RFE/RL

Ushtria ukrainase thotë se ka fundosur një anije ruse të tipit Serna që i përket flotës ruse të Detit të Zi.

“Në ujërat e Detit të Zi, u shkatërrua një mjet zbarkues armik i tipit Serna”, njoftoi të shtunën, më 7 maj, në kanalin e aplikacionit të komunikimeve Telegram, zëdhënësi ushtarak, Serhiy Bratschuk.

Ai publikoi një video ku pretendonte se tregonte një dron që gjuajti anijen.

Autenticiteti i pamjeve nuk mund të verifikohej në mënyrë të pavarur.

Fillimisht nuk pati asnjë reagim nga pala ruse.

Një ditë më parë, gazetarët ukrainas kishin raportuar se një anije luftarake ruse ishte qëlluar dhe kishte marrë zjarr në këtë zonë – megjithëse kjo nuk u konfirmua zyrtarisht as nga Kievi dhe as nga Moska.

Kohë më parë, ukrainasit patën goditur anijen ruse Moskva në Detin e Zi.

Ajo cilësohej si anija më e madhe ruse.

Nicola Gratteri, Prokurori i Antimafias së Catanzaros, pak orë më parë ishte një nga tre kandidaturat e zgjedhura për t’u votuar si Kryeprokuror i Antimafias Italiane, është në “shënjestër” të një atentati të mafias kalabreze Ndrangheta.

Alarmi është sinjalizuar prej disa javësh niveleve më të larta investigative institucionale e është përcjellë nga shërbimet sekrete të një vendi të huaj, që kanë kaptuar informacionin se “është aktivizuar një projekt për të eleminuar kreun e antimafias kalabreze të Catanzaros”.

Në dokumentin e ruajtur nga sekreti profesional dhe i dorëzuar shërbimeve sekrete italiane, mafia kalabreze Ndrangheta ka në plan një atentat “in grande stile”, përmes një bombe të lidhur me telekomandë kundër Prokurorit Gratteri.

Dokumenti bazohet në përgjimet e disa personave të lidhur me familje mafioze ndranghetiste që janë”bezdisur” nga hetimet e Gratterit që shkatërrojnë afarat e tyre jo vetëm në Kalabri por dhe në SHBA e Amerikë të Jugut.

Dokumenti i shkruar por dhe i lidhur me audio përgjimin zbardh se atentanti është planifikuar të kryhet në rrugën që lidh banesën e Prokurorit me zyrën e tij.

Mbi ç’ka ka mbërritur përtej kufijve italiane është hapur një proces hetimor nga Prokuroria e Salernos.

Mbi ç’ka është zbardhur është vënë në dijeni dhe Ministrja e Brendshme italiane, Luciana Lamorgese dhe i gjithë sistemi institucional që janë aktivizuar duke forcuar truprojën e Prokurorit.

Janë shtruar tre autovetura blindate, mes të cilave dhe një bomb jamper e që kanë çuar në 5 mjetet që ruajnë Nicola Gratterin që shoqërohet jo vetëm nga truprojat e tij por dhe nga oficerë të repartit operativ qendror të Policisë së Shtetit (NOCS).

Janë shtuar gjithashtu dhe të gjitha instrumentet që kontrollojnë frekuencat e transmetueshme radio e celularë për të evituar shpërthim eksplozivi në distancë.

Nën mbrojtje me truprojë janë vënë dhe bashkëshortja e fëmijët e Prokurorit të Antimafias që jetojnë jashtë rajonit të Kalabrisë.

Është hera e dytë, brenda dy viteve të fundit që vjen një alarm kaq i fortë për rrezikshmërinë e jetës së Prokurorit italian.

Në janar të 2020 pas ekzekutimit të operacionit Rianscita Scott, shërbimet sekrete italiane zbuluar se Ndrangheta kishte punësuar një killer për të vrarë Nicola Gratterin.

Prokurori i Antimafias së Catanzaros jeton në mbrojtjen e shteit prej 32 vitesh e është një nga ekspertët më të mirë të luftës kundër Ndraghetas e autor i disa librave e eseve që studiojnë e analizojnë fenomenin mafia në Itali e në botë.

RFE/RL

Ministrja gjermane e Mbrojtjes, Christine Lambrecht, ka thënë të enjten, 5 maj, në Prishtinë se Gjermania mbështet aspiratat e Kosovës për anëtarësim në Bashkimin Evropian dhe NATO.

Në një konferencë për media, pas takimit që ka pasur me kryeministrin e Kosovës, Albin Kurti, ajo ka thënë se Gjermania do të vazhdojë të ofrojë trajnime për Forcën e Sigurisë së Kosovës, dhe se forcat gjermane do të vazhdojnë të jenë prezente në Kosovë, në kuadër të misionit të NATO-s në këtë vend, KFOR.

Por, për përafrim me BE-në, ajo ka përmendur marrjen e disa hapave që i ka konsideruar të rëndësishëm, duke përfshirë dialogun e Kosovës me Serbinë.

“Shpresoj që ky proces të marrë një dinamikë të re dhe shpresoj që do të ketë vendime të mira më 13 maj në Bruksel. Hapat e parë do të mund të ishin për njohjen reciproke të dokumenteve dhe ky do të ishte një sinjal i mirë”.

Kurti, në anën tjetër, është shprehur optimist se mund të ketë diçka konkrete më 13 maj.

“Më 13 maj, unë shpresoj që përfundimisht do t’i kemi marrëveshjet për zgjidhje reciproke për targat, edhe për çështjen e mospagesës së energjisë në veri të Kosovës, e po ashtu edhe për nevojën për të përshpejtuar çështjen e zbardhjes së fatit të të pagjeturave, të të zhdukurve me dhunë”.

Kurti ka thënë se për këto tema ka biseduar një ditë më parë, 4 maj, me presidentin serb, Aleksandar Vuçiq, në një darkë joformale në Berlin, në të cilin ka qenë i pranishëm edhe i dërguari i BE-së për dialog, Mirosllav Lajçak.

“Unë besoj që dialogu i Kosovës me Serbinë, i lehtësuar nga Bashkimi Evropian, duhet të zhvillohet brenda vlerave të BE-së, të ketë karakter transformues, edhe Kosova edhe Serbia, me qytetarët e tyre, të përfitojnë dhe t’i afrohemi anëtarësimit në BE. Ky dialog duhet të rezultojë me marrëveshje, por kjo marrëveshje duhet ta ketë njohjen reciproke në qendër. Nuk mund të them që njohja reciproke të jetë elementi i vetëm, por duhet të jetë në qendër”.

