Kosova është vend i sigurt karshi çfarëdo tendence që mund të paraqitet nga elemente të terrorizmit, kanë vlerësuar zyrtarët e lartë të Policisë së Kosovës.

Drejtori i Policisë së Kosovës, Shpend Maxhuni, gjatë raportimit në Komisionin Parlamentar për Punë të Brendshme, Siguri dhe Mbikëqyrjen e Forcës së Sigurisë, ka theksuar se Policia e Kosovës ka kapacitete të nevojshme për t’iu përgjigjur çdo kërcënimi, ashtu sikurse edhe Agjencia Kosovare e Inteligjencës (AKI), me të cilën, siç ka thënë ai, kanë bashkëpunim të ngushtë.

“Unë me përgjegjësi mund të them që Kosova është dhe vazhdon të jetë vend i sigurt karshi çfarëdo tendence që mund të paraqitet nga këto elemente. Policia e Kosovës ka kapacitete të nevojshme, edhe agjencitë e tjera, respektivisht AKI-ja ka kapacitetet e saja, por natyrisht që ne duhet të bëjmë vlerësime dhe analiza koherente mbi zhvillimet, mbi trendet dhe mbi kërcënimet aktuale dhe ato që mund të pasojnë”, ka theksuar Maxhuni.

Ai gjithashtu ka dhënë përgjigje në pyetjen e anëtarit të këtij komisioni, Rexhep Selimi, lidhur me atë se a është Kosova cak i radikalizmit të dhunshëm dhe terrorizmit. Sipas Maxhunit, përgjigja bazohet në vlerësimet e Policisë së Kosovës.

“A është Kosova çerdhe e terrorizmit, radikalizmit të dhunshëm apo target? Vlerësimet tona është se Kosova nuk është çerdhe, e as nuk është promovuese, por është cak, është target”, ka theksuar Maxhuni.

Pas kërkesës së deputetit Zafir Berisha nga Nisma për Kosovën, gjithashtu anëtar i këtij Komisioni Parlamentar, që të sqarohet çështja se pse është anuluar koncerti për shënimin e 4 korrikut, ditës së pavarësisë së Shteteve të Bashkuara të Amerikës, Maxhuni ka theksuar se Policia e Kosovës nuk ka informacione lidhur me këtë çështje.

“Cili ka qenë shkaku kryesor apo arsyeja përfundimtare për ta anuluar koncertin që ka qenë i paraparë për ditën e pavarësisë së SHBA, kjo gjë nuk është e njohur për ne. Është një vendim që është marrë jashtë kompetencave të Policisë së Kosovës”, ka theksuar Maxhuni.

Drejtori i Policisë së Kosovës ka theksuar gjithashtu se lidhur me rastin e arrestimit të 5 personave që ndërlidhen me rastin te liqeni i Badovcit dhe të cilët janë arrestuar si të dyshuar për terrorizëm, i gjithë suksesi ka qenë e arritur e përbashkët e qytetarëve dhe Policisë së Kosovës.

Në anën tjetër, ministri i Punëve të Brendshme i Qeverisë së Kosovës, Skënder Hyseni, gjatë një vizite në komunën e Podujevës, u ka bërë thirrje qytetarëve që të jenë syqelë dhe të denoncojnë çdo përpjekje të radikalizmit fetar.

“Të denonconi çdo tendencë për radikalizim, kudo që e hetoni. Është obligim qytetar, nacional dhe patriotik, ua them me plot gojën. Kudo që të hetoni tendenca, shpërfaqje të thirrjeve, diskurseve ekstremiste, t’i denonconi ato, sepse nga ky vend i vogël, në luftrëra të huaja të dhunshme, terroriste, kanë marrë pjesë mbi 300 qytetarë të Republikës së Kosovës”, ka theksuar Hyseni.

Edhe ministri Hyseni, por edhe drejtori i Policisë së Kosovës, Shpend Maxhuni kanë theksuar se që nga viti 2012 e deri më tash në luftëra të huaja, përkatësisht në Siri, kanë marrë pjesë rreth 300 qytetarë të Kosovës.

Por, Maxhuni ka sqaruar se tash për tash, numri aktual i personave që dyshohet se tani marrin pjesë në zhvillimet apo aktivitetet e ndryshme në luftën e Sirisë është rreth 100 persona.

Zyrtarët e Policisë së Kosovës, ditën e hënë, kanë hedhur poshtë lajmin e publikuar në disa portale se në afërsi të liqenit të Badovcit, ditën e diel, organet e rendit kanë gjetur eksploziv.

Baki Kelani, zëdhënës i Policisë së Kosovës, përmes një përgjigje me shkrim, i ka thënë Radios Evropa e Lirë se “Policia e Kosovës, si vazhdimësi e punës dhe ofrimit të sigurisë, njofton se në orët e pasdites, në një lokacion afër Badovcit ka gjetur armë me municion dhe disa gjëra tjera si rroba, por që nuk kanë të bëjnë me eksplozivin e as me gjëra tjera të dyshuara të kësaj natyre”.

Kelani nuk ka sqaruar nëse ka pasur të arrestuar lidhur me rastin, por ka theksuar se “Policia e Kosovës, siguron se po punon intensivisht drejt zbardhjes së rastit dhe ofrimit të sigurisë, ruajtjes së rendit dhe qetësisë publike”.

Ndryshe, gjetja në afërsi të liqenit të Badovcit e armës së gjatë, municionit dhe rrobave, të cilat nga policia nuk janë specifikuar nëse janë uniforma ushtarake ose jo, ka ndodhur vetëm disa ditë pas arrestimit të 5 personave të dyshuar për terrorizëm.

Tre prej tyre ishin arrestuar po ashtu te liqeni i Badovcit.

