Deputeti i Lëvizjes Vetëvendosje, Albin Kurti ka treguar arsyet pse është ndarë blloku opozitar. Kurti në një intervistë për zërin ka treguar disa nga arsyet pse nuk ka funksionuar blloku opozitar, ai gjithashtu ka folur për partinë e Ramush Haradinajt si dhe pretendimet e AAK-së për rrëzimin e qeverisë.

Në intervistë Kurti gjithashtu thotë se mungesa e parimeve të Aleancës për Ardhmërinë e Kosovës ka bërë që ajo të shkëputet nga VV-ja.

Për më shumë shikoni një pjesë të intervistës së Albin Kurtit ku ndër të tjera ai fol edhe për listën e përbashkët opozitare për zgjedhjet e parakohshme.

Florim Prapashtica i ka parë të gjitha takimet e Azem Sylës me anëtarët e grupit të tij. Ai është pronar i picerisë “Fluri” që ndodhet përballë Fakultetit Teknik në Prishtinë. Ai i ka dhënë një përshkrim të hollësishëm Prokurorisë për aktivitetet e Azem Sylës, Shaban Sylës, Shpresim Ukës, Nazim Bllacës, Fahredin Gashit e Driton Hajdarit. Grupi i Azem Sylës është përshkruar nga Prokuroria Speciale e Kosovës si familje.

Azem Syla përshkruhet se si ulej në qoshe në picerisë “Fluri”. Askush nuk guxonte t’i afrohej nëse nuk ishte i ftuar.

Anëtarët e grupit uleshin një nga një në tavolinë për t’i raportuar për biznesin milionësh të tokave. Secili që do të ulej në takim me Azem Sylën, së pari duhej të legjitimohej nga shoferi i tij, Arton Vila.

Telefonat, çelësat e gjësendet tjera mblidheshin nga Arton Vila, futeshin në një çantë dhe largoheshin prej tavolinës. Kjo ishte si masë parandaluese e incizimit të bisedave.

Florim Prapashtica i ka parë të gjitha takimet e Azem Sylës me anëtarët e grupit të tij. Ai është pronar i picerisë “Fluri” që ndodhet përballë Fakultetit Teknik në Prishtinë.

Prapashtica është dëshmitari kyç kundër Azem Sylës. Ai i ka dhënë një përshkrim të hollësishëm Prokurorisë për aktivitetet e Azem Sylës, Shaban Sylës, Shpresim Ukës, Nazim Bllacës, Fahredin Gashit e Driton Hajdarit.

Grupi i Azem Sylës është përshkruar nga Prokuroria Speciale e Kosovës si familje.

“Azem Syla, i njohur si Daja, është kreu i familjes dhe ka qenë udhëheqësi kulmor i këtij grupi kriminal të organizuar për shumë vite”, shkruan në kërkesën e Prokurorisë për caktimin e paraburgimit për ish-deputetin Syla.

Dosjen hetimore e ka siguruar Insajderi.

“Aktivitetet e grupit të organizuar kriminal janë të lidhur me biznesin e tokave. Shpresim Uka dhe Shaban Syla janë anëtarët të lartë dhe bashkëthemelues të pjesës së grupit që merret me toka”, pretendon Prokuroria.

Syla dyshohet se ka siguruar financat fillestare për grupin. Fahredin Gashi dhe Nazim Bllaca përshkruhen si anëtarë të rangut të lartë të këtij grupi të përfshirë në nivelin që ishte drejtpërdrejtë nën Shpresim Ukën dhe Shaban Sylën.

“Shpresim Uka dhe Shaban Syla i kanë thënë Nazim Bllacës së paratë për të financuar biznesin e tokave kishin ardhur nga Azem Syla – fillimisht 50 mijë euro dhe pas kësaj janë përmendur shuma tjera të mëdha parash”, pretendon Prokuroria.

Dëshmitari tjetër, Fatmir Prapashtica, ka konfirmuar se Azem Syla ishte përgjegjësi kryesor i grupit. Prapashtica ka thënë se Azem Syla ishte në dijeni për biznesin e tokave dhe mbante të tjerët nën kontroll, por nuk përzihej në dokumente dhe çmime.

Prokuroria thekson se Shaban Syla ishte personi kyç në lidhjet me biznesin e tokave, por që të dy, Shaban Syla dhe Shpresim Uka, ishin figura udhëheqëse në këtë grup. Fatmir Prapashtica ka thënë se pasi që biznesi i tokave filloi, Shaban Syla u bë i pasur.

Prokuroria ka thënë se Nazim Bllaca ishte përgjegjës për shitjen dhe njerëz tjerë të cilët ishin të njoftuar mbi biznesin e tregtimit të tokave ishin të përfshirë në këtë biznes.

“Takimet e rregullta të grupit mbaheshin në picerinë ‘Fluri’, në pronësi të Fatmir Prapashticës në Bregun e Diellit, përballë Fakultetit Teknik. Azem Syla ulej në një qoshe dhe kohë pas kohe i ftonte anëtarët e grupit një nga një në tavolinën e tij duke kërkuar për ta njoftuar për të rejat.

Dëshmitari Fatmir Prapashtica ka thënë se ka qenë e pamundur që dikush të ulej në tavolinën e Azem Sylës pa qenë i ftuar prej tij.

“Kur një person është thirrur për të biseduar me Azem Sylën, Syla e ka thirrur Arton Vilën, shoferin, duke ia dorëzuar çantën e tij dhe telefonat si dhe telefonat e njerëzve tjerë të cilët do të uleshin në një qoshe ose pranë banakut”, pretendon Prokuroria.

Prokuroria thotë se anëtarët e grupit diskutonin në picerinë e Prapashticës në mënyrë të hapur dhe lirshëm. Dëshmitari i kishte parë anëtarët e grupit duke diskutuar dhe duke përgatitur dokumentacionin që duhet të dorëzohej në Gjykatën Komunale dhe në Zyrën Kadastrale. Ai deklaroi se toka ishte në Llapnasellë dhe Çagllavicë dhe se ajo kishte qenë e serbëve.

