VOAL

Europë

Franca premton mbështetje për planin e Ukrainës për t’i dhënë fund pushtimit rus

Ministri i Jashtëm i Francës, Jean-Noel Barrot, është zotuar se vendi i tij do ta mbështesë planin e Ukrainës për t’i dhënë fund luftës mbi dyvjeçare e gjysmë me Rusinë, duke thënë në Kiev të shtunën se do të punojë me zyrtarë ukrainas për të siguruar mbështetjen e vendeve të tjera për këtë plan.

Presidenti i Ukrainës, Volodymyr Zelensky, e shpalosi këtë javë para liderëve perëndimorë “planin e fitores” së Kievit, përmes të cilit shpreson se do ta detyrojë Rusinë t’i japë fund pushtimit të Ukrainës përmes bisedimeve.

Ky plan është duke u shqyrtuar nga partnerët perëndimorë të Ukrainës, mbështetja nga të cilët ka qenë jetik në përpjekjet e Kievit për t’i bërë ballë fqinjit të vet të madh.

Një pikë kyçe në plan është kërkesa për ftesë formale për Ukrainën për t’u bërë anëtare e NATO-s, të cilët mbështetësit perëndimorë kanë ngurruar ta shqyrtojnë pa përfunduar lufta.

“Një fitore e Rusisë do të ishte përulje para ligjit të të fortit dhe do ta shtynte rendin ndërkombëtar drejt kaosit”, tha Barrot në një konferencë të përbashkët shtypi me homologun e tij ukrainas, Andrii Sybiha.

“Kjo është arsyeja pse shkëmbimet tona duhet të na mundësojnë të shënojmë përparim në planin e fitores së presidentit Zelensky dhe t’i bindim sa shumë vende ta mbështesim atë”, shtoi ai.

Prej kur nisi pushtimi më 2022, Franca ka qenë një nga mbështetëset më të fuqishme ushtarake, diplomatike dhe ekonomike të Ukrainës në Evropë.

Ajo është duke e stërvitur pajisur një brigadë të re të ushtarëve ukrainas për dislokim në vijën e parë të frontit.

Presidenti francez, Emmanuel Macron, gjithashtu ka bërë thirrje më parë për një ndryshim të politikës nga aleatët perëndimorë të Ukrainës, që mund të ndryshojë natyrën e luftës – duke e lejuar Kievin të godasë bazat ushtarake brenda Rusisë me armë të sofistikuara me rreze të gjatë veprimi të siguruara nga partnerët perëndimorë, që përfshijnë edhe raketat nga Franca.

Armët me rreze të gjatë veprimi janë pjesë kyçe e planit të Zelenskyt me pesë pika, por deri tani aleatët e Kievit kanë ngurruar t’ia japin atij dritën jeshile.

Barrot gjithashtu njoftoi se Franca do ta kryejë dërgesën e parë të avionëve luftarakë Mirage 2000 në Ukrainë në tre muajt e parë të vitit 2025. Pilotët dhe mekanikët ukrainas janë stërvitur për t’i drejtuar dhe mirëmbajtur ata.

“Duke i bërë ballë pushtuesit me guxim të jashtëzakonshëm, ju nuk po luftoni vetëm për integritetin territorial të Ukrainës, por gjithashtu po mbani një vijë të frontit që ndan Evropën nga Rusia e Vladimir Putinit, që ndan lirinë nga shtypja”, tha ministri francez në Kiev. rel

Me raportet e progresit, Komisioni Evropian synon përshpejtimin e zgjerimit

Ndërtesa e Komisionit Evropian në Bruksel.

Vetëm pak javë para përfundimit të mandatit pesëvjeçar, Komisioni Evropian (KE) do të miratojë dhe bëjë publike paketën vjetore të zgjerimit dhe raportet e progresit për vendet e përfshira në këtë proces.

Do të jetë kjo paketa e fundit që miratohet nga përbërja e tashme e Komisionit, i cili është në largim e sipër.

Sipas planit, kjo pritet të ndodhë në takimin e Kolegjit të KE-së, më 30 tetor në Bruksel.

Plani i mëhershëm ishte që këto dokumente të miratoheshin më 16 tetor, por u shty për dy javë, për shkak të disa rrethanave.

Kur ishte përmendur 16 tetori për miratimin e paketës së zgjerimit, besohej se Komisioni i ri Evropian do të ishte i gatshëm ta niste mandatin që më 1 nëntor.

Por, ndërkohë, seancat për dëgjimin dhe votimin e kandidatëve për komisionarë të rinj u shtynë për dy javët e para të nëntorit, ndaj Komisioni i ri nuk do të jetë gati para 1 dhjetorit.

Sipas burimeve nga BE-ja, të cilat kanë pasur mundësi t’i shohin raportet e progresit në versionet e tyre të punës, pra si drafte, kësaj radhe pritet që ato të theksojnë një lloj përparimi për të gjitha vendet kandidate dhe për Kosovën si të vetmen “kandidate potenciale”.

Qëllimi i Komisionit është që, në njërën anë, të jetë objektiv në vlerësimin e gjendjes reale të vendeve nga procesi i zgjerimit, por, në anën tjetër, të mos jetë shumë kritik ndaj tyre, me qëllim që ta evitojë mundësinë që ndonjë vend anëtar i BE-së t’i përdorë pikërisht këto raporte për ta penguar avancimin e procesit.

Në pjesën politike të dokumentit strategjik për zgjerimin do të nënvizohen të arriturat kryesore gjatë vitit të fundit.

Në mesin e tyre pritet të përmendet vendimi i Këshillit Evropian nga dhjetori i vitit 2023 për t’i hapur negociatat e anëtarësimit me Ukrainën dhe Moldavinë, pastaj vendimi me kusht për t’i hapur negociatat edhe me Bosnje e Hercegovinën, si dhe dhënia e statusit të vendit kandidat Gjeorgjisë.

Mali i Zi, gjithashtu, shënoi një hap përpara me miratimin e raportit kalimtar për përmbushjen e kritereve nga kapitulli 23, që ka të bëjë me sundimin e ligjit.

Shqipëria, vetëm disa ditë para miratimit të Raportit të ri të Progresit për të, e hapi grup-kapitullin e parë të negociatave për anëtarësim në BE.

Të gjitha këto dhe të tjera do të përfshihen si të arritura në raportet e progresit për këto vende dhe në dokumentin për strategjinë e zgjerimit.

I vetmi vend për të cilin nuk ka pasur lëvizje në këtë drejtim, është Kosova.

Ajo e ka dorëzuar në dhjetor të vitit 2022 aplikacionin për anëtarësim në BE, por ajo kërkesë nuk është shqyrtuar ende.

Kështu, Kosova mbetet e vetmja nga dhjetë vendet e procesit të zgjerimit, që nuk e ka statusin e vendit kandidat.

Por, edhe për Kosovën, Raporti i Progresit pritet të jetë voluminoz dhe të analizojë reformat dhe performancën në të gjitha fushat, sikurse për të gjitha vendet tjera nga ky proces.

Raporti i Progresit për Kosovën dhe ai për Serbinë pritet të përmbajnë kritika për të dyja këto vende për mungesë të gatishmërisë për t’i zbatuar obligimet që dalin nga dialogu i tyre për normalizimin e marrëdhënieve, i lehtësuar nga BE-ja.

Kjo nuk do të jetë ndonjë befasi, pasi pakënaqësinë për mungesën e përparimit në dialog, në BE e kanë shprehur tashmë edhe publikisht.

BE-ja vazhdimisht rikujton Kosovën dhe Serbinë se rrugëtimi i tyre evropian varet edhe nga dialogu për normalizimin e raporteve mes tyre.

Një e arritur në raportet mes BE-së dhe vendeve të rajonit të Ballkanit Perëndimor është miratimi i Planit për Rritje dhe Reforma.

Fjala është për një paketë prej 6 miliardë eurosh, nga të cilat 2 miliardë janë grante pa kthim, ndërsa pjesa tjetër është në formën e kredive të favorshme.

Me këtë paketë synohet t’u ndihmohet vendeve të rajonit që të përgatiten për përparimin drejt integrimit në BE.

Pjesa që do të kërkojë më shumë nga vendet e rajonit në këto raporte të progresit, ka të bëjë me sundimin e ligjit, luftën kundër korrupsionit dhe reformat e administratës publike.

Ndonëse ka dallime mes vendeve kandidate sa i përket nivelit të progresit në këto fusha, të gjitha janë ende larg nga arritja e nivelit që kërkon BE-ja.

Komisioni Evropian pritet që, në veçanti, të bëjë ftesë për më shumë progres në sigurimin e një gjyqësori të pavarur, për respektimin e lirisë së shprehjes dhe për depolitizimin e administratës publike.

Nga vendet e rajonit edhe me këto dokumente pritet të kërkohet që të vazhdojnë bashkëpunimin në fushën e migrimit, përfshirë përshtatjen me politiken e azilit dhe të vizave të BE-së.

Pasi të miratohen nga Komisioni Evropian, këto raporte të progresit dhe paketa e zgjerimit do të shqyrtohen në muajin dhjetor edhe në Këshill nga vendet anëtare.

Në bazë të tyre, pritet edhe të merren vendime për hapjen apo mbylljen e kapitujve në procesin e negociatave të anëtarësimit për disa vende kandidate, sidomos për Malin e Zi dhe për Serbinë.

Gjithashtu, gjatë muajit dhjetor, pritet të zhvillohet edhe një samit i përbashkët i BE-së me vendet e Ballkanit Perëndimor.

Von der Leyen do ta vizitojë Ballkanin Perëndimor javën e ardhshme

Presidentja e Komisionit Evropian (KE), Ursula von der Leyen, do t’i vizitojë javën e ardhshme gjashtë vendet e Ballkanit Perëndimor, përfshirë Kosovën, për të shprehur përkushtimin e saj dhe të komisionit për angazhim në afrimin e rajonit drejt Bashkimit Evropian.

Von der Leyen, e cila në verë u rizgjodh për një mandat të ri pesëvjeçar, ka paralajmëruar se procesin e zgjerimit e ka ndër prioritetet kryesore dhe për këtë e ka caktuar një komisionare, e cila do të merret vetëm me zgjerimin e bllokut.

Sipas paralajmërimeve nga KE-ja, gjatë vizitës në rajon Von der Leyen do të përqendrohet më së shumti në ndihmën që BE-ja po u jep vendeve të rajonit për përshpejtimin e reformave dhe përgatitjeve për përparim më të shpejtë në procesin e integrimeve evropiane.

Von der Leyen do ta nisë turneun e saj në rajon të mërkurën, më 23 tetor, me ndalesën e parë Shqipërinë, ku do të takohet me presidentin Bajram Begaj dhe kryeministrin Edi Rama. ajo do të marrë pjesë edhe në përurimin e Kampusit të Kolegjit Evropian në Tiranë.

Më 24 tetor, ajo do të shkojë në Maqedoninë e Veriut dhe në Bosnje e Hercegovinë. Në Bosnje, ajo do t’i vizitojë edhe zonat e goditura nga përmbytjet e 4 tetorit, dhe do të shpreh gatishmërinë e BE-së për të ndihmuar në përballje me pasojat.

Në Serbi, Von der Leyen do të qëndrojë më 25 tetor, ku do të takohet me presidentin serb Aleksandar Vuçiq.

Von der Leyen do të udhëtojë pastaj për vizitë Kosovë të shtunën e 26 tetorit, ku do të takohet me presidenten Vjosa Osmani dhe kryeministrin Albin Kurti. Vizitën në rajon ajo do ta përfundojë me takimin me liderët e Malit të Zi të shtunën në Podgoricë.

Vetëm disa ditë pas vizitës së saj, Komisioni Evropian do t’i miratojë dhe publikojë paketën vjetore të zgjerimit dhe raportet e progresit për vendet e përfshira në këtë proces.

Fokusin e veçantë Von der Leyen do të ketë në paketën e BE-së për rritje dhe reforma në Ballkanin Perëndimor, e cila parasheh ndihmë financiare prej 6 miliardë euro për këto vende.

Të premten e kaluar, BE-ja i miratoi agjendat e reformave të pesë vendeve të Ballkanit Perëndimor, të cilat i kanë paraqitur ato si kusht për të përfituar nga paketa e Planit të Rritjes.

Kosova, e cila aplikoi për anëtarësim në BE më 15 dhjetor të vitit 2022, mbetet vendi i vetëm në rajon që nuk e ka ende statusin e vendit kandidat. REL

Paralajmërimi i Lagarde: Trumpi paraqet kërcënim për eurozonën

Christine Lagarde ka paralajmëruar se një presidencë e dytë e Donald Trump do të ishte një rrezik për ekonominë e eurozonës pasi BQE uli normat e interesit për herë të tretë këtë vit.

Presidentja e Bankës Qendrore Evropiane paralajmëroi për një “dështim” të mundshëm nëse kandidati republikan fiton zgjedhjet në SHBA në nëntor, ndërsa njoftoi një ulje të kostove të huamarrjes.

Politikëbërësit e BQE-së ulën normën e depozitave nga 3.5 për qind në 3.25 për qind sot, pasi thanë se ekonomia e eurozonës është goditur nga “surprizat e fundit në rënie” në aktivitetin ekonomik.

Qeveria gjermane këtë muaj parashikoi se ekonomia më e madhe e Evropës do të përballet me recesionin e parë dyvjeçar në dy dekada.

Ulja e normës së BQE-së vjen pasi Trump tha se planifikon të vendosë tarifa për mallrat jo-amerikane nëse ai merr detyrën.

Bashkimi Evropian ka përgatitur një listë të mallrave amerikane që mund të synojë me tarifa në rast të fitores së ish-presidentit, raportoi Bloomberg këtë javë, pasi blloku u kap në befasi nga taksat mbi eksportet e tij të çelikut dhe aluminit në vitin 2018.

Zonja Lagarde u pyet nëse mendonte se një rikthim i zotit Trump në Shtëpinë e Bardhë dhe plani i tij për të vendosur tarifa do të ndryshonte perspektivën për rritjen dhe inflacionin në zonën e euros.

Ajo tha se “tregtia është padyshim një element i rëndësishëm dhe si pjesë e shtytësve të aktivitetit në vijim, padyshim që kemi konsum dhe investime, por kemi edhe tregti”.

“Çdo kufizim, çdo pasiguri, çdo pengesë për tregtinë ka rëndësi për një ekonomi si ekonomia evropiane, e cila është shumë e hapur. Tregtia brenda vetes, natyrisht, por edhe tregtinë me pjesën tjetër të botës.

Çdo forcim i barrierave, tarifave, pengesave shtesë në këtë mundësi për të tregtuar me pjesën tjetër të botës është padyshim një dobësi”, tha ajo.bw

Gazeta gjermane: Integrimin e Shqipërisë e bllokon korrupsioni dhe krimi i organizuar

Gazeta e njohur gjermane, Zeit, shkruan se Shqipëria ka nisur negociatat me Bashkimin Europian. Por gazeta thekson se integrimin e Shqipërisë e pengon korrupsioni dhe krimi i organizuar. Më poshtë shkrimi i gazetës gjermane

Kanë nisur negociatat thelbësore për anëtarësimin e Shqipërisë në BE. Më shumë se dy vjet pas fillimit të bisedimeve të pranimit, përfaqësues nga BE dhe Shqipëria u takuan në kuadër të një takimi të 27 ministrave evropianë në Luksemburg. Aty u hapën kapitujt e parë të negociatave, të cilat ndër të tjera kanë të bëjnë me institucionet demokratike në Shqipëri.

“Ne do ta përgatisim Shqipërinë për BE-në deri në vitin 2030”, tha kryeministri shqiptar Edi Rama. Vendi i tij është “shumë i përkushtuar për të filluar përfundimisht pjesën më të vështirë të punës”. Sipas Ramës, lufta ruse kundër Ukrainës tregoi gjithashtu se Ballkani Perëndimor kontribuon në forcimin e Bashkimit Evropian – “prandaj Ballkani Perëndimor duhet të anëtarësohet në Bashkimin Evropian”.