Edhe kanceri gjerman, Olaf Scholz, ka thënë më 4 maj se njohja është pjesë e dialogut dhe do të duhet të përfshihet në marrëveshjen përfundimtare mes Kosovës dhe Serbisë.

I pyetur për kompromiset, Kurti përmendur palën serbe.

“Kërkesa për kompromise në kushtet kur (v.j. presidenti serb, Aleksandar Vuçiq) thotë se asnjëherë nuk do ta njohë Kosovën, teksa nuk distancohet as nga (Sllobodan) Millosheviqi, as nga (Vladimir) Putini, nuk është kërkesë për zgjidhje”.

Më 13 maj në Bruksel do të zhvillohet takimi i radhës mes Kosovës dhe Serbisë, në nivel të kryenegociatorëve, përkatësisht mes Besnik Bislimit dhe Petar Petkoviqit.

Pritet që në këtë takim të vazhdojnë diskutimet për çështjen e targave të veturave, për të cilën palët nuk janë marrë vesh në takimin e fundit në Bruksel.

Marrëveshja e përkohshme për targat parasheh mbulimin me letra ngjitëse të simboleve shtetërore në targat e makinave të Kosovës dhe Serbisë kur ato kalojnë në territorin e njëra-tjetrës.

Kjo marrëveshje, e arritur më 30 shtator të vitit të kaluar në Bruksel, ka dalë pas disa ditësh trazira në veri të Kosovës, ku disa serbë lokalë kanë bllokuar rrugët, për të kundërshtuar vendimin e atëhershëm të Qeverisë së Kosovës për masa reciprociteti kundër Serbisë.

Me ato masa, makinat me targa të Serbisë, me të hyrë në territorin e Kosovës, është dashur të vendosin targa të përkohshme – ngjashëm siç kanë vepruar shoferët e makinave me targa të Kosovës kur kanë hyrë në Serbi.

RFE/RL

Ministrja e Mjedisit dhe Energjisë të Francës, Barbara Pompili, tha se është e bindur që shtetet e Bashkimit Evropian do të arrijnë konsensus deri në fund të javës për mënyrën se si t’i jepet fund importeve të naftës ruse.

“Disa shtete janë më të varura nga nafta ruse sesa të tjerat dhe prandaj ne duhet të tentojmë të gjejmë zgjidhje që këto shtete të pajtohen për sanksionet”, tha ajo për radion France Info.

“Por, mendoj se do të arrijmë ta bëjmë këtë”, shtoi ajo.

Gjatë kësaj jave, Franca ka qenë nikoqire e një takimi urgjent të ministrave të Energjisë së BE-së, ku është diskutuar për vendimin e Moskës për të ndaluar furnizimet me gaz në Bullgari dhe Poloni, për shkak se këto dy shtete kanë refuzuar që të paguajnë me rubla për furnizimet ruse.

BE-ja ka propozuar një plan që deri në fund të vitit të hiqet dorë nga importet e naftës ruse. Nëse ky propozim miratohet, atëherë brenda gjashtë muajve, blloku evropian do të heqë dorë nga nafta e papërpunuar dhe në tetë muaj nga produktet e rafinuara.

Shtetet e Bashkuara dhe Britania veçse kanë vendosur ndalesa ndaj naftës ruse pasi Rusia nisi pushtimin e Ukrainës më 24 shkurt.

Një tjetër reporter i televizionit ukrainas, i cili u regjistrua në ushtri pas fillimit të pushtimit rus, u vra në betejën pranë qytetit të Izium, tha presidenti ukrainas Volodymyr Zelensky.

Alexander Mahov, 36 vjeç, është gazetari i tetë që vritet në më shumë se dy muaj luftë.

Mahof, i njohur për misionet e tij në zonat e luftës, kishte raportuar edhe në Antarktidë. Ai gjithashtu ishte regjistruar dhe luftuar në vitin 2014, kur shpërtheu lufta me separatistët pro-rusë në Donbas.

Ai ishte “patriotik”, “i sinqertë”dhe “gjithmonë ndër më të guximshmit, në vijën e parë”, tha Zelensky në një fjalim të lëshuar më herët sot.

“ Rusët vranë një tjetër njeri që e njihja, një gazetar tjetër. Kam takuar Oleksandr Mahov në Slovyansk disa vite më parë. Ai ishte një nga korrespondentët më të mirë të luftës në Ukrainë. Ai u regjistrua në ushtri pas pushtimit rus dhe u vra në betejë afër Izium. Ai ishte kaq i ri”, tha Olga Tokariuk, një gazetare dhe kolege e Mahof. bw

RFE/RL

I dërguari i posaçëm i Bashkimit Evropian për dialogun Kosovë-Serbi, Mirosllav Lajçak, priti të mërkurën mbrëma, në një darkë joformale, kryeministrin e Kosovës, Albin Kurti, dhe presidentin e Serbisë, Aleksandar Vuçiq.

Takimi u realizua në Berlin, ku Kurti dhe Vuçiq takuan të mërkurën edhe kancelarin gjerman, Olaf Scholz.

“Mirëpresim mundësinë për diskutime rreth dialogut, në një darkë joformale, me kryeministrin Kurti dhe presidentin Vuçiq, në Berlin. Faleminderit Qeverisë gjermane për pritjen. Ne do të vazhdojmë diskutimin në nivel të kryenegociatorëve më 13 maj”, shkroi Lajçak në Twitter.

Kurti dhe Vuçiq nuk janë takuar në kuadër të dialogut për normalizimin e marrëdhënieve qysh në korrik të vitit të kaluar.

Nga kancelari Scholz, ata u pritën në takime të ndara.

Scholz tha se përparimi në dialogun Kosovë-Serbi është i një rëndësie “të madhe” për paqen dhe stabilitetin në Evropën Juglindore, ashtu si dhe për integrimin evropian të të dyja vendeve.

Scholz theksoi se njohja e pavarësisë së Kosovës nga Serbia është pjesë e dialogut për normalizimin e marrëdhënieve midis këtyre dy vendeve.

RFE/RL

Një avion ushtarak rus dyshohet se ka hyrë në hapësirën ajrore finlandeze mbi qytetet Kesalahti dhe Parikkala pranë kufirit të dy vendeve, tha Ministria finlandeze e Mbrojtjes.