Të pesë të dyshuarve, Gjykata Themelore ua kishte shqiptuar masën e paraburgimit prej 30 ditësh, ndërkaq që edhe pas ankesës së tyre në Gjykatën e Apelit, kjo e fundit, të hënën i ka refuzuar si të pa bazuara ankesat e mbrojtësve të të pandehurve dhe e ka lënë në fuqi masën e paraburgimit ndaj pesë personave të dyshuar për veprën penale.

Arrestimet e fundit me dyshimin e veprës penale të terrorizmit, si dhe kërcënimet javë më parë nga grupi militant Shteti Islamik ndaj Ballkanit, përfshirë këtu edhe Kosovën, nga zyrtarë të institucioneve të Kosovës po shihen si veprime të rrezikshme për Kosovën.

Deputeti i Kuvendit të Kosovës nga radhët e Lëvizjes Vetëvendosje, Rexhep Selimi, anëtar i Komisionit Parlamentar për Punë të Brendshme, Siguri dhe Mbikëqyrjen e Forcës së Sigurisë së Kosovës, thotë për Radion Evropa e Lirë se institucionet e Kosovës duhet t’i qasen seriozisht kërcënimeve që vijnë nga terrorizmi.

“Çdo kërcënim, po të ishte vetëm verbal nuk do të ishte asnjëherë kërcënim. Kështu që kërcënimet verbale, zakonisht, apriori u paraprijnë kërcënimeve edhe faktike. Kosova nuk është cak i vetëm i kërcënimeve të terrorizmit global, por as nuk duhet të jetë e vetme në luftimin e kësaj të keqe globale që po ndodh rreth nesh”.

Deputeti Selimi, theksoi se Kosovës tashmë i janë shkaktuar dëmet e para nga situata e krijuar rreth ekstremizmit islamik dhe kërcënimet që vijnë nga ky ekstremizëm.

Sipas tij, Kosova është në fazën e njohjeve nga shtetet tjera dhe dëmtimi i imazhit të saj, si një vend që mund të jetë i kërcënuar apo si vend që mund të kërcënojë sigurinë rajonale, e dëmton këtë proces.

Burim Ramadani, ish-deputet i Kuvendit të Kosovës, duke folur për Radion Evropa e Lirë, vlerëson se Kosova, ka kaluar nga fazat e kërcënimit të përhapjes së ekstremizmit të dhunshëm në fazën kur sulmet terroriste mund të jenë prezente në vend, si pjesë e Ballkanit.

“Ballkani paraqet rëndësi strategjike dhe operacionale për lëvizjet ekstremiste dhe terroriste që funksionojnë nën ombrellën e IS-it (grupit militant Shteti Islamik) dhe asnjëri prej shteteve dhe popujve, veç e veç, në Ballkan, nuk e ka vlerën speciale aq sa e ka territori i Ballkanit, si portë hyrëse ose si urë ndërlidhëse me Evropën. Realisht, është i vetmi territor ose rajon që i mundëson qasje më të lehtë drejt Evropës, respektivisht ndaj civilizimit perëndimor”.

Kosova, tashmë është pjesë e koalicionit të vendeve që luftojnë kundër terrorizmit.

Por, deputeti Selimi vlerëson se institucionet e sigurisë në Kosovës, duhet të gëzojnë përkrahje më të madhe politike në luftë kundër terrorizmit.

“Nëse institucionet e Kosovës, Qeveria e Kosovës dhe institucionet e autorizuara shtetërore të sigurisë, nuk do t’i përziejnë agjendat politike në këtë temë, normalisht që Kosova do të kishte kapacitete, jo si e vetme, por si partnere me të gjitha vendet tjera, për ta luftuar këtë të keqe që është globale”.

“Duket që institucionet e Kosovës po e shfrytëzojnë – për agjenda dhe tema të ndryshme politike dhe jo vetëm- një situatë të tillë, e cila po e dëmton edhe luftën e institucioneve të autorizuara të sigurisë karshi këtij fenomeni”.

Edhe Ramadani vlerëson se duhet të punohet më tepër në koordinimin e institucioneve të vendit në luftë kundër terrorizmit.

“Vërehet qartë një moskoordinim ndërinstitucional dhe ky është elementi i parë që institucionet e Kosovës duhet, me shpejtësi, ta përmirësojnë”.

Ndryshe, kohë më parë, zyrtarë të institucioneve të Kosovës, por edhe njohës të rrethanave të sigurisë në vend, patën theksuar se kërcënimet e grupit militant Shteti Islamik ndaj vendeve të Ballkanit, përfshirë këtu edhe Kosovën, synojnë mbjelljen e frikës tek qytetarët, por ato kërcënime nuk duhet neglizhuar.

Rritja ekonomike, as duhet dhe as mund të bazohet në Qeverinë e Kosovës apo në institucionet publike – ajo duhet të vijë nga sektori privat. Kudo, në çdo vend ku funksionon ekonomia e lirë e tregut, bartës kryesor i zhvillimit ekonomik të vendit është sektori privat. Prandaj, që të ndodhë kjo, duhet sa më shpejt të futen masat, të cilat mundësojnë fuqizimin e këtij sektori”, thotë në intervistën për Radion Evropa e Lirë, drejtori ekzekutiv i Odës Ekonomike Amerikane në Kosovë, Arian Zeka.

Radio Evropa e Lirë: Zoti Zeka, shtatë muaj që nga krijimi i institucioneve të reja, përfaqësuesit e Qeverisë së Kosovës vazhdimisht kanë deklaruar se janë duke punuar në zhvillimin ekonomik të vendit. Ju, si përfaqësues i bizneseve në Kosovë, si i keni parë këta shtatë muaj të qeverisë?

Arian Zeka: Ajo çfarë mund të themi për këtë periudhë të Qeverisë së re të Kosovës, është se ka pasur një rritje të shpresës dhe pritjes për rezultate më të mëdha edhe nga ana qytetarëve edhe nga ana e bizneseve, por për shkak të dinamikës së ngadalshme në vendimmarrje në nxjerrjen e masave lehtësuese për bizneset e që nuk ka pasur rezultate konkrete.