Prapashtica kishte parë shumë dokumente në gjuhën serbe përfshirë vendimet gjyqësore.

Driton Hajdari është anëtar i grupit i cili qëndron në një nivel më të ulët në hierarkinë gjatë aktiviteteve të cilat janë hetuar. Ai ka njohuri të plotë mbi aktivitetet e grupit, duke qenë i pranishëm në takimet e rregullta në picerinë “Fluri”.

“Ai ka ndjekur urdhrat e grupit sa herë i janë dhënë. Mori pjesë nga fitimet e grupit. Driton Hajdari ishte gjithashtu i përfshirë në administrimin e takimeve të frikësimit në rast se ato ishin të nevojshme”, pretendon Prokuroria.

Azem Syla i ka mohuar të gjitha këto pretendime. Ndërkohë, po mbahet një seancë për caktimin e paraburgimit. Prokuroria ka kërkuar 30 ditë si masë të nevojshme për të mos pasur ndikim në proces hetimor dhe në dëshmitarë.

Insajderi sjell ndërkohë detaje të transaksioneve, të ryshfeteve dhe pagesave milionëshe. Do të shihni se si janë korruptuar zyrtarët e Gjykatës dhe të AKM-së./Insajderi.com

Latif Gashi, Rrustem Mustafa, humbën mandatet në muajin shkurt të këtij viti, si pasojë e dënimeve për veprën penale të krimeve të luftës. Dorëheqje nga pozita e deputetit “për ti hapur rrugë drejtësisë” dha të enjten edhe ish-komandanti i tyre, deputeti Azem Syla.

Tre deputetë të fuqishëm ia ka marrë drejtësia sivjet, Partisë Demokratike të Kosovës.

Latif Gashi, Rrustem Mustafa e Azem Syla lanë ulëset e kuvendit për shkak të veprimeve të tyre kriminale.

Gashi e Mustafa, humbën mandatet e deputetit në muajin shkurt të këtij viti, si pasojë e dënimeve për veprën penale të krimeve të luftës. Latif Gashi, madje shkoi në vuajtje të dënimit.

Këta ish-deputetë të z Llapit, kanë qenë eprorë të lartë të Ushtrisë Çlirimtare të Kosovës në atë zonë.

Dorëheqje nga pozita e deputetit “për ti hapur rrugë drejtësisë” dha të enjten edhe ish-komandanti i tyre, deputeti Azem Syla.

I dyshuari se ka drejtuar një grup të madh kriminal të përbërë kryesisht nga njerëz të dënuar për vrasje në rastin e Nazim Bllacës, ka thënë se ndjehet i pastër. Nga arratia ka lëshuar një deklaratë me të cilën thotë se nuk është më deputet.

“Të nderuar qytetarë të Republikës së Kosovës, nga sot ofroj dorëheqje të parevokueshme nga të gjitha përgjegjësitë institucionale, nga të qenit deputet i Kuvendit të Kosovës”, ka thënë Syla.

“Hetimi i filluar ndaj meje është padrejtësi, por unë dëshiroj t’i jap hapësirë dhe mundësi drejtësisë të punoj pa ndikime”.

Humbjen e tre deputetëve me peshë, PDK-ja po e sheh si humbje të vogël. Sekretari i kësaj partie, Basri Musmurati, i ka thënë Insajderit se PDK-ja nuk ka frikë as nga humbje tjera të mundshme të figurave për shkak të hetimeve e dënimeve.

“Tash, edhe vetëm një njeri dhe një votë e dëmton pak subjektin politik. Por na jemi subjekt i madh, i organizuar mirë dhe nuk besoj se kjo do të hetohet në votën e përgjithshme të partisë”, ka thënë Musmurati.

Ai thotë se këta deputetë kanë humbur mandatet jo për shkak të shkeljeve statutare apo ligjore në kuadër të partisë, por për shkak të veprave penale të kryera në mënyrë individuale.

“Ne nuk frikohemi për këtë punë, por kushdo që në mënyrë individuale shkel ligjin, merret me çfarëdo vepre që është e dënueshme, është problem i tij dhe sigurisht që në momentin që kjo do të ndodh, të gjithë ata do ta humbin pozitën e tyre”, ka thënë Musmurati.

Musmurati ka thënë se në kohën kur po bëhet trazicioni i kreut të PDK-së, ka zëra politikë se në struktura të subjektit  dhe të institucioneve, nuk do të ketë njerëz që kanë rënë në kundërshtim më ligjin.

“Ata që kanë bo vepra penale, kjo s’ka diskutim që do të largohen”.

Largimi i deputetëve të dënuar nga Kuvendi ishte përshëndetur nga ambasadori britanik në Kosovë, Ruairí O’Connell

“Me vjen mirë që më në fund, Kuvendi e largoi një nga deputetët e dënuar për krime lufte. As Kuvendi, as zyra publike, e as liria nuk janë vendi i duhur për njerëzit e dënuar për krime të rënda. Vendi i duhur është burgu”, kishte thënë ambasadori O’Connell./Insajderi.com

Voal – Azem Syla, deputet i PD, i akuzuar për krim të organizuar në pranga. Thuhet se arrestimi i tij është bërë të mërkurën.  Azem Sylen  dyshohet si udhëheqës i grupit kriminal në keqpërdorim të pozitës për biznese me toka shoqërore që i ka kushtuar dëme buxhetit të Kosovës rreth 30 milionë euro. Arrestimi i Sylës është bërë nga EULEX-

Foto nga Arkivi – Aktivitet kushtuar personave të zhdukur të luftës

Kryesuesi i Komisionit Qeveritar për Persona të Zhdukur, Prenkë Gjetaj, së bashku me përfaqësuesit e Shoqatave Familjare, ka pritur sot në takim Sejdi Thaçin, i evidentuar si person i zhdukur, dhe anëtarë të tjerë të familjes së Sejdi Thaçit, që ishin edhe iniciues në evidentimin apo hapjen e rastit të tij si person i zhdukur.