Roja kufitare po heton se çfarë ka ndodhur, tha ministria. Avioni ishte një helikopter ushtarak Mi-17, i cili thuhet se ka fluturuar 4 deri në 4.5 kilometra në hapësirën ajrore finlandeze, raporton agjencia e lajmeve dpa.

Finlanda dhe Rusia ndajnë një kufi prej mbi 1,300 kilometrash dhe incidenti i së mërkurës ndodhi mes debateve intensive në Finlandë dhe Suedi nëse do të anëtarësohen në NATO, një pyetje që ka fituar vëmendje të madhe që kur Rusia filloi pushtimin e saj të Ukrainës.

Po ashtu u raportua se një avion ushtarak rus kishte shkelur për pak kohë hapësirën ajrore suedeze dhe daneze disa ditë më parë.

“Të gjitha iniciativat paralele me procesin e Berlinit, për Kosovën janë të pavlefshme”ka deklaruar Albin Kurti gjatë një konference të prbashkët shtypi me kancelarin gjerman Scholz ne Berlin. Pas takimit në kancelari kryeministri kosovar i është kundërvënë hapur nismës së Ramës dhe Vuçiçit duke i konsideruar si tentativa për ta hapur Ballkanin nga lindja. Ai e ka bërë këtë duke iu bashkëngjitur idesë së Olaf Scholz i cili deklaroi se Gjermania do të mbështesë rigjallërimin e procesit të Berlinit. “Vullneti është shumë i madh për të bërë ndryshime. E para është rigjallërimi i procesit të Berlinit…“Unë e di nga bisedat që kam zhvilluar që procesi i Berlinit vlerësohet shumë nga shtetet e Ballkanit. E di që shtetet e Ballkanit gëzohen shumnë që kancelari i Gjermanisë e vazhdon këtë proces. Ne po përgatitemi ta bëjmë në gjysmën e dytë të vitit” tha Scholz.
Pikërisht pas ketyre fjalëve ishte momenti kur kryeministri i Kosovës Albin Kurti theksoi se të gjitha iniciativat paralele me këtë proces, për Kosovën janë të pavlefshme.

“Iniciativat rajonale ne i mbështesim atëherë kur e kemi BE brenda si vlerë. Të gjitha iniciativat e tjera paralele që duan ta hapin Ballkanin nga lindja ne nuk i konsiderojmë dhe i quajmë të pavlefshme”, deklaroi Kurti. Lapsi

Kryeministri i Kosovës, Albin Kurti dhe presidenti i Serbisë, Aleksandar Vuçiq do të zhvillojnë sot takime të ndara në Berlin me kancelarin Olaf Scholz.

Lajmi është bërë i ditur nga ambasadori i Gjermanisë në Kosovë, Jorn Rhode përmes një postimi në Twitter.

Ai ka shkruar se Scholz do ta mbajë një konferencë të përbashkët me kryeministrin kosovar, pas takimeve, në orën 16:00.

Forcat ruse kanë deportuar pothuajse 40,000 njerëz nga Mariupoli për në Rusi ose në Donetsk, tha kryebashkiaku i Mariupolit, Vadym Boichenko, gjatë një konference.

“Ne kemi verifikuar tashmë listat e atyre që u deportuan nga Mariupol në Rusi ose në të ashtuquajturën Republikën Popullore separatiste të Donetskut. Gati 40 mijë persona. Tani ata kanë filluar t’i fshehin këto lista. Fatkeqësisht, ne nuk jemi në gjendje të verifikojmë gjithçka për momentin, por ne po vazhdojmë punën”, tha Boichenko, shkruan CNN, transmeton Gazeta Express.

Ushtria ruse “e çon popullsinë vendase në periferi të Rusisë, në Lindjen e Largët ose në Siberi dhe atje ata i përdorin për punë të ndryshme,” tha Boichenko, duke shtuar se banorëve të Mariupolit u lëshohet një certifikatë zhvendosjeje dhe se përfshihen në punë ofenduese.

RFE/RL
2 Minuten

Finlanda do të vendosë rreth aplikimit për anëtarësim në NATO më 12 maj, raporton gazeta finlandeze Iltalehti, duke cituar burimet e saj qeveritare.

Vendimi do të merrej me dy hapa: fillimisht, presidenti finlandez, Sauli Niinisto, do të njoftonte se ka dhënë miratimin, ndërsa grupet parlamentare do ta jepnin miratimin pas tij.

Radio Evropa e Lirë nuk ka mundur t’i konfirmojë këto detaje të dhëna nga gazeta Iltalehti.

Debati në Finlandë për anëtarësim në aleancën ushtarake të NATO-s ka nisur qëkur Rusia ka filluar pushtimin e Ukrainës, më 24 shkurt.

Debat i ngjashëm është duke u bërë edhe në Suedi.

Të dyja këto vende janë ushtarakisht neutrale tash e sa dekada.

Finlanda ndan një kufi prej 1,300 kilometrash me Rusinë, ndërsa Suedia nuk ka kufi direkt me shtetin rus.

Rusia ka paralajmëruar pasoja për NATO-n nëse lejon anëtarësimin e Finlandës dhe të Suedisë.

Zëdhënësi i Kremlinit, Dmitry Peskov, ka thënë se zgjerimi i NATO-s nuk do të sillte më shumë stabilitet në Evropë, ndërsa Dmitry Medvedev, anëtar i Këshillit të Sigurisë në Rusi, ka thënë se nëse Finlanda dhe Suedia i bashkohen NATO-s, Moska do të detyrohet të forcojë mbrojtjen e saj në Baltik, duke vendosur edhe armë bërthamore.

Në një tweet kryeministri i Mbretërisë së Bashkuar Boris Johnson shkruan:

“Unë fola me Presidentin @ZelenskyyUa më herët për të përcaktuar se si Britania e Madhe do të vazhdojë të ofrojë ndihmë ushtarake dhe humanitare për t’u dhënë ukrainasve pajisjet që u nevojiten për t’u mbrojtur. Unë jam më i përkushtuar se kurrë për të përforcuar Ukrainën dhe për të siguruar dështimin e Putinit.”

Avionët luftarakë të NATO-s të stacionuar në të dy rajonet e Baltikut dhe të Detit të Zi janë ngritur në emergjencë “shumë herë gjatë katër ditëve të fundit” për të gjurmuar dhe përgjuar aeroplanët rusë pranë hapësirës ajrore të aleancës, sipas një deklarate të postuar nga Komanda Ajrore Aleate e NATO-s, raporton CNN.

