të rregullta.

“Rrinumërimi i tyre do të bëhet gjatë ditës së sotme. Pas orës 14:00, besoj që do të përmbyllet ky proces. Ndërkaq, sa i përket mundësisë që të ketë sërish rinumërim të vendvotimeve të tjera, me rekomandim të QNR-së, ne nuk mund ta përjashtojmë këtë, për faktin se ka vendvotime, të cilat janë në procesin e auditimit aktualisht dhe duhet të presim procesin e auditimit për të parë nëse do të ketë nevojë për rinumërim”, tha Elezi.

Ende nuk ka një datë të saktë se kur do të nisë procesi i numërimit të votave të ardhura me postë nga diaspora në Kosovë, për zgjedhjet e përgjithshme parlamentare, që janë mbajtur më 14 shkurt.

Përveç votave nga diaspora, KQZ-ja nuk ka nisur as procesin e numërimit të votave me kusht dhe votave të personave me nevoja të veçanta.

Në bazë të rezultateve preliminare, zgjedhjet e 14 shkurtit i ka fituar Lëvizja Vetëvendosje, e pasuar nga Partia Demokratike e Kosovës dhe Lidhja Demokratike e Kosovës. rel

Lidhja Demokratike e Kosovës do të shkojë në zgjedhje të jashtëzakonshme brenda pak ditësh. Kështu ka konfirmuar kryetari në dorëheqje i këtij subjekti, Isa Mustafa që e ka udhëhequr këtë subjekt për tri mandate me radhë, shkruan Gazeta Express.

Por, çka thotë Statuti i Lidhjes Demokratike të Kosovës për dorëheqjen e kryetarit dhe brenda sa ditësh duhet të mbahen zgjedhjet e brendshme?

Neni 27 në statutin e LDK-së thotë se kryetari i këtij subjekti mund të japë dorëheqje pa i skaduar mandati.

Në rast se kryetari i LDK-së shkarkohet apo jep dorëheqje, atëherë saktësohet se brenda 60 ditësh duhet të thirret Kuvendi i LDK-së.

“27.1 Për punën e tij, Kryetari i përgjigjet Kuvendit të LDK-së. Me propozimin e 1/3 së anëtarëve të Kuvendit, mund të ngrihet çështja e votëbesimit të Kryetarit. Votimin për besim mund ta ngrejë edhe vetë Kryetari. 27.2 Me votim për shkarkim, në përputhje me nenin 21, pushon mandati i Kryetarit të LDK-së.

27.3 Kryetari mund të japë dorëheqje para skadimit të mandatit. 27.4 Në rast të paragrafit 2 dhe 3 të nenit 27, duhet të thirret Kuvendi i LDK-së, në afatin prej 60 ditësh”, thuhet në statut.

Neni 25 në statutin e LDK-së e saktëson se kryetari i këtij subjekti votohet në Kuvend të LDK-së me votim të fshehtë.

Kandidimi për kryetar bëhet në Kuvend. Secila kandidaturë duhet të miratohet me 50 për qind plus 1 të delegatëve të pranishëm.

Në rast se Kuvendi nuk aprovon më shumë se një kandidaturë, atëherë Kuvendi vendos për mënyrën e përzgjedhjes dhe votimit për Kryetar. Kryetari i LDK-së njëkohësisht është kryetar i Kuvendit, i Këshillit të Përgjithshëm dhe i Kryesisë së LDK-së.

Ani pse statuti i LDK-së thotë se kryetari i ri duhet të votohet brenda 60 ditësh, Isa Mustafa tha sot para mediave se një gjë të tillë do ta bëjë shumë më herët, pasi që do ta ftojë brenda pak ditësh mbledhjen e këshillit.

“Në shenjë të respektimit të kësaj vote dhe të hapjes së rrugëve të mëtutjeshme për riorganizim të LDK-së unë sot e kam njoftuar kryesinë që do ta thërras kuvendin për zgjedhjen e kryetarit të ri të LDK-së, me statut i kemi 60 ditë po unë do ta bëjë këtë shumë më shpejt”, tha Mustafa.