Ajo çfarë mund të thuhet është që ka pasur vazhdim të trendëve negativë nga viti i kaluar, edhe në aspektin e rritjes dhe fuqizimit të sektorit privat, edhe në tërheqjen e investimeve të huaja direkte, që rrjedhimisht do të ndikojnë në normën e pritshme ekonomike për vitin 2015.

Radion Evropa e Lirë: Po thoni se nuk ka pasur rezultate konkrete, pse nuk janë arritur këto rezultate dhe çfarë duhet të bëhet?

Arian Zeka: Të gjitha këto pritje të shtuara të shoqërisë kosovare duhet të përcillen me masa konkrete të qeverisë. Duhet të shohim këtë zhvendosje të prioriteteve nga politika në ekonomi që i ka munguar Kosovës në të kaluarën.

Jemi të vetëdijshëm që Ministria e Financave dhe Qeveria në përgjithësi, sidomos pas zhvillimeve të fundit brenda Bashkimit Evropian, duhet të vazhdojnë të ndjekin politika më konservative. Megjithatë, ekzistojnë forma tjera mbështetëse, të cilat mund të fuqizojnë sektorin privat.

Rritja ekonomike, as duhet të bazohet dhe as mund të bazohet në Qeverinë e Kosovës apo në institucionet publike – ajo duhet të vijë nga sektori privat.

Kudo, në çdo vend ku funksionon ekonomia e lirë e tregut, bartës kryesor i zhvillimit ekonomik të vendit është sektori privat.

Prandaj, që të ndodhë kjo, duhet sa më shpejt të futen masat, të cilat mundësojnë fuqizimin e sektorit privat, masat që janë garantuese për investitorët e huaj, pasi që pa kapital të ri, pa metoda të reja të punës, përfshirë këtu edhe teknologjinë më moderne të punës, e cila do të sillej nga investitorët e huaj, vendi ynë do të humbë hapin me zhvillimet që tashmë po ndodhin nëpër botë, e për të cilat ne nuk jemi të përgatitur.

Radio Evropa e Lirë: Thoni se Kosova nuk është e përgatitur. Për çfarë përgatitje bëhet fjalë?

Arian Zeka: Në këtë drejtim duhet të them që Oda Ekonomike Amerikane e Kosovës së fundi ka filluar lansimin e diskutimit të temave, të cilat, mendoj, që nuk kanë marrë trajtimin e duhur në shoqërinë tonë, duke përfshirë edhe konceptin e ri teknologjik që po promovohet anë e mbanë botës, siç është interneti i gjërave, integrimi i internetit në secilën pajisje, thjesht ndryshimin e mënyrës së të jetuarit dhe kryerjes së punëve, përfshirë edhe ndryshimin e mënyrës së të bërit biznes.

Duam apo nuk duam shumë shpejt do të na imponohet edhe neve, nuk është diçka që lidhet me kërkesën tonë, por diçka që do të na imponohet e për të cilën unë mendoj se ne si vend nuk jemi të përgatitur.

Ekziston një debat i madh anë e mbanë botës,nëse këto zhvillime të reja teknologjike do të ndikojnë në zvogëlimin e vendeve të punës apo krijimit e vendeve të reja të punës, por pavarësisht se çka do të ndodhë, pavarësisht se cili do të jetë rezultati përfundimtar, ajo çka mund të themi nga konteksti ynë kosovar, është që ne nuk jemi të përgatitur për këto zhvillime teknologjike.

Radio Evropa e Lirë: Atëherë, cili do të duhej të ishte hapi i autoriteteve të Kosovës karshi këtyre zhvillimeve teknologjike?

Arian Zeka: Institucionet arsimore në Kosovë nuk po i mbështesin këta trendë të rinj botëror dhe një shqetësim që ne e shprehim në vazhdimësi është që institucionet arsimore nuk plotësojnë nevojat momentale të tregut, por nuk i plotësojnë as nevojat e ardhshme të tregut.

Institucionet arsimor duhet të shohin trendët botëror të zhvillimit të kërkesave për fuqi punëtore dhe të njëjtat të fillojnë të aplikohen edhe në vendin tonë.

Radio Evropa e Lirë: Me këtë trend të zhvillimit të teknologjisë dhe me qytetarët e Kosovës pa arsimim adekuat, ashtu si thoni ju, pra të papërgatitur për nevoja e tregut, zbutja e papunësisë në Kosovë del të jetë një problematikë e madhe?

Arian Zeka: Një prej arsyeve më të mëdha që Kosova ka këtë papunësi të madhe, është për shkak se ne vazhdojmë të kemi të rinj të diplomuar në fusha, për të cilat më nuk ka kërkesë të madhe në tregun e punës.

Po i shoh disa përpjekje të ditëve të fundit që të kufizohet numri i studentëve të rinj nëpër fushat sociale dhe t’u jepet prioritet më i madh drejtimeve që nuk lidhen me fushat sociale, duke përfshirë këtu shkencat natyrore dhe matematikore, e që është një përpjekje e qëlluar.

Nëse ne, si asociacione të biznesit, nëse ministritë përkatëse,nëse shoqëria në përgjithësi flet se ekzistojnë potenciale të shumta të zhvillimit të teknologjisë së informacionit dhe komunikimit, atëherë shkollimi duhet të jetë në këtë shërbim.

Mund të tingëlloj skeptik, por unë dyshoj se kemi kapacitetet e duhura dhe të mjaftueshme njerëzore që të realizojmë këtë potencial të zhvillimit të sektorit të teknologjisë së informacionit dhe komunikimeve në Kosovë. Duhet të kemi më shumë fuqi punëtore kurdo që krijohen kompanitë në këtë sektor, dhe ata duhet t’i kenë njerëzit që do t’i kryejnë detyrat dhe t’i realizojnë misionet e këtyre kompanive.