Radarët e NATO-s gjurmuan një numër avionësh të paidentifikuar mbi Baltik dhe Detin e Zi që nga e marta. NATO vuri në dukje se avionët rusë shpesh “nuk transmetojnë një kod transponder që tregon pozicionin dhe lartësinë e tyre, nuk paraqesin një plan fluturimi ose nuk komunikojnë”.

Në rajonin e Baltikut, avionë luftarakë nga Polonia, Danimarka, Franca dhe Spanja u përdorën në periudha të ndryshme për të kapur dhe identifikuar avionët që po afroheshin. Në rajonin e Detit të Zi, avionë nga Rumania dhe Britania e Madhe u përdorën për të hetuar gjurmët e avionëve të panjohur që i afroheshin hapësirës ajrore aleate, thuhet në deklaratë. Nuk ka asnjë tregues se avionët amerikanë kanë marrë pjesë në përgjime.

NATO tha se avioni rus nuk hyri kurrë në hapësirën ajrore të aleancës dhe “përgjimet u kryen në një mënyrë të sigurt dhe rutinë”. bw

Polonia ka dërguar qindra tanke në Ukrainë si pjesë e dërgesave të armatimeve të rënda për ta ndihmuar atë të fitojë luftën kundër Rusisë.

Varshava ka dërguar më shumë se 200 T-72 të prodhuara fillimisht nga Bashkimi Sovjetik, së bashku me artileri të lëvizshme, drone dhe raketahedhës si pjesë e një pakete prej 1.6 miliardë dollarësh.

Aleatët e Ukrainës kanë rritur masivisht mbështetjen për Kievin ndërsa luftimet e ashpra po zhvillohen në lindje, ndërsa gjeneralët e Kievit thonë se Rusia po pëson humbje ‘kolosale’ në betejën kryesore për Donbasin.

Oleksiy Arestovych, një veteran i shërbimit sekret ukrainas, i kthyer në këshilltar presidencial, pranoi se ushtria e tij po pësonte ‘humbje serioze’ në fushat e betejës në lindje, por këmbënguli se viktimat e Rusisë janë ‘shumë, shumë më të tepër’. bw

Logoja e Gazprom, kompania kryesore ruse e eksportit të gazit

VOAL- Vendet anëtare të BE-së nuk do të paguajnë për gazin rus në rubla: thanë të enjten zyrtarë të lartë të BE-së, duke kujtuar se afati i fundit për pagesat e ardhshme është caktuar për 20 maj. Qëndrimi vjen pasi Moska njoftoi ndalimin e furnizimeve për Poloninë dhe Bullgarinë në shenjë hakmarrjeje për mospërdorimin e monedhës ruse.

“Ajo që ne dimë, dhe ka një konsensus për këtë nga të gjitha Shtetet Anëtare, është se askush nuk është i gatshëm të paguajë” në rubla, thanë zyrtarët gjatë një takimi për shtyp.

Sanksionet kundër Rusisë, sipas burimeve evropiane, nuk ndalojnë angazhimin e një vendi me Gazprom ose Gazprombank, për sa kohë që pagesat për furnizimet me gaz vazhdojnë të bëhen në euro ose dollarë “në përputhje me kontratat ekzistuese” dhe të përcaktuara përpara dekretit të miratuar nga Kremlini më 31 mars, sipas të cilit kontratat respektohen vetëm pasi shumat e duhura të jenë konvertuar në rubla.

Të mërkurën, udhëheqësit evropianë kritikuan vendimin e Rusisë për të ndaluar furnizimet për Poloninë dhe Bullgarinë (të cilat janë vende të BE-së dhe anëtarë të NATO-s), duke e quajtur atë “shantazh” dhe duke akuzuar Kremlinin se dëshiron të përçajë Perëndimin për mbështetjen e tij për Ukrainën.

Ndërkohë, kancelari gjerman Olaf Scholz gjatë një udhëtimi në Japoni tha se edhe Gjermania po përgatitet për eventualitetin që Rusia të ndërpresë furnizimin me gaz. rsi-eb

Kryeministrja suedeze, Magdalena Andersson dhe kryeministrja finlandeze Sanna Marin.

RFE/RL

Sekretari i Përgjithshëm i NATO-s, Jens Stoltenberg tha të enjten se Finlanda dhe Suedia do të përqafohen me krahë hapur nëse vendosin të bashkohen me organizatën ushtarake prej 30 vendesh,

Deklarata e Stoltenbergut erdhi pasi mbështetja publike në Finlandë dhe Suedi për anëtarësimin në NATO rritet në përgjigje të luftës së Rusisë në Ukrainë.

Spekulimet e medias në të dy vendet sugjerojnë se të dy shtetet mund të aplikojnë në mes të majit.

“Është vendimi i tyre”, tha Stoltenbergut. “Por nëse vendosin të aplikojnë, Finlanda dhe Suedia do të mirëpriten ngrohtësisht dhe unë pres që procesi të shkojë shpejt”.

Ai nuk dha asnjë afat kohor të saktë, por tha se të dy shtetet mund të presin një mbrojtje nëse Rusia përpiqet t’i frikësojë ato që nga momenti kur bëhen aplikimet e tyre për anëtarësim deri sa ato të bashkohen zyrtarisht.

Stoltenberg tha se ai është “i sigurt se ka mënyra për të kapërcyer atë periudhë të përkohshme në një mënyrë që është mjaft e mirë dhe funksionon si për Finlandën ashtu edhe për Suedinë”.

Garancia e sigurisë kolektive e NATO-s siguron që të gjitha vendet anëtare duhet t’i vijnë në ndihmë çdo aleati të sulmuar.

Stoltenberg shtoi se shumë aleatë të NATO-s tani janë zotuar dhe kanë ofruar gjithsej të paktën 8 miliardë dollarë mbështetje ushtarake për Ukrainën.

Para fillimit të luftës në Ukrainë, presidenti rus Vladimir Putin kërkoi që NATO të ndalonte zgjerimin dhe të tërhiqte trupat e saj nga kufijtë e Rusisë. Pra, perspektiva e Finlandës dhe Suedisë fqinje, për t’iu bashkuar aleancës transatlantike nuk ka gjasa të mirëpritet në Moskë.

Finlanda ka një histori të mbushur me konflikte me Rusinë, me të cilën ndan një kufi prej 1,340 kilometrash. Finlandezët kanë marrë pjesë në dhjetëra luftëra kundër fqinjit të tyre lindor, për shekuj me radhë si pjesë e Mbretërisë suedeze dhe si një komb i pavarur.