Shqipëria u anëtarësua në NATO në vitin 2009. Shteti i Ballkanit Perëndimor kishte aplikuar për anëtarësim në Bashkimin Evropian në të njëjtin vit. Megjithatë, konferenca e parë ndërqeveritare për negociatat e anëtarësimit nuk u zhvillua deri në korrik 2022. Për vite me radhë, përparimi i Shqipërisë ishte i lidhur me atë të Maqedonisë së Veriut fqinje.

Pengesat për anëtarësimin e Shqipërisë në BE përfshijnë korrupsionin dhe krimin e organizuar. Në të njëjtën kohë, vendi po punon me BE-në për politikën e emigracionit. Shqipëria ka lidhur një marrëveshje emigracioni me Italinë, sipas së cilës do të pranojë çdo vit deri në 40 mijë persona dhe do të përpunojë kërkesat për azil përpara kufirit të BE-së.

Edhe Italia ka dërguar për herë të parë refugjatë në qendrat e diskutueshme të pritjes shqiptare. Sipas Ministrisë së Brendshme italiane, 16 persona u dërguan nga Lampedusa në Shqipëri me një anije të marinës. sn

Zelensky prezanton “Planin e fitores” që përfshin kërkesën për anëtarësim në NATO

Presidenti ukrainas, Volodymyr Zelensky, para Parlamentit të Ukrainës.

Presidenti ukrainas, Volodymyr Zelensky, e ka prezantuar një plan, që ai beson se do të ndryshonte kahen e luftës në të mirë të Kievit, dhe do të mund t’i jepte fund konfliktit me Rusinë, jo më larg se vitin e ardhshëm.

Në një fjalim të mbajtur para Parlamentit ukrainas, më 16 tetor, Zelensky ka bërë thirrje që “partnerët t’i heqin kufizimet për përdorim të armëve me rreze të gjatë në gjithë territorin ukrainas të pushtuar nga Rusia, në territorin rus dhe në infrastrukturën ushtarake të armikut”, dhe të ofrohet ndihmë në “furnizim të brigadave rezervë”.

Në “Planin e fitores” të përbërë prej pesë pikave, ai ka e ka hedhur poshtë mundësinë e copëtimit të territorit ukrainas, dhe ka bërë thirrje që Kievit të ftohet për t’iu bashkuar aleancës ushtarake të NATO-s, dhe që Kievi të pajisjet me një paketë strategjike parandaluese jobërthamore.

Lideri ukrainas ka thënë se do të prezantojë hollësitë e planit të enjten në një samit të Bashkimit Evropian, që do të mbahet në Bruksel.

Ai ka thënë se planin e ka diskutuar me liderë të Shteteve të Bashkuara, Mbretërisë së Bashkuar, Francës, Italisë dhe Gjermanisë.

Zëdhënësi i Kremlinit, Dmitry Peskov, ka thënë se Ukraina duhet të “kthjellet”, dhe e ka akuzuar Zelenskyn se vetëm e ka “kamufluar” një plan amerikan.

Moska kundërshton hapur anëtarësimin e Ukrainës në NATO, dhe një mundësi të tillë e përdor si pretekst pse e ka nisur luftën në Ukrainë, në shkurt të vitit 2022.

Kievi ka pritur të marrë një përgjigje për planin, në një takim që ishte planifikuar të mbahet në bazën Ramstein javën e kaluar në Gjermani, mirëpo takimi është shtyrë për shkak se presidenti amerikan, Joe Biden e ka anuluar udhëtimin, për shkak të uraganit Milton.

Zelensky ka thënë se pret përgjigje për planin para zgjedhjeve presidenciale të 5 nëntorit në Shtetet e Bashkuara – vendin që ofron përkrahjen më të madhe financiare dhe ushtarake për Kievin – meqë një fitore e kandidatit republikan, Donald Trump mund të zbehë përkrahjen e Uashingtonit.

Prezantimi i Zelenskyt vjen teksa Rusia vazhdon të rrisë presionin në qytetet dhe infrastrukturën ukrainase, dhe derisa ushtria ruse avancon në qytezën e rëndësishme Pokrovsk.

Më 16 tetor, Rusia e ka sulmuar Ukrainën me 136 dronë dhe dy raketa.

Forca ajrore ukrainase ka thënë se shumica e raketave janë rrëzuar prej sistemit për mbrojtje ajrore. REL

Inteligjenca gjermane: Rusia po përgatitet për një konfrontim të drejtpërdrejtë ushtarak me NATO-n

Shefat e inteligjencës gjermane lëshuan paralajmërime të rrepta për spiunazhin rus dhe përgatitjet për konflikt ushtarak me NATO-n, në një seancë parlamentare të hënën, shkruan Politico.

Gatishmëria e Moskës për të përdorur masa hibride dhe të fshehta ka arritur një “nivel të paparë më parë”, tha Bruno Kahl, kreu i shërbimit të inteligjencës së jashtme të Gjermanisë, ose BND, ndërsa paralajmëroi gjithashtu se “konfrontimi i drejtpërdrejtë ushtarak me NATO-n është bërë një opsion për Moskën”.

Qëllimi i Kremlinit është të ndajë Perëndimin në mënyrë që të pengojë aftësinë e Evropës për t’u mbrojtur duke, forcuar ushtrinë ruse në përgatitje për një sulm të mundshëm, u tha Kahl parlamentarëve.

“Putini do të vazhdojë të testojë linjat e kuqe të Perëndimit dhe do të përshkallëzojë më tej konfrontimin”, tha ai.

“Forcat e armatosura ruse ndoshta do të jenë në një pozicion, në aspektin e personelit dhe materialit, për të nisur një sulm kundër NATO-s më së voni deri në fund të kësaj dekade”, shtoi ai.sn

BE-ja miraton agjendat e reformave të Kosovës dhe katër shteteve tjera për Planin e Rritjes

Vendet e Bashkimit Evropian i kanë miratuar të premten agjendat e reformave të pesë vendeve të Ballkanit Perëndimor, të cilat i kanë paraqitur ato si kusht për të përfituar nga paketa e Planit të Rritjes, në vlerë prej 6 miliardë eurosh.

Komisioni i IPA-s (Instrumentet e Para-Anëtarësimit) i BE-së dha pëlqimin për agjendat e reformave të Kosovës, Shqipërisë, Maqedonisë së Veriut, Malit të Zi, dhe Serbisë.

I vetmi vend i rajonit, i cili duhet të presë ende miratimin e agjendës së tij, është Bosnje e Hercegovina, pasi që dokumenti që ky vend e ka dërguar në BE, nuk ka qenë komplet dhe nuk i ka adresuar të gjitha sugjerimet e dhëna nga Komisioni Evropian.

Për ketë ka njoftuar presidenca hungareze e Bashkimit Evropian.

Tani, vendet e Ballkanit janë një hap larg pranimit të pagesave të para nga ky plan miliardësh.

Komisioni Evropian pritet që më 16 tetor ta miratojë vendimin përfundimtar për zbatimin e pagesave dhe në këtë mënyrë do të jetë i gatshëm që t’i kryejë edhe pagesat e para nga kjo paketa për këto vende.

Por, para se të bëhen këto pagesa, vendet përfituese duhet t’i nënshkruajnë marrëveshjet dhe t’i ratifikojnë ato në parlamentet e tyre kombëtare, sepse dy miliardë euro do të jenë para pa kthim, ndërsa të tjerat do të jenë kredi të favorshme.

Me këtë paketë, BE-ja synon të ndihmojë rritjen ekonomike në vendet e rajonit dhe, në këtë mënyrë, ta përshpejtojë procesin e integrimit të tyre evropian.

Sipas një përllogaritje jozyrtare, Kosova do të mund të përfitojë mbi 880 milionë euro nga ky plan i rritjes.

Mbi 250 milionë euro, Kosovës do t’i ndaheshin si para pa kthim, ndërsa pjesa tjetër në formën e kredive të volitshme.

Rrjedhimisht, Kosovës do t’i paguheshin 7% e mjeteve si “parafinancim”, që i bie rreth 61 milionë euro. REL

Nga sistemet IRIS-T te dronët, Scholz i premton Ukrainës miliarda të tjera ndihmë ushtarake

Ukraina do të marrë një tjetër paketë miliarda dollarësh ndihmë! Gjatë vizitës së presidentit ukrainas Volodymyr Zelensky në Berlin, kancelari Olaf Scholz tha se Gjermania “qëndron e vendosur në anën e Ukrainës”.

Gjermania sapo i kishte dorëzuar Ukrainës një paketë të re mbështetjeje ushtarake me vlerë më shumë se 600 milionë euro. Kjo përfshin, ndër të tjera, sistemin e pestë të mbrojtjes ajrore IRIS-T SLM, mjetet luftarake të këmbësorisë, tanket kryesore të betejës, obusët vetëlëvizës, municionet e artilerisë dhe dronët.

“Deri në fund të vitit, me mbështetjen e partnerëve tanë, Belgjikës, Danimarkës dhe Norvegjisë, ne do të dorëzojmë gjithashtu një paketë të mëtejshme mbështetjeje ushtarake me vlerë rreth 1.4 miliardë euro për Ukrainën”, tha Scholz.

Paketa më pas përfshin sistemet e mbrojtjes ajrore të llojeve IRIS-T dhe Skynex, tankun anti-ajror Gepard, tanket obus me rrota, tanket kryesore të betejës, automjetet e blinduara, dronët luftarakë, radarët dhe municionet e artilerisë.

Të gjitha sistemet e shpallura nga Scholz ishin premtuar dhe miratuar tashmë vitin e kaluar. “Nuk kishte njoftime të reja, asnjë ndihmë të re”, ishte verdikti shkatërrues i blogerit të luftës “Ndihma gjermane për Ukrainën “, i cili dokumenton të gjithë ndihmën ushtarake gjermane për Ukrainën.

Scholz iu referua gjithashtu ndihmës ushtarake dypalëshe me vlerë 4 miliardë euro vitin e ardhshëm. Ai gjithashtu i bëri thirrje Parlamentit Evropian që të hapë shpejt rrugën për pjesën evropiane të huasë prej 50 miliardë dollarësh të shteteve të G-7 për Ukrainën.

“Mund të mbështeteni edhe te G7”, i tha Scholz, Zelenskyt.

Zelenskyj tashmë ka vizituar Kroacinë, Francën, Britaninë e Madhe dhe Italinë në udhëtimin e tij evropian. Ai në fakt donte të merrte pjesë në një samit të Ukrainës me 50 vende aleate të shtunën në bazën e forcave ajrore amerikane në Ramstein, Rheinland-Pfalz. Megjithatë, samiti u shty pasi presidenti amerikan Joe Biden (80) u anulua për shkak të uraganit Milton.

Kjo është vizita e dytë e presidentit ukrainas në Gjermani brenda pesë javësh dhe biseda e tretë personale me Scholz gjatë kësaj periudhe. Në fillim të shtatorit, Zelensky mori pjesë në një takim ministror të mbrojtjes të aleatëve në Ramstein dhe u takua me Scholz në Frankfurt.

Vetëm tre javë më vonë, të dy u takuan përsëri pak përpara Asamblesë së Përgjithshme të OKB-së në Nju Jork për një bisedë.bw

Gjenerali polak: Varshava duhet ta forcojë ushtrinë dhe ta përgatisë për luftë

Gjenerali Wieslaw Kukula

Polonia do të ketë nevojë për një ushtri shumë më të madhe, nëse kërkon të mbrohet nga ajo që duket të jetë një luftë e pashmangshme për këtë gjeneratë, citohet të ketë thënë një gjeneral i lartë polak.

Agjencia shtetërore e lajmeve PAP, citoi shefin e shtabit të forcave të armatosura, Gjeneralin Wieslaw Kukula, të ketë thënë se mplakja e popullsisë e bën të vështirë rekrutimin e ushtarëve të rinj.

“Gjithçka tregon se ne jemi brezi që duhet të luftojmë për ta mbrojtur vendin tonë. Unë dhe askush nga ju nuk kemi ndërmend ta humbasim këtë luftë”, tha Gjenerali Kulula gjatë një fjalimi përpara akademisë ushtarake të vendin në Universitetin e Forcave Tokësore në Wroclaw.

“Ne do ta fitojmë luftën dhe do të vazhdojmë ta ndërtojmë Poloninë, por diçka duhet të ndodhë. Ne duhet ta shtojmë rrethin e forcave të armatosura dhe t’i përgatisim për këtë lloj beteje”.

Gjenerali Kukula tha se kriza demografike do të ulë ritmin e rekrutimit.

“Fuqia e kundërshtarit është kaq e madhe sa duhet të krijojmë një ushtri shumë më të madhe, çka nënkupton aktivizimin e shërbimit të detyruar ushtarak”, citohet të ketë thënë zoti Kukula.

Aktualisht shërbimi ushtarak në Poloni nuk është i detyrueshëm.

Sipas të dhënave nga Ministria e Mbrojtjes e Polonisë, deri në fund të këtij viti Polonia do të ketë rreth 207,500 ushtarë, shifër që e bën atë ushtrinë e tretë më të madhe të vendeve të NATO-s, sa i përket personelit. Në vend të parë renditen Shtetet e Bashkuara dhe pas saj Turqia.

Gjenerali Kukula tha në muajin korrik se Polonia duhet t’i përgatisë forcat e saj ushtarake për një konflikt në shkallë të gjerë. Marrëdhëniet e Polonisë me Rusinë dhe Bjellorusinë janë përkeqësuar ndjeshëm që kur Moska filloi agresionin kundër Ukrainës fqinje në shkurt të vitit 2022.

Bashkimi Evropian: të gjitha gratë afgane kanë të drejtën e azilit

Gjykata Evropiane e Drejtësisë e ka vendosur – Statusi i refugjatit mund të njihet vetëm në bazë të seksit për shkak të diskriminimit të shkaktuar nga talebanët

VOAL- Të gjitha gratë afgane kanë të drejtën e azilit “vetëm” në bazë të gjinisë dhe kombësisë së tyre, për shkak të diskriminimit ndaj tyre nga talebanët: Gjykata Evropiane e Drejtësisë e vendosi këtë të premten, duke vendosur mbi një rast austriak. “Sipas vendimit të Gjykatës së Drejtësisë së Bashkimit Evropian (GJED), autoritetet kompetente të Shteteve Anëtare mund të konsiderojnë se nuk është e nevojshme të përcaktohet se aplikantja përballet me një rrezik real dhe specifik për t’iu nënshtruar akteve të persekutimit nëse kthehet në vendin e saj të origjinës. “Mjafton vetëm marrja në konsideratë e kombësisë dhe seksit të aplikantes,” shton vendimi.

Gjykata e Luksemburgut iu përgjigj një kërkese nga Gjykata Administrative austriake pasi autoritetet refuzuan t’i jepnin statusin e refugjatit dy grave afgane.

Duhet shënuar se në Zvicër praktika për këtë kategori është bërë më pak e ngurtë që nga vera e vitit 2023. RSI

Dënim të përjetshëm për organizatorin e sulmeve në Charlie Hebdo

Paris: Peter Cherif u shpall fajtor se kishte shtyrë mikun e tij të fëmijërisë Cherif Kouachi të sulmonte, bashkë me vëllain e tij, redaksinë e të përjavshmes satirike në 2015

VOAL- Në përfundim të gjyqit, dënimi, më i rëndë: burgim të përjetshëm. Të gjitha akuzat kundër Peter Cherif u njohën. Jo vetëm për pjesëmarrjen në rrëmbimin e tre francezëve nga një OJQ në Jemen në vitin 2011, duke iu bashkuar degës arabe të Al Kaedës deri në vitin 2018, kur më pas u arrestua, por mbi të gjitha për shkak se kishte shtyrë shokun e tij të fëmijërisë Cherif Kouachi të godiste, me vëllain e tij, redaksinë e së përjavshmes satirike Charlie Hebdo, të shfarosur më 2015.