Gjyqtari i procedurës paraprake në Gjykatën Themelore të Prishtinës, ua ka caktuar masën e paraburgimit në kohëzgjatje prej 30 ditësh Besnik Latifit, Enis Latifit, Milazim Haxhisë, Gazmend Halitit dhe Fehmi Musës.

Të pesë të apostrofuarit janë të dyshuar për terrorizëm dhe janë arrestuar me 11.07.2015, te liqeni i Badovcit.

Masa e paraburgimit ndaj të pandehurve është caktuar “për arsye se ekziston dyshimi i bazuar se të njëjtit kanë kryer veprat penale ‘Përgatitja e veprave terroriste ose veprave penale kundër rendit Kushtetues dhe Sigurisë së Republikës së Kosovës”.

Në anën tjetër, deputetët e Kuvendit të Kosovës dhe njohës të rrethanave të sigurisë në Kosovë, vlerësojnë se institucionet e sigurisë, Policia e Kosovës, Agjencia Kosovare e Intelegjencës dhe institucionet tjera për zbatimin e ligjit, duhet të jenë syhapur, të përgatitura dhe të punojnë më shumë në parandalimin e rasteve të ekstremizmit në Kosovë.

Nuredin Ibishi, anëtar i Komisionit Parlamentar për Punë të Brendshme dhe Siguri në Kuvendin e Kosovës, duke folur për Radion Evropa e Lirë, thotë se institucionet e Kosovës tashmë kanë ndërmarrë edhe masat parandaluese, por edhe të ndëshkimit për kërcënimet që vijnë nga individ apo grupe ekstremiste.

“Do t’i veçoja arrestimet e mëhershme që ishin në këtë vazhdë, por edhe këtë të fundit, që ende nuk ka marrë epilogun, që ndodhi para 3 ditësh, ku u bë arrestimi i personave të dyshuar afër liqenit të Badovcit”.

Skënder Perteshi, analist nga Qendra Kosovare për Studime të Sigurisë, thotë për Radion Evropa e Lirë, se Kosova është e orientuar drejt integrimeve evropiane dhe në NATO, ndërkohë që këto të fundit, nga grupi militant Shteti Islamik shihen si armike.

Megjithatë, kërcënimet eventuale nga ky grup për Kosovën, sipas tij, më shumë kanë të bëjnë me propagandë.

“Kjo është vetëm një pjesë, një propagandë e organizatave ekstremiste, në mënyrë specifike prej IS-it, që pak a shumë të mbretërojë në diskursin publik emri IS (Shteti Islamik) dhe emri ektremizëm dhe në anën tjetër, që të mbjellin frikë, pasiguri dhe shqetësim tek qytetarët dhe opinioni publik”.

Lidhur me rastin e arrestimit të pesë qytetarëve të Kosovës të dyshuar për terrorizëm, Perteshi vlerëson se ende mungojnë informatat e sakta, lidhur me synimet që këta persona kanë pasur.

Megjithatë, sipas tij, shndërrimi i temave mbi terrorizmin dhe rrezikun nga terrorizmi, në tema dite në opinion, si dhe plasimi i informatave jo të plota nga institucionet dhe mediet, janë veprime që e shqetësojnë opinionin dhe si të tilla, ai i vlerëson të gabuara.

“Plasohet një informacion që është totalisht i pakonfirmuar dhe i pa verifikuar mirë. Vet qëllimi i organizatave ekstremiste është që ato të mbizotërojnë në diskursin publik, të mbizotërojnë mendjet e qytetarëve dhe të shkaktojnë një lloj frike dhe shqetësimi tek qytetarët e Kosovës”.

“Këto operacione shteti duhet t’i bëjë në mënyrë më të fshehtë. Do të thotë, emrat e personave që involvohen, mënyra e arrestimit dhe qëllimi pse bëhet, shteti duhet t’i bëjë në mënyrë më të fshehtë, ashtu sikurse edhe hetimet, sepse pak a shumë ndikon që edhe opinioni publik të mos shqetësohet për rastet që po ndodhin”.

Megjithëkëtë, deputeti Ibishi vlerëson se të gjitha rastet duhet të zbardhen për opinionin, pavarësisht faktit se në raste të caktuara edhe mund ta shqetësojnë atë.

“Mendoj që duhet opinioni ta dijë realitetin, sepse nuk ka më asgjë sekrete që të mbetet, sikurse aksionet e fshehta apo diçka të tillë, për arsye se edhe policia do të jetë transparente në ndërmarrjen e veprimeve, së bashku me prokurori dhe gjyqësi”.

“Mendoj se këtu nuk ka asgjë të keqe, pa marrë parasysh që realisht kjo ngritë shqetësime në opinion. Por, në qoftë se nuk ka transparencë, atëherë lindin dyshime tjera se çfarë po ndodhë. Atëherë, mendoj se shqetësimi është edhe më i madh i opinionit”.

Deri para arrestimeve të fundit, të ditës së shtunë, Policia e Kosovës kishte raportuar se ka hapur hetime dhe ka ushtruar kallëzime penale për mbi 130 persona, lidhur me pjesëmarrjen në organizata terroriste, organizimin, rekrutimin nxitjen dhe financimin e individëve për t’iu bashkangjitur organizatave terroriste dhe për të gjitha këto raste është duke u bashkëpunuar ngushtë me Prokurorinë Speciale.

Në lidhje me këtë fenomen, sipas Policisë së Kosovës, deri në rastin e fundit, janë arrestuar mbi 80 persona dhe janë bastisur mbi njëqind lokacione të personave të dyshimtë. rel

Kancelarja gjermane Angela Merkel, tha të martën se një prej detyrimeve  më të rëndësishme të Kosovës është që të çojë deri në fund bisedimet me Serbinë.

Ajo i bëri këto komente pas takimit në Berlin me kryeministrin e Kosovës Isa Mustafa.