Nënkryetari i këtij subjekti ndërkaq, Lutfi Haziri ka thënë sot se e tërë kryesia është në dorëheqje.

“Nuk ka të bëjë me emra. Kryetari e tha, ne jemi kryesi në dorëheqje”, ka thënë Haziri para mediave, kur është pyetur nëse do të jetë ai kryetari i ri i LDK-së./GazetaExpress/

Pas publikimit të rezultateve të exit poll-eve, afër selisë qendrore të Vetëvendosjes në Prishtinë kanë filluar festa.

Në videon që e ka siguruar ‘T7’, shihet hedhja e fishekzjarreve në afërsi të selisë së saj, shkruan Gazeta Express.

Në shumicën e sondazheve të zhvilluara, Vetëvendosja është vënë e para.

Të përfshira në këta exit poll-a nuk kanë përfshirë votat nga diaspora.

Aeroporti Ndërkombëtar i Prishtinës “Adem Jashari”.

NATO-ja ka njoftuar për hapjen e linjave të reja në hapësirën e ulët ajrore mbi Kosovën. Në një njoftim të Aleancës Veri-Atlantike thuhet se kjo është një arritje e rëndësishme për normalizimin e hapësirës së ulët ajrore mbi Kosovën.

Kjo masë, sipas njoftimit, do të përmirësojë trafikun ajror civil nga dhe në aeroportin e Prishtinës.

“Përfitimet do të vërehen në udhëtime më të shpejta, më pak shpenzim i karburanteve dhe ulje të ndotjes së ajrit”, thuhet në njoftim. Që nga viti 1999 procesi i normalizimit të hapësirës ajrore të Kosovës është mbështetur në vazhdimësi nga NATO-ja.

Kjo është bërë në kuadër të takimeve për Normalizimin e Aviacionit në Ballkan, në kuadër të të cilave kanë marrë pjesë përfaqësues të vendeve Aleate, autoritetet e aviacionit, ato ushtarake dhe organizatat përkatëse ndërkombëtare, përfshirë Organizatën Ndërkombëtare të Aviacionit Civil, Agjencinë Evropiane të Sigurisë së Aviacionit.

Në vitet e fundit, NATO përmes Takimeve të Normalizimit të Aviacionit në Ballkan ka lehtësuar zyrtarizimin e një Marrëveshje Kuadër midis KFOR dhe Islandës. Agjencia e Sigurisë së Transportit të Islandës (ICETRA) tani po vepron si një Funksion i Mbikëqyrjes së Sigurisë dhe ofron mbështetje për Komandantin e KFOR-it.

Në përputhje me rezolutën 1244 të Këshillit të Sigurimit të Kombeve të Bashkuara dhe Marrëveshjen Teknike Ushtarake të vitit 1999, por edhe me ligjet e tanishme në Kosovë, komandanti i misionit të KFOR-it, përkatësisht NATO-s, është përgjegjës për sigurinë e hapësirës ajrore të Kosovës.

Kryetari i Lëvizjes Vetëvendosje, njëherësh kandidat për kryeministër, Albin Kurti deklaroi se në 14 shkurt qytetarët kosovarë janë përballë referendumit të dytë për të vendosur për të ardhmen e tyre. ka ftuar qytetarët që të dalin dhe të votojnë më 14 shkurt.

Sipas saj, dy dekada të keq-qeverisjes me dështime e me korrupsion, pa punë e pa drejtësi, duhet të marrin fund

“Qytetarë të dashur, në vitin 1991 ne kishim referendumin për pavarësi. Atëherë dolëm Krejt dhe vendosëm Drejt duke votuar masivisht për pavarësinë e vendit sepse e dinim vlerën e secilës votë. 30 vjet më vonë jemi përballë një referendumi të dytë për të vendosur për të ardhmen tonë. Dy dekada të keq-qeverisjes me dështime e me korrupsion, pa punë e pa drejtësi, duhet të marrin fund me 14 shkurt që ta kthejmë zhvillimin e ta bëjmë progresin. Prandaj duhet të dalim të gjithë, dhe secili, për ta bërë ndryshimin e madh.#KrejtDheDrejt për numrin 127, Lëvizja Vetëvendosje”, -thotë Kurti. Zgjedhjet e parakohshme parlamentare do të mbahen ditën e diel, më 14 shkurt. bw

Kryetarja e Listës së Bashkimit Socialdemokrat, Duda Balje, ka thënë se janë bërë gati për fushatë dhe zgjedhjet që do të mbahen më 14 shkurt.