“Në bazë të deklaratave zyrtare, familja nuk ka ditur për fatin dhe vendndodhjen e Sejdi Thaçit, nga data 6 janar 1999 deri më 17 prill 2016, kur ai është u kthyer i gjallë në familje”, thuhet në komunikatën për media të Kryesuesi i Komisionit Qeveritar për Persona të Zhdukur.

Në bazë të të dhënave të prezantuara, gjatë takimit, nga vet Sejdi Thaçi, ai është larguar nga Kosova, në janar të vitit 1999, mirëpo jo në mënyrë të dhunshme, por gjithnjë sipas vullnetit të tij, për të jetuar për këto 17 vite në Serbi.

“Në respektim të procedurave ligjore në fuqi, rasti i Sejdi Thaçit, i evidentuar si person i zhdukur që në vitet e para të pasluftës, tek institucionet kompetente vendore dhe ndërkombëtare, tashmë zyrtarisht është i mbyllur”, vijon komunikata.

Komisioni Qeveritar për Persona të Zhdukur siguron familjarët e personave të zhdukur, që bashkërisht do të vazhdohet me angazhimin dhe përpjekjet për ndriçimin e fatit dhe vendndodhjes edhe të 1665 personave të zhdukur, si pasojë e luftës së viteve 1998 – 1999, në Kosovë.

Po ashtu, Komisioni Qeveritar për Persona të Zhdukur shpreh mirënjohjen më të lartë për familjet e personave të zhdukur për mirëkuptimin e treguar gjatë trajtimit të këtij rasti. rel

Deputetja nga Lidhja Demokratike e Kosovës, Alma Lama ka deklaruar se krishterimi ndër shqiptarë është përhapur me shpatë dhe më dhunë. Kundër kësaj deklarate ka reaguar prifti kosovar Jeton Thaqi.

Ai përmes një postimi në rrjetin social “Facebook”, ka shkruar se deputetja nga LDK-ja, Alma Lama duhet të kërkojë falje popullit dhe të vërtetës historike.

“Zonja Alma Lama thote se krishterimi nder shqiptar eshte perhapur me shpate dhe me dhune. Kete deklarate mund ta degjoni pas minutit 12 dhe te konfirmuar tek minutat 34 ne emisionin Target.Le t’i kerkoje falje popullit dhe te vertetes historike, pasi qe eshte perfaqesuese e popullit”, ka shkruar Thaqi.

Deputeti Azem Syla i është dorëzuar sot policisë.

Ai është sjellë nga autoritetet e sigurisë në Stacionin policor në qendër.

Gazeta Express ka siguruar disa foto të momentit të dorëzimit të deputetit të PDK-së te autoritetet policore.

Voal – Ish-kryetari i Lipjanit, Shukri Buja do të jetë deputeti i Kuvendit të Kosovës, pas dorëheqjes së Azem Sylës nga mandati i tij si deputet.

Sipas rezultateve zyrtare në KQZ, mandati i deputeti duhet të kalojë te Shukri Buja, i cili ka garuar me numrin 80 dhe ka marrë 8,224 vota.

Shukri Buja më 30 dhjetor të 2015-s është dënuar me 4 muaj burgim me kusht dhe 2000 euro gjobë, pasi nuk kishte deklaruar pasurinë.

Azem Syla, në anën tjetër, ka dhënë dorëheqje pasi po hetohet si udhëheqës i një grupi të krimit të organizuar në lidhje me shpronësimin e disa pronave.

Buja ka qenë komandant i Zonës Operative të Nerodimës gjatë luftës së Ushtrisë Çlirimtare të Kosovës, e pas luftës ai ka qenë anëtar i Këshillit Drejtues të PDK-së. Në vitin 2007 ai ka garuar për kryetar të Lipjanit nga radhët e PDK-së, duke fituar dhe duke e mbajtur këtë mandate deri në vitin 2013, kur pas zgjedhjeve lokale e ka humbur garën përball Imri Ahmetit të LDK-së.

Për këtë kalim të mandatit të deputetit nga Azem Syla tek Shukri Buja, një i akuzuar për krim të organizuar tjetri i dënuar për mashtrim ndaj shtetit, sepse nuk e deklaron dhe e fsheh pasurinë, që nuk i dihet burimi se si e ka bërë, reagon Donika Gërvalla Schwarz në rrjetin social e cila shkruan:

“Ik një horr, e eja një tjetër… Quo vadis Kosova…”, bën një pyetje retorike Donika Gërvalla Schwarz.

Më 6 janar 1999, në Pejë, kishte ndodhur vrasja e disa të rinjve serbë në një diskotekë të qytetit. Policia serbe ia kishte hedhur fajin për vrasjen UÇK-së dhe për pasojë kishte ndërmarrë një mori reprezaljesh.

E vërteta e këtij rasti, i njohur si “Panda”, u mor vesh vetëm gjashtëmbëdhjetë vite më vonë, kur kryeministri serb Aleksander Vucic e tronditi opinionin serb, duke bërë të ditur se të rinjtë serbë i kishte ekzekutuar vetë policia serbe.

Po atë ditë ishte zhdukur edhe Sejdi Thaçi, nga fshati Zajm i Klinës. Ai ishte konsideruar i zhdukur, si edhe mijëra shqiptarë të tjerë. Mirëpo, para pak ditësh, për habinë e të gjithëve, ai u rikthye në vendlindje, gjallë e shëndoshë. Çfarë kishte ndodhur?

Lajmi i jashtëzakonshëm se Sejdi Thaçi u kthye pas 17 vitesh i gjallë nga burgjet serbe, rriti shpresat e shumë familjareve që kanë persona të zhdukur në luftën e fundit në Kosovë, pikërisht në ditën kur shënohet “Dita e të pagjeturve”.

