VOAL

Izraeli rihapet, ndërsa të dhënat tregojnë se vaksina Pfizer funksionon

February 24, 2021

Me gati gjysmën e popullsisë së Izraelit të vaksinuar me të paktën njërën dozë të vaksinës Pfizer-BioNTech, Ministria e Shëndetësisë e Izraelit po raporton rezultate edhe më të mira se ato të marra nga provat klinike të kompanisë Pfizer. Izraeli, i cili kryeson botën në përqindjen e popullsisë së vaksinuar, shkëmben të dhënat mjekësore me kompaninë Pfizer. Siç njofton korrespondetja e Zërit të Amerikës, Linda Gradstein nga Jeruzalemi, lajmi i mirë vjen ndërsa pjesa më e madhe e ekonomisë izraelite u rihap gjatë fundjavës.

Qendrat tregtare të Izraelit u hapën për herë të parë pas muajsh kufizimesh dhe bllokimesh për shkak të koronavirusit. Një numër i kufizuar i njerëzve lejohen brenda dyqaneve.

Vende të tjera, si hotelet dhe palestrat, janë të hapura vetëm për izraelitët që mbajnë ato që quhen “Pasaportat e Gjelbërta”, të cilat tregojnë se ata kanë marrë dy doza të vaksinës COVID-19, ose që e kanë kaluar virusin.

Mati Ariel është pronare e shtatë palestrave në të gjithë vendin ku janë regjistruar mijëra anëtarë. Të gjitha palestrat kanë qenë të mbyllura për pjesën më të madhe të vitit të kaluar dhe punëtorët e saj kanë qenë me leje pa rrogë.

“Po i motivojmë njerëzit të vaksinohen sepse ata duan të rikthehen në palestër. Por ka shumë njerëz që nuk mund të vaksinohen, si të rinjtë nën 16 vjeç, të cilët sipas rregullave nuk mund të vaksinohen dhe kështu po ndëshkohen. Ata me të vërtetë kanë nevojë për palestrën, për shëndetin e tyre fizik dhe mendor”, thotë zonja Ariel.

Hyrja në palestra është vetëm një nga stimujt e vaksinimit që u ofrohet të rinjve izraelitë, të cilët kanë qenë më të gatshëm sesa të moshuarit për të marrë pjesë në fushatën masive të vaksinimit të vendit. Tel Avivi dhe qytete të tjera kanë ofruar birrë joalkoolike, falafel dhe pica falas së bashku me vaksinën që bëhet në të njëjtin vend.

“Erdha të bëj vaksinën kundër COVID-19. Bashkia e Tel Avivit pati një ide interesante, për t’i tërhequr të rinjtë që ta bëjnë vaksinën në lokal dhe t’u japin birrë falas“, thotë Yaara Maimon, banore e Tel Avivit.

Përpjekja intensive dymujore e Izraelit për vaksinimin ka treguar rezultate mbresëlënëse për vaksinën Pfizer, sipas një deklarate të fundit të Ministrisë së Shëndetësisë. Si pjesë e marrëveshjes me të cilën Izraeli bleu vaksina të mjaftueshme për të gjithë popullsinë e tij, Izraeli ra dakord të shkëmbejë të dhënat e tij me kompaninë Pfizer.

“Shohim se efektiviteti është ai që u deklarua në studimet e kompanive Pfizer dhe Moderna, rreth 95 përqind. Dhe për sa i përket njerëzve të pranuar në spital, është edhe më shumë se kaq. Mbrojtja është e fortë”, thotë Ronni Gamzu, ish-koordinator kombëtar për koronavirusin.

Ministria e Shëndetësisë e Izraelit thotë se pas marrjes së dy dozave të vaksinës, rreziku i sëmundjes nga koronavirusi për izraelitët ra me 98.5%, dhe rreziku për t’u shtruar në spital ulet me pothuajse 99%.

Por edhe me këto statistika, zyrtarët izraelitë të shëndetësisë thonë se rihapja e vendit duhet të jetë graduale dhe se mbajtja e maskës dhe distancimi fizik do të vazhdojnë në të ardhmen.

twitter
Follow
facebook
linkedin

Fjalë kyçe: Izraeli

Komentet

Cancel reply

Lajme të ngjashëm

Teherani: Cecilia Sala ka shkelur ligjet e Republikës Islamike

VOAL- Njëmbëdhjetë ditë pas arrestimit, i cili u bë më 19 dhjetor, Irani konfirmoi zyrtarisht të hënën se Cecilia Sala ndodhet në një burg në vend (është Evin, red.). Këtë e ka bërë të ditur agjencia shtetërore IRNA, duke cituar një deklaratë të Departamentit të Përgjithshëm të Mediave të Huaja të Ministrisë së Kulturës dhe Orientimit Islamik. Akuza ndaj gazetarit italian është shumë gjenerike: “ka shkelur ligjet e Republikës Islamike të Iranit”. Duhet theksuar se hetimet janë ende në vazhdim.

Ambasadorja italiane në Teheran Paola Amadei u takua të dielën me zëvendësministren e Punëve të Jashtme, një takim ballë për ballë, përmbajtja e të cilit pak u zbulua dhe u përkufizua si “ndërlidhëse”.