“Gati jemi për zgjedhje, kemi bërë punë edhe për logjistikë edhe listën e kemi gati – sot po presim shortin për renditjen dhe të fillojmë fushatën”.

Ajo foli edhe rreth problemeve që kanë me Listën Serbe rreth përfaqësimit të minoriteteve brenda Kuvendit të Kosovës.

“Lista serbe do vota për vete, por kanë vendin e rezervuar dhe deri tash nuk kanë pasur konkurrencë e për këtë për ta ka qenë e lehtë të fitojnë 10 vende brenda Kuvendit. Pas deklarimit të ish-ministrit Rakiq ne kemi nis të dyshojmë se ata janë të interesuar edhe për më shumë ulëse”.

“Ata tashmë kanë filluar iniciativën e re të boshnjakëve dhe romëve në Mitrovicë dhe Graçanicë – kjo ende mbetet vetëm dyshim pasi nuk jemi të sigurt, por ne mund të shohim një plan sepse ata moti janë duke bashkëpunuar me vendin e goranëve brenda Parlamentit dhe tash ndoshta janë të interesuar për të siguruar edhe një vend boshnjakëve dhe romëve”.

Tutje Balje tregoi se Lista Serbe ka synim të marrë 2/3 brenda Kuvendit të Kosovës dhe kjo gjë është e rrezikshme.

“Mendoj se qëllim është të kenë 2/3 e komuniteteve brenda Kuvendit dhe kjo tregon fuqi”, tha Balje.

“Kjo gjë është e rrezikshme pasi nëse mund të mbërrijnë 2/3-tat atëherë disa ligje të fuqishme nuk mundesh me i votu me Kushtetutë pa pasur 2 të 3-tat. Mendoj se ky plan është duke u realizu dhe kjo për ta është e lehtë pasi pas zgjedhjeve kanë pasur 10 mijë vota shtesë dhe nëse prap ndodh e njëjta ata mund të shpërndajnë shumë lehtë ato 10 mijë vota në iniciativa që vet kanë formuar dhe të realizojnë planin e tyre”, tha Balje.

Balje tregoi se nuk di nëse Lista Serbe do të ketë ndonjë bashkëpunim me ndonjë subjekt politik kosovarë.

“Unë nuk e di nëse do të kenë ndonjë bashkëpunim me ndonjë parti kosovare, por në një emision televiziv kam dëgjuar se ata do të kenë bashkëpunime. Mbase ata kanë bërë ndonjë marrëveshje”.

Komisioni Qendror i Zgjedhjeve sot ka organizuar tërheqjen e shortit për renditjen e partive politike në fletëvotimin për zgjedhjet e 14 shkurtit, raporton Express.

Pas tërheqjes së shortit është bërë e ditur se Lëvizja Vetëvendosje do të ketë numrin 127, Lidhja Demokratike e Kosovës do të ketë numrin 132, Partia Demokratike e Kosovës do të ketë numrin 134, Aleanca për Ardhmërinë e Kosovës 135 dhe Nisma Socialdemokrate 121.

Më poshtë gjeni renditjen e partive të tjera në fletëvotimin për zgjedhjet e 14 shkurtit:

Partia Rome e Kosovës do të ketë numrin 117.

Lëvizja Përparimtare e Romëve të Kosovës do të ketë numrin 123.

Lëvizja për Bashkëveprim do të ketë numrin 116.

Kolicioni VAKAT do të ketë numrin 113.

FJALA do të ketë numrin 138.

Nova Demokratska Stranka do të ketë numrin 131.

NIsma Socialdemokrate do të ketë numrin 121.

Iniciative e Re Demokratike e Kosovës do të ketë numrin 111.

