Dhjetë ditë pas vrasjes së 14-vjeçarit Martin Cani pranë shkollës 9-vjeçare “Fan Noli” në Tiranë, nga autori i dyshuar, M. Përlleshaj, dhimbjes së pakufijshme të familjes dhe trishtimit të madh që përfshiu opinionin publik, i është shtuar edhe dyshimi i fortë mbi mos-reagimin, madje edhe akuza më të rënda për fshehje të krimit, nga ana e institucioneve arsimore dhe ato ligjzbatuese.

Të paktën tre protesta qytetare para Ministrisë së Arsimit nuk e kanë luajtur aspak këtë institucion të marrë masa ose më së paku të tregojë nëse ka zhvilluar një hetim administrativ dhe cilat janë konkluzionet e mundshme mbi stafin pedagogjik dhe drejtuesit e shkollës.

Nën parimin “gjithçka harrohet shpejt”, Ministrja Ogerta Manastirliu dhe bashkëpunëtorët e saj po paraqesin në media plane e projekte për rritjen e sigurisë në shkolla, pa thënë më parë se çfarë dështoi në rastin e vrasjes së 14-vjeçarit.

Por, kur ka kaluar më shumë se një javë nga ngjarja tragjike, akuzat më të rënda publike po ngrihen mbi institucionet ligjzbatuese, Policinë në radhë të parë, e më tej Prokurorinë.

Për ngjarjen, tashmë është arrestua M. Përlleshaj, si autor i dyshuar. Por, të dhëna publike, të deklaruara nga aktorë të dorës së parë në ngjarje, flasin edhe për më së paku një autor tjetër, po 14-vjeçar.

Në sherrin mes të miturve, krahas vrasjes së M. Canit, ka mbetur i plagosur edhe një miku i tij, L. M., i cili prej ditësh qëndron në regjim spitalor. Babai i të plagosurit, por edhe vetë i dëmtuari i mitur, kanë deklaruar që në ditët e para se në sherr ka qenë edhe një goditës i dytë, K. Bekaj, gjithashtu 14-vjeçar.

Ky deklarim është një akuzë shumë e rëndë për Policinë, për atë të Tiranës, por edhe për Drejtorinë e Përgjithshme.

Pas gjithë këtyre ditëve, Policia nuk rezulton të ketë kryer veprime hetimore ndaj këtij personazhi që dyshohet si “goditës i dytë” me thikë.

Madje, në një reagim pas deklaratave publike të babait të djaloshit të plagosur, Policia reagoi në mënyrë cinike dhe kërcënuese.

“Policia e Shtetit vëren se burime të caktuara janë angazhuar në një fushatë mediatike dizinformimi, lidhur me vrasjen e 14-vjeçarit nga një bashkëmoshatar i tij, në një distancë rreth 200 metra nga shkolla “Fan Noli” në Tiranë”, u tha në një deklaratë të lëshuar në datën 24 nëntor, pa përmendur se “burime të caktuara dizinformimi” në fakt janë vetë i plagosuri dhe babai i tij.

Partia Demokratike në opozitë akuzoi Drejtorin e Përgjithshëm të Policisë, Ilir Proda, se po fsheh autorin e dytë të dyshuar, pasi prindërit e tij punojnë në SPAK dhe BKH.

Nuk është hera e parë për Policinë që gjendet nën akuza publike për fshehje krimesh, prishje vendngjarjesh e të tjerë.

Si rregull, veprimet e Policisë, edhe ato të dyshimtat, verifikohen dhe kontrollohen nga Prokuroria.

Në rastin konkret, prokuroria e Tiranës dhe prokurorja e çështjes, Alma Felaj, kanë mbajtur heshtje publike, nën argumentin e “zhvillimit të hetimeve” dhe “kryerjes së ekspertizave”.

Vrasja tragjike e M. Canit nuk ka elementë të sekretit hetimor. Ngjarja ka ndodhur në sy të shumë njerëzve, pjesa më e madhe e tyre të mitur të shkollës “Fan Noli”.

Policia, ashtu edhe Prokuroria, i kanë që ditën e parë emrat e personave të përfshirë, kanë dinamikën e ngjarjes, siç e ka edhe publiku, nëpërmjet dëshmive të shumë dëshmitarëve okularë.

Prokuroria ka në dorë të tregojë nëse Policia e ka fshehur ngjarjen, nëse ka shmangur persona nga përgjegjësia penale dhe, nëse ka ndodhur diçka e tillë, për cilat arsye ka vepruar në këtë mënyrë.

Por, nga ana e prokurorisë po mbahet një “heshtje peshku”, duke shtuar më shumë dyshimet se ka element të rëndësishëm të krimit që po mbahen të fshehur dhe po mbulohen.

Një postulat akademik thotë që “drejtësia jo vetëm duhet të jepet, por edhe të duket që po jepet”. Në rastin e 14-vjeçarit, M. Cani, deri më tani, “drejtësia nuk duket se po jepet”.

Ndoshta është shpejt, por gjaku i 14-vjeçarit u tha, shoqëria në përgjithësi, por sidomos prindërit nuk po arrijnë të kalojnë traumën. Ndaj, akuzat publike për “fshehje autorësie” kanë nevojë për një përgjigje. Sot, jo nesër!/Boldnews.al