Prandaj, Gjykata Speciale e Assizes e Parisit të enjten pranoi argumentet e prokurorisë dhe të palëve civile të cilat gjatë tre javëve të seancave dëgjimore përcaktuan rolin e tij si xhihadist fondamentalist dhe si gur themeli në përgatitjen e sulmit ndaj Charlie Hebdo 7 janar 2015 u kushtoi jetën 12 personave. Cherif kundërshtoi me një mur heshtjeje ndaj pyetjeve të gjyqtarit, gjithashtu i pandjeshëm ndaj thirrjes së nënës së tij për të folur dhe për të dhënë një shpjegim. 42-vjeçari pranoi vetëm se kishte marrë pjesë në rrëmbimin e bashkatdhetarëve të tij, por vetëm në rolin e përkthyesit dhe mohoi të kishte lidhje me sulmin ndaj të përjavshmes satirike.

Në një nga deklaratat e rralla, i akuzuari dënoi sulmin ndaj Charlie Hebdo dhe të gjitha sulmet xhihadiste, duke rezervuar disa deklarata për familjet e viktimave, ose duke evokuar “fatin” përpara dëshmisë së një të mbijetuari të Charlie Hebdo.

I lindur dhe i rritur në Paris, Cherif u konvertua në ekstremizëm fetar pasi dështoi në provimin pranues të parashutistëve të ushtrisë. Në fillim të viteve 2000, ai shkoi në mënyrë klandestine në Irak për të luftuar në radhët e milicive xhihadiste dhe ku u burgos në Falluxha. Pas arratisjes nga burgu, pariziani u arrestua nga shërbimet franceze në Siri dhe u gjykua në Paris në vitin 2011, nga ku u arratis, para dënimit, në Jemen, ku u ngjit në radhët e Al Kaedës në Gadishullin Arabik. Dhe ku, sipas hetuesve, miku i tij Kouachi iu bashkua për një periudhë stërvitore dhe më pas u ngarkua të shkatërronte ekipin editorial të Charlie Hebdo. Sherif ka afat deri në javën e ardhshme për të apeluar dënimin me burg të përjetshëm.RSI

PD rikthehet me të drejta të plota në PPE, Bylykbashi: Kryetari i opozitës mbahet në arrest pa asnjë provë

Partia Demokratike është rikthyer më të drejta të plotë në PPE. Nënkryetari i PD-së, Oerd Bylykbashi dhe deputetja Albana Vokshi kanë marrë pjesë në tryezën politike të PPE-së, të zhvilluar një ditë më parë.

Gjatë fjalës së mbajtur në këtë tryezë politike, Bylykbashi është shprehur se, kryetari i PD-së, Sali Berisha mbahet nën arrest pa asnjë provë dhe fakt, Ervin Salianji u dënua me dëshmitar të rremë dhe eurodeputeti, kandidati fitues i bashkisë së Himarës, Fredi Beleri u arrestua dhe dënua, po me dëshmitar të rremë.

Fjala e Oerd Bylykbashit në tryezën politike të PPE-së:

I nderuar President Weber, Të nderuar nënkryetarë dhe Sekretar i Përgjithshëm i PPE.

Të nderuar përfaqësues të partive simotra në PPE-së. Së pari, më lejoni të shpreh kënaqësinë që jemi përsëri pjesë e Forumet e familjes sonë politike.

Falenderojmë të gjithë ata që na mbështetën dhe bënë të mundur rikthimin tonë këtu. Pjesëmarrja jonë në këtë takim vjen në një moment vendimtar për ne. Pas gjashtë muajsh Shqipëria do të mbajë zgjedhje të përgjithshme.

Kryeministri i korruptuar socialist, Rama, kërkon të mbajë pushtetin për një mandat të katërt, me çdo kusht, përmes blerjes së votave me paratë e korrupsionit dhe krimit të organizuar si dhe presionit të shtetit. Tre vitet e fundit kanë qenë shumë të vështira për PDSH-në, nën sulmet e vazhdueshme të kryeministrit Edi Rama.

Rama ka përdorur të gjitha mjetet, përfshirë drejtësinë e kapur politikisht për të rrënuar PDSH-në dhe opozitën dhe për ta nxjerrë jashtë sistemit politik. Ky sulm vazhdon edhe aktualisht. Ne e kuptojmë se ndonjëherë është e vështirë të kuptosh dhe të besosh atë që po ndodh në Shqipëri.

Propaganda dhe lobimi i paguar me miliona euro nga korrupsioni, pikturojnë një fasadë vezulluese. Por, përtej lajmeve për lulëzimin e turizmit dhe gjesteve pompoze të kryeministrit Rama me liderët europianë, ekziston një realitet i ashpër i bashkëpunimit të pushtetit shtetëror, politikës dhe krimit të organizuar.

-Vendimet e Gjykatës Kushtetuese po injorohen hapur. Institucionet e pavarura kontrollohen nga shumica qeverisëse.

-Mediat kapen apo ushtrohet presion dhe ka raste kur gazetarë gjithashtu janë kontrolluar dhe arrestuar pa urdhër gjykate.

-Gjyqësori është nën kontrollin politik ndërsa ekonomia është e centralizuar në duart e miqve të kryeministrit dhe oligarkëve. Për momentin, tre figura politike të opozitës janë në arrest politik ose në burg; Dy janë deputetë të grupit parlamentar të Partisë Demokratike.

1. Kreu i PD-së dhe opozitës, Sali Berisha ndodhet në arrest shtëpie prej një viti. Asnjëherë nuk është marrë në pyetje nga prokurorët. Arrestimi i tij është antikushtetues pasi Parlamentit nuk iu kërkua heqja e imunitetit që kërkohet përpara kufizimit të lirisë së një deputeti.

2. Kryetari i Bashkisë së Himarës, i zgjedhur nga opozita, Fredi Bejleri, nga minoriteti grek, u arrestua dy ditë para zgjedhjeve të vitit të kaluar. Ai fitoi zgjedhjet, por u bllokua nga prokurorët dhe gjykatat për të bërë betimin me urdhër të kryeministrit Rama.

3. Katër ditë më parë, deputeti tjetër i PDSH-së Ervin Salianji u dënua me një vit burg. Gjithçka që bëri ishte denoncimi publikisht se vëllai i ministrit të Brendshëm ishte dënuar në Itali me 7.5 vjet për trafik droge. Ministri dha dorëheqjen, vëllai i tij u ekstradua brenda pak ditësh, por deputeti ynë është në burg sot që flasim, vetëm për hakmarrje politike.

Të tre rastet janë të bazuara në prova të fabrikuara. Këto janë fakte të pastra. Nuk është çudi nëse ne që përfaqësojmë sot PDSH-në këtu në këtë Asamble Politike, mund të arrestohemi për denoncimin e kryeministrit Rama.

Kjo është arsyeja pse kthimi i PDSH-së në forumet e PPE-së është kaq i rëndësishëm në këto muaj para zgjedhjeve. Ne sot bëjmë thirrje për mbështetjen e fortë dhe të zëshme të PPE-së dhe partive simotra, në përpjekjet tona për të rikthyer demokracinë në Shqipëri, përmes zgjedhjeve të lira dhe të ndershme dhe për të bërë të mundur rotacionin demokratik të pushtetit.

Faleminderit sn

Kroati Davor Stier bëhet shef i delegacionit të PE-së për raportet me Kosovën dhe Bosnjën

Kryetar i ri i delegacionit të Parlamentit Evropian për Kosovë dhe Bosnjë dhe Hercegovinë do të jetë eurodeputeti nga Kroacia, Davor Stier. Zëvendës të tij do të jenë Laurence Trochu dhe Tineke Strik.

Lajmin se është zgjedhur në krye të këtij delegacioni për raportet me të dyja vendet ai e bëri përmes një njoftimi në llogarinë e tij në Facebook..

“Delegacionet do t’i kushtojnë vëmendje të veçantë hapjes së negociatave të anëtarësimit me Bosnjë-Hercegovinën dhe përmbushjes së agjendës së reformave. Perspektiva evropiane e Kosovës me mbrojtjen e të drejtave të pakicave dhe zbatimin e rendit kushtetues në gjithë territorin e Republikës së Kosovës. Sfidat gjeopolitike me të cilat përballet BE-ja kërkojnë një angazhim më të fortë në Evropën Juglindore. Nga ky këndvështrim, stabiliteti dhe siguria në Bosnjë e Hercegovinë dhe Kosovë janë të një rëndësie vendimtare”.

Stier ka lindur më 6 janar 1972 në Buenos Aires. Ka përfunduar studimet për shkenca politike dhe marrëdhënie ndërkombëtare në Universitetin Katolik Papnor të Argjentinës.

Stier është ish-ministër i Jashtëm i Kroacisë në periudhën 2016-2017. Ai u zgjodh në Parlamentin Evropian në vitin 2024 dhe ishte gjithashtu anëtar i Parlamentit Evropian midis 2013 dhe 2016.

Ai është pasardhës i emigracionit politik kroat që shkoi në Argjentinë pas përfundimit të Luftës së Dytë Botërore. Gjyshi i tij nga babai, Ivan Stier, ishte kolonel ustash dhe bashkëpunëtor i Maks Luburiqit, transmeton Klankosova.tv.

NATO dislokon trupa në Kosovë dhe Maqedoni të Veriut: Mbajmë në nivel të lartë gatishmërinë!

Pothuajse 200 trupa nga Forcat e reja Aleate të Reagimit (ARF) do të dislokohen në Kosovë dhe në Maqedoninë e Veriut nga 30 shtatori deri më 16 tetor, për stërvitje që synojnë “gatishmërinë e tyre dhe mbështetje për KFOR-in”.

Kështu njoftoi NATO-ja më 30 shtator, duke thënë se kjo është hera e parë që forca të ARF-së do të dislokohen, që kur kjo forcë u krijua në korrik të vitit 2024.

Në Kosovë do të dislokohen 50 trupa të Ekipit Operacional të Ndërlidhjes dhe Zbulimit (OLRT) të ARF-së, ndërkaq 150 të tjerë në Maqedoninë e Veriut.

“Personeli i dislokuar do të performojë aktivitete stërvitore për të mbajtur në nivel të lartë gatishmërinë dhe për të testuar aftësitë e tyre dhe procedurat për dislokim të shpejtë të një force të madhe. Një pjesë e selisë së ARF-së do të integrohet përkohësisht në komandën dhe strukturat kontrolluese të misionit të KFOR-it dhe do të ketë për detyrë që të identifikojë kërkesat e mbështetjes logjistike, mbështetjen infrastrukturore dhe operacione për KFOR-in në rast të nevojës për një përforcim të pranisë së KFOR-it”, u tha në njoftim.

Sipas NATO-s, ARF-ja është një forcë strategjike, e gatishmërisë së lartë me aftësi të shumë fusha. Kjo forcë mund të dislokohet shpejt dhe mund të ofrojë ndihmë në mbrojtje në skenare të ndryshme.

NATO tha se dislokimi i fundit, së bashku me dislokimet e bëra më herët gjatë këtij muaji në Kosovë të Forcave Strategjike Rezervë (SRF), dërgojnë “mesazh të qartë të vendosmërisë të fortë të NATO-s dhe përkushtimit për të ruajtur paqen dhe stabilitetin në rajon, por edhe aftësinë e aleancës dhe gatishmërinë për t’u përgjigjur”.

Së fundi, Kosovë janë dislokuar trupa të Britanisë për të marrë pjesë në stërvitje me trupat e misionit paqeruajtës të aleancës ushtarake perëndimore në Kosovë, KFOR.

Ndryshe, KFOR-i është reaguesi i tretë i sigurisë në Kosovë, pas Policisë së Kosovës që është e para dhe pas misionit të BE-së për sundim të ligjit, EULEX.

Misioni i NATO-s në Kosovë po ashtu është përgjegjës për sigurinë e kufijve të Kosovës me Serbinë. Ndërsa, pjesën tjetër të vijës kufitare e mbikëqyr Policia e Kosovës./REL

Fitoi zgjedhjet, por do të qeveriset Austria nga ekstremi i djathtë?

Partia e ekstremit të djathtë, Partia e Lirisë (FPO), e udhëhequr nga Herbert Kickl, ka fituar zgjedhjet parlamentare të mbajtura në Austri të dielën, sipas projeksioneve fillestare. Rezultati zgjedhor potencialisht e vendos këtë parti në vendin e parë për të formuar Qeverinë, për herë të parë në historinë e pasluftës.

Sipas projeksioneve, FPO-ja ka dalë e para, por nuk ka fituar shumicën absolute. Kjo nënkupton se partisë i duhet të gjejë një partner koalicioni në Parlament për të formuar një Qeveri stabile, nëse presidenti Alexander Van der Bellen e fton këtë parti për të formuar ekzekutivin e ri.

Cilat janë opsionet e udhëheqësit të partisë?

E vetmja parti e ka lënë mundësinë e hapur për koalicion me FPO-në është partia konservatore në pushtet, Partia Popullore Austriake (OVP). Por, udhëheqësi i OVP-së, kancelari Karl Nehammer, e ka përjashtuar mundësinë e formimit të një ekzekutivi ku do të merrte pjesë edhe Kickl.

Përveç kësaj, janë edhe rezervat e Van der Bellen lidhur me Kickl. Të gjitha këto kanë shtuar pikëpyetjet lidhur me atë nëse Kickl do të largohet dhe do të lë ndonjë anëtar tjetër të partisë së tij që të bëhet kancelar.

Duke pasur parasysh se sa ashpër ai dhe partia e tij kanë bërë fushatë me idenë që Kickl duhet të bëhet “volkskanzler” apo kancelari i popullit, ky opsion aktualisht duket i pamundur.

FPO-OVP

Nëse FPO-ja ftohet që të formojë një koalicion qeverisës, e vetmja parti me të cilën mund të formojë një shumicë është OVP-ja.

Dy partitë kanë qëndrime të ndryshme në shumë fusha kyçe, veçmas sa i përket vendosjes së rregullave më të ashpra për imigrimin.

Por, këto dy subjekte mbështesin shkurtimin e taksave për të rritur ekonominë, e cila po tkurret qe dy vjet radhazi.

Negociatat, megjithatë, do të mund të ndërlikoheshin për shkak të raportit jo të mirë mes Kickl dhe Nehammer. Gjatë fushatës, Nehammer e ka përshkruar Kickl si person që merret me teori konspirative dhe si një person që nuk është i kualifikuar që të qeverisë.

Roli i OVP-së

OVP-ja është partia në pushtet. Ka qenë në çdo qeveri, përveç në ekzekutivin jetëshkurtër në detyrë që ishte Qeveria e parë e përbërë nga tri parti në 37 vjetët e fundit.

Përderisa shumë mendojnë se OVP-ja është partia më e afërt me FPO-në në aspektin ideologjik, OVP-ja të paktën në parim duhet të ketë një alternativë sa i përket një koalicioni me FPO-në: një aleancë trepalëshe me partinë që ka dalë e treta në zgjedhje, Partia Socialdemokrate dhe me një nga dy partitë që kanë marrë më pak se 10 për qind të votave, liberalët e Neos apo të Gjelbërit e krahut të majtë.

Në një skenar të tillë, OVP-ja do të ishte partia më e madhe, që nënkupton se Nehammer do të mund të vazhdonte të mbante postin e kancelarit. Një skenar i tillë do të ishte më i lakmueshëm sesa një ku OVP-ja do të ishte partnerja më e vogël e koalicionit qeverisës.