Partia Demokratike e Ashkalinjve të Kosovës do të ketë numrin 127.

Srpska Lista do të ketë numrin 119.

Srpski Demokratski Savez do të ketë numrin 118.

Roman Iniciativa do të ketë numrin 124.

Partia e Ashkalinjve për Integrim do të ketë numrin 130.

Kryetari i SDS, Sllavisha Petkoviq vlerëson se vizita e Albin Kurtit dhe Vjosa Osmanit në veri të Mitrovicës është rezultat i një marrëveshje të nënshkruar në Bruksel nga presidenti serb Aleksandar Vuçiq.

“Kjo marrëveshje mundësoi krijimin e zyrës së prokurorit, gjykatave, por edhe integrimin në policinë e Kosovës në veri të Kosovës.”

“Gjithashtu vlen të përmendet marrëveshja e arritur në Bruksel në të cilën Presidenti serb Aleksandar Vuçiq ra dakord që veriu të përfshihet në sistemin ligjor të Kosovës për sa i përket mbajtjes së zgjedhjeve lokale dhe parlamentare. Prandaj, tani është e qartë për të gjithë ata që miratuan që politikanët shqiptarë parakalojnë rehat dhe lirshëm në veri të Kosovës”, tha Petkoviq.

Albin Kurti dhe Vjosa Osmani vizituan dje minierën “Trepça” në veri, ndërsa u raportua se kjo vizitë u ndërpre pas një reagimi i serbëve lokal.

Kryetari i Vetëvendosjes, Albin Kurti i ka dërguar një mesazh të qartë kundërshtarëve pavarësisht se vendimi i Gjykatës Supreme ia ndaloi përfundimisht kandidimit.

Kurti ende s’ka pranuar vendimin, por ai thotë me ironi se disa mendojnë se ai ka një kundërshtar në këto zgjedhje.

Për Kurtin në këto zgjedhje ka luftë të ashpër për vendin e dytë, pasi dihet që tani kush do të jetë fituesi.

Edhe njëherë ai ka përsëritur qëllimin, se LVV kërkon 61 deputetë që i sigurojnë shumicën parlamentare.

“Ju njëmend besoni që unë kam kundërkandidat. Ka një garë të ashpër për vendin e dytë, fituesi i këtyre zgjedhjeve dihet se kush është. Ne synojmë që të kemi 61 deputetë. Ne nuk jemi duke bërë fushatë për kushdo të jetë në vendin e parë, pasi ajo dihet,” ka thënë Kurti.

Gjykata Speciale ka dërguar edhe një ftesë në Kosovë.

Deputetja e PDK-së, Ganimete Musliu ka bërë të ditur se ish-ushtarja e UÇK-së, Sadete Doda – Shota është ftuar nga Gjykata Speciale.

Ajo do të paraqitet në zyrat e EULEX-it në Fushë Kosovë me 26 janar.

“Çlirimitaret e Kosovës krenar po përballen me betejën e fundit për Kosovën. Rreshtit Çlirimitar edhe njëher është ftuar ti bashkohet edhe Sadete Doda-SHOTA. Ajo me datën 26.01.2021 do te paraqitet në zyrat e EULEX-it në Fushë Kosovë”, ka shkruar Musliu në rrjetin e saj social Facebook.

Postimi i plotë i Ganimete Musliut:

Çlirimitaret e Kosovës krenar po përballen me betejën e fundit për Kosovën. Rreshtit Çlirimitar edhe njëher është ftuar ti bashkohet edhe Sadete Doda-SHOTA. Ajo me datën 26.01.2021 do te paraqitet në zyrat e EULEX-it në Fushë Kosovë.

Çlirimitaret do kthehen faqebardhe por si do jetojne me turpin mjeranet qe deponuan dosje në Hage!

Edhe një ftesë nga Gjykata Speciale për ish luftarët e UÇK-së. Kësaj radhe, prokurori special ka ftuar në cilësinë e të dyshaurit, ish eprorin e UÇK-së, Florim Kllokoqin nga Mareci i Prishtinës.

