Zëvendëskryeministri i Qeverisë së Republikës së Kosovës nga radhët e Listës Serbe, Branimir Stojanoviçi, është i bindur se “Lugina e Diellit” në veri të Mitrovicës do të ndërtohet.
Projekti për ndërtimin e 300 shtëpive në një vend dhe kthimin e një mijë serbëve ka filluar së ndërtuari më 9 qershor kur i ashtuquajturi shefi i Zyrës për Kosovë në Qeverinë e Serbisë, Marko Gjuriçi, vuri gurthemelin, edhe pse këtë projekt Ministria e Mjedisit dhe Planifikimit Hapësinor e konsideronte si projekt të jashtëligjshëm.
Për këtë, Stojanoviçi thotë se do të përmbushen të gjitha kërkesat ligjore dhe ajo lagje do të ndërtohet, duke u referuar edhe në pajtimin e kryetarit të Komunës së Zveçanit që të përmbushen të gjitha procedurat që kërkohen.
Branimir Stojanoviçi ka thënë se deri tash nuk ka pasur kthim substancial të serbëve në Kosovë sepse nuk janë krijuar parakushtet e një kthimi të qëndrueshëm.
“Deri tash kemi pasur vetëm fotografi të një rezultati të përkohshëm, i cili është portretizuar si një kthim. Prandaj është i rëndësishëm projekti “Lugina e Diellit” dhe pa mëdyshje që ne do të insistojmë për të”, ka thënë ai.
Sot bëhen 17 vjet kur forcat e Ushtrisë Çlirimtare të Kosovës hynë në Prishtinë.
Kjo u bë në ditën kur hyri në fuqi marrëveshja e Kumanovës e nënshkruar më 9 qershor në Kumanovë në mes forcave të NATO-së dhe ushtrisë jugosllave.
Me këtë marrëveshje fillon edhe tërheqja e forcave serbe nga Kosova.
11 Qershori është edhe ditë e çlirimit të Prishtinës. Për nder të kësaj dite sot në kryeqytet do të ketë disa aktivitete.
Nënkryetari i Kuvendit të Kosovës nga radhët e PDK-së, Xhavit Haliti ka dhënë mendimin e tij në lidhje me ndërtimin e 300 shtëpive për serbët në veri të Mitrovicës, nga Qeveria e Serbisë.
Ai, sipas KosovaPress, ka thënë se Serbia ka të drejtë t’i ndërtojë dhe t’i ndihmojë qytetarët serbë në Kosovë.
“Unë kam një mendim timin në përputhje me Marrëveshjen e Ahtisarit dhe Kushtetutën e Kosovës, Serbia ka të drejtë që t’i ndërtojë dhe të ndihmojë qytetarët serb në Kosovë në shumë fusha duke përfshirë edhe infrastrukturën. Prandaj, unë do të uroja që ambienti edhe në veri edhe në jug të jetë i përshtatshëm edhe për shqiptarët e veriut, ashtu siç duhet të jetë edhe për serbët në jug për të bashkëjetuar dhe për të qenë të gjithë kosovarë”, tha Haliti.
Se ndërtimi i këtyre nuk ka leje për ndërtim e institucioneve të Kosovës, Haliti tha se për këtë Kuvendet Komunale japin leje, dhe nëse nuk janë në përputhje me planin hapësinor të Mitrovicës, atëherë Ministria e Ambientit mundet të reagojë.
Shpresat që Gjeorgjisë, Ukrainës dhe Kosovës, Bashkimi Evropian t’ua aprovojë lëvizjen e lirë për në shtetet anëtarë të bllokut deri në verë, janë zbehur në ditët e fundit, pasi shqetësime të reja janë ngritur nga shtetet më të mëdha anëtare.
Shqetësimet vijnë nga shteti gjerman në lidhje me krimin e organizuar nga bandat gjeorgjiane si dhe shqetësimeve për Francën se marrja e vizave mund të krijojë dobësi të reja të sigurisë në një kohë të frikës së rritjes së sulmeve terroriste.
The Wall Street Journal, shkruan se zyrtarët dhe diplomatët e BE-së tani thonë se shtatori duket të jetë data më e hershme që qeveritë e BE-së dhe Parlamenti Evropian të nënshkruajnë marrëveshjet.
Marrëveshja do ju japë miliona qytetarëve nga këto vende, që të mbajnë pasaporta biometrike dhe qasje pa viza në zonën Shengen, që mbulon shumicën e vendeve të BE-së.
Në muajt e fundit, Komisioni Evropian, ekzekutivi i BE-së, ka rekomanduar statusin pa viza për Gjeorgjinë, Ukrainën, Kosovën dhe Turqinë.
Diplomatët thonë se ka disa qeveri të BE-së që duan të mbajnë deri ndonjë vendim në Gjeorgji, Ukrainë dhe në Kosovë deri sa të marrin në konsideratë kërkesën pa viza të Turqisë.
Kjo ka krijuar shqetësime të mëdha në Kiev, Tbilis dhe Prishtinë.
Qeveria e Serbisë ka nisur ndërtimin e një vendbanimi prej 300 shtëpive në veriun e Kosovës, për kthimin e 1500 serbëve nga Serbia. Ky projekt gjigant që quhet “Suncana Dolina” i ngjan kolonizimit dhe është investimi më i madhi i Serbisë në periudhën e pasluftës në Kosovë. Kryeministri Mustafa dhe Ministria e Mjedisit dhe Planifikimit Hapësinor, këtë projekt e cilësojnë të paligjshëm
Autoritetet e Serbisë si në “bahçe të babës” kanë promovuar të enjten në veriun e Kosovës, projektin e parë kolonizues dhe më të kushtueshmin që investon Qeveria e Serbisë në Republikën e Kosovës, ndërtimin e 300 shtëpive për kthimin e 1500 serbëve nga Serbia. Në një hapësirë në mes të komunës së Zveçanit dhe të Mitrovicës së Veriut, pranë kalasë, ka nisur ndërtimi i këtij vendbanimi që serbët e quajnë “Suncana Dolina” (Lugina e Diellit).
Marko Gjuriq, drejtor i Zyrës për Kosovën në Qeverinë e Serbisë dhe peshkopi i Argjipeshkvisë Rashkë-Prizren, Teodosije, kanë vendosur gurin e themelit dhe kanë përuruar fillimin e punimeve në këtë lokalitet. Në ceremoni kanë marrë pjesë edhe shumë politikanë serbë nga Kosova dhe Serbia, ndërsa është prezantuar edhe maketi i këtij vendbanimi kolonizues.
“Ky është hap historik për kthimin e popullit tonë në Kosovë e Metohi, për serbët në Kosovë, por edhe për të gjithë serbët nga Kosova të cilët para 16 vjetësh u dëbuan”, tha Marko Gjuriq, pas vënies së gurthemelit. Ai shtoi se projekti i filluar nuk është projekt i hartuar kundër askujt dhe bëhet fjalë për projekt, siç tha ai “të dashurisë ndaj popullit, qëllimi i të cilit është që të zbuten pasojat e spastrimit etnik dhe dëbimit të përgjakshëm”.zëri
Presidenti i Republikës së Kosovës, Hashim Thaçi, ka mbajtur një ligjëratë publike në “Këshillin Evropian për Punë të Jashtme” (EFCR), ku ka folur për të arriturat dhe sfidat e Kosovës dhe të rajonit në rrugën drejt integrimit në NATO dhe në Bashkimin Evropian, njofon kumtesa ministrore.
“Nuk ka dyshim që Bashkimi Evropian është në një udhëkryq të madh. BREXIT, vala e refugjatëve nga Azia dhe Afrika, ekspansioni i ri rus që ka shkaktuar krizat si ajo në Ukrainë, kërcënimet që vijnë nga radikalizmi – politik dhe fetar, terrorizmi… lista e shqetësimeve është bukur e gjatë për kontinentin tonë. Por, ku ndodhet Kosova në tërë këtë?”, e nisi prezantimin e tij presidenti Thaçi.
“Para 10 viteve, Kosova ende po diskutonte me bashkësinë ndërkombëtare të drejtën për të vendosur vetë për të ardhmen e saj politike. Për vetëm tetë vite si shtet, Kosova ka nënshkruar Marrëveshjen e Stabilizim Asociimit që tanimë ka filluar të zbatohet. Kemi marrë rekomandimin për liberalizimin e vizave dhe presim që këtë vit edhe qytetarët e Kosovës, më në fund, të lëvizin të lirë në zonën Schengen. Jemi bërë anëtare e Korporatës Sfidat e Mijëvjeçarit (MCC) të Kongresit Amerikan, pasi kemi përmbushur kritere strikte të reformave në ekonomi, në politikë dhe në drejtësi”, u shpreh presidenti Thaçi.
Tutje, presidenti Thaçi numëroi të arriturat e Kosovës në ekonomi, duke veçuar sektorin stabil dhe borxhin publik më të ulët në rajon. Duke folur për progresin në fushën drejtësisë, presidenti Thaçi theksoi se “Kosova ka pasur fat të ketë gëzuar mbështetje të fuqishme ndërkombëtare në ndërtimin e organeve të drejtësisë” dhe se “falë punës në ngritjen e kapaciteteve, organet e drejtësisë kanë ndërmarrë hapa për të luftuar krime serioze”.
“Janë arrestuar dhe janë gjykuar edhe zyrtarë të lartë për përfshirje në krim dhe korrupsion”, ka thënë presidenti Thaçi.
Duke folur për dialogun, i pari i vendit tha se falë dialogut me Serbinë, janë shënuar suksese edhe në integrimin e pjesës veriore të Kosovës.
“Kemi organizuar zgjedhjet në përputhje me ligjet e Kosovës dhe qytetarët tanë që jetojnë në pjesën veriore të Kosovës kanë zgjedhur liderët e tyre legjitimë. Ata që dikur ishin në barrikada, sot janë pjesë e institucioneve shtetërore të Kosovës dhe marrin pjesë në mënyrë aktive në jetën politike, në Kuvendin e Kosovës, në Qeverinë e Kosovës si ministra, në komunë si kryetarë komunash apo si këshilltarë”, theksoi presidenti Thaçi.
Në ligjëratën e tij në ECFR, presidenti Thaçi tha se komunikimi tani është normalitet në rajonin e Ballkanit Perëndimor dhe shtoi se tani është koha për një hap të ri, atë të ndërtimit të besimit mes popujve dhe shteteve por edhe ndërmjet rajonit të Ballkanit dhe BE-së.
“Është e rëndësishme që rajoni të ruajë besimin në idenë e BE-së dhe në aspiratën për anëtarësim në BE”, u shpreh presidenti Thaçi, i cili shtoi se “nëpërmjet dialogut konstruktiv që rajoni duhet të ketë me BE-në, do të jemi në gjendje që të dëshmojnë se pse Evropa nuk është e plotë pa pasur në gjirin e saj edhe Ballkanin Perëndimor. Por, nëpërmjet dialogut edhe t’i tregojmë BE-së se çfarë vlera sjell Kosova, por edhe Ballkani Perëndimor, në këtë bashkësi të popujve dhe shteteve.”
“Kosova, si dhe mbarë rajoni, është shumetnike dhe shumfetare. Vërtetë kemi shumicë që i përket fesë islame. Por është ky një islam evropian, që promovon tolerance, bashkëjetesën dhe paqen, ashtu siç ka bërë për shekuj të tërë. Kjo vlerë e Kosovës dhe e rajonit, është vlerë edhe për Evropën”, tha presidenti Thaçi.
“Është e rëndësishme që BE të mbetet e angazhuar në Kosovë dhe në rajonin e Ballkanit. Vonesat e BE-së që t’i shtrijë dorën Ballkanit Perëndimor u hapin rrugë ideologjive të tjera, nacionaliste apo fetare”, sqaroi presidenti Thaçi.
“Kosova është një rrëfim suksesi, por nuk është ende storie e përfunduar. Kemi edhe shumë rrugë për të bërë, por jemi në rrugë të drejtë”, përfundoi presidenti Thaçi.