Pengesa presidenciale

Presidenti Van der Bellen, ish-udhëheqës i të Gjelbërve, kishte bërë betimin së bashku me ministrat nga FPO-ja, përfshirë Kickl, kur partia e tij formoi një koalicion me OVP-në më 2017. Koalicioni kolapsoi pas një skandali më 2019.

Van der Bellen po ashtu kishte miratuar vendimin për shkarkimin e Kickl nga Qeveria me kërkesën e kancelarit të atëhershëm, Sebastian Kurz, nga OVP-ja, disa ditë para se Parlamenti të rrëzonte ekzekutivin.

Presidenti austriak ka shprehur rezerva lidhur me Kickl, duke lënë të kuptohet se ai ose nuk do ta lejojë atë që të bëhet kancelar, ose nuk do t’i kërkojë FPO-së që të tentojë të formojë Qeverinë nëse del partia e parë.

Megjithatë, margjina e fitores së FPO-së është paraparë që të jetë më e madhe sesa projeksionet e para, duke e vendosur në një pozicion më të mirë Kickl.

Edhe pse është një praktikë që presidenti t’i kërkojë partisë së parë që të formojë Qeverinë, Van der Bellen nuk është i obliguar të veprojë kështu.

“Kjo është një praktikë, por me sa e di ky rregull nuk është në Kushtetutë”, tha Van der Bellen vitin e kaluar.

“Ajo çfarë është në Kushtetutë është se unë e emëroj kancelarin… Është një nga pikat e pakta ku presidenti i ka duart plotësisht të lira”.

Pra, Van der Bellen mund të vendosë që të ndërmarrë një qasje krejtësisht të re. /REL

Ambasadori Silvio Gonzato: Ja pengesat që duhet të kapërcejë Shqipëria para se të hyjë në BE

Ambasadori i Delegacionit të Bashkimit Europian në Tiranë, Silvio Gonzato thotë se Shqipëria duhet të kapërcejë disa pengesa madhore si korrupsioni apo krimi i organizuar, para se të hyjë në BE.

Shqipëria duhet të kapërcejë disa pengesa madhore para se të bëhet pjesë e Bashkimit Europian, veçanërisht korrupsionin dhe krimin e organizuar. Në një takim në Tiranë me gazetarë europianë që mbulojnë çështjet e BE-së, ambasadori Silvio Gonzato, i kushtoi vëmendje të veçantë reformës në drejtësi. Një ndër temat ku ai vuri theksin, ishte dhe çështja e të drejtës së pronës në vend.

“Kuadri ligjor i investimeve në Shqipëri duhet të përafrohet me standardet e BE -së, duhet të jetë i drejtë dhe i barabartë, gjithashtu edhe për investitorët e huaj. I ashtuquajturi “ligj i investimeve strategjike” i jep status preferencial atyre që konsiderohen investitorë strategjikë, të cilët më pas përfitojnë tokë në kushte shumë preferenciale ose ndonjëherë edhe me çmim shumë të ulët, nën çmimin e tregut. I gjithë procesi që çon në përzgjedhjen e investitorëve strategjikë është disi jotransparent, veçanërisht në jug të vendit” – tha Gonzato.

Ligji i investimeve strategjike është një ndër ligjet më të debatueshme në Shqipëri. Ndër rastet e hetuara është ai i investitorit strategjik Artan Gaçi, bashkëshortit të deputetes dhe njëkohësisht ish-ministres së Mbrojtjes dhe të Punëve të Jashtme, Olta Xhaçka. Gaçi, gjithashtu ish-deputet socialist, u shpall investitor strategjik nga qeveria për ndërtimin e një kompleksi turistik në Himarë, në vlerën rreth 5.5 milionë euro.

Reformat, të domosdoshme

Bashkimi Europian është një ndër investitorët më të mëdhenj të reformës së drejtësisë në Shqipëri. Duke folur për prioritetet që çojnë drejt anëtarësimit, ambasadori Gonzato u ndal edhe tek rezultatet e SPAK, strukturë të cilën e përshkroi si të ngjashme me “Anti-mafian” italiane.

“Reforma e vitit 2016 ka filluar të japë frytet e saj por në të njëjtën kohë ka krijuar dhe tensione mes palëve, pasi opozita e konsideron SPAK si të njëanshëm dhe si një mjet në duart e qeverisë që përdoret për t’i mbyllur gojën opozitës”. Kjo sipas Gonzatos, çon në rritjen e polarizimit të situatës politike në vend.

Duke folur për reformat në tërësi në të cilat po kalon vendi, ambasadori Gonzato vuri në dukje përmirësimet që po ndodhin brenda një kohe shumë të shkurtër, pavarësisht “trajektores jo-lineare, por me zigzage”. “Ekzistojnë grupe interesi që nuk kanë interes për të parë reformat e ndërmarra në kuadër të anëtarësimit në vend, të cilat po përparojnë shumë shpejt. Prandaj ne jemi këtu në Tiranë, dhe së bashku me Brukselin i mbajmë këto zigzage brenda kufijve”.

“Shqipëria nuk ka plan B”

Delegacioni i BE-së në Shqipëri është shumë optimist kur vjen puna tek rruga e mbetur për vendin, deri në hapjen përfundimtare të derës së Unionit. Gonzato tha se “Shqipëria nuk ka plan B, dhe rruga Euro-Atlantike është e vetmja që shqiptarët kanë zgjedhur”.

Deklarata e tij u bë dy ditë pasi Shqipëria u nda zyrtarisht nga Maqedonia e Veriut në rrugën drejt BE-së. Gonzato deklaroi para gazetarëve se vendi ka kapacitetin e nevojshëm për t’iu bashkuar Malit të Zi në radhën e anëtarësimit.

Në datën 15 tetor, Bashkimi Europian dhe Shqipëria do të mbajnë Konferëncën e dytë Ndërqeveritare në Luksemburg për të diskutuar “grupin e parë të kapitujve”. /DW

Scholz thotë se Gjermania s’do t’i japë leje Ukrainës për armët me rreze të gjatë

Kancelari i Gjermanisë, Olaf Scholz, ka ngulur këmbë se vendi i tij nuk do t’i heqë kufizimet ndaj Ukrainës në lidhje me përdorimin e armëve gjermane me rreze të gjatë veprimi kundër Rusisë, pavarësisht lutjeve të Kievit.

Qeveria i ka marrë “disa vendime” në lidhje me mbështetjen ushtarake për Ukrainën, të cilat “janë shumë të qarta për mua”, tha Scholz të hënën mbrëma në Nju Jork, ku do të takohet me presidentin ukrainas, Volodymyr Zelensky.

Scholz theksoi se në mesin e atyre vendimeve janë edhe kufizimet që ia ndalojnë Ukrainës të hedhë raketa gjermane thellë brenda territorit të Rusisë.

“Kjo nuk është në përputhje me qëndrimin tim personal… Ne nuk do ta bëjmë këtë dhe kemi arsye të mirë për këtë”, shtoi Scholz, i cili ndodhet në Shtetet e Bashkuara për të marrë pjesë në Asamblenë e Përgjithshme të Kombeve të Bashkuara.

Zelensky u është lutur vazhdimisht partnerëve perëndimorë ta lejojnë Ukrainën t’i përdorë raketat e tyre me rreze të gjatë veprimi për t’i goditur shënjestrat thellë brenda tokës ruse, përfshirë fushat ajrore dhe depot e naftës të përdorura nga ushtria.

Arma me rreze më të gjatë veprimi që Gjermania ia ka dhuruar deri tani Kievit është raketahedhësi MARS II, i cili mund ta godasë shënjestrën 84 kilometra larg.

Berlini i ka dhënë leje Kievit ta përdorë këtë raketahedhës vetëm në hapësirë të kufizuar brenda tokës ruse, në afërsi të qytetit kufitar ukrainas, Harkiv.

Scholz nuk ka pranuar ta furnizojë Kievin me armë precize me rreze të gjatë veprimi, pavarësisht vendimeve të aleatëve të Gjermanisë në NATO.

Gjermania nuk dëshiron t’i japë Ukrainës raketa lundruese Taurus, e cila mund të godasë rreth 500 kilometra larg, duke argumentuar se “kjo do ta rriste dukshëm rrezikun për përshkallëzimin e luftës”.

SHBA-ja, Britania e Madhe dhe Franca e kanë furnizuar Kievin me raketa lundruese të cilat mund ta godasin shënjestrën deri në 300 kilometra larg. Ato janë duke shqyrtuar vendimin se a ta lejojnë apo jo Kievin t’i përdorë këto raketa për sulme ndaj shënjestrave thellë brenda Rusisë.

Presidenti i Rusisë, Vladimir Putin, ka thënë se përdorimi i armëve të tilla nga Kievi do ta zhyste NATO-n në konflikt të drejtpërdrejtë me Rusinë. REL

Planet për “Vatikanin e Tiranës”, bektashinjtë e Turqisë kundër

Kryeministri Edi Rama, në mbledhjen e Asamblesë së Përgjithshme të OKB dy ditë më parë, prezantoi idenë e një shteti bektashi brenda territorit shqiptar, sipas një modeli të ngjashëm me atë të Vatikanit në Itali.

Por mesa duket, kjo ide nuk është përkrahur nga bektashinjtë e Turqisë, të cilët janë shprehur kundër krijimit të një shteti të tillë.

Përfaqësuesit e Federatës Alevi-Bektash nga Turqia në deklaratat e publikuara në rrjetin turk Haber Global në pronësi të Azerbajxhanit, thonë se bektashizmi dhe “shteti fetar” janë koncepte të papajtueshme me njëri-tjetrin.

Kryetari i Federatës Alevi Bektashiane të Turqisë, Zeynel Abedin Koç, tha: “Bektashizmi është një sistem besimi me origjinë nga Turqia. Megjithatë, në Shqipëri rreth 115.000 besimtarë bektashianë, dhe kjo përfaqëson 5% të popullsisë se Shqipërisë. Sekti bektashi alevi jeton prej shekujsh në këto anë. Më vonë Perandoria Osmane u zgjerua në Ballkan duke arritur deri në Hungari dhe Shqipëria u bë vendi më i rëndësishëm për ta. Filozofia alevi-bektash, 72 kombet i konsideron si Një, këshillon të gjithë të jenë sovran në veprimet e tyre, të duan fjalët e tyre dhe të qëndrojnë në anën e heroi Ali“.

Nga ana e tij, presidenti aktual i Federatës Alevi Bektashiane në Turqi, Husein Güzelgül, thuhet se ka deklaruar se ndërsa i konsideron hapat e ndryshëm të ndërmarrë nga vendet për të njohur besimin e sektit bektashi në mbarë botën në përgjithësi pozitive, ai gjithashtu mbështet pikëpamjen se besimi bektashinjve dhe shteti fetar nuk mund të shkojnë paralelisht.

“Ne nuk e konsiderojmë të drejtë shtetin e bazuar në fe. Një gjë e tillë nuk mund të ekzistojë aty ku ka paqe, harmoni e dashuri”, thotë ai.

Mbizotërojnë konservatorët dhe centristët! Franca shpall përbërjen e qeverisë së re dy muaj pas zgjedhjeve

Pallati presidencial francez bëri publike përbërjen e një qeverie të re ku mbizotërojnë konservatorët dhe centristët, më shumë se dy muaj pas zgjedhjeve që thelluan ndasitë politike, ndërsa Franca përballet me sfida financiare dhe diplomatike në rritje.

Një koalicion i krahut të majtë siguroi numrin më të madhe të vendeve në zgjedhjet parlamentare në qershor dhe korrik, por nuk arriti të fitonte një shumicë.

Grupet studentore dhe aktivistët e së majtës mbajtën protesta në mbarë vendin të shtunën kundër një qeverie që ata thonë se refuzon vullnetin e votuesve.

Presidenti Emmanuel Macron emëroi konservatorin Michel Barnier si kryeministër në fillim të këtij muaji, edhe pse partia republikane e tij pati një paraqitje të dobët në zgjedhje. Zoti Barnier e formoi qeverinë pas negociatave të vështira. Zoti Macron e dekretoi atël.

Partia e ekstremit të djathtë kundër imigracionit Bashkimi Kombëtar i politikanes Marine Le Pen nuk ka ministra në qeverinë e zotit Barnier, por ka vota të mjaftueshme në parlament për ta rrëzuar atë. Kjo parti siguroi një fitore jo të drejtpërdrejtë me emërimin e konservatorit të Bruno Retailleau si ministër të ri të brendshëm, detyra e të cilit përfshin çështje kritike të brendshme si siguria kombëtare, imigracioni dhe zbatimi i ligjit.

Përbërja dhe orientimi i qeverisë së Francës është i rëndësishëm sepse ky vend është një zë udhëheqës në politikën e BE-së, ndër ekonomitë më të mëdha të botës dhe anëtar i Këshillit të Sigurimit të OKB-së që ka armë bërthamore dhe të drejtën e vetos.

Kabineti prej 39 anëtarësh përfshin kryesisht ministra nga aleanca qendrore e zotit Macron dhe republikanët konservatorë. Jean-Noël Barrot, një politikan centrist i njohur për punën e tij në transformimin dixhital dhe çështjet evropiane, është ministri i ri i Jashtëm.
Ai sjell përvojë të gjerë në çështjet komplekse ndërkombëtare, veçanërisht brenda BE-së.

Ministri i ri i financave është Antoine Armand, një figurë gjithjë e më e njohur në politikën franceze që tani ka për detyrë të drejtojë politikat fiskale të Francës dhe të menaxhojë buxhetin e ardhshëm të vitit 2025, mes presionit nga Brukseli për të trajtuar borxhin në rritje të Francës.

Sébastien Lecornu do të vazhdojë të mbajë postin e tij si ministër i mbrojtjes. Ai ka qenë i rëndësishëm në forcimin e aftësive ushtarake të Francës, përfshirë modernizimin e sistemeve të mbrojtjes dhe menaxhimin e ndihmës ushtarake për Ukrainën.

Udhëheqja e tij në mbrojtje do të jetë vendimtare për rolin e Francës brenda NATO-s dhe tensionet gjeopolitike në rritje nga luftërat në Ukrainë dhe në Lindjen e Mesme.

Aftësia e zotit Barnier për të qeverisur në mënyrë efektive është tashmë nën vëzhgim. Kundërshtarët e tij politikë nga e majta zotohen ta sfidojnë atë në çdo hap, ndërsa e djathta ekstreme thotë se do të monitorojë nga afër qeverinë.

Sprova e parë e madhe politike për Kryeministrin Barnier do të vijë më 1 tetor, kur ai të mbajë fjalimin për politikat e tij në Asamblenë Kombëtare.

Gjermania ‘merr frymë’ e çliruar: AFD-ja ngec, kryeson me diferencë të vogël SPD

Socialdemokratët në Brandeburg duhet të ndjehen të çliruar dhe të festojnë këtë të diel. Të dhënat flasin për një fitore të SPD në zgjedhjet për qeverisjen e këtij landi. Sipas exit poll të ARD, Partia Socialdemokrate arrin 31,2% të votave, vetëm pak para AfD-së me 29.9%. Kurse sipas të dhënave të grupit studimor “Zgjedhjet” për televizionin ZDF, SPD kryeson me 31,8%, e dyta renditet AfD me 29,2%.

AfD, e cila kohët e fundit ishte kryesuese në sondazhe renditet në vendin e dytë. CDU arriti 11.5%, kurse Aleanca Sahra Wagenknecht (BSW) e sapo formuar arrin menjëherë 12%. Të Gjelbrit duhet të shqetësohen nëse do të kthehen në parlamentin e shtetit me 4,5% të votave. Kurse “E Majta” nuk ka gjasa të kalojë kufirin 5%. Në Brandenburg nuk hyjnë në parlamentin e landit partitë që arrijnë më pak se niveli 5% i votave, vetëm nëse arrijnë të marrin një mandat të drejtpërdrejtë.
Roli i kryeministrit Woidke

Zgjedhjet e së dielës ishin edhe një votim për të ardhmen e kryeministrit, Dietmar Woidke (SPD) me 3 mandate qeverisjeje deri tani. Ai kishte bërë të ditur, se nëse AfD arrin të dalë forca kryesore do të tërhiqej nga qeveria. Kryeministri i Brandenburgut, Woidke është mjaft popullor në land. Sipas barometrit të ZDF-së më 19 shtator, 59% e votuesve e dëshironin atë si kryeministër.