Por, në fakt, del të jetë vetëm një mashtrim.

Sejdi Thaçi, një ditë pasi emri e historia e tij u shfaqën në opinion, ka rrëfyer për media se ai më 6 janar 1999 kishte shkuar vetë në Serbi, për të rregulluar disa dokumente për pension, pasi kishte punuar për 35 vite atje, para luftës.

Që nga ajo ditë, thotë të ketë mbetur rrugëve të Vojvodinës, pasi nuk kishte para e as kushte për t’u kthyer më te familja në Kosovë.

“Kam jetuar në disa banesa. Më kanë mbajte disa njerëz në banesat e tyre, sepse e dinin gjendjen që e kisha. S’kisha asnjë dinar me veti”, thotë ai.

Për rrugën që kishte marrë pikërisht në ditën kur në Pejë kishte ndodhur rasti famëkeq i njohur si “Panda”, thotë se nuk u kishte treguar fare familjes, që atëkohë qëndronin të strehuar pikërisht në këtë qytet, dhe afër lokalit ku kishte ndodhur ngjarja e 6 janarit 1999.

Rrëfimi i tij është tejet kundërthënës, porse herë-herë edhe sikur të ishte i mësuar përmendësh, ai përsërite të njëjtat gjëra.

Ndonëse pretendon se vazhdimisht ka dashur të kthehet në Kosovë, gjatë rrëfimit del se ai ka pasur kontakte me njerëz që disa herë kanë lëvizur nga Vojvodina e janë kthyer në Kosovë.

Fillimisht pohon se s’kishte arritur të takonte për 17 vjet asnjë shqiptar, por në fund të rrëfimit pranon se kishte njohur një person me emrin Bislim Bytyqi, nga Arllati, i cili kishte ndërruar jetë muaj më parë, e kufomën tij e kishte sjellë nga atje në Kosovë daja i tij.

Në Serbi rrëfen se ka jetuar si endacak, më pas ka punuar në një trafik ku fitonte shumë pak, e ka jetuar në shtëpi private tek disa familje të ndryshme. Por më vonë, thotë se ata që e mbanin në shtëpitë e tyre disa herë kishin provuar ta vrasin duke e helmuar, porse pretendon se ka arritur të shpëtojë duke u vetë mjekuar.

“Kam hekë shumë gjatë. Çuditna qysh jam gjallë”, rrëfen plaku i kthyer.

Kundërthënëse është edhe rruga e tij e kthimit. Fillimisht thotë se u kthye të dielën pas 10 ditësh rrugë, e më pas del se është kthyer para 10 ditëve dhe e ka bërë vetëm një ditë udhë.

Në nisje të rrëfimit tregon e një serb e solli me makinë deri në Kosovë, e më pas ndryshon deklaratën duke pretenduar se erdhi me autobus deri në Klinë.

Gjatë rrëfimit për media të cilin Gazeta Express ua sjell të plotë, më poshtë, disa herë kanë ndërhyrë familjaret e tij, me gjoja arsyetimin se plaku po i harron gjërat.

E edhe rrëfimi i familjareve, prapa kamerave ka qenë krejt ndryshe. Një familjar, në bisedë private me gazetën, pretendon se ai u kishte thënë se ka qenë në burg për gjithë këtë kohë, e kishte arritur të ikte pasi u la në sylah, por krejt këto i hedh poshtë vet 60 vjeçari.

“Atë ditë që ka ardhë na ka thanë se në fillim e kanë marrë serbët, por ma vonë e kanë lshu pasi i kanë thanë se nuk je as hajri e as e keqja e kujt. E masnej ka mbet aty deri tash”, deklaron djali i vëllait të tij Sejdi Thaçit, Skenderi, i cili edhe po e mban plakun në shtëpinë e tij në Kosovë, pas kthimit.

Sejdi Thaçi nga paslufta figuron në listën e personave të zhdukur gjatë viteve 1998/99. Familja e tyre madje për gjithë këto vite ka marruar pagë nga shteti, siç u takon çdo familje të personave të pagjetur që janë zhdukur në luftën e fundit në Kosovë, pasi ishin marrë nga forcat serbe gjatë asaj periudhe.

Sido që të jetë, 80 vjeçari tregohet mjaft i gëzuar se u kthye tek familja dhe se pohon se çuditet se si ka arritur të mbijetojë për 17 vite jetë tejet të rendë në Serbi.

“Jam shumë i lumtur, skej e n’skej”, përshkruan Sejdi Thaçi gëzimin e rikthimit në shtëpi. /GazetaExpress/.

Tokat që janë tregtuar nga “grupi i Azem Sylës”, para luftës së dytë botërore kanë qenë prona private kryesisht të serbëve të Kosovës. Ato, ndërkohë janë marrë nga shteti dhe është themeluar ndërmarrja “KBI Kosova Export”. Pas luftës, këto prona në mënyrë të paligjshme, janë bartur në emra të pronarëve të vjetër – pa e ditur fare ata. Pas bartjes në emra të tyre, pronat janë shitur tek pronarët shqiptarë. Vlera e këtyre trojeve është vlerësuar se peshon mbi 30 milionë euro.

Prokuroria pretendon se bazuar në rezultatet hetimore të deritashme, deputeti Azem Syla, ka organizuar, i financuar dhe mbikëqyrur një grup kriminal.

Syla, së bashku me Fahredin Gashin, dyshohet se kanë fituar pronësi në mënyrë të paligjshme të dhjetëra hektarëve tokë të shtetit në vlerë mbi 30 milion euro.

Grupi pretendohet se ka nisur veprimtarinë që nga viti 2006.

Insajderi ka siguruar urdhëresën e Gjykatës Themelore të Prishtinës për bastisjen e 42 lokacioneve në mbarë Kosovën, përfshirë shtëpinë e deputetit Syla në Kizhnarekë.