Pas prezantimit të tij, presidenti i Republikës së Kosovës, Hashim Thaçi, iu përgjigj pyetjeve të të pranishmëve, të cilët u interesuan për zhvillimet edhe në vendet fqinje të Kosovës.
Presidenti Thaçi tha se është me rëndësi që përkundër problemeve që kanë vendet e rajonit, që të gjitha janë të përcaktuara që të bëhen anëtare të BE-së dhe se BE-ja është “motori” i ndryshimeve pozitive në shtetet e Ballkanit Perëndimor.
ECFR është “think-tank” i njohur me seli në Bruksel që merret me përpilimin e raporteve dhe analizave për BE-në dhe rolin e BE-së në marrëdhëniet ndërkombëtare. Anëtarë të Bordit të ECFR janë, ndër të tjerë, edhe Martti Ahtisaari, Javier Solana dhe Joschka Fischer./ZERI/
Murat Meha, i cili është kritikuar më së shumti për humbjen e mijëra hektarëve tokë të Kosovës gjatë shënjimit të vijës kufitare me Malin e Zi, e ka rritur këtë vit pasurinë edhe me dy parcela të reja toke, si rezultat i trefishimit të pagës së tij nga Qeveria e Kosovës.
Shefi i Agjencisë Kadastrale të Kosovës, sipas formularëve të deklarimit të pasurisë, në vitin 2015 ka deklaruar pagë vjetore prej 5770 eurosh, ndërsa sivjet paga e tij i është rritur në 16200, apo rreth 10.500 euro më shumë se një vit më parë.
Po ashtu, bazuar në formularët e deklarimit të pasurisë për vitin 2016, krahas një viti më parë, Meha i ka deklaruar edhe dy parcela të reja toke prej rreth 3 ari, të cilat i ka vlerësuar rreth 50 mijë euro.
Zëvendësministri rus i Punëve të Jashtme, Gennady Gatilov
Shefi i misionit të OKB-së në Kosovë, Zahir Tanin, ka nisur një vizitë zyrtare në Moskë të Rusisë, me qëllim të, siç thuhet, mbajtjes së kontakteve me vendet që janë të interesuara për gjendjen në Kosovë.
Një zëdhënës i misionit UNMIK, Jan Malekzade, i tha Radios Evropa e Lirë se Tanin ka takuar zyrtarët e lartë të Ministrisë së Jashtme Ruse, përfshirë edhe zëvendësministrin Gennady Gatilov, për të diskutuar çështjet rajonale.
“Përfaqësuesi i Posaçëm i Sekretarit të Përgjithshëm mban kontakte të afërta me të gjitha shtetet e interesuara për gjendjen në Kosovë dhe në veçanti me vendet anëtare të përhershme të Këshillit të Sigurimit. Ai së voni ka vizituar Uashingtonin dhe tani ndodhet në Moskë për të biseduar drejtpërdrejt me homologët e Federatës Ruse”, tha Jan Malekzade.
Misioni i OKB-së, që udhëhoqi me Kosovën që prej përfundimit të luftës e deri në shpalljen e pavarësisë së saj më 2008, prej mijëra punonjësve të saj ka zvogëluar numrin në disa qindra, duke kryer një rol të një zyreje politike. Misioni që funksionon mbi bazën e një Rezolute të Këshillit të Sigurimit të OKB-së, që prej vitit 1999, në baza të rregullta tre mujore harton raporte për sekretarin e përgjithshëm të Kombeve të Bashkuara, për gjendjen në Kosovë.
Vizita e shefit të UNMIK-ut në Moskë, Zahir Tanin, bëhet pak javë para raportimit të radhës për gjendjen në Kosovë dhe në pritje të rifillimit të dialogut ndërmjet Kosovës dhe Serbisë për normalizimin e marrëdhënieve ndërmjet tyre.
Ndërkohë, sipas një kumtese për media të Ministrisë së Jashtme ruse, në takimin me Tanin, zëvendësministri i jashtëm rus, Gennady Gatilov, i bëri thirrje Kosovës që të përmbushë obligimet e saj për të cilat ka arritur marrëveshje me Serbinë.
“Gatilov theksoi nevojën e zbatimit të obligimeve që pala shqiptare e Kosovës ka marrë me marrëveshjet e arritura me palën serbe”, thuhet në kumtesën e Ministrisë së Jashtme ruse, të cilën e citon agjencia e lajmeve Sputnik. Gjithashtu në kumtesë thuhet se pala ruse ka ritheksuar rëndësinë e punës se misionit të OKB-së në Kosovë, në ruajtjen e paqes dhe të stabilitetit në rajon. (REL)
Ferizaj Municipality Beau Biden St
Qeveria e Kosovës ka marrë vendim që rruga Gjilan-Ferizaj të mbajë emrin “Beau Biden”.
Në vendimin e qeverisë thuhet se “Beau Biden u mor me ndërtimin dhe menaxhimin e institucioneve juridike të Kosovës, ku ka trajnuar shumë gjyqtarë dhe prokurorë të rinj dhe me punën e tij ka ndihmuar dhe mundësuar themelimin e sistemit të ri penal juridik në Kosovë”.
“Beau Biden është biri i burrështetasit amerikan Joe Biden, Nënpresident i Shteteve të Bashkuara të Amerikës, një mik i madh i Kosovës, i cili me punën e tij, bashkë me Presidentin e SHBA-ve, Barack Obama, në mënyrë të vazhdueshme ka kontribuuar në shtetndërtimin e Kosovës, në zhvillimin e përgjithshëm, në forcimin dhe sigurinë e paqes në rajon. Kjo e bën familjen Biden mike të vërtetë dhe të përhershme të Kosovës”, thuhet në vendimin e qeverisë.
Kryeministri i Kosovës Isa Mustafa, tha gjatë në mbledhjes së qeverisë se “përmes këtij vendimi tregohet falënderimi dhe mirënjohja e Kosovës për të gjithë ata që kanë kontribuar në ndërtimin e institucioneve të Republikës së Kosovës, posaçërisht për Shtetet e Bashkuara të Amerikës”.
Joseph Robinette “Beau” Biden III, ish-prokuror i përgjithshëm i shtetit Delauer në Shtetet e Bashkuara vdiq vitin e kaluar nga një sëmundje e rëndë. Ai kishte punuar në Kosovë si këshilltar i lartë në kuadër të Misionit të OSBE-së gjatë vitit 2001 në ndërtimin dhe menaxhimin e institucioneve juridike të Kosovës. Beau Biden ishte biri i Nënpresidentit amerikan Joe Biden.
Qeveria e Kosovës është e gatshme që të ulet për të biseduar me përfaqësuesit e Listës Serbe dhe drejtuesit e katër komunave me shumicë serbe në veri të Kosovës, për të arritur një pajtim lidhur me nisjen e procesit të regjistrimit të popullsisë në këto katër komuna.
Këtë e ka konfirmuar për Radion Evropa e Lirë zëdhënësi i Qeverisë së Kosovës, Faton Abdullahu, i cili ka theksuar se procesi i regjistrimit të popullsisë në komunat veriore duhet të nisë së shpejti, por pa precizuar ndonjë afat të caktuar kohor.
“Shumë shpejt. Pra, ne e kemi tash lajmin që ka një lloj hezitimi për pjesëmarrje. Është diçka që mendoj se do të tejkalohet, duke pasur parasysh që ne si qeveri do të bisedojmë me të gjithë faktorët relevantë që t’ua shpjegojmë se kjo është në të mirën e tyre. ”
“Fundja, kjo është dhe do të bëhet me përkrahjen konkrete të Bashkimit Evropian dhe asgjë të keqe nuk ka në këtë drejtim, përkundrazi, të gjitha dobitë do të jenë në të mirë të komunitetit serbë, në normalizimin e mëtutjeshëm të raporteve në Kosovë, por edhe atyre ndër-fqinjësore”, ka thënë Abdullahu.
Ai ka shtuar se Qeveria e Kosovës duhet t’i ketë të dhënat e sakta lidhur me numrin e popullatës nëpër komunat veriore, në mënyrë që shpërndarja e të mirave buxhetore dhe të mirave të tjera të shpërndahet në përputhshmëri të drejtë me numrin e tyre.
Ndryshe, në mënyrë që procesi i regjistrimit të jetë i mundur, nevojitet revidimi i Ligjit për regjistrimin e popullsisë, në të cilin do të duhej të parashihet formimi i një Komisioni të veçantë, i cili do t’i koordinonte aktivitetet në komunat e veriut. Nevojën për miratimin e një ligji të tillë, përveç institucioneve të Kosovës, e ka theksuar edhe Komisioni Evropian.
Në anën tjetër, përfaqësuesit e Listës Serbe vlerësojnë se pas shqyrtimit të ligjit me kryetarët e komunave në veri, si dhe me përfaqësuesit e serbëve në nivelin lokal dhe qendror, nuk janë krijuar kushtet për zbatimin e një procesi të regjistrimit të popullsisë.
Slavko Simiq, kryetar i Listës Serbe, thotë për Radion Evropa e Lirë që rekomandimet ndërkombëtare e vënë në pah që regjistrimi i popullsisë mund të bëhet vetëm në kushte kur mjedisi ka siguri dhe stabilitet politik. Sipas tij, në rastin në veri, këto mungojnë.
“Mendoj që të gjithë ne, me forca të bashkuara, të investojmë shumë mund që të përmbushen standardet ndërkombëtare, në mënyrë që të mbahet regjistrimi në komunat, në të cilat ky regjistrim nuk është mbajtur në vitin 2011. Duhet të krijojmë një klimë reale politike dhe të sigurisë që serbët të dalin në mënyrë masive në regjistrim. Në këto kushte, jam i sigurt që qytetarët nuk do të dilnin në numër të madh dhe do ta kishim një pasqyrë joreale dhe një vlerësim joreal. Do ta kishim një regjistrim jo të besueshëm“, tha Simiq.
Ai ka shtruar se është absurde që deputetët e Listës Serbe të votojnë për projektligjin dhe më pas kryetarët e komunave në veri të mos mund ta zbatojnë atë.
Ndërkaq, Adrijana Hoxhiq, shefe e administratës komunale në Mitrovicë të veriut, duke folur për Radion Evropa e Lirë konsideron që regjistrimi i popullsisë në veri duhet të jetë një nga temat e dialogut në Bruksel ndërmjet Kosovës dhe Serbisë.
Ajo ka shprehur mendimin se regjistrimi i popullsisë duhet të bëhet për faktin se edhe buxhetet komunale përcaktohen në bazë të numrit të qytetarëve në komunat e përkatëse.
“Nuk është mirë që të bëhet regjistrimi në qoftë se ai proces nuk është i pranueshëm për të gjithë, e posaçërisht për ato komuna në të cilat duhet të ndodhë ai regjistrim. Pavarësisht asaj se si do të votohet në Kuvendin e Kosovës, është mjaft e rëndësishme që për këtë proces ta kemi një marrëveshje ndërmjet Beogradit dhe Prishtinës“, ka theksuar Hoxhiq.
Por, Abdullahu thekson se refuzimi eventual i përfaqësuesve të komunitetit serb do të jetë krejtësisht i papranueshëm dhe për të përjashtuar një bllokim të procesit duhet të gjendet zgjidhja me përfaqësuesit serb.
“Konsideroj që forma më e mirë për të dalë nga kjo situatë, nga kjo lloj përpjekje për një bllokim të kësaj natyre, është që të ulemi dhe të bisedojmë. Për më shumë, kjo fiton argument, kur i shtohet se edhe nga Komisioni Evropian kemi premtime konkrete se Komisioni do ta përkrahë këtë proces të regjistrimit të komunitetit serb me mjete materiale, që ai të mos na kushtojë edhe neve më shumë. Prandaj, benefitet do të jenë edhe në këtë sferë”, ka thënë Abdullahu.
Abdullahu ka shtuar se për realizimin e procesit të regjistrimit duhet të gjenden edhe modalitetet përkatëse dhe funksionale, si dhe të bëhen ndryshimet në ligjin për regjistrim.