Në periudhën e pasluftës, megjithatë, Finlanda ndoqi lidhje pragmatike politike dhe ekonomike me Moskën, duke mbetur ushtarakisht e paangazhuar dhe një tampon neutral midis Lindjes dhe Perëndimit.

Suedia i ka shmangur aleancat ushtarake për më shumë se 200 vjet, duke zgjedhur një rrugë paqeje pas shekujsh luftë me fqinjët e saj.

Të dy vendet i dhanë fund neutralitetit tradicional duke u anëtarësuar në Bashkimin Evropian në 1995 dhe duke thelluar bashkëpunimin me NATO-n. Megjithatë, shumica e njerëzve në të dy vendet mbeten me vendosmëri kundër anëtarësimit të plotë në aleancë – deri më tani.

Dje sekretarja e jashtme britanike tha se Rusia duhet të tërheqë të gjithë trupat e saj nga Ukraina, sipas BBC.

Liz Truss tha se rusët duhet të largohen jo vetëm nga zonat që kanë pushtuar gjatë javëve të fundit, por edhe nga zonat që ata morën nën kontroll tetë vite më parë. Ndërkohë pas deklaratës së Truss ka reaguar edhe ish zëvëndës komandanti i NATO-s.

Dërgimi i më shumë armëve ushtarake dhe përforcimi i mbrojtjes është cilësuar si “qasja e duhur”, nga ish-zëvendës komandanti i NATO-s në Europë, gjenerali Richard Shirreff.

Ish-komandanti ushtarak paralajmëroi se Putini mund të përgjigjet në mënyrë agresive, por argumentoi se ky veprim ishte i nevojshëm për të treguar se Perëndimi ishte serioz.

“Rasti më i keq është lufta me Rusinë. Duke u përgatitur për rastin më të keq, diçka e tillë ka shumë të ngjarë të pengojë Putinin, sepse në fund të fundit Putini respekton fuqinë,” tha ai. syri.net

Presidenti i Ukrainës Volodymir Zelensky, ka deklaruar se Rusia po përpiqet të destabilizojë rajonin përmes aktiviteteve ushtarake që po zhvillon në rajonin separatist të Moldavisë, në Trasnistria.

Zelenksy thekson se forcat e armatosura të Ukrainës janë të përgatitura dhe se nuk i frikësohen aspak një fronti të ri të pushtimit ushtarak.

“Ky është vetëm një nga hapat e Federatës Ruse. Kjo po ndodh për të destabilizuar rajonin dhe për të kërcënuar Moldavinë”, tha Zelensky .bw

Ministri gjerman i Ekonomisë, Robert Habeck, thotë se vendi është shumë afër ndalimit të plotë të importeve të naftës ruse.

Ministri gjerman i ekonomisë, Robert Habeck, ka befasuar në Varshavë me deklaratat për një ndalim të mundshëm të dërgesave të naftës nga Rusia. “Sot mund të them se një embargo është më e arritshme për Gjermaninë. Në ditët dhe javët në vijim, ne do të vazhdojmë ta zgjerojmë këtë pavarësi dhe do të largohemi me shpejtësi nga karburantet fosile. Por, siç thashë, ajo që disa javë më parë dukej një problem shumë i madh për Gjermaninë, është tkurrur ndjeshëm, kështu që pavarësia e Gjermanisë nga nafta ruse tani është shumë afër”, tha politikani i Të Gjebërve pas një takimi me ministren polake të klimës, Anna Moskwa, të martën në Varshavë.

Vetëm 12 përqind varësi
Pjesa e naftës ruse që blen Gjermania është vetëm rreth dymbëdhjetë për qind nga 35 përqind që kishte qenë në fillim të luftës. Dhe kjo nevojitet për rafinerinë PCK në Schvedt mbi Oder. “Dhe Shvedti mund të them vetëm se menaxhohet nga një kompani ruse, “Rosneft”. Modeli i biznesit të kompanisë shtetërore është blerja e naftës ruse. Për këtë naftë po kërkohet një alternativë. “Kjo alternativë është detyrë e ditëve të ardhshme”, tha Habeck. Ministri gjerman parashikoi që kjo të jetë çështje ditësh.

Ekspertët janë të mendimit se një embargo e naftës, ndryshe nga ndalimi i furnizimit me gaz, do të ishte i menaxhueshëm për ekonominë gjermane. Këtë e konfirmon edhe një studim i porositur nga Greenpeace, në të cilin ekspertët arrijnë në përfundimin se rafineritë në Gjermani që tani mund të bëjnë pa importe nga Rusia. Rritja e çmimit të benzinës dhe naftës për ngrohje do të jetë e kufizuar.

Furnihzim me naftë nëpërmjet Gdanskut
Vetëm pak javë më parë, Habeck-u ishte shprehur kundër një hapi të tillë, të paktën nëse ai do të bëhej në mënyrë të njëanshme nga Gjermania. Në një rast të tillë, nuk do të kishim të bënim vetëm “me prishjen e rehatisë individuale”, por me “përçarje të vendit në përmasa të mëdha” ekonomike dhe sociale. Çdo sanksion duhet të projektohet në atë mënyrë që Gjermania të mund të “qëndrojë” për dy ose tre vjet, tha Habeck atëherë.

Në prag të vizitës së Habeck-ut në Varshavë, u tha se porti i Gdańskut në Poloni mund të luante një rol të rëndësishëm për të siguruar që Shvedti të furnizohej me naftë nëpërmjet anijeve. Një naftësjellës i rëndësishëm nga Rusia, i cili, sipas rafinerisë, së fundmi përmbante deri në dymbëdhjetë milionë tonë, pra, 25 për qind të kërkesës së Gjermanisë për naftë bruto, del në qytetin e Brandenburgut mbi Havel.

Edhe Polonia do të furnizohet nga Gjermania
Rafineritë e Schwedtit dhe Lojnas furnizojnë gjithashtu pjesë të Polonisë me benzinë ​​dhe naftë. Pala gjermane është e gatshme të furnizojë pjesë të Polonisë me naftë në të ardhmen, tha Habeck-u. Habeck-u përmendi edhe rezervën e emergjencës, e cila plotëson kërkesën e Gjermanisë për tre muaj. Deri atëherë me siguri do të gjendet një alternativö pör rafinerinë e Shvedtit.