Prokuroria pretendon se ngastrat e tokës të përvetësuara në mënyrë të paligjshme, dekada më parë ishin shpronësuar nga prona private dhe ishin bërë të shtetit. KBI Kosova Export, menaxhonte me to.

Pas luftës, këto prona në mënyrë të paligjshme – me vendime gjyqësore të paligjshme dhe me dokumente fals, janë bartur në emra të pronarëve të vjetër. Mirëpo, ata pronarë nuk kanë ditur fare për këtë. Në këtë mënyrë, pronat janë shitur pronarëve të rinj shqiptarë.

Pronarët e vjetër janë kryesisht serbë, të cilët kanë ikur nga Kosova pas luftës.

Prokuroria ka identifikuar tri raste të mëdha të pronave në emër të familjes Vujoviq (Rasti 1), Simiq (Rasti 2) dhe Steviq (rasti 3).

“Pas sigurimit të vendimeve origjinale nga familjet e tyre, grupi ka siguruar nga arkivat e Gjykatës Themelore në Prishtinë skendarët origjinal të gjykatës për procedurat të cilat kanë rezultuar në këto vendime gjyqësore”, pretendon prokurori.

Dokumentet të cilat i referohen ngastrave të tokës të cilat fillimisht iu ishin kthyer familjeve serbe, ishin larguar dhe zëvendësuar, apo plotësuar, me dokumente të rajt të falsifikuara, duke listuar ngastrat e KBI Kosova Export të cilat ishin me vlerë më të madhe se sa ngastrat origjinale të listuara në vendim.

Prokuroria pretendon se disa prej anëtarëve të atyre familjeve kanë bashkëpunuar me këtë grup. Të tjerët pretendohet që ose kanë nënshkruar këto autorizime në mirëbesim, apo nënshkrimet e tyre ishin falsifikuar.

“Dokumentet autentike apo të falsifikuara të autorizimit më pastaj ishin përdorur për të ekzekutuar vendimet e falsifikuara gjyqësore të cekura si më lartë. Të pandehurit kanë përdorur dokumentet për të lehtësuar transferimin e pronësisë në Zyrën komunale kadastrale, nga Ndërmarrja Shoqërore (KBI Kosova Export) në emrin e përfituesve”, shkruan në urdhrin për bastisje të Gjykatës.

Prokuroria thotë se transferimi i ngastrave të tokës ishte autorizuar nga zyra kadastrale pa miratimin e KPA-së. Pretendohet se grupi pastaj ka shitur tokën nëpërmjet njërës prej dy metodave.

“E para, të pandehurit Shaban Syla, Edvard Gashi dhe Hajrullah Beridha kanë shitur tokën drejtpërdrejt tek palët e treta, apo, e dyta. Grupi ka kryer shitje të rrejshme duke bërë transferimin e pronësisë së tokës tek anëtarët e grupit”, thuhet në vendim.

Bazuar në këto pretendime, gjatë rrjedhës së hetimeve Gjyqtari i procedurës paraprake ka miratuar disa kërkesa për masa të fshehta, duke përfshirë përgjimin e telekomunikimeve dhe zbulimin e të dhënave financiare.

Të dhënat e siguruara nëpërmjet përgjimeve mbështesin dyshimin se edhe pse disa prej anëtarëve janë në burg. Prokuroria ka thënë se ata janë aktiv për sa i përket organizimit dhe drejtimit të grupit. Prokuroria pretendon se Azem Syla është dhe ka qenë kreu i këtij grupi të organizuar për shumë vite. Dyshohet se ka siguruar financimin fillestar për grupin dhe ka mbajtur rolin mbikëqyrës përgjatë tërë operacionit.

“Raportet e Njësisë kundër krimit të organizuar përshkruajnë biseda të disa anëtarëve të pretenduar të grupit me një person të cilit i referoheshin si ‘Daja’ i cili pretendohet të jetë i pandehuri Azem Syla”, pretendon Prokuroria.

Sipas Prokurorisë, në një bisedë tjetër ata i referoheshin të pandehurit Syla, si “Kryemadhi”. Pretendohet se Shpresim Uka dhe Shaban Syla janë anëtarët e lartë të këtij grupi, duke qenë bashkë-themelues të grupit dhe me role menaxhuese.

Fahredin Gashi, pretendohet se është anëtar i rangut të lartë të grupit i cili punon drejtpërdrejt nën ta.

“Provat e grumbulluara deri më tani, përfshijnë deklarata të disa dëshmitarëve të cilët janë dëshmitarë bashkëpunues, të cilëve vetë kishin mbajtur pozita të larta në kuadër të grupit… ata kishin dëshmuar në mënyrë të elaboruar lidhur me modus opeandi të grupit, duke përfshirë marrjen dhe dhënien e ryshfetit tek të bashkë-pandehurit, dhe rolet dhe pozitat e anëtarëve”, shkruan në vendimin e gjykatës për bastisje.

Personat e lidhur me familjet Vujoviq, Simiq dhe Steviq, janë intervistuar, nëpërmjet ndihmës së juridike me Serbinë dhe kanë dhënë deklarata mbi ngastrat e tokës që kanë pasur në pronësi familjet, dhe procesin e autorizimit.

Informatat dhe aktivitetet e zhvilluara të grupit janë konfirmuar nga mesazhet telefonike të shkëmbyera prej tyre.

“Të dhënat kadastrale janë konsultuar nga Prokuroria, nga të cilat janë siguruar informata lidhur me ngastrat e tokës. Prokuroria e ka konsultuat gjithashtu Arkivat Ndër-komunale të Prishtinës, shkresat e gjykatës dhe vendimet nga Gjykata komunale e Prishtinës dhe ajo e Graçanicës. Për më tepër janë zbuluar edhe të dhënat financiare të të pandehurve.

Hajrullah Berisha, Ish-punëtori i UNMIK-ut, dyshohet se të ketë ndihmuar nëpërmjet procedurave administrative para Dhomës së Veçantë, duke qenë i përfshirë në shitblerjen e ngastrave të tokës për sa i përket Rastit 1, dhe duke lehtësuar blerjen e tokës për sa i përket rastit.