Zonja Merkel radhiti edhe luftën kundër krimit të organizuar dhe korrupsionit si dhe ngritjen e Gykatës së Posaçme në mesin e mesazheve për kryeministrin Mustafa me të cilin ka diskutuar edhe çështjen e emigruesve nga Kosova. Kancelarja gjermane Angela Merkel bëri thirrje për marrëveshje të drejta ndërmjet Kosovës dhe Serbisë, si dhe ngritjen e Gjykatës së Posaçme në Kosovë, që do të trajtojë pretendimet për krime lufte. Ajo i bëri këto thirrje gjatë takimit me kryeministrin e Kosovës Isa Mustafa, i cili po qëndron në Berlin, pak orë pasi delegacioni i drejtuar prej tij dhe ai i Serbisë, dështuan të arrijnë marrëveshje në bisedimet e ndërmjetësuara nga Bashkimi Evropian në Bruksel.

Kancelarja Merkel, e cila javën e ardhshme do të qëndrojë në Beograd, për të nxitur përparime në këtë proces, tha se ky është kusht për përparimin e të dyja palëve drejt integrimeve evropiane.

“Natyrisht, ne kemi një interes shumë të madh që të arrihen marrëveshje të drejta dhe kjo vlen për të dyja palët. Kompromise duhet të bëjnë të dyja palët, jo vetëm Kosova, por natyrisht edhe Serbia. Unë i nxisë të dyja, sepse vetëm nëse shënojnë përparime në bisedime, do të arijnë përparime edhe në rrugën evropiane. Kjo vlen edhe për Serbinë edhe për Kosovën”, tha zonja Merkel, e cila deri tash ka ngulur këmbë që hapja e kapitujve të negociatave me Serbinë për anëtarësim në Bashkimin Evropian, të paraprihen nga një marrëveshje gjithpërfshirëse dhe detyruese për normalizimin e marrëdhënieve me Kosovën.

Kryeministri i Kosovës, Isa Mustafa, tha se me kancelaren Merkel është biseduar për çështjet zhvillimore, integrimin evropian dhe përmbushjen e kritereve për këto integrime, përfshirë luftën kundër krimit të organizuar e korrupsionit por edhe përmbushjen e kritereve për liberalizimin e vizave. Ai u shpreh i përkushtuar edhe ndaj detyrimeve ndërkombëtare të Kosovës.

“Kancelarja na ka dhënë përkrahjen por edhe edhe kërkesën e saj që ne të intensifikojmë dhe të përparojmë edhe më tutje procesin e dialogut me Serbinë dhe po ashtue që të përmbushim obligimet tona dhe detyrimet sa i përket themelimit të Gjykatës Speciale si një prej detyrimeve që ne kemi marrë”, tha ai.

Të dy zyrtarët e lartë thanë se kanë diskutuar edhe për cështjen e migruesve të paligjshëm nga Kosova të cilët, sic u tha nuk kanë asnjë mundësi që të përfitojnë nga politikat e strehimit.

Takimi me kryeministrin Mustafa i paraprinë një turneu të kancelaresë Merkel në Serbi, Shqipëri e Bosnjë, që sipas saj dëshmon se Gjermania ësthë e interesuar për qëndrueshëmri në rajonin e Ballkanit që ende përballet me pasojat e së kaluarës që ka lënë pas vetes cështje të pazgjidhura.

Që prej publikimit të një videoje propagandistike nga grupi militant Shteti Islamik (IS) për disa vende të Ballkanit, përfshirë këtu edhe Kosovën, masat e sigurisë në vend duket se janë shtuar ndjeshëm.

Policia e Kosovës, përmes një komunikate për medie, ka thënë se “në vazhdimësi është duke e bërë vlerësimin e rreziqeve të mundshme të sigurisë në vend dhe në këtë kuadër edhe vlerësime për rreziqet që mund të vijnë nga terrorizmi, grupet terroriste apo individ që ndërlidhen me këto aktivitete”.

Haxhi Shala, kryetar i Komisionit Parlamentar për Mbikëqyrjen e Agjensionit Kosovar për Intelegjencë, thotë për Radion Evropa e Lirë, se institucionet e sigurisë së vendit kanë shqyrtuar kërcënimet e mundshme dhe sipas tij, ato kanë ndërmarrë masat e sigurisë.

“Edhe Kosova ka ngritur gjendjen e gatishmërisë. Ka dy javë që këtë e ka bërë Policia e Kosovës. Njëkohësisht, edhe AKI është duke i vëzhguar në çdo hap individët që kanë lëshuar mesazhe kërcënuese. Kështu që, besoj që gjithçka e kanë nën kontroll institucionet e sigurisë”, tha Shala.

Florian Qehaja, drejtori i Qendrës Kosovare për Studime të Sigurisë, thotë për Radion Evropa e Lirë se video propagandistike nga grupi militant Shteti Islamik për disa vende të Ballkanit, është në kuadër të fushatës që ky grup e bën për të mbjellë frikë dhe pasiguri tek popujt në Evropë, e sidomos te shtetet e Evropës perëndimore, që kanë ndikim në marrëdhëniet ndërkombëtare.

Sipas tij, shtetet e Ballkanit perëndimor nuk kanë ndonjë relevancë në këtë drejtim dhe ato nuk janë caku kryesor i grupit militant Shteti Islamik.

“Unë nuk e shoh nivelin e kërcënimit në atë masë që qytetarët e Kosovës – në këtë rast po flas për Kosovën – të shqetësohen. Mirëpo, nuk duhet neglizhuar si kërcënim, për vet faktin që qytetarët tonë veprojnë atje dhe ata potencialisht mund të përdoren apo keqpërdoren për të arritur ndonjë qëllim të caktuar, që në fund të fundit, në fokus ka mbjelljen e frikës dhe pasigurisë”.

Shala, nuk konsideron se grupi militant Shteti Islamik mund të kërcënojë seriozisht sigurinë e vendit.