Polonia ndërkohë po kërkon që BE-ja të shkëputet përfundimisht edhe nga gazi rus: “Ne e vlerësojmë gjestin e BE-së me embargon e qymyrit. Ne presim të njëjtën embargo për lëndët e para të tjera ruse – pa vonesa të panevojshme, këtu dhe tani”, tha ministrja e klimës Moskva.

Sidomos Gjermania dhe Austria vazhdojnë të hezitojnë për t’u shkëputur nga gazi rus nga frika e dëmeve të rënda ekonomike. Habeck tha kohët e fundit se Gjermaniamund shkëputet nga gazi rus vetëm në mesin e vitit 2024./DW/

Pavarësisht luftës në Ukrainë, Gerhard Schröder qëndron pranë mikut të tij Vladimir Putin.

Deklaratat e bëra nga ish-kancelari në një intervistë janë kritikuar ashpër edhe nga brenda partisë së tij.

Ish-kancelari Gerhard Schröder shkaktoi acarim dhe zemërim të konsiderueshëm në politikën gjermane me intervistën e tij në “New York Times”.

Ndër të tjera, ai vazhdoi të mos distancohej nga presidenti rus Vladimir Putin pavarësisht luftës në Ukrainë – dhe relativizoi përgjegjësinë e tij për krimet e luftës në qytetin ukrainas Bucha.

Reagimet e indinjuara nga brenda dhe jashtë vendit pasuan menjëherë.

Udhëheqësi i SPD-së së North Rhine-Westphalian dhe kandidati kryesor për zgjedhjet shtetërore, Thomas Kutschaty, sugjeroi që Gerhard Schröder të largohej nga partia.

“Unë nuk mendoj se e gjithë sjellja e Gerhard Schröder është në përputhje me vlerat bazë të SPD-së”, tha Kutschaty për të online. “Ai duhet të mendojë urgjentisht nëse dëshiron të jetë ende anëtar i SPD-së apo mbështetës i Putinit”. Ai është i kënaqur që tashmë ka një procedurë urdhëri partie në qarkun e Hanoverit kundër ish-kancelarit: “Nëse vetë Gerhard Schröder nuk shkon, është detyrë e komisionit të arbitrazhit të marrë vendimet e duhura”.

Politikani i CDU-së, Marco Wanderwitz, ish-komisioner i Qeverisë Federale për Evropën Lindore, e quajti Schröder një “Kancelar të turpit”:

Ai “haptas e mbështeti përsëri kriminelin rus të luftës”. Schröder e ka qenë mik i ngushtë me Putinin që kur ishte kancelar (1998-2005). Në intervistë ai theksoi se ishte ende i gatshëm të përdorte këtë lidhje të mirë për të ndërmjetësuar midis Rusisë dhe Ukrainës. “Unë kam përfaqësuar gjithmonë interesat gjermane. Bëj ç’të mundem. Të paktën njëra palë më beson”, thotë ish-kreu i SPD. Politikani i gjelbër Volker Beck kritikoi në Twitter: “Një ndërmjetës që është në listën e pagave të njërës anë. Vërtet?”/t-online.de

Në Kiev ka nisur puna për çmontimin e një monumenti të “miqësisë ruso-ukrainase”. Monumenti i madh pranë lumit Dnieper u ngrit në vitin 1982 për të përkujtuar ribashkimin e Ukrainës dhe Rusisë.

Vilati Klitschko, kryebashkiak i Kievit, tha:

“Demontimi ka filluar sot dhe ne planifikojmë ta përfundojmë sonte. Ne po heqim skulpturën prej bronzi të dy punëtorëve, të instaluar në qendër të kryeqytetit ukrainas në vitin 1982.”

Rusia tani demonstroi “një dëshirë barbare për të shkatërruar shtetin tonë dhe ukrainasit paqësorë”, tha Klitschko.

Për 40 vjet, dy figura kanë qëndruar në një kodër me pamje nga Kievi.

Tetë metra të larta dhe të derdhura në bronz, ato përshkruajnë dy punëtorë sovjetikë – njëri me gjoks të zhveshur, të dy me tipare të gdhendura në mënyrë të pamundur, duke mbajtur lart një simbol të BRSS. Ato u ngritën këtu nën një “Harku i Miqësisë” titani për të simbolizuar bashkëpunimin dhe vëllazërinë midis popullit të Rusisë dhe Ukrainës.

(BalkanWeb)

Selia e ministrisë së sigurisë publike të republikës së vetëshpallur

VOAL- Shpërthimet në republikën e vetëshpallur, natyra e të cilave nuk është konstatuar, shkaktojnë frikën e zgjatjes së konfliktit të vazhdueshëm në Ukrainë.

Presidentja e Moldavisë Maia Sandu thirri Këshillin e Sigurisë Kombëtare të martën pas një sërë shpërthimesh në rajonin separatist pro-rus të Transnistria ngjallën frikën se konflikti në Ukrainë mund të përhapet në vendin e vogël të Evropës Lindore. Kreu moldav do të mbajë një konferencë shtypi pas takimit të sigurisë.

Në mëngjes, dy shpërthime dëmtuan një kullë radio dhe të hënën, autoritetet separatiste raportuan një sulm me granatë në një ndërtesë zyrtare në kryeqytetin rajonal Tiraspol. Të dyja incidentet nuk rezultuan me viktima.

Transnistria, pavarësia e vetëshpallur e së cilës nuk njihet nga komuniteti ndërkombëtar, u nda nga Moldavia pas një lufte të shkurtër civile pas rënies së Bashkimit Sovjetik. Territori, me një popullsi prej rreth 500,000 banorësh, është shumë i varur nga Rusia, e cila furnizon gaz falas dhe ka 1,500 personel ushtarak të dislokuar.

Cocieri, Moldavi: një fshat rebel në një rajon separatist

Qendra ruse e transmetimit të radios është prekur nga shpërthimet, raporton agjencia ruse e lajmeve TASS.

Dje, të hënën, edhe autoritetet e kësaj republike të vetëshpallur kishin deklaruar se selia e Ministrisë së Sigurisë Publike ishte skenë e një sulmi me granatëhedhës, i cili edhe në këtë rast nuk pati viktima.

Shpërthimet, origjina e të cilave nuk dihet, po ngjallin shqetësime në Moldavi, e cila tani ka frikë se mund të jetë gjithashtu viktimë e ofensivës ushtarake ruse.

Kremlini: “I shqetësuar”

Kremlini po “monitoron nga afër” situatën në Transnistri, zhvillimet e fundit të së cilës shkaktojnë “shqetësim”. Këtë e tha zëdhënësi i Kremlinit, sipas raporteve të agjencisë zyrtare ruse të lajmeve Tass. Aktualisht nuk janë planifikuar kontakte midis Presidentit rus Vladimir Putin dhe Presidentes së Moldavisë Maia Sandu, tha Kremlini. rsi-eb

Një nga emrat më të rëndësishëm të Prokurorisë së Antimafias Italiane, Prokurori i Catanzaros në Kalabri e një nga ekspertët më të mirë të luftës kundër mafias kalabreze Ndrangheta, Nicola Gratteri, në një intervistë eskluzive për RTV Ora e Ora News, ka komentuar raportin e fundit të Antimafias Italiane, sinjalet më preukupuese të aktivitetit kriminal të mafias në fokusin e zhvillimeve ndërkombëtare si dhe rolin e mafias shqiptare në botën e krimit të organizuar europian e botëror! Gratteri shprehet i preokupuar se pas luftës në Ukrainë, armët në zotërim të civilëve do të blihen nga mafiet, ndërsa për krimin e organizuar shqiptar thotë se është gjithmonë e më alarmues.

Alba Kepi: Prokuror, sapo ka dalë raporti i fundit i Antimafias Italiane. Cili është preokupimi e alarmi i të dhënave të kësaj analize gjashtë mujore në fokusin dhe të zhvillimeve të fundit ndërkombatare ?

Nicola Gratteri: Sipas raportit të fundit të Antimafias, sipas të dhënave specifike dhe të analizuara nga ne, në Itali kemi një Ndrangheta mjaft të fortë e që vazhdon të jetë lider në tregtimin e kokainës, Kanë një sasi të madhe parash në duar e me anë të tyre arrijnë të blejnë gjithcka që mund të blihet. Këtij kuadri i shtohen dy vështirësi të mëdha për ne për të luftuar mafiet e në vecanti Ndrangheta. E para është Covid që godit gjithë botën e që ka gjeneruar një krizë të madhe ekonomike duke vënë në vështirësi sidomos sektorin e ristoracionit, turizmin, hoteleritë. Sipërmarrjet pa një bazë të fortë ekonomike u detyruan t’i shisnin aktivitetet e tyre më cmim mjaft të ulët. E mafiet që kanë një disponueshmëri të madhe parash, arrijnë t’i blejnë ato. E në të njëjtën kohë mafiet po përgatitetn të gallbërojnë paratë e fondeve të Bashkimit Europian. Si pasojë e krizës shkaktuar nga Covid, në Itali po mbërrijnë paratë e aprovuara nga Institucionet Europiane për të ndihmuar vendet anëtare, e mafiet po përgatiten se si të mbërrijnë e të kapin paratë e këtyre fondeve. Jo vetëm për të fituar tenderat publikë por dhe në përfshihen nëaktivitete të specilizuara bonifikuese, apo duke ofruar punë krahë në të zezë me kosto të uëlt. E të gjitha këto përdoren për të shtuar pasurinë e mafies.

Vështirësia e dytë që kemi aktualsht në luftën kundër mafieve e në vecanti kundër Ndranghetas, është lufta në Ukrainë, që është një mundësi e artë për mafien. Po pse e them këtë? Jemi të preokupuar se pas përfundimit të luftës, armët do t’u mbeten civilëve të thjeshtë ukrainas, e mes tyre dhe artileri e rëndë, armë të sofistikuara. E sic ndodhi gjatë luftës në ish Jugosllavi, pas përfundimt të saj, mjaft familje kishin 5 o 6 kallasnikov në shtëpi, dhjetra kilogramë eksplozvi që i ruajtën duke menduar se mund të duhen në të ardhmen. Disa i ruajnë akoma, e disa të tjerë ia shitën këto armë, Ndranghetas, mafias puglieze Sacra Corona Unita, E pra këto armë armatosën mafiozëtm u përdorën për të luftuar mes tyre apo për të favorizuar aktivitetet e paligjshme, E njëjta gjë jemi të preokupuar se mund të ndodh dhe në fund të luftës mes Ukrainës e Rusisë. Pra në këtë këndvështrim kërkojmë më shumë vëmendje e duhet të jemi më të preokupuar.

Alba Kepi: E një kapitull i veçantë i këtij raporti është mafia e huaj që hapet me mafian shqiptare. Në intervistën e fundit të gati një viti më parë, ju deklaruat se mafia shqiptare është mafia e së ardhmes? A vazhdon të jetë kështu e çfarë preokupimesh shfaq analiza e fundit e Antimafias?

Nicola Gratteri: Unë ju them se mafia shqiptare po rritet shumë në nivel ndërkombëtar. Kur flasim për mafian shqiptare nuk duhet të mendojmë si 15 o 10 vite më parë kur sulmonin për të grabitur vilat e më të pasurve italianë në Toskana, Piemonte, Lombardi, Veneto o kudo që të mundin. Kur unë ju flas për mafian shqiptar, ju them se janë organizata kriminale mjaft të forta, që nisen mjaft të forta, mjaft të apsura nga Shqipëria, të afermuar mirë në planin prestigios të fuqisë. Gjej të evidentuar mirë mafian shqiptare në dy shtete, në Kolumbi, e në Hollandë, Në Kolumbi mafia shqiptare blen vetë e në rrugë të drejtpërdrejtë kokainë, ndërsa në Hollandë është forcuar shumë pasi në këtë shtet pasi është një vend ku lufta kundër mafias është mjaft e ulët, ka një sistem burgjesh mjaft garantues. Në Hollandë edhe nëse kapesh me 10 kg kokainë, rreziku i burgut është maksimumi 2 vite, pra pothujase asgjë. Sot në Hollandë gjen të aktivizuar mirë tre mafia; mafia kalabreze ndrangheta, mafia shqiptare e mafia afrikano veriore, kryesisht e përbërë nga tunizianë emigrantë. Më në fund prej një vit e më shumë autoritetet hollandeze kanë marrë koshiencën për cfarë po ndodh, e kanë nisur bashkëpunumin me ne. Në Hollandë është vrarë një gazetar, një bashkëpunëtor i drejtësisë e një avokat,e këto janë sinjale të forta, të rënda që lënë të kuptojnë se këto tre mafie nuk janë kalimtare në Hollandë, por kanë hedhur rrënjë e janë aty jo vetëm për të bërë biznes, por janë të strukturuara mirë.

