Enti për Statistikë i Gjermanisë (Destatis) njoftoi se aeroportet gjermane vitin e kaluar realizuan rritje të numrit të pasagjerëve për 3.4 përqind në krahasim me vitin 2015

FRANKFURT – Aeroportet në Gjermani vitin e kaluar kanë realizuar qarkullim rekord gjithsej 111.9 milionë pasagjerë. Enti për Statistikë i Gjermanisë (Destatis) njoftoi se aeroportet gjermane vitin e kaluar realizuan rritje të numrit të pasagjerëve për 3.4 përqind në krahasim me vitin 2015 dhe realizuan qarkullim rekord.

Në linjat e jashtme vitin e kaluar nga aeroportet gjermane kanë fluturuar 88.2 milionë pasagjerë, që është për 3.6 përqind më shumë se në krahasim me një vjet më herët, ndërsa në linjat e avionëve brenda Gjermanisë kanë fluturuar 23.7 milionë njerëz, ndërsa edhe kjo është rritje prej 2.8 përqind në krahasim me vitin paraprak.

Më së shumti pasagjerë nga aeroportet gjermane kanë fluturuar në drejtim të Spanjës, ndërsa rritje më e madhe e pasagjerëve vitin e kaluar është realizuar në linjat drejt Tajlandës edhe atë për 26.3 përqind. aa

Drejtoresha për Ballkanin Perëndimor në Komisionin Europian, Genoveva Ruiz Calavera, e cila kryeson edhe misionin e Operacionit Ndërkombëtar të Monitorimit i ka dërguar një letër të gjithë atyre që kanë shprehur shqetësim për rolin e ONM.

Në letrën e saj theksohet se bordi drejtues i ONM ka natyrë të qartë administrative. “Bordi ka qëllim të lehtësojë punën e përbashkët të KE dhe qeverisë së SHBA. Të gjitha vendimet ekzekutive i përkasin institucioneve në Shqipëri”, theksohet në letrën e saj.

“Grupi i ONM ka natyrë të pastër administrative. Detyra e tij nën udhëheqjen time mund të krahasohet me atë të njësisë së menaxhimit të projektit qëllimi i së cilës është të lehtësojë dhe të bashkojë punën e Komisionit Europian dhe të qeverisë së SHBA.

Së dyti më lejoni të theksoj se të gjitha rekomandimet në lidhje me zgjedhjen e kandidatëve për formimin e organeve të Vettingut dhe e ardhmja e procesit të Vettingut do të jetë nën mbikëqyrjen e vëzhguesve ndërkombëtar ose do të emërohet nga ONM. Më lejoni të nënvizoj se ONM është një strukturë jo ekzekutive, detyra e të cilës është vetëm të monitorojë dhe të sigurojë rekomandimet përmes procesit të Vetingutt. Të gjitha vendimet ekzekutive i takojnë institucioneve ekzekutive të Shqipërisë”.

Së fundmi për të lehtësuar komunikimin dhe për të shmangur cdo lloj konfuzioni në të ardhmen sa i përket ONM do t’i referohem vetëm shkëmbimeve zyrtare”, thotë Calavera duke mbyllur letrën.

Gjatë dy javëve të fundit ministri i Drejtësisë, Petrit Vasili ka shkruar dy letra për institucione kryesore në vend ku thekson se bordi i OMN cënon besueshmërinë e reformës në drejtësi.

Në letrën e dërguar në 20 shkurt Presidentit, Kryetarit të Kuvendit, kryeministrit dhe dy ambasadorëve, Lu e Vllahutin, ministri Vasili vlerëson se ka shkelje të Kushtetutës në marrëveshjen me qeverinë, për sa kohë ajo është nismë e paautorizuar nga qeveria e Sekretarit të Përgjithshëm të Këshillit të Ministrave.

PARIS – Ndërkohë që në Francë po afrojnë zgjedhjet presidencale, fushata elektorale po vazhdon me gjithë shpejtësinë e saj. Liderja e partisë radikale të djathë, Marine Le Pen e cila në sondazhet e fundit duket se kryeson garën përgatitet për një miting në Nantes, ndërsa protestuesit në këtë qytet të cilët kundërshtojnë Le Pen janë përplasur me policinë.

Njoftimi është bërë i ditur nga Ministria franceze e Punëve të Brendshme. Në një deklaratë me shkrim kjo ministri thotë se një grup prej 2 mijë personash kanë organizuar një protestë me qëllim pengimin e mitingut të Le Pen në qytetin Nantes. Grupi i protesutesve thuhet se përbëhej nga të majtë dhe radikalë të majtë.

Protestuesit mbanin në duar pankarta si, “Nuk mund të kalojë fashizmi”, etj. Në deklaratën e ministrisë thuhet se protestuesit kanë sulmuar bizneset dhe kanë bllokuar rrugët duke mos lejuar kalimin e automjeteve dhe tramvait. Ndërsa pas përshkallëzimit të situatës policia ka përdorur gaz lotsjellës. Në deklaratën me shkrim thuhet gjithashtu se në këto ngjarje të paktën 11 efektivë kanë mbetur të plagosur, ndërsa janë arrestuar 4 persona.