Regjistrimi i popullsisë në Kosovë është mbajtur në vitin 2011, por ai proces ishte bojkotuar nga komunat në veri të Kosovës, për faktin se atë proces e kishin organizuar institucionet e Kosovës. (REL)
Autoritetet në Kosovë thonë se janë duke punuar në deradikalizmin, rehabilitimin dhe integrimin e personave të cilët kanë qenë pjesë në luftërat në Siri dhe Irak, përkrahë organizatave terroriste. Ata thonë se përpjekjet për të gjetur rrugët për përballje më këtë dukuri, po bëhen përmes strategjisë kombëtare për “Parandalimin e Ekstremizmit të Dhunshëm dhe Radikalizmit”, që është miratuar vitin e kaluar.
Bashkërenduesi i kësaj strategjie, Edon Miftari dhe njëherësh këshilltar për siguri i Kryeministrit të Kosovës thotë për Zërin e Amerikës se institucionet e Kosovës së bashku me partnerët ndërkombëtarë janë duke hartuar programe të posaçme për rehabilitim e personave që kanë qenë pjesëmarrës në luftërat në Siri dhe Irak.
“Këto nënkuptojmë programe që kanë të bëjnë me persona që janë duke e vuajtur denimin me burg për veprën penale të terrorizmit, në mënyrë që këta persona deri në momentin kur të lirohen nga denimi të jenë pjesë kontribuese e shoqërisë së Kosovës dhe të mos dalin nga burgu duke qenë ende të radikalizuar apo ende të kenë në një farë forme trurin e shpërlarë me fundamendalizëm që e kanë marr atje (Siri dhe Irak)”, tha ai.
Ai thotë se në këtë program do të përfshihen familjarë, organizata të ndryshme të shoqërisë civile dhe sociologë. Zoti Miftari thotë se institucionet e Kosovës tashmë kanë të gjitha kapacitetet e nevojshme për t’u përballur me këtë dukuri.
“Përkushtimi dhe vullneti qëndron. Në aspektin financiar ne qëndrojmë në një gjendje shumë të mirë për shkak se Kosova është një nga shtetet përfituese të një fondi global me një shumë prej pesë million dollarëve që do të fokusohet kryesisht për programet që do të zbatohen nga shoqëria civile dhe organizatat e ndryshme të shoqërisë civile në aspektin e rehabilitimit mirëpo edhe parandalimit, qoftë në vetëdijësim dhe me ri-integrim”, tha zoti Miftari.
Sociologu dhe studiuesi i çështjeve të religjionit Ismail Hasani thotë se ri-socializimi i personave të përfshirë në këto luftëra është një sfidë e madhe ndërsa veçon kohën e pasluftës dhe vështirësitë e kërkuara për integrimin e ish pjesëtarëve të Ushtrisë Çlirimtare të Kosovës në shoqëri.
“Normalisht se rruga e ri-integrimit të këtyre njerëzve përkatësisht ri-socializimit është shumë herë më e vështirë se sa që ishte rruga e ri-socializimit të ish-pjesëtarëve të UÇK-së menjëherë pas luftës. Ne e dimë se IOM dhe organizata tjera sa mund kanë shpenzuar për këtë proces, por megjithatë ri-socializimi i tyre në raport me ri-socializimin e këtyre njerëzve të radikalizuar është krejt e kundërt”, tha ai.
Zoti Hasani thotë se shenjat për radikalizim të jetës fetare janë parë vite më parë ndërsa thotë se kërkohet një bashkëpunim më i mirë ndërmjet institucioneve shtetërore dhe Bashkësisë Islame të Kosovës për të zbutur këtë problem.
“Të eliminohet në tërësi nuk ka mundësi përnjëherë sepse përmasat e radikalizmit kanë shkuar bukur thellë. Ne këto i shohim në jetën e përditshme me mënyrën e sjelljeve, veprimeve, kryerjes së ritualeve të ndryshme të njerëzve që janë jo të zakonshme për Islamin tradicional i cili është kultivuar në këto kordinata dhe njerëzit e kësaj përkatësie konfesionale mburren më të përkatësi. Por, me islamin tradicional, jo me islamin radikal, jo me veprimet të cilat përjashtojnë dhe jetojnë me eksluzivitetin në mënyrë të sjelljes, veshjes dhe mënyrës së veçantë të praktikimit të besimit, etj”, tha zoti Hasani.
Zoti Miftari thotë se gjendja ka filluar të ndryshojë viteve të fundit, pas angazhimit të institucioneve të Kosovës për tu përballur me këtë dukuri.
“Arsyet apo shkaqet pse kjo ka ndodhur në Kosovë ndoshta kanë të bëjnë me 15 vitet e fundit kur Kosova ishte nën administrimin e organizmave ndërkombëtarë, kur edhe nuk ka pasur funksionim të mirëfilltë ose kontroll të mirëfilltë qoftë të organizatave bëmirëse ose të atyre shoqërive të cilat kanë dhënë fianncime të ndryshme dhe kanë sjellë një lloj konflikti”, tha zoti Miftari.
Që nga viti 2014, autoritetet në Kosovë kanë bërë përpjekje që nëpërmjet arrestimeve dhe ligjeve të ndalojnë shkuarjen e qytetarëve të saj në luftërat në Siri dhe Irak përkrahë organizatave terroriste. Janë hetuar mbi 180 persona të përfshirë në vepra që lidhen me terrorizmin. Rreth 90 persona janë arrestuar dhe janë ngritur mbi 40 aktakuza, ndërsa janë dënuar edhe imam për rekrutimin e luftëtarëve.
Bruksel: Jens Stoltenberg dhe Hashim Thaçi
Presidenti i Kosovës, Hashim Thaçi ka shtruar nevojën që Kosova të ketë Forcat e Armatosura dhe të jetë pjesë e NATO-s. Këto qëndrime, Thaçi, sipas një komunikate për media, i ka shprehur në Bruksel gjatë një takimi që ka zhvilluar me Sekretarin e Përgjithshëm të NATO-s, Jens Stoltenberg.
Në takim, thuhet se u bisedua për mundësinë e inicimit të një dialogu politik ndërmjet Kosovës dhe NATO-s, si dhe për bashkëpunimin e Forcave të Sigurisë së Kosovës (FSK) me Aleancën Veri-Atlantike.
Presidenti Thaçi është shprehur po ashtu se FSK-ja është e gatshme që të marrë pjesë në manovrat, por edhe të kontribuojë në misionet paqeruajtëse të NATO-s, sidomos në fushat ku është specializuar.
“Kosova është e vendosur që të bëhet anëtare e NATO-s”, ka thënë Thaçi.
Në takim, sipas komunikatës, sekretari Stolteberg dhe presidenti Thaçi biseduan edhe për përkushtimin e Kosovës për sfidat e sigurisë, radikalizmin dhe terrorizmin. Me këtë rast, presidenti Thaçi u shpreh se Kosova do të mbetet e vendosur që të luftojë pa kompromis çdo ekstremizëm dhe radikalizëm.
Nga ana tjetër, Sekretari i Përgjithshëm i NATO-s, Jens Stoltenberg, ka theksuar se KFOR-i do të vazhdojë misionin e tij për një ambient të sigurt në Kosovë dhe do të garantojë lirinë e lëvizjes për aq kohë sa është e nevojshme.
Sekretari i Përgjithshëm vlerësoi se çfarëdo reduktimi i numrit të forcave të NATO-s në Kosovë do të bazohej në përmirësimin e kushteve në terren.
Kryesia e Organizatës së Veteranëve të Luftës së Ushtrisë Çlirimtare të Kosovës, në mbledhjen e fundit, shqyrtoj edhe çështjen e procesit të verifikimit të veteranëve të luftës së UÇK-së.
“Me këtë rast, kryesia dyshon se ka numër të fryrë të veteranëve, ose që ka nga ata të cilëve iu është dhënë statusi i veteranit por kjo bjen në kundërshtim me ligjin në fuqi, të miratuar nga Kuvendi i Republikës së Kosovës”, thuhet në një komunikatë për media.
Saktësinë e numrit të veteranëve, OVL UÇK mendon se institucionet e Kosovës përkatësisht Prokuroria e shtetit, duhet që ta vërtetojnë.
PRISHTINË – Aleanca Kosova e Re (AKR) zyrtarizoi sot koalicionin e saj me Lëvizjen Vetëvendosje në komunën e Prishtinës. Pas shumë mosmarrëveshjeve dhe mosgjetjes së një gjuhe të përbashkët në Asamblenë Komunale të Prishtinës dhe bllokimit të shumë çështjeve në interes të qytetarëve të Prishtinës, AKR-ja ka vendosur të bëjë koalicion qeverisës lokal për të shtyrë proceset përpara në interes të qytetarëve.
“Mbi bazën e vullnetit politik dhe nevojën për zhbllokimin e gjendjes në Kuvendin Komunal të komunës së Prishtinës dhe me qëllim ofrimin e shërbimeve më të mira publike për qytetarët arrihet kjo marrëveshje koalicioni qeverisës lokal mes dy subjekteve politike: Lëvizjes Vetëvendosje, përfaqësuar nga kryetari i komunës së Prishtinës dhe nga kryesuesi i grupit të këshilltarëve komunal- dhe Aleancës Kosova e Re – përfaqësuar nga kryetari i degës së Prishtinës dhe kryesuesi i grupit të këshilltarëve komunal”, thuhet në njoftim.
AKR-ja në kuadër të koalicionit do të ketë dy drejtori, drejtorinë e bujqësisë dhe drejtorinë e kulturës në komunën e Prishtinës. AKR thotë se është e angazhuar që të gjitha proceset në nivel vendi dhe komune t’i shtyjë përpara në të mirë të qytetarëve dhe ky koalicion vjen për shkak të një parimi të tillë, pasi për shkak të mosmarrëveshjeve ndërmjet subjekteve politike, pasojat janë duke i vuajtur qytetarët. /K.press
Autoritetet në Prishtinë thonë se pengesat e bëra nga Serbia janë faktori kryesor i mospranimit të Kosovës në organizatat ndërkombëtare, në veçanti në institucionet evropiane. Krahas mospranimit nga pesë vendet e BE-së, bllokimi i Kosovës nga Serbia i ka pamundësuar asaj të jetë pjesë e një numri organizatash jo vetëm rajonale, por dhe më gjerë.
Qeveria e Kosovës thotë se synimi parësor i saj janë mekanizmat evropianë, dhe me theks të posaçëm Këshilli i Evropës, një prej institucioneve që për Kosovën ka nxjerrë dhe raporte.
Këshilltari politik i kryeministrit të Kosovës, Faton Abdullahu, i tha Radios Evropa e Lirë, se me pengesën që Serbia i bën Kosovës po shkel parimet themelore të anëtarësimit në BE.
“Qasja e Serbisë është plotësisht e papranueshme. Është një qasje politikisht delikuente dhe shumë e rrezikshme sa i takon sigurisë dhe paqes në rajon. Dhe për sa i përket plotësimit të njërës nga kushtet që vlen edhe për Serbinë, normalizimi i raporteve me fqinjët është si premisë për t’i shpejtuar hapat drejt integrimeve evropian”, tha Abdullahu.
Problemet me anëtarësimin e vendit në organizatat ndërkombëtare janë theksuar posaçërisht me faktin e mosnjohjes së Kosovës nga pesë shtetet anëtare të BE-së dhe kundërshtimit të fuqishëm të Serbisë në organizata ku ajo mund të ketë ndikim më të madh.
Megjithëse ishte paralajmëruar prej vitesh anëtarësimi i vendit në Këshillin e Evropës, Kosova mbeti ende jashtë tij, për shkak të pamundësisë së mbledhjes së votave të mjaftueshme. Aplikimi në këtë institucion evropian nuk është bërë, sado që autoritetet në Prishtinë e patën paralajmëruar vite më parë.