“Vendi nuk është i rrezikuar nga ideologjia e IS-it apo individët që kërcënojnë. Nuk është kërcënim serioz dhe gjithçka është nën vëzhgim, përfshirë ata persona që kërcënojnë ose mendojnë diçka të tillë”, tha Shala.

Policia e Kosovës, përmes komunikatës gjithashtu ka theksuar se në fushën e parandalimit të ekstremizmit të dhunshëm dhe terrorizmit, “ka bashkëpunim shumë të ngushtë edhe me institucionet tjera të sigurisë në vend, duke përfshirë edhe institucionet relevante ndërkombëtare në rajon dhe më gjerë”.

Por, Qehaja vlerëson se për sa i përket bashkëpunimit rajonal në sferën e policisë dhe intelegjencës, Kosova çalon, për shkak se, sipas tij, ajo nuk ka qasje në iniciativat rajonale të sigurisë, sidomos kur flitet për bashkëpunimin në këtë drejtim me Serbinë dhe Maqedoninë.

“Konsideroj që asnjë shtet nuk mundet që me forcat vetanake të parandalojë një rrezikshmëri të tillë, për arsye se është vështirë të identifikohen njerëzit që kanë qëllime të tilla. Armiku nuk ka adresë dhe mund të gjendet në mesin tonë, por mund të vij edhe nga jashtë”.

“Kur them ‘në mesin tonë’, atëherë mendoj se qytetarët e Kosovës duhet të bashkëpunojnë me organet e sigurisë dhe ta ndajnë me ta çdo indikacion, sado të vogël, si dhe çdo informacion të mundshëm, që shpien në drejtim të parandalimit të ndonjë qëllimi të keq të mundshëm”.

Qehaja ka shtuar se në rast se vlerësohet që kërcënimi potencial vjen nga jashtë, atëherë institucionet e sigurisë duhet ta rritin kontrollin kufitar, sidomos në aeroport, si dhe të shtojnë masat e kontrollimit dhe verifikimit të pasagjerëve që hyjnë në territorin e Kosovës.

Policia e Kosovës, ka theksuar se është duke mbikëqyrur “çdo aktivitet të personave fizik dhe juridik për të cilët siguron informata se mund të paraqesin rrezik për rendin kushtetues në të ardhmen apo mund të kryejnë ndonjë vepër penale” dhe se “e gjithë kjo bëhet me qëllim të parandalimit dhe zbulimit të ndonjë vepre penale të mundshme, duke përfshirë veprat e terrorizmit dhe ekstremizmit fetar”.

Çështja e formimit të Asociacionit apo Bashkësisë së komunave me shumicë serbe, pritet të jetë një nga temat, për të cilat do të bisedohet në takimin e radhës, më 29 qershor në Bruksel, ndërmjet kryeministrit të Kosovës, Isa Mustafa, dhe atij të Serbisë, Aleksandar Vuçiq.

Pas takimit të 23 qershorit, të dy kryeministrat kanë theksuar se lidhur me çështjen e Asociacionit është arritur përparim gjatë bisedimeve, por ata nuk kanë dhënë ndonjë sqarim se në ç’masë është ai përparim.

Për më tepër, të dy kryeministrat kanë theksuar se janë marrë vesh që të mos ketë deklarata për medie lidhur me atë se në cilat pika është arritur pajtimi ose jo lidhur me formimin e Asociacionit të komunave me shumicë serbe.

Dy ditë më parë, kryeministri i Kosovës, Isa Mustafa, në mbledhjen e ekzekutivit, ka theksuar se bisedimet do të vazhdojnë, por nuk ka ofruar detaje lidhur me këtë temë.

“Jemi marrë vesh që të vazhdojmë kësaj të hëne, për arsye se dialogu është lënë të vazhdohet për të njëjtat tema dhe të mos dalim publikisht dhe të themi se kush çka i tha kujt, sepse kjo nuk na ndihmon që ne të zhvillojmë një dialog konstruktiv”, ka deklaruar Mustafa .

Deklaratë të ngjashme, lidhur me çështjen e Asociacionit, pati dhënë edhe kryeministri i Serbisë, Aleksandar Vuçiq, menjëherë pas takimit të 23 qershorit.

“Disa çështje të rëndësishme kemi arritur t’i zgjidhim, por për këtë nuk mund të flas dhe marrëveshja është që për to të mos flasim në publik”, pati theksuar Vuçiq.

Megjithatë, Hashim Thaçi, zëvendëskryeministër dhe ministër i Jashtëm i Kosovës, në një intervistë dhënë medieve vendore, e cila është publikuar edhe në faqen zyrtare të internetit të Ministrisë së Jashtme të Kosovës, ka theksuar se në takimin e 23 qershorit “është arritur përparim i rëndësishëm edhe në çështjet e ndjeshme si ajo e formimit të Asociacionit të Komunave”.

“Mund të themi se e kemi çimentuar qëndrimin tonë se Asociacioni duhet të formohet në përputhje me Kushtetutën e Kosovës, me Ligjin për qeverisje lokale të Republikës së Kosovës, si dhe dokumentet tjera relevante evropiane për qeverisjen lokale”, ka theksuar zëvendëskryeministri Thaçi.

Në anën tjetër, Goran Rakiq, kryetar i komunës së Mitrovicës së veriut, i cili ka qenë i pranishëm së fundmi në Bruksel, në kuadër të dialogut Kosovë – Serbi, thotë për Radion Evropa e Lirë se marrëveshja për të mos diskutuar në publik lidhur me atë që është biseduar në Bruksel, është shkelur nga zëvendëskryeministri i Kosovës Hashim Thaçi.

“Kësaj marrëveshje i përmbahet vetëm kryeministri Vuçiq, ndërkaq që zoti Thaçi e ka shkelur këtë marrëveshje. Ai ka dalë në opinion me disa deklarata, për të cilat me përgjegjësi mund të them se nuk janë të sakta”, thotë Rakiq.