Edhe nëse nuk konfirmohet zyrtarisht, lidhja me arrestimin në Malpensa më 16 dhjetor me kërkesë të Shteteve të Bashkuara të Mohammed Abedini Najafabadi, 38-vjeçari iranian me banim në Zvicër, i cili përmes një kompanie kuti letrash në EPFL në Lozanë, thuhet se ka kontribuar në ardhjen e teknologjisë iraniane të përdorur nga Pasdaran për dronët e tyre, kështu që do të kishte shkelur sanksionet e vendosura nga Uashingtoni. Gjatë fundjavës, Departamenti Amerikan i Shtetit deklaroi shprehimisht se ndalimi i Cecilia Sala do të ishte një hakmarrje iraniane për atë të Abedinit.

Ndaj loja luhet jo vetëm në aksin mes Romës dhe Teheranit, por nëse fatet e Sala dhe Abedinit lidhen edhe në atë mes Romës dhe Uashingtonit, i cili tashmë ka kërkuar ekstradimin e 38-vjeçarit. Megjithatë, drejtësisë italiane mund t’i duhen disa muaj për të marrë një vendim përfundimtar.

Ndërkohë, avokati i Abedinit, Alfredo De Francesco, ka bërë të ditur kërkesë për të kërkuar arrest shtëpiak për klientin e tij.RSI

Dy presidentë dhe trazira, çfarë e pret Gjeorgjinë?

Ka pasur thashetheme se presidentja në largim e Gjeorgjisë, Salome Zurabishvili, nuk do të pranonte të largohej nga pallati presidenciale edhe pas inaugurimit të pasuesit të saj.

Në fund, kjo gjë nuk ndodhi. Zurabishvili, e cila është bërë zëri moral për mijëra protestues antiqeveritarë, vendosi të tërhiqet paqësisht dhe shpejt, por natyrisht jo edhe qetësisht.

Derisa Mikheil Kavelashvili, ish-futbollist dhe populist i krahut të djathtë, po betohej si lider i ri i vendit më 29 dhjetor, Zurabishvili mbajti fjalim para protestuesve opozitarë pranë ndërtesës së pallatit presidencial.

Teksa po largohej nga pallati presidencial, Zurabishvili tha se ajo vazhdon të jetë ende “presidentja e vetme legjitime” e Gjeorgjisë.

Ajo e përsëriti se Kavelashvili, i cili u emërua nga një kolegj elektoral i mbizotëruar nga partia në pushtet, Ëndrra Gjeorgjiane, është president “i paligjshëm”.

Kërkesa kryesore, tha Zurabishvili para turmës, është që vendi të mbajë zgjedhje të reja parlamentare.

Zgjedhjet e 26 tetorit sollën mospajtimin kryesor politik në Gjeorgji, pasi protestuesit opozitarë dolën në rrugë për të protestuar menjëherë pasi Ëndrra Gjeorgjiane e shpalli fitoren.

Opozita dhe vëzhguesit ndërkombëtarë kanë thënë se zgjedhjet nuk ishin as të lira e as të drejta, për shkak të dyshimeve për parregullsi që ia mundësuan fitoren partisë në pushtet.

Ta bindësh Qeverinë gjeorgjiane të mbajë zgjedhje të reja nuk do të jetë e lehtë. Derisa zyrtarët e Ëndrrës Gjeorgjiane e pranuan se kishte ca shkelje, partia, e cila është akuzuar për minimin e demokracisë, ka ngulur këmbë se zgjedhjet ishin të lirë dhe të drejta.

Kryeministri i Gjeorgjisë, Irakli Kobakhaidze, ka thënë se arsyet ligjore për thirrjen e zgjedhjeve të reja janë shterur.

Një marrëvshje mund të jetë e mundshme, mbase nëse Zurabishvili heqë dorë nga pretendimi se ajo është shefja e ligjshme e shtetit në këmbim të zgjedhjeve të reja dhe amnistisë për protestuesit e burgosur apo akuzuar për vepra penale.

Megjithatë, për partinë në pushtet mbajtja e zgjedhjet e reja do të ishte garë e rrezikshme, posaçërisht kundër një opozite të porsamobilizuar dhe plot pasion.

Qeveria e Gjeorgjisë gjithashtu do të jetë nën trysni të shtuar ndërkombëtare. Më 27 dhjetor, Shtetet e Bashkuara njoftuan vendosën sanksione të reja ndaj miliarderit të lidhur me Moskën, Bidzina Ivanishvili, ish-kryeministër dhe themelues i partisë Ëndrra Gjeorgjiane, për minimin e demokracisë së Gjeorgjisë për “përfitim të Federatës Ruse”.

Në fillim të dhjetorit, Shtetet e Bashkuara vendosën regjim vizash për disa ministra të Qeverisë dhe zyrtarë të forcave të rendit.

Bashkimi Evropian ka ndjekur të njëjtën linjë, duke vendosur regjim vizash për zyrtarët gjeorgjianë që mbajnë pasaporta diplomatike. Blloku ka ngrirë gjithashtu 30 milionë euro nga mbështetje financiare për Ministrinë e Mbrojtjes së Gjeorgjisë.

Protesta të vazhdueshme

Më sfiduese për Qeverinë sesa sanksionet ndërkombëtare do të jetë trysnia nga protestat.

Protestat, të cilat u ndezën sërish në nëntor kur Qeveria njoftoi shtyrjen e bisedimeve për anëtarësimin në BE, nuk po tregojnë asnjë shenjë dobësimi.

Para ceremonisë së inaugurimit më 29 dhjetor, protestuesit antiqeveritarë në Gjeorgji formuan një “zinxhir uniteti” njerëzor, i cili u shtri rreth qendrës së Tbilisit. Protesta edhe më të mëdha priten në ditët në vazhdim.

Nëse autoritetet gjeorgjiane e vazhdojnë shtypjen brutale ndaj protestuesve, ose nëse vendosin madje ta burgosin Zurabishvilin, kjo mund të çojë në më shumë trazira civile dhe pasiguri politike.