Abdullahu thotë arsyet pse Kosova deri me tash nuk ka aplikuar në ketë mekanizëm janë të ndryshme.
“Arsyet janë nga më të ndryshmet, por ajo çka mund të thuhet konkretisht është se ne kemi raporte të mira me Këshillin e Evropës. Nuk besoj se në të ardhmen e afërt do të jetë pengesë e madhe edhe tejkalimi i atyre sfidave që të njihemi edhe nga Këshilli i Evropës”, tha Abdullahu për Radion Evropa e Lirë.
Por, ndërkohë, autoritetet në Prishtinë thonë se me BE-në, pavarësisht telasheve me vendet që ende nuk e kanë njohur pavarësinë e Kosovës, kanë arritur një marrëdhënie të re kontraktuale përmes nënshkrimit të Marrëveshjes së Stabilizim Asociimit që do t’i mundësojë vendit përafrimin me BE-në duke tejkaluar dallimet e sotme brenda vetë këtij mekanizmi.
Anëtarësimi në UEFA dhe FIFA, dy organizatat botërore të sportit, duket sikur kanë thyer mitin e mospranimit të Kosovës në botë.
Për qeverinë, Kosova ka ecur në drejtim të njohjes së saj në botë, por për opozitën, vendi nuk ka arritur të ndryshojë qasjen e institucioneve ndërkombëtare karshi tij.
Zgjim Hyseni, anëtar i kryesisë së Lëvizjes Vetëvendosje tha për Radion Evropa e Lirë, se Kosovën për vite me radhë e ka karakterizuar një politike e jashtme e dështuar dhe kjo, sipas tij, është rritur me koalicionin e dy partive më të mëdha në vend, PDK dhe LDK.
“Në këtë drejtim, një prej faktorëve që ka penguar suksesin dhe anëtarësimin e Kosovës në organizata të ndryshme ndërkombëtare ka qenë fakti që tashmë dihet, edhe në shtete tjera partnere, që Kosova udhëhiqet prej një klase politike të korruptuar. Kjo është reflektuar në mos-suksesin tonë sa i takon politikës së jashtme”, tha Hyseni.
Por, sipas tij mos anëtarësimi i Kosovës në organizata ndërkombëtare është ndikuar edhe nga qasja që Kosova ka pasur në raport me dialogun me Serbinë.
“Në rast se ne nuk e konsiderojmë si kapitull të mbyllur marrëdhënien tonë me Serbinë, dhe gjithmonë ende ka ende për të diskutuar këtu, ky është një argument në duart e diplomacisë Serbe që [mund të thonë] ju lutem mos bëni hapa të njëanshëm për ta njohur Kosovën sepse ne ende po diskutojmë për ta gjetur një zgjidhje sa i takon kësaj pune”, tha Hyseni.
Shenoll Muharremi, njohës i integrimeve evropiane, konsideron se Kosova dhe institucionet e saj duhet të kenë qëllime të caktuara kur bëjnë kërkesë për anëtarësim në ndonjë mekanizëm ndërkombëtar.
Sipas tij, Qeveria e Kosovës, duhet të thellojë reformat e brendshme për të forcuar kredibilitetin e vendit që mund të shfrytëzohet, sipas tij për anëtarësime në forume të ndryshme.
“Ne duhet t’i bëjmë prioritetet tona. Për mendimin tim çështja më primare e politikës së jashtme, sa i përket anëtarësimeve dhe njohjeve, është që vendi të fokusohet në pesë shtete anëtare të BE-së që nuk e kanë njohur Kosovën. Ne do të kemi telashe të mëdha pas 2-3 vitesh kur do të bëjmë hapa më serioz drejt anëtarësimit”, tha Muharremi.
Pengesa e Kosovës në rrugën e saj drejt integrimeve vazhdon të jetë marrëdhënia ende e rëndë me Serbinë.
Të dyja palët janë futur në një dialog për normalizim të marrëdhënieve, dhe sado që marrëveshja e prillit e vitit 2013 parasheh që asnjëra palë të mos e pengojë tjetrën në rrugën e integrimeve evropiane, një gjë është ende e qartë: Kosova nuk ka arritur të përafrohet me një numër të institucioneve evropiane.
Nënkryetarja e PDK-së , Flora Brovina ka thënë se partia e saj e kishte propozuar Gani Kocin për ministër të Drejtësisë, por në mes ka dalur ndonjë pengesë.
“Ne e kemi diskutuar, dhe e kemi propozuar Kocin për ministër, por prej propozimit deri tek vendimi duket se ka pasur pengesa. Ne e mbrojmë Kocin, e respektojmë. Ai e di pse nuk u bë ministër”, ka thënë Brovina në Interaktiv të KTV-së.
Ajo ka thënë se opozita me gaz nuk mund të zgjidhë asgjë, porse personalisht ka shprehur dyshimet e saj për demarkacionin.
Megjithatë, ajo ka thënë se mund të merret një vendim brenda partisë për të votuar për këtë.
“Nëse hedhin gaz sërish, do ta votojmë symbyllur”, ka thënë Brovina.
Ish-kryetari i Gjykatës Kushtetuese, Enver Hasani, këtë javë do të pranojë ftesën për t`u përballur me akuzat për falsifikim të dokumentit zyrtar dhe keqpërdorim të detyrës zyrtare në kohën sa ishte në krye të Kushtetueses.
Gjykata Themelore e Prishtinës ka konfirmuar për “Kohën Ditore” se tashmë kanë proceduar me çështjen pas vendimit të Gjykatës Supreme, e cila e ka hedhur poshtë ankesën e Hasanit për mbrojtje të ligjshmërisë.
Procedura gjyqësore ndaj tij pritet të fillojë si çdo procedurë tjetër, duke mos e ngritur çështjen e imunitetit.
Kjo mund të bëhet vetëm nëse kërkohet ndërkohë nga palët. Kryetari i gjykatës së shkallës së parë, Hamdi Ibrahimi, ka thënë se kanë vendosur për procedimin e rastit.
Kostoja e pensioneve të veteranëve të UÇK-së po rrezikon buxhetin dhe Marrëveshjen stand-by të Kosovës me Fondin Monetar Ndërkombëtar.
Jo vetëm njohës të kësaj çështjeje, por edhe vetë ish-komandantë të UÇK-së i kanë bërë apel Prokurorisë së Shtetit të nisë hetim për deklarimet e rrejshme që janë bërë, të cilat, sipas tyre, po e dëmtojnë kredibilitetin e UÇK-së dhe buxhetin e shtetit, shkruan sot Koha Ditore.
Rexhep Selimi, ish-anëtar i Shtabit të Përgjithshëm të UÇK-së, ka thënë se në ushtri asnjëherë nuk kanë qenë të angazhuar 46 mijë veta.
Avdullah Hoti, ministër i Financave, ka thënë se në fillim të vitit ishin ndarë 25 milionë euro, të mjaftueshme për pagesën e pensionit prej 170 eurosh për rreth 12 mijë veteranë.
Zbehja e imazhit në sytë e ndërkombëtarëve
Organet e drejtësisë kanë mbetur hallka më e dobët e pushtetit
Qortimi që ia bëri popullit ambasadori amerikan, Donal Lu, është shumë me vend. Është e pashpjegueshme së si po lejohen që këto struktura të kompremituara të udhëheqin shtetet tona
Pushtetet e pasluftës u treguan jomeritore në drejtimin e shtetit të ri të Kosovës. Në vend të punës për shtetndërtim dhe mirëqenie pas okupimit shumëvjeçar nga Serbia, u përballëm me dy fenomenet më të këqija të mundshme. Me krimin e organizuar dhe më korrupsionin, të cilat i shkaktuan dhe po shkaktojnë dëme të mëdha Kosovës. Krimi dhe korrupsioni fatkeqësisht na janë bërë pjesë e jetës. Organet e drejtësisë kanë mbetur hallka më e dobët e pushtetit. Krimi i organizuar ekonomik e politik dhe korrupsioni bënë që të zbehet shumë imazhi i Kosovës në sytë e botës demokratike. Kastat politike në pushtet punuan më shumë për të mirën e tyre, duke e varfëruar popullin secilën ditë e më shumë. Pak u interesuan për zhvillim të ekonomisë dhe për zvogëlimin e numrit të lartë të të papunëve. Fushatat elektorale dhe premtimet e dhëna i shfrytëzuan vetëm sa për t’u ngjitur në pushtet. Me veprimet e tyre e futën vendin në krizë të rëndë politike dhe institucionale.
Logjika e autoritarizmit
U futën në bisedime maratonike më shumë për çështje politike me Serbinë, duke nënshkruar marrëveshje të cilat prekin edhe statusin politik të Kosovës. Asociacioni i Komunave serbe me kompetenca vendimmarrëse dhe Demarkacioni prunë deri te eskalimi i situatës politike dhe deri te kriza institucionale. Këto marrëveshje u kundërshtuan në Kuvend dhe me protesta të cilat u organizuan në kryeqytet nga opozitarët. Edhe përkundër të gjitha këtyre të këqijave askush nuk dha dorëheqje si akti më madhor moral dhe politik. Ndjenja e përgjegjësisë nuk po ekziston së në kokat e kësaj elite politike, sepse është ngulitur logjika e autoritarizmit. E vërteta e madhe për kastat udhëheqëse në Shqipëri dhe në Kosovë që doli nga goja e mikut të shqiptarëve ambasadorit amerikan në Shqipëri, Donald Lu, është mesazhi më i drejtpërdrejtë dhe është mesazhi më i fuqishëm së si jemi katandisur si komb dhe si shtete dhe se cila është e mira dhe e keqja jonë. “Unë kam pak kohë që rri në vendin tuaj. Në fillim më bëri përshtypje që çdo gjë që thoshin ambasadorët ju e merrnit për flori safi. Nuk kisha parë njerëz më të verbër në besimin ndaj të huajve. Por, pastaj, kur pashë se ata që ju drejtojnë apo merren me politikë tek ju janë më të pashpirt se çdo i huaj dashakeq ndaj jush, e kuptova pse na shikoni në dritë të syrit”. Shkëputa këta rreshta lexues të nderuar nga fjalimi i ambasadorit Lu dhe a ka gjë më turp për shqiptarët në të dyja anët e kufirit së të lejohet që në emër të popullit ta kalërojnë pushtetin kastat politike të korruptuara dhe servile. Kjo e fundit vlen më shumë për udhëheqjen tonë, e cila ia ka zënë vetit bishtin me derë dhe tash janë të detyruar të bëhen të dëgjueshëm dhe vetë të zbatojnë urdhra, ashtu siç kërkojnë ambasadorët e huaj të akredituar në Kosovë. Nuk ka njeriu as një pres ose pikë t’ia heq këtij mendimi të ambasadorit Lu.