Para votimeve të gjitha partitë e kishin përjashtuar një koalicion me AfD. Zyra e Mbrojtjes Kushtetuese e ka kategorizuar degën e AfD për landin si rast të dyshuar ekstremist, kurse kandidatin e saj kryesor Hans-Christoph Berndt si ekstremist të djathtë. Me 73%, pjesëmarrja në votime ishte dukshëm më e lartë se në vitin 2019. Në atë kohë, 61,3% shkuan në votime.

Kjo vazhdimësi politike në Brandenburg është unike për shtetet e Gjermanisë Lindore. Aty ka pasur vetëm 3 kryeministra në 34 vjet, të gjithë nga e njëjta parti, dhe asnjë importim nga perëndimi, siç ndodhi në Saksoni dhe Tyringi pas ribashkimit të Gjermanisë. Ky është një land që është më shumë se një e treta është i mbuluar nga pyjet.

Me gati 2.6 milionë banorë, landi i Brandenburgut është i dhjeti në krahasim me 16 shtetet federale dhe me një mesatare prej 87 njerëz për kilometër katror duke u bërë më pak i populluari në Gjermani. Pothuajse 12% e njerëzve kanë prejardhje migracioni kur në mbarë Gjermaninë kjo shifër është 30%.sn

Kush do ta qeverisë në të vërtetë Evropën për 5 vitet e ardhshme

Në prezantimin e Komisionit të saj të ri, Ursula von der Leyen donte të nënvizonte se këtë herë ekzekutivi i saj do të punojë në një mënyrë shumë më kolegjiale, duke i ndarë detyrat sa më horizontalisht të jetë e mundur.

“Çdo anëtar është i barabartë dhe çdo komisioner ka të njëjtën përgjegjësi për të përmbushur prioritetet tona. Kjo do të thotë se të gjithë komisionerët duhet të punojnë së bashku”, tha ajo.

Me pak fjalë ajo premtoi një strukturë më ndërvepruese dhe të ndërlidhur.

Dhe nëse shqyrtojmë me kujdes strukturën e ekzekutivit të ri, del se ky horizontalitet do të thotë gjithashtu se portofolet që u caktohen komisionerëve të ndryshëm shpesh mbivendosen, gjë që do ta bëjë të vështirë për çdo individ që të ushtrojë një ndikim të madh vetëm në një politikë të caktuar.

Prandaj, në qendër do të jetë roli i “mbretëreshës” von der Leyen, e cila do të ketë fjalën e fundit për gjithçka.

Horizontale apo jo, si në çdo strukturë qeveritare, edhe në këtë Komision do të ketë një zinxhir komandimi, edhe pse është bërë pak më kompleks për t’u deshifruar. Poshtë presidentit do të jenë gjashtë nënkryetarë ekzekutivë. Midis tyre, më e fuqishmja (të paktën në letër) do të jetë spanjollja Teresa Ribera, një socialiste, e cila duket se është vendosur për të balancuar pushtetin e tepërt të krahut tjetër. Asaj iu dha edhe portofoli i rëndë i Konkurrencës, i cili deri më tani i përkiste liberales daneze Margrethe Vestager. Me pak fjalë, të gjitha rolet e rëndësishme dhe prestigjioze.

Detyra e saj do të jetë të udhëheqë tranzicionin industrial dhe politikat e saj do të ndikojnë në ekonomitë e të gjitha shteteve anëtare. Por në fakt, sërish në emër të horizontalitetit, Ribera është rrethuar fjalë për fjalë nga njerëz të njohur me portofol që mbivendosen me të tijin, dhe të cilët mund të punonin për t’i dhënë fund kërkesave të tij nëse do të tregoheshin tepër progresistë ose ambientalistë.

Holandezi i kursyer, Wopke Hoekstra, është emëruar Komisioner për Klimën, ndërsa një tjetër konservatore, suedezja Jessika Roswall, do të marrë përgjegjësinë për Mjedisin.

“Negociatat për klimën do të menaxhohen nga Hoekstra, edhe ato ndërkombëtare, edhe nëse Ribera do të jetë aktive për këtë çështje. Duhet të ketë bashkëpunim”, na shpjegon në mënyrë mjaft diplomatike një zyrtar i lartë i Komisionit.

Gjithashtu nga EPP janë Christophe Hansen dhe greku Apostolos Tzitzikostas, komisionerë për Bujqësinë dhe Transportin, dy nga sektorët në të cilët dispozitat e Marrëveshjes së Gjelbër janë sulmuar më shumë dhe ku bashkëjetesa nuk do të jetë e lehtë.

Mes nënkryetarëve, do të jetë edhe Raffaele Fitto, përgjegjës për Kohezionin dhe Reformat. Ndër detyrat e tij do të jetë monitorimi i zbatimit të Next GenerationEU, të ashtuquajturit Plani i Rimëkëmbjes, dhe për rrjedhojë të Pnrr-ve të ndryshme kombëtare. Në këtë detyrë, megjithatë, edhe ai, siç ndodhi me Riberën, u mbështet nga një komisioner i fuqishëm, ose më mirë një peshë e rëndë: letonezi Valdis Dombrovskis. Edhe pse i pari është nënkryetar dhe i dyti jo, “në këtë dosje do të jenë në krye të dy”, thotë zyrtari i lartë. Dhe ato do të jenë praktikisht në baza të barabarta.

Dombrovskis, i emëruar komisioner i thjeshtë, është ulur në detyrë në krahasim me mandatin e kaluar, kur ishte nënkryetar ekzekutiv. Por në realitet vetëm në dukje. Skifteri popullor i masave shtrënguese i është caktuar portofoli i Ekonomisë dhe për këtë arsye do të ketë për detyrë të kontrollojë llogaritë e shteteve anëtare. Për më tepër, Dombrovskis është vendosur direkt nën drejtimin e von der Leyen dhe do të duhet t’i përgjigjet asaj për punën e tij, duke anashkaluar nënkryetarët. E njëjta gjë do të jetë edhe për sllovakun Maros Sefcovic, dekan i ekzekutivit, i cili gjithashtu kishte një portofol strategjik, atë të Tregtisë, dhe për polakin Piotr Serafin, përgjegjës për Buxhetin. Me pak fjalë, kur bëhet fjalë për paratë, fjala e fundit i takon von der Leyen.

Dy figurat qendrore që do të merren me menaxhimin e një dosjeje tjetër shumë delikate, atë të emigrantëve, do të jenë austriaku Magnus Brunner dhe kroatja Dubravka Šuica, të dy ende në kuotën e PPE. I pari do të jetë komisioneri për Punët e Brendshme dhe Migracionin dhe i dyti për Mesdheun. Ky i fundit është një portofol i ri i cili do të ketë ndër detyrat e tij edhe forcimin e partneriteteve ekzistuese dhe krijimin e partneriteteve të reja me vendet e rajonit, sipas modelit të pakteve të përcaktuara tashmë me Tunizinë, Libinë dhe Egjiptin. Me pak fjalë, ajo do të kontraktojë gjithashtu menaxhimin e flukseve migratore, duke u përpjekur të krijojë bashkëpunime me vendet e nisjes së anijeve, linja e re e Evropës për këtë çështje.

Hungaria e Viktor Orban është ndoshta vendi që del më i dobësuar në këtë Komision, i cili tashmë duket se është në një bazë lufte me Budapestin që në fillim. Përfaqësuesi i saj, Olivér Varhelyi, është zhvendosur nga roli delikat i Zgjerimit në atë të Shëndetit dhe Mirëqenies së Kafshëve. Shëndetësia është një nga subjektet që mbetet një përgjegjësi kombëtare, ndaj në fakt ajo do të ketë pak fuqi efektive, edhe nëse do t’i duhet ende të merret me menaxhimin e një tregu delikat siç është ai i industrisë farmaceutike që karakterizohet nga pak lojtarë dominues.

E ndërkohë irlandezi Michael McGrath, është emëruar komisioner për sundimin e ligjit. “Zgjedhja e tij nuk është e rastësishme për këtë rol, sepse ka qenë ministër i Financave dhe detyra e tij do të jetë që në bashkëpunim me Komisionerin e Buxhetit të punojë për zbatimin e kushtëzimit në lidhje me fondet evropiane”, shpjegon më tej zyrtari i lartë për ne europianë.

Me pak fjalë, objektivi i tyre do të jetë të sigurojnë që gjithnjë e më shumë ata që shkelin rregullat e komunitetit të shohin shkurtimin e fondeve.

Një mesazh i qartë për Budapestin dhe për të gjithë ata që mendojnë të ndjekin të njëjtën rrugë si ai. bw

Von der Leyen: Gjashtë shtetet e Ballkanit Perëndimor e kanë vendin në Evropë

Presidentja e Komisionit Evropian (KE), Ursula von der Leyen, në Bruksel ka pritur në takim liderët e vendeve të Ballkanit Perëndimor.

Liderët nga Shqipëria, Kosova, Maqedonia e Veriut, Mali i Zi, Serbia dhe Bosnjë e Hercegovina udhëtuan në Bruksel për të mbajtur takim të nivelit të lartë me presidenten e KE-së.

“Sot prita liderët e gjashtë vendeve partnere të Ballkanit Perëndimor. Të gjashtë shtetet e kanë vendin në Evropë. Kjo është ajo për të cilën ne po punojmë. Paralelisht, ne po i afrojmë ekonomitë dhe tregjet e tyre me ekonomitë dhe tregjet tona me Planin e Rritjes prej 6 miliardë eurosh për rajonin”, u shpreh Von der Leyen në X.

Presidentja e KE-së ndau edhe video nga pritja, ndërsa në takim të pranishëm janë presidentët e Serbisë, Aleksandar Vuçiq, kryeministrat e Shqipërisë, Edi Rama; Kosovës, Albin Kurti; Maqedonisë së Veriut, Hristijan Mockoski; Malit të Zi, Millojko Spajiq; si dhe kryetarja e Këshillit të Ministrave të Bosnjë e Hercegovinës, Borjana Kristo.bw

Ursula von der Leyen drekë pune me liderët e Ballkanit Perëndimor në Bruksel- Të pranishëm Rama, Kurti dhe Vuçiçi!

Presidentja e Komisionit Evropian, Ursula von der Leyen, e cila është zgjedhur në krye të këtij institucioni edhe për një mandat të ri pesëvjeçar, do të mbledhë sot (19 Shtator) në një drekë pune në Bruksel udhëheqësit e vendeve të Ballkanit Perëndimor.

Të pranishëm në drekën e punës do të jenë kryeministri Edi Rama, homologu i tij, Albin Kurti dhe presidenti serb Aleksandër Vuçiç.

Me këtë takim, ajo do që të dëshmojë se edhe në mandatin e ri, do t’i kushtojë kujdes të veçantë këtij rajoni dhe në përgjithësi procesit të zgjerimit të BE-së.

Megjithatë, qëllim kryesor i këtij takimi është diskutimi për “agjendat e reformave dhe rritjes”, të cilat gati të gjitha vendet e rajonit të Ballkanit Perëndimor i kanë dorëzuar në Komisionin Evropian, si parakusht për të pranuar pagesat e para nga Plani i Rritjes për Ballkanin Perëndimor, i miratuar nga BE-ja në maj të këtij viti.

Von der Leyen ka qenë personalisht e angazhuar në promovimin e këtij plani, ndërsa atë e ka mbështetur edhe Parlamenti Evropian dhe vendet anëtare në Këshillin e BE-së.

Sipas burimeve në BE, takimi i von der Leyenit me udhëheqësit e vendeve të Ballkanit Perëndimor do të jetë një rast i mirë për të parë se ku kanë arritur këto vende me përgatitjet e tyre për t’i realizuar qëllimet e këtij plani.

Secili vend është dashur ta përgatisë një agjendë reformash, të bazuar në rekomandimet paraprake të trupave të BE-së.

Këtë e kanë bërë tashmë pesë vende të rajonit, ndërsa Bosnje e Hercegovina është e vetmja, e cila, për shkaqe të brendshme politike, nuk e ka bërë ende.

Kosova, ndërkaq, ka qenë ndër vendet e para që e ka dorëzuar planin e saj në Komisionin Evropian.

Pritjet në BE kanë qenë që, në mes të shtatorit, Komisioni Evropian t’i miratonte këto agjenda të vendeve të rajonit. Pritej që kjo të ndodhte edhe para takimit të 19 shtatorit, por procesi është shtyrë për muajin tetor.

Si arsye jozyrtare përmendet fakti se Bosnje e Hercegovina nuk e ka dorëzuar ende planin e saj. Dhe, marrë parasysh se në këtë vend së shpejti do të zhvillohen edhe zgjedhjet lokale, këtë nuk pritet ta bëjë deri në tetor.

Këto vonesa mund të ndikojnë, pastaj, që të mos realizohet qëllimi i Presidencës hungareze të BE-së, që pagesat e para për vendet më të avancuara, të bëhen para fundit të këtij viti.

Sipas një përllogaritjeje jozyrtare, Kosova do të mund të përfitojë mbi 880 milionë euro nga Plani i Rritjes. Mbi 250 milionë, Kosovës do t’i ndahen si para pa kthim, ndërsa pjesa tjetër në formën e kredive të volitshme.

Llogaritja për shumën financiare që do t’i takojë secilit vend, është bërë në bazë të Bruto Prodhimit Vendor (GDP), numrit të banorëve dhe disa kritereve të tjera.

Por, gjatë prezantimit të këtij plani, vendeve të rajonit u është thënë qartë se nëse nuk i kryejnë reformat pas një apo dy vjetësh, atëherë shuma do t’u shpërndahet vendeve tjera.

Përmes Planit të Rritjes për Ballkanin Perëndimor, Bashkimi Evropian planifikon të ndajë rreth 6 miliardë euro për vendet e këtij rajoni në periudhën prej vitit 2024 deri në vitin 2027.

Prej kësaj shume, dy miliardë do të jenë grante nga BE-ja pa kthim, ndërsa pjesa tjetër në formën e kredive të favorshme.

Qëllimi është që të ndihmohet rritja ekonomike dhe, në këtë mënyrë, të përshpejtohet edhe procesi i integrimit evropian të këtij rajoni.

Përfituese të këtyre mjeteve janë të gjitha vendet e rajonit: Kosova, Shqipëria, Maqedonia e Veriut, Mali i Zi, Bosnje e Hercegovina dhe Serbia.

Plani ka po ashtu qëllim të nxisë bashkëpunimin rajonal dhe zhvillimin e tregut të përbashkët në rajon, i cili gradualisht do të integrohej në tregun e përbashkët të Bashkimit Evropian.

Ky plan, sipas zyrtarëve të BE-së, nuk e ka në asnjë mënyrë qëllim që të krijojë një alternativë të zgjerimit të BE-së, por ta bëjë anëtarësimin e këtyre vendeve në BE më të lehtë.

Në BE vazhdojnë të rikujtojnë se për shfrytëzimin e mjeteve financiare nga Plani i Rritjes, vendet e rajonit duhet t’i përmbushin disa kushte, prej të cilave ato kryesoret kanë të bëjnë me sundimin e ligjit dhe sigurimin e procedurave për kontrollin financiar sipas standardeve evropiane. Panorama

Zyrtari i NATO-s bisedon me Bislimin për urën në Mitrovicë në margjinat e dialogut në Bruksel

Ndihmëssekretari i Përgjithshëm për Operacione i NATO-s, Thomas Goffus, i tha kryenegociatorit të Kosovës, Besnik Bislimi, se vendimi për hapjen e urës mbi lumin Ibër në Mitrovicë duhet të merret “përmes dialogut dhe në bashkërendim” me bashkësinë ndërkombëtare, njoftoi NATO-ja të martën vonë.