Ai shton se nuk mund të flasë për atë se për cilat çështje janë arritur përafrime të qëndrimeve ndërmjet Kosovës dhe Serbisë, lidhur me çështjen e formimit të Asociacionit të komunave me shumicë serbe. Por, sipas tij, pritjet e serbëve të Kosovës që ky asociacion të ketë edhe pushtet mbi disa segmente, janë reale.

“Unë pres që kjo Bashkësi të ketë pushtet konkret. Normalisht, ne nuk kërkojmë kompetenca që prekin diçka që nuk është ingerencë e një komune. Pra, kërkojmë kompetenca konkrete për sa i përket planifikimit hapësinor, arsimit, shëndetësisë. Do të thotë, bashkëpunimet lokale reciproke, të këtij lloji. Nuk kërkojmë asgjë më tepër dhe nuk po kërkojmë diçka të pamundur dhe të parealizueshme”, thekson Rakiq.

Në takimin e 29 qershorit, ndërmjet kryeministrave, Mustafa dhe Vuçiq, të ndërmjetësuar nga shefja e politikës së jashtme të Bashkimit Evropian, Federica Mogherini, pritet të vazhdojnë bisedimet për temat, për të cilat tashmë është diskutuar, siç janë: krijimi i Asociacionit të komunave me shumicë serbe, energjia, telekomi, dhe liria e lëvizjes.

Kryeministri Mustafa, pati theksuar se, në takimin e 29 qershorit në Bruksel, do të bëhen përpjekje për përmbylljen e disa marrëveshjeve. rel

Një ekspert i çështjeve të Ballkanit thotë se dështimi i miratimit të legjislacionit për Gjykatën e Posaçme për Krime Lufte në Kosovë, dëmton rëndë marrëdhëniet dyplaëshe me Shetet e Bashkuara. James Hooper, Drejtor Menaxhues i Grupit për të Drejtën Ndërkombëtare Publike dhe Politikat, i tha dje në një intervistë Zërit të Amerikës se hapat e Kosovës drejt integrimit euro-atlantik rrezikohen nga ky dështim. Ai i tha koleges Keida Kostreci se shpreson që Kosova të gjejë një mënyrë për ta votuar përsëri legjislacionin, pasi sipas tij në të kundërt do të fillonte destabilizimi i Kosovës.

Zëri i Amerikës: Zoti Hooper, sot parlamenti i Kosovës nuk arriti të miratojë legjislacionin për ndryshimet kushtetuese që do të bënin të mundur ngritjen e Gjykatës së Posaçme për Krimet e Luftës. Çfarë do të thotë kjo, sipas mendimit tuaj?

James Hooper: Kjo i dëmton rëndë marrëdhëniet dypalëshe mes Shteteve të Bashkuara dhe Kosovës. Mendoj se kjo është shumë serioze dhe shpresoj që tani të mbizotërojnë mendjet më të ftohta. E kuptoj që ishte një vendim jashtëzakonisht i vështirë që u duhej të merrnin kosovarët dhe nuk dua ta minimizoj. Ishte një nga vendimet më të rëndësishme që u është dashur të merrnin që kur mbaroi lufta në vitin 1999, sepse gjykata është konsideruar nga shumë vetë në Kosovë si një proces që ngre pyetje për legjitimitetin e luftës, legjitimitetin e Ushtrisë Çlirimtare të Kosovës dhe kjo ka shkaktuar një ankth dhe pakënaqësi të konsiderueshme mes ish-anëtarëve të UÇK-së dhe mes qytetarëve të Kosovës në përgjithësi, të cilët e kanë parë këtë si një kërcënim për të ardhmen e tyre, që vë në pikëpytje legjitimitetin e të qenurit shtet. Ajo që mund të them është se Kosova ka ndërmarrë kaq shumë hapa pozitivë, si fitorja e luftës me NATO-n si partnere në vitin 1999, shpallja e pavarësisë, vendimi i Gjykatës Ndërkombëtare. Gjatë gjithë këtyre hapave Shtetet e Bashkuara kanë qenë gjithnjë në krah të Kosovës.  Është bindja ime që Kosova ka grumbulluar shumë kapital përsa i takon vullnetit të mirë nga komuniteti ndërkombëtar. Mund të thuhet që kjo u konsolidua nga marrëveshja e para dy viteve në Bruksel mes Serbisë dhe Kosovës që krijoi mundësinë për hedhjen e hapave përpara. E gjithë kjo e ka vënë Kosovën në një situatë që nuk i duhet të shqetësohet për lirinë e tyre, për pavarësinë e tyre, nuk kërcënohet nga ndonjë sulm, që mund të përqendrohen tani tek ndërtimi i vendit, i shoqërisë së tyre, zgjidhja e problemeve të shoqërisë. Por kjo (ky vendim) do të ishte një kthim prapa, sepse e kthen debatin – dhe mendoj në një mënyrë emocionale për Kosovën – tek legjitimiteti i saj si shtet tek pavarësia dhe (shqiptarët e Kosovës) do të kërkojnë mbështetjen e shqiptarëve në gjithë rajonin për këtë çështje.

Unë u befasova vërtet që me gjithë inkurajimin që Shtetet e Bashkuara i dhanë Kosovës për ta ndihmuar që të arrinte të merrte një vendim që gjithkush në Uashington e kuptonte sesa i vështirë ishte, pra pavarësisht nga kjo Asambleja nuk arriti të siguronte shumicën e nevojshme prej dy të tretash.

Zëri i Amerikës: Në këtë pikë, a mendoni se mund të bëhet diçka për të ndryshuar vendimin e sotëm dhe cili do të ishte sugjerimi juaj?