Plaçkitin shtetin dhe popullin
Qortimi që ia bëri ai popullit është shumë me vend. Është e pashpjegueshme se si po lejohen që këto struktura të kompremituara të udhëheqin shtetet tona. “Librat e historisë thonë për ju shqiptarët e mi të dashur se nuk ju trembet syri dhe e keni ndjesinë e drejtësisë. Por, më ka bërë përshtypje që ndaj çdo padrejtësie ia mbathni nga sytë e këmbët. Në përgjithësi popujt e civilizuar nuk lejojnë që të manipulohen. Reagojnë ndaj qeverive. Ndërsa ju reagoni në mënyrë shumë të çuditshme. Ikni” thotë Lu. A ka shpjegim më të mirë dhe të hollësishëm së ky? Sigurisht së jo. Unë nuk dua të lavdërohem së kam shkruar dhe thënë ndër të parët, se gjithë kjo heshtje e popullit para këtyre regjimeve despotike nuk justifikohet. Regjimet në Shqipëri dhe në Kosovë sa më parë që të largohen nga skena politike, aq më afër do ta kemi shpëtimin nga kurthet të cilat na i kanë ngritur. Jo si zgjedhje ta preferojmë ikjen nga vendi siç e tha ambasadori i nderuar, Donald Lu. Natyrisht së Lu është zhgënjyer duke pa së si secili që ngjitet në pushtet ia falë dreqit, duke plaçkitur shtetin dhe popullin e vet. Lidhur me korrupsionin Lu shprehet: “Korrupsioni në drejtësi jo vetëm që i lejon gjyqtarët dhe politikanët të mbushin xhepat me para të pista; ai po shkatërron jetët e njerëzve të zakonshëm e të ndershëm. Të pasurit dhe të fortët e blejnë drejtësinë, ndërsa gratë, të varfrit dhe ata pa pushtet politik janë viktimat”.Këto ishin pjesë shkëputura nga një fjalim i ambasadorit amerikan, Donald Lu, gjatë prezantimit të Indeksit të Perceptimit të Korrupsionit. Zoti na ndihmoftë z. Lu, se ne deri më tash nuk ia kemi bërë argatin vetit që punët t’i kemi më mirë…
VOAL -Në një postim të shkurtër dje, menjëherë pas mbledhjes së tretë të qeverive të Kosovës dhe të Shqipërisë, mbajtur në sallën qendrore të Bibliotekës Kombëtare në Prishtinë, gazetari i atjeshëm Enver Robelli, i ka karakterizuar dy palët si ‘mafiozë toskë’ dhe ‘shvercera gegë’, duke përdorur në rastin e dytë një zhargon nga gjermanishtja për ‘zezakë’.
Ja postimi i plotë i Robellit:
Ishte një takim i suksesshëm i mafiozëve toskë me shvercerat gegë!
Analisti Dukagjin Gorani i është bashkuar Lëvizjes Vetëvendosje. Kalimi i Goranit në këtë parti është bërë sot.
Këtë e ka konfirmuar për lajmi.net, zëdhënësi i Vetëvendosjes Frashër Krasniqi. Ai po ashtu ka thënë gjatë ditëve në vijim se kësaj partie do t’i bashkohen edhe figura tjera të rëndësishme.
Dukagjin Gorani është folur se ka synuar krijim e një subjekti politik, së bashku me disa anëtarë tjerë përfaqësues të shoqërisë civile, por që tani ka vendosur i vetëm që t’i bashkohet partisë më ta madhe opozitare, Lëvizjes Vetëvendosje.
Policia e Kosovës ka ndermarrë një aksion për lirimin e pronave që dyshohet se janë të uzurpuara, ka thënë për Radion Evropa e Lirë, Daut Hoxha, zëdhënës në Policinë e Kosovës. Aksioni është duke u zhvilluar tek Hotel “ Viktoria” në Prishtinë
“Policia e Kosovës është në funksion të realizimit të detyrave dhe përgjegjësive të saj ligjore në vazhdën e zbatimit të ligjit, në bashkëpunim më autoritete kompetente për largimin e uzurpatorëve nga pronat e uzurpuara. Edhe sot në Prishtinë ka vazhduar një operacion i tillë” ka thënë Hoxha .
Ndryshe, sipas të dhënave të AKP-së janë 170 prona të uzurpuara, nga 116 persona fizik dhe 54 persona juridik.
Avni Klinaku, kryetari i Lëvizjes për Bashkim, që para pak ditësh e cilësoi si skandaloz numrin prej 46,000 e ish-pjesëtarëve të Ushtrisë Çlirimtare të Kosovë që kanë fituar statusin e veteranit të luftës, thotë se këtë titull nuk e meritojnë të gjithë ata që e kanë marrë.
Në emisionin Zona e Debatit në Klan Kosova, Klinaku u shpreh edhe njëherë se listat janë skandaloze dhe numrat e individëve që luftuan në Kosovë janë dyfishuar.
“Që nga fillimi nuk na ka pëlqyer ky proces, me definicione jo të sakta dhe me krejt atë që ka prodhuar. Duhet të vijmë në nj konstatim nëse numri nuk është i fryrë, nuk ka çka të lëndohet askush, por nëse është i fryrë atëherë i bie se dikush është barazuar me dikë pa meritë. Pakënaqësia jonë është hartimi i ligjit dhe listat që kanë dalë nga aty, sepse janë skandaloze”, deklaron Klinaku.
“Shifrat që kanë pas shoqatat e dala nga lufta dhe dokumentet nga komandantët e zonave të cilat ata vet i kanë nënshkruar dalin të dyfishuara. Kjo e dëmton shëmbëlltyrën e këtij procesi”, ka përfunduar ai.
Përfaqësues nga Qeveria e Kosovës dhe Kuvendi i Kosovës thonë se deri tash janë kryer të gjitha obligimet për themelimin e Gjykatës Speciale. Ata thonë se infrastruktura juridike për Gjykatën Speciale për krime lufte në Kosovë tashmë është ndërtuar, përfshirë këtu aprovimin nga Kuvendi i Kosovës të Ligjit për Dhomat e Specializuara dhe Zyrën e Prokurorit të Specializuar.
Nënkryetari i Kuvendit të Kosovës, Xhavit Haliti, tha se të gjitha veprimet për formimin e kësaj gjykate janë ndërmarrë, duke respektuar ligjet e Kosovës dhe rregulloret e veçanta. Andaj, ka vijuar ai, nuk ka asnjë arsye që institucionet e Kosovës të mos bashkëpunojnë me këtë gjykatë.
Haliti tha se askush nuk e ka dëshiruar një gjykatë të tillë. Por, ai beson se puna e kësaj gjykate do të dëshmojë edhe një herë se lufta e UÇK-së ka qenë e pastër dhe e drejtë.
“Në Kosovë nuk ka ndonjë çështje të pazgjidhur. Deri tash të gjitha çështjet janë miratuar në Kuvend dhe janë dërguar në Bruksel. Tani ka mbetur që Brukseli të bëjë rekrutimin e gjyqtarëve”, tha Haliti.
Edhe në Qeverinë e Kosovës thonë se obligimet e tyre karshi Gjykatës Speciale kanë përfunduar. Besnik Berisha, këshilltar i Jashtëm për çështje të Drejtësisë në zyrën e kryeministrit të Kosovës, tha për Radion Evropa e Lirë se kjo çështje tash është e përfunduar dhe se qeveria nuk ka dhe nuk do të duhej të përzihej në punët e sistemit të drejtësisë.
“Tash e tutje është çështje e pushtetit të drejtësisë. Është çështje që të merren ata dhe çdo ndërhyrje e qeverisë në parim do të përbente cenim të ndarjes së pushteteve”, tha Berisha.
Ideja për themelimin e një Gjykate Speciale buron mbi bazën e hetimeve të iniciuara nga Këshilli i Evropës, që si bazë kishin dyshimet e zviceranit Dick Marty, mbi trafikimin e organeve të serbëve nga pjesëtarët e ish-Ushtrisë Çlirimtare të Kosovës.
Dyshimet e tilla janë hedhur edhe mbi ish-udhëheqës të lartë të UÇK-së, të cilët aktualisht mbajnë poste të larta në institucionet e Kosovës, që nga presidenca e deri te dikasteret tjera të qeverisë, por edhe të partive politike.
Dren Doli, nga Grupi për Studime Juridike dhe Politike, vlerëson se institucionet e Kosovës tashmë kanë dhënë konfirmimin e tyre se do të ndihmojnë punën e kësaj gjykate në momentin kur kanë kaluar amendamentet kushtetuese dhe ligjin për themelimin e saj.
“Pra, nuk ekziston asnjë arsye as ligjore apo objektive e cila mund të ndikonte që institucionet e Kosovës të mos ndihmojnë punën e Gjykatës Speciale në Kosovë. Ky është një përkushtim që Kosova e ka marrë. Natyrisht është e nevojshme që pjesa tjetër e institucioneve të Kosovës të punojnë dhe bashkërendojnë punë me Gjykatën Speciale, në mënyrë që mandati i saj të realizohet sa me parë dhe ato supozime që do të ngritën në gjykatë të qartësohen njëherë e mirë dhe përgjithmonë”, tha Doli.
Sidoqoftë, tashmë ka mbetur që një komision i posaçëm i Bashkimit Evropian të shpallë konkursin për emërimin e gjyqtarëve dhe prokurorëve të Gjykatës Speciale për krime të luftës në Kosovë, si dhe stafin administrativ për këtë gjykatë. Gjithashtu është paralajmëruar edhe mundësia eventuale e procedimit të rasteve të para nga ana e kësaj gjykate, gjatë këtij viti. Në qeverinë e Kosovës besojnë në paanshmërinë e Gjykatës Speciale dhe njësoj, siç thotë ata, besim të njëjtë duhet të kenë edhe qytetarët.
“Institucionet e Kosovës, në përgjithësi, mendojnë se tashmë është instaluar një klimë e respektimit të vendimeve të gjyqësorit. Është instaluar po ashtu një klimë e bashkëpunimit me institucionet e drejtësisë në shumicën e rasteve. Unë nuk besoj se ka ndonjë arsye për tu përgatitur për situata të eskalimit të [situatës] dhunës për shkak se besohet në një gjykatë objektive”, tha Besnik Berisha.
Gjykata pritet të hetojë krimet serioze të kryera në periudhën 1999-2000 nga pjesëtarë të Ushtrisë Çlirimtare të Kosovës kundër pakicave etnike dhe kundërshtarëve politikë. Gjykata Speciale pritet të nisë së operuari këtë vit. Selia e saj do të jetë në Hagë të Holandës. (REL)
Polica e Kosovës njofton se në oborrin e një shtëpie serbi të blerë nga një shqiptar në Klinë u gjetën shumë armë: granata, pushkë e fishekë.
Në raportin e vet ditor Policia e Kosovës, ka njoftuar se, transmeton Koha.net, ankuesi mashkull K/Shqiptar ka informuar se ka blerë një shtëpi nga një mashkull K/Serb dhe me kërkesën e ankuesit nga ana e FSK-së është bërë kontrollimi i oborrit të shtëpisë pasi që kishte dyshime se mund të kishte lëndë shpërthyese.
Gjatë kontrollit me eskavator në oborrin e shtëpisë janë gjetur dhe konfiskuar nga FSK-ja 11 copë granata dore, 1 AK/47 me 9 karikatorë, 470 copë fishekë të kalibrit 7.62mm, 1 kilogram eksploziv plastik dhe 6 copë detektorë elektrikë.
Në lidhje me rastin është njoftuar prokurori kompetent.
Njerëzit i nderojnë trupat pa jetë të tre vëllezërve Bytyçi në Prishtinë, më 27 shkurt 2002
Familja e tre shtetasve amerikanë me origjinë nga Kosova, të vrarë gjatë luftës në Kosovë, në vitin 1999, tha se kryeministri i Serbisë, Aleksandër Vuçiçi, ka dështuar t’i realizojë premtimet, që të dyshuarit për këtë vrasje të sillen para drejtësisë.
Vëllezërit, Ylli, Mehmet dhe Agron Bytyçi, janë larguar nga Nju Jorku për të luftuar në radhët e kryengritësve shqiptarë kundër sundimit të Serbisë në Kosovë.
Ata ishin arrestuar pas një beteje dhe pastaj trupat e tyre të pajetë ishin gjetur në një varrezë masive në vitin 2001, raporton agjencia Associated Press.
Në një email dërguar kësaj agjencie, avokatët e familjes thonë se “përkundër kërkesave të përsëritura, familjes Bytyçi nuk i është dhënë asnjë njoftim për planet e ardhshme për të lëvizur në këtë rast”.
Avokatët thonë se kryeministri i Serbisë, Aleksandar Vuçiq, “e ka gënjyer shumë herë familjen e tre shtetasve të vrarë amerikanë. Ai duhet të mbahet përgjegjës”.
I pyetur për të komentuar këtë situatë, një zyrtar i qeverisë, që ka folur në kushte anonimiteti, tha se “ne kemi punuar në këtë rast”.
Përfaqësuesit e familjes Bytyçi pretendojnë për lëshime të shumta në hetime.