NATO-ja njoftoi në uebsajtin e vet se Goffus, së bashku me komandantin për operacione civile të Shërbimit të Veprimit të Jashtëm të BE-së, Stefano Tomat, pati takime të ndara me Bislimin dhe me kryenegociatorin e Serbisë, Petar Petkoviq, në margjinat e rundit të ri të bisedimeve mes dy vendeve të martën në Bruksel.

“Ndihmëssekretari i Përgjithshëm për Operacione bisedoi për gjendjen e sigurisë në Kosovë dhe shpalosi shqetësimet e sigurisë në rast të hapjes së mundshme për trafik të urës mbi lumin Ibër në Mitrovicë”, thuhet në njoftimin e NATO-s.

Goffus theksoi nevojën për një “zgjidhje gjithëpërfshirëse dhe afatgjate”.

“Ai nënvizoi se vendimet duhet të merren përmes dialogut dhe në kohë të duhur e në bashkërendim me bashkësinë ndërkombëtare, si dhe në një mënyrë që nuk e vë në rrezik komunitetin lokal apo trupat e NATO-s”, thuhet në njoftim.

Ai tha se KFOR-i ka prani mbi urë dhe po vazhdon të kryejë patrullime të rregullta në zonat përrreth.

Qeveria e Kosovës njoftoi në fillim të gushtit synimet e saj për ta hapur urën mbi lumin Ibër edhe për qarkullim të automjeteve, pasi ajo është e hapur vetëm për këmbësorë.

Hapja e urës – e cila ndan Mitrovicën në jug me shumicë shqiptare dhe në veri me shumicë serbe – u kundërshtua nga Shtetet e Bashkuara, BE-ja, por edhe nga vetë misioni i aleancës ushtarake, KFOR, të cilët thanë se ajo nuk duhet të hapet “në këtë kohë”.

Serbët lokalë protestuan kundër hapjes së urës gjithashtu.

Prej atëherë, kryeministri i Kosovës, Albin Kurti, ka thënë se Qeveria e tij është duke i vazhduar konsultimet dhe diskutimet me aleatët në lidhje me hapjen e urës.

Goffus ishte për një vizitë në Prishtinë në fund të gushtit, ku u bëri thirrje Kosovës dhe Serbisë të angazhohen në dialogun e ndërmjetësuar nga Brukseli dhe tha se shtimi i trupave të KFOR-it nuk ishte zgjidhja.

Ndërkohë, Bislimi dhe Petkoviq zhvilluan nga dy herë bisedime të ndara me të dërguarin e posaçëm të BE-së për dialogun, Miroslav Lajçak, i cili nuk arriti t’i bindë ata për një takim trepalësh me të martën në Bruksel.

Ata e akuzuan njëri-tjetrit për dështimin e takimit trepalësh. Bislimi tha se Serbia e “kushtëzoi agjendën e takimit me kërkesa të papranueshme për Kosovën”.

Por, Petkoviq e akuzoi Bislimin se nuk pranoi trepalësh për shkak të insistimit të palës serbe në tema si, Asociacioni i komunave me shumicë serbe.

Bislimi tha pas takimit se me Lajçakun kishte biseduar edhe për çështjen e urës, por nuk përmendi se kishte takim edhe me zyrtarin e lartë të NATO-s.

Ai tha se u pajtua me Lajçakun që Kosova dhe Brukseli të diskutojnë në të ardhmen edhe për mënyrën se si të veprohet me hapjen e urës mbi lumin Ibër, pa dhënë më shumë hollësi. REL

Ministrja e Jashtme e Gjermanisë paralajmëron: Nëse Ukraina humb luftën, Moldavia do të jetë shteti i radhës që do pushtohet

Ministrja e Jashtme e Gjermanisë, Annalena Baerbock, ka paralajmëruar se në rast se Ukraina do ta humbte luftën me Rusinë, “Moldavia do të ishte shteti i radhës”.

Ajo ka thënë të martën para gazetarëve se vetëm përkrahja për Ukrainën e garanton mbijetesën e Moldavisë, shtet fqinj me Ukrainën dhe Rusinë, ka raportuar Reuters.

Sipas saj, gjithçka që duhet bërë nënkupton edhe për stabilitetin e Moldavisë.

“Është e qartë se cili është shqetësimi kryesor i njerëzve; nëse Ukraina bie, Moldavia është shteti i radhës”, ka thënë Baerbock.

Ministrja gjermane ka vizituar kryeqytetin moldav Kishinau, për Platformën e Partneritetit me aleatë nga Franca dhe Rumania.

Gjatë vizitës, Baerbock ka thënë se presidenti i Rusisë, Vladimir Putin, ishte i vendosur ta destabilizonte Moldavinë, “por e arriti të kundërtën pasi Moldavia tash është në rrugën drejt anëtarësimit në Bashkimin Evropian”.

Moldavia ka qenë kandidate serioze që nga 2022-a për anëtarësim në BE.

Mbyllet raundi i bisedimeve Kosovë-Serbi në Bruksel, s’ka takim trepalësh

Kanë përfunduar takimet e ndara të kryenegociatorëve nga Kosova dhe Serbia në Bruksel, ndërsa pala evropiane nuk ia doli që t’i bindë ata për një takim të përbashkët.

Faktin se nuk do të ketë takim trepalësh, këtë e konfirmoi Besnik Bislimi, i cili dy herë është takuar me Lajçakun gjatë ditës. Kryenegocitorët kanë zhvilluar takime të ndara me Lajçak gjatë kësaj të marte.

Është ky një nga tentimet e palës evropiane që të organizojë një raund dialogu në nivel te kryenegociatorëve, ndonëse akoma nuk ka konfirmim nëse do të vijë deri tek takimi i përbashkët.

Një zyrtar evropian i informuar lidhur me takimet ne fjalë kë thënë se është vështirë të parashihet nëse do të ketë takim të përbashkët dhe se gjithçka do të varet nga atmosfera që do të dominojë gjatë bisedave të ndara.

Bislimi 2 orë takim me Lajçak
Besnik Bislimi, kryenegociatori i Kosovës ka përfunduar takimin e ndarë më Lajçak i cili kishte filluar në orën 9 dhe ka zgjatur gati 2 orë. Një takim të ngjashëm, me pas ai e ka zhvilluar edhe me homologun e Bislimit nga Beogradi, Petar Petkoviç, kryenegociatori serb.

Një ditë më parë, Peter Stano, zëdhënës i Bashkimit Evropian kishte paralajmëruar se në raundin e radhës do të diskutohen mënyrat si të shkohet tutje me zbatimin e marrëveshjes së arritur në Ohër në mars të vitit 2023, si dhe të gjitha çështjet tjera të cilat sipas Stanos, po ndikojnë në normalizimin ndërmjet Kosovës dhe Serbisë.

Paqartësitë lidhur me mbajtjen e takimit të përbashkët nisën qysh të premten që shkoi, kur kryenegociatori kosovar Besnik Bislimi nëpërmjet rrjeteve sociale konfirmoi gatishmërinë e palës kosovare për mbajtjen e takimit trepalësh, por se Serbia e ka refuzuar agjendën e ndërmjetësit.

Se kishte keqkuptime rreth agjendës, këtë e kanë konfirmuar disa burime në Bashkimin Evropian. Por këta zyrtarë shpjeguan se të dyja palët janë përgjegjëse për dështimin eventual të mbajtjes së takimit trepalësh. Gjithnjë sipas këtyre burimeve të dyja palët u përpoqën të diktojnë agjendën e takimit trepalësh dhe nuk u dakorduan me kërkesat e ndërsjella, teksa kanë injoruar propozimin origjinal të palës evropiane./ RTK

Gjuriq hesht pasi homologu i tij estonez tha se është e papranueshme t’i shtrëngosh duart me kriminel lufte

Ministri i Jashtëm i Serbisë, Marko Gjuriq, ka qëndruar dje për një vizitë zyrtare në Estoni, vizita e parë e një ministri serb në Talin pas plotë 14 vitesh, shkruan Gazeta Express.

Megjithatë dekonstruktiviteti serb dhe afërsia me Rusinë e Vladimir Putinit s’ka kaluar pa u përmendur dhe kritikuar nga kryediplomati estonez, Margus Tsahkna.

“Është e papranueshme të shtrëngosh duart me një kriminel lufte që është duke provuar të rrezikojë sigurinë e Evropës dhe sovranitetin e Ukrainës”, ka shkruar kryediplomati estonez në njoftimin e tij pasi kishte pritur Gjuriqin në takim zyrtar.

Gjuriq ndërkohë në njoftimin e tij për takimin s’e ka pasur asnjë fjalë për kritikën e fortë të kryediplomatit estonez për takimet që zv.kryeministri i Serbisë, Aleksander Vulin, ka zhvilluar me Vladimir Putinin.

Diplomati serb ndërkohë ka parur kohë që të ankohet për Veriun e Kosovës dhe për veprimet e “një anshme dhe të pa koordinuara të regjimit të Kurtit”./Express/

Von der Leyen zgjedh sllovenen Marta Kos komisionare të Zgjerimit

Presidentja e Komisionit Evropian, Ursula von der Leyen, paraqiti të martën përbërjen e re të Komisionit Evropian, e cila do të ketë mandat pesëvjeçar.

Postin e komisionares për zgjerim, ajo ka vendosur t’ia ndajë kandidates nga Sllovenia, Marta Kos.

Por, ajo do të emërohet zyrtarisht vetëm nëse merr mbështetjen e Parlamentit të Sllovenisë dhe të Parlamentit Evropian.

Kos nuk është nominuar formalisht nga vendi i saj.

“Çdo anëtar i ekipit tim do të sjellë përvojën dhe perspektivat e veta për Evropën”, shkroi von der Leyen në platformën X.

Portofoli i zgjerimit ka rëndësi të veçantë për rajonin e Ballkanit Perëndimor, sepse të gjashtë vendet e tij, plus Ukraina, Moldavia, Gjeorgjia dhe Turqia, janë në proces të zgjerimit.

Me përjashtim të Kosovës, të gjitha janë vende kandidate, e disa edhe në negociata për anëtarësim.

Kandidatura e Kosit ka shkaktuar kundërthënie në Slloveni, pasi opozita nuk dëshiron ta mbështesë e as të caktojë seancë dëgjimore në Komisionin përkatës parlamentar.

Autoritetet sllovene kanë ndërruar në momentin e fundit kandidatin e tyre, për t’i ndihmuar von der Leyenit të rriste numrin e grave në Komision, pasi ishte më pak se një e treta.

Megjithatë, kërkesa e von der Leyenit u pa nga disa si ndërhyrje në sovranitetin e një vendi anëtar të BE-së.

Kryetari i Komisionit për Çështje Evropiane të Parlamentit të Sllovenisë, Franc Breznik, i cili vjen nga opozita, ka refuzuar ta vendosë në rend dite konfirmimin e Kosit.

Për pasojë, von der Leyen nuk ka mundur ta propozonte Komisionin e ri më 10 shtator, kur ka qenë e planifikuar, por e ka shtyrë për 17 shtator.

Ajo e ka bërë tani këtë propozim, me pritjet që edhe Sllovenia ta përfundojë ndërkohë procedurën e saj.

Opozita në Slloveni ka akuzuar Kosin se ka qenë bashkëpunëtore e shërbimit sekret komunist të ish-Jugosllavisë.

Kos ka qenë ambasadore e Sllovenisë në Gjermani dhe në Zvicër.

Më herët ka punuar edhe në Qeverinë e Sllovenisë si drejtore për raportet me mediat.

Sipas traktateve të BE-së, secili vend anëtar ka të drejtë të ketë një komisionar. Për rrjedhojë, Komisioni Evropian ka po aq anëtarë sa ka edhe vende anëtare, përkatësisht 27.

Von der Leyen ka përsëritur disa herë se, gjatë mandatit të ardhshëm 5-vjeçar, do ta ketë prioritet zgjerimin e BE-së. REL

Një makinë përfundon mes publikut në Sallonin e Autove në Torino

VOAL- Shoferi i një makine rally humbi kontrollin e makinës gjatë paradës në Motor Show në Torino, duke u përplasur me barrierat pas të cilave ndodhej publiku. Dymbëdhjetë persona ishin të përfshirë. Disa u dërguan në spital, ndërsa të tjerët u trajtuan në vendngjarje. Aksidenti ka ndodhur në Piazza San Carlo. Policia ka nisur hetimet me drejtuesin e mjetit dhe organizatorët e ngjarjes. Sipas një rikonstruksioni fillestar, drejtuesi i Lancia Delta ka bërë manovër të gabuar. Makina po udhëtonte me shpejtësi të ulët. Ekipet e shpëtimit mbërritën menjëherë në vendngjarje me dy ekipe nga Kryqi i Gjelbër i Torinos dhe dy nga Kryqi i Kuq i Moncalieri.ANSA/RSI

Presidentja e KE takim me liderët e rajonit, Von der Leyen pret krerët e Ballkanit Perëndimor në Bruksel të enjten

Presidentja e Komisionit Evropian (KE), Ursula von der Leyen, më 19 shtator do të zhvillojë një takim me liderët e gjashtë vendeve të Ballkanit Perëndimor, tha zëdhënësi Eric Mamer.

Sipas zëdhënësit të KE-së, takimi i së enjtes do të mbahet në ndërtesën e Komisionit Evropian në Bruksel.

Liderët e Shqipërisë, Kosovës, Malit të Zi, Maqedonisë së Veriut, Bosnjë-Hercegovinës dhe Serbisë janë të ftuar në takimin e von der Leyen, por emrat se cilët do të përfaqësojnë secilin shtet ende nuk janë bërë të ditur ende.

Më 27 qershor të këtij viti, Këshilli Evropian emëroi von der Leyen për një mandat të dytë si presidente të Komisionit Evropian. Më 18 korrik, ajo u rizgjodh për një mandat pesë-vjeçar pas një votimi të fshehtë në Parlamentin Evropian. bw

Përmbytjet historike në Evropën Qendrore rritin evakuimet

Një digë në Poloninë Jugperëndimore shpërtheu dje në mbrëmje vonë, pas reshjeve të dendura, ndërsa ekipet e emergjencës në Poloni, Çeki dhe pjesë të Austrisë vazhdojnë të përballen me përmbytje të mëdha, të konsideruara historike, për shkak të reshjeve që nuk kanë të pushuar në të gjithë Evropën Qendrore.

Komuna e Silezisë së Poshtme, Bystrzyca Klodzka, në Poloni tha se diga në Miedzygorze ishte tejmbushur, pavarësisht përpjekjeve për të larguar ujin dhe për të parandaluar përmbytjen.

Autoriteti Rajonal i Menaxhimit të Ujit në Wrocław e quajti situatën ”kritike” duke nxitur evakuime nga fshatrat.

Diga, e ndërtuar në fillim të shekullit XX në luginën Klodzko, në kufirin e Polonisë me Çekinë, është 29 metra e lartë.

Rezervuari i saj i kontrollit të përmbytjeve mund të mbajë pothuajse një milion metra kub ujë.

Që nga mëngjesi i së premtes, më shumë shi ka rënë në Poloninë Jugperëndimore sesa gjatë të ashtuquajturës përmbytje të mijëvjeçarit, të vitit 1997, dhe niveli i alarmit është tejkaluar në 47 stacione matëse në të gjithë vendin.

Reshjet e dendura në rajonin e lumenjve Elba dhe Vltava në Çeki shkaktuan rritjen e nivelit të ujit të Elbës.