Ftesa për ish pjestarin e Njësitit “Shigjeta”, ka ardhur para dy ditesh. “Kam marrë ftesë nga Gjykata Speciale për intervistim si i dyshuar për krime lufte ndaj njerëzimit”, ka thënë Kllokoqi.

Kllokoqi që pas Betejës së Pashtrikut, ka shërbyer si komandant i njësisë në Artanë (Novobërë) ka konfimruar ftesën dhe ka thënë se ndjehet krenar për të kaluaren e tij. Ish ushtaraku që jeton në Beligjikë me familje që nga viti 2000, ka thënë se do të bashkëpunoj me Hagën dhe është i bindur se në fund do të dal i pafajshëm, shkruan Magazina.al.

Ditën kur ka marrë ftesën nga Specialja, ka njoftuar edhe autoritet belge. Shteti belg menjëherë është angazhuar dhe është interesuar nëse shtetasit të tyre po i shkelen të drejtat e njeriut.

Kllokoqi ka jetuar në perëndim dhe është kthyer gjatë luftës në Kosovë. Përmes Betejës së Pashtrikut, me njësitin “Shigjeta” është futur në Kosovë, dhe ka qëndruar deri në çlirimin e vendit. Në vitin 2000 Kllokoqi është kthyer sërish për të jetuar në Belgjikë.

Gjyqtari i procedurës paraprake të Dhomave të Specializuara Nicolas Guillou ka refuzuar kërkesën e mbrojtjes së Kadri Veselit për lirim nga paraburgimi. Në arsyetimin e gjyqtarit të Hagës përmendet edhe e kaluara e Veselit si shef i Shërbimit Informativ të Kosovës(SHIK), raporton Gazeta Express.

Gjyqtari i procedurës paraprake Nicolas Guillou në vendimin e hudhjes poshtë të kërkesës për lirim të ish-kryetarit të Kuvendit të Kosovës, Kadri Veseli ka përmendur edhe organizatën të cilën e ka drejtuar Veseli nga viti 1999 deri në vitin 2008, Shërbimin Informativ të Kosovës apo siç njihet me shkurtesën SHIK.

Nicolas Guillou ka thënë se Gjykata e Qarkut e Prishtinës e ka vlerësuar të mundshme se SHIK-u ka qenë i përfshirë në disa raste kriminale ndonëse gjykata nuk ka mundur të bëjë gjetje.

“Më tutje, në këtë kontekst, gjykatësi i procedurës paraprake merr parasysh që Gjykata e Qarkut e Prishtinës e ka vlerësuar të mundshme se SHIK-u ka qenë i përfshirë në kryerjen e tri rasteve të vrasjes së rëndë, tentim të rrëmbimit dhe tentim të vrasjes së rëndë, ndonëse gjykata nuk ka mundur të bëjë një gjetje të tillë përtej dyshimit të bazuar”, thuhet në vendimin e gjyqtarit të procedurës paraprake Nicolas Guillou për refuzim të kërkesës për lirimin e Kadri Veselit.

Pjesë nga vendimi i Gjyqtarit të procedurës paraprake, Nicolas Guillou për refuzim të kërkesës për lirim të përkohshëm nga burgu të Kadri Veselit.

Prokuroria Speciale para disa ditësh kishte dërguar argumentet e saj në Gjykatën Speciale për ta kundërshtuar kërkesën e avokatit të Veselit Ben Emmerson për ta liruar përkohësisht nga burgu.

Prokuroria ka përmendur edhe mundësinë e dënimit të Veselit me burgim të përjetshëm, si një prej arsyeve se pse sipas tyre ai nuk duhet të lirohet as përkohësisht.

Ambasadori i Kosovës në Shkup, Gjergj Dedaj është kontaktuar nga Prokuroria Speciale, raporton Gazeta Express.

Dedaj ka shkruar në Facebook se është telefonuar nga Specialja dhe është njoftuar se i është caktuar prokurori i rastit.

“Diten e premte, te dates 22 janar 2021, ne oret e vona, permes telefonit, jam kontaktuar nga prokurori i Gjyjates Speciale, ne Hage!Qellimi i kesaj thirrje, sipas tyre ishte te me njohtojne me caktimin e prokurorit te rastit, siq me njohtuan, pa me specifikuar se per çfare rasti behet fjale”, ka shkruar ai.