Arton Vila, vozitës i Azem Sylës, nga viti 2002 deri më 2014, pretendohet të ketë qenë i përfshirë në shitjen dhe blerjen e parcelave, veçanërisht të atyre që lidhen me parcelat e përmendura në rastin 3.

Ilaz Syla pretendohet të ketë qenë i përfshirë në blerjen dhe shitjen e parcelave, veçanërisht të atyre që lidhen me parcelat në rastin 1.

Nuhi Uka, si kryetar i Gjykatës Komunale në Prishtinë, pretendohet të ketë vërtetuar vendimet e falsifikuara në lidhje me rastet 1 dhe 2. Ai dyshohet të ketë siguruar një procedurë të rrjedhshme kur është nevojitur intervenimi i Gjykatës.

Shpresim Uka, pretendohet të jetë një pjesëtar i lartë i grupit dhe ka vepruar si dëshmitar në gjykatë për të ndihmuar falsifikimin e dokumenteve zyrtare.

Mexhid Syla, një avokat, pretendohet të ketë qenë i autorizuar (rrejshëm) që të ekzekutojë vendimin e gjykatës sa i përket familjes Steviq (rasti 3), i cili ka gënjyer se parcela është e tij. Këto dokumente i ka përdorur për të lehtësuar bartjen e pronësisë në kadastër nga KBI-ja te përfituesi.

Gazmend Gashi dhe Edvard Gashi, si avokat kanë vepruar në emër të grupit, kanë përdorur vendime të falsifikuara për parashtrimin e kërkesave pranë Komunës, ndërsa Gazmend Gashi ka vepruar si ndërmjetësues mes gjykatës dhe zyrës së Kadastrës. Gazmend Gashi është dhëndri i Nuhi Ukës.

Sabedin Haxhiu, si shef i Zyrës se Kadastrës, dyshohet të ketë siguruar dhe aprovuar bartjen e pronësisë në kadastër nga KBI- të përfituesi.

Edvard Gashi, Mexhid Syla (rasti 3), Gazmed Gashi, Avni Maxhuni (rasti 1 dhe 2) Ramadan Uka, dhe Avdyrrahman Brajshori, kanë vepruar si avokatë dhe ndërmjetësues në emër të grupit. Dy të fundit dyshohet të jenë përfshirë në blerjen dhe shitjen e parcelave.

Sali Bivolaku, Elhame Uka, Idriz Buza, Nyrtene Brajshori, Enver Cocaj, Visar Ahmeti, Lumnije SOpjani, Sami Maqedonci, Ndue Palushi, Jeton Govori, Shkëlqim Latifaj, Jusuf Lataj, Agron Haxhosaj dhe Besnik Rexha pretendohet të kenë qenë të përfshirë në blerjen dhe/apo shitjen e parcelave që lidhen me rastin 1.

Elhame Uka, Xhevahir Begolli, Nadir Shantir, Muharrem Kadriu, Ramadan Mavraj, Raif Hajdini, Vldet Shqiri dhe Sali Bivolaku pretendohet të kenë qenë të përfshirë në blerjen dhe/apo shitjen e parcelave që lidhen me rastin 2.

Arsim Hasani, Haki Hyseni, Baki Abdullahu dhe Kujtim Bucaliu pretendohet të kenë qenë të përfshirë në blerjen dhe/apo shitjen e parcelave që lidhen me rastin 3.

Dragan Maksimoviq dyshohet të ketë vënë kontaktet fillestare me familjet serbe dhe të ketë vepruar si ndërmjetësues.

Prokurori e thekson se hetimi bazohet kryesisht në provat materiale të cilat, mes tjerash, përbëjnë vendime origjinale të gjykatës, shkresa të lëndëve gjyqësore që përmbajnë dokumente të falsifikuara, shkresa të kadastrës, lista poseduese, kontrata të shitblerjes; prokurat.

Prokuroria ka futur nën hetim dhe i ka bërë pjesë të grupit kriminal edhe blerësit e parcelave, , Elhame Uka, Sali Bivolaku, Idriz Buza, Nyrtene Brajshori, Enver Coçaj, Visar Ahmeti, Lumnije Sopjani, Sami Maqedonci, Ndue Palushi, Jeton Govori, Shkëlqim Latifaj, Jusuf Lataj, Agron Haxhosaj, Xhevahir Begolli, Nadir Shantir, Rmadan Mavraj, Raif Hajdini, Valdet Shaqiri, Arsim Hasani, Kujtim Bacaliu, Baki Abdullahu, Haki Hyseni dhe Besnik Rexha./Insajderi.com

(Tekstit i kanë kontribuar Edona Jerliu dhe Nektar Zogjani)

Voal – Presidenti i Republikës së Kosovës, Hashim Thaçi, ka mbështetur aksionin e Policisë së Kosovës dhe EULEX-it për arrestimin e të dyshuarve për përfshirje në krim të organizuar.

Presidenti Thaçi ka kërkuar se të gjithë emrat që janë përfshirë në rastet gjyqësore të ofrojnë bashkëpunim të plotë policisë dhe prokurorisë.

“Lufta kundër korrupsionit dhe krimit të organizuar është çelësi i ndërtimit të shtetit demokratik e të drejtë, çelësi i të ardhmes tonë evropiane”, ka shtuar Thaçi në Facebook.

“Pres nga të gjithë ata që janë të përfshirë në rastet gjyqësore që t’i ofrojnë bashkëpunim të plotë policisë dhe prokurorisë”, ka thënë Thaçi.

Një aksion më i madhi i kryer ndonjëherë në Kosovë për krim të organizuar ka filluar sot, që në mesin 51 persona të dyshuarve është deputeti Azem Syla.  Mes tyre ka gjyqtarë, zyrtar komunalë, zyrtarë të Agjencisë Kosovare të Privatizimit, etj.

Sot ka nisur një aksion i EULEX-it bashkë me Policinë e Kosovës duke kërkuar deputetin e Partisë Demokratike të Kosovës, Azem Sylën i cili dyshohet si udhëheqës i grupit kriminal në keqpërdorim të pozitës për biznese me toka shoqërore që i ka kushtuar dëme buxhetit të Kosovës rreth 30 milionë euro.

Burime nga EULEX bëjnë të ditur se bëhet fjalë për një rast në të cilin janë 40 të dyshuar ndërsa do të bastisen 42 lokacione në vende të ndryshme të Kosovës.Aksioni është duke vazhduar edhe në këto momente.

Megjithatë biografia e Azem Sylës përmban në vete edhe skandale të tjera. Për vite me radhë Kuvendi i Kosovës ka pasur në gjirin e vet një “invalid psikik qind për qind”.

Me këtë diagnozë Azem Syla kishte arritur që nga Zvicra të marrë mijëra euro, të cilat shteti helvetik ia ka kërkuar t’ia kthejë, pas “zbulimit” që ka bërë se Syla është deputet në Kuvendin e Kosovës. Në vendimin e Gjykatës Administrative të Kantonit të Solothurnit në Zvicër, janë numëruar siç quhen aty, mashtrime, sjellje joligjore dhe keqpërdorime nga Azem Syla, deputet i Partisë Demokratike

Në vendimin e Gjykatës thuhet se Syla gjatë luftës ka qenë shef i Shtabit të Përgjithshëm të Ushtrisë Çlirimtare të Kosovës (UÇK), ndërsa pas luftës ushtroi funksionin e ministrit të Mbrojtjes. Për këto arsye atij iu kishte anuluar statusi i refugjatit më 6 tetor 2000. Mes 14 janarit 2000 dhe 14 janarit 2005, sipas aktvendimit, Syla kishte udhëtuar shumë herë me pasaportën e tij të Republikës së Shqipërisë në Shqipëri dhe në Kosovë, por asnjëherë direkt nga Zvicra. Me dokumentin zviceran të udhëtimeve (“Fletudhëtimi i kaltër”), i cili ishte i vlefshëm nga data 4 shtator 1998 deri më 15 dhjetor 2006, Syla kishte ndërmarrë disa udhëtime prej Shqipërisë dhe për në Shqipëri, si dhe disa udhëtime në Zvicër. “Gjatë qëndrimit të tij në Zvicër, Azem Syla nuk ka punuar kurrë. Pas ardhjes së tij ne Zvicër ai mori ndihma sociale dhe nga viti 2002 kontribute shtesë, pasi që për shkaqe psikike ai kishte një shkallë invaliditeti prej 100 për qind”, thuhet në këtë aktvendim.

Kontributet shtesë të cilave u referohet Gjykata janë një lloj pensioni që paguhen nga sigurimi invalidor i Zvicrës, kur personi përkatës gëzon një pension të ulët pasi nuk ka paguar mjaft kontribute në arkën pensionale. Kontributet shtesë paguhen edhe kur personi përkatës nuk ka paguar kontribute në arkën pensionale. Gjatë këtyre viteve, sipas vendimit të Gjykatës Administrative të Kantonit të Solothurnit, Azem Syla nga sigurimi invalidor zviceran ka marrë hiç më pak se 426 mijë franga, që në këmbim me euro i bie 350 mijë euro. Në vendim më tutje thuhet se Syla mes vitit 2001 deri më 2003, ka kryer një studim në distancë në Universitetin privat të Leibniz-it në SHBA për të marrë titullin master. Në po atë universitet ai është pajisur edhe me titullin doktor. Kryesisë së Partisë Demokratike të Kosovës të kryeministrit të tanishëm të Kosovës, Hashim Thaçi. Nga viti 2008, Syla është president i përhershëm i nderit i Konferencës ndërkombëtare të biznesit dhe zhvillimeve të Institutit Financiar Kosovar IFK. Në dhjetor 2010, Syla është zgjedhur deputet i Kuvendit të Kosovës. Gjykata ka nënvizuar se autoritetet zvicerane kanë gabuar kur më 14 tetor 1999, ia kanë dhënë Azem Sylës lejeqëndrimin C për shkak se është e pamohueshme që në atë kohë ai ka qenë shef i Shtabit të Përgjithshëm të UÇK-së dhe pjesëmarrës në Konferencën e Rambouillet.

Ilir Deda, deputet i deritashëm i Lëvizjes Vetëvendosje, ka dhënë dorëheqje nga kjo parti politike. Dorëheqjen, Deda e ka bërë publike përmes një konference për media në selinë e partisë, ku ishte i pranishëm edhe sekretari organizativ i Vetëvendosjes, Dardan Molliqaj, i cili ka falënderuar Dedën për kontributin që ka dhënë deri më tani në këtë subjekt politik.

Deputeti Ilir Deda, i cili tash e tutje vazhdon si i pavarur, ka paralajmëruar se në një të ardhme prej pak muajsh, do të angazhohet në një organizim të ri politik në Kosovë. Tërheqjen nga Vetëvendosja, Deda e ka arsyetuar me faktin që ai dhe partia kanë dallime konceptuale.

Kurse Molliqaj ka thënë se “ne po ndahemi, kushtimisht, por jemi bashkë kundër regjimit aktual”.

Partitë në pushtet dhe ato në opozitë nuk kanë vendosur ende dialogun e ndërsjellë me qëllim të tejkalimit të mospajtimeve dhe funksionalizimit të Kuvendit të Kosovës.

Kryesia e Kuvendit, është mbledhur të hënën dhe ka caktuar seancën e radhës, por aty nuk ka marrë pjesë deputetja e Lëvizjes Vetëvendosje, Aida Dërguti, e vetmja që përfaqëson opozitën në këtë organ.

Kryetari i Kuvendit, Kadri Veseli ka thënë se opozita duhet të rikthehet në Kuvend në mënyrë që t’i merr përsipër përgjegjësitë që i takojnë. Deri më tani, sipas tij, kishte disa komunikime, por jo në nivel të liderëve.