Para inaugurimit, kryeministri i Gjeorgjisë, Irakli Kobakhidze, foli për arrestimin e 72-vjeçares nëse ajo nuk pranon të largohet nga pallati presidencial.

Ky do të ishte veprim i rrezikshëm për Qeverinë e Gjeorgjisë, sepse do t’i rriste protestat në rrugë dhe do ta izolonte edhe më shumë vendin ndërkombëtarisht.

Autoritetet gjeorgjiane mund të zgjedhin thjesht të presin, duke parapëlqyer ngërçin politik dhe duke u mbrojtur nga sfidat ligjore të opozitës.

Derisa Zurabishvili thotë se ka biseduar me presidentin e zgjedhur amerikan, Donald Trump, nuk është e qartë se si administrata e tij, e cila pritet të ndjekë një politikë të jashtme më izoluese, do të reagojë.

Gjeorgjia gjithashtu po hyn në sezonin e festave, me festimin e Vitit të Ri më 31 dhjetor, Krishtlindjen Ortodokse më 7 janar dhe Vitin e Ri Ortodoks një javë më vonë. Pa dyshim, Qeveria do të shpresojë që gjeorgjianët të zgjedhin të qëndrojnë në shtëpitë e tyre me familjet e tyre, sesa të dalin në rrugë duke sfiduar të ftohtit.

Radio Evropa e Lirë

Përgatiti: Ekrem Idrizi

Drejtori i OBSH-së bën thirrje për ndaljen e sulmeve ndaj spitaleve në Gazë

Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, ka bërë thirrje të hënën që të ndalen sulmet ndaj spitaleve në Rripin e Gazës, pasi Izraeli e sulmoi një dhe e bastisi një tjetër rishtazi.

“Spitalet në Gazë janë bërë përsëri fushëbetejë, ndërsa sistemi shëndetësor është në rrezik shumë të madh”, tha Tedros në një postim në X.

“Ne e përsërisim: Ndalni sulmet ndaj spitaleve. Njerëzit në Gazë kanë nevojë për qasje në kujdes mjekësor. Humanitarët kanë nevojë për qasje për të ofruar ndihmë mjekësore. Armëpushim!” shtoi ai.

Ushtria izraelite tha se militantët e Hamasit ishin në shënjestër të një sulmi të saj në spitalin Al Wafa në qytetin Gaza të dielën, ku mbrojtja civile palestineze raportoi se humbën jetën shtatë njerëz.

Hamasi është i shpallur organizatë terroriste nga Shtetet e Bashkuara dhe Bashkimi Evropian.

Forcat izraelite i arrestuan gjithashtu mbi 240 palestinezë, përfshirë dhjetëra anëtarë të stafit mjekësor nga spitali Kamal Adwan të premten, përfshirë edhe drejtorin Hussam Abu Safiya, sipas autoriteteve shëndetësore në enklavë dhe ushtrisë izraelite.

Ushtria izraelite pretendoi se spitali po përdorej si qendër komanduese për operacionet ushtarake të Hamasit dhe se të arrestuarit dyshohet se janë militantë. Ajo shtoi se Abu Safiya u mor në pyetje nën dyshimin se është operativ i Hamasit.

Tedros kërkoi lirimin e menjëhershëm të Abu Safiyas dhe tha se spitali Al-Ahli gjithashtu ishte përballur me sulme.

Ai shtoi se OBSH-ja dhe partnerët kanë shpërndarë furnizime bazike mjekësore, ushqim dhe ujë, në spitalin indonezian të Gazës dhe se i transferuan 10 pacientë në gjendje të rëndë në spitalin Al Shifa. Gjatë transferimit, katër pacientë u arrestuan, tha ai.

“Ne i bëjmë thirrje Izraelit të garantojë që nevojat dhe të drejtat shëndetësore të këtyre njerëzve të respektohen”, tha Tedros.

Lufta në Gazë filloi kur militantët e Hamasit e sulmuan Izraelin jugor më 7 tetor 2023, ku i vranë rreth 1.200 njerëz, kryesisht civilë, dhe i rrëmbyen afër 250 të tjerë.

Prej atëherë, lufta hakmarrëse e Izraelit në Gazë i ka lënë të vdekur mbi 45.000 palestinezë, shumica e të cilëve gra dhe fëmijë, sipas Ministrisë së Shëndetësisë në Gazë. REL

Rrëzohet avioni i Azerbajxhanit, presidenti akuzon hapur Rusinë

VOAL- “Sistemet e luftës elektronike e nxorën avionin tonë jashtë kontrollit” dhe sërish “bishti u dëmtua nga zjarri që vinte nga toka”: këto janë fjalët e presidentit të Azerbajxhanit, Ilham Aliyev, i cili sot, të dielën, në një intervistë në televizionin publik tha. zbuloi disa detaje në lidhje me Aeroplanin Embraer 190 të Azerbajxhanit, i cili u rrëzua të mërkurën në Kazakistan pasi tentoi të ulej në aeroportin e Groznit (Çeçeni, Federata Ruse). 38 persona humbën jetën në aksident.

“Sigurisht që versioni përfundimtar do të jetë i qartë pas ekzaminimit të kutive të zeza. Megjithatë, edhe teoritë fillestare janë mjaft të arsyeshme dhe të bazuara në fakte. Faktet janë se avioni civil i Azerbajxhanit u dëmtua nga jashtë mbi territorin rus, pranë qytetit të Grozny, dhe pothuajse humbi kontrollin. Ne gjithashtu e dimë se sistemet e luftës elektronike e kanë nxjerrë avionin tonë jashtë kontrollit. Ky ishte goditja e parë në aeroplan. Në të njëjtën kohë, për shkak të zjarrit që vinte nga toka, edhe bishti i avionit u dëmtua rëndë”, tha kreu i shtetit, sipas transkriptit të siguruar nga APA, agjencia e lajmeve e qeverisë së Azerbajxhanit.

“Rusia donte ta mbulonte çështjen”

“Fakti që trupi i avionit është plot me vrima tregon se teoria e aeroplanit që godet një tufë zogjsh, e cila është paraqitur nga dikush, është krejtësisht jashtë axhendës,” shtoi Aliyev. “Për fat të keq, megjithatë, disa qarqe në Rusi preferuan të parashtronin këtë teori. Një moment tjetër i pakëndshëm dhe befasues për ne ishte se agjencitë zyrtare ruse hodhën teori për shpërthimin e një bombole gazi në bordin e avionit. Me fjalë të tjera, kjo tregoi qartë se pala ruse donte të mbulonte çështjen, e cila, natyrisht, është e pahijshme për askënd – shpjegoi më tej presidenti i Azerbajxhanit. Sigurisht që avioni ynë u godit rastësisht. Natyrisht nuk mund të flasim për një akt të qëllimshëm terrori. Prandaj, pranimi i fajit, kërkimi i menjëhershëm i faljes ndaj Azerbajxhanit, i cili konsiderohet një vend mik, dhe informimi i publikut janë të gjitha masat dhe hapat që duhet të ishin ndërmarrë. Fatkeqësisht, për tre ditët e para, nuk dëgjuam asgjë nga Rusia, përveç disa teorive absurde”.

Presidenti, sipas APA, tha: “Më lejoni të ritheksoj se pasi të ekzaminohen regjistruesit e fluturimit dhe të marrim informacion më të detajuar, do të zbulohet tabloja e plotë e asaj që ka ndodhur dhe do të sqarohen shumë pyetje që mbeten pa përgjigje sot. Për shembull, pse avioni nuk u ul në Grozny? Në çfarë mase ndikuan sistemet e luftës elektronike në kontrollet e avionëve? Sa ishte shkalla e dëmtimit të shkaktuar nga sulmi dhe shpërthimi pranë avionit? Më duhet gjithashtu të theksoj se përpjekjet për të mohuar faktet e qarta ose për të mashtruar njerëzit janë të pakuptimta dhe absurde.”

Lavdërime për pilotët

“Unë e vlerësoj shumë performancën e tyre (të pilotëve), profesionalizmin dhe përkushtimin e tyre”, deklaroi Presidenti Ilham Aliyev. “Pilotët demonstruan profesionalizëm dhe heroizëm, duke kontrolluar në mënyra të ndryshme avionin jashtë kontrollit. Natyrisht, ata ishin pilotë me përvojë dhe e dinin se nuk do t’i mbijetonin dot këtij ulje emergjente. Megjithatë, ata treguan një heroizëm të madh për të shpëtuar pasagjerët dhe falë tyre ka të mbijetuar nga ky aksident avioni. Falë tyre nuk u dogj një pjesë e trupit të avionit dhe falë tyre sot mund të themi qartë se avioni u rrëzua nga Rusia”, vuri në dukje presidenti.

Kërkesa për Rusinë

Më pas Aliyev shtoi: “Ne i kemi shprehur qartë kërkesat tona palës ruse. Këto kërkesa janë komunikuar zyrtarisht më 27 dhjetor. Nga çfarë përbëhen ato? Së pari, pala ruse duhet t’i kërkojë falje Azerbajxhanit. Së dyti, ai duhet të pranojë fajin e tij. Së treti, përgjegjësit duhet të ndëshkohen, të sillen në gjyq dhe të ketë dëmshpërblim për shtetin e Azerbajxhanit, si dhe për pasagjerët dhe anëtarët e ekuipazhit të dëmtuar. Këto janë kushtet tona. I pari ishte i kënaqur dje. Shpresoj që të pranohen edhe kushtet e tjera. Të gjitha këto kërkesa janë të drejta. Nuk ka kërkesa apo çështje të jashtëzakonshme; e gjithë kjo bazohet në përvojën ndërkombëtare dhe sjelljen normale njerëzore”. RSI

Vetëm dy të mbijetuar pas rrëzimit të avionit me 181 persona në bord

Vetëm dy persona i kanë mbijetuar rrëzimit të avionit në Korenë e Jugut, thanë zyrtarët.

Avioni me 181 persona në bord, teksa po tentonte të ulej, preku pistën, u kaplua nga flakët dhe më pas u përplas për një mur në Aeroportin Ndërkombëtar Muan të Koresë së Jugut. Për shkak të këtij aksidenti ajror, në këtë shtet janë shpallur shtatë ditë zie.

Dy anëtarë të ekuipazhit, një burrë dhe një grua, u shpëtuan nga pjesa e bishtit të avionit, tha zëdhënësi i zjarrfikësve në Korenë e Veriut, Lee Jung-hyun, duke shtuar se është arritur që të shuhet zjarri.

Avioni shkoi në Korenë e Jugut nga Bangkoku i Tajlandës tentoi të ulej në pistë pak pas orës 09:00, sipas kohës lokale, në aeroportin në jug të Seulit, tha Ministria jugkoreane e Transportit.

Autoritetet thanë se dy nga pasagjerët e këtij avioni ishin shtetas të Tajlandës, ndërkaq pjesa tjetër besohet se ishin nga Koreja e Jugut.

Ky është aksidenti më i rëndë ajror ku është përfshirë një kompani ajrore jugkoreane në tri dekadat e fundit.

Avioni i përfshirë nga flakët. 29 dhjetor 2024.

Në videot e publikuara në rrjetet sociale mund të shihej avioni i llojit Boeing 737-800 duke rrëshqitur në pistë dhe nuk dukej se ka pajisje për ulje, para se të përplasej në një mur dhe të shpërthejë në flakë.

Dy anëtarët e ekuipazhit, që i mbijetuan aksidentit, po trajtohen në spitale dhe autoritetet thanë se ata janë jashtë rrezikut për jetë.

Disa orë pas rrëzimit, familjarët e pasagjerëve u mblodhën në aeroport, teksa atyre u janë dhënë letra që të shkruajnë detaje për familjarët e tyre.

Ky është aksidenti më i rëndë ajror ku është përfshirë një kompani jugkoreane që nga viti 1997, kur një avion i Korean Air u rrëzua në Guam, duke lënë të vrarë më shumë se 200 persona.

Hetuesit po shikojnë nëse faktorët e rrëzimit të avionit mund të jenë goditjet nga zogjtë apo kushtet atmosferike, tha Lee. Agjencia e lajmeve Yonhap citoi autoritetet e aeroportit të kenë thënë se goditjet nga zogjtë mund të kenë shkaktuar mosfunksionimin e pajisjeve për uljen e avionit.

Kulla e Kontrollit kishte lëshuar një paralajmërim për goditje nga zogjtë pak pasi pilotët shpallën emergjencë brenda fluturakes, tha një zyrtar i Ministrisë së Transportit, duke mos specifikuar nëse avioni ishte goitur nga zogjtë.

Pothuajse një minutë pasi pilotët njoftuan për situatën, ata nisën përpjekjen e tyre të dështuar për t’u ulur, tha zyrtari.

Agjencia News1 raportoi se një pasagjer i kishte dërguar mesazh një familjari të tij, duke thënë se një zog kishte goditur krahun e avionit.

Avioni Boeing 737-800, që operohej nga Jeju Air, ishte prodhuar më 2009. Shefi ekzekutiv i Jeju Air kërkoi falje për aksidentin dhe gjatë një adresimi televiziv ai u përkul për të shprehur keqardhje. Ai tha se ende nuk dihet shkaku i rrëzimit, duke shtuar se fluturakja nuk kishte pasur asnjë aksident të mëparshëm dhe nuk kishte tregues se kishte ndonjë problem në avion dhe tha se do të bashkëpunojë me autoritetet për hetimet.

Kur avioni u largua nga aeroporti i Bangkokut, Suvarnabhumi, nuk ishte raportuar për kushte anormale, tha presidenti i aeroporteve të Tajlandës, Kerati Kijmanawat.

E themeluar më 2005, kompania Jeju Air është një kompani ajrore me kosto të ulët që operon në rrugët ndërkombëtare për në Japoni, Tajlandë dhe Filipine, si dhe kryen fluturime të shumta brenda Koresë së Jugut. REL

Të paktën 127 të vdekur pas rrëzimit të avionit në Korenë e Jugut

Të paktën 127 persona kanë vdekur teksa një avion pasagjerësh, teksa po ulej preku pistës, u kaplua nga flakët dhe u përplas për një mur në Aeroportin Ndërkombëtar Muan të Koresë së Jugut, thanë autoritetet.

Avioni shkoi në Korenë e Jugut nga Bangkoku i Tajlandës me 181 persona në bord dhe tentoi të ulej pak pas orës 09:00, sipas kohës lokale, në aeroportin në jug të Seulit, tha Ministria jugkoreane e Transportit.

Ky është aksidenti më i rëndë ajror ku është përfshirë një kompani ajrore jugkoreane në tri dekadat e fundit dhe është aksidenti më vdekjeprurës, sipas autoriteteve në Seul.

Në videot e publikuara në rrjetet sociale mund të shihet avioni i llojit Boeing 737-800 duke rrëshqitur në pistë dhe nuk duket se ka pajisje për ulje, para se të përplaset në një mur dhe të shpërthejë në flakë.

Autoritetet tani kanë nisur të kërkojnë në zonat përreth për trupa të mundshëm të pasagjerëve.

Dy anëtarët e ekuipazhit po trajtohen në spitale me lëndime nga mesatare deri të rënda, thanë autoritetet.

Disa orë pas rrëzimit, familjarët e pasagjerëve u mblodhën në aeroport, teksa atyre u janë dhënë letra që të shkruajnë detaje për familjarët e tyre.

Pothuajse një minutë pasi pilotët njoftuan për situatën, ata nisën përpjekjen e tyre të dështuar për t’u ulur, tha zyrtari.

Agjencia News1 raportoi se një pasagjer i kishte dërguar mesazh një familjari të tij, duke thënë se një zog kishte goditur krahun e avionit.

Në mesin e pasagjerëve ishin dy shtetas të Tajlandës, ndërkaq pjesa tjetër besohet se janë nga Koreja e Jugut, tha Ministria e Transportit në Seul.

Kur avioni u largua nga aeroporti i Bangkokut, Suvarnabhumi, nuk ishte raportuar për kushte anormale, tha presidenti i aeroporteve të Tajlandës, Kerati Kijmanawat.

“U endëm për rreth 2 orë në ajër”, dëshmi tronditëse nga rrëzimi i avionit në Kazakistan: Piloti tentoi tri herë ulje emergjente

Aykhan Bayramzada është një nga 29 të mbijetuarit nga rrëzimi i aeroplanit të Azerbajxhan Airlines në Kazakistan të mërkurën, ku humbën jetën 38 persona.

Ai ka dhënë një deklaratë për mediat vendase në lidhje me aksidentin e ndodhur më 25 dhjetor.

“Ishte hera ime e parë që udhëtoja me avion, por nuk shkoi siç duhej. Mbaj mend që pilotët tentonin të zbrisnin avionin në pistë, disa herë, por nuk mundeshin. Ne e ndjemë se diçka nuk po shkonte mirë , ekuipazhi na lajmëroi se duhet të bënim një ulje emergjent” tha Bayramzada.

Sipas të dhënave të marra , pavarësisht kërkesave te pilotit për ulje emergjente, avioni i dëmtuar nuk është lejuar të zbresë në aeroportet ruse, dhe është urdhëruar të fluturojë përmes detit Kaspik në drejtim të Aktau.

Aeroportet e Makhachkala dhe Mineralnye refuzuan avionin, dhe sistemet elektronike ruse bllokuan komunikimin me kullat e kontrollit. bw

Izraeli arreston drejtorin e një spitali në veri të Gazës

Spitali Kamal Adwan në Gazë.

Ushtria izraelite ka arrestuar një drejtor të një prej spitaleve të pakta funksionale në veri të Gazës, teksa sulmet ajrore gjatë natës në këtë enklavë kanë vrarë nëntë persona, përfshirë fëmijë, thanë zyrtarët shëndetësorë palestinezë më 28 dhjetor.

Ministria e Shëndetësisë në Gazë tha se mjeku Hussam Abu Safiya, drejtor i spitalit Kamal Adwan, u arrestua nga forcat izraelite së bashku dhe dhjetëra pjesëtarë të tjerë të stafit dhe u dërguan në një qendër për marrje në pyetje. Ministria tha se trupat izraelite hyn në spital dhe detyruan shumë pjesëtarë të stafit dhe pacientë që të dilnin jashtë.

Izraeli ende nuk ka komentuar për këtë rast. Por, një ditë më parë mohoi se ka hyrë në spital, megjithatë e pranoi se ka urdhëruar që njerëzit të dilnin jashtë objektit duke thënë se po kryente operacione kundër infrastrukturës së Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – dhe militantëve në atë zonë.

Ushtria izraelite vazhdimisht ka pretenduar se Hamasi operon brenda spitalit Kamal Adwan, por nuk ka ofruar dëshmi. Zyrtarët spitalorë kanë mohuar këto pretendime të Izraelit.

Ky spital është goditur disa herë në tre muajt e fundit nga Izraeli, teksa ushtria e këtij shteti po vazhdon ofensivën në pjesën veriore të Gazës kundër Hamasit. Më herët gjatë javës, zyrtarët spitalorë thanë se nga një sulm ajror u vranë pesë pjesëtarë të stafit.

Në fushatën pothuajse 15-mujore ushtarake të Izraelit, sistemi shëndetësor i Gazës ka pësuar dëme të mëdha. Organizata Botërore e Shëndetësisë tha se bastisja në Kamal Adwan e ka “nxjerr jashtë funksionit” spitalin e fundit të madh funksional në veri të Gazës, duke thënë se “ky terror duhet të marrë fund dhe sistemi shëndetësor duhet të mbrohet”.

Autoritetet shëndetësore palestineze thanë se pacientët e spitalit janë zhvendosur në një spital aty pranë ku situata “është jashtëzakonisht e vështirë”.

Lufta në Gazë nisi në tetorin e kaluar, pasi Hamasi sulmoi jugun e Izraelit duke vrarë afër 1.200 persona dhe duke rrëmbyer 250 të tjerë. Si pasojë e fushatës ushtarake izraelite, në Gazë janë vrarë më shumë se 45.000 palestinezë, shumica gra dhe fëmijë, dhe janë plagosur më shumë se 108.000 të tjerë. REL

Putini i thotë Azerbajxhanit se mbrojtja ajrore ruse ishte e aktivizuar kur u rrëzua avioni

Presidenti rus, Vladimir Putin, i tha udhëheqësit të Azerbajxhanit, Ilham Aliyev, tha se mbrojtja ajrore ruse ishte e aktivizuar për të zmbrapsur një sulm të supozuar me dronë nga Ukraina, teksa avioni i kompanisë Azerbaijan Airlines, tentoi të ulej në qytetin rus të Groznit.

Megjithatë, Putin nuk tha nëse mbrojtja ajrore ruse ishte përgjegjëse për rrëzimin e avionit.

“Gjatë kësaj kohe, Grozni, qyteza e Mozdokut dhe Vlladiavkazit ishin duke u sulmuar nga dronët luftarakë ukrainas dhe mbrojtja ajrore ruse ishte duke i zmbrapsur këto sulme”, i tha Putini Aliyevit, sipas Kremlinit.

Avioni me pasagjerë i kompanisë Azerbaijan Airlines, u rrëzua më herët gjatë javës afër Aktaut të Kazakistanit, duke vrarë 38 nga 67 personat në bord dhe spekulimet u shtuan se rrëzimi u shkaktua nga sistemet kundërajrore ruse që ishin në gatishmëri për shkak të sulmeve ruse me dronë në rajonin e Çeçenisë, para se avioni të ndryshonte rrugën. Grozni është kryeqyteti i rajonit rus të Çeçenisë.

Më 27 dhjetor, ligjvënësi azerbajxhanas Hikmat Babaoghlu ka thënë se ka “shumë mundësi” se rrëzimi i një avionit u shkaktua nga sistemet e mbrojtjes ajrore të Rusisë që ishin në gatishmëri për sulme ukrainase me dronë.

“Kjo është vetëm një mundësi, por një mundësi shumë e madhe, dhe vëzhgimet dhe përfundimet e nxjerra deri tani mbështesin idenë se rrëzimi i avionit nga goditja me armë është më pranë të vërtetës”, tha ai.

Po të njëjtën ditë, zëdhënësi i Shtëpisë së Bardhë, John Kirby, tha se ekspertët amerikanë “kanë parë disa tregues që thonë se ka mundësi që avioni të jetë rrëzuar nga sistemet ruse të mbrojtjes ajrore”.

Provat përfshijnë pamje nga brenda avionit apara rrëzimit, imazhe ku shfaqen vrima në bishtin e avionit pas rrëzimit, dëshmitë e të mbijetuarve dhe dëshmitë që lënë të kuptohet se dyshohej për një sulm me dronë në kohën kur aeroplani u përpoq të aterojë në Grozni.

Reuters ka cituar një burim në Azerbajxhan të ketë thënë se rezultatet e hetimeve thonë se avioni u godit nga sistemi Pantsir-S, i Rusisë.

Rrëzimi i avionit ka shkaktuar pengesa në trafikun ajror në Kaukaz dhe përtej. Më 27 dhjetor, një avion i Azerbaijan Airlines, që u nis nga Bakuja drejt qytezës ruse Mineranli Vodi, jo shumë larg Groznit, papritur u kthye mbrapsht pasi pranoi informacione se hapësira ajrore ruse ishte mbyllur. Më vonë kompania ajrore tha se ka pezulluar fluturimet drejt disa qyteteve ruse. REL

Osamu Suzuki, manjati japonez i industrisë së automobilave vdes në moshën 94-vjeçare

Manjati japonez i biznesit dhe ish-presidenti i “Suzuki Motor Corporation”, Osamu Suzuki, ka vdekur në moshën 94-vjeçare, njoftoi sot kompania.

Ai shërbeu si president, kryetar ose shef ekzekutiv i “Suzuki Motor Corporation” që nga viti 1978.

Në shkurt 2021, kompania japoneze e prodhimit të automjeve njoftoi se Suzuki do të tërhiqej nga posti në qershor 2021 dhe do të bëhej këshilltar.

Me më shumë se tre dekada si kreu i kompanisë, Suzuki raportohet të jetë një nga liderët më jetëgjatë në industrinë globale të automobilave.

Suzuki vlerësohet për transformimin e “Suzuki Corporation” në një nga kompanitë më të mëdha të prodhimit të makinave të vogla në botë. bw

Seuli: Ukraina ka zënë rob një ushtar verikorean

Agjencia e spiunazhit e Koresë së Jugut tha se ka konfirmuar që një ushtar i Koresë së Veriut, që ka luftuar në anën e Rusisë në luftën kundër Ukrainës, është kapur nga forcat ukrainase.

Pheniani ka dislokuar mijëra trupa për të ndihmuar ushtrinë ruse, përfshirë në rajonin kufitar të Kurskut ku Ukraina nisi një ofensivë të befasishme në gusht.

“Përmes ndarjes së informacioneve në kohë reale me një agjenci të inteligjencës të një shteti aleat është konfirmuar se një ushtar i plagosur i Koresë së Veriut është zënë rob”, tha përmes një deklarate më 27 dhjetor Shërbimi Kombëtar i Inteligjencës i Koresë së Jugut.

Ky njoftim i Seulit vjen disa ditë pasi presidenti ukrainas, Volodymyr Zelensky, tha se pothuajse 3.000 ushtarë të Koresë së Veriut janë “vrarë ose plagosur” që kur u janë bashkuar në luftime trupave ruse.

Shërbimi i inteligjencës i Seulit paraprakisht ka thënë se numri i ushtarëve të vrarë apo të plagosur verikorean është 1.000, duke shtuar se ky numër i lartë i viktimave mund të jetë për shkak se ushtarët e Phenianit janë të pafamiljarizuar me fushëbetejën dhe nuk kanë aftësi që të zmbrapsin sulmet me dronë.

Koreja e Veriut dhe Rusia kanë forcuar lidhjet e tyre ushtarake që kur Moska nisi pushtimin në shkallë të plotë të Ukrainës në shkurt të vitit 2022.

Në qershor të këtij viti, dy shtetet nënshkruan edhe një pakt për mbrojtje të përbashkët.

Aleatët e Ukrainës e kanë cilësuar përfshirjen e Phenianit në luftën e Rusisë kundër Ukrainës si “zgjerim të rrezikshëm” të konfliktit. REL

Njëzet vjet nga cunami që shkaktoi vdekjen e 230 mijë njerëzve

Një grua fshin lotët gjatë ceremonisë përkujtimore me rastin e 20 vjetorit të cunamit në Oqeanin Paqësor, në Banda Aceh, Indonezi, më 26 dhjetor, 2024/AP

VOA

BANDA ACEH, Indonezi – Familjarë e të afërm të viktimave të tsunamit u mblodhën për t’u lutur dhe vizituar varrezat masive në qytetin Banda Aceh të Indonezisë së enjten për të përkujtuar 20 vjetorin e cunamit në Oqeanin Paqësor, një prej katastrofave më të mëdha natyrore në historinë moderne.