“Dëshmitarëve nuk u janë dhënë sinjale të qarta se ata do të mbrohen. Ende nuk ka akuza. Megjithatë, kriminelëve të dyshuar të luftës po u shkon puna mjaft mirë”, thonë ata.
Mëtutje, përfaqësuesit e familjes Bytyçi pretendojnë se i dyshuari kryesor në këtë rast mbetet këshilltar kryesor i kryeministrit Vuçiç dhe presidentit të Serbisë, Tomisllav Nikoliç, dhe Partisë Progresiste të tyre, raporton AP.
Kërcënimet dhe frikësimet vazhdojnë të jenë arsyeja kryesore pse dëshmitarët në proceset gjyqësore, sidomos në rastet e cilësuara si të ndjeshme, shpeshherë refuzojnë tërësisht t’i tregojnë ato që dinë.
Mbrojtja e dëshmitarëve vazhdon të mbetet një nga sfidat për sistemin e drejtësisë në Kosovë.
Kohët e fundit, organet e ndjekjes penale kanë kryer një varg arrestimesh, përfshirë edhe persona të profilit të lartë politik, apo siç quhen shpesh, “peshqve të mëdhenj”, të dyshuar për krim të organizuar dhe korrupsion.
Që nga viti 2011, Kosova ka ligjin për mbrojtjen e dëshmitarëve. Ai mundëson masa mbrojtëse për të siguruar mbrojtje të personit të mbrojtur nga rreziku serioz.
Mirëpo, ky ligj, sipas njohësve të sistemit të drejtësisë dhe avokatëve, nuk po gjen zbatim në Kosovë.
Betim Musliu, drejtor i Institutit të Kosovës për Drejtësi, thekson për Radion Evropa e Lirë se në Kosovë asnjëherë nuk ka pasur ambient të përshtatshëm për dëshmitaret, e sidomos për dëshmitaret e mbrojtur.
Musliu thekson se brishtësia e sistemit të drejtësisë që nga pas lufta e deri me thash ka bërë që në asnjë formë dëshmitarët potencial nuk kanë pasur besim që t’u ofrohen prokurorive dhe gjykatave për të dhënë dëshmi.
“Nuk ka pasur asnjëherë programe specifike, të cilat do të ndikonin në ofrimin e dëshmitarëve për të dëshmuar për veprat tjera penale karakteristike, që mund të jenë, si krimi i organizuar apo korrupsioni. Vetëm së fundmi po flitet se në rastet e ashtuquajtura të profilit të lartë mund të ketë dëshmitarë të mbrojtur për të cilët tashmë ka filluar edhe një kërcenim (apo mbrojtje) nga ana e gjyqësorit, se vetëm përmendja e emrit të tyre mund të përbejë vepër penale nga kushdo qoftë”, tha Musli.
Për aplikimin e programeve për mbrojtje të dëshmitarëve, vijoi Musliu, deri më tani nuk ka pasur një seriozitet si nga ana e institucioneve vendore apo EULEX-it si dhe UNMIK-ut në të kaluarën.
“Prandaj do të duhej që shteti të investojë shumë e më shumë në hartimin e programeve të cilat do të ishin të favorshme për dëshmitarët. Kjo nuk ka ndodhur deri me tash dhe ky ambient, nëse vazhdon kështu, do të ndikojë që edhe ata që mund të jenë dëshmitarë të largohen e lëre më që të ketë dëshmitarë të ri që t’i ofrohen sistemit të drejtësisë”, u shpreh Musliu.
Ndërkohë, avokati Tomë Gashi konsideron se për faktin që ligji nuk po zbatohet, institucionet, sipas tij,duhet të ndërmarrin masa për realizimin e programeve të ndryshme në mënyrë që shumë çështje gjyqësore të zgjidhen.
“Sigurisht se ka mundësi të përmirësimit të këtij ligji, mirëpo është pak e pamundshme që në Kosovën e vogël të mos dihet identiteti i dëshmitarëve të caktuar, sepse për rastet të cilat janë në shqyrtim e sipër, zakonisht dëshmitarët vijnë nga vendi ku edhe i dyshuari jeton në afërsi”, tha Gashi.
Tutje, avokati Gashi thekson se me fillimin e funksionimit të Gjykatës Speciale, çështja e dëshmitarëve të mbrojtur do të vë në pah edhe më shumë moszbatimin e ligjit dhe programet e nevojshme që do të duhej t’i kishte Kosova.
“Këto mungesa janë shfrytëzuar që bashkësia ndërkombëtare të pranojë aprovimin dhe funksionalizimine një gjykate të huaj, duke pretenduar se në Kosovë nuk mbrohen fare dëshmitarët apo është jashtëzakonisht vështirë të mbrohen ata, për shkak të territorit të vogël dhe numrit të popullsisë që është rreth 2 milionë”, tha Gashi.
Në zyrën e Kryeprokurorit të Shtetit nuk kanë dashur që të flasin shumë për programet dhe ligjin për mbrojtjen e dëshmitarëve.
Në një përgjigje me shkrim nga zyra për media që i është thënë Radios Evropa e Lirë, thuhet se në bazë të ligjit edhe masat e mbrojtjes mund të zbatohen para, gjatë dhe pas procedurës penale për personat e rrezikuar në lidhje me hetimet për veprat penale.
Në kuadër të institucioneve të drejtësisë ekziston një komisioni i cili merret me mbrojtjen e dëshmitarëve. Ky komision udhëhiqet nga kryeprokurori i Shtetit, kryesuesi i Zyrës së hetuesisë së Policisë së Kosovës, dhe drejtori i Drejtorisë për mbrojtjen e dëshmitarëve.
Kodi i Procedurës Penale të Republikës së Kosovës parasheh mbrojtje për dëshmitarët në procedurë penale, në rast se ka rrezik serioz për rrezikim të jetës, shëndetit apo pronës së dëshmitarit apo edhe anëtarit të familjes, siç është urdhri për masa mbrojtëse apo urdhri për anonimitet nga të pandehurit apo publiku.
Pas luftës, mbrojtja e dëshmitarëve si kompetencë u ka takuar organizatave ndërkombëtare; fillimisht administratës së Kombeve të Bashkuara – UNMIK-ut, e më pas misionit të Bashkimit Evropian për Sundim të Ligjit – EULEX. (REL)
Nobelistja Shirin Ebadi po merr pjesë në konferencën ndëfetare në Prishtinë
Nobelistja nga Irani, Shirin Ebadi, tha të martën në Prishtinë, se Shteti Islamik është një ideologji e gabuar më parë se sa një grup terrorist dhe kjo , tha Ebadi, nuk mund të çrrënjoset me bomba.
Duke folur në hapje të konferencës ndërkombëtare për promovimin e dialogut ndërfetar dhe luftës kundër ekstremizmit të dhunshëm, Ebadi tha se „lufta kundër talebanëve ka treguar se sa e pamundur është që të çrrënjoset një ideologji e gabuar me bomba „sepse talibanët janë forcuar më shumë dhe pyeti siç tha botën se pse po zbaton përvoja të pasuksesshme“.
Sipas saj, lufta kundër ideologjisë së gabuar bëhet vetëm duke shfrytëzuar ideologji të vërtetë.
„Myslimanëve të rinj, përparimtarë dhe modern, djemve, duhet t’u japim një platformë përmes së cilës do të dërgohen në botë dhe duhet t’u tregojmë të rinjve se ekzistojnë interpretime më të mira të islamit. Prandaj gjithnjë them se në vend që ISIS-in ta godisni me bomba – goditeni me libra“, tha Ebadi.
Ajo tha se shoqëritë patriarkale ndalojnë reformimin e islamit, sepse me interpretimin e saj të islamit „arsyetojnë veprimet e tyre dhe sjelljet e tyre“. Duke folur diskriminimin e rëndë ndaj gruas në shtetet myslimane, Ebadi tha se „nuk është Islami ai që i shtyp gratë, por interpretimi i islamit nga shoqëritë patriarkale shtypin gratë“.
„Prandaj të rinjtë duhet t’i mësojmë me interpretimet e drejta të Islamit. Duhet t’i mësojmë të rinjtë se duhet t’i përmbahen shpirtit të Islamit, dhe se duhet ta zbatojnë varësisht nga koha kur jetojmë. Sikur që më nuk udhëtojmë me deve, ngjashëm duhet edhe zakonet tona të përputhen me këtë shekull“, tha Ebadi.
Nobelistja Shirin Ebadi është mysafire nderi në Konferencën ndërkombëtare për promovimin e dialogut ndërfetar, që po mbahet në Prishtinë për herën e pestë, dhe foli në temën „Roli i gruas në promovimin e dialogut ndërfetar dhe luftën kundër ekstremizmit“.
Konferencën e hapi Presidenti Hashim Thaçi, i cili theksoi se nuk ka një aleat më të mirë se sa gruaja, nëna, bashkëshortja dhe motra në luftën kundër ekstremizmit.
Konferenca ndërfetare mblodhi sivjet mbi 300 pjesëmarrës nga 50 shtete të botës dhe përveç Shirin Ebadit nga Irani, po merr pjesë edh enjë nobeliste tjetër nga Jemeni, Raëakool Kerman.
Gjatë punimeve të konferencës një çmimi Kosovës për dialogun ndërfetar do t’i ndahet kryetarit të ri të Londrës, Sadiq Khan dhe themeluesit të shoqërisë Sant Egidio, Monsinjor Vincenzo Paglia. (Radio Evropa e Lirë)
Një muaj pasi prokurori, Danilo Ceccarelli zbuloi identitetin e dy dëshmitarëve kryesorë kundër Azem Sylës, ka kërkuar nga Gjykata që identiteti i tyre tash e tutje të jetë i mbrojtur. Prokuroria ka refuzuar të flasë nëse mban përgjegjësi nëse në çfarëdo forme cenohen dëshmitarët, për shkak se vetë ua ka zbuluar identitetin. Përmendja e emrave në publik të këtyre dy dëshmitarëve përbënë vepër penale.
Prokurori i EULEX-it, Danilo Ceccarelli dhe gjyqtarja, Jeniffer Sill kanë marrë vendim që dy dëshmitarët kryesorë kundër Azem Sylës, t’i shpallin anonim, një muaj pasi vetë ua kanë zbuluar identitetin e tyre.
Emrat e këtyre dy dëshmitarëve me të dhënat e plota dhe pjesë të dëshmive të tyre, janë vënë në kërkesën e prokurorit për paraburgim për disa prej 21 të dyshuarve për krim të organizuar dhe shpëlarje parash.
Përveç kësaj, emrat e tyre përmenden edhe në vendimin e gjykatës për caktim të paraburgimit.
Dosja hetimore në këtë rast është publikuar thuajse e tëra në Insajder. Aty përmenden edhe emrat e këtyre dëshmitarëve.
Por, një muaj më vonë, gjyqtarja Jeniffer Sill, bazuar në kërkesën e prokurorit Danilo Ceccarelli që identiteti i këtyre dy dëshmitarëve të jetë i mbyllur. Këtë e kanë arsyetuar me rrezikun që u kanoset prej Azem Sylës dhe të tjerëve të cilët tashmë janë në dijeni se kush janë dëshmitarët kundër tyre.
Tash e tutje kushdo që ua përmend emrat publikisht këtyre dy dëshmitarëve, rrezikon të dënohet me burgi. Identiteti i tyre mbrohet me vendim gjykate.
“Edhe nëse identiteti i dëshmitarëve në këtë fazë tashmë mund të jetë i njohur për një pjesë të të pandehurve dhe avokatëve mbrojtës, e madje ai ka mundur që të diskutohet edhe në publik, gjykata e sheh të përshtatshme që të parandalojë çdo diskutim të mëtutjeshëm publik lidhur me identitetin e dëshmitarëve”, thuhet në vendimin e gjykatës që e ka Insajderi, e që ka të bëjë me caktimin e njëzetenjë seanca të mbyllura hetimore për të intervistuar këta dy dëshmitarë.
Prokuroria nuk ka dhënë përgjigje se cili është efekti mbrojtës, që tash e tutje mos të përmenden emrat e dëshmitarëve që janë zbuluar nga vetë prokurori. Nuk ka folur se pse Prokuroria nuk e kanë vlerësuar me kohë rrezikun për këta dëshmitarë. Po ashtu nuk ka folur nëse mbanë përgjegjësi në rast se këta dëshmitarë cenohen në çfarëdo forme.
“Ju informoj se prokuroria nuk mund të komentojë hetimet dhe çështjet që ndërlidhen me mbrojtjen e dëshmitarëve”, ka thënë Prokuroria e Shtetit në një përgjigje me shkrim për Insajderin.
Avokati i Azem Sylës, Tomë Gashi ka thënë për Insajderin se prokurori që fillimisht vetë i ka bërë publik emrat e dëshmitarëve të mbrojtur, e ka njoftuar mbrojtjen të premten se marrja në pyetje dy dëshmitarëve në procedurën e hetimit të veçantë, do të fillojë të martën në Gjykatën Themelore në Prishtinë dhe se identiteti id ëshmitarëve është i mbrojtur.
“Mendoj se prokurori me këtë vetëm dëshiron që eventualisht në të ardhmen përgjegjësinë për dekonspirimin eventual të dëshmitarëve të cilët ai i ka përmendur me emër dhe mbiemër gjatë kësaj procedure, ta fajësojë dike prej avokatëve sepse të pandehurve nuk ka çka t’ju bëjë”, ka thënë Gashi.
Ndërkoë, sot prej orës 9 e 30 ka filluar marrja në pyetje e këtyre dy dëshmitarëve nga prokurori, gjyqtarja dhe avokatët mbrojtës në kuadër të hetuesisë së veçantë.
Në vendimin për miratimin e kërkesës së prokurorit për hetuesi të veçantë që ka siguruar Insajderi, përmenden arsyet se pse duhet të merren dëshmitë e këtyre dëshmitarëve tash, duke mos e pritur nisjen e procesit gjyqësor.
Gjyqtarja thotë se rreziku për këta dëshmitarë është në nivelin më të lartë. Pos kësaj, njëri prej këtyre dy dëshmitarëve pritet të largohet nga Kosova për shkak se siç thuhet është futur në programin e mbrojtjes së dëshmitarëve.
Ish-deputeti Azem Syla është nën hetime për krim të organizuar e shpëlarje parash. Ai ndodhet në paraburgim prej një muaji. Prokuroria pretendon se bazuar në rezultatet hetimore të deritashme, deputeti Azem Syla, ka organizuar, i financuar dhe mbikëqyrur një grup kriminal.
Syla, së bashku me Fahredin Gashin, dyshohet se kanë fituar pronësi në mënyrë të paligjshme të dhjetëra hektarëve tokë të shtetit në vlerë mbi 30 milion euro.
Grupi pretendohet se ka nisur veprimtarinë që nga viti 2006.
Prokuroria pretendon se ngastrat e tokës të përvetësuara në mënyrë të paligjshme, dekada më parë ishin shpronësuar nga prona private dhe ishin bërë të shtetit. KBI Kosova Export, menaxhonte me to.
Pas luftës, këto prona në mënyrë të paligjshme – me vendime gjyqësore të paligjshme dhe me dokumente fals, janë bartur në emra të pronarëve të vjetër. Mirëpo, ata pronarë nuk kanë ditur fare për këtë. Në këtë mënyrë, pronat janë shitur pronarëve të rinj shqiptarë.
Prokuroria pretendon se dëshmitarët janë tepër të rrezikuar.
“Dëshmitari 1 ishte shpallur dëshmitar bashkëpunues në nëntor të vitit 2015. Prokurori potencon se deri më tani ky dëshmitar ka dhënë gjashtë intervista dhe se dëshmia e dhënë nga ky dëshmitar gjatë bashkëpunimit të tij është absolutisht vendimtare”, thuhet në vendim.
Sipas prokurorit statusi i rrezikut për dëshmitarin bashkëpunues formalisht është vlerësuar të jetë në nivelin më të lartë dhe kjo përbën një rrezik të madh se dëshmia e tij nuk do të mund të jetë në dispozicion në shqyrtimin gjyqësor. /Insajderi.com
Këshilli për Mbrojtjen e të Drejtave dhe Lirive të Njeriut ka reaguar në lidhje me rastet e arrestimeve në Kosovë, ku ata persona po portretizohen nga opinioni si kriminel, ende pa përfunduar proceset gjyqësore për ta.
KMDLNj, duke përmendur rastin e Azem Sylës, thotë se ish-shefi i Shtabit të Përgjithshëm të UÇK-së mori epitete kriminale nga më të ndryshmet, ende pa filluar procesi gjyqsor ndaj tij.
Sipas KMDLNJ arrestimet e fundit e të dyshuarve për vepra të rënda të penale në krye me Azem Sylën, paraqet shkelje të të gjitha neneve të Deklaratës Universale për të Drejtat e Njeriut të Kombeve të Bashkuara , Konventës Evropiane për të Drejtat e Njeriut dhe Kushtetutës së Kosovës shkaku se të arrestuarit janë portretizuar si kriminelë të rrezikshëm, pa përfunduar hetimet e na të flasim për një vendim gjyqësor që dëshmohet fajësia e të arrestuarve të dyshuar e të cilët ende nuk e kanë një aktakuzë të ngritur.
“’Grupi i rrezikshëm kriminal, kriminelët që kanë bashkëpunuar me Serbinë, komandantë të Çagllavicës, Graçanicës ,etj; ata që e rrezikojnë jetën e dëshmitarëve të mbrojtur, etj ….’ këto janë cilësime që drejtpërdrejtë ndikojnë në procesin e hetimeve , bëjnë presion te hetuesit duke paragjyk uar fajësinë e të arrestuarve ende pa përfunduar hetimet dhe pa një vendim të një gjykate. Prokuroria e EULEX – it kërkon katër muaj paraburgim sikur edhe një proces të veçantë hetimor ndaj Azem Sylës shkaku se po u rrezikuakan dëshmitarët e mbrojtur. Këto janë sinjale të qarta se vështirë se do të ketë një proces të rregullt , të paanshëm , të pandikuar politikisht dhe të drejtë një atmosferë të linçimit publik të arrestuarve që tashmë duket se janë shpallur fajtorë”, thuhet ndër të tjera në reagim.
KMLDNj rikujton raste nga e kaluara ku njejtë të akuzuarit linçoheshin në opinion, ndërsa ata në fund të proceseve gjyqësore shpalleshin të pafajshëm.
“Vetëm vendimi i formës së prerë i gjykatave përkatëse, pas administrimit të provave, krijimit të kushteve për mbrojtje efektive të të akuzuarve, mund të vendosë për fajësinë apo pafajësinë e të akuzuarve. Kështu ndodh në vendet demokratike nga vijnë prokurorët dhe gjykatësit e EULEX – it dhe atje mbrohet dinjiteti i të arrestuarve por edhe i të dënuarve kurse fushata linçuese përmes medieve do të llogaritej si e papranueshme. Në Kosovë ndërkombëtarët e testojnë opinionin duke i furnizuar disa medie me informata sensacionale sikur rasti i prokurorit Vrejsvik që deklaronte se Limaj i ka shpërdorur 80 milionë euro. Apo akuzat për rastin ‘Kleçka’ . Apo rasti i ish guvernatorit Rexhepi, drejtorit të Bankës Milazim Abazi e shumë raste të tjera që përfunduan në pafajësinë e plotë të të akuzuarve pasi që iu shkaktuan vuajtje të mëdha shpirtërore dhe fizikie , atyre dhe familjeve të tyre dhe pasi ua rrënuar krejtësisht karrierat duke i dëmtuar profesionalisht dhe moralisht”, thuhet në reagim.
Në Pallatin e Drejtësisë është duke u mbajtur një seancë ndaj Azem Sylës dhe të tjerëve.
Burime të “Zërit” bëjnë të ditur se prokurori i rastit ka kërkuar hetim të posaçëm ndaj të dyshuarave në rastin e tjetërsimit të pronave.
Të dyshuar në këtë rast janë 52 persona ndër ta edhe ish-deputeti i PDK-së, Azem Syla, dhe ish-kryetari i Gjykatës Komunale të Prishtinës, Nuhi Uka.
Azem Sylës dhe Nuhi Ukës para disa ditësh u është vazhduar masa e paraburgimit edhe për nga tre muaj nga gjyqtarja e procedurës paraprake.
Prokuroria pretendon se të dyshuarit kanë tjetërsuar prona shtetërore në mënyrë joligjore në regjionin.
Mitrovicë
Një raund i bisedimeve në Bruksel për çështje teknike ka ritheksuar dallimet ndërmjet palëve dhe ka ngritur shqetësime të reja për vazhdimin e dialogut, që duhet të çojë në normalizim të marrëdhënieve ndërmjet dy vendeve.
Në Beograd, ndërkaq, janë shtuar zërat se në pamundësi të arritjes së një marrëveshjeje për çështjen e asociacionit të komunave me shumicë serbe, Serbia do ta shfrytëzojë për shpalljen e njëanshme të bashkësisë së komunave.
Dushan Janjiqi, nga Forumi për Marrëdhënie Etnike, i tha Radios Evropa e Lirë, se muaji korrik është afati i fundit për përfundimin e punës në hartimin e statutit të Asociacionit dhe në rast të mos përmbushjes së këtij afati ka rrezik që Serbia të ecë një hap përpara.
“Bashkësia ndërkombëtare druan se Beogradi ka përgatitur një skenar për vetëshpalljen e bashkësisë së komunave. Kjo do të thotë se, për shkak të pakënaqësisë me ngadalësinë e procesit, bashkësitë e komunave të vetëshpallen dhe të konstituohen.”
“Kjo do të jetë sfida më e madhe e këtyre bisedave teknike. Nëse në nivelin e ekspertëve vlerësohet se kjo frikë nuk është e arsyeshme atëherë me siguri më fillimin e qershorit, menjëherë pas krijimit të qeverisë së Serbisë, do të pasojë takimi i kryeministrave Vuëiq e Mustafa, që do të zhbllokojë çështjen e bashkësisë së komunave”, tha Janjiq.
Por, për ministren për dialog të Qeverisë së Kosovës, Edita Tahiri, vetëshpallja e bashkësisë së komunave është një hap i pamundur dhe ritheksoi faktin se Serbia në të kaluarën ka bërë hapa të njëanshëm me të cilët, siç tha, ka shkelur Marrëveshjen e Brukselit.
“Serbia e ka parasysh se pa i plotësuar të gjitha marrëveshjet e Brukselit mund t’ia bllokojë vetes rrugën për në BE”, tha Edita Tahiri për Radion Evropa e Lirë.
Çështja e strukturave paralele në veri të Kosovës, ndërkohë, ka bllokuar procesin e bisedimeve, duke krijuar hendek më të thellë mes palëve dhe duke pamundësuar edhe zbatimin e një numri marrëveshjesh, posaçërisht asaj për Asociacionin e Komnave me shumicë serbe. Për palën e Kosovës strukturat paralele duhet të zhbëhen për t’i hapur rrugën zbatimit të plotë të të gjitha marrëveshjeve, në veçanti për Asociacionin.
Për Serbinë, ndërkaq, themelimi i Asociacionit duhet të ketë një afat të përcaktuar kohor. Ndërkohë, kryetari i Listës Serbe në Kosovë, Slavko Simiq, i tha Radio Evropa e Lirë se Asociacioni i komunave serbe është i domosdoshëm sepse, sipas tij, nënkupton mbijetesë për popullatës serbe dhe është një çelës i marrëveshjes së Brukselit….
“Na duhet dialog, na duhet pak më shumë durim dhe të bëhet një presion mbi përfaqësuesit ndërkombëtarë, mbi bashkësinë ndërkombëtare dhe institucionet ndërkombëtare, që së bashku me shqiptarët të fillojmë sa më shpejt krijimin e bashkësisë së komunave serbe”, tha Simic.