Nga ana tjetër Kryeministri i vendit, Bernard Cazeneuve, ka deklaruar se do të nisë një fushatë kundër partisë radikale të djathtë. “Është detyra ime të tregoj qytetarëve që fushtata e radikalëve të djathtë është e mbushur me gënjeshtra dhe është një rrugë pa krye”, ka thënë ai. Ndërsa në një deklaratë për gazetën JDD, ai është shprehur: “Do të jetë shumë vonë kur populli të kuptojë gënjeshtrat. Dëmi që do të shkaktohet do të jetë i pallogaritshëm”. aa

Edhe pse nuk pritej nga ekspertët e ekonomisë botërore dhe nag parashikimet e Fondit Monetar Ndërkombëtar, Gjermania ka parakaluar Britaninë e Madhe si vendi me ekonominë me rritjen më të shpejtë në mesin e shteteve brenda grupit G7, ku bëjnë pjesë edhe Kanadaja, Italia, Franca, Japonia, e Shtetet e Bashkuara të Amerikës, shkruan “The Guardian”. Gjatë vitit 2016, ekonomia gjermane shënoi rritje me 1.9 përqind, duke e zhvendosur Britaninë në vendin e dytë më 1.8 përqind rritje. Në katër mujorin e fundit të vitit 2016, ekonomia në Gjermani u rrit me 0.4 përqind, kryesisht për shkak të rritjes së konsumit dhe shpenzimeve nga qeveria.

Kështu, Gjermania i ka nxjerrë si të gabuara edhe parashikimet e Fondit Monetar Ndërkombëtar, fond ky që e kishte cilësuar ekonominë britanike si më të fortë, edhe për nga shpejtësia e rritjes brenda vitit 2016.

Fleckenstein, raportues për Shqipërinë në PE
“3 qëllimet që më sollën në Tiranë”
“Zgjedhjet, çelësi për negociatat”
“Sjellim më shumë vëzhgues të huaj”

TIRANE-Pak para mberritjes në Shqipëri, eurodeputeti gjerman Knut Fleckenstein, raportues për Shqipërinë në Parlamentin Europian thotë për Deutsche Welle-n, se zgjedhjet e qershorit janë moment kyç për hapjen e bisedimeve.

“Nëse këto zgjedhje nuk zhvillohen me korrektesë, atëherë do të ketë një problem për hapjen e negociatave me BE-në. Prandaj do të varet shumë nga ajo se sa palët në zgjedhje do t’i respektojnë rregullat e lojës që njihen në Europë për zgjedhje të lira e të ndershme”, shprehet raportuesi për Shqipërinë në Parlamentin Europian duke komentuar edhe protestën e opozitës me çadra para kryeministrisë.

Sipas tij, opozita shqiptare kushdo qoftë ka gjithmonë frikë para zgjedhjeve. Por sesa realiste është kjo frikë e PD, Knut Fleckenstein thotë se; “Për këtë dua të krijoj një përshtypje, kur të jem këto ditë në Shqipëri”.

Lidhur me shqetësimin e madh te opozites per blerjen e votave, sipas saj me paratë e drogës dhe krimit, raportuesi thekson: Po, por kjo akuzë duhet të provohet fillimisht, e është gjithmonë e vështirë ta bësh këtë para zgjedhjeve.

Eurodeputeti gjerman Knut Fleckenstein zbardh 3 qëllimet që e sjellin sot në Tiranë.

Zoti Fleckenstein, cili është qëllimi i vizitës suaj sot në Tiranë?

Qëllimi është i trefishtë, së pari Parlamenti Europian sapo ka miratuar raportin e përgatitur prej meje. Për mua është e rëndësishme të flas me të gjithë aktorët aty, si shoqërinë civile ashtu edhe në politikë për të diskutuar për ato që thotë parlamenti. Këtë e pason qëllimi i dytë, natyrisht zbatimi konkret i reformës në drejtësi, kaq e rëndësishme për vendin, me qëllim që në vjeshtë të fillojmë, me shpresë, bisedimet e anëtarësimit. E treta lidhet me pritshmëritë tona lidhur me zgjedhjet, e në këtë kontekst do të kem me vete edhe rekomandimet e ODHIR-it.

Pas raportit tuaj duken se shanset janë shumë të mira…apo priten edhe zgjedhjet…

Po qe se fillohet me zbatimin e reformës në drejtësi, pra nëse vihet në lëvizje procesi i vetingut, shanset janë, sepse gati të gjitha fraksionet në parlament e kanë mirëpranuar se qeveria shqiptare dhe parlamenti kanë bërë shumë kohë e fundit për t’u zhvilluar në drejtim të Bashkimit Europian.

…por opozita në Shqipëri nuk e sheh kështu gjendjen. Të shtunën filluan protestat e opozitës që kërkojnë largimin e Ramës dhe qeveri teknike. Si i shikoni këto protesta. Opozita duket se nuk ka aspak besim tek kjo qeveri për zgjedhje të lira…

Opozita e ka gjithmonë një frikë të tillë para zgjedhjeve. Se sa realiste është kjo, për këtë dua të krijoj një përshtypje, kur të jem këto ditë në Shqipëri. Sigurisht do të takoj edhe përfaqësues të opozitës.

Palët politike nuk e gjetën gjuhën e duhur për reformën zgjedhore para zgjedhjeve. Problemet e zgjedhjeve e kanë shoqëruar demokracinë në Shqipëri gjithmonë, por kësaj here opozita ngre shqetësim të madh blerjen e votave, sipas saj me paratë e drogës dhe krimit. Këto janë akuza shumë të rënda…

Po, por kjo akuzë duhet të provohet fillimisht, e është gjithmonë e vështirë ta bësh këtë para zgjedhjeve. Por të gjithë ata që marrin pjesë në këto zgjedhje duhet ta dinë, se nëse këto zgjedhje nuk zhvillohen me korrektesë, atëherë do të ketë një problem për hapjen e negociatave me BE-në. Prandaj do të varet shumë nga ajo se sa palët në zgjedhje do t’i respektojnë rregullat e lojës që njihen në Europë për zgjedhje të lira e të ndershme.

Ky pretendim është i vjetër sa demokracia në Shqipëri, të dyja palët thonë duam zgjedhje të lira, të dyja akuzojnë njëra-tjetrën se nuk i respektojnë rregullat e lojës, se kanë bërë manipulime…

Po, e vërtetë, por duhet të themi se me kalimin e viteve ka pasur përmirësime, kësaj here është shumë e rëndësishme, prandaj do të dërgohen edhe shumë vëzhgues zgjedhorë nga vetë vendi, por edhe vëzhgues të huaj, të cilët do të ndjekin me shumë  kujdes se çfarë do të ndodhë para zgjedhjeve e në ditën e zgjedhjeve.

Pra vlerësimi i zgjedhjeve është moment vendimtar…

Natyrisht kjo është shumë e rëndësishme, nuk mund të fillosh me implementimin e reformës në drejtësi dhe të bësh zgjedhje jo demokratike dhe jo duke respektuar kriteret ligjore. Kjo do të ishte një shenjë, se Shqipëria nuk është ende gati për fillimin e bisedimeve të anëtarësimit. Është e rëndësishme që në lista të mos gjenden kandidatë me të shkuar kriminale, të mos blihen votat. Para të atyre që kultivojnë drogën ka, këtë e di, por ato nuk duhet të përdoren për gjëra të tilla. Por kam edhe dyshime që ky është një problem vetëm i njërës anë./Deutsche Welle
–

Mijëra rumunë, për të 20-tën natë me radhë, kanë protestuar kundër qeverisë, pavarësisht shiut të furishëm.

Organizatorët thanë se 3,000 protestues janë mbledhur në Bukuresht dhe 3,000 të tjerë në qytetin e dytë më të madh, Cluj.

Protestat fillimisht kanë nisur kundër një dekreti të qeverisë, i cili, sipas kritikëve, do të dobësonte ligjet anti-korrupsion dhe do t’iu shkonte përshtati aleatëve të qeverisë.

Qeveria shfuqizoi dekretin më 5 shkurt, por shumë protestues kanë mbetur në rrugë, duke kërkuar dorëheqjen e kryeministrit Sorin Grindeanut, i cili ka marrë postin vetëm muajin e kaluar.

Pavarësisht protestuave, Grindeanu refuzon të japë dorëheqje.

INTERVISTË ME JOSCHKA FISCHER

Marrë nga Paolo Valentino ( i dërguari i “Corriere della Sera” në Berlin)/

Përktheu: Eugjen Merlika

Dy vjet më parë, Joschka Fischer shkrojti një libër me titullin apokaliptik : “Nëse Evropa do të dështonte?”. E pyes ish ministrin e jashtëm gjerman nëse sot jemi më pranë apo më larg humnerës. “Nuk kemi qënë kurrë më pranë dështimit. Por mundësitë e vënies përsëri në ecje, janë më të mëdha se atëherë, nëse evropianët do të mbeten  bashkë dhe do të hedhin një etapë të re të projektit të përbashkët. Në këtë kuptim jam i kënaqur, por vetëm pjesërisht.”

A ka qenë zgjedhja e Trump-it për t’i u bërë të ndërroni mendim ? Ju keni folur për rrezikun  e “perëndimit të Perëndimit”.

“Është e vërtetë por nuk nënkuptonja Perëndimin e lindur në Mesdhe. Bëja fjalë për Perëndimin, botën transatllanike të ngritur mbas luftës së Dytë botërore e thyerjes së nazizmit, të themeluar mbi lidhjen mes Amerikës, Evropës perëndimore dhe Kanadasë dhe mbi garancinë e sigurisë së dhënë aleatëve nga SH.B.A.. Donald Trump, me moton e tij America First shënon konkretisht heqjen dorë dhe shkatërrimin e mundshëm t’asaj bote : ve në diskutim Nato-n, i kthen shpinën tregëtisë së lirë, gërryen , me fjalë të tjera, dy shtyllat e rendit global që kemi njohur. Nëse kjo do të ndodhte, pasojat do të ishin tepër të rënda për Evropën.”

E ku qëndrojnë mundësitë ?

“Përballë kësaj perspektive Evropa, më së fundi, mund të bëhet e pjekur. Por duhet të rritemi pa rënë në kundëramerikanizëm.”

A janë shpejtësitë e ndryshme, për të cilat flet kancelarja Merkel , rruga për t’u ndjekur ?

“Shpejtësitë e ndryshme janë realiteti. Do të ndjehesha më mirë sikur të dinja se më 7 maj në Francë nuk do të zgjidhej Marine le Pen. Nëse kjo do të ndodhte do t’ishte fundi i BE dhe i euros, me pasoja dramatike botërore. Por kam besim se nuk do të ngjajë e që, mbas zgjedhjeve gjermane në shtator, mund të hapet një dritare mundësie për të rishpërcaktuar projektin evropian.”

Në çfarë mënyre ?

“Sigurisht eurogrupi do të jetë shtylla mbajtëse. Gjermania duhet të lëvizë, por duhet t’a bëjnë edhe të tjerët. Duhet të bëjmë më shumë për sigurinë, jo vetëm ushtarakisht, por edhe me një politikë të jashtëme të përbashkët në Mesdhe, ku nuk mund t’i ngarkojmë më Shteteve të Bashkuara interesat tona. Më së fundi duhet të marrim seriozisht mbrojtjen e përbashkët, bashkëpunimin kundër terrorizmit duke u mbështetur mbi përvojën e e shumë antarëve. Italia, për shembull, që mund të besojë mbi pasurinë e luftës kundër mafies.”