Postimi i plotë:

U kontaktova nga Gjykata Speciale !

Diten e premte, te dates 22 janar 2021, ne oret e vona, permes telefonit, jam kontaktuar nga prokurori i Gjyjates Speciale, ne Hage!

Qellimi i kesaj thirrje, sipas tyre ishte te me njohtojne me caktimin e prokurorit te rastit, siq me njohtuan, pa me specifikuar se per çfare rasti behet fjale!

Veq tjerash, prokurori me pyeti se a kam ndonje kercenim apo ndonje shqetesim!

I thash s’kam patur dhe nuk kam asnje kercenim nga askush, e per sa i perket shqetesimeve,ia permenda shqetesimet i mija me rastin e infektimit tim dhe te gjithe antareve te familjes sime me virusin COVID-19, gjate muajit te kaluar.

Njekohesisht i vura ne dijeni se shqetesim i yni me i madh, tash e 22 vite, eshte edhe mos zbardhja e krimit serb mbi dhjetra antare te familjes sime, si dhe mos zbardhja e masakres se Mejes se Gjakoves, ku forcat serbe me 27 prill 1999, vrane mizorisht mbi 380 civil shqiptar te pafajshem, ndonese askush nuk eshte arrestuar nga serbet ,per kete masaker kunder njerzimit!

Njohtoj opinionin se jam i gatshem, perkunder deshires sime, ne çdo çast t’i pergjigjjem ftesave te Gjykates Speciale, per te deshmuar luften epike te drejt dhe çlirimtare te UÇK-se, per vetembrojtje, liri, drejtesi, barazi dhe pavaresi, duke kerkuar me çdo kusht, çmim e sakrifice,drejtesi dhe denim, per pergjegjesit e 400 masakrave makabre serbe ne Kosove , te 20.000 dhunimeve dhe afer 15.000 vrasjeve civile, ndaj popullates kosovare, gjate viteve 1998/1999,ne Kosove!

Mbase keto krime dhe ky gjenocid serb, ne Kosove, do duhej te kishte trajtim dhe pergjigje nga Drejtesia Nderkombetare!

Kandidatja e VV’së për deputete, Donika Gërvalla Schwarz, në emisionin DPT te Fidani në T7, ka thënë se Vjosa Osmanit nuk i mbeti vend në LDK.

Madje ajo tha se Osmanin e larguan partia e saj në mënyrën më të shëmtuar të mundshme.

“Osmanit nuk i mbeti vend në LDK, ajo nuk u largua, por e larguan në mënyrën më të shëmtuar të mundshme”, është shprehur Gërvalla Schëarz në T7.

Tutje, ajo sqaroi edhe pse u largua nga LDK’ja, shkruan Express.

“Momenti kur unë jam larguar nga LDK’ja nuk është përplasja ime fizike përpara Këshillit të Përgjithshëm por unë edhe mbas atyre skenave të shëmtuara jam munduar megjithatë brenda LDK’së të përpiqem që me sa më shumë njerëz të realizojmë atë që secili votues i LDK’së e ka kërkuar nga ne. Pra të rrijmë në LDK dhe të kujdesemi që LDK’ja të mos mbetet e pareformuar dhe të thyhet betoni që e ka krijuar Isa Mustafa me një pjesë të Kryesisë së LDK’së, që të gjithë i njohim”, tha

“Unë jam larguar nga LDK’ja në momentin që rezolucioni im ka qenë që sado djem e vajza të mira të këtë në këtë strukturë të LDK’së kaq është Kryesia e LDK’së jo e gatshme, ndoshta tërësisht e paaftë që t’i lejojë ata djem dhe vajza në këtë strukturë. Kur kam kuptuar që kjo strukturë s’bën reformë unë jam larguar”, shtoi ajo./Express/

Kandidatja për deputete nga radhët e VVsë, Donika Gërvalla, ka folur për herë të parë pasi u bë e ditur se do të kandidoj në zgjedhje. Ajo thotë se e sheh si kontribut të vetin për çlirim të Kosovës nga krimi dhe korrupsioni.

