Eugen Cakolli nga KDI ka zbuluar emrat e deputetëve të rinj që do të fitojnë mandat në Kuvend duke zëvendësuar anëtarët e kabinetit Qeveritar, raporton Gazeta Express.

Cakolli në Facebook ka shkruar se me votimin e djeshëm të Qeverisë ‘Kurti 2’, janë plot 12 anëtarë të kabinetit ekzekutiv që tashmë kanë humbur mandatin e deputetit.

“Për zëvendësimin e tyre, Kryetari i Kuvendit do t’i bëjë praktikisht kërkesë vetes si U.D. i Presidentit, që të mbushë ulëset e mbetura të zbrazëta.  Pastaj, në cilësinë e U.D. të Presidentit, Glauk Konjufca do të kërkojë nga KQZ-ja që të rekomandojë emrat e kandidatëve në radhë me numrin më të madh të votave. KQZ-ja ka afat pesë ditë, që nga pranimi i kërkesës, për të kthyer përgjigje me emrat e ligjshëm të kandidatëve në radhë – të cilët duhet që në seancën e radhës të Kuvendit të japin betimin e tyre”, ka thënë i njejti.

Cakolli ka shkruar edhe emrat e ministrave dhe deputetëve që do të zëvendësohen në Kuvend.

Kandidatët për deputetë që do të zëvendësojnë tashmë ministrat e Qeverisë ‘Kurti 2’ janë:

Donika Gërvalla-Schwarz – Shqipe Isufi

Arben Vitia – Enver Haliti

Hekuran Murati – Mirsad Shkreta

Faton Peci – Gramos Agusholli

Liburn Aliu – Alban Bajrami

Arbërije Nagavci – Yllza Hoti

Hajrulla Çeko – Jahja Kokaj

Rozeta Hajdari – Gresa Bytyqi Kelmendi

Xhelal Sveçla – Hydajet Hyseni Kaloshi

Fikrim Damka – Enis Kervan

Elbert Krasniqi – Fridon Lala

Emilija Redžepi – Samra Ilijazi

Foto nga ceremonia e pranimit të postit të kryeministrit.

Me ceremoni shtetërore, kryeministri i ri i Kosovës, Albin Kurti nga Lëvizja Vetëvendosje, mori detyrën e re. Detyrën ia dorëzoi kryeministri i deritanishëm i Kosovës, Avdullah Hoti.

Qeveria e Albin Kurtit më 22 mars mori besimin e 67 deputetëve të Kuvendit të Kosovës.

Kurti ekzekutivin e ri e ka formuar me partitë e komuniteteve joserbe. Qeveria e tij ka tre zëvendëskryeministra dhe 15 ministri, pesë prej të cilave do të udhëhiqen nga gra.

Kryeministri i ri i Kosovës, Albin Kurti – partia e të cilit ka fituar 50.28 për qind të votave në zgjedhjet e 14 shkurtit – ka thënë se sfida kryesore e qeverisë së tij do të jetë vënia nën kontroll e pandemisë së koronavirusit. Ai ka thënë se synon që të sigurojë vaksina të mjaftueshme për të imunizuar 60 për qind të popullatës kundër COVID-19.

Kurti po mban postin e kryeministër për herë të dytë, pasi në shkurtin e vitit të kaluar ai u zgjodh për herë të parë në këtë post. Por, partnerja e atëhershme e koalicionit, Lidhja Demokratike e Kosovës, e rrëzoi Qeverinë Kurti dhe udhëheqjen e qeverisë e mori Avdullah Hoti.

Por, Gjykata Kushtetuese fundvitin e kaluar tha se Qeveria Hoti ishte jolegjitime, pasi për të kishte votuar një deputet, që kishte qenë i dënuar me vendim të formës së prerë në tre vjetët e fundit.

Institucionet e reja të Kosovës, kuvendi dhe qeveria e re, u formuan më 22 mars, 37 ditë pas mbajtjes së zgjedhjeve.

Sfida e radhës për partinë e Kurtit është që të zgjedhë edhe presidentin e ri të vendit. Për këtë post, kjo parti ka nominuar Vjosa Osmanin.

Por, Osmani nuk po përkrahet nga partitë opozitare Partia Demokratike e Kosovës dhe Aleanca për Ardhmërinë e Kosovës. Ndërkaq, ish-partia e saj, Lidhja Demokratike e Kosovës, ende nuk e ka bërë të qartë nëse do ta votojë ose jo Osmanin për një mandat pesëvjeçar në krye të shtetit.

Që prej 5 nëntorit, 2020, Kosova është me ushtrues detyre të presidentit, pasi Hashim Thaçi dha dorëheqje nga kjo pozitë pas konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë.

Që nga 5 nëntori deri më 22 mars, këtë post e ushtroi Osmani dhe pas zgjedhjes në krye të kuvendit, Glauk Konjufca mori edhe detyrën e ushtrimit të postit të presidentit.

U.d. Presidenti i Kosovës, Glauk Konjufca ka kërkuar propozimin e Lëvizjes Vetëvendosje për Kryeministër, raporton Gazeta Express.

U.d. Presidenti i Kosovës, Glauk Konjuca, duke u mbështetur në nenet 84 (14) dhe 95 (1) të Kushtetutës së Republikës së Kosovës, nëpërmjet një letre drejtuar kryetarit të Lëvizjes Vetëvendosje, Albin Kurti ka kërkuar që ky subjekt fitues i zgjedhjeve të 14 shkurtit ta propozojë mandatarin për Kryeministër.

Në letër, u.d. Presidenti Konjufca, duke iu referuar dispozitave kushtetuese dhe njoftimit të KQZ-së për certifikimin e rezultateve të zgjedhjeve të 14 shkurtit, ka theksuar se Lëvizja Vetëvendosje ka fituar shumicën e nevojshme në Kuvend për ta krijuar Qeverinë e re.

KOSOVA

Gratë e Lëvizjes Vetëvendosje dhe të Listës ‘’GUXO’’ të Vjosa Osmanit kanë pikasur në seancën konstituive të Kuvendit të ri të Kosovës.

Ato janë veshur të gjitha me uniformë të bardhë. Dita e sotme në Kosovë karakterizohet nga dëbora që e ka zbardhur gjithë Prishtinën, por përfaqësues të Vetëvendosjes dhe Listës ‘’GUXO’’ e kanë konsideruar si ‘’Ditë të Bardhë’’ për vendin.

Sot pritet të formohet dhe qeveria Kurti ll në rast se votohet.

KOSOVA

Glauk Konjufca do të jetë President në detyrë i Kosovës deri në zgjedhjen e të riut.

Ai u zgjodh pak më herët kryetar i parlamentit të Kosovës dhe tashmë Kushtetuta ia obligon që në mungesë të një Presidenti të zërë vendin e përkohshëm.

Vjosa Osmani ia dorëzoi detyrën Konjufcës ndërkohë që ky i fundit ia njohu meritat për kryerjen e detyrës me përgjegjësi të lartë.

“E falenderoj zonjën Vjosa Osmani. E ka kryer me përgjegjësi të lartë detyrën e ushtrueses së detyrës së presidentes. Zonja Osmani keni dhënë shembull të shkëlqyeshëm në politikë. Mua më vjen mirë që pas zgjedhjes së kryeisë së Kuvendit është hapur rruga e zgjedhjes së institucioneve të reja, edhe me juve si presidente, ku ju uroj suksese.’’- tha Konjufca.

Lidhja Demokratike e Kosovës ka zgjedhur sot nënkryetarët, anëtarët e Kryesisë, Shefin e Grupit Parlamentar dhe sekretarin organizativ, shkruan Gazeta Express.

Kryetari i ri i kësaj partie, Lumir Abdixhiku ka njoftuar se Arben Gashi do të jetë Shef i Grupit Parlamentar të kësaj partie, ndërsa Kujtim Shala do të jetë nënkryetar i Kuvendit.
“Shef i Grupit Parlamentar të LDK-së do të jetë Arben Gashi, ndërsa Kujtim Shala do të jetë nënkryetar i Kuvendit”, ka thënë ai.

Në pozitat e nënkryetarëve janë emëruar Anton Quni, Gazmend Muhaxheri, Lutfi Haziri dhe Shqipe Mjekiqi, derisa Imri Ahmeti është zgjedhur në pozitën e Sekretarit.

Ndërkohë janë zgjedhur edhe anëtarët e rinj të Kryesisë së Lidhjes Demokratike të Kosovës.

Në listën e personave që janë zgjedhur si anëtarë të kryesisë së re të LDK’së mungojnë emra të disa prej figurave të vjetëra të LDK’së, siç janë: Agim Veliu, Haki Rugova, Ismet Beqiri, Muharrem Svarqa, Skënder Hyseni, Arban Abrashi, Naser Osmani e Florian Dushi.

Jashtë ka mbetur edhe kreu i Degës së LDK’së në Dragash, Selim Kryeziu.

Agim Veliu, Haki Rugova nuk janë zgjedhur as nënkryetarë tashmë që partia është nën drejtimin e Isa Mustafës.

LDK-ja ka zgjedhur kryesinë e re të partisë, ku emra të rinj janë tashmë anëtarë të kryesisë.

Kjo është lista e kryesisë së re të LDK-së, ku përfshihen, kryetari, tre nënkryetarët, sekretari organizativ, kryetarja e forumit të gruas dhe kryetari i forumit të ri.

Kryetar Lumir Abdixhiku

Nënkryetar: Lutfi Haziri, Gazmend Muhaxheri, Anton Quni si dhe Shqipe Mjekiqi

Sekretar: Imri Ahmeti

Anëtarë:

Kujtim Shala

Avdullah Hoti

Hykmete Bajrami

Arben Gashi

Armend Zemaj

Sibel Halimi

Doruntinë Maloku

Ekrem Hyseni

Ardian Shala

Xhafer Tahiri

Alban Zogaj

Vlora Dumoshi

Safet Kamberi

Brikenda Kryeziu

Fadil Krasniqi

Sokol Haliti

Teuta Sahatqija

Valon Murtezaj

Besian Mustafa

Lutfi Zharku

Muhamet Hamiti

Faton Bislimi

Rrezarta Krasniqi

Ilir Ferati

Besa Gaxherri

Kryetare e Forumit të Gruas: Lirije Kajtazi

Forumit Rinor: Fidan Rekaliu

Këshilli i Përgjithshëm i Lidhjes Demokratike të Kosovës sot ka aprovuar me shumicë votash propozimin e Lumir Abdixhikut për emërimin e nënkryetarëve të rinj të partisë dhe sekretarit organizativ.