”Autoritetet kanë lëshuar nivelin e tretë të alarmit për përmbytjet për rreth 20 lumenj dhe përrenj. Më shumë se 60 000 familje çeke kanë mbetur pa energji elektrike pas stuhive të forta”, njoftoi agjencia çeke e lajmeve CTK.

Zona e Mikulovices, pranë kufirit polak, u përmbyt në mëngjes herët, siç shihet në pamjet e publikuara nga televizioni çek në platformën e mediave sociale X.

Në qytetin jugor të Ceske Budejovice, zjarrfikësit kanë ngritur barriera kundër përmbytjeve përgjatë lumenjve Malse dhe Vltava që nga mbrëmja e së premtes.

Në Pragë, përgatitjet për përmbytjen e pritshme të Vltava ishin të plota, me barriera përmbytëse që u ngritën përgjatë brigjeve të lumit.

Trafiku i transportit është pezulluar.

Nivelet e ujit në lumenjtë në Çeki pritet të rriten më tej gjatë fundjavës, sipas meteorologëve.

Disa zona kanë parë nga 50 deri në 110 litra reshje për metër katror që nga e premtja.

Ndërkohë, në Austri, 42 komuna janë shpallur zona katastrofash pasi nivelet e përmbytjeve në vend vazhduan të rriteshin.

Situata është veçanërisht e tensionuar përgjatë lumenjve Kamp dhe Kremps, të cilët derdhen në Danub.

Stephan Pernkopf, zëvendësguvernator i Austrisë së Poshtme, tha se mbrojtja e rajonit nga përmbytjet – e forcuar pas përmbytjeve të rënda në 2002 – ishin krijuar për t’i bërë ballë përmbytjeve që ndodhin statistikisht një herë në 100 vjet.

Megjithatë, me reshjet e dendura të shiut që pritet të vazhdojnë, meteorologët paralajmërojnë se situata mund të përkeqësohet.

Ata thonë se Danubi mund të arrijë nivelet që shihen një herë në 30 vjet në rajonet Weinviertel dhe Mostviertel të Austrisë.

Të paktën pesë persona u vranë në Rumaninë Lindore të shtunën pasi vendi u godit nga shirat e dendur dhe përmbytjet.

Ukraina, më afër marrjes së lejes për sulme me armë me rreze të gjatë brenda Rusisë

Presidenti ukrainas, Volodymyr Zelensky, për muaj të tërë po u lutet Shteteve të Bashkuara dhe Britanisë që t’i japin të drejtë që të përdorë raketat e tyre me rreze të gjatë veprimi për të sulmuar thellë brenda Rusisë.

Ai, më në fund duket se është afër arritjes së këtij qëllimi.

Javëve të fundit ka pasur një momentum lidhur me heqjen e këtyre kufizimeve, para se të mbahej një takim kyç mes presidentit amerikan, Joe Biden, dhe kryeministrit britanik, Keir Starmer, në Uashington më 13 shtator. Dy liderët pritej të diskutonin mbi mbështetjen për Ukrainë, por jo edhe që zyrtarisht të njoftonin për ndryshim të kësaj politike.

Por, vetë takimi dhe informacionet e tjera të raportuara gjatë javës dhanë pamjen se diçka po ndodhte. I pyetur më 11 shtator nëse ai do të hiqte kufizimin për përdorimin e raketave me rreze të gjatë veprimi, Biden tha “ne po punojmë për këtë”, duke sinjalizuar një ndryshim të mundshëm në qëndrimin e tij. Deklarata erdhi pasi shumë anëtarë të Kongresit amerikan, përfshirë edhe nga Partia e tij Demokratike, i bënë thirrje presidentit që të zbuste politikën e tij.

“Pres që së shpejti të shohim një njoftim për lehtësimin e kufizimeve. Ka pasur një intensifikim të jashtëzakonshëm drejt kësaj dhe do të ishte shumë e vështirë që të ketë një tërheqje”, tha për Radion Evropa e Lirë, Mark Cancian, analist ushtarak në Qendrën për Studime Strategjike dhe Institucionale.

“Dyshoj se SHBA-ja dhe Mbretëria e Bashkuar po përcaktojnë kushtet, veçmas sa i përket caqeve, sepse ata do të duan të kufizojnë sulmet vetëm në caqe ushtarake, në mënyrë që të shmangen viktimat civile”.

Caqet e mundshme të lejuara për sulme me rreze të gjatë veprimi do të përfshinin bazat ajrore, qendrat logjistike, depotë dhe selitë, tha ai.

Që nga fillimi i këtij viti, Ukraina vazhdimisht ka goditur asetet energjetike të Rusisë, në veçanti rafineritë e naftës dhe objektet e magazinimit, me dronët e saj që i ka prodhuar vetë, që kanë rreze të gjatë veprimi. Edhe pse ato janë caqe legjitime ushtarake brenda Rusisë, administrata Biden nuk ka shprehur mbështetje për sulme të tilla.

Gazeta britanike, Guardian, raportoi më 12 shtator se Londra veçse i ka dhënë dritën e gjelbër Ukrainës që të përdorë raketat e saj lundruese, Storm Shadow – të cilat mund të udhëtojnë deri në 250 kilometra – për sulme me rreze të gjatë veprimi thellë brenda territorit rus. Londrës i duhet të marrë leje nga Uashingtoni për këtë, pasi raketat kanë pjesë amerikane.

Duke i dhënë leje Ukrainës për përdorimin e Sistemit Raketor Taktik Ushtarak (ATACMS) – një raketë e fuqishme hipersonike, balistike, që mund të udhëtojë deri në 300 kilometra – për të shkatërruar asetet e ushtrisë ruse larg nga vija e frontit, do të ishte në linjë me modelin e vendosur nga administrata Biden që nga nisja e pushtimit të Ukrainës nga Rusia.

Administrata Biden fillimisht kishte refuzuar kërkesën e Ukrainës për tanket Abrams, për avionët luftarakë F-16 ,për Sistemin raketor të artilerisë me lëvizshmëri të lartë (HIMARS) dhe ATACMS, pjesërisht për shkak të shqetësimit se Rusia mund t’i shihte si provokim. Biden përfundimisht u dorëzua para këtyre kërkesave, pas rritjes së presionit nga Ukraina, aleatët dhe nga presioni brenda SHBA-së.

Më herët gjatë këtij viti, teksa forcat ruse u përqendruan pranë kufirit me qëllim që të ripushtonin Harkivin, qytetin e dytë më të madh të Ukrainës, administrata Biden zbuti politikën e saj dhe i lejoi Ukrainës që të përdorte raketat ATACMS për të sulmuar në zonat kufitare në Rusi, por jo thellë brenda territorit rus.

Bombat rrëshqitëse

Thirrja për lehtësimin e kufizimeve sa i përket sulmeve me rreze të gjatë veprimi është rritur gjatë këtij viti, përderisa Rusia po vazhdon të terrorizojë trupat ukrainase dhe qytetet përmes sulmeve me bombat e fuqishme rrëshqitëse, që vështirë detektohen nga radarët. Në qershor, Zelensky tha se Rusia po gjuante në Ukrainë deri në 3.000 bomba rrëshqitëse në muaj.

Sulmet nga ajri i pozicioneve ukrainase u ka mundësuar trupave tokësore ruse – megjithëse me kosto të madhe me jetë dhe pajisje – të fitojnë territor, duke kërcënuar qytetet kyçe logjistike, sikurse Pokrovsku.

Mbrojtja më e mirë kundër bombave rrëshqitëse është duke i shkatërruar avionët që i lëshojnë ato dhe duke i larguar këta avionë nga vijat e frontit, diçka që mund të arrihet duke sulmuar bazat ajrore, thanë ekspertët.

Por, Cancian pajtohet me deklaratën që bëri javën e kaluar sekretari amerikan i Mbrojtjes, Lloyd Austin, i cili tha se lehtësimi i kufizimeve nuk do të ndryshojë rrjedhën e luftës në favor të Ukrainës.

Cancian vuri në pah ndikimin e kufizuar që kanë pasur deri më tani armët perëndimore me rreze të gjatë veprimi në Krimenë e kontrolluar nga Rusia. Ukraina ka goditur me këto armë bazat ajrore dhe asete të tjera ushtarake të Rusisë në këtë gadishull. Përderisa, sulmet kanë dobësuar aftësitë e Moskës, ato nuk kanë qenë vendimtare për luftën, tha ai.

Ai shtoi se përdorimi i raketave precize me rreze të gjatë veprimi brenda Rusisë do ta bënte më të vështirë për Moskën që të kryejë sulme me bomba rrëshqitëse dhe do ta detyronte që të shpërndante selitë ushtarake dhe qendrat logjistike, duke bërë që operacioni i saj ushtarak të ishte më pak efikas.

“Nuk do ta ndryshonte lojën, por do të ndihmonte”, tha ai.

Kërcënimet e Putinit

Teksa u rrit momentumi gjatë kësaj jave lidhur me lehtësimin e kufizimeve, presidenti rus, Vladimir Putin, bëri paralajmërimin e tij të fundit ndaj Perëndimit lidhur me mbështetjen e Ukrainës. Ai tha se do ta shihte ndryshimin e një politike të tillë si “pjesëmarrje të drejtpërdrejtë” të shteteve të NATO-s në luftën në Ukrainë. Megjithatë, ai nuk tregoi se si do të reagonte.

Më 2022, Putin kishte lënë të kuptohej se do të përdorte armë taktike bërthamore, deklaratë që nxiti një përgjigje të menjëhershme negative në mbarë botën, përfshirë edhe nga vendet mike, sikurse India. Më herët gjatë këtij viti, pas ndryshimit të fundit të politikës së SHBA-së, Putin tha se Rusia mund të furnizojë me armë vdekjeprurëse kundërshtarët perëndimorë.

Deklarata të tilla të Putinit kanë ndikuar që administrata Biden të ketë një qasje të kujdesshme sa i përket furnizimit të Ukrainës me armë gjithnjë e më të sofistikuara, sikurse janë avionët luftarakë F-16, me raketa me rreze të gjatë veprimi dhe sa i përket lejimit të kryerjes së sulmeve brenda Rusisë. Disa ekspertë argumentojnë se kërcënimet e Putinit janë boshe, duke thënë se ai asnjëherë deri më tani nuk e ka çuar deri në fund ndonjë kërcënim dhe SHBA-ja nuk duhet t’i marrë parasysh këto kërcënime.

David Kramer, i cili ka shërbyer si ndihmëssekretar i Shtetit për Demokracinë, të Drejtat e Njeriut nga 2008 deri më 2009, gjatë një konference më 12 shtator deklaroi se Putini po e përdor kërcënimin bërthamor për të minuar vendosmërinë e Perëndimit, shkruan REL.

“Realisht, unë paralajmëroj kundër mbivlerësimit të mundësisë së përshkallëzimit bërthamor. Kjo është ajo që Putini dëshiron që ne të mendojmë. Le të mos biem pre e këtij provokimi”, tha Kramer, ekspert për Rusinë, i cili është drejtor ekzekutiv i Institutit George W.Bush. REL

Rrezikon 15 vjet burg- Vonoi zbarkimin e 147 emigrantëve, nis procesi kundër Matteo Salvinit

Historia daton në gusht 2019, kur OJQ-ja spanjolle, pasi shpëtoi 147 emigrantë në ngushticën e Siçilisë, qëndroi në det për disa ditë në pritje për t’u lejuar të zbarkonte.

“Rrezikon 15 vite burg, ka të drejtë të mbrohet, por nuk ka pasur të drejtë të bëjë atë që ka bërë”. Me këto fjalë Oscar Camps, themeluesi i OJQ-së spanjolle Open Arms, komenton qëndrimin e Matteo Salvinit para se të hynte në dhomën e bunkerit të burgut Pagliarelli në Palermo, ku sot filloi aktakuza e gjyqit në të cilin përballet lideri i Lidhjes dhe ministri aktual i Infrastrukturës, i akuzuar për rrëmbim dhe refuzim të akteve zyrtare, duke vonuar zbarkimin e 147 emigrantëve nga bordi i anijes së OJQ-së Open Arms në gusht 2019, kur ishte ministër i Brendshëm.

Në përgjigje, zëvendëskryeministri ka reaguar në rrjetet sociale ku shprehet: “Mbrojtja e kufijve nga emigrantët e paligjshëm nuk është krim”.

Por pikërisht në dhomën e bunkerit të burgut Pagliarelli në Palermo, ku Salvini nuk është i pranishëm, vendoset fati i liderit të Ligës së Veriut.

Prokurori publik do të përpiqet të argumentojë se si Salvini kishte kryer një “rrëmbim” duke vepruar “në kundërshtim me konventat ndërkombëtare dhe rregullat e brendshme në lidhje me shpëtimin në det dhe mbrojtjen e të drejtave të njeriut” duke “abuzuar me kompetencat që i janë besuar si autoritet kombëtar i sigurisë publike”.

Një nga pikat kyçe të gjyqit, ndoshta kryesorja, është ekspozuar nga prokurori publik Gery Ferrara në aktakuzë: “Kur Salvini bëhet Ministër i Brendshëm, vendimet për menaxhimin e zbarkimeve dhe lëshimin e POS-ve (zbarkimi leje, në një vend të sigurt) zhvendosen nga Departamenti i Lirive Civile dhe Emigracionit në kabinetin e ministrit dhe në veçanti është ministri ai që vendos”.

Gjyqi në vazhdim, saktësoi prokurori publik Ferrara, “nuk është një gjyq politik”.

Sipas prokurorisë, Salvini, i cili mohoi autorizimin për zbarkimin e të humburve, nuk kreu një akt politik, por një zgjedhje personale që shkonte përtej vijës qeveritare të ekzekutivit Conte 1, lidhur me rishpërndarjen e emigrantëve në Evropë. Një linjë e mohuar edhe nga kryeministri i atëhershëm Giuseppe Conte.

Në sallën e gjyqit, zëvendësprokurorja e Palermos Marzia Sabella gjatë aktakuzës, deklaroi se rreziku që në bordin e Open Arms të kishte prani të terroristëve mes të humburve të paidentifikuar ishte i pabazuar. Kjo sepse, shpjegoi Sabella, “askush nuk kishte hyrë në bord për të kontrolluar nëse kishte dokumente dhe së dyti është diskriminues dyshimi se mund të kishte terroristë vetëm nga kombësia e migrantëve”.

Si kreu i Ministrisë së Brendshme, Salvini “kishte detyrimin të tregonte një vend të sigurt për zbarkimin e emigrantëve nga anija “Open Arms”, tha zëvendësprokurorja e Palermos Marzia Sabella, duke nënvizuar kushtet “të tmerrshme” psikofizike të migrantëve në bordin e anijes.

Në fund të kësaj pjese të aktakuzës, avokatja Giulia Bongiorno, senatorja e Lidhjes dhe gjithashtu ministre në qeverinë Conte 1, komentoi jashtë sallës së gjyqit se kishte dëgjuar një aktakuzë “kundër një linje të qeverisë, jo kundër Salvinit”.

Për gazetarët, Bongiorno u shpreh se “prokurori publik po procedon me një aktakuzë kundër dekretit të sigurisë bis që është një akt i qeverisë dhe kundër vijës politike të rishpërndarjes së pari dhe më pas zbarkimit. Ai në fakt ka shprehur një gjykim sfidues të madh për këtë linjë, e realizuar nga e gjithë qeveria”.

Për avokatin që mbron zv.kryeministrin është “një aktakuzë disi kontradiktore sepse premisa është: nuk po hedhim në gjyq qeverinë, por dekreti bis i sigurisë është në kundërshtim me Kushtetutën”.

Në mbrojtje të Salvinit është edhe Antonio Tajani, zëvendëskryeministër dhe ministër i jashtëm aktual i Italisë.