Nga analizat e informacionet që ne kemi, duke i konfrontuar me kolegë të tjerë të forcave të rendit në botë, mafia shqiptare po fuqizohet gjithnjë e më shumë në Amerikën Latine.

Alba Kepi: Në vende të vogla e në zhvillim si Shqipëria, ku fenomeni mafia trajtohet si një krim i zakonshëm, cilat janë sinjalet për të kuptuar aktivitetin mafioz të krimit në jetën e përditshme, ekonomike, institucionale e drejtuese të një vendi.

Nicola Grattteri: Pasuria e papritur është sinjali i parë, Njerëz me punë të zakoshme që kanë një nivel jete mjaft të lartë. Sipërmarrës të vegjël me një nivel jetese milionare. Sipërmarrë që kanë të punësuar në fabrikë as 10 punëtorë, por që shpenzon për të jetuar sikur të zotëronte fabrika me 2000 punëtorë, E bërteta është që këta njerëz merren me trafiqe ilegale, janë njerëz që merren me riciklim parash. Korrupsioni i lartë është një tjetër sinjal i fortë e intimisht i lidhur me mafien. Në vendet ku ka korrupsion të lartë, nëpuënsit e adminsitratës publike mjaft lehtë mund të venë firma aty ku nuk duhet për 5 mijë o 10 mijë euro. Gjithashut ka një rrënim të sjelljes etiko morale, gjë që çon të jenë lehtësisht korruptive. E pra njerzit mafioz pa skrupuj, arrijnë të hynë në administratën publike, të fitojnë tendera, të blejnë aktivitete sipërmmarës duke dhënë para, pra duke korruptuar sistemin burokratik

Alba Kepi: Gjatë këtyre dy viteve të fundit ka pasur disa hetime që kanë lidhur Shqipërinë me Italinë, dosje hetimore me në qëndër bashkëpunimin mafioz me Ndrangheta. C’ndodh me këto hetime e pse nuk ka një vazhdim konkluziv të hetimeve të juaja dhe në Shqipëri, është krijuar preceptimi se pas një hetimi të rëndësishëm gjithçka mbetet në ajër në Shqipëri: Pse e çfarë ndodh?

Nicola Gratteri: Unë ju them se problemi parësor në bashkëpunim mes vendeve është sistemi gjyqësorë mjaft i ndryshëm, i largët nga njëri nga tjetri. E mbi këtë fakt mafiet luajnë shumë në favor të tyre. Kjo rëndesë, kjo vështirësi për të ndërvepruar sistemet me njëri-tjetrin ndihmon elementët e grupet mafioze.

RFE/RL

Bashkimi Evropian është duke shpresuar se gjatë kësaj jave do të ketë edhe një takim mes Kosovës dhe Serbisë në kuadër të dialogut në nivel të kryenegociatorëve.

Pas dështimit javën e kaluar që të arrihet marrëveshja për targat, një burim i bllokut evropian u ka thënë të hënën, 25 prill, gazetarëve se palëve u është përcjellë ftesa që të vazhdojnë diskutimet për këtë çështje dhe tema tjera.

Ky burim ka thënë se në takimet e fundit pala kosovare ishte e interesuar që të arrihet zgjidhje e përhershme për targat, ndërsa pala serbe ishte më shumë e interesuar për të ruajtur status quo-n.

Marrëveshja e përkohshme mes dy shteteve për targat parasheh mbulimin me letra ngjitëse të simboleve shtetërore në targat e makinave kur ato të kalojnë në territorin e njëra-tjetrës.

Sipas këtij burimi, palët janë “shumë afër” për të arritur dy marrëveshje tjera, atë për energji dhe për të pagjeturit.

“Sa i përket çështjes së të pagjeturve, praktikisht ka mbetur të zgjidhen vetëm dy fjalë, pra një gjysmë fjalie, që të kemi marrëveshjen”, ka thënë ky burim.

Në BE thonë se është e domosdoshme që të ketë shpejt marrëveshje, në mënyrë që të krijohen kushtet për takimin e nivel të lartë politik mes kryeministrit të Kosovës, Albin Kurtit dhe presidentit të Serbisë, Aleksandar Vuçiq.

“Të dy u kanë thënë përfaqësuesve të BE-së dhe Kuintit (Shtetet e Bashkuara, Franca, Gjermania, Italia dhe Britania) se janë të gatshëm të vijnë në takime, në kuadër të dialogut, kurdo që të ftohen nga BE-ja” ka thënë një zyrtar i BE-së.

Megjithatë, kryediplomati evropian, Josep Borrell ka thënë më parë se ai nuk do t’i ftojë palët në takim të tillë nëse nuk do të ketë sinjale të qarta se ato kanë gatishmëri për të arritur përparim në takime të tilla.

Arritja e marrëveshjeve për targat, për energji dhe të pagjeturit do të krijonte kushte edhe për takim në nivel të lartë mendojnë në BE.

Ky zyrtar i BE-së ka sqaruar se nuk ka pasur afat kohor për skadimin e marrëveshjes për regjimin e përkohshëm të përdorimit të letrave ngjitëse për targat, por mandati prej gjashtë muajsh ka qenë vetëm për grupet punuese për të paraqitur opsionet.

Këto grupe janë takuar tetë herë në gjashtë muaj. Por në asnjë rund nuk ka pasur pajtueshmëri mes tyre.

Burimet e BE-së kanë sqaruar po ashtu se për territorin e Kosovës vetëm autoritetet e Kosovës mund të lëshojnë targa të veturave dhe me këtë Serbia ishte pajtuar qëmoti.

Por megjithatë në BE kanë frikë se zbatimi me forcë i ndonjë vendimi nga ana e Kosovës mund të krijojë tensione të panevojshme prandaj kanë bërë thirrje që të mos ketë veprime të ngutshme dhe të njëanshme.

Marrëveshja e arritur më 30 shtator të vitit të kaluar në Bruksel, ka dalë pas disa ditësh trazira në veri të Kosovës, ku disa serbë lokalë kanë bllokuar rrugë, për të kundërshtuar vendimin e atëhershëm të Qeverisë së Kosovës për masa reciprociteti.

Me ato masa, makinat me targa të Serbisë, me të hyrë në territorin e Kosovës, është dashur të vendosin targa të përkohshme – ngjashëm siç kanë vepruar shoferët e makinave me targa të Kosovës kur kanë hyrë në Serbi.