Mbrojtja evropiane a do t’ishte alternative ndaj Nato-s?

“Diskutim akademik. Duhet të ruajmë të gjithë atë që kemi. Por, në të njëjtën kohë, të ndërtojmë opsione të tjera në mënyrë që, nëse të tjerë do të tërhiqeshin mbrapa, të mos mbetemi të pambrojtur. Nuk ka nevojë të quhet ushtri evropiane, por një bashkëpunim më i fuqishëm sa i përket armatimeve, forcave të veçanta, trasporteve, komunikacioneve, është i mundshëm dhe i nevojshëm. Nëse do të fuqizojmë shtyllën evropiane edhe Nato do të jetë përforcuar.

Mund të bëhet kjo nëpërmjet pararojave ?

“Sigurisht, traktatet e Lisbonës  e lejojnë. Është e qartë që kemi nevojë për një fillim të ri. Secili duhet të bëjë pjesën e tij : Gjermania duhet të bëjë më shumë n’ekonomi, barazia e bilancit është një çuditëri, nuk i shërben askujt. Franca që ka status bërthamor, mund të bëjë më shumë në sigurinë. Italia, më së fundi, duhet të bëjë reformat e saj. Të gjithë ata që duan e munden duhet të mundohen të gjejnë një miratim të ri.”

Por, si thoni ju, gjithshka varet nga një përfundim zgjedhor i vetëm, ai francez. A nuk është një shenjë e brishtësisë së projektit evropian ?

“Është ashtu. Evropa mund të shkojë përpara pa Britaninë e Madhe, shtoj, fatkeqësisht. Por nuk mund t’a bëjë  pa Gjermaninë, Francën dhe Italinë, kombet karolinge. I gjithë projekti evropian lindi nga kapërcimi i armiqësisë franko – gjermane. Pikërisht për këtë Italia u zotua që në fillim në këtë proçes. Nëse bashkëpunimi ndërmjet Francës e Gjermanisë do të mbaronte, do të mbaronte edhe Evropa. Por roli i Italisë si faktor i tretë , është themelor.”

A do t’a ndjekë popullsia ?

“Tashmë jemi brënda një thyerjeje historike. Politika duhet të ketë guximin t’i thotë popullsive se cilat janë pasojat e mundëshme. Njerëzia nuk është e marrë, flasim për përgjigjet nevojave të saj konkrete : siguri, mirëqënie, e ardhmja e fëmijëve. Nuk mund të mendojmë të ndahemi nga rendi liberal evropian pa paguar çmime tepër të larta në planin ekonomik e shoqëror. Sa më shumë që këto çështje të mëdha të vihen në qendër të politikave kombëtare, aq më pak do të futin frikën populistët, sepse nuk kanë asgjë për të ofruar. Loja është tmerrësisht e dëmëshme për të gjithë”.

Me shpejtësitë e ndryshme Gjermania kërkon një pararojë në shembëlltyrë të saj ?

“Gjermania nuk don një Evropë gjermanike. Nuk ka kuptim : perspektiva e Berlinit është sinonim i Be. Nëse Evropa do të mbetet e dobët, siç është tani, nuk do të ketë t’ardhëme. E vërteta është se një mirëkuptim me 27 është gjithënjë e më i vështirë. Prandaj është qenësore që zemra, pra Eurogrupi, të jetë i qëndrueshëm e të fuqizohet. Me monedhën e përbashkët kemi bërë një hap vendimtar drejt integrimit : tani bëhet fjalë për të kryer kërcimin e mëtejshëm, atë të bashkëpërgjegjësisë së rreziqevet. Por kjo nuk është Evropa gjermanike.”

E quan ende Merkelin të domosdoshme për Evropën ?

“Po. Duhet të komunikojë në mënyrë të ndryshme, është e zonja”.

Ҫfarë marrëdhëniesh duhet të kemi me Rusinë ? Ju keni kritikuar hapjet kundrejt Putinit.

“Të jetohet në kontinentin tonë do të thotë të bashkëjetohet me një fqinjë shumë kabà dhe këtë nuk mund t’a ndryshojmë. Sa më e fortë të jetë Evropa, aq më të kollajshme do të jenë marrëdhëniet me Rusinë. Putini mendon “përça e sundo”. E kuptoj por na takon neve t’i a ndalojmë. Do të gabojmë nëse do të mendojmë se duke u bërë të vegjël do të kemi marrëdhënie paqësore me Moskën. Ndërsa duhet të bëjmë që të merremi me seriozitet në Moskë ashtu si edhe në Washington. Mbi konfliktet konkrete : sanksionet u miratuan mbas pushtimit të Krimesë dhe krizës n’Ukrainë. Nëse Moska ndryshon qëndrim, nuk ka asnjë arsye për t’i mbajtur”.

Imigracioni sjell para Evropës një problem identiteti. Si do të përballohet ?

“Jetojmë në një yllësi gjeopolitike shumë të vështirë : në Veri, ndryshimet klimatike shkrijnë kësulën arktike ; në Lindje Rusia dhe në Jugë – Lindje Turqia janë fqinjë shumë problematikë ; në Jugë mërgimtarët na venë përpara një sfidë që nuk do të largohet e të cilën duhet t’a pranojmë. Me një kontroll më të mirë të kufijvet, por edhe me integrimin, me diplomacinë për të zgjidhur krizat, me marrëveshjet dhe investimet në Vendet e origjinës, si në Afrikën e Veriut, si në Afrikë. Por un kam shqetësime serioze edhe për Ballkanin.”

Në çfarë kuptimi ?

Mund të diskutojmë nëse Turqia i përket apo jo Evropës, por për Ballkanin përgjigja është afërmendsh. Deri sa premtimi që një ditë, secili që është ende jashtë, do futet në Be, do të mbetet i besueshëm, gjithshka do të mbetet paqësore. Por nëse një ditë nuk do të jetë më ashtu, do të gjendemi menjëherë para një situate shpërthyese, të dhunës e të luftës civile. (nënvizimi i përkthyesit) Mos të harrojmë se vala e parë e madhe e të  ikurve në Evropë nuk erdhi nga Lindja e Mesme, por nga Ballkani”./Dielli

“Corriere della Sera”, 11 shkurt 2017        Përktheu Eugjen Merlika

Mijëra mbështetës mbushën rrugët para një gjykate në Barcelonë të hënën, ndërsa ish-presidenti katalonjas Artur Mas doli para gjyqit.

Ai akuzohet për përfshirje në referendumin jo zyrtar të krahinës katalanase për pavarësinë në nëntor të vitit 2014.

Mas është paditur për mosbindje serioze civile, pasi votimit që u krye duke sfiduar vendimin e Gjykatës Kushtetuese spanjolle.

Prokurorët kanë kërkuar që ai të diskualifikohet nga detyrat publike për 10 vite. Kjo është hera e parë që një udhëheqës i qeverisë katalonjase del në gjyq.

Mas, i cili qeverisi Katalonjën nga viti 2010 deri në 2016-n, është akuzuar bashkë me dy partnerë të tij, ish-zëvendëspresidenten Joana Ortega dhe ish-ministren e Arsimit Irene Rigau.

Gjyqi i tyre po përdoret nga mbështetësit e pavarësisë së Katalonjës për të nxitur kauzën e tyre dhe qeveria aktuale e krahinës është zotuar që të zhvillojë një tjetër referendum në shtator.

Ish-presidenti katalonjas Mas ka këmbëngulur shpesh se nuk ka asgjë për të kërkuar falje dhe se nuk ka shkelur asnjë ligj, ndërsa u tregua mjaft sfidues para hyrjes në gjykatë.

Në referendumin e 2014-s, më shumë se 80% e votuesve mbështetën pavarësinë, por vetëm 2 nga 5.4 milionë katalonjasit me të drejtë vote morën pjesë në të.

Liderja e ekstremit të djathtë në Francë ka nisur fushatën presidenciale me deklarata të forta. Marine Le Pen ka shpalosur programin e saj për “prioritet kombëtar” në sfondin e një sërë polemikash që kanë minuar rivalin e saj të së djathtës, François Fillon në favor të kandidatit të qendrës Emmanuel Macron.

Duke folur gjatë një tubimi në Lion, Le Pen tha se do të braktisë monedhën e përbashkët euro dhe do rikthejë monedhën vendase, frangën. Gjithashtu liderja e partisë së ekstremit të djathtë të Frontit Kombëtar (FN tha se nëse ajo do bëhet presidente brenda 6 muajsh do kërkojë referendum për daljen e Francës nga BE deh nga NATO.

“Bashkimi Evropian është një dështim dhe të vendos në kontroll. Nëse bëhem Presidente, brenda gjashtë muajve do të thërras një referendum për Frexi’- tha , Marine Le Pen.

Gjithashtu ajo tha se Franca duhet të dalë nga organizata euroatlantike e mbrojtjes, pasi brenda 5 vitesh do të organizojë vetë mbrojtjen e vendit.

Delegacioni i Bashkimit Europian në Tiranë ka reaguar pas përplasjeve mes ambasadorit amerikan në Tiranë, Donald Lu dhe kryeprokurorit, Adriatik Llalla.

Përmes një deklarate për mediat, ambasada e BE mbështet publikisht ambasadorin e SHBA-së në Tiranë, për angazhimin e tij në krijimin e një gjyqësori të pavarur dhe profesional.

Delegacioni i BE thekson gjithashtu se javën e ardhshme nis punë Operacioni Ndërkombëtar i Monitorimit (ONM), i cili do të mbikëqyrë procesin e Vettingut për gjyqtarët dhe prokurorët.

Nisja e menjëhershme e Operacionit Ndërkombëtar të Monitorimit, i cili që prej javës së ardhshme do të mbikqyrë rivlerësimin e gjyqtarëve dhe prokurorëve, është një tjetër angazhim i përbashkët BE SHBA

Deklarata e BE
Bashkimi Europian ka shprehur vlerësimin më të lartë për angazhimin diplomatik të Ambasadës së SHBA në Tiranë dhe në veçanti të Ambasadorit të SHBA, Donald LU.

BE dhe SHBA bashkëpunojnë ngushtë për të mbështetur popullin shqiptar në krijimin e një sistemi gjyqësor plotësisht të pavarur, të përgjegjshëm, të paanshëm dhe profesional.

Nisja e menjëhershme e Operacionit Ndërkombëtar të Monitorimit, i cili që prej javës së ardhshme do të mbikqyrë rivlerësimin e gjyqtarëve dhe prokurorëve, është një tjetër angazhim i përbashkët BE SHBA.

Shërbimi Sekret i Norvegjisë tha se llogari të emaileve të shërbyesve civilë janë sulmuar nga hakerët që besohet të jenë të lidhur me inteligjencën ruse.

Shërbimi Sekret tha se hakerët kanë marrë informacione të klasifikuara.

Zëdhënësi i këtij shërbimi, Martin Bernsen, tha se agjencia është paralajmëruar më herët nga një agjenci e huaj për sulme kibernetike kundër Shërbimit Sekret, Partisë Laburiste të Norvegjisë, ushtrisë dhe agjencive qeveritare.

“Sulmet kanë pasur një nënshkrim që lë të kuptohet se ata që qëndrojnë prapa sulmeve, mund të identifikohen si APT29. Ata mund të gjurmohen në Rusi”, tha Bernsen.

Sipas tij, APT29 është një tjetër term për “Cozy Bear”, një grup hakerësh që, vitin e kaluar, ka pirateruar kompjuterët e Partisë Demokratike në SHBA dhe disa llogari të Qeverisë amerikane.

Eurodeputetët i kanë dhënë të drejtë kolegut të tyre të djathtë, Eduard Kukan, për t’u kërkuar autoriteteve shqiptare për ndëshkimin e fajtorëve për ngjarjet e përgjakshme të 21 Janarit 2011.

Me shumicë votash u miratua amendamenti 157 i propozuar nga Kukan, që shpreh “keqardhjen se autoritetet kompetente nuk kanë bërë një ndjekje penale efektive” dhe “i fton për të dhënë drejtësi, pa vonesë, mbi viktimat e ngjarjeve të 21 Janarit 2011”.

Eurodeputeti sllovak ka respektuar premtimin solemn ndaj familjarëve të viktimave të kësaj ngjarjeje të pergjakshme.

Gjatë votimit të 231 amendamenteve pati konsensus mes dy grupeve kryesore politike. Janë votuar me shumicë votash amendamentet që kanë të bëjnë kryesisht me luftën ndaj korrupsionit, duke instaluar në Shqipëri një sistem të ri drejtësie, nëpërmjet rivlerësimit të gjyqtarëve dhe prokurorëve aktualë.

Ndër amendamentet për mbajtjen e zgjedhjeve të lira dhe demokratike më 18 qershor, ra në sy amendamenti 83 i një grupi deputetësh, që u kërkon autoriteteve të përfshijnë në votime rreth 2 milionë shqiptarë që jetojnë në emigracion.

Eurodeputetët rrëzuan amendamentet që ishin hartuar nga kolegët grekë dhe ata bullgarë, mbi çështjet e pronave, detin dhe kishat, ndërsa u shpreh çudi për ekzistencën e pakicave kombëtare bullgare në Shqipëri./TCH

Para zgjedhjeve presidenciale që do të mbahen në Francë këtë vit, kandidatët në fushatat e tyre janë duke i vendosur në plan të parë premtimet që kanë të bëjnë me ekonominë

PARIS – Para zgjedhjeve presidenciale që do të mbahen në Francë këtë vit, kandidatët në fushatat e tyre janë duke i vendosur në plan të parë premtimet që kanë të bëjnë me ekonominë.

Një nga premtimet më të rëndësishme në programin e Benoit Hamon, ish-ministrit të Arsimit i cili gjatë ditës së djeshme u caktua si kandidat i Partisë Socialiste për zgjedhjet presidenciale që do të mbahen në dy raunde në muajin prill dhe maj duke fituar 58 përqind të votave në raundin e dytë të zgjedhjeve preliminare, është implementimi i pagave për secilin, ata që punojnë dhe ata që nuk punojnë.

Premtimi i Hamon ka lënë në pozitë të vështirë kundërshtarët e tij duke premtuar pagë për gjithkë, ndërkohë që kritikat se ky premtim nuk është realist nuk e penguan atë të sigurojë fitoren në zgjedhjet preliminare brendapartiake.

Hamon parasheh pagë mujore prej 600 eurosh për çdo person mbi moshën 18-vjeçare duke filluar nga viti 2018. Ish-ministri synon që këtë të ardhur ta rrisë gradualisht në 750 euro pas vitit 2022.

Në mesin e premtimeve të Hamon gjendet edhe e drejta e votës për të huajt në zgjedhjet lokale. Ndërkaq, në mesin e premtimeve që kanë të bëjnë me politikën e jashtme qëndron njohja e Palestinës si shtet.

Sipas programit të Hamon, i cili ka theksuar se bazohet në një program ambientalist, me qëllim të mbrojtjes së natyrës, deri në vitin 2025 do të ndalohet konsumi i lëndës djegëse dizel, ndërsa pjesëmarrja e energjisë nukleare në prodhimin e energjisë do të zvogëlohet në 50 përqind.

Nga ana tjetër, gjatë fushatës së tij, Hamon është shndërruar në shënjestër të së djathtës ekstreme për shkak të rekomandimeve të tij në lidhje me politikat që kanë të bëjnë me muslimanët.

E djathta ekstreme i kishte vendosur atij emrin Bilal, siç kanë theksuar, pasi ka nisur rrugën me emrin Benoit. Ndërkaq, pas kësaj, Hamon u shpreh se “Ndihem krenar që jam Bilal. Edhe të qenit Elie dhe David më bëjnë tejet krenar”.

Macron do të heqë shkurtimet e pagës minimale

Ish-ministri i Ekonomisë Emmanuel Macron, kandidat presidencial i cili ka formuar lëvizje të rej me emrin “En Marche” (Në marsh), në programin e tij ka vendosur heqjen e shkurtimeve të fondit të shëndetësisë dhe papunësisë në pagat punëtorëve. Macron thekson se në këtë mënyrë, një çift që siguron jetesën me pagë minimale do të mund të kursejë të paktën 500 euro në muaj.

Macron mbron mendimin për ndryshimin e orarit javor të punës prej 35 orëve i cili zbatohet në mënyrë të njëjtë për punëtorët e të gjitha moshave. Në sistemin e planifikuar nga ish-ministri parashihet që të rinjtë të punojnë më shumë se 35 orë, ndërsa orari javor i të moshuarve të mos kalojë mbi 30-32 orë.

Në sistemin e pensionimit, Macron synon pensionim në mosha të ndryshme varësisht nga profesioni. Ai premton ndryshimin e moshës së pensionimit nga 60 deri në 67 vjeç, në varësi të amortizimit të profesioneve.

Ai po ashtu premton punësimin e dhjetë mijë policëve brenda tre viteve pas ardhjes në detyrë duke synuar rritjen e sigurisë së vendit. Në kuadër të kësaj, Macron, i cili kërkon luftë aktive ndaj terrorit, synon forcimin e inteligjencës në zonat e ndjeshme.

Gjithashtu, Macron planifikon çek prej 500 eurosh, i cili do të jepet vetëm një herë, për të rinjtë që mbushin 18 vjeç, në mënyrë për të siguruar qasje në përmbajtjet kulturore. Ky shpenzim i Macron pritet të mbulohet përmes taksave që do të merren nga industria.

Fillon dëshiron reduktimin e hyrjes së refugjatëve

François Fillon, kandidati presidencial i Partisë Republikane nga qendra e djathtë, nga ana tjetër, synon heqjen e shkurtimeve sociale të kompanive që japin mbështetje për punësimin e të rinjve, në mënyrë që të reduktojë papunësinë në vend. Fillon është i mendimit se kontratat e punës duhet të jenë të një lloji dhe premton se do ta rrisë trajnimin për profesionalizimin e të papunëve.

Ish-kryeministri Fillon është i mendimit se duhet reduktuar hyrjen e refugjatëve në vend, ndërkohë që synon uljen e numrit vjetor të refugjatëve që mund të pranohen në nën 100 mijë.

Ndërkaq, për rritjen e sigurisë në vend, Fillon parasheh formimin e një strukture të madhe të Ministrisë së Brendshme e cila do t’i sjellë nën një çati të vetme doganat, burgjet, xhandarmërinë dhe institucionet policore.

Fillon, i cili planifikon lehtësimin e taksave ndaj kompanive, thekson nevojën që të merret taksë deri në 75 përqind nga punëtorët që kanë paga të larta.

Nga ana tjetër, Fillon është duke u përballur me vështirësi për shkak të akuzave ndaj tij për korrupsion.

Gazeta franceze “Le Canard Enchaine”, përmes një shkrimi pretendon se Penelope ka punuar për bashkëshortin e saj François Fillon që pre vitit 1998 si këshilltare dhe se ka marrë fitime pa të drejtë. Në lidhje me çështjen, organet e drejtësisë në vend filluan hetim.

Krahas kësaj, portali i lajmeve Mediapart pretendon se Fillon gjatë viteve ‎2005-2007, derisa ishte senator, ka marrë për vete pa të drejtë pagesën që ishte ndarë për ndihmësit e tij.

Rekomandimi i Le Pen për Eurozonën

Ndërkaq, kandidatja e së djathtës ekstreme nga Fronti Nacional, Marine Le Pen premton kufizimin e migrimit në vend. Sipas programit të Le Pen, shifra vjetore prej afër 200 mijë migrantësh që pranon Franca do të zvogëlohet në dhjetë mijë. Le Pen planifikon reduktimin e hyrjes në vend përmes rrugëve si azili politik dhe bashkimi familjar.

Le Pen është e mendimit se duhet organizuar referendum për dalje nga Eurozona, valuta e Bashkimit Evropian. Ajo mbron qëndrimin se euro ndikon negativisht në ekonominë e vendit, teksa thekson se nëse vjen në detyrë do t’i shqyrtojë marrëveshjet ekonomike të arritura me Bashkimin Evropian.

Reduktimi i arsimit dhe shëndetësisë për të huajt

Le Pen ka nënvizuar se do të sjellë kufizime për të huajt nëse arrin të bëhet presidente. Ajo premton se do të sjellë ndryshime ligjore të nevojshme që të huajt me leje qëndrimi dhe pune të paguajnë vetë dy vitet e para shpenzimet për shëndetësi. Po ashtu, ajo planifikon t’i japë fund të drejtës për arsim pa pagesë për fëmijët e migrantëve ilegalë në vend.

Le Pen thotë se do t’i ftojë në Francë kompanitë franceze që prodhojnë jashtë vendit, ndërsa atyre që nuk pranojnë të vijnë, do t’u zbatojë taksë të posaçme. Veçanërisht, ajo thekson se kompanitë automobilistike duhet të kenë institucionet vetëm në Francë.

Sondazhet e fundit në Francë tregojnë se Le Pen do të kalojë me lehtësi në raundin e dytë të zgjedhjeve presidenciale që do të mbahen në dy raunde në prill dhe maj dhe se ende nuk është e qartë se cili kandidat do të ngelet në raundin e dytë.

Shefja e diplomacisë evropiane Federika Mogherini ka ftuar kryeministrin e Kosovës dhe atë të Serbisë (01.02) në Bruksel, për raundin e ri të bisedimeve në kuadër të dialogut ndërmjet dy vendeve.

Përfaqësuesja e lartë e Bashkimit Evropian për politikë të jashtme dhe siguri, Federica Mogherini, sërish ka ftuar në zyrën e saj, udhëheqësit politik të Prishtinës dhe Beogradit, për të vazhduar dialogun për normalizimin e marrëdhënieve. Në takimin e radhës (01.02)Prishtinë – Beograd do të në Bruksel do të marrin pjesë të dy kryeministrat ai i Kosovës, Isa Mustafa dhe kryeministri i Serbisë, Aleksandër Vuçiq. Mediet në Serbi, shkruajnë se në këtë takim do të marrin pjesë sërish edhe dy presidentët e të dyja vendeve, Kosovës dhe Serbisë, përkatësisht Presidenti Hashim Thaçi dhe presidenti Tomisllav Nikoliq. Mirëpo, në Prishtinë, ende nuk konfirmohet pjesëmarrja e presidenti të Kosovës Thaçi. Ky i fundit dy ditë më parë shkroi në rrjetin social, se ka biseduar në telefon me kryeministrin e Serbisë, Aleksandër Vuçiq.

“Sapo zhvillova një bisedë telefonike me kryeministrin e Serbisë, Aleksandër Vuçiq. U pajtuam që të punojmë bashkërisht që nëpërmjet dialogut t’i zgjidhim të gjitha çështjet me interes reciprok e që ndërlidhen me procesin e normalizimit të marrëdhënieve mes Kosovës dhe Serbisë”, shkruan Thaçi.

Nga ana e saj ministrja e dialogut në qeverinë e Kosovës, Edita Tahiri, ka thënë për mediet lokale se takimi i një shkurtit në Bruksel, do të jetë në linjën e rikonfirmimit të zbatimit të marrëveshjeve të arritura në të kaluarën, ndërmjet Kosovës dhe Serbisë.

“Janë tri çështje që do të diskutohen dhe të cilat po prolongohen nga Serbia. Është çështja e energjisë elektrike, përkatësisht pavarësimi i Operatorit të Sistemit të Transmisionit dhe Tregut të Energjisë Elektrike të Kosovës i njohur si (KOSTT), që po prolongohet nga ana e Serbisë. Është marrëveshja për drejtësinë dhe po ashtu edhe çështja e Asociacionit të Komunave me Shumicë Serbe”, ka thënë Edita Tahiri.

Përfaqësuesit e serbëve të Kosovës nga lista “Srpska”, ka kohë që kanë pezulluar pjesëmarrjen në institucionet e Kosovës për shkak të shkarkimit të një ministri serb nga kryeministri Isa Mustafa dhe për shkak të “mosgatishmërisë së Prishtinës zyrtare për të formuar asociacionin e komunave me shumicë serbe”, argumentojnë ata.

Zëvendëskryeministri serb në qeverinë e Kosovës, Branimir Stojanoviq, thotë se përfaqësuesit e serbëve mund të mendojnë të kthehen në institucione, vetëm nëse ka përparim: “në çështjen e formimit të asociacionit të komunave me shumicë serbe”.

“Nuk e di nëse në takimin e Brukselit do të bisedohet për kthimin e ministrave serb në institucionet e Prishtinës. Është e rëndësishme për të vazhduar dhe të zbatohet ajo që duhet. Nëse ka një gatishmëri për të zbatuar atë për të cilën kemi dalë nga institucionet, atëherë, ne mund të mendojmë për kthim, e nëse nuk ka angazhim, unë nuk shoh se si”, citojnë mediet lokale serbe zotin Stojanoviq.

Kryeministri Isa Mustafa, nga ana e tij, ka ftuar përfaqësuesit e serbëve që të kthehen në institucionet e Kosovës, sepse vetëm aty mund të kontribuojnë për komunitetin e tyre.

“Unë dëshiroj që edhe njëherë të përsëris ftesën për serbët e Kosovës, që ata të kthehen në institucionet e Republikës së Kosovës, në qeveri dhe kuvend dhe të punojmë bashkërisht për të ardhmen e qytetarëve të Kosovës, pa asnjë dallim. Dëshiroj po ashtu të përsëris se qeveria është e përkushtuar për të implementuar marrëveshjet nga dialogu edhe marrëveshjen për asociacionin e komunave me shumicë serbe. Ne do të fillojmë me implementimin e saj në harmoni me vendimin e Gjykatës Kushtetuese dhe me marrëveshjen e parë, por me pjesëmarrje të serbëve dhe komuniteteve tjera në këtë proces”, tha kryeministri Isa Mustafa në mbledhjen e fundit të qeverisë. Sipas kryeministrit, ky proces do të jetë i hapur dhe transparent.

Tensionet ndërmjet Prishtinës dhe Beogradit u shkaktuan pas tentimit të Serbisë që ta fusë një tren në Kosovë pa lejen e autoriteteve të Prishtinës dhe pas arrestimit nga policia franceze të ish-kryeministrit të Kosovës, Ramush Haradinaj, bazuar në një flet-arresti të Serbisë.

U desh ndërhyrja e faktorit ndërkombëtar, përkatësisht shefes së diplomacisë evropiane Federika Mogherini, që të thërrasë në Buksel nivelin më të lartë politik të Kosovës dhe Serbisë për të ulur tensionet. Takimi i parë i këtij niveli u zhvillua më 24 janar dhe ai u cilësua si mjaft i vështirë nga të dyja palët, por që sipas zyrtarëve në Prishtinë dhe Beograd, u arrit të ulen tensionet e kohëve të fundit.