Anton Quni, Lutfi Haziri, Gazmend Muhaxheri dhe Shqipe Mjekiq janë zgjedhur nënkryetarë derisa Imri Ahemti në pozitën e sekretarit organizativ.
Por kush është Shqipe Mjekiqi nënkryetarja e re në Lidhjen Demokratike të Kosovës.

Mjekiqi është e lindur më 10 mars të vitit 1985, Prishtinë.

Siç mëson Gazeta Express ajo ka qenë këshilltare e Fatmir Sejdiut gjatë kohës sa ka qenë president i Kosovës dhe këshilltare e Skënder Hysenit gjatë kohës sa ky i fundit ka drejtuar Ministrinë e Punëve të Brendshme.

Mjekiqi siç ka treguar edhe në profilin e saj zyrtar në ‘facebook’, ka studiuar për shkenca politike në Kolegjin e Triniti në Dublin dhe në universitetin e Londrës për Ekonomi dhe Shkenca Sociale.

Ajo aktualisht është ligjëruese në një universitet privat në Kosovë dhe përveç gjuhës shqipe flet rrjedhshëm gjuhën angleze dhe komunikon në gjuhët frënge, italiane, spanjishte, dhe serbo-kroate.

Anëtari i Këshillit të Përgjithshëm të Lidhjes Demokratike të Kosovës, Imri Ahmeti ka njoftuar se Anton Quni, Gazmend Muhaxheri, Lutfi Haziri dhe Shqipe Mjekiqi janë katër nënkryetarët e rinj të LDK-së, shkruan Gazeta Express.

“Nënkryetarë janë: Anton Quni, Gazmend Muhaxheri Lutfi Haziri dhe Shqipe Mjekiqi”, ka thënë ai.

Në ndërkohë Imri Ahmeti është zgjedhur sekretar organizativ i kësaj partie.

Sot Këshilli i Përgjithshëm i LDK-së ka vendosur edhe për emrat e Kryesisë së partisë.

Këta emra pritet që të bëhen publik sot gjatë ditës.

Banka për Zhvillim e Këshillit të Evropës (CEB) ka miratuar dhënien e huas shtesë prej 25 milionë eurove, për të mbështetur autoritetet e Kosovës në blerjen e vaksinave kundër koronavirusit, për gati 50 për qind të popullsisë.

Kjo hua do të mbulojë edhe koston për materialet shpenzuese, bashkë me harxhimet lidhur me shpërndarjen e vaksinave dhe pajisjeve mjekësore.

Kosova pritet të përfitojë vaksinat e para nga COVAX – skema e Organizatës Botërore të Shëndetësisë për shpërndarje të vaksinave në vendet e varfra.

Me këtë hua të Bankës për Zhvillim të Këshillit të Evropës, Kosova besohet se do të mund të blejë vaksina për 50 për qind të popullsisë.

Guvernatori i kësaj banke, Rolf Wenzel ka thënë se Banka për Zhvillim është e lumtur që do të mund të ndihmojë Kosovën në përgjigjjen e saj ndaj pandemisë, si dhe të adresojë qasjen jo të barabartë në vaksina.

“Kjo gjë nuk është thelbësore vetëm për të tejkaluar krizën aktuale me pandeminë, por edhe për të zbutur pabarazitë sociale dhe ato ekonomike në rritje, si pasojë e pandemisë”.

Kjo hua sigurohet pas një marrëveshjeje prej 35 milionë eurosh, të nënshkruar në gusht të vitit 2020 në mes të autoriteteve të Kosovës dhe Bankës për Zhvillim, me qëllim të mbulimit të shpenzimeve të nxitura nga pandemia.

Kosova vazhdon të mbetet vendi i vetëm në Evropë që nuk ka nisur procesin e vaksinimit. Në dërgesën përmes COVAX-it, Kosova do të përfitojë 100,800 doza të vaksinës së prodhuar nga kompania AstraZeneca.

Ministria e Shëndetësisë në Kosovë, në fillim të muajit janar, pati njoftuar se ka marrë konfirmim nga kompania amerikane, Pfizer, për sigurimin e 535,000 vaksinave kundër koronavirusit.

Mirëpo zyrtarë të kësaj kompanie i kanë thënë Radios Evropa e Lirë se ende janë në diskutime me Qeverinë në detyrë të Kosovës për furnizim me vaksina.

Kryetari i Lidhjes Demokratike të Kosovës Lumir Abdixhiku ka thënë të premten, se javën e ardhshme do takohet me pretendenten për pozitën e presidentit në Kosovë Vjosa Osmani, për të diskutuar pozicionin e saj karshi disa çështjeve.

Ai i ka bërë këto komente pas takimit që ka pasur me ushtruesen e detyrës së presidentit Vjosa Osmanin dhe liderin e Lëvizjes Vetëvendosje Albin Kurtin, partia e të cilit ka fituar zgjedhjet e parakohshme parlamentare në Kosovë.

Ai ka përmendur se LDK-ja është e interesuar për qasjen e Osmanit ndaj partisë që drejton Abdixhiku, ndaj Lëvizjes Vetëvendosje, partive opozitare dhe nismës së saj të paralajmëruar politike.

Sipas tij, LDK-ja është e interesuar për një kandidat për president, që përfaqëson të gjithë qytetarët e Kosovës.

“Kemi përfunduar takimet me LVV-në, sepse pozicionet tona janë të qarta. Ne jemi në opozitë, ata janë në pozitë. Ne do të jemi opozitë aktive dhe alternativë e re në të ardhmen”, ka thënë Abdixhiku pas takimit.

Ai ka thënë se LDK-ja do të marrë pjesë në seancën e së hënës kur pritet të konstituohet legjislatura e re e Kuvendit të Kosovës, mirëpo nuk ka dhënë më shumë hollësi për seancat tjera.

Sipas Abdixhikut gjithçka do të varet nga vendimet që marrin organet e partisë së LDK-së.

“Nesër e kemi mbledhjen brenda partisë dhe do ta formojnë kryesinë e re. Unë do të prezantoj detajet e këtij takimi”, ka thënë mes tjerash ai.

Abdixhiku ka përsëritur sërish të premten se partia që drejton ai nuk është e interesuar të shkaktojë destabilizim politik.

Për dallim nga Abdixhiku, ushtruesi i detyrës së kryetarit të Partisë Demokratike të Kosovës Enver Hoxhaj ka qenë të enjten më i drejtpërdrejtë sa i përket kandidaturës së Osmanit për presidente.

Ai e ka quajtur Osmanin figurë përçarëse dhe ka thënë se PDK-ja nuk ka votë për të.

Po të enjten, kryetari i Aleancës për Ardhmërinë e Kosovës Ramush Haradinaj, ka thënë se partia që drejton ai, do të jetë pjesë e konstituimit të Kuvendit të Kosovës.

Për secilën seancë tjetër, Haradinaj ka thënë se grupi parlamentar i AAK-së do të diskutojë veç e veç.

Ditë më parë, Haradinaj ka thënë se është përgjegjësi e Lëvizjes Vetëvendosje që t’i sigurojë votat e nevojshme në kuvendin e ri, për zgjedhjen e presidentit të Kosovës. rel

Kryetari i Lidhjes Demokratike të Kosovës, Lumir Abdixhiku ka thirrur mbledhjen e parë të Këshillit të Përgjithshëm të partisë, për ditën e nesërme në ora 14:00, shkruan Express.

Në rend të ditës do të jenë, platforma e Kryetarit të ri të LDK-së dhe Zgjedhja e Kryesisë.
Po ashtu, kujtojmë se kryetari Abdixhiku pritet sot të mbaj një takim konsulativ me kandidatin për kryeministër nga Lëvizja Vetëvendosje, Albin Kurti dhe me kandidaten për presidente Vjosa Osmani.

Lumir Abdixhiku të dielën u zgjedh kryetari më i ri i Lidhjes Demokratike pas dorëheqjes së Isa Mustafës pas rezultatit të zgjedhjeve të 14 shkurtit.

Kryetari i AAK’së, Ramush Haradinaj, ka thënë se nuk do të qëndrojnë në Kuvend kur të votohet Vjosa Osmani për presidente.

Haradinaj, që bëri të ditur gjatë zgjedhjeve se kandidoi për president, ka përsëritur deklaratat e tij se është detyrë e VV’së si parti fituese që të sigurojë votat edhe për presidentin.
Këto komente ai i ka bërë në RTV Dukagjini.

Të njëjtat deklarata i ka bërë edhe nënkryetari i PDK’së, Xhavit Haliti.

Xhavit Haliti, nënkryetar i PDK-së dhe deputeti i zgjedhur nga kjo parti ka konfirmuar se partia të cilës ai i takon dje ka marrë vendim unanim që mos të merr pjesë në seancën e Kuvendit ku do të shpaloset kandidatura për president, respektivisht kandidatura e Vjosa Osmanit.

“Vjosën e kom pas kolege edhe në kohën kur ka punuar në kabinetin e zotit Sejdiu. Ka përvojë legjislative, por politika i ndanë njerëzit dhe partitë ka qëndrime të kundërta”, ka thënë Haliti.

Sipas tij, nëse Lëvizja Vetëvendosje i merr tri pozicionet më të rëndësishme të shtetit, atëherë nuk mund të themi se kemi shtet demokratik.

“Pse duhet lënë pozitën e presidentit për opozitën, ose të kemi një president konsensual. Në vijmë nga një mendësi e tillë politikë, që domosdoshmërisht duhet ta shkatërrojmë kundërshtarin, mos ta përfillimin dhe të ndërtojmë të vetëm institucionet”, ka shtuar Haliti.

“Nëse duam ta zbatojmë një rregull që e ka imponuar Kushtetuesja, duke e kushtëzuar qëndrimin e deputetëve në seancë, mendoj se deputeti duhet të prezent në çdo situatë në Parlamentin e Kosovës, përjashtuar disa raste të caktuar nëse nuk janë dakord me atë që ndodh”, ka thënë Haliti.

Kryetari i Lidhjes Demokratike të Kosovës Lumir Abdixhiku ka thënë të enjten se, partia që ai drejton, synon të shmangë zgjedhjet e reja në Kosovë.

“LDK-ja synon t’i shmangë zgjedhjet. LDK-ja synon të kontribuojë në formimin e institucioneve dhe LDK-ja synon që këto institucione të jenë demokratike, por edhe t’i përfaqësojnë të gjitha partitë politike, në veçanti pozita e presidentit”, ka deklaruar ai para gazetarëve.