“Ata duhet të jenë pjesë e vendimmarrjes në Kuvendin e Kosovës dhe duhet të kthehen sa më shpejt. Pak ka rëndësi se cilat janë raportet aktuale mes tyre, ata duhet të kthehen si opozitë dhe t’i marrin përgjegjësitë në vendimmarrje të cilën e kemi të përbashkët”.

“Oferta vazhdon të jetë e njëjta. Ne kemi disa komunikime mes nesh, por të cilat nuk e atakojnë drejtpërdrejtë lidershipet e partive”, ka thënë Veseli.

Përderisa kryetari i Kuvendit Kadri Veseli, njëherësh ushtrues detyre i kryetarit të Partisë Demokratike po i përsëritë ftesën opozitës të kthehet në Kuvend, dy subjekte opozitare Aleanca për Ardhmërinë e Kosovës dhe Nisma, tashmë kanë marrë vendime që të mos jenë pjesë e seancave të kësaj legjislature.

Vendimet e tyre mbështeten në vlerësimet politike se ky kuvend dhe këto institucione e kanë humbur legjitimitetin.

Ndërkaq subjekti më i madh opozitar, Lëvizja Vetëvendosje, praninë në seanca e ndërlidhë më agjendën e Kuvendit.

Por, si do që të jetë, opozita, pas ndarjes ndërmjet AAK-së dhe Nismës në njërën anë dhe Vetëvendosjes në anën tjetër, sot ka pësuar edhe një ndryshim të ri.

Deputeti Ilir Deda, ka konfirmuar edhe zyrtarisht se është tërhequr nga Lëvizja Vetëvendosje, për shkak të dallimeve konceptuale që ka me këtë subjekt politik. Dorëheqjen nga Vetëvendosja, Deda e ka bërë publike në selinë e kësaj partie politike gjatë një konference të përbashkët me sekretarin organizativ të Vetëvendosjes, Dardan Molliqaj.

Ky i fundit ka thënë se pa Ilir Dedën, Vetëvendosje dobësohet, por sipas tij, e përbashkëta e tyre mbetet kundërshtimi i qeverisë aktuale të Kosovës.

Kurse Ilir Deda, ka paralajmëruar se brenda një kohe do të angazhohet në një organizim të ri politik.

“Unë do ta fillojë një angazhim në muajt e ardhshëm. Të jemi të qartë, jo në javët, por muajt e ardhshëm për krijimin e një organizimi të ri politik”, ka thënë Deda.

Ri-rreshtimet në skenën politike në Kosovë tashmë janë një praktikë e zakonshme. Edhe në të kaluarën, deputetët apo zyrtarët e ndryshëm të partive politike kalojnë nga një subjekt në tjetrin.

Një lëvizje e tillë, së fundi ishte ajo e ish shefes së Grupit Parlamentar të Aleancës për Ardhmërinë e Kosovës Donika Kadaj Bujupi e cila kaloi në Lëvizjen Vetëvendosje.

Por, në rastin e deputetit, Ilir Deda, ai vet ka konfirmuar se nuk e sheh si zgjidhje bashkimin në ndonjë subjekt politik, por krijimin e një organizimi të ri.

ZUBIN POTOK – Persona të paidentifikuar kanë sulmuar me armë zjarri banesën e kandidatit për deputet në Parlamentin e Serbisë, Sllavisha Ristiç.

Ngjarja është shënuar mbrëmjen e djeshme, rreth orës 22:00 në fshatin Jagnjenicë, afër Zubin Potokut në veri të Kosovës. Sipas mediave kosovare, mësohet se nga të shtënat fatmirësisht nuk ka të plagosur.

Lajmi është bërë i ditur nga Ristiç, ndërsa ai pohoi se gjatë kohës që ndodhi ngjarja në banesë ndodheshin 12 persona, përfshi 6 fëmijët e tij. Ndër të tjera, kandidati për deputet theksoi se nga të shtënat janë goditur dritaret e shtëpisë së Ristiç. Sakaq, policia e Kosovës po vijon hetimet për identifikimin dhe kapjen e autorëve.

Zyra e Punëve të Jashtme dhe Komonuelthi në Britaninë e Madhe e ka publikuar një hartë të re, duke i radhitur 18 vendet më të rrezikshme dhe 45 vendet pjesërisht të rrezikshme për t’i vizituar, në të cilën Kosova konsiderohet si pjesërisht e rrezikshme për t’u vizituar nga britanikët.

The Sun e ka publikuar lajmin, duke e cituar Zyrën e Jashtme Britanike, e cila ju bën thirrje qytetareve të vet që të mos i vizitojnë për pushime këto vende, në mesin e tyre dhe Kosovën.

Ja 18 vendet më të rrezikshme të botës që duhet shmangur:

Afganistani

Burundi

Republika e Afrikës Qendrore

Çadi

Republika Dominikane e Kongos

Guineja

Irani

Libia

Mauritania

Nigeri

Territoret palestineze

Sierra Leone

Somalia

Somalilandi

Sudani Jugor

Siria

Tunizia

Jemeni

Ndërsa këto janë vendet që konsiderohen pjesërisht të rrezikshme:

Algjeria

Angola

Armenia

Azajbergjani

Bangladeshi

Burkina Faso

Burma

Kamboxhia

Kameruni

Kolumbia

Djibuti

Ekuadori

Egjipti

Eritrea

Etiopia

Gjeorgjia

Haiti

India

Irani

Izraeli

Bregu i Fildishtë

Japonia

Jordania

Kenia

Kosova

Libani

Madagaskari

Malajzia

Mali

Nepali

Nigeria

Pakistani

Filipinet

Republika e Kongos

Rusia

Arabia Saudite

Sudani

Tajkistani

Tajlanda

Turqia

Uganda

Ukraina

Venezuela

Sahara Perëndimore.