“Salvini e ka kryer detyrën e tij si ministër. Jam i bindur se ka gjithmonë një gjyqtar që njeh korrektësinë e sjelljes së një ministri, detyra e të cilit është gjithashtu për të mbrojtur ligjshmërinë, dhe unë besoj se Salvini e ka bërë këtë”, tha ai.bw

Stoltenberg: NATO mund të kishte bërë më shumë për të parandaluar pushtimin e Ukrainës! Fundi i luftës do të arrihet vetëm në tryezën e bisedimeve

NATO mund të kishte bërë më shumë për të armatosur Ukrainën në përpjekje për të parandaluar pushtim rus në vitin 2022, ka deklaruar Sekretari i Përgjithshëm i aleancës, Jens Stoltenberg.

“Përderisa ne i ofrojmë mjete ushtarake teksa ndodhet në luftë, atëherë mund t’ia kishim siguruar për të parandaluar luftën”, tha kreu në largim i NATO-së për gazetën gjermane FAS.

Stoltenberg vuri në dukje hezitimin e Organizatës së Traktatit të Atlantikut të Veriut për të ofruar armët që Kievi kishte kërkuar përpara pushtimit të plotë nga Rusia për shkak të frikës se tensionet me Moskën do të përshkallëzoheshin.

Pas fillimit të luftës, Kievi, i cili nuk është anëtar i NATO-s, mori një sistem armësh nga aleatët e tij pas hezituan fillimisht.

Stoltenberg, ish-kryeministri i Norvegjisë, do të japë dorëheqjen në tetor nga roli i tij në NATO, të cilin e mban që nga viti 2014. Ish-kryeministri holandez Mark Rutte u shpall në qershor si kreu i ardhshëm i organizatës.

Në intervistë, Stoltenberg tha se fundi i luftës në Ukrainë do të arrihet vetëm në tryezën e bisedimeve.

“Për t’i dhënë fund kësaj lufte do të duhet të ketë sërish dialog me Rusinë në një fazë të caktuar. Por duhet të bazohet në forcën ukrainase,” tha ai.

Stoltenberg nuk pranoi të konfirmonte se do të merrte detyrën nga diplomati gjerman Christoph Heusgen si kryetar i Konferencës së Sigurisë së Mynihut pas largimit nga NATO. Ai tha për FAS se kishte “shumë opsione” dhe se do të banonte në Oslo. Panorama

Presidentja Osmani flet për kërcënimet e Vuçiçit: Tregojnë mendësinë e tij të vërtetë, do të përballet me institucionet e Kosovës

Presidentja Vjosa Osmani, ka folur për kërcënimet e presidentit serb, Aleksandar Vuçiç, i cili tha se nesër mund ta shpallë Kosovën një territor të pushtuar.

Osmani tha se Vuçiçi mund të shpallë çfarë të dojë, por tha se realiteti i përhershëm është se Kosova është dhe do të mbetet përherë shtet i pavarur, sovran, demokratik e që do fqinjësi të mirë me të gjitha shtetet në rajon.

“Shpresoj që këto fjalë të Vuçiçit, që tregojnë mendësinë e tij të vërtetë, që është trashëgimi e Millosheviqit, po dëgjohen nga bota mbarë, në veçanti nga disa që po shpresojnë se ai derisa e mban lëkurën e qengjit, nuk është ujku përbrenda”.

“Në fakt, është i njëjti njëri, që ka qenë ministër i Propagandës së Millosheviqit, që ka menduar vetëm si t’i sulmojë e t’i shkatërrojë të tjerët. Kjo është logjika e vetme që mbizotëron në politikën e Serbisë për momentin dhe shpresoj që sa më parë që ta shohim dhe ta pranojmë këtë realitet, edhe shumë nga miqtë tanë në Evropë, aq më parë dhe aq më shumë do të kontribuojnë për paqen afatgjate në rajonin tonë”, tha Osmani në Edicionin Special.

Tutje, Osmani e paralajmëroi presidentin serb se çka do që mund të synojë, do të përballet me vendosmërinë e institucioneve të Kosovës.

“Fytyra e vërtetë e Vuçiçit është ajo që i kërcënon shtetet fqinje me okupim. Nuk ka Vuçiç tjetër, nuk ka Vuçiç pro-paqe, por ka Vuçiç që shkakton destabilitet, që do ta kthej rajonin prapa, por assesi nuk do ta lejojmë”.

“Çka do që mund të synojë, do të përballet me vendosmërinë e institucioneve të Kosovës sepse nuk ka kthim mbrapa, nuk lejojmë kthim prapa”, tha ajo.bw

Intervista e Osmanit për gazetën gjermane Tagesspiegel: Sa më pak Serbia t’i përmbahet marrëveshjeve, aq më shumë mbështetje financiare merr nga BE-ja

Presidentja e Kosovës, Vjosa Osmani ka dhënë një intervistë për gazetën gjermane Tagesspiegel, derisa ndodhet aty pasi pranoi çmimin “M100 Media Award”. Osmani në intervistën për gazetën gjermane ka folur për marrëveshjen me Serbinë, trajtimin e pakicës serbe nga Republika e Kosovës, ndikimin e Rusisë në ballkan, për raportet e Kosovës me Bashkimin Europian si dhe për ndikimin në raportet SHBA-Kosovë, nga një fitore potenciale e Donald Trump.

Çka tha Osmani?

Në pyetjen e gazetës se “a mund të ndryshojë disponimi dhe Kosova të kthehet drejt lojtarëve të tjerë si Rusia apo Kina që po përpiqen të zgjerojnë ndikimin e tyre në Ballkan?”

Osmani ka thënë se ka vetëm një rrugë për Kosovën, ajo është integrimi në BE dhe NATO, duke shtuar se Kosova nuk flirton me aktorë të këqinj.

“Vendi im nuk flirton me aktorë të këqij. Ne kurrë nuk kemi kërkuar askund tjetër dhe kurrë nuk do të bëjmë. Mbi 90 për qind e njerëzve në Kosovë janë pro integrimeve euroatlantike. Siguria që popullsia është kaq e qartë prapa nesh për këtë çështje e bën edhe punën tonë si politikanë më të lehtë”.- është shprehur Osmani.

Sa i përket një konflikti të mundshëm ndërmjet Kosovës e Serbisë, Osmani është shprehur se Kosova nuk e ka sulmuar kurrë Serbinë, por e kundërta. Duke përmendur edhe Banjskën.

“Kosova kurrë nuk e sulmoi Serbinë, por u mbrojt. Në shtator të vitit 2023, 25 vjet pas përfundimit të luftës, Serbia kreu një akt agresioni kundër Kosovës kur trupat pranë presidentit kaluan kufirin tonë. Në atë kohë, Këshilli i Sigurisë Kombëtare i SHBA foli për një zhvillim që kërcënonte të destabilizonte të gjithë rajonin e Ballkanit Perëndimor. Kjo nuk duhet të ndodhë më. Kosova është shtet sovran brenda kufijve të saj aktual. Ky është një realitet i pakthyeshëm”.

“Tërheqja e Serbisë nga marrëveshja”

Osmani ka thënë se BE-ja duhet ta sqaroj nëse “ekziston” marrëveshja ndërmjet Kosovës dhe Serbisë, apo jo, pasi sipas saj Serbia është tërhequr nga marrëveshja.

“Kosova është e përkushtuar ndaj procesit të dialogut të udhëhequr nga BE-ja dhe të mbështetur nga SHBA. Në vitin 2023, negociatat e BE-së arritën një marrëveshje, të ashtuquajturën Marrëveshja e Ohrit, e cila përmban angazhime për të dyja palët. Fatkeqësisht, Serbia së fundmi u tërhoq nga kjo marrëveshje. Qeveria serbe thotë se ata nuk e konsiderojnë atë një kontratë ligjërisht të detyrueshme dhe nuk do ta zbatojnë atë. BE-ja tani duhet të sqarojë nëse ka një marrëveshje apo jo.”

Osmani foli edhe për rolin e BE-së në dialogun Kosovë-Serbi. Ajo kritikoi ashpër Bashkimin Europian për trajtim të pabarabartë

“Fatkeqësisht, si Kosovë ne e dimë mirë se të dy palët në këtë proces nuk trajtohen në mënyrë të barabartë.” – u shpreh ajo.

Ajo e thelloi edhe më tej kritikën ndaj BE-së duke thënë se “sa më pak Serbia t’i përmbahet marrëveshjeve, aq më shumë mbështetje financiare merr nga BE-ja. Është koha që paratë e BE-së të shkojnë paralelisht me vlerat e BE-së.”

Sa i përket trajtimit të pakicës serbe në Kosovë dhe proklamimit të Vuçiq për keqtrajtim të tyre, Osmani ka krahasuar metodën e Vuçiç me atë të Putin, kur ky i fundit “po rregullonte” terrenin për invaszon në Ukrainë.

“Fakti është: OSBE, Organizata për Bashkëpunim të Sigurisë në Evropë, ka një nga misionet e saj më të mëdha në Kosovë dhe është marrë me të drejtat e pakicave që nga viti 1989. Raportet e tyre tregojnë një rënie të vazhdueshme të krimeve kundër serbëve në Kosovë, si dhe të krimeve ndëretnike në përgjithësi.” – tha Osmani

Osman gjithashtu iu përgjigj pyetjes për ndikimin e mundshëm në raportet ShBA-Kosovë, nëse në krye të Shteteve të Bashkuara të Amerikës vjen Donald Trump.

“Kosova është me fat që ka mbështetje dypartiake nga Shtetet e Bashkuara. Ne u bëmë të lirë nën Presidentin Bill Clinton, një demokrat, dhe të pavarur nën udhëheqjen e George W. Bush, një republikan. Është gjithashtu detyra ime si president të bind qeverinë amerikane se Kosova dhe Ballkani Perëndimor luajnë një rol të rëndësishëm për sigurinë në Evropë.” – ka thënë Osmani.

Ndryshe, Osmani e ka pranuar çmimin për media të njohur si “M100 Media Award” në Potsdam të Gjermanisë.

Asaj çmimin ia dha ish-ministri i Mbrojtjes në Gjermani gjatë luftës së fundit në Kosovë, Rudolf Scharping.

“M100 Media Award” i është ndarë presidentes Osmani nga bordi këshilldhënës i “M100 Sanssouci Colloquium”, një konferencë kjo ndërkombëtare e gazetarëve që mbahet çdo vit në Postdam të Gjermanisë, nga viti 2005.

Anëtar i Bordit është edhe Wolfgang Ischinger, ish emisar i BE-së për Kosovën në bisedimet post Ahtisaari mes Kosovës e Serbisë.

“Shqiptarët e Kosovës përjetuan dhimbjen që sot kanë ukrainasit”, Vjosa Osmani nderohet me çmimin “M100 Media Award” në Gjermani

Presidentja e Kosovës, Vjosa Osmani është nderuar me çmimin M100 Media Award, çmim që u jepet personaliteteve që janë të përkushtuar për forcimin e demokracisë, sundimin e ligjit, lirisë së shprehjes dhe lirisë së shtypit dhe mbrojtjes së vlerave evropiane.

Në fjalën e saj Osmani dha mesazhe kundër luftës e kundër diktaturës, derisa u shpreh se liderët duhet të sigurohen që fëmijët të mos i përjetojnë kurrë tmerret që gjeneratat e mëhershme i kanë përkujtuar.

“Falemnderit, cfarë nderi për popullin e Kosovës së pari… më vjen keq që s’mund ta therm fjalimin në gjermanisht. Të qëndrosh para jush dhe të shohësh kampionë të demokracisë është një nder një që më më përul thellësisht. Mbrëmë e lexova në një libër, ku shoshte “çdo gjeneratë e fëmijëve i ofron njerëzimit një mundësi të rë për rindërtimin e rrënojave në botë”. Më kujtoi që gjenerata e fëmijëve në Kosovë, është gjenerata e parë që do rritet pa luftë. Duhet të sigurohemi që kurrë mos ta dijnë çfarë do të thotë e kundërta e paqes, e demokracisë, të sigurohemi që të mos i kalojnë ato që i kemi kaluar ne”, tha ajo.

“Vetëm vitin e kaluar, isha e ulur në audiencë duke parë teksa po i jepnit çmimin M100 popullit të Ukrainës. Paraprakisht u shfaq një video. Një që përshkruan dhimbjen, vuajtjen, shkatërrimin e njerëzve të pafajshëm dhe shtëpive të stërgjyshërve të tyre, por gjithashtu tregon guximin, vendosmërinë dhe qëndrueshmërinë e ukrainasve për të luftuar për të lirinë dhe demokracinë, me çdo gjë që duhet”, është shprehur Osmani.

Më tej, ajo ka theksuar se shqiptarët e Kosovës e ndjejnë dhimbjen që sot ukrainasit e përjetojnë.

“Por siç ndodh me të gjithë që vijnë nga Kosova, kur shikojmë këto video të Ukrainës, nuk është thjesht një ndjenjë e largët apo për ndonjë nocion abstrakt i normave të së drejtës ndërkombëtare dhe domosdoshmërisë për mbrojtjen e tyre. Për ne, është një tmerr i rijetuar, një dhimbje e ndjerë vazhdimisht, një plagë shumë e thellë, por një plagë që nuk na ka penguar kurrë të bëhemi të mbijetuar që lulëzuan”.

“Ne ishim në vendin e tyre, ishim në pozitën e tyre, pamë shkatërrimin dhe vuajtjen që sjell e kundërta e demokracisë, prandaj sot jemi kaq të përkushtuar, kaq të palëkundur dhe kaq të vendosur për të luftuar çdo betejë dhe për ta paguar me çdo çmim sigurimin e mbijetesës dhe suksesit”.bw

Thirrja e Erdoganit: Rusia t’i kthejë Krimenë, Ukrainës

Erdogan theksoi se Turqia nuk e kishte njohur kurrë aneksimin e Krimesë, për të cilën ai tha se kishte përkeqësuar gjendjen e banorëve të rajonit.

Integriteti territorial i Ukrainës u mbështet nga presidenti turk, Recep Tayyip Erdogan, duke bërë thirrje për kthimin e rajonit të Krimesë, të cilin Rusia e ka në pronësi që nga viti 2014.

Konkretisht, presidenti turk, në një video-mesazh drejtuar Samitit të Liderëve të Platforma e Krimesë, nënvizoi se kthimi i Krimesë në Ukrainë është një kërkesë e së drejtës ndërkombëtare.

“Mbështetja jonë për integritetin territorial, sovranitetin dhe pavarësinë e Ukrainës është e palëkundur. Kthimi i Krimesë në Ukrainë është një kërkesë e ligjit ndërkombëtar”, tha Erdogan, duke nënvizuar qëndrimin e Turqisë kundër aneksimit të Krimesë nga Rusia në 2014.

Ai iu referua gjithashtu dhimbjes që pësuan tatarët e Krimesë, vuajtjet e të cilëve vazhdojnë për tetë dekada.

Ai falënderoi gjithashtu presidentin ukrainas Volodymyr Zelensky dhe udhëheqësin e tatarëve të Krimesë Mustafa Abdulcemil Kirimoglu për organizimin e samitit, i cili shënon 80 vjetorin e dëbimit të tatarëve të Krimesë.

Erdogan theksoi se Turqia nuk e kishte njohur kurrë aneksimin e Krimesë, për të cilën ai tha se kishte përkeqësuar gjendjen e banorëve të rajonit dhe nënvizoi të drejtën e tatarëve të Krimesë për të jetuar “të lirë, të sigurt dhe në paqe në atdheun e tyre”.

Në përfundim të fjalës së tij, Erdogan shprehu dëshirën për t’i dhënë fund luftës në Ukrainë përmes një paqeje të drejtë dhe të qëndrueshme, të bazuar në integritetin territorial dhe pavarësinë e vendit.bw

Faqja 2 prej 98‹ Prapa 123 4 5 6 Para ›Fundi »

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL