Alicia Kearns, deputete e Britanisë së Madhe, ka shprehur publikisht pakënaqësinë e saj për paralajmërimet e Bashkimit Evropian drejtuar Kosovës. Paralajmërimet kanë të bëjnë me pasojat e mundshme negative nëse Qeveria e Kosovës vazhdon në mënyrë të njëanshme në rihapjen e urës së Ibrit.
Në një postim në Twitter, Kearns tha se tmerruar në lidhje me paralajmërimet e BE-së për “masa të mëtejshme nëse Ura e Ibrit rihapet”.
“E dëshpëruar të shoh se BE-ja kërcënon Kosovën me masa të mëtejshme negative nëse Ura e Ibrit rihapet. Kjo është rënë dakord në vitin 2015 me datën e zbatimit në vitin 2017 – pse është e ndryshme nga marrëveshjet e tjera të mëparshme që BE-ja e detyron Kosovën të mbajë?”, tha ajo ndër të tjera.
Kearns kritikoi më tej qëndrimin e BE-së, duke argumentuar se Qeveria e re e Mbretërisë së Bashkuar dhe lidershipi aktual i BE-së duhet të mbështesin përpjekjet për të “ndërtuar ura në Kosovë, jo pengesa dhe ndarje”.
Ajo theksoi atë që ajo e percepton si një standard të dyfishtë në qasjen e BE-së, duke vënë në dukje se BE-ja ende nuk ka ndërmarrë veprime kundër Serbisë për sulmin në Banjskë të Zveçanit me 24 shtator.
“Qeveria e re e Mbretërisë së Bashkuar dhe ekipi i ri i BE-së duhet të bëjnë të qartë se mbështesin ndërtimin e urave në Kosovë, jo bllokimet e rrugëve dhe ndarjen. BE-ja ende nuk ka ndërmarrë ndonjë veprim kuptimplotë kundër Serbisë, pavarësisht provave të shumta që lidhin Milan Radoicic dhe sulmuesit e Banjskës me shtetin serb. Të ndëshkosh Kosovën për hapjen e një ure, duke injoruar Banjskën, sugjeron se vetë procesi është thellësisht i padrejtë dhe ka nevojë për reforma urgjente”, tha deputetja britanike më tej. sn