Ndryshe, Asociacioni ngriti kundërshtimet e fuqishme në skenën politike në Kosovë, me opozitën që nuk lejoi mbajtjen e seancave të Kuvendit, duke përdorur gazin lotsjellës, situatë kjo që çoi drejt një vendimi të Gjykatës Kushtetuese për shpërputhjen e statutit të Asociacionit me Kushtetutën.
Zhbërja e strukturave paralele, ndërkaq, është bërë çështje më e komplikuar, për faktin se strukturat koordinuese të krijuara nga Beogradi zyrtar që më 2013, për të ndihmuar në integrim në institucionet komunale të Kosovës, janë shndërruar në struktura poashtu paralele.
Takimi i nivelit të kryeministrave mendohet se do të zhbllokojë gjithë procesin, por për këtë nevojitet krijimi i qeverisë në Serbi dhe njëkohësisht edhe qetësimi i situatës në Kosovë. (REL)
Lidhja e Historianëve të Kosovës “Ali Hadri” dega në Deçan, ka përpiluar një marrëveshje mirëkuptimi përmes së cilës do të mund të zgjidhej problemi në mes të Komunës dhe banorëve të Deçanit me Manastirin e Deçanit.
Pas vendimit të Gjykatës Kushtetuese në favor të Manastirit për tokat rreth tij dhe dy ndërmarrjet “Apiko” dhe “Iliria”, të cilat komuna dhe banorët besojnë se janë pronë e tyre, historianët e Deçanit kanë përpiluar një dokument-marrëveshje që do të zgjidhte kontestin e kahmotshëm.
Ky dokument-marrëveshje, të cilin e ka Klan Kosova, kërkon nga Manastiri i Deçanit, “që t’u jap fund pretendimeve pronësore ndaj pronave publike-shoqërore të dy Ndërmarrjeve ‘Apiko’ dhe ‘Iliria’ dhe pronave të tjera private afër territorit të saj”.
Historianët deçanas thirren në një vendim të Gjykatës Komunale të Deçanit të viti 2002.
Sipas këtij vendimi, kur këto toka dhe dy ndërmarrjet i ishin dhënë Manastirit të Deçanit nga Republika e Serbisë gjithçka kishte ndodhur në kohën e masave të dhunshme.
“Prandaj Gjykata konstaton se kontrata e lidhur në mes të paditurit të parë, Manastirit të Deçanit dhe të paditurit të tretë, Republikës së Serbisë, është e pavlefshme dhe e kundërligjshme, pasi që i padituri i tretë ia ka dhuruar të paditurit të parë palujatshmërinë, që nuk i takon atij por që është pronë e NSH-së dhe punëtorëve të saj. Gjykata gjithashtu vëren se i padituri i dytë Komuna e Deçanit nuk e ka kontestuar padinë dhe se e ka pranuar atë”.
Por, përse do të pranonte Manastiri i Deçanit një marrëveshje të tillë dhe heqjen dorë nga tokat të cilat tashmë i ka në pronësi edhe me ligjet e Kosovës?
Dega e historianëve në dokumentin e përpiluar ka renditur edhe favorizimit që Manastiri do të kishte nga Komuna në qoftë se e pranon këtë marrëveshje.
Nëse krerët e Manastirit pajtohen me këtë propozim-marrëveshje atëherë komuna e Deçanit duhet jetë e gatshme të plotësojë nevojat e komunitetit që jeton në manastir, po ashtu edhe të plotësojë kërkesat e Manastirit.
Po që se këtë marrëveshje pajtohen ta nënshkruajnë Komuna e Deçanit dhe Manastiri i Deçanit atëherë garantues të saj do të jenë Qeverinë e Kosovës dhe Ambasadat e Quintit, njofton Klan Kosova.
Një përgjigje për këtë propozim ende nuk e kanë dhënë as nga Komuna e Deçanit e as nga Manastiri.
Diaspora ka qenë dhe do të vazhdon të mbetet e një rëndësie të veçantë për zhvillimin ekonomik të Kosovës. Kështu u tha në konferencën “Diaspora-investimet dhe punësimi” që po mbahet në Prishtinë.
Pos prezantimit të projekteve për investime, në konferencë po debatohet edhe për mundësitë që ofron legjislatura e re në Gjermani, si shans real i punësimit të qytetarëve të Kosovës në këtë shtet, por edhe specifika të veçanta për çështje që ndërlidhen direkt me avancimin dhe përgatitjen profesionale të të rinjve në vendin tonë.
Kosova për çdo vit pranon nga 600 deri 700 milionë euro nga diaspora, dhe sipas folësve në këtë konferencë këto mjete duhet edhe të kanalizohen në investime në Kosovë.
Ministrja e Tregtisë dhe Industrisë Hykmete Bajrami duke folur për reformat fiskale tregoi se ka përmirësime në fushën e të bërit biznes. Edhe ambasadorja gjermane në Kosovë Angelika Viets çmoi lart kontributin e diasporës për Kosovën e cila tha se në dy vitet e ardhshme Kosova do të ketë një rritje ekonomike deri 4 për qind.
Ministria e Punëve të Jashtme është në pritje të konfirmimit për t’u bërë anëtare e 110-të e Konventës së Apostiles, një vulë e standardizuar që duke u vendosur në një dokument nga autoriteti kompetent i një shteti e bën atë të vlefshëm edhe për shtetet e tjera që kanë nënshkruar konventën.
Por kundërshtime dhe distancim nga implikimet bilaterale që dalin prej konventës tashmë kanë shprehur edhe shtete, të cilat e kanë njohur Republikën e Kosovës, shkruan sot Koha Ditore.
Gjermania, Austria e Polonia kanë përjashtuar veten nga obligimet e ndërsjella edhe nëse Kosova pranohet, me arsyetimin se dokumentet nuk janë të sigurta.
Kundërshti kanë shprehur edhe disa vende të tjera në krye me Serbinë.
Regjimet të cilat më shumë janë autokratike, për ta mbajtur pushtetin sa më gjatë shantazhojnë dhe prodhojnë kriza të ndryshme në vazhdimësi. Tjetër. Tentojnë që nepërmjet mediave që i kontrollojnë të krijojnë opinion krejt ndryshe, se gjoja opozita është ajo e cila po e rrezikon shtetin, dhe prodhojnë gjithashtu armiq të brendshem dhe të jashtëm. Edhe Kosova nuk është imune karshi veprimeve të tilla edhe pse është shtet në formim e sipër. Grupet e caktuara të oligarkisë pushtetare po i japin të rëna qetësisë së qytetarëve.
Kjo në të shumtën e rasteve bëhët për ta zhvendosur vëmendjen e opinionit të gjerë publik nga problemet madhore ekonomike dhe politike më të cilat po përballet vendi. Ngjarjet në Parlament dhe protestat në rrugët e Prishtinës, të bllokut Opozitarë, përpos kërkesave për anulimin e dy marrveshjeve asaj të Demarkacionit dhe të Zajednicës, ishin edhe luftë propagandistike, së cili taborr politikë do ta mund tjetrin. Ne këtë dy luftim po përdorët i tërë arsenali propagandistik dy palësh duke kërkuar në fund edhe fituesin.
Grupacioni politik në pushtet nga frika së mund tu luhatën pozitat pushtetare, gjendjën e krijuar politike dhe krizën institucionale, po e paraqisin si shumë të rrezikshme për shtetin, duke i identifikuar me ineteresat nacionale, edhe pse në fakt situata aktuale politike nuk e përcakton shkallën e rrezikshmerisë të shtetit. Në Parlament dhe në demonstrata kemi pasur elemente të dhunës nga Pozita dhe nga Opozita, ku secila palë pas secilës ndodhi ka paraqitur edhe arsyetimet e veta. Si gjithmonë oligarkia në pushtet mbrohet më argumentin e rrezikshmerisë së gjendjës së përgjithshme, duke bërë përpjekje ta bindin opinion, për ti arsyetuar veprimet e dhunës policore karshi protestuesve.
Më shumë u lanqua propagandë nga ana e pushtetit, për ta kthyer ate në argument. Deri diku me të njejat metoda u shërbye edhe blloku opozitarë kur bëhët fjalë për elementet e dhunës së shpërfaqur, së kërkesat e tyre politike ishin dhe dolën shumë të drejta. Vendimi Gjykatës Kushtetuese e vertetoi këtë. Arsenali propagandistik është vu në levizje edhe kohën fundit. Po dalin njerëz të cilët po adresojnë akuza të rënda karshi strukturave të larta në PDK-së të cilët gjinden në hiearkinë më të lartë të shtetit. Këto akuza lidhen me vrasje të bashkëveprimtarëve të tyre, lidhën më sabotim të luftës qlirimare, lidhen me keqperdorime të mëdha deri në tradhëti kombëtare. Të gjitha këto akuza mediatike të adresuara, e organet tona po bëjnë sehirë du ke mos marre asnjë veprim ndaj atyre të cilët janë përfolur.
Së këto përfolje mund të jenë të sakëta, flet edhe e dhëna së pikërisht të përfolurit krejt paslufën keqpërdorën pozitën e tyre në shoqëri. Kur gjendja e krizës insitucionale vazhdon kaq gjatë, secili pushtet në secilin shtet demokratik do të kishte marrë vendime të arsyeshme. Kjo tek ne nuk po ndodhë sepse grupet politiko–financiare nuk dëshirojë ti lëshojnë pozitat e tyre, duke tentuar ti mbrojnë pasuritë e pa ligjshme, e disa të krijojnë imunitet pushtetarë karshi Gjykatës Speciale. Kur jemi të Gjykata, po bëhën gjithëfarë skenarësh, të cilat skenare kan për qëllim ta mbajnë situatën politike jo stabile, që të abrogohet disi puna e kësaj gjykate.
Kjo kryneqësi e kastës në pushtet është metodë tipike staliniste, Ndërkombëtaret kan filluar më e kuptuar lojën e atyre te cilët duhet të largohen nga skena jonë politike. Pragmatizmi politik është i nevojshem si kurrë më parë. Qetësia në rajon nuk mbahet më njerëz të inkriminuar në vepra të ndryshme kriminale, dhe as më struktura politike me logjikë të sistemit të kaluar. Të krijohet një ambient i përshtatshem politik për debatimin e atyre temave të cilat edhe e prun krizën institucionale. Të gjitha problemet zgjidhen duke u ballafaquar me to, jo duke iu ikur atyre. Mos të na ndodh që edhe kët vit të jemi të mashtruar dhe të demoralizuar sikurse ishim gjatë vitit që e lamë mbrapa. Ose disi të mbijetojmë, deri atë ditë kur do ta kemi një pushtet meritorë
Një shtetas i Shqipërisë është arrestuar në Gjakovë, pasi në veturën e tij janë gjetur dhe konfiskuar dhjetë paketime që dyshohet që janë të mbushura me narkotikë të llojit marihuanë.
Për këtë rast Policia e Kosovës ka konfirmuar sa kanë konfiskuar edhe tri vetura që dyshohet se janë shfrytëzuar për trafikimin e narkotikëve.
“Është arrestuar i dyshuari mashkull shqiptar shtetas i Shqipërisë, pasi që gjate kontrollit në veturë i janë gjetur dhe konfiskuar 10 paketime që dyshohet të jenë të mbushura me substancë te dyshuar narkotike të llojit Marihuanë. Lidhur me rastin janë konfiskuar edhe tre vetura qe dyshohet se janë shfrytëzuar për trafikimin e narkotikeve”, ka njoftuar Policia.
Në Komisionin për Integrime Evropiane, të martën do të flasë Murat Meha – kryesuesi i Komisionit Shterëror për Shënjimin e Vijës Kufitare ndërmjet Kosovës dhe Malit të Zi, lidhur me demarkacionin e kufirit me Malin e Zi.
Kjo u bë e ditur nga agjenda e Kuvendit të Kosovës ku shihet se Murat Meha do të jetë pjesë e mbledhjes së Komisionit për Integrime Evropiane të datës 31 maj 2016.