Zgjedhjet e shpeshta ai i ka cilësuar të mërzitshme dhe të kushtueshme për Kosovën.

Lidhur me unitetin e deputetëve të LDK-së, sa i përket votimit për pozitën e presidentit në Kuvendin e Kosovës, ai ka thënë se për këto çështje duhet diskutuar fillimisht me organet e partisë.

“Besoj që gjatë vikendit do t’i formojmë organet e partisë, siç është kryesia e partisë, dhe aty e marrim vendimin për të gjitha çështjet, në koordinim të plotë me grupin parlamentar të LDK-së”.

Sa i përket propozimit të ndonjë emri për pozitën e presidentit, nga ana e LDK-së, Abdixhiku ka thënë se rëndësishme është që fillimisht të mbahet takimi i planifikuar për të premten në mes të tij dhe ushtrueses së detyrës së presidentit në Kosovë, Vjosa Osmani dhe kryetarit të Lëvizjes Vetëvendosje Albin Kurti.

Ai i ka bërë këto deklarata pas takimit të zhvilluar me zëvëndëskryeministrin e Maqedonisë së Veriut Artan Grubi, i cili ka nisur po këtë ditë vizitën e tij në Kosovë, me qëllim të diskutimit të procesit të regjistrimit të popullsisë së diasporës.

Abdixhiku ka thënë se me Grubin kanë diskutuar marrëdhëniet mes shqiptarëve të Kosovës dhe atyre të Maqedonisë së Veriut dhe ka ftuar diasporën që të ndihmojë në procesin e regjistrimit të popullsisë.

Regjistrimi i popullsisë brenda Maqedonisë së Veriut pritet të nisë më 1 prill.

Sipas regjistrimit të fundit, Maqedonia e Veriut ka rreth 2 milionë banorë, prej tyre, 25.17 për qind janë shqiptarë.

Përqindja e popullatës shqiptare lidhet edhe me të drejtat e tyre të garantuara me kushtetutë, siç është ajo e përdorimit zyrtar të gjuhës shqipe. Kjo pasi në Kushtetutën e Maqedonisë së Veriut gjuha shqipe përkufizohet si gjuhë, të cilën e flasin më shumë se 20 për qind e numrit të përgjithshëm të popullsisë. rel

KOSOVA

Kosova po përballet me një valë të re infektimesh, teksa problemi më i madh qëndron tek spitalet.

Kapaciteti i këtyre të fundit po shkon drejt fundit, teksa në vend shënohen plot mbi 11 mijë raste aktive me COVID-19.

Drejtori i Klinikës Infektive dhe infektologu, Izet Sadiku e konfirmon së spitalet po shkojnë drejt kolapsit, pasi vetëm dy javët e fundit numri është rritur me 300. bw

Partia Demokratike e Kosovës dhe Lidhja Demokratike e Kosovës kanë vendosur që të mos e mbështesin për presidente Vjosa Osmanin. Në të njëjtën vijë është deklaruar ditë më parë pas takimit me Osmanin dhe Kurtin edhe Ramush Haradinaj që po synonte të garonte për karrigen më të rëndësishme të shtetit. Deri më tani, sipas burimeve, seanca për të votuar presidentin e ri është paraparë të mbahet në javën kur votohet edhe Qeveria e re, mëson Gazeta Express.

Java e ardhshme pritet të jetë përfundimtare sa i përket krijimit të institucioneve të reja. Të hënën, pak orë pas konstituimit të Kuvendit pritet të thirret edhe seanca për votimin e Qeverisë së re.

Gjatë të njëjtës javë është paraparë që të thirret seanca edhe për të votuar presidentin e ri.

Mirëpo, Vjosa Osmani që ka dalë më e votuara nga zgjedhjet e 14 shkurtit, nuk po e merr edhe përkrahjen e opozitës për t’u ulur në karrigen më të rëndësishme të shtetit.

Ishte Ramush Haradinaj i pari nga partitë opozitare që tha se AAK-ja nuk e mbështet VV-në, sepse në këtë mënyrë pushteti do të koncentrohej në një parti të vetme.

“Deri tash VV së bashku me Lëvizjen Guxo, ka marr shumicën e votave për të qeverisur me vendin, por nuk i kanë dy të tretat për zgjedhjen e presidentit. Po tash ta shohim se si do të veprojnë për ta zgjedhur këtë situate, pasi që edhe qeveria varet nga kjo. VV nuk i ka fituar zgjedhjet për të shkuar në zgjedhjet, por për të qeverisur me vendin. Ne nuk do t’i japim përkrahje VVsë për ta koncentruar pushtetin te një partie e vetme”, tha ai.

Një takim për të vendosur lidhur me çështjen e presidentin e kanë mbajtur edhe në Partinë Demokratike të Kosovës që po udhëhiqet nga Enver Hoxhaj.

Pas disa orë mbledhje, në organin më të lartë të PDK-së është marrë vendim që ky subjekt të mos e votojë Osmanin për kryetare të shtetit.

“Njëri prej vendimeve të rëndësishme është që KD i PDK në mënyrë unanime nuk e mbështet kandidaturën e zonjës Osmani për të qenë presidente”, tha Hoxhaj.
Enver Hoxhaj pas takimit me Këshillin Drejtues të PDK-së

Se nuk votojnë Vjosa Osmanin për presidente ka thënë mbrëmë edhe ish-partiaku i saj në LDK, Lumir Abdixhiku që tashmë është emëruar si kryetar i partisë.

Ai ka thënë se nuk do të jenë pjesë e Qeverisë dhe nuk votojnë president partiak.

“LDK nuk do jetë pjesë e qeverisë, sa jam unë kryetar, LDK nuk do të jetë në qeveri, do të jem opozitë, do te merrem me rikthimin e LDK-së, në korrigjimin e gabimeve që kemi pasë duke synuar ruajtjen e nivelit demokratik në vend. Çdo pretendent për president duhet të qartësojë se çfarë pozicioni ka ndaj LDK-së, është pozicion, urryes, apo neutral, sepse presidenti këtë punë ka”, ka thënë ai.

“Ne synojmë të ndërtojmë institucione, synojmë t’i shmangim zgjedhjet se qytetarët janë lodhur me zgjedhje, kërkojmë që pozita e presidentit të jetë e pavarur. Nuk po e personalizojë Hashim-Vjosë sepse po të ishte në nievl personal, zgjedhja do të ishte e thjeshtë. Kemi pasur president partiak sikurse Thaçit, nuk duam prapë një president partiak, presidenti duhet të ketë neutralitet”, ka përfunduar Abdixhiku.

Vjosa Osmani do të nominohet për presidente, derisa, për këtë çështje e njejta ishte dakorduar me Kurtin gjatë nënshkrimit të marrëveshjes parazgjedhore.

Zgjedhja e Presidentit bëhet me dy të tretat (2/3) e votave të të gjithë deputetëve të Kuvendit. Nëse asnjëri kandidat nuk merr shumicën prej dy të tretave (2/3) në dy votimet e para, organizohet votimi i tretë në mes të dy kandidatëve të cilët kanë marrë numrin më të lartë të votave në votimin e dytë dhe kandidati që merr shumicën e votave të të gjithë deputetëve, zgjidhet President i Republikës së Kosovës.

Nëse në votimin e tretë, asnjëri kandidat nuk zgjidhet President i Republikës së Kosovës, shpërndahet Kuvendi dhe shpallen zgjedhjet e reja, të cilat duhet të mbahen brenda 45 ditësh

Agonis Tetaj ishte në vendin e tij të punës, kur u qëllua për vdekje nga Shaban Gogaj, djali i pronarit të kompanisë në të cilën po punonte viktima. Gogaj ishte ngarkuar me veprën penale “Vrasje e rëndë”, ndërkaq këtë të martë prokurori i rastit, Agron Uka, e ka ricilësuar veprën penale si “Vrasje nga pakujdesia”. Express ju sjell detaje nga aktakuza.

Një ngjarje e rëndë kishte ndodhur mesditën e 23 shtatorit të vitit 2018 në në Deçan. Aty, 18-vjeçari Shaban Gogaj, kishte qëlluar për vdekje punonjësin 29-vjeçar, Agonis Tetaj, nga fshati Llukë i Deçanit.

Tetaj kishte mbetur i vdekur në vend, ndërkaq Gogaj i cili ishte 18-vjeçar atë kohë, ishte arrestuar menjëherë në vendngjarje.

Sipas aktakuzës, krejt kjo ngjarje kishte ndodhur menjëherë pasi Shabani kishte marrë një telefonatë nga N.M, ku sipas Prokurorisë kjo telefonatë e acaroi atë.

Në aktakuzë shkruan se në momentin kur Shaban Gogaj shkrep plumbin, Agonis Tetaj, ndodhej ndërmjet dy kolegëve te tij.

Plumbi e kishte goditur në fytyrë, konkretisht në mollëzën e djathtë. Predha e plumbit i kishte kaluar në pjesën e prapme të qafës, e cila i ka shkaktuar gjakderdhje të jashtme dhe të brendshme në cipat e buta të trurit dhe trurit të vogël, si rrjedhojë Agonis Tetaj kishte pësuar vdekje të menjëhershme.

Po ashtu, në aktakuzë thuhet se Shaban Gogaj, me dashje e kishte privuar nga jeta viktimën Agonis Tetaj.

Gogaj ishte ngarkuar me veprën penale “Vrasje e rëndë”, ndërkaq këtë të martë prokurori i rastit, Agron Uka, e ka ricilësuar veprën penale si “Vrasje nga pakujdesia”.

Pas rikualifikimit të veprës, i akuzuari Shaban Gogaj, e ka pranuar fajësinë për veprën në fjalë. Ndërkaq prokurori Uka ka deklaruar se te i pandehuri Gogaj, nuk ishte provuar dashja për kryerjen e vrasjes së të ndjerit Tetaj, e as ndonjë motiv apo qëllim për kryerjen e kësaj vepre.

“Nuk është argumentuar elementi i dashjes për vrasje e as për vrasje të rëndë. Duke u bazuar në nenin 7 të KPRK-së dhe në rast të dyshimit, duhet të veprohet në favor të pandehurit, pikërisht në këto rrethana dhe fakte dhe dispozita ligjore në fuqi, bëjmë ricilësimin e veprës penale nga vrasja e rëndë në vrasje nga pakujdesia”, ka deklaruar Uka.