Shumë prej të pranishmëve qanin ndërsa vendosnin lule në varrin masiv në fshatin Ulee Lheue, ku ndodhen mbi 14,000 viktima të paidentifikuara të cunamit. Kjo është një prej varrezave masive në Banda Aceh, kryeqytetin e njërës prej krahinave veriore të Indonezisë, që ishte edhe njëri prej vendbanimeve më të goditura nga tërmeti prej 9.1 shkallësh dhe cunamit masiv që e shkaktoi ai.

“Na mungojnë dhe ende nuk e dimë se ku janë. E tëra që dimë është se çdo vot e vizitojmë varrin masiv në Ulee Lhue dhe në Siron”, thotë Muhamad Amirudin, i cili humbi dy fëmijtë e tij para 20 vitesh deh kurrë nuk i gjeti trupat e tyre.

Tërmeti i fuqishëm në afërsi të ishullit indonezian Sumatra më 26 dhjetor të vitit 2004, nxiti cunamin që shkaktoi vdekjen e rreth 230,000 njerëzve në disa shtete, përfshirë disa prej tyre në Afrikën Lindore. Rreth 1.7 milionë njerëz u zhvendosën si pasojë, shumica në katër vendet që u goditën më së shumti: Indonezi, Shri Lankë, Indi dhe Tajlandë.

Mbi 170 mijë njerëz humbën jetën vetëm në Indonezi.

Ndonëse 20 vite kaluan që nga kjo ngjarje, të mbijetuarit në Indonezi ende po vajtojnë për të dashurit që i humbën kur valët gjigande rrafshuan ndërtesat deri në kryeqytetin Banda Aceh.

Qindra njerëz u mblodhën për të marrë pjesë në lutje në Xhaminë Baiturrahman në qendër të kryeqytetit. Sirenat kumbuan nëpër tërë qytetin për tre minuta për të shënuar kohën kur goditi tërmeti.

Infrastruktura në Banda Aceh është rindërtuar dhe tani është më e qëndrueshme se atëherë kur goditi cunami. Sistemi i paralajmërimit të hershëm tani është vendosur në zonat bregdetare për t’i paralajmëruar banorët për rreziqet nga cunami.

Rindërtimi është mundësuar me mbështetjen e donatorëve dhe organizatave ndërkombëtare, të cilat kontribuan fonde të konsiderueshme për të ndihmuar në rimëkëmbjen e rajonit.

Shkollat, spitalet dhe infrastruktura thelbësore, të cilat u shkatërrua gjatë kësaj katastrofe, u rindërtuan.

Në Tajlandë, banorët u mblodhën në një ceremoni përkujtimore në Ban Nam Khem, një fshat peshkimi në krahinën Phang Nga, i cili ishtë ndër vendbanimet e goditura më së shumti nga valët vdekjeprurëse në këtë shtet.

Cunami shkaktoi vdekjen e mbi 8 mijë njerëzve në Tajlandë, përfshirë ata që ende figurojnë të zhdukur, duke lënë një plagë të thellë në historinë e këtij vendi. Rreth 400 trupa ende nuk janë identifikuar.

Të afërmit e viktimave qajtën dhe përfaquan njëri-tjetrin ndërsa vendosën lule në monumentin përkujtimor. Rreth 300 banorë u bashkuan në një ceremoni modeste lutjesh muslimane, të krishtera dhe budiste.

Njëra nga të pranishmet, Urai Sirisuk tha se ajo shmang gjatë tërë vitit parkun përkujtimor pranë detit për shkak të tronditjes së humbjes së vajzës së saj 4 vjeçe.

“E kam ndjenjën që deti më mori fëmijën tim. Jam shumë e zemëruar në të. Nuk mund as ta fus më këmbën në det”, thotë ajo.

Por, thotë ajo, “ende e dëgjoj zërin e saj në veshët e mi, që po më thërret. Nuk mund t’ia kthej shpinën. Andaj më duhet të qëndroj këtu, për vajzën time”.

Në Indi, qindra banorë u mblodhën në plazhin Marina në qytetin jugor Chennai në krahinën Tamil Nadu. Ata derdhën qumësht në det për t’i qetësuar zotërat dhe dhuruan lule e lutje për të vdekurit ndërkohë që daullet kumbonin.

Sipas të dhënave zyrtare, 10,749 persona humbën jetën në Indi, përfshirë 7,000 banorë të krahinës Tamil Nadu.

“Kaluan 20 vite që kur goditi cunami”, tha 69 vjeçarja Sadayammal. “Jemi këtu për të shprehur respektin për njerëzit që humbën jetën”.

Në Shri Lankë, të mbijetuarit dhe familjarët e viktimave të cunamit u mblodhën në fshatin bregdetar Pereliya dhe vendosën lule në monumentin përkujtimor që përkujton 2,000 udhëtarët që humbën jetën kur treni – ‘Queen of the Sea’ – me të cilin po udhëtonin u godit nga valët. Vetëm disa dhjetëra prej tyre besohet se mbijetuan.

Anura Ranjith iu bashkua turmës për të përkujtuar motrën e tij, Anula Ranjani dhe vajzën e saj 9 vjeçare, që udhëtonin me tren. Ai kurrë nuk dëgjoi më për fatin e tyre.

“Me vite i kam kërkuar gjithandej dhe ende nuk kam ndonjë informacion për to. E ndjej një pikëllim të thellë dhe dhimbje për humbjen e tyre. Ende po vajtoj”, thotë ai.

Mbi 35,000 njerëz humbën jetën nga cunami në Shri Lankë. Banorët e këtij vendi mbajtën dy minuta heshtje të enjten për të përkujtuar ata që nuk janë më.