“Ka pak ditë që jam kthyer përsëri në Kosovë. Këtë herë për një kohë më të gjatë. Për herë të parë kandidoj që si deputete e Kuvendit të Republikës së Kosovës të jem pjesë e drejtpërdrejtë e politikës së vendit. E shoh këtë si kontribut timin për çlirimin e Kosovës nga krimi dhe korrupsioni i instaluar prei vitesh dhe hapjen e një perspektive më të mirë për të gjithë qytetarët e saj”, ka shkruar ajo.

Ajo thotë se do t’i ruajë mendimet e saja të pavarura përkundër futjes në parti politike.

“Unë në politikë mbetem ajo Donikë që kam qenë gjithmonë, me të gjithë personalitetin dhe bindjet e mia. Askush nuk do të mund të ma ndalojë mendimin e pavarur, të mësuar dhe ushtruar që në vegjëlinë më të hershme në Prishtinë dhe Dubovik. As respektin ndaj qytetarit në çdo cep të vendit. Kosova nuk është vetëm Prishtinë por është çdo qytet e fshat nga Dukagjini në Drenicë, nga Llapi në Anamoravë dhe sigurisht edhe në Mitrovicë”

Ajo thotë se gjatë javës së ardhshme do të bëhet e ditur se si ajo, dhe njerëz tjerë brenda listës së VV’së, mund të japin kontribut për vendin.

“Gjatë ditëve dhe javëve të ardhshme në këtë platformë, por edhe tjetërkund do të mund të lexohet konkretisht se si, së bashku me një grup të vogël, płot njerëz të guximshëm dhe të mençur, kemi menduar të japim kontributin tonë”, shtoi ajo. /Express/

Një aksident tragjik ndodhi mbrëmë në afërsi të Rubikut, ku një familje e tërë nga Kosova u shua. Nga aksidenti  humbën jetën 4 anëtarë të së njëjtës familje.

Makina kishte kaluar tek Dogana në Morinë dhe anëtarët e familjes ishin nisur për në Rinas, e do të shkonin në Zvicër, ku dhe jetonin. Blerim Avdiaj që drejtonte makinën dyshohet se në Rubik ka bërë manovër të gabuar, ka parakaluar në kthesë, duke mos parë se kishte mjet të tonazhit të lartë.

Shpejtësia që të mundëson rruga, ka bërë që pasojat të jenë të rënda dhe për fat të keq janë shkaktuar  4 viktima. Për fat të mirë, vetëm vajza 3 vjeçe tashmë ka kaluar rrezikun e jetës, ndërsa 4 të tjerëve ka qenë e pamundur që t’ju jepet ndihma mjekësore.

Viktima të aksidentit mbetën Blerim Avdiaj, 51 vjeç, dhe Anjeza Avdiaj, 34 vjeçe. Ndërkohë, viktima kanë mbetur edhe dy fëmijët e mitur K. Koçi, 11 vjeç, dhe M. Avdiaj, 6 vjeçe.

Ambasadori amerikan në Prishtinë Philip Kosnett, ka thënë të premten se bashkë me Kosovën nderon kujtimin për viktimat e Masakrës së Reçakut, e cila ka ndodhur 22 vjet më parë.

Përmes një postimi në rrjetin social, Twitter, ambasadori Kosnett ka thënë se Shtetet e Bashkuara vazhdojnë të jenë të përkushtuara për të garantuar drejtësi për familjet e viktimave dhe më të dashurit e tyre.

Masakra e Reçakut ka ndodhur më 15 janar të vitit 1999. Në mars të këtij viti NATO-ja nisi sulmet ajrore kundër caqeve të ushtrisë serbe për t’i dhënë fund dhunës në Kosovë.

Gjatë luftës në Kosovë humbën jetën rreth 13,500 persona, ndërsa 1,643 ende konsiderohen të pagjetur.

Po e ndajmë sërish me ju dokumentarin që ka realizuar ekipi i Radios Evropa e Lirë për 20-vjetorin e kësaj masakre. rel