E për këtë, babai i Agonisit, Isuf Tetaj, ka dërguar një letër publike në të cilin po e akuzon prokurorin Agron Uka, se është duke manipuluar me rastin e vrasjes së të riut Agonis Tetaj.

“Agonisi djali im u vra në vendin e punës në ditën e diele nga djali i pronarit të biznesit në të cilin ka qene i punësuar. Po ju shkruaj me qëllim që te ju informoj dhe alarmoj se prokurori z.Agron Uka, dje ne seancën gjygjësore në të cilën është thënë fjala përfundimtare nga palët pa asnjë provë dhe në kundërshtim me krejt realitetin ka rikualifikuar vrasjen e djalit tim nga vrasja e rëndë në vrasje nga pakujdesia”, ka shkruar Isuf Tetaj në letrën e tij.

Tetaj në letrën të cilën ua ka dërguar kryeprokurorit të shtetit, Aleksandër Lumezi, ambasadorit të SHBA’së në Kosovë Philip Kosnett, ambasadorit të Britanisë në Kosovë Nicholas Abott dhe atij të Gjermanisë, Joern Rohde, ka bashkëngjitur edhe aktakuzën e Prokurorisë Themelore të Pejës ndaj të akuzuarit Shaban Gogaj.

Po ashtu, Isuf Tetaj në këtë letër ka bashkëngjitur edhe videon nga momenti i vrasjes së djalit të tij, në vendin e punës.

Me këtë letër, ai po kërkon që të përjashtohet prokurori Agron Uka nga ky rast si dhe të vendoset gjykim meritor lidhur me vrasjen e djalit të tij.

Ndryshe, përveç Gogajt, për armëmbajtje pa leje, akuzohet edhe i pandehuri Isuf Cacaj.

Këtë çështje penale e përfaqëson Prokuroria e Gjilanit, pasi Kryeprokurori i Apelit, Haxhi Dërguti kishte aprovuar propozimin e mbrojtjes së të pandehurit, duke përjashtuar Prokurorinë e Pejës nga trajtimi i këtij rasti, me arsyetimin e trajtimit të njëanshëm të rastit.

120 deputetë të Kuvendit, filluan regjistrimin për Legjislaturën Vlll

Deputetët e zgjedhur nga zgjedhjet parlamentare të 14 shkurtit në Kosovë kanë filluar me procesin e regjistrimit, transmeton Anadolu Agency (AA).

120 deputetë të ardhshëm të Kuvendit të Kosovës, kanë filluar me procesin e regjistrimit për Legjislaturën Vlll të këtij institucioni, në hollin e objektit të Kuvendit, në Prishtinë.

Për shkak të numrit më të madh të deputetëve të fituar në zgjedhjet e fundit, të parët që kanë filluar me procesin e regjistrimit si deputetë të rinj janë ata nga Lëvizja Vetëvendosje.

Më pas, në këtë proces që do të zgjasë deri të premten, do të regjistrohen deputetë e partive tjera, me radhë të bazuar në numrin e deputetëve të fituar.

Sipas renditjes së vendeve në parlament, Lëvizja Vetëvendosje ka siguruar 58 deputetë, Partia Demokratike e Kosovës 19 deputetë, Lidhja Demokratike e Kosovës 15 deputetë, Aleanca për Ardhmërinë e Kosovës 8 deputetë, Lista Serbe ka siguruar 10 vendet e rezervuara për minoritetin serb.

Nga minoritetet tjera joserbe Partia Demokratike Turke e Kosovës (KDTP) ka siguruar 2 deputetë dhe nga 1 deputet kanë siguruar Koalicioni Vakat, Iniciativa e Re Demokratike e Kosovës, Romani Iniciativa, Nova Demokratska Stranka, Social Demokratska Unija, Jedinstvena Goranska Partija, Partia e Ashkalinjëve për Integrim dhe Lëvizja Përparimtare e Romëve të Kosovës.

Kryesia e vjetër e Kuvendit, vendosi të martën që pas regjistrimit të deputetëve të rinj, seanca konstituive të mbahet më 22 mars, seancë e cila simbolikisht do të “kryesohet nga deputeti më i vjetër dhe deputeti më i ri”.

Kjo seancë do t’i ketë tre pika të rendit të ditës: Formimin e komisionit për verifikimin e mandateve; Dhënien e betimit të deputeteve dhe Zgjedhjen e kryetarit dhe nënkryetarëve të Kuvendit.

Përgjatë kësaj jave, kandidati për kryeministër njëherësh kryetar i Lëvizjes Vetëvendosje Albin Kurti dhe kandidatja për presidente nga kjo parti Vjosa Osmani, kanë takuar krerë të partive shqiptare dhe atyre nga minoritetet për të diskutuar rreth formimit të institucioneve të reja.

Vëllai i Ramush Haradinajt, Daut Haradinaj është dorëhequr nga posti i deputetit vetëm pak javë pasi u zgjodh.

Daut Haradinaj thotë se do ia lirojë mandatin Shemsedin Dreshajt, pasi këtë vjeshtë ka zgjedhje dhe ai do të angazohet nëpër komuna në terren.

Ai thotë se AAK do të jetë shumë më e konsoliduar dhe përgatitur këtë vjeshtë.

STATUSI NGA DAUT HARADINAJ

Të nderuar qytetarë të Republikës së Kosovës, votues të AAK-së!

Dëshiroj të ju falënderoj për besimin e dhënë tash e sa mandate, besim të cilin jam munduar ta kryej me nder duke qenë zëri juaj në Kuvend.

Tash ne rrethanat e reja që jemi, do heqë dorë nga ky mandat për t’i krijuar hapësirë Prof.Dr Shemsedin Dreshajt të jetë deputet, dhe për të pasur mundësi kohore që të jem më prezent nëpër komunat tona edhe për faktin se do kemi zgjedhje në këtë vjeshtë. Po ma kërkon struktura angazhimin në terren dhe nuk dua t’a bëj punën në terren në dëm të mandatit të popullit.

Kolegëve të mi ju dëshiroj suksese në këtë legjislaturë.

Do jemi shumë më të konsoliduar dhe më të përgatitur këtë vjeshtë.

Fituesit të këtyre zgjedhjeve ju uroj suksese.

I juaji,

Daut Haradinaj

Kryetari në detyrë i Partisë Demokratike të Kosovës, Enver Hoxhaj, ka thënë të hënën se ka pasur një takim shumë të mirë me ushtruesen e detyrës së presidentit në Kosovë, Vjosa Osmani dhe liderin e Lëvizjes Vetëvendosje Albin Kurti.

“Qasja jonë në takim ka qenë konstruktive, parimore, ne kemi pasur kërkesa dhe çështje të qarta, të cilat i kemi ngritur”, ka thënë ai para gazetarëve.

Hoxhaj ka thënë se PDK-ja ka krijuar një listë me tema, për të cilat ka kërkuar të di qëndrimin e Kurtit dhe Osmanit, pas zgjedhjeve të 14 shkurtit.

Sipas tij, qëndrimi i tyre dhe diskutimi i këtyre çështjeve brenda PDK-së do të përcaktojnë qasjen e PDK-së ndaj qeverisë së re.

Në mesin e temave që ka përmendur Hoxhaj kanë qenë:

distancimi i Kurtit nga “dhuna politike”
qëndrimi për dialogun me Serbinë, “pas deklaratave të dikurshme të Kurtit se pa kërkuar falje Serbia dhe pa gjetur të gjithë të pagjeturit nuk ulet në takim me Beogradin”
qëndrimi pas deklaratave për anulim të Marrëveshjes për Asociacionin
çështja e demarkacionit me Malin e Zi, dhe “dilema nëse do të kthehet kufiri në Zhleb dhe Qakorr”
nëse do të respektohet Marrëveshja e Uashingtonit
qëndrimi për Mini-Shengenin Ballkanik
qëndrimi për moratorium njëvjeçar për mosanëtarësim në organizatat ndërkombëtare dhe
çështja e reciprocitetit

Sa i përket rolit të presidentit, Hoxhaj ka thënë se para se të flitet për personin, duhet të flitet për parime.

“Natyrisht se Kosova ka nevojë për stabilitet, për qartësi politike dhe ne kemi nevoje për liderë shtetërorë, që bashkojnë skenën politike dhe krijojnë unitet te populli”, ka thënë ai.

“Ne kemi kërkuar nga Kurti dhe Osmani qartësi për qasjen e tyre në raport me politikën e jashtme, meqë presidenti i ardhshëm i vendit ka rol në përfaqësimin e politikës sonë dhe qeveria ka rol në formimin e politikës së jashtme”.

Pas takimit me Hoxhajn, Osmani dhe Kurti pritet të takojnë përfaqësuesit e Aleancës për Ardhmërinë e Kosovës.

Një tjetër takim me Lumir Abdixhikun, kryetarin e ri të Lidhjes Demokratike të Kosovës është planifikuar po ashtu të hënën, por, Abdixhiku ka thënë se nuk do të arrijë të marrë pjesë në takim sepse i duhet të dalë në zyret e LDK-së, në ditën e parë si kryetar i kësaj partie.

Kurti dhe Osmani kanë bërë këto ftesa, pasi Lëvizja Vetëvendosje ka fituar mbi 50 për qind të votave në zgjedhjet e parakohshme parlamentare të 14 shkurtit.

Kurti synon postin e kryeministrit, derisa Osmani, e cila ka garuar në listën e LVV-së synon mandat të plotë si presidente. rel

Kryetari i Aleancës për Ardhmërinë e Kosovës, Ramush Haradinaj, tha se është përgjegjësi e Lëvizjes Vetëvendosje që t’i sigurojë votat e nevojshme në Kuvendin e ri për zgjedhjen e presidentit të Kosovës.

Haradinaj i bëri këto komente pas takimit konsultativ që pati me ushtruesen e detyrës së presidentit, Vjosa Osmani, dhe kreun e LVV-së, Albin Kurti.

“Fituesit e zgjedhjeve e gjejnë formulën për ta krijuar Qeverinë; dy të tretat për presidentin janë në përgjegjësinë e tyre”, deklaroi Haradinaj pas takimit, në të cilin u bisedua për krijimin e institucioneve të reja.

Lëvizja Vetëvendosje i ka fituar zgjedhjet parlamentare të 14 shkurtit, ndërsa Osmani, e cila në këto zgjedhje garoi në kuadër të listës së LVV-së, po kërkon një mandat të plotë në krye të shtetit.

Edhe Haradinaj ka garuar në zgjedhjet parlamentare të 14 shkurtit, duke e propozuar veten për postin e presidentit.

Pas takimit konsultativ me Osmanin dhe Kurtin, ai nuk tregoi nëse ka hequr dorë nga ambicia për postin e presidentit.

Kreu i AAK-së tha se në përbërjen e re parlamentare, partia e tij do të jetë një opozitë konstruktive.

“U dakorduam që në sfidat që i ka Kosova, në këto funksione, pra ne si opozitë, pra Aleanca, të bashkëpunojmë për tema të interesit nacional, çdoherë duke e ruajtur vendin”, tha Haradinaj.

Më 13 mars, Komisioni Qendror i Zgjedhjeve ka certifikuar rezultatin e zgjedhjeve të 14 shkurtit, duke i hapur rrugë formimit të institucioneve të reja.

Në zgjedhjet e 14 shkurtit, Lëvizja Vetëvendosje ka fituar 50.28 për qind të votave apo 58 ulëse në Kuvend.

Partia Demokratike e Kosovës do t’i ketë 19 deputetë, Lidhja Demokratike e Kosovës 15 dhe Aleanca për Ardhmërinë e Kosovës tetë. rel

Shoqata e Matematikanëve të Kosovës, ka bërë të ditur se nxënësja Era Syla, është pranuar në njërin ndër universitetet më të mira të botës, MIT – Massachusetts Institute of Technology.

Nxënësja Era Syla është pranuar për të studiuar matematikë në njërin ndër universitetet më të mira të botës, në MIT – Massachusetts Institute of Technology në SHBA

“Ky sukses i Erës para së gjithash është rezultat i talentit të saj për matematikë dhe i punës e përkushtimit të saj të palodhshme. Rikujtojmë se nxënësja Era Syla ka fituar Medalje të Bronztë në Olimpiadën Matematike Evropiane për Vajza – EGMO 2020, duke u bërë kështu fituesja e parë nga Kosova e një medalje në EGMO”, thuhet në një njoftim të kësaj shoqate.

Njoftimi i plotë:

Ky sukses i Erës para së gjithash është rezultat i talentit të saj për matematikë dhe i punës e përkushtimit të saj të palodhshme. Rikujtojmë se nxënësja Era Syla ka fituar Medalje të Bronztë në Olimpiadën Matematike Evropiane për Vajza – EGMO 2020, duke u bërë kështu fituesja e parë nga Kosova e një medalje në EGMO.

Po ashtu, ky sukses i Erës do të ishte shumë më i vështirë pa përkrahjen dhe investimin e vazhdueshëm të familjes, mësimdhënësve, individëve e organizatave të ndryshme profesionale.

Shoqatat e Matematikanëve të Kosovës iu shprehë mirënjohje dhe falënderim të gjithë atyre që kanë kontribuoar në realizimin e arritjen e këtij suksesi nga ana e saj!

Me këtë rast, një falënderim të veçantë e meritojnë Bleron Baraliu dhe Valmir Krasniqi nga Shoqata e Matematikanëve të Kosovës, të cilët e kanë ndihmuar Erën gjatë gjithë procesit dhe procedurave të aplikimit në MIT – Massachusetts Institute of Technology, si dhe i kanë ofruar asaj ndihmë e referenca kredibile e profesionale për pranim në MIT – Massachusetts Institute of Technology.

Shoqata e Matematikanëve të Kosovës e uron dhe e përgëzon nxënësen Era Syla për suksesin e arritur dhe i uron studime të suksesshme në MIT – Massachusetts Institute of Technology.

Shoqata e Matematikanëve të Kosovës mbetet e përkushtuar të kontribuojë me të gjitha mundësitë dhe kapacitetet që ka në dispozicion për t’i mbështetur të rinjtë e talentuar në fushën e matematikës.

Posa mori fjalën pasi u zgjodh kryetar i LDK-së, Lumir Abdixhiku i falenderoi delegatët, shumica e të cilëve votuan që ai ta marrë udhëheqjen e partisë. Pasi mbajti fjalën e parë para delegatëve dhe u urua nga kundërkandidatët, Abdixhiku foli edhe për media, ku tregoi risitë që do ta karakterizojnë LDK-në me të në krye, raporton Express.

Abdixhiku fillimisht theksoi se do të jenë gjithnjë konstruktiv dhe se “vendimet tona do të jenë kolektive dhe jo individuale”. Kështu tha edhe kur u pyet lidhur me mundësinë që deputetët e LDK-së t’ia mundësojnë Vjosa Osmanit që të zgjidhet presidente.
Ai tha se secili nga kundërkandidatët e tij sot, do të jenë në kryesinë e re të partisë. Ai gjithashtu tha se do ta ndërtojë një ekip me figura të reja brenda partisë, por paralajmëroi edhe prurje të reja.

“Po, secili kundërkandidat [do të jetë në Kryesi] – por jo vetëm – sepse këto janë figura të respektuara të LDK-së”, tha Abdixhiku.

“Do të ndërtoj një ekip të ri me figura të reja brendapartiake, por gjithashtu do të kërkojë edhe hapjen e dyerve për individë që kanë bindje të njëjta ideologjike me Lidhjen Demokratike të Kosovës. Do të shihni një kryesi të re të LDK-së”, tha ai.

Abdixhiku po ashtu tregoi se LDK-ja do të ndryshojë edhe në rrafshe të tjera. Ai tha se do të ketë hapësirë për zëra kritikë brenda, dhe se do të diskutohet e do të dëgjohet edhe aktivisti i LDK-së, por edhe qytetari.

“Do të shihni një organizim të ri politik të LDK-së. Do të shihni një shtrirje territoriale të përgjithshme të lidhjes tonë dhe do të shihni një politikë që është e përgjegjshmë, që dëgjon zërin qytetar dhe që mbi të gjitha e promovon idenë tradicionale të LDK-së që është e mbështetur në shtyllën e respektimit të shtetit të Kosovës, në bashkëpunimin ndërinstitucional, në mbështetjen e të gjitha proceseve integruese ku ka nevojë dhe një LDK që ka zë kritik brenda, ka mendim kritik, ka mendje, ka diskutim dhe ecën përpara duke dëgjuar edhe aktivistin e vet, edhe qytetarin”, tha Abdixhiku.

37-vjeçari është kryetari i katërt i LDK-së. Ai në garë e la pas Lutfi Hazirin dhe Besian Mustafën, që synonin të njëjtën pozitë.

Para se Kuvendi Zgjedhor i LDK-së t’i niste punimet, Anton Quni u tërhoq nga kandidatura e tij për kryetar të partisë. Pas zgjedhjeve të brendshme, Quni tha se këtë vendim e mori për t’i hapur rrugë frymës së re brenda subjektit politik.

Kryetari i Lëvizjes Vetëvendosje, Albin Kurti e ka uruar Lumir Abdixhikun për zgjedhjen e tij në krye të Lidhjes Demokratike të Kosovës (LDK), duke thënë se është në interes të Kosovës, që të ketë bashkëpunim ndërmjet opozitës dhe qeverisë së re.

“Është interes i përbashkët i çdo qytetari të Kosovës që partitë politike të hedhin hapa përpara sa i përket demokratizimit të brendshëm, bashkëpunimit midis opozitës dhe qeverisë për punë të dobishme, por edhe opozitarizmi i fortë për çështje të argumentuara drejt e saktë”, tha Kurti të dielën në një postim në rrjetin social Facebook.

Kurti, partia e të cilit ka fituar zgjedhjet e parakohshme parlamentare të 14 shkurtit, së bashku me ushtruesen e detyrës së presidentit, Vjosa Osmani, kanë ftuar liderët e partive në takim konsultativ për formimin e institucioneve të reja.

Megjithatë, Abdixhiku, i cili të dielën, më 14 mars, mori besimin për ta udhëhequr LDK-në, tha se e ka të pamundur që të marrë pjesë në këtë takim, për shkak të konsolidimit të organeve të reja të partisë.

“Gjithsesi propozoj të premten si datë të takimit eventual, në formatin e njëjtë siç është kërkuar”, tha Abdixhiku për mediat në Prishtinë.

Abdixhiku tha se platforma e tij është që LDK-ja të jetë konstruktive dhe të mos shkaktojë probleme në formimin e institucioneve të reja.

“Qasja e jonë do të jetë konstruktive. Pjesë e platformës sime, që do ta bëj publike për media, është që ne do të jemi konstruktiv me të gjitha partitë politike shqiptare, jo vetëm në Kosovë, por dhe në rajon”, tha Abdixhiku.

Më 13 mars, Komisioni Qendror i Zgjedhjeve certifikoi rezultatin e zgjedhjeve të 14 shkurtit, ku LVV-ja e Albin Kurtit ka fituar 50.28 për qind të votave.

Kurti, më herët ka deklaruar se qeverinë mëton që ta formojë me partitë e komuniteteve joserbe, duke përjashtuar në këtë drejtim bashkëpunimin me Listën Serbe dhe partitë tjera shqiptare.

Përveç konstituimit të legjislaturës së tetë të Kuvendit të Kosovës dhe zgjedhjes së qeverisë së re, të cilën pritet ta udhëheqë Kurti, Kosova duhet të zgjedhë edhe presidentin e ri.

Lëvizja Vetëvendosje, për kandidate për presidente e ka Vjosa Osmanin, e cila aktualisht është ushtruese e detyrës së presidentit.

Për zgjedhjen e presidentit, sipas Kushtetutës, duhet mbështetja e 80 deputetëve të kuvendit. Deri tani, as LDK-ja dhe as partitë e tjera, nuk kanë treguar nëse do ta votojnë Osmanin për presidente.

Osmani, ish-zyrtare e LDK-së, në këto zgjedhje kandidoi në listën e LVV-së dhe është personi më i votuar, duke siguruar mbi 300 mijë vota. rel

Kryetari i LDK-së, Lumir Abdixhiku, pas marrjes së udhëheqjes së partisë, është pyetur nëse deputetët e kësaj partie do ta votojnë Vjosa Osmanin për presidente të vendit.

Abdixhiku ka premtuar se LDK-ja do të jetë kontruktive, ndërsa ka theksuar se “Kryesia e re e merr vendimin”, raporton Gazeta Express.
“Ne do të jemi konstruktiv me të gjitha partitë shqiptare, jo vetëm në Kosovë por edhe rajon”, ka thënë Abdixhiku.

“Meqenëse dje janë certifikuar rezultatet dhe sot është zgjedhur kryetari i partisë, ju lus për mirëkuptim, që t’i themelojmë organet e reja, të zhvillojmë konsulta fillimisht të brendshme sepse vendimet tona do të jenë kolektive dhe jo individuale, gjithmonë duke respektuar frymën e kontruktivitetit në skenën tonë politike dhe të shohim se çfarë mund të bëjmë në këtë drejtim duke marrë parasysh edhe respektin e ndërsjellë që partitë tjera do ta tregojnë për LDK-në”, ka shtuar ai.

Duke komentuar deklaratat e përfaqësuesit special të SHBA-së për Ballkanin, Matthew Palmer se partitë opozitare duhet të qëndrojnë në sallë kur të votohet presidenti, Abdixhiku ka ripërsëritur se do të sillen në mënyrë kontruktive.

“Edhe unë po them që do të sillemi në mënyrë konstruktive. Qëllimi është që të jemi kontruktivë”, ka thënë Abdixhiku.

Abdixhiku është zgjedhur sot kryetar i LDK-së, duke marrë shumicat e votave të delegatëve të partisë në Kuvendin Zgjedhor. Kundërkandidatë të tij ishin Lutfi Haziri dhe Besian Mustafa.

Komisioni Qendror i Zgjedhjeve certifikoi të shtunën rezultatin e zgjedhjeve të parakohshme parlamentare të 14 shkurtit, ku Lëvizja Vetëvendosje e Albin Kurtit ka shënuar fitore bindëse, duke fituar 50.28 për qind të votave.

Partia e Kurtit në zgjedhjet e 14 shkurtit ka fituar 438.335 vota.

Certifikimi i rezultateve pason trajtimin e ankesave të kandidatëve për deputetë dhe subjekte politike nga Paneli Zgjedhor për Ankesa dhe Parashtresa si dhe nga Gjykata Supreme.

Pas certifikimit të rezultatit, sipas Kushtetutës së Kosovës, presidenti i Kosovës, në këtë rast, ushtruesja e detyrës së presidentit, Vjosa Osmani, brenda 30 ditësh duhet të thërrasë seancën e parë të kuvendit, në mënyrë që të formohen institucionet e dala nga zgjedhjet.

Kjo do të jetë legjislatura e tetë e Kuvendit të Kosovës dhe në bazë të rezultatit, Lëvizja Vetëvendosje do të ketë 58 ulëse, Partia Demokratike e Kosovës do të ketë 19 ulëse, Lidhja Demokratike e Kosovës 15 dhe Aleanca për Ardhmërinë e Kosovës do të ketë tetë ulëse.

Hoxhiq, përfundimisht jashtë kuvendit

Ndërkaq, nga komunitetet, Lista Serbe ka fituar të dhjetë ulëset e garantuara. Dy ulëse ka fituar Partia Demokratike Turke e Kosovës. Nga një ulëse kanë fituar Koalicioni Vakat, Partia e Re Demokratike, Partia Gorane, Iniciativa e Re Demokratike e Kosovës, Partia e Ashkalinjëve për Integrim, Iniciativa Rome, Lëvizja Përparimtare e Romëve të Kosovës dhe Unioni Socialdemokrat.

Pas ankesave në PZAP dhe Gjykatën Supreme, “Komuniteti i Bashkuar-Adrijana Hoxhiq” ka humbur ulësen në kuvend dhe në vend të saj ka hyrë, Unioni Socialdemokrat i Duda Bales. Ndërkaq, “Iniciativa Rome” ka mbetur vetëm me një ulëse në kuvend.

Gjatë mbledhjes së KQZ-së, ku u certifikua rezultati i zgjedhjeve, kryetarja e këtij institucioni, Valdete Daka bëri thirrje që deputetët e rinj të bëjnë reformën zgjedhore.

“Dua t’i drejtohem deputetëve të legjislaturës së ardhshme, subjekteve politike, që reformën zgjedhore të mos e lënë në udhëkryq, por t’ia japin rrugën e duhur. KQZ-ja është e gatshme që të japë kontributin e vetë profesional në këtë reformë”, tha Daka.

Ankesat në PZAP dhe Gjykatën Supreme të komuniteve joserbe

Pas shpalljes së rezultatit të zgjedhjeve nga KQZ-ja më 4 mars, partitë e komuniteteve joserbe iu drejtuan Panelit Zgjedhor për Ankesa dhe Parashtresa, duke thënë se dy subjekte boshnjake dhe rome, kanë fituar vota me ndihmën e Listës Serbe.

Ata kanë argumentuar se subjekti “Komuniteti i Bashkuar – Adrijana Hoxhiq” dhe “Iniciativa Rome” kanë fituar vota në lokalitete të banuara me shumicë serbe.

PZAP-ja ka miratuar pjesërisht ankesat e këtyre partive politike, duke anuluar votat që këto dy subjekte fituan në komunat me shumicë serbe dhe duke bërë që jashtë kuvendit të mbetet Adrijana Hoxhiq. Kjo e fundit humbi betejën edhe në Gjykatën Supreme, e cila refuzoi ankesën e saj.

Hoxhiq ka paralajmëruar se do t’i drejtohet edhe Gjykatës Kushtetuese, por edhe mekanizmave ndërkombëtarë.

Dyshimet për manipulime të votave në QNR

Pas ankesave, PZAP-ja po ashtu kishte urdhëruar rinumërimin e votave me kusht dhe me postë të kandidatëve për deputetë të Aleancës për Ardhmërinë e Kosovës, pas dyshimeve se janë manipuluar votat në favor të një kandidateje.

Pas ngritjes së dyshimeve, Meliza Haradinaj-Stublla, dha dorëheqje nga drejtimi i Ministrisë së Punëve të Jashtme dhe Diasporës dhe nga funksionet partiake. Pas rinumërimit të votave, Haradinaj-Stublla humbi edhe mandatin e deputetes për legjislaturën e tetë.

Lidhur me dyshimet për manipulime në Qendrën e Numërimit dhe Rezultateve autoritetet kanë arrestuar dy persona.

Takime konsultative për krijimin e institucioneve

Kreu i LVV-së, Albin Kurti dhe Vjosa Osmani – që në këto zgjedhje garoi në kuadër të listës së LVV-së – kanë thirrur takime konsultative me liderët e partive, lidhur me krijimin e institucioneve të reja.

Takimet pritet të mbahen të hënën më 15 mars.

Për formim të Qeverisë në Kosovë duhen të sigurohen 61 vota në Kuvendin e Kosovës.

Kurti ka thënë se qeverinë synon ta formojë me disa parti të komuniteteve joserbe.

Kosova po ashtu pritet që të zgjedhë edhe presidentin e ri, pasi që nga 5 nëntori i vitit 2020, është me ushtrues detyre të presidentit. Kandidatët për këtë pozitë duhet të kenë 80 vota për të fituar ulësen në presidencë.

Lëvizja Vetëvendosje ka thënë se për këtë post do ta kandidojë Vjosa Osmanin.

Në zgjedhjet e 14 shkurtit, nga mbi 1.7 milion qytetarë me të drejtë vote kanë votuar 48.78 për qind dhe vota të vlefshme, sipas KQZ-së, kanë qenë 877.503.

Kosova ka pasur mundësi të bëhët një vend i rregulluar për 22 vite në liri.Shtetit më të ri në Evropë nuk iu vunë themelet bash të mira. Nuk kishte vullnet politikë për këtë gjë, së dominojë vullneti për përfitime , për pasurime të paligjshme… Kosova më kohë është larguar nga e kaluara , ndërsa më punë ka mbetur mbrapa botës së civilizuar.Nuk ka fajtorë kujdestar , por fajtorët dihet së janë klasa politike e cila nuk u largua nga logjika e kaluara e ish sistemit komunist. Mund ti numërojmë në gishta të dorës shtetarët të cilët u përpoqën për shtëtndërtim dhe mirëqenje .I kishim simbolet nga e kaluara së si duhet dashur atdheu dhe kombi, por që ky rrugëtim shumë pak u trasua nga ata që morën timonin e shtetit të Kosovës. Më shumë u ballafaquam gjatë këtyre viteve më jurishnikët e politikës të cilët nuk treguan zgjuarësi dhe as dije . Po rrezikojmë të bëhëmi tradhëtar të idealeve tona. Po e rrezikojmë rrugën e demokratizimit .Ky eshalon politike u tregua inert, I pa aftë për kohën e pluralizmit politikë dhe për sistemin kapitalist liberal. Është e qartë së një shtet I pa ndërtuar mirë në sisteme , nuk ka mundësi ti këtë as përfaqësuesit politikë në nivelin e kërkuar.Thënë saktësisht, kur kemi rregullim të mbrendshëm, kur kemi shtet funksional dhe ligjor, atëherë janë predispozitat për pushtetarë të zot dhe në nivelin e kërkuar.Kosova ka marrë leksione jo të mira nga njerëzit të cilët shkelën në krim të organziuar , korrupcion…, të cilat dukuri bënë që te kemi një situatë përmanente të krizave politike, institucionale, dhe të krizave ekonomike.Bën që të kemi varfëri , madje edhe të formës ekstreme, si dhe largime masovike nga Kosova… Kemi edhe shumë shembujë jo të mirë të politikave dështuese të gardës së vjetër dhe reakcionare politike, të cilat janë si përvojë, që të mos përseriten.Kjo do tju shërbën forcave reformatore politike të 14 shkurtit. Këta tashmë e kan mësuar modelin e keqeverisjës më vendin , për dy decenie , që është shumë kohë e gjatë. Modeli I qeversjës së mirë është kur hiqët lakmia për pushtet apsolut, kur hiqët lakmia e hajnisë dhe zhatjës të pronës shoqërore. Kur të gjitha këto , si dhe krimi e korrupcioni bien në suaza të normalitetit …. Albin Kurti dhe Vjosa Osmani e kan rastin historik të formohen shtetarë autoritativ,më moral dhe përgjëgjësi të lartë politik. Është e logjikshme së pas kohës së keqe, vjen kohë e bukur. Kohë e bukur ka lindur pas 14 shkurtit kur në mënyrë plebishitare u zgjodhën nga gjiri i popullit përfaqësuesit legjtimim . U zgjohën ata të cilët nuk do të lejojnë të pëmbyset anija e quajtur-Kosovë…

Ish-kryetari i Gjykatës Kushtetuese të Kosovës, Enver Hasani thotë se deputetët kanë obligim kushtetues që të qëndrojnë në sallë kur të votohet presidenti.