James Hooper: Nuk besoj se është vonë. Ky nuk duhet të jetë votimi i fundit dhe përfundimtar për këtë çështje i banorëve të Kosovës përmes deputetëve që i përfaqësojnë. Unë do t’u bëja thirrja autoriteteve të gjejnë një mënyrë për të patur një votim të ri. Të mos nxitohen, ta shqyrtojnë edhe një herë situatën, të analizojnë dëmin që do t’i shkatonin marrëdhënieve me Shtetet e Bashkuara. Ky votim në këtë formë, do t’u shkaktonte dëm serioz marrëdhënieve dypalëshe me Shtetet e Bashkuara në se nuk do të korrigjohej. Kosova duhet të gjejë një rrugë, të gjejë një zgjidhje që Gjykata të krijohet dhe në të njejtën kohë të ruhen marrëdhëniet me Shtetet e Bashkuara. Nuk dua në asnjë mënyrë të minimizoj rrezikun që vendimi i së premtes përmban për marrëdhëniet e Shteteteve të Bashkuara me Kosovën. Ky ishte një vendim serioz që do të shkaktonte dëme të mëdha.

Zëri i Amerikës: Më konkretisht, cilat mendoni se do të jenë pasojat jo vetëm në marrëdhëniet dypalëshe me Uashingtonin, por edhe me kryeqytetet evropiane që e kanë mbështetur Kosovën dhe tek e ardhmja e saj?

James Hooper: Dhe sidomos Gjermania, mes vendeve mike evropiane. Gjermania ka ndërmarrë përpjekje serioze dhe të vazhdueshme, për të ndërmjetësuar marrëdhënie më të mira mes Serbisë dhe Kosovës, që marrëveshja për Veriun të zbatohet në mënyrë konstruktive dhe për të inkurajuar Serbinë të pranojë hyrjen e Kosovës në Kombet e Bashkuara, gjë që unë mendoj se është diçka me rëndësi kritike që duhet të ndodhë. Nëse ky votim do të lejohet të qëndrojë në fuqi, kjo do të ishte një hap i madh prapa për marrëdhëniet me Evropën, pa folur për SHBA. Siç e kam përmendur, ky do të ishte një hap prapa në marrëdhëniet me SHBA, do të ishte një humbje e besimit në këto marrëdhënie dhe sidomos në Kongres. Do të ishte më e vështirë për miqtë e Kosovës në Kongres ta mbështesnin atë me të njëjtën forcë si në të kaluarën. Por në Evropë, kjo do të dëmtonte përpjekjet për ta sjellë Kosovën më afër Bashkimit Evropian dhe për të krijuar shtegun drejt anëtarësimit. Është gjithashtu një hap prapa për marrëdhëniet e Kosovës në përpjekjet për të hyrë në NATO, gjë që mendoj se ka rëndësi kritike. Prandaj mendoj se për hir të marrëdhënieve të Kosovës me SHBA dhe me Evropën, për hir të së ardhmes së saj në NATO dhe në BE, është e nevojshme që ajo të ndërmarrë një votim të ri dhe ta miratojë ligjin.

Zëri i Amerikës: Alternativa tjetër, për të cilën Kosova ishte paralajmëruar që të mos ta lejonte të ndodhte, është ngritja e një gjykate të tillë nga Këshilli i Sigurimit, sipas një propozimi rus. Çfarë do të thoshte kjo – nëse nuk zgjidhet çështja e alternatives që dështoi dje – dhe alternativa e Këshillit të Sigurimit mbetet e vetmja mbi tryezë?

James Hooper: Ky do të ishte një skenar edhe më i keq se sa ta miratonin krijimin e gjykatës. Kjo do të thotë në fakt që Shtetet e Bashkuara të bëhen partnere me Rusinë për një Gjykatë të krijuar nga Këshilli i Sigurimit të OKB-së, që nuk do të shihej si legjitim nga banorët e Kosovës. Ndërsa Gjykata  që do të krijohej nga vetë parlamenti, do të gëzonte mbështetjen e plotë të Shteteve të Bashkuara duke u siguruar që ajo do të ishte një gjykatë e drejtë përsa u përket procedurave dhe jo një gjykatë politike. Mendoj se Shtetet e Bashkuara duhet të besohen për këtë. Ndërsa krijimi i gjykatës nga Këshilli i Sigurimit do të ishte fillimi i një procesi që shënon kthim pas, ku gjerat përkeqësoshen dhe alternativat për Kosovën do të keqësohen. Në se kjo Gjykatë, që mbështetet nga Shtetet e Bashskuara nuk pranohet, si do ta shikonin kosovarët gjykatën e mbështetur nga Këshilli i Sigurimit….

Zëri i Amerikës: Ndoshta ata nuk duan krijimin e asnjë gjykate, por ç’do të ndodhte në se Gjykata krijohet pa dëshirën e tyre (Kosovës)?

James Hooper: Në se Gjykata nuk miratohet, në se kosovarët këmbëngulin që të mos pranojnë asnjë gjykatë,  as atë të tanishmen, as atë të Këshillit të Sigurimit, e cila po ashtu do të mbështetej nga Shtetet e Bashkuara por në të cilion Shtetet e Bashkuara nuk do të luanin dot më një rol konstruktiv, pasi kur gjerat kalojnë në Këshillin e Sigurimit,  ka edhe aktorë të tjerë të përfshirë, sidomos Rusia, kjo do të shënonte kthim pas për Kosovën dhe në vend që të gjendeshin forma për t’i çuar përpara marrëdhëniet me Evropën, me NATO-n, forcimin e ekonomisë, atëhere do të kishim një skenar kur lufta për pavarësinë do të hynte në kanale ligjore, emocionet do të shtoheshin, njerëzit do të kërkonin gjeste simbolike, vendime simbolike, do ta vishnin veten me flamur, nacionalizmi do të shtohej në Kosovë dhe në situata të tilla, nuk ka ecje përpara, ka kthim pas. Në se situata nuk ndryshon unë shoh fillimin e destabilizimit të Kosovës. Dhe kjo do të ishte një pasojë shumë serioze.