”Nëse nuk qëndrojnë në sallë nuk flitet për përgjegjësi penale, por është një përgjegjësi kushtetuese të qëndrojnë në sallë”, tha ai në “Debat Plus”.
Hasani thotë se në Kuvendin e Kosovës ka pasur edhe rrahje por përgjegjësia në këtë rast ka qenë politike.

”Formimi i institucioneve është përgjegjësi kushtetuese. Njerëzit duhet të qëndrojnë në sallë dhe të kryejnë detyrat e tyre”, tha Hasani.

Ish-kryetari i Gjykatës Kushtetuese të Kosovës thotë se standardi është që në fillim të konstituohet Kuvendi e më pas të zgjidhet presidenti.

”Shefi i shtetit është institucion balancues i institucioneve tjera. Tashmë e dimë që presidenti përfaqëson unitetin e popullit”, tha ndër të tjera Enver Hasani.

Katër ujq janë parë sot në qendër të Prishtinës.

Pa menduar fare, pronari i tyre ka nxierr në mes të qytetit katër ujqit e tij, duke mos pasur parasysh rrezikun që mund të kanosej qytetarëve.

Në video shihet se dy persona mbajnë të lidhur me zinxhir katër ujq deri sa ecin në Prishtinë.

Mendohet se ujqit kanë ardhur nga Bullgaria për një film i cili do të xhirohet në Kosovë, ndërsa mënyra e transportit të tyre duket se ka qenë e gabuar.

Ushtruesja e detyrës së presidentit në Kosovë Vjosa Osmani, është fokusuar në takimin virtual me Zëvendës-ndihmës Sekretarin amerikan të Shtetit Mathew Palmer, në themelimin pa vonesë të institucioneve të Kosovës.

Në një komunikatë për media është thënë se Palmer ka uruar Osmanin për zgjedhjet e parakohshme parlamentare, të mbajtura më 14 shkurt në Kosovë.

Osmani, e cila ka garuar në kuadër të listës së Vetëvendosjes ka fituar më së shumti vota, përkatësisht 300.788.

Në njoftim është thënë se të dy zyrtarët janë pajtuar se institucionet e reja duhet të fokusohen në luftimin e korrupsionit, në adresimin e pandemisë, në rimëkëmbjen ekonomike dhe në krijimin e vendeve të punës.

Në bisedë është diskutuar edhe për rëndësinë e dialogut me Serbinë dhe angazhimin aktiv në këtë proces.

Osmani ka thënë se dialogu duhet të përqendrohet në njohjen reciproke derisa Palmer ka thënë se përkushtimi i Kosovës në dialog kontribuon në stabilitet, paqe dhe progres brenda vendit si dhe në rajon.

Palmer ka thënë po ashtu se Shtetet e Bashkuara do të jenë të përfshira si partnere në dialog, duke i koordinuar qëndrimet me Bashkimin Evropian.

Edhe kryeministri në detyrë i Kosovës Avdullah Hoti ka biseduar të enjten me Palmerin, në një takim virual, për sfidat me të cilat përballet Kosova, mes tjerash pasojat e pandemisë së koronavirusit.

“Kryeministri Hoti ka falënderuar z. Palmer për bashkëpunim dhe mbështetjen e vazhdueshme të SHBA-ve për Kosovën në të gjitha etapat e shtetndërtimit”, është thënë në njoftim.

Sa i përket pandemisë, Hoti ka njoftuar të njëjtën ditë se në Kosovë do të vazhdojnë të zbatohen masat e njëjta për luftim të pandemisë së koronavirusit.

“Institucionet shëndetësore po funksionojnë me kapacitete të plota, furnizimi me barna është stabil, ndërsa deri në fund të muajit pritet të arrijë kontingjenti i parë i prej 33 mijë dozave të vaksinës COVAX dhe menjëherë të fillojë vaksinimi i qytetarëve”, ka thënë Hoti.

Megjithatë, qytetarët e intervistuar më 10 mars në Qendrën Klinike Universitare të Kosovës kanë thënë për Radion Evropa e Lirë se duhet të blejnë pothuajse të gjitha ilaçet për familjarët e infektuar me koronavirus.

Vetëm në shtatë ditët e fundit, në Kosovë janë regjistruar mbi 4.500 raste të infektimit.

Nga data 11 shkurt, orë policore nuk ka në asnjë qytet të Kosovës, derisa orari i punës së operatorëve ekonomikë është nga ora 05:00 deri më 22:00.

Përndryshe Kosova vazhdon të mbetet vendi i vetëm në Evropë që nuk ka nisur procesin e vaksinimit.

Skema e Organizatës Botërore të Shëndetësisë, COVOX, përmes së cilës pritet të shpërndahen vaksinat për koronavirus në vendet e varfra, ka bërë të ditur se Kosova mund të furnizohet me këtë vaksinë deri në muajin maj.

Në dërgesën përmes COVAX-it, Kosova do të përfitojë 100,800 doza të vaksinës së prodhuar nga kompania AstraZeneca.

Ministria e Shëndetësisë në Kosovë, në fillim të muajit janar, pati njoftuar se ka marrë konfirmim nga kompania amerikane, Pfizer, për sigurimin e 535,000 vaksinave kundër koronavirusit.

Mirëpo zyrtarë të kësaj kompanie i kanë thënë Radios Evropa e Lirë se ende janë në diskutime me Qeverinë në detyrë të Kosovës për furnizim me vaksina.

Sandra Cvetkoviq

Bojan Markoviq nga komuna e Ranillugut, komunë kjo me shumicë serbe, pretendon se e ka humbur vendin e punës, vetëm sepse refuzoi të votonte për Adrijana Hodxhiqin, përfaqësuese e një prej subjekteve politike boshnjake nga Mitrovica, në zgjedhjet parlamentare të 14 shkurtit në Kosovë.

Markoviq thotë se kryetari i komunës së Ranillugut, Vlladica Aritonoviq nga Lista Serbe, i kërkoi që të votonte për Hoxhiqin.

Markoviq, i cili është baba i dy fëmijëve të mitur, punonte për kompaninë e sigurimit fizik “Scorpion” me seli në Ferizaj, e cila është në pronësi të një shqiptari. Vendi i punës së Markoviqit ishte në ndërtesën e komunës së Ranillugut. Komuna është 60 kilometra nga Prishtina.

“Ai më thirri mua (kryetari i Ranillugut, Vlladica Aritonoviq) dhe më dha një fletëvotim. E rrumbullakoj opsionin për mua dhe numrin në të djathtë, dhe më tha: ‘Këtë kërkesë do të ma respektosh. Voto për Adrijana Hoxhiqin dhe i pres katër vota nga ti’. Pra, që unë, prindërit e mi dhe gruaja ime ta mbështesnim këtë opsion”, thotë Markoviq në një deklaratë për Radion Evropa e Lirë.

Fletëvotimi, të cilin Bojan Markoviq pretendon se e mori nga kryetari i Komunës së Ranillugut, Vlladica Aritonoviq.
Fletëvotimi, të cilin Bojan Markoviq pretendon se e mori nga kryetari i Komunës së Ranillugut, Vlladica Aritonoviq.

“Ata më thirrën më 16 shkurt (dy ditë pas zgjedhjeve) për një bisedë me kryetarin. Unë shkova dhe ai më tha: ‘Ku janë votat?’. Unë i thash se nuk mund ta votoja atë, as prindërit e mi nuk donin të votonin (për Iniciativën Qytetare Komuniteti i Bashkuar- Adrijana Hoxhiq)”, shtoi ai.

Më 21 shkurt, shtatë ditë pas zgjedhjeve, Markoviq u shkarkua nga kompania e tij e punës. Dokumenti që iu dorëzua atij me atë rast dhe të cilin e ka parë edhe Radio Evropa e Lirë, thotë se punësimi i tij është ndërprerë për shkak të “zvogëlimit të numrit të punëtorëve, sipas urdhërave të komunës së Ranillugut”.

Aktvendimi për ndërprerjen e marrëdhënies së punës të Bojan Markoviqit.
Aktvendimi për ndërprerjen e marrëdhënies së punës të Bojan Markoviqit.

Markoviq shton se kryetari i Komunës së Ranillugut dhe zyrtarët e tjerë shpërndanë fletëvotime me një opsion të vetëm politik, për të cilin u thoshin qytetarëve që të votojnë.

Markoviq nuk është ankuar për vendimin e punëdhënësit dhe nuk është i gatshëm që ta raportojë rastin në polici. Sidoqoftë, ai vendosi të flasë për këtë publikisht për Radion Evropa e Lirë, sepse, siç thotë, ajo që i ndodhi atij është “turp”.
Pse Adrijana Hoxhiq?

Adrijana Hoxhiq garoi në zgjedhje me Iniciativën Qytetare Komuniti i Bashkuar-Adrijana Hoxhiq. Subjekti i saj fitoi 6.422 vota apo një ulëse në Kuvendin e Kosovës.

Sidoqoftë, Paneli Zgjedhor për Ankesa dhe Parashtresa (PZAP), duke vepruar në bazë të ankesës së partive të tjera boshnjake, ia anuloi subjektit të Hoxhiqit 4.205 fletëvotime pas shpalljes së rezultateve përfundimtare. Vendimi u mor me arsyetimin se numri i votave për partitë boshnjake u rrit me 49 për qind, që krahasuar me rezultatin e zgjedhjeve të vitit 2019 nënkupton se “si asnjëherë më parë, mijëra votues të komunitetit serb në Kosovë votuan për përfaqësuesit boshnjakë”.

Hoxhiq e apeloi vendimin e PZAP-it në Gjykatën Supreme, e cila pritet të vendosë për këtë çështje deri më 12 mars.

Instituti i Kosovës për Drejtësi, që i përfaqësoi kundërshtarët politikë të Hoxhiqit në PZAP, tha se janë manipuluar rreth 10.000 vota, të cilat janë orkestruar nga Lista Serbe.

E gjithë kjo, me qëllim të kontrollit të deputetëve joserbë nga radhët e komuniteteve joshumicë në Kuvendin e Kosovës. Hoxhiq i ka mohuar në mënyrë të vazhdueshme këto pretendime.

Në Ranillug, ajo mori 255 vota ose 9.6 për qind të votave të përgjithshme në këtë komunë. E sipas regjistrimit të fundit të popullsisë në vitin 2011, në Ranillug jeton vetëm një boshnjak.
Kompania ‘Scorpion’: Kërkesa erdhi nga komuna

Xhevat Emërllahu, pronar i kompanisë ‘Scorpion’, ka vetëm lëvdata për Bojan Markoviqin. Pavarësisht nga kjo, siç tha në një deklaratë për Radion Evropa e Lirë, kërkesa për zvogëlimin e numrit të punëtorëve erdhi nga komuna.

“Në momentin që Kuvendi Komunal kërkon që ne të bëjmë zvogëlimin e punëtorëve, përmes zyrës së prokurimit, ne jemi të detyruar që ta bëjmë zvogëlimin automatikisht, sepse nuk paguan ai zotëria. Nëse për shembull i kemi pesë persona dhe ai thotë ‘ke për ta larguar një person’, ne jemi të obliguar për ta zvogëluar numrin, sepse nuk paguan faturën”, u shpreh Emërllahu.

Por, Emërllahu nuk dha sqarim lidhur me atë se pse pikërisht Bojan Markoviq u pushua nga puna dhe nëse kërkesa për largimin e tij nga puna ishte bërë më sugjerim të komunës.

“Tash ma keni bërë një pyetje shumë të rëndë”, tha ai.

Emërllahu thotë se Bojani ishte një punëtor i jashtëzakonshëm, por se “Kuvendi Komunal punon në bazë të politikave që ka, të partisë, apo çfarëdo qoftë tjetër”.

“E përsëris që ai ishte një punëtor shumë i mirë, i dëgjueshëm, me sjellje të mirë dhe na respektonte”, tha Emërllahu.
Çfarë thotë kryetari i komunës së Ranillugut?

Kryetari i Ranillugut, Vlladica Aritonoviq, mohon të gjitha akuzat lidhur me Bojan Markoviqin dhe shton se ai nuk u ka bërë “presion njerëzve për të votuar për ndonjë opsion politik”.

“Unë po ju them edhe një herë, për sa i përket komunës, askush nuk u largua nga puna”, i tha Aritonoviq Radios Evropa e Lirë.

Ai shtoi se është i njoftuar për rastin që një punëtor i sigurimit u pushua nga puna, por gjithashtu pretendon se komuna nuk ka asnjë lidhje me këtë.

“Ata janë aty për të siguruar objektet në territorin e Komunës së Ranillugut dhe nëse punëdhënësi i tij e pushoi nga puna, kjo nuk ka asnjë lidhje me komunën. Ai nuk është punëtor i komunës, por punonjës i një kompanie të sigurimit fizik”, thotë Aritonoviq.

“Punëdhënësi i lidh kontratat vetë dhe po ashtu vetë edhe i përfundon. Sa kam dijeni, kontratat kanë skaduar. Tani vetëm nëse atij kontrata nuk i është vazhduar dhe nuk e ka marrë ende vendimin për përfundimin e kësaj kontrate”, shton Aritonoviq.
Hoxhiq: Kjo është çështje për Policinë

Udhëheqësja e Iniciativës Qytetare “Komuniteti i Bashkuar, Adrijana Hoxhiq”, në një deklaratë për Radion Evropa e Lirë thotë “se ky është rast për policinë”.

“Shpresoj që zotëria në fjalë t’i drejtohet policisë. Nuk ka rëndësi se kush e ushtron presionin, qoftë edhe kryetari, i cili duhet të mbajë përgjegjësi para ligjit. Nuk vjen në shprehje që të ndryshohet vullneti i votuesve. Duhet të ketë liri absolute në ditën e zgjedhjeve. Unë i jam mirënjohës këtij zotërisë që nuk e dëgjoi rekomandimin dhe që nuk votoi në favor të iniciativës tonë, nëse për këtë dikush i ka bërë presion. Unë kërkoj që policia të hetojë plotësisht këtë çështje”, tha Hoxhiq.

Por ajo, njëkohësisht, tha se dyshon në vërtetësinë e rrëfimit të Bojan Markoviqit sepse “numri rendor gjashtë nuk është shtyrë përpara as në Mitrovicën e Veriut”.

Në këtë numër është e renditur Amra Memoviq.

“Ajo mori numrin më të madh të votave në veri të Kosovës. Sa i përket këtij numri edhe nëse do të kishte presion, ajo mori shumë pak vota nga pjesa jugore e Kosovës. Kjo, përfundimisht, është e pavërtetë”, thotë Hoxhiq.

Amra Memoviq mori 14 vota në Ranillug.
Çka pas zgjedhjeve?

Nga gjithsej 120 vende në Kuvendin e Kosovës, 20 janë të garantuara për komunitetet joshumicë, prej të cilave 10 për komunitetin serb dhe 10 për komunitetet e tjera që jetojnë në Kosovë.

Bazuar në rezultatet aktuale të Komisionit Qendror të Zgjedhjeve, Lista Serbe fitoi të dhjetë vende në Kuvendin e Kosovës, të garantuara për këtë komunitet.

Partia Demokratike Turke e Kosovës dhe Iniciativa Rome fituan nga dy vende secila. Subjektet politike boshnjake, Koalicioni Vakat, Komuniteti i Bashkuar – Adrijana Hoxhiq dhe Partia e Re Demokratike, fituan nga një vend secila. Partia e Bashkuar Gorane, Iniciativa e Re Demokratike e Kosovës, e cila përfaqëson komunitetin egjiptian dhe Partia e Ashkalinjëve për Integrim fituan nga një vend në Kuvend.

PZAP-ja gjithashtu anuloi mbi 800 vota të cilat Iniciativa Rome i ka marrë nga komuniteti serb në Kosovë, subjekt ky që fitoi 4,049 vota. Arsyet janë të ngjashme me rastin e Adrijana Hoxhiqit.

Certifikimi i rezultateve të zgjedhjeve do të bëhet kur Gjykata Supreme, si instancë e fundit e ankimimit, të vendosë mbi ankesat e subjekteve politike apo kandidatëve për rezultatet e zgjedhjeve. Gjykata ka afat që të vendosë deri të premten, më 12 mars.

Lëvizja Vetëvendosje, e udhëhequr nga Albin Kurti, arriti një fitore bindëse në këto zgjedhje. Ai pritet që të formojë Qeverinë e re të Kosovës. Sidoqoftë, Kurti në disa raste ka thënë se nuk do ta përfshijë në koalicion qeverisës Listën Serbe, të cilën ai e konsideron si një instrument të Beogradit në Kosovë.

Partia e Kurtit fitoi 58 vende, ndërkaq për zgjedhjen e qeverisë nevojiten 61 vota. Kurti ka thënë se planifikon të formojë qeverinë me disa deputetë nga komunitetet e tjera pakicë.

Kryetari i Aleancës për Ardhmërinë e Kosovës, (AAK) Ramush Hradinaj ka kërkuar të enjten nga Komisioni Qendror i Zgjedhjeve (KQZ) rinumërim të plotë të votave të zgjedhjeve të 14 shkurtit dhe dënimin e keqpërdorueseve të votave.

Ai u ka thënë mediave se AAK-ja është e shqetësuar me keqpërdorimet e votave, që kanë ndodhur në disa raste nga komisionarë, të cilët i ka konsideruar të papërgjegjshëm.

“Kërkojmë nga organet e rëndit, ligjit dhe hetuesisë që kriminelet e votës të të gjitha partive të përfundojnë në burg. Ne nuk kontestojmë rezultatin e zgjedhjeve, nuk e di pse dikush duhet të jetë kundër rinumërimit” ka thënë Haradinaj.

Pas ngritjes së dyshimeve për manipulim të votave në zgjedhjet e 14 shkurtit, Meliza Haradinaj-Stublla të martën, më 9 mars, ka thënë dorëheqje nga drejtimi i Ministrisë së Punëve të Jashtme dhe Diasporës si dhe nga funksionet në Aleancën për Ardhmërinë e Kosovës.

Kryetarja e Komisionit Qendror të Zgjedhjeve (KQZ), Valdete Daka, në një intervistë për Radion Evropa e Lirë, të mërkurën ka thënë se “ dyshimet për manipulim të votave të kandidatëve për deputetë e kanë dëmtuar procesin zgjedhor, por ajo nuk beson se ka arsye për rinumërim total të votave”.

Komisioni Qendror i Zgjedhjeve ka shpallur më 4 mars rezultatin e zgjedhjeve të parakohshme parlamentare të 14 shkurtit.

Lëvizja Vetëvendosje e Albin Kurtit ka shënuar fitore bindëse, duke siguruar 58 ulëse në legjislaturën e re.

Sipas rezultatit përfundimtar, Partia Demokratike e Kosovës do të ketë 19 ulëse në kuvend, Lidhja Demokratike e Kosovës, 15 dhe Aleanca për Ardhmërinë e Kosovës do të ketë tetë deputetë.

Gjykata Supreme ka njoftuar të enjten se ka refuzuar nëntë nga 15 ankesat e pranuara, kundër vendimeve të Panelit Zgjedhor për Ankesa dhe Parashtresa (PZAP).

Gjashtë ankesa tjera është thënë se do të trajtohen në 72 orët e ardhshme.

Ankesat u janë refuzuar: Anton Shalës, Nezir Çoçajt, Lëvizjes Vetëvendosje, Visar Hotit, Ismet Shamollit, Hisen Berishës, Lirie Kajtazit, Ekrem Hysenit dhe Gentrit Sylës.

Ankesat kanë qenë të lidhura me kërkesa për rinumërim apo manipulim me vota.

Ankesa e Adrijana Hoxhiqit, udhëheqëses së subjektit politik boshnjak “Komuniteti i Bashkuar- Adrijana Hoxhiq”, nuk është trajtuar ende.

Ajo i është drejtuar Gjykatës Supreme për të kundërshtuar një vendim të Panelit Zgjedhor për Ankesa dhe Parashtresa që ia anuloi mbi 4.200 vota, që i kishte siguruar në komunat e banuara me shumicë serbe.

Hoxhiq e ka vlerësuar vendimin e PZAP-së, të marrë më 8 mars, si “skandaloz dhe të papranueshëm”, pasi sipas saj, me anulimin e votave, shkelen të drejtat themelore të qytetarëve të Kosovës.

Ajo ka paralajmëruar se nëse Supremja nuk hedh poshtë vendimin e PZAP-së, do të shfrytëzojë edhe instanca të tjera gjyqësore, duke aluduar në Gjykatën Kushtetuese dhe mekanizmat ndërkombëtarë. rel